ខេត្តកំពង់ឆ្នាំង៖សមាគមបញ្ញវន្តកម្ពុជាដើម្បីអភិវឌ្ឍន៍ “CIDA” និង សមាគមសិស្ស-និស្សិតអាហារូបករណ៍ សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត (អ.ម.ត) ខេត្តកំពង់ឆ្នាំង ដែលមានលោកជំទាវ សេង វួចហ៊ុន ជាប្រធាន នៅថ្ងៃអង្គារ ទី១៣ ខែមិថុនា ឆ្នាំ២០២៣ បានសហការជាមួយរដ្ឋបាលខេត្តកំពង់ឆ្នាំង រៀបចំសិក្ខាសាលាលើប្រធានបទស្ដីពី “ការជម្រុញសក្តានុពលវិនិយោគផ្នែកកសិកម្ម និងកិច្ចគាំពារផ្នែកច្បាប់”។

សិក្ខាសាលានេះ ធ្វើឡើងបនៅសាលប្រជុំសាលាខេត្តកំពង់ឆ្នាំងក្រោមអធិបតីភាពនៃ លោក ជីវ សុងហាក់ រដ្ឋលេខាធិការ នៃក្រសួងយុត្ដិធម៌, លោក វ៉ា រុតសាន រដ្ឋលេខាធិការក្រសួងពាណិជ្ជកម្ម និងជាទីប្រឹក្សានៃសមាគមបញ្ញាវន្តកម្ពុជាដើម្បីអភិវឌ្ឍន៍, លោកជំទាវ សេង វួចហ៊ុន ប្រធានក្រុមការងារគ្រប់គ្រងនិស្សិត អ.ម.ត ខេត្ដកំពង់ឆ្នាំង និង ជាប្រធានសមាគមបញ្ញាវន្តកម្ពុជាដើម្បីអភិវឌ្ឍន៍ (CIDA) និងលោក យ៉ង ភិរម្យ ជាអភិបាលរងខេត្ដកំពង់ឆ្នាំង។

វាគ្មិនធ្វើបទបង្ហាញក្នុងសិក្ខាសាលានេះមាន ចំនួន ០៣រូប គឺ លោក វ៉ា រុតសាន រដ្ឋលេខាធិការ នៃក្រសួងពាណិជ្ជកម្ម លោក ងិន ហ៊ុន ប្រធានមន្ទីរកសិកម្ម រុក្ខប្រមាញ់ និងនេសាទ ខេត្ដកំពង់ឆ្នាំង និងជាសមាជិកក្រុមការងារគ្រប់គ្រងនិស្សិត អ.ម.ត ខេត្ដកំពង់ឆ្នាំង ព្រមទាំង លោក ម៉ុង មុន្នីសោភា ចៅក្រម នៃសាលាឧទ្ធរណ៍បាត់ដំបង និងជាសមាជិកក្រុមការងារគ្រប់គ្រងនិស្សិត អ.ម.ត ខេត្ដកំពង់ឆ្នាំង។

សិក្ខាសាលាកាមចំនួន ៤០០នាក់ ដែលមានសមាសភាពមកពី ក្រុមប្រឹក្សាខេត្ត គណៈអភិបាលខេត្ត នាយក នាយករងរដ្ឋបាលសាលាខេត្ត នាយកទីចាត់ការ ប្រធានអង្គភាពសាលាខេត្ត ប្រធានមន្ទីរ-អង្គភាពជុំវិញខេត្ត គណអភិបាលក្រុងស្រុក មេឃុំ ចៅសង្កាត់ ស្មៀនឃុំសង្កាត់ សមាគមកសិកម្ម សមាគមម៉ាសុីនកិនស្រូវ ដែលនៅចំណុះឲ្យមន្ទីរកសិកម្ម រុក្ខាប្រមាញ់ និង នេសាទ, សមាគមទេសចរដែលនៅចំណុះឲ្យមន្ទីរទេសចរណ៍ ព្រមទាំង សិស្សនិស្សិតមកពីវិទ្យាល័យ និង មហាវិទ្យាល័យសំខាន់នានារបស់ខេត្តដែលរៀបចំដោយមន្ទីរអប់រំយុវជននិងកីឡា។

សិក្ខាសាលានេះ ត្រូវបានរៀបចំឡើងដើម្បីផ្សព្វផ្សាយ និង បញ្ជ្រាបនូវចំណេះដឹងពាក់ព័ន្ធ ដល់អ្នកចូលរួម និង សាធារណជន ក្នុងគោលបំណង ជម្រុញដល់ការអភិវឌ្ឍ និងការវិនិយោគលើវិស័យកសិកម្ម ដែលជាវិស័យអាទិភាព សម្រាប់ខេត្តកំពង់ឆ្នាំង ស្របតាមល្បឿន និង គោលនយោបាយអភិវឌ្ឍ របស់រាជរដ្ឋាភិបាល ដែលមានសម្តេចហ៊ុន សែន ជាប្រមុខដឹកនាំដ៏ឈ្លាសវៃ៕ដោយនាគខៀវ

លោក សុខ លូ អភិបាលខេត្តបាត់ដំបង បានមានប្រសាសន៍លើកឡើងថា ខេត្តបាត់ដំបងជាខេត្តដែលមានសក្ដានុពល ខាងផ្នែកកសិកម្ម ទន្ទឹមនឹងនោះដែរ ខេត្តក៏កំពុងមានតម្រូវការជាច្រើន ខាងផ្នែកនេះ ដោយទាមទារឱ្យអ្នកវិនិយោគក្នុងស្រុក និងក្រៅស្រុក ចាប់អារម្មណ៍វិនិយោគផ្នែកកសិឧស្សាហកម្ម ដូចជាការកែច្នៃផ្លែឈើ ការយកផលិតផលកសិកម្មយកទៅកែច្នៃ ដើម្បីធ្វើការលក់ និងនាំចេញទៅក្រៅប្រទេស ព្រោះសព្វថ្ងៃនេះផលិតផលកសិកម្ម ជាច្រើន នៅមិនទាន់បានយកមកកែច្នៃអស់លទ្ធភាពនៅឡើយទេ ធ្វើឱ្យផលិតផលទាំងនោះលើសតម្រូវការទីផ្សារ បណ្ដាលឱ្យមានការធ្លាក់ថ្លៃផងដែរ។ មិនត្រឹមតែវិស័យកសិកម្មប៉ុណ្ណោះទេ ក្នុងនោះវិស័យទេសចរណ៍ក៏សំខាន់ផងដែរ។

លោកបានបន្តថា វិស័យទេសចរណ៍ក៏ជាវិស័យអតិភាពមួយ ក្នុងចំណោមវិស័យផ្សេងនៅខេត្តបាត់ដំបង ក៏ប៉ុន្តែសម្រាប់វិស័យសណ្ឋាគារ ឬផ្ទះសំណាក់ជាដើម ហាក់បីដូចជានៅមិនទាន់មានច្រើននៅឡើយ ដោយយើងត្រូវការអ្នកវិនិយោគជាច្រើន បោះទុនវិនិយោគវិស័យសណ្ឋាគារ ផ្ទះសំណាក់ Resortបន្ថែមទៀត ដើម្បីត្រៀមរង់ចាំទទួលទេសចរដែលនឹងមកទស្សនាកំសាន្ដខេត្តបាត់ដំបង នាពេលខាងមុខផងដែរ។

លោក សុខ លូ លើកឡើងបែបនេះក្នុងកិច្ចប្រជុំជាមួយគណៈប្រតិភូវៀតណាម ដែលជាសហគ្រាសឯកជន ដើម្បីស្វែងយល់ពីសក្ដានុពលនៅក្នុងខេត្តបាត់ដំបង នៅរសៀលថ្ងៃអង្គារម្សិលមិញ។

លោក Nguyen Thanh Van អគ្គកុងស៊ុលនៃស្ថានអគ្គកុងស៊ុលសាធារណរដ្ឋសង្គមនិយមវៀតណាមប្រចាំខេត្តបាត់ដំបង បានមានប្រសាសន៍លើកឡើងថា គោលបំណងចម្បងរបស់ប្រតិភូវៀតណាម ដែលជាម្ចាស់សហគ្រាសឯកជនលើកនេះ គឺមានគោលបំណងដើម្បីចង់ធ្វើការស្វែងយល់បន្ថែមទៀត អំពីសក្ដានុពលនៅក្នុងខេត្តបាត់ដំបង ពិសេសគឺវិស័យកសិកម្ម ដែលជាវិស័យចម្បង និងមានអតិភាពជាងគេនៅក្នុងខេត្តបាត់ដំបង ក៏ដូចជាមានភាពលេចធ្លោជាងគេជាងវិស័យដទៃទៀត មិនត្រឹមតែប៉ុណ្ណោះក៏ដើម្បីធ្វើការស្វែងយល់បន្ថែមទៀតអំពីវិស័យទេសចរណ៍នៅក្នុងខេត្ត ដើម្បីបានជាធាតុចូលនៃចំណេះដឹងបន្ថែមទៀតដល់អ្នកវិនិយោគផ្នែកវិស័យទេសចរណ៍ឱ្យកាន់តែជ្រាបច្បាស់ និងមានចំណាប់អារម្មណ៍វិនិយោគមកខេត្តបាត់ដំបងផងដែរ។

លោកបានបន្តថា នេះគឺជាកិច្ចជំនួបពិភាក្សាដំបូង ដើម្បីប្រមូលបានជាធាតុចូលសំខាន់ៗ ហើយសង្ឃឹមថានៅថ្ងៃខាងមុខដ៏ខ្លីនេះ នឹងមានកិច្ចជំនួបពិភាក្សាម្ដងទៀតរវាងអាជីវករ និងអាជីវករ ម្ចាស់សហគ្រាស អ្នកវិនិយោគពីប្រទេសកម្ពុជា និងប្រទេសវៀតណាមបន្ថែមទៀត៕ដោយនាគខៀវ

លោកសុខ លូ អភិបាលខេត្តបាត់ដំបង បានលើកឡើងថា សម្រាប់ខេត្តបាត់ដំបង ត្រូវបានរាជរដ្ឋាភិបាលកម្ពុជា បានចាត់ទុកថាជាប៉ូលសេដ្ឋកិច្ចទី៤ សម្រាប់ប្រទេសកម្ពុជា។ ដូច្នេះហើយក្នុងនាមរដ្ឋបាលខេត្តបាត់ដំបង ត្រូវតែមានភាពច្បាស់លាស់ ទៅលើសក្ដានុពល ក្នុងខេត្តអ្វីខ្លះដែលយើងកំពុងមាន ឬ តម្រូវការអ្វីខ្លះដែលយើងកំពុងខ្វះខាត និងកំពុងមានតម្រូវការសម្រាប់ថ្ងៃមុខ យើងត្រូវប្រាកដថាតើខេត្តបាត់ដំបង មានចំណុចអ្វីដែលពិសេសសម្រាប់ទាក់ទាញអ្នកវិនិយោគឱ្យមកវិនិយោគនៅក្នុងខេត្តបាត់ដំបង។

លោកសុខ លូ បានបន្តទៀតថា កត្តាទាំងអស់នោះហើយ យើងត្រូវចាប់ឱ្យបានច្បាស់លាស់ នូវទិន្នន័យសំខាន់ៗឧទាហរណ៍ថា សម្រាប់វិស័យទេសចរណ៍ មានចំនួនសណ្ឋាគារ ភោជនីយដ្ឋាន ឬអាហារដ្ឋានជាដើម មានចំនួនប៉ុន្មាននៅក្នុងខេត្ត ផលិតផលកសិកម្មអ្វីខ្លះ ដែលកំពុងមានសក្ដានុពល នៅក្នុងខេត្ត ឬក៏នៅក្នុងវិស័យឧស្សាហកម្ម មានរោងចក្រ សិប្បកម្ម សហគ្រាសប៉ុន្មាន ដែលកំពុងដំណើរការនៅក្នុងខេត្តបាត់ដំបង ។ល។ គឺត្រូវធ្វើយ៉ាងណាឱ្យមានទិន្នន័យច្បាស់លាស់។

លោកសុខ លូ បានបន្តទៀតថា ក្នុងនាមរដ្ឋបាលខេត្តបាត់ដំបង យើងត្រូវក្ដាប់ឱ្យបានអំពីសេដ្ឋកិច្ចក្នុងខេត្តបាត់ដំបង ថាចំណូលប្រចាំឆ្នាំចំនួនប៉ុន្មាន ក្នុងនោះត្រូវក្ដាប់ឱ្យបាននូវចំណូលរបស់កម្មករ កម្មការិនីចំនួនប៉ុន្មានជាមធ្យមប្រចាំឆ្នាំ ឬចំណូលរបស់ប្រជាពលរដ្ឋ ក្នុងខេត្តចំនួនប៉ុន្មាន មិនត្រឹមតែប៉ុណ្ណោះទេ ក៏ត្រូវក្ដាប់ឱ្យបាននូវ ហេដ្ឋារចនាសម្ព័ន្ធ ក្នុងខេត្តបាត់ដំបង មានអ្វីខ្លះដូចជា ប្រព័ន្ធធារាសាស្រ្ដ ផ្លូវថ្នល់ក្នុងខេត្ត ក៏ដូចជាវិស័យផ្សេងៗជាច្រើនទៀតនៅក្នុងខេត្តផងដែរ។

លោក សុខ លូ លើកឡើងយ៉ាងដូច្នេះក្នុងឱកាសដឹកនាំកិច្ចប្រជុំ ស្ដីពីការធ្វើបច្ចុប្បន្នភាព សក្ដានុពល និងឱកាសវិនិយោគក្នុងខេត្តបាត់ដំបង នៅថ្ងៃអង្គារម្សិលមិញ។

គួរបញ្ជាក់ផងដែរថា ខេត្តបាត់ដំបង ជាខេត្តដែលស្ថិតនៅភាគពាយ័ព្យ នៃប្រទេសកម្ពុជា ដែលមានប្រជាពលរដ្ឋ សរុប ១,៣៦៤,៨៧៣នាក់ ក្នុងនោះខេត្តបាត់ដំបង ជាខេត្តដែលមានព្រំប្រទល់ជាប់នឹងប្រទេសថៃ ដែលមានច្រកទ្វារអន្តរជាតិចំនួន២ គឺច្រកទ្វារអន្តរជាតិដូង ស្ថិតក្នុងស្រុកកំរៀង និងច្រកទ្វារអន្តរជាតិគីឡូ១៣ (ភ្នំដី) ស្ថិតក្នុងស្រុកសំពៅលូន ព្រមទាំងច្រកទ្វារតំបន់ព្រំដែនចំនួន៣ ដែលបង្កភាពងាយស្រួល ក្នុងការដឹកជញ្ជូនដំណាំកសិផល និងផលិតផលនានា ទៅប្រទេសថៃផងដែរ។ មិនត្រឹមតែមានហេដ្ឋារចនាសម្ព័ន្ធ ផ្លូវថ្នល់សំខាន់ៗ ខ្វាត់ខ្វែងទេ ខេត្តបាត់ដំបង ក៏ជាខេត្តដែលមានសក្ដានុពលសំខាន់ៗជាច្រើនផ្នែក សម្រាប់ទាក់ទាញអ្នកវិនិយោគ ឱ្យមកវិនិយោគនៅក្នុងខេត្តបាត់ដំបង និងធ្វើឱ្យកំណើនជីវភាពប្រជាពលរដ្ឋ ក៏កាន់តែកើនឡើង និងកាន់តែរីកចម្រើនទៅមុខផងដែរ៕ដោយនាគខៀវ

ខេត្តកំពង់ចាម​៖លោកបណ្ឌិត ហ៊ុន ម៉ាណែត តំណាងសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត​ បានថ្លែងថា​ “សម័យតេជោសន្តិភាព” ដែលបានចាប់កកើតឡើងពីចុងឆ្នាំ១៩៩៨ ក្រោមនយោបាយឈ្នះ-ឈ្នះ បានធ្វើឱ្យកម្ពុជា មានសន្តិភាពពេញលេញ ឯកភាពទឹកដី និងឯកភាពជាតិក្រោមដំបូលរដ្ឋធម្មនុញ្ញ តែមួយ ព្រមទាំងរាជរដ្ឋាភិបាលតែមួយ បន្ទាប់ពីជម្លោះបែកបាក់ អស់រយៈកាលជាង ៥០០ ឆ្នាំ នៅក្នុងដានប្រវត្តិសាស្ត្ររបស់កម្ពុជា។ ទាំងនេះ គឺជាអ្វីដែល សម្តេចតេជោ និងថ្នាក់ដឹកនាំ គណបក្សប្រជាជនកម្ពុជា ខិតខំសម្រេចបានប្រកបដោយវីរភាពលះបង់ ដើម្បីបុព្វហេតុជាតិ និងប្រជាជនកម្ពុជាទាំង ១៧លាននាក់។​

លោកថ្លែង​បែប​នេះ​ក្នុងពិធីសម្ពោធឆ្លងអគារពុទ្ធិកបឋមសិក្សាកម្រង និងសមិទ្ធផលនានា​ ក្នុងវត្តកែវមុនី (ហៅវត្តថ្មី) ស្ថិតនៅភូមិអង្គរបានទី៨ ឃុំអង្គរបាន ស្រុកកងមាស ខេត្តកំពង់ចាម នៅរសៀលថ្ងៃអង្គារម្សិលមិញ។

លោកបណ្ឌិត​ ហ៊ុន​ ម៉ាណែត​ បានថ្លែងថា​ រាជរដ្ឋាភិបាលដែលដឹកនាំដោយ គណបក្សប្រជាជនកម្ពុជា និងមាន សម្តេចតេជោ ហ៊ុន សែន ជាប្រមុខ តែងបានផ្តល់ការគោរព និងបដិបត្តិតាមបាវចនាជាតិ គឺ ជាតិ សាសនា ព្រះមហាក្សត្រ៖
ទី១. ជាតិ គឺទឹកដី និងប្រជាជន ដែលក្នុងនេះ គណបក្សប្រជាជនកម្ពុជា បានការពារយ៉ាងប្តូរផ្តាច់នូវបូរណភាពទឹកដី និងបានជួយសង្គ្រោះជីវិតរបស់ប្រជាពលរដ្ឋ រួមទាំងការលើកកម្ពស់ជីវភាពរស់នៅផងដែរ, ទី២. សាសនា គឺការសង្គ្រោះវិស័យសាសនាឱ្យរស់ឡើងវិញនៅក្រោយរបបប៉ុលពត និងការលើកស្ទួយវិស័យសាសនាឱ្យមានការអភិវឌ្ឍរីកចម្រើនប្រកបដោយសុខដុមនីយកម្ម ដើម្បីសេចក្តីសុខផ្លូវចិត្តរបស់ប្រជាពលរដ្ឋ, ទី៣. គឺព្រះមហាក្សត្រ ដោយក្នុងនេះ ថ្នាក់ដឹកនាំគណបក្សបានចូលរួមតស៊ូក្នុងព្រៃម៉ាគី តាមការអំពាវនាវរបស់អង្គអតីតព្រះមហាក្សត្រ ជាពិសេសនៅក្រោយកិច្ចព្រមព្រៀងទីក្រុងប៉ារីសឆ្នាំ១៩៩១ គណបក្សប្រជាជនកម្ពុជាបានចូលរួមបង្កើតរបបរាជានិយមអាស្រ័យរដ្ឋធម្មនុញ្ញឡើងវិញ និងបន្តគោរពប្តូរផ្តាច់ការពារយ៉ាងម៉ឺងម៉ាត់រហូតមកដល់បច្ចុប្បន្ន និងតទៅអនាគត​៕ដោយនាគខៀវ

ម្ចាស់អចលនទ្រព្យ ដាំសុវណ្ណរីអង្គរ សមត្ថកិច្ចនគរបាលព្រហ្មទណ្ឌកម្រិតធ្ងន់ នៃស្នងការនគរបាលខេត្តសៀមរាបចាប់ខ្លួន។

ការចាប់ខ្លួនធ្វើឡើងនៅថ្ងៃអង្គារនេះ ដោយតាមដីកាបង្កាប់ចាប់ខ្លួនពិរទ្ធជន លេខ: ៤២ ចុះថ្ងៃទី២១ ខែមីនា ឆ្នាំ២០២៣។

ស្រ្តី រូបនជនឈ្មោះ ហែម វ៉ាន់រី អាយុ៣៨ឆ្នាំ ស្រុកកំណើតនៅ ខេត្តកំពង់ធំ និងនៅខ្នារ សង្កាត់ជ្រាវ ក្រុងសៀមរាប ត្រូវបានចោទប្រកាន់ពីបទ (ក្លែងបន្លំ) ប្រព្រឹត្តនៅភូមិខ្នារ ឃុំខ្នាសណ្ដាយ ស្រុកបន្ទាយស្រី ខេត្តសៀមរាប កាលអំឡុងខែកក្កដាឆ្នាំ ២០២១។

ប្រភពពីសមត្ថកិច្ចបានអោយដឹងថា បានសមត្ថកិច្ចកំពុងឃាត់ខ្លួននៅស្នងការនគរបាលខេត្តសៀមរាបនិងត្រូវបញ្ជូនទៅសាលាដំបូងខេត្តសៀមរាបនៅថ្ងៃស្អែកនេះ៕ដោយនាគខៀវ

ខេត្តសៀមរាប៖ស្ត្រីអ្នកជិះម៉ូតូម្នាក់ត្រូវបានរថយន្តបុកចំពេញទំហឹងបណ្ដាលឱ្យស្លាប់ភ្លាមៗនៅកន្លែងកើតហេតុ។

ហេតុការណ៍បានកើតឡើង នៅវេលាម៉ោង០៦:០០នាទី​ ថ្ងៃ​ទី​១៣​ ខែមិថុនា​ ឆ្នាំ​២០២៣​ នៅត្រង់ចំណុច ខាងជើងភ្នំក្រោម ស្ថិតនៅភូមិ ក្រសាំងលើង  សង្កាត់សៀមរាប ក្រុងសៀមរាប។

ប្រភពពីសមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ រវាងម៉ូតូម៉ាក HONDA DRKAM ពណ៌ខ្មៅ ពាក់ស្លាកលេខសៀមរាប 1AA 6562 បើកបរដោយឈ្មោះ ព្រែក សីហា ភេទស្រី អាយុ១៨ឆ្នាំ រស់នៅភូមិ សំរោងយា ឃុំ សំរោងយា ស្រុកពួក ខេត្តសៀមរាប (ទិសដៅពីរជើងទៅត្បូង) និង រថយន្តមិនស្គាល់អត្តសញ្ញាណ ក្រោយកើតហេតុបើកគេចខ្លួនបាត់។

សមត្ថកិច្ចបានបន្តថា ករណីនេះ ខូចខាត ម៉ូតូ១គ្រឿង និងស្លាប់ស្ត្រីម្នាក់។ មូលហេតុ រថយន្តបើកបរក្នុងល្បឿនលឿនខ្វះការប្រុងប្រយ័ត្ន។ វត្ថុតាង សមត្ថកិច្ចយកទៅរក្សាទុកនៅការិយាល័យនគរបាលចរាចរផ្លូវគោក នៃស្នងការដ្ឋាននគរបាលខេត្តសៀមរាប៕ដោយនាគខៀវ

ខេត្តសៀមរាប៖ស្ត្រីអ្នកជិះម៉ូតូម្នាក់ត្រូវបានរថយន្តបុកចំពេញទំហឹងបណ្ដាលឱ្យស្លាប់ភ្លាមៗនៅកន្លែងកើតហេតុ។

ហេតុការណ៍បានកើតឡើង នៅវេលាម៉ោង ៦:០០នាទី​ ថ្ងៃ​ទី​១៣​ ខែមិថុនា​ ឆ្នាំ​២០២៣​ នៅត្រង់ចំណុច ខាងជើងភ្នំក្រោម ស្ថិតនៅភូមិ ក្រសាំងលើង  សង្កាត់សៀមរាប ក្រុងសៀមរាប។

ប្រភពពីសមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ រវាងម៉ូតូម៉ាក HONDA DRKAM ពណ៌ខ្មៅ ពាក់ស្លាកលេខសៀមរាប 1AA 6562 បើកបរដោយឈ្មោះ ព្រែក សីហា ភេទស្រី អាយុ១៨ឆ្នាំ រស់នៅភូមិ សំរោងយា ឃុំ សំរោងយា ស្រុកពួក ខេត្តសៀមរាប (ទិសដៅពីរជើងទៅត្បូង) និង រថយន្តមិនស្គាល់អត្តសញ្ញាណ ក្រោយកើតហេតុបើកគេចខ្លួនបាត់។

សមត្ថកិច្ចបានបន្តថា ករណីនេះ ខូចខាត ម៉ូតូ១គ្រឿង និងស្លាប់ស្ត្រីម្នាក់។ មូលហេតុ រថយន្តបើកបរក្នុងល្បឿនលឿនខ្វះការប្រុងប្រយ័ត្ន។ វត្ថុតាង សមត្ថកិច្ចយកទៅរក្សាទុកនៅការិយាល័យនគរបាលចរាចរផ្លូវគោក នៃស្នងការដ្ឋាននគរបាលខេត្តសៀមរាប៕ដោយនាគខៀវ

ខេត្តសៀមរាប៖ទីតាំងស្តុកឈើមួយកន្លែងត្រូវបានសមត្ថកិច្ចចម្រុះខេត្តសៀមរាបចុះបង្ក្រាបថ្ងៃចន្ទនេះ។

ការបង្ក្រាបធ្វើឡើង ភូមិទទឹងថ្ងៃ ឃុំឫស្សីលក ស្រុកជីក្រែង ដោយកំលាំងមូលដ្ឋានកងរាជអាវុធហត្ថស្រុកជីក្រែងសហការជាមួយជំនាញរដ្ឋបាលព្រៃឈើជីក្រែង។

សមត្ថកិច្ចក្នុងហេតុការណ៍បង្ក្រាបបានអ្នកដឹងថា ការ
ចុះពិនិត្យទីតាំងរក្សាទុកនិងដឹកជញ្ជូនឈើខុសច្បាប់ នៅចំណុចខាងលើដោយគ្មានច្បាប់អនុញ្ញាតិ ដោម្ចាស់ទីតាំងឈ្មោះ ដន ឌី ភេទប្រុស អាយុ ៤០ឆ្នាំ។

ការបង្ក្រាបនេះ មន្ត្រីជំនាញដកហូតវត្ថុតាង ឈើប្រភេទ ក្ដា+គ្រឿង ( ត្រាច ) ចំនួន 185ដន្លឹក ស្មើ7.402ម៉ែតគូប។ វត្ថុតាងបានយកមករក្សាទុកនៅសង្កាត់រដ្ឋបាលព្រៃឈើជីក្រែង ដេីម្បីអនុវត្តន៍នីតិវិធី៕ដោយនាគខៀវ

គណ:កម្មាធិការអន្តរជាតិ ដើម្បីសម្របសម្រួលកិច្ចគាំពារ និងអភិវឌ្ឍរមណីយដ្ឋានប្រវត្តិសាស្ត្រអង្គរហៅកាត់ថា (អាយស៊ីស៊ី-អង្គរ)និងសំបូរព្រៃគុក បានបើកកិច្ចប្រជុំបច្ចេកទេសលើកទី៣៧ របស់ខ្លួននៅព្រឹកថ្ងៃទី១២ ខែមិថុនា ឆ្នាំ២០២៣ នៅខេត្តសៀមរាប។

កិច្ចប្រជុំបច្ចេកទេសនេះ ស្ថិតក្រោមអធិបតីភាព លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា ដោយមានបារាំង និងជប៉ុនជាសហប្រធាន។

សហប្រធាននៃកិច្ចប្រជុំពេលនេះ មានលោក TANINAI Ichitomo អនុប្រធានបេសកកម្មនៃស្ថានទូតជប៉ុនប្រចាំកម្ពុជា លោក Pierre VINCENT ទីប្រឹក្សាកិច្ចសហប្រតិបត្តិការវប្បធម៌ស្ថានទូតបារាំងប្រចាំកម្ពុជា និងមានការចូលរួមពី លោក Sardar Umar ALAM តំណាងអង្គការយូណេស្កូប្រចាំកម្ពុជា។

កិច្ចប្រជុំបច្ចេកទេសថ្ងៃទី១២ ខែមិថុនា ឆ្នាំ២០២៣នេះ គណ:កម្មាធិការអន្តរជាតិ ដើម្បីសម្របសម្រួលកិច្ចគាំពារ និងអភិវឌ្ឍរមណីយដ្ឋានប្រវត្តិសាស្ត្រអង្គរហៅកាត់ថា (អាយស៊ីស៊ី-អង្គរ) បានពិភាក្សា និងពិនិត្យតាមដានលើការអនុវត្តអនុសាសន៍ ដែលបានអនុម័តនៅក្នុងសម័យប្រជុំបច្ចេកទេសទី៣៦ និងកិច្ចប្រជុំពេញអង្គទី២៩ នៅខែធ្នូ ឆ្នាំ ២០២២ កន្លងមក ព្រមទាំង ពិនិត្យរបាយការណ៍សកម្មភាពក្រុមបច្ចេកទេស ការជួសជុល និងការអភិរក្ស។

ចំពោះរបាយការណ៍ដែលបានពិនិត្យក្នុងកិច្ចប្រជុំនេះបានឆ្លុះបញ្ចាំងចំពោះសកម្មភាពរបស់គណកម្មាធិការចំពោះកិច្ច(AdHoc)ដែលបានចុះតាមការដ្ឋាន ចាប់តាំងពីថ្ងៃទី០៧ រហូតដល់ថ្ងៃទី១១ ខែមិថុនា ២០២៣ ហើយរបាយការណ៍នានានឹងដាក់បញ្ចូលទៅក្នុងកិច្ចពិភាក្សាក្នុងកិច្ចប្រជុំពេញអង្គ នៅថ្ងៃស្អែក ទី១៣ ខែមិថុនា ឆ្នាំ២០២៣៕អត្ថបទនាយកដ្ឋាន ស្រាវជ្រាវ បណ្តុះបណ្តាល និងផ្សព្វផ្សាយ

រូបភាព៖លោក ហាប់ គឹម អាន ,លោក ហ៊ុ រិទ្ធី,លោក រដ្ឋ ផល្លីន

លោកសុខ លូ អភិបាលខេត្តបាត់ដំបង បានមានប្រសាសន៍លើកឡើងថា សម្រាប់ខេត្តបាត់ដំបង បានខិតខំបំពេញតួនាទីរបស់ខ្លួនយ៉ាងសកម្ម ដើម្បីចូលរួមថែរក្សាសន្ដិភាព សន្ដិសុខ សុវត្ថិភាពសង្គម និងការអភិវឌ្ឍនៅតាមមូលដ្ឋានជូនប្រជាពលរដ្ឋ ដើម្បីជាការចូលរួមការពារ និងលើកកម្ពស់សិទ្ធិសេរីភាព របស់មនុស្ស ក្នុងការលើកកម្ពស់ជីវភាព ប្រជាពលរដ្ឋ តាមរយៈការបង្កើតការងារ ការវិនិយោគ បាននាំមកនូវសក្ដានុពលដ៏ធំធេង សម្រាប់ប្រជាពលរដ្ឋ និងសង្គមជាតិ ព្រមទាំងយកចិត្តទុកដាក់ចំពោះសុខទុក្ខប្រជាពលរដ្ឋ ព្រមទាំងលើកទឹកចិត្តឱ្យមានការចូលរួមបន្ថែមទៀត ដល់ប្រជាពលរដ្ឋ ក្នុងមូលដ្ឋានដើម្បីឱ្យគាត់បានស្វែងយល់ពីសិទ្ធិ និងការប្រើប្រាស់សិទ្ធិសេរីភាព របស់ខ្លួនស្របតាមច្បាប់ជាធរមាន ។

លោកបានបន្តទៀតថា បច្ចុប្បន្ន សិទ្ធិសេរីភាពរបស់ប្រជាពលរដ្ឋ ត្រូវបានការពារ និងគោរព ដោយប្រជាពលរដ្ឋមានសិទ្ធិពេញលេញ ក្នុងការប្រកបរបរចិញ្ចឹមជីវិត សិទ្ធិទទួលបានការអប់រំ សិទ្ធិនយោបាយ សិទ្ធិបញ្ចេញមតិ សិទ្ធិស្រ្ដី កុមារ និងជនមានពិការភាព សេរីភាពក្នុងជំនឿសាសនាជាដើម ហើយទន្ទឹមនឹងនោះ ការធានាបាននូវសន្ដិភាព គឺជាកត្តាសំខាន់ចម្បងបំផុតដែលនាំមកជូនប្រជាពលរដ្ឋ កម្ពុជានូវលទ្ធិប្រជាធិបតេយ្យ នីរតិរដ្ឋ ការអភិវឌ្ឍ និងការគោរពសិទ្ធិមនុស្ស។

លោកបានបន្តទៀតថា សម្រាប់ពិធីផ្សព្វផ្សាយនាពេលនេះ គឺសង្ឃឹមថា នឹងពង្រឹងចំណេះដឹងបន្ថែមទៀត ដល់មន្រ្ដីរាជការ ប្រជាពលរដ្ឋ អំពីសិទ្ធិរបស់ខ្លួនឱ្យកាន់តែច្បាស់ ហើយការគោរពសិទ្ធិមនុស្សកាន់តែល្អប្រសើរ ដើម្បីសុខសន្ដិភាព សុវត្ថិភាព ឈានទៅរកការអភិវឌ្ឍសេដ្ឋកិច្ចជាបន្តបន្ទាប់ទៀត។

លោកសុខ លូ អភិបាលខេត្តបាត់ដំបង បញ្ជាក់យ៉ាងដូច្នេះ នៅក្នុងបានអញ្ជើញចូលរួមបើក ក្នុងសិក្ខាសាលាស្ដីពីការផ្សព្វផ្សាយរបាយការណ៍ជាតិ ស្ដីពីការអនុវត្តកតិកាសញ្ញាអន្តរជាតិ ស្ដីពីសិទ្ធិពលរដ្ឋ និងនយោបាយ (ICCPR) ក្រោមអធិបតីភាព លោក កែវ រ៉េមី រដ្ឋមន្រ្ដីប្រតិភូអមនាយករដ្ឋមន្រ្ដី និងជាប្រធានគណៈកម្មាធិការសិទ្ធិមនុស្សកម្ពុជា ដែលពិធីនេះរៀបចំឡើងនៅឯសាលប្រជុំអគារE សាលាខេត្តបាត់ដំបង នៅថ្ងៃចន្ទនេះ៕ដោយនាគខៀវ

ខេត្តសៀមរាប៖មានការលើកឡើងថា ដីព្រៃក្នុងដែនជម្រកសត្វព្រៃបឹងពែ កំពុងតែរងការកាប់ទន្រ្ទានយកមកធ្វើជាកម្មសិទ្ទិ ពីសំណាក់ជនឱកាសនិយមខិលខូច និងអ្នកមានលុយមួយចំនួន។

ទីតាំងកាប់កាប់ទន្រ្ទានយកមកធ្វើជាកម្មសិទ្ទិ ស្ថិតនៅចំណុច អណ្តូងភ្លូរ ស្ថិតក្នុងភូមិ ត្រពាំងភ្លោះ ឃុំពង្រលើ ស្រុកជីក្រែង ខេត្តសៀមរាប។

ប្រជាពលរដ្ឋបានបង្ហើបឲ្យដឹង ថាមានអ្នកមានលុយម្នាក់ ឈ្មោះ ក្អុក មានស្រុកកំណើតនៅ ភូមិកំពង់ ឃុំ ជីក្រែង ស្រុកជីក្រែង បច្ចុប្បន្នមករស់នៅ និងលក់ទូរស័ព្ទដៃក្នុង ភូមិគ្រាំង ឃុំពង្រលើ បានជួលប្រជាពលរដ្ឋ ក្នុងតម្លៃ៣០០០០រៀល ក្នុង១ថ្ងៃ ដើម្បី កាប់ទន្ទ្រានដីព្រៃ នៅចំណុចខាងលើយកធ្វើជាកម្មសិទ្ធិ ដោយពេលនេះទន្ទ្រានយកមិនតិចជាង២០ ហិកតានោះទេ។

ប្រជាពលរដ្ឋបន្តថា ឈ្មោះ (ក្អក) មានមហិច្ឆតាទន្ទ្រានយកដីព្រៃរដ្ឋ មកធ្វើជាកម្មសិទ្ធិមិនតិចជាង១០០ ហិកតា ក្រោមហេតុផលប្រមូលទិញពីប្រជាពលរដ្ឋ។

ករណីនេះ លោក ខៀវ ប៊ុនឈឿន មេឃុំពង្រលើ បានប្រាប់អ្នកសារព័ត៌មានតាមទូរស័ព្ទថា លោកមិនដឹងទេព្រោះដី គឺជាដែនសមត្ថកិច្ចរបស់មន្ត្រីបរិស្ថាន។

ចំណែក លោក លឹង ជួប ប្រធានមន្ត្រីបរិស្ថានស្ដីទី ស្នាក់ការស្រោង ថា លោកនឹងពិនិត្យមើល តើវាជាដីព្រៃឬក៏ជាដីបុស្ស? តើជាប់គម្របព្រៃឈើដែរឬក៏អត់?

ឯ លោក ពៅ ជុំ នាយការិយាល័យ ឧទ្យានុរក្ស និងបរិស្ថានដែនជម្រកសត្វព្រៃបឹងពែរ បានឆ្លើយបំភ្លឺប្រាប់អ្នកសារព័ត៌មានតាមទូរស័ព្ទថា លោកបានទៅពិនិត្យមើលឃើញហើយ ដីព្រៃនៅចំណុចនោះពិតជាជាប់គម្របព្រៃឈើដែនជម្រកសត្វព្រៃបឹងពែរមែន។ ប៉ុន្តែមិនមែន ជាដីព្រៃទេគឺជាបុស្ស ដែលប្រជាពលរដ្ឋធ្លាប់អាស្រ័យផល។

លោកពៅ ជុំ បន្តទៀតថា ទោះបីជាយ៉ាងណាក៏ដោយលោកនឹងបញ្ជូនឈ្មោះ ក្អុក ទៅខេត្តដើម្បីអោយខេត្តធ្វើការវិនិច្ឆ័យ។

សៀមរាប ប៉ុស្តិ៍ នៅមិនទាន់ទទួលបានការបំភ្លឺពីឈ្នោះ
ក្អុក នៅឡើយទេចំពោះការលើករបស់ពលរដ្ឋដោយមិនមានលេខទូរស័ព្ទទំនាក់ទំនង។

កាលពីថ្មីៗនេះ សម្តេចតេជោហ៊ុន សែន បានបញ្ជាឲ្យក្រសួងស្ថាប័នពាក់ព័ន្ធអាជ្ញាធរទប់ស្កាត់ការកាប់ទន្ទ្រានព្រៃយកដីរបស់រដ្ឋ ក៏ប៉ុន្តែជំនាញខេត្តសៀមរាប ហាក់បីមិនគោរពតាមបទបញ្ជារបស់សម្ដេចនោះទេ៕ដោយនាគខៀវ

ខេត្តកំពង់ចាម​៖ក្នុងពិធីបញ្ជូលសមាជិកគណបក្សទើបកសាងថ្មី​ ចំនួន៧១៦៩នាក់​ មក​ពី​​វិទ្យាល័យ​ទាំង​៦​ និង​ឃុំ​ទាំង​១៤​ ក្នុង​ស្រុក​ស្រីសន្ធរ​ ខេត្ត​កំពង់ចាម​ នៅថ្ងៃអាទិត្យនេះ លោកយឹម ឆៃលី សមាជិកគណៈអចិន្ត្រៃយ៏គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាលចុះជួយខេត្តកំពង់ចាម​ បានថ្លែងប្រាប់​យុវជន​គ្រប់​អាយុ​បោះឆ្នោត​ដែល​ជា​សមាជិក​ថ្មី​ថា​ គណបក្ស​ប្រជាជន​កម្ពុជា​ ជា​គណបក្ស​ដែល​ហ៊ាន​លះបង់​ជីវិត​ ដេីម្បី​ជួយ​សង្គ្រោះ​អាយុជីវិត​ប្រជាជន​កម្ពុជា​ ឱ្យ​រួច​ចាកផុត​ពី​សេចក្ដី​ស្លាប់​។

លោក យឹម ឆៃលី បានថ្លែងថា​ ប្រជាជនកម្ពុជាជាង៩០% ជាអ្នកកាន់ព្រះពុទ្ឋសាសនា ហើយព្រះពុទ្ឋបរមគ្រូនៃយើង បានប្រៀនប្រដៅឲ្យយើងចេះស្គាល់គុណ ស្គាល់ទោស និងចេះដឹងគុណចំពោះអ្នកដែលធ្លាប់ជួយយើងនៅគ្រាលំបាក ជាពិសេសត្រូវជឿជាក់លើសច្ចធម៌ និងប្រវត្តិសាស្ត្រដែលយើងធ្លាប់ហែលឆ្លងកាត់ក្នុងជីវិតរបស់យើង។ ប៉ុន្តែ​មានប្រជាជនយើងមួយចំនួនតូច នៅតែមិនជឿជាក់លើសច្ចធម៌ប្រវត្តិសាស្ត្រ ហើយងាកទៅជឿលើការឃោសនាបោសបញ្ជោតរបស់អ្នកដែលមិនដែលរួមសុខរួមទុក្ខជាមួយខ្លួន ដោយមើលមិនឃើញពីគុណបំណាច់របស់ គណបក្សប្រជាជនកម្ពុជា ដែលបានវាយផ្តួលរំលំរបបប្រល័យពូជសាសន៏ប៉ុលពត រំដោះប្រជាជនកម្ពុជាពីរណ្តៅមរណៈ និងបានខិតខំពុះពារគ្រប់ការលំបាក និងឧបសគ្គសព្វបែបយ៉ាង រហូតស្វែងរកបាននូវសុខសន្តិភាពពេញបរិបូរណ៏ពេញផ្ទៃប្រទេស ដោយមានការបង្រួបបង្រួមជាតិ ឯកភាពជាតិ ឯកភាពទឹកដី ក្រោមដំបូលរដ្ឋធម្មធញ្ញ តែមួយ រាជរដ្ឋាភិបាលតែមួយ និងដឹកនាំប្រទេសជាតិតាមលទ្ឋិប្រជាធិបតេយ្យ សេរីពហុបក្ស និងអភិវឌ្ឍន៏ប្រទេសមានការរីកចម្រើនយ៉ាងឆាប់រហ័សលើគ្រប់វិស័យ។ ដូច្នេះ​យើងត្រូវពន្យល់ណែនាំពួកគាត់កុំឲ្យចាញ់បោកការឃោសនាអកុសលរបស់ក្រុមជនអគតិ និងជនក្បត់ជាតិ តទៅទៀត។

លោកក៏បានណែនាំដល់ ប្រធានគណបក្សសង្កាត់ទាំងពីរ ក៏ដូចជាក្រុមការងារស្នូល ត្រូវយកចិត្តទុកដាក់ខ្ពស់ លើការចិញ្ចឹមចលនាសមាជិកបក្ស និងការជួយសម្របសម្រួលដល់សមាជិកបក្សរាល់ពេលពួកគាត់មានតម្រូវការ ឬមានសំណូមពរ និង​ជួបបញ្ហាផ្សេងៗ ជា​ពិសេសគឺ​ត្រូវ​ផ្សារភ្ជាប់ទៅនឹងការផ្ដល់-ទទួលសេវាសាធារណៈ ដែលជាតម្រូវការចាំបាច់ប្រចាំថ្ងៃ របស់ពួកគាត់​ផងដែរ​៕ដោយនាគខៀវ