ខេត្តសៀមរាប៖លោក បូរ ប៊ុនថន (ហៅចាន់ ថន) នាយកប្រតិបត្តិនៃគេហទំព័រសារព័ត៌មាន«ដើមរាំង» កំពុងរៀបចំ ភស្តុតាងនិងសាក្សី ដើម្បីប្ដឹងសុំកិច្ចអន្តរាគមន៍ ទៅក្រសួងពាក់ព័ន្ធ ជាពិសេស គឺសម្ដេច ហ៊ុន សែន នាយករដ្ឋមន្ត្រីនៃកម្ពុជា ក្នុងបំណងស្នើសុំមេធាវី សម្ដេចតេជោ ដើម្បីជួយការពារក្ដី នឹងសុំកិច្ចអន្តរាគមន៍ លើបណ្ដឹងរបស់លោកឧត្ដមសេនីយ៍ត្រី ខាត់ សារ័ត្ន នាយប៉ុស្តិ៍នគរបាល ច្រកទ្វារព្រំដែនអន្តរជាតិបាវិត ដែលបានប្ដឹងលោក បូរ ប៊ុនថន (ហៅចាន់ថន) នាយកប្រតិបត្តិនៃគេហទំព័រ«ដើមរាំង»ទៅនាយកដ្ឋានព័ត៌មានវិទ្យា នៃអគ្គលេខាធិការដ្ឋាន ក្រសួងមហាផ្ទៃ ពីបទ៖ បរិហារកេរ្តិ៍ជាសាធារណៈ និងបទ៖ ញុះញង់ឱ្យមានការរើសអើង។
ការសុំអន្តរាគមន៍ទៅក្រសួងពាក់ព័ន្ធ ជាពិសេស គឺសម្ដេច ហ៊ុន សែន នាយករដ្ឋមន្ត្រីនៃកម្ពុជា ក្នុងបំណងស្នើសុំមេធាវី សម្ដេចតេជោ ដើម្បីជួយការពារក្ដី ពីសំណាក់ លោក បូរ ប៊ុនថន (ហៅចាន់ ថន) ដោយដោយផ្អែកថា៖ «សារព័ត៌មានដើមរាំង» បានផ្សាយមានប្រភពច្បាស់លាស់ «មិនបំពានសិទ្ធអ្នកដទៃ មិនបំភ្លៃការពិត» មិនឡាយហ្វេសប៊ុកជេរប្រមាថគេឯងនោះឡើយ ពោលគឺ«ដើមរាំង»ផ្សាយនៅលើទំព័រព័ត៌មានស្របច្បាប់គោរពតាមក្រមសីលធម៌និងវិជ្ជាជីវៈ ច្បាប់ស្ដីពីរបបសារព័ត៌មាន។ នេះបើតាមសារព័ត៌មានដើមរាំងបានចេញផ្សាយនៅថ្ងៃទី២២ ខែកក្កដា ឆ្នាំ២០២២នេះ។
ក្នុងលិខិតរបស់នាយកដ្ឋានព័ត៌មានវិទ្យា នៃអគ្គលេខាធិការដ្ឋាន ក្រសួងមហាផ្ទៃ បានកោះហៅលោក ចាន់ ថន ឲ្យចូលបំភ្លឺ នៅព្រឹក ថ្ងៃទី០១ ខែសីហា ឆ្នាំ២០២២ខាងមុខនេះ។
ករណីបែបនេះលោក ចាន់ ថន បានថ្លែងថា៖ ខ្ញុំមិនរត់ទៅណាទេ ហើយខ្ញុំនឹងចូលបំភ្លឺតាមការបរិច្ឆេទ ដោយភ្ជាប់មកជាមួយ ភស្ថតាង សាក្សី សម្រាប់បំភ្លឺជូននាយកដ្ឋាន។ លោក ចាន់ ថន ថា៖ ខ្ញុំភ្ញាក់ផ្អើលយ៉ាងខ្លាំង ក្រោយទទួលបានលិខិតកោះហៅបំភ្លឺរបស់នាយកដ្ឋានព័ត៌មានវិទ្យា នៃអគ្គលេខាធិការដ្ឋាន ក្រសួងមហាផ្ទៃ។
ក្នុងសារព័ត៌មានដើមរាំង លោក ចាន់ ថន បានលើកឡើងបន្តថា៖ លុះខលសួរលោកវរសេនីយ៍ទោ ថុន គីមថេង ទើបដឹងថា៖ លោកឧត្ដមសេនីយ៍ត្រី ខាត់ សារ័ត្ន ជាដើមចោទនិងជាអ្នកប្ដឹង។
បើតាមលោក ចាន់ ថន បណ្ដឹងនេះធ្វើឡើង បន្ទាប់ពីគេហទំព័រ«ដើមរាំង» ចេញផ្សាយ កាលពីថ្ងៃទី០៣ ខែកក្កដា ឆ្នាំ២០២២ ដែលមានចំណងជើងថា៖«ធ្លាយអំពើពុករលួយធ្ងន់ធ្ងរ ដែលនគរបាល ច្រកទ្វារព្រំដែនអន្តរជាតិបាវិត គាបយកលុយពីអ្នកដំណើរបានរាប់ម៉ឺនដុល្លារក្នុង១ថ្ងៃៗ»។
ក្នុងខ្លឹមសារនៃអត្ថបទនោះ គឺបានដកស្រង់សម្ដីការលើកឡើងពីអ្នកដំណើរ ចេញចូលពីកម្ពុជា ទៅវៀតណាម និងពីវៀតណាម មកកម្ពុជា។ ដោយថា៖ ពួកគាត់បានបង់លុយ ជូនមន្ត្រីនគរបាលច្រកទ្វារព្រំដែនអន្តរជាតិបាវិត ជាថ្នូរនិង បោះត្រាលើលិខិតឆ្លងដែន{ប៉ាស្ព័រ} ។ខណៈអ្នកអត់{ប៉ាស្ព័រ} ត្រូវបង់លុយអស់ច្រើនចាប់ ពី៧៥$ ទៅ១០០$ក្នុងម្នាក់ៗ សម្រាប់ការចេញចូល ឆ្លងដែនទៅវៀតណាម មួយជើងៗ។
លោក ចាន់ ថន ក៏បានចាត់ទុកការប្ដឹងរបស់លោកឧត្ដមសេនីយ៍ ខាត់ សារ័ត្ន នៅពេលនេះ គឺជាការអាងអំណាច តួនាទី.បុណ្យស័ក្ដិធំ ប្ដឹងបំបាក់ស្មារតីអ្នកសារព័ត៌មានផងដែរ ដែលហ៊ានផ្សាយការពិត លើកយកនូវភាពអសកម្ម ក្នុងការអនុវត្តតួនាទីរបស់ខ្លួន មកបង្ហាញជាសាធារណៈ ក៏ដូចជាការជូនព័ត៌មាន ទៅថ្នាក់ដឹកនាំ ក្នុងន័យរិៈគន់ដើម្បីស្ថាបនាតែប៉ុណ្ណោះ ស្រពេលដែលអ្នកដំណើរ រិៈគន់រឿងមន្ត្រី នៅច្រកទ្វារព្រំដែនអន្តរជាតិបាវិត ប្រព្រឹត្តអំពើពុករលួយ។
លោក ចាន់ ថន អះអាងទៀតថា៖ ក្នុងអត្ថបទនោះ បានព្យាយាមសុំការបកស្រាយពីលោក ប្រាក់ អង្គាវិសាល នាយរងប៉ុស្តិ៍នគរបាលច្រកទ្វារព្រំដែនអន្តរជាតិបាវិត ប៉ុន្តែលោកបដិសេធមិនបកស្រាយ ហើយ ក៏បានព្យាយាមសុំលេខ លោក ខាត់ សារ័ត្ន ដើម្បីបំភ្លឺផងដែរ ប៉ុន្តែលោក ប្រាក់ អង្គាវិសាល មិនបានផ្ដល់ឱ្យ។
ក្នុងនោះ «ដើមរាំង» ក៏បានបញ្ជាក់ដែរថា៖ រឿងរ៉ាវនេះ គ្រាន់តែទទួលព័ត៌មានច្បាស់ការណ៍ តែម្ខាងប៉ុណ្ណោះ «ដើមរាំង» មិនធ្វើការសន្និដ្ឋានថា ជាការពិតឬយ៉ាងណានោះទេ.? ហើយ«ដើមរាំង» រង់ចាំបកស្រាយបំភ្លឺ ពីសាម៉ីខ្លួនរៀងរាល់ម៉ោងធ្វើការ ដើម្បីផ្សាយលម្អិតនៅលេខក្រោយទៀត។ ប៉ុន្តែរហូតមកទល់និងពេលនេះ មិនមានការបកស្រាយបំភ្លឺពីសាម៉ីខ្លួន ឬចេញលិខិតបដិសេធ ស្នើឱ្យ«ដើមរាំង»ផ្សាយបំភ្លឺឡើងវិញឡើយ។ ស្រាប់តែលោកឧត្ដមសេនីយ៍ត្រី ខាត់ សារ័ត្ន នាយប៉ុស្តិ៍នគរបាលច្រកទ្វារព្រំដែនអន្តរជាតិបាវិត អាងអំណាចតួនាទី បុណ្យស័ក្ដិធំ ប្ដឹងលោក ចាន់ ថន ទៅនាយកដ្ឋានព័ត៌មានវិទ្យា រំលងច្បាប់ស្ដីពីរបបសាព័ត៌មានទៅវិញ។
ទោះជាយ៉ាងណាក៏ដោយលោក ចាន់ ថន នៅតែអះអាងថា «ខ្លួនផ្សាយមានប្រភពច្បាស់លាស់ មិនចូលក្នុងបទស្មើស បរិហារកេរ្តិ៍ជាសាធារណៈ នោះទេ ហើយលោកគ្រាន់តែផ្សព្វផ្សាយ រិៈគន់ដើម្បីស្ថាបនាប៉ុណ្ណោះ មិនបានញុះញង់លាបពណ៌ បញ្ចុះបញ្ចូលពីបុគ្គល១ ឬច្រើន ឱ្យស្អប់រើសអើង លើបុគ្គលអង្គភាពស្ថាប័នណាឡើយ គឺមិនចូលក្នុងបទៈ ញុះញង់ឱ្យមានការរើសអើង នោះទេ។
ជុំវិញករណីនេះ អង្គភាពសៀមរាបប៉ុស្ដិ៍ នៅមិនទាន់ទទួលបានការបកស្រាយពី លោកឧត្ដមសេនីយ៍ត្រី ខាត់ សារ័ត្ន នាយប៉ុស្តិ៍នគរបាល ច្រកទ្វារព្រំដែនអន្តរជាតិបាវិត នៅឡើយទេ ជុំវិញលោកប្ដឹង លោក បូរ ប៊ុនថន (ហៅចាន់ ថន) នាយប្រតិបត្តិនៃគេហទំព័រសារព័ត៌មាន«ដើមរាំង»។
សូមជម្រាបថា៖កាលពីថ្ងៃទី២០ ខែកក្កដាឆ្នាំ២០២២ លោកហ៊ុយ វណ្ណៈ រដ្ឋលេខាធិការក្រសួងមហាផ្ទៃនិងជាប្រធានសហភាពសហព័ន្ធអ្នកសារព័ត៌មានកម្ពុជា បានសរសេរសារមួយនៅរសៀលថ្ងៃនេះថា «ខ្ញុំមានការចម្លែកចិត្ត ដែលឃើញមាន អង្គភាព និងគណៈកម្មការខ្លះ បានប្រើសិទ្ធិអំណាចចេញដីកាជាបន្តបន្ទាប់ កោះហៅអ្នកសារព័ត៌មាន ឬចាងហ្វាងសារព័ត៌មាន ឱ្យទៅបំភ្លឺចំពោះអត្ថបទដែលកាសែតបានចុះផ្សាយ»។
លោក ហ៊ុយ វណ្ណៈ បានលើកឡើងថា ១- តើយើងកំពុងចង់បង្ហាញអ្វី? ការពារផលប្រយោជន៍អ្វី? តើយើងបានយល់ដឹងថាមាន ច្បាប់ស្តីពីរបបសារព័ត៌មាន ដែរទេ? ហើយតើយើងកំពុងចង់យកច្បាប់នេះទៅទុកឯណា?
២- ខ្ញុំមិនគាំទ្រការបញ្ចេញមតិនិងការផ្សាយមួលបង្កាច់ ញុះញង់ បំផ្លិចបំផ្លាញសង្គមជាតិនោះទេ។ ប៉ុន្តែ ដីកាដែលចេញជាបន្តបន្ទាប់នេះ គឺជាការប៉ុនប៉ងរបស់បុគ្គល១ក្រុម កំពុងព្យាយាមបង្ខំឱ្យ កាសែត លុបចេញនូវអត្ថបទដែលលាតត្រដាងទង្វើណាមួយ ដែលខ្លួនគ្មានភាពស្មោះត្រង់ក្នុងការបំភ្លឺ និងបកស្រាយ។
សូមជម្រាបផងដែរថា កន្លងមកមានករណីប្ដឹងអ្នកសារព័ត៌មាន នឹងប្ដឹងចាងហ្វាងការផ្សាយសារព័ត៌មាន មួយចំនួន ទៅអាជ្ញាធរនឹងទៅស្ថាប័នតុលាការ ដោយចោទពីបទផ្សេងៗគ្នា។ យ៉ាងណាក៏ដោយករណីបែបនេះ សុំសាមីខ្លួន អាចសុំការបំភ្លឺ ឬការបកស្រាយពីអង្គភាពសារព័ត៌មានទាំងនោះបានមុនឈានដល់ការប្ដឹង។ ដូចគ្នានេះដែរសុំស្ថាប័នច្បាប់និងអាជ្ញាធរពាក់ព័ន្ធ មេត្តាយក ច្បាប់ស្តីពីរបបសារព័ត៌មាន មកដោះស្រាយផងដែរ៕SR
សូមជម្រាបថា កន្លងមកមានអតិថិជនអ្នកប្រើប្រាស់សេវាទូរស័ព្ទ ជាច្រើន បានធ្វើការរិះគន់យ៉ាងខ្លាំងទៅក្រុមហ៊ុនមួយចំនួន ដែលតែងតែកាត់លុយ របស់អតិថិជនដោយពុំដឹងមូលហេតុហើយក្រុមហ៊ុនមួយចំនួនទាំងនោះតែងតែភ្ជាប់កម្មវិធីជាច្រើន ដើម្បីកាត់លុយរបស់អតិថិជន ធ្វើឱ្យអតិថិជនមានការមិនសប្បាយចិត្ត ហើយឈានដល់ការឈប់ប្រើប្រព័ន្ធទូរស័ព្ទមួយចំនួនផងដែរ៕SRP
