ខេត្តសៀមរាប៖អាជ្ញាធរបានប្រកាសថា ដោយមានកិច្ច សហការល្អ និងទំនាក់ទំនងជាមួយនឹងស្ថានកុងស៊ុលជប៉ុនប្រចាំខេត្តសៀមរាប រដ្ឋបាលខេត្ត បានទទួលព័ត៌មានថា មានបុគ្គលម្នាក់ ដែលអះអាងថាជាតំណាងក្រុមហ៊ុន (ដោយពុំស្គាល់អត្តសញ្ញាណ-ច្បាស់) បានប្រាប់បុរសម្នាក់ថា ដើម្បីបានបម្រើការងារនៅស្ថានកុងស៊ុលជប៉ុនប្រចាំខេត្តសៀមរាប ត្រូវទៅដាក់ពាក្យចូលបម្រើការងារ នៅស្ថានកុងស៊ុលនោះ ដោយបង់កម្រៃជើងសាចំនួន ៥០០ដុល្លារ សម្រាប់ក្រុមហ៊ុន និង១០០ដុល្លារ សម្រាប់ស្ថានកុងស៊ុលជប៉ុន។

ពាក់ព័ន្ធនឹងករណីនេះ កាលពីថ្ងៃទី១០ ខែវិច្ឆិកា ឆ្នាំ២០២០ ស្ថានឯកអគ្គរាជទូតជប៉ុនប្រចាំព្រះរាជាណាចក្រកម្ពុជា បានផ្សព្វផ្សាយតាមគណនីហ្វេកប៊ុករបស់ខ្លួន បដិសេធថា ស្ថានឯកអគ្គរាជទូត-ជប៉ុនប្រចាំព្រះរាជាណាចក្រកម្ពុជា និងស្ថានកុងស៊ុលប្រចាំខេត្តសៀមរាប ពុំមានផែនការជ្រើសរើសបុគ្គលិក តាមរយៈក្រុមហ៊ុន ឬទីភ្នាក់ងារស្វែងរកការងារណាមួយនោះឡើយ។

ដោយទទួលបានព័ត៌មាន ពីស្ថានឯកអគ្គរាជទូតជប៉ុនប្រចាំព្រះរាជាណាចក្រកម្ពុជា និងស្ថានកុងស៊ុលជប៉ុនប្រចាំខេត្តសៀមរាប រដ្ឋបាលខេត្តសូមជម្រាបជូនដល់សាធារណជន សូមមានការប្រុងប្រយ័ត្ន អំពីការឆបោក ពីបុគ្គលទុច្ចរិតពាក់ព័ន្ធ នឹងករណីដូចបានបញ្ជាក់ជូនខាងលើ។

ជាមួយគ្នានេះ រដ្ឋបាលខេត្ត ក៏សូមអំពាវនាវដល់សាមីជន ដែលទទួលរងគ្រោះដោយ អំពើ-ល្មើសនេះ សហការជាមួយរដ្ឋបាលខេត្តសៀមរាប ដើម្បីឈានទៅរកការស្រាវជ្រាវ ផ្តល់ព័ត៌មានបន្ថែម ក្នុងការទប់ស្កាត់ បង្ការ និងចាត់វិធានការ ចំពោះបុគ្គលទុច្ចរិតនេះតាមផ្លូវច្បាប់ និងធានាបាននូវផល-ប្រយោជន៍សាធារណជន។

រាល់ព័ត៌មានទាំងនេះ សូមសាមីជនដែលទទួលរងគ្រោះ ដោយអំពើល្មើសនេះ និងសាធារណជនដែលធ្លាប់បានទទួលព័ត៌មាន ឬដឹងពីអត្តសញ្ញាណក្រុមហ៊ុន ឬជន ដែលបានប្រព្រឹត្តអំពើល្មើសនេះ សូមទំនាក់ទំនងមករដ្ឋបាលខេត្តសៀមរាប ឬលេខទូរស័ព្ទ ០១២ ៩០២ ២៩៩/០១២ ៥៩៨ ៦៧២៕SRP

ខេត្តព្រៃវែង៖លោក ស្បោង សារ៉ាត ប្រធានក្រុមប្រឹក្សាខេត្ត បានពាំនាំនូវប្រសាសន៍ផ្ដាំផ្ញើសួរសុខទុក្ខ និងការនឹករលឹកពីសម្ដេចតេជោ ហ៊ុន សែន នាយករដ្ឋមន្ត្រី និងសម្ដេចស ខេង រដ្ឋមន្ត្រីក្រសួងមហាផ្ទៃ ដែលតែងតែគិតគូ សុខទុក្ខ ប្រជាពលរដ្ឋក្រីក្រ មានទុក្ខលំបាក ជនរងគ្រោះ ជនងាយរងគ្រោះ នៅទូទាំងប្រទេស ដោយមិនមានការរើសអើង ប្រកាន់វណ្ណៈ ជាតិសាសនពណ៌សម្បុរ ឬនិន្នាការនយោបាយឡើយ។ ជាពិសេសនោះគឺការដោះស្រាយ ឲ្យបានទាន់ពេលវេលានិងឆាប់រហ័ស មិនត្រូវទុកឲ្យប្រជាពលរដ្ឋ ណាម្នាក់ រងការលំបាកខ្វះខាត និងស្លាប់ដោយសារអត់ស្បៀងអាហារ ដោយគ្មានអាជ្ញាធរមូលដ្ឋានដឹងឭនោះឡើយ។ លោកថ្លែងយ៉ាងដូច្នេះ នៅថ្ងៃទី១១ ខែវិច្ឆិកា ព្រឹកមិញនេះ ក្នុងពិធីចែកអំណោយ របស់ សម្ដេច ស ខេង រដ្ឋមន្ត្រីក្រសួងមហាផ្ទៃ ជូនពលរដ្ឋក្រីក្រចំនួន៦៧គ្រួសារ នៅឃុំស្មោងខាងជើង ស្រុកកំចាយមារ។

លោកប្រធានក្រុមប្រឹក្សាខេត្ត ក៏បានអំពាវនាវ ដល់ប្រជាពលរដ្ឋទាំងអស់ ត្រូវមានការប្រុងប្រយ័ត្នខ្ពស់ចំពោះបញ្ហាអគ្គិភ័យ និងមិនត្រូវធ្វេសប្រហេស ចំពោះជំងឺឆ្លងកូវីដ-១៩ នោះទេ ត្រូវបំផុសឲ្យជាពលរដ្ឋទាំងអស់ មានទំលាប់ធ្វើអនាម័យទប់ស្កាត់ ការចម្លងក្នុងសហគមន៍ ត្រូវបន្តយកចិត្តទុកដាក់ខ្ពស់លាងសំអាតដៃ ឱ្យបានញឹកញាប់ជាមួយសាប៊ូ អាល់កុល ឬជែល ហើយប្រសិនបើចេញទៅទីសាធារណៈ ត្រូវពាក់ម៉ាស់ ឬក្រមាឱ្យបានជាប់ជាប្រចាំអនុវត្តតាមការណែនាំរបស់ក្រសួងសុខាភិបាល ឲ្យបានត្រឹមត្រូវ និងត្រូវបង្កបង្កើនផល ដាំដំណាំ បន្លែ ចិញ្ចឹមសត្វផ្សេងៗ ដើម្បីចូលរួមលើកស្ទួយជីវភាពគ្រួសារ សង្គម និងប្រទេសជាតិ ក្នុងបរិបទជម្ងឺកូវីដ១៩។

អំណោយ ដែលចែកជូនពលរដ្ឋក្រីក្រទាំង៦៧គ្រួសារ មួយគ្រួសារទទួលបានអង្ករ២៥គ.ក មី១កេស និងថវិកា៤០.០០០រៀល៕SRP

ខេត្តសៀមរាប៖សេចក្ដីរាយការណ៍បានដឹងថាទីតាំងរោងម៉ាស៊ីនរ៉ៃអារឈើចំនួនពីរកន្លែង នៅក្រុងសៀមរាប បានដំណើរការ រាប់ខែឆ្នាំមកហើយ ពុំទាន់មាន សមត្ថកិច្ច ជំនាញណា ហ៊ានចុះទៅបង្ក្រាបនោះទេ។ ទីតាំងទី១មានម្ចាស់ឈ្មោះ «សាន» ស្ថិតនៅក្នុងភូមិវត្តស្វាយ សង្កាត់សាលាកំរើក ក្រុងសៀមរាប។ ទី២មានទីតាំង ស្ថិត នៅភូមិវិហារចិន សង្កាត់ស្វាយដង្គំ ក្រុងសៀមរាប មានឈ្មោះ «អេង ហៅតាអេង»។

យោងតាមប្រភពបានឲ្យដឹងថាទីតាំងរោងម៉ាស៊ីនអាឈើទាំងពីរខាងលើ គេតែងតែសង្កេតឃើញ មានឈ្មួញដឹកឈើ តាមរថយន្ត នឹងរុឺម៉ក ដឹកចូលដោយមួយថ្ងៃៗ ជាច្រើនគ្រឿង ដោយពួកគេកោតខ្លាចមិនញញើតអ្វីទាំងអស់។

ទីតាំងរោងម៉ាស៊ីនរ៉ៃអារឈើ ទាំងពីរខាងលើនេះ គេនៅពុំទាន់ដឹងថាមានលិខិតអនុញ្ញាត ពីក្រសួងពាក់ព័ន្ធ ឬយ៉ាងណានោះទេ។ ក៏ប៉ុន្តែសមត្ថកិច្ចធ្លាប់បានប្រាប់អ្នកសារព័ត៌មានថា ទីតាំងរោងម៉ាស៊ីនរ៉ៃអារឈើខាងលើនោះ មានច្បាប់អនុញ្ញាត ដើម្បីធ្វើអាជីវកម្ម ឈើក្នុងស្រុក។

ប៉ុន្តែគេមិនបានបញ្ជាក់ថា ឈើដែលចូលមកទីតាំង រោងម៉ាស៊ីនអារឈើនោះ ដឹកចេញពីក្រុមហ៊ុនណាមួយ ដែលមានច្បាប់អនុញ្ញាត ពីរដ្ឋាភិបាល ស្របច្បាប់នោះឡើយ គឺឃើញតែក្រុមឈ្មួញ ដឹកជញ្ជូន ចេញចូលៗ តាមរថយន្តនឹងរុឺម៉ក តែប៉ុណ្ណោះ។

ពាក់ព័ន្ធករណីនេះ បណ្ដាញ«សៀមរាបប៉ុស្ដិ៍» នៅមិនទាន់ ទទួលបានការបំភ្លឺ ពីលោកម៉ុង ប៊ុនលីម នាយខណ្ឌរដ្ឋបាលព្រៃឈើ សៀមរាបនៅឡើយទេ។ ទោះយ៉ាងណា ពលរដ្ឋ រំពឹងថា សមត្ថកិច្ចជាពិសេស រដ្ឋបាលព្រៃឈើខេត្តសៀមរាប និងចុះចាត់វិធានការចំពោះទីតាំងរោងម៉ាស៊ីនអារឈើទាំងពីរខាងលើ នេះជាក់ជាពុំខានឡើយ៕SRP

ភ្នំពេញ៖លោកដួង តារា អនុរដ្ឋលេខាធិការទីស្តីការគណៈរដ្ឋមន្ត្រី និងជាជំនួយការផ្ទាល់ សម្ដេចតេជោ ហ៊ុន សែន នាយករដ្ឋមន្ត្រី នៅមុននេះបន្តិច បានសរសេរសារនៅលើទំព័រហ្វេសប៊ុកផ្លូវការរបស់លោកថា៖«សុខភាពខ្ញុំធម្មតាទេថ្ងៃនេះ កម្តៅគឺ ៣៦.៥ »។ ខ្ញុំកំពុង ធ្វេីចត្តាឡីស័កនៅក្នុងផ្ទះហើយរង់ចាំធ្វើតេស្ត២លើកទៀត។
ទោះបីកន្លងទៅខ្ញុំបានចូលរួមដោយប្រយោលក្តី ក៏ខ្ញុំត្រូវធ្វើតេស្តពិនិត្យអោយបានច្បាស់គ្រប់៤លើក។
លោកដួង តារា បានបន្តថា៖ ថ្ងៃនេះ “សារព័ត៌មានជាភាសាចិនជានហ្វា” បានធ្វើការកែតម្រូវការផ្សព្វផ្សាយព័ត៌មានពិតឡើងវិញ ព្រោះកាលពីម្សិលមិញបានសរសេរថាខ្ញុំ “ មានជំងឺកូវីដ១៩វិជ្ជមាន” ។ ខ្ញុំសួរថាបានព័ត៌មានហ្នឹងមកពីណា? គាត់ថាយកមកពី “កម្ពុជាថ្មី”។ ប៉ុន្តែពេលនេះ ជានហ្វា បានកែមកផ្សាយព័ត៌មានត្រឹមត្រូវវិញ ព្រមទាំងមានការសូមទោសជាសាធារណៈផងដែរ។

ព័ត៌មានគេរៀបចំបញ្ជាអោយធ្វើ, ព័ត៌មានឮតាមគេ, ឬព័ត៌មានឮគេថា, ឬយកតាមកាសែត ដោយគ្មានការសួរនាំអោយបានច្បាស់ពីប្រភពដើម គឺមិនត្រឹមតែបំផ្លាញកិត្តិយសបុគ្គលទេ ថែមទាំងបំផ្លាញសង្គមជាតិទៀតផង។ ពាក់ព័ន្ធនឹងកូវីដ១៩ ព័ត៌មានពិតនឹងផ្លូវការតែមួយគត់គឺព័ត៌មានចេញពីក្រសួងសុខាភិបាល។

ខ្ញុំបាទសូមគាំទ្រនឹងគោរពអនុវត្តន៍ធ្វើតាមប្រសាសន៍ណែនាំដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីកម្ពុជា “ សូមកុំអោយកំទេចភ្លើងក្លាយជាអគ្គីភ័យតាមរយៈការធ្វេសប្រហែសរបស់យើង សូមជួយពន្លត់ភ្លើង និង សុំកុំអង្គុយបក់ផ្សែង”។

អរគុណបងប្អូនជាទីគោរពស្រឡាញ់ទាំងអស់ពីបេះដូង។ យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម និង សូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង៕SRP

ខេត្តត្បូងឃ្មុំ៖សេចក្ដីរាយការណ៍បឋមបានឲ្យដឹងថា ករណីគ្រោះថ្នាក់ចរាចរណ៍ រវាងរថយន្តយីឌុប បុកជាមួយនិងរថយន្តសង្គ្រោះបន្ទាន់ របស់មន្ទីរពេទ្យបង្អែកខេត្តរតនគិរី ក្នុងទិសដៅបញ្ច្រាសគ្នា កាលពីវេលាម៉ោង៨និង៤០នាទីយប់ ថ្ងៃទី១០ ខែវិច្ឆិកា ឆ្នាំ២០២០ ត្រង់ចំណុចបង្គោលគីឡូម៉ែត្រលេខ៣៥-៣៦ ស្ថិតនៅភូមិស្វាយកាំបិត ឃុំសេដា ស្រុកតំបែរ ខេត្តត្បូងឃ្មុំ។

សេចក្ដីរាយការណ៍បន្តថា នៅក្នុងរថយន្តសង្គ្រោះបន្ទាន់ មានមនុស្សចំនួន៥នាក់ តៃកុងរថយន្តម្នាក់(របួសស្រាល) គ្រូពេទ្យស្រីម្នាក់(របួសធ្ងន់បាក់ភ្លៅម្ខាង) អ្នកកំដរអ្នកជំងឺ២នាក់(របួសធ្ងន់)និងអ្នកជំងឺបានស្លាប់ បន្ទាប់ពីបានជួបគ្រោះថ្នាក់ចរាចរណ៍។
ដោយឡែកអ្នកគ្រូពេទ្យ ត្រូវបានគេដឹកបញ្ជូន ទៅមន្ទីរពេទ្យកាល់ម៉ែត នៅរាជធានីភ្នំពេញដើម្បីជួយសង្គ្រោះ៕SRP

ខេត្តសៀមរាប៖ស្នងការប៉ូលិសខេត្តសៀមរាប បានធ្វើការបដិសេធថា«គ្មានករណីចោរ ចាំស្ទាក់ប្លន់ នៅតាមផ្លូវ ទៅអង្គរវត្ត នោះទេ» ការចេញបដិសេធនេះ ក្រោយពីមានហ្វេសប៊ុកមួយបានបង្ហោះថា «អ្នកគ្រប់គ្នាពេលយប់ឡើងស្ងាត់កុំជិះម៉ូតូតាមផ្លូវអង្គរកន្លែងលក់គំនូរព្រោះមានចោរនៅចាំស្ទាក់ប្លន់ម្ដុំហ្នឹង»។

ពាក់ព័ន្ធករណីនេះស្នងការប៉ូលិសខេត្តនៅព្រឹកថ្ងៃទី១១ខែ វិច្ឆិកានេះ បានបញ្ជាក់ថា«ករណីដែលគណនីហ្វេសបុកឈ្មោះ លី វណ្ណដា បានបង្ហោះកន្លងមក ជាការមិនពិត»។

ស្នងការប៉ូលិសបានបន្តថានៅថ្ងៃទី១០ ខែវិច្ឆិកា ឆ្នាំ២០២០ វេលាម៉ោង២០៖០០នាទី កម្លាំងប៉ុស្តិ៍បានចុះទៅដល់ទីតាំងផ្ទះ របស់ម្ចាស់គណនីហ្វេសបុកឈ្មោះ លី វណ្ណដា មានទីតាំងនៅខាងលិចផ្សាលើភូមិ ដកពោធិ៍ សង្កាត់ស្លក្រាម ក្រុងសៀមរាប ដែលបានសរសេរសារបង្ហោះ ថា «អ្នកគ្រប់គ្នាពេលយប់ឡើងស្ងាត់កុំជិះម៉ូតូតាមផ្លូវអង្គរកន្លែងលក់គំនូរព្រោះមានចោរនៅចាំស្ទាក់ប្លន់ម្ដុំហ្នឹង»។ នគរបាលបានចុះទៅជួបជាមួយឈ្មោះ លី វណ្ណដា ភេទស្រី អាយុ២៦ឆ្នាំ មុខរបរអ្នកធ្វើនំពៀរលក់ (អ្នកបង្ហោះ) បានអោយដឹងថា នៅថ្ងៃកើតហេតុថ្ងៃទី០៦ ខែវិច្ឆិកា ឆ្នាំ២០២០ វេលាម៉ោងប្រហែល២១និង៤០នាទី ពេលខ្លួនមិនបាននៅជាមួយប្ដីទេ ខ្លួនកំពុងនៅផ្ទះ បានទទួលទូរស័ព្ទពីប្ដីតាមរយៈលេខ ០១៥៨៨៥៨៤៨ ថាមានគេតាមបងពីក្រោយ បងមើលតាមកញ្ចក់ឃើញគេកាន់កាំបិត គេជិះម៉ូតូគៀរផ្ដួលបង បងរត់ចូលក្នុងរបងព្រៃឧទ្យាន អាជ្ញាធរអប្សរា នៅពេលឮដូច្នេះ ខ្លួនមានការភ័យខ្លាច និងបានឆាត រកបងប្អូនអោយទៅជួយមើលប្ដី ។ ស្រាប់តែនៅវេលាម៉ោងប្រហែល ២៣និង៣០នាទី ខ្លួនក៏បានឃើញប្ដី ជិះម៉ូតូត្រលប់មកផ្ទះ ដោយសុវត្ថិភាព និងមិនមានរបួសស្នាមអ្វីទាំងអស់ ម៉ូតូក៏មិនមានខូចខាតអ្វីដែរ។

នគរបាលបានស្រង់សំដី ការបំភ្លឺឈ្មោះ ស៊ាន វ៉ាន់នី ភេទប្រុស អាយុ២៧ឆ្នាំ មុខរបរជាងតោនឡាន(ការ៉ាស់ជាងម៉ៅផ្សាភូមិភាគ) ថា ៖ នៅថ្ងៃទី០៦ ខែវិច្ឆិកា ឆ្នាំ២០២០ ខ្លួនបានផឹកស្រាបៀរហ្គេនប៊ឺគ អស់ចំនួន១កេសកន្លះ គ្នា០៤នាក់ ក្រោយពីផឹករួចវេលាម៉ោង ២១និង៣៥នាទី ខ្លួនបានចេញពីការ៉ាស់ជួសជុលឡាន ជាងម៉ៅ ត្រលប់មកផ្ទះវិញដោយជិះម៉ូតូម៉ាក Zoomer X ពណ៌ក្រហមជិះត្រឡប់មកផ្ទះវិញ ពេលជិះមកដល់ចំណុចមុខជាងគំនូរផ្លូវកូម៉ៃ មានគុម្ពឫស្សីនៅពីមុខស្រាប់តែមានម៉ូតូពីរគ្រឿង ជិះគ្នា០៤នាក់ជិះពីក្រោយ មានម៉ូតូ០១គ្រឿង ជិះវ៉ាមកខាងមុខ នៅពេលនោះខ្លួនបានបត់ចង្កូត ទៅខាងកើតផ្លូវ ហើយផ្ដួលម៉ូតូរបស់ខ្លួនឯង ដកសោចុះរត់ចូលព្រៃឧទ្យានអង្គរតែម្ដង រួចហើយក៏បានខលមកប្រពន្ធអោយជួយ។ លុះក្រោយមកម៉ូតូទាំងពីរគ្រឿងនោះក៏ជិះហួសទៅបាត់ទៅ ទើបខ្លួនចេញមកក្រៅហើយបានជួបជាមួយជាងគំនូរ និងសមត្ថកិច្ចពីរនាក់ ដែលខ្លួនស្គាល់ថាឯកសណ្ឋានប៉ូលីសអន្តរាគមន៍ បានធ្វើកំណត់ហេតុរូបគាត់នៅលើម៉ូតូ រួចខ្លួនក៏បានជិះម៉ូតូត្រឡប់មកផ្ទះមក។

បើតាមសន្និដ្ឋា របស់សមត្ថកិច្ចចុះទៅដល់កន្លែងកើតហេតុ ដែលជនរងគ្រោះ ចង្អុលបង្ហាញ សួរបំភ្លឺជាងគំនូរបាននិយាយអោយដឹងថា នៅថ្ងៃកើតហេតុអំឡុងម៉ោង២១ ទៅម៉ោង២២ មិនមានករណីដូចដែល ជនរងគ្រោះនិយាយទេ។ កន្លែងកើតហេតុមានភ្លើងបំភ្លឺ មិនដូចដែលឈ្មោះ លី វណ្ណដា សរសេរក្នុងហ្វេសប៊ុកនោះទេ។ ដោយជាងគំនូរមិនបានឮសម្លេងស្រែកអោយជួយទេ ឮតែសម្លេងឆ្កែព្រូសប៉ុណ្ណោះ៕SRP

ខេត្តបន្ទាយមានជ័យ៖មានការលើកឡើងថាមន្ត្រីគយច្រកទ្វារអន្តរជាតិប៉ោយប៉ែត បានគប់គិតគ្នាប្រព្រឹត្តអំពើពុករលួយយ៉ាងពេញបន្ទុកដោយមិនកោតខ្លាចញញើតអ្វីទាំងអស់។

យោងតាមប្រភពពីអាជីវករបានឲ្យដឹងថា មេឈ្មួញដែលធ្លាប់រកស៊ីដោយប្រើប្រាស់ កម្លាំងកម្មករ អូសរទេះដឹកជញ្ជូនទំនិញ ចេញពីទឹកដីថៃ តាមច្រកទ្វារអន្តរជាតិប៉ោយប៉ែត​ ចូលកម្ពុជា ឥឡូវនេះពួកគេបង្វែរ ការជួល រថយន្តរបស់ថៃ ម្ដងដើម្បី ដឹកជញ្ជូនទំនិញ យកមកទម្លាក់ នៅកន្លែងផែស្ងួតវិញម្តង ដោយមានមន្រ្តីគយនិងរដ្ឋាករដែលនៅកន្លែងទីលានរទេះ មកត្រួតពិនិត្យ។

ប្រភពបានបន្តថាឈ្មួញដឹកទំនិញចេញចេញ ពីថៃ ចូលមក កម្ពុជា មានដូចជាមេឈ្មួញ ជាទី.ថោងឡេង. កូនកុង ម៉ែអាឆុន. យាយវិត. ហ៊ាណយ. ថោងស៊ីង. ចែស្រី. ចែអៀង. និងចែអាង. ឈ្មួញទាំងនោះជាប្រភពចំណូលរបស់គយច្រកទ្វារអន្តរជាតិប៉ោតប៉ែត ដែលមិនចេះរីងស្ងួត។ ទោះយ៉ាងណាឈ្មួញដែលរកស៊ីដឹកទំនិញទាំងនោះបានបង្ហើបថាពួកគេដឹកជញ្ជូន គឺត្រូវបានបង់ប្រាក់ឲ្យទៅស្ថាប័នគយប៉ោយប៉ែត ជាប្រចាំ ដោយគយនៅច្រកទ្វារប៉ោយប៉ែត រាប់ក្បាលឡាន បង់ប្រាក់ដោយមិនមានការ សរសេរវិក័្កយបត្រ អ្វីទាំងអស់។

បើតាមប្រភពបានឲ្យដឹងទៀតថា ក្រុមឈ្មួញដឹកទំនិញ ចេញ ចូល ថៃ -កម្ពុជា ថា សព្វថ្ងៃនៅច្រកទ្វារអន្តរជាតិប៉ោយប៉ែត រថយន្តដែលដឹកទំនិញចេញចូល ថៃ កម្ពុជា គឺមន្ត្រីគយប្រចាំការនៅទីនោះ កូនចៅរបស់លោក ងួន កុសល តម្រូវអោយក្រុមឈ្មួញដឹកទំនិញបង់លុយ ក្នុងក្បាលឡាន មួយចាប់ពី ២លាន ទៅ៤លានរៀលដោយមិនមានចេញវិក័្កយបត្រនោះទេ។ សូម្បីតែទំនិញទាំងនោះ តិចតួច មិនពេញរថយន្តក៏ដោយ ក៏មន្ត្រីគយខាងលើមិនបន្ធូរបន្ថយ ក្នុងការបង់លុយនោះដែរ។

ប្រភពពីមន្ត្រីពាក់ព័ន្ធនៅច្រកទ្វារអន្តរជាតិប៉ោយប៉ែត បានឲ្យដឹងថា មួយរយៈកូវិដ19-នេះ គ្រប់ទឹកតែម្តងហើយ លោក ងួន កុសល ប្រធានការិយាល័យគយ ច្រកទ្វារអន្តរជាតិប៉ោយប៉ែត និងបក្ខពួកគប់គិត គ្នាប្រព្រឹត្តអំពើពុករលួយកាន់តែខ្លាំងក្លាជាងមុន។

ប្រភពពីជាតំណាងឈ្មួញដឹកជញ្ជូនទំនិញតាមច្រកទ្វារអន្តរជាតិប៉ោយប៉ែត បានត្អូញត្អែរថា សព្វថ្ងៃនេះ លោក ងួន កុសល ប្រធានការិយាល័យគយច្រកទ្វារអន្តរជាតិប៉ោយប៉ែត តម្រូវទារលុយច្រើនពេក ធ្វើអោយពួកគាត់ពិបាកក្នុងការរកស៊ីខ្លាំងណាស់។ ដោយពួកគាត់យល់ថាការបង់លុយមិនមានចេញវិក្កយបត្រ បែបនេះអាចជាអំពើពុករលួយ ជាប្រព័ន្ធតែម្ដង។

ហេតុនេះសូមលោកបណ្ឌិត គុណ ញឹម អគ្គនាយកដ្ឋានគយ និងរដ្ឋាករកម្ពុជា មិនគួរមើលរំលងអំពើពុករលួយ របស់លោក ងួន កុសល ប្រធានការិយាល័យគយ ច្រកទ្វារអន្តរជាតិប៉ោយប៉ែត នោះទេ។

បណ្ដាញ«សៀមរាបប៉ុស្ដិ៍» នៅមិនទាន់ទទួលបានការបកស្រាយបំភ្លឺពី​លោក ងួន កុសល ប្រធានការិយាល័យគយ ច្រកទ្វារអន្តរជាតិប៉ោយប៉ែត បាននៅឡើយទេ ជុំវិញការលើកឡើងរបស់អាជីវករនេះ។ ប៉ុន្តែលោកងួន កុសល ធ្លាប់ប្រាប់«សៀមរាបប៉ុស្ដិ៍ថាសុទ្ធតែមានលិខិតអនុញ្ញាតទាំងអស់។ ដោយឡែកចំពោះសំណួរពាក់ព័ន្ធនឹងការយកលុយ $៥០០ក្នុងមួយរថយន្តដោយមិនចេញ វិក្កយបត្រ លោក ងួន កុសល ថា គ្មានទេ៕SRP

ខេត្តសៀមរាប៖បន្ទាប់ពីមានសេចក្ដីប្រកាសរបស់អាជ្ញាធរខេត្តសៀមរាបស្ដីពីការផ្អាកអាជីវកម្ម KTV ក្លឹបកម្សាន្ត ខារ៉ាអូខេ រង្គសាល ឌីស្កូតែក បៀរហ្គាឌិន រួចមកគេសង្កេតឃើញហាងនៅក្រុងសៀមរាប បានបិទជាបណ្ដោះសន្ន។

សុំបញ្ជាក់ថា នៅយប់ថ្ងៃទី១០ ខែវិច្ឆិកា ឆ្នាំ២០២០ មន្ត្រីខេត្តសៀមរាប បានចុះត្រួតពិនិត្យ និងទប់ស្កាត់ការរីករាលដាលជម្ងឺកូវីដ១៩ ក្នុងវិស័យទេសចរណ៍ ខេត្តសៀមរាប នឹងបានអរគុណ ដល់បណ្តារ ម្ចាស់អាជីវកម្មដ្ឋាន KTV ក្លឹបកម្សាន្ត ខារ៉ាអូខេ រង្គសាល ឌីស្កូតែក បៀរហ្គាឌិន នៅក្នុងភូមិសាស្រ្តក្រុងសៀមរាប ទាំង អស់ ដែលបានចូល រួម សងការ ផ្អាកអាជីវកម្មជាបណ្តោះអាសន្ន តាមសេចក្តីជូនដំណឹង របស់ក្រសួងសុខាភិបាល ក្រសួងទេសចរណ៍ និងសេចក្តីជូនដំណឹងរបស់រដ្ឋបាលខេត្តសៀមរាប។

ក្រុមការងារចំរុះនឹងបន្តចុះត្រួតពិនិត្យជាប្រចាំ នៅតាមមណ្ឌលកម្សាន្ត ទេសចរណ៍មនុស្សពេញវ័យក្នុងមូលដ្ឋានខេត្តសៀមរាប។

ការចូលរួមរបស់បងប្អូន បានបង្ហាញពីឆន្ទៈ ចូលរួមបង្ការទប់ស្កាត់ ជំងឺ កូវិដ១៩ កុំអោយ ឆ្លងចូល សហគមន៍យើង និងបានចូលរួមគិតគូរអំពី សុវត្ថិភាព សង្គម ដោយភាពទទួលខុសត្រូវផងដែរ។

សូមរំលឹកថានៅថ្ងៃទី១០ខែ វិច្ឆិកា ឆ្នាំ២០២០ ម្សិលមិញ រដ្ឋបាលខេត្ត បានចេញសេចក្ដីប្រកាសមួយ ស្តីពីបន្តការបិទសកម្មភាពអាជីវកម្មដ្ឋាន KTV ក្លឹបកម្សាន្ត(ខារ៉ាអូខេ រង្គសាល ឌីស្តូតែកបៀរហ្គាឌិន)រោងភាពយន្ត និងសារមន្ទីរ នៅក្នុងភូមិសាស្ត្រខេត្តសៀមរាប។

ជាមួយគ្នានេះអាជ្ញាធរខេត្តសៀមរាប បានព្រមានថា ប្រសិនបើរកឃើញថា ក្លឹបកំសាន្តណា ដែលមិនព្រមបិទតាមការណែនាំរបស់រាជរដ្ឋាភិបាល អាជ្ញាធរខេត្តសៀមរាប នឹងចាត់វិធានការទៅតាមផ្លូវច្បាប់ ដូចជាការដកអាជ្ញាប័ណ្ណធ្វើអាជីវកម្ម ផងដែរ៕SRP

ខេត្តសៀមរាប៖សមត្ថកិច្ចបានឲ្យដឹងថាជនបរទេសម្នាក់បានដេកស្លាប់នៅក្នុងផ្ទះសំណាក់មួយកន្លែង។ ហេតុការណ៍ភ្ញាក់ផ្អើលបានកើតឡើងនៅម៉ោង២១និង២០នាទី  ថ្ងៃទី១០ ខែវិច្ឆិកាឆ្នាំ ២០២០ នៅក្នុងបន្ទប់ជួលផ្ទះសំណាក់ ណាហ្គា(NAGA) ស្ថិតនៅក្នុងភូមិតាភុល សង្កាត់ស្វាយដង្គំ ក្រុងសៀមរាប។

សមត្ថកិច្ចបានបន្តថាបន្ទាប់ពីទទួលព័ត៌មានពីបុគ្គលិកផ្ទះសំណាក់ណាហ្គា ថា មានជនបរទេសស្លាប់ភ្លាមៗ សមត្ថកិច្ចបានចុះដល់កន្លែងកើតហេតុពិនិត្យឃើញថា ជនរងគ្រោះឈ្មោះ   NEWTON IAN JAME ភេទ  ប្រុស  កើតថ្ងៃទី ២៨-០៨-១៩៦៣  ជនជាតិ  អង់គ្លេស  កាន់លិខិតឆ្លងដែនលេខ ៥៤៩៩២៦២៨៣  ជាភ្ញៀវ ទេសចរ ណ៍ ស្នាក់នៅផ្ទះសំណាក់ ណាហ្គា ខាងលើ។

តាមការស្រាវជ្រាវរបស់ សមត្ថកិច្ចជំនាញ និងលោកវេជ្ជបណ្ឌិត អ៊ិត ឆបឆរត័្ន គ្រូពេទ្យអមតុលាការបានសនិដ្ឋានថា៖ជនរងគ្រោះស្លាប់ រយៈពេលពីរថ្ងៃមកហើយដោយសារ ជំងឺគាំងបេះដូង។ ករណីនេះសមត្ថកិច្ចបានបញ្ជូនសាកសព ទៅតម្កល់ទុកបណ្តោះអាសន្ននៅវត្ត ទឹកថ្លា រាជធានីភ្នំពេញ ដើម្បីរង់ចាំការសម្រេចពីក្រុមគ្រួសារនិងស្ថានទូត៕SRP

ខេត្តបាត់ដំបង៖លោក ណុប ដារ៉ា អភិបាលរងខេត្តបាត់ដំបង នៅថ្ងៃទី១០ ខែវិច្ឆិកា ឆ្នាំ២០២០ បានអញ្ជើញចុះសំណេះសំណាលសួរសុខទុកនិងស្វែងយល់អំពីការលក់ដូរប្រចាំថ្ងៃ របស់អាជីវករព្រមទាំងបានពិសារបាយ សាមគ្គីជាមួយអាជីវករ ផ្សារណាត់ប្រកបដោយក្កីរីករាយ។

អាជីវករផ្សារណាត់ បានឲ្យដឹងថានេះ ជាលើកទីមួយហើយ ដែលឃើញលោកអភិបាលរងខេត្ត បានចុះមកសំណេះសំណាលស្វែងយល់បន្ថែម លើជីវភាពនិងការលក់ដូរប្រចាំថ្ងៃរបស់ពួកគាត់។ ដោយពួកគាត់ពិតជារីករាយយ៉ាងខ្លាំងចំពោះវត្តមាន របស់លោកណុប ដារ៉ា។

អាជីវករបានបន្ថែមទៀតថា បាយ១ពេលចំណាយ អស់ ២០០ដុល្លារ ហូបនៅហាងទំនើប ហូបបានតែមនុស្ស ២, ៣នាក់ ប៉ុណ្ណោះ តែបាយមួយពេលនាពេលនេះចំណាយ ២០០ដុល្លារដូចគ្នា អាចហូបបានរហូតទៅដល់ ៣០នាក់ ហើយឆ្ងាញ់ដូចគ្នា ថែមទាំងប្រកបដោយក្កីរីករាយយ៉ាងក្រៃលែងទៀតផង។

ឆ្លៀតក្នុងឱកាសនោះ លោកណុប ដារ៉ា បានធ្វើការផ្សព្វផ្សាយអប់រំបន្ថែមនូវវិធានការណ៍ ការពារការរីករាលដាលនូវជំងឺកូវីដ-១៩ ដល់អាជីវករ នៅក្នុងផ្សារណាត់ ផងដែរ៕SRP

ខេត្តសៀមរាប៖អាជ្ញាធរខេត្តនៅថ្ងៃទី១០ខែ វិច្ឆិកា ឆ្នាំ២០២០ នេះបានចេញសេចក្ដីប្រកាសមួយ ស្តីពីបន្តការបិទសកម្មភាពអាជីវកម្មដ្ឋាន KTV ក្លឹបកម្សាន្ត(ខារ៉ាអូខេ រង្គសាល ឌីស្តូតែកបៀរហ្គាឌិន)រោងភាពយន្ត និងសារមន្ទីរ នៅក្នុងភូមិសាស្ត្រខេត្តសៀមរាប។

អាជ្ញាធរខេត្តសៀមរាប នៅរសៀលនេះដែរ បានបើកកិច្ចបានដឹកនាំកិច្ចប្រជុំផ្សព្វផ្សាយ សេចក្តីជូនដំណឹងស្តីពីការបន្តបិទសកម្មភាពអាជីកម្មដ្ឋាន KTV ក្លឹបកម្សាន្ត (ខារ៉ាអូខេ រង្គសាល ឌីស្កូតែក បៀរហ្គាឌិន) រោងភាពយន្ត និងសារមន្ទីរ នៅក្នុងភូមិសាស្រ្តខេត្តសៀមរាប  និងសេចក្តីជូនដំណឹងរបស់ក្រសួងសុខាភិបាល ក្រសួងទេសចរណ៍ និងសេចក្តីជូនដំណឹងរបស់រដ្ឋបាលខេត្ត។

កិច្ចប្រជុំនេះធ្វើនៅសាលរដ្ឋបាលខេត្តសៀមរាប ក្រោមវត្តមាន លោក ពៅ ពិសិដ្ឋ អភិបាលរង តំណាងលោក ទៀ សីហា អភិបាលខេត្តសៀមរាប។

នៅក្នុងកិច្ចប្រជុំនេះ អភិបាលរងខេត្តបានស្នើដល់ម្ចាស់អាជីវកម្មទាំងអស់ ចូលរួមទប់ស្កាត់ ការរីករាលដាលជម្ងឺកូវីដ១៩ និងម្ចាស់អាជីវកម្ម មណ្ឌលកម្សាន្តទេសចរណ៍ មនុស្សពេញវ័យទាំងអស់ផងដែរ។ លោកបានបន្តថាដោយសារស្ថានភាពជំងឺកូវីដ នៅមិនទាន់បានធូរស្រាល ដូចនេះដើម្បីសុវត្ថិភាព ក្នុងការឆ្លងចូលសហគម សូមបងប្អូនម្ចាស់អាជីវកម្មដ្ឋាន KTV ក្លឹបកម្សាន្ត (ខារ៉ាអូខេ រង្គសាល ឌីស្កូតែក បៀរហ្គាឌិន) រោងភាពយន្ត និងសារមន្ទីរ នៅក្នុងភូមិសាស្រ្តខេត្តសៀមរាប សូមធ្វើការផ្អាកជាបណ្តោះអាសន្នសិន ហើយរង់ចាំការជូនដំណឹងថ្មី បន្ថែមពីរាជរដ្ឋាភិបាល និងអាជ្ញាធរពាក់ព័ន្ធ៕SRP

«រដ្ឋមន្ត្រីក្រសួងកិច្ចការនារី អ៉ឹង កន្ថាផាវី»

ខេត្តសៀមរាប៖លោកស្រី «ក្រង់ ស៊ីថាវី» ត្រូវបាន ក្រសួងកិច្ចការនារី តែងតាំង ជាប្រធានមន្ទីរកិច្ចការនារីខេត្តសៀមរាប។«លោកស្រី ក្រង់ ស៊ីថាវី ប្រធានមន្ទីរកិច្ចការនារីខេត្តសៀមរាបថ្មី»

នេះបើយោងតាមសេចក្ដីប្រកាសតែងតាំង របស់ក្រសួងកិច្ចការនារី ដែលចុះហត្ថលេខាដោយ លោកជំទាវ អ៉ឹង កន្ថាផាវី នៅថ្ងៃទី១០ខែ វិច្ឆិកាឆ្នាំ២០២០នេះ៕SRP