ខេត្ដព្រះវិហារ៖លោកផ្កាយពីរ ស៊ិន ប៊ុនធឿន មេបញ្ជាការរងកងពលធំអន្តរាគមន៍លេខ៣ កំពុងរោងការរិះគន់ថា បានកាប់បំផ្លាញព្រៃឈើជិត២០០ហិកតា ដោយដួលរលំរនូករនេលពាសពេញដី ក្នុងភូមិកំពេញ ស្រុកជាំក្សាន្ដ ខេត្ដព្រះវិហារ។

សេចក្ដីរាយការណ៍ពីខេត្តព្រះវិហារបានឲ្យដឹងថា
រហូតហូតមកដល់ ថ្ងៃទី១១ ខែមេសា ឆ្នាំ២០២៣ ដើមឈើនៅលើផ្ទៃដីចំនួន ២០០ហិកតា បានដួលជិតអស់ហើយ មិនទាន់ឃើញអាជ្ញាធរ និងសមត្ថកិច្ចជំនាញខេត្ដព្រះវិហារ ធ្វើការទប់ស្កាត់នៅឡើយ។

ករណីបែបនេះ អាជ្ញាធរ និងក្រសួងពាក់ព័ន្ធ គួរណាតែចុះធ្វើអធិការកិច្ច នៅទីតាំងខាងលើដើម្បីធានា បានការការពារធនធានធម្មជាតិ ដែលជាទ្រព្យសម្បត្តិរបស់រដ្ឋ មិនគួរបណ្ដែតបណ្ដោយ អោយអ្នកមានអំណាចប្រើទឹកប្រាក់ បំផ្លិចបំផ្លាញព្រៃបែបនេះទេ។

ជុំវិញករណីនេះ លោកឧត្ដមសេនីយ៍ទោ ស៊ិន ប៊ុនធឿន មេបញ្ជាការរងកងពលធំលេខ៣ បានប្រាប់អ្នកសារព័ត៌មាន ថា ដីដែលកំពុងកាប់រានព្រៃឈើនៅភូមិកំពេញ ស្រុកជាំក្សាន្ដ ខេត្ដព្រះវិហារ មានចំនួន ២០០ហិកតា ជាដីរបស់លោក ដែលប្រមូលទិញ ពី ប្រជាពលរដ្ឋ ដែលជាដីស្របច្បាប់ និងមានលិខិតកាន់កាប់ត្រឹមត្រូវ៕SRP

ខេត្តកំពង់ចា៖អភិបាលខេត្តំពង់ចាម​ លោក អ៊ុន​ ចាន់ដា​ បាន​ព្រមាន​ថា​ នឹង​មិន​លេីកលែង​ជា​ដាច់ខាត​ ចំពោះ​ជន​ទាំងឡាយ​ណា​ ដែលបានប្រព្រឹត្តិនូវ​អំពើ​ពុក​រលួយ​ តាម​រយៈ​ការ​ផ្តល់​ប័ណ្ណ​ ប​ ស​ ស​ ជូន​ប្រជាពលរដ្ឋ​ ដោយ​មាន​ចិត្ត​លម្អៀង​ ទុច្ចរិត​និយម​បក្សពួក​។

លោកព្រមានបែប​នេះ​ក្នុង​កិច្ចប្រជុំសាមញ្ញលើកទី៤៧​ អាណត្តិទី៣ របស់ក្រុមប្រឹក្សាខេត្តកំពង់ចាម​ នៅថ្ងៃអង្គារនេះ។

សូមជម្រាបថា បន្ទាប់​ពី​មាន​លេីក​ឡើង​ពាក់ព័ន្ធ​ ទៅ​នឹង​ការ​ផ្តល់​ប័ណ្ណ​ ប​ ស​ ស​ មិន​ប្រក្រតី​ លោក អ៊ុន​ ចាន់ដា​ អភិបាលខេត្តកំពង់ចាម​ បាន​ស្នើ​ដល់​សមាជិក​ក្រុមប្រឹក្សា​ខេត្ត​ ក៏ដូចជា​មន្រ្តី​ពាក់ព័ន្ធ​ ឱ្យ​ជួយ​វែកមុខ​ជន​ទាំងឡាយ​ណា​ ដែល​បាន​ប្រព្រឹត្តិ​អំពើ​ពុក​រលួយ​ តាម​រយៈ​ការ​ផ្ដល់​ ប័ណ្ណ​​របបសន្តិសុខសង្គម​ ដើម្បី​យក​មក​ផ្តន្ទា​ទោស​ តាម​ផ្លូវ​ច្បាប់​ ព្រោះ​រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចហ៊ុន សែន ពិតជាបានយកចិត្តទុកដាក់លើកកម្ពស់ សុខុមាលភាព​ប្រជាពលរដ្ឋ​ ដែល​រស់​នៅ​ក្បែរបន្ទាត់ក្រីក្រ​ ហើយ​បានដាក់ចេញនូវវិធានការណ៍ អន្តរាគមន៍ គាំពារសង្គម តាមរយៈកម្មវិធីជំនួយសង្គមចំនួន ២បន្ថែមទៀត​គឺ​ ការឧបត្ថម្ភសាច់ប្រាក់ជូនគ្រួសារ ងាយរងហានិភ័យក្នុងអំឡុងពេលមានសម្ពាធអតិផរណា និងការឧបត្ថម្ភសាច់ប្រាក់ជូនគ្រួសារ ងាយរងហានិភ័យ​ ដែលរងផលប៉ះពាល់ធ្ងន់ដោយទឹកជំនន់​ នាពេលកន្លងមក​ផងដែរ។

ក្នុងកិច្ចប្រជុំនេះដែរ លោក ខ្លូត​ ផន ប្រធានក្រុមប្រឹក្សាខេត្តកំពង់ចាម បានលើកយកសេចក្កី ព្រាងរបៀបវារៈសំខាន់ៗ មកពិភាក្សា រួមមាន៖
១-ពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី៤៧ អាណត្តិទី៣ របស់ក្រុមប្រឹក្សាខេត្តកំពង់ចាម។
២-ពិនិត្យ ពិភាក្សា និងអនុម័តសេចក្តីព្រាងរបាយការណ៍បូកសរុបលទ្ធផលការងារប្រចាំត្រីមាស ទី១ និងទិសដៅការងារប្រចាំត្រីមាសទី២ ឆ្នាំ២០២៣ របស់រដ្ឋបាលខេត្តកំពង់ចាម។
៣-ពិនិត្យ ពិភាក្សា និងអនុម័តសេចក្ដីព្រាងផែនការសកម្មភាពការងាររយៈពេលបីខែ (មេសា ឧសភា មិថុនា) ឆ្នាំ២០២៣ របស់រដ្ឋបាលខេត្តកំពង់ចាម។
៤-ពិនិត្យ ពិភាក្សា និងអនុម័តសេចក្តីព្រាងលើការស្នើសុំផែនការក្របខ័ណ្ឌប្រចាំឆ្នាំ២០២៤។
៥-ពិនិត្យ និងអនុម័តសេចក្តីព្រាងផែនការក្របខ័ណ្ឌរបស់មន្ទីរសុខាភិបាល នៃរដ្ឋបាលខេត្តកំពង់ចាម​ ឆ្នាំ២០២៤​៕SRP

ខេត្តសៀមរាប៖មានការលើកឡើងថាក្រុមឈ្មួញដែលបានសិទ្ធិទៅកាយយកដី នៅតំបន់អភិរក្សត្រីពូជ បឹងពារាំង យកទៅលក់យកលុយចែកគ្នាជាមួយអ្នកពាក់ព័ន្ធ ហាក់មិនគោរពអនុវត្តតាមការណែនាំរបស់លិខិតរដ្ឋបាលខេត្តសៀមរាប។

ប្រភពច្បាស់ការបានអោយដឹងថា ជា
ច្រើនខែមកហើយ ស្ទើតែគ្រប់រដូវកាល គេបានឃើញឈ្មួញពីរក្រុម នៅតែបន្តដណ្តើមគ្នា ជីកកាយដី បឹងធម្មជាតិ តំបន់អភិរក្សពូជត្រី បឹងពារាំង ដឹកលក់ក្នុង១ថ្ងៃៗ រាប់រយឡាន ក្រោមរូបភាពស្តារ។

បើទោះបីជាក្រុមឈ្មួញ សម្រុកជីកកាយដឹកយកដីលក់រាប់ខែឆ្នាំ ហើយត្រឹមតែប្រើពាក្យ (ស្តារបឹង) បែបនេះ គេហាក់មិនទាន់ឃើញមន្ត្រីជំនាញរូបណា បញ្ជាក់ពីការដឹកដីពីបឹងពារាំងយកទៅលក់យកលុយទៅណានៅឡើយទេ។

ប្រភពបានបង្ហើបថា ប្រការដែលឈ្មួញ អាចកាយយកអាចម៍ដី ពីតំបន់ធម្មជាតិ បឹងពារាំង បានដោយលូនបែបនេះ គេមានការសង្ស័យថា ក្រុមឈ្មួញជាមួយអាជ្ញាធរជំនាញពាក់ព័ន្ធ មានការឃុបឃិតគ្នា ក្នុងការចែកផលប្រយោជន៍ ទៅវិញទៅមក។

យោងតាមលិខិតរបស់សាលាខេត្តសៀមរាប ដែលចុះហត្ថលេខា ដោយ លោក ទៀ សីហា អភិបាលខេត្តសៀមរាប បង្ហាញថា អនុញ្ញាតអោយជីកស្តារលើផ្ទៃ ដី ១០ហិកតា។ អាចម៍ដីដែលបានពីការជីកស្តារ មួយផ្នែកសម្រាប់ដោះស្រាយការជីកស្តារ ឯមួយផ្នែកទៀតសម្រាប់អភិវឌ្ឍន៍តាមត្រូវការក្នុងមូលដ្ឋាន។ ករណីមិនអនុវត្តតាម នឹងត្រូវបញ្ឈប់សកម្មភាពជាបន្ទាន់។ ប៉ុន្តែផ្ទុយទៅវិញ សកម្មភាពឈ្មួញក្នុងពេលបច្ចុប្បន្ន គេមិនបានឃើញអនុវត្តទៅតាមលិខិតរបស់សាលាខេត្តនោះទេ។

ដោយក្រុមឈ្មួញប្រឹងជីកយ៉ាងល្ហល្ហេវ និងដឹកដីយកទៅលក់យ៉ាងគគ្រឹកគគ្រែង បង្កភាពហុយប៉ះពាល់ការរស់នៅដល់ពលរដ្ឋរៀងរាល់ថ្ងៃនិងថែមទាំងបំផ្លាញផ្លូវលំមួយចំនួនយ៉ាងធ្ងន់ធ្ងរថែមទៀត។

ករណីខាងលើនេះ អាជ្ញាធរនិងជំនាញពាក់ព័ន្ធ មិនគួរបណ្ដែតបណ្ដោយ ឲ្យមានអំពើកាយដី បឹងធម្មជាតិយ៉ាងគគ្រឹកគគ្រេង ហើយមិនអនុវត្តតាមលិខិតរបស់សាលាខេត្តបែបនេះទេ។

លោក អ៉ឹង សោភ័ណ្ឌ នាយកទីចាត់ការអន្តរវិស័យរដ្ឋបាលខេត្តសៀមរាប បានថ្លែងប្រាប់សៀមរាប ប៉ុស្ដិ៍ ថា ពាក់ព័ន្ធនឹងគម្រោងស្តារ និងអភិរក្សនេះ មានការឯកភាពពីក្រសួងរួចហើយ។អ្នក ធ្វើពិបាក អ្នកថាស្រួលណាស់…. បន្ទាប់ពីស្តារមួយរយ:ពេល ជីវះចម្រះនឹងកើតឡើងវិញ។ ចំណែកលោក ឡេង លាភ ប្រធានមន្ទីរ៉ែនិងថាមពលខេត្តសៀមរាប បានបញ្ជាក់ថា ការជីកស្តារនេះ មានការអនុញ្ញាតគ្រប់ស្ថាប័ន។ អាចសាក សួរទៅរដ្ឋបាលខេត្ត ដើម្បីច្បាស់ ព្រោះនេះជាគម្រោងរបស់ខេត្ត ។

បើតាម លោកលី វណ្ណៈ នាយករដ្ឋបាលសាលាខេត្តសៀម រាប បានថ្លែងប្រាប់ សៀមរាប ប៉ុស្ដិ៍ ថា ជាការស្នើសុំរបស់មន្រ្តីជំនាញ និងមានការឯកភាពពីក្រសួងរួចហើយ ។

ទោះជាបែបនេះ គេនៅមិនទាន់ដឹងថា តើចំណូលដែលបានពីការលក់អាចម៍ដី ដែលដឹកចេញពីបឹងពារាំយ៉ាងគគ្រឹកគគ្រែង ក្នុង១ថ្ងៃៗរាប់សិបឡាននេះ ចូលដល់រដ្ឋ ដែរឬយ៉ាងណានោះទេ។

មន្ត្រីនៃសហគមន៍ក្នុងសង្កាត់ជ្រាវ និងសង្កាត់ចុង ឃ្នៀស មួយចំនួនបានបង្ហើបថា ចាប់តាំងពីមានការជីកស្តារដឹកដីចេញពីបឹងពារាំង មិនមានភ្ញៀវចូលទៅទស្សនាទេសភាពព្រៃលិចទឹក ក៏ដូចជាហ្វូងសត្វស្លាប ក្នុងបឹងធម្មជាតិនេះទេ ខណ:ឆ្នាំកន្លងទៅមុនពេលជីកស្តារមានភ្ញៀវទៅទស្សនាស្ទើតែរកកាណូតដឹកជូនមិនបាន។

ពួកគេក៏បានស្នើសុំអោយជំនាញពាក់ព័ន្ធ មេត្តាបើកការស៊ើបអង្កេត និងចុះទៅទប់ស្កាត់ជាបន្ទាន់ បើពុំដូច្នោះទេ ផ្លូវលំ និងដីបឹងធម្មជាតិ បឹងពារាំង ពិសេសដីល្បាប់ផ្នែកខាងលើ ដែលមានជីវ:ចម្រុះសម្រាប់ត្រីពងនិងកូន ត្រូវបំភ្លេចបំផ្លាញយ៉ាងធ្ងន់ធ្ងរ ក្រោមថ្វីដៃឈ្មួញពីរក្រុមនាពេលបច្ចុប្បន្នជាក់ជាមិនខាន។

សូមបញ្ជាក់ថា ព្រោះតែដណ្តើមប្រយោជន៍គ្នាពីបឹងពារាំង កាលពីដើមខែកុម្ភ: ឆ្នាំ២០២២ កន្លងទៅ ឈ្មួញពីក្រុមបានវ៉ៃតប់គ្នាយ៉ាងសាហាវព្រៃផ្សៃ រហូតគម្រាមបញ្ចប់តំណែងប្រធានសហគមន៍បឹងពារាំងទៀតផង នៅចំណុចកុងត្រូល ផ្លូវចូលទៅកាន់បឹងពារាំង។ភ្លាមៗនោះមអាជ្ញាធរក៏ចុះទៅបិទ សកម្មភាពជីកស្តារបឹង បានត្រឹមមួយដង្ហើមចង្រិត ហើយក៏បន្តបើកឡើងវិញ៕SRP

ខេត្តសៀមរាប៖ករណីឆក់កាបូប នៅក្រុងសៀមរាប ហាក់កម្រើកឡើងវិញ ក្នុងរយៈពេលចុងក្រោយនេះ ប៉ុន្តែករណីនេះ ត្រូវបានសមត្ថកិច្ចនគរបាលខេត្តសៀមរាប បង្ក្រាបបានទាន់ពេលវេលា។

អធិការនគរបាលក្រុងសៀមរាប លោកដា ចំរើន បានឲ្យដឹងថា នៅថ្ងៃទី១០ ខែមេសា ឆ្នាំ២០២៣ កម្លាំងនគរបាលក្រុងសៀមរាប បានសហការជាមួយនគរបាលព្រហ្មទណ្ឌកម្រិតស្រាល បានឃាត់ខ្លួនជនសង្ស័យចំនួន២នាក់ ដោយបានឆ្លើយសារភាពថា ពួកខ្លួនពិតជាបានជិះម៉ូតូឆក់កាបូបជនរងគ្រោះពិតមែន។ ឈ្មោះ​ ជា កវី ហៅហ៊ីន ជាអ្នកឆក់ កាបូប រីឯជនឈ្មោះ​ ប៉ឹង ភត្រ្តា ហៅចាន់ ជាអ្នកបើកម៉ូតូ ចំណែកប្រាក់ដែលឆក់បាន ពួកខ្លួនបានយកចែកគ្នា។

ជនសង្ស័យ១-ឈ្មោះ​ ប៉ឹង ភត្រ្តា ហៅចាន់ ភេទប្រុស អាយុ៣០ឆ្នាំ មានស្រុកកំណើតនៅភូមិភ្នំក្រោម សង្កាត់សៀមរាប ក្រុងសៀមរាប និងទីលំនៅបច្ចុប្បន្នស្នាក់នៅភូមិភ្នំក្រោម សង្កាត់សៀមរាប ក្រុងសៀមរាប (ធ្លាប់ជាប់ពន្ធនាគារករណីគ្រឿងញៀន) ០២-ឈ្មោះ ជា កវី ហៅហ៊ីន ភេទប្រុស អាយុ២២ឆ្នាំ មុខរបរលក់ប៉េងប៉ោង មានស្រុកកំណើត នៅភូមិចាមលើ ឃុំព្រែកថ្មី ស្រុកកោះធំ ខេត្តកណ្តាល បច្ចុប្បន្នរស់នៅភូមិទី៥ សង្កាត់ចុងឃ្នៀស ក្រុងសៀមរាប (ធ្លាប់ជាប់ពន្ធនាគារករណីគ្រឿងញៀន)។ ជនសង្ស័យទាំង២នាក់ វិជ្ជមាន(ជាតំរុយមេតំហ្វេតាមីន)។

លោកដា ចំរើន បន្តថា ករណីឆក់កាបូបនេះ ខណៈពេលដែរជនរងគ្រោះជិះកង់ បានកើតឡើង នៅថ្ងៃទី០៨ ខែមេសា ឆ្នាំ២០២៣ វេលាម៉ោង១២និង៥៦នាទី នៅចំណុចផ្លូវបេតុង ក្នុងភូមិបន្ទាយចាស់ សង្កាត់ស្លក្រាម​ ក្រុងសៀមរាប។

ជនរងគ្រោះ ឈ្មោះ ជ.ច ភេទស្រី អាយុ​ ១៩ឆ្នាំ រស់នៅភូមិវត្តបូព៌ សង្កាត់សាលាកំរើក ក្រុងសៀមរាប។ ក្នុងកាបូប មានកុំព្យូទ័រយូរដៃពណ៌ទឹកប្រាក់ ម៉ាកDell ១គ្រឿង ទូរស័ព្ទម៉ាកvivo ពណ៌ក្រហម លាយស្វាយ ១គ្រឿង លុយ៣០ដុល្លារ លុយខ្មែរ១៥ម៉ឺនរៀល។

អធិការបន្តថាក្រោយឃាត់ខ្លួនសមត្ថកិច្ចដកហូតវត្ថុតាងបាន៖ ម៉ូតូជនសង្ស័យជិះធ្វើសកម្មភាព​ ១គ្រឿង។ ទូរស័ព្ទ០៣គ្រឿង កាបូបខ្មៅ​ ១-កុំព្យូរទ័រម៉ាកDell ១គ្រឿង -ថង់ថ្កឹបមាត់ និងឧបករណ៍ច្នៃជក់ថ្នាំញៀនមួយចំនួនផងដែរ។

បើតាម លោកដា ចំរើន អធិការក្រុងសៀមរាប ដែល បានដឹកនាំកម្លាំងផ្នែកព្រហ្មទណ្ឌ​ ចុះបង្រ្កាប​ បញ្ជាក់ថា ប្រតិបត្តិការបង្ក្រាបនេះ ដោយមានការចង្អុលបង្ហាញពីសំណាក់ លោកតេង ច័ន្ទណាត ស្នងការនគរបាលខេត្ត និងលោកភឹង ចិន្តារ៉េត ស្នងការរង ទទួលផែនការងារ នគរបាលព្រហ្មទណ្ឌ៕SRP

តាមរយៈទំព័រតេលេក្រាមផ្លូវការរបស់សម្ដេចតេជោហ៊ុន សែន នាយករដ្ឋមន្ត្រី នៅថ្ងៃអង្គារនេះ បានព្រមានចំពោះមន្ត្រីទាំងអស់កុំធ្វើបាបអ្នកទន់ខ្សោយ និងប្រើប្រាស់អាវុធខុសច្បាប់។

តាមរយៈសាររបស់នាយករដ្ឋមន្ត្រី ដែល សៀមរាប ប៉ុស្តិ៍ ទទួលបាន បញ្ជាក់ថា៖ បើតុលាការមិនចាត់ការតាមផ្លូវច្បាប់ទេទុកឲ្យខ្ញុំដាក់វិន័យតាមផ្លូវរដ្ឋសិន។ អាងមានអំណាចប្រើប្រាស់អាវុធគំរាមអ្នកទន់ខ្សោយ។ នេះជាសារព្រមានចំពោះមន្ត្រីទាំងអស់សូមកុំអាងអំណាចធ្វើ បាបអ្នកទន់ខ្សោយជាពិសេសសូមកុំប្រើប្រាស់អាវុធខុសច្បាប់។

ក្នុងសារដដែលបន្តថា សូមរដ្ឋមន្ត្រីក្រសួងយុត្តិធម៍ធ្វើការជាមួយតុលាការសូមកុំឲ្យជនល្មើសប្រើប្រាស់អាវុធខុសច្បាប់បាននៅក្រៅឃុំមុនពេលកាត់ទោសដែលជននោះអាចតាមគំរាមកំហែងដល់អ្នកផ្សេងទៀត។

ការចេញសារព្រមានរបស់សម្ដេចនាយករដ្ឋមន្ត្រីហ៊ុន សែន បន្ទាប់ពី សម្ដេចបានចេញអនុក្រឹត្យបញ្ចប់មុខតំណែង ឈ្មោះ បែល វ៉ាន់ដែត ជាអគ្គនាយករងនៃអគ្គនាយកដ្ឋានរដ្ឋបាល និងកិច្ចការទូទៅនៃរដ្ឋលេខាធិការដ្ឋានអាកាសចរស៊ីវិល៕SRP

លោក បណ្ឌិត ហ៊ុន ម៉ាណែត តំណាងសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត បានអះអាងថា​ ក្នុងរយៈកាលកន្លងមកនេះ សម្តេចតេជោ តែងបានប្តេជ្ញាកសាងសាលារៀន ឱ្យបានកៀកជិត ទៅនឹងមូលដ្ឋាននៅទូទាំងប្រទេស ដើម្បីបង្កលក្ខណៈឱ្យកូនចៅ ប្រជាពលរដ្ឋ ជាពិសេសសិស្សានុ សិស្ស ជានារី ឱ្យទទួលបានឱកាសសិក្សារៀនសូត្រ ដោយពុំចាំបាច់ធ្វើដំណើរផ្លាស់ទីទៅឆ្ងាយ។

លោកហ៊ុន ម៉ាណែត ថា ជាក់ស្តែង ក្នុងស្រុកស្ទឹងត្រង់នេះផ្ទាល់ មានសមិទ្ធផល អគារសិក្សា ដែលជាអំណោយដ៏ថ្លៃថ្លារបស់ សម្តេចទាំងទ្វេ ចំនួន៦៥ ខ្នង ស្មើនឹង​ ៤៦០បន្ទប់ សម្រាប់ការសិក្សារៀនសូត្ររបស់កូនចៅរបស់ ប្រជាពលរដ្ឋ ដែលនឹងផ្តល់នូវផលផ្លែផ្កាសម្រាប់បុគ្គល​ គ្រួសារ និងសង្គម។

លោកថ្លែង​បែប​នេះក្នុងពិធីសម្ពោធសាលាបឋមសិក្សា-អនុវិទ្យាល័យ សម្តេចតេជោ ហ៊ុន សែន ដងក្តារ, អគារសម្ពពនៃមណ្ឌលសុខភាពដងក្តារ និងពិធីបើកការដ្ឋានស្ថាបនាផ្លូវបេតុង ស្ថិតក្នុងឃុំដងក្តារ ស្រុកស្ទឹងត្រង់ ខេត្តកំពង់ចាម នៅ
ថ្ងៃចន្ទម្សិលមិញ។

លោកហ៊ុន ម៉ាណែត ក៏បាន​ថ្លែង​អំណរគុណ​ដល់​ប្រជាពលរដ្ឋ នៅក្នុងស្រុកស្ទឹងត្រង់ ក៏ដូចជាក្នុងខេត្តកំពង់ចាមទាំងមូល ដែលតែងជឿជាក់លើរាជរដ្ឋាភិបាលក្រោមដឹកនាំ របស់ សម្តេចតេជោ នាយករដ្ឋមន្តី្រ ជាពិសេស តាមរយៈការទទួលចាក់វ៉ាក់សាំងកូវីដ-១៩ គ្រប់ៗគ្នា ដើម្បីការពារអាយុជីវិតខ្លួនឯង និងក្រុមគ្រួសារ ព្រមទាំងប្រទេសជាតិទាំងមូល។ សក្ខីភាពនេះបានបង្ហាញថា ប្រជាពលរដ្ឋយើងនៅតែគាំទ្រ និងផ្តល់ទំនុកចិត្តចំពោះ សម្តេចតេជោ ក្នុងការដឹកនាំការពារ និងសង្គ្រោះអាយុជីវិតនៅគ្រប់ដំណាក់កាល លំបាកបំផុត ជាពិសេស នៅក្នុងយុទ្ធនាការប្រយុទ្ធនឹងជំងកូវីដ-១៩ កន្លងមកនេះ សម្តេចតេជោ បានបង្ហាញនូវភាពជាអ្នកដឹកនាំដ៏គួរស្ញប់ស្ញែង តាមរយៈចក្ខុវិស័យដ៏វែងឆ្ងាយ, យុទ្ធសាស្ត្រច្បាស់លាស់ និងភាពអារកាត់ប្រកបដោយការទទួលខុសត្រូវខ្ពស់ ទាំងក្នុងការទប់ស្កាត់ និងគ្រប់គ្រងការរីករាលដាល, ការពិនិត្យព្យាបាលអ្នកជំងឺកូវីដ-១៩ និងជោគជ័យនៃយុទ្ធនាការជាតិចាក់វ៉ាក់សាំងការពារ នៅទូទាំងប្រទេស ហើយនៅក្នុងដំណាក់កាលនីមួយៗនេះ គឺអាយុជីវិតរបស់ប្រជាពលរដ្ឋគ្រប់វ័យ និងគ្រប់មជ្ឈដ្ឋាន ត្រូវបានតម្កល់ជាកត្តាអាទិភាពចម្បងបំផុត​។

បេីតាម​លោក អ៊ុន​ ចាន់ដា​ អភិបាលខេត្តកំពង់ចាម​ បានឱ្យដឹងថា​ ខេត្តកំពង់ចាម មានសាលាមត្តេយ្យសិក្សា ៤៦៦សាលា ក្នុងនោះ មត្តេយ្យសិក្សារដ្ឋ ២៨៩កន្លែង (មត្តេយ្យ សិក្សាដាច់ដោយឡែក ០៦កន្លែង) មត្តេយ្យសិក្សាឯកជន ១៥កន្លែង និងមត្តេយ្យសិក្សាសហគមន៍ ១៦២កន្លែង សាលាបឋមសិក្សា ៤០៧កន្លែង (សាលាបឋមសិក្សាឯកជន ០៧កន្លែង អនុវិទ្យាល័យ ៨១កន្លែង និងវិទ្យាល័យ ៤៣កន្លែង (វិទ្យាល័យធនធាន ០២កន្លែង វិទ្យាល័យអប់រំពិសេស ០១កន្លែង) អនុវិទ្យាល័យឯកជន ១កន្លែង និងវិទ្យាល័យឯកជន ៤កន្លែង។
ក្នុងនោះអគារសិក្សា ដែលជាអំណោយដ៏ថ្លៃថ្លារបស់ សម្ដេចតេជោ នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត មានចំនួន ៣៨៤ខ្នង ស្មើនឹង ២.៤៣១បន្ទប់ (អគារកម្ពស់៣ជាន់ មានចំនួន ១៦អគារ) រួមនឹងទីចាត់ការ ២៣ខ្នង អគារកាត់ដេរចំនួន ១២ខ្នង ក្នុង នោះស្រុកស្ទឹងត្រង់ មាន ៦៥ខ្នង ស្មើនឹង ៤៦០បន្ទប់។

ចំពោះវិស័យសុខាភិបាល នៅក្នុងខេត្ត កំពង់ចាម មានមន្ទីរពេទ្យបង្អែកចំនួន០៩កន្លែង មណ្ឌលសុខភាព ចំនួន ៩១កន្លែង ក្នុងនោះស្រុក ស្ទឹងត្រង់ មានមន្ទីរពេទ្យបង្អែកចំនួន ០១កន្លែង ទទួលបានចំណាត់ថ្នាក់ សំណុំ សកម្មភាពបង្គ្រប់ កម្រិត ១ (CPAI) ជាអង្គភាពផ្តល់សេវាសុខាភិបាលល្អលេខ៣ និងមណ្ឌលសុខភាពចំនួន ១២ កន្លែង មាននៅគ្រប់ឃុំ។ ក្នុងនោះមណ្ឌលសុខភាពដងក្តារ បាននឹងកំពុងបម្រើសេវា សុខាភិបាល ក្នុងការ ពិនិត្យ ព្យាបាលជំងឺជូន ប្រជាពលរដ្ឋ និងផ្តល់សេវាថែទាំសុខភាពជូន ប្រជាពលរដ្ឋ នៅក្នុងឃុំដងក្តារ ផងដែរ៕SRP

ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បានលើកឡើងថា«ដើម្បីមន្ទីរពេទ្យកុមារអង្គរ »។ ការលើកយ៉ាដូច្នេះក្នុងឱកាសលោក ដឹកនាំការរត់ម៉ារ៉ាតុន ឆ្នាំ ២០២៣ នៅក្នុងកម្មវិធី រត់ និងជិះកង់ (FAN RUN AND CYCLING) ដើម្បីអបអរសាទរព្រឹត្តិការណ៍អង្គរសង្ក្រាន្ត និងដើម្បីរកថវិកា ជួយឧបត្ថម្ភ ដល់មន្ទីរពទ្យកុមារអង្គរ ដោយមានអ្នក ចូលរួមច្រើនជាង ១៤០០នាក់ ប្រជាពលរដ្ឋខ្មែរក្មេងចាស់ប្រុសស្រី និងជនបរទេសផងដែរនៅព្រឹកមិញនេះ។

នៅក្នុងកម្មវិធីរត់មានរយៈចម្ងាយ ៣ គីឡូម៉ែត្រ, ១០ គីឡូម៉ែត្រ, និង២១គីឡូម៉ែត្រ ដែលអ្នករត់ទាំងអស់ចាប់ផ្ដើមចេញដំណើរពីមុខបរិវេណខាងមុខប្រាសាទ អង្គរវត្ត ឆ្ពោះតាមច្រកទន្លេអុំ បន្តរត់កាត់តាមប្រាសាទ បាយ័ន ឆ្ពោះទៅព្រលានជល់ដំរី និងបន្តទៅកាន់ក្លោងទ្វាជ័យ វង់ទៅតាមស្រះស្រង់ និងចុងបញ្ចប់ត្រឡប់មកកាន់កន្លែងដើមវិញ។

តាមការបញ្ជាក់ពីអ្នករៀបចំកម្មវិធី បានឱ្យដឹងថា ថវិកា ដែលប្រមូលបានតាមរយៈ ការរត់ម៉ារ៉ាតុនឆ្នាំនេះ នៅក្នុងកម្មវិធី រត់ និងជិះកង់ (FAN RUN AND CYCLING) ឆ្នាំនេះ និងត្រូវប្រគល់ជូនមន្ទីរពេទ្យកុមារអង្គរ ខេត្តសៀមរាប ដើម្បីជួយសង្គ្រោះកុមារកម្ពុជាជាច្រើននាក់ដែលកំពុងត្រូវការការព្យាបាល។

ការចូលរួមយ៉ាងច្រើនកុះករ នៅក្នុងកម្មវិធីរត់ម៉ារ៉ាតុននេះ មិនត្រឹមតែបង្ហាញឱ្យឃើញពីទឹកចិត្តស្រលាញ់វិស័យកីឡា ថែមទាំងបានបង្ហាញឱ្យឃើញពីកម្លាំងសាមគ្គីគ្នា ក្នុងមហាគ្រួសារខ្មែរ ដើម្បីអបអរ នូវព្រឹត្តិការណ៍ អង្គរសង្ក្រាន្ត ស្វាគមន៍ឆ្នាំថ្មី ក៏ដូចជាចូលរួមបំផុសនូវស្មារតីកីឡាមុននឹងព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេម ដែលកម្ពុជាធ្វើជាម្ចាស់ផ្ទះនាខែឧសភា ឆ្នាំ២០២៣ ខាងមុខនេះ៕SRP

ខេត្តសៀមរាប៖ជនសង្ស័យចំនួន២នាក់បន្ថែមទៀតពាក់ពន្ធ័នឹងករណីអំពើលួច(ឆក់កាបូប) ត្រូវបានឃាត់ខ្លួន។

ស្នងការរងទទួលផែនការងារនគរបាលព្រហ្មទណ្ឌ លោកឧត្តមសេនីយ៍ត្រី ភឹង ចិន្តារ៉េត បានប្រាប់ សៀមរាប ប៉ុស្ដិ៍ ថាការឃាត់ខ្លួន នៅសុក្រម្សិលមិញ ដោយកម្លាំងការិយាល័យនគរបាលព្រហម្មទណ្ឌកម្រិតស្រាលខេត្តសៀមរាប សហការជាមួយនគរបាលស្រុកសូទ្រនិគម ដោយមានការសម្របសម្រួលពី លោកមាស ចន្ទ័ពិសិដ្ឋ ព្រះរាជអាជ្ញាអមសាលាដំបូងខេត្តសៀមរាប។

លោកឧត្តមសេនីយ៍ត្រី ភឹង ចិន្តារ៉េត បនុ្តថា ករណីឆក់កាបូប​ បានកើតឡើងកាលពីថ្ងៃទី០៤ ខែមេសា ឆ្នាំ២០២៣ ត្រង់ចំណុចភូមិចុងកៅស៊ូ សង្កាត់ស្លក្រាម ក្រុងសៀមរាប។

ជនសង្ស័យ១.ឈ្មោះ ណីប ស៊ីណា ភេទប្រុស អាយុ១៥ឆ្នាំ រស់នៅភូមិព្រះត្រពាំង ឃុំដំដែក ស្រុកសូទ្រនិគម ខេត្តសៀមរាប។

២.ឈ្មោះ ភា  ស៊ីន ភេទប្រុស អាយុ ២៣ឆ្នាំ រស់នៅភូមិអង្គុញដូនហុង ឃុំដំដែក ស្រុកសូទ្រនិគម ខេត្តសៀមរាប៕SRP

ខេត្តសៀមរាប៖នៅទីបំផុតនគរបាលការិយាល័យព្រហ្មទណ្ឌកម្រិតធ្ងន់នៃស្នងការនគរបាលខេត្តសៀមរាប បានចាប់ខ្លួនជនដៃដល់ចំនួន២នាក់ពាក់ព័ន្ធករណីហិង្សារហូតជនរងគ្រោះស្លាប់។

លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនការងារនគរបាលព្រហ្មទណ្ឌ បានប្រាប់ សៀមរាប ប៉ុស្ដិ៍ ថាករណីហិង្សាមានស្ថានទម្ងន់ទោស បណ្តាលឲ្យមរណភាព បានកើតឡើងកាលរំលងអាធ្រាតឈានថ្ងៃទី០៤ ខែមីនា ឆ្នាំ២០២៣ នៅចំណុចរវង្វង់មូលព្រះរាជដំណាក់ ស្ថិតនៅភូមិមណ្ឌល២ សង្កាត់ស្វាយដង្គំ ក្រុងសៀមរាប។

លោកឧត្តមសេនីយ៍ត្រី ភឹង ចិន្តារ៉េត បន្តថាដោយមានការសម្របសម្រួលពីឯកឧត្តមមាស ចន្ទ័ពិសិដ្ឋ ព្រះរាជអាជ្ញាអមសាលាដំបូងខេត្តសៀមរាប​ តាមរយះលោកឧត្តមសេនីយ៍ស្នងការរង ទទួលដឹកនាំការិយាល័យនគរបាលព្រហ្មទណ្ឌកម្រិតធ្ងន់ ការិយាល័យនគរបាលព្រហ្មទណ្ឌកម្រិតធ្ងន់ ដឹកនាំដោយវរសេនីយ៍ឯក សុខ ម៉េងអ៊ាងបានស្រាវជ្រាវបង្ក្រាបនិងឃាត់ខ្លួនជនសង្ស័យចំនួន២នាក់៖

១-ឈ្មោះ ឆាយ សាន់ទិក ភេទប្រុស អាយុ ១៧ឆ្នាំ មុខរបរ (គ្មាន) កើតនៅភូមិអូរស្មាច់ ឃុំដើមជ្រៃ ស្រុកសំរោង ខេត្តឧត្តមានជ័យ ទីលំនៅបច្ចុប្បន្នស្នាក់នៅបន្ទប់ជួល ភូមិដកពោធិ៍ សង្កាត់ស្លក្រាម ក្រងសៀមរាប។

២-ឈ្មោះ សៅ ស៊ីវយុន ភេទប្រុស អាយុ ១៧ឆ្នាំ មុខរបរ បុគ្គលិកភោជនីយដ្ឋាន កើតនៅភូមិវាល ឃុំគោកចក ស្រុកសៀមរាង ខេត្តសៀមរាប ទីលំនៅបច្ចុប្បន្នភូមិវាល សង្កាត់គោកចក ក្រងសៀមរាប។

សូមរំលឹកថា- នៅវេលាម៉ោង ០១និង៤០នាទី រំលងអាធ្រាត ឈានថ្ងៃទី០៤ ខែមីនា ឆ្នាំ២០២៣ មានករណីក្មេងទំនើងមួយក្រុមប្រដាប់ដោយដាវ, កាំបិតភ្គាក់ និងដុមថ្ម បានបើកម៉ូតូប្រដេញក្នុងគោលបំណងកាប់ និងគប់ទៅលើជនរងគ្រោះ ឈ្មោះ តាន់ រាត្រី ហៅកិញ ភេទប្រុស អាយុ ១៩ឆ្នាំ និងឈ្មោះ សឿប សាន់ ភេទប្រុស  អាយុ ១៤ឆ្នាំ ចេញពីចំណុចមុខសណ្ឋាគារមហាសណ្ឋាគារអង្គរ (Grand Hotel) បត់ឡើងមកទិសខាងត្បូង ក្នុងល្បឿនលឿន ជិតដល់ចំណុចរង្វង់មូលព្រះរាជដំណាក់។  ម៉ូតូជនរងគ្រោះម៉ាកទ្រីមសង់ ពណ៌ក្រហម សេរីឆ្នាំ២០២១ (គ្មានស្លាកលេខ) បានបើកគេចទៅបុកនឹងឃឿនថ្នល់ ហើយរេទៅបុកបង្គោលដែកបណ្តាលឲ្យម៉ូតូបើងទៅលើឃឿនផ្លូវខាងត្បូងរង្វង់មូល ដោយជនរងគ្រោះឈ្មោះ តាន់ រាត្រី ហៅកិញ ជាអ្នកជិះក្រោយរងរបួសធ្ងន់ស្លាប់ភ្លាមៗ។ ចំណែកអ្នកបើកឌុបឈ្មោះ សឿប សាន់  មានពាក់មួកសុវត្តិភាពរងរបួសស្រាល។

បើតាម លោកឧត្តមសេនីយ៍ត្រី ភឹង ចិន្តារ៉េត បានបញ្ជាក់ថាជនសង្ស័យ ឈ្មោះ ឆាយ សាន់ទិក បានឆ្លើយសារភាពថា៖ រូបខ្លួននិងបក្ខពួកពិតជាបានធ្វើសកម្មភាពពិតប្រាកដមែន។  ដោយនៅយប់កើតហេតុឈ្មោះ អាដែន (មិនស្គាល់ត្រកូល) ភេទប្រុស អាយុ ១៧ឆ្នាំ បានបើកម៉ូតូម៉ាកទ្រីមសង សេរីឆ្នាំ២០១៨ ពណ៌ខ្មៅ កាំរាយឌុបរូបគេ ប្រដាប់ដោយដាវ ផ្លែកដង ដងដែករុំក្រណាត់ពណ៌លៀង ប្រវែងប្រហែល ១ម៉ែត្រ  ចំណែកឈ្មោះ អាចិន (មិនស្គាលត្រកូល) ភេទប្រុស អាយុ ១៩ឆ្នាំ បានបើកម៉ូតូម៉ាកទ្រីមសង សេរីឆ្នាំ២០១៨ ពណ៌ខ្មៅ កាំសន្ទះពណ៌ខ្មៅ ឌុបឈ្មោះ អាតុង (មិនស្គាលត្រកូល) ប្រដាប់ដោយកាំភ្គាក់ ផ្លៃដែក ដងឈើ មានប្រវែងប្រហែល ជាង ១ម៉ែត្រ។​ ចំណែកឈ្មោះ សៅ សៀវយុន និងបក្ខពួកផ្សេងទៀតប្រដាប់ដោយដុំថ្ម និងខ្សែក្រវ៉ាត់ បើកម៉ូតូប្រដេញជនរងគ្រោះបណ្តាលឲ្យដួលម៉ូតូស្លាប់និងរងរបួសពិតមែន។

២-ឈ្មោះ សៅ ស៊ីវយុន បានឆ្លើយសារភាពថា៖ នៅក្នុងសកម្មភាពល្មើសខាងលើ រូបគេបានបើម៉ូតូម៉ាក NextII ពណ៌ស សេរីឆ្នាំ២០១៩ ពាក់ស្លាកលេខ សៀមរាប 1AO: 5587 ឌុបឈ្មោះ គល់ ផានិត ហៅចែម ភេទប្រុស អាយុ ១៧ឆ្នាំ ប្រដេញជនរងគ្រោះពិតប្រាកដមែន លុះពេលជនរងគ្រោះបានដួលម៉ូតូ ពួកខ្លួននិងបក្ខពួកបាននាំគ្នាបើកម៉ូតូគេខ្លួនតែម្តង។

ជនសង្ស័យបញ្ជាក់បន្ថែមថា៖មូលហេតុដែលនាំឲ្យពួកគេដេញកាប់ទៅលើជនរងគ្រោះ គឺមកពីជនរងគ្រោះទាំង២នាក់ បើកម៉ូតូកាត់មុខពួកខ្លួនហើយរោទ៍សម្លេងខ្លាំងៗឌឺដងដាក់ពួកខ្លួន ទើបខ្លួនដេញកាប់តែម្តង៕SRP

ខេត្តសៀមរាប៖លោកហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកឡើងថា ការផ្តួចផ្តើម ឲ្យមានព្រឹត្តិការណ៍អង្គរសង្ក្រាន្ត គឺជាការគាស់រំលើងនូវប្រពៃណី វប្បធម៌ខ្មែរ ឲ្យរស់រវើកឡើងវិញ។

លោក ហ៊ុន ម៉ានី ថ្លែងប្រាប់អ្នកសារព័ត៌មាននៅក្នុងឱកាសចុះពិនិត្យវឌ្ឍនភាព ការសាងសង់សំណង់នាៗ សម្រាប់ព្រឹត្តិការណ៍អង្គរសង្ក្រាន្ត នៅថ្ងៃសៅរ៍ បានមានប្រសាសន៍ថា ចាប់តាំងពីមានការរៀបចំព្រឹត្តិការណ៍អង្គរសង្ក្រាន្ត កាលពីឆ្នាំ២០១៣ មក ក៏ដូចជាឆ្នាំ២០២៣នេះ ស្មារតីជារួមរបស់អង្គរសង្ក្រាន្ត គឺលើកស្ទួយប្រពៃណី វប្បធម៌ខ្មែរ ក្នុងនោះការសាងសង់សំណង់នាៗ ក៏ត្រូវគោរពតាមរចនាបទខ្មែរដែរ។

លោកម៉ានី បញ្ជាក់ថា “ព្រឹត្តិការណ៍អង្គរសង្ក្រាន្តពីឆ្នាំ២០១៣ ដល់ឆ្នាំ២០១៨ ហើយនឹងបច្ចុប្បន្ន២០២៣ ស្មារតីជារួម គឺការលើកស្ទួយ វប្បធម៌ប្រពៃណីខ្មែរ ហើយក្នុងនោះរចនាបទខ្មែរ ក៏ដូចគ្នាដែរ អីចឹងហើយនៅទិដ្ឋភាព នៅទីតាំងនីមួយៗយើងតែងតែធ្វើការ ជាមួយក្រសួងវប្បធម៌ និងវិចិត្រសិល្បៈ លោកគ្រូ អ្នកគ្រូ នៃសាលាវិចិត្រសិល្បៈដែលគ្រប់រចនាបទ របស់យើង ដូចជាទីតាំងដែលយើងកំពុងឈរនៅទីនេះ ភូមិខ្ញុំ ទីលានជល់ដំរី មុខប្រាសាទបាយ័ន គឺយើងគិតគូរថាសម័យកាលណា ហើយសម្លៀកបំពាក់ណា ដំបូលរបៀបម៉េច? ពេលខ្លះយើងមានសម័យកាល តែមួយឬលើសពីមួយទាំងអស់នេះយើងតែងតែ ឆ្លងសួរនាំ និងតែងមានការណែនាំពិគ្រោះយោបល់ ពីលោកគ្រូ អ្នកគ្រូ សាលាវិចិត្រសិល្បៈ មុនយើងសម្រេចការសាងសង់ជារចនាបទឲ្យស្របទៅនឹងដំណាក់កាល ហើយដោយសារជាព្រឹត្តិការមួយ ដែលលើកស្ទួយរបៀបរបបប្រពៃណីវប្បធម៌យើង អីចឹងរចនាបទទាំងអស់ ស្ទើរតែទាំងស្រុង ទៅក្នុងការយកគំរូតាមអ្វី ដែលជារចនាបទខ្មែរ។ ប៉ុន្តែកន្លែងខ្លះក៏មានច្នៃប្រឌិតដែរ ឧទាហរណ៍ដូចជានៅត្រពាំងសេស ដែលមានតំបន់តោះៗ លេងទឹកឬក៏អី ដែលវាជាកន្លែងកម្សាន្ត មិនអាចទាំងស្រុងដូចរចនាបទទេ“ ។

សូមបញ្ជាក់ថា សម្រាប់ព្រឹត្តិការណ៍អង្គរសង្ក្រាន្តឆ្នាំ២០២៣ ដែលខួបគម្រប់១០ឆ្នាំនៃព្រឹត្តិការណ៍នេះ ក្រុមការងារនៃស.ស.យ.ក. បានពង្រីកទីតាំងលេងកម្សាន្តដល់៦ទីតាំង និងមានល្បែងលេងកម្សាន្តដល់ទៅ៤៤ប្រភេទ សម្រាប់ទទួលអ្នកមកកម្សាន្ត។ ជាមួយនឹងការពង្រីកទំហំព្រឹត្តិការណ៍នេះ លោក ហ៊ុន ម៉ានី បានឲ្យដឹងថា ក៏មានយុវជនស្ម័គ្រចិត្តជាង៥០០០នាក់មកចូលរួមផងដែរ៕SRP

ខេត្តសៀមរាប៖ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប លោក ទៀ សីហា បានចាត់លោកស្រី ទាង អេង ទៀសីហា អនុប្រធានគណៈកម្មាធិការសាខា ចុះជួបសំណេះសំណាល សួរសុខទុក្ខ និងនាំយកអំណោយមនុស្សធម៌ ជូនប្រជាពលរដ្ឋ រងគ្រោះដោយខ្យល់កន្ត្រាក់ កាលពីព្រឹកថ្ងៃទី៧ ខែមេសា ឆ្នាំ២០២៣ ចំនួន២២គ្រួសារ (រលំ៦ខ្នង និងរបើកដំបូល១៦ខ្នង) ក្នុងនោះ៖
– ឃុំរុនតាឯក ចំនួន ១៩គ្រួសារ (រលំ៤ខ្នង របើកដំបូល១៥ខ្នង)
– ឃុំឃុនរាម ចំនួន ៣គ្រួសារ (រលំ២ខ្នង និងរបើកដំបូល១ខ្នង)។

ពិធីសំណេះសំណាល និងផ្ដល់អំណោយមនុស្សធម៌ នេះប្រារព្ធនៅភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី នៅថ្ងៃសៅរ៍នេះ។

លោកស្រី ទាង អេង ទៀសីហា អនុប្រធានគណៈកម្មាធិការសាខា បានពាំនាំនូវការផ្ដាំផ្ញើសួរសុខទុក្ខ ពី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជា លោក ទៀ សីហា ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរខ្ពស់មចំពោះសុខទុក្ខប្រជាពលរដ្ឋ គ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។

លោកស្រី ក៏បានសំដែងនូវការសោកស្ដាយជាពន់ពេកចំពោះការខូចខាត ផ្ទះសំបែង ទ្រព្យសម្បត្តិ ដែលនេះជាគ្រោះមហន្តរាយដោយធម្មជាតិ គ្មាននរណាម្នាក់ ចង់ជួបប្រទះឡើយ។

លោកស្រី បន្តថា ថ្វីត្បិតតែអំណោយមនុស្សធម៌ ដែលបាននាំយកមកចែកជូនបងប្អូន នាពេលនេះ មានចំនួនមិនសមល្មម នឹងការខាតបង់របស់បងប្អូន តែក៏អាចជួយសម្រាលទុក្ខលំបាក របស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋ គ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា”។

ឆ្លៀតក្នុងឱកាសនោះផងដែរ លោកស្រី ក៏បានអំពាវនាវ លោកតា លោកយាយ អ៊ំពូមីង និងបងប្អូនប្រជាពលរដ្ឋ ទាំងអស់ សូមមេត្តាអញ្ជើញទៅបោះឆ្នោតជ្រើស តាំងតំណាងរាស្ត្រ នីតិកាលទី៧ ឱ្យបានគ្រប់ៗគ្នា នៅថ្ងៃទី ២៣ ខែកក្កដា ឆ្នាំ២០២៣។

សូមបញ្ជាក់ថាអំណោយមនុស្សធម៌ដែលបានផ្ដល់ជូន១គ្រួសារទទួលបាន៖
– គ្រួសាររលំផ្ទះ៖ មុង១ ភួយ១ សារុង១ ក្រមា១ កន្ទេល១ អាវយឺត១ ស័ង្កសី ១៦សន្លឹក មី១កេស ទឹកត្រី១យួរ ត្រីខ១យួរ ស្កសរ១គីឡូក្រាម អំបិល១គីឡូក្រាម ប៊ីចេង១០កញ្ចប់តូច អង្ករ៣០គីឡូក្រាម និងថវិកា១សែន៥ម៉ឺនរៀល។
– គ្រួសាររបើកដំបូល៖ មុង១ ភួយ១ សារុង១ ក្រមា១ កន្ទេល១ អាវយឺត១ ស័ង្កសី ១០សន្លឹក មី១កេស ទឹកត្រី១យួរ ត្រីខ១យួរ ស្កសរ១គីឡូក្រាម អំបិល១គីឡូក្រាម ប៊ីចេង១០កញ្ចប់តូច អង្ករ៣០គីឡូក្រាម និងថវិកា១សែនរៀល។ លោកស្រី និងប្រតិភូអមដំណើរបានអញ្ជើញទស្សនកិច្ចក្នុងតំបន់អភិវឌ្ឍន៍ភូមិធម្មជាតិរុនតាឯកនេះផងដែរ៕SRP