ព័ត៌មានជាតិ

ខេត្តសៀមរាប៖របាយការណ៍បានបញ្ជាក់ថាករណីអគ្គិភ័យ ភ្លើងឆេះបង្គោលភ្លើង មិនបានប្រើប្រាស់រថយន្តពន្លត់អគ្គិភ័យនោះទេ ដោយសារប្រជាពលរដ្ឋ បានទំនាក់ទំនងទៅខាងអគ្គិសនី មុន បន្ទាប់មកខាងអគ្គិសនីបានមកផ្តាច់ចរន្ត និងពន្លត់ភ្លើងរលត់។ សមត្ថកិច្ចបញ្ជាក់ថាមូលហេតុទុស្សេខ្សែភ្លើងលើបង្គោលភ្លើង។
សូមជម្រាបថាហេតុការណ៍បានកើតឡើងនៅថ្ងៃអាទិត្យទី២០ ខែកញ្ញា ឆ្នាំ២០២០ នៅវេលាម៉ោង១៥និង១៣នាទី ហើយបានរលត់ទៅវិញនៅវេលាម៉ោង១៥និង៣០នាទី ស្ថិតនៅភូមិវត្តដំណាក់ សង្កាត់សាលាកំរើក ក្រុងសៀមរាប ខេត្តសៀមរាប៕SRP

ខេត្តសៀមរាប៖អាជ្ញាធរបានរាយការណ៍ថាយុវជនម្នាក់ បានលោតពីលើស្ពានតាអោង បណ្ដាលលង់ទឹកស្លាប់បង្កឲ្យមានការភ្ញាក់ផ្អើល។

ហេតុការណ៍បានកើតឡើងវេលាម៉ោង ល្ងាចថ្ងៃទី២០ខែកញ្ញាឆ្នាំ២០២០ នៅចំណុចស្ពានតាអោង ក្នុងភូមិចុងស្ពាន ឃុំខ្វាវ ស្រុកជីក្រែង។

ជនរងគ្រោះមានឈ្មោះ ទុំ មករា អាយុ១៨ឆ្នាំ មានទីលំនៅភូមិកំបោរអរ ឃុំខ្វាវ ស្រុកជីក្រែង។

បើតាមសមត្ថកិច្ចដកស្រង់សំដីការបំភ្លឺរបស់អ្នករស់នៅជិតខាង និងមានការធ្វេីពិនិត្យពិច័យរបស់សមត្ថកិច្ចជំនាញ មូលហេតុ ជនរងគ្រោះបានឡេីងលេីស្ពានលោតលេងទឹក បណ្តាលអោយលង់ទឹកស្លាប់តែម្ដង។

ពាក់ព័ន្ធទៅនឹងករណីនេះបន្ទាប់ពី បានត្រួតពិនិត្យលើសាកសព រួច ប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕SRP

ខេត្តកំពង់ចាម៖លោក ស៊ាន សុគុន ប្រធានមន្ទីរទេសចរណ៍ ខេត្តកំពង់ចាម បានឲ្យដឹងថា ក្នុងឱកាសបុណ្យភ្ជុំបិណ្ឌ ដោយរាប់ចាប់ពីថ្ងៃទី១៦ ដល់ថ្ងៃទី១៨ ខែកញ្ញា ឆ្នាំ២០២០នេះ ខេត្តកំពង់ចាម ទទួលបានភ្ញៀវទេសចរណ៍មកទស្សនាកំសាន្តសរុបចំនួន ៣៥.៥៩៧ នាក់ ក្នុងនោះភ្ញៀវអន្តរជាតិមានចំនួន ២៣នាក់ ។ លោកប្រធានមន្ទីរ បានបញ្ជាក់ថា ចំនួនភ្ញៀវទាំងអស់នោះ គឺមកទស្សនាកំសាន្ត នៅតាមកន្លែងកំសាន្តនានា មានដូចជា៖ រមណីដ្ឋានទឹកឆារមណីដ្ឋានកសិថ្មដាទឹកឆា រមណីដ្ឋានភ្នំហាន់ជ័យ រមណីដ្ឋានឬស្សី រមណីដ្ឋាន ភ្នំប្រុស ភ្នំស្រី រមណីដ្ឋាននគរបាជ័យនិងអាហារដ្ឋានស្មៅទន្លេ។
លោកប្រធានមន្ទីរទេសចរណ៍ខេត្តកំពង់ចាម ក៏បានបញ្ជាក់ដែរថា ចំពោះ ស្ថានភាពទូទៅ នៅតាមកន្លែងកម្សាន្ត និងនៅតាមរមណីយដ្ឋាននីមួយៗ មានសន្តិសុខ សណ្តាប់ធ្នាប់ របៀបរៀបរយល្អ នឹងមានការយាមប្រចាំការ ពីកម្លាំងសមត្ថកិច្ច ។ ចំណែកឯការលក់ដូរក៏ដូចជាតម្លៃទំនិញវិញពុំមានការឡើងថ្លៃហួសពីប្រក្រតីនោះឡើយ។
សូមរំលឹកថាពិធីបុណ្យភ្ជុំបិណ្ឌដែលជាពិធីបុណ្យដ៏ធំមួយរបស់ខ្មែរយើងសម្រាប់ការធ្វើបុណ្យទានឧទ្ទិសកុសលជូនដល់វិញ្ញាណក្ខន្ធដូនតាដើម្បីសុំសេចក្ដី សុខរកស៊ីទទួលទានមានបានដោយការជួបជុំសាច់ញាតិបងប្អូននិងការដើរលេងកម្សាន្តនៅតាមរមណីយដ្ឋាននានាយ៉ាងសប្បាយរីករាយ៕SRP

ខេត្តសៀមរាប៖មនុស្សចំនួនពីរនាក់​និងវត្ថុតាងត្រូវបាននគរបាលក្រុងសៀមរាបបញ្ជូនទៅតុលាការដើម្បីអនុវត្តតាមផ្លូវច្បាប់បន្ទាប់ពីបានសាកសួរចម្លើយរួច និងសារភាពថា​ ពិតជាបានធ្វើសកម្មភាពលួច។

ជនសង្ស័យទី១-ឈ្មោះទូច ញាញ់ ភេទស្រី អាយុ១៩ឆ្នាំ មុខរបរគ្មាន មានទីលំនៅបច្ចុប្បន្ននៅភូមមណ្ឌល៣ សង្កាត់ស្លក្រាម ក្រុងសៀមរាប។ទី២-ឈ្មោះសឿន ភារិនភេទប្រុសអាយុ១៤ឆ្នាំ មុខរបរគ្មាន មានទីលំនៅបច្ចុប្បន្ននៅភូមិមណ្ឌល៣ សង្កាត់ស្លក្រាម ក្រុងសៀមរាប។

យោងតាមរបាយការណ៍របស់អធិការនគរបាលក្រុងសៀមរាបបានបង្ហាញថាបន្ទាប់ពីជនសង្ស័យធ្វើសកម្មភាពលួចបាន ក៏យកភេសជ្ជៈ​ទាំងនោះ​ ដាក់ចូលក្នុងការ៉ុង ដឹកតាមកង់ទៅរកជួបបក្ខពួកគេពីរនាក់ទៀតដើម្បីលក់ ប៉ុន្តែត្រូវបាន

នគរបាលចុះល្បាត ប្រទះឃើញ​ឃាត់ខ្លួនតែម្ដង។ ។ វត្ថុតាងដកហូតបាន​ រួមមាន​ ភេសជ្ជៈខារ៉ាប៉ាវចំនួន ២០កំប៉ុង, ទឹកក្រូចIZEចំនួន ០៧ដប, បាកាសចំនួន ០៧កំប៉ុង,គោជល់ចំនួន ០៥កំប៉ុង ស្រាបៀរហ្គែនស្បឺតចំនួន ១៥កំប៉ុង​ កូនកាំបិតចំនួន០២ កង់ចំនួន០២គ្រឿង និងកូនកន្ត្រៃចំនួន០១ផងដែរ។

សូមជម្រាបថាការឃាត់ខ្លួនធ្វើនៅវេលាម៉ោងទៀបភ្លឺថ្ងៃទី១៧ខែកញ្ញាឆ្នាំ២០២០កន្លងទៅ​​ដោយនគរបាលបុស្តិ៍សង្កាត់ជ្រាវ សហការណ៍ ជាមួយនគរបាលការិយាល័យអន្តរាគមន៍ខេត្តសៀមរាប បន្ទាប់ពីបានសកម្មភាពយកកូនកាំបិត​ ចិតបន្លែ​ ចៀរធុងទឹកក(កន្លែងសំរាប់ចាក់សោរ) លួចយក​ ភេសជ្ជ: ពីក្នុងធុងទឹកកក នៅចំណុចតូបលក់ដូរ០១កន្លែង​ ស្ថិតនៅភូមិខ្នារ សង្កាត់ជ្រាវ ក្រុងសៀមរាប​ របស់ជនរងគ្រោះ ឈ្មោះ ប៉ោ សុខណេង ភេទស្រី អាយុ៣៣ឆ្នាំ មានមុខរបរលក់ឥវ៉ាន់ចាបហួយ៕SRP

ខេត្តកំពង់ធំ៖បើមិនមានអ្វីប្រែប្រួលនោះទេនៅព្រឹកថ្ងៃទី ២១ ខែកញ្ញាឆ្នាំ២០២០ស្អែកនេះ លោកឧត្តមសេនីយ៍ទោម៉ែន លី អតីតស្នងការខេត្តឧត្ដរមានជ័យនឹងត្រូវប្រកាសជាស្នងការខេត្តកំពង់ធំ ជំនួសលោកអ៉ិត គឹមស្រ៊ន ស្នងការស្ដីទី។ នេះបើយោងតាមសេចក្ដីប្រកាសរបស់ស្នងការនគរបាលខេត្តកំពង់ធំ ដែលបានចេញជូនដំណឹងនៅថ្ងៃទី១៨ខែកញ្ញាឆ្នាំ២០២០។

សូមជម្រាបថាលោកឧត្តមសេនីយ៍ទោ

ម៉ែន លី អតីតស្នងការនគរបាលខេត្តឧត្ដរមានជ័យ ត្រូវបានផ្លាស់ចេញបន្ទាប់ពីលោកឧត្តមសេនីយ៍ ហួត សុធីស្នងការរងខេត្តសៀមរាប ទៅកាន់មុខតំណែងជាស្នងការខេត្តឧត្តរមានជ័យជំនួសកាលពីថ្មីៗនេះ។

សូមបញ្ជាក់រផងដែរថាអតីតស្នងការនគរបាលខេត្តកំពង់ធំ លោកឧត្តមសេនីយ៍ទោអ៊ុក កុសល ត្រូវបានប្ដូរចេញ បន្ទាប់ពីមានរឿងចម្រូងចម្រាសដោយកូនចៅប្ដឹងទៅថ្នាក់ដឹកនាំពាក់ព័ន្ធករណីបៀតបៀនកេរ្តិ៍ខ្មាស់។ ចំណែកឧត្តមសេនីយ៍ត្រីអ៉ិត គឹមស្រ៊ន ស្នងការរង ត្រូវបានឡើងជាស្នងការស្ដីទីជំនួសលោកឧត្តមសេនីយ៍ទោអ៊ុក កុសល។

អ្នកនាំពាក្យក្រសួងមហាផ្ទៃ លោកនាយឧត្តមសេនីយ៍ ខៀវ សុភ័គ ធ្លាប់បានអះអាងប្រាប់សារព័ត៌មានថ្មីៗថា  ក្រសួងមហាផ្ទៃ បានសម្រេចបញ្ចប់ឧត្តមសេនីយ៍ទោ អ៊ុក កុសល ពីតំណែងស្នងការខេត្តកំពង់ធំហើយ។

ការបញ្ចប់មុខតំណែងរបស់លោក អ៊ុក កុសល គឺបន្ទាប់ពីលោក ត្រូវនគរបាលនារីៗមួយចំនួន ក្រោមឱវាទ ប្តឹងទៅសម្តេច ស ខេង រដ្ឋមន្រ្តីក្រសួងមហាផ្ទៃថា បានបៀតបៀនកេរ្តិ៍ខ្មាសលើពួកនាង។

លោក ខៀវ សុភ័គ បានថ្លែងថា៖«ក្រោយពីស៊ើបអង្កេតទៅ ឃើញថា បានប្រព្រឹត្តដូចការប្តឹងមែន»។
បើតាមលោក ខៀវ សុភ័គ បញ្ជាក់ថា លោក អ៊ុក កុសល ត្រូវបានទម្លាក់ឋានន្តរស័ក្តិពីផ្កាយ២ (ឧត្តមសេនីយ៍ទោ) មកនៅត្រឹមស័ក្តិ៥ (វរសេនីយ៍ឯក) ហើយក្រសួងមហាផ្ទៃ បានស្នើឲ្យទម្លាក់ស័ក្តិ២ថ្នាក់ថែមទៀត (អាចនៅត្រឹមស័ក្តិ៣)។

បើគេចាំមិនភ្លេចទេខេត្តកំពង់ធំមានស្នងការជាច្រើនជំនាន់មកហើយ តែងតែមានកូនចៅថ្នាក់ក្រោមប្ដឹងពាក់ព័ន្ធទៅនឹងការងារដឹកនាំមានភាពមិនប្រក្រតី។ ទោះយ៉ាងណាគេសង្ឃឹមថា ស្នងការថ្មីគឺលោកឧត្តមសេនីយ៍ទោ ម៉ែនលី នឹងដឹកនាំអង្គភាពស្នងការនគរបាលខេត្តកំពង់ធំ មិនឱ្យមានករណីដូចស្នងការមុនៗឡើយ៕SRP

ខេត្តសៀមរាប៖សេចក្ដីរាយការណ៍ព័ត៌មានបឋមបានឲ្យដឹងថាកម្លាំងអាវុធហត្ថស្រុកស្វាយលើបានឃាត់រថយន្តដឹកឈើមួយគ្រឿងដែលសង្ស័យថាបង្កប់ឈើថ្មី។
ហេតុការណ៍បានធ្វើឡើងនៅវេលាម៉ោង ០៩យប់ថ្ងៃទី១៩ខែកញ្ញាឆ្នាំ ២០២០ស្ថិតនៅទីរួមស្រុកស្វាយលើ។
ទោះយ៉ាងណារថយន្ត ដឹកឈើផ្ទះចាស់ខាងលើ ត្រូវបានសមត្ថកិច្ចអាវុធហត្ថ សហការជាមួយរដ្ឋបាលព្រៃឈើស្រុកស្វាយលើឃាត់ទុកដើម្បីរង់ចាំត្រួតពិនិត្យមើលនៅថ្ងៃស្អែក៕SRP

ខេត្តកំពង់ស្ពឺ៖ជនសង្ស័យប្រុសស្រី០៥នាក់ត្រូវបានកម្លាំងនគរបាលស្រុកគងពិសីធ្វើការឃាត់ខ្លួនរួមជាមួយវត្ថុតាង ខណ:ចុះល្បាតតាមមូលដ្ឋាន។

ការឃាត់វេលាម៉ោង១០និង៥០នាទីព្រឹក ថ្ងៃទី១៩ ខែកញ្ញា ឆ្នាំ២០២០ នៅចំណុចភូមិស្វាយទាប ឃុំអង្គពពេល ស្រុកគងពិសី ខេត្តកំពង់ស្ពឺ។

ជនសង្ស័យ

ទី០១-ឈ្មោះ សំណាង ឈីត ភេទ ប្រុស អាយុ ១៧ឆ្នាំ នៅភូមិព្រៃកី សង្កាត់ពងទឹក ខណ្ឌដង្កោ រាជធានីភ្នំពេញ

ទី០២-ឈ្មោះ នួន គា ហៅ ពុធ ភេទ ប្រុស អាយុ ១៧ឆ្នាំ នៅភូមិក្រាំងក្រូច ឃុំ ស្រុក ខេត្តកណ្ដាល

ទី០៣-ឈ្មោះ ញ៉ែម មករា ភេទ ប្រុស អាយុ ៣៤ឆ្នាំ នៅភូមិស្វាយទាប ឃុំអង្គពពេល ស្រុកគងពិសី

ទី០៤-ឈ្មោះ យិន យ៉ារ៉ូ ភេទ ប្រុស អាយុ ១៤ឆ្នាំ នៅភូមិអូរការ៉ុង ឃុំវាំងចាស់ ស្រុកឧដុង្គ

និងទី០៥-ឈ្មោះ សុន ធារ៉ា ភេទ ស្រី អាយុ ១៧ឆ្នាំ នៅភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។

ក្រោយពីឃាត់ខ្លួនដកហូតបានម្សៅក្រាមពណ៌សថ្លាសង្ស័យជាគ្រឿងញៀន ១កញ្ចប់តូច , ជញ្ជីងថ្លឹងគ្រឿងញៀន ១ , ម៉ូតូ ២ , ទូរស័ព្ទដៃ ៤គ្រឿង , អាវុធខ្លី ម៉ាក K59 មួយដើម , បង់ ១ មានគ្រាប់ ៦គ្រាប់ , ដាវ ២ រួមនឹងឧបករណ៍ប្រើប្រាស់គ្រឿងញៀនមួយចំនួន។

បច្ចុប្បន្ននគរបាលបញ្ជូនទៅតុលាការដើម្បីអនុវត្តតាមច្បាប់៕SRP

ខេត្តសៀមរាប៖សេចក្ដីរាយការណ៍បានដឹងថាពលរដ្ឋបានប្រទះឃើញ សាកសពម្នាក់ នៅស្ទឹងសៀមរាបបង្កឲ្យមានការភ្ញាក់ផ្អើល។
ហេតុការណ៍នៅវេលាម៉ោង១៧និង៤០នាទីថ្ងៃទី១៩ខែកញ្ញាឆ្នាំ២០២០ចំណុចមាត់ស្ទឹងសៀមរាបមុខផ្សារទំនើបទ្រេធសេនធ័រ ក្រុមទី១០ភូមិមណ្ឌល១សង្កាត់ស្វាយដង្គំ ក្រុងសៀមរាប។
យោងតាមរបាយការណ៍របស់អធិការនគរបាលក្រុងសៀមរាបលោកវរសេនីយ៍ឯកណុប សារ៉ាក់ បានឲ្យដឹងថា
ករណីមនុស្សលង់ទឹកស្លាប់នេះជនរងគ្រោះឈ្មោះព្រឹម វ៉ាន់នី ភេទស្រីអាយុ៣៨ឆ្នាំ មុខរបរគ្មានស្នាក់នៅភូមិកក្រាញ សង្កាត់សៀមរាប ក្រុងសៀមរាប។
មូលហេតុ ស្រវឹងស្រា។
សូមបញ្ជាក់ជនរងគ្រោះស្រវឹងខួប
តាមព័ត៌មានពីឈ្មោះកែវ ពេជ្រកន្និការ ភេទស្រីអាយុ៣៥ឆ្នាំបានបញ្ជាក់ថាជនរងគ្រោះ ត្រូវជាអតីតបងថ្លៃតែបានលែងលះជាមួយបងរបស់គាត់រយ:ពេល១៤ឆ្នាំមកហើយ។ ដោយ ជនរងគ្រោះបាត់ពីផ្ទះរយ:ពីថ្ងៃមកហើយ។ ទោះយ៉ាងណាក្រោយមានការភ្ញាក់ផ្អើលសមត្ថកិច្ចខេត្តសៀមរាបបានចុះទៅដល់ទីតាំងកើតហេតុផងដែរដើម្បីពិនិត្យលើសាកសព។បើយោងតាមរបាយការណ៍របស់អធិការនគរបាលក្រុងសៀមរាប បង្ហាញថាពុំមានមិនពាក់ព័ន្ធ ករណីផ្សេងនោះទេ៕SRP

ខេត្តសៀមរាប៖អាជ្ញាធរស្រុកស្វាយលើបានរាយការណ៍ថាបុរសម្នាក់បានសម្រេចចងកសម្លាប់ខ្លួនឯងនិងដើមចន្ទី។
ហេតុការណ៍បានកើតឡើងនៅវេលាម៉ោង ១១ព្រឹកនាទី ថ្ងៃ សោរ៍ ថ្ងៃទី ១៩ ខែ កញ្ញា ឆ្នាំ ២០២០​ នៅចំណុច(អូររូង)ភូមិត្រពាំងពពេល​ ឃុំតាសៀម​ សស្រុកស្វាយលើ។
ជនរងគ្រោះ​ឈ្មោះ​ ស្រេង​ ធារ៉ា​ ភេទប្រុស​ អាយុ​២៩ឆ្នាំ​ មានស្រុកកំណេីត​ នៅភូមិលេខ២​ ឃុំចំការអណ្តូង​ ស្រុកចំការលើ​ ខេត្ត​កំពង់ចាម​ មានឪពុកឈ្មោះ សៀង ម៉ុង ភេទប្រុស អាយុ ៥៥ឆ្នាំ​ និងម្តាយឈ្មោះ​ សេង​ ភាព​ ភេទស្រីឣាយុ​ ៥៥ឆ្នាំ​ មកស្នាក់នៅបណ្តោះអាសន្ន នៅភូមិត្រពាំងពពេល (អូរូង) ឃុំតាសៀម ស្រុកស្វាយលើ ខេត្តសៀមរាប។
បើតាមអាជ្ញាធរថាមូលហេតុ​ ខឹងម្ដាយស្តីបន្ទោស។ក្រោយការពិនិត្យ របស់សមត្ថកិច្ចពុំឃើញមានស្លាកស្នាមអ្វីគួរអោយកត់សម្គាល់ឡើយ ហេីយបានធ្វើកំណត់ហេតុប្រគល់សាកសពជូនសាច់ញាតិដើម្បីធ្វើបុណ្យតាមប្រពៃណី៕SRP

ខេត្តសៀមរាប៖ជនសង្ស័យម្នាក់ ឈ្មោះសឿម វឌ្ឍនា ភេទប្រុស អាយុ១៨ឆ្នាំ មានទីលំនៅមិនពិតប្រាកដ ត្រូវបាន
កម្លាំងនគរបាលព្រហ្មទណ្ឌក្រុងសៀមរាប និងប៉ុស្ដិ៍នគរបាលរដ្ឋបាលស្វាយដង្គុំ សហការឃាត់ខ្លួន និងកសាងសំណុំរឿងបញ្ជូនទៅតុលាការដើម្បីអនុវត្តតាមច្បាប់ពាក់ព័ន្ធអំពេីលួចទូរស័ព្ទ។
លោកវរសេនីយ៍ឯកណុប សារ៉ាក់ អធិការនគរបាលក្រុងសៀមរាបបានអះអាងថានៅថ្ងៃទី​ ១៨​ ខែ​ កញ្ញា​ ឆ្នាំ​ ២០២០ម៉ោង​ ៤:០០នាទី​ទាបភ្លឺ​ ស្ថិតនៅចំណុចភោជនីយដ្ឋានស៊ុបម្រះក្រោយស្តាតចាស់​ ក្នុងភូមិ​សាលាកន្សែង​ សង្កាត់​ ស្វាយដង្គំ​ ក្រុង​សៀមរាប​ ជនសង្ស័យបានលួចយកទូរស័ព្ទដៃ០៣គគ្រឿងមានម៉ាក៖
១-ZTEលេខ​ ០៩៦៦៧៣១៥២៥ ពណ៌ខ្មៅ
២-Vivoលេខ​ ០៩៧​ ៣៩៥២៨៣៤​ពណ៌ទឹកប៊ិចក្រម៉ៅ
៣-Iphone 6 plusលេខ០៩៧៦៩១៧៤២២ពណ៌ទឹកមាស​ របស់ជនរងគ្រោះឈ្មោះ​ ឡោម​ ឡី​ ភេទ​ ប្រុស​អាយុ​១៨ឆ្នាំ​ មុខរបរ​បុគ្គលិកស៊ុបម្រះស្នាក់នៅកន្លែងកេីតហេតុខាងលេី។
លោកវរសេនីយ៍ឯកណុប សារ៉ាក់ បន្តថា
ក្នុងពេលជនសង្ស័យធ្វើសកម្មភាព ជនរងគ្រោះភ្ញាក់ទាន់ ក៏រាយការណ៍មកសមត្ថកិច្ច ចុះអន្តរាគមន៍ នឹងឃាត់ខ្លួនបានភ្លាមៗ។
ជនសង្ស័យបានឆ្លើយសារភាពថាខ្លួនពិតជាបានលួចទូរស័ព្ទរបស់ជនរងគ្រោះពិតប្រាកដមែន។ ចំណែកវត្ថុតាងទូរស័ព្ទ បានប្រគល់ឲ្យទៅជនរងគ្រោះជាម្ចាស់វិញ៕SRP

ខេត្តបាត់ដំបង ៖ យុវជនម្នាក់បានលង់ទឹកស្លាប់នៅក្នុងរមណីយដ្ឋាន ទឹកធ្លាក់ចំការស្វាយ។

ហេតុការណ៍បានកើតឡើងនៅថ្ងៃទី១៨ខែកញ្ញាឆ្នាំ២០២០ ស្ថិតក្នុង ភូមិ ស្រែ ជី ពៅ ឃុំ មានជ័យ ស្រុក សំឡូត ។

ជន រងគ្រោះ ឈ្មោះ យឿ ត ម៉េងហួរ អាយុ១៧ឆ្នាំនៅភូមិឃុំជ្រៃ ស្រុកថ្មគោល ខេត្តបាត់ដំបង។ សមត្ថកិច្ចស្រុកបានដកស្រង់សម្តីរបស់ក្រុមគ្រួសារ មក បញ្ជាក់ថា កូន គាត់ បាន ចុះ ហែល លេង នៅ កន្លែង ទឹក ជ្រៅ ដោយ គ្មាន អាវ សម្រាប់ ពាក់ ការពារ នោះទេ ហើយទឹកកួចខ្លាំងផង ទើបបណ្ដាលឱ្យលង់ស្លាប់តែម្ដង។

បើតាមប្រភពបានឲ្យដឹងថា នៅ កន្លែង ដែលមាន ទឹក ជ្រៅ នៅរមណីយដ្ឋានទឹកធ្លាក់ចំការស្វាយត្រូវ បានម្ចាស់ ដាក់ ស្លាក សញ្ញា ដើម្បីហាមឃាត់ដែរ។ ប៉ុន្តែ មាន អ្នកខ្លះ អាង ថា ខ្លួន ចេះ ហែល ទឹក មិន ព្រម ពាក់ អាវ ការពារ ហើយមិនគោរពតាមការណែនាំដែរ ដោយមានមនុស្សច្រើនទើបម្ចាស់មិនអាចមើល អស់ ។
សាកសព ត្រូវបាន ក្រុមគ្រួសារ ដឹកយក ទៅធ្វើ បុណ្យ នៅ លំនៅស្ថាន វិញ ៕SRP

ខេត្តកំពង់ធំ៖សេចក្ដីរាយការណ៍បានឲ្យដឹងថាសកម្មភាពដឹកជញ្ជូនឈើចេញពីទឹកដីខេត្តព្រះវិហារចូលមកក្នុងខេត្តកំពង់ធំបានកំពុងកើតមានដូចហែកឋិន ខណ:អាជ្ញាធរជំនាញពាក់ព័ន្ធរក្សាភាពស្ងប់ស្ងាត់បណ្ដោឲ្យឈ្មួញដឹកជញ្ជូនតាមតែអំពើចិត្ត។

សេចក្ដីរាយការណ៍បន្តថាការដឹកជញ្ជូនឈើយ៉ាងអនាធិបតេយ្យបែបនេះនៅតាមផ្លូវជាតិលេខ៦២ពីខេត្តព្រះវិហារ ចូលមកចែកចាយតាមដេប៉ូមួយចំនួននៅក្នុងខេត្តកំពង់ធំ ដោយមិនមានមន្ត្រីជំនាញពាក់ព័ន្ធណាចេញមុខបង្ក្រាបនោះទេ។ ប្រការដែលឈ្មួញអាចដឹកជញ្ជូនឈើបានដោយរលូនគ្មានការបង្ក្រាបយ៉ាងដូច្នេះត្រូវបានគេសង្ស័យថាមន្ត្រីជំនាញពាក់ព័ន្ធទទួលបានផលប្រយោជ៏តាមរបៀបពុករលួយ។

សូមជម្រាបថាសកម្មភាពដឹកជញ្ជូនឈើរបស់ក្រុមឈ្មួញចេញពីទឹកដីខេត្តព្រះវិហារចូលមកខេត្តកំពង់ធំ គឺភាគច្រើនក្រុមឈ្មួញាបានប្រើប្រាស់រថយន្តប្រភេទសាំយ៉ុងក្នុងការដឹកជញ្ជូន ដោយពួកគេធ្វើសកម្មភាពទាំងយប់ទាំងថ្ងៃតែម្ដង៕SRP