ខេត្ត​សៀមរាប​៖​យ៉ាងហោចណាស់ មានមនុស្ស​៣​នាក់​ បានស្លាប់ និង​ម្នាក់​ទៀត​ រងរបួសធ្ងន់ដោយសាររថយន្តបែកកង់ រួចរេចង្កូតបុកម៉ូតូ។

ហេតុការណ៍បានកើតឡើង នៅថ្ងៃ​ទី​២៣​ ខែមករា​ ឆ្នាំ​២០២១​ វេលា​ម៉ោង​១៧​និង​២០​នាទី​
នៅ​លើ​ផ្លូវជាតិ​លេខ​៦​ ចន្លោះ​បង្គោលគីឡូម៉ែត្រ​លេខ​៣៣២​.៣៣៣​ ភូមិ​ដូន​ទ្រ​ឃុំ​ល្វា​ ស្រុក​ពួក​ ខេត្តសៀមរាប​។​

បើយោងតាមប្រភពបានឲ្យដឹងថាគ្រោះថ្នាក់ចរាចរណ៍នេះ បង្កឡើងដោយរថយន្តសាំយ៉ុង ពណ៌​ស​ ពាក់​ស្លាក​លេខ​ភ្នំពេញ​២X៨១៤៩ បើកបរ​ដោយ​ ឈ្មោះ រិ​ន​ ភិ​រ​ក្យ​ ភេទ​ប្រុស​ អាយុ​៣០​ឆ្នាំ​ នៅ​ភូមិ​អូ​តា​គី​ ឃុំ​អូ​តា​គី​ ស្រុក​បាត់ដំបង​ ខេត្តបាត់ដំបង​ ដឹក​ប្រពន្ធ ឈ្មោះវ៉ាន់ សៅ​ឌី​ អាយុ​៣២​ឆ្នាំ​ របួសស្រាល ក្នុង​ទិស​ដៅ​ពីលិច ទៅកើត បាន​បុកម៉ូតូ មានទិសដៅពីកើត ទៅលិច ម៉ាកហុងដាឌ្រីម សេរី២០១៥​ បើកបរ​ដោយ​ឈ្មោះ​ ប៊ុត​ ហៃ​ម៉េ​ង​ ភេទ​ប្រុស​ អាយុ​៣០​ឆ្នាំ​ នៅ​ភូមិ​ តាង​ ឃុំ​គោក​មន​ ស្រុក​បន្ទាយ​អំពិល​ ខេត្តឧត្តមានជ័យ(ពាក់មួក) (​ស្លាប់​នៅ​ពេទ្យ​ខេត្ត​)ដឹកមនុស្ស០២នាក់៖

១.​ឈ្មោះ​ អ៊ួ​ក​ ចៀន​ អាយុ​៣៦​ឆ្នាំ​ ជាប្រពន្ធ(​អត់​មួក​)​ ។​(​ស្លាប់​នៅ​ពេទ្យ​ខេត្ត​)
២.​ឈ្មោះ​ ម៉េ​ង​ នី​ ភេទ​ស្រី​ អាយុ​១១​ឆ្នាំ​ ជា​កូន​ (​អត់​មួក​)​ (​ស្លាប់​នៅ​ពេទ្យ​ខេត្ត​) ចំណែករថយន្តនិងម៉ូតូខូចខាតធ្ងន់​។ ដោយឡែកអ្នកបើកបររថយន្តត្រូវបានឃាត់ខ្លន។

ពាក់ព័ន្ធករណីនេះ កម្លាំង​ជំនាញ​ បានចុះវាស់វែង ដកហូតវត្ថុតាង ទៅរក្សាទុកនៅអធិការដ្ឋាននគរបាលស្រុក ដើម្បីកសាងសំណុំរឿងបន្ត៕SRP

ខេត្តកំពង់ចាម៖លោក​​ អ៊ុន​ ចាន់ដា​ អភិបាលខេត្តកំពង់ចាម​ នៅថ្ងៃទី២៣ ខែមករា ម្សិលមិញ បានដឹកនាំ​ក្រុមការងារ​ អញ្ជេីញ​ចុះពិនិត្យ កសិដ្ឋានចិញ្ចឹមសត្វ ស្ថិត​នៅ​ក្នុង​ឃុំស្រក ស្រុកកំពង់សៀម នឹងផ្លូវក្រាលកៅស៊ូប្រភេទDBSផងដែរT

បេីតាមមន្ត្រីរដ្ឋបាលសាលាខេត្តកំពង់ចាម​ បានបញ្ជាក់ថា​ លោក​​ អ៊ុន ចាន់ដា រួមជាមួយអភិបាលរងខេត្ត និងមន្ទីរពាក់ព័ន្ធ អ្នកបច្ចេកទេស និងអាជ្ញាធរមូលដ្ឋាន បានចុះពិនិត្យផ្លូវដែលជាសមទ្ធិផល របស់រាជរដ្ឋាភិបាលតាមរយ: ក្រសួងអភិវឌ្ឍន៍ជនបទ​ នៅក្នុងខេត្តកំពង់ចាម ដោយបានចុះពិនិត្យផ្លូវប្រវែង២៨គីឡូម៉ែត្រ​ ពីភ្នំហាន់ជ័យ ឃុំហាន់ជ័យ ស្រុកកំពង់សៀម ដល់ផ្លូវ៧១C កាត់ឃុំទួលព្រះឃ្លាំង និងឃុំសូភាស ស្រុកស្ទឹងត្រង់ ដែលកំពុងអនុវត្តដោយក្រាលកៅស៊ូ​ប្រភេទ​DBST (ជាថវិកាពហុឆ្នាំរបស់នាយកដ្ឋាន)។​

គួរ​បញ្ជាក់ថា ទន្ទឹមនឹងការចុះពិនិត្យផ្លូវខាងលេីនេះ​ លោក​​អភិបាលខេត្ត ក៏បានដឹកនាំក្រុមការងារ ជាមួយនឹងមន្ត្រីពាក់ព័ន្ធ ចុះពិនិត្យទីតាំងចិញ្ចឹមសត្វជ្រូក និងសត្វមាន់​ និងការដាំដុះ​ដំណាំ​ផ្សេងៗ របស់ប្រជាពលរដ្ឋ នៅក្នុងភូមិសាស្ត្រ ឃុំស្រក ស្រុកកំពង់សៀមផងដែរ៕SRP

ខេត្តសៀមរាប៖លោកបណ្ឌិតឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប លោក អ៊ាន ឃុន ប្រធានក្រុមប្រឹក្សាខេត្តស្តីទី លោម ទៀ សីហា អភិបាលខេត្តសៀមរាប នៅថ្ងៃសៅរិ៍ ទី២៣ ខែ មករា ម្សិលមិញ បាននាំយកអំណោយ របស់មូលនិធិ ថៃ យ៉ា ជាគ្រឿងឧបភោគ បរិភោគ មានអង្ករ ៣០តោន ត្រីខ ២ពាន់យួរ អំបិល២ពាន់កញ្ចប់ ទឹកស៊ីអ៉ីវ ២ពាន់យួរ អាល់កុល ២ពាន់ដប និងថវិកា ២០លានរៀល ចែកជូនប្រជាពលរដ្ឋ ជួបការលំបាកចំនួន ២០០០គ្រួសារ មកពី១០ឃុំក្នុងស្រុកក្រឡាញ់ នៅក្នុងបរិវេណវត្ត ខ្នារ តេជោ ឃុំចន្លាស់ដៃ ស្រុកក្រឡាញ់ ខេត្តសៀមរាប។

អភិបាលខេត្ត ក៏បានឧបត្ថម្ភ ដល់រដ្ឋបាលស្រុកក្រឡាញ់ នូវម៉ាស់ ៩ពាន់ម៉ាស់ ជែលលាងដៃ ១០កេស ស្មើ ២៥០ដបផងដែរ៕SRP

ខេត្តសៀមរាប៖តាមរយៈគម្រោងសាងសង់ផ្លូវទាំង៣៨ខ្សែនេះ នឹងធ្វើឲ្យទីក្រុងសៀមរាប ប្រែក្លាយរូបរាង ជាទីក្រុងទំនើប និងទេសចរណ៍ ដ៏មានសក្តានុពល ដែលត្រូវបានរាជរដ្ឋាភិបាលកម្ពុជា កំណត់ជាតំបន់ស្នូល នៃប៉ូលអភិវឌ្ឍជាតិ ជាគោលដៅទេសចរណ៍ វប្បធម៌ប្រវត្តិសាស្រ្ត និងធម្មជាតិ ស្របតាមរូបសាស្ត្រ ទីក្រុង រួមជាមួយការគិតគូរ ដល់ការការពារ និងកែលម្អបរិស្ថាន ផាសុកភាព របស់ប្រជាពលរដ្ឋ និងការរៀបចំអភិវឌ្ឍទីក្រុងឆ្លាតវៃ (Smart City) ផងដែរ។

បណ្តាញផ្សព្វផ្សាយ របស់រដ្ឋបាល ខេត្តសៀមរាបបានបង្ហាញថា ផ្លូវទាំង៣៨ខ្សែនេះ មានប្រវែងសរុប ១០៨.៧៤គីឡូម៉ែត្រ ដោយគ្រោងប្រើប្រាស់ថវិកាជាតិំ សរុបប្រមាណ ១៤០លានដុល្លារអាមេរិក និងថវិកាជាង ៩លានដុល្លារអាមេរិកទៀត សម្រាប់ការងារ ចាំបាច់ក្នុងការរៀបចំស្ថាបនា ប្រព័ន្ធបង្ហូរទឹកភ្លៀង និងទឹកកខ្វក់ដែលនៅ ក្រៅគម្រោង សាងសង់ខ្សែផ្លូវទាំង៣៨នេះ។

ក្រោយពីបញ្ចប់ការស្ថាបនា ទៅ គម្រោងនេះនឹងដើរតួជាហេដ្ឋារចនាសម្ព័ន្ធ ប្រទាក់ក្រឡាគ្នា តភ្ជាប់ទីប្រជុំជន ទៅជាយក្រុង និងតភ្ជាប់ទៅកាន់តំបន់ទេសចរណ៍ំ សំខាន់ៗ និងបណ្តាញខ្សែផ្លូវជាតិនានា សំដៅកាត់បន្ថយការកកស្ទះចរាចរណ៍ក្នុងទីក្រុង ជំរុញកំណើនដឹកជញ្ជូន ទាក់ទាញវិនិយោគិន ធុរជន និងភ្ញៀវទេសចរជាតិ-អន្តរជាតិ ដែលជាការរួមចំណែកក្នុងការជំរុញកំណើនសេដ្ឋកិច្ចជាតិ ឱ្យកាន់តែរីកចម្រើន នៅក្រោយវិបត្តិ នៃជំងឺកូវីដ-១៩។

សូមជម្រាបថានៅរសៀលថ្ងៃទី២៣ ខែមករា ម្សិលមិញ លោកហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានគណៈកម្មការទី៧នៃរដ្ឋសភា លោក ទៀ សីហា អភិបាលខេត្តសៀមរាប និងលោក ប្រាក់ សោភ័ណ ប្រធានសហភាពសហព័ន្ធយុវជនកម្ពុជាខេត្តសៀមរាប បានអញ្ជើញចុះមើលសកម្មភាព ការស្ថាបនាផ្លូវ នៅខេត្តសៀមរាប។

ជាមួយនឹងការចុះពិនិត្យការស្ថាបនាផ្លូវនេះ លោក ហ៊ុន ម៉ានី បានបង្ហោះសាររបស់ខ្លួននៅលើគេហទំព័រហ្វេសប៊ុកថា «ទិដ្ឋភាពនៃការសាង់សង់ផ្លូវនេះបានសបញ្ជាក់ថា ទោះបីជាពិភពលោកកំពុងជួបវិបត្តិនៃការរីករាលដាលជំងឺកូវីដ១៩ យ៉ាងណាក៏ដោយ ក៏ការណ៍នេះមិនបានធ្វើឲ្យមានការប៉ះពាល់ធ្ងន់ធ្ងរដល់ការអភិវឌ្ឍប្រទេសកម្ពុជាឡើយ។ ផ្ទុយទៅវិញ ការអភិវឌ្ឍនេះគឺជាការជួយស្តារសេដ្ឋកិច្ចរបស់ប្រជាពលរដ្ឋនៅខេត្តសៀមរាប និងជាការត្រៀមទទួលទេសចរមកកាន់ខេត្តសៀមរាបក្រោយវិបត្តិកូវីដ១៩»៕SRP

ខេត្តសៀមរាប៖លោកហង់ ពៅ អគ្គនាយកអាជ្ញាធរជាតិអប្សរា និងមន្ត្រីរបស់ខ្លួន នៅព្រឹកថ្ងៃទី ២៤ ខែមករាឆ្នាំ ២០២១ នេះ បានចុះបង្ហាញផ្លូវសម្រាប់អ្នកជិះកង់។

ការចុះបង្ហាញផ្លូវសម្រាប់អ្នកជិះកង់នេះ ចាប់ផ្ដើមពីចំណុច អតីតកន្លែងលក់សំបុត្រទៅអង្គរវត្ត។

បើតាមមន្ត្រីអាជ្ញាធរជាតិអប្សរាបានថ្លែងថា ផ្លូវសម្រាប់អ្នកជិះកង់នេះ ក៏ជាផ្លូវសម្រាប់អ្នករត់ហាត់ប្រាណផងដែរ។ ដោយផ្លូវនេះ គឺអ្នកជិះកង់និងអ្នករត់ហាត់ប្រាណ មិនមានការព្រួយបារម្ភអំពី គ្រោះថ្នាក់ចរាចរណ៍ឡើយ។

សូមជម្រាបថាផ្លូវសម្រាប់អ្នកជិះកង់នេះ មានទទឹង០២ម៉ែត្រ នឹងមានចម្ងាយជាង២០ គីឡូម៉ែត្រ ដែលបានសាងសង់ឡើងដោយអាជ្ញាធរជាតិអប្សរា ដើម្បីបំរើដល់វិស័យទេសចរណ៍ ជាពិសេសអ្នកនិយមជិះកង់នឹងរត់ហាត់ប្រាណ៕SRP

ខេត្តសៀមរាប៖កាំសេចក្ដីរាយការណ៍ព័ត៌មានបឋម បានឲ្យដឹងថា នៅមុននេះបន្តិចនាថ្ងៃទី២៣ ខែមករាឆ្នាំ ២០២១នេះ វេលាម៉ោងជិត០៨យប់នេះ មានករណីគ្រោះថ្នាក់ចរាចរណ៍ម៉ូតូ២គ្រឿងបុកគ្នានៅផ្លូវ ៦០ម៉ែត្រ បណ្ដាលឲ្យមនុស្ស ២ នាក់រងរបួសធ្ងន់។

ហេតុការណ៍នេះបានកើតឡើង នៅបណ្ដោយផ្លូវ ៦០ម៉ែត្រ រវាងម៉ូតូនិងម៉ូតូ នៅត្រង់ចំណុចខាងត្បូងទីតាំងឆែកសំបុត្រ ក្នុងសង្កាត់នគរធំក្រុងសៀមរាប។

ទោះបីជាយ៉ាងណា ពាក់ព័ន្ធករណីគ្រោះថ្នាក់ចរាចរណ៍នេះ សមត្ថកិច្ចនៅមិនទាន់ បញ្ជាក់លម្អិតនៅឡើយទេ៕SRP

ខេត្តសៀមរាប៖មនុស្សម្នាក់ បានស្លាប់ខណៈកំពុងដើរ ត្រូវបានម៉ូតូបុកចំពេញទំហឹង។

ករណីនេះបានកើតឡើង នៅវេលាម៉ោង៧និង២០នាទី ថ្ងៃទី ២៣ ខែមករា ឆ្នាំ២០២១ នៅតាមបណ្តោយផ្លូវលំគ្រួសក្រហម ត្រងចំណុច ភូមិរហាល ឃុំតាសៀម ស្រុកស្វាយលើ។

សមត្ថកិច្ចស្រុកស្វាយលើ បានឲ្យដឹងថាជនរងគ្រោះឈ្មោះ គង់ រឿន ភេទស្រី អាយុ៥៧ឆ្នាំ រស់នៅភូមិរហាល ឃុំតាសៀម ស្រុកស្វាយលើ។

ចំណែកអ្នកបង្កឈ្មោះ មឺយ លឿង ភេទប្រុស អាយុ៣១ឆ្នាំ រស់នៅភូមិតាសៀម ឃុំតាសៀមស្រុកស្វាយលើ បើកបរម៉ូតូម៉ាក YAMAHA ពណ៌ខ្មៅគ្មានស្លាកលេខ អ្នករួមដំណើរជាមួយឈ្មោះ ឡុន អិន ភេទប្រុសអាយុ២៥ ឆ្នាំ រស់នៅឃុំស្វាយលើ ស្រុកស្វាយលើ បានរត់គេចខ្លួនបាត់។ មូលហេតុ បើកបរក្នុងល្បឿនលឿន។ ក្នុងនោះបណ្តាលឱ្យ ខូចខាតម៉ូតូ១គ្រឿងផងដែរ។

ក្រោយកើតហេតុ កម្លាំងជំនាញ បានចុះទៅដល់
នឹងប្រគល់សាកសព ទៅអោយក្រុមគ្រួសារធ្វើបុណ្យ។ ដោយឡែកវត្ថុតាង យកទៅរក្សាទុកនៅអធិការដ្ឋាននគបាលស្រុកដើម្បីរង់ចាំការដោះស្រាយ៕SRP

ខេត្តសៀមរាប៖លោកហ៊ុន ម៉ានី តំណាងរាស្ត្រមណ្ឌលកំពង់ស្ពឺ និងជាប្រធានសហភាពសហព័ន្ធយុវជនកម្ពុជា បានចុះពិនិត្យការស្ថាបនាផ្លូវនៅក្រុងសៀមរាប នៅរសៀលថ្ងៃនេះ។

លោកហ៊ុន ម៉ានី បានលើកឡើងថា ថ្ងៃនេះខ្ញុំមានឱកាស បានមកមើលផ្លូវ កំពុងស្ថាបនា ដែលរាជរដ្ឋាភិបាល បានប្រកាស ឲ្យបញ្ចេញកញ្ចប់ថវិកាជាតិ ដើម្បីស្ថាបនា ហេដ្ឋារចនាសម្ព័ន្ធ ផ្លូវចំនួន៣៨ខ្សែ ក្នុងក្រុងសៀមរាប កាលពីខែកញ្ញា ឆ្នាំ២០២០។

បើតាម លោកហ៊ុន ម៉ានី ទិដ្ឋភាពនៃការសាងសង់ ផ្លូវនេះ បានសបញ្ជាក់ថា ទោះបី ជាពិភពលោក កំពុងជួបវិបត្តិ នៃការរីករាលដាលជំងឺកូវីដ១៩ យ៉ាងណាក៏ដោយ ក៏ការណ៍នេះ មិនបានធ្វើឲ្យមានការប៉ះពាល់ ធ្ងន់ធ្ងរ ដល់ការអភិវឌ្ឍ ប្រទេសកម្ពុជាឡើយ។

ផ្ទុយទៅវិញ ការអភិវឌ្ឍនេះ គឺជាការជួយស្តារសេដ្ឋកិច្ច របស់ប្រជាពលរដ្ឋ នៅខេត្តសៀមរាប និងជាការត្រៀម ទទួលទេសចរ មកកាន់ខេត្តសៀមរាប ក្រោយវិបត្តិកូវីដ១៩ផងដែរ៕SRP

ខេត្តសៀមរាប៖បុរសម្នាក់ត្រូវបាន ចាប់ខ្លួនករណីលួចដោយមានស្ថានទម្ងន់ទោស។

សមត្ថកិច្ចស្រុកប្រាសាទបាគងបានរាយការណ៍ថា ហេតុការណ៍ គាស់បង្អួចផ្ទះចូលលួចទ្រព្យសម្បត្តិ បានកើតឡើង នៅវេលាម៉ោង០៩និង៣០ថ្ងៃទី២៣ខែមករា ឆ្នាំ២០២១ នៅចំណុចភូមិស្វាយជ័យ ឃុំត្រពាំងធំ ស្រុកប្រាសាទបាគង។

សមត្ថកិច្ចបានបញ្ជាក់ថាម្ចាស់ផ្ទះ មានឈ្មោះឆេង សារ៉េត ភេទស្រីអាយុ៤៥ឆ្នាំ រស់នៅភូមិឃុំខាងលើ។ ដោយបានបាត់បង់សម្ភារមានរួមមាន៖ ទូរទស្សន៍មួយគ្រឿង រូបចាក់មួយផ្ទាំង និងទូរសព្ទ១។

បើតាមសមត្ថកិច្ចបានបញ្ជាក់ថាបន្ទាប់ពីមានករណីនេះ ប៉ូលិសស្រុកប្រាសាទបាគង និងកម្លាំងនគរបាលព្រហ្មទណ្ឌកម្រិតធ្ងន់នៃស្នងការខេត្តសៀមរាប រួមជាមួយ ប្រជាការពារភូមិ ធ្វើការដេញស្ទាក់ចាប់ បានជនសង្ស័យភ្លាមៗ នៅចំណុចភូមិគោគត្នោត ឃុំកណ្តែក ស្រុកប្រាសាទបាគង។ នឹងម៉ូតូ១គ្រឿងម៉ាក nex ពណ៌ស គ្នានស្លាកលេខ។

ជនសង្ស័យឈ្មោះ តែ ម៉េងសួង ហៅញ៉ាញ់ អាយុ២៩ឆ្នាំរស់នៅ ភូមិល្វា សង្កាត់កោះដាច់ ខណ្ឌជ្រោយចង្វា រាជធានីភ្នំពេញ។ បច្ចុប្បន្ននៅភូមិធ្លកអណ្ដូង សង្កាត់ស្លក្រាមក្រុងសៀមរាប។

នគរបាលស្រុកបាគង កសាងសំណុំរឿងបញ្ជូនទៅតុលាការដើម្បីអនុវត្តតាមផ្លូវច្បាប់៕SRP

ខេត្តសៀមរាប៖លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានថ្លែងថា កន្លងមកទីផ្សារបន្លែក្នុងស្រុកមានតម្រូវការខ្ពស់ក៏ប៉ុន្តែការផ្គត់ផ្គង់ ដែលមានភាពជាក់លាក់ ទាំងបរិមាណ និងគុណភាពនៅមានកម្រិត ខណៈពេលដែល កសិករជួបប្រទះនូវភាព មិនប្រាកដប្រជា នៃតម្លៃកសិផលដែលផលិតបាន។
ក្រសួងពាណិជ្ជកម្ម ជាស្ថាប័ន អនុវត្តគម្រោង ដោយផ្តោតលើផលិតផល សំខាន់ៗ ចំនួន០៥មុខ រួមមាន ស្រូវក្រអូប ដំឡូងមី មាន់ស្រែ បន្លែ និង សូត្របៅ ហើយបាននិងកំពុងអនុវត្តន៍ នៅក្នុងខេត្តគោលដៅចំនួន១៨ ចែកចេញជាបីមណ្ឌលភូមិភាគគឺ មណ្ឌលភូមិភាគនិរតី បណ្ឌលភូមិភាគបូព៌ា និងឦសាន និងមណ្ឌលភូមិភាគពាយ័ព្យ ដែលខេត្តសៀមរាប ស្ថិតនៅក្នុងមណ្ឌល ភូមិភាគនេះ។

លោកថ្លែងយ៉ាងដូច្នេះ នាថ្ងៃទី២២ ខែមករា ឆ្នាំ២០២១ នៅសណ្ឋាគារ អេមព្រីស អង្គរខេត្តសៀមរាប ក្នុងពេលអញ្ជើញជាអធិបតីភាពចុះហត្ថលេខា លើអនុស្សរណៈ នៃការយោគយល់គ្នា ស្តីពីការផ្គត់ផ្គង់ និងបញ្ជាទិញផលិតផលកសិ-ពាណិជ្ជកម្មបន្លែ រវាងផ្សារកសិផល និងចំណីអាហារ (FAM) និងក្រុមហ៊ុន លី លី ហ៊្វូដអ៊ុនដាសទ្រី ខូ អិល ធីឌី (LYLY)។

លោក ប៉ាន សូរស័ក្តិ ក៏បានថ្លែងជំរុញ ឲ្យភាគីទាំងពីរ សហការគ្នា ដើម្បីធ្វើឲ្យដំណើរការ នៃការផ្គត់ផ្គង់ និង បញ្ជាទិញផលិតផល កសិពាណិជ្ជបន្លែ រក្សាឲ្យបាននូវនិរន្តរភាព ទាំងបរិមាណ និងគុណភាព។ ភាគីទាំងពីរ ត្រូវមានការចែករំលែកនូវព័ត៌មាន ជាមួយគ្នាទៅវិញ ទៅមក និងសម្របសម្រួល ជាមួយភាគី ពាក់ព័ន្ធនានា ដើម្បីធ្វើការដោះស្រាយ នូវរាល់បញ្ហានានា ដែលអាចកើតមានឡើង។

សូមជម្រាបថា ពិធីចុះអនុស្សរណៈ នៃការយោគយល់គ្នារវាង ផ្សារកសិផល និងចំណីអាហារ និងក្រុមហ៊ុន លី លី ហ្វីងអ៊ុនដាសទ្រី ខូ អិល ធីរឺ ស្តីពីការផ្គត់ផ្គង់ និងបញ្ជាទិញ ផលិតផល កសិពាណិជ្ជកម្ម បន្លែ នាពេលនេះ គឺជាសមិទ្ធផល មួយទៀតដែលកើតចេញពីការប្រឹងប្រែង របស់គម្រោង AIMS ក្រសួងពាណិជ្ជកម្ម ក្នុងការ តភ្ជាប់ក្រុមអ្នកផលិត អ្នកប្រមូលទិញ និងរោងចក្រកែច្នៃ ដែលជាកិច្ចការដ៏មានអត្ថ ប្រយោជន៍ រួមចំណែកដល់ការអភិវឌ្ឍសេដ្ឋកិច្ចជាតិ និងការបង្កើនចំណូលជូនដល់ប្រជាជននៅមូលដ្ឋាន។

ទន្ទឹមនឹងនេះប្រទេសកម្ពុជា ក៏មានសក្តានុពល ក្នុងការនាំចេញផលិតផលទៅកាន់ទីផ្សារអន្តរជាតិ ពិសេស ទីផ្សារអឺរ៉ុប អាម៉េរិក និងអាស៊ី ហើយផលិតផលដែលកែច្នៃពីផលិតផលកសិ-ពាណិជ្ជកម្មបន្លែ គឺជា ផលិតផលដែលកម្ពុជាមានលទ្ធភាពក្នុងការពង្រីកបន្ថែមទៅលើបណ្តាមុខទំនិញជាច្រើនក្រៅពី អង្ករ ម្រេច សំលៀកបំពាក់ ស្បែកជើង កាបូប និងកង់ជាដើម៕SRP

ខេត្តសៀមរាប៖បុរសម្នាក់ហែលទឹកឆ្លងស្ទឹង មិនរួចបណ្ដាលឲ្យលង់ស្លាប់។

ហេតុការណ៍បានកើតឡើង នៅវេលាម៉ោង១០
និង២០នាទីព្រឹក ថ្ងៃទី២២ ខែមករា ឆ្នាំ២០២១
ក្នុងទឹកស្ទឹង ទំនប់តាគង់ ស្ថិតនៅក្នុងភូមិត្រាច ឃុំបល្ល័ង្ក
ស្រុកប្រាសាទបាគង ខេត្តសៀមរាប។

សមត្ថកិច្ចស្រុកប្រាសាទបាគងបានរាយការណ៍ថាជនរងគ្រោះ មានឈ្នោះ តាយ ទី អាយុ៣៩ឆ្នាំនៅភូមិត្រាច ឃុំបល្ល័ង្ក
ស្រុកប្រាសាទបាគង ខេត្តសៀមរាប។

សមត្ថកិច្ចបានបញ្ជាក់ថា ករណីនេះ មូលហេតុហែលទឹកស្ទឹង ឆ្លងពីទិសខាងកើត ទៅខាងលិច ដែលមានប្រវែង៦០ម៉ែត្រលុះដល់ ត្រង់ចំណុចទឹកជ្រៅ បណ្តាលអោយលង់ទឹកស្លាប់តែម្តង។

តាមកាពិនិត្យរបស់គ្រូពេទ្យ មណ្ឌលសុខភាពបល្ល័ង្កនិងកម្លាំងជំនាញបច្ចេកទេស នៃអធិការដ្ឋានគរបាលស្រុកប្រាសាទបាគង បញ្ជាក់ថាសពពិតជាបានស្លាប់ ដោយសាលង់ទឹក ពិតប្រាកដមែន៕SRP

ខេត្តសៀមរាប៖ក្រុមបុគ្គលិកក្រុមហ៊ុនអាកាសយានដ្ឋានកម្ពុជា បានវិលត្រឡប់ ទៅវិញនៅប៉ុន្មានម៉ោងក្រោយ បន្ទាប់ពីមន្ទីរការងារ សន្យាថានឹងរកដំណោះស្រាយ ជូនដល់ពួកគាត់ នៅថ្ងៃបន្ទាប់។

បុគ្គលិកក្រុមហ៊ុនអាកាសយានដ្ឋានកម្ពុជា VINCI/SCA/CAMS ប្រមាណ៧៥នាក់ នៅថ្ងៃទី២២ខែមករា ឆ្នាំ២០២១ ព្រឹកមិញ នេះ បានលើកគ្នាមកកាន់មន្ទីរការងារ ដើម្បីអោយខាងមន្ទីរ ជួយដោះស្រាយ ការកាត់បន្ថយបុគ្គលិក១៦១នាក់។

ការលើកគ្នាមកតវ៉ានេះ ដំបូងឡើយ ត្រឹមតែអោយខាងមន្ទីរ ជួយរកដំណោះស្រាយតែប៉ុណ្ណោះ លុះពេលខាងមន្ទីរពន្យល់ អំពីគោលការរបស់ក្រុមហ៊ុន ក៏ផ្ទុះការតវ៉ា ហើយនាំគ្នាលើកបដាទៅវិញ។

ក្រុមអ្នកតវ៉ាបានលើកឡើងថា ពួកគាត់ទាំងអស់គ្នា បានបម្រើការងារ នៅទីនោះច្រើនឆ្នាំមកហើយ។ តែពេលនេះ ក្រុមហ៊ុន បែជា បញ្ឍប់បុគ្គលិកតែ១៦១នាក់ទៅវិញ មានន័យថា ក្រុមហ៊ុនប្រកាន់បក្ខពួក។ បើអីចឹងទេ ពួកគេមិនព្រមឡើយ ចាំបាច់ត្រូវរកដំណោះស្រាយអោយសមរម្យ ដោយរក្សាពួកគេទាំងអស់ នៅបម្រើការដដែល។

ជាមួយការវិលត្រឡប់ របស់ក្រុមអ្នកតវ៉ាប្រធានមន្ទីរការងារខេត្តសៀមរាប លោកចន្ទ័ សុខុមចិត្តា បានថ្លែងថា ករណីនេះ ខាងបុគ្គលិក បានដាក់លិខិតទៅក្រសួងដើម្បីសុំអន្តរាគមន៍ហើយ តែក្រសួងសម្រេចអោយខេត្តដោះស្រាយ។

លោកបន្តថា នៅថ្ងៃទី២២ខែមករានេះ មន្ទីរហៅពួកគាត់មកសម្រួល រកដំណោះស្រាយ តាមផ្លូវច្បាប់ តែពួកគាត់មិនស្តាប់ បែជាចោទថា ជារឿងវិវាទ ហើយនាំគ្នាលើកបដាតវ៉ាទៅវិញ។

លោកប្រធានមន្ទីរបន្ថែមថា តាមពិតការកាត់ បន្ថយបុគ្គលិក១៦១ របស់ក្រុមហ៊ុនអាកាសយានដ្ឋាននេះ គឺដោយសារវិបត្តិកូវីដ១៩។ បើភ្ញៀវបរទេស មិនហ៊ានមកលេង ហើយបុគ្គលិក គ្មានការងារធ្វើផង តើបានប្រាក់ឯណា ផ្តល់ជូនពួកគាត់ ចឹងហើយទើបក្រុមហ៊ុនសម្រេចកាត់បន្ថយបែបនឹង។

លោកបញ្ជាក់ថា តាមពិតបុគ្គលិកចំនួន១៣០នាក់ បានយល់ព្រម ទទួលយកប្រាក់ដំណោះស្រាយ របស់ក្រុមហ៊ុនរួចហើយ តែពួកគេនៅតែប្រមូលគ្នា មកតវ៉ាបន្ថែម។ ប៉ុន្តែទោះជាបែបនេះ ក៏ខាងមន្ទីរ នៅតែព្យាយាមរកដំណោះស្រាយ ដល់ពួកគាត់ដែរ ប៉ុន្តែតាមគោលការច្បាប់។

រហូតដល់រសៀលថ្ងៃទី២២ខែមករា នេះ បណ្ដាញ សៀមរាបប៉ុស្តិ៍ នៅមិនទាន់ទទួលបានការឆ្លើយតប ពីក្រុមហ៊ុនអាកាសយានដ្ឋានកម្ពុជា VINCI/SCA/CAMSនៅឡើយទេ ចំពោះការលើកឡើង របស់ក្រុមអ្នកតវ៉ាបែបនេះ៕SRP