Siem Reap Post – Page 572 – Siem Reap News, Cambodia News

ខេត្តព្រះសីហនុ៖ក្រុមហ៊ុន Royal Group Koh Rong Development Company និងក្រុមហ៊ុន Sinohydro Corporation Limited ចុះហត្ថលេខាលើកិច្ចព្រមព្រៀងសាងសង់ផ្លូវបេតុងអាមេប្រវែង ៧០គីឡូម៉ែត្រ ក្នុងតម្លៃ៣៥លានដុល្លារអាមេរិកនៅលើតំបន់អភិវឌ្ឍន៌កោះរ៉ុង។
ពិធីចុះហត្ថលេខានេះ ធ្វើនៅសណ្ឋាគារ Goddess of Liberty Hotel & Resort ក្នុងខេត្តព្រះសីហនុ នៅថ្ងៃអង្គារ ទី១៤ ខែកក្កដា ឆ្នាំ២០២០នេះ ក្រោមវត្តមានលោក គួច ចំរើន អភិបាលអភិបាលខេត្តព្រះសីហនុ, លោក ជា វុទ្ធី អគ្គលេខាធិការរងក្រុមប្រឹក្សាអភិវឌ្ឍន៍កម្ពុជា ជាតំណាងរបស់លោកសុខ ចិន្តា សោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិកាក្រុមប្រឹក្សាអភិវឌ្ឍន៍កម្ពុជា និងមានការចូលរួមពីអភិបាលរងខេត្ត អភិបាលក្រុង ប្រធានមន្ទីរស្ថាប័នពាក់ព័ន្ធ ព្រមទាំងមន្ត្រីសាលាខេត្តព្រះសីហនុជាច្រើនរូបទៀត។

យោងតាមកិច្ចព្រមព្រៀង គម្រោងសាងសង់ផ្លូវបេតុងនៅលើតំបន់អភិវឌ្ឍន៍កោះរ៉ុង ត្រូវចំណាយថវិកាចំនួន ៣៥លាន ដុល្លារអាមេរិក ហើយត្រូវបញ្ចប់ការសាងសង់ក្នុងរយៈពេល១៦ខែ ស្របតាមផែនការមេអភិវឌ្ឍន៍ហេដ្ឋារចនសម្ព័ន្ធ ដែលគណៈកម្មការអន្តរក្រសួងរបស់ក្រុមប្រឹក្សាអភិវឌ្ឍន៍កម្ពុជាបានអនុម័តកាលពីថ្ងៃទី០៩ខែតុលាឆ្នាំ២០១០កន្លងទៅ។

នៅក្នុងឱកាសនេះ អ្នកឧកញ៉ា គិត ម៉េងអគ្គនាយកក្រុមហ៊ុន Royal Group Koh Rong Development Company បានមានប្រសាសន៍ថ្លែងអំណគុណដល់ស្ថាប័នពាក់ព័ន្ធទាំងអស់ដែលបានចូលរួមចំណែកក្នុងការជម្រុញឲ្យការស្ថាបនាផ្លូវនៅលើតំបន់អភិវឌ្ឍន៍កោះរ៉ុងនេះបានកើតឡើង។

អ្នកឧកញ៉ាមានប្រសាសន៍ថា នៅខណៈនេះ ក្រុមហ៊ុនបានចាប់ផ្តើមសាងសង់ផ្លូវបេតុង ៧០គីឡូម៉ែត្រ ហើយតទៅមុខទៀតក្រុមហ៊ុននឹងត្រូវសាងសង់រោងចក្រអគ្គិសនី កំពង់ផែនិងព្រលានយន្តហោះ នៅលើតំបន់អភិវឌ្ឍន៍កោះរ៉ុងទៀត។
លោកគួច ចំរើន អភិបាលខេត្តព្រះសីហនុ បានកោតសរសើរចំពោះក្រុមហ៊ុន Royal Group Koh Rong Development Company ដោយថា បានសម្រេចចិត្តដ៏ក្លាហានក្នុងការសាងសង់ផ្លូវប្រវែង៧០គីឡូម៉ែត្រនៅលើតំបន់អភិវឌ្ឍន៍កោះរ៉ុងនេះ។ ជាមួយគ្នានេះ លោក បានអំពាវនាវឲ្យគ្រប់ភាគីពាក់ព័ន្ធទាំងអស់ឲ្យមានការចូលរួមអភវឌ្ឍន៍តំបន់អភិវឌ្ឍន៍កោះរ៉ុងទាំងអស់គ្នា ដោយមិនត្រូវបង្កើតឲ្យមានឧបសគ្គណាមួយក្នុងការអភិវឌ្ឍន៍នោះទេ។

លោក ជា វុទ្ធី អគ្គលេខាធិការរងក្រុមប្រឹក្សាអភិវឌ្ឍន៍កម្ពុជា ក៏បានកោតសរសើរអ្នកឧកញ៉ា គិត ម៉េង អគ្គនាយកក្រុមហ៊ុន ដែលបានខិតខំយ៉ាងស្វិតស្វាញ ផ្តល់កិច្ចសហការល្អជាមួយក្រសួងស្ថាប័នពាក់ព័ន្ធជាពិសេស កិច្ចសហការដ៏មានប្រសសិទ្ធភាពជាមួយអាជ្ញាធរដែនដី និងប្រជាពលរដ្ឋនៅលើកោះរ៉ុង ដើម្បីជម្រុញការអភិវឌ្ឍន៍គម្រោងនៅលើកោះរ៉ុងចាប់តាំងពីពេលចុះហត្ថលេខាលើកិច្ចសន្យាជួលកោះរ៉ុង។
គួរបញ្ជាក់ថាកាលពីថ្ងៃទី២៨ខែកុម្ភៈឆ្នាំ២០០៨ ក្រុមហ៊ុន រ៉ូយ៉ាល់ គ្រុប ខូអិលធីឌី បានចុះហត្ថលេខាជួលកោះរ៉ុង ស្ថិតក្នុងខេត្តព្រះសីហនុ ជាមួយក្រុមប្រឹក្សាអភិវឌ្ឍន៍កម្ពុជា ដែលជាភាគីតំណាងឲ្យរាជរដ្ឋាភិបាលកម្ពុជា ដើម្បីអភិវឌ្ឍតំបន់នោះឲ្យក្លាយជាតំបន់អភិវឌ្ឍន៍ពាណិជ្ជកម្ម និងរម្មណីយដ្ឋានទេសចរធម្មជាតិ៕SRP

ខេត្តព្រៃវែង៖នាយករដ្ឋមន្ត្រី សម្តេចតេជោ ហ៊ុន សែន បានស្នើឱ្យអាជ្ញាធរពាក់ព័ន្ធរួមទាំងក្រសួងកសិកម្ម រុក្ខាប្រមាញ់ និងនេសាទ ព្រមទាំងបង ប្អូនប្រជាពលរដ្ឋបង្កើតសហគមន៍អ្នកចិញ្ចឹមត្រី ដើម្បីងាយស្រួលក្នុងការតតាំងជាមួយឈ្មួញ សម្រាប់កំណត់តម្លៃលក់ត្រី។

ថ្លែងក្នុងការអញ្ជើញចុះពិនិត្យមើលវឌ្ឍនភាពនិងផែនការអភិវឌ្ឍន៍នៃការធ្វើវារីវប្បកម្ម នៅកម្ពុជា នៅមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មទឹកសាបរបស់រដ្ឋបាល ជលផល ដែលមានទីតាំងស្ថិត នៅភូមិបាទី ឃុំពាមរក៍ ស្រុកពាមរក៍ ខេត្តព្រៃវែង នាព្រឹកថ្ងៃទី១៤ខែកក្កដាឆ្នាំ២០២០នេះ សម្តេច ហ៊ុន សែន បានលើកឡើងពីបញ្ហារបស់ប្រជា កសិករចិញ្ចឹមត្រីលើបញ្ហាតម្លៃត្រីថោកនៅពេលទទួលផល ត្រង់ចំណុចនេះ សម្ដេចតេជោ បានស្នើឱ្យអាជ្ញាធរពាក់ព័ន្ធគួរបង្កើតឱ្យមានសហគមន៍អ្នកចិញ្ចឹមត្រី ដើម្បីធ្វើការតវ៉ា ជាមួយឈ្មួញទិញត្រី។

សម្ដេចតេជោបានបញ្ជាក់ថាបើសិនប្រជាកសិករលក់ត្រីដោយខ្លួនឯង នោះឈ្មួញពិបាកឱ្យតម្លៃព្រោះអ្នកខ្លះលក់ថ្លៃ អ្នកខ្លះថោកដែលធ្វើឱ្យឈ្មួញពិបាក ចូលទិញ ដូច្នេះគួរបង្កើតសហគមន៍ មួយដើម្បីលក់ត្រីមានភាពងាយស្រួល។ សម្តេចតេជោបានលើកឡើងថា ការចឹញ្ចឹមត្រីទទួលបានផលច្រើនជាងការធ្វើស្រែ ដោយមានការ ចំណេញ ច្រើនគួរសម ដោយធ្វើការលើផ្ទៃដីប្រហាក់ប្រហែលគ្នា។

សម្តេចនាយករដ្ឋមន្ត្រីបានស្នើឱ្យសមត្ថកិច្ចដែលចុះចាប់បង្រ្កាបបទល្មើសជលផលខុសច្បាប់ដោយប្រើប្រាស់ស្បៃ អួនដាក់ត្រី មិនត្រូវចាប់យក ស្បៃទៅ ដុតចោលដូចមុនទៀតទេ គឺត្រូវទុកស្បៃទាំងនោះឱ្យប្រជាកសិករ អ្នកចឹញ្ចឹមត្រី យកទៅ បាំងត្រីក្នុងស្រះដែលលិចទឹក។ សម្តេចតេជោបានថ្លែងថា “ពេលនេះខ្ញុំស្នើសុំឱ្យសមត្ថកិច្ច ដែលចាប់បានស្បែ អួនដែលជនល្មើសយកទៅដាក់ចាប់ត្រីខុសច្បាប់ដោយកុំ ដុតចោល ដូចមុនទៀត ដោយទុកយកមកឱ្យប្រជាកសិករអ្នកចឹញ្ចឹមត្រីនៅពេលទឹកលិចស្រះ របស់ពូកគាត់វិញ”។

សម្តេចថា ការទុកស្បៃនេះចំណេញច្រើនជាង ព្រោះនៅពេលយកស្បៃ នេះមកឱ្យប្រជាកសិករមិនសូវចំណាយលុយច្រើនក្នុងការទិញស្បៃមកបាំង ឃាត់មិនឱ្យចេញពីស្រះនៅពេលរដូវទឹកលិចស្រះ៕SRP

ភ្នំពេញ៖លោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងថាបញ្ហាកូវីដ១៩ បានក្លាយជាឧសគ្គរារាំងការដឹកជញ្ជូនសម្ភារមួយចំនួន សម្រាប់បំពាក់នៅតាមការិយាល័យច្រកចេញចូលតែមួយ ដើម្បីផ្ដល់សេវាចុះបញ្ជីទោចក្រយានយន្តជូនពលរដ្ឋហើយថាបញ្ហានេះបានធ្វើឱ្យការដាក់ឱ្យដំណើរការក៏ត្រូវពន្យាពេលរហូតដល់ដំណាច់ឆ្នាំ២០២០។

លោកស៊ុន ចាន់ថុលបន្តថានៅក្នុងដំណាក់កាលនេះ ក្រសួងសាធារណការ និងដឹកជញ្ជូន និងក្រសួងមហាផ្ទៃ បានបង្កើតក្រុមការងារប្រជុំពិភាក្សាគ្នារៀបចំនីតិវិធី និងបែបបទ ដើម្បីចេញសេចក្ដីណែនាំពាក់ព័ន្ធនឹងដំណើការផ្ដល់សេវាចុះបញ្ជីទោចក្រយានយន្ត និងបានស្នើឱ្យក្រុមហ៊ុនព័ត៌មានវិទ្យារិះរកបច្ចេកវិទ្យាទប់ស្កាត់ការក្លែងបន្លំឯកសារ។

លោកបានស្នើសុំការគាំទ្រពីសម្ដេចក្រឡាហោម ស ខេង ពិនិត្យលទ្ធភាពភ្ជាប់ប្រព័ន្ធអនឡាញរបស់ក្រសួងសាធារណការ និងដឹកជញ្ជូន ជាមួយប្រព័ន្ធអនឡាញគ្រប់គ្រងអត្តសញ្ញាណប័ណ្ណរបស់ក្រសួងមហាផ្ទៃ ដើម្បីបញ្ចៀសការក្លែងបន្លំឯកសារអត្តសញ្ញាណប័ណ្ណពេលស្នើសុំចុះបញ្ជី ពីព្រោះកន្លងមកមានអ្នកក្លែងបន្លំ អត្តសញ្ញាណប័ណ្ណដើម្បីបានស្លាកលេខភ្នំពេញ ហើយមន្រ្តីក៏ជួបការលំបាក ដោយសារមិនមានទិន្នន័យដើមផ្ទៀងផ្ទាត់។

លោកបានបញ្ជាក់បែបនេះនៅព្រឹកថ្ងៃអង្គារទី១៤ខែកក្កដា ឆ្នាំ២០២០នេះ ក្នុងកិច្ចប្រជុំត្រួតពិនិត្យលទ្ធផលការអនុវត្តការងារចុះបញ្ជីទោចក្រយានយន្តរបស់ការិយាល័យច្រកចេញចូលតែមួយ ក្រុង ស្រក ខណ្ឌ តាមរយៈប្រព័ន្ធស្វ័យប្រវត្តិកម្ម នៅទីស្ដីការក្រសួងមហាផ្ទៃ ក្រោមវត្តមានរបស់សម្ដេចស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។

សម្ដេចស ខេង បានថ្លែងថាកិច្ចប្រជុំនៅថ្ងៃនេះ គឺដើម្បីស្ដាប់នូវរបាយការណ៍របស់ក្រសួងសាធារណការ និងដឹកជញ្ជូនទាក់ទងនឹងការអនុវត្តនយោបាយកំណែទម្រង់វិមជ្ឈការ និងវិសហមជ្ឈការ ក្នុងក្របខណ្ឌក្រសួងទទួលខុសត្រូវ ពិសេសការផ្ដល់សេវានានាជូនប្រជាពលរដ្ឋ ។

សូមបញ្ជាក់ថាបច្ចុប្បន្ន ការផ្ដល់សេវាចុះបញ្ជីទោចក្រយានយន្ត នៅការិយាល័យច្រកចេញចូលតែមួយមានចំនួន៥២ការិយាល័យ។ គិតចាប់ពីខែមករាឆ្នាំ២០១៧មក ការិយាល័យបានចុះបញ្ជីទោចក្រយានយន្តជាង៥៤ម៉ឺនគ្រឿង និងសេវាផ្សេងៗទៀត សរុបជាង៥៦ម៉ឺនគ្រឿង និងបានរកឃើញភាពមិនប្រក្រតី ដូចជាការប្រើអត្តសញ្ញាណប័ណ្ណមិនត្រឹមត្រូវ និងការក្លែងបង្កាន់ដៃបង់ពន្ធដើម។

ពាក់ព័ន្ធនឹងការស្នើសុំពន្យាពេលដល់ដំណាច់ឆ្នាំ២០២០ សម្រាប់ការបំពាក់សម្ភារបម្រើឱ្យការផ្ដល់សេវាចុះបញ្ជីយានយន្តដោយសារបញ្ហាកូវីដ១៩នោះ សម្ដេចស ខេង បានមានប្រសាសន៍ឯកភាពតាមសំណើ និងបានផ្ដល់ការណែនាំកិច្ចការសំខាន់ៗមួយចំនួនទៀតសម្រាប់ក្រុមការងារក្រសួងមហាផ្ទៃ និងក្រសួងសាធារណការ និងដឹកជញ្ជូន៕SRP

ភ្នំពេញ៖នាយករដ្ឋមន្ត្រីបានសម្រេចឯកភាពជាផ្លូវការហើយក្នុងការផ្តល់ជូនថ្ងៃឈប់សម្រាកចំនួន០៥ ថ្ងៃ សងថ្ងៃបុណ្យចូលឆ្នាំខ្មែរកន្លងមកនេះ (បើសរុបទាំងថ្ងៃចុងសប្តាហ៍ផងគឺ០៩ថ្ងៃ)។

សម្តេចតេជោ ហ៊ុន សែន នៅព្រឹកថ្ងៃអង្គារថ្ងៃទី១៣ខែកក្កដា២០២០នេះ បានសម្រេចឯកភាពជាផ្លូវការអោយ កម្មករ – និយោជិក និងមន្រ្តីរាជការ បានឈប់សម្រាករយៈពេល០៥ថ្ងៃ (ចាប់ពី១៧- ២១ ខែសីហា ២០២០) ជំនួស ឱ្យថ្ងៃឈប់សម្រាកបុណ្យចូលឆ្នាំខ្មែរ២០២០ ដែលត្រូវបាពន្យារពេលកាលខែមេសាកន្លងមកនេះ។

ប៉ុន្តែទន្ទឹមនឹងនេះសូមក្រសួងសុខាភិបាល,ក្រសួងទេសចរណ៍,ក្រសួងសាធារណការនិងដឹកជញ្ជូនអាជ្ញាធរដែនដី ព្រមទាំងក្រសួងស្ថាប័ន និងសមត្ថកិច្ចពាក់ព័ន្ធទាំងអស់សហការ និងពង្រឹងការអនុវត្តវិធានការការពារសុវត្ថិភាព វិធានការសុខាភិបាល និងអនាម័យ ព្រមទាំងធ្វើការផ្សព្វផ្សាយអប់រំ និងណែនាំប្រជាពលរដ្ឋ និងម្ចាស់អាជីវកម្មដោយតម្រូវឲ្យអនុវត្តដាច់ខាតតាមគោលការណ៍ណែនាំរបស់ក្រសួងសុខាភិបាល ដើម្បីកាត់បន្ថយហានិភ័យនៃការចម្លងរាលដាលជំងឺកូវីដ-១៩ នៅក្នុងអំឡុងពេលនៃថ្ងៃឈប់សម្រាកចំនួន ៥ថ្ងៃ ក្នុងខែ សីហា ខាងមុខនេះ៕SRP

ភ្នំពេញ៖ប្រមុខដឹកនាំកម្ពុជា សម្ដេចតេជោ ហ៊ុន សែន នៅព្រឹកនេះបានអញ្ជើញចុះទៅពិនិត្យ មជ្ឈមណ្ឌល ស្រាវជ្រាវ និងអភិវឌ្ឍន៍
ពូជត្រី នៅខេត្តព្រៃវែង។
ប្រមុខដឹកនាំកម្ពុជា បានបញ្ជាក់ថា
នៅព្រឹកថ្ងៃអង្គារ៍ទី ១៤ កក្កដា នេះ ខ្ញុំនឹងចុះទៅពិនិត្យមើលមជ្ឈមណ្ឌលស្រាវជ្រាវ និងអភិវឌ្ឍន៍ពូជត្រី ហើយនឹងឆ្លៀតឱកាសជួបសំណេះសំណាលជាមួយបងប្អូនប្រជាកសិករនៅស្រុកពាមរក៍ខេត្តព្រៃវែងផងដែរ ប្រសិនបើពេលវេលាអនុញ្ញាត។

«ស្ថានីយ៍ផលិតកូនត្រីពូជ» នេះបានបង្កើតឡើងនៅឆ្នាំ១៩៨៨ ដោយរដ្ឋបាលជលផល សហការជាមួយអង្គការប៉ាដិក លើផ្ទៃដី១៦ហិកតា។ មកដល់ឆ្នាំ២០០៨ ក្រសួងកសិកម្មបានប្តូរឈ្មោះនិងបង្កើតទៅជាមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មទឹកសាបរហូតមកដល់សព្វថ្ងៃ។

មជ្ឈមណ្ឌលនេះ បានផលិតពូជត្រីរាប់លានកូនជារៀងរាល់ឆ្នាំ ដូចជាត្រីឆ្ពិន ត្រីប្រា ត្រីអណ្តែង ត្រីទីឡាព្យ៉ា កង្កែប បង្កង និងប្រភេទត្រីកាបមួយចំនួនទៀត សម្រាប់ចែកដល់កសិករចិញ្ចឹមទូទាំងប្រទេស និងលែងចូលទៅក្នុងដែនទឹកសាធារណៈ និងស្រះជម្រកត្រីសហគមន៍ជាដើម។

យើងនាំគ្នាបំផុសចលនាប្រជាកសិករឱ្យចូលរួមដាំដុះដំណាំស្បៀងតាមគោលការណ៍អភិវឌ្ឍន៍បៃតង ចិញ្ចឹមសត្វ និងវារីវប្បកម្មឱ្យបានសកម្មនៅក្នុងយុគសម័យបដិវត្តន៍ឧស្សាហកម្មទី៤ ដែលកម្ពុជាកំពុងមានការអភិវឌ្ឍពីប្រទេសពឹងផ្អែកលើវិស័យកសិកម្មទៅជាកសិ-ឧស្សាហកម្មវិញនេះ៕SRP

Sponsored

ខេត្តសៀមរាប៖ចៅក្រមសើបសួរនៃសាលាដំបូងខេត្តសៀមរាប លោកមុយ សុភ័ក្រ្ត បានសម្រេចចេញដីកាបង្គាប់ឲ្យឃុំខ្លួន មនុស្សពីរនាក់ដាក់ពន្ធនាគារ
ពីបទកាប់រានព្រៃ ឈូសឆាយដីព្រៃ ហ៊ុំព័ទ្ធកាប់ដីព្រៃឈើ និងប្រើប្រាស់រណាយន្តដោយគ្មានការអនុញ្ញាតពីរដ្ឋបាលព្រៃឈើ ដែលបានប្រព្រឹត្តនៅភូមិរុងរឿង ឃុំកន្ទួត ស្រុកស្វាយលើ ខេត្តសៀមរាប កាលពីថ្ងៃទី ០៩ខែកក្កដាឆ្នាំ២០២០ បទល្មើសមានចែង និងផ្ដន្ទាទោសតាមបញ្ញត្ដិមាត្រា៩៧ កថាខណ្ឌ១ចំណុច៦ និងមាត្រា ៩៩ កថាខណ្ឌ ចំណុច១ នៅច្បាប់ស្ដីពីព្រៃឈើ។
ជនជាប់ចោទទី១ឈ្មោះ ហឿម ហុង ភេទប្រុសអាយុ២៩ឆ្នាំ កើតនៅភូមិរំដួលថ្មី ឃុំដូនពែង ស្រុកអង្គរជុំខេត្តសៀមរាប ទីលំនៅមុនចាប់ខ្លួន នៅភូមិរំដួលថ្មី ឃុំដូនពែង ស្រុកអង្គរជុំខេត្តសៀមរាប មុខរបរធ្វើស្រែ។
ជនជាប់ចោទទី២ឈ្មោះម៉ៅ ម៉ាងភេទប្រុសអាយុ២៨ ឆ្នាំ កើតនៅភូមិកំព្រំ ឃុំឃុនរាម ស្រុកបន្ទាយស្រីខេត្តសៀមរាប មុនចាប់ខ្លួន នៅភូមិកំព្រំ ឃុំឃុនរាម ស្រុកបន្ទាយស្រីខេត្តសៀមរាប៕SRP

ខេត្តសៀមរាប៖អាជ្ញាធរស្រុកក្រឡាញ់បានឲ្យដឹងថាមន្ត្រីយោធាម្នាក់បានស្លាប់និងម្នាក់ទៀតរងរបួសធ្ងន់ក្នុងហេតុការណ៍គ្រោះថ្នាក់ចរាចណ៍។
ហេតុការណ៍បានកើតឡើង
ថ្ងៃទី១៣ខែកក្កដាឆ្នាំ២០២០ វេលាម៉ោង ១៤និង១០នាទី វាងម៉ូតូនិងគោយន្ដកន្ត្រៃ លើផ្លូវជាតិលេខ៦៨ ត្រង់ចំណុចចន្លោះគីឡូម៉ែត្រលេខ២០និង២១មុខការ៉ាស់សាំងឈ្មោះ ឡង ម៉ៅ ស្ថិតនៅភូមិតាប៉ាង ឃុំសែនសុខ ស្រុកក្រឡាញ់ ខេត្តសៀមរាប។
អាជ្ញាធរបានបន្តថាករណីនេះគឺម៉ូតូម៉ាក វ៉េវអាល់ហ្វាពណ៌ខ្មៅ ពាក់ផ្លាកលេខ បន្ទាយមានជ័យ ១J៩៨៤៣ បើកបរឈ្មោះ អៀម ម៉ុន ភេទប្រុស អាយុ២៨ឆ្នាំ រស់នៅភូមិស្វាយ ឃុំថ្មពួក ស្រុកថ្មពួក ខេត្តបន្ទាយមានជ័យ (ស្លាប់)និងអ្នករួមដំណើរម្នាក់ឈ្មោះក្រឹម រ៉ា ភេទប្រុសអាយុ ៣៦ឆ្នាំរស់នៅភូមិចង្ក្រានយក្ស ឃុំបេង ស្រុកបន្ទាយអំពិល ខេត្តឧត្តរមានជ័យ (របួសធ្ងន់) ក្នុងទិសដៅពីត្បូងទៅជើង(អ្នកទាំងពីរជាទាហានធ្វើការនៅកងពលធំអន្តរាគមន៍លេខ២ វរសេនាតូចកាំភ្លើងត្បាល់ ១០០DKZ ៧៥) ពាក់មួកសុវត្ថិភាពទាំងពីរនាក់ បានបើកបុកគោយន្តកន្រ្តៃពីក្រោយម៉ាក់គូប៊ូតា ពណ៌ក្រហម គ្មានផ្លាកលេខកំពុងឈប់នៅចិញ្ចើមផ្លូវខាងជើងបែរក្បាលទៅទិសខាងជើង បើកបរដោយ(មិនទាន់ស្គាល់អត្តសញ្ញាណ) ដោយកើតហេតុរួចអ្នកបើកបរគោយន្តកន្ត្រៃបានរត់គេចខ្លួនបន្សល់ទុកគោយន្តកន្ត្រៃនៅកន្លែងកើតហេតុ។ ក្នុងនោះខូចខាតម៉ូតូមួយគ្រឿងធ្ងន់ និងគោយន្តកន្ត្រៃខូចខាតស្រាលមួយគ្រឿង។
បើតាមអាជ្ញាធរបញ្ជាក់ថាមូលហេតុះអាចបណ្តាលមកពីអ្នកបើកបរម៉ូតូមានល្បឿនលឿនដោយខ្វះការប្រុងប្រុងយ័ត្ន។ក្រោយកើតហេតុកម្លាំងជំនាញបានយកវត្ថុតាង រក្សាទុកនៅប៉ុស្តិ៍នគរបាលរដ្ឋបាលសែនសុខស្រកក្រឡាញ់៕SRP

ខេត្តកំពង់ឆ្នាំង៖សេចក្ដីរាយការណ៍បានឲ្យដឹងថាសត្វគោចំនួន០៨ក្បាល ដែលម្ចាស់បានលែងឲ្យរកស៊ីស្មៅនៅតាមផ្លូវសាធារណៈ ត្រូវគោយន្តកែឆ្នៃមួយគ្រឿងបុកងាប់។

ហេតុការណ៍ការខាងលើនេះបានកើតឡើងនៅវេលាម៉ោង៨និង១០នាទីព្រឹកថ្ងៃទី១៣ខែកក្កដាឆ្នាំ២០២០លើផ្លូវក្រាលគ្រួសក្រហម លេខ៥១C ចំណុចអូរធំ ស្ថិតភូមិកង្កែប ឃុំច្រណូក ស្រុកកំពង់លែង ជាផ្លូវតភ្ជាប់ពីខេត្តកំពង់ធំ មកស្រុកកំពង់លែង។

លោកវរសេនីយ៍ឯក ប៉ាល់ ជឿន អធិការនគរបាលស្រុកកំពង់លែង បានឲ្យដឹងតាមទូរស័ព្ទនៅរសៀលថ្ងៃនេះថា៖ ករណីគ្រោះថ្នាក់ចរាចរណ៍នេះ កើតទ្បើងដោយមានគោយន្ដកែឆ្នៃមួយគ្រឿង គ្មានស្លាកលេខ បើកបរក្នុងទិសដៅពី ខេត្តកំពង់ធំមកស្រុកកំពង់លែង ខណៈដែលអ្នកបើកបរ បានបើកគេចជង្ហុក ក៏ជ្រុលទៅបុកសត្វគោទាំង០៨ក្បាលនេះងាប់រណូកប្រណែល ក្នុងនោះមានគោញីចំនួន០៥ក្បាល ដែលម្ចាស់បានលែងឲ្យស៊ីស្មៅតាមផ្លូវសាធារណៈ។

អធិការនគរបាលស្រុកកំពង់លែងបានបញ្ជាក់ថា៖ ក្រោយពេលកើតហេតុអ្នកបើកបរបានចុះរត់គេចខ្លួនបាត់ ដែលគេមិនទាន់ស្គាល់អត្តសញ្ញាណគេនៅឡើយដោយទុកគោយន្តកែច្នៃនៅនិងកន្លែងកើតហេតុ។ ករណីនេះសមត្ថកិច្ច បានយកគោយន្តមករក្សាទុកនៅអធិការដ្ឋាននគរបាលស្រុកកំពង់លែង ដើម្បីកសាងសំណុំរឿងតាមនីតិវិធី៕SRP

ខេត្តសៀមរាប៖ លោកវរសេនីយ៍ទោ លឹម សម្បត្តិ អធិការនគរបាលស្រុកប្រាសាទបាគង បានឲ្យដឹងថាថ្ងៃច័ន្ទ ទី១៣ខែកក្កដាឆ្នាំ២០២០វេលាម៉ោង៨និង២៩នាទីមានករណីគ្រោះថ្នាក់ចរាចរណ៍ចំណុចបង្គោលគីឡូលេខ ២៩៨៧ ២៩៨ ភូមិស្ទឹង ឃុំបាគង ស្រុកប្រាសាទបាគង លើផ្លូវជាតិលេខ៦ រវាងម៉ូតូសណ្ដោងរ៉ឺម៉ក និងរថយន្ដ២គ្រឿង ម៉ាកហុងដា សេ១២៥សេរី ២០១០ ពណ៌ខ្មៅ ពាក់ផ្លាកលេខ បន្ទាយមានជ័យ 1H 9030 បើកបរដោយឈ្មោះ កាយ ម៉ាប ភេទប្រុសអាយុ៣១ឆ្នាំសញ្ជាតិខ្មែរដែលមានទីលំនៅភូមិតាត្រាវ ឃុំ កន្រ្ទាំង ស្រុកប្រាសាទបាគង ខេត្ដសៀមរាប(ស្លាប់) បើកម៉ូតូសណ្ដោងរ៉ឺម៉កដឹកប្រពន្ធពីក្រោយ ឈ្មោះ ក្រឹម ស្រីខួន អាយុ ២៥ឆ្នាំសញ្ជាតិខ្មែរ (របួសធ្ងន់) ដែលបើកបរពីទិសខាងលិចទៅកើត បុកនិង រថយន្ដម៉ាកកាមរីបាឡែនពណ៌ទឹកមាស ពាក់ផ្លាកលេខ ភ្នំពេញ2Y 9479 បើកបរដោយឈ្មោះ ឆែម លាងសុង ភេទប្រុសអាយ៤២ឆ្នាំសញ្ជាតិខ្មែរដែលមានទីលំនៅឃុំរកាពប្រាំ ស្រុកត្បូងឃ្មុំ ខេត្ដត្បូងឃ្មុំ បើបរមានទិសដៅពីលិចទៅកើត ក្រោយពេលកើតហេតុរួច ម៉ូតូសណ្ដោងរ៉ឺម៉កវេចង្កូតទៅបុកជាមួយរថយន្ដដឹកដី ម៉ាក នីសាន់ពណ៌ទឹកស ពាក់ផ្លាកលេខ តាកែវ3A 26 21 បើកបរដោយមិនស្គាល់អត្ដ សញ្ញាណ បើកបរមាទិសដៅពីកើតទៅលិច ក្រោយពេលកើតហេតុរួចអ្នកបើកបររថយន្ដដឹកដីបានរត់គេចខ្លួនបាត់ទៅ។

លោកវរសេនីយ៍ទោ លឹម សម្បត្តិ បន្តថា មូលហេតុម៉ូតូសណ្ដោងរ៉ឺម៉កបើកបរមានល្បឿនលឿនខ្វះការប្រុងប្រយ័ត្ន។

វត្ថុតាងទាំងបីគ្រឿងបានយកមករក្សាទុកនៅអធិ ការ រដ្ឋា ននគរ បាល ស្រុកប្រាសាទបាគង ៕SRP