ខេត្តព្រះវិហារ៖លោក លី សារ៉ារិទ្ធ អភិបាលរងខេត្តព្រះវិហារនៅព្រឹកថ្ងៃអង្គារ ទី១២ ខែមករា ឆ្នាំ២០២១ បានអញ្ជើញជាអធិបតី ក្នុងសិក្ខាសាលាចាប់ផ្តើមអនុវត្តគម្រោងឆ្លើយតបបន្ទាន់ទៅនឹងជំងឺកូវីដ១៩ តាមរយ:ប្រព័ន្ធបញ្ជូនរូបភាពនិងសម្លេង video Conference ពីទីស្តីការក្រសួងកសិកម្ម រុក្ខាប្រមាញ់ និងនេសាទ។

កិច្ចប្រជុំនេះមានការចូលរួមពីប្រធានមន្ទីរកសិកម្មកសិកម្ម រុក្ខាប្រមាញ់ និងនេសាទខេត្ត ប្រធានមន្ទីរធនធានទឹក និងឧតុនិយមខេត្ត និងមន្រ្តីសាលាខេត្តជាច្រើនរូប នៅសលប្រជុំមន្ទីរកសិកម្មរុក្ខាប្រមាញ់និងនេសាទខេត្តព្រះវិហារ។

សិក្ខាសាលានេះ រៀបចំឡើងផ្សព្វផ្សាយដំណើរការចាប់ផ្តើមអនុវត្តគម្រោងសង្គ្រោះបន្ទាន់ ក្នុងការរួមចំណែកធានា បាននូវ សន្តិសុខស្បៀងក្នុងអំឡុងពេលការីករាលដាលនៃជំងឺកូវីដ-១៩៕SRP

ភ្នំពេញ៖សម្ដេចក្រឡាហោម ស ខេង រដ្ឋមន្ត្រីក្រសួងមហាផ្ទៃ បានបង្ហាញលទ្ធផល ការដោះស្រាយ មតិយោបល់ និងសំណូមពរ របស់ ពលរដ្ឋ នៅក្នុងគេហទំព័រហ្វេសប៊ុក ប្រចាំខែធ្នូ។

សម្ដេច ស ខេង បានលើកឡើងថា
ខ្ញុំសូមជម្រាបជូនបងប្អូនជនរួមជាតិ អំពីលទ្ធផលការងារក្នុងខែធ្នូ ឆ្នាំ២០២០ របស់ក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់បងប្អូនប្រជាពលរដ្ឋនៅក្នុងគេហទំព័រហ្វេសប៊ុករបស់ខ្ញុំ ដូចមានតារាងភ្ជាប់នៅខាងក្រោម។

ខ្ញុំសូមសម្ដែងការកោតសរសើរ និងវាយតម្លៃខ្ពស់ចំពោះកិច្ចសហការប្រកបដោយការទទួលខុសត្រូវខ្ពស់របស់ថ្នាក់ដឹកនាំ និងមន្ត្រីនៃអង្គភាពចំណុះក្រសួងមហាផ្ទៃ ព្រមទាំងស្ថាប័នពាក់ព័ន្ធទាំងថ្នាក់ជាតិ និងថ្នាក់ក្រោមជាតិ ក្នុងការឆ្លើយតបចំពោះមតិយោបល់ កង្វល់ និងសំណូមពរនានារបស់មហាជន ជាមួយក្រុមការងារទំព័រហ្វេសប៊ុករបស់ខ្ញុំ។

ជាមួយគ្នានេះខ្ញុំក៏សូមថ្លែងអំណរគុណដល់បងប្អូនប្រជាពលរដ្ឋទាំងអសើ ដែលបានផ្ដល់ជាព័ត៌មាន លើកជាមតិយោបល់ និងសំណូមពរ តាមរយៈទំព័រហ្វេសប៊ុករបស់ខ្ញុំ ដែលនេះបានបង្ហាញពីការចូលរួម និងលើកតម្កើងសិទ្ធិសេរីភាពក្នុងការសម្តែងមតិ និងការដោះស្រាយបញ្ហារបស់បងប្អូនប្រជាពលរដ្ឋ សមស្របតាមគន្លងលទ្ធិប្រជាធិបតេយ្យ ដើម្បីអភិវឌ្ឍន៍សង្គមជាតិយើង៕SRP

ខេត្តសៀមរាប៖ទីតាំងស្តុក អេតចាយ មួយកន្លែង របស់ជនជាតិ វៀតណាម នៅក្រុងសៀមរាប ត្រូវបានអគ្គីភ័យឆាប់ឆេះបំផ្លាញ។

ហេតុការណ៍បានកើតឡើង នៅរសៀល នៅថ្ងៃទី ១២ ខែមករា ឆ្នាំ ២០២១ នេះ ស្ថិតនៅចំណុច ក្រុមទី០៧ ភូមិថ្មី សង្កាត់ស្វាយដង្គំ ក្រុង សៀមរាប ខេត្តសៀមរាប។

នាយប៉ុស្តិ៍ នគរបាល សង្កាត់ស្វាយដង្គំ លោកស៊ូ វ៉ាន់ដេត បានថ្លែងប្រាប់អ្នកសារព័ត៌មានថា មានម្ចាស់ឈ្មោះ លឿង ប៊ុនចូវ ភេទប្រុស អាយុ៣៨ឆ្នាំ ជនជាតិវៀតណាម។

លោកនាយប៉ុស្ដិ៍ ថាករណីនេះ បណ្ដាលអោយឆេះ ខូចខាតគំនរ កម្ទេចជ័រសំបកទូរទស្សន៍ អេតចាយ ម្ចាស់បានស្តុកទុក នៅខាងក្រោយ ដែលមានតម្លៃប្រហែលជាង ៣,០០០,០០០រៀល។

លោកបានបញ្ជាក់ថា មូលហេតុ អ្នកជិតខាងឈ្មោះ ជា ម៉ិច ភេទ ប្រុស អាយុ៤១ឆ្នាំ បានដុតសំរាមស្លឹកឈើងាប់ៗ នៅដីរបស់ខ្លួន ដែលជាប់នៅគ្នា ហើយក៏ឆេះរាលដាលតែម្ដង។

ក្នុងហេតុការនេះដែរ សមត្ថកិច្ចប្រើប្រាស់ឡានទឹកអស់ចំនួន០៣ឡាន(ឡានទឹកអធិការដ្ឋាន ក្រុងសៀមរាប ០១ឡាន,ឡានទឹកស្នងការដ្ឋាននគរបាល ខេត្តសៀមរាបចំនួន០២គ្រឿង)ទើបរលត់ជាស្ថាពរ៕SRP

ខេត្តសៀមរាប៖លោកវរសេយ៍ទោសុខ ម៉េង អ៊ាង នាយរងនាយការិយាល័យ នគរបាលព្រហ្មទណ្ឌ កម្រិតធ្ងន់ នៃស្នងការខេត្តសៀមរាប ត្រូវបានសម្ដេច ក្រឡាហោម ស ខេង រដ្ឋមន្ត្រីក្រសួងមហាផ្ទៃ សម្រេចតែងតាំង ជានាយការិយាល័យ នគរបាល ព្រហ្មទណ្ឌ កម្រិតធ្ងន់ នៃស្នងការខេត្តសៀមរាប ជំនួសលោកវរសេនីយ៍ឯកដួង សុខា ដែលត្រូវបានចូលនិវត្តន៍។

គួរបញ្ជាក់ថានៅថ្ងៃទី១២ ខែ មករា ២០២១ ព្រឹកមិញនេះ នៅស្នងការដ្ឋាននគរបាលខេត្តសៀមរាប បានបើកកិច្ចប្រជុំ និងប្រកាសផ្ទៃក្នុង បូកសរុបកិច្ចប្រតិបត្តិការ រក្សាសន្តិសុខសណ្តាប់ធ្នាប់ សង្គមប្រចាំខែ ធ្នូ ឆ្នាំ ២០២០ និងទិសដៅបន្ត របស់ស្នងការដ្ឋាននគរបាលខេត្តសៀមរាប ក្រោមអធិបតីភាព លោកឧត្តមសេនីយ៍ទោ ទិត្យ ណារ៉ុង ស្នងការខេត្ត។

ក្នុងកិច្ចប្រជុំថ្ងៃនេះដែរ ក៏មានការប្រកាសផ្ទេរភារកិច្ច និងប្រគល់ភារកិច្ច ចូលកាន់តំណែង ស្នងការរង នាយការិយាល័យ អធិការនគរបាលស្រុកមួយចំនួនផងដែរ។

សូមជម្រាបថា លោកវរសេយ៍ទោសុខ ម៉េង អ៊ាង អតីត នាយរងនាយការិយាល័យ នគរបាលព្រហ្មទណ្ឌ កម្រិតធ្ងន់ នៃស្នងការខេត្តសៀមរាប ជាមន្ត្រីនគរបាលមួយរូបដែលមានស្នាដៃជាច្រើន ក្នុងការទប់ស្កាត់ បង្រ្កាបបទល្មើសជាច្រើនក្នុងខេត្តសៀមរាបកន្លងមក ជាពិសេសបទល្មើសឧក្រិដ្ឋ៕SRP

ខេត្តកំពង់ចាម​៖លោក​​ អ៊ុន​ ចាន់ដា​ អភិបាលខេត្តកំពង់ចាម នៅថ្ងៃទី១២ ខែមករា​ ឆ្នាំ​២០២១​ ព្រឹកមិញ នេះ បានដឹកនាំមន្ត្រីជំនាញពាក់ព័ន្ធ និង​អាជ្ញាធរ​មូលដ្ឋាន​ ចុះពិនិត្យគម្រោងស្ថាបនា កែប្រែពីផ្លូវដី ទៅ​ជា​​​ផ្លូវ​ក្រាល​​កៅស៊ូ​ ប្រភេទDBST​​ នៅ​ឃុំ​ថ្មពូន​ ​ស្រុកព្រៃឈរ​ ដែលមានប្រវែង​ ប្រមាណជា២៥គីឡូម៉ែត្រ និងស្រុកស្ទឹងត្រង់​ មានប្រវែងជាង២០​គីឡូម៉ែត្រ​​​​។

លោក​ អ៊ុន​ ចាន់ដា​ បានបញ្ជាក់ថា ការ​អញ្ជើញ​ចុះពិនិត្យ​គម្រោង​​កែប្រែ​ពី​ផ្លូវ​ដី​ ឲ្យ​ក្លាយ​ទៅ​ជា​ផ្លូវ​ក្រាល​កៅស៊ូ​ទាំង២ខ្សែ នេះ គឺជាការឆ្លើយតបទៅតាមតម្រូវការ របស់​បងប្អូន ប្រជាពលរដ្ឋ ដេីម្បី​ងាយស្រួល​ ក្នុងការធ្វើដំណើរ ក៏ដូចជា​ការ​ដឹក​ជញ្ជូន​កសិផល​ ​យកទៅលក់ នៅទីផ្សារ។

ដូច្នេះហើយ ក្នុងនាមអាជ្ញាធរ ត្រូវតែ​ខិតខំ​កៀងគរ​ថវិកា​ លើក គម្រោង ឲ្យត្រូវតាម សេចក្តីត្រូវការ របស់អ្នកប្រើប្រាស់ និង​ប្រយោជន៍​ សម្រាប់ប្រើប្រាស់បានយូរអង្វែងផងដែរ។ ជាពិសេដ ដើម្បីចូលរួមចំណែក លើកកម្ពស់ជីវភាព របស់​បងប្អូន​ប្រជាពលរដ្ឋ​ ឲ្យកាន់តែប្រសើរឡើង។

បើតាម លោក អ៊ឹង វិសុទ្ធ ប្រធានមន្ទីរអភិវឌ្ឍន៍ និងជនបទខេត្តកំពង់ចាម បានឲ្យដឹងថា ផ្លូវទាំង២ខ្សែ​នេះ ត្រូវ​បាន​កែប្រែ ពីផ្លូវ​ក្រាល​គ្រួស​ក្រហម ទៅជាកៅស៊ូប្រភេទ DBST ពីរជាន់ ដែលជាការកែលម្អផ្លូវជនបទជំហាន៣ របស់ធនាគារអភិវឌ្ឍអាស៊ី ហៅកាត់ថា អេឌីបី (ADB) តាមរយៈ ក្រសួងអភិវឌ្ឍន៍ជនបទ។

ក្នុង​នោះ​រួមមាន​ ខ្សែទី១ ឆ្លងកាត់ឃុំចំនួន៣ គឺមានឃុំគរ ឃុំថ្មពូន និងឃុំក្រូច ហើយ​បន្ត​ដល់​ឃុំ​តាអុង​ ស្រុក​ចំការលេី​ ដែល​សរុប​ប្រមាណ​ជា​២៥គីឡូម៉ែត្រ​ ទទឹងខ្នងលើ៦ម៉ែត្រ​ ដោយការងារសម្រេចបានចាក់បំពេញដីស​បាន១០០%​ ចាក់បំពេញដីក្រួសក្រហមស្រទាប់គ្រឹះក្រោម​បាន៩០%​ ការងារសាងសង់លូមូលចំនួន២៣កន្លែង បាន ១០០%​ សាងសង់លូជ្រុងចំនួន១កន្លែង សម្រេចបាន១០%​ ចាក់បំពេញថ្មមិចគ្រឹះផ្លូវ​ និង​ស្រោចកៅស៊ូចាប់ផ្ដើមពីខែ មិនា ឆ្នាំ២០២១​ ខាងមុខនេះ​។

ដោយឡែក​ខ្សែទី២ ផ្លូវដីក្រហម-អារក្សត្នោត ឆ្លងកាត់ឃុំចំនួន៣ មានឃុំសូភាស ឃុំដងក្ដារ និងឃុំព្រែកកក់ ស្ថិតនៅក្នុងស្រុកស្ទឹងត្រង់​ មានប្រវែងជាង២០គីឡូម៉ែត្រ​ ទទឹងខ្នងលើ ៦ម៉ែត្រ​ ការងារសម្រេចបាន​ គឺចាក់បំពេញដីសបាន១០០%​ ចាក់បំពេញដីក្រួសក្រហមស្រទាប់គ្រឹះក្រោមបាន៧០%​ សាងសង់លូមូលចំនួន៥កន្លែង សម្រេចបាន១០០%​ ចាក់បំពេញថ្មមិចគ្រឹះផ្លូវ​ និង​ស្រោចកៅស៊ូចាប់ផ្ដើមពីខែ មីនា ឆ្នាំ២០២១​ ខាងមុខនេះ​៕SRP

ភ្នំពេញ៖រយ:ពេលកន្លងមកនេះគេសង្កេតឃើញ ល្បែងស៊ីសងប្រភេទ ឡូតូតាមអនឡាញ បានកើតមានសឹងគ្រប់ខេត្តក្រុង តាមបណ្ដារស្រុក ដោយមានការបើកលេងដោយចំហរតែម្ដង។

ប្រការ ដែលមានល្បែងស៊ីសង ប្រភេទ ឡូតូ បើកលេងដោយចំហរ នៅតាមបណ្ដាហាងកាហ្វេនានាតាមបណ្តាខេត្តក្រុងបែបនេះ គេនៅមិនទាន់ដឹងថា មានអាជ្ញាប័ណ្ណ ឬយ៉ាងណានោះទេ។

បើទោះបី ល្បែងស៊ីសង ប្រភេទ ឡូតូ តាមអនឡាញ មានអាជ្ញាប័ណ្ណយ៉ាងណាក៏ដោយ ក៏ប៉ុន្តែពេលសង្កេតឃើញពលរដ្ឋខ្មែរ មួយចំនួន ហាក់វីនិងល្បែងស៊ីសងនេះយ៉ាងខ្លាំង។ ត្រង់ចំណុចនេះក្រសួងពាក់ព័ន្ធ មិនគួរមើលរំលងនោះទេ។ ព្រោះហេតុថាបញ្ហាល្បែងស៊ីសងនេះអាចនាំឱ្យមានអំពើចោរកម្មអំពើហិង្សាផងដែរ។

ពាក់ព័ន្ធល្បែងស៊ីសង ប្រភេទឡូតូ អនឡាញ នេះ ប្រជាពលរដ្ឋ កំពុងតែមានការងឿងឆ្ងល់ទៅនឹង ចំពោះល្បែងស៊ីសង ប្រភេទនេះ កើតឡើងតាមបណ្ដាខេត្ត ក្រុង និងតាមស្រុកក្រុង ដែលអាចនាំឱ្យពួកគាត់គាត់មានការព្រួយបារម្ភ កើត
មានអំពើចោរកម្មនៅតាមមូលដ្ឋានផងដែរ។

ប្រជាពលរដ្ឋ ហាក់សម្ដែង នូវមិនសប្បាយចិត្ត ការដែលមានល្បែងស៊ីសង ប្រភេទឡូតូ បែបនេះ ជាការ ផ្ទុយនឹងភូមិ ឃុំ មានសុវត្ថិភាព ដែល មិនអនុញ្ញាតឲ្យមានល្បែងស៊ីសងគ្រប់ប្រភេទ។

សូមរំលឹកថាកាលពីថ្មីៗនេះ នាយឧត្តមសេនីយ៍នេត សាវឿន អគ្គស្នងការនគរបាលជាតិ បានចេញបទបញ្ជា ឲ្យបិទល្បែងស៊ីសង ឆ្នោត​ឡូតូ​ តាមអនឡាញ ត្រូវបានបិទទូទាំងប្រទេស។

សូមបញ្ជាក់ថានៅ​ថ្ងៃទី ០៤​ ខែ​ វិច្ឆិកា​ ឆ្នាំ​ ២០២០​នេះ ក្រុម​ប្រតិបត្តិការ​ នៃគណៈកម្មការ ចម្រុះបង្ក្រាបការលេងល្បែងកាស៉ីណូ ឆ្នោត​ ឡូតូ​ ភ្នាល់​បាល់​ ភ្នាល់​អនឡាញ​ និង​ល្បែង​ភ្នាល់​ខុសច្បាប់​គ្រប់​ប្រភេទ​ បានចុះ​ពិនិត្យ​ ក្រុម​ហ៊ុន​ ស៊ិន នីវ​ ដែល​មានទី​ស្នាក់​ការ​នៅ​កោះពេជ្រ​ រាជធានី​ភ្នំពេញ​ និងបាន​រកឃើញ​ថា​ តំណាង​ចែកចាយ​មួយចំនួន​ ពិតជា​បានធ្វើ​អាជីវកម្ម​ឆ្នោត​ប្រភេទ​ Kenoប្រាកដ​មែន។

ក្រោយពីក្រុមប្រតិបត្តិការចម្រុះពិនិត្យរួចបានសម្រេចបិទមិនអនុញ្ញាតឲ្យធ្វើ អាជីវកម្ម​ឆ្នោត​ប្រភេទ​ keno ចាប់​ពីថ្ងៃ​នេះ​តទៅ។

គួរបញ្ជាក់ផងដែរថា ល្បែងស៊ីសងប្រភេទ ឆ្នោត ឡូតូ​ ភ្នាល់បាល់តាម អនឡាញ ខាងលើនេះ បានបើកឱ្យអ្នកលេងចាក់ ដោយចំហរនៅតាមហាងកាហ្វេនិងតារាងបាល់ សឹងគ្រប់ខេត្តក្រុង។

ពលរដ្ឋ រំពឹងថា នៅក្នុងប្រទេសកម្ពុជា មិនមានល្បែងស៊ីសងប្រភេទនេះ តទៅទៀតនោះទេ ហើយសង្ឃឹមថាក្រសួងពាក់ព័ន្ធ ជួយពិនិត្យករណីនេះផង៕SRP

ខេត្តសៀមរាប៖ក្នុងកិច្ចប្រជុំបូកសរុបការអនុវត្តការងារប្រចាំឆ្នាំ២០២០ និងទិសដៅអនុវត្តបន្តឆ្នាំ ២០២១ របស់មន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិកាកិច្ច អាជ្ញាធរខេត្តសៀមរាប បានដាក់គោលការណ៍ចំនួន៦ចំណុចដើម្បីឱ្យមន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចបន្តអនុវត្តការងារបន្ថែម។

កិច្ចប្រជុំនេះ ធ្វើនៅថ្ងៃច័ន្ទ ថ្ងៃទី១១ ខែ មករា ឆ្នាំ ២០២១ ម្សិលមិញ ក្រោមវត្តមាន លោក ពៅ ពិសិដ្ឋ អភិបាលរងខេត្ត ទទួលបន្ទុកកិច្ចការមន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច។

នាឱកាសនោះដែរ អភិបាលរងខេត្ត បានមានមតិផ្តាំផ្ញើ៖
-ត្រូវបន្តយកចិត្តទុកខ្ពស់ចំពោះវិធានការការពារការឆ្លងវីរុសCovide19 និងអនុវត្តតាមការណែនាំរបស់ក្រសួងសុខាភិបាល
-ត្រូវមានសាមគ្គីភាពផ្ទៃក្នុង ភាតរភាព និងការគោរពគ្នាទៅវិញទៅមក និងស្មោះត្រង់ចំពោះអង្គភាព។
-ពង្រឹងកិច្ចការទំនាក់ទំនងជាមួយមន្ទីរអង្គភាពពាក់ព័ន្ធ និងស្ថាប័នជាតិ-អន្តរជាតិ អោយបានល្អប្រសើរ
-ពង្រឹងប្រសិទ្ធិភាព កិច្ចការទំនាក់ទំនងជាមួយរដ្ឋសភា -ព្រឹទ្ធសភា និងអធិការកិច្ចនិងបន្តផ្សព្វផ្សាយឯកសារច្បាប់នានាអោយបានទូលំទូលាយ
-ពង្រឹងប្រសិទ្ធិភាព កិច្ចការរដ្ឋបាល និងហិរញ្ញវត្ថុក្នុងអង្គភាព
-បន្តពង្រឹងប្រសិទ្ធិភាព កិច្ចការអធិការកិច្ច និងទទូលពាក្សបណ្តឹង ដោះស្រាយពាក្យបណ្តឹងជូនប្រជាពលរដ្ឋ
កិច្ចប្រជុំនេះរៀបចំនៅបន្ទប់ប្រជុំនៃមន្ទីរទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចខេត្តសៀមរាប។

បើតាមប្រធានមន្ទីរបានរាយការណ៍ បានបញ្ជាក់ថាមន្ត្រីក្របខណ្ឌ និងរចនាសម្ព័ន្ធ ក្នុងមន្ទីរ មន្ត្រីក្របខណ្ឌសរុបចំនួន ១៣ រូប ស្រី ៦ រូប ដោយមានការរិយាល័យចំនួន ៣
១ ការិយាល័យរដ្ឋបាល និងហិរញ្ញវត្ថុ
២ ការិយាល័យអធិការកិច្ច និងទទួលពាក្យបណ្តឹង
៣ ការិយាល័យទំនាក់ទំនងជាមួយរដ្ឋសភា-ព្រឹទ្ធសភា និងអាជ្ញាធររាជធានីខេត្ត៕SRP

ភ្នំពេញ៖នៅថ្ងៃទី១១ ខែមករា ឆ្នាំ២០២១ នេះ សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) បានចេញរបាយការណ៍ស្តីពី «បណ្តឹងលើអ្នកកាសែតកម្ពុជា ក្នុងឆ្នាំ២០២០» ដោយបានកត់សម្គាល់ឃើញថា មិនសូវមានការយកចិត្តទុកដាក់លើច្បាប់ស្តីពីរបបសារព័ត៌មាន។

របាយការណ៍បានឲ្យដឹងថា ពេញមួយឆ្នាំកន្លងទៅនេះ ស.ស.ស.ក បានទទួលបណ្តឹង និងបានជួយអន្តរាគមន៍ដោះស្រាយ ចំនួន៣៣ករណី ស្មើចំនួន២៧អង្គភាព នៅលើដែនសមត្ថកិច្ចចំនួន៥។

របាយការណ៍នេះ ឆ្លុះបញ្ចាំងតែករណីដែល ស.ស.ស.ក បានទទួលពាក្យស្នើសុំពឹងពាក់ជាផ្លូវការពីអ្នកសារព័ត៌មាន ឲ្យជួយអន្តរាគមលើរឿងក្តីរបស់ពួកគេនៅតុលាការប៉ុណ្ណោះ ដោយមិនបានរាប់បញ្ចូលនូវករណីខ្លះដ៏ទៃទៀត ក្រៅពីកិច្ចអន្តរាគមន៍របស់ ស.ស.ស.ក នោះទេ។

សហភាពសហព័ន្ធអ្នកសារព័ត៌មានកម្ពុជា កត់សំគាល់ឃើញថា នៅក្នុងបណ្តឹងទាំង៣៣ករណី កម្មវត្ថុនៃពាក្យប្តឹង គឺផ្តើមចេញពីមូលហេតុនៃការផ្សាយអំពីបញ្ហាទំនាស់ដីធ្លី និងការបង្ហាញទីតាំងបទល្មើស។ មិនមានការប្តឹងលើការផ្សាយទស្សនៈមតិ ឬការបរិយាយនយោបាយនោះទេ។

សហភាពសហព័ន្ធអ្នកសារព័ត៌មានកម្ពុជា កត់សំគាល់ឃើញដែរថា កម្មវត្ថុនៃពាក្យប្តឹងទាំងអស់ គឺសំដៅកសាងបទចោទជា «សំណុំរឿងព្រហ្មទណ្ឌ» ដែលសូម្បីតែក្នុងបណ្តឹងរវាងអ្នកសារព័ត៌មាន នឹងអ្នកសារព័ត៌មាន ក៏កសាងបទចោទជាសំណុំរឿងព្រហ្មទណ្ឌដែរ។ នេះហាក់បង្ហាញអំពីការយកចិត្តទុកដាក់នៅកម្រិតទាបបំផុតលើ «ច្បាប់ស្តីពីរបបសារព័ត៌មាន»។

សហភាពសហព័ន្ធអ្នកសារព័ត៌មានកម្ពុជា ជម្រាបជូនបន្ថែមថា ស.ស.ស.ក សម្រេចមិនជ្រើសយកការចេញសេចក្តីថ្លែងការណ៍ក្នុងករណីនីមួយៗ ដោយយល់ឃើញថា វិធីបែបនេះ នឹងធ្វើឲ្យរឿងរ៉ាវខ្ទរខ្ទារ ប៉ុន្តែអាចបង្ករភាពស្មុគស្មាញក្នុងវិធីដោះស្រាយរឿងក្តី។ អាស្រ័យហេតុនេះ ស.ស.ស.ក យល់ឃើញថា និងសម្រេចយកវិធីនៃការបំពេញតួនាទីជាជំនួយនៃការស្រាវជ្រាវអង្គហេតុ ជាពន្លឺសម្រាប់តុលាការធ្វើសេចក្តីសម្រេចលើរឿងក្តីនៃមួយៗ គឺល្អបំផុត ហើយត្រឹមត្រូវតាមនីតិវិធី។

លោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា មានប្រសាសន៍ថា៖ «នៅក្នុងរបៀបនៃការអន្តរាគមន៍ករណីនីមួយៗខាងលើ គឺ ស.ស.ស.ក បានអញ្ជើញអ្នកដែលត្រូវគេប្តឹងមកសាកសួរព័ត៌មាន។ បន្ទាប់មក ស.ស.ស.ក បានរកការសម្របសម្រួលពីភាគីដើមបណ្តឹងរដ្ឋប្បវេណី និងស្រាវជ្រាវបន្ថែមលើករណីនីមួយៗ។ បន្ទាប់មក ស.ស.ស.ក ធ្វើរបាយការណ៍ជាសារណាដាក់ជូនអយ្យការអមសាលាដំបូងរាជធានី-ខេត្ត តាមដំណើររឿងក្តីនីមួយៗ ដោយបានស្នើសុំឲ្យពិនិត្យនិងចេញដីការតម្កល់រឿងទុកឥតចាត់ការ និងឬ ស្នើសុំឲ្យធ្វើការផ្សះផ្សាតាមផ្លូវច្បាប់ក្រោមស្មារតី «គោលនយោបាយឈ្នះ-ឈ្នះ»។

សហភាពសហព័ន្ធអ្នកសារព័ត៌មានកម្ពុជា យល់ឃើញថា លំហរសេរីភាពសារព័ត៌មាននៅប្រទេសកម្ពុជាក្នុងឆ្នាំ២០២០ ពុំមានចំណុចព្រួយបារម្ភនោះទេ ខណៈនៅទូទាំងពិភពលោកមានអ្នកសារព័ត៌មានចំនួន៥០នាក់ត្រូវបានសម្លាប់ និងចំនួន៣៨៧នាក់ទៀតត្រូវបានឃុំខ្លួន។ អ្នកកាសែតមួយចំនួនទៀតនៅប្រទេសលោកខាងលិច រួមទាំងនៅ សហរដ្ឋអាមេរិកផង រងការធ្វើទារុណកម្មលើរាងកាយ និងត្រូវបានចាប់បោកសម្ភារៈចោល ក្នុងពេលពួកគេបំពេញការងារនៅកន្លែងមានបាតុកម្ម។

ស.ស.ស.ក សូមលើកទឹកចិត្តដល់អ្នកសារព័ត៌មាន បន្តបំពេញតួនាទីដោយឈរលើគោលការណ៍ វិជ្ជាជីវៈជាចម្បង ហើយរួមចំណែកក្នុងការប្រយុទ្ធប្រឆាំងព័ត៌មានក្លែងក្លាយ សង្គ្រាមចិត្តសាស្ត្រនៃភូមិសាស្ត្រនយោបាយ និងចូលរួមចំណែក ផ្សព្វផ្សាយ សក្តានុពល កិត្យានុភាព និងឧត្តមភាពជាតិយើង៕SRP

ខេត្តកំពង់ចាម​៖លោក​ឧប​នាយក​រដ្ឋ​មន្ដ្រី ​ហោ ​ណាំហុង​ នៅថ្ងៃទី១១ ខែមករា​ ឆ្នាំ​២០២១​ព្រឹកមិញ បានអញ្ជេីញ​ជា​អធិបតី​ក្នុងពិធី​បេីក​បវេសនកាល​ឆ្នាំ​សិក្សា​២០២០-២០២១​ និង​សម្ពោធ​អគារ​សិក្សា​១ខ្នង​ កម្ពស់​៣ជាន់​ ស្មើ​នឹង​១២បន្ទប់​ ដែលជា​អំណោយ​របស់​​មូលនិធិ​ ហោ​ ណាំហុង​-បូរី​ ហោ​ ​ផ្តល់​ជូន​វិទ្យាល័យអប់រំពិសេស​កំពង់ចាម​ ដោយ​មាន​ការ​អញ្ជើញ​ចូល​រួម​ពី​ លោក​​ ខៀវ​ កាញារីទ្ធ​ រដ្ឋមន្ត្រី​ក្រសួងព័ត៌មាន​ លោក​​ ហង់​ជួនណារ៉ុន​ រដ្ឋមន្ត្រី​ក្រសួង​អប់រំ​យុវជន​និង​កីឡា​​ និង​លោក​​ អ៊ុន​ ចាន់ដា​ អភិបាលខេត្តកំពង់ចាម​​ ព្រមទាំង​ថ្នាក់ដឹកនាំ​ ​មន្ត្រី​រាជការ​​ និង​សប្បុរសជន​នានា​ផង​ដែរ​។

លោក​ ហោ ​ណាំហុង​ បាន​ថ្លែង​ថា​ ក្រោម​ការ​ដឹកនាំ​ប្រកប​ដោយ​ គតិបណ្ឌិត របស់ សម្តេច ហ៊ុន​ សែន​ ប្រមុខ​រាជរដ្ឋាភិបាល​កម្ពុជា​ និង​សម្តេច​កិត្តិព្រឹទ្ធបណ្ឌិត​ ប្រទេស​ជាតិ​យើង​ទទួល​បានជោគជ័យ​​ ក្នុងការអភិវឌ្ឍន៍ គ្រប់វិស័យ មិន​ថា​នៅ​រាជធានី​ ឬនៅ​តាម​​បណ្ដា​ខេត្ត​-ក្រុង​​នោះ​ទេ​ ដោយមាន​បរទេស​បានទទួល​ស្គាល់​ ​ចំពោះ​ការ​រីកចម្រើន​យ៉ាង​ឆាប់រហ័ស​។

លោក បានកោតសរសើរ និង​ថ្លែង​អំណរគុណ​យ៉ាង​ជ្រាលជ្រៅ​បំផុត​ ​ចំពោះ​​លោក​នាយក​ លោក​គ្រូ​ អ្នកគ្រូ​ ទាំងអស់​ ដែល​បាន​យកចិត្ត​ទុកដាក់​ ​ក្នុង​ការ​​ដឹកនាំ​សាលា​រៀន​ ក៏ដូចជា​ការ​បម្រើ​​ដល់​វិស័យ​អប់រំ​ រហូត​ទទួល​បាន​​លទ្ធផល​ផ្លែផ្កា​ជាទី​មោទនៈ​នាពេល​កន្លង​មក​ ជាពិសេស​បាន​ចូលរួម​ទប់ស្កាត់​ការ​រីករាលដាល​នៃ​ជំងឺ​កូវីដ​-១៩​ ទៀត​ផង​។

លោកក៏បានសំណូមពរដល់អ្នកគ្រប់គ្រងសាលា​ ក៏ដូចជា​លោកគ្រូ​ អ្នកគ្រូ​ ទាំងអស់​ ឲ្យ​​ជួយ​ថែរក្សា​អគារ​ថ្មី​នេះ​ ទុក​សម្រាប់​ក្មួយៗ​ ចៅ​ៗ​ ដែល​ជា​ទំពាំង​ស្នង​ឫស្សី​ បាន​សិក្សា​រៀនសូត្រ​ រហូត​ទទួល​បាន​ជោគជ័យ​ ប្រកបដោយគុណភាព។ ​ ​

លោក​​ អ៊ុន​ ចាន់ដា​ អភិបាលខេត្តកំពង់ចាម​ បាន​ឲ្យដឹងថា​ សិស្ស​ក្នុង​វិទ្យាល័យ​អប់រំ​ពិសេស​ ​​សរុប​ចំនួន​​​១៧២នាក់​ ក្នុងនោះ​សិស្ស​ពិការ​ភ្នែក​មាន​៥៥នាក់​ និង​គផ្លង់​ចំនួន​១១៧នាក់​ ចាប់​​ពី​ថ្នាក់​បឋម​ ដល់​​វិទ្យាល័យ​ ដោយ​​មាន​​បុគ្គលិក​សរុប​​ចំនួន​​៣០នាក់​។ អគារសរុបចំនួន៧ខ្នង ស្មើ​នឹង​៤១បន្ទប់​ ក្នុង​នោះ​អគារ​ស្នាក់នៅ​ថ្មី​១ខ្នង​ កម្ពស់​៣ជាន់​ ស្មើ​នឹង​១២បន្ទប់​ ដែលជា​អំណោយ​​របស់​មូនិធិ​ ហោ​ ណាំហុង​-បូរី​ហោ​ សរុប​ជា​ទឹកប្រាក់​ប្រមាណ​ជា​ ២៩១.២០៤ដុល្លារ​អាមេរិក​។​

ក្នុង​នោះ​លោក​​ ខៀវ​ កាញារីទ្ធ​ រដ្ឋមន្ត្រី​ក្រសួងព័ត៌មាន​ និង​លោកស្រី​​ បានចុះ​សួរសុខទុក្ខ​បុគ្គលិក​ កុមារ​ពិការ​ភ្នែក​ និង​គថ្លង់​ ចំនួន​២ដង​ ក្នុង​១ឆ្នាំ​ ដោយ​បាន​រៀបចំ​អាហារ​ថ្ងៃត្រង់​ ព្រមទាំង​ឧបត្ថម្ភ​ជា​សំភារៈ​សិក្សា​ គ្រឿង​ឧបភោគ​បរិភោគ​ និង​ថវិកា​មួយ​ចំនួន​ដល់​បុគ្គលិក​ សិស្សានុសិស្ស​ និង​សម្រាប់​សាលា​រៀន​ផងដែរ​៕SRP

ខេត្តសៀមរាប៖លោក ទៀ សីហា អភិបាលខេត្តសៀមរាប នៅថ្ងៃទី១១ ខែមករា ឆ្នាំ២០២១ នាព្រឹកមិញ បានអញ្ជើញ បើកបវេសនកាល ឆ្នាំសិក្សា២០២០. ២០២១ នៅ វិទ្យាល័យ ១០ មករា ១៩៧៩ ។

លោកទៀ សីហា បានលើកឡើងថា ថ្ងៃទី១១ ខែមករា ឆ្នាំ២០២១ គឺជាថ្ងៃបើកទំព័រថ្មី នៃការចាប់ផ្តើមជីវិតសិក្សាដំបូងរបស់ប្អូនៗ ក្មួយៗ សិស្សានុសិស្ស ទើបនឹងដល់អាយុត្រូវចូលសាលារៀន និងជាថ្ងៃត្រឡប់មកកាន់សាលារៀនវិញ ក្នុងឆ្នាំសិក្សាថ្មី របស់ប្អូនៗ ក្មួយៗ បន្ទាប់ពីបានឆ្លងកាត់ និងទទួលនូវបទពិសោធន៍នៃការអប់រំក្នុងសម័យកូវីដ-១៩ ក្នុងឆ្នាំសិក្សា២០១៩-២០២០ កន្លងមកនេះ ទោះបីក្នុងរូបភាពខុសៗគ្នាយ៉ាងណាក៏ដោយ។

សូមថ្លែងអំណរគុណដ៏ ស្មោះស្ម័គ្រ ចំពោះថ្នាក់ដឹកនាំ គ្រប់លំដាប់ថ្នាក់ មន្ទីរ-អង្គភាពពាក់ព័ន្ធនានា មាតាបិតា អាណាព្យាបាល សប្បុរសជន គណៈគ្រប់គ្រងសាលា ជាពិសេសលោកគ្រូ អ្នកគ្រូ ដែលបានពុះពារឧបសគ្គគ្រប់បែបយ៉ាង ក្នុងការគាំទ្រ និងផ្តល់នូវការរៀនសូត្រ ដល់សិស្សានុសិស្ស តាមគ្រប់រូបភាព ក្នុងអំឡុងពេល នៃការប្រយុទ្ធប្រឆាំងនឹងជំងឺកូវីដ-១៩។

លោកបន្តថា ពាក់ព័ន្ធនឹងការស្ថាបនាផ្លូវ ៣៨ខ្សែ ក្នុងក្រុងសៀមរាប កំពុងតែដំណើរការយ៉ាងសស្រាក់សស្រាំ សូមបងប្អូន ប្រជាពលរដ្ឋ ប្អូនៗ ក្មួយៗទាំងអស់ ធ្វើចរាចរណ៍ដោយការប្រុងប្រយ័ត្ន ក្នុងកំឡុងពេលនៃការដ្ឋាននេះ ព្រោះនឹងមានការបិទផ្លូវ មួយចំនួន ការកកស្ទះ ធូលីដីហ៊ុយ ឡានដឹកដីធំៗជាដើម៕SRP

ភ្នំពេញ៖សារលិខិត របស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាថ្លែងក្នុងឱកាសបើកបវេសនកាលឆ្នាំសិក្សា២០២០-២០២១ ថ្ងៃចន្ទ ១៣រោច ខែ បុស្ស ទោស័ក ព.ស ២៥៦៤ ត្រូវនឹងថ្ងៃទី ១១ ខែ មករា ឆ្នាំ២០២១៕SRP

ខេត្តព្រះវិហារ៖លោក ប្រាក់ សុវណ្ណ អភិបាលនិងជាប្រធានគណៈបញ្ជាការឯកភាពរដ្ឋបាលខេត្តព្រះវិហារ នៅថ្ងៃទី១១ ខែមករា ឆ្នាំ២០២០ ព្រឹកមិញ បានអញ្ជើញជាអធិបតី ក្នុងពិធីបិទវគ្គហ្វឹកហ្វឺនពង្រឹងយោធា ដល់នាយទាហាន នាយទាហានរង និងពលទាហានតំបន់ប្រតិបត្តិការ សឹករងព្រះវិហារប្រចាំឆ្នាំ២០២០។

មានប្រសាសន៍ក្នុងនោះដែរ លោក ប្រាក់សុវណ្ណ បានពាំនាំនូវការផ្តាំផ្ញើ និងសាកសួរសុខទុក្ខពីសំណាក់ សម្តេច តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជានិច្ចកាលសម្តេចទាំងពីរតែងតែ គិតគូរយកចិត្តទុកដាក់បំផុត ចំពោះសុខទុក្ខ និងដោះស្រាយរាល់បញ្ហា លំបាករបស់បងប្អូនកងកម្លាំង តាមរយៈការផ្គត់ផ្គង់ សម្ភារជាតម្រូវការផ្សេងៗ សាងសង់លំនៅដ្ឋាន និងផ្តល់ដីសម្បទាន សម្រាប់បង្កបង្កើន ផលផងដែរ។ ជាពិសេស សម្ដេចទាំងទ្វេ តែងតែជួយឧបត្ថម្ភគាំទ្រគ្រប់បែបយ៉ាង ដើម្បីបង្កលក្ខណៈ ដល់ការរស់នៅ របស់កងកម្លាំងឱ្យមាន ស្ថានភាពល្អប្រសើរឡើងពីមួយ ឆ្នាំទៅមួយឆ្នាំ។

ជាមួយគ្នានេះដែរ ក្នុងនាមថ្នាក់ដឹកនាំ មន្រ្តីរាជការ និងប្រជាពលរដ្ឋ សូមគោរពថ្លែងអំណរគុណដ៏ខ្ពង់ខ្ពស់ ជូន សម្តេចតេជោ ដែលបានផ្តល់ជូននូវទឹកសុទ្ធចំនួន ១.០០០ កេស និង មីកញ្ចប់ចំនួន ៥០០ កេស ដើម្បីឧបត្ថម្ភដល់ ពលករ ដែលវិលត្រឡប់មកពីប្រទេសថៃ និងធ្វើចត្តាឡីស័កតាម០៧ មណ្ឌលចត្តាឡីស័ក ក្នុងខេត្តព្រះវិហារផងដែរ៕SRP