ព័ត៌មានជាតិ

ខេត្តសៀមរាប៖ក្រុមមន្ត្រីនគរបាលប្រឆាំងការជួញដូរមនុស្សនិងការពារអនីតិជនបានសម្រុកចូលបន្ទប់ក្នុងហាងម៉ាស្សា ស្រីពៅ រកឃើញសុទ្ធតែស្រោមអនាម័យ មិនទាន់ប្រើនិងប្រើរួចជាច្រើន និងរំដោះនារីបំរើសេវាផ្លូវភេទ៤នាក់ក្នុងនោះមានអនីតិជនអាយុ១៦ឆ្នាំម្នាក់ផងដែរ។
លោកវរសេនីយ៍ឯក ជា ហេង នាយការិយាល័យនគរបាលប្រឆាំងការជួញដូរមនុស្សនិងការពារអនីតិជនខេត្តសៀមរាប បានអោយដឹងថាករណីបង្ក្រាបការជួញដូរមនុស្សក្នុងហាងម៉ាស្សា ស្រីពៅ នេះ បុរសជាថៅកែហាងម៉ាស្សា ម្នាក់ត្រូវឃាត់ខ្លួនបញ្ជូនខ្លួនទៅតុលាការ ក្រោមបទចោទ អំពើសញ្ចារកម្ម។
លោកវរសេនីយ៍ឯក ជា ហេង បានអោយដឹងថា ការជនសង្ស័យមានឈ្មោះយិន ង៉ែត ភេទប្រុស អាយុ៤៩ឆ្នាំ ស្នាក់នៅហាងម៉ាស្សាខាងលើ។
លោកបន្តថា ក្នុងប្រតិបត្តិការ ដែលដឹកនាំសម្រប សម្រួលនិតិវិធីដោយលោកកើត វណ្ណារ៉េត ព្រះរាជ អាជ្ញាអមសាលាដំបូងខេត្ត។ លោកបញ្ជាក់ថា ជនសង្ស័យ បញ្ជូនទៅតុលាការនៅថ្ងៃទី៦ខែកញ្ញាឆ្នាំ២០២០នេះ។ចំណែកនារីបំរើសេវាផ្លូវភេទទាំង៤នាក់ ជាជនរងគ្រោះ ប្រគល់អោយមន្ទីរសង្គមកិច្ចដើម្បីអប់រំណែនាំ។សូមបញ្ជាក់ថាការបង្ក្រាបនេះធ្វើឡើងនៅវេលាម៉ោង១០យប់ថ្ងៃទី០៤ខែកញ្ញាឆ្នាំ២០២០ ស្ថិតនៅភូមិតាវៀន សង្កាត់សាលាកំរើក ក្រុងសៀមរាប៕SRP

ខេត្តសៀមរាប៖សេចក្ដីរាយការណ៍បានអោយដឹងថាអគ្គិភ័យបានឆេះផ្ទះមួយ នៅក្នុងបុរីសៀងណាំ ដោយបំផ្លាញទ្រព្យសម្បត្តិ ប្រមាណ៥ពាន់ដុល្លារ។
ហេតុការណ៍បានកើតឡើងនៅថ្ងៃទី០៦ ខែកញ្ញា ឆ្នាំ២០២០វេលាម៉ោង០៤និង០០នាទី ស្ថិតក្នុងភូមិខ្នារ សង្កាត់ជ្រាវ ក្រុងសៀមរាប។
នគរបាលប៉ុស្តិ៍សង្កាត់ជ្រាវបានអោយដឹងថាម្ចាស់ផ្ទះឈ្មោះសុខ ចិត្រា ភេទស្រី អាយុ៤១ឆ្នាំ មុខរបរលក់ដូរ ស្នាក់នៅបណ្តោះអាសន្នក្នុងបុរីសៀងណាំ(ផ្លូវលេខ១៥) កន្លែងកើតហេតុខាងលើ។នគរបាលប៉ុស្តិ៍បន្តថាករណីនេះបណ្ដាលអោយខូចខាតសម្ភាររួមមានគ្រឿងអលង្កានិងសម្ភារតាំងក្នុងផ្ទះជារបស់ប្រទេសជប៉ុន(ខោ-អាវ តុ ទូរ ចាន ឆ្នាំង ស្បែកជើង)សរុបជាប្រាក់ប្រមាណ៥០០០ដុល្លារ។ បើតាមនគរបាលថាអគ្គិភ័យបានរលត់វិញនៅម៉ោងប្រហែល០៥ និង០០នាទី។មូលហេតុទុស្សេរខ្សែរភ្លើងចេញពីកន្លែងកុងម៉ា៕SRP

ខេត្តត្បូងឃ្មុំ៖លោកជាម ច័ន្ទសោភ័ណ អភិបាលខេត្តត្បូងឃ្មុំ បានបញ្ជាក់ថាពលរដ្ឋនៅ ភូមិត្រពាំងផ្លុង១ និង២ បានអះអាងថាពុំមានការបាត់បង់ដីក្រោយបោះបង្គោលព្រំដែននោះទេ ផ្ទុយទៅវិញយើងទទួលបានដីសេសសល់ថែមទៀត។

ការអះអាងរបស់អភិបាលខេត្តត្បូងឃ្មុំ បានធ្វើឡើងនៅថ្ងៃទី០៥ខែកញ្ញាឆ្នាំ២០២០នាព្រឹកមិញនេះក្នុងពេលរួមដំណើរជាលោក វ៉ា គឹមហុង ប្រធានគណៈកម្មាធិការចម្រុះ កិច្ចការព្រំដែន កម្ពុជា ចុះទៅជួបប្រជាពលរដ្ឋ នៅភូមិខាងលើ។

ទាក់ទងទៅនឹងបញ្ហាព្រំដែន កាលពីព្រឹកថ្ងៃអង្គារ ទី២៥ ខែសីហា ឆ្នាំ២០២០ ក្នុងពេលអញ្ជើញជាអធិបតីភាពប្រជុំបូកសរុបការងារឆមាសទី៤ របស់ឧត្តមក្រុមប្រឹក្សាពិគ្រោះ និងផ្តល់យោបល់ ប្រមុខដឹកនាំកម្ពុជា សម្តេចតេជោ ហ៊ុន សែន បានបញ្ជាអោយ លោក វ៉ា គឹមហុង ប្រធានគណៈកម្មាធិការចម្រុះ កិច្ចការព្រំដែន កម្ពុជា ចុះទៅជួបប្រជាពលរដ្ឋ ដែលអះអាងថា បាត់ដីនៅខេត្តត្បូងឃ្មុំ ក្រោយការបោះបង្គោលព្រំដែន។

ជាមួយគ្នានេះដែរ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានណែនាំទៅកាន់ លោកឧបនាយករដ្ឋមន្រ្តី ប៊ិន ឈិន រដ្ឋមន្រ្តីទីស្ដីការគណៈរដ្ឋមន្រ្តីអោយបើកសិក្ខាសាលាមួយ ដើម្បីឲ្យប្រជាពលរដ្ឋ សិស្ស និស្សិតចូលស្តាប់និងសួរអំពីរឿងព្រំដែនផងដែរ៕SRP

ខេត្តព្រះវិហារ៖សេចក្ដីរាយការណ៍បានអោយដឹងថារថយន្តមួយគ្រឿងដឹកជញ្ជូនបទល្មើសព្រៃឈើចេញពីកំពង់ស្រឡៅ​​ នៃស្រុកឆែប ខេត្តព្រះវិហារ ទៅកាន់ខេត្តសៀមរាប ត្រូវបានសមត្ថកិច្ចអាវុធហត្ថសហការជាមួយមន្ត្រីជំនាញរដ្ឋបាលព្រៃឈើឆែបចុះបង្ក្រាប។

ការបង្ក្រាបបានធ្វើឡើងកាលយប់ថ្ងៃទី០៤កញ្ញា២០២០ ក្នុងភូមិសាស្រ្តស្រុកឆែបខេត្តព្រះវិហារ។ តាមសមត្ថកិច្ចបានបង្ហើបប្រាប់ថាម្ចាស់រថយន្តដឹកឈើខាងលើឈ្មោះ ម៉ៅ គឺឈ្មួញឈើដ៏សកម្មក្នុងការដឹកជញ្ជូនឈើចេញពីភូមិសាស្ត្រខាងលើចូលទៅចែកចាយក្នុងខេត្តសៀមរាប។ បើទោះបីជាមានការបង្រ្កាបយ៉ាងណាក្ដីនៅក្នុងខេត្តព្រះវិហារត្រូវបានគេសង្កេតឃើញថាមានបទល្មើសព្រៃឈើបានកើតមានឡើងយ៉ាងអនាធិបតេយ្យក៏ប៉ុន្តែការបង្ក្រាបបានតិចតួចបំផុត ជាពិសេសការដឹកជញ្ជូនឈើប្រភេទរថយន្តសាំយ៉ុង ចេញពីខេត្តព្រះវិហារទៅខេត្តកំពង់ធំតាមផ្លូវជាតិលេខ៦២នៅតែបន្តកើតមានទាំងយប់ ទាំងថ្ងៃប៉ុន្តែគ្មានអ្នកបង្ក្រាបនោះឡើយ៕SRP

ខេត្តតាកែវ៖យ៉ាងមនុស្ស៣នាក់បានស្លាប់បាត់បង់ជីវិតភ្លាមៗនិងមានម្នាក់រងរបួសធ្ងន់ក្នុងគ្រោះថ្នាក់ចរាចររវាងម៉ូតូនិងម៉ូតូបុកគ្នាក្នុងទិសដៅផ្ទុយ។

ហេតុការណ៍កើតឡើងនៅរសៀលថ្ងៃទី០៣ ខែកញ្ញា ឆ្នាំ២០២០ វេលាម៉ោង១៦និង១០នាទី នៅលើបណ្តោយផ្លូវខេត្តលេខ១២៩ ចន្លោះគីឡូម៉ែត្រលេខ២៥_២៦ ស្ថិតនៅភូមិព្រៃល្លាកើត ឃុំព្រៃល្វា ស្រុកព្រៃកប្បាស ខេត្តតាកែវ។ ម៉ូតូជនរងគ្រោះទី១ម៉ាកវ៉េវ ពណ៌ទឹកប៊ិក ពាក់ស្លាកលេខ ព្រៃវែង 1A 8233 បើកបរដោយឈ្មោះ តែម នាង ភេទប្រុស អាយុ៣០ឆ្នាំ រស់នៅភូមិព្រៃព្រំ ឃុំព្រៃកប្បាស ស្រុកព្រៃកប្បាស ខេត្តតាកែវ ស្លាប់ភ្លាមៗ និងអ្នករួមដំណើរម្នាក់ឈ្មោះ ចឹម ជីវ័ន្ត ភេទប្រុស អាយុ៦ឆ្នាំ រងរបួសធ្ងន់និងស្លាប់ពេលបញ្ជូនទៅមន្ទីរពេទ្យ។ ដោយឡែកភាគីម្ខាងទៀតបើកបរម៉ូតូម៉ាកភីស៊ីអិច ដែលបើកបរដោយឈ្មោះ អ៊ឹម ស្រីពៅ ភេទស្រី អាយុ២២ឆ្មាំ រស់នៅភូមិតាមួង ឃុំរំចង់ ស្រុកសំរោង ខេត្តតាកែវ ស្លាប់ភ្លាមៗ និងអ្នករួមដំណើរម្នាក់ឈ្មោះ ប៊ុន សូណាត ភេទស្រី អាយុ២៦ឆ្នាំ រស់នៅភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ រងរបួសធ្ងន់។

ក្រោយកើតហេតុនគរបាលចរាចរណ៍ស្រុកព្រៃកប្បាសបានចុះដល់ធ្វើកំណត់ហេតុវាស់វែង នឹងចាត់បញ្ជូនអ្នករងរបួសទៅមន្ទីរពេទ្យ។ចំណែកសពជនរងគ្រោះដែលស្លាប់ត្រូវបានប្រគាល់ជូនសាច់ញាតិយកទៅធ្វើបុណ្យតាមប្រពៃណី៕SRP

ខេត្តសៀមរាប៖ក្នុងនាមក្រុមប្រឹក្សា គណៈអភិបាលខេត្ត មន្រ្តីរាជការ កងកម្លាំងប្រដាប់អាវុធគ្រប់លំដាប់ថ្នាក់ និង ប្រជាពលរដ្ឋទូទាំងខេត្តសៀមរាប សូមគោរពថ្លែងអំណរគុណយ៉ាងជ្រាលជ្រៅបំផុតចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលបានប្រកាសសម្រេចកញ្ចប់ថវិកា ចំនួន ១៥០លានដុល្លារ ក្នុងកិច្ចប្រជុំពេញអង្គគណៈរដ្ឋមន្រ្តី នាថ្ងៃសុក្រ ២រោច ខែភទ្របទ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី០៤ ខែកញ្ញា ឆ្នាំ២០២០ សម្រាប់ស្ថាបនាផ្លូវ ចំនួន ៣៨ខ្សែ ក្នុងខេត្តសៀមរាប។

ជាថ្មីម្តងទៀត ក្នុងឱកាសនៃពិធីបុណ្យកាន់បិណ្ឌ ភ្ជុំបិណ្ឌនេះ សូមគោរពជូនពរជ័យ សិរីមង្គល គ្រប់ប្រការ ជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ព្រមទាំងបុត្រាបុត្រី ចៅប្រុស ចៅស្រីទាំងអស់ សូមសមប្រកបដោយព្រះពុទ្ធពរទាំងបួនប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕SRP

ខេត្តកំពង់ចាម ៖គម្រោងមូលនិធិ ឃុំ -សង្កាត់ ឆ្នាំ ២០២០ របស់គណៈកម្មការជាតិសម្រាប់ការអភិវឌ្ឍន៍តាមបែប ប្រជាធិបតេយ្យ នៅ ថ្នាក់ ក្រោម ជាតិ ត្រូវ បាន បេីក សំណេី ដេញ ថ្លៃ ចំនួន ៥គម្រោង នាព្រឹក ថ្ងៃ ទី ៤ ខែកញ្ញា ឆ្នាំ ២០២០ នៅ សាលា ស្រុក ស្ទឹងត្រង់ ក្រោម វត្តមាន លោក ឡី មិច នាយក រង រដ្ឋបាល សាលា ខេត្ត កំពង់ចាម និង លោក ជៀម វុត្ថា អភិបាល រង ស្រុក ស្ទឹងត្រង់ ដោយ មាន ការ ចូលរួម ពី គណៈកម្មការ ម្ចាស់ លទ្ធកម្ម និង តំណាង ក្រុម ហ៊ុន អ្នក ទទួល ការ ជា ច្រើន រូប ផង ដែរ ។

គួរបញ្ជាក់ថា គម្រោង ដែល បាន ដាក់ ឲ្យ ដេញ ថ្លៃ ខាង លើ នេះ គឺមាន ផ្លូវ ចំនួន ៥ខ្សែ ដែល ត្រូវ ស្ថាបនា ជូន ប្រជាពលរដ្ឋ ប្រើប្រាស់ ក្នុង នោះ មាន ១-ឃុំ ទួល ព្រះ ឃ្លាំង សាងសង់ផ្លូវបេតុងអាមេ ប្រវែង២៤៥ម៉ែត្រ ទទឹង៥ម៉ែត្រ កម្រាស់០.១៥ម៉ែត្រ នៅភូមិដូនទ័រ និង ភូមិថ្មី។
២-ឃុំ ព្រែកកក់ សាងសង់ផ្លូវបេតុងអាមេ ប្រវែង៧៣៤ម៉ែត្រ ទទឹង៤ម៉ែត្រ នៅភូមិ អូរប្រាំទី២។
៣-ឃុំ ទួល សំបួរ ជួសជុលផ្លូវក្រាលក្រួសក្រហម ប្រវែង២៤៣០ម៉ែត្រ ទទឹង៤ម៉ែត្រ នៅភូមិពោន។
៤-ឃុំ ដងក្តារ ជួសជុលផ្លូវក្រាលក្រួសក្រហម ប្រវែង២០៣០ម៉ែត្រ ទទឹង៤ម៉ែត្រ នៅភូមិ ថ្មី។
៥-ឃុំ អូរ ម្លូ សាងសង់ផ្លូវបេតុងអាមេ ប្រវែង៤៣៨ម៉ែត្រ ទទឹង៤ម៉ែត្រ នៅភូមិ ខ្ទួយ១ និង ភូមិខ្ទួយ៤ ៕SRP

ខេត្តសៀមរាប៖ការកូដកម្ម នៅភូមិវប្បធម៌កម្ពុជា នៃខេត្តសៀមរាប ដែលបានអូសបន្លាយជិត ១ ខែមកហើយនោះ ពេលនេះបានឈានដល់ដំណាក់ កាល ចាក់ភ្លេងខ្មោចបំពងសម្លេងហើយ។

ការធ្វើរបៀបនេះ ត្រូវបានអះអាងថា ក្រុមអ្នកតវ៉ា មានការឈឺចាប់ រងទុក្ខបីដូចជាមានមនុស្សស្លាប់អីយ៉ាងចឹង។ ក្រុមអ្នកតវ៉ា នៅព្រឹកថ្ងៃទី៣ខែកញ្ញនេះ បានលើក ឡើងថា ពួកគេបានស្នើសុំដល់ខាងក្រុមហ៊ុនអោយចូលចរចាគ្នានូវ៣ចំណុច។

ទី១ ចូលចរចា អំពីអនុសញ្ញារួមដោយស្មោះត្រង់។
ទី២ រក្សាការិយាល័យសិល្ប:និងតួនាទីនៅដដែល
និងទី៣ សងប្រាក់ឈ្នួលនិងប្រាក់ថ្លៃអាហារដែលបានកាត់កន្លងមក។ ប៉ុន្តែមកទល់ពេលនេះ ភាគីខាងក្រុមហ៊ុនមិនព្រមចរចាអ្វីទាំងអស់។

លោកអេង មុន្នី បុគ្គលិកបំរើការនៅភូមិវប្បធម៌ ផ្នែកគ្រូបង្ហាត់សិល្ប: បានអោយដឹងថា ពួកគេបានធ្វើ កូដកម្មដោយគ្មានហិង្សានេះ ចាប់តាំងពីថ្ងៃទី១៤ ខែ សីហាមកហើយ។ ប៉ុន្តែក្នុងចំណោមជាង៣០០នាក់ គឺមានតែ៦៤នាក់ទេដែលធ្វើកូដកម្មនេះ។

លោកបន្តថា ក្រុមហ៊ុនបានកាត់ប្រាក់ឈ្នួល ២៥ដុល្លារ និងប្រាក់អា ហារ៥ដុល្លារក្នុង១ខែ សម្រាប់ពួកយើង៦៤នាក់ដែលទទួលបានប្រាក់ខែចាប់ពី២០០ដុល្លារឡើងទៅ។ ករណីនេះពួកយើងបានចរចាគ្នានៅសាលាខេត្តច្រើន ដងហើយដែរ តែមិនមានលទ្ធផលនោះឡើយ។

លោកអេង មុន្នី អោយដឹងទៀតថា គិតមកទល់ពេលនេះមានរយ:ជិត១ខែមកហើយ នៅតែគ្មានផ្លូវដោះស្រាយ ចឹងហើយទើបពួកយើងសម្រេចចាក់ភ្លេងខ្មោចបំពងសម្លេងបែបនេះ។

លោកបញ្ជាក់ថា ការចាក់ភ្លេងខ្មោចនេះ គឺបង្ហាញពីការឈឺចាប់ ដែលពួក គេ ជួបទុក្ខសោក ប្រៀបដូចជាមានមនុស្ស(បុគ្គលិក) ស្លាប់នៅទីនេះអីចឹង។ ចឹងទេពួកយើង អាចនឹងប្រគុំតន្ត្រីនៅទីនេះទៀត ប្រសិនបើនៅតែមិនមានដំណោះស្រាយ។

ករណីនេះលោកស្រីលឹម សុភក្រ័ អ្នកគ្រប់គ្រង នៅភូមិវប្បធម៌កម្ពុជា នៃខេត្តសៀមរាប បានបញ្ជាក់យ៉ាងខ្លីថា យើងបានចរចាគ្នាច្រើនដងហើយ តែមិនសម្រេច ចឹងទេបើចង់ដឹងលម្អិតសូមទាក់ទងទៅមន្ទីរការងារខេត្ត ព្រោះឯកសារនៅទីនោះទាំងអស់។

ប្រធានមន្ទីរការងារខេត្តសៀមរាប លោកចន្ទ័ សុខុមចិត្តា នៅព្រឹកថ្ងៃទី៣ខែកញ្ញានេះ មិនបានពន្យល់អំពីសកម្មភាពធ្វើកូដកម្ម និងការចរចានោះទេ នោះទេ ដោយទូរសព្ទ័ហៅចូលច្រើនដង តែគ្មានការឆ្លើយតប។ លោកចន្ទ័ សុខុមចិត្តា បានប្រាប់បណ្ដាញសៀមរាបប៉ុស្ដិ៍ថាការដែលលោកមិនបានលើកទូរស័ព្ទដោយសារជាប់រវល់ប្រជុំ។

ចំណែកលោក នាក់ ណេរ៉ុន អភិបាលរងខេត្តសៀមរាប ដែលជាអ្នកសម្របសម្រួលករណីនេះ បានថ្លែងតាមទូរសព្ទ័ថា រឿងនេះវាហាក់ដូចជាតានតឹងបន្តិច ដោយគូភាគី មិនបន្ទន់ចិត្តក្នុងការចរចាសោះ។

លោកបន្តថា យើងបានព្យាយាមពន្យល់ដល់គូភាគីច្រើនដងមកហើយ តែនៅមិនសម្រេច ចឹងទេរសៀលនេះ លោកនឹងហៅគូភាគីមកនិយាយម្តងទៀត ហើយសង្ឃឹមថា គ្រប់យ៉ាងអាចល្អ។

សូមបញ្ជាក់ថា កូដកម្មទាមទារ៣ចំណុច របស់បុគ្គលិកនៅភូមិវប្បធម៌ បានធ្វើឡើងចាប់តាំងពីថ្ងៃទី ១៤ខែសីហា ហើយមកទល់ថ្ងៃទី៣ខែកញ្ញាឆ្នាំ២០២០ ស្ថានការហាក់នៅតែក្តៅនៅឡើយ។ ចឹងទេនៅថ្ងៃបន្តមិនដឹងថា អាចមានអ្វីនោះទេ តែគេរំពឹងថា អាចរលត់ទៅវិញ ក្រោយថ្នាក់ដឹកនាំខេត្តហៅចរចាជាថ្មី៕SRP