ខេត្តកំពង់ចាម​៖ក្នុង​ឱកាស​ចូល​ឆ្នាំថ្មី ​ប្រពៃណីយជាតិខ្មែរ ​ថ្ងៃទី​២នេះ​ លោក អ៊ុន ចាន់ដា អភិបាលខេត្តកំពង់ចាម និងលោកជំទាវ និងលោក ខ្លូត ផន ប្រធានក្រុមប្រឹក្សាខេត្ត​ បានអញ្ជើញចូលរួមពិធីបង្សុកូល និងពិធីពូនភ្នំខ្សាច់ នៅវត្តជ័យគីរី (វត្តភ្នំ​ហាន់ជ័យ)​ ស្រុក​កំពង់សៀម​។

ពិធីនេះធ្វើឡើងនៅព្រឹកថ្ងៃទី​១៥​ ខែមេសា​ ឆ្នាំ​២០២៣​ ដោយ​មានការចូលរួមពីសំណាក់ សមាជិកក្រុមប្រឹក្សាខេត្ត អភិបាលរងខេត្ត និង​មន្ត្រី​ពាក់ព័ន្ធ​ រួមនឹង​រួមនឹង​អាជ្ញាធរ​មូលដ្ឋាន​ផងដែរ​។

គួរបញ្ជាក់ថា​ ទំនៀមទម្លាប់ប្រារព្ធពិធី ពូនភ្នំខ្សាច់នៅក្នុង ពិធីបុណ្យចូល ឆ្នាំប្រពៃណីខ្មែរ​ មានអត្ថន័យ៣យ៉ាង ដោយ​អត្ថន័យទី១-នោះសម្ដែងថា ពិធីពូនភ្នំខ្សាច់ប្រារព្ធឡើង ដើម្បីឧទ្ទិសដល់ព្រះមុនីចេតិយរបស់ ព្រះសម្មាសម្ពុទ្ធដែលតាំងនៅឯស្ថានតាវត្តិង្ស។ មានន័យថា ភ្នំខ្សាច់ដែលគរលើគ្មានោះ ប្រៀបបានដូចជា កូនភ្នំមួយ តំណាងឲ្យព្រះចេតិយដែលមានតម្កល់ព្រះសារីរិកធាតុ (ព្រះអដ្ឋិធាតុនៃព្រះសម្មាសម្ពុទ្ធ)។

ហេតុនេះ នៅពេលដែលអ្នកបានពូនភ្នំខ្សាច់ហើយនោះ គឺហាក់បីដូចជាអ្នកបានចូលរួមកសាងព្រះចេតិយថ្វាយ ព្រះសម្មាសម្ពុទ្ធ។ ជាលទ្ធផលអ្នកដែលបានពូនភ្នំខ្សាច់នោះ ទទួលបានអានិសង្ឃខ្ពស់បំផុត។ នេះបើតាមទ្រឹស្ដីព្រះពុទ្ធសាសនាបែបខ្មែរ។

អត្ថន័យទី២-មានន័យថា ការធ្វើពិធីពូនភ្នំខ្សាច់ គឺដើម្បីបានរំដោះកម្មពៀរវេរាដែលខ្លួន ធ្លាប់បានសាង ពីមុនមក។ មានន័យថា ប្រសិនបើអ្នកមានកម្មពៀរដោយហេតុធ្លាប់បានសម្លាប់សត្វ ឬបៀតបៀនអ្នកដទៃពីមុន ឬពីជាតិមុនមកនោះ ប្រសិនបើគេចង់មកចងកម្មពៀរ ឬយកជីវិតអ្នកវិញ តោងត្រូវតែរាប់ចំនួន គ្រាប់ខ្សាច់ ដែលអ្នកបានពូននោះឲ្យអស់សិន ទើបអាចមកយកជីវិតអ្នក ឬមកយកកម្មពៀរពីអ្នកបាន។ បើមិនអាចរាប់ចំនួស គ្រាប់ខ្សាច់នេះឲ្យអស់ទេនោះ មានន័យស្មើនិងអ្នកបានរំដោះកម្មរំដោះពៀរពីសត្វ នោះហើយ។ នេះបើតាមទ្រឹស្ដីព្រហ្មមញ្ញសាសនា។

អត្ថន័យទី៣-មានន័យខុសប្លែកពីទ្រឹស្ដីបែបសាសនាខាងលើនេះ តាមការសង្កេតជាក់ស្តែង នៅតាមវត្តអារាមមួយចំនួន ជាពិសេសនៅទីជនបទ មានការខ្វះខាតខ្សាច់ធ្វើសំណង់អ្វីមួយ គឺព្រះសង្ឃ ឬគណៈកម្មការវត្តអនុញ្ញាតឲ្យមានពិធីពូនភ្នំខ្សាច់នេះឡើង បន្ទាប់មកគេយកខ្សាច់នោះទៅប្រគេនព្រះ សង្ឃសម្រាប់ ដែលត្រូវការវត្ថុធាតុដើមដីខ្សាច់នោះ។

ជាសរុបមក ដូនតារបស់ខ្មែរ តែងតែធ្វើអ្វីមួយ ច្រើនមានអត្ថន័យច្រើនបែបច្រើនយ៉ាង ហើយអត្ថន័យនេះ សុទ្ធតែចុះសំរុងគ្នា។ ប៉ុន្តែការពិត អត្ថន័យទី១ និងទី២ ត្រូវជាងគេ ហើយបន្ទាប់ពីចប់ពិធីពូនភ្នំខ្សាច់រួច ជាជាងទុកចោលឥតប្រយោជន៍ ព្រះសង្ឃក៏អាចយកដីខ្សាច់នេះ ទៅសាងសង់អ្វីក៏បានដែរឲ្យតែនៅក្នុង បរិវេណវត្ត ឬក្រៅវត្ត តែបំរើផលប្រយោជន៍សាធារណៈ៕SRP

លោក អ៊ុន​ ចាន់ដា​ អភិបាលខេត្តកំពង់ចាម​ បានថ្លែងថា​ កត្តាដែលនាំ​ឱ្យ​យើង​អាច​ជួបជុំ​គ្នា​សប្បាយ​រីករាយ​ទៅបាន គឺអាស្រ័យទៅលើកត្តា ៣យ៉ាង​ គឺ​ ទី១– កត្តាសុ ខសន្តិភាព សណ្ដាប់ធ្នាប់សាធារណៈ ពីព្រោះថា មានសន្តិភាពទើបយើងមានឱកាសធ្វើបុណ្យជួបជុំគ្នាទៅបាន។ ទី២- កត្តាការ​ គ្រប់គ្រង​ជំងឺ​កូវីដ១៩​ ពីព្រោះថា ដោយសារយុទ្ធសាស្រ្តគន្លឹះរបស់សម្តេចតេជោ ហ៊ុន សែន ក្នុងការបញ្ជាទិញវ៉ាក់សាំងសម្រាប់ចាក់ការពារអាយុជីវិត ប្រជាពលរដ្ឋ ទើបយើងមានឱកាស ជួបជុំ​គ្នា​សប្បាយ​រីករាយ​នានៅពេលនេះ។ ទី៣-កត្តាអាជ្ញាធរ ពីព្រោះថា ដោយសារមានការយកចិត្តទុកដាក់ពី ថ្នាក់ដឹកនាំអាជ្ញាធរគ្រប់លំដាប់ថ្នាក់ ទើបយេីងមានឱកាសរួមគ្នា​ ទទួល​ទេវតា​ឆ្នាំ​ថ្មី​ ប្រពៃណី​ជាតិ​ខ្មែរ​។​

អភិបាលខេត្ត​ ក៏បាន​សំណូមពរ​ដល់​បងប្អូន​ប្រជាពលរដ្ឋ​ ជាពិសេស​យុវវ័យ​ គ្រប់​រូប​ សូម​ឱ្យ​មាន​ការ​យោគយល់​អធ្យាស្រ័យ​ គ្នា​ទៅវិញទៅមក​ ដេីម្បី​បង្ក​ភាព​សប្បាយរីករាយ​ ទាំងអស់​គ្នា​ និង​សូម​បេីកបរ​ដោយ​មាន​ការ​គោរព​ ច្បាប់​ចរាចរ​ ជាពិសេស​មុន​នឹង​ចាកចេញ​ពី​ផ្ទះ​ ត្រូវ​ពន្លត់​ភ្លើង​ចង្ក្រាន​ ភ្លើង​ធុបទាន​ និង​ចាក់សោ​ទ្វារ​ ឱ្យ​បាន​ត្រឹមត្រូវ​ផងដែរ​។

លោកថ្លែងយ៉ាងដូច្នេះក្នុងឱកាសអញ្ជើញចូលរួមទទួលទេវតាឆ្នាំថ្មី ឆ្នាំថោះ បញ្ចស័ក ព.ស.២៥៦៧ ព្រះនាម «ព្រះនាមកិមិរាទេវី» ជាបុត្រីទី៦នៃកបិលមហាព្រហ្ម​ ដែលបានប្រារព្ធធ្វើឡើងនៅសួនច្បារមុខសាលាខេត្ត​ នៅសៀលថ្ងៃទី១៤ ខែមេសា ឆ្នាំ២០២៣ ដោយ​មានការចូលរួមពីសំណាក់ សមាជិកក្រុមប្រឹក្សាខេត្ត អភិបាលរងខេត្ត នាយក នាយករដ្ឋបាល កងកម្លាំងទាំងបី អាជ្ញាធរក្រុង មន្ត្រីរាជការ យុវជន និងបងប្អូនប្រជាពលរដ្ឋយ៉ាងច្រើនកុះករ។

សូមជម្រាបថាបន្ទាប់ពីពិធីទទួលអំណរសាទរ ទេវតាឆ្នាំថ្មី អភិបាលខេត្ត និងលោកជំទាវ និងលោក ខ្លូត ផន ប្រធានក្រុមប្រឹក្សាខេត្ត និងសហការី បានចូលរួមលេងល្បែងប្រជាប្រិយ និងរលេងកំសាន្តយ៉ាងសប្បាយរីករាយ ប្រកបដោយសុខសុវត្ថិភាព និងភាពកក់ក្តៅបំផុតផងដែរ៕SRP

ក្នុងឱកាសបើកជាផ្លូវការព្រឹត្តិការណ៍អង្គរសង្ក្រាន្តឆ្នាំ២០២៣ នៅលើទឹកដីអង្គរ ខេត្តសៀមរាប នៅថ្ងៃទី១៤ ខែមេសា ឆ្នាំ២០២៣ នេះ សម្ដេចនាយករដ្ឋមន្រ្តី ហ៊ុន សែន បានមានប្រសាសន៍ថា ការរៀបចំឡើងវិញនៃអង្គរសង្ក្រាន្តក្នុងឆ្នាំ២០២៣នេះ បានបង្កើតនូវព្រឹត្តិការណ៍ នៃការជួបជុំរវាងមនុស្ស ជាមួយនឹងបេតិកភណ្ឌរូបី អរូបីជាមួយគ្នា។ ទម្រង់ជាច្រើនបានជួបជុំគ្នា បានប្រមូលផ្ដុំគ្នានៅក្នុងអង្គរសង្ក្រាន្តរយៈពេល ០៣ថ្ងៃនេះ ដែលនេះជាការបង្កើតនូវស្ថានភាពដ៏ល្អប្រសើរ ធ្វើឱ្យរស់ឡើងវិញនូវទីកន្លែងដែលធ្លាប់តែស្ងប់ស្ងាត់ និងក្លាយទៅជាកន្លែងដែលទាក់ទាញសម្រាប់ភ្ញៀវទេសចរណ៍ផងដែរ។

សម្ដេចតេហ៊ុន សែន បានគូសបញ្ជាក់ថា មានកត្តា ៦យ៉ាង ដែលនាំឱ្យកម្ពុជាអាចរៀបចំអង្គរសង្ក្រាន្តឆ្នាំនេះឡើងក្នុងនោះរួមមាន៖

កត្តាទី១ ៖ កត្តាសន្តិភាព ដែលគ្របដណ្ដប់ប្រទេសរបស់យើង បានផ្ដល់ឱកាសសប្បាយរីករាយសម្រាប់ប្រជាពលរដ្ឋ អាចធ្វើអ្វីទៅតាមបំណងរបស់ខ្លួន ដោយស្របតាមច្បាប់។

កត្តាទី២៖ ភាពជោគជ័យលើកូវីដ-១៩ ដែលពុំមានការឆ្លងធ្ងន់ធ្ងរ។ ទោះជាយ៉ាងនេះក្ដី សម្ដេចក៏នៅតែអំពាវនាវឱ្យប្រជាពលរដ្ឋ និងក្រុមគក្រូពេទ្យបន្តយកចិត្តទុកដាក់លើបញ្ហាអនាម័យ និងការការពារខ្លួន។

កត្តាទី៣៖ ហេដ្ឋារចនាសម្ព័ន្ធតភ្ជាប់ ដែលធ្វើឱ្យប្រជាពលរដ្ឋអាចធ្វើដំណើរពីកន្លែងមួយទៅកន្លែងមួយ តាមរយៈសមិទ្ធផលផ្លូវថ្នល់ជាច្រើនខ្សែ។

កត្តាទី៤៖ មធ្យោបាយធ្វើដំណើរ ទាំងផ្ទាល់ខ្លួន និងសេវាឈ្នួល រួមទាំងការសេវាដឹកជញ្ជូនដែលរដ្ឋបានផ្ដល់ជូនផងដែរ។

កត្តាទី៥៖ ជីវភាពល្អប្រើសើរនៃប្រជាពលរដ្ឋ ដែលអាចមានលទ្ធភាពធ្វើដំណើរកម្សាន្តបានក្នុងឱកាសបុណ្យចូលឆ្នាំ។

ដោយឡែកកត្តាសំខាន់មួយទៀត ជាកត្តាទី៦ គឺតាមរយៈសកម្មភាព និងទិសដៅរបស់សហភាពសហព័ន្ធយុវជនកម្ពុជា ដែលបានចូលរួមយ៉ាងសំខាន់តាមរយៈការខិតខំប្រឹងប្រែង និងការចូលរួមរបស់យុវជនប្រមាណជា ៥០០០នាក់ក្នុងការធ្វើសកម្មភាពនៅទីនេះ។ ជាមួយគ្នានេះ សម្ដេចក៏បានថ្លែងកោតសរសើរ និងវាយតម្លៃខ្ពស់ចំពោះឆន្ទៈរបស់ស.ស.យ.ក. ក្នុងការលះបង់កន្លងមកផងដែរ។

គួរបញ្ជាក់ថា ព្រឹត្តិការណ៍អង្គរសង្ក្រាន្ត ត្រូវបានអាក់ខានតាំងពីឆ្នាំ២០១៩ មកដោយសារការរីករាលឆ្លងនៃវិបត្តិកូវិដ-១៩។ ការប្រារព្ធឡើងវិញនៃឱកាសនេះ ស្របពេលខួប១០ឆ្នាំនៃព្រឹត្តិការណ៍អង្គរសង្ក្រាន្ត។ ជាមួយគ្នានេះ ការត្រឡប់មកវិញនៃព្រឹត្តិការណ៍ថ្នាក់ជាតិដ៏ធំនេះ បានឆ្លុះបញ្ចាំងពីភាពជោគជ័យដ៏ត្រចេះត្រចង់របស់រាជរដ្ឋាភិបាលកម្ពុជាក្រោមការដឹកនាំរបស់សម្ដេច ដែលបាននាំកម្ពុជាត្រឡប់មកប្រក្រតីភាព និងផ្ដល់ឱកាសឱ្យប្រទេសជាតិដំណើរឡើងវិញលើគ្រប់វិស័យ ជាពិសេសគឺការនាំមកនូវស្នាមញញឹម ភាពក្អាកក្អាយរបស់ប្រជាពលរដ្ឋខ្មែរ ព្រមទាំងបរិយាកាសដ៏រីករាយក្នុងការសាទរពិធីបុណ្យចូលឆ្នាំប្រពៃណីជាតិយើងនាឱកាសនេះ៕SRP

ខេត្តកំពង់ចាម​៖អភិបាលខេត្តំពង់ចាម​ លោក​ អ៊ុន​ ចាន់ដា​ បាន​ក្រេីនរំលឹក​ដល់​​មន្ត្រី​ពាក់ព័ន្ធ​ទាំង​អស់​ ត្រូវ​រួម​សាមគ្គី​ភាព​ភាព​ ឯកភាព​គ្នា​ ឱ្យ​កាន់​តែ​ខ្លាំងក្លា​បន្ថែម​ទៀត​ ព្រោះ​កត្តា​សាមគ្គីភាព​ផ្ទៃក្នុង​ ពិត​ជា​នាំមក​នូវ​ការ​រីកចម្រើន។

លោកថ្លែង​បែប​នេះ​ក្នុង​ឱកាសជួបសំណេះសំណាលជាមួយមន្រ្តីរាជការសាលាខេត្ត កងកម្លាំង​ប្រដាប់​អាវុធ​ មន្ត្រី​កិច្ចសន្យា​ និង​និវត្តជន​ នាឱកាស​ចូលឆ្នាំ​ថ្មី​ ប្រពៃណី​ជាតិ​ខ្មែរ​ ឆ្នាំថោះចត្វាស័ក ព.ស ២៥៦៦​ ចំនួន​៣៨៩នាក់ នៅសាលាខេត្តកំពង់ចាម នៅថ្ងៃទី​៣​ ខែមេសា​ ២០២៣​ ក្រោម​វត្តមាន​ លោក​ ខ្លួន​ ខ្លូត​ ប្រធាន​ក្រុមប្រឹក្សា​ខេត្ត​។​

​អភិបាលខេត្តកំពង់ចាម​ បាន​ថ្លែង​ថា​ យើង​ត្រូវ​ពង្រឹង​គុណភាព​ សមត្ថភាព​ស្ថាប័ន​រដ្ឋបាល​ខេត្ត​ ក៏ដូចជា​រដ្ឋបាល​ក្រុង-ស្រុក​ ដេីម្បី​បម្រើ​សេវា​ជូន​ប្រជាពលរដ្ឋ​ ឱ្យ​កាន់​តែ​ល្អ​ប្រសើរ​ឡើង​បន្ថែម​ទៀត​ ពោលគឺ​ត្រូវ​ធ្វើ​ឱ្យ​លឿន​ ធ្វើ​ឱ្យ​រហ័ស​ កន្លែង​ណា​មិន​ច្បាស់​ គឺ​ត្រូវ​សួរ​ថ្នាក់ដឹកនាំ​យេីង​ ធ្វេី​យ៉ាងណា​ឱ្យ​ប្រជាពលរដ្ឋ​ មាន​ជំនឿ​ជឿជាក់​លើ​ការ​ដឹកនាំ​របស់​រាជរដ្ឋាភិបាល​ ក្រោម​ការ​ដឹក​នាំ​ប្រកបដោយគតិបណ្ឌិត របស់សម្តេចតេជោ​ ហ៊ុន សែន នាយក​រដ្ឋមន្ត្រី​នៃ​កម្ពុជា​។

អភិបាលខេត្ត​ ក៏បានកោតសរសើរ និងវាយតម្លៃខ្ពស់រាល់ការខិតខំប្រឹងប្រែង របស់មន្រី្ដរាជការសាលាខេត្តទាំងអស់ ដែលបានខិតខំបំពេញការងារ ទទួលបានលទ្ធផលល្អ និងបន្តជំរុញលើកកម្ពស់ប្រសិទ្ធភាព ការងារបន្ថែមទៀត ពិសេលការផ្តល់សេវាសារធារណៈ ដែលមានក្នុងកម្មវិធីនយោបាយរបស់រាជរដ្ឋាភិបាលក្នុងនីតិកាលទី៦នេះ។

លោកអ៊ុន​ ចាន់ដា​ បាន​បញ្ជាក់​ថា នេះជាការជួបជុំគ្នា តាមគំរូថ្នាក់ដឹកនាំមុនៗ ជាពិសេសគឺ សម្តេចឧត្តមទេពញាណ ហ៊ុន ណេង អតីត អភិបាលខេត្តកំពង់ចាម តែងតែធ្វើឡើង​ សម្រាប់ឱកាស​ចូលឆ្នាំ​ថ្មី​ ប្រពៃណី​ជាតិ​ខ្មែរ​ ជាធម្មតាក្នុងឱកាសបុណ្យប្រពៃណីរបស់ជាតិយើង មានបុណ្យធំៗ ដល់ទៅ២ គឺរដូវបុណ្យភ្ជុំបិណ្ឌ និងបុណ្យចូលឆ្នាំថ្មី ដែលជាទំនៀមទម្លាប់ប្រពៃណីជាតិម្តងៗ រដ្ឋបាលសាលាខេត្តយើងតែងតែបានធ្វើពិធីជួបសំណេះសំណាល ជាមួយបងប្អូនជាមន្ត្រីចូលនិវត្តន៍ ដែលជារាមច្បង និងបងប្អូនមន្ត្រីរាជការ កម្មករ រដ្ឋបាលសាលាខេត្តកំពង់ចាម ទាំងអស់ ព្រមទាំងឧបត្ថម្ភនូវថវិកា មួយចំនួន ដើម្បី​ឱ្យ​បងប្អូនយកទៅប្រើប្រាស់ទៅតាមតម្រូវការ៕SRP

អភិបាលខេត្តព្រះសីហនុ លោក គួច ចំរើន អភិបាលខេត្តកំពង់ចាម លោក អ៊ុន ចាន់ដា អភិបាលខេត្តបន្ទាយមានជ័យ លោក អ៊ុំ រាត្រី ត្រូវបាន ព្រះមហាក្សត្រ ត្រាស់បង្គាប់តែងតាំង ក្នុងអាណត្តិទី២ របស់ខ្លួន។

នេះបើយោងតាមព្រះរាជក្រឹត្យ នស/រកត /០៤២៣/៦៥១ ចុះថ្ងៃទី១១ មេសា ២០២៣ របស់ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា៕SRP

ខេត្ដព្រះវិហារ៖លោកផ្កាយពីរ ស៊ិន ប៊ុនធឿន មេបញ្ជាការរងកងពលធំអន្តរាគមន៍លេខ៣ កំពុងរោងការរិះគន់ថា បានកាប់បំផ្លាញព្រៃឈើជិត២០០ហិកតា ដោយដួលរលំរនូករនេលពាសពេញដី ក្នុងភូមិកំពេញ ស្រុកជាំក្សាន្ដ ខេត្ដព្រះវិហារ។

សេចក្ដីរាយការណ៍ពីខេត្តព្រះវិហារបានឲ្យដឹងថា
រហូតហូតមកដល់ ថ្ងៃទី១១ ខែមេសា ឆ្នាំ២០២៣ ដើមឈើនៅលើផ្ទៃដីចំនួន ២០០ហិកតា បានដួលជិតអស់ហើយ មិនទាន់ឃើញអាជ្ញាធរ និងសមត្ថកិច្ចជំនាញខេត្ដព្រះវិហារ ធ្វើការទប់ស្កាត់នៅឡើយ។

ករណីបែបនេះ អាជ្ញាធរ និងក្រសួងពាក់ព័ន្ធ គួរណាតែចុះធ្វើអធិការកិច្ច នៅទីតាំងខាងលើដើម្បីធានា បានការការពារធនធានធម្មជាតិ ដែលជាទ្រព្យសម្បត្តិរបស់រដ្ឋ មិនគួរបណ្ដែតបណ្ដោយ អោយអ្នកមានអំណាចប្រើទឹកប្រាក់ បំផ្លិចបំផ្លាញព្រៃបែបនេះទេ។

ជុំវិញករណីនេះ លោកឧត្ដមសេនីយ៍ទោ ស៊ិន ប៊ុនធឿន មេបញ្ជាការរងកងពលធំលេខ៣ បានប្រាប់អ្នកសារព័ត៌មាន ថា ដីដែលកំពុងកាប់រានព្រៃឈើនៅភូមិកំពេញ ស្រុកជាំក្សាន្ដ ខេត្ដព្រះវិហារ មានចំនួន ២០០ហិកតា ជាដីរបស់លោក ដែលប្រមូលទិញ ពី ប្រជាពលរដ្ឋ ដែលជាដីស្របច្បាប់ និងមានលិខិតកាន់កាប់ត្រឹមត្រូវ៕SRP

ខេត្តកំពង់ចា៖អភិបាលខេត្តំពង់ចាម​ លោក អ៊ុន​ ចាន់ដា​ បាន​ព្រមាន​ថា​ នឹង​មិន​លេីកលែង​ជា​ដាច់ខាត​ ចំពោះ​ជន​ទាំងឡាយ​ណា​ ដែលបានប្រព្រឹត្តិនូវ​អំពើ​ពុក​រលួយ​ តាម​រយៈ​ការ​ផ្តល់​ប័ណ្ណ​ ប​ ស​ ស​ ជូន​ប្រជាពលរដ្ឋ​ ដោយ​មាន​ចិត្ត​លម្អៀង​ ទុច្ចរិត​និយម​បក្សពួក​។

លោកព្រមានបែប​នេះ​ក្នុង​កិច្ចប្រជុំសាមញ្ញលើកទី៤៧​ អាណត្តិទី៣ របស់ក្រុមប្រឹក្សាខេត្តកំពង់ចាម​ នៅថ្ងៃអង្គារនេះ។

សូមជម្រាបថា បន្ទាប់​ពី​មាន​លេីក​ឡើង​ពាក់ព័ន្ធ​ ទៅ​នឹង​ការ​ផ្តល់​ប័ណ្ណ​ ប​ ស​ ស​ មិន​ប្រក្រតី​ លោក អ៊ុន​ ចាន់ដា​ អភិបាលខេត្តកំពង់ចាម​ បាន​ស្នើ​ដល់​សមាជិក​ក្រុមប្រឹក្សា​ខេត្ត​ ក៏ដូចជា​មន្រ្តី​ពាក់ព័ន្ធ​ ឱ្យ​ជួយ​វែកមុខ​ជន​ទាំងឡាយ​ណា​ ដែល​បាន​ប្រព្រឹត្តិ​អំពើ​ពុក​រលួយ​ តាម​រយៈ​ការ​ផ្ដល់​ ប័ណ្ណ​​របបសន្តិសុខសង្គម​ ដើម្បី​យក​មក​ផ្តន្ទា​ទោស​ តាម​ផ្លូវ​ច្បាប់​ ព្រោះ​រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចហ៊ុន សែន ពិតជាបានយកចិត្តទុកដាក់លើកកម្ពស់ សុខុមាលភាព​ប្រជាពលរដ្ឋ​ ដែល​រស់​នៅ​ក្បែរបន្ទាត់ក្រីក្រ​ ហើយ​បានដាក់ចេញនូវវិធានការណ៍ អន្តរាគមន៍ គាំពារសង្គម តាមរយៈកម្មវិធីជំនួយសង្គមចំនួន ២បន្ថែមទៀត​គឺ​ ការឧបត្ថម្ភសាច់ប្រាក់ជូនគ្រួសារ ងាយរងហានិភ័យក្នុងអំឡុងពេលមានសម្ពាធអតិផរណា និងការឧបត្ថម្ភសាច់ប្រាក់ជូនគ្រួសារ ងាយរងហានិភ័យ​ ដែលរងផលប៉ះពាល់ធ្ងន់ដោយទឹកជំនន់​ នាពេលកន្លងមក​ផងដែរ។

ក្នុងកិច្ចប្រជុំនេះដែរ លោក ខ្លូត​ ផន ប្រធានក្រុមប្រឹក្សាខេត្តកំពង់ចាម បានលើកយកសេចក្កី ព្រាងរបៀបវារៈសំខាន់ៗ មកពិភាក្សា រួមមាន៖
១-ពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី៤៧ អាណត្តិទី៣ របស់ក្រុមប្រឹក្សាខេត្តកំពង់ចាម។
២-ពិនិត្យ ពិភាក្សា និងអនុម័តសេចក្តីព្រាងរបាយការណ៍បូកសរុបលទ្ធផលការងារប្រចាំត្រីមាស ទី១ និងទិសដៅការងារប្រចាំត្រីមាសទី២ ឆ្នាំ២០២៣ របស់រដ្ឋបាលខេត្តកំពង់ចាម។
៣-ពិនិត្យ ពិភាក្សា និងអនុម័តសេចក្ដីព្រាងផែនការសកម្មភាពការងាររយៈពេលបីខែ (មេសា ឧសភា មិថុនា) ឆ្នាំ២០២៣ របស់រដ្ឋបាលខេត្តកំពង់ចាម។
៤-ពិនិត្យ ពិភាក្សា និងអនុម័តសេចក្តីព្រាងលើការស្នើសុំផែនការក្របខ័ណ្ឌប្រចាំឆ្នាំ២០២៤។
៥-ពិនិត្យ និងអនុម័តសេចក្តីព្រាងផែនការក្របខ័ណ្ឌរបស់មន្ទីរសុខាភិបាល នៃរដ្ឋបាលខេត្តកំពង់ចាម​ ឆ្នាំ២០២៤​៕SRP

ខេត្តសៀមរាប៖មានការលើកឡើងថាក្រុមឈ្មួញដែលបានសិទ្ធិទៅកាយយកដី នៅតំបន់អភិរក្សត្រីពូជ បឹងពារាំង យកទៅលក់យកលុយចែកគ្នាជាមួយអ្នកពាក់ព័ន្ធ ហាក់មិនគោរពអនុវត្តតាមការណែនាំរបស់លិខិតរដ្ឋបាលខេត្តសៀមរាប។

ប្រភពច្បាស់ការបានអោយដឹងថា ជា
ច្រើនខែមកហើយ ស្ទើតែគ្រប់រដូវកាល គេបានឃើញឈ្មួញពីរក្រុម នៅតែបន្តដណ្តើមគ្នា ជីកកាយដី បឹងធម្មជាតិ តំបន់អភិរក្សពូជត្រី បឹងពារាំង ដឹកលក់ក្នុង១ថ្ងៃៗ រាប់រយឡាន ក្រោមរូបភាពស្តារ។

បើទោះបីជាក្រុមឈ្មួញ សម្រុកជីកកាយដឹកយកដីលក់រាប់ខែឆ្នាំ ហើយត្រឹមតែប្រើពាក្យ (ស្តារបឹង) បែបនេះ គេហាក់មិនទាន់ឃើញមន្ត្រីជំនាញរូបណា បញ្ជាក់ពីការដឹកដីពីបឹងពារាំងយកទៅលក់យកលុយទៅណានៅឡើយទេ។

ប្រភពបានបង្ហើបថា ប្រការដែលឈ្មួញ អាចកាយយកអាចម៍ដី ពីតំបន់ធម្មជាតិ បឹងពារាំង បានដោយលូនបែបនេះ គេមានការសង្ស័យថា ក្រុមឈ្មួញជាមួយអាជ្ញាធរជំនាញពាក់ព័ន្ធ មានការឃុបឃិតគ្នា ក្នុងការចែកផលប្រយោជន៍ ទៅវិញទៅមក។

យោងតាមលិខិតរបស់សាលាខេត្តសៀមរាប ដែលចុះហត្ថលេខា ដោយ លោក ទៀ សីហា អភិបាលខេត្តសៀមរាប បង្ហាញថា អនុញ្ញាតអោយជីកស្តារលើផ្ទៃ ដី ១០ហិកតា។ អាចម៍ដីដែលបានពីការជីកស្តារ មួយផ្នែកសម្រាប់ដោះស្រាយការជីកស្តារ ឯមួយផ្នែកទៀតសម្រាប់អភិវឌ្ឍន៍តាមត្រូវការក្នុងមូលដ្ឋាន។ ករណីមិនអនុវត្តតាម នឹងត្រូវបញ្ឈប់សកម្មភាពជាបន្ទាន់។ ប៉ុន្តែផ្ទុយទៅវិញ សកម្មភាពឈ្មួញក្នុងពេលបច្ចុប្បន្ន គេមិនបានឃើញអនុវត្តទៅតាមលិខិតរបស់សាលាខេត្តនោះទេ។

ដោយក្រុមឈ្មួញប្រឹងជីកយ៉ាងល្ហល្ហេវ និងដឹកដីយកទៅលក់យ៉ាងគគ្រឹកគគ្រែង បង្កភាពហុយប៉ះពាល់ការរស់នៅដល់ពលរដ្ឋរៀងរាល់ថ្ងៃនិងថែមទាំងបំផ្លាញផ្លូវលំមួយចំនួនយ៉ាងធ្ងន់ធ្ងរថែមទៀត។

ករណីខាងលើនេះ អាជ្ញាធរនិងជំនាញពាក់ព័ន្ធ មិនគួរបណ្ដែតបណ្ដោយ ឲ្យមានអំពើកាយដី បឹងធម្មជាតិយ៉ាងគគ្រឹកគគ្រេង ហើយមិនអនុវត្តតាមលិខិតរបស់សាលាខេត្តបែបនេះទេ។

លោក អ៉ឹង សោភ័ណ្ឌ នាយកទីចាត់ការអន្តរវិស័យរដ្ឋបាលខេត្តសៀមរាប បានថ្លែងប្រាប់សៀមរាប ប៉ុស្ដិ៍ ថា ពាក់ព័ន្ធនឹងគម្រោងស្តារ និងអភិរក្សនេះ មានការឯកភាពពីក្រសួងរួចហើយ។អ្នក ធ្វើពិបាក អ្នកថាស្រួលណាស់…. បន្ទាប់ពីស្តារមួយរយ:ពេល ជីវះចម្រះនឹងកើតឡើងវិញ។ ចំណែកលោក ឡេង លាភ ប្រធានមន្ទីរ៉ែនិងថាមពលខេត្តសៀមរាប បានបញ្ជាក់ថា ការជីកស្តារនេះ មានការអនុញ្ញាតគ្រប់ស្ថាប័ន។ អាចសាក សួរទៅរដ្ឋបាលខេត្ត ដើម្បីច្បាស់ ព្រោះនេះជាគម្រោងរបស់ខេត្ត ។

បើតាម លោកលី វណ្ណៈ នាយករដ្ឋបាលសាលាខេត្តសៀម រាប បានថ្លែងប្រាប់ សៀមរាប ប៉ុស្ដិ៍ ថា ជាការស្នើសុំរបស់មន្រ្តីជំនាញ និងមានការឯកភាពពីក្រសួងរួចហើយ ។

ទោះជាបែបនេះ គេនៅមិនទាន់ដឹងថា តើចំណូលដែលបានពីការលក់អាចម៍ដី ដែលដឹកចេញពីបឹងពារាំយ៉ាងគគ្រឹកគគ្រែង ក្នុង១ថ្ងៃៗរាប់សិបឡាននេះ ចូលដល់រដ្ឋ ដែរឬយ៉ាងណានោះទេ។

មន្ត្រីនៃសហគមន៍ក្នុងសង្កាត់ជ្រាវ និងសង្កាត់ចុង ឃ្នៀស មួយចំនួនបានបង្ហើបថា ចាប់តាំងពីមានការជីកស្តារដឹកដីចេញពីបឹងពារាំង មិនមានភ្ញៀវចូលទៅទស្សនាទេសភាពព្រៃលិចទឹក ក៏ដូចជាហ្វូងសត្វស្លាប ក្នុងបឹងធម្មជាតិនេះទេ ខណ:ឆ្នាំកន្លងទៅមុនពេលជីកស្តារមានភ្ញៀវទៅទស្សនាស្ទើតែរកកាណូតដឹកជូនមិនបាន។

ពួកគេក៏បានស្នើសុំអោយជំនាញពាក់ព័ន្ធ មេត្តាបើកការស៊ើបអង្កេត និងចុះទៅទប់ស្កាត់ជាបន្ទាន់ បើពុំដូច្នោះទេ ផ្លូវលំ និងដីបឹងធម្មជាតិ បឹងពារាំង ពិសេសដីល្បាប់ផ្នែកខាងលើ ដែលមានជីវ:ចម្រុះសម្រាប់ត្រីពងនិងកូន ត្រូវបំភ្លេចបំផ្លាញយ៉ាងធ្ងន់ធ្ងរ ក្រោមថ្វីដៃឈ្មួញពីរក្រុមនាពេលបច្ចុប្បន្នជាក់ជាមិនខាន។

សូមបញ្ជាក់ថា ព្រោះតែដណ្តើមប្រយោជន៍គ្នាពីបឹងពារាំង កាលពីដើមខែកុម្ភ: ឆ្នាំ២០២២ កន្លងទៅ ឈ្មួញពីក្រុមបានវ៉ៃតប់គ្នាយ៉ាងសាហាវព្រៃផ្សៃ រហូតគម្រាមបញ្ចប់តំណែងប្រធានសហគមន៍បឹងពារាំងទៀតផង នៅចំណុចកុងត្រូល ផ្លូវចូលទៅកាន់បឹងពារាំង។ភ្លាមៗនោះមអាជ្ញាធរក៏ចុះទៅបិទ សកម្មភាពជីកស្តារបឹង បានត្រឹមមួយដង្ហើមចង្រិត ហើយក៏បន្តបើកឡើងវិញ៕SRP

ខេត្តសៀមរាប៖ករណីឆក់កាបូប នៅក្រុងសៀមរាប ហាក់កម្រើកឡើងវិញ ក្នុងរយៈពេលចុងក្រោយនេះ ប៉ុន្តែករណីនេះ ត្រូវបានសមត្ថកិច្ចនគរបាលខេត្តសៀមរាប បង្ក្រាបបានទាន់ពេលវេលា។

អធិការនគរបាលក្រុងសៀមរាប លោកដា ចំរើន បានឲ្យដឹងថា នៅថ្ងៃទី១០ ខែមេសា ឆ្នាំ២០២៣ កម្លាំងនគរបាលក្រុងសៀមរាប បានសហការជាមួយនគរបាលព្រហ្មទណ្ឌកម្រិតស្រាល បានឃាត់ខ្លួនជនសង្ស័យចំនួន២នាក់ ដោយបានឆ្លើយសារភាពថា ពួកខ្លួនពិតជាបានជិះម៉ូតូឆក់កាបូបជនរងគ្រោះពិតមែន។ ឈ្មោះ​ ជា កវី ហៅហ៊ីន ជាអ្នកឆក់ កាបូប រីឯជនឈ្មោះ​ ប៉ឹង ភត្រ្តា ហៅចាន់ ជាអ្នកបើកម៉ូតូ ចំណែកប្រាក់ដែលឆក់បាន ពួកខ្លួនបានយកចែកគ្នា។

ជនសង្ស័យ១-ឈ្មោះ​ ប៉ឹង ភត្រ្តា ហៅចាន់ ភេទប្រុស អាយុ៣០ឆ្នាំ មានស្រុកកំណើតនៅភូមិភ្នំក្រោម សង្កាត់សៀមរាប ក្រុងសៀមរាប និងទីលំនៅបច្ចុប្បន្នស្នាក់នៅភូមិភ្នំក្រោម សង្កាត់សៀមរាប ក្រុងសៀមរាប (ធ្លាប់ជាប់ពន្ធនាគារករណីគ្រឿងញៀន) ០២-ឈ្មោះ ជា កវី ហៅហ៊ីន ភេទប្រុស អាយុ២២ឆ្នាំ មុខរបរលក់ប៉េងប៉ោង មានស្រុកកំណើត នៅភូមិចាមលើ ឃុំព្រែកថ្មី ស្រុកកោះធំ ខេត្តកណ្តាល បច្ចុប្បន្នរស់នៅភូមិទី៥ សង្កាត់ចុងឃ្នៀស ក្រុងសៀមរាប (ធ្លាប់ជាប់ពន្ធនាគារករណីគ្រឿងញៀន)។ ជនសង្ស័យទាំង២នាក់ វិជ្ជមាន(ជាតំរុយមេតំហ្វេតាមីន)។

លោកដា ចំរើន បន្តថា ករណីឆក់កាបូបនេះ ខណៈពេលដែរជនរងគ្រោះជិះកង់ បានកើតឡើង នៅថ្ងៃទី០៨ ខែមេសា ឆ្នាំ២០២៣ វេលាម៉ោង១២និង៥៦នាទី នៅចំណុចផ្លូវបេតុង ក្នុងភូមិបន្ទាយចាស់ សង្កាត់ស្លក្រាម​ ក្រុងសៀមរាប។

ជនរងគ្រោះ ឈ្មោះ ជ.ច ភេទស្រី អាយុ​ ១៩ឆ្នាំ រស់នៅភូមិវត្តបូព៌ សង្កាត់សាលាកំរើក ក្រុងសៀមរាប។ ក្នុងកាបូប មានកុំព្យូទ័រយូរដៃពណ៌ទឹកប្រាក់ ម៉ាកDell ១គ្រឿង ទូរស័ព្ទម៉ាកvivo ពណ៌ក្រហម លាយស្វាយ ១គ្រឿង លុយ៣០ដុល្លារ លុយខ្មែរ១៥ម៉ឺនរៀល។

អធិការបន្តថាក្រោយឃាត់ខ្លួនសមត្ថកិច្ចដកហូតវត្ថុតាងបាន៖ ម៉ូតូជនសង្ស័យជិះធ្វើសកម្មភាព​ ១គ្រឿង។ ទូរស័ព្ទ០៣គ្រឿង កាបូបខ្មៅ​ ១-កុំព្យូរទ័រម៉ាកDell ១គ្រឿង -ថង់ថ្កឹបមាត់ និងឧបករណ៍ច្នៃជក់ថ្នាំញៀនមួយចំនួនផងដែរ។

បើតាម លោកដា ចំរើន អធិការក្រុងសៀមរាប ដែល បានដឹកនាំកម្លាំងផ្នែកព្រហ្មទណ្ឌ​ ចុះបង្រ្កាប​ បញ្ជាក់ថា ប្រតិបត្តិការបង្ក្រាបនេះ ដោយមានការចង្អុលបង្ហាញពីសំណាក់ លោកតេង ច័ន្ទណាត ស្នងការនគរបាលខេត្ត និងលោកភឹង ចិន្តារ៉េត ស្នងការរង ទទួលផែនការងារ នគរបាលព្រហ្មទណ្ឌ៕SRP

តាមរយៈទំព័រតេលេក្រាមផ្លូវការរបស់សម្ដេចតេជោហ៊ុន សែន នាយករដ្ឋមន្ត្រី នៅថ្ងៃអង្គារនេះ បានព្រមានចំពោះមន្ត្រីទាំងអស់កុំធ្វើបាបអ្នកទន់ខ្សោយ និងប្រើប្រាស់អាវុធខុសច្បាប់។

តាមរយៈសាររបស់នាយករដ្ឋមន្ត្រី ដែល សៀមរាប ប៉ុស្តិ៍ ទទួលបាន បញ្ជាក់ថា៖ បើតុលាការមិនចាត់ការតាមផ្លូវច្បាប់ទេទុកឲ្យខ្ញុំដាក់វិន័យតាមផ្លូវរដ្ឋសិន។ អាងមានអំណាចប្រើប្រាស់អាវុធគំរាមអ្នកទន់ខ្សោយ។ នេះជាសារព្រមានចំពោះមន្ត្រីទាំងអស់សូមកុំអាងអំណាចធ្វើ បាបអ្នកទន់ខ្សោយជាពិសេសសូមកុំប្រើប្រាស់អាវុធខុសច្បាប់។

ក្នុងសារដដែលបន្តថា សូមរដ្ឋមន្ត្រីក្រសួងយុត្តិធម៍ធ្វើការជាមួយតុលាការសូមកុំឲ្យជនល្មើសប្រើប្រាស់អាវុធខុសច្បាប់បាននៅក្រៅឃុំមុនពេលកាត់ទោសដែលជននោះអាចតាមគំរាមកំហែងដល់អ្នកផ្សេងទៀត។

ការចេញសារព្រមានរបស់សម្ដេចនាយករដ្ឋមន្ត្រីហ៊ុន សែន បន្ទាប់ពី សម្ដេចបានចេញអនុក្រឹត្យបញ្ចប់មុខតំណែង ឈ្មោះ បែល វ៉ាន់ដែត ជាអគ្គនាយករងនៃអគ្គនាយកដ្ឋានរដ្ឋបាល និងកិច្ចការទូទៅនៃរដ្ឋលេខាធិការដ្ឋានអាកាសចរស៊ីវិល៕SRP