ខេត្តត្បូងឃ្មុំ៖នៅចំពោះមុខប្រជាពលរដ្ឋ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ បានថ្លែងអំពាវ ដល់ប្រជាពលរដ្ឋ ក្នុងស្រុកក្រូចឆ្មារ ខេត្តត្បូងឃ្មុំ សូមជួយថែរក្សា ទំនប់ ប្រឡាយ ពិសេសមិនត្រូវលក់ដីដាច់ខាត ពីព្រោះ ការលក់ដី គឺយើងទទួលបានប្រាក់ត្រឹមមួយពេល តែបើយើងទុកជួល និងបង្កបង្កើនផល គឺយើងទទួលបានប្រាក់ចំណូលមួយជីវិត។

លោកមានប្រសាសន៍យ៉ាងដូច្នេះ ក្នុងឱកាស ដឹកនាំមន្ត្រីជំនាញចុះពិនិត្យ បឹង ប្រឡាយ និងទំនប់ទឹកមួយចំនួន ក្នុងឃុំចំនួន០៤ ស្រុកក្រូចឆ្មារ ខេត្តត្បូងឃ្មុំ ដើម្បីសិក្សាធ្វើយ៉ាងណារក្សា និងទាញយកប្រភពទឹកសម្រាប់ស្រោចស្រពដំណាំផ្សេងៗរបស់ប្រជាកសិករ នារដូវប្រាំង ដូចជាស្រូវ ពោត និងថ្នាំជក់ជាដើម ខណៈឆ្នាំនេះ បឹង និងប្រឡាយនានាបានគោករាក់ ធ្វើឲ្យប្រជាពលរដ្ឋមួយចំនួនបង្ខំចិត្តបុកអណ្តូងស្នប់ ដើម្បីទាញយកទឹកមកប្រើប្រាស់។

លោកបានថ្លែងទៅកាន់ បងប្អូន ប្រជាពលរដ្ឋ ពិសេសអាជ្ញាធរ ភូមិ/ឃុំ សិក្សាឲ្យបានច្បាស់ថា ត្រូវជីកប្រឡាយ ធ្វើទំនប់ បែបណា ដើម្បីរក្សាទឹក បានច្រើនអាចប្រើប្រាស់គ្រប់គ្រាន់ តាមតំបន់នីមួយៗ ខណៈក្រុមការងារត្រៀមជានិច្ច ក្នុងការជួយតាមសំណូមពរ។

លោករដ្ឋមន្ត្រី ក៏បានដោះស្រាយ បញ្ហាដី នៅតំបន់ជាប់បឹង ជូនប្រជាពលរដ្ឋ ដោយប្រើប្រាស់យុទ្ធសាស្ត្រឈ្នះៗ បានយ៉ាងល្អ និងបានលើកទឹកចិត្ត ជួយសម្រួល ប្រជាពលរដ្ឋ ធានាជួយទិញគោ ដែលពលរដ្ឋ ចិញ្ចឹមបានផងដែរ។

សូមបញ្ជាក់ថាក្រោមការចង្អុលបង្ហាញពីសំណាក់ លោកជា សុផារ៉ា បានចាត់ឲ្យក្រុមការងារ ចុះជួយអន្តរាគមន៍ ស្តារប្រឡាយមួយចំនួន ដូចជាប្រឡាយវត្តគគីរ និងប្រឡាយទួលតាចក់, ដាក់ម៉ាស៊ីនបូមទឹកចំនួន២ ជួយបូមទឹកពីព្រែកចាមចូលប្រឡាយប្រវែង៤គីឡូម៉ែត្រ បម្រើប្រយោជន៍ កសិករ៦ភូមិ លើផ្ទៃដីជាង២០០ហិកតា។

គ្រោងជីកស្រះធំមួយ នៅឃុំស្វាយឃ្លាំង បម្រើការស្រោចស្រព លើផ្ទៃដីច្រើនជាង ៣០០ ហិកតា។ អន្តរាគមន៍ស្តារប្រឡាយអូឈ្លើង យកទឹកពីបឹងធំ ក្នុងឃុំរការខ្នុរ សម្រាប់ស្រោចស្រពដំណាំថ្នាំជក់ ពោត ប្រជាពលរដ្ឋចំនួន៥ភូមិ។

ដោយឡែកនៅឃុំឈូក ក្រុមការងារ បានទាញយកទឹក សង្រ្គោះស្រូវនៅចំនុចឃ្លីវ និងបឹងកាដេរ តាមរយ:ការស្តាប្រឡាយ ទាញយកទឹកពីបឹងការដេ ដែលអាចស្រោចស្រព លើផ្ទៃដីច្រើនជាង ១៥០០ ហិកតា៕SRP

ខេត្តកំពង់ធំ៖ខ្ញុំបាទ សូមគោរពជូនពរជ័យ សិរីមង្គល វិបុលសុខ មហាប្រសើរ ជូនចំពោះ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ក្នុងឱកាសដ៏មហានក្ខត្តប្ញក្សប្រារព្ធខួបកំណើតគម្រប់៧០ ឈានចូល ៧១ឆ្នាំ។

ក្នុងឱកាសដ៏ប្រពៃថ្លៃថ្លានេះ ខ្ញុំបាទយើងខ្ញុំទាំងអស់គ្នាសូមបួងសួងដល់គុណបុណ្យព្រះរតនត្រ័យកែវទាំងបី និងវត្ថុស័ក្តិសិទ្ធក្នុងលោក សូមប្រោះព្រំប្រសិទ្ធពរជ័យ បវរសួស្តី សិរីមង្គល វិបុលសុខមហាប្រសើរ ជូនដល់ សម្ដេចក្រឡាហោម និងលោកជំទាវ ព្រមទាំងក្រុមគ្រួសារទាំងមូល សូមប្រកបតែមហាវិបុលសុខ សុភមង្គល ព្រមទាំងពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លៀតឡើយ៕SRP

ខេត្តកំពង់ធំ៖ឯកឧត្តម សុខ លូ អភិបាលនៃគណៈអភិបាល ខេត្តកំពង់ធំ និងលោកជំទាវ ព្រមទាំងមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងខេត្ត បានផ្ញើសារសម្តែងនូវអំណរសាទរដោយស្មោះអស់ពីដួងចិត្ត និងសូមគោរពជូននូវសព្ទសាធុការពរជ័យ សិរីមង្គលដ៏មហាប្រសើរគ្រប់ប្រការជូន សម្តេចតេជោ ហ៊ុន សែន ក្នុងឱកាសខួប៣៦ឆ្នាំ នៃការចូលកាន់តំណែងផ្លូវការ ជានាយករដ្ឋមន្ត្រីនៃកម្ពុជា ដែលប្រព្រឹត្តទៅនាថ្ងៃទី១៤ ខែមករា ឆ្នាំ២០២១ (១៤ មករា ១៩៨៥-១៤ មករា ២០២១)។
រយៈពេល ៣៦ឆ្នាំ ក្រោមការដឹកនាំប្រកបដោយគតិបណ្ឌិត ភាពឈ្លៀសវៃ និងភាពអង់អាចរបស់ សម្តេចតេជោ បានបន្សល់ទុកនូវស្នាដៃដ៏ធំធេង ជាប្រវត្តិសាស្ត្រ ដែលមិនអាចកាត់ថ្លៃបាន ក្នុងការរំដោះប្រទេសជាតិចេញផុតពីរបបប្រល័យពូជសាសន៍ ប៉ុល ពត ឈានដល់ការផ្សះផ្សារ បង្រួបបង្រួមជាតិក្រោមនយោបាយឈ្នះ ឈ្នះ ដែលបាននាំមកនូវឯកភាពជាតិ ស្ថិរភាពនយោបាយ សន្តិភាព លទ្ធិប្រជាធិបតេយ្យ និងការអភិវឌ្ឍប្រទេសលើគ្រប់វិស័យ ជូនប្រជាជន និងមាតុភូមិទាំងមូល។
ក្នុងឱកាសដ៏វិសេសវិសាលនេះផងដែរ យើងខ្ញុំសូមបួងសួងដល់គុណបុណ្យព្រះរតនត្រ័យ វត្ថុស័ក្តិសិទ្ធិក្នុងលោក និងទេវតាតាមជួយបីបាច់ថែរក្សាប្រទានពរជ័យ សិរីសួស្តី ជ័យមង្គល វិបុលសុខបវរមហាប្រសើរ គ្រប់ប្រការជូនចំពោះសម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំង បុត្រាបុត្រី ចៅប្រុស ចៅស្រី ជាទីស្រឡាញ់ សូមបានប្រកបដោយពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕SRP

ខេត្តបាត់ដំបង៖អ្នកលេងកាំបិតធំចំនួន៣នាក់ត្រូវបាន ការិយាល័យ នគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តបាត់ដំបង ឃាត់ខ្លួន ករណី ហិង្សាដោយចេតនាមានស្ថានទម្ងន់ទោស កាប់ដោយកាំបិត។

ការបង្ក្រាបនេះនៅថ្ងៃទី ១៣ ខែ មករា ឆ្នាំ ២០២១ វេលាម៉ោង ១៦និង៣០នាទី នៅចំណុក្នុងបន្ទប់ជួលស្ថិតក្នុងភូមិអូរតាគាំ១ សង្កាត់ទួលតាឯក ក្រុងបាត់ដំបង ខខេត្តបាត់ដំបង។

ជនសង្ស័យ៖
១.ឈ្មោះ ហ៊ាង គឹមហាង ហៅជ្រុយ ភេទប្រុស អាយុ ២៤ ឆ្នាំ មានទីលំនៅភូមិព្រែកខ្ពប ឃុំព្រែកខ្ពប ស្រុកឯកភ្នំ ខេត្តបាត់ដំបង។

២.ឈ្មោះ ចាយ ដូ ភេទប្រុស អាយុ ២១ឆ្នាំ មានទីលំនៅភូមិព្រែកខ្ពប ឃុំព្រែកខ្ពប ស្រុកឯកភ្នំ ខេត្តបាត់ដំបង ឮ។

៣.ឈ្មោះ ឆាំ សំបូរ ហៅ ទីន ភេទប្រុស អាយុ ២៥ឆ្នាំ មានទីលំនៅភូមិស្វាយស ឃុំត្រែង ស្រុករតនៈមណ្ឌល ខេត្តបាត់ដំបង។

បុរសទាំង៣នាក់នេះ បានធ្វើសកម្មភាព ប្រើហិង្សាទៅលើ ជនរងគ្រោះ ឈ្មោះ ឡុង ញើង ភេទប្រុស អាយុ ៤២ ឆ្នាំ មានទីលំនៅភូមិកំពង់ក្របី សង្កាត់ស្វាយប៉ោ ក្រុងបាត់ដំបង ខេត្តបាត់ដំបង កាលពីថ្ងៃទី ១២ ខែមករា ឆ្នាំ ២០២១ វេលាម៉ោង ១៤និង៣០នាទី នៅចំណុចក្រុងរ៉ារថភ្លើង ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។

វត្ថុតាងដកហូតរួមមាន ៖
– កាំបិត កែច្នៃ០១ ដើម
– ផ្លែ រណាសម្រាប់អារទឹកកក០១
– ដែកឆាប០១

បច្ចុប្បន្នកសាងសំណុំរឿង បញ្ជូនទៅសាលាដំបូងខេត្តបាត់ដំបង ចាត់ការបន្តតាមផ្លូវច្បាប់៕SRP

ខេត្តសៀមរាប៖ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប សូមអបអរសាទរខួបទី៣៦ឆ្នាំនៃការកាន់តំណែងជានាយករដ្ឋមន្ត្រីរបស់សម្តេចតេជោហ៊ុនសែន។

ខ្ញុំបាទ និងក្រុមគ្រួសារ ព្រមទាំងក្រុមប្រឹក្សាខេត្ត គណៈអភិបាលខេត្ត មន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងខេត្តសៀមរាប សូមសម្តែងនូវគារវភក្តី និងកតញ្ញូតាធម៌ដ៏ជ្រាលជ្រៅបំផុតជូន សម្ដេចតេជោ ហ៊ុន សែន ក្នុងឱកាសខួប៣៦ឆ្នាំ នៃការចូលកាន់តំណែងផ្លូវការជា នាយករដ្ឋមន្ត្រី នៃកម្ពុជា ដែលប្រព្រឹត្តទៅនាថ្ងៃទី១៤ ខែមករា ឆ្នាំ២០២១។

រយៈពេល៣៦ឆ្នាំ ក្នុងវីរភាពដ៏អស្ចារ្យ សម្ដេចនាយករដ្ឋមន្ត្រី គឺជាប្រទីបបំភ្លឺផ្លូវ និងជាអ្នកកាច់ចង្កូតនាវាកម្ពុជាឆ្លងកាត់ការលំបាក ខ្វះសព្វ ខ្វះគ្រប់ ក្នុងកាលៈទេសៈ មានសន្តិភាពផង សង្គ្រាមផង រហូតទទួលបានការអភិវឌ្ឍមួយដ៏ខ្លាំងក្លានាពេលបច្ចុប្បន្ន ក្រោមនយោបាយ ឈ្នះ ឈ្នះ ស្ដារនិងអភិវឌ្ឍ នាំមាតុភូមិដ៏កម្សត់មួយនេះ បើកទំព័រសករាជថ្មីឆ្ពោះទៅរកអនាគតរុងរឿង។ ស្នាដៃដ៏ច្រើនឥតគណនា ក្រោមការដឹកនាំប្រកបដោយគតិបណ្ឌិតរបស់ សម្ដេចតេជោ ជាទីគោរព គឺសក្តិសមជារដ្ឋបុរសនៃកម្ពុជា ហើយពិតណាស់ថា បើគ្មានការដឹកនាំដោយបុរសខ្លាំង តេជោសែន នោះទេ ក៏គ្មានអ្វីៗដូចពេលនេះដែរ។

ក្នុងឱកាសដ៏វិសេសវិសាលនេះផងដែរ យើងខ្ញុំសូមបួងសួងដល់គុណបុណ្យព្រះរតនត្រ័យកែវទាំងបី ទេវតាឆ្នាំថ្មី និងវត្ថុស័ក្ដិសិទ្ធិក្នុងលោក សូមជួយប្រោះព្រំសព្ទសាធុការពរជ័យជូនចំពោះ សម្ដេចតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត ព្រមទាំងបុត្រា-បុត្រី និងចៅៗជាទីស្រឡាញ់ សូមបានប្រកបដោយពុទ្ធពរ និងពរទាំងប្រាំប្រការគឺ អាយុ វណ្ណៈ សុខៈ ពលៈ និងបដិភាណ កុំបីឃ្លៀងឃ្លាតឡើយ៕SRP

ខេត្តសៀមរាប៖លោកទៀ សីហា អភិបាលខេត្តសៀមរាប បានអះអាងថានៅឆ្នាំ២០២២ ក្រុងសៀមរាបនិងប្រែមុខមាត់ថ្មី ក្រោយពីបញ្ចប់គម្រោងសាងសង់ផ្លូវចំនួន៣៨ខ្សែ។

អភិបាលខេត្តបានបញ្ជាក់ថា ដោយសារតែជំងឺកូវីដ១៩ បានធ្វើឲ្យខេត្តសៀមរាប បាត់បង់ភ្ញៀវទេសចរណ៍ បរទេស ស្ទើរទាំងស្រុង។ ប៉ុន្តែទោះបីយ៉ាងនេះណាក្ដី សម្ដេចតេជោហ៊ុន សែននាយករដ្ឋមន្ត្រី បានផ្ដល់ថវិកា សម្រាប់សាងសង់កែលម្អផ្លូវនៅក្រុងសៀមរាប ឲ្យឱ្យមានសុខភាពល្អប្រសើរឡើងវិញ ដើម្បីសក្កិសមជាទីក្រុងទេសចរណ៍។

ជាពិសេសក្រោយពីបញ្ចប់វិបត្តិ កូវីដ ខេត្តសៀមរាប នឹងអាចទទួលបាននូវភ្ញៀវទេសចរជាតិអន្តរជាតិដូចដើមវិញ។

អភិបាលខេត្តថ្លែងយ៉ាងដូច្នេះ នៅថ្ងៃទី១៤ ខែមករា ឆ្នាំ២០២១ ព្រឹកមិញ នេះ ក្នុងឱកាសអញ្ជើញសម្ពោធអាគារការិយាល័យ សភាពាណិជ្ជកម្ម ខេត្តសៀមរាប និងខេត្តឧត្តរមានជ័យ ស្ថិតនៅផ្លូវក្រវ៉ាត់ក្រុងសៀមរាប ក្នុងឃុំខ្នារសង្កាត់ជ្រាវក្រុងសៀមរាប។

អភិបាលខេត្តសៀមរាប ក៏ថ្លែងកោតសរសើរ
ចំពោះ សភាពាណិជ្ជកម្ម ខេត្តសៀមរាប និងខេត្តឧត្តរមានជ័យ ដែលសម្រេចបានក្នុងរយៈពេលកន្លងមក ក្នុងការ សម្របសម្របសម្រួល
លើវិស័យពាណិជ្ជកម្ម សេវាកម្ម កសិកម្ម ឧស្សាហកម្ម និងសិប្បកម្ម ជាពិសេស បានធ្វើឲ្យវិស័យឯកជន ចូលរួមយ៉ាងសកម្ម ជាមួយរដ្ឋបាលខេត្ត និងបានទាក់ទាញអ្នកវិនិយោគទុនជាច្រើន មកបណ្តាក់ទុននៅក្នុងខេត្តទាំងពីរ  ដែលប្រការនេះ គឺពិតជាបានជំរុញ ដល់កំណើនសេដ្ឋកិច្ចរបស់ខេត្តទាំងពីរ ឱ្យបានកាន់តែប្រសើរថែមទៀត។

អភិបាលខេត្តសៀមរាប បានបញ្ជាក់ថា ក្រោយបញ្ចប់គម្រោងសាងសង់ ហេដ្ឋារចនាសម្ព័ន្ធផ្លូវថ្នល់ចំនួន ៣៨ខ្សែ និងកែលម្ព មាត់ស្ទឹងសៀមរាប នឹងលើកកម្ពស់ សោភ័ណភាព ក្រុងសៀមរាប ពិសេស បានរួមចំណែកយ៉ាងខ្លាំង ដល់សក្តានុពលទេសចរណ៍ និងអាជីវកម្ម វិនិយោគក្នុងខេត្តសៀមរាប សម្រាប់ភ្ញៀវទេសចរ និងបងប្អូនប្រជាពលរដ្ឋ ដែលកំពុងរស់នៅក្នុងខេត្តសៀមរាបទាំងមូល។

បើតាម លោកឧកញ៉ា បណ្ឌិត ហ៊ុយ ភៀវ ប្រធានសភាពាណិជ្ជកម្មមណ្ឌលសៀមរាប ឧត្តរមានជ័យ មានប្រសាសន៍ថា៖ ឆ្នាំ២០១៩-២០២០ ទោះបីស្ថិតក្នុងបញ្ហាប្រឈមជាមួយនឹងជំងឹកូវីដ-១៩ក៏ដោយ ក៏សភាពាណិជ្ជកម្មខេត្ត បានចូលរួមសកម្មភាព ការងារសង្គមជាមួយអាជ្ញាធរដែនដីខេត្ត ស្ថាប័នរាជរដ្ឋាភិបាល ដៃគូឯកជននានានិងអ្នកវិនិយោគទុន ជាច្រើន។ ហើយសង្ឃឹមថាក្រោយវិបត្តិកូវីដ-១៩ នឹងបន្តរួមគ្នាបំពេញការងារសកម្មភាពលើវិស័យ សេដ្ឋកិច្ចពាណិជ្ជកម្ម បានងាយស្រួលជាងមុន បង្កើនប្រភពចំណូល ដើម្បីឱ្យសេដ្ឋកិច្ច ខេត្តសៀមរាបមានភាពរស់រវើឡើងវិញ។
សភាពាណិជ្ជកម្មខេត្តក៏នឹងខិតខំបំពេញការងារបន្ថែមទៀត តាមរយៈជួយលើកស្ទួយវិស័យឯកជន ក្នុងការធ្វើទំនាក់ទំនង ជាមួយក្រសួងសភាពាណិជ្ជកម្មកម្ពុជា សមាគម អង្គការដៃគូនានាថ្នាក់ដឹកនាំមន្ទីរអង្គភាពជុំវិញខេត្ត។

សូមបញ្ជាក់ថា សភាពាណិជ្ជកម្មខេត្តសៀមរាប-ឧត្តរមានជ័យ បានបង្កើតឡើងនៅឆ្នាំ២០០៤ ហើយបានដំណើរការបោះឆ្នោតរៀងរាល់៣ឆ្នាំម្តង សម្រាប់ជ្រើសរើសថ្នាក់ដឹកនាំការងារ ក្នុងអាណត្តិនីមួយៗ៕SRP

ភ្នំពេញ៖សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ប្រធានកាកបាទក្រហមកម្ពុជា​ បានផ្ញេីសារលិខិតជូនពរ សម្តេចក្រឡាហោម​ ស​ ខេង​ ឧ​ប​​នា​​​​​យ​​​​​​ក​​​រដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងឱកាសថ្ងៃខួបកំណើតគម្រប់​ ៧០ឆ្នាំ ឈានចូល ៧១ឆ្នាំ​ ដែលសារលិខិតនោះមានខ្លឹមសារថា​ ៖​ «ក្នុងឱកាសប្រកបដោយសិរីមង្គលដ៏ប្រសើរថ្លៃថ្លា នៃពិធីចម្រើន​ជន្មាយុ នៅថ្ងៃទី១៥ ខែមករា ឆ្នាំ២០២១ ជា​ប​ឋម ខ្ញុំ និងសហការី នៃកាក​​បាទ​​​ក្រហមកម្ពុជា សូមចូលរួមសម្តែងនូវ​​​អំណរ​សាទរប្រកបដោយក្តីសោមនស្ស​រីក​រាយ​ និងសូមជូននូវ​សព្ទ​សា​ធុ​កា​រ​ពរជ័យសិរីវឌ្ឍនមង្គល វិបុល​សុខមហា​ប្រសើរគ្រប់​ប្រការ ជូន​ សម្ដេច​ក្រឡាហោម ឧ​ប​​នា​​​​​យ​​​​​​ក​​​រដ្ឋមន្ត្រី សូម​បាន​​ប្រកប​ដោយ​សុខភាព​ល្អបរិបូរណ៍ កម្លាំង​មាំមួន បញ្ញា​ភ្លឺថ្លា​វាងវៃ ចម្រើនជន្មាយុ​យឺន​យូរ ដើម្បីរួមចំណែក​ក្នុងការដឹកនាំសង្គមជាតិ មាតុភូមិ ឲ្យទទួល​បាន​នូវ​​​វឌ្ឍនភាព​ថ្មីៗ គួរជាទីមោទកភាព​បន្ត​បន្ទាប់​បន្ថែម​​​​​​​​ទៀត។

ស្ថិតក្នុងឱកាសដ៏វិសេសវិសាលនេះ ខ្ញុំសូមគោរពកោតសរសើរដ៏ជ្រាលជ្រៅបំផុត ចំពោះ​វីរភាព​ឧត្តុង្គឧត្តម របស់ សម្ដេចក្រឡាហោម ​ឧ​ប​​នា​​​​​យ​​​​​​ក​​​រដ្ឋមន្ត្រី ដែល​ជានិច្ចកាល សម្តេច តែងបានបំពេញ​បេស​ក​កម្ម​​ចម្ប​ង​ៗ​ប្រកប​ដោយ​សក្តានុ​ព​ល លះបង់​​កម្លាំង​កាយ ចិត្ដ ឆន្ទៈ មនសិការ និងបទពិសោធន៍ ​​ក្នុងការដឹកនាំ​ស្ថាប័ន​ក្រសួ​ង​មហាផ្ទៃ ទប់ស្កាត់បាននូវសកម្មភាពភេរវកម្ម បញ្ហាគ្រឿងញៀន ឧក្រិដ្ឋកម្ម​ឆ្លង​ដែន​គ្រប់ប្រភេទ ជា​ពិសេ​ស​​​​ទប់​ស្កា​ត់​បានឧបាយកលទុច្ចរិតដើម្បីផ្តួ​លរំលំ​រាជរដ្ឋាភិបាលស្របច្បាប់ រួមទាំងអនុវត្តនីតិរដ្ឋ លិទ្ធិ​ប្រជា​ធិប​តេយ្យ រក្សា​បាន​សុវត្ថិភាពសង្គម របៀបរៀបរយ សណ្តាប់ធ្នាប់​សាធារណៈ ទទួលបានជោគជ័យ​ត្រចះ​ត្រចង់​ជា​បន្តបន្ទាប់ ធានា​​​​​​​បាន​នូវមូលដ្ឋានសន្តិភាព ស្ថិរភាព ជាតិរឹងមាំ ក្រោម​ម្លប់ដ៏ត្រជាក់ នៃ ព្រះករុណា​ព្រះបាទសម្តេច​ព្រះបរម​នា​​ថ នរោត្តម សីហមុនី ព្រះមហាក្សត្រ នៃព្រះរាជា​ណាចក្រកម្ពុជា។»

ខាងក្រោមនេះ​ ជាខ្លឹមសារទាំងស្រុងនៃសារលិខិតជូនពររបស់​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ផ្ញេីជូន​ សម្តេចក្រឡាហោម​ ស​ ខេង​៖

ខេត្តសៀមរាប៖លោក ទៀ សីហា អភិបាលខេត្តនៅថ្ងៃទី១៣ ខែ មករា ម្សិលមិញ បានបើកកិច្ចប្រជុំពិភាក្សា ស្តីពីការកំណត់ព្រំ ប្រទល់រដ្ឋបាល ដែលមិនទាន់ច្បាស់លាស់ រវាងរដ្ឋបាលខេត្តសៀមរាប និង រដ្ឋបាល ខេត្តឧត្តរមានជ័យ។

លោក ទៀ សីហា បានលើកឡើង នៃភូមិសាស្ត្រមួយចំនួន ដែលមានការពាក់ព័ន្ធទៅនឹងបញ្ហាព្រំប្រទល់រដ្ឋបាល រវាងខេត្តសៀមរាប និង ខេត្តឧត្តរមានជ័យ ដែលពុំទាន់បានកំណត់ឱ្យច្បាស់លាស់ ជាយូរឆ្នាំមកហើយ ដែលបានធ្វើឲ្យប៉ះពាល់ដល់សតិអារម្មណ៍ របស់ប្រជាពលរដ្ឋ ក៏ដូចអាជ្ញាធរដែលមានព្រំប្រទល់រដ្ឋបាល ក្នុងការគ្រប់គ្រងត្រួតលើគ្នា ដើមី្បធ្វើការបញ្ចប់។

កិច្ចប្រជុំ ក៏ដើមី្បត្រួតពិនិត្យទៅលើគំនូសខ្សែផែនទីព្រំប្រទល់ថ្មី ដែលអគ្គនាយកដ្ឋានភូមិសាស្ត្រ បានចុះធ្វើការសិក្សាកន្លងមក ក្នុងការចាំស្តាប់នូវរាល់សំណូមពររបស់អាជ្ញាធរមូលដ្ឋាន ក្នុងការកែសម្រួលព្រំប្រទល់ ឬ ក៏ឯកភាពទៅតាមគំនូសខ្សែព្រំប្រទល់ថ្មី ក្នុងការយកចំណុចទាំងនោះទៅធ្វើការប្រជុំពិភាក្សាជាមួយ ខេត្តឧត្តរមានជ័យ នៅថ្ងៃខាងមុខនេះ។

បើតាម នាយកទីចាត់ផែនការ វិនិយោគនៃសាលាខេត្តសៀមរាប បានឲ្យដឹងថាបញ្ហាព្រំ ប្រទល់រដ្ឋបាលមិនច្បាស់លាស់ មានស្រុកចំនួន៣ គឺស្រុកស្វាយលើ នៅឃុំកន្តួត និង ឃុំស្វាយលើ ស្នើ ៤ភូមិ ,ស្រុកស្រីស្នំ គឺស្ថិត ឃុំស្លែងស្ពាន មាន ៧ភូមិ និង ស្រុកវ៉ារិន សិ្ថតនៅឃុំស្រែណូយ និងឃុំវ៉ារិន មាន ៨ភូមិ ដែលធ្វើឲ្យមានការប៉ះពាល់ ដល់តុលាការ សមត្ថកិច្ច នៅខេត្តឧត្តរមានជ័យ ធ្វើការចាប់ខ្លួន ប្រជាពលរដ្ឋ និងមេភូមិ នៅភូមិសាស្ត្រខេត្តសៀមរាប៕SRP

ភ្នំពេញ៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃព្រហស្បតិ៍ ថ្ងៃទី១៤ ខែមករា ឆ្នាំ២០២១ ព្រឹកមិញនេះ បានអញ្ជើញដឹកនាំកិច្ចប្រជុំ ស្ដីពី បច្ចុប្បន្នភាពនៃកិច្ចប្រតិបត្តិការបោសសំអាតគ្រាប់យុទ្ធភណ្ឌមិនទាន់ផ្ទុះក្នុងនាវាចម្បាំងលិច ស្ថិតនៅក្នុងភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម។

កិច្ចប្រជុំនេះមានការអញ្ជើញចូលរួមពីឯកឧត្តមនាយឧត្តមសេនីយ៍ នាង ផាត រដ្ឋលេខាធិការប្រចាំការក្រសួងការពារជាតិ និងជាប្រធានប្រតិបត្តិការក្នុងការប្រមូលអាវុធយុទ្ធភណ្ឌមិនទាន់ផ្ទុះ, ឯកឧត្ត សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ ឯកឧត្តម នាយឧត្តមសេនីយ៍ និងអស់លោក លោកស្រី ជាថ្នាក់ដឹកនាំជាន់ខ្ពស់ក្រសួងមហាផ្ទៃ និងក្រសួងការពារជាតិ។

សម្ដេចក្រឡាហោមបានមានប្រសាសន៍ថាកិច្ចប្រជុំនាថ្ងៃនេះ ធ្វើឡើងស្របតាមសំណើរឯកឧត្តម នាយឧត្តមសេនីយ៍ នាង ផាត ប្រធានក្រុមប្រតិបត្តិការការប្រមូលអាវុធយុទ្ធភណ្ឌមិនទាន់ផ្ទុះ នៅស្រុកស្រីសន្ធរ ខេត្តកំពង់ចាម តាមការចង្អុលបង្ហាញដ៏ខ្ពង់ខ្ពស់ពី សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដោយទទួលបានលទ្ធផលយ៉ាងល្អប្រសើរ៕SRP

ខេត្តសៀមរាប៖ក្រសួងសាធារណការបានឲ្យដឹងថា “គម្រោងស្ថាបនាហេដ្ឋារចនាសម្ព័ន្ធផ្លូវ ៣៨ខ្សែ ក្នុងក្រុងសៀមរាប សម្រេចបាន 14.27% (ដែលរួមបញ្ចូលការងារសាងសង់រួច និងសម្ភារៈដែលបានបញ្ជូនដល់ការដ្ឋាន) ជាវឌ្ឍនភាពគិតត្រឹមថ្ងៃទី១២ ខែមករា ឆ្នាំ២០២១” ។

នេះជាខ្លឹមសារ នៃកិច្ចប្រជុំចង្អៀត ដើម្បីពិភាក្សាលទ្ធផលការងារអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្រុងសៀមរាប ខេត្តសៀមរាប ក្រោមអធិបតីភាពសម្តេច ពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន គណៈកម្មការអន្តរក្រសួង នាថ្ងៃទី១៣ ខែមករា ឆ្នាំ២០២១ នៅទីស្តីការគណ:រដ្ឋមន្ត្រី ដោយមានការចូលរួមពី លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាអនុប្រធានគណៈកម្មការអន្តរក្រសួង លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍គណៈកម្មការអន្តរក្រសួង ព្រមទាំងមន្ត្រីជាន់ខ្ពស់ពាក់ព័ន្ធ។

ជាជំហានបន្ទាប់ គណៈកម្មការអន្តរក្រសួង នឹងធ្វើការបន្តការត្រួតពិនិត្យតាមដានការងារ ព្រមទាំងធ្វើការដោះស្រាយកែតម្រូវចំណុចខ្វះចន្លោះ ដើម្បីធានាថា ការស្ថាបនា នឹងពិតជាមានគុណភាពតាមបទដ្ឋាបច្ចេកទេសផ្លូវថ្នល់ និងសៀវភៅបន្ទុក ព្រមទាំងជំរុញដោះស្រាយនូវផលប៉ះពាល់ដែលនៅសេសសល់មួយចំនួនតូចឱ្យបានចង់សព្វគ្រប់៕SRP

ភ្នំពេញ៖ថ្ងៃនេះគឺជាថ្ងៃអបអរសាទរខួបទី ៣៦ ឆ្នាំនៃការកាន់តំណែងជានាយករដ្ឋមន្ត្រីរបស់សម្តេចតេជោ ហ៊ុន សែន។

ថ្ងៃទី ១៤ ខែ មករា ឆ្នាំ ២០២១ នេះ គឺជាខួបទី ៣៦ឆ្នាំ នៃការកាន់តំណែងជា នាយករដ្ឋមន្ត្រីរបស់ សម្តេចអគ្គមហាសេនាបតីតេជោ ហ៊ុន សែន ( ១៤ មករា ១៩៨៥-១៤ មករា ២០២១) ដែលពេលនោះ សម្តេចតេជោ ជានាយករដ្ឋមន្រ្តីដែលមានវ័យក្មេងជាងគេបំផុតនៅក្នុងពិភពលោក។ មកដល់ថ្ងៃនេះ សម្តេចតេជោ ហ៊ុន សែន គឺជានាយករដ្ឋមន្រ្តីដែលពលរដ្ឋគោរពស្រឡាញ់ និងគាំទ្រខ្លាំងបំផុត ហើយដែលរក្សាតំណែងជានាយករដ្ឋមន្រ្តីបានយូរជាងគេបំផុតនៅក្នុងពិភពលោក។

៣៦ឆ្នាំកន្លងទៅនេះ កម្ពុជាបានឆ្លងកាត់មហាឧបសគ្គធំៗរាប់មិនអស់ ប៉ុន្តែប្រមុខដឹកនាំដ៏វៃឆ្លាតនិងមានបទពិសោធន៍បំផុតរបស់កម្ពុជាបានដឹកនាំកសាងអភិវឌ្ឍន៍ប្រទេសជាតិអោយមានការរីកចម្រើនលើគ្រប់វិស័យ និងមានមុខមាត់លើឆាកអន្តរជាតិ មកទល់សព្វថ្ងៃ។

នៅក្នុងឱកាសដ៏វិសេសវិសាលថ្លៃថ្លានេះ ប្រជាពលរដ្ឋខ្មែរនៅទូទាំងប្រទេស សូមគោរពជូនពរ សម្តេចតេជោនាយករដ្ឋមន្រ្តី មានសុខភាពល្អដើម្បីបន្តដឹកនាំកម្ពុជាអោយកាន់តែរីកចម្រើនរុងរឿង និងដើម្បីផ្តល់ជាម្លប់ដ៏កក់ក្តៅបំផុតសម្រាប់ប្រទេសជាតិទាំងមូល៕SRP

ខេត្តឧត្តរមានជ័យ៖បុរសម្នាក់ត្រូវបាន កម្លាំងប៉ុស្ដិ៍ចុងកាល់ នៃអធិការដ្ឋាននគរបាលចុងកាល់ ខេត្តឧត្ដរមានជ័យ ឃាត់ខ្លួន ករណីលួចម៉ូតូ។

ការឃាត់ខ្លួននៅថ្ងៃពុធ ថ្ងៃទី១៣ ខែមករា ឆ្នាំ២០២១ នៅវេលាម៉ោង ០៧យប់ នេះនៅចំណុចភ្នំល្អក់ ស្ថិតក្នុងភូមិអាតោ ឃុំចុងកាល់ ស្រុកចុងកាល់ ខេត្តឧត្ដរមានជ័យ។

ជនសង្ស័យឈ្មោះ ស៊ត់ សុភា ហៅ ថេប អាយុ ១៧ឆ្នាំ មានទីលំនៅភូមិអំពៅដៀប ឃុំជ្រោយនាងងួន ស្រុកស្រីស្នំ ខេត្តសៀមរាប។

នគរបាលបានឲ្យដឹងថាជនសង្ស័យ បានធ្វើសកម្មភាពលួច (ម៉ូតូ) កាលពីថ្ងៃទី០៩ ខែមករា ឆ្នាំ២០២១ នៅចំណុចភូមិកំពង់ថ្កូវ២ ឃុំកំពង់ថ្កូវ ស្រុកក្រឡាញ់ ខេត្តសៀមរាប។

បច្ចុប្បន្ន ត្រូវបានបញ្ជូនទៅកាន់អធិការដ្ឋាននគរបាល ស្រុកក្រឡាញ់ ដើម្បីធ្វើការសាកសួរ និងកសាងសំណុំរឿងបញ្ជូនតាមនីតិវិធីច្បាប់៕SRP