ភ្នំពេញ៖មន្ត្រីនគរបាលម្នាក់ បានដកកាំភ្លើងភ្ជង់ប្រពន្ធគេ ឲ្យដោះសម្លៀកបំពាក់ រួចផ្ដួលនាងទៅនឹងដីចាប់រំលោភរហូតបានសម្រេច ហើយព្យាយាម រត់គេចខ្លួន តែត្រូវជនរងគ្រោះ និងសមត្ថកិច្ច ប្រើល្បិច ធ្វើជាណាត់ជួបគ្នាដើម្បីចាប់ខ្លួន។

ហេតុការណ៍នេះបានកើតឡើងកាលពីវេលាម៉ោង ១០និង២០នាទីថ្ងៃទី១២ ខែវិច្ឆិកា ឆ្នាំ២០២០ នៅចំណុចវិមានឈ្នះឈ្នះ ភូមិគប់ស្រូវតូច សង្កាត់គោករកា ខណ្ឌព្រែកព្នៅ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យ មានឈ្មោះ ខេម វណ្ណឌី ភេទប្រុស អាយុ៣៣ឆ្នាំ មុខរបរជានគរបាលជាតិ ស្នាក់នៅភូមិបាក់ខែង សង្កាត់ព្រែកលាប ខណ្ឌជ្រោយចង្វារ ត្រូវបានចាប់ខ្លួននៅថ្ងៃទី១៤ វិច្ឆិកា ម្សិលមិញ។

ចំណែកជនរងគ្រោះ មានអាយុ២៦ឆ្នាំ ស្នាក់នៅសង្កាត់សំរោងក្រោម ខណ្ឌពោធិ៍សែនជ័យ។

វត្ថុតាងដកហូតរួមមាន៖ កាំភ្លើងម៉ាក ROLO លេខ 874015 ចំនួន១ដើម, គ្រាប់កាំភ្លើងចំនួន ០៥គ្រាប់, រថយន្តម៉ាកកូរ៉ូឡា ពណ៌ទឹកប្រាក់ ស៊េរី ១៩៩៤ ពាក់ស្លាកលេខ ភ្នំពេញ 2W-4327 មួយគ្រឿង និងទូរស័ព្ទ១គ្រឿង។

តាមប្រភពព័ត៌មានពីជនរងគ្រោះ បានបញ្ជាក់ប្រាប់សមត្ថកិច្ចថា មុនពេលកើតហេតុ ជនរងគ្រោះនិងប្តី បានជិះម៉ូតូម៉ាក ហុងដា ចេញពីផ្ទះមកដកក្រអៅឈូក នៅចំណុចកើតហេតុ។ ដោយប្តីបានឲ្យប្រពន្ធដែលជាជនរងគ្រោះ នៅឈរចាំម៉ូតូ ហើយប្តីជាអ្នកចុះទៅដក។ មួយសន្ទុះក្រោយមក ជនសង្ស័យ បានជិះម៉ូតូមកឈប់ក្បែររបង រួចបានដើរសំដៅ មករកជនរងគ្រោះ ដោយសួរថាប្តីទៅណា? តែជនរងគ្រោះ មិនតបនោះទេ រួចជនសង្ស័យ ក៏ពឹងជនរងគ្រោះ ឲ្យជួយបង្វែរក្បាលទូក នៅក្បែរនោះ តែជនរងគ្រោះ បដិសេធ ហើយក៏ដើរចេញមកក្រៅរបងថ្ម ក៏ត្រូវជនសង្ស័យ ដកកាំភ្លើងម៉ាក ROLO មកភ្ជង់ដើមទ្រូង បង្ខំឲ្យជនរងគ្រោះ ដោះសម្លៀកបំពាក់ រួចចាប់រំលោភ រហូតបានសម្រេច។

ពេលនោះ ជនរងគ្រោះ ក៏ប្រើល្បិចធ្វើជាសុំលេខទូរស័ព្ទ ជនសង្ស័យ ដើម្បីទុកសម្រាប់ទាក់ទងគ្នាពេលក្រោយ ហើយជនសង្ស័យក៏បានឲ្យលេខទូរស័ព្ទ រួចបានដើរទៅយកម៉ូតូ ជិះគេចទៅទិសខាងកើតបាត់។
ក្រោយមកជនរងគ្រោះ បានមកប្តឹងសមត្ថកិច្ចប៉ុស្តិ៍គោករកា ដោយសមត្ថកិច្ច បានសហការជាមួយជនរងគ្រោះ ប្រើល្បិចតេហៅជនសង្ស័យ ណាត់ជួប ជនរងគ្រោះម្តងទៀត នៅចំណុចផ្លូវបេតុង ភូមិផ្សារលិច សង្កាត់ព្រែកព្នៅ លុះជនសង្ស័យ មកដល់ឃើញសមត្ថកិច្ច ក៏ព្យាយាម បើករថយន្តម៉ាកកូរ៉ូឡា ស៊េរី១៩៩៦ គេចរហូតដល់ចំណុចវិមានឈ្នះឈ្នះ ក៏ត្រូវបានសមត្ថកិច្ចចាប់ឃាត់ខ្លួនតែម្តង។

បច្ចុប្បន្ន ជនសង្ស័យ ត្រូវបានឃាត់ខ្លួនបណ្តោះអាសន្ន នៅអធិការដ្ឋាននគរបាលខណ្ឌព្រែកព្នៅ ដើម្បីកសាងសំណុំរឿងបញ្ជូនទៅតុលាការចាត់ការតាមច្បាប់៕SRP

ខេត្តសៀមរាប៖អាជ្ញាធរខេត្តសៀមរាប សូមធ្វើការណែនាំដល់ម្ចាស់ក្រុមហ៊ុន សហគ្រាស ឱសថស្ថានគ្រប់ប្រភេទ ហាងទំនិញ និងតាមបណ្តាទីផ្សារនានា សូមកុំឆ្លៀតឱកាស លក់ដំឡើងថ្លៃទំនិញ ដូចជា ម៉ាស អាល់កុល និងសម្ភារផ្សេងៗក្នុងអំឡុងពេលឆ្លងវីរុសកូវដ(Covid-19)។
បើតាមសេចក្ដីប្រកាសបានដឹងថា
សូមជម្រាបជូនដល់ម្ចាស់ក្រុមហ៊ុន សហគ្រាស ឱសថស្ថានគ្រប់ប្រភេទ ម្ចាស់ហាងទំនិញ និងសាធារណជន ជ្រាបថា៖ បច្ចុប្បន្ននេះ ដោយមានការរីករាលដាលនៃការចម្លងវីរុស កូវីដ(Covid-19) ពាក់ព័ន្ធនឹងព្រឹត្តិការណ៍ ០៣ វិច្ឆិកា នៅរាជធានីភ្នំពេញ នៃព្រះរាជាណាចក្រកម្ពុជា។ ជាមួយគ្នានេះដែរ រដ្ឋបាលខេត្តសៀមរាប សង្កេតឃើញថានៅតាមបណ្តាក្រុមហ៊ុន សហគ្រាស ឱសថស្ថាន គ្រប់ប្រភេទ ហាងទំនិញ និងតាមបណ្តាទីផ្សារនានា បានឆ្លៀតឱកាសក្នុងការលក់ដំឡើងថ្លៃទំនិញគ្រឿង បរិភោគ និងសម្ភារ ប្រើប្រាស់ចាំបាច់មួយចំនួន ដូចជា ម៉ាស អាល់កុល និងសម្ភារផ្សេងៗ។
ដូចនេះ រដ្ឋបាលខេត្តសៀមរាប សូមធ្វើការណែនាំដល់ម្ចាស់ក្រុមហ៊ុន សហគ្រាស ឱសថស្ថានគ្រប់ប្រភេទ ហាងទំនិញ និងតាមបណ្តាទីផ្សារនានា សូមប្រកាន់នូវស្មារតីសាមគ្គី ព្រមទាំងអនុវត្តតាមច្បាប់ស្តីពី កិច្ចការពារអ្នកប្រើប្រាស់ និងចូលរួមលើកកម្ពស់ការប្រកួតប្រជែងដោយសុចរិត និងមិនត្រូវឆ្លៀតឱកាស លក់ដំឡើងថ្លៃទំនិញ ដូចជា ម៉ាស អាល់កុល និងសម្ភារផ្សេងៗឡើយ។
ក្នុងករណីរកឃើញភាពមិន ប្រក្រតីណាមួយ សូមមេត្តាផ្តល់ព័ត៌មានតាមរយៈលេខទូរស័ព្ទ៖
០១១ ៨៧៦ ៣៩៣
/០១៧ ២៨៣ ៣៣៣
/០១២ ៥៩៨ ៦៧២
/០១២ ៥៥០ ៦៣៥
«ដើម្បីអាជ្ញាធរមានសមត្ថកិច្ចចាត់វិធានការតាមផ្លូវច្បាប់ និង លិខិតបទដ្ឋានគតិយុត្តជាធរមាន»។

រដ្ឋបាលខេត្តសៀមរាប សង្ឃឹមជឿជាក់យ៉ាងមុតមាំថា ម្ចាស់ក្រុមហ៊ុន សហគ្រាស ឱសថស្ថាន គ្រប់ប្រភេទ ហាងទំនិញ និងតាមបណ្តាទីផ្សារនានា ព្រមទាំងសាធារណជន នឹងចូលរួមអនុវត្តតាមសេចក្តី ជូនដំណឹងនេះឱ្យមានប្រសិទ្ធភាពខ្ពស់ ដើម្បីចូលរួមកាត់បន្ថយការឆ្លងវីរុសកូវីដ (Covid-19)៕SRP «រូបភាពកម្លាំងនគរបាលប៉ុស្តិ៍សង្កាត់ស្លក្រាម និងប្រជាការពារ ចុះណែនាំឱ្យអាជីវករនិងពលរដ្ឋ ពាក់ម៉ាសនៅផ្សារលើធំថ្មីខេត្តសៀមរាប»

ភ្នំពេញ៖នៅក្នុងសារលិខិត សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ផ្ញើជូនចំពោះនាយករដ្ឋមន្រ្តីឡាវ សម្ដេចតេជោបានបញ្ជាក់ថា តាងនាមនៃរាជរដ្ឋាភិបាលនៃព្រះរាជាណាចក្រកម្ពុជា ខ្ញុំសូមធ្វើការបរិច្ចាគនូវម៉ាសចំនួន២លាន និងសម្ភារៈវិជ្ជសាស្រ្តមួយចំនួនទៀត ដូចមានក្នុងបញ្ជីរាយនាម ជូនដល់រដ្ឋាភិបាល និងប្រជាជននៃសាធារណរដ្ឋប្រជាធិបតេយ្យប្រជាមានិតឡាវ។

ទន្ទឹមនេះ ខ្ញុំក៏សូមចាត់តាំងលោកជំទាវ យក់ សម្បត្តិ រដ្ឋលេខាធិការ ក្រសួងសុខាភិបាល ដើម្បីនាំយកអំណោយខាងលើទៅទីក្រុងវៀងច័ន្ទ នាព្រឹកថ្ងៃច័ន្ទសប្តាហ៍ក្រោយ តាមជើងយន្តហោះពិសេស។ខ្ញុំមានជំនឿយ៉ាងមុតមាំថា ក្រោមការដឹកនាំដ៏ឈ្លាសវៃរបស់ឯកឧត្តម នៃសាធារណរដ្ឋប្រជាធិបតេយ្យប្រជាមានិតឡាវ នឹងទទួលបានជោគជ័យ ក្នុងការប្រយុទ្ធប្រឆាំងនឹងជំងឺកូវីដ១៩ ហើយយើងនឹងងើបឡើងវិញយ៉ាងរឹងមាំជាមួយគ្នា៕SRP

ភ្នំពេញ៖ប្រមុខដឹកនាំកម្ពុជា សម្តេចតេជោ ហ៊ុន សែន បានផ្ញើលិខិតជូន នាយករដ្ឋមន្ត្រីឡាវ ដែលបានសួរសុខទុក្ខ គឺជាកាយវិការបង្ហាញនូវទំនាក់ទំនងពិសេស មិត្តភាពដ៏ជិតស្និទ្ធ ក្នុងភាពជាបងប្អូន នៃប្រទេសទាំងពីរ។

សូមអានលិខិតខាងក្រោម៖

ខេត្តព្រះវិហារ៖រថយន្ដវ៉េអង ដឹកកូនឈើធ្នង់ របស់សាលារាជធានីភ្នំពេញ បានធ្លាក់ចូលប្រឡាយក្រឡាប់ផ្ងារជើង។

សមត្ថកិច្ចបានឲដឹងថា រថយន្ដវ៉េអង ក្បាលសរ ទ្រុងខៀវ ពាក់ស្លាកលេខ ព្រះសីហនុ 4A-3650 ដឹកកូនឈើប្រភេទធ្នុងចេញពីភូមិបាក់កាំ ឃុំឈានមុខ ស្រុកត្បែងមានជ័យ ខេត្តព្រះវិហារ យកទៅដាំនៅរាជធានីភ្នំពេញ” របស់សាលាក្រុងភ្នំពេញ” លុះដល់ចំណុចកើតហេតុខាងលើ រថយន្ដបានដាច់ចង្កូតក្រឡាប់ចូលប្រឡាយក្បែរ ចិញ្ចេីមផ្លូវ ខ្ទាតចេញកូនឈើធ្នង់ រាប់រយដើម។

ប្រភពបានបន្តទៀតថា រថយន្ដខាងលើរបស់សាលារាជធានីភ្នំពេញ ដែលប្រមូលទិញកូនឈើប្រភេទធ្នុងពីប្រជាពលរដ្ឋខាងលើដែលពួកគាត់បានគាស់យកផ្សាំរួចលក់ក្នុង១ដើមតំលៃ១ម៉ឺនរៀល។

បើតាមសមត្ថកិច្ចថារថយន្ដវ៉េអង២គ្រឿងរបស់សាលារាជធានីភ្នំពេញបានដឹកកូនឈើធ្នង់ចេញពីចំណុចខាងលើ ១គ្រឿងត្រូវបានដឹកចេញទៅដោយសុវត្ថិភាព​ នឹងមួយគ្រឿងទៀតជួប គ្រោះថ្នាក់ចរាចរណ៍ ប៉ុន្តែមិនបណ្ដាលឲ្យអ្នកបេីកបរនិងអ្នកដំណើររបួស ធ្ងន់ធ្ងរនោះទេ។​

ជុំវិញការដឹកកូនឈើធ្នង់ នេះដែរលោកពឹង ទ្រីដា ប្រធានមន្ទីកសិកម្មនិងរុក្ខាប្រមាញ់ខេត្តព្រះវិហារ បានឲ្យដឹងថា រថយន្ដវ៉េអងដឹកកូនឈើធ្នង់ខាងលើ ពិតជា របស់សាលារាជធានីភ្នំពេញ នឹងមានច្បាប់ត្រឹមត្រូវពិតប្រាកដមែន។

សូមបញ្ជាក់ថាហេតុការណ៍នេះបានកើតឡើងកាលពីយប់ថ្ងៃទី១១ ខែវិច្ឆិកា ឆ្នាំ២០២០ លើដងផ្លូវជាតិលេខ៦២ ចន្លោះគីឡូម៉ែត្រលេខ៧២.៧៣ ស្ថិតនៅក្នុងភូមិសាស្ត្រ ចំណុចព្រៃពពេល ក្នុងភូមិត្រពាំងទទឹម ឃុំរមទម ស្រុករវៀង ខេត្តព្រះវិហារ។បង្កដោយខ្លួនឯង មូលហេតុដាច់ចង្កូតរ៉េ បណ្ដាលឲ្យរាគធ្លាក់ផ្លូវតែម្ដង៕SRP

ភ្នំពេញ៖លោកដួង តារា អនុរដ្ឋលេខាធិការទីស្តីការគណៈរដ្ឋមន្ត្រីនិងជាជំនួយការផ្ទាល់សម្ដេចតេជោហ៊ុន សែន នាយករដ្ឋមន្ត្រី បានបង្ហោះសារមួយនៅលើទំព័រផេកហ្វេសប៊ុករបស់លោកថា៖ មានប្រជាពលរដ្ឋ បានខលប្រាប់ខ្ញុំថា មានបុរសម្នាក់ជាទាហាន ឈ្មោះ ហុង លឹមហ៊ី បានបង្កហិង្សាទៅលើមីងឈ្មោះ អ៊ិត រុំ អាយុ៥៨ឆ្នាំ បណ្តាលអោយគាត់សន្លប់ ហើយបានដឹកមកព្យាបាលនៅពេទ្យបង្អែកត្រពាំងក្រឡឹង។ មីង អ៊ិត រុំ សន្លប់អស់មួយព្រឹក ហើយនោមអត់ចេញទៀតផង។ ករណីហិង្សានេះ គឺបណ្តាលមកពី ជនបង្កហេតុ ធ្លាប់មាន ទំនាស់ដីធ្លីជាមួយ មីង អ៊ិត រុំ ដែល ឯកឧត្តមហ៊ុន ម៉ានី តំណាងរាស្ត្រខេត្តកំពង់ស្ពឺ បានជួយមីង ពីមុនម្តងរួចមកហើយ។

លោកដួង តារា បានបន្តថា៖សមត្ថកិច្ចនគរបាលព្រហ្មទណ្ឌស្រុកភ្នំស្រួច បានសហការ ជាមួយជំនាញពាក់ព័ន្ធ ទៅអញ្ជើញ ទាហារូបស្រស់មកដោះស្រាយទទួលខុសត្រូវ តែគាត់បានរត់ចូលបន្ទាយ ដែលមានមេបញ្ជាការឈ្មោះ ឡាញ់ កៅ នៅកងរថក្រោះ អាសេអូ។ ការបង្ករបួសស្នាមលើអ្នកដ៏ទៃ គឺជាបទល្មើសជាក់ស្តែងដែលត្រូវទទួលខុសត្រូវចំពោះមុខច្បាប់ ? មិនមែនជា ការប្រព្រឹត្តបទល្មើសយោធាទេ ? ហើយក៏មិនអាចប្រើ តួនាទីទាហាន ក្នុងការគេចខ្លួនដែរ …..

លោកដួង តារាបានបញ្ជាក់ថា៖
ទោះជនប្រព្រឹត្តិល្មើស បានចូលទៅពួនក្នុងបន្ទាយ យករួចខ្លួន ឬចូលទៅសុំទោសមេមកដោះស្រាយជាមួយពលរដ្ឋ ក៏ជននោះ មិនអាចរួចផុតពី ការទទួលខុសត្រូវចំពោះមុខច្បាប់ឡើយ !!!!

បើបានធ្វើខុសហើយ សូមចេញខ្លួនមកទទួលខុសត្រូវលើអ្នករងគ្រោះអោយស័ក្តសម ជាទហានមានវិន័យ ហើយកសាងខ្លួនអោយបានល្អទៅគឺពលរដ្ឋនឹងស្រឡាញ់ពេញចិត្តមិនខាន។

«កុំទម្លាប់វាយបង្ករបួសស្នាមដល់អ្នកដទៃហេីយគេចរត់ចូលបន្ទាយយករួចខ្លួនបែបនេះ មិនល្អទេ»។ តើបងប្អូនយល់យ៉ាងណាដែរ?

យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម និង សូមមានចិត្តអាណិតស្រឡាញ់ ពលរដ្ឋយើងគ្រប់ទីកន្លែង ដោយគ្មានការរើសអើង៕SRP

ខេត្តកំពង់ចាម៖លំនៅដ្ឋានពលរដ្ឋចំនួន ២ខ្នង ត្រូវបានអគ្គិភ័យ ឆាប់ឆេះបំផ្លាញទាំងស្រុងរួមទាំងទ្រព្យសម្បត្តិផងដែរ។

ហេតុការណ៍បានកើតឡើងថ្ងៃទី១៤ ខែវិច្ឆិកា ឆ្នាំ២០២០ វេលាម៉ោង១៤និង៣០នាទីរសៀល នៅចំណុចភូមិត្រពាំងឈូក ឃុំមេសរជ្រៃ ស្រុកស្ទឹងត្រង់ ខេត្តកំពង់ចាម។
សមត្ថកិច្ចបានឲ្យដឹងថាទី1.ឈ្នោះ ពៅ យ៉ន ភេទ ស្រី អាយុ៧២ឆ្នាំ សញ្ជាតិខ្មែរ ផ្ទះទំហំ 4×8ម៉ែត្រ សង់ពីឈើប្រក់ស័ង្កសី ឆេះខូចខាតទាំងស្រុង និងបានខូចខាតសម្ភាររួមមាន÷
+ខោ.អាវមួយចំនួន
+ទូរទស្សចំនួន១គ្រឿង
+អង្ករចំនួន១បេ
+កង់ចំនួន ៣គ្រឿង
+ចាន.ឆ្នាំង និងសម្ភារប្រើប្រាស់មួយចំនួន។

ទី2.ឈ្មោះ លន់ ហ៊ាង ភេទ ប្រុស អាយុ59 ឆ្នាំ សញ្ជាតិខ្មែរ ផ្ទះ03ខ្នង ទំហំ 6×15ម៉ែត្រ សង់ពីឈើរប្រក់ក្បឿង ឆេះខូចខាតទាំងស្រុង រួមមាន
+ខោ.អាវ មួយចំនួន
+ចាន ឆ្នាំងនិងសម្ភារប្រើប្រាស់មួយចំនួន។
បលតាមការសន្និដ្ឋានៈ មូលហេតុឆ្លងចរន្តអគ្គិសនី។
គ្រោះថ្នាក់អគ្គិភ័យខាងលើនេះ មិនបណ្តាលឲ្យមានគ្រោះថ្នាក់ដល់អាយុជីវិតមនុស្សឡើយ។
កម្លាំងអន្តរាគមន៍បានប្រើប្រាស់រថយន្តពន្លត់អគ្គិភ័យ ចំនួន២គ្រឿង គឺរថយន្តពន្លត់អគ្គីភ័យរបស់អធិការដ្ឋាននគរបាលស្រុកចំការលើ០១គ្រឿង -និងរថយន្តអធិការដ្ឋាននគរបាលស្រុកស្ទឹងត្រង់០១គ្រឿង ដោយប្រើប្រាស់ទឹកអស់ចំនួន៣ឡាន។សូមបញ្ជាក់ថា ក្រោយពីទទួលបានព័ត៌មាន ពីប្រជាពលរដ្ឋ ករណីអគ្គិភ័យនេះ លោក ទុន ណេត អភិបាលស្រុកស្ទឹងត្រង់ បានដឹកនាំកម្លាំងអន្តរាគមន៍របស់ស្រុក បាញ់ពន្លត់អគ្គិភ័យផងដែរ៕SRP

ខេត្តសៀមរាប៖កម្លាំងអាវុធហត្ថខេត្តសៀមរាប បានចាប់ខ្លួនស្ត្រីនិងបុរសពីរនាក់ពាក់ពន្ធនឹងករណី៖ បទទារុណកម្ម និងអំពើឃោឃៅដោយមានស្ថានទម្ងន់ទោស។

មន្ត្រីអាវុធហត្ថខេត្តសៀមរាបបានថ្លែងប្រាប់បណ្ដាញ«សៀមរាបប៉ុស្តិ៍ថា» ដោយមានការសម្របស្រួលពី លិកកើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប នៅវេលាម៉ោង ១០:០០ នាទី ថ្ងៃទី១៣ ខែវិច្ឆិកា ឆ្នាំ២០២០ ម្សិលមិញ កម្លាំងការិយាល័យព្រហ្មទណ្ឌ កងរាជអាវុធហត្ថខេត្តសៀមរាប និង មូលដ្ឋានកងរាជអាវុធហត្ថស្រុកស្វាយលើ សហការណ៍ជាមួយកំលាំងកងពលតូចលេខ៦ នៃកងពលធំអន្ដគមន៍លេខ២ បានឃាត់ខ្លួនជនសង្ស័យចំនួន ០២នាក់៖
១.ឈ្មោះ ហាប់ ផល ភេទប្រុស អាយុ ៣៥ឆ្នាំ មុខរបរ យោធា និងប្រពន្ធឈ្មោះ ឈឿង វីន ភេទស្រី អាយុ ៣៥ឆ្នាំ មុខរបរ មេផ្ទះ ទីលំនៅបច្ចុប្បន្នភូមិរុងរឿង ឃុំកន្ទួត ស្រុកស្វាយលើ ខេត្តសៀមរាប (ដែលត្រូវជាឪពុកម្តាយចិញ្ចឹម សពឈ្មោះ ផល សុភាន់) ដែលជាប់ពាក់ព័ន្ធនឹងករណី៖ បទទារុណកម្ម និង អំពើឃោឃៅដោយមានស្ថានទម្ងន់ទោសដោយសារមរណៈភាពនៃជនរងគ្រោះ ប្រព្រឹត្តកាលពីវេលាម៉ោង ១៩ និង ៣០នាទី ថ្ងៃទី០៨ ខែវិច្ឆិកា ឆ្នាំ២០២០ នៅចំណុចភូមិរុងរឿង ឃុំកន្ទួត ស្រុកស្វាយលើ ខេត្តសៀមរាប។

សពឈ្មោះ ផល សុភាន់ ភេទប្រុស អាយុ ០៦ឆ្នាំ ទីលំនៅបច្ចុប្បន្ន ភូមិរុងរឿង ឃុំកន្ទួត ស្រុកស្វាយលើ ខេត្តសៀមរាប មានរបួសនៅលើផ្ទៃមុខមានស្នាមជាំ, ស្លឹកត្រចៀករយះដាច់ និងមានដំបៅរលួយ, បែកក្បាល ដោយមានស្នាមរបួសថ្មី និង ចាស់, នៅលើដងខ្លួនមានស្នាមវាយជាច្រើនកន្លែង, បាក់ធ្មេញអស់ចំនួន ០៣, បាក់ដៃខាងស្តាំ និង បាក់ស្មងជើងខាងស្តាំ។

បើតាមមន្ត្រីអាវុធហត្ថបានថ្លែងថា
កាលពីព្រឹកថ្ងៃទី១០ ខែវិច្ឆិកា ឆ្នាំ២០២០ មូលដ្ឋានកងរាជអាវុធហត្ថស្រុកស្វាយលើបានទទួលដំណឹងថា មានករណីក្មេងប្រុសឈ្មោះ ផល សុភាន់ អាយុ ០៦ឆ្នាំ ត្រូវជាកូនចិញ្ចឹមរបស់ឈ្មោះ ហាប់ ផល ភេទប្រុស អាយុ ៣៥ឆ្នាំ មុខរបរ យោធា និង ឈ្មោះ ឈឿង វីន ភេទស្រី អាយុ ៣៥ឆ្នាំ មុខរបរ មេផ្ទះ ទីលំនៅបច្ចុប្បន្ន ភូមិរុងរឿង ឃុំកន្ទួត ស្រុកស្វាយលើ ខេត្តសៀមរាប បានពុលដំឡូងមី នៅចំណុច ភូមិរុងរឿង ឃុំកន្ទួត ស្រុកស្វាយលើ ខេត្តសៀមរាប (ដែលជាភូមិនៅដាច់ស្រយាលពីទីរួមស្រុក) ហើយកំលាំងមូលដ្ឋានស្រុកស្វាយលើបានចុះទៅដល់កន្លែងកើតហេតុ ហើយស្តាប់ចម្លើយសាក្សីនៅទីនោះទើបសន្និដ្ឋានថា ក្មេងប្រុសខាងលើមិនបានស្លាប់ដោយសារពុលដំឡូងមីឡើយ ហើយក៏បានរាយការណ៍មកការិយាល័យជំនាញកងរាជអាវុធហត្ថខេត្តសៀមរាប ទើបកំលាំងជំនាញការិយាល័យព្រហ្មទណ្ឌ ចុះទៅសហការណ៍ជាមួយកំលាំងមូលដ្ឋានកងរាជអាវុធហត្ថស្រុកស្វាយលើ ចុះធ្វើការស៊ើបអង្កេតករណីខាងលើ ដល់កន្លែងកើតហេតុតែម្តង។ ប៉ុន្តែឈ្មោះ ហាប់ ផល និងប្រពន្ធឈ្មោះ ឈឿង វីន បានរត់គេចខ្លួនចេញពីលំនៅដ្ឋាន ទៅស្នាក់នៅក្នុងបន្ទាយវរៈសេនាតូចលេខ២៦៤ ប្រចាំទិសស្រុកត្រពាំងប្រសាទ ចំណុះឲ្យកងពលធំអន្តរាគមន៍លេខ២ បាត់ទៅហើយ។ រហូតដល់ថ្ងៃទី១៣ ខែវិច្ឆិកា ឆ្នាំ២០២០ ទើបមេបញ្ជាការរងកងពលតូចលេខ៦ នៃវរៈសេនាតូចលេខ២៦៤ ចំណុះឲ្យកងពលធំអន្តរាគមន៍លេខ២ បានប្រគល់ជនសង្ស័យឈ្មោះ ហាប់ ផល និងប្រពន្ធឈ្មោះ ឈឿង វីន មកឲ្យមូលដ្ឋានកងរាជអាវុធហត្ថស្រុកស្វាយលើ និងកំលាំងជំនាញ ដើម្បីធ្វើការសាកសួរ។ បន្ទាប់ពីកំលាំងជំនាញធ្វើការស្តាប់ចម្លើយ ជនសង្ស័យទាំងពីរនាក់ខាងលើបានសារភាពថា ពួកគេបានវាយធ្វើបាបទៅលើកូនចិញ្ចឹមឈ្មោះ ផល សុភាន់ ជាច្រើនលើកច្រើនសារពិតប្រាកដមែន។ ចំពោះចម្លើយដែលពួកគេនិយាយប្រាប់ឪពុកជនរងគ្រោះ និងរាយការណ៍ប្រាប់សមត្ថកិច្ចថា ជនរងគ្រោះស្លាប់ដោយសារពុលដំឡូងមី គឺមិនសមហេតុផលឡើយ គឺជនរងគ្រោះស្លាប់ដោយសារការប្រើអំពើហិង្សា ឬ អំពើទារុណកម្ម ទើបបណ្តាលឲ្យជនរងគ្រោះស្លាប់បាត់បង់ជីវិតតែម្តង។បច្ចុប្បន្នជំនាញ កំពុងកសាងសំណុំរឿងបញ្ជូនជនសង្ស័យទៅសាលាដំបូងខេត្តសៀមរាប ដើម្បីចាត់ការតាមនីតិវិធី៕SRP

ខេត្តព្រះវិហារ៖ក្រុមហ៊ុន ម៉ាឃល ឡូជីស្ទីក (ខេមបូឌា) ត្រូវបានគេរាយការណ៍ថាបានកំពុងតែបានដៃក្នុងការ កាប់បំផ្លាញព្រៃឈើ យ៉ាងគគ្រឹកគគ្រេង បំផុតនៅក្នុងខេត្តព្រះវិហារ។ ចំណែកអាជ្ញាធរខេត្តនិងមន្ត្រីជំនាញពាក់ព័ន្ធបានរក្សាភាពស្ងប់ស្ងាត់ ទុកឱកាសឲ្យក្រុមហ៊ុនមួយនេះ កាប់បំផ្លាញព្រៃឈើតាមតែអំពើចិត្ត។ ការដែលអាជ្ញាធរនិងសមត្ថកិច្ចពាក់ព័ន្ធ ធ្វើមិនដឹង មិនឮ ហើយសម្ងំស្ងៀមបែបនេះ គេសង្ស័យថា បានទទួលផលប្រយោជន៍ពីក្រុមហ៊ុន។

សេចក្ដីរាយការណ៍បានឲ្យដឹងថាក្រុមហ៊ុន ម៉ាឃល ឡូជីស្ទីក (ខេមបូឌា) ប្រើប្រាស់រថយន្តបាកុង ដឹកជញ្ជូនព្រៃឈើនៅក្នុងព្រៃតំបន់ចំណុចដើមត្នោតមួយដើម,ព្រៃបាក់កន ស្ថិតនៅក្នុងឃុំរៀបរយ ស្រុករវៀង ខេត្តព្រះវិហារដែលមានព្រំប្រទល់ជាមួយចំណុចអូរភ្ញៀវ ឃុំដងកាំបិត ស្រុកសណ្ដាន់ ខេត្តកំពង់ធំ។

សេចក្ដីរាយការណ៍បន្តថានៅរសៀលថ្ងៃទី១២ និងព្រឹកថ្ងៃទី១៣ ខែវិច្ឆិកា ឆ្នាំ២០២០ ក្រុមអ្នកសារព័ត៌មាន បានជួបប្រទះឃើញរថយន្តបាកុង ប្រមាណជិត១០គ្រឿង កំពុងធ្វើសកម្មភាពដឹកជញ្ជូនឈើមូលនៅតំបន់ខាងលើ។ ក្នុងនោះ ក៏ឃើញត្រាក់ទ័រចំនួន២គ្រឿង កំពុងតែអូសឈើ និងរថយន្តបាកុង២គ្រឿងទៀត កំពុងតែខាឈើឡើងលើរថយន្ត និងដឹកឈើចូលឃ្លាំង រួមគំនរឈើដូចរូបភាពជាក់ស្ដែងខាងក្រោម។

បើតាមសេចក្ដីរាយការណ៍ថាក្រុមឈ្មួញអ្នកមានអំណាច កំពុងសំរុកកាប់ឈើដឹកជញ្ជូន ឮលាន់សម្លេងរណារយន្ត និងម៉ាស៊ីនអារឈើ ទ្រហឹងពេញព្រៃ ដោយពួកគេទាំងនោះបានប្រើប្រាស់រថយន្តបាកុង សម្រាប់ដឹកឈើមកទម្លាក់នៅចំណុចក្នុងព្រៃតំបន់ព្រៃបាក់កន ជាប់នឹងព្រៃឡង់ឋិតនៅក្នុងឃុំរៀបរយ ស្រុករវៀង ខេត្តព្រះវិហារ។

អ្នកភូមិនិយាយថា ពួកគាត់កាប់ឈើបន្តិចបន្តួច សម្រាប់សង់ជាផ្ទះសម្បែង ត្រូវបានអាជ្ញាធរ រដ្ឋបាលព្រៃឈើ និងសមត្ថកិច្ចពាក់ព័ន្ធ ធ្វើការបង្ក្រាប និងគំរាមកំហែងជាប់គុកច្រវ៉ាក់។ ប៉ុន្តែសម្រាប់ឈ្មួញអ្នកមានអំណាចវិញពួកគេកាប់បំផ្លាញព្រៃឈើប្រើប្រាស់សុទ្ធតែគ្រឿងចក្រ ដោយមិនមានការទប់ស្កាត់នោះទេ។

«បណ្ដាញសៀមរាបប៉ុស្ដិ៍» នៅមិនទាន់ទទួលបានការបំភ្លឺពី ក្រុមហ៊ុន ម៉ាឃល ឡូជីស្ទីក (ខេមបូឌា) បាននៅឡើយទេ ជុំវិញការចោទប្រកាន់នេះ ដោយមិនមានលេខទូរស័ព្ទ។ ប៉ុន្តែមេការក្រុមហ៊ុនបានប្រាប់អ្នកសារព័ត៌មានក្នុងស្រុកថា«ក្រុមហ៊ុនរបស់ពួកគេមានច្បាប់ទម្លាប់ត្រឹមត្រូវ ដោយមេការរូបនោះថា ឯកសារនៅមេធំៗ លើឯណោះ។

ប្រជាពលរដ្ឋ តូចតាចបានឲ្យដឹងថាពួកគាត់ព្រួយបារម្ភយ៉ាងខ្លាំង ចំពោះការកាប់ រង្គាលព្រៃឈើ និងការបាត់បង់ព្រៃឈើ ទៅថ្ងៃអនាគត ព្រោះពួកគាត់រស់បានអាស្រ័យ ទៅលើធនធានធម្មជាតិព្រៃឈើទាំងអស់នោះ។

ជុំវិញការកាប់បំផ្លាញព្រៃឈើរបស់ក្រុមហ៊ុន ម៉ាឃល ឡូជីស្ទីក (ខេមបូឌា) ក្រសួងកសិកម្ម បានចេញ«សេចក្តីប្រកាសព័ត៌មាន មួយកាលពីម្សិលមិញ»ថារដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទ បានកត់សម្គាល់ឃើញថា ក្នុងពេលថ្មីៗនេះនៅលើ បណ្តាញសារព័ត៌មានក្នុងស្រុកមួយចំនួន បានផ្សព្វផ្សាយព័ត៌មានថា មានក្រុមហ៊ុនមួយកំពុងធ្វើសកម្មភាពកាប់បំផ្លាញព្រៃឈើ យ៉ាងសកម្ម ដឹកជញ្ជូនសុទ្ធតែរថយន្តបាកុង ហើយមានឃ្លាំងស្តុកឈើ និងរោងម៉ាស៊ីនរ៉ៃ នៅចំណុចភូមិបាក់កន និងភូមិស្រែ ស្ថិតក្នុងឃុំរៀបរយ ស្រុករវៀង ខេត្តព្រះវិហារ។

ពាក់ព័ន្ធនឹងព័ត៌មានខាងលើនេះ រដ្ឋបាលព្រៃឈើសូមធ្វើការបំភ្លឺដូចខាងក្រោម៖

១-យោងតាមលិខិតលេខ ៥៥៥៥កសក ចុះថ្ងៃទី២៦ ខែមិថុនា ឆ្នាំ២០២០ ក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឱ្យ ក្រុមហ៊ុន ម៉ាឃល ឡូជីស្ទីក (ខេមបូឌា) បង់ថ្លៃសួយសារ និងបុព្វលាភជូនរដ្ឋ និងធ្វើការកាប់ ប្រមូលផល អនុផលព្រៃឈើក្នុងអនុតំបន់ II ,III និងអនុតំបន់ IV នៃសម្បទានដីសេដ្ឋកិច្ចរបស់ ក្រុមហ៊ុន ភី អ៊ិន ធី ខូ អិលធីឌី ស្របតាមលទ្ធផលសារពើភ័ណ្ឌប៉ាន់ស្មានធនធានព្រៃឈើរបស់រដ្ឋបាលព្រៃឈើ ដោយត្រូវអនុវត្តតាមនីតិវិធីជាធរមាន ដែល ការប្រមូលផល អនុផលព្រៃឈើនេះស្ថិតនៅក្នុងឃុំរៀបរយ ស្រុករវៀង ខេត្តព្រះវិហារ។

២-ក្រុមហ៊ុន ម៉ាឃល ឡូជីស្ទីក (ខេមបូឌា) ទើបតែចុះធ្វើការប្រមូលផល អនុផលព្រៃឈើកាលពីថ្ងៃទី១២ ខែវិច្ឆិកាឆ្នាំ២០២០ នេះប៉ុណ្ណោះ។ ក្នុងករណីដែលរដ្ឋបាលព្រៃឈើរកឃើញថា ការប្រមូលផល អនុផលព្រៃឈើរបស់ ក្រុមហ៊ុនម៉ាឃល ឡូជីស្ទីក (ខេមបូឌា) ខាងលើនេះ មិនត្រឹមត្រូវទៅតាមគោលការណ៍អនុញ្ញាត និងច្បាប់ស្តីពីព្រៃឈើនោះ រដ្ឋបាលព្រៃឈើនឹងចាត់វិធានការតាមនីតិវិធីច្បាប់ជាធរមាន។

បើតាមរដ្ឋមន្ត្រី កសិកម្ម វេង សាខុន បានចុះហត្ថលេខា នៅថ្ងៃទី២៦ខែ​មិថុនា ឆ្នាំ២០២០ បានអនុញាតឲ្យក្រុមហ៊ុន ម៉ាឃល ឡូជីស្ទីក (ខេមបូឌា) ប្រមូលផល អនុផលព្រៃឈើ នៅតំបន់ខាងលើ៕SRP

ខេត្តកំពង់ចាម៖ស្ពានឆ្លងកាត់ទន្លេមេគង្គស្ទឹងត្រង់-ក្រូចឆ្មារ​ គ្រោង​រៀបចំ​ពិធី​តភ្ជាប់​ នៅថ្ងៃទី០៧ ខែធ្នូ ឆ្នាំ២០២០ នៅភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ក្រោមអធិបតីភាពដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រី។
ភ្នាក់ងារសៀមរាបប៉ុស្តិ៍បានរាយការណ៍ថា
នារសៀលថ្ងៃទី១៣ ខែវិច្ឆិកា ម្សិលមិញ
លោក​ យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី និង​លោក​ លឹម ស៊ីដេនីន រដ្ឋលេខាធិការក្រសួងសាធារណការអមដំណើរដោយ​លោក​ អ៊ុន ចាន់ដា អភិបាលខេត្តកំពង់ចាម ​ បានចុះពិនិត្យទីតាំង និងប្រជុំពិភាក្សាត្រៀមផែនការបែងចែកភារកិច្ចរៀបចំពិធីតភ្ជាប់ស្ពានឆ្លងកាត់ទន្លេមេគង្គស្ទឹងត្រង់-ក្រូចឆ្មារ ដោយមានការអញ្ជើញចូលរួមពី​លោក​អភិបាលរងខេត្ត​កំពង់ចាម​ ត្បូងឃ្មុំ មន្ទីរ-អង្គភាពពាក់ព័ន្ធ និងអាជ្ញាធរមូលដ្ឋានពាក់ព័ន្ធជាច្រើនរូបផងដែរ។

គួរបញ្ជាក់ថា សមិទ្ធផលជាប្រវត្តិសាស្ត្រ ដែលជាចំណង ដៃដ៏ថ្លៃថ្លា របស់សម្ដេចតេជោ ហ៊ុន សែន ជូនប្រជាពលរដ្ឋខេត្តកំពង់ចាម និងខេត្តត្បូងឃ្មុំ ត្រូវបានបើកការដ្ឋានស្ថាបនា កាលពីថ្ងៃទី៩ ខែកុម្ភៈ ឆ្នាំ២០១៨ ​ក្រោមអធិបតី សម្ដេច ហ៊ុន សែន។ ស្ពាននេះ មានបណ្តោយប្រវែង ១ ១៣១ ម៉ែត្រ , ទទឹងប្រវែង ១៣.៥០ ម៉ែត្រ ចំណាយថវិកាជិត ៥៧លានដុល្លារ ដែលជាហិរញ្ញប្បទានសម្បទានពីរដ្ឋាភិបាលចិន រួមជាមួយ​កញ្ចប់​ថវិកា​បដិភាគរបស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់ និង បោសសំអាតយុទ្ធភ័ណ្ឌមិនទាន់ផ្ទុះផងដែរ​។ ព្រោះថា​ស្ពានឆ្លងកាត់ទន្លេមេគង្គស្ទឹងត្រង់-ក្រូចឆ្មារ នឹងបង្កលក្ខណៈប្រសើរបន្ថែមទៀតក្នុងការជំរុញការអភិវឌ្ឍន៏ និងកំណើនសេដ្ឋកិច្ច នៅក្នុងខេត្តកំពង់ចាម និងជួយសម្រួលដល់ការធ្វើដំណើរ និងការដឹកជញ្ជូនកសិផល ឬទំនិញផ្សេងៗ​៕SRP