ខេត្តសៀមរាប៖ក្រុមចោរបានធ្វើសកម្មភាព គាស់តូបលក់ខោអាវ ក្នុងផ្សារដំដែក យកទ្រព្យសម្បត្តិ អស់សរុបទឹកប្រាក់ប្រមាណជា២ពាន់ដុល្លាររួចគេចខ្លួនបាត់ស្រមោល។

ប្រភពពីសមត្ថកិច្ចបានឲ្យដឹងថា ករណីម្ចាស់តូបលក់ ឈ្មោះ អន ស្រីមុំ ភេទស្រី អាយុ២៩ ឆ្នាំមុខរបរ លក់ដូរខោអាវ។

តាមការបំភ្លឺរបស់ជនរងគ្រោះបានអោយដឹងថា រាល់ថ្ងៃខ្លួនមានតូបលក់ខោអាវ ក្នុងផ្សារដំដែក ដែលមានទំហំ ២៥០×២៥០ សង់ទីម៉ែត្រ ហើយមានទ្វាររូតពីរ និងមានសោចាក់ទ្វារចំនួន៤គ្រាប់ (សោចិន ពណ៌ខ្មៅ)។ ខោអាវទាំងអស់ គឺខ្លួនរក្សាទុកនៅនឹងតូបក្នុងផ្សារតែម្ដង មិនបានខ្ចប់យកទៅផ្ទះនោះទេ។ នៅថ្ងៃទី១ ខែមិថុនា ឆ្នាំ២០២២ វេលាម៉ោង ១៦និង៣០នាទី ល្ងាច ខ្លួនបានបិទតូបលក់ និងបានចាក់សោទាំង៤គ្រាប់ រួចខ្លួនក៏ទៅផ្ទះ។

ម្ចាស់តូបបន្តថានៅថ្ងៃទី២ ខែ មិថុនា ឆ្នាំ២០២២ វេលាម៉ោង ០៦និង៣០ នាទីព្រឹក ខ្លួនមិនទាន់បានមកដល់តូបលក់ទេ ស្រាប់តែមានអ្នកលក់ជិតៗ នោះបានទូរស័ព្ទទៅប្រាប់ម្តាយក្មេកខ្លួនថា មានជនមិនស្គាល់អត្តសញ្ញាណ ចូលគាស់តូបខ្លួនយកខោអាវក្នុងតូបអស់ខ្លះ។ ពេលខ្លួនឮដូច្នោះ ក៏ប្រញ៉ាប់មកមើលតូបក៏ស្រាប់តែឃើញតូបខ្លួនរបើកទ្វារ និងបាត់សោចំនួន ១គ្រាប់ និង១គ្រាប់ទៀតគាស់បែកមាត់ ជាប់និងត្រចៀកទ្វារ ហើយខ្លួន ក៏ស្ទុះចូលទៅមើលខាងក្នុងតូបក៏ឃើញបាត់ខោអាវអស់ច្រើន ដោយមិនដឹងថាចោរគាស់លួច ពីពេលណានោះទេ។ តាមការប៉ាន់ស្មានឥវ៉ាន់ដែលបាត់បង់មានតម្លៃប្រហាក់ប្រហែលជិត ២០០០ដុល្លារ។

សមត្ថកិច្ចបញ្ជាក់ទៀតថាតាមរយៈការស្រាវជ្រាវ កាមេរ៉ាសុវត្ថិភាព នៅខាងមុខផ្សារឃើញមានសកម្មភាពសង្ស័យដោយមានរថយន្ត បាឡែន ពណ៌ស ឬពណ៌ទឹកប្រាក់ ចតខាងមុខផ្សារ រួចមានមនុស្សប្រុសមាឌធំកាន់ឥវ៉ាន់ចេញពីក្នុងផ្សារមកដាក់ក្នុងឡាន នៅម៉ោង ១និង៥៥ នាទីទៀបភ្លឺ។ ផ្សារដំដែក មិនមានសន្តិសុខយាម មិនមាន កាមេរ៉ាសុវត្ថិភាព និងភ្លើងបំភ្លឺនោះទេ ហើយករណីនេះ ពុំទាន់កំណត់មុខសញ្ញាបាននៅឡើយទេ។

សូមជម្រាបថាហេតុការណ៍​នេះបានកើតឡើងនៅវេលាម៉ោងប្រមាណជា១រំលង អាធ្រាត្រ​ ថ្ងៃទី២ ខែមិថុនាឆ្នាំ២០២២ ស្ថិតនៅភូមិដំដែក ឃុំដំដែក ស្រុកសូទ្រនិគម ខេត្តសៀមរាប៕SRP

ខេត្តសៀមរាប៖នៅចំពោះមុខសមត្ថកិច្ចនគរបាល ជនសង្ស័យបានឆ្លេីយសារភាពថា ខ្លួនពិតជាបានប្រព្រឹត្តសកម្មភាព យកម្រាមដៃខ្លួនលូកខ្វេះប្រដាប់ភេទក្មេងស្រីខាងលេីពិតប្រាកដមែន។ មូលហេតុដោយរូបគេ មេីលវិដេអូអាសអាភាស ក៏ចង់អនុវត្តតាមផ្ទាល់។

សមត្ថកិច្ចបានឲ្យដឹងថា ជនសង្ស័យមាន ឈ្មោះ​ មីង​ ពណ្ណារាយ ភេទប្រុស​ អាយុ២៦ឆ្នាំ រស់នៅភូមិល្វា​ ឃុំស្រែណូយ​ ស្រុកវ៉ារិនខេត្តសៀមរាប ត្រូវជាពូជនរងគ្រោះ។

ការឃាត់ខ្លួនធ្វើឡើងថ្ងៃទី១ ខែមិថុនា ឆ្នាំ២០២២​ ស្ថិតនៅភូមិល្វា​ ឃុំស្រែណូយ​ ស្រុកវ៉ារិន ខេត្តសៀមរាប។

ម្តាយជនរងគ្រោះ ប្រាប់រាយការណ៍សមត្ថកិច្ចថា ឈ្មោះ​ មីង​ ពណ្ណារាយ (ត្រូវប្អូនថ្លៃ) មកអង្គុយផឹកស្រានៅផ្ទះរបស់គាត់ ហេីយបានជិះម៉ូតូនាំកូនស្រីគាត់ ឈ្មោះ ភ.​ ស.ម អាយុ៥ឆ្នាំ ដោយបាននិយាយប្រាប់កូនស្រីគាត់ថា​ ទៅមេីលទូរស័ព្ទ ឯផ្ទះរបស់ខ្លួន​ បានប្រហែលមួយម៉ោង ក៏យកកូនគាត់ត្រឡប់មកវិញ​។

ស្ត្រីជាម្ដាយបន្តថា ពេលមកដល់កូនរបស់គាត់និយាយប្រាប់ថា​ ឈឺប៉ុមពឺតបីទៅបួនដង (ឈឺប្រដាប់ភេទ) តែរូបគាត់ពុំចាប់អារម្មណ៍ លុះដល់គាត់ងូតទឹកអោយកូន​ កូនស្រីគាត់យំប្រាប់ថាផ្សារប៉ុមពឺត (ប្រដាប់ភេទ)​ គាត់ក៏បានសួរថា​ អ្នកណាធ្វេីអីកូន​ កូនគាត់ប្រាប់ថា ពូរាយ​ (មីង​ ពណ្ណារាយ)លូកខ្វះ​ ប៉ុមពឺត។

បច្ចុប្បន្ននគរបាលស្រុកវ៉ារិន កសាងសំណុំរឿងបញ្ជូនតុលាការដើម្បីអនុវត្តតាមផ្លូវច្បាប់៕SRP

ខេត្តកំពង់ចាម៖លោក អ៊ុន ចាន់ដា ក៏បានលើកឡើងអំពីសមិទ្ធផលធំៗដែលរាជរដ្ឋាភិបាលដឹកនាំដោយ គណបក្សប្រជាជនកម្ពុជា សម្រេចបានរហូតមកដល់ពេលនេះ ដែលបានធ្វើឲ្យប្រទេសជាតិ មានការរីកចម្រើនឥតឈប់ឈរលើគ្រប់វិស័យ គួរជាទីមោទនៈ។ ដូច្នេះយើងគ្រប់គ្នាត្រូវរួមគ្នាថែរក្សា ឲ្យបានគង់វង្សនូវសុខ សន្តិភាព ដែលរកបានដោយកម្រ ក្រោមការ ដឹកនាំដ៏ខ្ពង់ខ្ពស់របស់ សម្តេចហ៊ុន សែន នាយករដ្ឋមន្ត្រី និងជាប្រធាន គណបក្សប្រជាជនកម្ពុជា។

លោក​ អ៊ុន ចាន់ដា សមាជិកគណៈកម្មធិការកណ្តាលគណបក្សប្រជាជនកម្ពុជា -ប្រធានគណៈកម្មាធិការគណបក្សខេត្ត និងជាប្រធានក្រុមការងារចុះមូលដ្ឋានក្រុងកំពង់ចាម ថ្លែងយ៉ាងដូច្នេះនៅថ្ងៃទី​២​ ខែមិថុនា​ នេះ​ ក្នុងឱកាសសំណេះសំណាល និងបង្រៀនគូសសន្លឹកឆ្នោត ដល់សមាជិក សមាជិកា គណបក្ស​ប្រជាជន​កម្ពុជា​សង្កាត់​បឹងកុក​ ប្រមាណ​ជាង៥០០នាក់។

លោក​ អ៊ុន ចាន់ដា ប្រធានគណបក្សខេត្ត បានអបអសាទរនូវលទ្ធផល បោះឆ្នោតល្បងនាពេលនេះ និងបានណែនាំឱ្យសកម្មជន និងយុវជនបក្ស បន្តចុះទៅតាមខ្នងផ្ទះរបស់ប្រជាពលរដ្ឋ ដើម្បីសួរសុខទុក្ខ និងបង្រៀនពីការគូសសន្លឹកឆ្នោតឱ្យបានផុលផុស ក៏ដូចជាការត្រៀមពេលវេលា និងអត្តសញ្ញាណប័ណ្ណ សញ្ជាតិខ្មែរ ឬឯកសារបញ្ជាក់ អត្តសញ្ញាណ បម្រើឲ្យការបោះឆ្នោត សម្រាប់ប្រើនៅថ្ងៃបោះឆ្នោត​ ឲ្យ​បាន​គ្រប់ៗគ្នា។

ប្រធានគណបក្សខេត្ត បានថ្លែងអំណរគុណ ដល់សមាជិក សមាជិកាគ្រប់រូប ដែលបានជឿជាក់មកលើគណបក្សប្រជាជនកម្ពុជា និងបានគាំទ្រ ក៏ដូចជាបានអញ្ជើញទៅចូលរួមបោះឆ្នោតជូនគណបក្សប្រជាជនកម្ពុជា រហូតមក​ និង​ការ​ប្តេជ្ញា​ចូលរួមបោះឆ្នោត នៅថ្ងៃទី៥ ខែមិថុនា ឆ្នាំ២០២២ ខាងមុខនេះ​ផងដែរ​៕SRP

ខេត្តត្បូងឃ្មុំ៖ថ្លែងទៅកាន់កងកម្លាំងនគរបាលខេត្ត ប្រមាណជាង៣០០នាក់ នៅទីបញ្ជាការស្នងការដ្ឋាននគរបាលខេត្ត លោកឧត្តមសេនីយ៍ត្រី ម៉ុន មាគ៍ា បានជំរុញ និងក្រើនរំលឹកឲ្យគ្រប់ផ្នែកជំនាញទាំងអស់ គ្រប់ជាន់ថ្នាក់ត្រូវក្តាប់ ឲ្យបាននូវរាល់បញ្ហាសំខាន់ៗ ទាក់ទងទៅនឹង ការថែរក្សាសុវត្ថិភាព សណ្តាប់ធ្នាប់សាធារណៈ។ ក្នុងនោះការជួយសម្រួលចរាចរណ៍ តាមដងផ្លូវ ពង្រឹងការការពារឲ្យបានម៉ត់ចត់នៅមុនថ្ងៃបោះ ថ្ងៃបោះ និងក្រោយថ្ងៃបោះឆ្នោត ពិសេសនៅតាមការិយាល័យ បោះឆ្នោតនៅថ្ងៃបោះឆ្នោត ជ្រើសរើសក្រុមប្រឹក្សាឃុំ-សង្កាត់ អាណត្តិទី៥ តែម្តង។

លោកឧត្តមសេនីយ៍ត្រី ម៉ុន មាគ៌ា ថ្លែងបែបនេះ នៅថ្ងៃទី០២ ខែមិថុនា ឆ្នាំ២០២២នេះ ក្នុងឱកាសត្រួតពិនិត្យកម្លាំង ដាក់បទបញ្ជា ផែនការ ធ្វើយ៉ាងណាបន្តរឹតបន្តឹង វិន័យកងកម្លាំងក្នុងគោលដៅធានា បាននូវសេចក្តីសុខជូន ប្រជាពលរដ្ឋ ក្នុងមូលដ្ឋាន។

លោកឧត្តមសេនីយ៍ត្រី ម៉ុន មាគ៍ា បន្ថែមថា បើទោះបីយើងជាប់បេសកកម្ម លើការងារការពារការិយាល័យ បោះឆ្នោត ក៏ដោយ ប៉ុន្តែភារកិច្ចស្នូល គឺត្រូវបន្តអនុវត្តន៍ឲ្យបានល្អប្រសើរ រក្សាការងារតាមជំនាញ ក្នុងនោះថ្នាក់ដឹកនាំ នាយ-នាយករងការិយាល័យ ត្រូវបន្តពន្លឿនការងារមកកាន់សេនាធិការ រាល់បទល្មើសនានា ត្រូវបន្តនីរិវិធីបញ្ជូនសំណុំរឿងទៅកាន់តុលាការ ក្នុងការដោះស្រាយរឿងក្តី និងបញ្ហាជូនពលរដ្ឋ។

លោកឧត្តមសេនីយ៍ត្រី ស្នងការ ក៏បានកោតសរសើរ ចំពោះកងកម្លាំងនគរបាល ទាំងអស់ដែលខិតខំបំពេញភារកិច្ច ការងារយ៉ាងសស្រាក់សស្រាំ ទាំងយប់ថ្ងៃ ដើម្បីសុខសុវត្ថិភាព សង្គម ពិសេស សូមឲ្យបេសកកម្ម ការពារក្នុងពេលបោះឆ្នោតក្រុមប្រឹក្សាឃុំ-សង្កាត់ អាណត្តិទៅ០៥ ក្នុងខេត្តត្បូងឃ្មុំខាងមុខនេះ ប្រព្រឹត្តទៅដោយរលូន និងមាន សសន្តិសុខសណ្តាប់ធ្នាប់ល្អផងដែរ៕SRP

ភ្នំពេញ៖ក្រសួងព័ត៌មាន បានចេញណែនាំម្ចាស់ស្ថានីយ៍វិទ្យុ ទូរទស្សន៍គ្រប់ប្រព័ន្ធ និងម្ចាស់ប្រព័ន្ធផ្សព្វផ្សាយទាំងអស់ ត្រូវបញ្ឈប់គ្រប់សកម្មភាពឃោសនា ផ្សព្វផ្សាយព័ត៌មានពាក់ព័ន្ធការបោះឆ្នោត ជ្រើសរើស ក្រុមប្រឹក្សាឃុំ-សង្កាត់អាណត្តិទី ៥ នៅថ្ងៃទី ៤ ខែមិថុនា ឆ្នាំ ២០២២ មុនបោះឆ្នោតមួយថ្ងៃ។ បើយោងតាមលិខិត របស់លោក អ៊ុក ប្រាថ្នា រដ្ឋលេខាធិការប្រចាំការ នៃក្រសួងព័ត៌មាន។

លិខិតបានបញ្ជាក់ថា ដើម្បីរក្សាភាពស្ងៀមស្ងាត់ ឲ្យប្រជាពលរដ្ឋដែលជាម្ចាស់សំឡេងឆ្នោត ធ្វើការសម្រេចចិត្តជ្រើសរើសតំណាងស្របច្បាប់ ទៅតាមឆន្ទៈរបស់ខ្លួនតាមបទប្បញ្ញត្តិច្បាប់ បទបញ្ជា និងនីតិវិធីសម្រាប់ការបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិទី ៥ ឆ្នាំ ២០២២ ក្រសួងព័ត៌មាន សូមធ្វើការណែនាំ​ម្ចាស់ស្ថានីយ៍វិទ្យុ ទូរទស្សន៍គ្រប់ប្រព័ន្ធ និងម្ចាស់ប្រព័ន្ធផ្សព្វផ្សាយទាំងអស់ ត្រូវបញ្ឈប់សកម្មភាពឃោសនាផ្សព្វផ្សាយព័ត៌មាន ពាក់ព័ន្ធនឹងការបោះឆ្នោតជ្រើសរើស ក្រុមប្រឹក្សាឃុំ-សង្កាត់អាណត្តិទី ៥ នៅថ្ងៃទី ៤ ខែមិថុនា ឆ្នាំ ២០២២ ជាកំហិត៕SRP

ខេត្តសៀមរាប៖លោក នូ ផល្លា តំណាងរាស្រ្ត មណ្ឌលសៀមរាប បានបញ្ជាក់ថា វាសនាប្រទេសជាតិ គឺស្ថិតលើបងប្អូនទាំងអស់គ្នា ដូច្នេះបងប្អូន ត្រូវអញ្ជើញទៅបោះឆ្នោត ឲ្យបានគ្រប់គ្នា បោះឆ្នោតឲ្យគណបក្សប្រជាជន គឺបោះឲ្យខ្លួនឯង បោះឲ្យក្រុមគ្រួសារខ្លួន ដើម្បីអនាគតកូនចៅ មានគណបក្សប្រជាជនកម្ពុជា មានសុខសន្តិភាព និង មានការអភិវឌ្ឍន៍ លើគ្រប់វិស័យនៅក្នុងមូលដ្ឋានខ្លួន។

លោក ក៏បានលើកផងដែរ ពីសមទ្ធិផលថ្មីៗ នៅលើទឹកដី ក្រុងបុរាណ ដែលផ្តើមចេញពីគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធានគណបក្ស និង ជា នាយករដ្ឋមន្ត្រី នៃព្រះរាជាណាចក្រកម្ពុជា បានផ្តល់នូវផ្លូវ៣៨ខ្សែ និង ការកែលម្អរស្តារស្ទឹង ធ្វើឲ្យក្រុងប្រវត្តិសាស្ត្រមួយ នេះ ឲ្យកាន់តែមានសោភណ្ឌភាព ស្រស់ស្អាត ដែលលម្អរទៅដោយភ្លើងបំភ្លឺពេលរាត្រីទៀតផង ហើយ កត្តាទាំងនេះក៏ជាការ ស្តារឡើងវិញនូវវិស័យទេសចរណ៍ ក្រោយពីមានភាពធូរស្រាលនៃជម្ងឺកូវីដ១៩ ហើយមានតែ គណបក្សប្រជាជនកម្ពុជា គឺយើងមានអ្វីៗគ្រប់យ៉ាងនៅថ្ងៃនេះ។ ជាពិសេសគណបក្សប្រជាជន បាននាំមកវ៉ាក់សាំងប្រឆាំងការពារជម្ងឺកូវិដ១៩ មកចាក់ជូនបងប្អូនប្រជាពលរដ្ឋ ទូទាំងប្រទេស ដោយឥតគិតថ្លៃ បានធ្វើឲ្យបងប្អូនប្រជាពលរដ្ឋ រួចផុតជម្ងឺកូវីដ១៩។

លោក មានប្រសាសន៍យ៉ាងដូច្នេះក្នុងពិធី សំណេះសំណាល និងណែនាំឲ្យសមាជិក គណបក្ស នៅទូទាំងសង្កាត់សាលាកំរើក ក្រុង ខេត្តសៀមរាប នៅថ្ងៃទី០២ ខែមិថុនា នេះ។

លោក នូ ផល្លា ក៏បានអំពាវនាវ ដល់សមាជិក គណបក្សប្រជាជនកម្ពុជា និងបងប្អូនពលរដ្ឋ ដែលមានឈ្មោះ ក្នុងបញ្ជីបោះឆ្នោត មេត្តាអញ្ជើញទៅបោះឆ្នោត នៅថ្ងៃអាទិត្យ ទី៥ ខែមិថុនា ឆ្នាំ២០២២ ខាងមុខ នៅការិយាល័យ ដែលបងប្អូន បានចុះឈ្មោះ។ លោកក៏បានស្នើឲ្យ បោះឱ្យ គណបក្សប្រជាជនកម្ពុជា ដើម្បីឱ្យ គណបក្ស អាចបន្តបេសកកម្មការពារ និងអភិវឌ្ឍជាតិ ព្រមទាំងបម្រើប្រជាពលរដ្ឋ បានជាបន្តទៅទៀត។

សូមជម្រាបថា ក្នងឱកាសនោះដែរ ក្រុមការងារ ក៏បានពន្យល់សមាជិកបក្ស អំពីរបៀបគូសសន្លឹកឆ្នោតគាំទ្រគណបក្សប្រជាជន នៅសង្កាត់សាលាកំរើក ដែលមានលំដាប់លេខរៀងទី៥ នៅក្នុងសន្លឹកឆ្នោត និង សំណូមពរឲ្យ សមាជិកបក្សនិងក្រុមគ្រួសារ ត្រៀមឯកសារចូលរួមទៅបោះឆ្នោតជូនបេក្ខជនក្រុមប្រឹក្សាសង្កាត់គោកចក របស់គណបក្សប្រជាជនកម្ពុជា ឲ្យបានគ្រប់ៗគ្នា ដើម្បីគណបក្សប្រជាជនយើងបន្តការពារ សុខសន្តិភាព សុវត្តិភាពជូនប្រជាជន និង ការអភិវឌ្ឍន៍ប្រទេសជាតិឲ្យមានការរីកចម្រើន តទៅអនាគត៕SRP

ខេត្តបាត់ដំបង៖លោក សុខ លូ អភិបាលខេត្តបាត់ដំបង បានមានប្រសាសន៍ថា ពាក់ព័ន្ធទៅនឹងការអញ្ជើញទៅពិនិត្យ វត្តដូនទ្រី ដែលព្រះគ្រូចៅអធិការវត្តដូនទ្រីបានស្នើដល់រដ្ឋបាលខេត្ត ដើម្បីសុំធ្វើការកាត់ប្លង់ សម្រាប់ជាទ្រព្យសម្បត្តិរបស់វត្ត ក៏ប៉ុន្តែដោយសារវត្តនេះ ស្ថិតនៅក្នុងតំបន់២ ដែលមិនអាចកាត់ប្លង់បាន ហើយវត្តនេះជាប្រភេទវត្តបុរាណក កើតឡើងរាប់រយឆ្នាំមកហើយ ស្ថិតនៅក្នុងភូមិចាស់បុរាណ រដ្ឋបាលខេត្ត បានរៀបចំឯកសារជូនរាជរដ្ឋាភិបាលកម្ពុជា ដើម្បីរៀបចំកាត់ប្លង់ជូនវត្ត និងប្រជាពលរដ្ឋដែលរស់នៅភូមិចាស់បុរាណ ដែលស្ថិតនៅតំបន់២នេះ មកជាតំបន់១វិញ។

លោកបានលើកឡើងថា ការអភិរក្ស ត្រូវពាក់ព័ន្ធទៅនឹងការអភិវឌ្ឍ ដោយមុននឹងធ្វើការអភិវឌ្ឍសំណង់បុរាណ អ្វីមួយត្រូវមានការសិក្សា ឱ្យល្អិតល្អន់ជាមុនសិន នូវបច្ចេកទេសក្នុងការសាងសង់ ឬជួសជុល ដែលមិនធ្វើឱ្យមានផលប៉ះពាល់សំណង់បុរាណ ដើម្បីចៀសវាង ការទុកសំណង់បុរាណ ចោល មិនហ៊ានអភិវឌ្ឍន៍ ខ្លាចប៉ះពាល់ ធ្វើឱ្យសំណង់បុរាណ មួយចំនួនរងការខូចខាត ដោយសារគ្មានការថែរក្សាត្រឹមត្រូវ។

លោក សុខ លូ ក៏ធ្វើការអំពាវនាវដល់ព្រះសង្ឃ តាជី យាយជី ជួយក្នុងការបញ្ជៀបស្មារតីប្រជាពលរដ្ឋ ឱ្យចូលរួមគោរពច្បាប់ចរាចរណ៍ ណែនាំដល់ប្រជាពលរដ្ឋ កុំឱ្យបើកបរក្នុងស្ថានភាពស្រវឹង បើងងុយត្រូវសំរាកសិន រួចចាំបន្តដំណើរទៅមុខទៀត ព្រោះអត្រាគ្រោះថ្នាក់ចរាចរណ៍ នៅតែបន្តគំរាមកំហែង ដល់ ប្រជាពលរដ្ឋ អត្រាការស្លាប់ ជនពិការ ដោយសារគ្រោះថ្នាក់ចរាចរណ៍នៅតែជាហានិភ័យដែលប្រជាពលរដ្ឋ ត្រូវតែចូលរួមទាំងអស់គ្នា ទើបអត្រាគ្រោះថ្នាក់ចរាចរណ៍មានការថយចុះ។

លោកក៏បានស្នើសូមឲ្យចូលរួមលុបបំបាត់ការប្រើប្រាស់ និងជួញដូរគ្រឿងញៀន ខុសច្បាប់ ដែលសង្គមស្អប់ខ្ពើម គ្រឿងញៀន នឹងធ្វើឱ្យអ្នកប្រើប្រាស់បាត់បង់ស្មារតី លែងស្គាល់អ្វីល្អ អ្វីអាក្រក់បង្កភាពអសន្ដិសុខដល់ប្រជាពលរដ្ឋផងដែរ។

លោក សុខ លូ មានប្រសាសន៍ថាយ៉ាងដូច្នេះ ក្នុងពិធីបិទការផ្សព្វផ្សាយខ្លឹមសារ អនុសំវច្ឆរមហាសន្និបាតមន្រ្ដីសង្ឃទូទាំងប្រទេសលើកទី២៩ នៅរសៀលថ្ងៃពុធ ម្សិលមិញ នៅសាលប្រជុំអគារE សាលាខេត្តបាត់ដំបង៕SRP

ខេត្តត្បូងឃ្នុំ៖លោក​ហ៊ុន ម៉ាណែត សមាជិក គណៈអចិន្រ្តៃយ៍ នៃគណៈកម្មាធិការកណ្តាល គណបក្សប្រជាជនកម្ពុជា និងជាប្រធានយុវជនថ្នាក់កណ្តាល បានថ្លែងថា៖ សេចក្តីសុខរបស់ប្រជាពលរដ្ឋ គឺជាសេចក្តីសុខរបស់គណបក្សប្រជាជនកម្ពុជា។
ក្នុងន័យនេះ មន្ត្រីបក្ស និងអ្នកគាំទ្រ គណបក្សប្រជាជនកម្ពុជា តែងបានខិតខំប្រែងបម្រើប្រជាពលរដ្ឋ ទូទៅដោយស្មោះត្រង់ និងដោយគ្មានការរើសអើងបែងចែក ព្រមទាំងបានបើកទូលាយឱ្យមានការចូលរួមពីអង្គការ-សមាគមគ្រប់មជ្ឈដ្ឋាន គ្រប់និន្នាការ ក្នុងនាមជាកម្លាំងសរុបរបស់ជាតិ សំដៅធ្វើយ៉ាងឱ្យប្រជាពលរដ្ឋ បានរស់នៅដោយសុខសាន្ត និងមានជីវភាពសម្បូរសប្បាយរុងរឿង។

លោក ហ៊ុន ម៉ាណែត បន្តថា៖ សមាសភាព ជា សមាជិកបក្ស ជាអ្នកគាំទ្រ ឬជា ប្រជាលពលរដ្ឋទូទៅ មិនមានអ្វីសំខាន់ឡើយ ពីព្រោះអ្វីសំខាន់ គឺការគាំទ្រ និងចូលរួមក្នុងបុព្វហេតុដឹកនាំដ៏ត្រឹមត្រូវ គឺការបម្រើ និងតម្កល់ផលប្រយោជន៍ជាតិ និងប្រជាជនជាធំ ក្រោមធ្លុងមហាសាមគ្គីភាពជាតិ និងដំបូលនៃសុខសន្តិភាព។ ការចូលរួមរបស់ថ្នាក់ដឹកនាំ សមាជិក សមាជិកា នៃក្រុមការងារយុវជន និងសកម្មជនយុវជន យ៉ាងច្រើនកុះករជាង ២,០០០ នាក់ ដែលសុទ្ធសឹងជាក្បាលម៉ាស៊ីននៃយន្តការយុវជន របស់គណបក្សខេត្ត នាឱកាសនេះ គឺជាការបង្ហាញនូវកិត្យានុភាព ជំនឿជឿជាក់ និងកម្លាំងដ៏ស្វាហាប់របស់មហាគ្រួសាតគណបក្សប្រជាជនកម្ពុជា នៅក្នុងខេត្តត្បូងឃ្មុំ ស្របពេលដែលថ្ងៃនេះ គឺជាថ្ងៃទី១២ នៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដែលត្រូវបិទបញ្ចប់នៅថ្ងៃទី៣ ខែមិថុនា ខាងមុខនេះ។

លោក​ហ៊ុន​ ម៉ាណែត​ បាន​បន្ត​ទៀត​ថា​ លទ្ធផលនៃការបោះឆ្នោតនីមួយៗ គឺជាការបញ្ជាក់អំពីឥទ្ធិពលរបស់គណបក្ស និងការគោរពស្រឡាញ់ពិតប្រាកដ របស់ប្រជារាស្ត្រ មកលើគណបក្សនយោបាយ ដោយហេតុថា ការបោះឆ្នោតដាច់ខាតត្រូវធ្វើឡើងដោយសម្ងាត់ សេរី ត្រឹមត្រូវ និងយុត្តិធម៌ ដែលពិតជាការឆ្លុះបញ្ចាំងនូវឆន្ទៈ ពិតប្រាកដរបស់ប្រជាពលរដ្ឋ។ ដូច្នេះ ការបោះឆ្នោតគាំទ្រគណបក្សប្រជាជនកម្ពុជា បន្តដឹកនាំ គឺជាការផ្តល់រង្វាន់ និងការគាំទ្រលើកទឹកចិត្តដល់អ្នកដែលបានខិតខំធ្វើ និងលះបង់ជាក់ស្តែង ដើម្បីឱ្យថ្នាក់ដឹកនាំ និងមន្ត្រីបក្សគ្រប់ជាន់ថ្នាក់ មានកម្លាំងចិត្ត និងលទ្ធភាពបំពេញភារកិច្ចឱ្យកាន់តែប្រសើរឡើងថែមទៀត។ ឆ្លងតាមមូលដ្ឋានស្នាដៃ និងសមិទ្ធផលជាច្រើន ដែលបានកសាងក្នុងរយៈពេលជាង ៤០ ឆ្នាំ កន្លងមកនេះ គណបក្សប្រជាជនកម្ពុជា គឺជាគណបក្សតំណាងឱ្យអនាគត, ភាពត្រជាក់ជុំរួបរួមផ្សះផ្សារជាតិ និងការអភិវឌ្ឍរីកចម្រើន ដោយខុសផ្ទុយស្រឡះពីការធ្វើនយោបាយបែបប្រជាភិថុតិ ដែលនាំមកនូវសង្គ្រាមបែកបាក់, ការរើសអើង, ការបំផ្លិចបំផ្លាញ និងភាពអន់ថយ ដូចអ្វីដែលកម្ពុជាធ្លាប់បានឆ្លងកាត់រួចមកហើយក្នុងប្រវត្តិអតីតកាលដ៏ជូរចត់។

លោក​ ហ៊ុន ម៉ាណែត ថ្លែងបែបនេះ ក្នុងពិធីសំណេះសំណាល ជាមួយក្រុមការងារ យុវជនគណបក្ស​នៅទូទាំងខេត្តត្បូងឃ្មុំ នៅថ្ងៃពុធម្សិលមិញ។

លោក​ហ៊ុន ម៉ាណែត បានថ្លែងថា ប្រជាពលរដ្ឋខ្មែរ បានផ្តល់ទំនុកចិត្តទទួលយកការចាក់វ៉ាក់សាំងក្នុងក្របខ័ណ្ឌនៃយុទ្ធនាការជាតិ រហូតដល់ជាង ៩០% នៃចំនួនប្រជាជនសរុប ១៦ លាននាក់។ ដូច្នេះ យើងសង្ឃឹមថា នៅក្នុងការបោះឆ្នោតឃុំ-សង្កាត់សម្រាប់ឆ្នាំ២០២២នេះ ក៏ដូចជាការបោះឆ្នោតថ្នាក់ជាតិឆ្នាំ២០២៣ ខាងមុខ គណបក្សប្រជាជនកម្ពុជា ដែលបានដឹកនាំប្រទេស និងជួយសង្គ្រោះអាយុជីវិតប្រជាជន ឆ្លងផុតពីគ្រោះភ័យវិបត្តិនៃជំងឺកូវីដ-១៩ ដ៏កាចសាហាវ ក៏នឹងបន្តទទួលបាននូវការគាំទ្រ និងការជឿជាក់ពីសំណាក់ ប្រជាពលរដ្ឋយ៉ាងច្រើនលើសពី ៩០% ដូចជោគជ័យនៃយុទ្ធនាការជាតិចាក់វ៉ាក់សាំងផងដែរ ដើម្បីផ្តល់ឱកាសឱ្យគណបក្សប្រជាជន បន្តទទួលរែកពន់អម្រែកភារកិច្ចបម្រើ ការពារជាតិ និងប្រជាជនឱ្យបានរស់នៅក្នុងសេចក្តីសុខ សុភមង្គល និងសុវត្ថិភាព ក្រោមម្លប់នៃសន្តិភាព លំនឹងស្ថិរភាពផ្នែកសង្គម សេដ្ឋកិច្ច និងនយោបាយ ព្រមទាំងឱកាសនៃការអភិវឌ្ឍរីកចម្រើន ជានិច្ចនិរន្តន៍៕SRP

ខេត្តព្រះវិហារ៖រថយន្ដដឹកឈើរបស់ឈ្មោះ ព្រុំ វុទ្ឋី ហៅធី ត្រូវបានសមត្ថកិច្ចបង្ក្រាប។

ការបង្ក្រាបធ្វើឡើងចំណុចភូមិកោះកំពង់លួង ឃុំរស្មី ស្រុករៀង ខេត្តព្រះវិហារ នៅវេលាម៉ោង១២និង៣២នាទី ថ្ងៃទី១ ខែមិថុនា។

លោកស៊ុំ សុវុត្ថា នាយផ្នែករវៀង បានអោយដឹងថារថយន្តដឹកឈើ របស់មេឈ្មួញឈ្មោះ ព្រុំ វុទ្ឋី ហៅ (ធី) កម្លាំងជំនាញបានយករថយន្តពាំងពីមុខទើប រថយន្តដឹកឈើនេះព្រមឈប់។

លោកស៊ុំ សុវុត្ថា បានបន្តថា ការចុះបង្ក្រាបរថយន្តដឹកឈើរបស់ឈ្មួញជើងខ្លាំងខាងលើ ប្រឈមនឹងហានិភយ័ណាស់ ប្រឈមដល់អាយុជីវិតទៀតផង ពេលខ្លះត្រូវរថយន្តដឹកឈើកៀរធ្លាក់ផ្លូវក៏មាន។

លោកបានសំណូមពរទៅដល់កងកម្លាំងប្រដាប់អាវុធសូមចូលរួមសហការ ជាមួយកម្លាំងជំនាញផង បើពឹកផ្អែកលើកម្លាំងជំនាញ មិនអាចបង្ក្រាបបទល្មើសមានប្រសិទ្ឋភាពឡើយ។

សូមបញ្ជាក់ថានៅថ្ងៃម្សិលមិញ លោក វុធ សាវី ព្រះរាជអាជ្ញារងនិងជាអ្នកនាំពាក្យអមសាលាដំបូងខេត្តព្រះវិហារបានអោយដឹងថា៖ មានក្រុមឈ្មួញទុច្ចរិតមួយចំនួន បានយកឈ្មោះរបស់លោក ទៅប្រព្រឹតរកសុីបទល្មើសខុសច្បាប់នឹងបានធ្វើអោយមហាជនមួយចំនួន មានការយល់ច្រលំមកលើរូបលោក។

លោកវុធ សាវី បានបញ្ជាក់យ៉ាងច្បាស់ថា៖ រូបលោកមិនដែលមានបងប្អូន ឬសាច់ញាតិ រកសុីបទល្មើសព្រៃឈើខុសច្បាប់ឡើយ។ លោកថា ត្រឹមអាហារ ហូបចុក១ថ្ងៃ ៣ពេលនឹងរបស់ប្រើប្រាស់មួយចំនួន លោកអាចមានសមត្ថភាព មិនបាច់ទៅរកសុីរបរខុសច្បាប់ឡើយ។ ជាមួយគ្នានោះផងដែរ លោក វុធ សាវី បានស្នើសុំ អោយលោកប្រធានមន្ទីរបរិស្ថានខេត្ត នឹងលោក នួន សុខុម នាយខណ្ឌរដ្ឋបាលព្រៃឈើ បង្ក្រាបបទល្មើសព្រៃឈើអោយប្រសិទ្ឋភាពផង។

ក្នុងនោះលោកក៏បានស្នើដល់អ្នក
សាព័ត៌មាន អោយជួយតាមដាន នឹងប្រម៉ាញ់រូបភាពរួចរាយការណ៍ជូនលោក ទោះពេលណា ឬម៉ោងណាក៏ដោយ លោកនឹងមានចំណាត់ការអោយមានប្រសិទ្ឋភាព។

សូមរំលឹកថាមេឈ្មួញឈ្មោះ ព្រុំ វុទ្ឋី ជាមេឈ្មួញជើងខ្លាំងប្រចាំខេត្តព្រះវិហារ ជាង១០ឆ្នាំមកហើយ មិនសូវមានសមត្ថកិច្ចណាហ៊ានបង្ក្រាបរថយន្តដឹកឈើរបស់គេនោះទេ៕SRP

ខេត្តសៀមរាប៖ក្មេងអាយុទើបឆ្នាំបានលង់ទឹកស្លាប់ ខណ:ម្ដាយជាប់រវល់។

ហេតុការណ៍បានកើតឡើងនៅវេលាម៉ោង១៧ ថ្ងៃទី៣១ ខែឧសភាឆ្នាំ២០២២ នៅភូមិតាប្រុក ឃុំលាងដៃ ស្រុកអង្គរធំ។

អាជ្ញាធរស្រុកអង្គរធំបានរាយការណ៍ថា៖ ជនរងគ្រោះឈ្មោះឈ្មោះ សៀម សុវណ្ណ ភេទ ប្រុស អាយុ២ឆ្នាំ រស់នៅភូមិតាប្រុក ឃុំលាងដៃ ស្រុកអង្គរធំ។

អាជ្ញាធរបន្តថា៖មូលហេតុ ជនរងគ្រោះ ចុះទឹកស្រះក្បែរផ្ទះបណ្តាលអោយលង់ទឹកស្លាប់តែម្ដងខណ:ពេលម្តាយកំពុងធ្វើកិច្ចការផ្ទះ៕SRP

ខេត្តសៀមរាប៖អង្គភាពសៀមរាបប៉ុស្ដិ៍ សូមធ្វើការកែតម្រូវអត្ថបទរបស់ខ្លួនដែលបានចេញផ្សាយលើគេហទំព័រសៀមរាបប៉ុស្ដិ៍
នៅថ្ងៃទី២៩ ខែឧសភា ឆ្នាំ២០២២ ដែលមានចំណង់ជើងថា « ទីបំផុតរថយន្តដឹកឈើរបស់ឈ្មួញដ៏ល្បីនៅខេត្តសៀមរាប លី ណាំឈួង ត្រូវបានបង្ក្រាបនៅទឹកដីស្រុកជាំក្សាន្ត ខេត្តព្រះវិហារ ដោយកម្លាំងកងរាជអាវុធហត្ថស្រុកជាំក្សាន្ត »។

ក្រោយពីបានចុះផ្សាយនូវអត្ថបទខាងលើរួចមក ក្រុមការងារ អង្គភាពសៀមរាបប៉ុស្ដិ៍ បានស្រាវជ្រាវបន្តដោយរកឃើញថា ការផ្សាយមានការយល់ច្រឡំដោយប្រភពមិនទាន់គ្រប់គ្រាន់ ករណីបង្ក្រាបបទល្មើសព្រៃឈើ នៅ ស្រុកកែវសីមា មិនមានការពាក់ព័ន្ធជាមួយ ឈ្មោះ លី ណាំឈួង នោះឡើយ។

សមត្ថកិច្ចខេត្តមណ្ឌលគិរី បានប្រាប់ សារព័ត៌មាន សៀមរាបប៉ុស្ដិ៍ នៅព្រឹក ថ្ងៃពុធនេះថា៖ នៅវេលាម៉ោង៨និង៣០នាទី ថ្ងៃ២៨ ខែឧសភា ឆ្នាំ២០២២ កំលាំងស្នាក់ការសន្តិសុខ៧៦១ ចំនួន០៣នាក់ រថយន្ត០២គ្រឿងអាវុធAk៤៧ ចំនួន២ដេីម ដឹកនាំដោយលោក សាក់ សុគុណ ប្រធានស្នាក់ការ៧៦១ បានឃាត់រថយន្ត១គ្រឿងម៉ាកហុីយ៉ាន់ដាយពណ៌ស ពាក់ស្លាកលេខភ្នំពេញ 3E6073 ដឹកឈេីខុសច្បាប់ប្រភេទលេខ១ (គគី) ចំនួន២៨០សន្លឹក មិនទាន់វាស់ ស្ថិតនៅចំណុចU T M0695134 1339751 ស្ថិតនៅភូមិឆ្នែង ឃុំស្រែខ្ទុម ស្រុកកែវសីមា ខេត្តមណ្ឌលគិរី។

បច្ចុប្បន្ន វត្ថុតាងខាងលេីបានប្រគល់ទៅអោយនាយសង្កាត់ចុងផ្លាស់ស្រែព្រះដើម្បីអនុវត្តបន្ត។

សូមជម្រាបថា ផេក « Post News- សៀមរាបប៉ុស្ដិ៍ » ជាផេកផ្លូវការ សម្រាប់ស៊ែព័ត៌មាន ចេញពីគេហទំព័រសៀមរាបប៉ុស្តិ៍ និងតំណាងឲ្យអង្គភាព គេហទំព័រសៀមរាបប៉ុស្តិ៍ និងមានការទទួលស្គាល់ពីមន្ទីរព័ត៌មានខេត្តសៀមរាប ផងដែរ។ ក្នុងនោះបានចុះបញ្ជីពាណិជ្ជកម្ម ពន្ធដារ ប៉ាតង់ ទៀតផង។

ដូច្នេះរាល់ការផ្សាយព័ត៌មាននៅលើគេហទំព័រនឹងនៅលើផេក សៀមរាបប៉ុស្តិ៍ គឺអនុវត្តតាមវិជ្ជាជីវៈនិងក្រមសីលធម៌ស្តីពីរបបសារព័ត៌មាន៕SRP

ខេត្តត្បូងឃ្មុំ​៖ក្នុង​ពិធី​ជួបសំណេះសំណាល ជាមួយថ្នាក់ដឹកនាំ មន្ត្រីនៃមន្ទីរព័ត៌មាន និងអ្នកអ្នកសារព័ត៌មាន ប្រចាំខេត្តត្បូងឃ្មុំ​ នៅថ្ងៃទី៣១ ខែឧសភា ឆ្នាំ២០២២នេះ​ លោក ជាម ច័ន្ទសោភ័ណ អភិបាលខេត្តត្បូងឃ្មុំ​ បាន​ស្នេីដល់អ្នកសារព័ត៌មាន ទាំង​វិស័យ​រដ្ឋ​ និង​ឯកជន​ ឲ្យបន្តផ្សព្វផ្សាយពាក្យ «អរគុណសន្តិភាព» នេះឲ្យបានទូលំទូលាយ ជ្រាបដល់ក្រអៅបេះដូងប្រជាពលរដ្ឋ គ្រប់រូប ជាពិសេសផ្សព្វផ្សាយ នូវកិច្ចខិតខំប្រឹងប្រែង ក្នុងការអភិវឌ្ឍ រីកចម្រើនគ្រប់វិស័យ គ្រប់ទិសទី គ្រប់តំបន់ គ្រប់មូលដ្ឋាន បង្ហាញនូវគោលនយោបាយ ដ៏ល្អយ៉ាងមានប្រសិទ្ធភាពរបស់រាជរដ្ឋាភិបាល ជូនពលរដ្ឋ ដើម្បីឲ្យពួកគាត់ មានការសម្រេចឲ្យបានត្រឹមត្រូវ បោះឆ្នោតជូនអ្នកដែលនៅកៀក គិតគូរសុខទុក្ខគ្រប់ពេល គ្រប់កាលៈទេសៈ នោះគឺគាំទ្រសម្តេចតេជោ ហ៊ុន សែន បោះឆ្នោតគាំទ្រគណបក្សប្រជាជនកម្ពុជា ចៀសវាង នូវក្រុមអគតិ មួយចំនួន ធ្វើប្រជាភិថុត បោកប្រាស់ បន្លំ កុហក ក្លែងព័ត៌មាន បង្កាច់បង្ខូច រាជរដ្ឋាភិបាល ស្របច្បាប់។

លោក ជាម ច័ន្ទសោភ័ណ បានលើកឡើងថា កម្ពុជាអស់រយៈកាលប្រមាណ៦០០ឆ្នាំកន្លងមក មិនមានសុខសន្តិភាពពេញលេញនៅទូទាំងប្រទេសនោះឡើយ ប៉ុន្តែរហូតមកដល់ពេលនេះ ក្រោមការដឹកនាំរបស់សម្តេចហ៊ុន សែន ចាប់តាំងពីឆ្នាំ១៩៩៨មក រយៈកាល២៤ឆ្នាំ កម្ពុជា គឺមានសុខសន្តិភាពពេញលេញ ទូទាំងប្រទេស មានការឯកភាពជាតិខ្មែរ តែមួយ មានព្រះមហាក្សត្រ តែ១ រាជរដ្ឋាភិបាល តែ១ មានរដ្ឋធម្មនុញ្ញ ជាច្បាប់គោលសម្រាប់ជាតិ មានការកសាងហេដ្ឋារចនាសម្ព័ន្ធ ការអភិវឌ្ឍលើគ្រប់វិស័យ និងកំពុងបន្តល្បឿន ដើម្បីសម្រេច នូវគោលដៅក្លាយជាប្រទេស អ្នកមាន នាឆ្នាំ២០៥០ខាងមុខផងដែរ។

លោកអភិបាលខេត្ត បានគូសបញ្ជាក់ថា យើងត្រូវចង់ចាំ ពាក្យគុណសន្តិភាព នៅក្នុងដួងចិត្តគ្រប់ៗគ្នា មានសន្តិភាពទើបមានការអភិវឌ្ឍ រីកចម្រើន មានស្ថិរភាពក្នុងប្រទេស ពលរដ្ឋរស់នៅដោយសុខសាន្ដត្រាណ ក្នុងនោះវិស័យ សារព័ត៌មាន ក៏មានភាពពេញលេញ អ្នកសារព័ត៌ មានមានសិទ្ធសេរីភាពពេញលេញ និងលទ្ធភាពគ្រប់គ្រាន់ ក្នុងការចុះយកព័ត៌មានដើម្បីផ្សព្វផ្សាយបានយ៉ាងទូលំទូលាយជូនទស្សនិកជន។

ថ្នាក់ដឹកនាំមន្ទីរ ព្រមទាំងមន្ត្រីមន្ទីរព័ត៌មានខេត្ត និងក្រុមអ្នកសារព័ត៌មាន ប្រចាំខេត្តត្បូងឃ្មុំ បានថ្លែងអំណរគុណយ៉ាងជ្រាលជ្រៅចំពោះ លោក ជាម ច័ន្ទសោភ័ណ អភិបាលខេត្ត ដែលតែងតែជួបសំណេះ សំណាល លើកទឹកចិត្ត ផ្តល់តម្លៃដល់អ្នកសារព័ត៌មាន ជាពិសេសយកចិត្តទុកដាក់និងផ្ដល់អនុសាសន៍ល្អៗ ព្រមទាំងចំណាយថវិកាផ្ទាល់ខ្លួន និងសម្ភារៈមួយចំនួនបម្រើឱ្យវិស័យព័ត៌មានផងដែរ៕SRP