ខេត្តកំពង់ធំ៖មន្ត្រីបរិស្ថានខេត្តកំពង់ធំ បានបាញ់ ចំពលរដ្ឋម្នាក់ឲ្យរងរបួស ខណៈជនរងគ្រោះ លួចចូលទៅកាប់អាឈើក្នុងដែនអភិរក្សព្រៃអង់តែន។

ហេតុការណ៍បាញ់ប្រហារទៅលើពលរដ្ឋនេះ បានកើតឡើងនៅរសៀលថ្ងៃទី២៦ ខែមិថុនា ឆ្នាំ២០២១ ម្សិលមិញ ក្នុងដែនអភិរក្សព្រៃអង់តែន ស្ថិតនៅត្រពាំងឪឡឹក ស្រុកសន្ទុក ខេត្តកំពង់ធំ។

ជនរងគ្រោះ បានរបួសចំត្រង់ភ្លៅខាងឆ្វេង ខណៈនេះកំពុងតែសម្រាកព្យាបាលរបួសនៅ គ្លីនិកឯកជនមួយ នៅក្នុងស្រុកសន្ទុក ខេត្តកំពង់ធំ។

ពាក់ព័ន្ធនឹងករណីនេះ ប្រធានមន្ទីរបរិស្ថាន ខេត្តកំពង់ធំ លោក តុប កក្តដា បានប្រាប់អ្នកសារព័ត៌មានថា ករណីមានការបាញ់ទៅលើពលរដ្ឋ គឺជាសិទ្ធិការពារខ្លួន ខណៈជនរងគ្រោះជាជនសង្ស័យ មុខសញ្ញាចាស់ ធ្លាប់បង្កហេតុ កាប់មន្រ្តីបរិស្ថានបណ្តាលឲ្យបែកក្បាល របួសធ្ងន់កន្លងមក តែត្រូវបានជនសង្ស័យម្នាក់នេះ រត់គេចខ្លួនបាត់តែម្តង និងទើបតែប្រទះឃើញខណៈកំពុងតែអាតឈើតំបន់ហាមឃាត់នេះ។

លោកតុប កក្តដា បានបន្តថា នៅថ្ងៃកើតហេតុ មន្រ្តីបរិស្ថានប្រចាំការនៅស្នាក់ការចំនួន២នាក់ បន្ទាប់ពីឮសូរ សំឡេងអារឈើ មន្រ្តីបរិស្ថានម្នាក់បានចូលក្នុងព្រៃទៅមើល ក៏ស្រាប់តែប្រទះឃើញជនសង្ស័យ២នាក់ កំពុងតែធ្វើសកម្មភាព អារឈើ ខណៈនោះមន្រ្តីបរិស្ថានបាន ប្រាប់ឲ្យជនសង្ស័យទាំង២នាក់ ទម្លាក់ម៉ាស៊ីនអារឈើចុះ តែអ្នកទាំងពីរពុំបានទម្លាក់ចុះនោះឡើយ បែរជាគ្រវីម៉ាស៊ីនតម្រង់មកមន្រ្តីបរិស្ថាន ខណៈនោះមន្រ្តីអភិរក្សក៏បាន បាញ់កំភ្លើងបង្អើលតែ គ្រាប់បានផ្លាតទៅចំភ្លៅបណ្តាលឲ្យរបួសតែម្តង។
លោកតុប កក្តដា បញ្ជាក់ថាបើមានចេតនាបាញ់សម្លាប់គឺស្លាប់បាត់ហើយ តែនេះគឺជាការពារខ្លួន ប្រសើរជាងត្រូវគេកាត់និងម៉ាស៊ីអារឈើ ព្រោះជាមុខសញ្ញាចាស់ធ្លាប់បង្កហេតុម្តងមកហើយ គឺត្រូវការពារខ្លួនរួចចាំដោះស្រាយគ្នា តាមនិតិវិធីច្បាប់។

លោក ម៉ែន លី ស្នងការប៉ូលិសខេត្តកំពង់ធំ បានឲ្យដឹងថា ជនរងគ្រោះដែលត្រូវរបួសដោយសារគ្រាប់កំាភ្លើង មានឈ្មោះ ប៉ុន ផល្លា ភេទប្រុស អាយុ២៤ឆ្នាំ រស់នៅភូមិសុភមង្គល ឃុំក្រយា ស្រុកសន្ទុក ខេត្តកំពង់ធំ។ ចំណែកមន្រ្តីបរិស្ថាន ដែលបានបាញ់ទៅលើជនរងគ្រោះ ដោយអះអាងថា ការពារខ្លួននោះ មានឈ្មោះចក់ សុជាតិ រស់ភូមិសរជ័យ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ។ បន្ទាប់ពីមានការហេតុការណ៍ បាញ់ពលរដ្ឋលោក ចក់ សុជាតិ បានមកផ្ទះ ទើបមន្រ្តីនៃស្នងការនគរបាលខេត្តកំពង់ធំ បាននាំខ្លួនមកស្នងការដើម្បីសាកសួរ៕SRP

ភ្នំពេញ៖សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន តាមរយៈលោកជំទាវ ហ៊ុន ម៉ាណា អគ្គនាយិកាវិទ្យុ-ទូរទស្សន៍បាយ័ន បានផ្ដល់អំណោយដល់អ្នកប្រកបរបរស៊ីក្លូនៅរាជធានីភ្នំពេញចំនួន៣០០នាក់ ដើម្បីជួយសម្រួលដល់ជីវភាពនៅក្នុងអំឡុងពេលនៃវិបត្តិកូវីដ-១៩នេះ។

ពិធីប្រគល់អំណោយនេះធ្វើឡើងនៅស្ថានីយទូរទស្សន៍បាយ័នបឹងស្នោរ នៅព្រឹកថ្ងៃទី២៧ ខែមិថុនា ឆ្នាំ២០២១ ដោយមានការរៀបចំជូនដោយលោក ជិន ប៊ុនធឿន រួមជាមួយនឹងក្រុមការងារមួយចំនួនទៀត។

ក្នុងឱកាសនោះ លោក ជិន ប៊ុនធឿន បានផ្ដាំផ្ញើសួរសុខទុក្ខពីថ្នាក់ដឹកនាំទៅដល់បងប្អូនអ្នកធាក់ស៊ីក្លូ ជាពិសេសសម្តេចតេជោ ហ៊ុន សែន និងសម្ដេចគតិព្រឹទ្ធបណ្ឌិត ដែលតែងតែគិតគូរអំពីសុខទុក្ខបងប្អូនអ្នកធាក់ស៊ីក្លូគ្រប់ពេលវេលា។

លោកក៏បានក្រើនរម្លឹកដល់បងប្អូនដែលប្រកបរបរធាក់ស៊ីក្លូ ដែលភាគច្រើនមានវ័យចំណាស់ ឱ្យថែរក្សាសុខភាពពិសេសការពារខ្លួនពីការរីករាលដាលនៃជំងឺកូវីដ-១៩។ បងប្អូនអ្នកធាក់ស៊ីក្លូទាំងអស់ពិតជាសប្បាយរីករាយ និងអរគុណដល់ទាំងទ្វេ ដែលតែងតែគិតគូរចំពោះពួកគាត់ជាពិសេសតាមរយៈការបង្កើតមូលនិធិត្រីចក្រក្រយានធ្វើឲ្យពួកគាត់បានកាត់បន្ថយការលំបាកក្នុងជីវភាពមួយផ្នែកធំ។

គួររំលឹកថា កន្លងមកនេះ សម្តេចតេជោ ហ៊ុន សែន នាយក រដ្ឋមន្ត្រីកម្ពុជា បានង្កើនមូលនិធិនេះត្រីចក្រក្រយានឡើង ជាពិសេសសម្រាប់បងប្អូនអ្នកធាក់ស៊ីក្លូនេះតែម្តង ដែលមូលនិធិនេះអ្នកធាក់ស៊ីក្លូបាន ទទួលបាន ប្រយោជន៍ ជាច្រើន ដូចជា ការទទួលបាន ប្រាក់ឧបត្ថម្ភ ៧០០០រៀលក្នុងមួយថ្ងៃ (បើកប្រាក់នេះ ១០ថ្ងៃ ម្តង ) ការទទួលបានសេវាព្យាបាលពីមន្ទីរពេទ្យរដ្ឋ ដោយឥតគិតថ្លៃ និងផលប្រយោជន៍ផ្សេងទៀត ដូចជាប្រាក់ឧបត្ថម្ភក្នុងថ្ងៃបុណ្យជាតិធំៗ និងពេលចូលនិវត្តន៍ជាដើម។

សម្រាប់អំណោយដែលផ្ដល់ជូននាពេលនេះក្នុងម្នាក់ៗ ទទួលបាន:
០១- អង្ករចំនួន ១បេស្មើនឹង២៥ គីឡូក្រាម
០២- ត្រីខចំនួន២យួរ ស្មើនឹង២០កំប៉ុង
០៣- មីចំនួន៣កេសតូច
០៤- ភេសជ្ជៈខារ៉ាបាវចំនួន៦កំប៉ុង
០៥- ទឹកសុទ្ធអរុណាចំណុះ៣៥០ml ចំនួន១ កេស
០៦- ក្រមា១
០៧- ភួយ ១
០៨- មុង ១
០៩- ស្បែកជើងមួយគូ
១០-ថ្នាំវីតាមីនសេចំនួនមួយទីប
១១- ថ្នាំពេទ្យចំនួនមួយប្រអប់
១២- ប្រេងកូឡាចំនួនមួយដប
១៣- ប្រេងខ្យល់ ១ដប
១៤- ម៉ាសចំនួនមួយប្រអប់
១៥- ច្រាស និងថ្នាំដុសធ្មេញមួយឈុត
១៦- ជេលលាងដៃចំនួន១ដប
១៧-សាប៊ូ១ ដុំ
១៨- ថវិកាចំនួន៥ ម៉ឺនរៀល៕SRP

ខេត្តសៀមរាប៖បុរសម្នាក់ត្រូវបានគេប្រទះឃើញដេកស្លាប់ នៅក្នុងបន្ទប់របស់ខ្លួន។

ហេតុការណ៍បានកើតឡើងនៅវេលាម៉ោង២០និង៤០នាទីថ្ងៃទី២៦ ខែមិថុនា ​ឆ្នាំ ២០២១ នៅភូមិធ្លកអណ្ដូង​ សង្កាត់ស្លក្រាម​ ក្រុងសៀមរាប។

សមត្ថកិច្ចបានឲ្យដឹងថា ជនរងគ្រោះ មានឈ្មោះ​ ហែន លឿម​ អាយុ៤២ឆ្នាំ​ រស់នៅនៅភូមិធ្លកអណ្ដូង​ សង្កាត់ស្លក្រាម​ ក្រុងសៀមរាប។

បើតាមសមត្ថកិច្ចបានបញ្ជាក់ថា ករណីនេះជនរងគ្រោះស្លាប់ មូលហេតុដោយជំងឺរបេង៕SRP

ភ្នំពេញ៖នគរបាលចំនួន ២ រូបនិងយោធាមួយរូប ត្រូវបានឃាត់ខ្លួន ដោយក្រុមការងារគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ។

ការឃាត់ខ្លួននៅថ្ងៃទី២៥ ខែមិថុនា ឆ្នាំ២០២១ ម្សិលមិញនៅខេត្តបណ្ឌលគីរី។

សមត្ថកិច្ចបានឲ្យដឹងថា ក្រុមការងារគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ រួមមានថ្នាក់ជាតិ និងថ្នាក់ក្រោមជាតិ បន្តរុករកវត្ថុតាងរកឃើញគល់ឈើដែលបានកាត់ចំនួន ៧៧គល់ និងរកឃើញឈើស្រឡៅមូលចំនួន ៣ដើម និងឈើអារជ្រុងស្រឡៅ ចំនួន១៣កំណាត់ និងបានឃាត់ខ្លួនជនសង្ស័យចំនួន៣នាក់ បន្ថែមទៀត បញ្ជូនទៅអយ្យការអមសាលាដំបូងខេត្តមណ្ឌលគិរី។

ជនសង្ស័យទាំង៣នាក់១.ឈ្មោះ ព្រំ វណ្ណៈ នាយរងប៉ុស្តិ៍អូរហ៊ុច នគរបាលការពារព្រំដែន។២.ឈ្មោះ ផាត សុខឡេង នាយរងប៉ុស្តិ៍អូរហ៊ុច នគរបាលការពារព្រំដែន។ ៣.ឈ្មោះ អ៊ាង ចាន់ឌី មេបញ្ជាការរង កងអនុសេនាធំទី២ យោធាការពារព្រំដែន។

សូមជម្រាបថាប្រតិបត្តិការបង្ក្រាបបទល្មើសព្រៃឈើនេះធ្វើឡើងនៅតាមបន្ទាត់ព្រំដែន(អូរហ៊ុច)ស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី នៅមុននេះប៉ុន្មានថ្ងៃ
ក្រុមមន្ត្រីចម្រុះក៏បានឃាត់ខ្លួនមនុស្សចំនួន៤នាក់ ដែលសង្ស័យមានការសមគំនិត ឃុបឃិតគ្នា ជាមួយជនជាតិវៀតណាម បើកផ្លូវឲ្យចូលមកកាប់ឈើ ក្នុងតំបន់អូរហ៊ុច ដើម្បីដឹកជញ្ជូនយកទៅ ប្រទេសវៀតណាម។

មន្ត្រីបានថ្លែងប្រាប់បណ្ដាញសៀមរាបប៉ុស្ដិ៍ ជនសង្ស័យទាំង៤នាក់។ទី១ ឈ្មោះ អ៊ុក ណាខៃ មេបញ្ជាការកងអនុសេនាធំការពារព្រំដែនលេខ២,ទី២ ឈ្មោះ ឡឹក ញែក មេបញ្ជាការរង កងអនុសេនាធំការពារព្រំដែនលេខ២ ទទួលទិសអូរហ៊ុច,ទី៣ ឈ្មោះ វ៉ាន់ ចន្ធារី មេបញ្ជាការកងអនុសេនាតូចការពារព្រំដែនលេខ២ ឈរជើងនៅអូហ៊ុច,ទី៤ឈ្មោះ លាង ភារ័ត្ន មេប៉ុស្តិ៍នគរបាលការពារព្រំដែន អូរហ៊ុច និងវត្ថុតាងរួមមាន ឈើមូលប្រភេទស្រឡៅ សុក្រមចំនួន២៥២កំណាត់ ត្រាក់ទ័រ២គ្រឿង ម៉ូតូ២គ្រឿង រណារយន្ត១គ្រឿង បញ្ជូនទៅតុលាការខេត្តមណ្ឌលគិរី ដើម្បីអនុវត្តតាមផ្លូវច្បាប់៕SRP

ខេត្តសៀមរាប៖លោកគិម ប៊ុនថាន់ អនុប្រធាន​ សមាគម​ចលនាយុវជនកម្ពុជា​(ក្រុម​១៥៧)​ស្រុកក្រឡាញ់​ បាន​ដឹក​នាំ​សមាជិក​ សមាជិកា​ នាំ​យក​អំណោយ​ជា​ គ្រឿង​ឧបភោគ​ បរិភោគ​ និង​ សម្ភារមួយ​ចំនួន​ ឧបត្ថម្ភ​ដល់​សាលាឃុំជន្លាសដៃនិងពលរដ្ឋចំនួនពីរគ្រួសារ ដែលមានជីវភាពខ្វះខាត​។

ការចុះឧបត្ថម្ភអំណោយ នៅថ្ងៃ​សៅរ៍ ទី២៦ ខែ​មិថុនា​ ឆ្នាំ២០២១​ នេះ តាមការណែនាំពីសំណាក់លោក ហ៊ុន ប៉ូគា ប្រធានសមាគមចលនាយុវជនកម្ពុជា (ក្រុម​១៥៧) សាខាខេត្ត​សៀមរាប​ ក្រោមការទទួលពីលោកប៊ូន ឈឿត មេឃុំជន្លាស់ដៃ និងមានការចូលរួមពីលោក​ សុខ​ ណារ៉េត​ អភិបាលរងស្រុក​ក្រឡាញ់​ និង​ លោក យ៉ែម មុន្នីរ័ត្ន ស.ស.យ.​ក​ ស្រុក​ក្រឡាញ់​ផងដែរ។

លោកគិម ប៊ុនថាន់ តំណាង​លោក​ ឆាត​ ឆី​ហ៊ុយ​ ប្រធាន​សមាគម​ចលនាយុវជនកម្ពុជា​ (ក្រុម​១៥៧)​ស្រុកក្រឡាញ់ បានឲ្យដឹងថា សម្ភារដែលបានប្រគល់ជូន​សាលា​ឃុំជន្លាស់ដៃមាន​ដូច​ជា​៖-​ ទឹក​សុទ្ធ​ ២០យួរ​ -​ ទឹក​ក្រូច​ ១កេស​ -​ មី​ ១កេស​ -​ សាប៊ូ​លាង​ដៃ​ ២០លីត្រ​-​ ម៉ាស ចំនួន ៤០០ម៉ាស និង-​ អាកុល​ ៣ដប។

ចំណែកអំណោយ​ជូន​គ្រួសារ​ដែលមានជីវភាពខ្វះខាត​ ចំនួន​២គ្រួសារ​នៅភូមិតាមាឃ និងភូមិ កំបោរ ក្នុងឃុំជន្លាស់ដៃ ដោយក្នុង​មួយគ្រួសារ​ទទួលបាន៖ -​ ថវិកា​ ៥មុឺន​រៀល -​ អង្ករ​ ២៥គីឡូ​ -​ ទឹក​សុទ្ធ​ ១០យួរ​ -​ មី​ ១កេស​-​ ត្រី​ខ​ ១យួរ​ -​ ទឹក​ស៊ីអុីវ ១យួរ​ -​ ទឹក​ត្រី​ ១យួរ​ -​ ប្រេង​ឆា​ ១លីត្រ​ -​ ស្ករ​ស​ ១គីឡូ​ -​ ប៊ីចេង​ ១គីឡូ​ -​ អំបិល​ ១គីឡូ​ -​ សាប៊ូ​លាង​ចាន​ ១ធុង​ (៥លីត្រ​) -​ ពង​ទា​ ៣០គ្រាប់​ និង-​ អាកុល​ ១ដប​។

ឆ្លៀតក្នុងឱកាសនោះផងដែរ លោក គិម ប៊ុនថាន់ បានមានមតិសំណេះសំណាល ផ្តាំផ្ញេី សូមឲ្យយកចិត្តទុកដាក់ អោយបានខ្ពស់នូវអនាម័យ​។ ជាពិសេសសូមចូលរួមអនុវត្តតាមប្រសាសន៍ណែនាំរបស់ សម្តេចតេជោ (៣កុំ ៣ការពារ) ឲ្យបានខ្ជាប់ខ្ជួនដើម្បីចៀសផុតពីមេរោគកូវីដ-១៩ ដ៏កាចសាហាវនេះ៕SRP

ខេត្តសៀមរាប៖បុរសម្នាក់ត្រូវបានខ្សែភ្លើងឆក់ស្លាប់ភ្លាមៗ បង្កឲ្យមានការភ្ញាក់ផ្អើល។

ហេតុការណ៍បានកើតឡើងនៅរសៀលថ្ងៃទី២៦ ខែមិថុនា ឆ្នាំ២០២១ ស្ថិតនៅភូមិត្បែងលិច ឃុំត្បែង ស្រុកបន្ទាយស្រីខេត្តសៀមរាប។

សមត្ថកិច្ចស្រុកបន្ទាយស្រីបានឲ្យដឹងថាជនរងគ្រោះ មានឈ្មោះឆន​ ឆាយ អាយុ៣៩ឆ្នាំរស់នៅភូមិឃុំខាងលើ។

សមត្ថកិច្ចបានបន្តថាករណីនេះមុនពេលកើតហេតុ ជនរងគ្រោះ បានក្នុងឡើងតាមជណ្តើរដើម្បីដាក់ពិដានផ្ទះនិងរៀបហ្គែនខ្សែភ្លើង ដោយជើងជណ្តើរជាន់លើខ្សែភ្លើងពុំបានដឹងក៏ត្រូវឆ្លងចរន្ធភ្លើងឆក់ស្លាប់ភ្លាមៗតែម្តង។

បើតាមសមត្ថកិច្ចបញ្ជាក់ថាក្រោយពិនិត្យកោសល្យវិច្ច័យរួចឃើញថា ជនរងគ្រោះ ពិតជាបានស្លាប់ដោយឆក់ខ្សែភ្លើងពិតប្រាកដមែន៕SRP

ខេត្តសៀមរាប៖សមត្ថកិច្ចចម្រុះបានបង្ក្រាបរថយន្តដឹកឈើមួយគ្រឿងខណៈព្យាយាមបើកឆ្លងកាត់ខេត្តសៀមរាប។

ការបង្ក្រាបធ្វើឡើងនៅថ្ងៃសៅរ៍ ទី២៦ខែ មិថុនា ឆ្នាំ២០២១ នាវេលាម៉ោង ៦និង៣០នាទីព្រឹកត្រង់ចំណុច ភូមិចំបក់ ឃុំរលួស ស្រុកប្រាសាទបាគង ខេត្តសៀមរាប។

មន្ត្រីរដ្ឋបាលព្រៃឈើខេត្តសៀមរាបបានថ្លែងប្រាប់សារព័ត៌មានសៀមរាបប៉ុស្តិ៍ថា ករណីបង្ក្រាបរថយន្តដឹកឈើនេះដោយក្រុមអន្តរាគមន៍បង្ក្រាបបទល្មើសនៃខណ្ឌរដ្ឋបាលព្រៃឈើសៀមរាប សហការជាមួយនគបាលប្រធាំងបទល្មើសសេដ្ឋកិច្ចនៃស្នងការខេត្តសៀមរាប នឹងនគបាលស្រុកប្រាសាទបាគង។

មន្ត្រីរដ្ឋបាលព្រៃឈើបានឲ្យដឹងថារថយន្ត ដឹកឈើនេះម៉ាកTOYOTA HILANDER ពណ៌សពាក់ស្លាកលេខភ្នំពេញ2Q-5517 ដឹកជញ្ជូនឈើប្រណិត(ធ្នង់)ចំនួន១៤ដុំ ស្មើនឹង១,៣៩៤ម៉ែត្រត្រីគុណ ដែលដឹកជញ្ជូនដោយគ្មានលិខិតអនុញ្ញាតពីរដ្ឋបាលព្រៃឈើ។ ចំណែក (អ្នកបើកបរចុះពីរថយន្តរត់គេចខ្លួនបាត់)។

បច្ចុប្បន្នវត្ថុតាងត្រូវបានយកទៅរក្សាទុក នៅថ្នាលបណ្តុះកូនឈើ ផ្នែករដ្ឋបាលព្រៃឈើបន្ទាយស្រី ស្ថិតនៅភូមិព្រះដាក់ឃុំព្រះដាក់ ស្រុកបន្ទាយស្រី ខេត្តសៀមរាប ដើម្បីកសាងសំណុំរឿងតាមនិតិវិធីច្បាប់ស្តីពីព្រៃឈើ។

ជាមួយនឹងការបង្ក្រាបនេះ នៅយប់មិញដែរ សមត្ថកិច្ចស្រុកស្ទោង ខេត្តកំពង់ធំ ក៏បានបង្ក្រាបរថយន្តដឹកឈើធ្នង់មួយគ្រឿងផងដែរ ម៉ាកស្តារិច ពណ៌ខ្មៅពាក់ស្លាកលេខភ្នំពេញ ២AD៥២០៦។

តាមប្រភពបានបង្ហើបឲ្យដឹងថាម្ចាស់រថយន្ត មានឈ្មោះត្រេន គឺជាឈ្មួញរកស៊ីដឹកជញ្ជូនឈើឆ្លងកាត់ខេត្តសៀមរាបដ៏សកម្មម្នាក់។
ប្រភពបានបន្តទៀតថារថយន្តដឹកឈើទាំង ២គ្រឿងនេះ ដឹកចេញពីក្រុងសំរោងខេត្តឧត្តរមានជ័យ តាមផ្លូវលេខ ៦៨ ឆ្លងកាត់ស្រុកក្រឡាញ់ខេត្តសៀមរាប ឆ្ពោះទៅខេត្តកំពង់ធំ។

ក្នុងនោះគេក៏បានបង្ហើបឲ្យដឹងថា រថយន្តទាំងពីរគ្រឿងខាងលើនេះសុទ្ធតែអត់មានពន្ធទៀតផង។

យ៉ាងណាក៏ដោយជុំវិញការបង្ក្រាបរថយន្ដដឹកឈើនេះ មានការសាទរយ៉ាងខ្លាំងចំពោះសមត្ថកិច្ចរដ្ឋបាលព្រៃឈើ និងនគរបាលស្រុកប្រាសាទបាគងនិងនគរបាលប្រឆាំងបទល្មើសសេដ្ឋកិច្ចខេត្តសៀមរាប ដែលបានបង្ក្រាបបទល្មើសទាន់ពេលវេលា៕SRP

ខេត្តឧត្តរមានជ័យ៖ឈើប្រណិតប្រភេទធ្នង់ក្នុងដែនការពារជម្រកសត្វសង្ឃរុក្ខវ័ន រងការកាប់បំផ្លាញយ៉ាងរង្គាល ដោយត្រឹមតែរយៈពេល៤ថ្ងៃ ត្រូវគេចូលទៅកាប់អស់៩ដើម។

ការចូលទៅកាប់ឈើក្នុងព្រៃសហគមន៍ខាងលើនេះ បានកើតឡើងក្នុងចន្លោះថ្ងៃទី៩ដល់ថ្ងៃទី១២ខែ មិថុនាឆ្នាំ២០២១។

ព្រះតេជគុណព្រះនាមថូ ធូរស់ ប្រធាបប្រតិបត្តិនិងជាប្រធានសង្ឃសហគមន៍រុក្ខវ័នស្តីទី បានមានសង្ឃ ដីកាថា ជាការពិតណាស់ដែលក្រុមជនមិនស្គាល់មុខបានចូលទៅកាប់ឈើប្រភេទធ្នង់ក្នុងព្រៃសហគមន៍អស់៩ដើមត្រឹមតែរយៈពេល៤ថ្ងៃ។ ឈើដែលរងការកាប់បំផ្លាញនេះស្ថិតនៅចំណុច ភូមិបាក់ដឹង សង្កាត់សំរោង ក្រុងសំរោង ខេត្តឧត្តរមានជ័យ មានចម្ងាយប្រហែល២០០ម៉ែត្រពីស្នាក់ការឧទ្យានុរក្សនៃមន្ទីរបរិស្ថានខេត្ត។ ឈើប្រណិតប្រភេទធ្នង់ទាំង៩ដើមដែករងការកាប់បំផ្លាញនេះ មានមុខកាត់ពី២តឹកដល់ជាង៣តឹក។

ព្រះតេជគុណអោយដឹងទៀតថា ក្រុមជនមិនស្គាល់មុខ បានប្រើរូបភាព៣ផ្សេងគ្នាក្នុងការដឹងជញ្ជូនឈើចេញក្រោយពេលកាប់។ ១ ដឹកដោយរទេះច្នៃកង់ពីរឬ(រុក្ខិន)ទី២ ចងស្ពាយម្នាក់ៗ និងទី៣ សែង។ សកម្មភាពនេះកម្លាំងធ្លាប់ល្បាតប្រទះឃើញ ហើយរឹបអូសបានជាវត្ថុតាងទៀតផង ខណ:ជនសង្ស័យបានរត់គេចខ្លួននាពេលកន្លងមក។ តែថ្មីនេះ ក្រុមជនមិនស្គាល់មុខបន្តចូលទៅកាប់ ហើយដឹកចេញដោយសុវត្ថិភាព ហាក់មិនខ្លាចអំពីកម្លាំងរបស់មន្ត្រីឧទ្យាននុរក្សអីបន្តិចសោះ។

ព្រះតេជគុណ បន្ថែមថា ដែនជម្រកសត្វព្រៃសង្ឃរុក្ខវ័នមានទំហំ៣០២៥៤ហិកតា ជាប់ព្រំប្រទល់ ៣ ក្រុងស្រុកគឺក្រុងសំរោង ស្រុកអន្លង់វែង និងស្រុកចុងកាល់ នៃខេត្តឧត្តរមានជ័យ។ គិតចាប់ពីខែ១២ឆ្នាំ ២០២០មកទល់ពេលនេះ មានឈើប្រភេទធ្នង់ជាង ១០០ដើមហើយ ដែលត្រូវក្រុមមិនស្គាល់មុខកាប់បំផ្លាញ ធ្វើអាជីវកម្ម ។ ចឹងទេ ករណីចូលកាប់ឈើ ខាងលើ ព្រះតេជគុណ អំពាវនាវសំុអោយជំនាញពាក់ព័ន្ធ ពិសេសកម្លាំងឧទ្យាននុរក្ស ដែលបានដាក់ពង្រាយរហូត៥ស្នាក់ការមេត្តា ជួយល្បាតទប់ស្កាត់ និងចាប់ឃាត់ខ្លួនក្រុមជនឧក្រិដ្ឋព្រៃឈើមកផ្តន្ទាទោស ចៀសជាងក្រុមជនខាងលើចូលកាប់បំផ្លាញឈើក្បែរស្នាក់ការខ្លួនហើយ បែជាមិនដឹងទៅវិញ។

ជុំវិញការបាត់បង់ឈើប្រណិត៩ដើមត្រឹមរយៈពេល៤ថ្ងៃនេះ លោកភួង លីណា ប្រធានមន្ទីរបរិស្ថានខេត្តឧត្តរមានជ័យ បានអោយដឹងតាមទូរស័ព្ទថា ជាការពិតណាស់ចំពោះការបាត់បង់ដើមឈើនេះ។ ប៉ុន្មានថ្ងៃមុនកាប់អស់៨ដើម និងនៅថ្ងៃទី២១ខែមិថុនានេះកាប់១ដើមទៀតសរុបអស់៩ដើម។ តែខាងលោកក៏បានរាយការណ៍ទៅថ្នាក់ខេត្តរួចហើយដែរ។ ពេល នេះកម្លាំងកំពុងស្រាវជ្រាវរកចាប់ខ្លួន ត្បិតយើងស្គាល់អត្តសញ្ញាណខ្លះហើយ។
លោកបន្តថា ក្រុមជនមិនស្គាល់មុខធ្វើសកម្មភាពពេលយប់ ចឹងទេយើងពិបាកក្នុងការល្បាតខ្លះៗដែរ។ តែចំពោះថា កាប់ក្បែរស្នាក់ការមិនពិតទេ គឺមានចម្ងាយ២០០ ទៅ៣០០ម៉ែត្រ។ តែខាងលោកនិងព្យាយាមស្រាវជ្រាវវែកមុខជនល្មើសដើម្បីចាប់ខ្លួន។

ទោះជាបែបនេះ ព្រះតេជគុណ ថូ ធូរស់ នៅតែបញ្ជាក់ថា ចំពោះការសហការក្នុងការការពារព្រៃឈើសង្ឃរុក្ខវ័ននេះ ហាក់មិនសូវស៊ីសង្វាក់គ្នារវាងសហគមន៍និងឧទ្យាននុរក្សនោះឡើយ។ ហេតុនេះទើបជនឧក្រិដ្ឋព្រៃឈើ នៅតែមានឱកាសក្នុងការចូលកាប់បំផ្លាញ៕SRP

ភ្នំពេញ៖សម្ដេចតេជោហ៊ុន សែន នាយករដ្ឋមន្ត្រី បានអះអាងថា កម្ពុជានឹងសម្រេចផែនការចាក់វ៉ាក់សាំង ជូនប្រជាពលរដ្ឋចំនួន ១០លាននាក់ នៅក្នុងឆ្នាំ២០២១នេះ ឬយ៉ាងយូរបំផុតនៅដើមឆ្នាំ២០២២។

សម្ដេចតេជោហ៊ុន សែនបានបញ្ជាក់ថា៖

គិតពីថ្ងៃទី១០ ខែកុម្ភៈ២០២១ ដល់ត្រឹមថ្ងៃទី២៥ ខែមិថុនា កម្ពុជា ចាក់វ៉ាក់សាំងជូនប្រជាពលរដ្ឋបានជាង ៣.៨លាននាក់ស្មើនឹងជាង ៣៨ភាគរយហើយ។ ក្រៅតែពីរាជធានីភ្នំពេញ បច្ចុប្បន្នរាជរដ្ឋាភិបាលកម្ពុជា បាននិងកំពុងពង្រីកការចាក់វ៉ាក់សាំងទៅកាន់ខេត្តកណ្តាល ព្រះសីហនុ កោះកុង កំពង់ស្ពឺ និងតាកែវផងដែរ។

បើតាមសម្ដេចតេជោហ៊ុន សែន បានបញ្ជាក់ថា នៅថ្ងៃសៅរ៍ ទី២៦ ខែមិថុនា ឆ្នាំ២០២១នេះ វ៉ាក់សាំងប្រយុទ្ធប្រឆាំងជំងឺកូវីដ១៩ ស៊ីណូវ៉ាក់ (Sinovac Vaccine) ចំនួន១លានដូសទៀត ដែលកម្ពុជាបានបញ្ជារទិញពីប្រទេសចិន ត្រូវបានដឹកមកដល់ប្រទេសកម្ពុជាទៀតហើយ។

ដោយឡែកនៅថ្ងៃទី២៨ ខែមិថុនា ដដែលនេះ វ៉ាក់សាំង ១លានដូសទៀត នឹងដឹកមកដល់ប្រទេសកម្ពុជាផងដែរ។ សរុបទៅត្រឹមខែមិថុនា កម្ពុជាទទួលបានវ៉ាក់សាំងពីក្រុមហ៊ុនចិន រហូតដល់ទៅ ៥លានដូស ហើយនៅខែកក្កដាខាងមុខ វ៉ាក់សាំងប្រមាណ ៣លានដូសទៀត ក៏នឹងត្រូវដឹកពីប្រទេសចិន មកកាន់កម្ពុជាផងដែរ។

ប្រមុខរាជរដ្ឋាភិបាលកម្ពុជារូបនេះក៏បានបញ្ជាក់បន្ថែមផងដែរថា វ៉ាក់សាំងបានក្លាយទៅជាវិធានការយុទ្ធសាស្ត្ររបស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងជំងឺកូវីដ១៩ និងជួយការពារអាយុជីវិតប្រជាពលរដ្ឋពីជំងឺឆ្លងសាកលមួយនេះ។ វត្តមានវ៉ាក់សាំងជាបន្តបន្ទាប់នេះ នឹងជួយឱ្យកម្ពុជាសម្រេចផែនការចាក់វ៉ាក់សាំងជូនប្រជាពលរដ្ឋប្រមាណ ១៣លាននាក់ ឱ្យបានលឿន និងទៅតាមការគ្រោងទុក៕SRP

ខេត្តសៀមរាប៖ក្មេងប្រុសអាយុ៦ឆ្នាំម្នាក់ ដើរតាមបងទៅចងគោ ហើយចុះលេងទឹកស្រះ បណ្ដាលឲ្យលង់ស្លាប់។

ហេតុការណ៍បានកើតឡើងនៅរសៀលថ្ងៃទី២៥ ខែមិថុនា ឆ្នាំ២០២១ នៅចំណុចវាលស្រែខាងលិចភូមិគោកល្វា ឃុំចារឈូក ស្រុកអង្គរជុំ។

សមត្ថកិច្ចស្រុក​អង្គរជុំ បានរាយការណ៍ថាជនរងគ្រោះ មានឈ្មោះ ជ័យ រ៉ាយុក រស់នៅភូមិ ឃុំកើតហេតុខាងលើ។ មូលហេតុដើរតាមបងទៅចងគោ ចុះទឹកស្រះលេងបណ្ដាលលង់ស្លាប់ តែម្ដង៕SRP

ភ្នំពេញ៖នាយករដ្ឋមន្ត្រីហ៊ុន សែន បានចេញសារលិខិត ក្នុងឱកាសប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា ឆ្នាំ២០២១៕SRP

ខេត្តសៀមរាប៖សត្វ«ឈ្លូសយក្ស»ជាភាសាបច្ចេកទេស Large-antlered muntjac ឬ Giant muntjac (Muntiacus vuquangensis) ដែលជាប្រភេទសត្វរងគ្រោះជិតផុតពូជខ្លាំងលើពិភពលោកនៅក្នុងបញ្ជីក្រហមរបស់ IUCN ត្រូវបានរកឃើញជាលើកដំបូង នៅក្នុងតំបន់ការពារធម្មជាតិ នៃប្រទេសកម្ពុជាក្នុងរយៈពេលជិត ៣០ ឆ្នាំចាប់តាំងពីពេលដែលអ្នកជំនាញបានរកឃើញលើកដំបូងនៅឆ្នាំ១៩៩៤ក្នុងប្រទេសវៀតណាម និងឡាវនៅតាមជួរភ្នំអាណាមដែលលាតសន្ធឹងដល់ឧទ្យានជាតិវីរៈជ័យភាគឦសានប្រទេស
កម្ពុជា។ នេះគឺជា ការប្រកាសឱ្យដឹងរបស់លោក នេត្រ ភក្ត្រា រដ្ឋលេខាធិការនិងជាមន្ត្រីនាំពាក្យក្រសួងបរិស្ថាននៅថ្ងៃទី២៥ ខែមិថុនា ម្សិលមិញ ដោយឈរលើទិន្នន័យរូបភាពប្រមូលបានពីម៉ាស៊ីនថតស្វ័យប្រវត្តិដាក់ដោយមន្ត្រីក្រសួងបរិស្ថាន ដើម្បីសិក្សាស្រាវជ្រាវសត្វព្រៃកម្រៗនៅក្នុងឧទ្យានជាតិវីរៈជ័យ ភូមិសាស្ត្រខេត្តរតនគិរី ចាប់ពីខែមីនា ដល់ខែឧសភា ឆ្នាំ២០២១នេះ។

រដ្ឋលេខាធិការ នេត្រ ភក្ត្រា បានថ្លែងថា នេះគឺជាដំណឹងដ៏រីករាយបំផុតសម្រាប់កម្ពុជា និងសម្រាប់ពិភពលោកទាំងមូល ដែលប្រភេទសត្វកម្ររងគ្រោះជិតផុតពូជខ្លាំងបំផុតនេះ មានវត្តមាននៅ ក្នុងប្រទេសកម្ពុជា និងបានថ្លែងកោតសរសេរចំពោះក្រុមមន្រ្តីក្រសួងបរិស្ថាន ប្រជាសហគមន៍ដែលបានរួមគ្នាចុះសិក្សាស្រាវជ្រាវប្រភេទសត្វព្រៃនៅក្នុងឧទ្យានជាតិវីរៈជ័យដែលបានបានលះបង់កម្លាំងកាយចិត្តក្នុង ការធ្វើដំណើរដ៏លំបាកក្នុងព្រៃដើម្បីបំពេញការងាររបស់ខ្លួន។

រដ្ឋលេខាធិការបានថ្លែងថាលទ្ធផលនៃការសិក្សាស្រាវជ្រាវនេះពិតជាមានតម្លៃបំផុតសម្រាប់ការអភិរក្សជីវៈចម្រុះ និងអ្នកបរិស្ថានហើយចាំបាច់ យើងទាំងអស់គ្នាត្រូវចូលរួមការពារនិងអភិរក្សប្រភេទសត្វដ៏កម្រនេះឱ្យបានគង់វង្សក្នុងព្រៃកម្ពុជា។

លោកបានថ្លែងថាដោយការការពារនិងអភិរក្សធនធនធម្មជាតិបានល្អប្រសើរដែលជាទីជម្រក កន្លែងរកចំណី និងប្រភព ទឹកដែលជាតម្រូវការចាំបាច់សម្រាប់ការរស់នៅរបស់សត្វព្រៃ យើងឃើញមានវត្តមាន ប្រភេទសត្វកម្រៗជាច្រើនប្រភេទចាប់ផ្តើមមានវត្តមាននៅក្នុងព្រៃកម្ពុជា។ នេះគឺជាលទ្ធផលដ៏វិជ្ជមានមួយ នៃកិច្ចខិតខំប្រឹងប្រែងអភិរក្សធនធានធម្មជាតិ ធម្មជាតិរបស់រាជរដ្ឋាភិបាលនិងភាគីពាក់ព័ន្ធទាំងអស់។

លោក ពិន ច័ន្ទរតនា ប្រធានក្រុមការងារស្រាវជ្រាវនៃនាយកដ្ឋានអភិរក្សតំបន់ការពារធម្មជាតិដីគោកខាងកើតទន្លេមេគង្គនៃក្រសួងបរិស្ថានដែលដឹកនាំការស្រាវជ្រាវឧបត្ថមគាំទ្រដោយក្រសួងបរិស្ថាន និងការិយាល័យស្រាវជ្រាវអភិរក្សសត្វព្រៃ (WildCRU) នៃសាកលវិទ្យាល័យ Oxford ចក្រភពអង់គ្លេស បានថ្លែងថា សត្វឈ្លូសយក្សចូលចិត្តរស់នៅក្នុងព្រៃស្រោងនិងព្រៃពាក់កណ្តាលស្រោងមានរយៈកម្ពស់ខ្ពស់ (រហូតដល់ជាង ១០០០ម៉ែត្រពីនីវ៉ូសមុទ្រ)។ នៅកំឡុងទស្សវត្សឆ្នាំ៩០ ស្នែងឈ្លូសយក្សត្រូវបានឃើញដាក់លក់នៅក្នុងភូមិដាច់ស្រយាលមួយនៃខេត្តមណ្ឌលគិរី ប្រទេសកម្ពុជា ប៉ុន្តែមិនដែលមានការរាយការណ៍ពីការឃើញខ្លួនវាដោយផ្ទាល់នោះទេ។

លោកបានថ្លែងថា ឈ្លូសយក្ស ជាប្រភេទឈ្លូសដែលមានមាឌធំជាងគេ អាចមានទម្ងន់លើសពី ៣០គីឡូក្រាមក្នុងមួយក្បាល និងស្ថិតក្នុងចំណោមឈ្លូសទាំង១២ប្រភេទហើយលក្ខណៈខុសគ្នារវាងសត្វឈ្លូសយក្សនិងសត្វឈ្លូសធម្មតា Northern red muntjact (Muntiacus vaginalis) ដែលមានវត្តមានស្ទើរតែនៅទូទាំងប្រទេសកម្ពុជាយើង ត្រង់ចំណុចបីសំខាន់៖ ទី១)ស្នែង៖ ស្នែងសត្វឈ្លូសយក្សមានទំហំធំជាងស្នែងសត្វឈ្លូសធម្មតា ខ្នែងស្នែងតូច ដុះស្រប ឬក៏ដុះបែកងាកចេញក្រៅពីខ្នែងមេ ហើយគល់ស្នែងរបស់ឈ្លូសយក្សខ្លីជាងគល់ស្នែងរបស់ឈ្លូសធម្មតា។ ទី២) កន្ទុយ៖ កន្ទុយរបស់សត្វឈ្លូសយក្សមានប្រវែងខ្លីជាង (ប្រហែល១/៣) កន្ទុយរបស់សត្វឈ្លូស
ធម្មតា ហើយកន្ទុយនោះមានរាងត្រីកោណ និងមានពណ៌សនៅផ្នែកខាងក្រោម។ ទី៣) ថ្ងាសរបស់សត្វ
ឈ្លូសយក្សញី មានពណ៌ក្រម៉ៅ (ស្ទើរតែខ្មៅតែម្តង) ជាងថ្ងាសឈ្លូសធម្មតា។

តាមរយៈការសិក្សារកឃើញវត្តមានសត្វឈ្លូសយកនេះ លោក នេត្រ ភក្ត្រា បានថ្លែងថាក្រសួងបរិស្ថាននឹងបញ្ចូលប្រភេទសត្វនេះទៅក្នុងបញ្ជីជីវៈចម្រុះដែលមាននៅក្នុងប្រទេសកម្ពុជា។ កម្ពុជាដែលតាមការបញ្ជាក់របស់រដ្ឋលេខាធិការក្រសួងបរិស្ថាន ត្រូវបានអ្នកជំនាវស្រាវជ្រាវឃើញថាជាប្រទេសសម្បូរទៅដោយជីវៈចម្រុះដែលបានបង្ហាញវត្តមានប្រភេទថនិកសត្វ ១២៣ ប្រភេទ សត្វស្លាប ៥៤៥ ប្រភេទ ឧរង្គសត្វ ៨៨ ប្រភេទ រុក្ខជាតិតូចៗ (vascular plants) ២៣០៨ប្រភេទ ត្រី ៨៧៤ ប្រភេទ ផ្កាថ្មរឹង២៤ប្រភេទ ផ្កាថ្មទន់ ១៤ ប្រភេទ ស្មៅសមុទ្រ ១០ ប្រភេទ និងថលជលិក ៦៣ ប្រភេទ។ នៅមានវត្តមានប្រភេទរុក្ខជាតិ និងសត្វមួយចំនួនទៀតដែលមិនទាន់សិក្សាស្រាវជ្រាវ និងកំណត់អត្តសញ្ញាណនៅទ្បើយ។ មានប្រភេទរុក្ខជាតិ និងសត្វដែលបានកំណត់ក្នុងបញ្ជីក្រហមរបស់អង្គការសហភាពអន្តរជាតិ ដើម្បីការអភិរក្សធម្មជាតិ (IUCN) ក្នុងតារាង១ ដូចជា៖ ថនឹកសត្វ៣៩ប្រភេទ សត្វស្លាប៣៦ប្រភេទ ឧរង្គសត្វ១៣ប្រភេទ រុក្ខជាតិតូចៗ (vascular plants) ៣៨ប្រភេទ និង ថលជលិក១២ប្រភេទ។

ជាមួយគ្នានេះដែរ រដ្ឋលេខាធិការក្រសួងបរិស្ថានបានអំពាវនាវប្រជាពលរដ្ឋចូលរួមការពារនិងអភិរក្សសត្វព្រៃដែល កម្ពុជាមាន ជាពិសេសប្រភេទសត្វពូជកម្រៗជិតផុតពូជនៅលើពិភពលោកឱ្យបានគង់វង្ស។

តាមការបញ្ជាក់ឱ្យដឹងរបស់រដ្ឋលេខាធិការក្រសួងបរិស្ថាន ប្រភេទសត្វឈ្លូសយក្សនេះ ត្រូវបានចាត់ជាប្រភេទរងគ្រោះជិតផុតពូជខ្លាំង (Critically Endangered) នៅក្នុងបញ្ជីក្រហមរបស់ IUCN ហើយកត្តាគំរាម កំហែងដល់សត្វឈ្លូសយក្ស គឺការបរបាញ់យកស្នែង និងសាច់។ ដូច្នេះយើងត្រូវនិយាយថាទេចំពោះសាច់សត្វព្រៃ និងសូមកុំបរិភោគសាច់សត្វព្រៃដើម្បីបញ្ឈប់ការបរបាញ់ និងការដាក់អន្ទាក់សម្លាប់សត្វដោយខុសច្បាប់៕SRP