ព័ត៌មានជាតិ

ខេត្តសៀមរាប៖ក្រុមហ៊ុនបុរីកុមារមាស ឯ.ក ដែលមានលក់ផ្ទះល្វែង និងដីឡូតិ៍ នៅស្រុកបន្ទាយស្រី បានចែកអង្ករ ដល់ ពលរដ្ឋជាង៥០គ្រួសារ។
ការចែកអំណោយនេះ ធ្វើនៅសាលាឃុំព្រះដាក់ ស្រុកបន្ទាយស្រីខេត្តសៀមរាប នៅរសៀលថ្ងៃទី១៧ខែតុលាឆ្នាំ២០២០នេះ ដោយមានការចូលរួមពីមេឃុំផងដែរ។
បើតាមការបញ្ជាក់របស់ក្រុមហ៊ុន
បុរីកុមារមាស ឯ.ក ថា ប្រជាពលរដ្ឋដែលបានមកទទួលអំណោយ ទាំងជាង៥០គ្រួសារ ដោយមួយគ្រួសារទទួលបានអង្ករ៥គីឡូនិងក្រមាមួយផងដែរ។ ជាមួយគ្នានេះ ក្រុមហ៊ុនថានឹងបន្តចែកដល់ពលរដ្ឋចំនួន ៥ឃុំទៀត នៅស្រុកបន្ទាយស្រីផងដែរ៕SRP

ខេត្តសៀមរាប៖ក្នុងពេលដឹកនាំក្រុមការងារចុះពិនិត្យស្ថានភាពទឹកអាងទំនប់ម្កាក់ ស្ថិតនៅភូមិខ្វាវ ឃុំគោកធ្លកលើ​ ស្រុកជីក្រែង នៅល្ងាចថ្ងៃទី១៦ ខែតុលា ម្សិលមិញ លោកទៀ សីហា អភិបាលខេត្តសៀមរាប បានណែនាំដល់មន្ទីរធនធានទឹកនិងឧតុនិយម ឲ្យតាមដាន និងពិនិត្យកម្ពស់ទឹកឱ្យបានជាប្រចាំ ប្រសិនបើទឹកឡើងដល់កម្រិតមួយត្រូវប្រកាសអាសន្ន ត្រូវឆាប់ជូនដំណឹងដើម្បីធ្វើជម្លៀស ប្រជាពលរដ្ឋ រកកន្លែងសុវត្ថិភាព។ ម្យ៉ាងទៀត ត្រូវសហការជាមួយអាជ្ញាធរពាល់ព័ន្ធ ត្រៀមលក្ខណៈ ដើម្បីធ្វើការបើកទ្វារទឹក បញ្ចៀសការបាក់ទំនប់ផងដែរ។ ដោយឡែកគណៈបញ្ជាការឯកភាពរដ្ឋបាល និងគណៈកម្មការគ្រប់គ្រងគ្រោះមហន្តរាយរដ្ឋបាលក្រុងស្រុកឃុំ សង្កាត់ ត្រូវត្រៀមជានិច្ចក្នុងការជួយអន្តរាគមន៍ប្រជាពលរដ្ឋ រកទីទួលសុវត្ថិភាព ចៀសវាង មានបញ្ហាគ្រោះថ្នាក់ផ្សេងៗ។ ក្នុងដំណើរចុះត្រួតពិនិត្យទំនប់ម្កាក់នេះដរ អភិបាលខេត្ត ក៏បានអំពាវនាវដល់ពលរដ្ឋ និងសាធារណជន មេត្តាបង្កើនការយកចិត្តទុកដាក់និងប្រុងប្រយ័ត្នខ្ពស់ ដើម្បីចៀសវាង នូវគ្រោះថ្នាក់ផ្សេងៗ ដែលអាចកើតឡើងជាយថាហេតុ។ ដោយសូមចូលរួមសហការ និងផ្តល់ព័ត៌មានជូនដល់អាជ្ញាធរមានសមត្ថកិច្ចដែលនៅជិតបំផុត ដើម្បីជួយអន្តរាគមន៍បានទាន់ពេលវេលា៕SRP

ខេត្តសៀមរាប៖ជនសង្ស័យចំនួន ៥នាក់ត្រូវបានកម្លាំងប៉ុស្តិ៍សង្កាត់គោកចក នៃក្រុងសៀមរាប ធ្វើការឃាត់ខ្លួនពាក់ព័ន្ធករណីគ្រឿងញៀន។
ហេតុការណ៍ធ្វើនៅថ្ងៃ សុក្រទី ១៦ ខែ តុលា ឆ្នាំ ២០២០ នៅវេលាម៉ោង១៤និង៣០នាទី ស្ថិតនៅមុខអង្គរវត្ត ក្នុងភូមិត្រពាំងសេះ សង្កាត់គោកចក ក្រុងសៀមរាប។
មន្ត្រីនគរបាលប៉ុស្តិ៍នគបាលរដ្ឋបាលសង្កាត់គោកចក បានឲ្យដឹងថាការឃាត់ខ្លួនក្រោយពី
បានទទួលព័ត៌មានពីប្រជាពលរដ្ឋថាមានក្មេងប្រមូលផ្តុំគា្នជក់ថ្នាំញៀន ដោយនគរបាលនិងប្រជាការពារភូមិបានចុះទៅដល់ផ្ទះជួបជនសង្ស័យតែម្ដង។

ជនសង្ស័យ
_ទី១ ឈ្មោះ ស៊ុត ហួរ ភេទប្រុស អាយុ២៨ឆ្នាំ មុខរបរកម្មករ នៅភូមិ ត្រពំាងសេះ សង្កាត់គោកចក
ជាម្ចាស់ផ្ទះ
_ទី២ ឈ្មោះ ដឿម រតនា ភេទប្រុស អាយុ៣៩ឆ្នាំ មុខរបរកម្មករ នៅភូមិ ត្រពាំងសេះ
(ជាម្ចាស់ផ្ទះនិងម្ចាស់ថ្នាំញៀន)
_ទី៣ ឈ្មោះ ម៉ី គា ភេទប្រុស អាយុ២៨ឆ្នាំ មុខរបរកម្មករ នៅភូមិ ត្រពាំងសេះ (ជាម្ចាស់ថ្នាំញៀន)
_ទី៤ ឈ្មោះ សុខ ចិន្តា ភេទប្រុស អាយុ៣២ឆ្នាំ មុខរបរកម្មករ នៅភូមិ ប្រីយ៍ចាស់សង្កាត់ទឹកវិល
_ទី៥ ឈ្មោះ ឡុង លាភ ភេទប្រុស អាយុ២២ឆ្នាំ មុខរបរកម្មករ នៅភូមិ គោតាចាន់ ។
ជនសង្ស័យបានសារភាព ខ្លួនពិតជាបានទិញថ្នាំញៀនប្រភេទម៉ាទឹកកកមកប្រើប្រាស់ពិតប្រាកដមែន។
បច្ចុប្បន្នត្រូវបាបញ្ជូនទៅការិយាល័យជំនាញ នៃស្នងការនគរបាលខេត្តសៀមរាបដើម្បីចាត់ការបន្ត៕SRP

ខេត្តសៀមរាប៖លោក វេង សាខុនរ រដ្ឋមន្ត្រីក្រសួងកសិកម្មបានអះអាងថា យើងកំពុងប្រឈមនឹងបញ្ហាពីរសំខាន់គឺជំងឺឆ្លងកូវីដ-១៩ និងគ្រោះទឹកជំនន់ ដែលបញ្ហាទាំងពីរបានបង្កផលប៉ះពាល់យ៉ាងធ្ងន់ធ្ងរដោយផ្ទាល់ និងដោយប្រយោលលើផលិតកម្មស្បៀង។ ក្នុងកាល: ទេស:ដ៏លំបាកនេះ យើងត្រូវរួមគ្នាទប់ស្កាត់ និងចាត់វិធានការដោះ ស្រាយបញ្ហាឲ្យបានទាន់ពេល មានប្រសិទ្ធភាព និងត្រូវបន្តយុទ្ធនាជំរុញផលិត កម្មស្បៀង និងការរក្សានិរន្តរភាពភពផែនដីពី ព្រោះដីជាមូលដ្ឋានផ្តល់ជីវិតសម្រាប់សត្តនិករនៅលើភពផែនដី រួមទាំងការបន្ធូរបន្ថយនូវវិបត្តិដែលបណ្តាលមកពីការប្រែប្រួលធាតុអាកាសផងដែរ ដែលធ្វើឱ្យមនុស្សជាតិជាង២៥០លាននាក់បាននិងកំពុងទទួលរងនូវផលប៉ះពាល់នេះ។

ពិតណាស់ថាការប្រារព្ធទិវានាពេលនេះគឺឆ្លើយតប ទៅនឹងកម្មវិធីសកម្មភាពជាតិប្រយុទ្ធប្រឆាំងនឹងការធ្លាក់ចុះគុណភាពដីដែលត្រូវបានរាជរដ្ឋាភិបាលនុម័តកាលនាឆ្នាំ២០១៨ និងជាពិសេសប្រសាសន៍របស់សម្តេចតេជោ ដែលបានគូសបញ្ជាក់ថា “ដំណោះស្រាយពាក់ព័ន្ធនឹងសន្តិសុខស្បៀង និងអាហារូបត្ថម្ភ មិនត្រឹមតែជាការឆ្លើយតប ទៅនឹងគោលនយោបាយជាអាទិភាពរបស់រាជរដ្ឋាភិបាលប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់ក្នុងការលើកស្ទួយកម្រិតជីវភាព កាត់បន្ថយភាពក្រីក្រ និងរក្សាសុខុមាលភាពរបស់ប្រជាជន ស្របតាមការប្តេជ្ញាចិត្តរបស់រាជរដ្ឋាភិបាលថាមិនឲ្យប្រជាពលរដ្ឋណាម្នាក់ស្លាប់ដោយភាពអត់ឃ្លាននោះឡើយ”។

លោករដ្ឋមន្ត្រីថ្លែងថា ចូលរួមសហការគ្នាផលិតស្បៀង ធានាអាហារូបត្ថម្ភ សន្តិសុខស្បៀង បង្កើតការងារ បង្កើនប្រាក់ចំណូល បង្កើនផលិតភាពផលិតកម្មក្នុងស្រុក តាមរយ:ការប្រើប្រាស់បច្ចេកវិទ្យាទំនើបសមស្រប ធន់នឹងការប្រែប្រួលអាកាសធាតុ បរិយាប័ន្ន និងនវានុវត្តន៍។ លើកកម្ពស់ការផ្សព្វផ្សាយបច្ចេកទេសនៃការប្រើប្រាស់ធាតុចូលកសិកម្មគ្រប់បែបយ៉ាង ទប់ស្កាត់ការកាប់បំផ្លាញព្រៃឈើ និងព្រៃលិចទឹក រក្សាបាននូវភាតរបរិស្ថាន ធនធានធម្មជាតិ(ទឹក ដី ព្រៃ សត្វ និងដំណាំ) ឆ្ពោះទៅសម្រេចគោលនយោបាយ និងយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាន និងគោលនយោបាយអភិវឌ្ឍវិស័យកសិកម្ម ឆ្នាំ២០១៩-២០២៣។

លោកថ្លែងបែបនេះនៅ ក្នុងខួបលើកទី៤០នៃទិវាស្បៀងអាហារពិភពលោកក្រោមប្រធានបទ “រួមគ្នាផលិតស្បៀងសម្រាប់មនុស្ស និងនិរន្តរភាពភពផែនដី” បានរៀបចំប្រារព្វនៅភូមិសំរោងជើង ឃុំសំរោង ស្រុកសូត្រនិគម ខេត្តសៀមរាប នាព្រឹកថ្ងៃសុក្រទី១៦ ខែតុលា ឆ្នាំ២០២០នេះ។

ពិធីនេះដោយអញ្ជើញការចូលរួមពីលោក អ៉ឹង ហឿន ប្រធានក្រុមប្រឹក្សាខេត្ត និងលោក ទៀ សីហា អភិបាលខេត្ត និងឯកអគ្គរាជទូត ឯកអគ្គរដ្ឋទូត លោក Alexandre HUYNH តំណាងអង្គការស្បៀងនិងកសិកម្មនៃសហប្រជាជាតិ លោកស្រី Claire Conan តំណាងកម្មវិធីស្បៀងអាហារពិភពលោកផងដែរ។

លោកទៀ សីហា បានបញ្ជាក់ថាវិស័យកសិកម្ម មានសក្តានុពលសម្រាប់ការបង្កើនផលិតភាពផលិតកម្មស្បៀង ធានាបាននូវនិរន្តរភាពនៃការផ្គត់ផ្គង់នៅទូទាំងខេត្ត ស្របតាមកំណើនទេសចរណ៍ក្នុងរយ:ពេលកន្លងមក។

បើតាមលោកស្រីClaire Conan បានរាយការណ៍ថានេះគឺជាលើកទី៤០ នៃទិវាស្បៀងអាហារពិភពលោក ហើយការប្រារព្ធទិវានាពេលនេះគឺជាព្រឹត្តិការណ៍សាកលរបស់អង្គការសហប្រជាជាតិ ដែលពិភពលោកបានប្រារព្ធឡើងក្នុងន័យបំផុសស្មារតីយល់ដឹង និងទទួលស្គាល់អំពីតួនាទីសំខាន់នៃវិស័យកសិកម្ម ក្នុងការផលិតស្បៀង ធានាសន្តិសុខស្បៀង សុវត្ថិភាពចំណីអាហារ អាហារូបត្ថម្ភ និងនិរន្តរភាពភពផែនដី ដែលគ្រប់តួអង្គពាក់ព័ន្ធត្រូវមានឆន្ទៈចូលរួមឲ្យបានសកម្មក្នុងស្មារតីទទួលខុសត្រូវ សំដៅធានាឲ្យបានសន្តិសុខស្បៀងក្នុងកាល:ទេស:ដែលពិភពលោកបាននិងកំពុងប្រឈមបញ្ហាជំងឺឆ្លងសកលកូវីដ- ១៩។

ចំណែកលោក Alexandre HUYNH បានថ្លែងថាការជំរុញផលិតកម្មស្បៀងគឺជាឆន្ទ:រួមគ្នាពីគ្រប់តួរអង្គពាក់ព័ន្ធរួមមានអ្នកផលិត អ្នកបរិភោគ រដ្ឋាភិបាល វិស័យឯកជន ស្ថាប័នស្រាវជ្រាវ អង្គការជាតិ អន្តរជាតិ និងដៃគូអភិវឌ្ឍ ធ្វើយ៉ាងណាឲ្យខ្លឹមសារនៃប្រធានបទនាថ្ងៃនេះទទួលបានជោគ ជ័យ ហើយអង្គការ FAO នឹងបន្តគាំទ្ររាល់សកម្មភាពដើម្បីឈានទៅសម្រេចឲ្យបាននូវចក្ខុវិស័យរបស់យើងនាពេលអនាគត៕SRP

ខេត្តកំពង់ចាម៖រដ្ឋមន្ត្រីក្រសួងកសិកម្ម វេង សាខុន បានណែនាំឲ្យមន្ទីរកសិកម្ម រុក្ខាប្រមាញ់ និងនេសាទ ត្រូវបន្តតាមដានស្ថានភាពទឹកជំនន់នេះឲ្យបានជាប្រចាំ បង្កាក្រែងលិចសន្ទូងរបស់ប្រជាពលរដ្ឋ ក្នុងករណីមានការរលួយស្រូវ គឺត្រូវជួយចាត់ចែងធ្វើការផ្តល់ពូជស្រូវរយៈពេលខ្លីក្នុងការស្តារឡើងវិញនៅពេលទឺកស្រកនាពេលខាងមុខ ។ ដោយឡែក ម្ចាស់ស្រែក៏ត្រូវចុះពិនិត្យតាមដានអំពីបញ្ហានេះផងដែរ ពិសេសពេលទឹកស្រកត្រូវភ្លឺទប់តម្កល់ទឹកទុកក្នុងស្រែង ក្រែងទឹកហូរចេញអស់។

ថ្លែងយ៉ាងដូច្នេះនាឱកាសដឹកនាំសហការី ចុះទៅសំណេះសំណាលជាមួយពលរដ្ឋ ជាម្ចាស់ស្រែប្រមាណ ៤០០នាក់ ក្នុងវត្តសេរីកោះចំប៉ា នៅ ភូមិកោះចំប៉ា ឃុំព្រីងជ្រំ ស្រុកជើងព្រៃ ខេត្តកំពង់ចាម នៅរសៀលថ្ងៃទី១៦ខែតុលានេះ ដើម្បីពិនិត្យស្ថានភាពទឹកជំនន់ទឹកភ្លៀង។

រដ្ឋមន្ត្រី វេង សាខុន បានពាំនាំនូវការផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន ជានាយករដ្ឋមន្រ្តី និងសម្តេចកិត្តិព្រឹត្តបណ្ឌិតប៊ុន រ៉ានី ហ៊ុន សែន ដែលសម្តេចទាំងពីរជានិច្ចកាលតែងតែយកចិត្តទុកដាក់ គិតគូពីសុខទុក្ខ និងបញ្ហាជីវភាពរបស់ប្រជាពលរដ្ឋ គ្រប់ពេលវេលា ជាពិសេសបងប្អូនដែលកំពុងទទួលរងនូវគ្រោះទឹកជំនន់ និងសម្តេចបានជូនពរឲ្យបងប្អូនទាំងអស់ចៀសផុតពីគ្រោះមហន្តរាយនេះផងដែរ។

បើតាមលោក វេង សាខុន ការចុះពិនិត្យស្ថានភាពជារួម គ្រោះទឹកជំនន់នេះ ពុំមានអ្វីគួរឲ្យបារម្ភ ដោយសារកម្រិតទឹកនៅទាប មិន ទាន់ប៉ះពាល់ដល់ការលូតលាស់សន្ទូងនៅឡើយ។ ជាមួយគ្នានេះដែរ រដ្ឋមន្រ្តីបានឧបត្ថម្ភថវិកាសម្រាប់ម្នាក់ៗ ២០០០០រៀលផងដែរ៕SRP

ខេត្តកំពត៖ប្រជាពលរដ្ឋ​ប្រមាណ៧០​គ្រួសារ នៅក្នុង​ខេត្តកំពត កំពកំពុងអត់ផ្លូវដើរ
ដោយសារតែបុគ្គលម្នាក់ បាន​រំលោភ​យក​ដី​ប្រឡាយ ​ឬ​ផ្លូវភ្លោះ ​ដែល​ពួកគេ​ធ្លាប់​ធ្វើ​ដំណើរ​ចេញចូល​ពី​ថ្នល់ជាតិ​ទៅ​ស្រែ ​និង​ទៅផ្ទះ​។

ពលរដ្ឋបានឱ្យដឹងថា ​អាជ្ញាធរ​ភូមិ​ឃុំ ​បាន​ចុះទៅ​ហាមឃាត់​បុគ្គល​នោះដែរ ​ប៉ុន្តែ​គេ​មិន​ស្តាប់ ​ខណៈដែល​អាជ្ញាធរ​ស្រុក​វិញ ​បានត្រឹមតែ​មក​សន្យា​ហើយ ​សន្យា​ទៀត​ អូសបន្លាយ​រាប់​ខែ គ្មាន​ដំណោះស្រាយ​ដដែល។

ប្រជាពលរដ្ឋ​ ជា​ម្ចាស់​ស្រែ ជាប់មាត់​ប្រឡាយ​ ដែល​គេ​រំលោភ​យក ​នៅក្នុង​ឃុំ​សម្រោង​ក្រោម ​ស្រុក បន្ទាយមាស បាន​លើកឡើងថា​ នៅ​ឃុំ​នេះ​ មាន​ប្រឡាយទឹក​បន្សល់ទុក​ពី​សម័យ ប៉ុលពត ជាច្រើន​ខ្សែ ដែល​បច្ចុប្បន្ន ​ប្រឡាយទឹក​នេះ បាន​ក្លាយ​ជា​ផ្លូវ​សម្រាប់​ចេញចូល​ផ្ទះ​របស់​អ្នកភូមិ​។​ កន្លងមក មិនមាន ​ពលរដ្ឋ​ ណាម្នាក់ហ៊ានចាក់ដីលុប ​ឬ​ធ្វើ​របង​បិទផ្លូវ​ប្រឡាយ​នោះទេ ​តែ​ម្ចាស់​ទីតាំង​ដី​ជាប់​ផ្លូវជាតិ​ម្នាក់ ​ពិត​ជាមានឥទ្ធិពលខ្លាំងណាស់ ព្រោះ​អាជ្ញាធរ​ភូមិ​ឃុំ ​បាន​ចុះ​ហាមឃាត់​ច្រើនដង ប៉ុន្តែ​គេ​នៅតែ​មិន​ស្តាប់ ​រហូតដល់​ពលរដ្ឋ ​បាន​ដាក់​ពាក្យស្នើសុំ​បើកផ្លូវ​ដល់​រដ្ឋបាលខេត្ត ​ហើយ​រដ្ឋបាលខេត្ត ​បាន​ចុះមក​ពិនិត្យ និង ឱ្យ​រក្សា​ប្រឡាយ​ទុក​ដូចដើម​។ ប៉ុន្តែ​អ្វីដែល​គួរឱ្យ​ឆ្ងល់​នោះ គឺ​អាជ្ញាធរ​ស្រុក​បន្ទាយមាស ​ដែល​បាន​សន្យាថា ​ជួយ​ដោះស្រាយ​ម្តង​ហើយ​ម្តងទៀត​ រាប់​ខែ​ទៅហើយ នៅតែ​គ្មាន​លទ្ធផល​បន្តិច​សោះ​។

ប្រជាពលរដ្ឋ បាន​បញ្ជាក់ថា ការបិទផ្លូវ​ប្រឡាយ​នេះ ​គឺជា​បិទផ្លូវ​ធ្វើដំណើរ​របស់​ពួកគេ​ ពី​ផ្ទះ​ទៅ​ផ្លូវ ជាតិ​។

ប្រជាពលរដ្ឋថានឹង​វាយ​ជញ្ជាំង​របង​បិទផ្លូវ​ប្រឡាយ​នេះ​ចេញ ​ក្នុងពេល​ឆាប់ៗ ​ប្រសិនបើ​អាជ្ញាធរ​ស្រុក ​គ្មាន​ដំណោះ​ឱ្យ​ពួកគេ​។ ប្រជាពលរដ្ឋ​ទាំង​៧០​គ្រួសារ​ ស្នើឱ្យ​អាជ្ញាធរ និង​ជំនាញ​ពាក់ព័ន្ធ ជាពិសេស​ អភិបាលខេត្ត ជួយ​ព​ន្លឿ​ន​ដោះស្រាយ​បើកផ្លូវ​ជូន​ពួកគេ​ប្រើប្រាស់​ដូចដើម​វិញ ឱ្យបាន​ឆាប់រហ័ស​៕SRP អួង វុឹង

ខេត្តកំពង់ចាម៖លោក​ អ៊ុន ចាន់ដា អភិបាលខេត្តកំពង់ចាម នៅថ្ងៃទី១៦ ខែខែតុលានេះ អញ្ជើញចុះពិនិត្យការបង្កបង្កើនផលស្រូវរដូវវស្សា របស់បងប្អូនប្រជាកសិករ ស្ថិតនៅ​ក្នុង​ឃុំខ្នុរដំបង ឃុំត្រពាំងគរ និងឃុំសំពងជ័យ ស្រុកជើងព្រៃ។

គួរ​បញ្ជាក់​ថា​ ការបង្កបង្កើនផលដំណាំស្រូវរដូវវស្សាឆ្នាំ២០២០នេះ​សម្រាប់​ខេត្ត​កំពង់ចាម​ អនុវត្តបាន៖ ការភ្ជួររាស់ ៩២ ៧១៥ហិកតា​ សំណាប ១៤៧​ហិកតា​ និងការដាំដុះ ៩២ ៧១៥ហិកតា​ ស្មើនឹង ១០៧.២៣% នៃផែនការ​ ៨៦ ៤៦១ហិកតា​ លឿនជាងឆ្នាំមុន ៣ ៤២៤ ហិកតា​ បើធៀបនឹងរយៈពេលដូចគ្នា។
ចំពោះ​ការប្រមូលផលបាននឹងកំពុងចាប់ផ្តើមលើផ្ទៃដី សរុបចំនួន ២២ ៩១៨ហិកតា​ ស្មើនឹង២៤.៧២%នៃផ្ទៃដី​អនុវត្ត។
ដោឡែក​ដំណាំរួមផ្សំរដូវវស្សាឆ្នាំ២០២០​ អនុវត្តបាន៖ ការភ្ជួររាស់ ៥១ ១២៩ហិកតា​ និងការដាំដុះ ៥១ ១២៩ហិកតា​ ស្មើនឹង១០១.០០% នៃផែនការ ៤៩ ៦៣៣ហិកតា​ យឺតជាងឆ្នាំមុនចំនួន ២៩៥ហិកតា​ បើធៀបនឹងរយៈពេលដូចគ្នា។
ចំពោះ​ការប្រមូលផលបាននឹងកំពុងចាប់ផ្តើមលើផ្ទៃដី សរុបចំនួន ២០ ៧៤៩ហិកតា​ ស្មើនឹង៤១.៣៩%នៃផ្ទៃដីអនុវត្ត។​
បេីយោងតាម​របាយការណ៍​របស់​ លោក​ អ៊ុម​​ វិបុល​ ប្រធាន​មន្ទីរធនធានទឹក និងឧត្តុនិយមខេត្តកំពង់ចាម​ បាន​បញ្ជាក់​​ថា ចាប់​គិតត្រឹម​ព្រឹក​ថ្ងៃទី១៦​ ខែតុលា​ ឆ្នាំ​២០២០នេះ ទឹកទន្លេ​មេគង្គ​ខេត្តកំពង់ចាម​មាន​កម្ពស់​១១.១៣ បេី​ប្រៀបធៀប​នឹង​ថ្ងៃ​ម្សិលមិញ​ឡេីង​០.១៣​ម៉ែត្រ​​ ចំពោះ​កម្រិត​ទឹក​ដែល​ត្រូវ​ប្រកាស​ប្រុងប្រយ័ត្ន​១៥,២០​ ដោយ​ឡែក​​ឆ្នាំ​២០១៨កន្លងទៅ​ទឹក​មាន​កម្ពស់​​៦.១៦ម៉ែត្រ​​​​៕​SRP

ខេត្តកែប៖ករណីសកម្មភាពចាក់ដីលុបសមុទ្រ នៅចំណុច ភូមិអំពែង ឃុំ អង្កោល ស្រុក ដំណាក់ចង្អើរ ខេត្តកែប ត្រូវបាន លោក សោម ពិសិដ្ឋ អភិបាលខេត្ត បញ្ជាឱ្យកាយចេញវិញជាបន្ទាន់។ ការបញ្ជានេះបន្ទាប់ពីមានប្រព័ន្ធផ្សព្វផ្សាយ បានផ្សាយថាបុគ្គលឈ្មោះ គង់ យន្ត ដែលមានងារជា ក្រុមប្រឹក្សាឃុំអង្កោល បានចាក់ដីលុបសមុទ្រ ទាំងបំពានច្បាប់ ខណៈដែលខ្លួនឯងគឺជាមន្ត្រីអនុវត្តច្បាប់។
បើតាមសេចក្ដីរាយការណ៍ថាលោកស្រី គឹម ចាន់នី អភិបាល ស្រុកដំណាក់ចង្អើរ បានឲ្យក្រុមការងារ ចុះទៅពិនិត្យ សកម្មភាព កាយដីវិញ ធ្វើឲ្យប្រជាពលរដ្ឋ មានការសារទរ យ៉ាងខ្លាំង ចំពោះចំណាត់ការ របស់អភិបាលខេត្ត៕SRP

ខេត្តកំពង់ធំ៖ពលរដ្ឋ រស់នៅ ក្នុង ស្រុក សណ្ដាន់ នៅព្រឹកថ្ងៃទី១៦ខែតុលា នេះ ទទួលបានវិញ្ញាបនបត្រសម្គាល់ម្ចាស់អ្ចាស់អចលនវត្ថុ ៨៤១ប័ណ្ណ ពីលោកសុខ លូ អភិបាលខេត្តកំពង់ធំ។ ពិធីនេះធ្វើនៅក្នុងបរិវេណវត្តឈើទាល ឃុំឈើទាល ស្រុក សណ្ដាន់ ខេត្តកំពង់ធំ៕SRP

ខេត្តកែប៖អ្នកភូមិបានរាយការណ៍ថានៅថ្ងៃទី ១៥ខែតុលាឆ្នាំ២០២០ នៅវេលាម៉ោង ០៤និង៤០នាទី នៅចំណុចភូមិអំពែង ឃុំអង្កោល ស្រុកដំណាក់ចង្អើរ មានបុគ្គលឈ្មោះ គង់ យន្ត ដែលមានងារជាក្រុមប្រឹក្សាឃុំអង្កោល បានចាក់ដីលុបសមុទ្រ ទាំងបំពាន ខណៈដែលខ្លួនឯងគឺជាមន្ត្រីអនុវត្តច្បាប់។

ពលរដ្ឋរស់នៅភូមិអំពែង ឃុំអង្កោល បានសម្ដែងការ ហួសចិត្តយ៉ាងខ្លាំង ចំពោះ លោកគង់ យន្តដែលខ្លួនឯងជាមន្ត្រី បែជាធ្វើជាគំរូអាក្រក់ដល់ពលរដ្ឋទៅវិញ។

ពលរដ្ឋបានឲ្យដឹងថា បើជាពួកគាត់សាងសង់តូប ឬក៏ ធ្វើអ្វីមួយនៅមាត់សមុទ្រ ត្រូវតែសុំច្បាប់ ឬសុំច្បាប់ហើយ គេមិនអនុញ្ញាតឲ្យផង ចុះហេតុអ្វីបានជា លោកក្រុមប្រឹក្សាឃុំម្នាក់នេះ ហ៊ានដល់ចាក់ដីលុបសមុទ្រ មិនមានអ្នកណាមកហាមឃាត់បែបនេះ ឬមួយច្បាប់គេអនុវត្តបានតែជាមួយប្រជាពលរដ្ឋទេ ?  ពាក់ព័ន្ធការចាក់លុបមាត់សមុទ្រពីសំណាក់ លោកគង់ យន្ត នេះ លោកម៉ី ជី មេឃុំអង្កោលបានឲ្យដឹងថា មួយរយៈនេះគាត់ឈឺ គាត់បានប្រគល់ការងារឲ្យទៅ ជុំទប់ទី១ ឯរឿងលោកក្រុមប្រឹក្សាឃុំចាក់ដីលុបសមុទ្រនេះ លោកមិនគាំទ្រនោះទេ ក្នុងនាម ខ្លួនគឺជាមន្ត្រី ធ្វើអ្វី តាមតែទំនើងចិត្ត ធ្វើឲ្យប៉ះពាល់ដល់អារម្មណ៍របស់ប្រជាពលរដ្ឋ និងជាគំរូអាក្រក់មួយ ដែលមិនអាចទទួលយកបាន។

ជុំវិញការចោទប្រកាន់នេះបណ្ដាញសៀមរាបប៉ុស្តិ៍ នៅមិនទាន់ទទួលបានការបំភ្លឺពីលោកគង់យន្ត នៅឡើយទេ។
ទោះយ៉ាងណា ពលរដ្ឋ កំពុងតែរង់ចាំចំណាត់ការរបស់អ្នកស្រីគឹមចាន្នី អភិបាលស្រុកដំណាក់ចង្អើរនិង លោកសោម ពិសិដ្ឋ អភិបាលខេត្តកែប ទើបតែឡើងកាន់តំណែងថ្មីថ្មោង តើមានចំណាត់ការយ៉ាងណាចំពោះក្រុមប្រឹក្សាឃុំអង្កោលម្នាក់នេះ៕SRP

ខេត្តសៀមរាប៖អាជ្ញាធរបានអះអាងនៅមុននេះបន្តិចថា
រដ្ឋបាលខេត្ត សូមបញ្ជាក់ថាការផ្សព្វផ្សាយទឹកភ្នំគូលែន គឺរូបភាពឆ្នាំ២០១៧ ហើយបច្ចុប្បន្ន ទឹកមានស្ថានភាពធម្មតា។
អាជ្ញាធរបន្តថាក្នុងអំឡុងពេលស្ថានភាពប្រទេសកម្ពុជាកំពុងតែជួបប្រទះនឹងជំនន់ទឹកភ្លៀង រដ្ឋបាលខេត្តសង្កេតឃើញថាមានគណនេយ្យឈ្មោះ Mai Muon និងគណនេយ្យឈ្មោះ អុក ជួរ បានយករូបភាពទឹកឡើងខ្លាំងនៅតំបន់ភ្នំគូលែនកាលពីថ្ងៃទី៧ ខែតុលា ឆ្នាំ២០១៧ មកបង្ហោះក្នុងគណនេយ្យឡើងវិញ ដែលសកម្មភាពនេះធ្វើឱ្យបងប្អូន ក៏ដូចជាសាធារណជនមានការភាន់ច្រឡំ។ ជាមួយគ្នានេះ រដ្ឋបាលខេត្តសូមបញ្ជាក់ថាស្ថានភាពទឹកនៅតំបន់ភ្នំគូលែនមានស្ថានភាពល្អប្រសើរ និងគ្រប់គ្រងបានដែលមិនទាន់ប្រកាសអាសន្ននោះទេ។

រដ្ឋបាលខេត្ត សូមស្នើឲ្យបងប្អូនផ្សព្វផ្សាយព័ត៌មានឲ្យបានត្រឹមត្រូវ មានមូលដ្ឋានច្បាស់លាស់ ដោយហេតុថា ការផ្សព្វផ្សាយព័ត៌មានមិនពិត ឬមានចេតនាបង្ករការយល់ច្រឡំ ឬអសណ្តាប់សង្គម គឺអាចប្រឈមចំពោះមុខច្បាប់៕SRP