ខេត្តសៀមរាប៖សមត្ថកិច្ចស្រុកប្រាសាទបាគងបានអះអាងថា បុរសជាប្ដី បានស្លាប់ នៅពេលបញ្ជូនទៅដល់មន្ទីរពេទ្យ។ ចំណែកប្រពន្ធនិងកូន បានរងរបួសធ្ងន់ ខណៈកំពុងលក់ខោអាវ ត្រូវបានរថយន្តមួយគ្រឿងចូលបុក។

ហេតុការណ៍បានកើតឡើងនៅវេលាម៉ោង០៨និង៣០នាទី ថ្ងៃទី ២៨ ខែមករា ឆ្នាំ២០២១ នៅចំណុចផ្លូវជាតិលេខ 265 F ស្ថិតក្នុងភូមិត្រពាំងទឹម ឃុំកណ្ដែក ស្រុកប្រាសាទបាគង ខេត្តសៀមរាប។

សមត្ថកិច្ចស្រុកប្រាសាទបាគងបានបញ្ជាក់ថា គ្រោះថ្នាក់ចរាចរណ៍នេះ បង្កឡើងដោយរថយន្តបង្កហេតុ ford ranger ពណ៌មាស ពាក់ស្លាកលេខ ភ្នំពេញ២AP ៥៦៣១ បើកបរមានទិសដៅ ពីខាងលិច ទៅខាងកើតបានរ៉េចង្កូត ចូលតូបលក់ខោអាវ ចំនួន២។

សមត្ថកិច្ចបានបញ្ជាក់ទៀតថា អ្នកបើកបររថយន្តហ្វត ឈ្មោះ ពៅ អាយុ៣៧ឆ្នាំ នៅភូមិអូរ ឃុំកណ្តែក ស្រុកប្រាសាទបាគង ខេត្តសៀមរាប។

ចំណែកម្ចាស់តូបលក់ខោអាវ ទី១ឈ្មោះ ណូ បូរ៉ា ភេទប្រុសអាយុ២៤ឆ្នាំ រស់នៅភូមិឃុំខាងលើ មិនមាន របួសនោះទេ។

ម្ចាស់តូបទី២ នៅជាប់គ្នាតូបទី១បណ្តាលឲ្យរបួសធ្ងន់ចំនួន៣នាក់។

១.ឈ្មោះ ស៊ីន គាន ភេទប្រុសអាយុ៤១ឆ្នាំ របួសធ្ងន់ ពេលបញ្ជូនទៅមន្ទីរពេទ្យបង្អែកសៀមរាប(ស្លាប់)ត្រូវជាប្តី។

២.ឈ្មោះ ថន រដ្ឋា ភេទស្រីអាយុ៣៦ឆ្នាំ របួសធ្ងន់(ប្រពន្ធ)។

៣.គាន កាក់ការ ភេទស្រីអាយុ០៩ឆ្មាំរបួសធ្ងន់(ធ្ងន់)កូន។

បើតាមសមត្ថកិច្ចបានបញ្ជាក់ថា មូលហេតុ រថយន្តបង្ក បើកលឿន បែកកង់ បណ្តាលឲ្យរេចង្កូតចូលបុកទាំងកំរោលតែម្ដង។

ករណីនេះត្រូវបាននគរបាល នាំយករថយន្តទៅរក្សាទុក នៅអធិការដ្ឋាននគរបាលស្រុកប្រាសាទបាគងដើម្បីរង់ចាំការដោះស្រាយ៕SRP

ខេត្តសៀមរាប៖ជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា បានមានប្រសាន៍ថា៖ កន្លងមកនេះ ពេលមានប្រាសាទ ណាមួយ ជួបហានិភ័យ ឧកទាហរណ៍ ដូចជា ខ្យល់ខ្លាំង ធ្វើឱ្យថ្មប្រាសាទ ណាមួយរលំ ឬធ្លាក់ គឺចាំបាច់ ត្រូវឆ្លងទៅ គណៈកម្មាធិការអន្តរជាតិ ដើម្បី សម្របសម្រួលកិច្ចគាំពារ និងអភិវឌ្ឍន៍ រមណីយដ្ឋានប្រវត្តិសាស្ត្រ អង្គរសិន ទើបអាចរៀបចំ និងថែទាំបាន។ ប៉ុន្តែសម្រាប់ អង្គភាពថែទាំប្រាសាទ មួយ ដែលគ្រោងបង្កើតថ្មី ស្ថិតក្រោមការគ្រប់គ្រងនៃនាយកដ្ឋានអភិរក្សប្រាសាទ ក្នុងឧទ្យាន អង្គរនិងបុរាណវិទ្យាបង្ការនេះ គឺពេលប្រាសាទជួបហានិភ័យ គឺមិនចាំបាច់ លើកគម្រោងវែងឆ្ងាយនិងឆ្លងអាយស៊ីស៊ី នោះទេ គឺសម្រាប់ការងារដែលបន្ទាន់ គឺធ្វើបានភ្លាមៗតែ ម្តង។

រដ្ឋមន្ត្រីបញ្ជាក់យ៉ាងដូច្នេះ ក្រោយបញ្ចប់កិច្ចប្រជុំ បច្ចេកទេសលើកទី៣៤ និងកិច្ចប្រជុំពេញអង្គលើកទី២៧ នៃអាយស៊ីស៊ី-អង្គរ កាលពីល្ងាចថ្ងៃទី២៧ ខែមករា ឆ្នាំ២០២១ ថ្លែងប្រាប់អ្នកសាព័ទ៌មាន។

លោកជំទាវបន្តថា ឈរលើមូលដ្ឋាន អចិន្រ្តៃយ៍ និងមានប្រសិទ្ធភាព អង្គភាពមួយនេះ នឹងជួយធានា បាននូវការត្រួតពិនិត្យ ស្ថានភាពនៃការអភិរក្សប្រាសាទ នៅតាមទីតាំង ដែលមានហានិភ័យ ក៏ដូចជាការថែរក្សា ជាប្រចាំនូវប្រាសាទទាំងអស់ ជាពិសេស នូវការអភិរក្សយូរអង្វែង និងសភាពដើម នៃប្រាសាទនានា ក្នុងតំបន់អង្គរ ដែលជាតម្លៃ ដ៏មានសារៈសំខាន់បំផុតក្នុងការរក្សា តំបន់រមណីយដ្ឋានអង្គរ នៅក្នុងបញ្ជីបេតិកភណ្ឌពិភពលោក(យូណេស្កូ)។ កិច្ចការអភិរក្សបេតិកភណ្ឌពិភពលោកអង្គររយៈពេល២៥ឆ្នាំមកនេះ គឺមិនមែនជាកាតព្វកិច្ច របស់ កម្ពុជា តែឯងប៉ុណ្ណោះទេ ប៉ុន្តែក៏ជាកាតព្វកិច្ច របស់អន្តរជាតិដែរ។ ក្នុងន័យនេះ ទោះបីជាមាន វិបត្តិសុខភាព សកល ក្រុមការងារអន្តរជាតិ បានបន្តស្នាក់នៅក្នុងប្រទេសកម្ពុជា ហើយបន្តអនុវត្តគម្រោង ការងារដដែល។ អ្នកជំនាញទាំងនេះ បានជួយសហការ និងដោះស្រាយ បញ្ហាលំបាកជាច្រើនដល់អ្នកជំនាញការខ្មែរផងដែរ។

លោកជំទាវ បានបញ្ជាក់ថា ក្រៅពីការងារអភិរក្សនិងអភិវឌ្ឍ នៅក្នុងតំបន់ រមណីយដ្ឋានអង្គរនេះ អាស៊ីស៊ី ក៏បានគាំទ្រ ចំពោះការអនុវត្ត ផែនការមេទេសចរណ៍ ក្នុងខេត្តសៀមរាប របស់កម្ពុជា ប៉ុន្តែសូមឱ្យការអនុវត្តឱ្យប្រព្រឹត្តិ ទៅតាមរបៀបរបរ ក្នុងតំបន់មួយ ដែលជាតំបន់បេតិកភណ្ឌ ដើម្បីធ្វើការអភិវឌ្ឍ ដោយចេរិភាព នៅតំបន់ខេត្តសៀមរាប អង្គរនេះ។

សូមបញ្ជាក់ថា កិច្ចប្រជុំបច្ចេកទេសលើកទី៣៤និងកិច្ចប្រជុំពេញអង្គ លើកទី២៧ នៃ គណៈកម្មាធិការអន្តរជាតិដើម្បីសម្របសម្រួលកិច្ចគាំពារនិងអភិវឌ្ឍន៍រមណីយដ្ឋានប្រវត្តិសាស្ត្រអង្គរ បានដំណើរការ រយៈពេលពីរថ្ងៃ គឺនៅថ្ងៃទី២៦-២៧ ខែមករា ឆ្នាំ២០២១ នៅខេត្តសៀមរាប ដោយមានលោកជំទាវ Eva Nguyên-Binh ឯកអគ្គរដ្ឋទូតបារាំងប្រចាំនៅកម្ពុជា និងឯកឧត្តម Mikami Masahiro ឯកអគ្គរដ្ឋទូតជប៉ុន ប្រចាំនៅកម្ពុជា ក្នុងនាមសហប្រធាននៃកិច្ចប្រជុំពេញអង្គនេះ៕SRP

ខេត្តសៀមរាប៖លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោកនៅថ្ងៃទី២៧ ខែមករា ម្សិលមិញ បានអញ្ជើញ
សិក្ខាសាលា ដកពិសោធន៍លើការងារសម្ព័ន្ធមេត្រីភាព រវាង អង្គភាពនៃកងយោធពលខេមរភូមិន្ទ ជាមួយស្ថាប័ន អង្គភាពស៊ីវិល នៅទិសយោធភូមិភាគទី៤។

មានប្រសាសន៍ថ្លែងក្នុងពិធីនេះ លោកហ៊ុន ម៉ាណែត បានសម្ដែងនូវការកោតសរសើរ និងវាយតម្លៃខ្ពស់ ចំពោះថ្នាក់ដឹកនាំ មេបញ្ជាការគ្រប់លំដាប់ថ្នាក់ និងនាយទាហានជំនាញពាក់ព័ន្ធទាំងអស់ ព្រមទាំង ឯកឧត្តម លោកជំទាវ លោកឧកញ៉ា អស់លោក លោកស្រី សប្បុរសជន បណ្ដាអង្គភាពសម្ព័ន្ធមេត្រីភាព និងជនរួមជាតិទាំងអស់ ដែលកន្លងមកបានយកចិត្តទុកដាក់ខិតខំបំពេញការងារសម្ព័ន្ធមេត្រីភាព សម្រេចបានលទ្ធផលល្អប្រសើរ។

ដោយឈរលើស្មារតីទទួលខុសត្រូវក្នុងការបំពេញភារកិច្ច សាមគ្គីសហការល្អ លើកកម្ពស់ “សិល្បៈនៃការចែករំលែក” ជាពិសេសនៅក្នុងស្ថានភាពដែលប្រទេសជាតិត្រូវប្រឈម នឹងការលំបាកនានា សម្តេចតេជោ ហ៊ុន សែន បានលើកឡើងនូវមរតកសាសន៍ ដ៏មានតម្លៃបំផុតគឺ “ស្រឡាញ់គ្នាក្នុងគ្រាក្រ ស្គាល់មិត្តល្អក្នុងគា្រមានអាសន្ន ” “ខ្មែរជួយខ្មែរ ខ្មែរកាន់តែរឹងមាំ” ហើយមរតកសាសន៍ដ៏មានតម្លៃនេះ បានក្លាយទៅជាកម្លាំងសាមគ្គីជាតិ ជួយឧបត្ថម្ភទំនុកបម្រុងគ្នាជា មហាគ្រួសារខ្មែរ និយាយជារួម និងនិយាយដោយឡែក ចំពោះការងារសម្ព័ន្ធមេត្រីភាពរបស់យើងកន្លងមក ក៏បានប្រព្រឹត្តទៅយ៉ាងសកម្មផុលផុស អនុវត្តខ្ជាប់ខ្ជួនតាមគោលនយោបាយ លើវិស័យការពារជាតិរបស់រាជរដ្ឋាភិបាល ដែលបានដាក់ចេញ។

លោកហ៊ុន ម៉ាណែត បានចាត់ទុកអង្គសិក្ខាសាលានេះថា បានដើរតួនាទីយ៉ាងសំខាន់ក្នុងការលើកកម្ពស់ ភាពជាដៃគូ និងពង្រីកកិច្ចសន្ទនា ជាពិសេសពង្រឹង នូវទំនុកចិត្ត និងការផ្សារភ្ជាប់ទំនាក់ទំនងកាន់តែជិតស្និទ្ធរវាងបណ្តាស្ថាប័ន កងយោធពលខេមរភូមិន្ទ ជាមួយនឹងស្ថាប័ន -អង្គភាពស៊ីវិលដៃគូ ក្នុងសម្ព័ន្ធមេត្រីភាព ក៏ដូចជាសប្បុរស ជននានា លើមូលដ្ឋាននៃ “ខឿនការពារជាតិ របស់ប្រជាជន” ដើម្បីជាគុណប្រយោជន៍យុទ្ធសាស្ត្រយូរអង្វែង នៃការកសាងនិងពង្រឹង ប្រៀបការពារជាតិ តាមរយៈការបំផុសចលនា ឱ្យប្រជាជនគ្រប់រូបមានឆន្ទៈ ស្រឡាញ់ប្រទេសជាតិ និងបានបំពេញកាតព្វកិច្ចចំពោះជាតិមាតុភូមិ ដោយស្មារតីមោទនភាពជាតិ។

លោកហ៊ុន ម៉ាណែត ក៏បានជំរុញអោយខិតខំបន្តនិរន្តរភាពការងារ សម្ព័ន្ធមេត្រីភាព ជាមួយដៃគូសម្ព័ន្ធមេត្រីភាព ឆ្លើយតបទៅនឹងអនុសាសន៍ ដ៏ថ្លៃថ្លារបស់ សម្តេចតេជោ នាយករដ្ឋមន្ត្រី ដើម្បីបង្វែរទិសដៅមួយផ្នែក នៃជំនួយសម្ព័ន្ធ មេត្រីភាព ឱ្យបម្រើទស្សនវិស័យយូរអង្វែង សំដៅរួមចំណែកអភិវឌ្ឍសេដ្ឋកិច្ច សង្គម ក្នុងការកែទម្រង់ កងយោធពលខេមរភូមិន្ទ៕SRP

ខេត្តសៀមរាប៖លោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅព្រឹកថ្ងៃព្រហស្បតិ៍ ១៥កើត ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៨ ខែមករា ឆ្នាំ២០២១ ស្របនឹងថ្ងៃបុណ្យមាឃបូជា បានចូលបួងសួងនៅព្រះអង្គចេក ព្រះអង្គចម និងលោកយាយទេព ក្នុងទឹកដីអង្គរ ក្រុងសៀមរាប ខេត្តសៀមរាប។

លោករដ្ឋមន្ត្រី បានបួងសួង សូមឱ្យកម្ពុជាមានសុខសន្តិភាព និងការអភិវឌ្ឍជានិច្ចនិរន្ត ក្រោមការងដឹកនាំរបស់ រាជរដ្ឋាភិបាល ដែលមានសម្តេចតេជោ ហ៊ុន សែន ជាប្រមុខដឹកនាំ និងសូមឱ្យកម្ពុជាចៀសផុត ពីជំងឺកូវីដ១៩ ដែលកំពុងយាយី ពិភពលោកទាំងមូល។

សូមជម្រាបជូនថា បុណ្យមាឃបូជា គឺជាបុណ្យមួយក្នុងបណ្ដាបុណ្យធំៗ ទាំងឡាយ ក្នុងព្រះពុទ្ធសាសនា ដែលប្រទេស កាន់ព្រះពុទ្ធសាសនាលើសកលលោក តែងតែប្រារព្ធធ្វើពុំដែលខាន។

ពិធីនេះប្រារព្ធធ្វើឡើង ដើម្បីរម្លឹកដល់អភិលក្ខិតសម័យទាំងពីរ នៃសាសនា ព្រះសម្មាសម្ពុទ្ធបរមគ្រូ ដែលកើតឡើង នៅថ្ងៃពេញបូណ៌មី ខែមាឃដូចគ្នា គឺថ្ងៃប្រជុំចតុរង្គសន្និបាត និងថ្ងៃដែលព្រះអង្គទ្រង់ ប្រកាសដាក់ ព្រះជន្មាយុសង្ខារ។

ជារៀងរាល់ឆ្នាំ ពុទ្ធសាសនិកខ្មែរ តែងតែប្រារព្ធធ្វើបុណ្យមាឃបូជានេះ នៅគ្រប់វត្តអារាម ទូទាំងប្រទេសដោយចាត់ទុកថា ជាការបំពេញកុសលដ៏ថ្លៃថ្លាបំផុត តាមប្រពៃណី ព្រះពុទ្ធសាសនា ស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា ដែលបានចែងថា «ព្រះពុទ្ធសាសនា ជាសាសនារបស់រដ្ឋ»៕SRP

ភ្នំពេញ៖គេហទំព័រហ្វេសប៊ុក របស់
សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃនេះ បានសរសេរថា អនុមោទនា «បុណ្យមាឃបូជា»។

សម្ដេចហ៊ុន សែន បានសរសេរថា
ថ្ងៃព្រហស្បត៍​ ១៥​កេីត​ ខែមាឃ​ ឆ្នាំជូត​ ទោស័ក​ ពុទ្ធសករាជ២៥៦៤​ ត្រូវនឹងថ្ងៃទី​២៨ ខែមករា ឆ្នាំ​២០២០១នេះ គឺ​ជា​ថ្ងៃ​បុណ្យ​មាឃ​បូជា ដែលជា​ពិធីបុណ្យ​មួយ​ដ៏មាន​សារៈសំខាន់​បំផុត​នៅក្នុង​ព្រះ​ពុទ្ធ​សាសនា ដែល​ជា​សាសនា​របស់​រដ្ឋ។

បុណ្យមាឃបូជាប្រារព្ធឡើង ដើម្បីរំលឹកដល់ថៃ្ង ដែលព្រះសម្មាសម្ពុទ្ធ ទ្រង់ប្រកាសបង្កើតព្រះពុទ្ធសាសនាឡើង ក្នុងលោក​នា​ប្រទេសឥណ្ឌា កាលពី៥៨៨ឆ្នាំ មុនគ្រិស្តសករាជ នាថៃ្ងទី១៥កើត ខែមាឃ ក្រោយពីការត្រាស់ដឹងរបស់ព្រះអង្គចំនួន៩ខែគត់។ ព្រះពុទ្ធសាសនា មិនត្រឹម​តែ​បាន​ធ្វើឱ្យបងប្អូនប្រជាពលរដ្ឋយើងបានរួមរស់ជាមួយគ្នាដោយសុខសាន្តខាង​ផ្លូវស្មារតីប៉ុណ្ណោះទេ ប៉ុន្តែថែមទាំង​បានរួមចំណែក​យ៉ាង​សំខាន់នៅក្នុងការពង្រឹងសណ្ដាប់ធ្នាប់ សុខសន្តិភាព ស្ថិរភាពសង្គម ការអភិវឌ្ឍលើគ្រប់វិស័យ និងថែរក្សាការពារ​អត្តសញ្ញាណ​ជាតិទៀតផង។

សូមប្រគេនពរ ដល់ព្រះតេជគុណ គ្រប់ព្រះអង្គ និងជូនពរបងប្អូនជន​រួម​ជាតិ​ ជួបតែសេចក្តីសុខ និងសេចក្តីចម្រើនគ្រប់ៗគ្នា៕SRP

ខេត្តសៀមរាប៖បុរសម្នាក់បានស្លាប់ភ្លាមៗ ខណៈកំពុងបើកម៉ូតូបុករថយន្តពីក្រោយចំពេញទំហឹង។

ហេតុការណ៍បានកើតឡើងនៅវេលាម៉ោង០៦និង៤០នាទីយប់ថ្ងៃពុធទី២៧ ខែមករា ឆ្នាំ២០២១នេះ លើផ្លូវជាតិលេខ០៦ ត្រង់ចំណុចមុខសាលាឃុំស្រណាល ស្ថិតនៅភូមិគំរូ ឃុំស្រណាល ស្រុកក្រឡាញ់។

សមត្ថកិច្ចស្រុកក្រឡាញ់បានរាយការណ៍ថាករណីគ្រោះថ្នាក់ចរាចរណ៍នេះ រវាងម៉ូតូ និងយានយន្តមិនស្គាល់ម៉ាក។ ម៉ូតូធុន C១២៥ពណ៌ខ្មៅសេរី២០១៧ ពាក់ស្លាកលេខ សៀមរាប១X៤៨១៥ បើកបរដោយឈ្មោះ ហ៊ីង គឹមហាក់ អាយុ១៩ឆ្នាំ រស់នៅភូមិតាដែក ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ ក្នុងទិសដៅ ពីកើតទៅលិច បានបុកយានយន្តពីក្រោយ
ក្នុងទិសដៅពីកើត ទៅលិចស្របទិសគ្នា បណ្ដាលឱ្យស្លាប់តែម្ដង។ ក្រោយធ្វើការវាស់វែង បានប្រគល់សាកសពជូនក្រុមគ្រួសារធ្វើបុណ្យតាមប្រពៃណី៕SRP

ភ្នំពេញ៖សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ​ បានថ្លែងនៅរសៀលថ្ងៃទី២៧ ខែមករា ឆ្នាំ​២០២១នេះ ថា ករណី​លោក​ឧត្តម​សេនីយ៍ត្រី ហ៊ិន សុខខេង ស្នងការ​រង​ទទួលផែន​ព្រហ្មទណ្ឌ នៃស្នងការដ្ឋាននគរបាល​ខេត្តតាកែវ ដែល​រងបណ្តឹងពី​ការបង្ខាំង​មនុស្ស​ជំរិត​ទារលុយនោះ សម្តេចនៅមិនទាន់ទទួលបាន​លទ្ធផល​ត្រួតពិនិត្យ​នៅ​ឡើយទេ តែ​សម្តេច​បញ្ជាក់ជំហរថា អ្នក​ណា​ក៏​ដោយ ឲ្យ​តែ​ប្រព្រឹត្ត​បទល្មើស គឺមាន​ទោស​ហើយ បើ​រកឃើញ​ភស្តុតាង។

គួរ​បញ្ជាក់ថា កាលពីពេលថ្មីៗនេះ សម្តេច ស ខេង បានចាត់​ឲ្យ​មន្រ្តីក្រសួងមហាផ្ទៃ​ ចំនួន៦រូប ចុះ​ធ្វើ​ការ​ស្រាវជ្រាវ ចំពោះពាក្យបណ្តឹង របស់ប្រជាពលរដ្ឋ ក៏​ដូចជា​មន្រ្តីនគរបាល​នៅ​ខេត្តតាកែវ ដែលបាន​ចោទ​ប្រកាន់​ លោកឧត្តមសេនីយ៍ត្រី ហ៊ិន សុខខេង ស្នងការរងនគរបាល​ខេត្តតាកែវ ពាក់ព័ន្ធនឹងអំពើពុករលួយ​ចាប់មនុស្ស​ជម្រិត​ទារប្រាក់។

តាមពាក្យ​បណ្តឹង​នោះថា ចាប់តាំងពី​ចូលកាន់​តំណែង​នៅ​ដើមឆ្នាំ​២០១៩ លោក​ឧ​ត្ត​ម​សេនីយ៍​ត្រី ហ៊ិ​ន សុខ​ខេង ពុំ​ដែលមាន​ស្នាដៃ​ក​ក្នុងការ​បង្ក្រាប​បទល្មើស​ទេ គឺ​មានតែ​អួតអាង បង្កើត​បក្ខពួក គំរាមកំហែង​ថ្នាក់ក្រោម​គិតតែ​ពី​ផលប្រយោជន៍​ផ្ទាល់ខ្លួន​។

នៅ​ចុងឆ្នាំ​២០១៩ លោក​ឧ​ត្ត​ម​សេនីយ៍​ត្រី ហ៊ិ​ន សុខ​ខេង រួមជាមួយ​បក្ខពួក​ បានចាប់បង្ខាំងជនរងគ្រោះ ជំរិតទារប្រាក់ចំនួន ២០​ម៉ឺន​ដុល្លារ នឹងនៅថ្ងៃទី៣១ ខែធ្នូ ឆ្នាំ​២០១៩ លោក​ឧ​ត្ត​ម​សេនីយ៍​ត្រី ហ៊ិ​ន សុខ​ខេង និង​លោក​វរសេនីយ៍ទោ សាក់ ទូច រួមទាំង​បក្ខពួក​ បានធ្វើសកម្មភាព ចាប់បង្ខាំង ជនរងគ្រោះ ជាជនជាតិវៀតណាម ចំនួនបីនាក់ និង​ជនជាតិខ្មែរ​ចំនួន២នាក់ ជម្រិត​ទារប្រាក់ ១០​ម៉ឺន​ដុល្លារ​និង​បាន​ដកហូតយក​ខ្សែដៃ និង​ខ្សែក ចិញ្ចៀនពេជ្រ​ពី​ជនរងគ្រោះ ដោយមាន​លោក​វរសេនីយ៍ទោ រស់ សេន នាយរង​ការិយាល័យ​ បុគ្គិល ជា​អ្នកបកប្រែ​។ លុះ​នៅ​ថ្ងៃទី​១ ខែមករា ឆ្នាំ​២០២០ មាន​តំណាង​ របស់ជនរងគ្រោះ ចំនួនពីរនាក់ បានមក​ប្តឹងតវ៉ា​ ដល់ស្នងការដ្ឋាននគរបាលខេត្តតាកែវ គឺ​លោក​ឧ​ត្ត​ម​សេនីយ៍​ឯក មាស ប៊ុន​ឡី និង​លោក​ឧ​ត្ត​ម​សេនីយ៍​ទោ សុខ សម្បត្តិ បម្រើ​ការងារ​ នៅអគ្គនាយកដ្ឋានភស្តុភាហិរញ្ញវត្ថុនៃក្រសួងការពារជាតិ​ ក្នុងគោលបំណងទាមទារឲ្យអនុវត្តច្បាប់ ចំពោះមន្ត្រីនគរបាល ជាន់ខ្ពស់ខាងលើ និង​ទាមទារ​យក​សម្ភារ​ ដែលបានដកហូតពីជនរងគ្រោះ ដែលជាអ្នកវិនិយោគិនវៀតណាមត្រឡប់មកវិញ។

​ក្រោយពី​មាន​បណ្តឹងតវ៉ា ក៏មាន​ស្នងការរង នៃ​ស្នងការដ្ឋាន​នគរបាល​ខេត្តតាកែវ​ មួយរូប (​មិន​ស្គាល់ឈ្មោះ​) បាន​យក​សម្ភារ​ ទៅប្រគល់ជូនជនរងគ្រោះ វិញដល់រាជធានីភ្នំពេញ។

ករណីនេះ តំណាង​អយ្យការ​អម​សាលាដំបូង​ខេត្តតាកែវ ធ្លាប់បាន​ កោះហោះ លោកឧត្តមសេនីយ៍ត្រី ហ៊ិ​ន សុខ​ខេង មក​សាកសួរ​ពី​ដំណើររឿង​បង្ខាំង​មនុស្ស​ ខុសច្បាប់ម្តងរួចមកហើយ៕SRP

ភ្នំពេញ៖អេង ជាសាន ប្រតិភូរាជរដ្ឋាភិបាល ទទួលបន្ទុកជាប្រជានរដ្ឋបាលជលផល ត្រូវបានព្រះមហាក្សត្រ នៃព្រះរាជាណាចក្រកម្ពុជា ត្រាស់បង្គាប់ តែងតាំងមុខតំណែង ជាអនុរដ្ឋលេខាធិការ នៃក្រសួងកសិកម្ម រុក្ខាប្រមាញ់ និងនេសាទ នឹងតែងតាំងលោក ពុំ ស៊ីថា ប្រតិភូរាជរដ្ឋាភិបាល ទទួលបន្ទុក ជាប្រជានរដ្ឋបាលជលផល ជំនួស មានឋានៈ ស្មើអនុរដ្ឋលេខាធិការ។

នេះបើយោងតាមព្រះរាជក្រឹត្យ ដែលបណ្ដាញសារព័ត៌មានទទួលបាននៅថ្ងៃនេះ៕SRP

ខេត្តបាត់ដំបង៖ជនជាតិវៀតណាមចំនួន០៣ នាក់ ដែលឆ្លងដែនចូលមកព្រះរាជាណាចក្រកម្ពុជា ដោយខុសច្បាប់ ត្រូវបានបញ្ជូនទៅនាយ កដ្ឋានជំនាញដើម្បីអនុវត្តតាមនីតិវិធីក្រោយ ពេលធ្វើចត្តាឡីស័ក។

មន្ត្រីប៉ូលិសខេត្តបាត់ដំបងបានឲ្យដឹងថានៅរសៀលថ្ងៃទី ២៧ ខែ មករា នេះអនុវត្តតាមយោបល់ដឹកនាំរបស់ លោកឧត្តម សេ នីយ៍ទោ សាត គឹមសាន ស្នងការខេត្តបាត់ដំបង
លោកឧត្តមសេនីយ៍ត្រី ដាញ់ អេងប៊ុនចាន់ ស្នងការរងផែនការងារអន្តោ ប្រវេសន៍បានរៀបចំបញ្ជូនជនបរទេសជាជន ជាតិវៀតណាមចំនួន០៣នាក់ខាងលើ ទៅកាន់អគ្គនាយកដ្ឋានអន្តោប្រវេសន៍ ក្រសួងមហាផ្ទៃដើម្បីអនុវត្តតាមនីតិវិធី។

មន្ត្រីប៉ូលិសបានបញ្ជាក់ថា ការរៀបចំបញ្ជូនវៀតណាមទាំង០៣នាក់ ទៅ នាយកដ្ឋានជំនាញនាពេលនេះ បន្ទាប់ពីរូបគាត់ បានធ្វើដំណើរពីក្នុងទឹកដីនៃព្រះរាជាណាចក្រថៃ ឆ្លងចូលមកក្នុងព្រះរាជាណាចក្រកម្ពុជា ក្នុងស្រុកកំរៀង ខេត្តបាត់ដំបង ដោយខុសច្បាប់ហើយត្រូវ បានសមត្ថកិច្ចនៅទីនោះធ្វើការពិនិត្យ និងបាន ដាក់ឱ្យពួកគាត់ធ្វើចត្តា ឡីស័ករយៈពេល១៤ថ្ងៃ។ បន្ទាប់ពីរយៈពេលធ្វើចត្តាឡីស័កបានកន្លងផុតទៅហើយពួកគាត់មិនមានករណីCovid-19(អវិជ្ជមាន) ទើបសមត្ថកិច្ចរៀបចំបញ្ជូនពួកគាត់ ទៅកាន់នាយកដ្ឋានជំនាញ ដើម្បីអនុវត្តតាមនី តិវិធី៕SRP

ខេត្តសៀមរាប៖លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ថ្ងៃអង្គារ ទី២៧ ខែមករា ឆ្នាំ ២០២១ នេះ បានដឹកនាំកិច្ចប្រជុំ បច្ចេកទេសស្ដីពីការតភ្ជាប់មុខតំណលូ និងបច្ចេកទេសសាងសង់ហេដ្ឋារចនាសម្ព័ន្ធផ្លូវទាំង ៣៨ខ្សែនៅក្រុងសៀមរាប។

ក្រសួងសារធារណការបានឲ្យដឹងថា កិច្ចប្រជុំនេះ ធ្វើឡើងគោលបំណង ស្ដាប់មន្ត្រីជំនាញ ធ្វើបទបង្ហាញ ពីបច្ចេកទេស តភ្ជាប់ មុខតំណលូញី-ឈ្មោលបញ្ចូលគ្នា បញ្ហាប្រឈមនានា និងក៏ជាវេទិកា សួរដេញដោល ឬចូលរួមជាមតិយោបល់ទាក់ទង នឹងបច្ចេកទេស តភ្ជាប់មុខតំណលូញី-ឈ្មោលបញ្ចូលគ្នា សំដៅឱ្យការតភ្ជាប់មុខតំណងលូ ធ្វើឡើងត្រឹមត្រូវ តាមបទដ្ឋានបច្ចេកទេស ប្រកប ដោយគុណភាពខ្ពស់ និងជាប់រឹងមាំបានល្អ។

រដ្ឋមន្ត្រីបានគូសបញ្ជាក់ពីសារសំខាន់ នៃការតភ្ជាប់មុខតំណលូញី-ឈ្មោលត្រឹមត្រូវ តាម បទដ្ឋានបច្ចេកទេស និងការប្រើប្រាស់សម្ភារប្រកបដោយគុណភាពខ្ពស់ ស្របតាមសៀវភៅបន្ទុក និងកិច្ចសន្យាសាងសង់។

រដ្ឋមន្ត្រី បានសម្តែង នូវការកោតសរសើរ ចំពោះការខិតខំប្រឹងប្រែង បំពេញការងារប្រកប ដោយទំនួលខុសត្រូវខ្ពស់ របស់អង្គភាពសាងសង់នីមួយៗ និងបានផ្ដាំផ្ញើឱ្យក្រុមការងារ ទទួលបន្ទុក និងមន្ត្រីបច្ចេកទេស ទាំងអស់បន្តសហការគ្នាឱ្យបានស្អិតរមួត ពិភាក្សារកចំណុចខ្លាំង និងចំណុចខ្សោយ ជាពិសេស រួមគ្នាពិភាក្សា ស្វែងរកបច្ចេកទេសថ្មីៗ ដើម្បីឱ្យការសាងសង់ហេដ្ឋារចនាសម្ព័ន្ធផ្លូវថ្នល់ និងប្រព័ន្ធលូមានគុណភាពកាន់តែខ្ពស់។

សូមជម្រាបជូនថា៖ នៅថ្ងៃស្អែកទី២៨ ខែមករា ឆ្នាំ២០២១ នេះ រដ្ឋមន្ត្រីនឹងដឹកនាំក្រុមការងារ ដើម្បីអមដំណើរ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ អញ្ជើញចុះពិនិត្យវឌ្ឍន ភាព ការងារសាងសង់ហេដ្ឋារចនាសម្ព័ន្ធ ផ្លូវទាំង៣៨ខ្សែនេះ៕SRP

ភ្នំពេញ៖សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃនៅរសៀលថ្ងៃពុធ ទី២៧ ខែមករា ឆ្នាំ២០២១នេះ បានអនុញ្ញាត ជូនលោក លី ច័ន្ទតុលា ប្រធានគណៈមេធាវីនៃព្រះរាជាណាចក្រកម្ពុជា ដឹកនាំគណៈប្រតិភូក្រុមប្រឹក្សាគណៈមេធាវីចូលជួបសម្ដែងការគួរសម៕SRP

ខេត្តកំពង់ធំ៖លោក អ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទ នៅថ្ងៃពុធ ទី២៧ ខែមករា ព្រឹកមិញនេះ បានដឹកនាំ មន្ត្រីជំនាញក្រសួង និងក្រុមទីប្រឹក្សាបច្ចេក ទេសរបស់គម្រោង
ទៅពិនិត្យការងារស្ថាបនាផ្លូវជនបទក្រាលកៅស៊ូពីរជាន់ប្រភេទ DBST ចំនួន ៥ខ្សែ នៅខេត្តកំពង់ធំ។

លោក សួស គង់ រដ្ឋលេខាធិការក្រសួងអភិវឌ្ឍន៍ជនបទ បានឲ្យដឹងថា រដ្ឋមន្រ្តីក្រសួងអភិវឌ្ឍន៍ជនបទ ចុះទៅពិនិត្យនេះ និងវាយតម្លៃការងារស្ថាបនា ផ្លូវជនបទ ក្រាលកៅស៊ូពីរជាន់ប្រភេទ DBST ចំនួន ៥ខ្សែ ប្រវែងសរុប ១២២ គីឡូម៉ែត្រ និង ៤៨០ ម៉ែត្រ នៅក្នុងខេត្តកំពង់ធំ ក្នុងក្របខណ្ឌ “គម្រោងកែលម្អ ផ្លូវជនបទ ជំហានទី ២” ដែលជាគម្រោង របស់រាជ
រដ្ឋាភិបាល គ្រប់គ្រង ដោយក្រសួងអភិវឌ្ឍន៍ ជនបទ គាំទ្រ ថវិកា ដោយរាជរដ្ឋាភិបាល កម្ពុជា ធនាគារអភិវឌ្ឍន៍អាស៊ី (ADB) ទីភ្នាក់ងារបារាំងសម្រាប់ការអភិវឌ្ឍន៍ (AFD) និងរដ្ឋាភិបាលអូស្ត្រាលី (GOA)។

បើតាមលោក សួស គង់ ជារួម លទ្ធផលសម្រេចបានប្រមាណ ៨៥% ហើយ គ្រោងនឹងបញ្ចប់ ១០០% នៅចុងខែកុម្ភៈ ឆ្នាំ២០២១ខាងមុខ៕SRP