ខេត្តកំពង់ចាម៖ក្នុងកិច្ចប្រជុំសាមញ្ញលើកទី៤៤ អាណត្តិទី៣ របស់ក្រុមប្រឹក្សាខេត្តកំពង់ចាម នៅថ្ងៃ ទី១២ ខែមករា ឆ្នាំ២០២៣ នេះ លោក អ៊ុន ចាន់ដា អភិបាលខេត្តកំពង់ចាម បានថ្លែងថា បច្ចុប្បន្ន យើងបានជាប់កិច្ចសន្យាសាកល្បងជាមួយក្រុមហ៊ុន ស៊ីនទ្រី ក្នុងការកែប្រែរបៀបប្រមូលសំរាម បើ បងប្អូនប្រជាពលរដ្ឋ មិនពេញចិត្តនឹងតម្លៃសេវាទេនោះ សូមអញ្ជើញមកតវ៉ានៅសាលាក្រុងកំពង់ចាម ដើម្បី ជជែកគ្នារកដំណោះស្រាយឲ្យបានសមស្រប។

អភិបាលខេត្ត បានបញ្ជាក់ថា ក្នុងដំណាក់កាលជាប់កិច្ចសន្យាសាកល្បងជាមួយក្រុមហ៊ុន ស៊ីនទ្រី ដើម្បីកែប្រែរបៀបប្រមូលសំរាមថ្មីនេះដែរ គឺយើងធ្វើឡើងត្រឹមតែរយៈពេល៦ខែប៉ុណ្ណោះ សម្រាប់នៅក្រុងកំពង់ចាម និងនៅតាមបណ្តាស្រុកមួយចំនូនទៀត ហើយបើឃើញថាល្អ គឺយើង នឹងបន្តទៅមុខទៀត ដោយមានក្រុមការងារចំនួន៣ សម្រាប់ដោះស្រាយនូវបញ្ហាផ្សេងៗទៀងផង ទី១-គឺក្រុមការងារតាមដានការប្រមូលសំរាម ទី២-ក្រុមការងារគ្រប់គ្រងការប្រមូលសំរាម និងការ ប្រមូលថវិកា និងទី៣-ក្រុមការងារដោះស្រាយនូវវិវាទផ្សេងៗ ដូច្នេះសូមឲ្យមានការចូលរួមទាំងអស់គា្ន ដើម្បីទីក្រុងមានសោភ័ណភាពល្អស្អាត និងថែរក្សាធនធានធម្មជាតិប្រកបដោយនិរន្តរភាព។​

គួររំលឹកថា ការសាកល្បងកែប្រែរបៀបប្រមូលសំរាមថ្មីនេះ គឺត្រូវកំណត់ឲ្យ ក្រុមហ៊ុន ស៊ីនទ្រី ធ្វើ ការប្រមូលសំរាម ថ្លឹងគីឡូលក់ទៅឲ្យក្រុមហ៊ុនផ្សេងមួយទៀត ក្នុង១តោនប្រមាណជា ១៨ដុល្លារ ហើយប្រជាពលរដ្ឋនៅគ្រប់ខ្នងផ្ទះ ត្រូវប្រើប្រាស់ប្រព័ន្ធអែប ដើម្បីបង់ប្រាក់ថ្លៃសេវាប្រមូលសំរាម តាមវិក្កយបត្រ ដោយមានការសម្របសម្រួលពីអាជ្ញាធរមូលដ្ឋាន ពោលគឺក្រុមហ៊ុន ស៊ីនទ្រី មាន ភារកិច្ចត្រឹមប្រមូលសំរាមថ្លឹងគីឡូហើយលក់យកលុយ ចំពោះការប្រមូលថវិកាគឺស្ថិតនៅលើអាជ្ញាធរ។

ក្នុងកិច្ចប្រជុំនេះដែរ លោក ខ្លូត ផន ប្រធានក្រុមប្រឹក្សាខេត្តកំពង់ចាម បានលើកយកសេចក្តី ព្រាងរបៀបវារៈសំខាន់ៗ មកពិភាក្សា រួមមាន៖ ១-ពិនិត្យ និងអនុម័តសេចក្តីព្រាងកំណត់ហេតុន កិច្ចប្រជុំសាមញ្ញលើកទី៤៣ អាណត្តិទី៣ របស់ក្រុមប្រឹក្សាខេត្តកំពង់ចាម។ ២-ពិនិត្យ ពិភាក្សា និងអនុម័តសេចក្ដីព្រាងរបាយការណ៍បូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារប្រចាំឆ្នាំ២០២៣ របស់រដ្ឋបាលខេត្តកំពង់ចាម។ ៣-ពិនិត្យ ពិភាក្សា និងអនុម័តសេចក្ដីព្រាងផែនការសកម្មភាពរយៈពេល៣ខែ(មករា កុម្ភៈ មីនា) ឆ្នាំ២០២៣ របស់រដ្ឋបាលខេត្តកំពង់ចាម​៕SRP

ខេត្តសៀមរាប៖ជនបរទេស ព្រមទាំងអាជីវករ ដែលប្រកបរបរផ្សេងៗ នៅក្នុងតំបន់ផ្សាររាត្រី (PUB STREET) ក្នុងក្រុងសៀមរាប បានសម្តែងនៅការមិនពេញចិត្ត និងត្រៀមដាក់ពាក្យបណ្តឹងប្រធានអង្គភាពនគរបាលទេសចរណ៍ប្រចាំខេត្តសៀមរាប ទៅស្ថានទូតនិងដូចជាក្រសួងមហាផ្ទៃ។

ការត្រៀមដាក់ពាក្យបណ្ដឹង ទៅស្ថានទូតនិងដូចជាក្រសួងមហាផ្ទៃ ប្ដឹងលោកវរសេនីយ៍ទោ ទី សុឡែន ប្រធានអង្គភាពនគរបាលទេសចរណ៍ យ៉ាងដូច្នេះ បន្ទាប់ពីមានការផ្ទុះរឿងអាស្រូវ របស់ប្រធានអង្គភាពនគរបាលទេសចរណ៍ប្រចាំខេត្តសៀមរាប រូបនេះ ចុះអនុវត្តន៍ការងារខុសនិតិវិធី។ នេះបើតាមការផ្សព្វផ្សាយសារព័ត៌មានក្នុងស្រុកកាលពីយប់ថ្ងៃទី ១១ ខែមករា ឆ្នាំ២០២៣។

យោងតាមប្រភពព័ត៌មានបានឲ្យដឹងថា លោកវរសេនីយ៍ទោ ទី សុឡែន ប្រធានអង្គភាពនគរបាលទេសចរណ៍ ដែលទើបនឹងឡើងកាន់តំណែងថ្មីៗ នេះ ត្រូវបានគេរាយការណ៍មកថាចុះអនុវត្តការងារខុសនីតិវិធី ព្រោះចង់បានលាភសក្ការៈ។

ប្រភពព័ត៌មានដដែលបន្តថា ប្រធានអង្គភាពនគរបាលទេសចរណ៍ ដែលមាន លោកវរសេនីយ៍ទោ ទី សុឡែន ជាប្រធានបានរៀបគម្រោងដើម្បីដាក់ខែ តាមហាងមួយចំនួន និងយកលុយពីជនពិការលេងភ្លេងនៅតំបន់ pub street យ៉ាងគគ្លើន។ ចំណែកមន្ត្រីរាជការមួយចំនួននៅក្នុងអង្គភាពនេះ បានសម្តែងការមិនពេញចិត្តចំពោះប្រធានអង្គភាពនគរបាលទេសចរណ៍ ដែលមាន លោកវរសេនីយ៍ទោ ទី សុឡែន ដែលប្រព្រឹត្តិខុសនឹងច្បាប់កំណត់បែបនេះ។ ដោយពេលខ្លះភ្ញៀវទេសចរ ដែលបានមកកម្សាន្តនៅតំបន់អង្គរ ហើយជ្រុះបាត់សម្ភារៈ និងបានមកសុំធ្វើលិខិតបញ្ជាក់ថា បានបាត់ពិតប្រាកដមែននោះ ក៏លោកប្រធានអង្គភាពនគរបាលទេសចរណ៍ តម្រូវឲ្យយកលុយពីភ្ញៀវទេសចរណ៍ផងដែរ។

ប្រភពបានបញ្ជាក់ទៀតបន្តថា នៅក្នុងអង្គភាពមួយនេះ មានមន្ត្រីប្រមាណជាង៣០នាក់ ប៉ុន្តែមិនសូវមុខ មកនម្រើការងារនោះទេ ពោលគឺដាក់ព្យួរឈ្មោះដើម្បីទុកលុយដាក់ហោប៉ៅ។

ជុំវិញការលើកឡើងរបស់អាជីវករបែបនេះ «អង្គភាពសៀមរាប ប៉ុស្តិ៍» នៅមិនទាន់ទទួលបានការបំភ្លឺ ពីប្រធានអង្គភាពនគរបាលទេសចរណ៍ លោកវរសេនីយ៍ទោ ទី សុឡែន នៅឡើយទេ។ ប៉ុន្តែលោកវរសេនីយ៍ទោទី សុឡែន បានប្រាប់អ្នកសារព័ត៌មានថា៖ ករណីនេះលោក មិនចង់តបតឬ ក៏ប្តឹងផ្តល់ជាមួយខាងព័ត៌មាននោះទេ ហើយការដែលលោកចុះមករៀបចំសណ្ដាប់ធ្នាប់នៅតំបន់នេះ គឺទៅតាមបណ្ដឹងរបស់អាជីវករតែប៉ុណ្ណោះ។ លោកថា បើចង់ដឹងព័ត៌មាន សូមទៅកាន់អង្គភាព ដើម្បីជជែកគ្នាឲ្យដឹងព័ត៌មានច្បាស់៕SRP

អង្គភាពប្រឆាំងអំពើពុករលួយឲ្យ លោក ពៅ សោមាណាក់ ប្រធានមន្ទីរបរិស្ថាន ខេត្តកណ្ដាល ធ្វើការបំភ្លឺករណីពីភាពមិនប្រក្រតីមួយចំនួនពាក់ព័ន្ធនឹងសកម្មភាពបំពេញតួនាទីភារកិច្ច។

ការឲ្យបំភ្លឺនេះ គឺយោងពាក្យប្ដឹងដែលអង្គភាពប្រឆាំងអំពើពុករលួយ ទទួលបានកាលពីថ្ងៃទី១៥ ខែធ្នូ ឆ្នាំ ២០២២៕SRP

ភ្នំពេញ៖ស.ជ.ណ​ដែលបានបញ្ជាឲ្យនាំខ្លួន លោកស្រី សៀង ចាន់ហេង និងបក្ខពួក នៅថ្ងៃនេះ សម្ដេចតេជោ ហ៊ុន សែន បានសម្រេចលុបចោលស.ជ.ណ ថ្ងៃទី៥មករា ឆ្នាំ ២០២៣។

សម្ដេចហ៊ុន សែន បានបញ្ជាក់តាមប្រព័ន្ធផេកសហ្វេសប៊ុកថា៖ថ្ងៃនេះមានការផ្សាយយ៉ាងព្រោងព្រាត

នូវស.ជ.ណទាក់ទងជាមួយលោកស្រី

សៀង ចាន់ហេង តាមសំណើររបស់

សម្តេចស ខេង និងការសម្រេចរបស់ខ្ញុំ

កាលពីថ្ងៃ២៩ធ្នូ២០២២។

នៅថ្ងៃទី៩មករា២០២៣តាមសំណើររបស់

លោកស្រីសៀង ចាន់ហេង ខ្ញុំបានប្រគល់

ជូនឯកឧត្តមជា សុផារា ផ្តល់មតិដែលឯកសារនេះមិនត្រូវបានផ្សព្វផ្សាយទេ។

ដើម្បីបញ្ចប់នូវភាពមិនច្បាស់លាស់មុន

ពេលឯកឧត្តមជា សុផារ៉ាផ្តល់មតិខ្ញុំសម្រេចលប់ចោលស.ជ.ណលេខ១៨មយ

ថ្ងៃទី៥មករា២០២៣ចាប់ពីម៉ោងនេះតទៅ។

ការសម្រេចយ៉ាងណាទៀតនិងធ្វើក្រោយ

ពេលឯកឧត្តមជា សុផារ៉ាផ្តល់មតិ៕SRP

ខេត្តបន្ទាយមានជ័យ៖បើទោះបីជាមានការអះអាងពីមន្ត្រីជំនាញសុរិយោដី ជំនាញសំណង់និងអាជ្ញាធរដែនដីថា ក្រុមហ៊ុន«KP MORN DANY Land & House ឬម៉ន ដានី» បន្តលក់ដីឡូតិ៍ អត់មានច្បាប់យ៉ាងណាក៏ដោយក៏រហូតមកដល់ពេលនេះ ក្រុមហ៊ុនមួយនេះ នៅតែបន្តផ្សព្វផ្សាយលក់ដីរបស់ខ្លួន ទាំងងងើលដោយមិនខ្លាចច្បាប់បន្តិចសោះឡើយ។

ជាមួយនឹងការអះអាងពីមន្ត្រីជំនាញសុរិយោដី ជំនាញសំណង់និងអាជ្ញាធរដែនដីថា ក្រុមហ៊ុន«KP MORN DANY Land & House ឬម៉ន ដានី» លក់ដីឡូតិ៍ អត់មានច្បាប់បែបនេះ​ បណ្ដាញសារព័ត៌មានក្នុងស្រុក បានចុះផ្សាយជាបន្តបន្ទាប់ ខណៈមន្ត្រីជំនាញនិងអាជ្ញាធរពាក់ព័ន្ធមិន​ទាន់ចាត់វិធានការក្ដៅ។

សូមជម្រាបថាអាជ្ញាធរនិងមន្ត្រីជំនាញ បានកោះប្រជុំ២លើក នៅថ្ងៃទី ១០ មករា២០២៣ ប៉ុន្តែករណីនេះ មិនមានតំណាងឬថៅកែមកចូលរួមប្រជុំនោះទេ ពោលទុកតែបុគ្គលិកផ្នែកលក់២-៣នាក់  ដែលមិនមែនជាអ្នកទទួលខុសត្រូវផ្នែកច្បាប់។

បើតាមមន្ត្រីជំនាញសុរិយោដី សំណង់និងអាជ្ញាធរដែនដីថា ក្រុមហ៊ុនKP MORN DANY Land & House ឬម៉ន ដានី លក់ដីឡូតិ៍ អត់មានច្បាប់នៅឡើយទេ ហើយលេងឆៅតែម្តង ក្នុងការបើកគម្រោងអាជីវកម្មនិងលក់គម្រោងខ្លួន។ កាលពីថ្ងៃទី១២ខែធ្នូ ក្រុមហ៊ុន មួយនេះ បានសម្ពោធគម្រោងផ្ទះវីឡាទោលនិងដីលំនៅឋាននៅផ្លូវជាតិលេខ៥ ចំណុចព្រំប្រទល់ក្រុងសិរីសោភ័ណ (ភូមិ/ឃុំទឹកថ្លា) ស្រុកអូរជ្រៅ (ភូមិសាលាក្រហមឃុំសំរោង) តែបញ្ឆោតថា នៅក្រុងប៉ោយប៉ែត។ នេះបើយោងតាមបណ្ដាញព័ត៌មានបានបង្ហោះចែកចាយ។

បណ្ដាញព័ត៌មានបានបន្តថា លោកស្រីម៉ន ដានី និងដៃគូ បុរសជនជាតិថៃ របស់លោកស្រី បានប្រកាសអបអរសាទរថ្ងៃបើក សម្ពោធគម្រោង ផ្ទះវីឡាទោល និង ដីលំនៅឋាន បន្ទាយមានជ័យ – ក្រុងប៉ោយប៉ែត ជាផ្លូវការ។ ដោយ ថ្ងៃនេះ ក្រុមហ៊ុន ជូនកាដូរ មហាពិសេស ទិញ1 ថែមជូន1 ក្នុងតម្លៃត្រឹមតែ២៤.០០០ដុល្លារ ទទួលចុះឈ្មោះ ១០នាក់ដំបូង។ ក្នុងការប្រកាស ក្រុមហ៊ុនបង្ហាញពីគម្រោងផ្ទះវីឡាទោល និងដីលំនៅឋានជាង១ម៉ឺនឡូតិ៍ លើផ្ទៃដីរជាច្រើនហិកតា។

ឯនៅលើផ្ទាំងនិងសន្លឹក ផ្សព្វផ្សាយពាណិជ្ជកម្ម ក្រុមហ៊ុននេះ បានសរសេអក្សរធំៗ លេចច្បាស់ នៅផ្នែកខាងលើ ក៏មានគម្រោងដីអាជីវកម្ម ដែលដាក់ថា “គម្រោងដីអាជីវកម្ម បើកថ្មីនៅក្រុងប៉ោយប៉ែត “។

“គម្រោង១៥.០០០ឡូតិ៍ ជាប់ផ្លូវជាតិលេខ៥ ក្នុងក្រុងប៉ោយប៉ែត “.ដែលមានគម្រោងផ្សារ រោងចក្រ ហាងទំនិញ ចំណតឡានក្រុង ជាដើម ។ ប៉ុន្តែបានសរសេរអក្សរតូច ព៌ណមិនសូវលេចនៅចុងផ្នែកខាងក្រោមថា វាស្ថិតនៅភូមិទឹកថ្លា សង្កាត់ទឹកថ្លាក្រុងសិរីសោភ័ណ (ជាប់ព្រំប្រទល់ស្រុកអូរជ្រៅ) ហើយភ្ជាប់នឹងលេខទូរស័ព្ទ ជាច្រើនខ្សែសម្រាប់ទំនាក់ទំនង។

ករណីនេះ លោកឡុង វុធ អនុប្រធានមន្ទីររៀបចំដែនដី នគរោបនីយកម្ម សំណង់និងសុរិយោដីខេត្តបន្ទាយមានជ័យ ទទួលបន្ទុកសំណង់ប្រាប់អ្នកកាសែត កាលពីថ្ងៃទី១២ខែធ្នូថា៖ “គម្រោងលក់ដីល្វែងនិងផ្ទះម៉ន ដានីនេះ លេងឆៅតែម្តង។ មិនមានការអនុញ្ញាតិច្បាប់ទេ មិនមានសុំអីទាំងអស់។ អីក៏អត់ៗ “។

លោកអនុប្រធានបានបន្តថា៖ ករណីអង្កន់ដីល្វែងកណ្តាលភ្នែកមហាជននេះ លោកប្រធានមន្ទីរ (អាង ណារឹទ្ធ) បានបញ្ជូនមន្ត្រីអោយចុះពិនិត្យ និងធ្វើរបាយណ៍សុំគោលការណ៍ រដ្ឋបាលខេត្តដើម្បីបិទសកម្មភាពតែម្តង។

សូមរំលឹកថា កាលពីថ្ងៃទី០៥ខែធ្នូ ឆ្នាំ ២០២២ ក្រុមការងារនៃការិយាល័យរៀបចំដែនដី នគរូបនីយកម្ម និងសំណង់ ដែលដឹកនាំដោយ លោក ប៉ង់ រ៉ុម ប្រធានការិយាល័យដែនដី នគរោបនីយកម្មនិងសំណង់(ដ.ន.ស )បានដឹកនាំក្រុមការងារត្រួតពិនិត្យសំណង់ ចុះត្រួតពិនិត្យការដ្ឋានសំណង់ គម្រោងសាងសង់ អគារពាក់កណ្តាលភូមិគ្រឹះ និងផ្ទះល្វែង របស់ឈ្មោះ ម៉ន ដានី (សមត្ថកិច្ចក្រសួង) ដែលក្រឡាផ្ទៃសរុប ៨៤០០០ ម៉ែត្រក្រឡា (ជាង៨ហិចតា)ស្ថិតនៅភូមិទឹកថ្លា សង្កាតទឹកថ្លា ក្រុងសិរីសោភ័ណ។

លោកបានធ្វើរបាយការណ៍ជូនលោកប្រធានមន្ទីរពីការដ្ឋានសំណង់ បានសាងសង់របស់ឈ្មោះ ម៉ន ដានី ដោយគ្មានលិខិតអនុញ្ញាតសាងសង់ និងលិខិតអនុញ្ញាតបើកការដ្ឋានសាងសង់។ មានប្លង់ស្ថាបត្យកម្ម និងប្លង់គ្រឿងផ្គុំសំណង់ តែគ្មានវិស្វករប្រចាំការដ្ឋាន។ ឯក្រុមជាងម៉ៅការសាងសង់ ពុំមានច្បាប់ប្រកបអាជីវកម្មសាងសង់ឡើយ។

ចំពោះគម្លាតនគរូបនីយកម្មដែលក្រុមការងារចុះពិនិត្យឃើញថា គម្លាតខាងមុខៈ ៥ ម៉ែត្រពីព្រំដី។ គម្លាតខាងក្រោយៈ ១ ម៉ែត្រពីព្រំដីគម្លាតខាងស្តាំៈ ១ ម៉ែត្រពីព្រំដី។គម្លាតខាងឆ្វេងៈ ១ ម៉ែត្រពីព្រំដីជាដើម។

ចំណែកលោករ៉ូ បូរ៉ា អនុប្រធានមន្ទីររៀបចំដែនដី នគរោបនីយកម្ម សំណង់និងសុរិយោដីខេត្តបន្ទាយមានជ័យ ទទួលបន្ទុកសុរិយោដី បានប្រាប់អ្នកកាសែត ថា៖ គម្រោងក្រុមហ៊ុនKP MORN DANY Land & House ឬម៉ន ដានី លក់ដីឡូតិ៍ នេះ មានទីតាំងនៅក្រុងសិរីសោភ័ណនិងស្រុកអូរជ្រៅ (មិនមែននៅក្រុងប៉ោយប៉ែត ដូចដែលក្រុមហ៊ុនប្រកាសប្រាប់អតិថិជន)ទេ។

លោកបន្ត:ថា បន្ថែមលើនោះ គម្រោងនេះ មិនមានការស្នើសុំច្បាប់ មកការិយាល័យភូមិបាល និងមន្ទីរនៅឡើយទេ។ ពោលគឺអត់ច្បាប់ទាំងលើ :ទី១-ការបំបែកក្បាលដី ទី២- ការស្នើសុំប្តូរប្រភេទដី (ពីដីស្រែទៅដីលំនៅឋាននិងសំណង់។ទី៣- ខេត្តក៏មិនសុំ ។ក៏មិនសុំច្បាប់ដល់ក្រសួងផងដែរ។

ចំណែកអភិបាលខេត្តបន្ទាយមានជ័យ ក៏ដូចអភិបាលក្រុងសិរីសោភ័ណ ធ្លាប់បានកាសែតកន្លងមកថា៖ គម្រោងដីធ្លីមួយនេះ ខាងក្រុមហ៊ុនមិនទាន់បានបំពេញបែបបទ ឯកសារអីមកដល់អាជ្ញាធរនៅឡើយទេ។ ទោះយ៉ាងណា អាជ្ញាធរលើកទឹកចិត្តដល់អ្នកវិនិយោគ អោយសុំគោលការណ៍និងច្បាប់។

រហូតមកដល់ថ្ងៃពុធនេះ សៀមរាបប៉ុស្ដិ៍ នៅមិនទាន់ទទួលបានការបកស្រាយបំភ្លឺពីក្រុមហ៊ុន «KP MORN DANY Land & House ឬម៉ន ដានី» នៅឡើយទេ៕SRP

ភ្នំពេញ៖អង្គភាពប្រឆាំងអំពើពុករលួយ បានចាប់ខ្លួនលោក ឡាយ សំណាង អនុប្រធាននាយកដ្ឋានហិរញ្ញវត្ថុ និងផ្គត់ផ្គង់ក្រសួងសង្គមកិច្ចអតីតយុវជន និងយុវនីតីសម្បទា និងជាអ្នកភ្នាក់ងាររបស់ក្រសួងដើម្បីទៅបើកប្រាក់ពីធនាគារ ពាក់ព័ន្ធនឹងការកិបគេងថវិការដ្ឋជាង៣០ម៉ឺនដុល្លារ។

ប្រាប់អ្នកសារព័ត៌មាន លោកទេសរដ្ឋមន្ត្រី ឱម យ៉ិនទៀង បញ្ជាក់ថាអបព បានបញ្ជូន ឈ្មោះ ឡាយ សំណាង ទៅកាន់សាលាដំបូងរាជធានីភ្នំពេញ​ នៅថ្ងៃពុធ នេះ ករណីកិបគេងថវិការដ្ឋជាង ១,៥០០ លានរៀល (ជាង៣៨ម៉ឺនដុល្លារ) ក្នុងនោះមានទាំងការកិបគេងប្រាក់ របបគោលនយោបាយ របស់រដ្ឋជូនជនពិការក្រីក្រ នៅតាមសហគមន៍ ចំនួនជិត ៤ពាន់នាក់ផងដែរ។

នេះបើតាមការបញ្ជាក់ លោកទេសរដ្ឋមន្ត្រី ឱម យ៉ិន «ក្រៅអំពីការជាប់សង្ស័យលើអំពើពុករលួយ បទល្មើសកេង យកផលប្រយោជន៍ដោយខុសច្បាប់ ឡាយសំណាង នៅជាប់សង្ស័យអំពីបទល្មើសសម្អាតប្រាក់ទៀតផង»៕SRP

ទីស្តីការគណៈរដ្ឋមន្ត្រី ប្រគល់សមត្ថកិច្ចឱ្យស្នងការដ្ឋាននគបោលខេត្តកណ្តាល ចាត់ការតាមនីតិវិធីនាំខ្លួនជនល្មើស ឈ្មោះ សៀង ចាន់ហេង និងបក្ខពួកប្រគល់ឱ្យអយ្យការអមសាលាដំបូងខេត្តកណ្តាល ដើម្បី ចោទប្រកាន់ និងផ្តន្ទាទោសតាមច្បាប់ដោយមិនលើកលែង។

នេះបើតាមលិខិត របស់ទីស្តីការគណៈរដ្ឋមន្ត្រី សៀមរាប ប៉ុស្ដិ៍ ទទួលបាននៅថ្ងៃពុធនេះ។

ក្នុងលិខិតដែលជម្រាបជូនសម្ដេចស ខេង រដ្ឋមន្ត្រីក្រសួងមហាផ្ទៃ ដូចខាងក្រោម៖ ទីស្តីការគណៈរដ្ឋមន្ត្រីបានធ្វេីលិខិតជម្រាបជូនសម្ដេចក្រឡាហោម ស​ ខេង​ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ​ និងអភិបាលនៃគណៈអភិបាលខេត្តកណ្តាល​ ករណីប្រើប្រាស់ឯកសារក្លែងបន្លំ ដើម្បីកាន់កាប់អចលនវត្ថុរបស់ឈ្មោះ ហ៊ុន ប៊ុនធឿន និងឈ្មោះ ហៀវ លន់ នៅភូមិទួលសាលា ឃុំស្អាងភ្នំ ស្រុកស្អាង ខេត្តកណ្តាល។​

ប្រគល់សមត្ថកិច្ចឱ្យស្នងការដ្ឋាននគបោលខេត្តកណ្តាល ចាត់ការតាមនីតិវិធីនាំខ្លួនជនល្មើស ឈ្មោះ សៀង ចាន់ហេង និងបក្ខពួកប្រគល់ឱ្យអយ្យការអមសាលាដំបូងខេត្តកណ្តាល ដើម្បី ចោទប្រកាន់ និងផ្តន្ទាទោសតាមច្បាប់ដោយមិនលើកលែង៕SRP

ខេត្តកំពង់ចាម​៖សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានសម្រេចតែងតាំង លោក ប៉ាន សូរស័ក្ដិ ជាប្រធានកិត្តិយសសាខាកាកបាទក្រហមកម្ពុជាខេត្តកំពង់ចាម ដើម្បីបំពេញភារកិច្ចបន្តពី សម្តេចឧត្តមទេពញាណ ហ៊ុន ណេង ដែលបានទទួលមរណភាព និងតែងតាំងអនុប្រធានកិត្តិយសចំនួន ២៥រូបទៀត​។

ពិធីប្រកាសទទួលស្គាល់ ប្រធាន-អនុប្រធានកិត្តិយសសាខាកាកបាទក្រហមកម្ពុជាខេត្តកំពង់ចាម អាណត្តិទី៥នេះ បានធ្វេីឡេីងនៅថ្ងៃទី១០ ខែមករា ឆ្នាំ២០២៣ នៅសាលាខេត្តកំពង់ចាម ក្រោមវត្តមាន​ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា​។

ថ្លែង​ក្នុង​ពិធី​នេះ​ លោក អ៊ុន ចាន់ដា ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ចាម បានគូសបញ្ជាក់ថា “ក្នុងរយៈពេល ៣ឆ្នាំកន្លងទៅ ដោយមានការណែនាំ តម្រង់ទិសពី សម្ដេចឧត្ដមទេពញាណ ហ៊ុន ណេង, សាខា អនុសាខា បានបំពេញតួនាទីយ៉ាងសកម្ម ក្នុងភាពម្ចាស់ការលើការផ្តល់សេវាកម្ម​ មនុស្សធម៌ ផ្តោតទៅលើវិស័យអាទិភាពទាំង៤ ដោយបានឆ្លើយតបទៅនឹង តម្រូវការជាក់ស្ដែង​ នៃភាពងាយរងគ្រោះ ហើយសម្រេចបានលទ្ធផលគួរឱ្យកត់សម្គាល់​ ផងដែរ​។

​លោក ប៉ាន សូរស័ក្ដិ បានសន្យាថា នឹងរៀនសូត្រយកតម្រាប់តាមគំរូស្នាដៃដ៏ប្រពៃរបស់ សម្ដេចឧត្តមទេពញាណ ហ៊ុន ណេង តាមរយៈនៃការ ខិតខំកៀរគររកមូលនិធិ ថវិកាពីសប្បុរសជន គ្រប់មជ្ឈដ្ឋាន ដើម្បីជួយបន្តនិរន្តរភាពទ្រទ្រង់សាខាកាកបាទក្រហមកម្ពុជាខេត្តកំពង់ចាម តាមគ្រប់លទ្ធភាព ធានាឱ្យសាខាម្ចាស់ការបំពេញបេសកកម្មមនុស្សធម៌ដ៏ ឧត្តុង្គឧត្តម និងការលើកកម្ពស់គោលការណ៍គ្រឹះតម្លៃមនុស្សធម៌ សេចក្ដីថ្លៃថ្នូររបស់មនុស្សជាតិ ព្រមទាំង ការចូលរួមពង្រឹងសមត្ថភាពរបស់កាកបាទក្រហមកម្ពុជា ដូចពាក្យស្លោក “កាកបាទក្រហមកម្ពុជា មានគ្រប់ ទីកន្លែងសម្រាប់គ្រប់ៗគ្នា”។

ក្នុង​ឱកាស​នោះ​ដែរ​ លោកជំទាវ ម៉ែន នារីសោភ័គ អគ្គលេខាធិការរងទី១ បានពាំនាំនូវអនុសាសន៍របស់ សម្តេច កិត្តិព្រឹទ្ធបណ្ឌិតប្រធានកាកបាទក្រហមកម្ពុជា​ ជម្រាបជូនចំពោះសាខាកាកបាទក្រហមកម្ពុជាទាំងអស់ សូមបន្តពង្រឹង ពង្រីកសមត្ថភាពបន្ថែមទៀតទាំងថ្នាក់កណ្តាល សាខា អនុសាខា ដើម្បីដឹកនាំអ្នកស្ម័គ្រចិត្ត និងយុវជនឱ្យបំពេញការងារមនុស្សធម៌បានពេញលេញនៅតាមសហគមន៍ និងសូមយកចិត្តទុកដាក់សហការជាមួយអាជ្ញាធរដែនដីគ្រប់លំដាប់ថ្នាក់ ជាពិសេសកម្លាំងយុវជន និងអ្នកស្ម័គ្រចិត្ត ឱ្យចូលរួមយ៉ាងសកម្មក្នុងការងារមនុស្សធម៌ ដើម្បីរួមចំណែកជាមួយរាជរដ្ឋាភិបាលដោះស្រាយបញ្ហាប្រឈមនានាផងដែរ​៕SRP

ខេត្តសៀមរាប៖អ្នកលក់ស្រាក្រឡុកម្នាក់ និងបក្សពួក ត្រូវបាននគរបាលក្រុងសៀមរាប ឃាត់ខ្លួននៅថ្ងៃម្សិលមិញ បញ្ជូនទៅតុលាការ ពាក់ព័ន្ធនឹងករណី “អំពើលួ,ចមានស្ថានទម្ងន់ ដោយសហចារី( លួ.ចទូរស័ព្ទ កុំព្យូទ័រ ទូរទស្សន៍ ) និងប្រើប្រាស់ដោយខុសច្បាប់នូវសារធាតុញៀន​”។

សូមជម្រាបថា​នៅថ្ងៃទី០៩ ខែមករា ឆ្នាំ២០២៣ វេលាម៉ោង០៣:០០នាទី ស្ថិតនៅរីសត និងវីឡា​ ស្ថិតនៅភូមិគ្រួស សង្កាត់ស្វាយដង្គំ ក្រុងសៀមរាប មានករណីអំពើលួ,ច ( លួ.ចទូរស័ព្ទ កុំព្យូទ័រ ទូរទស្សន៍ ) ដោយបានធ្វើសកម្មភាពផ្លោះរបងរីសត ចូលទៅលួ.ចទូរស័ព្ទ កុំព្យូទ័រ ទូរទស្សន៍ ក្នុងផ្ទះជួលដាច់របស់ជនរងគ្រោះឈ្មោះ​ ថ-ច-ថ​ ភេទស្រី អាយុ៤២ឆ្នាំ និងឈ្មោះ​ យ-ស-ផ​ ភេទប្រុស អាយុ៤២ឆ្នាំ ខណៈពេលដែរជនរងគ្រោះដេកងលក់។

ប្រភពបានបន្តថាក្រោយពេលធ្វើសកម្មភាព ជនសង្ស័យបានយកទូរទស្សន៍ ទៅលាក់ទុកក្នងព្រៃ ហើយនាំគ្នាបម្រុងធ្វើសកម្មភាពលួ,ចបន្តទៀត ក៏ត្រូវកម្លាំងសមត្ថកិច្ចល្បាត ហើយប្រទះឃាត់ខ្លួនតែម្ដង ដោយសារភាពថា ពួកខ្លួនពិតជាបានផ្លោះរបងចូលលួចទូរស័ព្ទ កុំព្យូទ័រ ទូរទស្សន៍ ពិតប្រាកដមែន។

ជនសង្ស័យ​ទាំង២នាក់​ (ដែលជាមុខសញ្ញាធ្លាប់ជាប់ពន្ធនាគារ)​ រួមមាន៖០១-ឈ្មោះ​ អ៉ី សាក់ ភេទប្រុស អាយុ១៩ឆ្នាំ​ មុខរបរមិនពិតប្រាកដ មានស្រុកកំណើតនៅ​ ភូមិប្រយុទ្ធ ឃុំទឹកវិល ស្រុកពួក ខេត្តសៀមរាប បច្ចុប្បន្នស្នាក់នៅបន្ទប់ជួលភូមិសាលាកន្សែង សង្កាត់ស្វាយដង្គំ ក្រុង/ខេត្តសៀមរាប។

០២-ឈ្មោះ​ ធាវ ប៊ុនធឿន ហៅតឿ ភេទប្រុស អាយុ៣១ឆ្នាំ​ មុខរបរលក់ស្រាក្រឡុក មានស្រុកកំណើតនៅភូមិគោកបេង ឃុំគោកចក ក្រុងសៀមរាប ខេត្តសៀមរាប បច្ចុប្បន្ននៅភូមិមណ្ឌល៣ សង្កាត់ស្លក្រាម ក្រុង/ខេត្តសៀមរាប។

+វត្ថុតាងដកហូតបាន ម៉ូតូជនសង្ស័យចំនួន០២គ្រឿង ទូរស័ព្ទដៃចំនួន​ ០៣គ្រឿង ទូរទស្សន៍LEDចំនួន០២គ្រឿង កាបូបស្ពាយចំនួន០១ កាសត្រចៀកចំនួន០២ឈុត កូនសោររថយន្តចំនួន០១ កំព្យូទ័រចំនួន០១គ្រឿង។​ ដោយបានប្រគល់ជូនជនរងគ្រោះយកទៅប្រើប្រាស់វិញ​។ ក្នុងនោះធ្វើតេស្តស្វែងរកសារធាតុញៀន ឈ្មោះធាវ ប៊ុនធឿន ហៅតឿ ជាលទ្ធផល វិជ្ជមាន ( ជាតំរុយមេតំហ្វេតាមីន )៕SRP

ខេត្តកំពង់ចាម​៖លោក អ៊ុន​ ចាន់ដា​ អភិបាលខេត្តកំពង់ចាម​ បានថ្លែងអំណរគុណ​យ៉ាង​ជ្រាលជ្រៅ​ចំពោះ​ សម្តេចតេជោ​ ហ៊ុន​ សែន​ ដែល​បាន​ផ្ដល់ការចាក់វាក់សាំងកូវីដ-១៩ ដួសជំរុញទី៣ ទី៤ ទី៥ និងដូសទី៦ ដល់មន្ត្រីរាជការ​ កងកម្លាំងប្រដាប់អាវុធ និងប្រជាពលរដ្ឋនៅក្នុងភូមិសាស្រ្តខេត្តកំពង់ចាម។

ការ​ថ្លែង​អំណរគុណ​នេះ​ បនបន្ទាបពីអភិបាលខេត្ត​ រួមនឹងថ្នាក់ដឹកនាំ​ មន្ត្រីរាជការ​ កងកម្លាំង​ប្រដាប់​អាវុធ​ ​អ្នក​សារព័ត៌មាន​ និង​បងប្អូន​ប្រជាពលរដ្ឋ​បានអញ្ជើញ​ទទួល​ការ​ចាក់​វ៉ាក់សាំង បង្ការជំងឺកូវីដ-១៩​ ដូសជំរុញ​ នៅ​​សាលាខេត្តកំពង់ចាម​ ​​នៅសៀលថ្ងៃទី៩​ ខែមករា​​​ ឆ្នាំ​២០២៣​។

រដ្ឋបាលខេត្តកំពង់ចាម បាន​ជូន​ដំណឹងដល់បងប្អូនប្រជាពលរដ្ឋរស់នៅក្នុងខេត្តកំពង់ចាម​ថា​ ដើម្បីបង្កើន ភាពស៊ាំ នៅក្នុងសហគមន៍ឱ្យកាន់តែប្រសើរឡើង ទប់ស្កាត់ការឆ្លងរីករាលដាល នៃជំងឺកូវីដ-១៩ និងធានាការពារ អាយុជីវិតរបស់ប្រជាជន ពីជំងឺមហាប្រល័យកូវីដ-១៩ សម្តេចហ៊ុន សែន បានអនុញ្ញាតឱ្យក្រសួងសុខាភិបាល បន្តចាក់វ៉ាក់សាំងកូវីដ-១៩ ដូស ទី៣, ទី៤, ទី៥ និងដូសទី៦ ជូនដល់ប្រជាពលរដ្ឋនៅតាមមូលដ្ឋានបន្ថែមទៀត។

អាស្រ័យដូចបានជម្រាបជូនខាងលើ សូមឯកឧត្តម លោកជំទាវ លោក លោកស្រី បងប្អូនប្រជាពលរដ្ឋ រស់នៅក្នុងខេត្តកំពង់ចាម អញ្ជើញទៅទទួលការចាក់វ៉ាក់សាំងកូវីដ-១៩ ដូសទី៣, ទី៤, ទី៥ និងដូសទី៦ ដោយឥតគិតថ្លៃ នៅតាមទីតាំងដែលរដ្ឋបាលក្រុង-ស្រុក បានកំណត់ និងរៀបចំ ដូចជានៅតាមសាលារៀន វត្តអារាម និងតាមទីតាំងនានាដែលអាជ្ញាធរឃុំ-សង្កាត់ បានកំណត់ ចាប់ពីថ្ងៃទី៩ ខែមករា ឆ្នាំ២០២៣ នេះតទៅ។

ទន្ទឹមនឹងនេះ រដ្ឋបាលខេត្តកំពង់ចាម សូមក្រើនរំលឹកបងប្អូនដែលអញ្ជើញទៅទទួល ការវ៉ាក់សាំង កូវីដ-១៩ ដូសទី៣, ទី៤, ទី៥ និងដូសទី៦ ត្រូវចូលរួមអនុវត្តឱ្យបានខ្ជាប់ខ្ជួនវិធានការសុខាភិបាល និងប្រកាន់ ខ្ជាប់នូវវិធានការ « ៣ការពារ និង៣កុំ» ព្រមជាមួយគ្នានេះក៏ សូមអំពាវនាវដល់បងប្អូនប្រជាពលរដ្ឋ មាតាបិតា និងអាណាព្យាបាលដែលមានបុត្រធីតាអាយុចាប់ពី​ ៥ឆ្នាំឡើង សូមមកទទួលការចាក់វ៉ាក់សាំងកូវីដ-១៩ ដូស មូលដ្ឋាន ឬដូសជំរុញដោយស្ម័គ្រចិត្ត និងឥតគិតថ្លៃ នៅតាមទីតាំងដែលបានរៀបចំ ដើម្បីរួមគ្នាបញ្ឈប់ការឆ្លង រីករាលនៃជំងឺកូវីដ-១៩ នៅក្នុងសហគមន៍​ផងដែរ​៕SRP

ខេត្តសៀមរាប៖លោក ពៅ ប៊ុនធឿន អភិបាលស្រុកជីក្រែង ឋានន្តរស័ក្តិវរៈមន្តី្រថ្នាក់លេខ២ ត្រូវបានប្រកាសចូលកាន់តំណែងជាអភិបាលស្រុកអង្គរធំ ជំនួសលោក ឡុង រដ្ឋារក្ស ដែលត្រូវបានគ្រប់អាណត្តិរបស់ខ្លួន បានផ្ទេរភារកិច្ចថ្មីទៅបម្រើការនៅសាលាខេត្តសៀមរាប។

ពិធីធ្វើឡើងថ្ងៃទី ០៩ ខែ មករា ឆ្នាំ២០២៣ ក្រោមអធិបតីភាពរបស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប​៕SRP

ខេត្តសៀមរាប៖លោក រិន ឡូត អភិបាលរងស្រុកក្រឡាញ់ ឋានន្តរស័ក្តិ ឧត្តមមន្ត្រីថ្នាក់លេខ៥ ត្រូវបានប្រមុខរាជរដ្ឋាភិបាល ប្រកាសតែងតាំងជាអភិបាលស្រុកបន្ទាយស្រី ជំនួសលោក ឃឹម ហ្វីណង់ ដែលបានទៅទទួលភារកិច្ចថ្មី ជាអភិបាលរងខេត្តសៀមរាប។

ការប្រកាសអភិបាលស្រុកបន្ទាយស្រី ធ្វើឡើងនៅចន្ទម្សិលមិញ ក្រោមអធិបតីភាពរបស់ ឯកឧត្តម ទៀ សីហា អភិបាលខេត្តសៀមរាប​។

ក្នុងពិធី ឯកឧត្តម ទៀ សីហា ក៏បានធ្វើការកោតសរសើរ និង វាយតម្លៃខ្ពស់ផងដែរ ចំពោះថ្នាក់ដឹកនាំមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងស្រុកបន្ទាយស្រី ដែលបានរួមសាមគ្គីគ្នា ក្នុងការកសាងអភិវឌ្ឍន៍ស្រុកឱ្យមានការរីកចម្រើនលើគ្រប់វិស័យក្នុងរយៈពេលកន្លងមកនេះ។ ម៉្យាងទៀតស្រុកក៏មានសក្តានុពល ក្នុងវិស័យកសិកម្ម ទេសចរណ៍ទៀតផង។

ឯកឧត្តមបន្តទៀតថា សមទ្ធិផលដែលស្រុកសម្រេចបានកន្លងមកនេះ ជាគុណប្រយោជន៍ដ៏ឧត្តុង្គឧត្តមនៃប្រជាជាតិ ព្រមជាមួយកម្មវិធីកំណែទម្រង់នានារបស់រាជរដ្ឋាភិបាល ហើយក្នុងបរិបទ នៃកំណែទម្រង់វិមជ្ឈការ និងវិសហមជ្ឈការ រាជរដ្ឋាភិបាលសម្រេចបាននូវសមទ្ធិផល ជាច្រើគួរជាទីមោទនភាព។ ជាមួយគ្នានោះ ឯកឧត្តមបានស្នើដល់ លោកអភិបាលស្រុក ដែលទើបតែងតាំងថ្មី រួមទាំងក្រុមប្រឹក្សា គណៈអភិបាលស្រុក មន្រ្តីរាជការ កងកម្លាំងប្រដាប់អាវុធ និងកម្លាំងមានសមត្ថកិច្ចគ្រប់លំដាប់ថ្នាក់នៃស្រុកបន្ទាយស្រី
ត្រូវរួមសហការគ្នាអនុវត្តការងារសំខាន់ៗ ជាអាទិភាពមួយចំនួននោះគឺ -ត្រូវរួមគ្នាថែរក្សាការពារសន្តិភាព ស្ថិរភាពនយោបាយ ស្ថិរភាព សង្គមឱ្យបានល្អប្រសើរ ក្នុងការតាមដានត្រួតពិនិត្យ និងដោះស្រាយបាតុភាពអសកម្ម និង ការថ្នាំងថ្នាក់នានានៅមូលដ្ឋានឲ្យមានប្រសិទ្ធភាពខ្ពស់។ ក្នុងនោះត្រូវរួមគ្នាកសាង ពង្រឹងសមត្ថភាពរដ្ឋបាលថ្នាក់ក្រោមជាតិ ជាពិសេសភូមិ ឃុំឱ្យមានភាពធុនទៅនិងវិបត្តការប្រែប្រួល នៃព្រឹត្តិការណ៍នានា ជាក់ស្តែងដូចជាយើងកំពុងជួបប្រទះនៅពេលកន្លងមក ដោយឆ្លងរាលដាលនៃមេរោគកូវីដ-១៩ ដោយយើងក៏មិនត្រូវធ្វេសប្រហែសឡើយ គឺត្រូវប្រកាន់ឱ្យបានខ្ជាប់ខ្ជួននូវវិធានការរបស់រាជរដ្ឋាភិបាល ៣កុំ និង ៣ការពារ ដើមី្បបន្សាំខ្លួននឹងការរស់នៅតាមគន្លងប្រក្រតីថ្មី នៃបរិបទកូវីដ-១៩ ព្រមទាំងជម្រុញដល់អាជ្ញាធរភូមិ ឃុំ ធ្វើការផ្សព្វផ្សាយដល់ប្រជាពលរដ្ឋឲ្យទៅចាក់វ៉ាក់សាំងនូវដូសបន្តទៀតផងដែរ។

ឯកឧត្តម ទៀ សីហា បានផ្តល់នូវអនុសាសន៍៨ចំណុច សម្រាប់រដ្ឋបាលស្រុកដេីម្បីបន្តសហការអនុវត្តឱ្យមានប្រសិទ្ធិភាព នូវកម្មវិធីកំណែទម្រង់នានា របស់រាជរដ្ឋាភិបាលឲ្យមានវឌ្ឍនភាពតាមផែនការកំណត់ ជាពិសេសត្រូវត្រៀមសហការអនុវត្តជាមួយក្រុមការងារថ្នាក់ជាតិ ថ្នាក់ខេត្ត ថ្នាក់ស្រុក និងឃុំ ឲ្យទទួលបានជោគជ័យ និង បង្ការទប់ស្កាត់ បង្រ្កាបបទល្មើសព្រៃឈើ និង ការចូលទន្ទ្រានកាន់កាប់ដីរដ្ឋ។ ម៉្យាងទៀតស្រុកបន្ទាយស្រី ក៏មានសក្តានុពលលើវិស័យទេសចរណ៍ និង កសិកម្ម ដែលមានប្រាង្គប្រាសាទដ៏ប្រណិតក្នុងការទាក់ទាញភ្ញៀវទេសចរជាតិ អន្តរជាតិមកទស្សនាកម្សាន្ត។

ឯកឧត្តមក៏បានធ្វើការផ្តាំផ្ញើដល់អភិបាលដែលទើបតែងតាំងថ្មី មានការសាមគ្គីឯកភាពផ្ទៃក្នុងឲ្យបានល្អ ដើម្បីរួមគ្នាបំពេញការងាររបស់រដ្ឋបាលស្រុកឱ្យកាន់តែមានប្រសិទ្ធភាពថែមទៀត។ ខិតខំពង្រឹង និង ទទួលខុសត្រូវក្នុងការគាំទ្របច្ចេកទេសទៅដល់ឃុំ ក្នុងដែនសមត្ថកិច្ចរបស់ខ្លួន និង ធ្វើការបណ្តុះបណ្តាលមន្រ្តីរាជការសាលាស្រុកឲ្យមានសមត្ថភាពគ្រប់គ្រាន់ក្នុងការអនុវត្តតួនាទី ភារកិច្ចរបស់ខ្លួនបានកាន់តែល្អប្រសើរ និង ត្រូវតាមដានត្រួតពិនិត្យជាប្រចាំអំពីបញ្ហាប្រឈមនានា ដែលនឹងអាចកើតមានឡើង ។ ក្នុងការអនុវត្តតួនាទី ភារកិច្ច ដែលបានកំណត់ ព្រមទាំងខិតខំស្វែងរកដំណោះស្រាយប្រកបដោយប្រសិទ្ធភាព និងការទទួលខុសត្រូវ ដោយត្រូវប្រកាន់ខ្ជាប់នូវគោលការណ៍ច្បាប់ និង លិខិតបទដ្ឋានគតិយុត្តិនានា ដើម្បីធ្វើយ៉ាងណាត្រូវរក្សាឲ្យបាននូវសាមគ្គីភាព ឯកភាពផ្ទៃក្នុងឲ្យបានល្អប្រសើរ៕SRP