សៀមរាប ប៉ុស្តិ៍

ខេត្តមណ្ឌលគិរី៖ទារិកាម្នាក់ បានកើតចេញមកឃើញពន្លឺព្រះអាទិត្យ ក្នុងមន្ទីរពេទ្យមួយក្នុងខេត្តមណ្ឌលគិរី កាលពីថ្ងៃទី២៩មេសា ប៉ុន្តែអកុសល្យ រូបរាង្គ ក្បាល ដៃ មិនពេញលក្ខណៈជាមនុស្សមានសុខភាពល្អនោះទេ!។

លោកស្រី ម៉ាលី សុខនី ប្រធានមន្ទីរ កិច្ចការនារីខេត្តមណ្ឌលគិរី អញ្ជើញទៅសួរសុខទុក្ខ ស្ត្រីរងគ្រោះ បានឲ្យដឹងថា
ជនរងគ្រោះឈ្មោះ ស .ធ អាយុ១៦ឆ្នាំ ដែលត្រូវឪពុកបង្កើតរំលោភ ជាច្រើនដង
រហូតមានផ្ទៃពោះ និងសម្រាលទារិកាម្នាក់នេះ។ ទារិកានេះ អត់មានលលាដ៏ក្បាល,អញ្ជាញធ្មេញឆែបស្ទើរដល់ក្រអូបមាត់ ម្រាមដៃពិការទាំងសងខាង តែម្រាមជើងគាត់នៅល្អ។

លោកស្រីប្រធានមន្ទីរបន្តថា ទារិកានេះបើសិនមានការថែទាំអាចរស់បាន តែពេលអ្នកស្រីទៅដល់ក្មេងនឹងត្រូវម្តាយគ្របចោលមិនខ្ចីមើលមុខកូនទេ។

សូមរំលឹកថា៖ទារិកាអភ័ព្វម្នាក់នេះ ជាកូនរបស់ឈ្មោះ សិង សៃ អាយុ៤២ឆ្នាំមុខរបរ កសិកររស់នៅ ស្រុកកោះញែក។
ដែលត្រូវជាឪពុកបង្កើត របស់ម្ដាយទារិកាខាងលើ។ជននេះត្រូវបាននគបាលស្រុកកោះញែក ឃាត់ខ្លួនកាលពីថ្ងៃទី២៦ខែមេសា ឆ្នាំ២០២០នៅភូមិ​ណងប៊ួ ឃុំណងឃីលឹក ស្រុកកោះញែក ខេត្តមណ្ឌលគិរី​។

ជនសង្ស័យជាឪពុក បានសារភាពថា៖ ខ្លួនពិតជាបានរំលោភលើកូនស្រីខ្លួនឯងដែលមានអាយុទើបតែ១៦ឆ្នាំនោះប្រាកដមែន។ ការរំលោភកូនស្រីខ្លួនឯងលើកទីមួយគឺចាប់ផ្ដើមនៅក្នុងខែតុលាឆ្នាំ២០១៩នៅពេលប្រពន្ធមិននៅ ដោយខ្ទប់មាត់នាងគំរាមសម្លាប់មិនអោយប្រាប់គេឯងឡើយ និងក្រោយៗទៀតបន្តរួមភេទជាមួយនាង នៅខ្ទមចាំស្រែនឹងកន្លែងផ្សេងៗគ្នា ដោយស្និតស្នាលនឹងគ្នា
ពោលគឺឈានដល់ការស្រលាញ់រវាងឪពុកនឹងកូនទៅហើយ បណ្ដាលឱ្យនាងមានផ្ទៃពោះទើបបែកការណ៍។ករណីនេះ ប្រពន្ធជនសង្ស័យបានប្ដឹងសមត្ថកិច្ចឱ្យចាប់ខ្លួនប្ដីតែម្ដង៕SRP

ខេត្តប៉ៃលិន៖លោកឧត្ដមសេនីយ៍ទោ សេង សុគន្ធ ស្នងការ នៃស្នងការដ្ឋាននគរបាលខេត្ដប៉ៃលិននៅព្រឹកនេះបានដឹកនាំកម្លាំងជំនាញ​ចរាចរណ៍​ផ្លូវ​គោក​ បេីក​កិច្ចប្រជុំផ្សព្វផ្សាយផែនការស្តីពីការបែងចែកក្រុមត្រួតពិនិត្យចុះរឹតបន្តឹងការអនុវត្តច្បាប់ចរាចរណ៍ផ្លូវគោក តាមអនុក្រឹត្យលេខ ៣៩អនក្រ.បក ចុះថ្ងៃទី១៧ ខែមីនា ឆ្នាំ២០២០។
ជាមួយគ្នានេះលោកឧត្ដមសេនីយ៍ ស្នងការ​ ​ក៏​បាន​ធ្វើ​ការ​ត្រួត​ពិនិត្យ​លេី​ឯកសណ្ឋាន​ និង​សក់​ក្បាល​របស់​កងកម្លាំង​ ព្រមទាំងបានណែនាំអំពីអាកប្បកិរិយាក្នុងការអនុវត្តច្បាប់ដល់មន្ត្រីនគរបាលចរាចរណ៍ផ្លូវគោក ដែលត្រូវអនុវត្តចាប់ពីថ្ងៃទី០១​ ខែឧសភា​ ឆ្នាំ​២០២០ តទៅ ។ ក្នុង​កិច្ច​ប្រជុំ​​នេះមានសមាជិកចូលរួមចំនួន ៤១នាក់ ដែល​ប្រព្រឹត្តទៅនៅសាលប្រជុំធំរបស់​ ស្នងការដ្ឋាននគរបាលខេត្ដប៉ៃលិន៕SRP

ខេត្តសៀមរាប៖មន្ត្រីចម្រុះស្រុកជីក្រែង បានចាប់ឃាត់ត្រាក់ទ័រចំនួន២គ្រឿងខណៈកំពុងឈូសឆាយព្រៃ។
ហេតុការណ៍បានធ្វើឡើងនៅល្ងាចថ្ងៃទី២៩ខែមេសាឆ្នាំ២០២០ម្សិលមិញចំណុចភូមិចេក ឃុំពង្រលើស្រុកជីក្រែង ខេត្តសៀមរាប ដោយកម្លាំងអាវុធហត្ថស្រុកសហការជាមួយកម្លាំងគណ:បញ្ជាការឯកភាពស្រុក ដឹកនាំដោយលោក ភោក វីរះ នាយសង្កាត់រដ្ឋបាលព្រៃឈើខ្វាវ។
មន្ត្រីស្រុកជីក្រែងបានឲ្យដឹងថាត្រាក់ទ័រ ដែលបានឃាត់ម៉ាកKUBUTAពណ៌ក្រហមមួយគ្រឿងនិងម៉ាកTALOS ពណ៌បៃតងមួយគ្រឿង។ ក្រោយឃាត់វត្ថុតាងខាងលើយកមករក្សាទុកនៅសង្កាត់រដ្ឋបាលព្រៃឈើខ្វាវ ដើម្បីអនុវត្តតាម
និតិវិធីច្បាប់។
ពាក់ព័ន្ធករណីនេះមិនទាន់មានការបញ្ជាក់បន្ថែមពីនាយសង្កាត់រដ្ឋបាលព្រៃឈើខ្វាវ លោកភោក វីរះ បាននៅឡើយទេនៅព្រឹកនេះ៕SRP

ខេត្តកំពង់ធំ៖កម្លាំងអន្តរាគមន៍បង្ក្រាបបទល្មើសព្រៃឈើ របស់ខណ្ឌរដ្ឋបាលព្រៃឈើខេត្តកំពង់ធំ និងមន្រ្តីផ្នែករដ្ឋបាលព្រៃឈើកំពង់ថ្ម សហការជាមួយកម្លាំងស្នងការដ្ឋាននគរបាលខេត្តកំពង់ធំ នៅនៅថ្ងៃទី ២៩ខែមេសា ម្សិលមិញបានចុះប្រតិបត្តិការបង្រ្កាបបទល្មើសព្រៃឈើ
ត្រង់ចំណុចក្រុមហ៊ុនចំការកៅស៊ូ ភឿកហ្វា ស្ថិតក្នុងភូមិសាស្ដ្រ ឃុំក្រយា
ស្រុកសន្ទុក ខេត្តកំពង់ធំ។
ការចុះបង្ក្រាបនេះបានប្រទះឃើញការធ្វើ
សន្និធិកូនឈើខុសច្បាប់ចំនួន៥៣ កំណាត់ ក្នុងនោះរួមមាន៖
០១-កូនឈើប្រឡៅមូលចំរុះ(ចំបក់ និងច្រម៉ាស់) អង្កត់ផ្ចឹត ១៥-៣០ ស.ម ប្រវែង០២ម/១ដើម មានចំនួន០៩ដើម ។
វត្ថុតាងល្មើសខាងលើនេះ ត្រូវបាននាំយកមករក្សាទុកនៅផ្នែករដ្ឋបាលព្រៃឈើកំពង់ថ្មដើម្បីរង់ចាំការដោះស្រាយ៕SRP

ភ្នំពេញ៖លោកដួង តារា ជំនួយការសម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា តាមរយ:ទំព័រហ្វេសប៊ុកបានលើកឡើងថា

សម្តេចតេជោនាយករដ្ឋមន្ត្រី បានផ្តល់យុត្តិធម៌ ដល់ជនជាតិ អាមេរិកាំង (ថម) ហើយ នៅយប់នេះ!   ( O’BRIEN GEORGE ALLEN ) ។

លោកដួង តារា បានបញ្ជាក់ថាកាលពីម៉ោង ៧០០ យប់មិញ ខ្ញុំបានធ្វើដំណើរពីភ្នំពេញមកកាន់ខេត្តកំពតជាមួយ ថម។ លោកដួង តារា បន្តថាក្រោមការយកចិត្តទុកដាក់ដោះស្រាយប្រកបដោយគតិបណ្ឌិត និងព្រហ្មវិហារធម៌ដ៏មហាធំធេងរបស់ សម្តេចតេជោ ហ៊ុន សែន គឺលោកថម ត្រូវបានទទួលយុត្តិធម៌ពិតប្រាកដនៅយប់នេះ។   ដីធ្លីដែលបាត់បង់ទាំងអស់ដោយសារប្អូនធម៌ដែលជាជនជាតិខ្មែរ គឺគាត់បានទទួលត្រឡប់មកវិញ ដោយភាគីម្ខាងទៀតបានទទួលស្គាល់កំហុសខ្លួន ហើយសុខចិត្តប្រគល់ដីជូន លោក ថម វិញទាំងអស់ ដោយបានសុំទោសចំពោះកំហុសឆ្គងរបស់ខ្លូននិងបានសុំលោកថមរាប់អានគ្នាតទៅមុខទៀត  ដែលនេះគឺជាដំណោះស្រាយឈ្នះ-ឈ្នះ។

បើតាមលោកដួង តារា ថា ខ្ញុំពិតជារំភើបចិត្តក្រៃលែងចំពោះការយកចិត្តទុកដាក់ប្រកបដោយព្រហ្មវិហារធម៌ និងក្តីសណ្តោសដ៏ធំធេងបំផុតរបស់ សម្តេចតេជោ ហ៊ុន សែន នាយករដ្ឋមន្រ្តី ដែលបានជួយដោះស្រាយដោយផ្ទាល់និងលឿនបំផុតចំពោះករណី លោកថម (កាលពីថ្ងៃសុក្រទី២៤ -៣០ មេសា)  ដែលបានទទួលលទ្ឋផលគួរអោយពេញចិត្តខ្លាំងបំផុត។

លោកថម ពេលនេះមានស្នាមញញឹមឡើងវិញហើយ គាត់សប្បាយចិត្តខ្លាំងណាស់ ហើយគាត់គ្រវីក្បាលតតាត់ និងបើកភ្នែកធំៗ ជាច្រើនលើកច្រើនសារ ហើយលាន់មាត់ថា តើពិតមែនឬ? គឺមិនគួរអោយជឿសោះថាពិតជាមានយុត្តិធម៌សម្រាប់រូបលោកដែលជាជនបរទេសម្នាក់ដែលស្រឡាញ់ប្រទេសកម្ពុជា ហើយមានរឿងដ៏សោកសៅបំផុតនេះអស់រយៈពេលជាងមួយឆ្នាំមកហើយ!

លោកថម បានគោរពកោតសរសើរនិងថ្លែងអំណរគុណយ៉ាងជ្រាលជ្រៅចំពោះសម្តេចតេជោនាយករដ្ឋមន្រ្តីដែលបានផ្តល់យុត្តិធម៌ជូនរូបលោក ហើយលោកនឹងចងចាំអំពើល្អរបស់កម្ពុជាជារៀងរហូត។ ពេលនេះ លោកថម និងខ្ញុំកំពុងស្នាក់នៅកំពតមួយយប់។

សូមអរគុណអាជ្ញាធរគ្រប់លំដាប់ថ្នាក់ទាំងអស់ដែលបានចូលរួមជួយដោះស្រាយក្នុងរឿងនេះ  និងអរគុណបងប្អូនជាទីគោរពស្រឡាញ់ទាំងអស់ ដែលបានចូលរួមអាណិតអាសូរដល់ថមក្នុងរឿងនេះ។ សូមជូនពរបងប្អូនជួបតែសេចក្តីសុខ និងសំណាងល្អគ្រប់ៗគ្នាកុំបីខាន។ យើងចូលរួមកសាងអំពើល្អ ចែករំលែកក្តីស្រឡាញ់ និងស្នាមញញឹមគ្រប់ទីកន្លែងដោយគ្មានការរើសអើង! ៕SRP

ខេត្តសៀមរាប៖គណ:កម្មការប្រយុទ្ធនឹងជំងឺកូវីដ-១៩ រដ្ឋបាលខេត្តសៀមរាបនៅព្រឹកមិញនេះបានបើកកិច្ចប្រជុំក្រោមវត្តមានលោក ពិន ប្រាកដ អភិបាលរងខេត្ត និងជាអនុប្រធានគណ:កម្មការ។

លោក ពិន ប្រាកដ អភិបាលរងខេត្ត មានប្រសាសន៍ថា ដើម្បីចូលរួមអនុវត្តវិធានការបង្ការ និង ទប់ស្កាត់ការរីករាលដាលនៃជំងឺកូវីដ-១៩ នៅក្នុងខេត្តសៀមរាប ឱ្យកាន់តែមានប្រសិទ្ឋភាព រដ្ឋបាលខេត្ត មានវិធានការឆ្លើយតប ការបង្ការទប់ស្កាត់ និងការផ្សព្វផ្សាយ ដោយបន្តសម្របសម្រួលប្រចាំការ ទទួលដឹកជញ្ជូនប្រជាពលរដ្ឋខ្មែរដែលវិលត្រឡប់ពីក្រៅប្រទេស នៅតាមច្រកព្រំដែនកម្ពុជា-ថៃ ដូចជាច្រកអន្តរជាតិដូង ខេត្តបាត់ដំបង , ច្រកប៉ោយប៉ែត ខេត្តបន្ទាយមានជ័យ និងច្រកអូរស្មាច់ ខេត្តឧត្ដរមានជ័យ។
ដោយបានបញ្ជូនពួកគាត់មកកាន់ទីតាំងមណ្ឌលត្រួតពិនិត្យសុខភាពខេត្ត ស្ថិតនៅសាលាគរុកោសល្យ និងវិក្រឹតការខេត្ត ដើម្បីឱ្យក្រុមគ្រូពេទ្យពិនិត្យ និងតាមដានសុខភាពមុននឹងបញ្ជូនទៅទីតាំងចត្តាឡីស័ករយៈពេល ១៤ថ្ងៃ នៅតាមមូលដ្ឋានរបស់ខ្លួន ដោយគិតចាប់ពីថ្ងៃទី០៩ ខែមេសា ឆ្នាំ២០២០ រហូតដល់ថ្ងៃទី២៦ ខែមេសា ឆ្នាំ២០២០ មានចំនួន៥២២នាក់។

លោក ពិន ប្រាកដ មានប្រសាសន៍បន្ថែម រដ្ឋបាលខេត្ត បានរៀបចំទីតាំងចត្តាឡីស័ករយៈពេល ១៤ថ្ងៃ តាមការណែនាំរបស់ក្រសួងសុខាភិបាល នៅតាមបណ្ដាសាលារៀនក្នុងភូមិសាស្ត្រក្រុង-ស្រុក នៃខេត្តសៀមរាប សរុបចំនួន ១៣០ទីតាំងសម្រាប់ការស្នាក់នៅរបស់ប្រជាពលរដ្ឋខ្មែរដែលត្រឡប់ពីប្រទេសថៃ។ ជាមួយគ្នានេះដែរ រដ្ឋបាលខេត្ត រដ្ឋបាលក្រុង-ស្រុក មន្ទីរ អង្គភាព សាខាកាកបាទក្រហមកម្ពុជាខេត្ត សហភាពសហព័ន្ធយុវជនកម្ពុជាខេត្ត និងអ្នកពាក់ព័ន្ធ បានចុះសួរសុខទុក្ខ និងចែកអំណោយជាគ្រឿងឧបភោគបរិភោគ និងសម្ភារប្រើប្រាស់មួយចំនួន ដែលបានទទួលពីសប្បុរស ជន នានា ដូចជា ៖ អាកុល , ម៉ាស់ , សាប៊ូលាងដៃ , មី និងអង្ករ ជូនដល់បងប្អូនប្រជាពលរដ្ឋដែលកំពុងធ្វើចត្តាឡីស័ក ផងដែរ។

ក្នុងឱកាសនោះដែរ លោកអភិបាលរងខេត្តសៀមរាប បានជំរុញដល់ក្រុមការងារនៃគណ:កម្មការប្រយុទ្ធនឹងជំងឺកូវីដ-១៩ខេត្ត និង មន្ទីរ អង្គភាព ស្ថាប័នពាក់ព័ន្ឋ សូមឱ្យពង្រឹងកិច្ចសហការជាមួយមន្ទីរសុខាភិបាលខេត្ត ក្រុមការងារចត្តាឡីស័ក បន្តការតាមដាន ត្រួតពិនិត្យស្ថានភាពសុខភាព និងធ្វើតេស្តប្រជាពលរដ្ឋខ្មែរ ដែលទើបត្រឡប់មកពីធ្វើការនៅក្រៅប្រទេស បានរៀបចំចត្តាឡីស័ករយៈពេល ១៤ថ្ងៃ។ លោកថាត្រូវបន្តសម្របសម្រួល ទំនាក់ទំនងជាមួយរដ្ឋបាលខេត្តជាប់ព្រំដែនប្រទេសថៃ ដើម្បីដឹកជញ្ជូនប្រជាពលរដ្ឋខ្មែរទៅកាន់លំនៅដ្ឋានរបស់ពួកគាត់និងត្រូវបន្តជំរុញផ្សព្វផ្សាយអំពីវិធានការបង្ការទប់ស្កាត់នៃជំងឺកូវីដ-១៩ នៅក្នុងភូមិសាស្រ្តខេត្តសៀមរាប តាមគ្រប់រូបភាព និងចាក់ឧគ្ឃោសនសព្ទផ្សេងៗ ជាពិសេសភូមិ ឃុំ សង្កាត់ ដែលមានបងប្អូនប្រជាពលរដ្ឋច្រើនទើបវិលត្រឡប់មកពីប្រទេសថៃ និង ស្រាវជ្រាវបុគ្គលមួយចំនួន ដែលបានធ្វើការផ្សព្វផ្សាយព័ត៌មានមិនពិត ឬបំភ្លើស ដើម្បីយកមកអប់រំ ណែនាំ និងចាត់វិធានការតាមនីតិវិធីច្បាប់។
បើតាមលោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានឲ្យដឹងថា ស្ថានភាពជំងឺកូវីដ-១៩ នៅខេត្តសៀមរាប លទ្ធផលធ្វើតេស្តជនសង្ស័យរកជំងឺកូវីដ-១៩ បានចំនួន ២៩១ករណី មានស្រីចំនួន៩៦នាក់ ក្នុងនោះអវិជ្ជមានចំនួន ២៨៤នាក់ ស្រីមានចំនួន ៩៥នាក់ និង វិជ្ជមានចំនួន០៧ករណី ស្រីមានចំនួន០១នាក់ រួមមានជនជាតិខែ្មរចំនួន០៥នាក់ ស្រីមានចំនួន០១នាក់ និង ជនជាតិឥណ្ឌូនេស៊ីចំនួន ០២នាក់ ប៉ុន្តែមកទល់ពេលនេះ អុ្នកជំងឺកូវីដ-១៩ បានព្យាបាលជាសះស្បើយទំាងអស់ហើយ ហើយក៏បានអនុញ្ញាតឲ្យចេញពីមន្ទីរពេទ្យទាំងអស់គ្នាដែរ៕SRP

ខេត្តសៀមរាប៖​​ លោក ទៀ សីហា អភិបាលខេត្ត និងលោក អ៊ាន ឃុន តំណាងប្រធានក្រុមប្រឹក្សាខេត្ត នៅព្រឹកមិញបានដឹកនាំប្រតិភូខេត្ត ដោយមានអស់លោក លោកស្រីជាថ្នាក់ដឹកនាំមន្ទីរ មន្ត្រីរាជការ សហភាពសហព័ន្ធយុវជនកម្ពុជាខេត្ត និង កងកម្លាំងប្រដាប់អាវុធ អាជ្ញាធរក្រុង ស្រុក ឃុំសង្កាត់បានចូលរួមគោរពវិញ្ញាណក្ខន្ធ និងចូលរួមរំលែកទុក្ខក្រុមគ្រួសារនៃសព លោក ហង់ ហឿម ចៅសង្កាត់រងទី១ សង្កាត់ស្វាយដង្គំ និងជាអតីតប្រធានសមាគមក្រុមប្រឹក្សាក្រុង ស្រុក ឃុំ សង្កាត់ ខេត្តសៀមរាប ដែលបានទទួលមរណភាព ក្នុង ជម្មាយុ ៦៧ឆ្នាំ វេលាម៉ោង ១៦៖២០នាទីរសៀល នៅថ្ងៃទី២៧ ខែមេសា ឆ្នាំ២០២០ ដោយរោគាពាធ។

ក្នុងនោះដែរដែរ លោក ទៀ សីហា អភិបាលខេត្ត លោកអ៊ាន ឃុន ព្រមទាំងគណៈអភិបាលខេត្ត អស់លោក លោកស្រីថ្នាក់ដឹកនាំ និង មន្ត្រីរាជការ ក៏បានធ្វើការបូជាទៀនធូក ដើមី្បឧទ្ទិសជូនដល់ដួងវិញ្ញាណក្ខន្ធ លោក ហង់ ហឿម សូមឲ្យលោកបានទៅកាន់សុខគតិភពថ្មី ព្រមទាំងបែរងាកក្រោយឲ្យពរជ័យដល់ក្រុមគ្រួសារ បងប្អូន កូនចៅ និង ថ្នាក់ដឹកនាំគ្រប់ជាន់ថ្នាក់ ក្នុងជួរមន្ត្រីរាជការ ឲ្យទទួលនូវសេចក្តីសុខ និងឲ្យស្គាល់នូវតែសុខសន្តិភាព សុភមង្គល និង ការអភិវឌ្ឍប្រទេសជាតិលើគ្រប់វិស័យ៕SRP

ខេត្តសៀមរាបលោក ទៀ​ សីហា​ អភិបាលខេត្តសៀមរាប នៅព្រឹកមិញនេះបានដឹកនាំក្រុមការងាររដ្ឋបាលខេត្ត​ ក្រុង​ សង្កាត់ មេភូមិ​ស្ទឹងថ្មី​ចុះទៅពិនិត្យផ្លូវកដប​ ត្រង់​ចំណុច​ផ្លូវ​ភូមិ​ស្ទឹងថ្មី​ ប្រសព្វនឹងផ្លូវសម្តេចទេពវង្ស( ផ្លូវផ្សារញ៉ែ​ ទៅស្តុបឡាប៉េ​ ទល់មុខផ្សារទំនេីប​ចៅសាំងហុក​)​ ដេីម្បីពិនិត្យមេីល​ផ្ទះ​​ និងសំយ៉ាបផ្ទះដែលប៉ះពាល់លេីដីចំណីផ្លូវរបស់ប្រជាពលរដ្ឋចំនួនពីរគ្រួសារដែលបានឯកភាពឲ្យក្រុមការងារចម្រុះរដ្ឋបាលខេត្តរុះរើ​ ដេីម្បីពង្រីកផ្លូវឲ្យបានធំទូលាយ​ និងងាយស្រួលក្នុងការធ្វេីចរាចរណ៍របស់បងប្អូនប្រជាពលរដ្ឋដែលរស់នៅក្នុងក្រុងសៀមរាប​ ក៏ដូចជាការចូលរួមបញ្ជៀសការកកស្ទះចរាចរផងដែរ។
ក្នុងឱកាសនោះដែរ អភិបាលខេត្តសៀមរាប បានកោតសរសើរ និងថ្លែងអំណរគុណយ៉ាងជ្រាលជ្រៅដល់បងប្អូនប្រជាពលរដ្ឋទាំង​ ២គ្រួសារដែលមានឈ្មោះ ទៀវ សុខវី និងឈ្មោះ ម៉ៅ សុខលី ស្ថិតនៅភូមិស្ទឹងថ្មីតាមបណ្តោយផ្លូវពីកេសរកូល​ ទៅប្រសព្វនឹងផ្លូវសម្តេចទេពវង្ស( ផ្លូវផ្សារញ៉ែ​ ទៅស្តុបឡាប៉េ​ ទល់មុខផ្សារទំនេីប​ចៅសាំងហុក​)​ សង្កាត់ស្វាយដង្គំ ក្រុងសៀមរាប ដែលបានយល់ព្រមឲ្យក្រុមការងារចម្រុះរដ្ឋបាលខេត្តរុះរើផ្ទះ និងសំយ៉ាបផ្ទះដែលប៉ះពាល់ដីចំណីផ្លូវដោយស្ម័គ្រចិត្ត។ ដោយរដ្ឋបាលខេត្តបាននិងកំពុងដំណើរការអនុវត្តគម្រោងសាងសង់ផ្លូវភូមិស្ទឹងថ្មី សង្កាត់ស្វាយដង្គំ ដោយមានការពង្រីកផ្លូវតាមទំហំដែលបានកំណត់ដោយ គណៈកម្មការរដ្ឋបាលខេត្ត។

នេះគឺជាសកម្មភាពជាគំរូមួយដែលបានចូលរួមនៅក្នុងសកម្មភាពអភិវឌ្ឍក្រុង។ ក្នុងនាមអាជ្ញាធរខេត្តសៀមរាបសូមស្នើដល់បងប្អូនប្រជាពលរដ្ឋ ទាំងអស់ចូលរួមសហការលេីការងារអភិវឌ្ឍន៍នានានៅក្នុងខេត្តសៀមរាបទាំងមូលផងដែរ។

សូមបញ្ជាក់ថាទិសដៅការងារឆ្នាំ២០២០ ក៏បានកំណត់យកការងារបើកផ្លូវ និងការសាងសង់ផ្លូវ ជាការងារអាទិភាពតាមរយៈសេចក្តីសម្រេចសន្និបាតបូកសរុបលទ្ធផលការងារប្រចាំឆ្នាំ២០១៩ និងលើកទិសដៅការងារឆ្នាំ២០២០ របស់រដ្ឋបាលខេត្ត៕SRP

ខេត្តកំពង់ចាម៖បន្ទាប់ពីមានការបង្ហោះផ្សព្វផ្សាយតាមបណ្ដាញសារព័ត៌មានមួយចំនួនថា មានបើកបនល្បែងជល់មាន់និងអាប៉ោង ពីមុនលេងនៅស្រុកជើងព្រៃ ហើយប្ដូរទីតាំងមកលេងនៅខាងជើងវត្តផ្ចឹកប្រហែល១០០ម៉ែត្រក្នុងព្រៃកោះវិញម្ដង ស្ថិតនៅភូមិត្រពាំងធំ ឃុំស្រង៉ែ ស្រុកព្រៃឈរ។ ការផ្សាយបែបនេះ ត្រូវបានលោកអ៊ុន ចាន់ដា អភិបាលខេត្តកំពង់ចាម ធ្វើការបដិសេធច្រានចោល។

អភិបាលខេត្តកំពង់ចាមលោកអ៊ុន ចាន់ដា បានបញ្ជាក់ថាខ្ញុំពិនិត្យឃើញដូចមុនជារូបភាពចាស់ខ្ញុំ បានសួរទៅបណ្តាញប្រចាំការតាមស្រុកហើយ  គឺមិនដូចអ្វីដែលគេចុះផ្សាយនេះទេ។គាត់ថាអាចមកពីទំនាស់ផលប្រយោជន៍បុគ្គលដែលពីមុនអ្នកកាសែតមួយចំនួនធ្លាប់បានលុយពីអ្នកបើកលេងល្បែងជាថ្នូនឹងការមិនចុះផ្សាយ ឫរាយការណ៍មកសមត្ថកិច្ច  បន្ទាប់ពីត្រូវបានអាជ្ញាធរខេត្តចុះបង្រ្កាបជាបន្តបន្ទាប់  ពួកមេល្បែងមិនហ៊ានបើកលេងតទៅទៀត  ហើយក៏ឈប់អោយលុយអ្នកកាសែតទាំងនោះ ទើបក្រុមកាសែតទាំងនោះខឹង  នាំគ្នាចុះផ្សាយទៅ។ នេះគេហៅថាល្បិចស្វាលួចស៊ីបាយលាបមាត់ពពែ៕SRP

ខេត្តកំពង់ចាម៖ទំនប់អាងទឹកតំបន់ដែលអាចរក្សាទឹកទុកបានរហូត ចំនួន១២លានម៉ែត្រត្រីគុណ សម្រាប់ស្រោចស្រពបន្ថែមលើផ្ទៃដីបង្កបង្កើនផលស្រូវវស្សា ៤៥២ហិចតា ស្រូវប្រាំង១.២៥០ហិចតា និងដំណាំរួមផ្សំ ៤០ហិចតា របស់ប្រជាពលរដ្ឋ ចំនួន១០ភូមិ ក្នុងឃុំសំរោង ស្រុកព្រៃឈរ និងឃុំព្រៃចារ ស្រុកជើងព្រៃ ចំនួន៣.២១៣គ្រួសារ ដែលបានពឹងអាស្រ័យលើអាងតំបន់នេះ ត្រូវបានជួសជុលឡើងវិញ។
នៅព្រឹកមិញនេះលោកអ៊ុន ចាន់ដា អភិបាលខេត្តកំពង់ចាម និងលោកឈា ប៊ុនរិទ្ធិ អគ្គនាយកកិច្ចការបច្ចេកទេសក្រសួងធនធានទឹក និងឧតុនិយម អមដំណើរ ដោយ មន្ត្រីជំនាញពាក់ព័ន្ធ និងអាជ្ញាធរមូលដ្ឋាន បានអញ្ជើញ ចុះពិនិត្យការរដ្ឋានជួសជុលទំនប់អាងទឹកតំបន់ និងសំណង់សិល្បការនៅតំបន់ខាងលើ។
លោកអ៊ុម វិបុល ប្រធានមន្ទីរ ធនធានទឹក និងឧតុនិយមខេត្តកំពង់ចាម បានឲ្យដឹងថា ការជួសជុលទំនប់អាងទឹក តំបន់ខាងលើនេះឡើងវិញ ដើម្បីលើកកម្ពស់កម្រិតជីវភាពរបស់ បងប្អូនប្រជាពលរដ្ឋ ក៏ដូចជាការចូលរួមជាមួយរាជរដ្ឋាភិបាល ក្នុងការកាត់បន្ថយភាពក្រីក្រ តាមរយ:ការបង្កើនលទ្ធភាពនៃការបង្កបង្កើនផល របស់ប្រជាកសិករ ក្រោមការយកចិត្តទុកដាក់ ពីសំណាក់ សម្តេច ហ៊ុន សែន នាយករដ្ឋមន្ត្រី ។
លោកប្រធានមន្ទីរបានបន្តថាក្នុងការជួសជុលទំនប់អាងទឹកតំបន់ និងជួសជុលសំណង់សិល្បការ រួមមានជួសជុលទំនប់អាងទឹកប្រវែង៣.៩០០ម៉ែត្រ និងទ្វារទឹកចំនួន០៣កន្លែង។ ដោយរដ្ឋបាលខេត្តកំពង់ចាមបានធ្វើការស្នើសុំទៅក្រសួងធនធានទឹក និងឧតុនិយម ដើម្បីធ្វើការជួសជុលកែលម្អសំណង់នោះឡើងវិញ៕SRP

ភ្នំពេញ៖សម្តេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ នៅព្រឹកមិញបានអញ្ជើញដឹកនាំកិច្ចប្រជុំឆ្លងផែនការសកម្មភាពឆ្នាំ២០២០ របស់បណ្ឌិត្យសភានគរបាលកម្ពុជា។
អញ្ជើញមានប្រសាសន៍បើកកិច្ចប្រជុំ សម្ដេចក្រឡាហោម ស ខេង បានគូសបញ្ជាក់ថា កិច្ចប្រជុំឆ្លងផែនការសកម្មភាពរបស់បណ្ឌិត្យសភានគរបាលកម្ពុជានាពេលនេះ គឺបានប្រព្រឹត្តទៅបន្ទាប់ពីកាលពីពេលថ្មីៗនេះ ក្រសួងក៏ទើបតែបានឆ្លងផែនការសកម្មភាពអគ្គស្នងការដ្ឋាននគរបាលជាតិ និងអគ្គនាយកដ្ឋានអន្ដោប្រវេសន៍ ដែលជាធម្មតាគឺមានការកែសម្រួល និងបន្ថែមធាតុចូលខ្លះៗបន្ថែមទៀត។

ពាក់ព័ន្ធនឹងការកសាងផែនការ និងការដាក់ចេញទិសដៅត្រូវអនុវត្ត សម្ដេចក្រឡាហោម ក៏បានជំរុញឱ្យបណ្ឌិត្យសភានគរបាលកម្ពុជា ពន្លឿនកិច្ចការទាំងនេះឱ្យបានឆាប់ ទោះមានកិច្ចខ្លះជារឿងថ្មី និងត្រូវបានធ្វើឡើងនៅក្នុងបរិបទនៃការរីករាលដាលជំងឺកូវីដ១៩ក៏ដោយ។ សម្ដេចក៏បានណែនាំឱ្យថ្នាក់ដឹកនាំពាក់ព័ន្ធបន្តពង្រឹងយន្តការកែទម្រង់ឱ្យបានខ្លាំងក្លា និងមានប្រសិទ្ធភាព ក្នុងនោះក៏ត្រូវបែងចែកកងកម្លាំងបំពេញភារកិច្ចឱ្យបានច្បាស់លាស់ដែរ។

សម្ដេចបានបន្តថា សម្រាប់នគរបាលដែលបញ្ចប់ការសិក្សា និងតាំងស៊ុបជាមន្ត្រីនគរបាលជាតិ ត្រូវបែងចែកឱ្យបំពេញការងារនៅអង្គភាពដែលមានតម្រូវការធនធានពិតប្រាកដ និងចាំបាច់ ពោលគឺមិនអាចបណ្ដែតបណ្ដោយឱ្យទៅប្រមូលផ្ដុំនៅអង្គភាពណាមួយដែលមិនសូវមានតម្រូវការនោះទេ។ ដោយឡែកក្នុងកិច្ចប្រជុំ សម្ដេចនិងអង្គប្រជុំក៏បានពិភាក្សាគ្នាអំពីការផ្ដល់ការលើកទឹកដល់គ្រូនគរបាលដែលមានស្នាដៃល្អ និងអំពីត្រូវការគ្រូបន្ថែមនាពេលខាងមុខដែរ។

សម្ដេចក៏បានណែនាំថ្នាក់ដឹកនាំបណ្ឌិត្យសភានគរបាលកម្ពុជា ត្រូវបន្តបង្កើនការបើកវគ្គបណ្ដុះបណ្ដាលរយៈពេលខ្លីលើមុខជំនាញចាំបាច់ និងទាន់សភាពការណ៍វិវត្តន៍ជាក់ស្ដែងមួយចំនួន ជូនដល់ថ្នាក់ដឹកនាំនគរបាលគ្រប់លំដាប់ថ្នាក់ ដើម្បីបានជាទុនបន្ថែមក្នុងការពង្រីងចំណេះដឹង ពង្រឹងជំនាញ និងសម្រាប់ការអប់រំ ផ្សព្វផ្សាយ ណែនាំដល់មន្ត្រីនគរបាលក្រោមឱវាទ ដោយវគ្គបណ្ដុះបណ្ដាលនោះអាចធ្វើឡើង២ទៅ៣ថ្ងៃក៏បាន។
អង្គប្រជុំក៏បានពិភាក្សាគ្នាដែរអំពីតម្រូវការធនធានកងកម្លាំងនគរបាលប្រចាំឆ្នាំ ដើម្បីបំពេញចំនួនមន្ត្រីនគរបាលដែលចូលនិវត្តន៍ ឬមានបញ្ហាសុខភាព ឬត្រូវបានបណ្ដេញចេញ និងក៏ដើម្បីឆ្លើយតបនឹងសេចក្ដីត្រូវការក្នុងកិច្ចការពារសន្តិសុខ សណ្ដាប់ធ្នាប់សាធារណៈ សុវត្ថិភាពសង្គម និងកិច្ចការពារព្រំដែន។ កិច្ចប្រជុំនេះឆ្លងផែនការសកម្មភាពឆ្នាំ២០២០របស់បណ្ឌិត្យសភានគរបាលកម្ពុជា នៅទីស្ដីការក្រសួងមហាផ្ទៃនាឱកាសនោះ មានការអញ្ជើញចូលរួមពីរដ្ឋលេខាធិការប្រចាំការ រដ្ឋលេខាធិការ អនុរដ្ឋលេខា អគ្គនាយក អគ្គនាយករង និងថ្នាក់ដឹកនាំជាន់ខ្ពស់នៃបណ្ឌិត្យសភានគរបាលកម្ពុជាជាច្រើនផងដែរ៕SRP

ភ្នំពេញ៖ នាយករដ្ឋមន្ត្រី កម្ពុជា សម្ដេចតេជោហ៊ុន សែន បានផ្ញើសារប្រាប់បងប្អូនប្រជាពលរដ្ឋខ្មែរថា៖បើកបរត្រូវគោរពច្បាប់ចរាចរណ៍ដើម្បីសុវត្ថិភាពទាំងអស់គ្នា។
សម្តេចតេជោហ៊ុន សែន បានបញ្ជាក់ថា៖ នៅពេលនេះ ការរឹតបន្តឹងច្បាប់ចរាចរណ៍គឺកំពុងដំណើរការនៅទូទាំងប្រទេស។ សូមបងប្អូនប្រជាពលរដ្ឋ ជាពិសេសក្មួយៗយុវជន មុននឹងបើកបររថយន្តត្រូវមានបណ្ណបើកបរពិតប្រាកដត្រឹមត្រូវ។ រីឯរថយន្តវិញត្រូវបង់ពន្ធ និងបង់ថ្លៃសេវាផ្សេងៗអោយបានត្រឹមត្រូវមុននឹងបញ្ជាយានយន្តនៅលើដងផ្លូវសាធារណៈ។

ការរឹតបន្តឹងនេះ គឺដើម្បីធានាសុវត្ថិភាពអាយុជីវិតបងប្អូនប្រជាពលរដ្ឋនៅទូទាំងប្រទេស ដើម្បីចៀសវាងគ្រោះថ្នាក់ផ្សេងៗដែលអាចបង្ករបួសស្នាមធ្ងន់ស្រាលរហូតដល់មានការបាត់បង់អាយុជីវិតទៀតផង។ យើងមិនចង់ឃើញករណីគ្រោះថ្នាក់ចរាចរណ៍កើតមាននៅក្នុងក្រុមគ្រួសាររបស់បងប្អូនណាម្នាក់ឡើយ។

សូមបងប្អូនប្រជាពលរដ្ឋ និងក្មួយៗយុវជន បើកបរដោយមានការប្រុងប្រយ័ត្នខ្ពស់ ជាមួយនឹងការយោគយល់ដល់គ្នាទៅវិញទៅមកដើម្បីសុខសុវត្ថិភាពទាំងអស់គ្នានៅទូទាំងប្រទេស៕SRP