ភ្នំពេញ៖សេចក្ដីប្រកាសព័ត៌មានស្តីពី លទ្ធផលនៃសម័យប្រជុំពេញអង្គគណៈរដ្ឋមន្ត្រី ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាថ្ងៃទី០៩ ខែតុលាឆ្នាំ២០២០ នៅវិមានសន្តិភាព រាជធានីភ្នំពេញ៕SRP

ខេត្តបន្ទាយមានជ័យ៖លោក ឧត្ដមសេនីយ៍ត្រី សិទ្ធិ ឡោះ ស្នងការ នគរបាលខេត្តបន្ទាយមានជ័យ នៅថ្ងៃទី០៩ ខែតុលា ឆ្នាំ២០២០នេះបាន អញ្ជើញជួបសំណេះសំណាល និងប្រកាសផ្ទេរភារកិច្ច តែងតាំងមុខ ដំណែង បំពាក់ឋានន្តរស័ក្តិ ជូនមន្រ្តីនគរបាលជាតិ នៅអធិការដ្ឋាននគរបាលស្រុកម៉ាឡៃ។

ក្នុងឱកាស នោះដែរ លោកឧត្ដមសេនីយ៍ត្រី ស្នងការខេត្ត បានផ្ដល់អនុសាសន៍ អោយបំរើប្រជាពលរដ្ឋដោយស្មោះត្រង់ ហើយលោកបាន ដាក់ចេញទិសដៅអនុវត្តចំនួន ០៤ មាន៖

១- ខិតខំប្រឹងប្រែងបន្តអោយមានសន្តិសុខសណ្ដាប់ធ្នាប់ និងការពារសន្តិភាព។

២- ពង្រឹងអនុវត្តគោលនយោបាយ ភូមិ ឃុំ មានសុវត្ថិភាព។

៣- ដោះស្រាយក្តីកង្វល់ចំពោះមុខរបស់ប្រជាពលរដ្ឋ ។

៤- សាមគ្គីភាព ឯកភាពផ្ទៃក្នុង ចូលរួមសហការជាមួយគ្រប់អជ្ញាធរដែនដីពាក់ព័ន្ធទាំងអស់ដើម្បីសំរេចជោគជ័យគ្រប់ភារកិច្ច៕SRP

ខេត្តសៀមរាប៖ប្រធានស្ដីទីការិយាល័យសុវត្ថិភាពចរាចរណ៍ផ្លូវគោក មន្ទីរសាធារណការ និងដឹកជញ្ជូនខេត្តសៀមរាប លោក ហូ សម័យ បានអះអាងថា ក្នុងរយៈពេល៩ខែដើមឆ្នាំ២០២០នេះ គ្រោះថ្នាក់ចរាចរណ៍ក្នុងខេត្តសៀមរាប កើតឡើងចំនួន៥០ករណី បណ្ដាលឲ្យមនុស្ស៥៧នាក់ បានស្លាប់ ភាគច្រើនគឺជាអ្នកបើកបរម៉ូតូ និងរបួសធ្ងន់ស្រាល ចំនួន១៥៦នាក់ ថយចុះជាងឆ្នាំមុន បើប្រៀបធៀបនឹងរយៈពេលដូចគ្នាឆ្នាំ ២០១៩ ករណីគ្រោះថ្នាក់មានមានចំនួន ៦៧ករណី  បណ្ដាលឲ្យមនុស្សស្លាប់ចំនួន ៦១ នាក់ និងរបួសធ្ងន់ស្រាល ចំនួន១៧៣នាក់។

លោក ហូ សម័យ ថា គ្រោះថ្នាក់ចរាចរណ៍ភាគច្រើនបង្កឡើង ដោយអ្នកបើកបរខ្វះការប្រុងប្រយ័ត្ន និងលើសល្បឿនកំណត់ ហើយភូមិសាស្ត្រដែលតែងតែកើតមានគ្រោះថ្នាក់ចរាចរណ៍ញឹកញាប់ជាងគេ គឺស្ថិតនៅលើកំណាត់ផ្លូវជាតិលេខ៦ ឆ្លងកាត់ស្រុកចំនួន ៣ចំនួន រួមមាន ៖ ស្រុកជីក្រែង , ស្រុកសូទ្រនិគម និងស្រុកពួក៕SRP

ខេត្តសៀមរាប៖លោក ទៀ សីហា ប្រធានគណៈកម្មាធិការសាខាកាកបាទក្រហមកម្ពុជា ខេត្ត នារសៀលថ្ងៃព្រហស្បតិ៍ ថ្ងៃទី ៨ ខែតុលា ម្សិលមិញ បានអញ្ជើញបិទវគ្គតម្រង់ទិស ការងារអនុសាខាកាកបាទក្រហកម្ពុជា ក្រុង-ស្រុកទាំង១២ នៃខេត្តសៀមរាប នៅទីស្នាក់ការសាខាកាកបាទក្រហមកម្ពុជា ខេត្តសៀមរាប។

ដែលវគ្គតម្រង់ទិសនេះ មានរយៈពេល២ថ្ងៃ ចាប់ពីថ្ងៃទី ៧-៨ ខែតុលា ឆ្នាំ២០២០ និងសិក្ខាកាមអញ្ជើញចូលរួមមាន លោក លោកស្រី ប្រធាន ឬអនុប្រធាន គណៈកម្មាធិការអនុសាខាកាកបាទក្រហមកម្ពុជា ក្រុង-ស្រុកទាំង១២ លោក លោកស្រី ហេរញ្ញិកគណៈកម្មាធិការអនុសាខាក្រុង-ស្រុកទាំង១២ និងមន្ត្រីប្រចាំការអនុសាខាកាកបាទក្រហមកម្ពុជា ក្រុង-ស្រុក ទាំង១២ នៃខេត្តសៀមរាប សរុបចំនួន ៤៨នាក់។

វគ្គនេះផ្ដោតលើប្រធានបទសំខាន់ៗមួយចំនួនរួមាន តួនាទីភារកិច្ចគណៈកិត្តិយស គណៈកម្មាធិការ និងមន្ត្រីប្រចាំការអនុសាខា ការយល់ដល់ដឹអពីចលនាអន្តរជាតិកាកបាទក្រហម អឌ្ឍចន្ទក្រហម ការងារគ្រប់គ្រងគ្រោះមហន្តរាយ របាយការណ៍កាលកំណត់ ការគ្រប់គ្រងមូលនិធិ និងចុះបញ្ជីគណនេយ្យ ការរៀបចំខ្លឹមសារអត្ថបទ និងរូបភាព ផ្សព្វផ្សាយតាមបណ្ដាយទំនាក់ទំនងសង្គម…។

នាឱកាសនោះ លោកទៀ សីហា បានពាំនាំនូវការសាកសួរសុខទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចប្រធានតែងគិតគូរខ្ពស់ អំពីសុខទុក្ខរបស់មន្រ្តីនិយោជិតសាខា អនុសាខា អ្នកស្ម័គ្រចិត្ត និងយុវជនកាកបាទក្រហមកម្ពុជាទូទាំងប្រទេស។

លោកបន្តថា ទោះបីជាវគ្គតម្រង់ទិសការងារអនុសាខាក្រុង/ស្រុក ប្រព្រឹត្តទៅរយៈពេល២ថ្ងៃ ដែលជាពេលវេលាខ្លីក្តី ក៏វគ្គនេះ តាមរយៈការបង្ហាញពីប្រធានបទសំខាន់ៗដូចជា មូលដ្ឋានគ្រឹះកាកបាទក្រហម រចនាសម្ព័ន្ធ តួនាទីភារកិច្ចអនុសាខា ក្រុមអ្នកស្ម័គ្រចិត្ត យុវជនកាកបាទក្រហមកម្ពុជា សកម្មភាពវិស័យស្នូលទាំង៤ រួមទាំងការងារគ្រប់គ្រងប្រើប្រាស់ថវិកា ជូនអស់លោក លោកស្រីជាសិក្ខាកាមទាំងអស់ បានយល់ដឹង និងជាជំនួយតម្រង់ទិស សំដៅអនុវត្តសកម្មភាពនៅតាមបណ្តាអនុសាខាបានត្រឹមត្រូវតាមគោលការណ៍របស់កាកបាទក្រហមកម្ពុជាយើង និងក្នុងសកម្មភាពរួមគ្នាអនុវត្តនូវទិសស្លោកដ៏សំខាន់គឺ៖ ធ្វើឱ្យបានកាន់តែច្រើនជាងមុន ធ្វើឱ្យបានកាន់តែល្អជាងមុន ធ្វើឱ្យបានកាន់តែស៊ីជម្រៅ និងទៅឱ្យបានកាន់តែឆ្ងាយជាងមុន។ ចំពោះមុខនេះ ដើម្បីទ្រទ្រង់សកម្មភាពសេវាកម្មមនុស្សធម៌បាននោះ ទាមទារឱ្យគណៈកម្មាធិការអនុសាខាទាំងអស់ខិតខំបន្តរកមូលនិធិពីគ្រប់មជ្ឈដ្ឋាន តាមរយៈការពង្រីកសមាជិភាព ការដាក់ហិបសប្បុរសធម៌ ព្រឹត្តិការណ៍មនុស្សធម៌តាមលទ្ធភាព។ល។

ជាមួយគ្នានេះដែរ ត្រូវបន្តពង្រីក ពង្រឹងសកម្មភាពអ្នកស្ម័គ្រចិត្ត យុវជនកាកបាទក្រហមកម្ពុជាក្នុងអនុសាខា ដែលជាឆ្អឹងខ្នងរបស់សមាគមជាតិយើង។

បន្ទាប់ពីពិធីបិទវគ្គនេះ លោកក៏បានធ្វើការប្រគល់ជូននូវអាវពោងដែលទទួលបានពីកាកបាទក្រហកម្ពុជា ដល់អនុសាខាកាកបាទក្រហមកម្ពុជា ក្រុង-ស្រុក ទាំង១២ផងដែរ៕SRP

ខេត្តកំពង់ចាម​៖ក្នុងពិធីប្រកាសតែងតាំងមន្ត្រីរាជការ ថ្នាក់ដឹកនាំ នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម​ នាព្រឹក​ថ្ងៃទី០៩ ខែតុលា ឆ្នាំ២០២០​នេះ​ លោក​​ កែវ នាឬទ្ធិ អភិបាលរង ខេត្តកំពង់ចាម បាន​ថ្លែង​ជំរុញ​ដល់​មន្ត្រី​ពាក់ព័ន្ធ​​ ឲ្យ​កសាងសមត្ថភាពរបស់ខ្លួនបន្ថែមទៀត តាមរយ:នៃការរៀនសូត្រ ព្រោះការសិក្សាមិនគិតពីអាយុ និងតួនាទីឡើយ ហើយអ្វីដែលសំខាន់នោះ គឺយើងជាមន្ត្រីជំនាញ ត្រូវធ្វើជាមន្ត្រីចុះមូលដ្ឋានឲ្យបានញឹកញាប់ ដើម្បីដឹងពី បញ្ហាប្រឈមជាមួយប្រជាពលរដ្ឋ និងដោះស្រាយជូនគាត់វិញទៅតាមជំនាញរបស់ខ្លួន ដោយកុំធ្វើឲ្យក្លាយជាមន្ត្រីជើង១០នោះឡើយ​។

ក្នុង​ពិធី​នោះ​ដែរ​ លោក​​ កែវ នាឬទ្ធិ
បានសម្តែងការកោតសរសើរចំពោះមន្ទីរកសិកម្មម រុក្ខាប្រមាញ់ និងនេសាទ​ខេត្តកំពង់ចាម ដែលបានខិតខំប្រឹងប្រែងបំពេញការងារ ជំរុញឲ្យវិស័យកសិកម្ម
ឲ្យមាន កំណើនកើនឡើង ពីមួយ ឆ្នាំទៅមួយឆ្នាំទាំងគុណភាព និងបរិមាណ គួរជាទីមោទនៈ។
ជាក់ស្តែងនៅក្នុងឆ្នាំ២០១៩-២០២០នេះ ខេត្តកំពង់ចាមយើងផលិតបាននៅលើផ្ទៃដីសរុបចំនួន ១៣៦ ១១៧ហ.ត បើគិតជា បរិមាណផលស្រវសរុបរហូតដល់ទៅ៤៩៦ ៣០០តោន ហើយក្រោយពីការប្រើប្រាស់សម្រាប់ជាតម្រូវការនៅ ក្នុងខេត្តនោះ យើងក៏មាននៅសល់ស្រវសរុបចំនួន១៧០ ៥៧៣តោន សម្រាប់ធ្វើការនាំចេញក្រៅខេត្តផងដែរ។
លោក​​ កែវ នាឬទ្ធិ​ ក៏បាន​ធ្វើ​ការ​ផ្តាំផ្ញេី​ដល់​មន្ត្រីទាំងអស់ ត្រូវអនុវត្តឲ្យបានខ្ជាប់ខ្ជួន ទៅនឹងគោលនយោបាយរបស់ រាជរដ្ឋាភិបាល​ ដោយ​មានទឹកចិត្តអំណត់អត់ធននឹងការងារ និងមានឆន្ទៈទទួលខុសត្រូវខ្ពស់ប្រកបដោយភាពបត់បែន ព្រមទាំង​ប្រកាន់យកនូវសាមគ្គីភាពល្អ នៅក្នុងអង្គភាព​ ជាពិសេស​ត្រូវ​​បំពេញភារកិច្ច និងអនុវត្តតួនាទីរបស់ខ្លួនឲ្យបានល្អប្រសើរនិងមានក្រមសីលធម៌វិជ្ជាជីវ​:។

គួរបញ្ជាក់ផងដែរថាមន្ត្រី​ដែលត្រូវ​ប្រកាស​តែងតាំង​ក្នុង​ពិធី​នេះ​រួមមាន​៖​ ១-លោក រឿង សូផាត ជានាយរង​ ខណ្ឌរដ្ឋបាលព្រៃឈើកំពង់ចាម នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម ។

២-លោក កែវ មុនី ជានាយរង​ ផ្នែករដ្ឋបាលព្រៃឈើកំពង់ចាមត្រើយស្តាំ នៃមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ចាម។
៣-លោកស្រី ហួ សុភី ជាអនុប្រធានការិយាល័យផ្សព្វផ្សាយកសិកម្ម នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាម​៕SRP

ខេត្តសៀមរាប៖ពលរដ្ឋ៤០០គ្រួសារ រស់នៅក្នុងសង្កាត់ជ្រាវ ក្រុង ខេត្តសៀមរាប ទទួលបានអំណោយពីព្រះគ្រូគុណ្ណវឌ្ឍោ សន សារិទ្ធ ជាទីឧត្តមប្រឹក្សាផ្ទាល់សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិតសម្ដេចសង្ឃរាជ ទេព វង្ស នៃព្រះរាជាណាចក្រកម្ពុជា និងជាព្រះចៅអធិការ វត្តប្រាសាទរាជាធិបតី ហៅវត្តព្រិន្ទ។

ពិធីនេះធ្វើនៅក្នុងភូមិក្រសាំង សង្កាត់ជ្រាវ ក្រុងសៀមរាប នៅរសៀលថ្ងៃទី០៨ ខែតុលា ឆ្នាំ២០២០ ម្សិលមិញ។

ពលរដ្ឋដែលមកទទួលបានអំណោយនេះដោយសារមានការខ្វះខាត ក្នុងវិបត្តិកូវីត១៩ មានចំនួន៧ភូមិក្នុងសង្កាត់ជ្រាវ ក្នុងមួយគ្រួសារទទួលបាន អង្ករ២៥គីឡូ មី១កេស ទឹកត្រី១យួរ ទឹកស៊ីអុីវ១យួរ សារ៉ុង១ ក្រណាត់សរ១ដុំ និងថវិកា១ម៉ឺនរៀលផងដែរ៕SRP

ភ្នំពេញ៖សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា នៅព្រឹកថ្ងៃសុក្រ ថ្ងៃទី០៩ ខែតុលា ឆ្នាំ២០២០ នេះ បានកំពុងអញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រី ដើម្បីពិភាក្សា និងឆ្លងលើរៀបវារៈដូចខាងក្រោម៖

១-សេចក្តីព្រាងកម្មវិធីវិនិយោគសាធារណៈ៣ឆ្នាំរំកិល ២០២១-២០២៣។

២-សេចក្តីព្រាងផែនការសកម្មភាពជាតិស្តីពីការទប់ស្កាត់អំពើហិង្សាលើស្រ្តី ២០១៩-២០២៣។

៣-បញ្ហាៗ សំណើសុំការយល់ព្រមពីគណៈរដ្ឋមន្រ្តី ដើម្បីសុំការអនុម័តពីស្ថាប័ននីតិប្បញ្ញត្តិ៖
៣.១-សេចក្តីព្រាងស្តីពីការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម។
៣.២-សេចក្តីព្រាងច្បាប់ស្តីពីការអនុម័តយល់ព្រមលើ៖
១-ពិធីសារទី៣ ស្តីពីសហការជើងហោះហើរក្នុងស្រុក ក្នុងរង្វង់ទឹកដីនៃប្រទេសជាសមាជិកអាស៊ានណាមួយ។
២-ពិធីសារ៤ ស្តីពីសិទ្ធិហោះហើរកូធ័រមីណល (Co-Terminal Rights)រវាងអាកាសយានដ្ឋាននៅក្នុងទឹកដីនៃប្រទេសជាសមាជិកអាស៊ាន។
៣.៣-សេចក្តីព្រាងច្បាប់ស្តីពីការយល់ព្រមលើ ពិធីសារអនុវត្តកញ្ចប់កិច្ចសន្យាទី៩និងទី១០នៃសេវាកម្មដឹកជញ្ជូនតាមផ្លូវអាកាស ក្រោមកិច្ចព្រមព្រៀងក្របខណ្ឌអាស៊ានស្តីពីសេវាកម្ម។
៣.៤-សេចក្តីព្រាងច្បាប់ស្តីពីការអនុម័តយល់ព្រមលើសន្ធិសញ្ញាស្តីពីការហាមឃាត់អាវុធនុយក្លេអ៊ែរ៕SRP

ខេត្តបន្ទាយមានជ័យ៖ក្នុងពិធីប្រកាសផ្ទេរភារកិច្ច​ និងបំពាក់ឋានន្តរស័ក្តិ​ ជូនមន្ត្រីនគរបាលជាតិ​ អធិការដ្ឋាននគរបាលក្រុងប៉ោយប៉ែត នៅរសៀល ថ្ងៃទី ០៨ ខែ តុលា ឆ្នាំ២០២០នេះ លោកឧត្តមសេនីយ៍ត្រី សិទ្ធិ ឡោះ ស្នងការនគរបាលខេត្តបន្ទាយមានជ័យ បានសម្ដែងនៅសាទរ និងផ្តាំផ្ញើដល់កម្លាំងទាំងអស់បន្តខិតខំ ប្រឹងប្រែង យកចិត្តទុកដាក់ក្នុងការងារ និងបម្រើប្រជាពលរដ្ឋ អោយបានល្អ។
លោក ឧត្ដមសេនីយ៍ត្រី សិទ្ធិ ឡោះ
បានផ្ដល់អនុសាសន៍ដល់អធិការនគរបាលក្រុងប៉ោយប៉ែត និងមន្រ្តីនគរបាលទាំងអស់ អោយបំរើប្រជាពលរដ្ឋដោយស្មោះត្រង់ ហើយលោកបាន ដាក់ចេញទិសដៅអនុវត្តចំនួន ០៤ មាន៖
១- ខិតខំប្រឹងប្រែងបន្តអោយមានសន្តិសុខសណ្ដាប់ធ្នាប់ និងការពារសន្តិភាព។
២- ពង្រឹងអនុវត្តគោលនយោបាយ ភូមិ ឃុំ មានសុវត្ថិភាព។
៣- ដោះស្រាយក្តីកង្វល់ចំពោះមុខរបស់ប្រជាពលរដ្ឋ ០៣ មាន៖
ក/ ក្តីកង្វល់រឿងគ្រោះថ្នាក់ចរាចរណ៍ (នគរបាលខេត្តបន្ទាយមានជ័យនឹងចូលរួមអប់រំ ផ្សព្វផ្សាយ អោយប្រជាពលរដ្ឋគោរពច្បាប់ចររាចរណ៍ និងពង្រឹងបន្ថែមទៀតដើម្បីអោយប្រជាពលរដ្ឋពាក់មួកសុវត្ថិភាព ដាក់ខ្សែក្រវ៉ាត់សុវត្ថិភាព គោរពតាមល្បឿនកំណត់ បង្ការថ្ងៃនេះថ្ងៃស្អែក មិនអោយមានគ្រោះចរាចរណ៍។)
ខ/ ក្តីកង្វល់រឿងគ្រឿងញៀន (នគរបាលខេត្តបន្ទាយមានជ័យ នឹងចូលរួម ខិតខំ បង្ការ ទប់ស្កាត់ បង្រ្កាប កាប្រើប្រាស់ និងចែកចាយដាំដុះ គ្រឿងញៀនដើម្បីអោយភូមិឃុំ ងាកចេញឆ្ងាយពីគ្រឿងញៀន។)
គ/ ក្តីកង្វល់រឿង បទល្មើស លួចទ្រព្យសម្បត្តិឆក់ ប្លន់គ្រប់ប្រភេទ (នគរបាលខេត្តបន្ទាយមានជ័យនឹងចូលរួម អនុវត្តវិធានការរដ្ឋបាល បង្ការ ល្បាត ពួនស្ទាក់ និងបង្រ្កាប ដើម្បីអោយភូមិឃុំមានសុវត្ថិភាព។)
៤- សាមគ្គីភាព ឯកភាពផ្ទៃក្នុង ចូលរួមសហការជាមួយគ្រប់អជ្ញាធរដែនដីពាក់ព័ន្ធទាំងអស់ដើម្បីសំរេចជោគជ័យគ្រប់ភារកិច្ច។

វិធានការទាំងនេះ ស្នងការនគរបាលខេត្ត នឹងដាក់ចេញទៅលើអធិការនគរបាលស្រុក/ក្រុងទាំង៩ និងប៉ុស្តិ៍រដ្ឋបាលឃុំ/សង្កាត់ ទាំង៦៥ នៅក្នុងភូមិសាស្រ្តខេត្តបន្ទាយមានជ័យ ដើម្បីអនុវត្តទាំងអស់គ្នា៕SRP

ខេត្តបណ្ឌលគិរី៖ប្រតិបត្តិការបង្ក្រាបមុខសញ្ញាជួញដូរគ្រឿងញៀន ដកហូតបានថ្នាំញៀនជាច្រេីន។

មន្ត្រីនគរបាលបានឱ្យដឹងថាថ្ងៃពុធថ្ងៃទី៧ខែតុលា ឆ្នាំ២០២០នៅវេលាម៉ោង១០និង០០នាទី កម្លាំងជំនាញការិយាលយ័ប្រឆាំងគ្រឿងញៀន បាសហការជាមួយ កម្លាំងនៃអធិការដ្ឋាននគរបាលក្រុងសែនមនោរម្យ ដឹកនាំសម្របសម្រួលដោយលោក ម៉ម វ៉ាន់ដា ព្រះរាជអាជ្ញារងខេត្តមណ្ឌលគិរី បានចុះអនុវត្តន៍ដីកាបង្គាប់ឱ្យឆែកឆេរលំនៅដ្ឋានលេខ១៥៥៣/២០និងដីកាបង្គាប់ឲ្យនាំជនត្រូវចោទលេខ ១០៨/២០ មកធ្វើការឆែកឆេរលំនៅដ្ឋាន(បន្ទប់ជួល) ក្នុងសំណុំរឿលេខ០៥៨/២០

ករណី រក្សាទុក ជួញដូរ និងប្រើប្រាស់ នូវគ្រឿងញៀនខុសច្បាប់ របស់ជនត្រូវចោទឈ្មោះ ដា រី ហៅ រួន ឡារី ហៅម៉ាប់ ភេទប្រុសនិងឈ្មោះ ជា ផាលីណែត ភេទស្រីនៅចំណុចបន្ទប់ជួល ស្ថិតក្នុងភូមិចំការតែ សង្កាត់ស្ពានមានជយ័ ក្រុងសែនមនោរម្យ ខេត្តមណ្ឌលគិរី។

មន្ត្រីនគរបាលបានបន្តថាករណីនេះសមត្ថកិច្ចបានធ្វើការឆែកឆេរនៅចំពោះមុខជនត្រូវចោទទាំងពីរនាក់ជាលទ្ធផលបានរកឃើញសារធាតុសង្ស័យថា ជាសារធាតុញៀនមានសណ្ឋានជាក្រាមពណ៌សថ្លាចំនួន២កញ្ចប់ធំ ស្មើនឹង២០៥,៤០ក្រាម (ថ្លឹងទាំងសំបក)នៅក្នុងកូនធុងបាស់តូច ។

ចាប់យកវត្ថុតាងបានរួមមាន៖

១.សារធាតុសង្ស័យថា ជាសារធាតុញៀនមានសណ្ឋានជាក្រាមពណ៌សថ្លា ចំនួន២កញ្ចប់ធំ ស្មើនឹង២០៥,៤០ក្រាម (ថ្លឹងទាំងសំបក) ។

២.កូនធុងបាស់ ចំនួន០១គ្រឿង។

ករណីនេះកម្លាំងសមត្ថកិច្ចបានបញ្ជូនមនុស្សទៅដាក់នៅក្នុងពន្ធនាគារវិញ វត្ថុតាងបានបញ្ជូនទៅដល់តុលាការ៕SRP

ខេត្តសៀមរាប៖អាជ្ញាធរខេត្តបានអះអាងថាផ្លូវស៊ីវុត្ថានឹងធ្វើជួសជុលឡើងវិញ បន្ទាប់ពីកប់បំពង់លូនៃគម្រោងផ្គត់ផ្គង់ទឹកស្អាត និងអនាម័យក្រុងក្រោមឥណទានសម្បទារបស់ធនាគារអភិវឌ្ឍន៍អាស៊ី។

លោកទៀ សីហា អភិបាលខេត្ត និងលោក វង្ស ពិសិដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន នៅថ្ងៃព្រហស្បតិ៍ ទី០៨ ខែតុលា ឆ្នាំ២០២០ព្រឹកមិញនេះ បានដឹកនាំកិច្ចប្រជុំវឌ្ឍនភាពការងារកប់បំពង់លូសម្រាប់ផ្គត់ផ្គង់ទឹកស្អាត និងអនាម័យក្រុង និងការងារជួសជុលផ្លូវស៊ីវុត្ថា ក្រុងសៀមរាប។«រូបភាពផ្លុវស៊ីវត្ថា ថតនៅល្ងាចថ្ងៃទី០៨ខែតុលាឆ្នាំ២០២០ដោយបណ្ដាញសៀមរាបប៉ុស្ដិ៍»

សូមជម្រាបថា ផ្លូវស៊ីវត្ថានេះបានធ្វើការកប់បំពង់លូចាប់ពីស្តុបសុខារហូតដល់វត្តចក ដែលគម្រោងនេះសាងសង់ ដើម្បីផ្គត់ផ្គង់ទឹកស្អាត និងអនាម័យក្រុងផងដែរ។ គម្រោងនេះ ជាឥណទានសម្បទារបស់ធនាគារអភិវឌ្ឍន៍អាស៊ី នៃគម្រោងផ្គត់ផ្គង់ទឹកស្អាត និងអនាម័យក្រុង។

បើតាមអាជ្ញាធរខេត្តសៀមរាបថាការសាងសង់គម្រោងនេះ បានកប់បំពង់លូរួចរាល់ ក្រសួងសាធារណការនិងដឹកជញ្ជូននឹងធ្វើការសាងសង់ផ្លូវនេះឡើងវិញ ដែលជាឥណទានសម្បទារបស់ធនាគារអភិវឌ្ឍន៍អាស៊ី៕SRP

ខេត្តសៀមរាប៖មន្ត្រីនគរបាលចរាចណ៍ផ្លូវគោកនៃស្នងការខេត្តសៀមរាបបានថ្លែងប្រាប់បណ្ដាញ«សៀមរាបបប៉ុស្ដិ៍»នៅរសៀលថ្ងៃនេះថាគ្រោះថ្នាក់ចរាចណ៍រថយន្តស៊ីណា បុករថយន្តព្រូសកំពុងចតស្ងៀម និងបុកបង្គោលភ្លើងនៅ ខាងត្បូងស្តុបកោះកេរិ៍្ត  បណ្ដាលឲ្យស្លាប់មនុស្សប្រុសស្រីពីរនាក់ ម្នាក់ជាតៃកុង ម្នាក់ទៀតអ្នករួមដំណើរ​ក្នុងនោះរបួសធ្ងន់ស្ត្រីម្នាក់ និងខូចខាតរថយន្តទាំងពីរគ្រឿងផងដែរ។

ហេតុការណ៍បានកើតឡើងនៅវេលាម៉ោង០៤និង២០នាទីទាបភ្លឺ ក្នុងថ្ងៃទី០៨ខែតុលាឆ្នាំ២០២០នេះ ចំណុចខាងត្បូងស្តុបកោះកេរិ៍្ត ២៥០ម៉ែត្រ ស្ថិតនៅវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប លើដងវិថីវត្តបូព៌ ទល់មុខមន្ទីរពហុព្យាបាលខេរ៉ាអង្គរ២។

មន្ត្រីនគរបាលចរាចណ៍បានបន្តថាករណីនេះស្ត្រីអ្នករួមដំណើរឈ្មោះម៉ាត ម៉ារ៉ានី អាយុ១៨ឆ្នាំ មានទីលំនៅភូមិឃ្លាំងស្បែក ឃុំកំពង់ហ្លួង ស្រុកពញាឮ ខេត្តកណ្ដាល ស្លាប់នៅកន្លែងកើតហេតុ។ ចំណែកតៃកុងរថយន្តម៉ាកស៊ីណាពណ៌ទឹកប្រាក់ពាក់ស្លាកលេខសៀមរាប២C៦០៦៣ ឈ្មោះសាំង សាន ភេទប្រុស អាយុ២៤ឆ្នាំ រស់នៅភូមិគោគដូង សង្កាត់ទឹកវិល ក្រុងសៀមរាប ខេត្តសៀមរាប បានស្លាប់នៅមន្ទីរពេទ្យ។ អ្នករួមដំណើរម្នាក់ទៀតឈ្មោះគឹម រដ្ឋា ភេទស្រីអាយុ២៧ឆ្នាំស្នាក់នៅភូមិត្រាំនាគ សង្កាត់ស្លក្រាម ក្រុងសៀមរាប ខេត្តសៀមរាប រងរបួសធ្ងន់។ ដោយឡែករថយន្តព្រូសពាក់ស្លាកលេខ សៀមរាប ២B៩៥១៥ ពណ៌ទឹកប្រាក់។ នគរបាលបានបញ្ជាក់ថាគ្រោះថ្នាក់ចរាចណ៍នេះគឺរថយន្តម៉ាកស៊ីណា បង្កឡើងដោយខ្លួនឯង។បើតាមការសន្និដ្ឋានតៃកុងរថយន្តអាចមានសារធាតុសុរា។សូមជម្រាបថារថយន្តបង្កហេតុម៉ាកស៊ីណា បើកបរទិសដៅពីខាងត្បូងមកជើង៕SRP

ខេត្តសៀមរាប៖អាជ្ញាធរជាតិអប្សរា បានសម្រេចដកបុគ្គលិកម្នាក់ចេញពីអង្គភាព បន្ទាប់ពីបុគ្គលិករូបនេះត្រូវបានសមមត្ថកិច្ចចាប់ខ្លួនពាក់ព័ន្ធជក់ថ្នាំញៀន។នេះបើតាមសេចក្តីសម្រេចរបស់អគ្គនាយកអាជ្ញាធរជាតិអប្សរា ចុះថ្ងៃទី០៧ ខែតុលា ឆ្នាំ២០២០ម្សិលមិញ។

យោងតាមសេចក្ដីប្រកាសបានឲ្យដឹងថាអាជ្ញាធរជាតិអប្សរាបានសម្រេចលុបឈ្មោះ លោក សៀវ សុមិត្រា ជាបុគ្គលិកបម្រើការងារនៅក្នុងនាយកដ្ឋានសណ្តាប់ធ្នាប់និងកិច្ចសហប្រតិបត្តិការ ដែលប្រព្រឹត្តិខុសធ្ងន់ធ្ងរនឹងច្បាប់ស្ថាប័ន ក៏ដូចជាច្បាប់សង្គម ចេញពីស្ថាប័នអាជ្ញាធរជាតិអប្សរាជាស្ថាពរចាប់ពីថ្ងៃចេញផ្សាយសេចក្តីជូនដំណឹងនេះតទៅ។
ករណីបុគ្គល សៀវ សុមិត្រា ប្រព្រឹត្តិនូវកំហុសឆ្គងអ្វីផ្សេង អំពីថ្ងៃនេះទៅ ពុំទាក់ទងនឹងស្ថាប័នអាជ្ញាធរជាតិអប្សរាទៀតឡើយ។

សូមជម្រាបថានៅយប់ថ្ងៃទី០៦ ខែតុលា ឆ្នាំ២០២០ ខណៈសមត្ថកិច្ចកំពុងសកម្មភាពត្រួតពិនិត្យអាវុធជាតិផ្ទុះនៅត្រង់ចំណុច កែងអាវុធហត្ថក្រុងសៀមរាបចាស់ ស្ថិតនៅភូមិត្រពាំងសេះ សង្កាត់គោកចក ក្រុងសៀមរាប បានចាប់ខ្លួនជនសង្ស័យម្នាក់ឈ្មោះ សៀវ សុមិត្រា ភេទ ប្រុស អាយុ៣០ឆ្នាំ មុខរបរបុគ្គលិកនាយកដ្ឋានសណ្ដាប់ធ្នាប់ និងសហប្រតិបត្តិការ នៃអាជ្ញាធរអប្សារា រស់នៅភូមិណ្ឌល៣ សង្កាត់ស្លក្រាម ក្រុងសៀមរាប មូលហេតុ កម្លាំងបានឆែកកែបម៉ូតូឃើញមានដែកកេះកែឆ្នៃចំនួន០២(ពណ៌លឿង១ ខៀវ១)។ ក្រោយពីយកមកសួរនាំនៅប៉ុស្តិ៍នគរបាលគោកចក ហើយជនសង្ស័យបានសារភាពថាខ្លួនបានប្រើប្រាស់គ្រឿងញៀនប្រភេទទឹកកក កាលពីថ្ងៃទី០៤ ខែតុលា ឆ្នាំ២០២០។ តាមលទ្ធផលតេស្តទឹកនោមមានសញ្ញាវិជ្ជមាន។បច្ចុប្បន្នសមត្ថកិច្ចជំនាញកំពុងរៀបចំសំណុំរឿងចាត់ការតាមច្បាប់៕SRP