ព័ត៌មានជាតិ – Page 539

ខេត្តព្រះសីហនុ៖សាកសពក្មេងប្រុសអាយុជាង១០ឆ្នាំម្នាក់ត្រូវបានប្រទះឃើញ នៅក្នុងគំនរសំរាម ក្នុងទីលានចាក់សំរាមក្រុមហ៊ុន (KSWN)។

ការប្រទះឃើញ ស្ថិតនៅភូមិ១ សង្កាត់លេខ១ ក្រុងព្រះសីហនុ នៅពីវេលាម៉ោង០៩ព្រឹកថ្ងៃទី ១៥ ខែកញ្ញា ឆ្នាំ ២០២០។
ករណីនេះសមត្ថកិច្ចប្រាប់ថា ក្មេងប្រុសនេះគឺតាមម្ដាយរបស់គេដែលធ្វើការជាអ្នកអនាម័យនៅក្នុង ទីលានផ្ទុកសំរាមបណ្ដោះអាសន្ន របស់ក្រុមហ៊ុន KSWN នេះ។តាមការសន្និដ្ឋានជំហានដំបូងរបស់សមត្ថកិច្ចថា ជនរងគ្រោះ អាចកំពុងរើសសំបកកំប៉ុងស្របពេល គ្រឿងចក្រ (សាស័រ) កំពុងធ្វើការចូកសំរាម ហើយទំនងជាត្រូវបានអ្នកបើកសាស័រមើលមិនទាន់ ជោគសំរាមចាក់លុបបណ្ដាលឲ្យបាត់បង់ជីវិតក្នុងគំនរសំរាមតែម្ដង។ទោះជាយ៉ាងណាពាក់ព័ន្ធករណីនេះបណ្ដាញសារព័ត៌មានសៀមរាបប៉ុស្ដិ៍មិនទាន់បានរបាយការណ៍ពីអត្តសញ្ញាណជនរងគ្រោះច្បាស់លាស់ពីសមត្ថកិច្ចនៅឡើយទេ៕SRPព័ត៌មានលំអិតនៅពេលក្រោយ៖

ខេត្តសៀមរាប៖អ្នកបើកកាណូតម្នាក់បានស្លាប់និងបើកកាណូតម្ខាងទៀតបានគេចបាត់បន្ទាប់ពីបានបុកគ្នា។

ហេតុការណ៍បានកើតឡើងនៅ វេលាម៉ោង១៩និង៣០នាទី ថ្ងៃទី១៤ ខែកញ្ញា ឆ្នាំ២០២០ នៅចំណុចក្រោមអូប្រាំជាន់ ចុងភូមិតាច្រនៀង ឃុំកំពង់ឃ្លាំង ស្រុកសូទ្រនិគម។

មន្ត្រីស្រុកសូទ្រនិគមបានរាយការណ៍ឲ្យដឹងនៅព្រឹកនេះថាករណីគ្រោះថ្នាក់ចរាចរណ៍ផ្លូវទឹកនេះគឺរវាងការណូតម៉ាកកាវ៉ា សំបកស្មាច់បុកគ្នា បណ្ដាលអោយស្លាប់ម្នាក់ ជាអ្នកបើកបរកាណូត។

ជនរងគ្រោះឈ្មោះរឿម ប៉ូ ភេទប្រុស អាយុ៥៦ឆ្នាំ នៅភូមិព្រែកស្រម៉ោច ឃុំកំពង់ឃ្លាំង ស្រុកសូទ្រនិគម ខេត្តសៀមរាប (ស្លាប់)។ ចំណែក ជនបង្កឈ្មោះព្រុំ ឆាន ភេទប្រុស អាយុ៣៩ឆ្នាំ នៅភូមិតាអួស ឃុំកំពង់ឃ្លាំង ស្រុកសូទ្រនិគម ខេត្តសៀមរាប (រត់គេចខ្លួនបាត់)។

បើតាមមន្ត្រីបានអះអាងថាមូលហេតុបើកបរពេលងងឹត គ្មានភ្លើង ក្នុងល្បឿនលឿន និងខ្វះការប្រុងប្រយ័ត្ន។ ក្រោយកើតហេតុ កាណូតបានយកទៅ រក្សាទុកប៉ុស្តិ៍នគរបាលកំពង់ឃ្លាំងដើម្បីរង់ចាំការដោះស្រាយ។ ដោយឡែកសាកសពបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តនិងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត នៅថ្ងៃច័ន្ទទី១៤ ខខែកញ្ញាព្រឹកមិញនេះ បានដឹកនាំមន្ត្រីជំនាញ ចុះពិនិត្យស្ថានភាពនៃការបាក់ស្រុតលូបង្ហូរទឹក ស្ថិតនៅក្នុងភូមិទី៣ សង្កាត់វាលវង់ ក្រុងកំពង់ចាម។
ការចុះពិនិត្យនេះ លោកអ៊ុន ចាន់ដា បានណែនាំឲ្យមន្ត្រីពាក់ព័ន្ធ ធ្វើការសិក្សាចំពោះបញ្ហានេះ ដេីម្បីជួសជុលបន្ទាន់ ដែលរងផលប៉ះពាល់ ចៀសវាងបង្កគ្រោះថ្នាក់ផ្សេងៗកេីតឡើងជាយថាហេតុ។

គួរបញ្ជាក់ថា កាលពីវេលាម៉ោង១២និង៣០នាទី រំលងអាធ្រាត្រ ចូលថ្ងៃទី១៣ ខែកញ្ញា ឆ្នាំ២០២០នេះ មានភ្លៀងមួយមេឃធំ បណ្តាលឲ្យបាក់លូបង្ហូរទឹកចូលទន្លេទំហំ៧ម៉ែត្រ គុណ១០ម៉ែត្រ នៅចំណុចមាត់ទន្លេ និងបណ្តាលឲ្យធ្លាក់ម៉ូតូ០១គ្រឿង ម៉ាកវ៉េវ តែមិនបង្កឲ្យមានគ្រោះថ្នាក់ដល់អាយុជីវិតមនុស្សឡើយ។
បេីតាមការសន្និដ្ឋានរបស់មន្ត្រីជំនាញថា ការបាក់ស្រុតដីនេះអាចបណ្តាលមកពីប្រព័ន្ធលូបង្ហូរទឹកចេញពីក្រុងកំពង់ចាម ចូលក្នុងទន្លេដែលមានសភាពចាស់ទ្រុឌទ្រោម គឺជាប្រព័ន្ធលូសាងសង់តាំងពីសង្គមចាស់ ហើយមុនពេលកើតហេតុក៏មានភ្លៀងធ្លាក់យ៉ាងខ្លាំងនៅក្នុងក្រុងកំពង់ចាមនេះផងដែរ៕SRP

Sponsored

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម នៅថ្ងៃច័ន្ទទី១៤ខែកញ្ញាព្រឹកមិញ បានអញ្ជើញជួបសំណេះសំណាលសាកសួរសុខទុក្ខមនមន្រ្តីរាជការចូលនិវត្តន៍ និងមន្ត្រីរាជការកំពុងបំពេញការងារនៃសាលាខេត្តកំពង់ចាម ជាង២០០នាក់ នៅសាលាខេត្តកំពង់ចាម ក្នុងឱកាសរដូវបុណ្យភ្ជុំបិណ្ឌប្រពៃណីជាតិខ្មែរ។
ថ្ថ្លែងក្នុងពិធីសំណេះសំណាលលោក អ៊ុន ចាន់ដា បានកោតសរសើរ និងវាយតម្លៃខ្ពស់រាល់ការខិតខំប្រឹងប្រែងរបស់មន្រី្ដរាជការសាលាខេត្តទាំងអស់ ដែលបានខិតខំបំពេញការងារទទួលបានលទ្ធផលល្អ និងបន្តជំរុញនិងលើកកម្ពស់ប្រសិទ្ធភាពការងារបន្ថែមទៀត ពិសេលការផ្តល់សេវាសារធារណៈដែលមានក្នុងកម្មវិធីនយោបាយរបស់រាជរដ្ឋាភិបាលក្នុង នីតិកាលទី៦នេះ ក្រោមការដឹកនាំរបស់សម្តេចជោ ហ៊ុន សែន។
អភិបាលខេត្តបានថ្លែងបន្តថានេះជាការជួបជុំគ្នាតាមគំរូថ្នាក់ដឹកនាំមុនៗ ជាពិសេសគឺ ឯកឧត្តម ហ៊ុន ណេង អតីតអភិបាលខេត្តកំពង់ចាម តែងតែធ្វើឡើង សម្រាប់ឱកាស បុណ្យភ្ជុំបិណ្ឌ ជាធម្មតាក្នុងឱកាសបុណ្យប្រពៃណីរបស់ជាតិយើង មានបុណ្យធំៗ ដល់ទៅ២ គឺរដូវបុណ្យភ្ជុំបិណ្ឌ និងបុណ្យចូលឆ្នាំថ្មី (លេីកលែងតែពេលមានការផ្ទុះនូវជំងឺកូវីដ១៩កន្លងទៅថ្មីៗនេះ) ដែលជាទំនៀមទម្លាប់ប្រពៃណីជាតិម្តងៗ រដ្ឋបាលសាលាខេត្តយើងតែងតែបានធ្វើពិធីជួបសំណេះសំណាល ជាមួយបងប្អូនជាមន្ត្រីចូលនិវត្តន៍ ដែលជារាមច្បង និងបងប្អូនមន្ត្រីរាជការ កម្មករ រដ្ឋបាលសាលាខេត្តកំពង់ចាមទាំងអស់ ព្រមទាំងឧបត្ថម្ភនូវថវិកាមួយចំនួន ដើម្បីឲ្យបងប្អូនយកទៅប្រើប្រាស់ទៅតាមតម្រូវការ។
លោក អ៊ុន ចាន់ដា ក៏បានធ្វើការផ្តាំផ្ញេីថា ក្នុងនាមជាមន្ត្រីរាជការល្អគឺត្រូវផ្លាស់ប្ដូរឥរិយាបថពីចៅហ្វាយនាយទៅជាអ្នកបម្រើរាស្ត្រយ៉ាងពិតប្រាកដ ដេីម្បីធ្វើការផ្ដល់សេវាសាធារណៈជូនប្រជាពលរដ្ឋឲ្យបានគាប់ប្រសើរ ដោយឡែកចំពោះថ្នាក់ដឹកនាំល្អដែលនាំមកនូវភាពជោគជ័យនោះ គឺត្រូវផ្តល់ជូនមន្ត្រីក្រោមឱវាទ៣យ៉ាង ទី១-ត្រូវឲ្យមន្ត្រីចេះធ្វើការងារ ២-ត្រូវឲ្យមន្ត្រីមានសិទ្ធិសម្រេច និងទី៣-គឺត្រូវឲ្យមន្ត្រីមានធនធានសម្រាប់ចុះធ្វើការងារផងដែរ៕SRP

ខេត្តសៀមរាប៖នគរបាលរដ្ឋបាលប៉ុស្តិ៍ សង្កាត់គោកចកបានឲ្យដឹងថាកម្លាំងនគរបាលប៉ុស្តិ៍សង្កាត់គោកចក សហការជាមួយមន្ត្រីCMAC នៅថ្ងៃច័ន្ទទី១៤ ខែកញ្ញា ឆ្នាំ២០២០ វេលាម៉ោង០៨និង៣០នាទីព្រឹកនេះ បានចុះទៅយកគ្រាប់មិនទាន់ផ្ទុះប្រភេទ ៣៨១(សាវ៉េនធីណៃ) មួយគ្រាប់។

ទីតាំងមានគ្រាប់មិនទាន់ផ្ទុះប្រភេទ ៣៨១(សាវ៉េនធីណៃ)នៅចំណុចទួលខាងលិច ប្រាសាទគោកចក ស្ថិតក្នុងភូមិវាល សង្កាត់គោកចក ក្រុងសៀមរាប។

មន្ត្រីនគរបាលប៉ុស្តិ៍គោកចកបានបន្តថា ការចុះទៅត្រួតពិនិត្យនិងយកគ្រាប់ចេញពីទីតាំងខាងលើបន្ទាប់ពីបានទទួលសេចក្ដីរាយការណ៍ ពីប្រជាពលរដ្ឋនៅល្ងាចថ្ងៃទី១៣ ខែកញ្ញា ម្សិលមិញ។

មន្ត្រីនគរបាលបញ្ជាក់ថាក្រោយកម្លាំងប៉ុស្តិ៍បានចុះទៅដល់កន្លែងកើតហេតុ ឃើញពិតជាមានកាកសំណល់សង្គ្រាមគ្រាប់មិនទាន់ផ្ទុះ រួចក៏បានដាក់សញ្ញាសំគាល់ និងហាមប្រាមប្រជាពលរដ្ឋ កុំអោយមក
ក្បែរផងដែរ៕SRP

ខេត្តសៀមរាប៖សេចក្ដីរាយការណ៍
បានឲ្យដឹងថារថយន្តមួយគ្រឿងបានបុករះរថយន្ត៣គ្រឿងផ្សេងទៀតបណ្ដាលឲ្យគ្រូពេទ្យម្នាក់រងរបួស។
សមត្ថកិច្ចក្នុងហេតុការណ៍បានឲ្យដឹងថា
ករណីនេះរវាងរថយន្ត និងរថយន្ដ បើកបរទិសដៅផ្ទុយគ្នាបង្កឡើងដោយរថយន្តម៉ាកCRVពាក់ស្លាកលេខសៀមរាប២C៨៦៤៨ បើកបរទិសដៅពីកើតទៅលិច ក្នុងស្ថានភាពស្រវឹងក៏បានទៅបុករថយន្ដ ០៣គ្រឿងទៀត មកពីទិសខាងលិច ទៅកើត បណ្ដាលឲ្យខូចខាតរថយន្តទាំង០៤គ្រឿង។
សមត្ថកិច្ចបានបន្តថារថយន្តទាំង៣គ្រឿងរួមមាន៖
ទី១រថយន្ដម៉ាកហ្វត ពាក់ស្លាកលេខខេមរភូមិន្ទ៦.២.៨៣០៤ ទិសដៅពីលិចទៅកើតបើកបរដោយឈ្មោះ ភួង ភឿង ភេទប្រុស អាយុ៥៤ឆ្នាំ
មុខរបរយោធា រស់នៅភូមិគោកធ្លក ឃុំកណ្ដែក ស្រុរប្រាសាទបាគង ខេត្តសៀមរាប។
ទី២រថយន្ដម៉ាកកាមរី០៨ ពាក់ស្លាកលេខ ខេមរភូមិន្ទ០២.២.២៤៤២ទិសដៅពីលិចទៅកើតបើកបរដោយឈ្មោះ វ៉ា រក្សា ភេទប្រុស អាយុ៣១ឆ្នាំ មុខរបរយោធា រស់នៅភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប។
ទី៣រថយន្ដម៉ាករ៉េហ្វរ ពាក់ស្លាកលេខ ភ្នំពេញ ២R៤០១៤ ទិសដៅពីលិចទៅកើតបើកបរដោយឈ្មោះ សុខ សាលា ភេទស្រី អាយុ៤៥ឆ្មាំ មុខរបរគ្រូពេទ្យ រស់នៅក្រុងសៀមរាប ខេត្តសៀមរាប។

សមត្ថកិច្ចបានបញ្ជាក់ថាក្រោយកើតហេតុបានចុះវាស់វែងនិងនាំយករថយន្តទាំង០៤គ្រឿង ទៅរក្សាទុកនៅស្នាក់ការនគរបាលចរាចរណ៍ខេត្តសៀមរាបដើម្បីដោះស្រាយតាមក្រោយ។មូលហេតុរថយន្តស៊ីអរវីបើកបរក្នុងស្ថានភាពស្រវឹងស្រា។
ទោះយ៉ាងណាសមត្ថកិច្ចបង្ហាញថាករណីនេះមានការប៉ះដង្គិចគ្នាបន្តិចបន្តួចប៉ុណ្ណោះហើយភាគីទាំងអស់ក៏បានសម្របសម្រួលគ្នាបញ្ចប់រឿងតែម្ដង។សូមជម្រាបថាហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង០៤និង៣០នាទីរសៀលថ្ងៃអាទិត្យថ្ងៃទី១៣ខែកញ្ញាឆ្នាំ២០២០នៅចំណុចខាងកើតស្ពាននាគស្ថិតក្នុងភូមិទ្រាំង សង្កាត់ស្លក្រាម ក្រុងសៀមរាប ខេត្តសៀមរាប លេីវិថីសម្ដេចវិបុលបញ្ញាសុខអាន (៦០ម៉ែត្រ)៕SRP

ខេត្តសៀមរាប៖សេចក្ដីរាយការណ៍ព័ត៌មានបឋមបានឲ្យដឹងថារថយន្តមួយគ្រឿងម៉ាកCRV បានបុករះរថយន្ត៣គ្រឿងផ្សេងទៀត នៅក្បែរស្ពាននាគ បណ្ដាលឲ្យរបួសមនុស្សម្នាក់។
ហេតុការណ៍បានកើតឡើងនៅវេលាម៉ោង៤និង៣០នាទី ថ្ងៃទី ១៣ខែកញ្ញាឆ្នាំ ២០២០នៅលេីផ្លូវ វិវិបុលបញ្ញាសុខអាន ក្បែរស្ពាននាគ(៦០ម៉ែត្រ)ស្ថិតក្នុងសង្កាត់ស្លក្រាមក្រុងសៀមរាប។

សមត្ថកិច្ចបានឲ្យដឹងថាករណីគ្រោះថ្នាក់ចរាចរណ៍នេះរវាងរថយន្តនិងរថយន្ត ចំនួន០៤គ្រឿង បង្កឡេីង ដោយរថយន្តម៉ាកCRV បណ្តាលអោយខូចខាតរថយន្តស្រាលទាំងគ្រឿង និងមានអ្នករបួសស្រាលម្នាក់ភេទស្រីផងដែរ។
សមត្ថកិច្ចបានបញ្ជាក់ថារថយន្តស៊ីអរវីបានបើកបរពីទិសខាងកើតទៅលិចក្នុងស្ថានភាពស្រវឹងក៏បានទៅបុករថយន្ដ ០៣គ្រឿងទៀតដែលបើកបរមកពីទិសខាងលិចទៅកើត។ ក្នុងចំណោមរថយន្តរងគ្រោះទាំង០៣គ្រឿងមាន
រថយន្តពីរគ្រឿងពាក់ស្លាកលេខ ខេមរៈភូមិន្ទ។ ទោះយ៉ាងណាសមត្ថកិច្ចនគរបាលមិនបានបញ្ជាក់លម្អិតចំពោះហេតុការណ៍នេះទេ ដោយបញ្ជាក់ថាករណីនេះមានការប៉ះបន្តិចបន្តួចប៉ុណ្ណោះហើយភាគីទាំងអស់ក៏បានសម្របសម្រួលគ្នាបញ្ចប់រឿងតែម្ដង៕SRP

Sponsored

ភ្នំពេញ៖លោកឌី វិជ្ជានៅព្រឹកថ្ងៃទី១៣ ខែកញ្ញា ឆ្នាំ២០២០នេះ បានអញ្ជើញចុះសួរសុខទុក្ខ សំណេះសំណាលព្រម ទាំងបាននាំយកអំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្តល់ជូនដល់បងប្អូនដែលប្រកបមុខរបររើសអេតចាយចំនួន៣៩៤ គ្រួសារ ក្នុងទីលានចាក់សំរាមក្នុងខណ្ឌដង្កោ រាជធានី ភ្នំពេញ។

ក្នុងឱកាសនោះលោក ឌី វិជ្ជា បានក្រើនរំលឹកឱ្យបងប្អូនបង្កើនការយកចិត្តទុកដាក់ថែរក្សាសុខភាព ប្រចាំថ្ងៃដើម្បីការពារជំងឺឆ្លងកូវីដ-១៩ ពិសេសក្នុងរដូវបុណ្យភ្ជុំនេះ។ សូមរក្សាគម្លាតសង្គម និងពាក់ម៉ាស់នៅកន្លែងមានមនុស្សច្រើន។ លោក បានបន្តផ្តាំផ្ញើឱ្យប្រជាពលរដ្ឋជំរុញកូនតូចៗឱ្យបានចូលរៀនគ្រប់ៗគ្នា ដើម្បីទទួលបានចំណេះដឹង និងបានរួមចំណែកអភិវឌ្ឍន៍ប្រទេសជាតិយើង ហើយលើសពី នេះអំណោយដែលទទួលបានក្នុងមួយគ្រួសារៗរួមមាន៖

១-អង្ករ៥០គីឡូក្រាម

២-មី២កេសតូច

៣-ទឹកត្រី១យួរ

៤-ទឹកសុីអុីវ១យួរ

៥-ត្រីខកំប៉ុង១យួរ

៦-ទឹកដោះគោខាប់២កំប៉ុង

៧-នំផ្អែម១ធុង

៨-ថ្នាំពេទ្យ២ប្រអប់

៩-សាប៊ូ៦ដុំ

១០-ថវិកាចំនួន ១០០,០០០រៀល៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម និងលោក ស្រី ញូង ចរិយា អ៊ុន ចាន់ដា នាព្រឹកថ្ងៃ ទី១២ ខែកញ្ញាឆ្នាំ ២០២០នេះ បានអញ្ជើញចូលរួមក្នុងពិធីបុណ្យកាន់បិណ្ឌវេនទី១១ នៅវត្ត ខែលជ័យ ស្ថិត ក្នុង ឃុំ អូរស្វាយ ស្រុកកំពង់សៀម ដោយមានការអញ្ជើញចូលរួមពី លោក ខ្លូត ផន ប្រធាន ក្រុមប្រឹក្សា ខេត្ត លោក លោកស្រី អភិបាល រង ខេត្ត សមាជិកក្រុមប្រឹក្សាខេត្ត ថ្នាក់ដឹកនាំ មន្ត្រីរាជការ នៃមន្ទីរអង្គភាព ពាក់ព័ន្ធ ជុំវិញខេត្ត និង អជ្ញាធរ មូលដ្ឋាន ព្រមទាំងពុទ្ធបរិស័ទ ជាច្រើនរូបផងដែរ ។

ក្នុង ពិធី នោះដែរ លោក អ៊ុន ចាន់ដា អភិបាលខេត្តកំពង់ចាម រួមនឹង ថ្នាក់ដឹកនាំ មន្ត្រី រាជការ បាន ឧទ្ទិស សូម ឲ្យ ដួង វិញ្ញាណក្ខន្ធ បុព្វការី ជន បាន យោង យកកំណើត កើត នៅ ក្នុង ទីឋាន ដ៏ ខ្ពង់ខ្ពស់ និង ងាក ក្រោយ ឲ្យ ពរជ័យ ដល់ កូន ចៅ បាន សេចក្តីសុខ សេចក្តីចម្រើន ជាពិសេស សូម ឲ្យ ព្រះ បារមី ដ៏ សក្ដិសិទ្ធិ នៅក្នុង លោក ក៏ដូចជា ព្រះ បារមីនៅវត្ត ខែលជ័យ តាម ជួយ បីបាច់ ថែរក្សា សម្តេច តេជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រ កម្ពុជា និង សម្តេច កិត្តិព្រឹទ្ធបណ្ឌិត មាន សុខ ភាព ល្អ បរិបូរណ៍ ជន្មាយុ យឺនយូរ ដើម្បី សម្តេច បានដឹកនាំ នាវា កម្ពុជា ឲ្យ រក្សា បាន ជានិរន្តរ៍ នូវ សន្តិភាព ស្ថេរភាព នយោបាយ សន្តិសុខ សណ្តាប់ធ្នាប់ សាធារណៈ និង ការអភិវឌ្ឍ រីកចំរើន ថ្មីៗ បន្ថែមទៀត ដើម្បី ជា សេចក្តីសុខ សេចក្តីចម្រើន របស់ ប្រជាពលរដ្ឋ ខ្មែរ ទូទាំងប្រទេស។ ព្រមទាំង ឧទ្ទិស នូវ មហា កុសលផល បុណ្យ សូម ឲ្យ បាន ដល់ វិញ្ញាណក្ខន្ធ វីរៈ កម្មាភិបាល យុទ្ធជន យុទ្ធ នារី អ្នកស្នេហាជាតិ ដែល បាន បាត់បង់ ជីវិត ដើម្បី បុព្វ ហេតុ ជាតិ មាតុភូមិ ជាតិ ស្នេហា នៃ យើង ផងដែរ ៕SRP