ព័ត៌មានជាតិ

ខេត្តត្បូងឃ្មុំ៖សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន
នៅថ្ងៃព្រហស្បតិ៍ ១៤ កើត ខែអស្សុជ ទោស័ក ព.ស ២៥៦៤ ត្រូវនឹងថ្ងៃទី០១ ខែ តុលា ឆ្នាំ២០២០ បានអញ្ជើញជាអធិបតីក្នុងពិធីបុណ្យឆ្លងវិមានគុណមាតាបិតា ឧទ្ទិសមហាកុសលជូនដួងវិញ្ញាណក្ខន្ធមហាឧបាសក លីន គ្រី និងអ្នកឧកញ៉ាព្រឹទ្ធមហាឧបាសិកាធម្មញាណវិវឌ្ឍនា ប៊ុន ស៊ាងលី ដែលប្រារព្ធធ្វើនៅ ភូមិ២ ឃុំរកាខ្នុរ ស្រុកក្រូចឆ្មារ ខេត្តត្បូងឃ្មុំ។ ពិធីបុណ្យឆ្លងវិមានគុណមាតាបិតាគឺមានរយៈពេល៣ថ្ងៃ គឺចាប់ពីថ្ងៃទី ១ ដល់ថ្ងៃទី ៣ តុលា ឆ្នាំ ២០២០៕SRP

ភ្នំពេញ៖រដ្ឋមន្ត្រីក្រសួងមហាផ្ទៃនៅព្រលប់ថ្ងៃទី ០១ ខែតុលាឆ្នាំ ២០២០ នេះបានអះអាងថាក្នុងរយៈពេល៩ខែ ឆ្នាំ២០២០នេះ អត្រាគ្រោះថ្នាក់ ស្លាប់ និងរងបួស មានការថយចុះ គួរឲ្យកត់សំគាល់។
តាមរយៈទំព័រហ្វេសប៊ុកផ្លូវការរបស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានសរសេរថា{បងប្អូនជនរួមជាតិជាទីគោរពស្រឡាញ់ដ៏ជ្រាលជ្រៅ!}

នៅថ្ងៃនេះ ខ្ញុំព្រះករុណាខ្ញុំ សូមសម្ដែងនូវការកោតសរសើរ និង វាយតម្លៃខ្ពស់ចំពោះលទ្ធផលនៃការអនុវត្តច្បាប់ស្ដីពីចរាចរណ៍ផ្លូវគោកក្នុងរយៈពេល៩ខែ គិតចាប់ពីខែមករា ដល់ខែកញ្ញា ឆ្នាំ២០២០នេះ ដែលអត្រាគ្រោះថ្នាក់ ស្លាប់ និងរងបួសមានការថយចុះគួរឲ្យកត់សំគាល់ បើប្រៀបធៀបនឹងរយៈពេលដូចគ្នាកាលពីឆ្នាំ២០១៩។

របាយការណ៍បានបង្ហាញថា ក្នុងរយៈពេល៩ខែឆ្នាំ២០២០នេះ មានគ្រោះថ្នាក់ចរាចរណ៍ផ្លូវគោកបានកើតឡើងសរុបចំនួន២៤៣០លើក ថយចុះ៧២៩លើក ស្មើនឹង២៣,០៧ភាគរយ ធៀបនឹងរយៈពេលដូចគ្នាកាលឆ្នាំ២០១៩។ រយៈពេល៩ខែកាលពីឆ្នាំ២០១៩ មានគ្រោះថ្នាក់ចរាចរណ៍កើតឡើងរហូតដល់ទៅ៣១៥៩លើក។

អត្រាគ្រោះថ្នាក់ថយចុះ ធ្វើឲ្យអត្រាអ្នកស្លាប់ក៏បានថយចុះ! នៅក្នុងគ្រោះថ្នាក់ចរាចរណ៍ដែលថយចុះមកនៅត្រឹម២៤៣០លើកនេះ បានធ្វើឱ្យចំនួនអ្នកស្លាប់ថយចុះ២៦៤នាក់ ស្មើនឹង១៧,៣៥ភាគរយ បើធៀបនឹងរយៈពេលដូចគ្នាកាលពីឆ្នាំ២០១៩។ រយៈពេល៩ខែឆ្នាំ២០១៩ គ្រោះថ្នាក់ចរាចរណ៍បានបណ្ដាលឲ្យមានអ្នកស្លាប់ចំនួន១៥២១នាក់។

ចំណែកអត្រាអ្នករងរបួសដោយសារគ្រោះថ្នាក់ចរាណ៍វិញ នៅក្នុងរយៈពេល៩ខែឆ្នាំ២០២០នេះ អ្នករងបួសមានចំនួន៣៦៦៣នាក់ បានថយចុះ១០៥៨នាក់ ស្មើនឹង២២,៤១ភាគរយ បើធៀបនឹងរយៈពេល៩ខែដូចគ្នាកាលឆ្នាំ២០១៩ ដែលអ្នករងបួសដោយសារគ្រោះថ្នាក់ចរាចរណ៍ពេលនោះ មានរហូតដល់ទៅ៤៧២១នាក់។

ផ្អែកលើលទ្ធផលនេះ ខ្ញុំព្រះករុណាខ្ញុំ សូមថ្លែងអំណរគុណ និងកោតសរសើរខ្ពស់ ចំពោះស្មារតីយកចិត្តទុកដាក់បំពេញភារកិច្ចដឹកនាំការអនុវត្តច្បាប់ស្ដីពី ចរាចរណ៍ផ្លូវគោកទាំងយប់ ទាំងថ្ងៃ ដោយគ្មានការនឿយហត់ របស់ថ្នាក់ដឹកនាំ និងមន្រ្តីកងកម្លាំងនគរបាលគ្រប់លំដាប់ថ្នាក់ នៃអគ្គស្នងការដ្ឋាននគរបាលជាតិ គណៈបញ្ជាការឯកភាពរដ្ឋបាលរាជធានីខេត្ត។

ខ្ញុំព្រះករុណា ខ្ញុំ ក៏សូមថ្លែងអំណរគុណយ៉ាងជ្រាលជ្រៅបំផុត ចំពោះបងប្អូនជនរួមជាតិទាំងមូល និងអ្នកបញ្ជាមធ្យោបាយធ្វើដំណើរគ្រប់ប្រភេទទាំងអស់ ដែលបានចូលរួមគោរពច្បាប់ចរាចរណ៍យ៉ាងខ្ជាប់ខ្ជួន និងគ្រប់ពេលធ្វើដំណើរ ធ្វើឲ្យអត្រាគ្រោះថ្នាក់ ចំនួនអ្នកស្លាប់ និងរងរបួសដោយសារគ្រោះថ្នាក់ចរាចរណ៍មានការថយចុះគួរឲ្យកត់សំគាល់ជាបន្តបន្ទាប់។

ឆ្លៀតនៅក្នុងឱកាសនេះ ខ្ញុំព្រះករុណា ខ្ញុំសូមបន្តការអំពាវនាវដល់ប្អូនជនរួមជាតិទាំងអស់! អំពាវនាវដល់អ្នកបញ្ជាយានយន្តទាំងអស់! សូមប្រកាន់ខ្ជាប់នូវស្មារតីបើកបរដោយការគោរពច្បាប់ចរាចរណ៍ និងប្រុងប្រយ័ត្នគ្រប់ពេលវេលា និងសូមស្នើថ្នាក់ដឹកនាំសមត្ថកិច្ចគ្រប់លំដាប់ថ្នាក់បន្តបំពេញភារកិច្ចដ៏ថ្លៃថ្លាក្នុងការរក្សាសុវត្ថិភាព ចរាចរណ៍ជូនប្រជាពលរដ្ឋ និងបន្តផ្តល់ការលើកទឹកចិត្តដល់មន្ត្រីដោយស្មារតីយកចិត្តទុកដាក់ខ្ពស់៕SRP

ខេត្តបាត់ដំបង៖សេចក្ដីរាយការណ៍បានឲ្យដឹងថាបនល្បែងស៊ីសងប្រភេទជល់មាន់ដ៏ធំមួយកន្លែង បានបើកលេងយ៉ាងគគ្រឹកគគ្រេង ដើម្បីស្វាគមន៍លោកស្នងការថ្មី លោកសាត គឹមសាន។

ទីតាំងល្បែងភ្នាល់ជល់មាន់នេះ នៅចំណុចភូមិស្ពង់ ឃុំអន្លង់វិល ស្រុកសង្កែ ខេត្តបាត់ដំបង បានដំណើរការជាយូណាស់មកហើយ។ មានការលើកឡើងថាបនល្បែងស៊ីសងនេះអាចដំណើការបាន សង្ស័យថៅកែល្បែងបានបង់លុយឲ្យអធិការស្រុកសង្កែ និងស្នងការខេត្តទើបបើកលេងបានដោយរលូនគ្មានអ្នកបង្ក្រាប។

ប្រជាពលរដ្ឋបានលើកឡើងថានៅស្រុកសង្កែ តែងតែមានអំពើចោរកម្មកើតមានជាបន្តបន្ទាប់ ចាប់តាំងពីមានបនល្បែងជល់មានខាងលើនេះមក។ ពួកគាត់ថាល្បែងជល់មាន់នេះបានធ្វើឲ្យប៉ះពាល់យ៉ាងធ្ងន់ធ្ងរយ៉ាងខ្លាំងដល់សន្តិសុខការរស់នៅរបស់ពួកគាត់។ ជាពិសេសបានកំពុងតែប៉ះពាល់ដល់គោលនយោបាយដល់ភូមិឃុំមានសុវត្ថិភាពផងដែរ។ ពាក់ព័ន្ធទៅនឹងការនេះ សៀមរាបប៉ុស្តិ៍ មិនអាចទាក់ទង លោកសាត គឹមសានស្នងការនគរបាលខេត្តបាត់ដំបងដើម្បីបំភ្លឺបានទេ។ ប៉ុន្តែអធិការនគរបាលស្រុកសង្កែ លោកស៊ុន សុវណ្ណ បានប្រាប់ក្រុមអ្នកយកព័ត៌មាននៅថ្ងៃទី៣០ ខែកញ្ញា ឆ្នាំ២០២០ម្សិលមិញថា លោកមិនគាំទ្រឲ្យមានល្បែងក្នុងតំបន់លោកគ្រប់គ្រងទេ។ លោកថានឹងនាំកម្លាំងចុះទៅបង្ក្រាបភ្លាមបើនៅតែបើកលេងបន្តទៅទៀតដាច់ខាតមិនឲ្យកើតមានល្បែងស៊ីសងនោះទេ ហើយក៏មិនចូលចិត្តល្បែងស៊ីសងផងដែរ។

សូមជម្រាបថាកាលពីថ្ងៃទីកាលថ្ងៃទី២៣ ខែកញ្ញា ឆ្នាំ២០២០ ខេត្តបាត់ដំបងមានរៀបចំពិធីប្រកាសលោកឧត្តមសេនីយ៍ត្រី សាត គឹមសាន ឱ្យចូលកាន់តំណែងជាស្នងការនគរបាលខេត្ត ជំនួសលោកឧត្តមសេនីយ៍ទោ អ៊ុច សុខុន ដែលចូលនិវត្តន៍។ ពលរដ្ឋសង្កេតឃើញថាចាប់តាំងពីលោកសាត គឹមសាន ចូលកាន់ជាស្នងការខេត្តមកឃើញថាបនល្បែងនៅខេត្តបាត់ដំបង ចាប់ផ្ដើមកើតមានយ៉ាងអនាធិបតេយ្យបំផុត មិនទាន់មានការបង្ក្រាបនៅឡើយទេ៕SRP

ខេត្តសៀមរាប៖បុរស៣នាក់ត្រូវបានកម្លាំងអាវុធហត្ថខេត្តសៀមរាបនិងស្រុកពួកចាប់ខ្លួនពាក់ព័ន្ធករណីពីបទ ជួញដូរ និង ប្រើប្រាស់ដោយខុសច្បាប់នូវសារធាតុញៀន។

ការបង្ក្រាបនេះដឹកនាំដោយលោកវរសេនីយ៍ត្រី ធាវ ច័ន្ទតារា នាយការិយាល័យប្រឆាំងបទល្មើសគ្រឿងញៀននៃអាវុធហត្ថខេត្ត ធ្វើឡើងនៅវេលាម៉ោង ១៦ និង ៣០នាទី ថ្ងៃទី ៣០ខែកញ្ញា ឆ្នាំ២០២០ នៅចំណុចភូមិកិត្តិយស ឃុំព្រៃជ្រូក ស្រុកពូក ខេត្តសៀមរាប។

លោកវរសេនីយ៍ត្រី ធាវ ច័ន្ទតារា បានឲ្យដឹងថាជនសង្ស័យ
១.ឈ្មោះជា សេងហៃ ភេទប្រុស អាយុ ២៥ ឆ្នាំ មុខរបរអាជីវករ រស់នៅភូមិកិត្តិយស ឃុំព្រៃជ្រូក ស្រុកពូក ខេត្តសៀមរាប។
២.ឈ្មោះ ជា សេងឃាំងអាយុ២១ ឆ្នាំ មុខរបរធ្វើស្រែ រស់នៅភូមិកិត្តិយស ឃុំព្រៃជ្រូក ស្រុកជីក្រែង ខេត្តសៀមរាប។
៣.ឈ្មោះមុឺន កំសត់ ភេទ ប្រុស អាយុ ២៨ ឆ្នាំ មុខរបរជាងសំណង់ រស់នៅភូមិព្រៃជ្រូក ឃុំជ្រូក ស្រុកពូក ខេត្តសៀមរាប។
ប្រតិបត្តិការនេះដកហូត វត្ថុតាងរួមមាន៖ថ្នាំញៀនម្សៅក្រាមពណ៌សថ្លាចំនួន ១៥កញ្ចប់ទម្ងន់៧.៥៤ ក្រាម។ទូរស័ព្ទដៃចំនួន០៣គ្រឿងនិងឧបករណ៍ប្រើប្រាស់ថ្នាំញៀនមួយចំនួន ។ធ្វើតេស្តទឹកនោមចំនួន០៣ នាក់ប្រុស ០៣ នាក់ ( វិជ្ជមានចំនួន ៣នាក់ ) ។ បច្ចុប្បន្ន ជនសង្ស័យ និងវត្ថុតាង កំពុងបន្តនីតិវិធី៕SRP

ខេត្តសៀមរាប៖កម្លាំងនគរបាលផ្នែកព្រហ្មទណ្ឌក្រុងសៀមរាប នៅវេលាម៉ោង 2និង30នាទី នាថ្ងៃទីពុធ ថ្ងៃទី 30 ខែសីហាឆ្នាំ 2020នេះបាន សហការជាមួយនគរបាលរដ្ឋបាលសង្កាត់គោកចក បានចុះទៅនៅទីតាំងដីឡូតិ៍មួយកន្លែង ស្ថិតនៅភូមិវាល សង្កាត់គោកចក ក្រុងសៀមរាប ខេត្តសៀមរាប។

មន្ត្រីនគរបាលបានឲ្យដឹងថាពេលចុះទៅដល់ ពុំឃើញមានលែងល្បែងខុសច្បាប់នោះទេ។ ដោយមានរបងខ្ពស់បិទទ្វារសោរជិតផងដែរ។

សូមជម្រាបថាការចុះទៅពិនិត្យនេះ បន្ទាប់ពីមានសារព័ត៌មានមួយចំនួនបានផ្សាយថាទីតាំងខាងលើមានល្បែងសីសងជល់ និងលេងអាប៉ោង៕SRP

ខេត្តកំពង់ចាម​៖នគរបាលស្រុកព្រៃឈរ បានចាប់ឃាត់ខ្លួនបុរសជាឪពុកម្នាក់ តាមពាក្យបណ្ដឹង បន្ទាប់ពីបានចាប់រំលោភសេពសន្ថវៈទៅលើកូនស្រីបង្កើតរបស់​ខ្លួន​ ​អាយុ​១៣ឆ្នាំ​ រហូត​បាន​សម្រេច​ នៅចំណុចព្រៃចំការដំឡូង​ ស្ថិតក្នុងភូមិថ្មពូនកណ្ដាល ឃុំថ្មពូន ស្រុកព្រៃឈរ​ ខេត្តកំពង់ចាម។
ការឃាត់ខ្លួនបានធ្វើឡើងកាលពីវេលាម៉ោង៣និង៤០នាទី​ ល្ងាច​ថ្ងៃ​ទី​២៩​ ខែកញ្ញា​ ឆ្នាំ​២០២០​។

សមត្ថកិច្ច​បាន​ឲ្យដឹងថា​ បន្ទាប់​ពី​ទទួលបានពាក្យបណ្ដឹងពី​ស្ត្រី​ម្នាក់​ ឈ្មោះអ៊ុន ចាន់ធី​ អាយុ៣៧​ ជាតិខ្មែរ​ មុខរបរកសិករ​ កាលពីវេលាម៉ោង១១និង​២០នាទីព្រឹក​ ថ្ងៃទី២៩​ ខែកញ្ញា​ ឆ្នាំ​២០២០ ប្ដី​របស់​ខ្លួនឈ្មោះសៀង​ ហុង អាយុ៣៥ឆ្នាំ​ ផឹកស្រាស្រវឹង​ បាននាំកូនស្រី​របស់​ខ្លួនបង្កើ
ត ឈ្មោះស សណ អាយុ១៣ឆ្នាំ​ ទៅកាប់ឫស្សី​ នៅចំណុចព្រៃចំការដំឡូង​ ហើយធ្វើសកម្មភាពគំរាមកំហែង​រួចរំលោភសេពសន្ថវៈទៅលើនាង​រហូត​បានសម្រេច១លេីក​។ បច្ចុប្បន្នជនសង្ស័យ ត្រូវ​បានឃាត់ខ្លួនទុកនៅអធិការដ្ឋាននគរបាលស្រុកព្រៃឈរ​ ​ដើម្បី​ធ្វើការ​សាកសួរ​ និង​កសាងសំណុំរឿងតាមនីតិវិធី​ច្បាប់​៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្ត កំពង់ចាម និងលោកខ្លូត ផន ប្រធានក្រុមប្រឹក្សា ខេត្ត នៅពីព្រឹកមិញនេះ បានដឹកនាំមន្រ្តីរាជការ នៃ មន្ទីរអង្គភាពពាក់ព័ន្ធជុំវិញខេត្តនិងអាជ្ញាធរស្រុកព្រៃឈរអញ្ជើញចូលរួមគោរពវិញាណក្ខន្ធសព លោកគ្រូ អ៊ូ ហុង សមាជិកក្រុមប្រឹក្សាស្រុក ព្រៃឈរ ដែលលោកបានទទួលមរណៈភាព កាលពីថ្ងៃចន្ទ១១កេីតខែអស្សុជ ឆ្នាំជូត ទោស័ក ព.ស ២៥៦៤ត្រូវនឹងថ្ងៃទី២៨ខែកញ្ញាឆ្នាំ២០២០ វេលាម៉ោង៦និង៤៥នាទីព្រឹកក្នុងជន្មាយុ៦៦ឆ្នាំ ដោយរោគាពាធហើយសពត្រូវបានតម្កល់ទុក ធ្វើ បុណ្យនៅគេហដ្ឋានស្ថិតនៅក្នុងភូមិព្រៃឈរ ឃុំ ព្រៃឈរ ស្រុកព្រៃឈរ ខេត្តកំពង់ចាម។

ក្នុងឱកាសនោះដែរលោកអ៊ុន ចាន់ដា និងលោក ខ្លូត ផន ព្រមទាំងសមាជិកក្រុមប្រឹក្សាខេត្ត អភិបាលរងខេត្តនិងថ្នាក់ដឹកនាំមន្ត្រីរាជការ និង អាជ្ញាធរ ស្រុកព្រៃឈរ បានចូលរួមសម្ដែងនូវសមានទុក្ខយ៉ាងគ្រៀមក្រំ ជាមួយគ្រួសារសព និងអញ្ជើញអុចធូប បួងសួងសូមឲ្យឌួងវិញាណក្ខន្ធសព លោក គ្រូ អ៊ូ ហុង បានសោយសុខទៅកាន់ដ្ឋានបរមសុខ កុំបីភ្លាំងភ្លាត់ឡើយ ។

ជាមួយគ្នានោះ ឯកឧត្តមអភិបាលខេត្ត ក៏បាននាំយកថវិកា ចំនួន១លានរៀល និងថវិកាស្រុក ព្រៃឈរ ៣.៣០០០០លានរៀល ដេីម្បីចូលរួមក្នុងពិធីរៀបចំបុណ្យសពនេះផងដែរ ។

សូមបញ្ជាក់ថាក្រុមគ្រួសារសពក៏បានមូលមតិគ្នា ដង្ហែរទៅបញ្ចុះនៅទួលស្វាយតាសរខាងលិចភូមិ ព្រៃឈរ ឃុំព្រៃឈរ ស្រុកព្រៃឈរវេលាម៉ោង៨ព្រឹកថ្ងៃទី០១ខែតុលានេះហើយគ្រោងប្រារព្ធធ្វើបុណ្យទក្ខិណានុប្បទាន គម្រប់ខួប៧ថ្ងៃ ទៅតាមកិច្ចសាសនា ដើម្បីឧទ្ទិសកុសលផលបុណ្យដល់ឌួងវិញ្ញាណក្ខ័ន្ធរបស់លោក គ្រូ អ៊ូ ហុង នៅថ្ងៃទី៣ខែតុលា ឆ្នាំ២០២០ខាងមុខនេះ៕SRP

ខេត្តស្វាយរៀង៖ឪពុកចុងចាប់បង្ខំរំលោភកូនស្រីអាយុ១១ឆ្នាំបានសម្រេចចំនួន៨ដងទើបបែកឆ្លាយដោយប្រជាពលរដ្ឋ ជិតខាងបានឃើញហេតុការនេះ។

នគបាលប៉ុស្ត៍រដ្ឋបាលឃុំស្វាយរំពារបានឲ្យដឹងថា ករណីឪពុកចុងបង្ខំកូនស្រីរួមភេទ ដោយកូនស្រីចុងកាលពីយប់ថ្ងៃទី២៨កញ្ញា២០២០នៅវេលាម៉ោង៩និង៣០នាទីយប់ ឃុំស្វាយរំពារ ស្រុកស្វាយទាបខេត្តស្វាយរៀង។
ជនសង្ស័យមានឈ្មោះសាញ់ រតនា ភេទប្រុសអាយុ៣៣ឆ្នាំ មុខរបរអ្នកលេងភ្លេងការ រស់នៅភូមិកើតហេតុខាងលើ។ចំណែកជនរងគ្រោះឈ្មោះច ព ស អាយុ១១ឆ្នាំមុខរបរសិស្សរស់នៅជាមួយគ្នា។

សមត្ថកិច្ចបញ្ជាក់ថា តាមចម្លើយសារភាពរបស់ជនសង្ស័យពិតជាបានបង្ខំកូនស្រីចុងរួមភេទពិតប្រកដមែន បានចំនួនពី៧ទៅ៨ដងតាំងពីខែមករាឆ្នាំ២០២០មកដល់ថ្ងៃទី២៩កញ្ញា២០២០នេះ។

បើតាមសមត្ថកិច្ចឲ្យដឹងទៀតថា ជនសង្ស័យតែងតែចាប់កូនស្រីរំលោភនៅពេលប្រពន្ធដែលជាម្តាយកុមារីរងគ្រោះមិននៅផ្ទះ ដោយស្រ្តីជាម្តាយក៏ជាអ្នកចំរៀងភ្លេងការ។ នេះជាឱកាសប្តីតែងតែរកលេះទៅនេះទៅនោះនិងត្រឡប់ទៅផ្ទះមុនប្រពន្ធ ពេលមកដល់ផ្ទះក៏ចាប់បង្ខំកូនស្រីរួមភេទ ហើយគម្រាមកូនស្រីមិនឲ្យប្រាប់ម្តាយ បើប្រាប់និងវាយធ្វើបាបទើបនាងមិនហ៊ានប្រាប់ម្តាយ។

អ្នកស្រុកនិយាយថា ជនសង្ស័យនេះមានប្រពន្ធច្រើននាក់មកហើយ បានលែងលះគ្នាទើបយកអ្នកចុងក្រោយគឺបានម្តាយកុមារីរងគ្រោះ ក៏មានករណីចាប់រំលោភកូនស្រីចុងបែបនេះ។

សមត្ថកិច្ចបានបញ្ជាក់ថានៅព្រឹកថ្ងៃទី៣០កញ្ញា២០២០នេះ ជនសង្ស័យត្រូវបានសមត្ថកិច្ចចាប់ខ្លួនបញ្ជូនមកអធិការដ្ឋាននគបាលស្រុកស្វាយទាបដើម្បីកសាងសំណុំរឿងបញ្ជូនមកស្នងការដ្ឋាននគបាលខេត្តស្វាយរៀងចាត់ការបន្តតាមនីតិវិធី៕SRP

ខេត្តសៀមរាប៖ជនបរទេសម្នាក់ត្រូវបានឃាត់ខ្លួនករណីហិង្សាលើស្ត្រីជាសង្សា។

លោកវរសេនីយ៍ឯក ណុប សារ៉ាក់ អធិការនគរបាលក្រុងសៀមរាបបានឲ្យដឹងថាយោងតាមដីកាសម្រេចឲបើកការ ស៊ើបអង្កេតបឋម លេខ ៣៨៨ ចុះថ្ងៃទី២៨ ខែកញ្ញា ឆ្នាំ២០២០ ចេញដោយ លោក កើត វណ្ណារ៉េត ព្រះរាជអាជ្ញា អមសាលាដំបូងខេត្តសៀមរាប។ សមត្ថកិច្ចឃាត់ខ្លួនជនសង្ស័យឈ្មោះ FAISAl ហៅ RALO CHAN ភេទប្រុស អាយុ៣០ឆ្នាំ ជនជាតិប៉ាគីស្ថាន ស្នាក់នៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប ក្នុងករណី អំពើហិង្សាដោយចេតនាមានស្ថានទម្ងន់ទោស និង ប្រើប្រាស់ដោយខុសច្បាប់នូវសារធាតុញៀន។

លោកអធិការបន្តថាកាលពីថ្ងៃទី០៧ ខែកញ្ញាឆ្នាំ២០២០ ម៉ោង១២,០០នាទី នៅចំណុចក្នុងបន្ទប់លេខG6 អាផាតមិន Phat Nata ស្ថិតនៅក្នុងភូមិតាវៀនសង្កាត់សាលាកំរើកក្រុងសៀមរាបខេត្តសៀមរាប ជនសង្ស័យឈ្មោះ FAISAL ហៅ Ralo Chan បានប្រើហិង្សាយកញញួរដែក វាយទៅលើក្បាលជង្គង់ ទាំងសងខាងចំនួន១០ដង បណ្តាលឲមានស្នាមជាំឈាម និង ទះកំភ្លៀងច្រើនដៃទៅលើ ស្ត្រីខ្មែរម្នាក់ ដែលត្រូវជាសង្សារនឹងគ្នា រួចគេចខ្លួនបាត់។ ក្រោយពេលបានទទួលបណ្តឹងរួច រហូតដល់ម៉ោង១៣,២០នាទីថ្ងៃទី២៩ខែកញ្ញាឆ្នាំ២០២០សមត្ថកិច្ចបានស្រាវជ្រាវឃើញឈ្មោះ FAISAL ហៅ Ralo Chan កំពុងស្នាក់នៅក្នុងបន្ទប់លេខ ៣១៧ នៃ ស្មាត អង្គរ ប៊ូទិក ស្ថិតក្នុងភូមិស្ទឹងថ្មី សង្កាត់ស្វាយដង្គំ ក្រុងសៀមរាប ហើយក៏បានឃាត់ខ្លួនយកមកសាកសួរទើបជនសង្ស័យឈ្មោះខាងលើ បានឆ្លើយសារភាពថា៖ខ្លួនគេពិតជាបានប្រើហិង្សាទៅលើជនរងគ្រោះប្រាកដមែន និងពិតជាបានប្រើប្រាស់គ្រឿងខុសច្បាប់ផងដែរ៕SRP

ខេត្តព្រៃវែង៖ដោយសារតែអំណាចស្រាធ្វើឲ្យស្ត្រីម្នាក់ចាក់សម្លាប់ប្តីខ្លួនឯងមិនញញើតដៃ។
ហេតុការណ័បានកើតឡើង
នៅថ្ងៃអង្គារទី២៩ ខែកញ្ញា ឆ្នាំ២០២០ វេលាម៉ោង១១និង៥០នាទីថ្ងៃត្រង់ នៅចំណុចលើផ្លូវលំស្ថិតនៅភូមិក្តាមពុក ឃុំសេនារាជឧត្តម ស្រុកព្រះ ស្ដេចខេត្តព្រៃវែង។
ជនសង្ស័យឈ្មោះ សោម ស៊ីម៉ាក់ អាយុ៣៥ឆ្នាំ រស់នៅក្នុងភូមិឃុំកើតហេតុខាងលើ។

សមត្ថកិច្ចបានឲ្យដឹងថា ជនសង្ស័យ បានយកដែកបន្លាកដាប់ថ្មបេតុង ចុងស្រួចប្រវែង3តឹក ចាក់ទៅលើប្តីឈ្មោះ អ៊ុន លី អាយុ៤៨ឆ្នាំ ចំបំពង់ក១កន្លែង បណ្តាលឲ្យស្លាប់នៅកន្លែងកើតហេតុ។
មូលហេតុ ប្តីប្រពន្ធខាងលើនេះ ស្រវ៉ឹងស្រាជោគជាំ ហើយបានទាស់ទែងគ្នា រហូតបង្កជាហិង្សា។

បច្ចុប្បន្ន សាកសព សមត្ថកិច្ចប្រគល់ជូនសាច់ញាតិយកធ្វើបុណ្យតាមប្រពៃណី។ចំណែកជនសង្ស័យត្រូវបានឃាត់ខ្លួន នៅអធិការរដ្ឋានស្រុកព្រះស្ដេច៕SRP

ខេត្តសៀមរាប៖ជនសង្ស័យចំនួនពីរនាក់ត្រូវបានឃាត់ខ្លួន ពាក់ព័ន្ធអំពើលួចមានស្ថានទម្ងន់ទោស និងប្រើប្រាស់គ្រឿងញៀន។
ការឃាត់ខ្លួនធ្វើឡើងនៅថ្ងៃទី២៩ ខែកញ្ញា ឆ្នាំ២០២០ នៅសង្កាត់គោកចក ក្រុងសៀមរាប បន្ទាប់ពីបានឃាត់ខ្លួនឈ្មោះក្រូច ផល្លា អាយុ១៨ឆ្នាំរស់នៅភូមិវាល សង្កាត់គោកចក ក្រុងសៀមរាបកាលពីថ្ងៃម្សិលមិញ។
ជនសង្ស័យ១.ឈ្មោះ សុទ្ធ វណ្ណៈ ភេទប្រុស អាយុ ១៧ឆ្នាំ មុខរបរ គ្មាន ២.ឈ្មោះ ឡេង ដេវីត ភេទប្រុសអាយុ១៧ឆ្នាំ មុខរបរគ្មាន អ្នកទាំងពីរបច្ចុប្បន្នស្នាក់នៅភូមិមណ្ឌល៣ សង្កាត់ស្លក្រាម ក្រុងសៀមរាប។
សូមរំលឹកថាករណី លួចបានកើតឡើងកាលពីវេលាម៉ោង ២២ និង ៤០នាទី ថ្ងៃទី២៧ ខែកញ្ញា ឆ្នាំ ២០២០ ត្រង់ចំណុចភូមិមណ្ឌល៣ សង្កាត់ស្លក្រាម ក្រុងសៀមរាប។
ជនសង្ស័យទាំងពីរបានសារភាពថាពិតជាបានលួចប្រាកដមែន។ កន្លងមកពួកខ្លួនធ្លាប់លួចគាស់ផ្ទះក្នុងក្រុងសៀមរាបចំនួន ០៦ករណីមកហើយ។
សូមជម្រាបថាប្រតិបត្តិការនេះដឹកនាំផ្ទាល់ដោយលោកវរសេនីយ៍ទោ សុខ ម៉េងអ៊ាង នាយរងការិយាល័យនគរបាលព្រហ្មទណ្ឌកម្រិតធ្ងន់ ខេត្តសៀមរាបសហការជាមួយនគរបាលក្រុងសៀមរាប និងសង្កាត់គោកចក ក្រោមការណែនាំពី
លោកឧត្តមសេនីយត្រី ភឹង ចិន្តរ៉េត ស្នងការរងទទួលផែនការងារព្រហ្មទណ្ឌ និងលោកប្រធានការិយាលយ័នគរបាលព្រហ្មទណ្ឌកំរិតធ្ងន់៕SRP

ខេត្តសៀមរាប៖ប្រជាពលរដ្ឋចំនួន៩២គ្រួសារ នៅព្រឹកថ្ងៃទី២៩ខែកញ្ញាឆ្នាំ២០២០នេះ បានលើកគ្នាមកកាន់សាលាខេត្ត បំណងសុំអោយអាជ្ញាធរជួយរកដំណោះស្រាយ ខណ:តម្រូវអោយពួកគាត់រុះរើផ្ទះចេញពីលើផ្លូវ ដែលនឹងត្រូវស្ថាបនាក្នុងពេលដ៏ខ្លីខាងមុខ។ ប៉ុន្តែនៅពេលប្រមាណជាង១ម៉ោងក្រោយ ក្រុមពលរដ្ឋ ក៏បានវិលទៅផ្ទះរៀងខ្លួនវិញ បន្ទាប់ពីមន្ត្រីសាលាខេត្ត សន្យាចុះទៅពិនិត្យជាក់ស្តែនៅតាមផ្ទះ។
ក្រុមពលរដ្ឋខាងលើ រស់នៅក្នុងសង្កាត់គោកចកក្រុងសៀមរាប ដោយសាងសង់ផ្ទះនៅលើផ្លូវលេខ២២(សំណង់មិនរៀបរយ) ស្ថិតក្នុងភូមិសង្កាត់ខាងលើ។
នៅមុខសាលាខេត្តសៀមរាប ក្រុមពលរដ្ឋខាងលើបានលើកឡើងថា ពួក គាត់មកសាលាខេត្តនេះ មិនមែនតវ៉ាឬធ្វើកូដកម្មអ្វីនោះទេ គឺគ្រាន់តែមកសុំអោយអាជ្ញាធរ ពិចារណា និងរកដំណោះស្រាយណាមួយដល់ពួកគាត់។ ត្បិតពេលនេះជារដូវវស្សា ភ្លៀងធ្លាក់ជោគជាំជាប្រចាំ ហើយអាជ្ញាធរចេញលិខិតតម្រូវអោយពួក គាត់រុះរើផ្ទះ អោយរួចរាល់ត្រឹមថ្ងៃទី២ខែតុលាឆ្នាំ ២០២០ខាងមុខនេះ។
ពលរដ្ឋម្នាក់ ក្នុងចំណោម៩២គ្រួសារ បានលើកឡើងថា ពួកគាត់ទទួលស្គាល់ថា សំណង់ ផ្ទះរបស់ពួកគាត់ ពិតជាសាងសង់ដោយខុសច្បាប់។ព្រោះសាងសង់លើផ្លូវ ប៉ុន្តែពួកគាត់ពិតជាគ្មានទី ជម្រក ម្យ៉ាងទៀតការរុះរើគឺមានការខូចខាត ចឹងទេការនាំគ្នាមកសាលាខេត្តគឺបំណង សុំអោយអាជ្ញាធរជួយផ្តល់ទីជម្រក។ ក្នុងករណីតានតឹង ក៏សុំអោយជួយផ្តល់ជាថវិកា ខ្លះៗ សម្រាប់ការរុះរើ តែក៏សុំពន្យាពេល អោយផុតរដូវភ្លៀង។ ពលរដ្ឋថា ការវិលទៅផ្ទះវិញរបស់ពួកគាត់ គឺរំពឹងថាអាជ្ញាធរ នឹងជួយដោះស្រាយ តាមភាពជាក់ស្តែង។
ឆ្លើយតប នឹងការលើគ្នាមកសាលាខេត្ត របស់ពលរដ្ខ អភិបាលរង និងជាអ្នកនាំពាក្យសាលាខេត្ត សៀមរាប លោកលី សំរិទ្ធបានមានប្រសាសន៍នៅរសៀលថ្ងៃដដែលនេះថា មន្ត្រីជំនាញបានកំពុងចុះទៅសិក្សាជាថ្មីហើយ។ លទ្ធផលយ៉ាងណានោះ រងចាំមើលសំណើររបស់ពួកគាត់សិន ថាអាជ្ញាធរទទួល យកបានឬយ៉ាងណា។

លោកអភិបាលបញ្ជាក់ថា ប្រសិនបើមិនអាចទទួលយកបាន ហើយក្នុងករណីចាំបាច់ គឺត្រូវតែអនុវត្តវិធានការរដ្ឋបាល(រុះរើ)។ ពីព្រោះសំណង់មិនរៀបរយទាំងនោះ គឺសង់លើផ្លូវលេខ២២តែម្តង។ តែយ៉ាងណា អាជ្ញាធរនិងរកគ្រប់វិធីក្នុងការដោះស្រាយ។
ទោះយ៉ាងណាការលើកគ្នាមកកាន់សាលាខេត្ត របស់ក្រុមពលរដ្ឋ៩២គ្រួសារនេះ គេមិនឃើញមានកងកម្លាំងសមត្ថកិច្ចដាក់ពង្រាយក្នុងការទប់ស្កាត់អំពីការកើតអំពើហិង្សា ដូចការតវ៉ារបស់ពលរដ្ឋមុនៗនោះទេ។ គឺមានត្រឹមតែប៉ូលិសមូលដ្ឋាន៤ទៅ៥នាក់ប៉ុណ្ណោះ ដែលស្ថិតក្នុងហ្វូងពលរដ្ឋ៕SRP