នៅទីបំផុតកម្ពុជា នឹងសាងសង់ផ្លូវល្បឿនលឿន ទី៣ សៀមរាប-ភ្នំពេញ ដោយគ្រោងបញ្ចប់ការសិក្សានៅខែឧសភា ២០២៣។

លោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍នៅក្នុងសន្និសីទ ស្តីពីការលើកកម្ពស់ ការតភ្ជាប់ការដឹកជញ្ជូន ក្នុងតំបន់សម្រាប់អាស៊ីកណ្តាល និងអាស៊ីអាគ្នេយ៍ នៅក្រុងសៀមរាប នៅថ្ងៃសុក្រម្សិលមិញថា កម្ពុជានឹងមានផ្លូវល្បឿនជាច្រើនបន្ថែមទៀត ខណៈផ្លូវល្បឿនលឿនសៀមរាប ភ្នំពេញ នឹងបញ្ចប់ការសិក្សាគម្រោងនៅខែឧសភាឆ្នាំ២០២៣នេះ ហើយសម្រាប់កម្ពុជា ការអភិវឌ្ឍ មានច្រើនជាបន្តបន្ទាប់ មានទាំងគម្រោងតូច គម្រោងធំ។

លោក ស៊ុន ចាន់ថុល លើកឡើងទៀតថា នៅថ្ងៃទី៧ ខែមិថុនា ឆ្នាំ២០២៣ ខាងមុខនេះ សម្តេចតេជោ ហ៊ុន សែន នឹងអញ្ជើញជាអធិបតី ក្នុងពិធីសម្ពោធបើកការដ្ឋានសាងសង់ ផ្លូវល្បឿនលឿន ភ្នំពេញ-បាវិត និងនៅថ្ងៃទី០១ ខែឧសភា ខាងមុខនេះដែរ សម្តេចតេជោក៏នឹងអញ្ជើញជួបសំណេះសំណាល ជាមួយកម្មករ កម្មការិនី និងសម្ពោធបើកការដ្ឋានសាងសង់ ផែកុងទីន័រថ្មីមួយទៀត នៅកំពង់ផែស្វយ័ត ក្រុងព្រះសីហនុ ដែលមានជម្រៅទឹក១៤,៥ម៉ែត្រ ដែលផែថ្មីនេះ អាចឲ្យនាវាប្រមាណជា៩៣ភាគរយ ដែលចរាចរណ៍នៅក្នុងតំបន់អាស៊ីប៉ាស៊ីហ្វិក អាចចូលចតបាន ខណៈពេលបច្ចុប្បន្ននេះ មាននាវាប្រមាណតែ១៨ភាគរយប៉ុណ្ណោះដែលអាចចូលចតបាន។

លោកស៊ុន ចាន់ថុល បន្តថា ជាមួយគ្នានេះ យើងក៏បានសិក្សា ផ្លូវរថភ្លើង ដែលបច្ចុប្បន្នមានល្បឿន យឺត ឲ្យទៅជាផ្លូវរថយន្តភ្លើង មានល្បឿនលឿន ពីភ្នំពេញ ទៅប៉ោយប៉ែត ហើយពីភ្នំពេញទៅកំពង់ផែស្វយ័តខេត្តព្រះសីហនុ ជាមួយគ្នានឹងការសិក្សាគម្រោងដឹកជញ្ជូនតាមផ្លូវទឹកពីទន្លេបាសាក់ ទៅកាន់សមុទ្រនៅខេត្តកែប ក៏បានបញ្ចប់ផងដែរ។

លោកបន្តថា នៅមានគម្រោងជាច្រើនទៀត ទាំងតូច ទាំងធំ ក្នុងនោះក៏មានគម្រោងផ្លូវល្បឿនលឿន ទី៣ សៀមរាប ភ្នំពេញ ហើយក៏អាចមានផ្លូវល្បឿនលឿនទី៤ ទី៥ ទី៦ ជាបន្តទៀត។

សូមបញ្ជាក់ថា ផ្លូវល្បឿនលឿន ទី១ ភ្នំពេញ-ព្រះសីហនុ មានប្រវែង១៩០គីឡូម៉ែត្រ ត្រូវបានសម្ពោធដាក់ឲ្យប្រើប្រាស់ កាលពីចុងឆ្នាំ២០២២ ដែលបានប្រើប្រាស់ទុនវិនិយោគប្រមាណ២ពាន់លានដុល្លាអាម៉េរិក៕SRP

ថ្លែងនៅមុខអាជ្ញាធរមូលដ្ឋាន ដូនជី តាជី លោកគ្រូអ្នគ្រូ សិស្សានុសិស្ស និងប្រជាពលរដ្ឋក្នុងមូលដ្ឋានយ៉ាងច្រើនកុះករ នាថ្ងៃសុក្រម្សិលមិញ ក្នុងពិធីសម្ពោធកាត់ខ្សែបូរ ដាក់ឲ្យប្រើប្រាស់ជាផ្លូវការសាលាធម្មសភា ផ្លូវថ្នល់ និងនិងសមិទ្ឋផលនាៗ នៅវត្តគគីរ ស្រុកប្រាសាទបាគង​ ឯកឧត្តមអ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប បានបញ្ជាក់ថា រាល់សមិទ្ឋផលនានាទាំងនៅទីនេះ​ និងនៅទីដ៏ទៃក្នុងទូទាំងប្រទេស អាចកើតឡើងទៅបានគឺអាស្រ័យដោយប្រទេសជាតិមានសុខសន្តិភាពពេញលេញ បើគ្មានសន្តិភាពទេ យើងមិនអាចធ្វើការអភិវឌ្ឍឱ្យរីកចម្រើនដូចពេលនេះបានឡើយ។

ឯកឧត្តម សៀង ណាំ ក៏បានកោតសរសើរ ចំពោះព្រះចៅអធិការ ព្រះសង្ឃ គណៈកម្មការ អាចារ្យវត្តគគីរ អាជ្ញាធរដែនដី បងប្អូនប្រជាពលរដ្ឋ និងពុទ្ធបរិស័ទគ្រប់មជ្ឈដ្ឋាន ដែលបានសាមគ្គី ចូលរួមចំណែកជាកម្លាំងកាយ កម្លាំងចិត្ត និងទ្រព្យធនធ្វើឲ្យការកសាងសាលាធម្មសភា និងសមិទ្ឋផល មួយចំនួនទៀត បានសម្រេចរួចរាល់ជាស្ថាពរ។

ឯកឧត្តម ក៏បានអំពាវនាវដល់លោកតា លោកយាយ បងប្អូនប្រជាពលរដ្ឋ ដែលមានអាយុគ្រប់ និងមានសិទ្ធិបោះឆ្នោត សូមអញ្ជើញទៅចូលរួមបោះឆ្នោតជ្រើសរើសតំណាងរាស្ត្រ នីតិកាលទី៧ ដែលនឹងប្រព្រឹត្តទៅ នៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះកុំបីខានឡើយ។

ឯកឧត្តម ក៏បានប្រគេនព្រះចៅអធិការវត្តនូវថវិកាចំនួនប្រគេនបច្ច័យចំនួន ១០លានរៀលនិង ចែកជូនតាជីយាយជី ២០០នាក់ សិស្សានុសិស្ស ១០០នាក់ លោកគ្រូ អ្នកគ្រូ ១៥នាក់ ប្រជាពលរដ្ឋ១ពាន់នាក់ សរុបអស់ថវិកា ១៧លានរៀលផងដែរ។

ក្នុងនាមរដ្ឋបាលខេត្ត លោកស្រី យូ សុភា អភិបាលរងខេត្ត មានប្រសាសន៍ថា សង្គមខ្មែរយើងបានចាត់ទុកព្រះពុទ្ឋសាសនា ជាវិស័យដ៏មានសារៈសំខាន់ ជាដៃគូអភិវឌ្ឍ មិនអាចខ្វះបាន ហើយពុទ្ឋចក្រ ដែលថ្នាក់ដឹកនាំគ្រប់ជាន់ថ្នាក់ តែងបានយកចិត្តទុកដាក់ ក្នុងការកសាងហេដ្ឋារចនាសម្ព័ន្ឋនានាក្នុងវិស័យនេះ ដើម្បីបំរើសេចក្តីត្រូវការ របស់ប្រជាពុទ្ឋបរិស័ទ មកបំពេញបុណ្យកុសល តាមសេចក្តីជ្រះថ្លា ជាមួយគ្នានេះវត្តអារាម បានផ្តល់គុណសម្បត្តិដល់ពុទ្ឋបរិស័ទ ដែលមានព្រះសង្ឃ ជាតួអង្គសំខាន់ និងបានជួយអភិវឌ្ឍសង្គម កម្ពុជាតាំងពីសម័យមុនរហូតមកដល់បច្ចុប្បន្ន។

សូមជម្រាបថា សមិទ្ឋផលថ្មីជាគរុភ័ណ្ឌវត្តនេះ មានដូចជា សាលាធម្មសភា មួយខ្នងមានទំហំ១៦មគុណនឹង៣៧ម៉ែត្រ ផ្លូវថ្នល់មុខវត្តប្រវែង១ពាន់២០០ម៉ែត្រ​ ទទឹង​ ៨ម៉ែត្រ និងសមិទ្ឋិផលនាៗ មួយចំនួនទៀតចំណាយក្នុងការកសាងអស់ថវិកាសរុប ជាង៤១ ម៉ឺនដុល្លារ និងនៅខ្វះថ្លៃជាងនិងសម្ភារៈសំណង់ ៦ម៉ឺន៨ពាន់ដុល្លារទៀត៕SRP

យ៉ាងហោចណាស់គោមួយក្បាលបានស្លាប់ មនុស្សម្នាក់បានរករបួស ក្នុងហេតុការណ៍គ្រោះធម្មជាតិ មួយនៅរសៀលថ្ងៃសុក្រនេះ។

ព័ត៌មានបឋម ថា នៅរសៀលថ្ងៃនេះ នៅចំណុចភូមិស្រិតខាងកើត និងភូមិតាត្រាវ ឃុំកន្ត្រាំងស្រកប្រាសាទបាគង មានករណីភ្លៀងធ្លាក់លាយឡំនឹងខ្យល់កន្ត្រាក់ ផ្គររន្ទះ ដែលបណ្តាលឲ្យដួលរលំរោង១ខ្នងទាំងស្រុង ដែលមានទំហំ (៣៧មx ១៧ម)និងរបេីកសំយ៉ាបផ្ទះ១ខ្នងទំហំ (៦មx៣ម)។

ប្រភពបានបន្តថា គ្រោះធម្មជាតិនេះ បង្កគ្រោះថ្នាក់ដល់ជីវិតមនុស្សម្នាក់របួសស្រាលមនុស្ស១នាក់ និងរន្ទះបាញ់ សត្វគោងាប់១ក្បាល៕SRP

បុរសអ្នកជិះម៉ូតូម្នាក់បានរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍ ប៉ះជាមួយរថយន្ត។

ហេតុការណ៍បានកើតឡើង នៅរសៀល២៨ ខែមេសា ឆ្នាំ២០២៣ស្ថិត នៅភូមិលលៃ ឃុំបាគង ស្រុកប្រាសាទបាគង ខេត្តសៀមរាប។

យោងតាមប្រភពបានអោយដឹងថា ករណីគ្រោះថ្នាក់ចរាចរណ៍នេះ រវាងរថយន្តកូរ៉េម៉ាកKiaពណ៌ខៀវផ្លាកលេខភ្នំពេញ 2BJ-5718 បានទៅបុកជាមួយម៉ូតូហុងដា C125 សេរី ឆ្នាំ2022 ពណ៌ខ្មៅផ្លាកលេខសៀមរាប 1AP-3110 បណ្តាលឲ្យរបួសធ្ងន់បាក់ជេីងស្តាំ (ត្រូវបានបញ្ជូនទៅសង្រ្គោះនៅមន្ទីរពេទ្យឯកជនតាសាម)។

ជនរងគ្រោះ ឈ្មោះស៊ុយ ដា ភេទប្រុសអាយុ២៨ឆ្នាំនៅភូមិមមាញ ឃុំរលួស ស្រុកប្រាសាទបាគង។ ក្រោយកេីតហេតុ អ្នកបេីកបររថយន្តបានរត់គេចខ្លួនបាត់ បន្សល់រថយន្តនៅកន្លែងកើតហេតុ។ មូលហេតុ អ្នកបេីកបរម៉ូតូមានល្បឿនលឿនមិនប្រកាន់ស្តាំ។

នៅទីបំផុតក្រុមមន្ត្រី បានចាប់ខ្លួនបានហើយ ក្រុមខ្មាន់កាំភ្លើងបាញ់សម្លាប់សត្វព្រៃក្នុងដែនជម្រកសត្វព្រៃភ្នំព្រេច-លំផាត់ និងហូតកាំភ្លើងវែងខ្លីចំនួន ៨ដើម គ្រាប់កាំភ្លើងជាច្រើនគ្រាប់ រួមទាំងវត្ថុតាងផងដែរ។

មន្ត្រីឧទ្យានុរក្សនៃដែនជម្រកសត្វព្រៃភ្នំព្រេច-លំផាត់ បានថ្លែងប្រាប់អ្នកសារព័ត៌មានថា ករណីនេះ បានចាប់ខ្លួនមនុស្សចំនួន៣នាក់ ក្នុងចំណោម៤នាក់ (ម្នាក់រត់គេចខ្លួន) នៅក្នុងប្រតិបត្តិការបង្ក្រាបបទល្មើសធនធានធម្មជាតិ ត្រង់ចំណុចនិយាមកា ៧០៨៨៤៨-១៤៤២៨៣៥ ស្ថិតក្នុងភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរី។

មន្ត្រីបានថ្លែងថា កាលពីថ្ងៃទី២២ ខែមេសា ឆ្នាំ២០២២ ដោយមានការសង្ស័យ ក្រុមការងារបានចាប់ឃាត់រថយន្ត MAZDA ១គ្រឿងពាក់ស្លាក់លេខ 2AP-9211 ដើម្បីសាកសួរ ក្រោយឃើញសមត្ថកិច្ច ជនសង្ស័យម្នាក់ ក្នុងចំណោម ៤នាក់ បានរត់គេចខ្លួនបាត់។  ដោយឃើញដូច្នេះ ក្រុមការងារបានស្ទាក់ចាប់ឃាត់បានមនុស្សចំនួន៣នាក់ និងដកហូតវត្ថុតាងរួមមាន៖

អាវុធប្រភេទ វែង ចំនួន៥ដើម មាន៖ ១)- CZ 457 PREMIUM ១ដើម ឆ្នាំផលិត CIPN 20 លេខ D185893 ចំនួន០១ដើម- បង់ដាក់គ្រាប់ ចំនួន០១- សឺមែល ចំនួន០១គ្រាប់ ២)- CZ 457 PREMIUM ចំនួន០១ដើម ឆ្នាំផលិត CIPN 21 លេខ F309647 – បង់ដាក់គ្រាប់ ចំនួន០១- សឺម៉ែល ចំនួន០១គ្រាប់- ពិលបំពាក់ ជាប់អាវុធ ចំនួន០១គ្រាប់ ៣)- CZ 452-2EZKM ចំនួន០១ដើម ឆ្នាំផលិត CIPN 15 លេខ CIPN B 851993 – បង់ដាក់គ្រាប់ ចំនួន០១- សឺម៉ែល ចំនួន០១គ្រាប់ ៤)- PROPERTY OF U.S. GOVT. M-16A1 CAL .5.56 M.M លេខ 4946387(អឹមសី/R) ចំនួន០១ដើម – បង់ដាក់គ្រាប់ ចំនួន០១- បំពាក់ HE510C-GR#017482594 ចំនួន ០១ – បំពាក់ HM3X #023823475 ចំនួន ០១ ។ ៥)- អាវុធ AK (ចិន) ស្វាយបត់ លេខ 56-16031510 ចំនួន០១ដើម – បង់ដាក់គ្រាប់ ចំនួន០១- ឡាសែរ ចំនួន០១គ្រាប់។

II. អាវុធប្រភេទ ខ្លី ចំនួន០៣ដើម ១. អាវុធខ្លី ម៉ាក(CF98-9) លេខ 008494 08 236 ចំនួន០១ដើម – បង់ដាក់គ្រាប់ ចំនួន០១ ២. អាវុធខ្លី ម៉ាក UL TRA CRIMSON CARRY II KIMBER MFG KU134831 YONKERS NY YSA ចំនួន០១ដើម- បង់ដាក់គ្រាប់ ចំនួន០១ ៣. អាវុធខ្លី ម៉ាក A.T.C BRNO CZ MOD.5.CAL.6.35mm លេខ 215553 – បង់ដាក់គ្រាប់ ចំនួន០១
សរុបអាវុធ មានចំនួន ០៨ដើម

III. ចំនួនគ្រាប់រំសេវ
– សរុបគ្រាប់រំសេវ CZ 457 PREMIUM មានចំនួន ២៧០គ្រាប់
– សរុបគ្រាប់រំសេវ CZ 452-2EZKM មានចំនួន០២គ្រាប់
– គ្រាប់រំសេវ M-16A1 មានចំនួន១៥គ្រាប់
– គ្រាប់រំសេវ AK មានចំនួន៣០គ្រាប់
– គ្រាប់រំសេវ (CF98-9) មានចំនួន0៥គ្រាប់
– គ្រាប់រំសេវ ម៉ាក UL TRA CRIMSON CARRY II ចំនួន០៤គ្រាប់
– គ្រាប់រំសេវ ចំនួន១៣គ្រាប់
– គ្រាប់រំសេវ ម៉ាក A.T.C BRNO CZ MOD.5.CAL.6.35mm ចំនួន១៣គ្រាប់
– គ្រាប់រំសេវ ប្រភេទគ្រាប់ប៉េអាកុល ចំនួន០៥គ្រាប់
សរុបរួម ចំនួនគ្រាប់ ៣៤៤គ្រាប់

IV. វត្ដុតាងសត្វព្រៃ
១. សត្វឈ្លូស ងាប់ ចំនួន ០២ក្បាល ស្មើនឹង ចំនួន ២០គីឡូក្រាម
២. សត្វឈ្លូស រស់ ចំនួន ០១ក្បាល (កូន)
៣. សត្វជ្រូកព្រៃ ងាប់ ចំនួន០១ក្បាល ស្មើនឹង ចំនួន ៤៤គីឡូក្រាម
៤. សត្វឆ្មាបា ចំនួន០១ក្បាល ស្មើនឹង ចំនួន ០២គីឡូក្រាម។ ចំពោះវត្ថុតាងទាំងអស់បានយកមករក្សាទុកនៅមន្ទីរបរិស្ថាន និងមនុស្សបានបញ្ជូនទៅសាលាដំបូងខេត្តដើម្បីបន្តនីតិវិធីច្បាប់៕SRP

នៅទីបំផុត ក្រុមការងារគណៈកម្មការជាតិដើម្បីទប់ស្តាត់ និងបង្ក្រាបបទល្មើសធនធានធម្មជាតិ ដឹកនាំដោយ លោក ឧត្តមសេនីយ៍ឯក ហុង វិណុល មេបញ្ជាការរង តំណាងលោក នាយឧត្តមសេនីយ៍ សៅ សុខា អគ្គមេបញ្ជាការរងនៃងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ គិតត្រឹមថ្ងៃទី២៨ ខែមេសា ឆ្នាំ២០២៣ នេះបានរកឃើញឈើជាច្រើន ម៉ែត្រ នៅក្នុងក្រុមហ៊ុនស៊ីង បាយអូថេក នឹងកំពុងបើកការស្រាវជ្រាវរកអ្នកពាក់ព័ន្ធផងដែរ។

ក្រុមមន្ត្រីជំនាញក៏បានបញ្ជូនជនសង្ស័យចំនួន ១១នាក់ គោយន្តកន្ត្រៃដឹកឈើចំនួន ១១គ្រឿង អត់មានឈើ ចំនួន ២គ្រឿង សរុប (១៣គ្រឿង) បញ្ជូនទៅស្ថាប័នអយ្យការដើម្បីអនុវត្តនីតិវិធី។

ប្រភពបានឲ្យដឹងថា ចំពោះឈើចំនួន ៦ឡាន ដែលកម្លាំងរកឃើញនៅក្រុមហ៊ុន ស៊ីងបាយអូថេក មន្ត្រីជំនាញនឹងបើកអង្កេតបឋម ដើម្បីស្រាវជ្រាវរកអ្នកទទួលខុសត្រូវ និងអ្នកដែលមានការពាក់ព័ន្ធបន្តទៀត។

បើតាមប្រភពនៅព្រឹកមិញនេះ មានការប្រជុំក្រុមការងារថ្នាក់ជាតិ និងថ្នាក់ខេត្តរៀបចំកម្លាំងរុករកស្រាវជ្រាវ រកវត្ថុតាង ចុះស្រាវជ្រាវគល់ឈើ ដែលបានកាប់បន្ថែមទៀត ដើម្បីផ្ទៀងផ្ទាត់ និងដាក់បន្ទុកទៅលើឈើនៅក្នុងក្រុមហ៊ុន ថាតើផែនការមេ នៅក្នុងក្រុមហ៊ុន មានឈួសមានឆាយ មានគាល់ឈើឬអត់ ដោយមន្ត្រីជំនាញ ក៏ចុះត្រួតពិនិត្យក្រុមហ៊ុន និងឱ្យក្រុមហ៊ុនបង្ហាញឯកសារពាក់ព័ន្ធ ឈើទាំង៦ឡាន ថាតើក្រុមហ៊ុន បានឈើនេះ មកពីណា ដើម្បីឱ្យមន្ត្រីនគរបាលយុត្តិធម៌ មានសិទ្ធអំណាចស្រាវជ្រាវ ដើម្បីឈានទៅដល់ការឃាត់ខ្លួនជនសង្ស័យប្រព្រឹត្តិល្មើសតែម្ដង៕SRP

នៅមុខប្រជាពលរដ្ឋ មន្ត្រីអ្នកចូលរួម ក្នុងពិធីកាត់ឫសសីមា និងសម្ពោធសមិទ្ធផលនានា ក្នុងវត្តថ្មី ហៅវត្តគ្រើល ស្ថិតក្នុងភូមិបន្ទាយបុស្ស ឃុំអន្សោង ស្រុកកំពង់ត្របែក ខេត្តព្រៃវែង នៅព្រហស្បតិ៍ ម្សិលមិញ លោកហ៊ុន ម៉ាណែត បានថ្លែងទៅកាន់បញ្ជាក់ថា «ប្រជាជនជាម្ចាស់ប្រទេស ហើយមន្ត្រីរាជការជាអ្នកបម្រើរាស្ត្រ»។ ក្នុងន័យនេះ រាជរដ្ឋាភិបាល ដែលដឹកនាំដោយ សម្តេចហ៊ុន សែន នាយករដ្ឋមន្ត្រី តែងបានតម្កល់ផលប្រយោជន៍ របស់ ប្រជាជនជាធំ ក្នុងគ្រប់កាលៈទេសៈ ដូចដែលស្តែងឡើងតាមរយៈ ការបង្កើតយន្តការ ជាច្រើនចុះបម្រើប្រជាពលរដ្ឋ ផ្ទាល់នៅតាមមូលដ្ឋាន និងការពង្រឹងនូវក្រមសីលធម៌ វិជ្ជាជីវៈ របស់មន្ត្រីការនៅក្នុងពេលបំពេញមុខងារផងដែរ។

លោកហ៊ុន ម៉ាណែត បានថ្លែងថា ក្នុងកាលៈទេសៈ សុខសន្តិភាព សេរីភាព និងភាពសម្បូរសប្បាយ រុងរឿង ដូចបច្ចុប្បន្ន, ប្រជាពលរដ្ឋ បានចូលរួមយ៉ាងសកម្ម ជាមួយរាជរដ្ឋាភិបាល ក្នុងការកសាងសមិទ្ធផលនាៗ ទាំងផ្នែកសាសនា និងអាណាចក្រ ទៅតាមបំណងប្រាថ្នារៀងៗខ្លួន៕SRP

អភិបាលខេត្តព្រះវិហារ លោក គីម រិទ្ធី បានអះអាង និង​បញ្ជាថា «ទី១ អភិបាលខេត្តព្រះវិហារ មិនយកលុយមួយរៀលពីឈ្មួញឈើទេ ​ទី២ សូមទប់ស្កាត់ឲ្យបាននូវបទល្មើសព្រៃឈើ ទី៣ បើមានមន្រ្តីពាក់ព័ន្ធនឹងមានវិធានការដកមន្រ្តី​នោះចោលតែម្តង»។

ការព្រមានធ្វើឡើងនៅថ្ងៃទី២៧ ខែមេសា ឆ្នាំ២០២៣ ដោយបានណែនាំយ៉ាងម៉ឺងម៉ាត់ ដល់មន្រ្តីពាក់ព័ន្ធ ក្នុងខេត្តទាំងអស់ ចូលរួមទប់ស្កាត់បទល្មើសព្រៃឈើ ដើម្បីបង្ក្រាបឲ្យបានទាំងជនល្មើស និងអ្នកពាក់ព័ន្ធផងដែរ។

«សំឡេង លោក គឹម រិទ្ធី អភិបាលខេត្តព្រះវិហារ»

សូមជម្រាបថានាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពល​ខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិ ដើម្បីទប់ស្កាត់ ​និងបង្ក្រាបបទល្មើសធនធានធម្មជាតិ បានដាក់ចេញវិធានការបន្ថែមលើបញ្ហា​បទល្មើសព្រៃឈើ ដោយបាន​បញ្ជាយ៉ាងដាច់ណាត់​ ដល់គ្រប់សមត្ថកិច្ច និងអាជ្ញាធរគ្រប់លំដាប់ថ្នាក់ត្រូវសហការអន្តរាគមន៍​ បង្ក្រាបឲ្យបានទាន់ពេលវេលា។

នាយឧត្តមសេនីយ៍ សៅ សុខា បញ្ជាក់ថា «ស្រាវជ្រាវប្រមូលព័ត៌មានពាក់ព័ន្ធនឹងបទល្មើសព្រៃឈើ ក្នុងនោះពាក់ព័ន្ធនឹងជនល្មើស​ និងអ្នកពាក់ព័ន្ធ រួមទាំងមន្រ្តី​ឃុបឃិត​ ជាមួយជនល្មើសទាំង​មន្រ្តីជំនាញ ​និងមូលដ្ឋាន»។នាយឧត្តមសេនីយ៍ សៅ សុខា សង្កត់ធ្ងន់ថា «តាមដានគ្រប់សកម្មភាព​មធ្យោបាយ សកម្មភាព​ស្របច្បាប់របស់ ក្រុមហ៊ុន ដែលមានច្បាប់អនុញ្ញាត​ពីរាជរដ្ឋាភិបាល ជាពិសេសព័ត៌មាន​ អំពី​និយាមកាដែល​រាជរដ្ឋាភិបាល ផ្តល់សម្បទានសេដ្ឋកិច្ច ដល់ក្រុមហ៊ុន ដោយសហការជាមួយ​ក្រសួងកសិកម្ម រុក្ខាប្រមាញ់ និងនេសាទ»។

នាយឧត្តមសេនីយ៍ សៅ សុខា ក៏ណែនាំដល់​អាជ្ញាធរមានសមត្ថកិច្ចត្រូវ​ប្រតិបត្តិការ​ ជាមួយអាជ្ញាធរខេត្ត ​ដោយសហការបញ្ជាកម្លាំងស្រុក ចេញ​ទៅតំបន់ព្រៃអភិរក្ស ហើយ​ត្រៀមកម្លាំងអន្តរាគមន៍ សម្រាប់ ចេញប្រតិបត្តិការរាល់ពេលទទួលបានព័ត៌មានទាំងក្នុង​ខេត្តព្រះវិហារ ក្រចេះ និងកំពង់ធំ។

នាយឧត្តមសេនីយ៍ សៅ សុខា បន្ថែមថា ចំពោះការអនុវត្តច្បាប់ដោយមន្រ្តីនគរបាលយុត្តិធម៌ ដីព្រៃអភិរក្សត្រូវអនុវត្តដោយមន្រ្តីបរិស្ថាន​ ដីអភិវឌ្ឍន៍​ និងព្រៃអភិវឌ្ឍន៍​អនុវត្តដោយមន្រ្តីបរិស្ថាន ប៉ុន្តែត្រូវសហការជាមួយមន្រ្តីក្រសួងពាក់ព័ន្ធ ​ដើម្បីកសាងសំណុំរឿងអនុវត្តទៅតាមផ្លូវច្បាប់៕SRP

ខេត្តសៀមរាប៖សមត្ថកិច្ចខេត្តសៀមរាប បានប្រាប់ សៀមរាប ប៉ុស្ដិ៍ ថានៅវេលាម៉ោង​ ១៤និង៤៤នាទី​ ថ្ងៃទី២៦​ ខែមេសា​ ឆ្នាំ​២០២៣ នៅចំណុចបន្ទប់ជួល​ បន្ទប់លេខ199​ ស្ថិត​នៅភូមិ​ទក្សិណខាងត្បូង​ សង្កាត់​គោកចក​ ក្ក្រុសៀមរាប​ មានជនជាតិបរទេសម្នាក់បានស្លាប់។

ជនរងគ្រោះ​ឈ្មោះ​ MILLER MICHAELSTEVEN ភេទ​ប្រុស​  អាយុ​៦៨ឆ្នាំ​ មុខរបរ​គ្មាន​ កំពស់១,៨៥មែត្រ​ ជនជាតិ​អាមេរិក​កាំង​ កាន់លិខិតឆ្លងដែនលេខA02555374។

តាមការបញ្ជាក់ពីលោកគ្រូពេទ្យកោសល្យវិច័យសន្និដ្ឋានថា ជនរងគ្រោះបានស្លាប់​ដោយសារ​ រលាកសួតធ្ងន់ធ្ងរ។ ករណីនេះសាកសព ត្រូវបានគេយកទៅរក្សាទុកនៅវត្តស្ទឹងមានជ័យ​ រាជធានីភំ្នពេញ​ ដេីម្បីគ្រប់គ្រងនិងបន្តនីតិវិធី៕SRP

ខេត្តឧត្តរមានជ័យ៖រថយន្តដឹកអាចម៍ដីរបស់មន្ទីរសាធារណការដឹកជញ្ជូនខេត្តឧត្តរមានជ័យ បានជួបគ្រោះថ្នាក់ចរាចរណ៍ ជាមួយម៉ូតូ បណ្តាលអោយស្លាប់ម្នាក់និងរបួសធ្ងន់ម្នាក់។

ករណីគ្រោះថ្នាក់ចរាចរណ៍កើតឡើងរវាងម៉ូតូនិងឡានដឹកដីម៉ាកហីយ៉ាន់ដាយ ផ្លាកលេខ 3. A 66 76 ឧត្តរមានជ័យ ចំណុចមង្គូលគីឡូលេខ15 16 និងម៉ូតូម៉ាកវ៉េវ អាវហ្វា នៅថ្ងៃទី27 ខែមេសា ឆ្នាំ2023។

តាមប្រភពបានឲ្យដឹងថាករណីនេះរថយន្តដឹកដីនិងម៉ូតូធ្វើដំណើរស្របទើសគ្នាពីលិចទៅកើត ដោយឡានដឹកដី បត់ទទឹងផ្លូវ ធ្វើឲ្យម៉ូតូមកចាប់ប្រាំងមិនទាន់ក៏បុកពេញទំហឹងបណ្តាល់ឲ្យបុរសអាយុវ័យចំណាស់ម្នាក់ឈ្មោះ ញៀន ជឿនអាយុ 61 ឆ្នាំរស់នៅភូមិគោកភ្លុកបានស្លាប់ បាត់បង់ជីវិតនៅកន្លែងកើតហេតុនិងឈ្មោះម៉ៅ វាសនាភេទប្រុសអាយុ 32 ឆ្នាំរស់នៅភូមិគោកភ្លុកសង្កាត់កូនក្រៀល របួសភ្លៅខាងឆ្វេងធ្ងន់ធ្ងរ។

បច្ចុប្បន្នសពជនរងគ្រោះ ត្រូវបានសាច់ញាតិយកទៅធ្វើបុណ្យតាមប្រពៃណី។ ឯជនរងគ្រោះត្រូវបានសង្រ្គោះនៅមន្ទីពេទ្យ។ ចំណែកតៃកុងរថយន្តបង្កត្រូវបានគេចខ្លួនបាត់។ បើតាមប្រភពបានបញ្ជាក់ថារថយន្តខាងលើជារបស់មន្ទីរសាធារណការដឹកជញ្ជូនខេត្តឧត្តរមានជ័យ ដោយកាយដីព្រៃឈើក្នុងដែនព្រៃសង្ឃរុក្ខវ័ន្ត៕SRP

ខេត្តសៀមរាប៖អ្នកវិនិយោគចំណតរថយន្តខេត្តសៀមរាប បានអះអាងថា ខ្លួនមិនបានយកលុយពីឡានដឹកភ្ញៀវទេសចរណ៍ចូលមកខេត្តសៀមរាប នោះទេ។

អះអាងប្រាប់សៀមរាប ប៉ុស្តិ៍ នៅរសៀលថ្ងៃពុធនេះ អ្នកវិនិយោគចំណតរថយន្តប្រចាំខេត្តសៀមរាប បានបញ្ជាក់ថា កន្លងមកក៏ដូចបច្ចុប្បន្ន ការវិនិយោគចំណណតរថយន្តលើការទាភាស៊ី មិនបានយកលុយពីឡានដែលដឹកភ្ញៀវចូលមកសៀមរាប មិនដូចការលើកឡើងរបស់អ្នកមួយចំនួននោះទេ។

ការអះអាងយ៉ាងដូច្នេះ បន្ទាប់ពីមាន ពាក្យអាចាមអារាម មួយចំនួនបានបង្ហោះថា ឡានដឹកភ្ញៀវទេសចរណ៍ចូលសៀមរាប ក៏ត្រូវបង់លុយដែរឲ្យថ្លៃបេនដែរ។

បើតាមអ្នកវិនិយោគ ការយកភាស៊ី គឺយកតែអ្នកដែលដឹកអ្នកដំណើរចេញពីខេត្តសៀមរាបតែប៉ុណ្ណោះ ចំពោះដឹកអ្នកដំណើរចូលមិន តម្រូវយកថ្លៃភាស៊ីនោះទេ។ ការយកថ្លៃភាស៊ី ចំពោះអ្នកដឹកអ្នកដំណើរចេញ ទី១ រថយន្តតាក់ស៊ី .ទី២ រថយន្តក្រុមហ៊ុនដឹកអ្នកដំណើរ. ទី៣ រថយន្កដឹកទំនិញ ទំលាក់ទំនិញ។

ដោយឡែកចំពោះរថយន្តដឹកទំនិញឆ្លងកាត់ខេត្ត ប្រសិនរថយន្តនោះមានលិខិតបញ្ជាក់ទីតាំងច្បាស់លាស់ក៏មិនមានការយកលុយថ្លៃភាស៊ីដែរ។ ជាមួយគ្នានេះដែរ រាល់ការយកថ្លៃភាស៊ី គឺយកតាមសៀវភៅបន្ទុក មិនមានការយកលើសនោះឡើយ៕SRP

ខេត្តសៀមរាប៖អធិការនគរបាលស្រុកស្វាយលើ លោក វរសេនីយ៍ឯក ស៊ុន អេង បានទទួលមរណភាព។

របាយការណ៍របស់ប៉ូលិសខេត្តសៀមរាប សៀមរាប ប៉ុស្តិ៍ ទទួលបាននៅរសៀលថ្ងៃពុធនេះ បានបង្ហាញថា ករណីនេះកើតឡើងនៅវេលាម៉ោង ១៩ៈ៤០នាទី ទី​ ២៥ ខែ​ មេសា ឆ្នាំ​២០២២៣ នៅចំណុច​: អធិការដ្ឋាននគរបាលស្រុកស្វាយលើ ស្ថិតនៅភូមិជប់ក្រោម ឃុំស្វាយលើស្រុកស្វាយលើ ខេត្ត សៀមរាប។

សាកសពឈ្មោះ  ស៊ុន អេង ភេទប្រុស អាយុ ៥៧ ឆ្នាំ មុខរបរ នគរបាលជាតិ(អធិការស្រុកស្វាយលើ)មានទីលំនៅបច្ចុប្បន្នទីតាំងកើតហេតុខាងលើ។

១-យោងតាមការបំភ្លឺពីឈ្មោះ លី យ៉ុងឈី  ភេទប្រុស អាយុ ២៩ ឆ្នាំ មុខរបរ នគរបាល មានទីលំនៅបច្ចុប្បន្នភូមិជប់ក្រោមឃុំស្វាយលើ ស្រុកស្វាយលើ ខេត្តសៀមរាប ត្រូវជាកូនបង្កើតរបស់សពបានឲ្យដឹងថា សព្វថ្ងៃរូបខ្ញុំមានការងារជានគរបាលជាតិបម្រើការងារនៅអង្កភាព អធិការដ្ឋាននគរបាលស្រុក ស្វាយលើ នៃស្នងការដ្ឋាននគរបាល ខេត្តសៀមរាប  ចំពោះការងារប្រចាំថ្ងៃរបស់ឪពុកខ្ញុំ គឺគាត់តែងតែប្រចាំការនៅ នៅក្នុងអង្កភាព ដោយគាត់មានបន្ទប់សម្រាប់ស្នាក់នៅផ្ទាល់ខ្លួននៅខាងក្រោយអធិការដ្ឋានស្រុកស្វាយលើ ដោយសង់ពីឈើ ប្រក់ស័ង្កសី គាត់តែងតែសម្រាកនៅទីនោះជារៀងរាល់ថ្ងៃ។

ចំពោះសកម្មភាពការងារនៅ ក្នុងអង្កភាព គឺរូបគាត់មិនដែលមានទំនាស់ជាមួយអ្នកណានោះទេ ដោយកូនចៅក្រោមឱវាទតែងតែគោរព ស្រលាញ់គាត់។

ចំពោះអាហារហូបចុករបស់គាត់ ប្រចាំថ្ងៃ គឺកូនចៅរបស់គាត់ ឈ្មោះ សុខ ខៃ ភេទប្រុស ជាអ្នកចំអិនឲ្យគាត់ពិសារ ជួនកាលគាត់ក៏ទៅទិញម្ហូបស្រាប់យកមកពិសារផងដែល បើតាមរូបខ្ញុំសង្កេតរយៈពេលប្រហែល១០ឆ្នាំ រហូតបមដល់បច្ចុប្បន្ន ឪពុករបស់ខ្ញុំគាត់មានជម្ងឺ ប្រចាំកាយ  មានដូចជា ទឹកនោម និងលើសឈាម កម្រិតធ្ងន់ធ្ងូរ ចំពោះសេវាព្យាបាលជម្ងឺរបស់គាត់ គាត់មិនដែលបានទទួលការព្យាបាលនៅមន្ទីរពេទ្យណាមួយនោះទេ គឺគាត់បានត្រឹមតែទិញថ្នាំ នៅតាម ឱសថស្ថាន យកមកប្រើប្រាស់ជាប្រចាំ ដោយជម្ងឺរបស់គាត់មួយរយៈចុងក្រោយ គឺគាត់ឈានដល់ការ ប្រើថ្នាំចាក់ នៅមុនថ្ងៃកើតហេតុចំនួន២ថ្ងៃ ឪពុករបស់ខ្ញុំបានស្រវឹងស្រាចំនួន២ថ្ងៃជាប់គ្នា នៅថ្ងៃទី២៥ ខែ មេសា ឆ្នាំ២០២៣ វេលាម៉ោង ១៣:៥៦នាទី គាត់បានខលទូរស័ព្ទមករូបខ្ញុំ ដោយឲ្យរូបខ្ញុំយករថយន្តជិះ ទៅមើលម្តាយកំពុងឈឺ នៅស្រុកជីក្រែង រូបខ្ញុំបានមកយករថយន្តជិះចេញទៅស្រុកជីក្រែង រហូតដល់វេលាម៉ោង១៧:៣០នាទី ពេលដែលរូបខ្ញុំបានត្រឡប់ពីស្រុកជីក្រែង ម្តាយរបស់ខ្ញុំបានខល ទូរស័ព្ទមកគាត់ច្រើនដងតែពុំមានអ្នកលើកទទួលនោះទេ ដោយមានសង្ស័យម្តាយរបស់ខ្ញុំបានឲ្យរូបខ្ញុំមកមើលគាត់នៅកន្លែងស្នាក់នៅ របស់គាត់ លុះដល់វេលាម៉ោងប្រហែល១៩:៤០នាទី  ខ្ញុំបានចូលទៅមើលឪពុ របស់ខ្ញុំក៏ស្រាប់តែឃើញ  គាត់ដេកស្តូកស្តឹងនៅលើគ្រែ ដោយជើងឆ្វេងសំយ៉ុងចុះក្រោម ជើងស្តាំ បតនៅលើគ្រែ ខ្លួនដេកបែរក្បាលទៅទិសខាងជើង ឈាងខាងកើត ដៃស្តាំបោះទៅលើ ដៃឆ្វេងស្រប និងដងខ្លួន ភ្លាមនោះរូបខ្ញុំបានស្រែកហៅគាត់ និងអង្រួនខ្លួនគាត់ ទើបបានដឹងថាឪពុករបស់ខ្ញុំ បានផុត ដង្ហើមទៅហើយ។

យោងតាមការបំភ្លឺពីឈ្មោះ សុខ ខៃ ភេទប្រុស អាយុ ៥០ ឆ្នាំ មុខរបរ នគរបាលនៃអធិការដ្ឋានស្រុកស្វាយលើ បានឲ្យដឹងថា  ខ្ញុំត្រូវបានលោករវរសេនីយ៍ឯក ស៊ុន អេង ប្រើការងារឯកជនដូចជា ទិញអាហារ, បារី និងថ្នាំពេទ្យជាដើម ហើយខ្ញុំបានដឹងថាគាត់មានជម្ងឺប្រចាំកាយដូចជា លើសឈាម រោគថ្លើម និងទឹកនោមផ្អែម ហើយថ្នាំដែលបានទិញមកប្រើប្រាស់ចុងក្រោយគឺទិញកន្លែងអ្នកគ្រូពេទ្យខុន មានទីតាំងនៅភូមិត្រពាំងខ្នារ ឃុំស្វាយលើ ស្រុកស្វាយលើ។

ជាក់ស្តែងនៅវេលម៉ោង១៤:០០ នាទី ថ្ងៃទី២៥ ខែមេសា ឆ្នាំ២០២៣ ខ្ញុំបានយកថ្នាំទៅជូនគាត់ កំពុងដេកនៅអន្រឹង និងឃើញមានកំអួតជាច្រើននៅក្បែរកន្លែងក្បែរនោះហើយខ្ញុំបានឲ្យថ្នាំ និងយកទឹកឲ្យគាត់និងលុបកំអួតរបស់គាត់ រួចហើយមកធ្វើការងារបន្ត។

លុះដល់ម៉ោងប្រហែល១៦:៤០នាទី ខ្ញុំបានយកបបរទៅកាន់កន្លែងគាត់ស្នាក់នៅនិងបានស្រែកហៅថា មេៗ ប៉ុន្តែមិនឮសម្លេងឆ្លើយតបខ្ញុំក៏មិនហ៊ានបើកទ្វាព្រោះគិតថាដេកលក់ រហូតដល់វេលាម៉ោង១៨:០០នាទី ឮសម្លេងលោកអធិការរង នឿម វ៉ាន់ណៃ បានស្រែកប្រាប់ថាជួយមើលលោកអធិការផង ពេលនោះរូបគាត់ និងឈ្មោះ លី យ៉ុងឈី (កូនបង្កើតសព) និងឈ្មោះ ភឿន ម៉ាប់ (នាយផ្នែកសេនា ) បានចូលទៅក្នុងបន្ទប់ដេក ទើបដឹងថាគាត់ស្លាប់បាត់ហើយ។
III.ការ​ពិនិត្យ​សាកសព​:
-ផ្នែក​ក្បាល​, ក
ដងខ្លួន​,អវយវះ គ្រប់​ផ្នែក​ទាំង​អស់​ គ្មាន​ស្លាក​ស្នាម​អ្វី​ គួរឲ្យកត់សម្គាល់ទេ។
IV.ការសន្និដ្ឋាន:
យោងតាមការបំភ្លឺពីសាក្សី ការពិនិត្យសាកសព  ពិនិត្យកន្លែងកើតហេតុ និងតាមការបញ្ជាក់ពីលោកពេទ្យកោសល្យវិច័យយើងសន្និដ្ឋានថា :
-ស្លាប់ដោយសារ ស្ទះសសៃឈាមខួរក្បាល(បណ្ដាលមកពីរាគធ្ងន់ធ្ងរបាត់បង់ជាតិទឹក)សាកសពបានប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី៕SRP