ខេត្តព្រះវិហារ៖ក្រសួងកសិកម្ម រុក្ខាប្រមាញ់ និងនេសាទ បានអនុញាតឲ្យក្រុមហ៊ុន ម៉ាឃល ឡូជីស្ទីក (ខេមបូឌា) កាប់បំផ្លាញព្រៃឈើយ៉ាងរង្គាល នៅក្នុងទឹកដីខេត្តព្រះវិហារ ដែលធ្វើឲ្យព្រៃឈើនៅខេត្តមួយនេះ ប្រឈមទៅនឹងវិនាសមហន្តរាយយ៉ាងធ្ងន់ធ្ងរ។ នេះបើតាមរដ្ឋមន្ត្រី កសិកម្ម វេង សាខុន បានចុះហត្ថលេខា នៅថ្ងៃទី២៦ខែ​មិថុនា ឆ្នាំ២០២០ ដែលបានអនុញាតឲ្យក្រុមហ៊ុន ម៉ាឃល ឡូជីស្ទីក (ខេមបូឌា) ប្រមូលផល អនុផលព្រៃឈើ។

យោងតាមប្រភពបានឲ្យដឹងថាក្រុមហ៊ុន ម៉ាឃល ឡូជីស្ទីក (ខេមបូឌា) ត្រូវបានគេរាយការណ៍ថាបានកំពុងតែបានដៃក្នុងការ កាប់បំផ្លាញព្រៃឈើ យ៉ាងគគ្រឹកគគ្រេង បំផុតនៅក្នុងខេត្តព្រះវិហារ។ ចំណែកអាជ្ញាធរខេត្តនិងមន្ត្រីជំនាញពាក់ព័ន្ធបានរក្សាភាពស្ងប់ស្ងាត់ ទុកឱកាសឲ្យក្រុមហ៊ុនមួយនេះ កាប់បំផ្លាញព្រៃឈើតាមតែអំពើចិត្ត។ ការដែលអាជ្ញាធរនិងសមត្ថកិច្ចពាក់ព័ន្ធ ធ្វើមិនដឹង មិនឮ ហើយសម្ងំស្ងៀមបែបនេះ គេសង្ស័យថា បានទទួលផលប្រយោជន៍ពីក្រុមហ៊ុន។

សេចក្ដីរាយការណ៍បានឲ្យដឹងថាក្រុមហ៊ុន ម៉ាឃល ឡូជីស្ទីក (ខេមបូឌា) ប្រើប្រាស់រថយន្តបាកុង ជាច្រើនគ្រឿង ដឹកជញ្ជូនព្រៃឈើ នៅក្នុងព្រៃតំបន់ចំណុចដើមត្នោតមួយដើម,ព្រៃបាក់កន ស្ថិតនៅក្នុងឃុំរៀបរយ ស្រុករវៀង ខេត្តព្រះវិហារ ដែលមានព្រំប្រទល់ ជាមួយចំណុចអូរភ្ញៀវ ឃុំដងកាំបិត ស្រុកសណ្ដាន់ ខេត្តកំពង់ធំ។

បើតាមសេចក្ដីរាយការណ៍ ថាក្រុមឈ្មួញអ្នកមានអំណាច កំពុងសំរុកកាប់ឈើដឹកជញ្ជូន ឮលាន់សម្លេងរណារយន្ត និងម៉ាស៊ីនអារឈើ ទ្រហឹងពេញព្រៃ ដោយពួកគេទាំងនោះបានប្រើប្រាស់ រថយន្តបាកុង សម្រាប់ដឹកឈើ មកទម្លាក់នៅចំណុចក្នុងព្រៃតំបន់ព្រៃបាក់កន ជាប់នឹងព្រៃឡង់ឋិតនៅក្នុងឃុំរៀបរយ ស្រុករវៀង ខេត្តព្រះវិហារ។

អ្នកភូមិនិយាយថា ពួកគាត់កាប់ឈើបន្តិចបន្តួច សម្រាប់សង់ជាផ្ទះសម្បែង ត្រូវបានអាជ្ញាធរ រដ្ឋបាលព្រៃឈើ និងសមត្ថកិច្ចពាក់ព័ន្ធ ធ្វើការបង្ក្រាប ដោយមិនមានការយោគយល់នោះឡើយ។ ប៉ុន្តែសម្រាប់ឈ្មួញអ្នកមានអំណាចវិញ ពួកគេកាប់បំផ្លាញព្រៃឈើ ប្រើប្រាស់ សុទ្ធតែគ្រឿងចក្រ ដោយមិនមានការទប់ស្កាត់នោះទេ។

ជុំវិញការលើកនេះ «បណ្ដាញសៀមរាបប៉ុស្ដិ៍» នៅមិនទាន់ទទួលបានការបំភ្លឺពី ក្រុមហ៊ុន ម៉ាឃល ឡូជីស្ទីក (ខេមបូឌា) បាននៅឡើយទេ ជុំវិញការចោទប្រកាន់នេះ ដោយមិនមានលេខទូរស័ព្ទ។

ប្រជាពលរដ្ឋ តូចតាចបានឲ្យដឹងថាពួកគាត់ព្រួយបារម្ភយ៉ាងខ្លាំង ចំពោះការកាប់ រង្គាលព្រៃឈើ និងការបាត់បង់ព្រៃឈើ ទៅថ្ងៃអនាគត ព្រោះពួកគាត់រស់បានអាស្រ័យ ទៅលើធនធានធម្មជាតិព្រៃឈើទាំងអស់នោះ។

ទោះយ៉ាងណាក្រសួងកសិកម្ម បានចេញ«សេចក្តីប្រកាសព័ត៌មាន»ថារដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទ បានកត់សម្គាល់ឃើញថា ក្នុងពេលថ្មីៗនេះនៅលើ បណ្តាញសារព័ត៌មានក្នុងស្រុកមួយចំនួន បានផ្សព្វផ្សាយព័ត៌មានថា មានក្រុមហ៊ុនមួយកំពុងធ្វើសកម្មភាពកាប់បំផ្លាញព្រៃឈើ យ៉ាងសកម្ម ដឹកជញ្ជូនសុទ្ធតែរថយន្តបាកុង ហើយមានឃ្លាំងស្តុកឈើ និងរោងម៉ាស៊ីនរ៉ៃ នៅចំណុចភូមិបាក់កន និងភូមិស្រែ ស្ថិតក្នុងឃុំរៀបរយ ស្រុករវៀង ខេត្តព្រះវិហារ។

ពាក់ព័ន្ធនឹងព័ត៌មានខាងលើនេះ រដ្ឋបាលព្រៃឈើសូមធ្វើការបំភ្លឺដូចខាងក្រោម៖

១-យោងតាមលិខិតលេខ ៥៥៥៥កសក ចុះថ្ងៃទី២៦ ខែមិថុនា ឆ្នាំ២០២០ ក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឱ្យ ក្រុមហ៊ុន ម៉ាឃល ឡូជីស្ទីក (ខេមបូឌា) បង់ថ្លៃសួយសារ និងបុព្វលាភជូនរដ្ឋ និងធ្វើការកាប់ ប្រមូលផល អនុផលព្រៃឈើក្នុងអនុតំបន់ II ,III និងអនុតំបន់ IV នៃសម្បទានដីសេដ្ឋកិច្ចរបស់ ក្រុមហ៊ុន ភី អ៊ិន ធី ខូ អិលធីឌី ស្របតាមលទ្ធផលសារពើភ័ណ្ឌប៉ាន់ស្មានធនធានព្រៃឈើរបស់រដ្ឋបាលព្រៃឈើ ដោយត្រូវអនុវត្តតាមនីតិវិធីជាធរមាន ដែល ការប្រមូលផល អនុផលព្រៃឈើនេះស្ថិតនៅក្នុងឃុំរៀបរយ ស្រុករវៀង ខេត្តព្រះវិហារ។

២-ក្រុមហ៊ុន ម៉ាឃល ឡូជីស្ទីក (ខេមបូឌា) ទើបតែចុះធ្វើការប្រមូលផល អនុផលព្រៃឈើកាលពីថ្ងៃទី១២ ខែវិច្ឆិកាឆ្នាំ២០២០ នេះប៉ុណ្ណោះ។ ក្នុងករណីដែលរដ្ឋបាលព្រៃឈើរកឃើញថា ការប្រមូលផល អនុផលព្រៃឈើរបស់ ក្រុមហ៊ុនម៉ាឃល ឡូជីស្ទីក (ខេមបូឌា) ខាងលើនេះ មិនត្រឹមត្រូវទៅតាមគោលការណ៍អនុញ្ញាត និងច្បាប់ស្តីពីព្រៃឈើនោះ រដ្ឋបាលព្រៃឈើ នឹងចាត់វិធានការ តាមនីតិវិធីច្បាប់ជាធរមាន។

សូមបញ្ជាក់ថាបន្ទាប់ពីមានការចុះផ្សាយព័ត៌មាន ថាក្រុមហ៊ុន ម៉ាឃលឡូជីស្ទីក (ខេមបូឌា) បានកំពុងតែធ្វើសកម្មភាព កាប់បំផ្លាញព្រៃឈើយ៉ាងអនាធិបតេយ្យ រួចមកនៅថ្ងៃទី១៥ នឹងថ្ងៃទី១៦ខែវិច្ឆិកា ឆ្នាំ២០២០ អាជ្ញាធរសមត្ថកិច្ច ជំនាញពាក់ព័ន្ធ បានចុះត្រួតពិនិត្យទីតាំងគល់ដើមឈើ ដែលបានកាត់ប្រមូលផល អនុផលព្រៃឈើដោយក្រុមហ៊ុន ម៉ាឃលឡូជីស្ទីក (ខេមបូឌា)ស្ថិតក្នុងភូមិបង្កន ឃុំរៀបរយ ស្រុករវៀង ខេត្តព្រះវិហារ។ ដោយបានចុះជាក់ស្តែងដល់ចំនួន ៣កន្លែង ដែលក្រុមសារព័ត៌មាន បានផ្សព្វផ្សាយថា កាប់ឈើពីព្រៃឡង់ និងសហគមន៏តំបន់ការពារ។

មន្ត្រីដែលបានចុះពិនិត្យនិយាយថា គ្មានការកាប់ដើមឈើចេញពីព្រៃឡង់ និងសហគន៍តំបន់ការពារធម្មជាតិនោះទេ។ ដោយឡែកតំណាងក្រុមហ៊ុនក៏បានបំភ្លឺផងដែរថា មិនពិតដូចការចុះផ្សាយរបស់ក្រុមសារព័ត៌មាននោះឡើយ។ ទោះយ៉ាងណា ក្រសួងកសិកម្ម មិនគួរចេញអាជ្ញាប័ណ្ណឲ្យក្រុមហ៊ុន កាប់បំផ្លាញព្រៃឈើ បន្តទៅទៀតទេ ដែលជាហេតុ បណ្ដាលឲ្យព្រៃឈើនៅ កម្ពុជា កាន់តែអស់បន្តិចម្ដងៗ។ ដូច្នេះក្រសួងកសិកម្ម គួរតែពិនិត្យឡើងវិញ ចំពោះការចេញអាជ្ញាប័ណ្ណឲ្យក្រុមហ៊ុនទាំងនោះ៕SRP

ខេត្តសៀមរាប៖មន្ត្រីរដ្ឋាករទឹកខេត្តសៀមរាប ម្នាក់ បានបើករថយន្តម៉ាកប្រ៊ូស ពណ៌ទឹកប្រាក់ ពាក់ស្លាកលេខសៀមរាប ២B៥១១៤ បុកម៉ូតូកង់បី pass app បណ្ដាលឱ្យរបួសមនុស្សចំនួន២នាក់ ហើយព្យាយាមបើករត់។

ហេតុការណ៍នេះ បានកើតឡើងនៅវេលាម៉ោង២៣និង០០នាទីថ្ងៃទី១៤ខែវិច្ឆិកាឆ្នាំ២០២០ ស្ថិតនៅតាមផ្លូវជាតិលេខ៦ក្នុងភូមិទឹកវិល សង្កាត់ទឹកវិល ក្រុងសៀមរាប ខេត្តសៀមរាប។ ​

ជុំវិញគ្រោះថ្នាក់ចរាចរណ៍នេះ លោកវរសេនីយ៍ឯក ណុប សារ៉ាក់ អធិការនគរបាល ក្រុងសៀមរាប បានប្រាប់អ្នកសារព័ត៌មានថា៖ ក្រោយកើតហេតុ ជនបង្ក បានយករថយន្ត មកប្រគល់ ឲ្យសមត្ថកិច្ច
ទាំងយប់។

នាយការិយា ល័យចរាចរណ៍ផ្លូវគោក នៃស្នងការប៉ូលិស ខេត្តសៀមរាប លោកវរសេនីយ៍ឯក ជឹម សុវណ្ណ បានថ្លែងប្រាប់អ្នកសារព័ត៌មាន ថា ករណីនេះលោកកំពុងត្រួតពិនិត្យមើលសិន ព្រោះសំណុំរឿង ទើបនឹងមកដល់នៅព្រឹកម៉ិញនេះ។ ហើយភាគីទាំងពីរក៏កំពុងសម្រួលគ្នា។

យោងតាមប្រភពបានឲ្យដឹងថា អ្នកបើករថយន្ដ មានឈ្មោះដឿយ ស៊ីដេត អាយុ៣១ឆ្នាំ ជាមន្ត្រីរដ្ឋាករទឹក ខេត្តសៀមរាប មានទីលំនៅភូមិទឹកវិល សង្កាត់ទឹកវិល ក្រុងសៀមរាប។
ចំណេកជនរងគ្រោះមានឈ្មោះទឹង អឿត ភេទប្រុសអាយុ២៥ឆ្នាំរស់នៅភូមិបុស្សក្រឡុក ឃុំគោកដូង ស្រុកអង្គរជុំ របួសស្រាល។ ទី២ឈ្មោះ ភិន មុន្នីសាន់ ភេទប្រុសអាយុ៣៧ឆ្នាំ របួសធ្ងន់ ប្រេះជើង៕SRP

ភ្នំពេញ៖សម្ដេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិ នៅថ្ងៃទី១៦ ខែវិច្ឆិកា ឆ្នាំ២០២០នេះ តំណាង សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងមានការអមដំណើរដោយលោកជំទាវ យក់ សម្បត្តិ រដ្ឋលេខាធិការ ក្រសួងសុខាភិបាល ព្រមទាំងមានមន្ត្រីពាក់ព័ន្ធមួយចំនួនទៀត បាននាំនូវអំណោយ របស់រាជរដ្ឋាភិបាលដែលមាន ម៉ាសចំនួន២លាន១សែន និងបរិក្ខារពេទ្យសរុបចំនួន១២មុខ ត្រូវបានប្រគល់ជូន លោក ថនលូន ស៊ីសូលីត នាយករដ្ឋមន្ត្រីសាធារណរដ្ឋ ប្រជាធិបតេយ្យប្រជាមានិតឡាវរួចហើយ ដើម្បីចូលរួមជួយដល់ប្រទេសឡាវ ក្នុងការប្រយុទ្ធប្រឆាំងនឹងជំងឺកូវីដ១៩។

សម្តេចពិជ័យសេនា បានបញ្ជាក់ថា កម្ពុជា និងឡាវមានចំណងមិត្តភាព ជាបងប្អូនដ៏យូរអង្វែង ដែលថ្នាក់ដឹកនាំគ្រប់កម្រិតនៃប្រទេសទាំងពីរកំពុងបន្តពូនជ្រុំ និងពង្រឹងឱ្យកាន់តែរឹងមាំថែមទៀតជារៀងរាល់ថ្ងៃ។ ប្រជាជនយើងទាំងពីរបានកៀកស្មាគ្នា តស៊ូប្រយុទ្ធប្រឆាំងនឹងរបបអាណានិគមនិយម និងចក្រពត្តិនិយម ដើម្បីទទួលបានឯករាជ្យ អធិបតេយ្យភាពជាតិ សេរីភាព និងសិទ្ធិស្វ័យសម្រេចរៀងៗខ្លួន។ បច្ចុប្បន្ន កម្ពុជា និងឡាវក៏មានកិច្ចសហប្រតិបត្តិការយ៉ាងជិតស្និទ្ធ ទាំងក្នុងក្របខ័ណ្ឌទ្វេភាគី និងពហុភាគី ដើម្បីនាំមកនូវ សន្តិភាព ស្ថិរភាព សន្តិសុខ ការអភិវឌ្ឍប្រកបដោយចីរភាព និងផលប្រយោជន៍ទៅ វិញទៅមកនៃប្រជាជាតិយើងទាំងពីរ។ សម្តេចពិជ័យសេនា បានជឿជាក់ថា ទំនាក់ទំនងល្អប្រសើរជាប្រពៃណី និងកិច្ចសហប្រតិបត្តិការវាងប្រជាជាតិយើង នឹងកាន់តែមានភាពស៊ីជម្រៅ រីកចម្រើនរឹងមាំ នាំមកនូវភាពសុខដុម និងវឌ្ឍនភាពសេដ្ឋកិច្ច-សង្គមជានិរន្តរ៍ ដល់ប្រជាជនយើងទាំងពីរ ដែលនឹងរួមចំណែកផងដែរដល់សន្តិភាព ស្ថិរភាព និងការអភិវឌ្ឍនៅក្នុងតំបន់។

ការចូលរួមវិភាគទានថ្ងៃនេះ ដើម្បីជួយទប់ស្កាត់ការផ្ទុះឡើងនៃជំងឺកូវីដ១៩ នៅក្នុងប្រទេសឡាវ គឺជាកាយវិការបង្ហាញនូវមនោសញ្ចេតនាជាបងប្អូន និងសាមគ្គីភាព របស់ប្រជាជនកម្ពុជាជាមួយប្រជាជនឡាវ នៅក្នុងកាលៈទេសៈដែលពិភពលោក ទាំងមូលកំពុងជួបនឹងបញ្ហាប្រឈមដែលមិនធ្លាប់មានពីមុនមក លើសុវត្ថិភាពនៃសុខភាព និងសន្តិសុខមនុស្សជាតិ។

អំណោយរបស់រាជរដ្ឋាភិបាលកម្ពុជា ជូនរដ្ឋាភិបាលឡាវរួមមាន៖ ម៉ាស ចំនួន២លាន, ម៉ាសក្រណាត់ចំនួន ២០ម៉ឺន, ម៉ាស N95 ចំនួន២ម៉ឺន, វែនតាសុវត្ថិភាព ចំនួន២ម៉ឺន, សំលៀកបំពាក់សុវត្ថិភាព សម្រាប់មន្ត្រីសុខាភិបាល (ជាឈុត) ចំនួន២ម៉ឺនឈុត, ម៉ាស៊ីនវាស់កំដៅ ចំនួន៥០០, របាំងមុខចំនួន២ម៉ឺន, ឧបករណ៍ជំនួយការដកដង្ហើម សម្រាប់ប្រយោធនកម្ម ចំនួន២០, ទូរទស្សន៍តាមដានសុខភាពអ្នកជំងឺ និងសម្ភារបន្ទាប់បន្សំម៉ូឌែល Vista 120 ចំនួន២០, ម្សៅថ្នាំក្លរ៉ាមីនប្រភេទB ៥០០កេស, ស្បែកជើងក៏វែងសុវត្ថិភាព ១ពាន់គូ និងសាប៊ូលាងដៃ ២ពាន់គូផងដែរ៕SRP

ខេត្តសៀមរាប៖ប៉ូលិសស្រុកប្រាសាទបាគងបានឃាត់ខ្លួន បុរសម្នាក់ ពាក់ពន្ធ័ករណីប្រើហិង្សាដោយចេតនា មានស្ថានទម្ងន់ទោស។  ការឃាត់ខ្លួនធ្វើឡើងនៅថ្ងៃទី១៤ ខែវិច្ឆិកា ឆ្នាំ២០២០ម្សិលមិញស្ថិតនៅភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប។

ជនសង្ស័យឈ្មោះ ភឿក ឆង ភេទប្រុស អាយុ៣៨ឆ្នាំ រស់នៅតាមភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប។  ជនរងគ្រោះ ឈ្មោះ ហ៊ិម ពេជ្រ រស់នៅភូមិ ជាមួយគ្នា។

ករណីនេះហិង្សានេះបានកើតឡើងកាលពីវេលាម៉ោង១៧និង២០នាទីថ្ងៃទី១៣ខែវិច្ឆិកា ឆ្នាំ២០២០ នៅចំណុចតាមផ្លូវក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប។

ប៉ូលិសថា មូលហេតុ ជនបង្ក ស្រវឹង និងធ្លាប់មានរឿងរ៉ាវឈ្លោះប្រកែកគ្នា ជាមួយជនរងគ្រោះ ជាច្រើនលើក។

យោងតាមពាក្យបណ្ដឹងរបស់គ្រួសារជនរងគ្រោះ បច្ចុប្បន្នសង្ស័យនិងវត្ថុតាង ត្រូវបាននគរបាល កសាងសំណុំរឿងបញ្ជូនទៅតុលាការដើម្បីផ្ដន្ទាទោសតាមច្បាប់៕SRP

ខេត្តបាត់ដំបង៖ពលរដ្ឋចំនួន៧៥០គ្រួសារ ក្នុងស្រុកគាស់ក្រឡ ខេត្តបាត់ដំបង នៅថ្ងៃចន្ទ ទី១៦ ខែវិច្ឆិកា ព្រឹកនេះ បានទទួលអំណោយពូជបន្លែ ពីសម្ដេច ស ខេង រដ្ឋមន្ត្រីក្រសួងមហាផ្ទៃ តាមរយ: លោកងួន រតនៈ អភិបាលខេត្តបាត់ដំបង។

លោកឃឹម ហ្វីណង់ អភិបាលស្រុកបន្ទាយស្រី បានអះអាងថា៖ «គម្រោងដីឡូត៍និងផ្ទះល្វែង នៅក្នុងស្រុកបន្ទាយស្រី សុទ្ធតែ អត់ទាន់មាន ច្បាប់អនុញ្ញាត ទាំងអស់»។

លោកឃឹម ហ្វីណង់ អះអាងយ៉ាងដូច្នេះ ក្នុងពេលអនុញ្ញាតឲ្យបណ្ដាញ «សៀមរាបប៉ុស្តិ៍» និងអ្នកសារព័ត៌មានពីររូបទៀត ជួបលោកដោយផ្ទាល់នៅសាលាស្រុកបន្ទាយស្រីកាលពីកន្លងទៅនេះ។

លោកអភិបាលស្រុកបន្ទាយស្រីបានបន្តថា៖ ចាប់តាំងពីលោកចូលកាន់តំណែង ជាអភិបាលស្រុកបន្ទាយស្រី មក លោកនៅមិនទាន់អនុញ្ញាតឱ្យមានលិខិត សាងសង់ផ្ទះល្វែង និងដីឡូតិ៍នៅឡើយទេ។

លោកអភិបាលស្រុកក៏បានបញ្ជាក់ផងដែរថា ដីនៅស្រុកបន្ទាយស្រីភាគច្រើនជាប់គម្របព្រៃឈើ និងមួយចំនួនទៀតជាប់តំបន់គ្រប់គ្រងដោយអាជ្ញាធរជាតិអប្សរា។«លោកឃឹម ហ្វីណង់ អភិបាលស្រុកបន្ទាយស្រី»

សូមរំលឹកផងដែរថា កាលពីកន្លងទៅអាជ្ញាធរស្រុកបន្ទាយស្រីបានបើកយុទ្ធនាការ ចុះរុះរើស្លាកយីហោដីឡូត៍និងផ្ទះល្វែង នៅស្រុកបន្ទាយស្រី ទាំងអស់ផងដែរ។ ការចុះរុះរើនោះ ដោយហេតុថា គម្រោងផ្ទះល្វែងដីឡូត៍ទាំងនោះមិនទាន់មានលិខិតអនុញ្ញាតពីអាជ្ញាធរនិងក្រសួងពាក់ព័ន្ធ។

បើទោះបី មានការលើកឡើងពីសំណាក់អភិបាលស្រុកបន្ទាយស្រី បែបនេះក្ដី គេសង្កេតឃើញ មួយរយ:ចុងក្រោយនេះ នៅក្នុងស្រុកបន្ទាយស្រី មានក្រុមហ៊ុនគំរោងដីឡូត៍នឹងផ្ទះល្វែងមួយចំនួន បានបើកការដ្ឋានសាងសង់និងពុះឡូត៍លក់ជាហូរហែផងដែរ។ ប្រការដែលក្រុមហ៊ុនទាំងនោះ ប្រកាសបើកការដ្ឋាន និងប្រកាសលក់ដីឡូត៍និងផ្ទះល្វែង ជាសាធារណៈ បែបនេះ គេនៅពុំទាន់ដឹងនៅឡើយថា មានលិខិតអនុញ្ញាត ត្រឹមត្រូវ ពីអាជ្ញាធរក្រសួងពាក់ព័ន្ធដែរឬយ៉ាងណានោះទេ។ ដូច្នេះសូមអតិថិជន ទាំងអស់ដែលមានបំណងទិញដីឡូត៍និងផ្ទះល្វែង នៅស្រុកបន្ទាយស្រី សូមមានការប្រុងប្រយ័ត្ន ឲ្យបានខ្ពស់ ចៀសវាង ការខាតបង់ ពេលវេលានិងថវិកាផងដែរ។ បើតាមលោក ឃឹម ហ្វីណង់ ថា៖ នៅស្រុកបន្ទាយស្រី នោះដែរ មានក្រុមហ៊ុន គម្រោងដីឡូត៍ មួយកន្លែង របស់ឧកញ៉ាម្នាក់ គឺជាប់គម្របព្រៃឈើទាំងអស់៕SRP

ភ្នំពេញ៖នៅថ្ងៃថ្ងៃទី ១៦ វិច្ឆិកា ២០២០នេះ កម្ពុជា បានរៀបចំអំណោយម៉ាសចំនួន២លាន និងបរិក្ខារពេទ្យ ជាច្រេីនទៀត នឹងបញ្ជូនចេញទៅជួយមិត្តឡាវ ដេីម្បីទប់ស្កាត់ការរីករាលដាលជំងឺឆ្លងកូវីដ១៩។

សុំបញ្ជាក់ថា សម្ដេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិ តំណាងសម្ដេចតេជោ ហ៊ុន សែន នាយករដ្ឋមន្ត្រី នឹងនាំយកអំណោយទាំនេះទៅកាន់ប្រទេសឡាវ តាមយន្តហោះពិសេស៕SRP

ខេត្តសៀមរាប៖បើមិនមានអ្វីប្រែប្រួល នោះទេ ថ្ងៃទី៣០ខែវិច្ឆិកា ឆ្នាំ២០២០ ខាងមុខនេះ សម្តេចហ៊ុន សែន នាយករដ្ឋមន្ត្រី នឹងអញ្ជើញ បើកការដ្ឋានសាងសង់ផ្លូវ ៣៨ខ្សែ ក្នុងក្រុងសៀមរាប។

នេះបើតាម លោកស៊ុន ចាន់ថុល រដ្ឋមន្ត្រីក្រសួងសាធារណការ បានថ្លែងប្រាប់អ្នកសារព័ត៌មាន នៅថ្ងៃទី១៥ខែវិច្ឆិកា ម្សិលមិញ ក្នុងពេលបានដឹកនាំគណៈប្រតិភូក្រុមការងារបច្ចេកទេសក្រសួងអញ្ជើញ ចុះពិនិត្យគម្រោងស្ថាបនាហេដ្ឋារចនាសម្ព័ន្ធផ្លូវចំនួន ៣៨ខ្សែ នៅក្រុងសៀមរាប ខេត្តសៀមរាប។

ការចុះពិនិត្យនេះធ្វើឡើងក្នុងគោលបំណង ដើម្បីពិនិត្យអំពីវឌ្ឍនភាពការសាងសង់ ការឈូសឆាយផ្លូវ គ្រឿងចក្រ ទីតាំងដាក់ប្រព័ន្ធលូ មន្ទីរពិសោធន៍ក្នុងការស្ថាបនាផ្លូវ៣៨ខ្សែ បញ្ហាប្រឈម សំណូមពរ និងដំណោះស្រាយ ព្រមទាំងមតិយោបល់ទាក់ទងនឹងការស្ថាបនានៃខ្សែផ្លូវទាំង ៣៨ខ្សែ ឱ្យប្រព្រឹត្តទៅដោយរលូន។

លោកស៊ុន ចាន់ថុល បានបញ្ជាក់ថា៖ ហេដ្ឋារចនាសម្ព័ន្ធផ្លូវទាំង៣៨ខ្សែនេះ នឹងត្រូវសាងសង់ឡើងដោយអង្គភាព ចំនួន០៦ បែងចែកជាកំណាត់ៗ ប្រកបដោយភាពបត់បែន និងច្នៃប្រឌិតខ្ពស់ ចាក់បេតុងកៅស៊ូ សមស្របតាមទំហំចរាចរណ៍ និងការដឹកទំនិញធ្ងន់ ឬស្រាល ដោយផ្ដោតជាសំខាន់លើគុណភាព ប្រសិទ្ធភាព ជាមួយនឹងការបញ្ចប់គម្រោងឱ្យបានទាន់ពេលវេលា តាមការគ្រោងទុក។

រដ្ឋមន្រ្តី បានបន្ថែមថា៖ ក្រុមការងារក្រសួងនឹងធ្វើការចុះពិនិត្យតាមដានលើ លក្ខណៈបច្ចេកទេសសាងសង់ហេដ្ឋារចនាសម្ព័ន្ធ ផ្លូវទាំង ៣៨ខ្សែ នេះ ដើម្បីឱ្យអង្គភាពសាងសង់ អនុវត្តតាមលក្ខខណ្ឌតម្រូវនៃស្តង់ដា បច្ចេកទេស ធានាបាននូវគុណភាពជាប់រឹងមាំ ប្រើប្រាស់បានយូរអង្វែងតាមអាយុកាល។

បើតាមរដ្ឋមន្ត្រី អង្គភាព ដែលទទួលយក ការងារសាងសង់ផ្លូវទាំង៣៨ខ្សែនេះ រួមមាន៖

• កងវិស្វកម្មសម្តេចតេជោខេត្តសៀមរាប
• កងវិស្វកម្ម១០៨
• នាយកដ្ឋានគ្រឿងចក្រ
• និងស្ថាបនាផ្លូវ
• នាយកដ្ឋានជួសជុល និងថែទាំផ្លូវ អគ្គនាយកដ្ឋានប្រព័ន្ធចម្រោះទឹកកខ្វក់ និងមន្ទីរសាធារណការ និងដឹកជញ្ជូនខេត្តសៀមរាប។

រដ្ឋមន្ត្រី បានបន្ថែមថា៖ ការសាងសង់ផ្លូវទាំង៣៨ខ្សែនេះ ត្រូវបានបែងចែកជាបួនប្រភេទ ក្នុងនោះ៖ ប្រភេទទីមួយចាក់បេតុងកម្រាស់ ២៥សង់ទីម៉ែត្រ ដូចជាផ្លូវវាងក្រុង ដោយកន្លែងខ្លះចាក់បេតុង តែមិនអ៊ុតបេតុងកៅស៊ូ(AC)ពីលើទេ ប្រភេទទីពីរចាក់បេតុងកម្រាស់ ២០សង់ទីម៉ែត្រ និងកន្លែងខ្លះកម្រាស់ ៧សង់ទីម៉ែត្រយោងទៅតាមស្ថានភាពភូមិសាស្ត្រ ស្ថានភាពចរាចរាណ៍ និងការដឹកជញ្ជូន ប្រភេទទីបីជួសជុលគ្រឹះ មិនចាំបាច់ចាក់បេតុងហើយអ៊ុតកៅស៊ូបេតុងតែម្ដង និងប្រភេទទីបួន អ៊ុតកៅស៊ូបេតុងកម្រាស់ ១៥សង់ទីម៉ែត្រ ពីលើតែម្ដងដោយសារគ្រឹះផ្លូវនោះនៅមានភាពរឹងមាំស្រាប់ទៅហើយ។

រដ្ឋមន្ត្រី បានបន្តទៀតថា៖ ការចុះមកពិនិត្យការពង្រីកផ្លូវលេខ៦ ពីរាជដំណាក់ទៅរង្វង់មូលព្រះបាទជ័យវរ្ម័នទី៧ ផ្លូវបត់ចូលព្រលានយន្តហោះ ពង្រីកជា ៦គន្លង ៣គន្លងទៅ ៣គន្លងមក ទ្រង់ផ្លូវ ២ម៉ែត្រ និងចិញ្ចើមផ្លូវ ៣ម៉ែត្រសងខាង ជាថវិកាកម្ចីពីធនាគារអភិវឌ្ឍន៍អាស៊ី ប្រវែងជិត ៦គីឡូម៉ែត្រ ត្រូវបានស្ថាបនាឡើងវិញ ប្រើពេលសាងសង់រយៈមួយឆ្នាំ នេះជាដំណាក់កាលទី២ ចំពោះដំណាក់កាលទី១ ពីរង្វង់មូលព្រះបាទជ័យវរ្ម័នទី៧ ទៅស្រុកក្រឡាញ់ បានស្ថាបនារួចហើយក្រាលបេតុងកៅស៊ូ (AC) ឡើងវិញ និងដំណាក់កាលទី៣ ពីស្រុកក្រឡាញ់ ទៅក្រុងសិរីសោភណ្ឌ ប្រភេទបេតុងកៅស៊ូ (AC) បានចុះហត្ថលេខារួចហើយជាមួយក្រុមហ៊ុនសាងសង់។ ចំពោះកំណាត់ផ្លូវលេខ៦ ពីរាជដំណាក់ ទៅរង្វង់មូលព្រះបាទជ័យវរ្ម័នទី៧ នេះគ្រោងស្នើសុំសម្ដេចបើកការដ្ឋានជាមួយផ្លូវ ៣៨ខ្សែតែម្តង៕SRP

ខេត្តរតនគិរី៖ទីតាំងសង្វៀនជល់មាន់ អាប៉ោង យូគី ដែលស្ថិតនៅក្នុងទឹកដីនៃអាណាចក្ររបស់លោក ថង សាវុន អភិបាលខេត្តរតនគិរី បានដំណើរការបើកលេងយ៉ាងពេញបន្ទុក ដោយគ្មានការបង្ក្រាបឡើយ។

ប្រភពពលរដ្ឋរស់នៅក្រុងបានលុងបានឱ្យដឹងថាទីតាំង អាប៉ោង យូគី នឹង ជល់មាន់ ដ៏ធំនេះគឺស្ថិតនៅ ភូមិភ្នំធំ សង្កាត់យក្សឡោម ក្រុងបានលុង ខេត្តរតនគីរី នៅត្រង់ចំណុចភ្នំយោល និងមួយទៀត ស្ថិតនៅផ្ទះឈ្មោះ ងួន សុវណ្ណា ហៅអូនធំ ស្ថិតនៅភូមិ បឹងកន្សែង ឃុំឡាបានសៀក ក្រុងបានលុង ខេត្តរតនគិរី។

ប្រជាពលរដ្ឋលើកឡើងថាលោក ថង សាវុន អភិបាលខេត្តរតនគិរី ក៏ដូចជាលោក យិន សំណាង ស្នងការនគរបាលខេត្ត ហាក់គ្មានអំណាច អនុវត្តច្បាប់ចំពោះម្ចាស់ទីតាំងល្បែងសុីសងខុសច្បាប់ខាងលើនេះទាល់តែសោះ ដែលធ្វើឲ្យមានមន្ទិលថា គឺជាការឃុបឃិតបើកដៃពីសំណាក់អាជ្ញាធរមានសមត្ថកិច្ចពាក់ព័ន្ធ បើកឲ្យមានល្បែងភ្នាល់ខុសច្បាប់យ៉ាងដូច្នេះ។

ប្រជាពលរដ្ឋ ក្នុងខេត្តរតនគិរី លើកឡើងថា ពួកគាត់កំពុងមានការព្រួយបារម្ភយ៉ាងខ្លាំង ពីការឆ្លងរីករាលដាលជំងឺcovid-19 ដោយសារតែការជួបជុំប្រជ្រៀតគ្នា ណែនណាន់តាន់តាប់លេងល្បែងភ្នាល់ របស់ក្រុមអ្នកញៀនល្បែង ដែលអាចជាគ្រោះមហន្តរាយដ៏អាក្រក់សម្រាប់ខេត្តមួយនេះ ក៏ដូចជាសន្តិសុខ សុវត្ថិភាព របស់ពលរដ្ឋក្នុងមូលដ្ឋានផងដែរ។

ពាក់ព័ន្ធនឹងការលើកឡើងខាងលើពីសំណាក់ពលរដ្ឋ ក្នុងក្រុងបានលុង អ្នកយកព័ត៌មានមិនអាចសុំការបកស្រាយពីលោក ថង សាវុន និងលោក យិន សំណាង បានទេ ដោយសារលោកមិនលើទូរស័ព្ទ៕SRP

ខេត្តកំពង់ចាម៖លោកវេជ្ជបណ្ឌិត គីមសួរ ភីរុណ ប្រធានមន្ទីរសុខាភិបាលខេត្ត នៅថ្ងៃអាទិត្យ ទី១៥ ខែវិច្ឆកា ឆ្នាំ២០២០ នេះ ជាមួយ ក្រុមការងារ រួមនឹងអាជ្ញាធរមូលដ្ឋានស្រុកព្រៃឈរ នាំយកអំណោយឧបត្ថម្ភ ជាគ្រឿងឧបភោគ បរិភោគ និងសម្ភារការពារ វីរុសកូវីដ-១៩ របស់លោក
អ៊ុន ចាន់ដា អភិបាលខេត្តកំពង់ចាម ជូនដល់ ប្រជាពលរដ្ឋចំនួន៥ គ្រួសារ ដែលកំពុងចត្តាឡីស័ក១៤ថ្ងៃ នៅផ្ទះស្ថិតនៅភូមិព្រៃឈរ ស្រុកព្រៃឈរ។
សម្ភារទាំងនោះរួមមាន÷
-អង្ករ៥០kg
-មី ២កេះ
-ទឹកស៊ីអុី ៦ដប
-ត្រីខកំប៉ុង ១២កំប៉ុង
-ត្រីងៀត ២kg
-ទឹកក្រូច ១កេះ
-ម៉ាស់ ១ប្រអប់=៥០ម៉ាស់
-ទឹកអាល់កុល ១ដប
ក្នុងឱកាសនោះផងដែរលោកប្រធានមន្ទីរសុខាភិបាល បានពាំនាំការផ្តាំផ្ញើរសួរសុខទុក ពីសំណាក់ អភិបាលខេត្ត និងបានអប់រំដល់ពួកគាត់ អោយចេះពាក់ម៉ាស លាងដៃ អោយបានញឹកញាប់ជាមួយអាល់កុល ឬសាប៊ូ ពិសេសត្រូវចូលរួមទប់ស្កាត់ការរីករាលដាលរលកទីពីរ នៃជំងឺកូវីដ-១៩ កុំឲ្យកើតឡើងក្នុងសហគមន៍យើង៕SRP