ខេត្តកំពង់ធំ៖ដើម្បីជួយសម្រាលការលំបាករបស់ប្រជាពលរដ្ឋ
ងាយរងគ្រោះបំផុតក្រោយទឹកជំនន់ នៅថ្ងៃ ពុធ ទី១៨ ខែវិច្ឆិកា ឆ្នាំ២០២០នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យលោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា និងលោក សុខ លូ ប្រធានគណៈកម្មាធិការសាខាកាកបាទក្រហមកម្ពុជា ខេត្តកំពង់ធំ ព្រមទាំងសហការី ចុះសួរសុខទុក្ខ និងនាំយកអំណោយមនុស្សធម៌ផ្តល់ជូន ចាស់ឥតទីពឹង ស្ត្រីមេម៉ាយ ជនមានពិការភាព និងអ្នកផ្ទុកមេរោគអេដស៍ចំនួន ៦៩៤គ្រួសារ រស់នៅក្នុងភូមិចំនួន៥ ឃុំផាត់សណ្តាយ នៃស្រុកកំពង់ស្វាយ ខេត្តកំពង់ធំ។

មានមតិស្វាគមន៍នាពេលនោះ លោក សុខ លូ បានថ្លែងអំណរគុណ យ៉ាងជ្រៀលជ្រៅ ដល់គណៈប្រតិភូកាកបាទក្រហមកម្ពុជា ជាពិសេស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន ដែលតែងតែគិតគូរដល់សុខទុក្ខបងប្អូនប្រជាពលរដ្ឋដែលងាយរងគ្រោះបំផុត។
ទន្ទឹមនឹងនេះ លោក បានស្នើឱ្យបងប្អូនប្រជាពលរដ្ឋ ទាំងអស់ សូមចូលរួមជាមួយអាជ្ញាធរមូលដ្ឋាន អនុវត្តគោលនយោបាយ ភូមិឃុំមានសុវត្ថិភាព ជាពិសេសជៀសវាងអំពើហិង្សាក្នុងគ្រួសារ គ្រឿងញៀន គ្រឿងស្រវឹង ដើម្បីភាពសុខសាន្តក្នុងក្រុមគ្រួសារ និងចូលរួមពង្រឹងសាមគ្គីភាពជាតិ និងរក្សាសុខសន្តិភាពឱ្យបានគង់វង្ស ព្រោះមានសន្តិភាព ទេីបមានកំណើនសេដ្ឋកិច្ចជាតិ និងការអភិវឌ្ឍ។

ក្នុងឱកាសសំណេះសំណាលជាមួយបងប្អូនប្រជាពលរដ្ឋលោកជំទាវអគ្គលេខាធិការ បានពាំនាំនូវព្រះរាជបន្ទូលផ្តាំផ្ញើដ៏ខ្ពង់ខ្ពស់បំផុតពីសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល និងជាព្រះប្រធានកិត្តិយស កាកបាទក្រហមកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខប្រជាពលរដ្ឋទាំងអស់ដោយ មនោសញ្ចេតនា ការនឹករលឹក អាណិតស្រឡាញ់ ការគិតគូរពីសុខទុក្ខ និងជីវភាពរស់នៅប្រចាំថ្ងៃ ជាពិសេសបញ្ហា សុខភាពរបស់បងប្អូនប្រជាពលរដ្ឋគ្រប់ពេលវេលា។

លោកជំទាវអគ្គលេខាធិការ បានពាំនាំនូវសារអំពាវនាវរបស់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនចំពោះបងប្អូន ប្រជាពលរដ្ឋទាំងអស់ ឱ្យមានស្មារតីប្រុងប្រយ័ត្នជានិច្ចពីជំងឺកូវីដ-១៩ កុំមានការភ័យស្លន់ស្លោ ថ្វីត្បិតតែមិនទាន់មានថ្នាំព្យាបាលបាន ប៉ុន្តែយើងអាចទប់ស្កាត់បាន តាមរយៈការអនុវត្តឱ្យបានខ្ជាប់ខ្ជួននូវវិធានការនានារបស់ក្រសួងសុខាភិបាល ដែលជាពិសេសត្រូវអនុវត្ត «រស់នៅធម្មតា តាមបែបគន្លងថ្មី»។
ក្នុងន័យនេះ សូមប្រជាពលរដ្ឋទាំងអស់ គិតគូរពីគម្លាតសុវត្ថិភាពសង្គម គម្លាតសុវត្ថិភាពបុគ្គល ពាក់ម៉ាស់ការពារ រក្សាអនាម័យឧស្សាហ៍លាងដៃនឹងសាប៊ូ ឬ អាល់កុល។ ជាមួយគ្នានេះ សូមលើកទឹកចិត្តដល់ស្ត្រីដែលមានផ្ទៃពោះត្រូវទៅពិនិត្យផ្ទៃពោះឱ្យបាន៤ដង មុន ពេលសម្រាល និងទៅធ្វើតេស្តឈាមរកមេរោគអេដស៍ ដើម្បីការពារកុំឱ្យឆ្លងពីម្តាយទៅកូន និងត្រូវស្វែងរកមណ្ឌលសុខភាព ឬមន្ទីរពេទ្យបង្អែកសម្រាលកូនឱ្យបានត្រឹមត្រូវ។

លោកជំទាវ បានសំណូមពរ ដល់ប្រជាពលរដ្ឋទាំងអស់ មេត្តាគិតគូរថែទាំសុខភាព ឱ្យបានល្អ និងត្រូវរស់នៅដោយមានអនាម័យ ពិសាទឹកដាំឆ្អិនល្អ ប្រើប្រាស់ទឹកស្អាត ដើម្បីជៀសផុតពីជំងឺផ្សេងៗ និងត្រូវមានការប្រុងប្រយ័ត្នចំពោះគ្រោះថ្នាក់ដោយការលង់ទឹកជាយថាហេតុ។

ក្នុងនោះដើម្បីរក្សាគម្លាតសុវត្ថិភាពសង្គម និងសម្រួលដល់ ការធ្វើដំណើររបស់ប្រជាពលរដ្ឋ កាកបាទក្រហមកម្ពុជា បានរៀបចំពិធីចែកចាយនៅទីតាំងចំនួន២ផ្សេងគ្នាគឺ ៖ទីតាំងទី១ ស្ថិតនៅក្នុងបរិវេណវត្តកំពង់ចម្លង សម្រាប់ប្រជាពលរដ្ឋ ចំនួន ១៧៨គ្រួសារ រស់នៅក្នុងភូមិទួលនាងសាវ នៃឃុំផាត់ សណ្តាយ និងទីតាំងទី២ ស្ថិតនៅក្នុងសាលាបឋមសិក្សាផាត់ សណ្តាយ សម្រាប់ប្រជាពលរដ្ឋ ៥១៦គ្រួសារ រស់នៅភូមិ ទួលនាងសាវ កំពង់ចម្លង ផាត់សណ្តាយ កោះតាពៅ នៃឃុំផាត់សណ្តាយ។

សូមបញ្ជាក់ថា អំណោយអង្ករដែលទទួលពីក្រុមហ៊ុនព្រូដិនសលកម្ពុជា និងអំបិលពីក្រុមហ៊ុនសុវណ្ណគិរី ផ្តល់ជូនដល់ក្រុមគ្រួសាររងគ្រោះនីមួយៗ ៖ អង្ករ ២៥ គីឡូក្រាម, អំបិល ២ គីឡូក្រាម និងមី ១កេស, ត្រីខ ១០កំប៉ុង, ឃីត ១កញ្ចប់ (មុង១ ភួយ១ សារុង១ ក្រមា១ អាវយឺត២) ជាអំណោយកាកបាទក្រហមកម្ពុជា៕SRP

ខេត្តកំពង់ឆ្នាំង៖លោក ឌី វិជ្ជា និងលោកជំទាវ ហ៊ុន ម៉ាណា នៅថ្ងៃ
ព្រហស្បត្តិ៍ទី ១៩ ខែ វិច្ឆិកា ឆ្នាំ២០២០នេះ បានចាត់ឱ្យលោក ជិន ប៊ុនធឿន និងក្រុមការងារមនុស្សធម៌ នាំយកអំណោយមួយចំនួនធំ ទៅប្រគល់ជូនគ្រួសារមួយ ដែលកំពុងប្រឈម នឹងការខ្វះខាតក្នុងជីវភាព។

ដោយលោកទាំងពីរបានទទួលដំណឹងពីការបង្ហោះតាមការផ្សព្វផ្សាយប្រព័ន្ធ ទំនាក់ទំនងសង្គមពីការលំបាកខ្វះខាតក្នុងជីវភាពរបស់លោក រស់ សារឹម និងប្រពន្ធឈ្មោះ ជាម កុសល មានមុខរបរជាជាងសំណង់មានកូនតូចៗចំនួន០២នាក់ ក្នុងបន្ទុក ដោយសារជីវភាពទើបធ្វើអោយអ្នកទាំងពីរ សម្រេចចិត្តនាំកូនតូចៗ ទៅធ្វើការជាមួយនៅតាមការដ្ឋានសំណង់នានាដែលខ្លួនកំពុងធ្វើ មើលទៅគួរអោយអាណិតអាសូរជាពន់ពេក ហើយគ្រួសារនេះរស់នៅ ភូមិទ្រាជេីង ឃុំស្រែថ្មី ស្រុករលាប្អៀរ ខេត្តកំពង់ឆ្នាំង ។
អំណោយដែលបានផ្តល់ជូនក្នុងពេលនេះរួមមាន៖
១-ត្រីខ ចំនួន ១០០កំប៉ុង
២-មី ចំនួន៥កេសតូច
៣-ទឹកដោះគោខាប់ ចំនួន៤៨កំប៉ុង
៤-ស្ករសចំនួន ៥គីឡូ
៥-វិទ្យុស្តាប់ F12 និងថ្មពិលចំនួន ០១ ឈុត
៦-សាប៊ូដុំចំនួន ១២ដុំ
៧-ថ្នាំពេទ្យចំនួន ៥ប្រអប់
៨-ជេលលាងដៃចំនួន ០៥ ដបតូច
៩-ខោអាវយាយតាចំនួន ០៤កំផ្លេ
១០-ប្រេងកូឡាចំនួន ០១ ប្រអប់ធំ
១១-ប្រេងខ្យល់ចំនួន ០១ ប្រអប់ធំ
១២-សម្ភារប្រើប្រាស់ក្នុងផ្ទះមួយចំនួន
១៣-ថវិកាសម្រាប់ដោះស្រាយបំណុលធនាគារចំនួន ៣,៤៣៣,០០០៛ និងថវិកាចំនួន ១,១០០,០០០៛ សម្រាប់សងប្រាក់ចងការក្នុងភូមិ រីឯថវិកាបន្ថែមចំនួន ២,៤៦៧,០០០៛ ប្រគល់ជូនគ្រួសារមួយនេះសម្រាប់ដោះស្រាយបញ្ហាដែលកំពុងប្រឈមក្នុងជីវភាពរបស់គ្រួសារខណៈពេលដែលជំងឺកូវីដ-19 កំពុងរីករាយដាលធ្វើអ្នកទាំងពីរពិបាករកការងារធ្វើនោះ ។
ក្នុងឱកាសនោះ អ្នកទាំងពីរបានថ្លែងអំណរគុណដល់ លោក ឌី វិជ្ជា និងលោកជំទាវ ហ៊ុន ម៉ាណា ទាំងទឹកមុខ ពោរពេញដោយក្តីសង្ឃឹមជាថ្មីរកអ្វីប្រៀបផ្ទឹមពុំបាន ដែលលោកទាំងទ្វេតែងតែគិតពីទុក្ខលំបាករបស់ប្រជាពលរដ្ឋគ្រប់ទីកន្លែង។
«សូមជូនពរឯកឧត្តម និងលោកជំទាវ ព្រមទាំងក្រុមគ្រួសារឱ្យមានសុខភាពល្អពេញបរិបូរណ៌េះ៕

ខេត្តព្រះវិហារ៖ផ្លូវជាតិ ផ្លូវខេត្ត និងផ្លូវខ្សែក្រវ៉ាត់ព្រំដែន ដែលស្ថិតនៅក្នុងរង្វង់ដែនដីរដ្ឋបាលខេត្តព្រះវិហារ ពិសេស ផ្លូវក្រាលគ្រួសក្រហម ដែលតភ្ជាប់ទៅកាន់តំបន់ព្រំដែនកម្ពុជា-ថៃ និងឡាវ បានរងការខូចខាតជាអន្លើរៗ ដោយសារជំនន់ទឹកភ្លៀង ដែលហូរស្រោចស្រពពីគ្រប់ទិសទី នៃតំបន់ខ្ពង់រាបក្នុងខេត្ត នាពេលកន្លងមកនោះ ខណៈនេះត្រូវបានជួសជុល និងកែលំអរឡើងវិញហើយ សម្រាប់ប្រជាពលរដ្ឋនៅក្នុងមូលដ្ឋាន ធ្វើដំណើរបានរហ័ស និងប្រកបដោយសុវត្ថិភាព។

ប្រធានមន្ទីរសាធារណការ និងដឹកជញ្ជូនខេត្តព្រះវិហារ លោកសំ លាងទ្រី បានប្រាប់អ្នកសារព័ត៌មានឲ្យដឹងថា នៅច្រើនថ្ងៃមកនេះ លោកបានបញ្ជូនមន្ត្រីជំនាញ នាំយកគ្រឿងចក្រគ្រប់ប្រភេទ ចុះទៅកាន់ទីតាំងចំនួន ៤ ដើម្បីជួសជុល និងសម្អាតរុក្ខជាតិ នៅតាមដងផ្លូវឲ្យមានភាពល្អប្រសើរឡើងវិញ ក្រោយជំនន់ទឹកភ្លៀង ដែលបានហូរច្រោះ និងកាត់ផ្តាច់ជាអន្លើរៗ នាពេលកន្លងមកនោះ។

លោក សំ លាងទ្រី បានឲ្យដឹងទៀតថា ផ្លូវដែលត្រូវជួសជុលឡើងវិញនេះ គឺមានចំនួន ៤ខ្សែ ដែលរងការខូចខាតខ្លាំង ក្នុងនោះ ផ្លូវជាតិលេខ៩៤ មានប្រវែង ៦៥គីឡូម៉ែត្រ តភ្ជាប់ពីស្រុកឆែប ឆ្ពោះទៅតំបន់ព្រំដែនកម្ពុជា-ឡាវ ,ផ្លូវជាតិលេខ៩៥ ជាផ្លូវក្រាលគ្រួសាក្រហម មានប្រវែង ១៣គីឡូម៉ែត្រ តភ្ជាប់ពីស្រុកឆែប ឆ្ពោះទៅកាន់ស្រុកជ័យសែន ,ផ្លូវជាតិលេខ៦២ តភ្ជាប់ពីភូមិភ្នំដែក ឆ្ពោះទៅកាន់ភូមិស្វាយដំណាក់ ស្ថិតក្នុងឃុំរមណីយ ស្រុករវៀង និងផ្លូវជាតិលេខ៩២ ជាប្រភេទផ្លូវក្រាលគ្រួសក្រហម មានប្រវែងជាង ៨០គីឡូម៉ែត្រ តភ្ជាប់ពីព្រំប្រទល់ខេត្តស្ទឹងត្រែង និងព្រះវិហារ ឆ្ពោះទៅកាន់ព្រំដែនកម្ពុជា-ឡាវ និងបន្តតភ្ជាប់ទៅកាន់តំបន់បន្ទាយស្រមោច ស្ថិតក្នុងស្រុកជាំក្សាន្ត នៃតំបន់ព្រំដែនកម្ពុជា-ថៃ ដោយធ្វើការជួសជុលឆ្លងកាត់ ឃុំកំពង់ស្រឡៅ១ និងកំពង់ស្រឡៅ២ ស្រុកឆែប ខេត្តព្រះវិហារ។

លោកបានបញ្ជាក់ថា ផ្លូវជាតិ ផ្លូវខេត្ត និងផ្លូវក្រវ៉ាត់ព្រំដែនទាំង ៤ខ្សែ ដែលរងការខូចខាត
កន្លងមកនេះ ត្រូវបានបញ្ចប់ការកែសម្រួល ជួសជុល លុបគ្រលុក លុបផ្លូវសំបុកមាន់ និងការកាត់សម្អាតរុក្ខជាតិ ដោយម៉ាស៊ីនស្វ័យប្រវត្តិ បានរួចរាល់ស្ទើរទាំងស្រុងហើយ ដើម្បីសម្រួលដល់ការធ្វើដំណើរ ការដឹកជញ្ជូនកសិផលកសិកម្ម ពីទីជនបទទៅកាន់ទីប្រជុំជន និងដើម្បីធានាសុខ សុវត្ថិភាព ធ្វើដំណើរបានរហ័ស ចំណាយពេលវេលាតិច ជូនប្រជាពលរដ្ឋនៅក្នុងតំបន់នីមួយៗ ពិសេស កងកម្លាំងប្រដាប់អាវុធ និងប្រជាពលរដ្ឋ ដែលស្ថិតនៅតាមបណ្តោយខ្សែបន្ទាត់ ព្រំដែនកម្ពុជា-ថៃ និងកម្ពុជា-ឡាវ ក្នុងភូមិសាស្ត្រខេត្តព្រះវិហារ៕SRP

ខេត្តបាត់ដំបង៖ជនសង្ស័យចំនួន ៦នាក់ត្រូវបានកម្លាំងនគរបាលខេត្តបាត់ដំបង ចាប់ខ្លួនភ្លាមៗក្រោយធ្វើសកម្មភាពឆក់ ទ្រព្យសម្បត្តិពលរដ្ឋ។

ហេតុការណ៍ឆក់បានកើតឡើង
នាវេលាម៉ោង១៥និង១០នាទី រសៀលថ្ងៃទី១៨ ខែវិច្ឆិកា ឆ្នាំ ២០ ២០ នៅខាងលិចស្ពានដើមក្រសាំង ក្នុងក្រុមទី០១ ភូមិថ្នល់បត់ ឃុំឫស្សីក្រាំង ស្រុកមោងឫស្សី ខេត្តបាត់ដំបង។

សមត្ថកិច្ចបានដឹងថាករណីនេះក្រុមជនសង័្សយមានគ្នា៦នាក់
ប្រើប្រាស់ ម៉ូតូ០៣គ្រឿង បានធ្វើសកម្មភាព ឆក់យកប្រាក់ ចំនួន១.១៩ ៥. ០០០រៀល
របស់ពលរដ្ឋ ឈ្មោះ ភេន ផល ភេទប្រុស អាយុ៤២ឆ្នាំ រស់នៅឃុំឫស្សី ក្រាំង ស្រុកមោងឫស្សី ខេត្តបាត់ដំបង ពេល ជនរងគ្រោះកំពុងធ្វើដំណើរ នៅលើផ្លូវជាតិ។

ប្រភពបានឱ្យដឹងថា ក្រោយមានហេតុការណ៍បែបនេះ នគរបាល ស្រុកមោងឫស្សី បានប្រតិបត្តិការ តាមចាប់បានក្រុមជនសង្ស័យ ទាំង៦នាក់ភ្លាមៗ នៅក្នុងភូមិសាស្ត្រស្រុកមោងឬស្សី។

ជនសង្ស័យ៖
១-/ឈ្មោះ ហ្វាត អ៉ីណេស ហៅឆែប ភេទប្រុស អាយុ១៤ឆ្នាំ មានទីលំនៅភូមិចុងខ្នុរខាងលិច សង្កាត់ទឹកថ្លា ខណ្ឌសែនសុខ រាជធានីភ្នំពេញ។

២-/ឈ្មោះ ជួង ភក្តី ភេទប្រុស អាយុ១៨ឆ្នាំមានទី លំនៅភូមិ១៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

៣-/ឈ្មោះ សាត ភារ៉ុង ភេទប្រុសអាយុ១៦ឆ្នាំ មានទីលំនៅភូមិសំរោង សង្កាត់ខ្នួច ខណ្ឌសែន សុខ រាជធានីភ្នំពេញ។

៤-/ឈ្មោះ ផាន រ៉ាវី ភេទប្រុស អាយុ១៥ឆ្នាំមាហនទីលំនៅភូមិផ្សារសាន់ហាន់ ខណ្ឌឫស្សីកែវរាជ ធានីភ្នំពេញ។

៥-/ឈ្មោះ ផាន រ៉ាវីន ហៅជ័យភេទប្រុស អាយុ ១៤ឆ្នាំរស់នៅភូមិភ្នំពេញថ្មី សង្កាត់ភ្នំពេញថ្មី ខណ្ឌ សែនសុខ រាជធានីភ្នំពេញ។

៦-/ឈ្មោះ រតនាវិសាលសិដ្ឋភេទប្រុសអាយុ ១៥ ឆ្នាំមានទីលំនៅភូមិគោកឃ្នាង សង្កាត់គោកឃ្នាង ខណ្ឌសែន សុខរាជធានីភ្នំពេញ។

សមត្ថកិច្ចបានបន្តថាក្រោយឃាត់ខ្លួនដកហូតសម្ភាររួមមាន៖
១/ប្រាក់រៀលចំនួន ១.៥0០.០០០រៀល (មួយលានហាសិបម៉ឺនរៀល) ។

២/ម៉ូតូចំនួន០៣ គ្រឿង។

៣/ទូរស័ព្ទចំនួន០២គ្រឿង។

៤/-ខ្សែដៃកាឡៃចំនួន០១ខ្សែ ។
៥/ខ្សែកផ្លាកទីនចំនួន ០១ ខ្សែ ។
៦/ចិញ្ចៀនផ្លាកទីន ចំនួន ០១ វង់។

បើតាមអធិការនគរបាលស្រុកមោងឬស្សី លោកវរសេនីយ៍ឯក ស គឹមឡុង បានបញ្ជាក់ថា ក្រុមជនសង័្សយខាងលើនេះ បានចេញដំណើរ ពីរាជធានីភ្នំពេញ ហើយ មានគោលបំណង ទៅកាន់ខេត្តសៀមរាប។

ក្នុងពេលធ្វើដំណើរ ក្រុមគេបានធ្វើសកម្មភាព (ឆក់យកទ្រព្យ សម្បត្តិ ពីអ្នកធ្វើដំណើរតាមដងផ្លូវយកបានប្រាក់ចំនួន ៧០០.០០០រៀល (ចិតសិបម៉ឺនរៀល) ពីជនរងគ្រោះ ភេទស្រីម្នាក់នៅចំណុចស្នាមព្រះភូមិសាស្រ្ត ខេត្តពោធិ៍សាត់ លុះមកដល់ភូមិសាស្រ្តខេត្តបាត់ដំបង ពួកគេបានធ្វើសកម្មភាព ទៀតតែត្រូវបាននគរបាល ស្រុកមោងឫស្សី
បង្រ្កាបបាន។

បច្ចុប្បន្ន នគរបាល បញ្ជូនជនសង័្សយនិងវត្ថុតាង មកកាន់ការិយាល័យជំនាញ ដើម្បីអនុវត្តតាមផ្លូវច្បាប់៕SRPដោយប៊ុនថេត

ខេត្តបាត់ដំបង៖ផ្ទះមួយខ្នងត្រូវបានអគ្គិភ័យឆាបឆេះ អស់ទាំងស្រុង ខណៈម្ចាស់ចាក់សោ ចេញទៅក្រៅអស់។

ហេតុការណ៍ បានកើតឡើងនៅវេលាម៉ោងប្រមាណជា០៧និង០០នាទី ថ្ងៃទី ១៩ ខែវិច្ឆិកា ឆ្នាំ២០២០ នៅចំណុចក្រុមទី០១ ស្ថិតក្នុងភូមិចំការឬស្សី សង្កាត់ព្រែកព្រះស្ដេច
ក្រុងបាត់ដំបង។

សមត្ថកិច្ចបានឲ្យដឹងថា ផ្ទះដែលរងការឆេះ មានទំហំ ៨ម៉ែត្រx១៥ម៉ែត្រ សង់អំពីឈើ ដំបូលប្រក់ស័ង្កសី រួមនឹងសម្ភារប្រើប្រាស់មួយចំនួន។
ម្ចាស់ឈ្មោះ ពិន សម្បត្តិ ភេទស្រី អាយុ ៦៧ឆ្នាំ ។

បើតាមប្រភពបានឲ្យដឹងថាម្ចាស់ផ្ទះបានចាក់សោផ្ទះទុកចោល
ដោយរវល់ចេញទៅខាងក្រៅអស់ លុះក្រោយមក ក៏ស្រាប់តែមានការភ្ញាក់ផ្អើល នៅពេលដែលមានភ្លើងឆេះយ៉ាងសន្ធោសន្ធៅ។

គួរបញ្ជាក់ដែរថាករណីនេះសមត្ថកិច្ច បានប្រើឡានទឹកអស់ចំនួន៦គ្រឿង នឹងចុះទៅធ្វើរការសាកសួរ ពិនិត្យជំវិញកន្លែងកើតហេតុនិងបានដាក់ការសន្និដ្ឋានថា មូលហេតុនៃការឆេះនេះគឺបណ្តាលមកពីឆ្លងចរន្តអគ្គិសនី៕SRPដោយប៊ុន ថេត