ខេត្តសៀមរាប៖បុរសម្នាក់បើកម៉ូតូទៅបុកគោយន្តកន្ត្រៃពីក្រោយបណ្ដាលឲ្យស្លាប់នៅពេលបញ្ជូនដល់មន្ទីរពេទ្យ។

ហេតុការណ៍បានកើតឡើងនៅថ្ងៃទី១០ ខែមេសា ឆ្នាំ២០២៤ វេលាម៉ោង១៨និង១៥នាទី​ផ្លូវជាតិលេខ៦៨:ចន្លោះបង្គោលគីឡូម៉ែត្រលេខ( 27-28) ស្ថិតនៅភូមិខ្វែក ឃុំមោង ស្រុកស្រីស្នំ។

សមត្ថកិច្ចបានប្រាប់ថាករណីគ្រោះថ្នាក់ចរាចណ៍នេះរវាងម៉ូតូ និងគោយន្តកន្ត្រៃបើកបរស្របទិសគ្នាពីត្បូង ទៅជើង ដោយម៉ូតូ០១គ្រឿងម៉ាកHONDA DREAM ពណ៌ខ្មៅ ស៊េរី2005

ពាក់ផ្លាកលេខសៀមរាប1M-1091បើកបរដោយឈ្មោះ គង់ សាន ភេទប្រុស អាយុ៤៣ឆ្នាំ មុខរបរធ្វើសំណង់ ទីលំនៅនច្ចុប្បន្នភូមិច្រឹបចាស់ ឃុំជប់វ៉ារី ស្រុកព្រះនេត្រព្រះ ខេត្តបន្ទាយមានជ័យ​បានបុកគោយន្តកន្ត្រៃមួយគ្រឿងម៉ាកគូបូតា ស៊េរី… ពណ៌ក្រហម គ្មានផ្លាកលេខ បើកបរដោយឈ្មោះ ឈឹង ឈួយភេទប្រុស អាយុ៣៥ឆ្នាំ មុខរបរកសិករ ទីលំនៅបច្ចុប្បន្នភូមិខ្វែក ឃុំមោង ស្រុកស្រីស្នំ ខេត្តសៀមរាប។

សមត្ថកិច្ចបន្តថាហេតុការណ៍នេះបណ្ដាលឲ្យរបួសធ្ងន់អ្នកបើកបរម៉ូតូហើយត្រូវបានគេបញ្ជូនទៅព្យាបាលនៅមន្ទីពេទ្យបង្អែក ស្រុកក្រឡាញ់ ខេត្តសៀមរាប ហើយបានស្លាប់នៅវេលាម៉ោងប្រម៉ណ២១និង២៥នាទី។ ចំណែកម៉ូតូខូចខាតធ្ងន់និងគោយន្តកន្ត្រៃស្រាល។

បើតាមសមត្ថកិច្ចគ្រោះថ្នាក់នេះ ការសន្និដ្ឋានអាចមូលហេតុបណ្ដាលមកពីអ្នកបើកបរម៉ូតូ បើកបរក្នុងស្ថានភាពស្រវឹងបុកគោយន្តកន្ត្រៃពីក្រោយ។ ម៉ូតូនិងគោយន្ត ត្រូវបានសមត្ថកិច្ចនាំយកទៅរក្សាទុកអធិការដ្ឋាននគរបាលស្រុកស្រីស្នំ៕SRP

ខេត្តបាត់ដំបង៖លោកបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានថ្លែងលើកទឹកចិត្តប្រជាពលរដ្ឋ កុំឱ្យមានការព្រួយបារម្ភ ចំពោះការផ្ដល់សេវាពិនិត្យ និងព្យាបាល ពីព្រោះក្រុមគ្រូពេទ្យ ដែលអញ្ជើញមក សុទ្ធតែជាអ្នកមានចំណេះជំនាញ និងបទពិសោធច្បាស់លាស់។ ជាមួយគ្នានេះ លោកក៏បានទទូចទៅកាន់ប្រជាពលរដ្ឋ យកចិត្តទុកដាក់ប្រតិបត្តិតាមវេជ្ជបញ្ជារបស់គ្រូពេទ្យ និងត្រូវខិតខំថែរក្សាសុខភាពទាំងខ្លួនឯង និងកូនចៅ ដែលជាអនាគតនៃអ្នកបន្តវេនទាំងក្រុមគ្រួសារ និងសង្គមជាតិ។

លោកបណ្ឌិត ស សុខា ក៏បានអំពាវនាវដល់បងប្អូនប្រជាពលរដ្ឋ ដែលធ្វើដំណើរនាឱកាស បុណ្យចូលឆ្នាំថ្មីប្រពៃណីជាតិ សូមប្រកាន់ខ្ជាប់នូវការគោរពច្បាប់ចរាចរណ៍ និងសូមផ្ដល់ការដាស់តឿននេះ ទៅកាន់សមាជិកក្រុមគ្រួសាររៀងៗខ្លួន។

លោកបណ្ឌិត ក៏បានលើកទឹកចិត្ត ប្រជាពលរដ្ឋ ពិសេសយុវជន ចូលរួមកម្សាន្តសប្បាយ ក្នុងព្រឹត្តិការណ៍សង្ក្រាន្តខេត្តបាត់ដំបង ឱ្យបានច្រើនកុះករដែលព្រឹត្តិការណ៍នេះ ត្រៀមរៀបចំពិធីបើកនៅក្រុងបាត់ដំបង ក្រោមអធីបតីភាពសម្ដេចក្រឡាហោម ស ខេង នាថ្ងៃទី១២ ខែមេសា ឆ្នាំ២០២៤ ខាងមុខនេះ។

លោកបណ្ឌិត ស សុខា បានថ្លែងអំណរគុណក្រុមគ្រូពេទ្យស្ម័គ្រចិត្ត ស សុខា ដែលជានិច្ចជាកាលបានចុះធ្វើសកម្មភាពមនុស្សធម៌ ប្រកបដោយការទទួលខុសត្រូវជូនប្រជាពលរដ្ឋ និងបានចាត់ទុកបេសកកម្មនេះ ថាជាការរួមចំណែកជាមួយរាជរដ្ឋាភិបាលកម្ពុជា ក្រោមការដឹកនាំប្រកបដោយភាពឈ្លាសវៃរបស់ សម្ដេចមហាបវរធិបតី ហ៊ុន ម៉ាណែត ដើម្បីសម្រេចបានចក្ខុវិស័យ ប្រជាជន នៅក្នុងព្រះរាជាណាចក្រកម្ពុជា ត្រូវមានសុខភាព សុខុមាលភាពកាន់តែប្រសើរឡើងជាលំដាប់។

លោកបណ្ឌិត ស សុខា មានប្រសាសន៍យ៉ាងដូច្នេះ នៅថ្ងៃពុធនេះ ក្នុងឱកាសលោកបណ្ឌិត អញ្ជើញ ជាអធិបតី ព្យាបាលជំងឺដោយឥតគិថ្លៃ ជូនប្រជាពលរដ្ឋ ក្នុងស្រុកបាណន់ ខេត្តបាត់ដំបង ដោយ
គ្រូពេទ្យស្ម័គ្រចិត្ត ស សុខា ចំនួន១៥០នាក់។

យោងតាមរបាយការណ៍ លោកខៀវ ភារិទ្ធ អនុប្រធានអចិន្ត្រៃយ៍សមាគមក្រុមគ្រូពេទ្យស្ម័គ្រចិត្ត ស សុខា ក្រោមគំនិតផ្ដួចផ្ដើមដ៏ខ្ពង់ខ្ពស់របស់សម្ដេចក្រឡាហោម ស ខេង អតីតឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ចាប់ពីឆ្នាំ២០១៦ មក ក្រុមគ្រូពេទ្យស្ម័គ្រចិត្ត ស សុខា បានចុះពិនិត្យនិងព្យាបាលជំងឺជូនប្រជាពលរដ្ឋបាន ចំនួន ២២លើកហើយ ក្នុងនោះខេត្តព្រៃវែង មាន ១៩លើក និងខេត្តបន្ទាយមានជ័យ ចំនួន ៣លើក។ ដោយឡែកសម្រាប់ខេត្តបាត់ដំបង គឺជាលើកទី១ ដែលក្រុមគ្រូពេទ្យ បានចុះមកកាន់ស្រុកបាណន់។

លោក បានបន្ថែមទៀតថា បច្ចុប្បន្នក្រុមពេទ្យស្ម័គ្រចិត្ត ស សុខា មានជំនាញ៨ផ្នែក ទី១.ផ្នែកអេកូសាស្ត្រ ទី២.ផ្នែកវះកាត់តូច ទី៣.ផ្នែកជំងឺទូទៅ ទី៤.ផ្នែករោគស្ត្រី ទី៥.ផ្នែកកុមារ  ទី៦.ផ្នែកទន្តសាស្ត្រ ៧.ផ្នែកឱសថ ទី៨.ផ្នែកពិនិត្យ និងចុះឈ្មោះបឋមដែលផ្នែកនីមួយៗ និងថ្មីៗនេះក៏បានបន្ថែមផ្នែកជំងឺភ្នែកមួយទៀតផងដែរ ដោយផ្នែកនីមួយៗមានលោកគ្រូ អ្នកគ្រូពេទ្យ វេជ្ជបណ្ឌិត ទន្តបណ្ឌិត ជំនាញវិជ្ជាជីវៈច្បាស់លាស់ និងមានបទពិសោធព្យាបាលជាច្រើនឆ្នាំមកហើយ៕SRP

ខេត្តសៀមរាប៖លោកប្រាក់ សោភ័ណ អភិបាលខេត្តសៀមរាប នៅថ្ងៃថ្ងៃអង្គារ ម្សិលមិញ បានអនុញ្ញាតឱ្យលោក ហ៊ុយ គឹមហ៊ួរ ប្រធានសមាគមខ្មែរ-ចិនខេត្តសៀមរាប និងសហការី ចូលជួបសម្តែងការគួរសម និងជូនពរដល់ លោកអភិបាលខេត្ត និងមន្រ្តីរាជការរដ្ឋបាលខេត្តសៀមរាបទាំងអស់ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខ។

លោក ប្រធានសមាគមខ្មែរ-ចិនខេត្តសៀមរាប បានថ្លែងអំណរគុណយ៉ាងជ្រាលជ្រៅចំពោះ លោក ប្រាក់ សោភ័ណ អភិបាលខេត្ត ដែលចំណាយពេលដ៏មានតម្លៃ ដែលអនុញ្ញាតឱ្យប្រតិភូចូលរួមជួបសំណេះសំណាល និងសម្តែងការគួរសម នាពេលនេះ និងសូមជូនពរ លោក អភិបាលខេត្ត និងលោកជំទាវ ព្រមទាំងក្រុមគ្រួសារ និងមន្រ្តីរាជការរដ្ឋបាលខេត្ត ក្នុងឱកាសបុណ្យចូលឆ្នាំថ្មីប្រពៃណីខ្មែ ឆ្នាំរោង ឆស័ក ព.ស ២៥៦៧ ឈានចូល ព.ស២៥៦៨ សូមមានកម្លាំងមាំមួនផ្លូវកាយ ផ្លូវចិត្ត ប្រាជ្ញាស្មារតី និងបន្តសម្រេចបាននូវសមិទ្ធផលថ្មីៗថែមទៀតដើម្បីជាទីសង្ឃឹម និងជាជម្រកដ៏ត្រជាក់ត្រជុំសម្រាប់បងប្អូនអាជីវកករ កសិករ អ្នកវិនិយោគទុក ក៏ដូចជាពលរដ្ឋទូទៅក្នុងខេត្តទាំងមូល ដើម្បីឈានទៅរកភាពចម្រុងចម្រើន សេចក្តីសុខក្សេមក្សាន្ត ការអភិវឌ្ឍ និងវឌ្ឍនភាពសង្គមរបស់យើងប្រកបដោយកិត្តិយស សេចក្តីថ្លៃថ្នូរ និងឧត្តុង្គឧត្តម ក្រោមម្លប់នៃសុខសន្តិភាព។

លោកប្រាក់ សោភ័ណ បានថ្លែងអំណរគុណចំពោះ លោក ប្រធានសមាគមខ្មែរ-ចិនខេត្ត និងសហការី ដែលបានចំណាយពេលមកជូនពរដល់រូប លោក និងមន្រ្តីរាជការរដ្ឋបាលខេត្ត ក្នុងឳកាសបុណ្យចូលឆ្នាំថ្មីប្រពៃណីជាតិខ្មែរឆ្នាំរោង ឆស័ក ព.ស ២៥៦៧ ឈានចូល ព.ស២៥៦៨ ។ កាយវិការនេះ ជាការបញ្ជាក់ពី ទឹកចិត្តស្រឡាញ់ គាំទ្ររបស់បងប្អូនសមាជិកសមាជិកាសមាគមខ្មែរ-ចិនទាំងអស់ ចំពោះ លោក និងមន្រ្តីរាជការរដ្ឋបាលខេត្ត និងជាការលើកទឹកចិត្តបន្ថែមទៀតដើម្បីខិតខំបំពេញតួនាទី ក្នុងការបម្រើសេវាសាធារណៈ ឱ្យបានរិតតែល្អទ្វេឡើងថែមទៀត និងសូមរួមគ្នាអភិវឌ្ឍ សង្គមរបស់យើង ឱ្យបានរីកចម្រើនសម្រាប់ខ្លួនយើង និងកូនចៅរបស់យើងតជំនាន់៕SRP

ខេត្តសៀមរាប៖ លោកប្រាក់ សោភ័ណ អភិបាលខេត្ត នៅថ្ងៃអង្គារ ម្សិលមិញ បានអនុញ្ញាតឱ្យ លោកNguyen Thanh Van អគ្គកុងស៊ុលនៃស្ថានអគ្គកុងស៊ុលសាធារណរដ្ឋសង្គមនិយមវៀតណាមប្រចាំខេត្តបាត់ដំបង និងសហការី ចូលជួបសំណេះសំណាល និងសម្តែងការគួរសម ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ។

លោក Nguyen Thanh Van បានថ្លែងអំណរគុណយ៉ាងជ្រាលជ្រៅចំពោះលោក ប្រាក់ សោភ័ណ អភិបាលខេត្ត ដែលចំណាយពេលដ៏មានតម្លៃ ដែលអនុញ្ញាតឱ្យប្រតិភូចូលរួមជួបសំណេះសំណាល និងសម្តែងការគួរសមនាពេលនេះ។ ឆ្លៀតក្នុងឱកាសនេះ លោក ក៏បានជូនពរដល់ អភិបាលខេត្ត និងលោកជំទាវ ព្រមទាំងក្រុមគ្រួសារមានសិរីសួស្តី ជ័យមង្គល វិបុលសុខ បវរមហាប្រសើរ និងម្លាំងពលំ ដេីម្បីបន្តដឹកនាំអភិវឌ្ឍន៍ខេត្តសៀមរាបឱ្យកាន់តែប្រសេីរឡេីងថែមទៀត។

លោកប្រាក់ សោភ័ណ អភិបាលខេត្តបានស្វាគមន៍យ៉ាងកក់ក្តៅ ចំពោះវត្តមាន លោកអគ្គកុងស៊ុល ដែលបានអញ្ជើញមកបំពេញបេសកកម្ម ក្នុងខេត្តសៀមរាប និងសូមថ្លែងអំណរគុណ ចំពោះរដ្ឋាភិបាលវៀត ណាម ដែលជានិច្ចកាលតែងតែរក្សា នូវទំនាក់ទំនងជាមិត្តល្អជាមួយប្រទេសកម្ពុជា។

លោកអភិបាលខេត្តក៏បានជូនពរដល់ លោក ប្រធានប្រតិភូ និងសហការីក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឆ្នាំរោង ឆស័ក ព.ស ២៥៦៧ ឈានចូល ព.ស.២៥៦៨ សូមមានសុខភាពល្អបរិបូរណ៍ កម្លាំងពលំមាំមួន និងសូមជួបប្រទះតែពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កុំបីឃ្លាងឃ្លាតឡេីយ៕SRP

ខេត្តសៀមរាប៖ស្ត្រីម្នាក់ត្រូវបាននៅផ្ទះបាញ់សម្លាប់ នៅចណុចជប់ម្លូរ ស្ថិតនៅភូមិគោកភ្នំ ឃុំវ៉ារិនស្រុកវ៉ារិន នាថ្ងៃ 9 ខែមេសា ឆ្នាំ២០២៤នេះ។

ជនរងគ្រោះមាន ឈ្មោះអឿត សម្បត្តិ ភេទស្រីអាយុ៤៣ឆ្នាំ មានទីលំនៅនៅភូមិអានូក ឃុំចារឈូកស្រុកអង្គរជុំ ខេត្តសៀមរាប

សមត្ថកិច្ចបានប្រាប់ថា ករណីនេះ មូលហេតុ មេឃរកភ្លៀង ជនរងគ្រោះ ចេញទៅគ្របដំឡូងដែលហាលទុកខ្លាចត្រូវភ្លៀងសើមខូច គាត់ត្រូវរន្ទះបាញ់សម្លាប់តែម្ដង។ បច្ចុប្បន្នជនរងគ្រោះត្រូវបានប្រគល់សពជូនគ្រួសារធ្វើបុណ្យតាមប្រពៃណី៕SRP

ភ្នំពេញ៖សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជានៅថ្ងៃទី៨ ខែមេសា ឆ្នាំ២០២៤ បានអនុញ្ញាតឱ្យលោក Jonathan K.S. Choi ប្រធានក្រុមហ៊ុន Sunwah Group ចូលជួបសម្តែងការគួរសម និងពិភាក្សាការងារ។

ក្នុងឱកាសនៃជំនួប លោកប្រធានក្រុមហ៊ុន បានថ្លែងអំណរគុណយ៉ាងជ្រាលជ្រៅចំពោះ សម្តេចធិបតី ដែលបានចំណាយពេលដ៏មមាញឹកអនុញ្ញាតឱ្យរូបលោក និងគណៈប្រតិភូ ចូលជួបសម្ដែងការគួរសម និងពិភាក្សាការងារ។ លោកប្រធានក្រុមហ៊ុន បានគោរពជម្រាបជូនសម្តេចធិបតី អំពីដំណើរការវិនិយោគរបស់ក្រុមហ៊ុន Sunwah Group ក្នុងព្រះរាជាណាចក្រកម្ពុជាចាប់តាំងពីឆ្នាំ១៩៩៤ ជាពិសេសការបង្កើតរោងចក្រកែច្នៃគ្រឿងសមុទ្រ ដើម្បីនាំចេញទៅទីផ្សារបរទេស។ បន្ថែមលើនេះ លោកប្រធានក្រុមហ៊ុន ក៏បានគោរពជម្រាបជូនសម្តេចធិបតីថា ក្នុងដំណើរទស្សនកិច្ចរបស់រូបលោក និងសហការីនាឱកាសនេះ មានតំណាងក្រុមហ៊ុនវិនិយោគប្រមាណជាង៧០ក្រុមហ៊ុន ដែលមានអាជីវកម្មក្នុងវិស័យជាច្រើនដូចជា៖ បច្ចេកវិទ្យាហិរញ្ញវត្ថុ ឌីជីថល អចលនទ្រព្យ ថាមពល និងទេសចរណ៍ ជាដើម។ ជាងនេះទៅទៀត លោកប្រធានក្រុមហ៊ុន ក៏បានបង្ហាញបំណងក្នុងការវិនិយោគបន្ថែមទៀតលើវិស័យមួយចំនួន រួមមាន៖ (១) វិនិយោគអភិវឌ្ឍន៍តំបន់សេដ្ឋកិច្ចពិសេសបៃតង (Green SEZ) (២) វិនិយោគលើការកសាងអគារពាណិជ្ជកម្ម និងលំនៅឋានខុនដូ (៣) វិនិយោគលើវិស័យទេសចរណ៍ (៤) វិនិយោគលើការដំឡើងស្ថានីយសាកថាមពលយានយន្តអគ្គិសនី (EV Charging Station) និង (៥) វិនិយោគលើការកសាងស្ថានីយបណ្តាញទូរគមនាគមន៍ 5G។

ជាការឆ្លើយតប សម្តេចធិបតី បានស្វាគមន៍ប្រកបដោយក្តីរីករាយ ដែលបានជួបពិភាក្សាការងារជាមួយលោកប្រធានក្រុមហ៊ុន និងសហការី ព្រមទាំងបានអរគុណចំពោះចំណាប់អារម្មណ៍ និង ការវិនិយោគរបស់ក្រុមហ៊ុន និងសម្តែងនូវក្តីសោមនស្សចំពោះផែនការវិនិយោគបន្ថែមរបស់ក្រុមហ៊ុននៅក្នុងព្រះរាជាណាចក្រកម្ពុជា។

ពាក់ព័ន្ធនឹងការបង្ហាញបំណងវិនិយោគលើវិស័យមួយចំនួន ដែលក្រុមហ៊ុនបានរៀបរាប់ខាងលើ សម្តេចធិបតី បានគូសបញ្ជាក់ថា រាជរដ្ឋាភិបាល នីតិកាលទី៧ នៃរដ្ឋសភា ក៏ដូចជានីតិកាលមុនៗដែរ គឺបន្តចក្ខុវិស័យច្បាស់លាស់ក្នុងការជំរុញកំណើនសេដ្ឋកិច្ច ដើម្បីលើកកម្ពស់នូវជីវភាពរស់នៅរបស់ប្រជាពលរដ្ឋកម្ពុជា ហើយតាមរយៈការប្តេជ្ញាចិត្តនេះ សេដ្ឋកិច្ចកម្ពុជាមានការរីកចម្រើន និងរក្សាបាននូភាពធន់ ហើយសម្រេចបានកំណើនសេដ្ឋកិច្ចក្នុងអត្រា ៥,៦% នៅឆ្នាំ ២០២៣ និងត្រូវបានព្យាករណ៍ថានឹងកើនឡើង ក្នុងអត្រា ៦,៦% នៅឆ្នាំ២០២៤។ ទន្ទឹមនោះ ដើម្បីធានាបាននូវបរិយាកាសនៃការប្រកួតប្រជែង និងការធ្វើធុរកិច្ច រាជរដ្ឋាភិបាលកម្ពុជាបានបន្តយកចិត្តទុកដាក់លើការធានានូវសុខសន្តិភាព ស្ថិរភាពនយោបាយ និងសណ្តាប់ធ្នាប់សង្គម ដើម្បីផ្តល់ជំនឿទុកចិត្តដល់វិនិយោគិនផងដែរ។ ជាមួយគ្នានេះ រាជរដ្ឋាភិបាល ក៏បានខិតខំជំរុញកសាងហេដ្ឋារចនាសម្ព័ន្ធតភ្ជាប់ ដូចជាផ្លូវលឿន និងកំពង់ផែទឹកជ្រៅ និងបានដាក់ចេញនូវគំនិតផ្តួចផ្តើមថ្មីៗជាច្រើនទៀត ដើម្បីគាំទ្រដល់ការវិនិយោគនៅកម្ពុជា ដូចជាគំរូថ្មីនៃតំបន់សេដ្ឋកិច្ចពិសេស តាមប្រភេទឧស្សាហកម្ម និងតម្រូវការរបស់ប្រទេសនីមួយៗ និងយុទ្ធសាស្រ្តប្រទេសបូក ( Plus-One Strategy)។

ពាក់ព័ន្ធនឹងគម្រោងវិនិយោគអភិវឌ្ឍតំបន់សេដ្ឋកិច្ចពិសេសបៃតង និងគម្រោងវិនិយោគលើយានយន្តអគ្គិសនី EV, សម្តេចធិបតី បានណែនាំឱ្យក្រុមហ៊ុនពិភាក្សាបន្ថែមជាមួយក្រសួង-ស្ថាប័នពាក់ព័ន្ធ ដូចជាក្រុមប្រឹក្សាអភិវឌ្ឍន៍កម្ពុជា CDC ក្រសួងសាធារណការ និងដឹកជញ្ជូន និងក្រសួងរ៉ែ និងថាមពល ជាដើម។ សម្តេចធិបតី ក៏បានបញ្ជាក់ថា រាជរដ្ឋាភិបាលកម្ពុជាបានយកចិត្តទុកដាក់ក្នុងការប្រើប្រាស់ថាមពលស្អាត ដោយនាពេលបច្ចុប្បន្ននេះ កម្ពុជាកំពុងប្រើប្រាស់ថាមពលស្អាត ប្រមាណជាង ៦០% និងបានកំពុងបន្តជំរុញការប្រើប្រាស់ថាមពលស្អាតនេះ ឱ្យឈានទៅដល់៧០% ត្រឹមឆ្នាំ២០៣០។ ពាក់ព័ន្ធនឹងវិស័យទេសចរណ៍ សម្តេចធិបតី បានគូសបញ្ជាក់ថា រាជរដ្ឋាភិបាលបានយកចិត្តទុកដាក់ និងផ្តល់អាទិភាពក្នុងការជំរុញវិស័យទេសចរណ៍ តាមរយៈការដាក់ចេញនូវគោលនយោបាយគាំទ្រវិស័យទេសចរណ៍ និងការពង្រីកជើងហោះហើរត្រង់ ពីបណ្តាប្រទេសនានាក្នុងតំបន់ និងពិភពលោកដោយបានបង្កើតក្រុមប្រឹក្សាភិបាលសិក្សាទីផ្សារនិងផ្សព្វផ្សាយទេសចរណ៍កម្ពុជា ដើម្បីផ្តល់សេវាកម្មទេសចរណ៍ឱ្យកាន់តែមានប្រសិទ្ធភាពបន្ថែមទៀត។ ដោយឡែក ចំពោះចំណាប់អារម្មណ៍លើការកសាងស្ថានីយបណ្តាញទូរគមនាគមន៍ 5G, សម្តេចធិបតី បានលើកទឹកចិត្តឱ្យក្រុមហ៊ុនពិភាក្សាជាមួយក្រសួងប្រៃសណីយ៍ និងទូរគមនាគមន៍បន្ថែមទៀត៕SRP

ខេត្តព្រៃវែង៖លោកបណ្ឌិត ស សុខា សមាជិកគណៈអចិន្ត្រៃយ៍គណបក្សប្រជាជនកម្ពុជា និងជាអនុប្រធានទី១ ក្រុមការងារគណបក្សប្រជាជនកម្ពុជា ចុះមូលដ្ឋានខេត្តព្រៃវែង បានជំរុញនិងលើកទឹកឱ្យយុវជន បន្តការខិតខំរៀនសូត្រ ទាំងពីសាលារៀន សហគមន៍ សង្គមជាតិ និងពីបរិបទអន្តរជាតិ ដោយត្រូវចាប់យកជំនាញច្បាស់លាស់ យ៉ាងហោចណាស់មួយ ហើយត្រូវតែអភិវឌ្ឍន៍ជំនាញនោះដោយភ្ជាប់នឹងសង្គមឌីជីថល។

លោកបណ្ឌិត ស សុខា បានថ្លែងបែបនេះក្នុងឱកាសអញ្ជើញជាអធិបតីក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារបន្តឆ្នាំ២០២៤ របស់ក្រុមការងារយុវជនគណបក្សប្រជាជនកម្ពុជា ខេត្តព្រៃវែង នៅមន្ទីរគណបក្សខេត្ត នៅថ្ងៃ ថ្ងៃអាទិត្យម្សិលមិញ។

ថ្លែងក្នុងឱកាសនោះដែរ លោកបណ្ឌិត ស សុខា បានគូសបញ្ជាក់ថា ការសិក្សារៀនសូត្រ មិនមែនត្រឹមតែជាការខិតខំជាប្រចាំ និងគ្មានទីបញ្ចប់ប៉ុណ្ណោះទេ ប៉ុន្តែត្រូវតែមានគោលបំណងជាក់លាក់ ដើម្បីសម្រួចលើជំនាញដ៏ច្បាស់លាស់ក្នុងជីវិត ពីព្រោះទីផ្សារការងារបច្ចុប្បនិងទៅអនាគតនិយាយជារួម និងដោយឡែក តម្រូវការធនធានមនុស្សនៅតាមក្រសួងស្ថាប័នរដ្ឋ សុទ្ធតែបានផ្ដល់តម្លៃខ្ពស់ដល់អ្នកដែលមានជំនាញច្បាស់លាស់ ប្រកបដោយគុណវឌ្ឍិ សីលធម៌ និងគុណធម៌ ដើម្បីធានាគុណភាព និងប្រសិទ្ធភាពនៃការបំពេញតួនានិងភារកិច្ច។

ក្នុងន័យនេះ និងក៏ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយចក្ខុវិស័យដ៏ជឿនលឿន របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក៏ដូចជាឆ្លើយតបនិន្នាការសកល លោកបណ្ឌិត ស សុខា បានផ្ដល់អនុសាសន៍ លើកទឹកចិត្តឱ្យក្រុមការងារយុវជន គណបក្សប្រជាជនកម្ពុជា ខេត្តព្រៃវែង និងយុវជនខ្មែរទូទាំងប្រទេស កុំរំលងឱ្យសោះការភ្ជាប់ជំនាញរបស់ខ្លួនទៅនឹងប្រព័ន្ធឌីជីថល ទាំងការអភិវឌ្ឍសមត្ថភាព និងការធ្វើទំនាក់ទំនង។

យ៉ាងណាក៏ដោយលោកបណ្ឌិត ស សុខា បានរម្លឹកបន្ថែមថា ក្នុងនាមជាអ្នកបន្តវេននៃគ្រួសារ និងសង្គមជាតិ យុវជនត្រូវតែប្រកាន់ឱ្យជាប់នូវស្មារតី បន្តវេនដើម្បីការពារជាតិ ការពារទឹកដី ជំរុញការអភិវឌ្ឍ កសាងប្រទេសជាតិ ការពារឯករាជ្យ និងអធិបតេយ្យជាតិឱ្យឋិតថេរគង់វង្ស ពោលគឺទោះជាបំពេញការងារអ្វី ឬមានមុខរបរអ្វី និងរស់នៅទីណាក៏ដោយ ម្នាក់ៗត្រូវតែបំពាក់ឱ្យខ្លួននូវឧត្តមគតិស្នេហាជាតិ និងប្រជាជន ហើយលើកកម្ពស់ជាប្រចាំនូវឧត្តមគតិដ៏បរិសុទ្ធនេះ៕SRP

ខេត្តសៀមរាប៖យ៉ាងហោចណាស់មនុស្សម្នាក់បានស្លាប់និងម្នាក់ទៀតបានរករបួសក្នុងហេតុការណ៍គ្រោះថ្នាក់ចរាចរណ៍។

ហេតុការណ៍បានកើតឡើង នៅថ្ងៃសៅរ៍ទី០៦ ខែមេសា ឆ្នាំ២០២៤ នេះ នៅវេលាម៉ោង ១១និង៤០ នាទី ត្រង់ចំណុចទឹករុន ស្ថិតនៅភូមិតាពេញ ឃុំខ្នងភ្នំ ស្រុកស្វាយលើ ខេត្តសៀមរាប នៅលើផ្លូវបេតុងពីឃុំខ្នងភ្នំទៅ ឃុំស្វាយលើ ដោយ បង្កឡើងដោយខ្លួនឯង។

ករណី គ្រោះថ្នាក់ចរាចរណ៍ នេះ ម៉ូតូមួយគ្រឿងម៉ាក ហុងដាឌ្រីម សេរីឆ្នាំ២០១៥ ពណ៌ខ្មៅ ផ្លាកលេខ សៀមរាប 1T-8014 បើកបរដោយឈ្មោះ អុល សុធី ភេទប្រុស អាយុ១៧ ឆ្នាំ រស់នៅភូមិកំពីងរាជ ឃុំលាងដៃ ស្រុកអង្គរធំ ខេត្តសៀមរាប បើកបរមានទិសលិចទៅកើត បានបើកធ្លាក់ផ្លូវហើយចូលទៅក្នុងស្នាមផ្លោះ។(មិនមានពាក់មួកសុវត្ថិភាព)។ អ្នករួមដំណើរ ១នាក់: ឈ្មោះ សៀម ហ៊ុន ភេទប្រុស អាយុ ១៦ឆ្នាំ រស់នៅភូមិដូនឪ ឃុំលាងដៃ ស្រុកអង្គរធំ ខេត្តសៀមរាប ។(មិនមានពាក់មួកសុវត្ថិភាព)។

ករណីនេះបណ្ដាលឱ្យ ៖ ស្លាប់នៅនឹងកន្លែងកើតហេតុ ០១នាក់ឈ្មោះ អុល សុធី និងរងរបួសធ្ងន់ ០១នាក់ឈ្មោះ សៀម ហ៊ុន និងខូចខាត ម៉ូតូ០១គ្រឿងធ្ងន់។

មូលហេតុនៃគ្រោះថ្នាក់ចរាចរណ៍ បណ្តាលមកពី អ្នកបើកបរម៉ូតូបើកបរក្នុងល្បឿនលឿន និងផ្លូវមានភាពចុះចំណោតខ្លាំង។
កម្លាំងជំនាញនិងកម្លាំងប៉ុស្តិ៍បានចុះទៅដល់កន្លែងកើតហេតុបានវាស់វែង ប្រមូលវត្ថុតាង និងបញ្ជូនអ្នករបួសទៅមន្ទីពេទ្យ។ នឹងប្រគល់សាកសពអោយគ្រួសារសពដើម្បីយកទៅធ្វើបុណ្យសពតាមប្រពៃណី។

ចំណែកវត្ថុតាងម៉ូតូ១គ្រឿងបានយកមករក្សាទុកនៅអធិការដ្ឋាននគរបាលស្រុកស្វាយលើ រងចាំដោះស្រាយតាមនីតិវិធីច្បាប់៕SRP

ខេត្តសៀមរាប៖លោកគុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា និងលោកជំទាវ ប៉ាន់ ត្រាប្រណី នៅថ្ងៃទី៦ ខែមេសា ឆ្នាំ២០២៤ បានដឹកនាំប្រតិភូអគ្គនាយកដ្ឋានគយនិងរដ្ឋាករកម្ពុជា (អគរ) ចុះសួរសុខទុក្ខ និងនាំយកអំណោយរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និង លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ទៅចែកជូនដល់កងទ័ពជួរមុខ នៅទីបញ្ជាការកងពលធំអន្តរាគមន៍លេខ២ ស្ថិតនៅក្នុងភូមិរហាល ឃុំត្បែង ស្រុកបន្ទាយស្រី ខេត្តសៀមរាប។

ថ្លែងក្នុងមតិស្វាគមន៍ លោកឧត្តមសេនីយ៍ឯក កែវ ធី មេបញ្ជាការរងកងទ័ពជើងគោក និងជាមេបញ្ជាការកងពលធំអន្តរាគមន៍លេខ២ បានលើកឡើងថា កងពលធំអន្តរាគមន៍លេខ២ បានអនុវត្តយ៉ាងម៉ឺងម៉ាត់បទបញ្ជាដ៏ខ្ពង់ខ្ពស់ របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងការកសាងពង្រឹងប្រៀបការពារជាតិ និងខឿនការពារជាតិរបស់ប្រជាជន ការពារ រឹងមាំអធិបតេយ្យ បូរណភាពទឹកដីនៃមាតុភូមិ និងលើកកម្ពស់ស្មារតីទទួលខុសត្រូវ ក្នុងកិច្ចសហប្រតិបត្តិការជាមួយប្រទេសជិតខាង រក្សាប្រក្រតីភាព កសាងព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ។

លោកឧត្តមសេនីយ៍ឯក បានថ្លែង អំណរគុណដល់ អគរ និងប្រមុខរាជរដ្ឋាភិបាល ចំពោះការគិតគូរ យកចិត្តទុកដាក់ជួយទំនុកបម្រុង ឧបត្ថម្ភគាំទ្រគ្រប់សកម្មភាពការងាររបស់កងពលធំអន្តរាគមន៍លេខ២ ក្នុងបុព្វហេតុខាងលើ ក៍ដូចជាការគាំទ្រដល់សកម្មភាពកសាង និងពង្រឹងអង្គភាពលើគ្រប់វិស័យ ជាពិសេសថ្លែងអំណរដល់ការចុះសួរសុខទុក្ខដោយផ្ទាល់នាឱកាសដែលបុណ្យចូលឆ្នាំថ្មីប្រពៃណីជាតិខ្មែរជិតចូលមកដល់ ដើម្បីរឹតចំណងមេត្រីភាពរវាងអង្គភាពទាំងពីរកាន់តែជិតស្និទ្ធបន្ថែមទៀត។

លោកគុណ ញឹម បានមានប្រសាសន៍ថា ស្របតាមអនុសាសន៍ដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន អគរ និង កងពលធំអន្តរាគមន៍លេខ២ ក្នុងខេត្តសៀមរាប បានចងសម្ព័ន្ធមេត្រីជាមួយគ្នា តាំងពីឆ្នាំ២០០៥ មក ដែលគិតមកដល់ពេលនេះមានរយៈពេលជិត ២០ឆ្នាំហើយ។ តាមរយៈចំណងសម្ព័ន្ធមេត្រីភាពនេះ អគរ តែងតែបានចងភ្ជាប់មនោសញ្ចេតនាឧបត្ថម្ភគាំទ្រ និងចុះជួបសាកសួរសុខទុក្ខ កងពលធំអន្តរាគមន៍លេខ២ ជាប្រចាំ និងបាននាំយកនូវអំណោយជាគ្រឿងឧបភោគបរិភោគ និងសម្ភារប្រើប្រាស់ ព្រមទាំងថវិកាឧបត្ថម្ភដល់ការអភិវឌ្ឍ ហេដ្ឋារចនាសម្ព័ន្ធ និងមធ្យោបាយការងារជូនដល់បញ្ជាការដ្ឋាន ក៏ដូចជាថវិកាជូនចំពោះកងកម្លាំងប្រដាប់អាវុធ និងក្រុមគ្រួសារ ដើម្បីចូលរួមចែករំលែក គាំទ្រ ផ្សារភ្ជាប់ជាមួយអង្គភាពជួរមុខ និងសម្រាលការលំបាកក្នុងជីវភាពរស់នៅបានមួយកម្រិត។

ចាប់តាំងពីឆ្នាំ២០០៥ មក អគរ បានចូលរួមឧបត្ថម្ភដល់ការកសាងសមិទ្ធផល និងហេដ្ឋារចនាសម្ព័ន្ធរបស់ទីបញ្ជាការកងពលធំអន្តរាគមន៍លេខ២ ជាបន្តបន្ទាប់ដែលសមិទ្ធផលចម្បងៗ រួមមាន ការកសាងអគាររដ្ឋបាល ១ខ្នង, អគារបណ្ណាល័យ ១ខ្នង, ផ្លូវបេតុងចូលបញ្ជាការដ្ឋាន, បង្គោលអង់តែនវិទ្យុទាក់ទង និងវិទ្យុទាក់ទងមួយចំនួន, រោងរថយន្តដឹកជញ្ជូន, សួនច្បារក្នុងទីបញ្ជាការដ្ឋាន ព្រមទាំងការចូលរួមសាងសង់អគារ និងឧបត្ថម្ភសម្ភារប្រើប្រាស់ដទៃទៀត។

អំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ដើម្បីប្រគល់ជូនដល់កងពលធំអន្តរាគមន៍លេខ២ រួមមាន៖ ម៉ាស៊ីនបូមទឹក ៤គ្រឿង, អង្ករ ១៦តោន, មីកញ្ចប់ ៤០កេសធំ, ត្រីខ ៤០កេសធំ, ស្ករស ១តោន, ទឹកស៊ីអ៊ីវ ១០០យួរ, ទឹកសុទ្ធ ៥០០កេស, ទឹកក្រូច ៥០០កេស, ស្រាបៀរ ៥០០កេស, ថវិកាជូនដល់បញ្ជាការដ្ឋានចំនួន ២០,០០០,០០០ រៀល, ថវិកាសម្រាប់សាងសង់អគារសាលប្រជុំវរសេនាតូចកាំភ្លើងធំ ចំនួន ២០,០០០ ដុល្លារ-អាម៉េរិក និងថវិកាជូនដល់នាយទាហាន, នាយទាហានរង និងពលទាហាន ៣០,០០០ រៀល ក្នុងម្នាក់។ សរុបជាថវិកាមានចំនួន ៣៨,៩៧២ ដុល្លារអាម៉េរិក និង ៧៦,៥៨០,០០០ រៀល៕SRP

ភ្នំពេញ៖លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា និងឯកឧត្តម ឃួង ស្រេង អភិបាលរាជធានីភ្នំពេញ និងជា ប្រធានក្រុមប្រឹក្សាមូលនិធិត្រីចក្រយានកម្ពុជា នៅថ្ងៃសៅរ៍នេះ បានអញ្ជើញសួរសុខទុក្ខ និងជូនអំណោយជាគ្រឿងឧបភោគបរិភោគនិងថវិកា ដល់សមាជិកមូលនិធិត្រីចក្រយានកម្ពុជាចំនួន ២៩៦ នាក់ នៅបរិវេណសាលារាជធានីភ្នំពេញ។

មានប្រសាសន៍នៅក្នុងឱកាសនោះ ជំទាវបណ្ឌិត ពេជ ចន្ទមុន្នី ហ៊ុនម៉ាណែត បានលើកទ្បើងថា ការរៀបចំកម្មវិធីសប្បុរសធម៌នេះ គឺដើម្បីចែករំលែកសេចក្តីស្រលាញ់របស់ថ្នាក់ដឹកនាំ សមាជិក សមាជិកា នៃសមាគមកាយឫទ្ធិនារីកម្ពុជា ដល់សមាជិកមូលនិធិត្រីចក្រយានកម្ពុជា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលនឹងខិតដល់នាពេលឆាប់ៗខាងមុខនេះ និងជាការចូលរួមលើកកម្ពស់សកម្មភាពសប្បុរសធម៌នៅក្នុងសង្គមកម្ពុជា ផងដែរ។

សូមបញ្ជាក់ថា មូលនិធិត្រីចក្រយានកម្ពុជា ត្រូវបានបង្កើតឡើងនាថ្ងៃទី១៨ ខែមករា ឆ្នាំ២០១៨ ជាគំនិតផ្តួចផ្តើមដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា សំដៅអភិរក្សត្រីចក្រយាន(ស៊ីក្លូ) ដែលមានដើមកំណើតតាំងពីឆ្នាំ ១៩៣៦ មកម្លេះ។ សមាជិកមូលនិធិត្រីចក្រយានកម្ពុជាទាំង ២៩៦ នាក់នេះ ទទួលបានប្រាក់ខែជាទៀងទាត់ ដោយក្នុងមួយខែពួកគាត់អាចបើកបានចំនួន ៣ដង ដើម្បីជួយសម្រួលការលំបាកក្នុងជីវភាពរស់នៅប្រចាំថ្ងៃ។ ការបង្កើតមូលនិធិនេះ គឺជាផ្នែកមួយដ៏សំខាន់ នៃការចូលរួមអនុវត្តប្រព័ន្ធគាំពារសង្គម តាមរយៈការជួយសម្រាលទុក្ខលំបាក និងរួមចំណែកគិតគូរអំពីសុខភាព និងជីវភាពរបស់ប្រជាពលរដ្ឋ ដែលជាអ្នកប្រកបរបរធាក់ស៊ីក្លូ ឱ្យទទួលបានសេវាសង្គមកិច្ច សុខាភិបាល និងការរស់នៅប្រកបដោយភាពថ្លៃថ្នូរ ជាពិសេសរួមគ្នាអភិរក្ស និងអភិវឌ្ឍមុខរបរធាក់ស៊ីក្លូ ស្របតាមគោលនយោបាយ កាត់បន្ថយភាពក្រីក្ររបស់រាជរដ្ឋាភិបាលកម្ពុជា ៕SRP

ខេត្តព្រះវិហារ៖ក្រុមមន្ត្រីថ្នាក់ក្រោម បានសម្រេចដាក់ពាក្យបណ្ដឹង ប្ដឹងទៅសម្ដេចអធិបតីហ៊ុន ម៉ាណែត ដោយសុំដក លោក ឡង់ សុបិន អភិបាលស្រុកឆែប ចេញពីមុខតំណែង។

នេះបើយោងតាម លិខិតបណ្ដឹងដោយបើកចំហ.របស់មន្ត្រីក្រោមឱវាទ ដែលបានគោរពជូនសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងរដ្ឋមន្ត្រីក្រសួងមហាផ្ទៃ កាលពីថ្ងៃទី១៤ ខែកុម្ភៈ ឆ្នាំ២០២៤។

នៅក្នុងលិខិតនោះបានអះអាងថា«យើងខ្ញុំជាមន្ត្រីរាជការនៅចំណុះរដ្ឋបាលស្រុកឆែប ក្រុមប្រឹក្សាឃុំទាំង៨ និង ក្រុមប្រឹក្សាស្រុកឆែប ខេត្តព្រះវិហារ ។ ពុំដែលទទួលបាននូវភាពកក់ក្តៅ សប្បាយរីករាយ ក្នុងការបំពេញកិច្ចការងារ សោះឡើយ ។
ដោយលោកអភិបាលស្រុករូបនេះ គឺតែងតែព្យាយាមធ្វើទុក្ខបុកម្នេញយើងខ្ញុំទាំងអស់គ្នា តាមគ្រប់រូប ភាពដែលមិនសមជាអ្នកដឹកនាំ គ្រប់គ្រង មានពេលខ្លះស្រែកសំឡុត គំរាមកំហែង ស្តីបន្ទោសថាស្រេចតែចិត្តគាត់ ។ ហើយមិនមានភាពច្បាស់លាស់ ទៅលើការងាររដ្ឋបាល និងបញ្ជាឲ្យធ្វើការងារ តាមតែអារម្មណ៍របស់គាត់។

-មន្ត្រីក្រោមឱវាទបញ្ជាក់ថា៖សកម្មភាពរបស់លោក ឡង់ សុបិន កន្លងមកមានដូចជា៖ ពុំមានការប្រាស្រ័យទាក់ទងល្អជាមួយមន្ត្រីក្រោមឱវាទ ក្រុមប្រឹក្សាឃុំ និងក្រុមប្រឹក្សាស្រុក។
– ប្រើប្រាស់ថវិកាជាតិរបស់រដ្ឋបាលស្រុកមិនត្រឹមត្រូវ កេងចំណេញ គិតតែប្រយោជន៍ផ្ទាល់ខ្លួនជាធំ (ពិសេសកញ្ចប់លទ្ធកម្ម)។

មានអត្តចរិកឆេវឆាវ គ្រប់គ្រងកំហឹងពុំបាន បញ្ចេញសម្តីមិនល្អជាមួយមន្ត្រី និងក្រុមប្រឹក្សា។

សម្ដីគ្មានសុជីវធម៌ សីលធម៌ក្នុងភាពជាអ្នកដឹកនាំ ពុំខ្វល់ខ្វាយពីសាមគ្គីភាពផ្ទៃក្នុង។ មិនមានភក្ដីភាពជាអ្នកដឹកនាំ គ្មានក្រមសីលធម៌ ដឹកនាំតាមអារម្មណ៍របស់ខ្លួន។

ធ្វើការអត្តនោម័ត ពុំដែលស្តាប់យោបល់អ្នកណា ពិសេសគណៈអភិបាលស្រុក និងក្រុមប្រឹក្សាស្រុក។
– គ្មានចំណេះដឹងផ្នែករដ្ឋបាល ដឹកនាំ គ្រប់គ្រង ។
– ពុំសូវនៅអង្គភាពដោយធ្វើការផ្ទេរសិទ្ធិជាញឹកញាប់ តែពេលនៅសាលាស្រុកតែងតែតាមដាន និង ដាក់អវត្តមានមន្ត្រីកំពុងធ្វើការ ដែលពុំទាន់ចុះហត្ថលេខា លើបញ្ជីវត្តមាន។

មិនចេះលើកទឹកចិត្ត និងយកចិត្តទុកដាក់ពីសុខទុក្ខររបស់មន្ត្រីក្រោមឱវាទ ចេះតែចាប់កំហុស។
រាល់កិច្ចប្រជុំគណៈបញ្ជាការឯកភាព និងប្រជុំប្រចាំខែ ។
គឺពុំមានរបៀបវារៈត្រឹមត្រូវ ច្បាស់លាស់ក្នុង កិច្ចប្រជុំ ហើយតែងតែស្តីបន្ទោសមន្ត្រី និងបណ្តេញមន្ត្រីចេញពីអង្គប្រជុំជារឿយៗ។

– មិនដែលចូលរួមកិច្ចប្រជុំសាមញ្ញក្រុមប្រឹក្សាស្រុក រយៈពេលជាងមួយឆ្នាំ ហើយគេចវេសមិនចូលរួម វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាស្រុក និង វេទិកាផ្សព្វផ្សាយ និងពិគ្រោះ
យោបល់របស់ក្រុមប្រឹក្សាខេត្ត។
ហើយមិនដែលចូលរួមដោះស្រាយបញ្ហាប្រឈមផ្សេងៗ ដែលកើត មានឡើងក្នុងស្រុកឡើយ។

– បង្កើតបក្សក្នុងបក្ស បង្កទំនាស់ផ្ទៃក្នុង បំបែកបំបាក់សាមគ្គីផ្ទៃក្នុងរវាងថ្នាក់លើ ថ្នាក់ក្រោម។
– បង្កអោយមានទំនាស់ដីធ្លីជាញឹកញាប់ក្នុងភូមិសាស្ត្រស្រុកឆែប ហើយមិនចូលរួមដោះស្រាយ។

– បង្កើតចលនាដីធ្លី ដោយបានសហការជាមួយលោក ម៉ី សោភា (មន្ត្រីចូលនិវត្តន៍) និងក្រុមហ៊ុន ចំ ការអំពៅចិន ។
ដោយយកដីសប្បទានសេដ្ឋកិច្ចរបស់ក្រុមហ៊ុនចំការអំពៅចិន មិនវិនិយោគលើដំណាំ អំពៅ បែជាជួលដីឲ្យប្រជាពលរដ្ឋដាំដំឡូងមីវិញ (នៅឆ្នាំ២០២៣ ក្នុង១ហិកតាជួលក្នុងតំលៃ ៤៥០,០០០៛ ទៅ៦០០,០០០៛ ។

លុះដល់ឆ្នាំ២០២៤លោក ម៉ី សោភា បានបង្កើនថ្លៃជួលដីរហូត ដល់ ៨០០,០០០៛ ទៅ១,០០០,០០០៛ ដើម្បីជួលឲ្យប្រជាជនក្រៅស្រុក)។ ដែលធ្វើឲ្យប៉ះពាល់ដល់ ជីវភាពរស់នៅ របស់ប្រជាពលរដ្ឋជាម្ចាស់ឆ្នោតក្នុងស្រុកឆែប យ៉ាងធ្ងន់ធ្ងរបំផុត។
លោក ម៉ី សោភា ម្ចាស់សហគ្រាសអឹមសេវែន គឺបានរំលោភបំពានលើប្រជាពលរដ្ឋដែលបានជួលដី ហើយទាមទារ លុយពីប្រជាពលរដ្ឋមុនការកំណត់ជាប្រចាំ លើកខ្លួនជាស្ដេចក្រាញ់ប្រចាំតំបន់ ដោយមិនខ្លាចរអា ច្បាប់ឡើយ ព្រោះមានការសហការពីអភិបាលស្រុក។

ជាក់ស្តែងកាលពីថ្ងៃទី២៩ ខែមករា ឆ្នាំ ២០២៤ បានប្តឹងឲ្យកំលាំងកងរាជអាវុធហត្ថស្រុក ចាប់យកត្រាក់ទ័ររបស់ប្រជាពលរដ្ឋចំនួនមួយ គ្រឿង ម៉ាកគូបូតាពណ៌ក្រហមលេខ១០៥០ ។
ដែលកំពុងភ្ជួរដីរើសផលដំឡូងមីក្នុងដីចំការដែលបាន ជួល ពីខាងសហគ្រាសអឹមសេវែន។
ពេលចុះចាប់នោះ មានកំលាំងកងរាជអាវុធហត្ថស្រុកចំនួន០៣ នាក់ សន្តិសុខសហគ្រាសអឹមសេវែនចំនួន០៦នាក់ អ្នកបកប្រែចិនចំនួន០១នាក់ ដឹកនាំដោយ លោក ហុង ហាំ មេបញ្ជាការកងរាជអាវុធហត្ថស្រុកឆែប ខេត្តព្រះវិហារ ។

បានចាប់យកត្រាក់ទ័រទៅ រក្សាទុក នៅទីបញ្ជាការកងរាជអាវុធហត្ថខេត្តព្រះវិហារ។
ពេលដែលប្រជាពលរដ្ឋស្នើសុំឲ្យជួយ អន្តរាគមន៍តែលោក ឡង់ សុបិន មិនព្រមចុះហត្ថលេខា លើឯកសារសំណើរបស់ប្រជាពលរដ្ឋ ដោយ គ្មានភាពទទួលខុសត្រូវចំពោះប្រជាពលរដ្ឋរបស់ខ្លួនឡើយ ក្នុងនាមជាថ្នាក់ដឹកនាំស្រុក។

ប្រភពដដែលបន្ថែមទៀតថាកន្លងមក(នៅថ្ងៃទី ០៨ ខែកញ្ញា ឆ្នាំ ) ធ្លាប់មានជនអាណាមិកបានបោះត្រាក់នៅមុខសាលាស្រុកឆែប និងនៅមុខសាលាខេត្តព្រះវិហារ រិះគន់ ២០២៣ អំពីអសម្ថភាពដឹកនាំរបស់លោក ឡង់ សុបិន។

បន្ទាប់មក គណៈចាត់តាំង នៃគណៈកម្មាធិការគណបក្សប្រជាជន កម្ពុជាខេត្តព្រះវិហារ ។
បានចុះមកសាកសួរក្រុមប្រឹក្សាស្រុក និងគណៈអភិបាលស្រុក ថាតើអត្ថន័យក្នុងត្រាក់នោះ ជាការពិតដែររឺទេ? ។ ប៉ុន្តែមកទល់ពេលនេះ យើងខ្ញុំពុំទាន់បានឃើញចំណាត់ការណាមួយចំពោះបុគ្គលនេះនៅឡើយ។

-ជាចុងក្រោយមន្ត្រីក្រោមឱវាទ ស្នើសុំឱ្យសម្តេចធិបតី ហ៊ុន ម៉ាណែត មេត្តាដក ឬសម្រួលភារកិច្ច លោក ឡង់ សុបិន ចេញពីអភិបាល នៃគណៈអភិបាលស្រុកឆែប ខេត្តព្រះវិហារ ដោយក្ដីអនុគ្រោះ។

អង្គភាពផ្សារព័ត៌មានសៀមរាប ប៉ុស្តិ៍ នៅពុំទាន់ទទួលបានការបំភ្លឺ ពីលោក លោក ឡង់ សុបិន អភិបាលស្រុកឆែប នៅឡើយទេ។ តែលោកបានថ្លែងប្រាប់អ្នកសារព័ត៌មាន នៅថ្ងៃសៅរ៍នេះថា ៖ ការដឹកនាំរបស់លោក គឺល្អប្រសើ។
ក្នុងនោះរូបលោក ក៏មិននឹកស្មានថា មានអ្នកមិនពេញចិត្ត នឹងលោកដែរ។ លោកបន្តថា ខ្ញុំតែងតែធ្វើការណែនាំដល់មន្ត្រីជំនាញ ឬការិយាល័យនានា ឱ្យអនុវត្តតួនាទីភារកិច្ច ល្អដើម្បីបម្រើពលរដ្ឋ។ចំពោះរឿង ជួលដីសប្បទានសេដ្ឋកិច្ច របស់ក្រុមហ៊ុនចំការអំពៅចិន លោកបានបដិសេធថា ខ្ញុំមិនពាក់ព័ន្ធនោះទេ៕SRP

ខេត្តព្រះសីហនុ៖លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅរសៀលថ្ងៃទី៥ ខែមេសា ឆ្នាំ២០២៤ បានអញ្ជើញដឹកនាំកិច្ចប្រជុំពិនិត្យវឌ្ឍនភាព នៃការថែរក្សាសន្តិសុខក្នុងខេត្តព្រះសីហនុ រៀបចំនៅស្នងការដ្ឋាននគរបាលខេត្តព្រះសីហនុ។ កិច្ចប្រជុំនេះ មានការអញ្ជើញចូលរួមពីថ្នាក់ដឹកនាំក្រសួងមហាផ្ទៃ រដ្ឋបាលខេត្តព្រះសីហនុ សាលាដំបូងខេត្ត ស្នងការដ្ឋាននគរបាលខេត្ត និងមន្ត្រីពាក់ព័ន្ធមួយចំនួនទៀត។

លោក គួច ចំរើន អភិបាលខេត្តព្រះសីហនុ បានធ្វើរបាយការណ៍ឱ្យដឹងថា គិតចាប់ពីឆ្នាំ២០២៣ មក ជាពិសេសក្នុងរយៈពេល ៣ខែដើមឆ្នាំ២០២៤ នេះ ការគ្រប់គ្រងសន្តិសុខ និងសណ្ដាប់ធ្នាប់សាធារណៈក្នុងខេត្តទទួលបានលទ្ធផលយ៉ាងល្អប្រសើរ ក្នុងនោះករណីបទល្មើសប្រព្រឹត្តដោយជនបរទេស ដែលនៅមានចំនួនតិចតួច ក៏ត្រូវបានកម្លាំងសមត្ថកិច្ចបង្ក្រាបយ៉ាងមានប្រសិទ្ធភាពផងដែរ។

បើតាមអភិបាលខេត្ត គិតចាប់ពីថ្ងៃទី៦ ខែមីនា ដល់ថ្ងៃទី២ ខែមេសា ឆ្នាំ២០២៤ គណៈកម្មការចំពោះកិច្ចដឹកនាំដោយលោកសុខ ផល រដ្ឋលេខាធិការក្រសួងមហាផ្ទៃ ដែលមានការចូលរួមពីគណៈបញ្ជាការឯកភាពរដ្ឋបាលខេត្ត បានបង្ក្រាបបទល្មើសល្បែងអនឡាញ ខុសច្បាប់ ចំនួន ៥ទីតាំង ឃាត់ខ្លួនអ្នកពាក់ព័ន្ធជាង ២ពាន់នាក់ ក្នុងនោះបណ្ដាញមេក្លោងជាជនបរទេស ត្រូវបញ្ជូនទៅតុលាការ ជនបរទេសពាក់ព័ន្ធផ្សេងទៀត ត្រូវអនុវត្តនីតិវិធីបណ្ដេញចេញ ខណៈជនជាតិខ្មែរមួយចំនួនត្រូវបានអប់រំនិងធ្វើកិច្ចសន្យា។

ក្នុងនាមសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា និងក្នុងនាមក្រសួងមហាផ្ទៃ លោកស សុខា បានថ្លែងអំណរគុណនិងកោតសរសើរចំពោះកិច្ចខិតខំប្រឹងរបស់ រដ្ឋបាលខេត្តព្រះសីហនុ និងដោយមានការគាំទ្រពីគណៈកម្មការចំពោះកិច្ច ដែលបានបំពេញតួនាទីធានាការពារសន្តិសុខ និងសណ្ដាប់ធ្នាប់សាធារណៈ ក្នុងខេត្តបានយ៉ាងល្អ ក្នុងនោះក៏រួមទាំងការបង្ការ ទប់ស្កាត់ និងបង្ក្រាបបទល្មើសដែលបង្កឡើងដោយជនបរទេស ធ្វើឱ្យសាធារណមតិជាតិ និងអន្តរជាតិមានការអបអរសាទរ និងវាយតម្លៃជាវិជ្ជមាន។

រដ្ឋមន្ត្រីក្រសួងមហាផ្ទៃ បានផ្ដល់អនុសាសន៍ណែនាំ និងលើកទឹកចិត្តខ្ពស់ ដល់គណៈកម្មការចំពោះកិច្ច និយាយជារួម និងដោយឡែកគណៈបញ្ជាការឯកភាព រដ្ឋបាលខេត្តព្រះសីហនុ បន្តបង្កើនការស្រាវជ្រាវ និងបង្ក្រាបគ្រប់បទល្មើស ទាំងបទល្មើសប្រពៃណី និងមិនប្រពៃណី ក្នុងនោះជនបរទេសដែលពាក់ព័ន្ធត្រូវតែអនុវត្តនីតិវិធីបណ្ដេញចេញ ហើយរាល់ព័ត៌មានក្លែងក្លាយធ្វើឱ្យប៉ះពាល់កិត្តិយសខេត្ត និងមុខមាត់ប្រទេសជាតិ ត្រូវតែបន្សាប និងបកស្រាយឱ្យបានច្បាស់លាស់៕SRP