ខេត្តសៀមរាប៖កម្លាំងការិយាល័យនគរបាលព្រហ្មទណ្ឌកម្រិតស្រាល បានចុះធ្វើការបង្រ្កាបករណីលេងល្បែងស៊ីសងខុសច្បាប់(ក្រឡុកគ្រាប់ឡូតូ និងបៀរ)ឃាត់ខ្លួនបុរសស្ត្រី១១នាក់។
ហេតុការណ៍បានធ្វើឡើងនៅថ្ងៃទី២៤ ខែមេសា ឆ្នាំ២០២០ វេលាម៉ោង១៥និង៣០នាទី នៅចំណុចតូបជួលលក់ឥវ៉ាន់ចាប់ហ៊ួយ ភូមិតាវៀន សង្កាត់សាលាកំរើក ក្រុងសៀមរាបខេត្តសៀមរាប។
លោកវរសេនីយ៍ឯក ហង្ស សូផាតភីរម្យ នាយការិយាល័យនគរបាលព្រហ្មទណ្ឌកម្រិតស្រាលបានឲ្យដឹងថាការបង្ក្រាបនេះដោយមានការបញ្ជារដោយផ្ទាល់ពីលោកឧត្តមសេនីយ៍ទោស្នងការ នគរបាលខេត្ត និងលោកឧត្តមសេនីយ៍ត្រី ស្នងការរង ទទួលផែនការងារនគរបាលព្រហ្មទណ្ឌ។
ដោយឃាត់ខ្លួនបានអ្នកលេងបានចំនួន១១នាក់៖
១.ឈ្មោះ លាង ស្រីលុច ភេទស្រី អាយុ៣២ឆ្នាំ មុខរបរនៅផ្ទះ ទីលំនៅភូមិអញ្ចាញ សង្កាត់នគរធំ ក្រុង/ខេត្តសៀមរាប។
២.ឈ្មោះ ទ្រុល គឹមហាប់ ភេទស្រី អាយុ២២ឆ្នាំ មុខរបរគ្មាន ទីលំនៅភូមិអញ្ចាញ សង្កាត់នគរធំ ក្រុង/ខេត្តសៀមរាប។
៣.ឈ្មោះ ហ៉ីម សុគ័ន ភេទស្រី អាយុ២៤ឆ្នាំ មុខរបរអតីតបុគ្គលិកខារ៉ាអូខេ ទីលំនៅបន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
៤.ឈ្មោះ ឆៅ ស្រីទូច ភេទស្រី អាយុ៣២ឆ្នាំ មុខរបរអតីតមេការហាងក្លាស់ស៉ិក ទីលំនៅបន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
៥.ឈ្មោះ ឆេង ពន្លឺ ភេទស្រី អាយុ២៨ឆ្នាំ មុខរបរអតីតបុគ្គលិកខារ៉ាអូខេ ទីលំនៅបន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
៦.ឈ្មោះ ហង្ស ដាលីន ភេទស្រី អាយុ២៣ឆ្នាំ មុខរបរអតីតបុគ្គលិកហាងចំប៉ីសៀមរាប ទីលំនៅបន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
៧.ឈ្មោះ ឈឿត ហួត ភេទស្រី អាយុ៣៧ឆ្នាំ មុខរបរអតីតបុគ្គលិកហាងសែនសប្បាយ ទីលំនៅភូមិអញ្ចាញ សង្កាត់នគរធំ ក្រុង/ខេត្តសៀមរាប។
៨.ឈ្មោះ ប៉ិន ហាទីន ភេទស្រី អាយុ៣៧ឆ្នាំ មុខរបរនៅផ្ទះ ទីលំនៅបន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
៩.ឈ្មោះ អេង ណារ៉ា ភេទប្រុស អាយុ៥៣ឆ្នាំ មុខរបរជាងជួសជុលរថយន្ត ទីលំនៅភូមិតាវៀន សង្កាត់សាលាកំរើក ក្រុង/ខេត្តសៀមរាប។
១០.ឈ្មោះ ទុយ វណ្ណី ភេទប្រុស អាយុ៣៥ឆ្នាំ មុខរបរជាងដែក ទីលំនៅ ន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
១១.ឈ្មោះ សែន សុខសំបូរ ភេទប្រុស អាយុ៣៣ឆ្នាំ មុខរបរលក់ដូរ ទីលំនៅបន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។
ករណីនេះដកហូតវត្ថុតាងរួមមាន៖
១,គ្រាប់ក្រឡុកឡូតូ
២,កាតុងលេងឡូតូចំនួន៣០សន្លឹក(កាតុង)
៣,បៀរចំនួន០៣ហ៊ូរ
៤,ម៉ូតូចំនួន០៤គ្រឿង។
ចំណែកមេស៊ីសងត្រូវបានរត់គេចខ្លួន។
លោកបន្តថាដោយការបង្ក្រាបបានតែអ្នកលេង ហើយក្នុងនោះមានស្រ្តីទើបកូនខ្ចីរួចផងនោះ សុំគោលការណ៍ពី
លោកឧត្តមសេនីយ៍ត្រី ស្នងការរង ធ្វើការអប់រំលើកទី១ អោយត្រឡប់ទៅផ្ទះវិញ៕SRP

ខេត្តសៀមរាប៖រដ្ឋបាលខេត្តបានលើកនូវសំណូមពរដល់អង្គការ IOM ក្នុងការគាំពារដល់កិច្ចការងារមួយចំនួន។
១-ការរៀបចំឲ្យរថយន្តឈ្នួលដឹកជញ្ជូនពលករមកពីក្រៅប្រទេសទាំងអស់ត្រូវមានការកត់ត្រាឈ្មោះអ្នកជិះរថយន្ត ដើម្បីងាយស្រួលស្រាវជ្រាវក្នុងករណីមាន ប្រជាពលរដ្ឋមកពីក្រៅប្រទេសណាម្នាក់មានផ្ទុកវីរុសកូវីដ ១៩។
២-ការគាំទ្រក្នុងការផ្សព្វផ្សាយ ឲ្យមានការប្រុងប្រយ័ត្ននិងយកចិត្តទុកដាក់ខ្ពស់ ពីសំណាក់មន្ត្រីដែលជួបអនុវត្តការងារផ្ទាល់ជាមួយបងប្អូនប្រជាពលរដ្ឋមកពីក្រៅប្រទេស និងសាធារណជនទូទៅ។
៣-ការគាំទ្រជាសម្ភារៈដល់ការ ធ្វើចិត្តាឡីស័ក ដោយការដាក់នៅដាច់ដោយឡែករយៈពេល១៤ថ្ងៃ នៅតាមមណ្ឌលចត្តាឡីស័កក្នុងក្រុង ស្រុកនីមួយៗ។
៤-ការរៀបចំបញ្ជីពលករដោយមានការបញ្ជាក់ពីជំនាញវិជ្ជាជីវៈនានាដែលពួកគាត់បានអនុវត្តនៅក្រៅប្រទេស។

ជំនួបពិភាក្សាការងាររវាងរដ្ឋបាលខេត្តជាមួយ អង្គការ IOM លើការងារប្រជាពលរដ្ឋមកពីក្រៅប្រទេស និងការការពារការីករាលដាលជំងឺកូវីដ១៩ ធ្វើនៅរសៀលថ្ងៃទី២៣ខែមេសាម្សិលមិញ ក្រោមវត្តមានរបស់លោក នាក់ ណេរ៉ុន អភិបាលរងខេត្តនិងជាតំណាង លោកទៀ សីហា អភិបាលខេត្ត។
ឆ្លើយតបនឹងសំណូមពរនេះ IOM នឹងធ្វើកិច្ចការនេះជាមួយគណៈកម្មការកូវីដខេត្ត និងគណៈកម្មការគ្រប់គ្រងប្រជាពលរដ្ឋមកពីក្រៅប្រទេស ដើម្បីពិនិត្យលទ្ធភាពក្នុងការគាំទ្រនានា។ ជាក់ស្តែង IOM នឹងផ្តល់នូវសម្ភារ:មួយចំនួនសម្រាប់មន្ត្រីបំពេញកិច្ចការងារផ្ទាល់ជាមួយពលករ និងការងារទប់ស្កាត់ជំងឺកូវីដ១៩៕SRP

ខេត្តកំពង់ចាម៖អំណោយជាម៉ាស់ចំនួន៣០,០០០ម៉ាស់ និងអាល់កុលចំនួន១២០លីត្រ ស្មើនឹង២៤០ដប របស់គណៈកម្មាធិការប្រជាជនខេត្តតៃនិញនៃសាធារណរដ្ឋ សង្គមនិយមវៀតណាម បានឧបត្ថម្ភដល់រដ្ឋបាលខេត្តកំពង់ចាម។ ការទទួលនាព្រឹកមិញនេះ នៅច្រកទ្វារព្រំដែនអន្តរជាតិត្រពាំងផ្លុង-ស្មាច់ ក្នុងខេត្តត្បូងឃ្មុំ ដោយអនុប្រធាន គណៈកម្មការ ប្រយុទ្ធ នឹង ជំងឺ កូវីដ ១៩ ខេត្តកំពង់ចាម លោក ហាន កុសល អភិបាលរងខេត្ត តំណាង លោក អ៊ុន ចាន់ដា អភិបាលខេត្តកំពង់ចាម។

លោកហាន កុសល បានពាំនាំការផ្តាំផ្ញើ សាកសួរសុខទុក្ខ និងថ្លែងអំណរគុណយ៉ាងជ្រាលជ្រៅបំផុតពីសំណាក់ លោក អ៊ុន ចាន់ដា ប្រធានគណៈកម្មការខេត្ត ប្រយុទ្ធប្រឆាំងនឹងជម្ងឺកូវីដ១៩ ខេត្តកំពង់ចាម ជូនចំពោះថ្នាក់ដឹកនាំ និងប្រជាជនខេត្តតៃនិញ នៃសាធារណរដ្ឋសង្គមនិយមវៀតណាម ដែលបានចូលរួមចែករំលែក និងចូលរួមជាមួយរដ្ឋបាលខេត្តកំពង់ចាម គាំទ្រដល់ការងារប្រយុទ្ធប្រឆាំងនឹងការរីករាលដាលនៃជម្ងឺកូវីដ១៩។នេះជាកាយវិការប្រកបដោយសប្បុរស និងបង្ហាញ ឲ្យឃើញពីសាមគ្គីភាព មិត្តភាព រវាងខេត្តទាំងពីរ (កំពង់ចាម -តៃនិញ) ជួយគ្នាក្នុងគ្រាលំបាក ហើយសម្ភារៈទាំងនេះ ផងដែរ រដ្ឋបាលខេត្តនឹងយកទៅប្រើប្រាស់ បម្រើឲ្យយុទ្ធនាការប្រយុទ្ធប្រឆាំងទប់ស្កាត់ការរាតត្បាតនៃជម្ងឺកូវីដ១៩៕SRP

ខេត្តសៀមរាប៖អង្គភាពសៀមរាបប៉ុស្ដិ៍ សូមជម្រាបដល់ភ្នាក់ងារអ្នកយកព័ត៌មាន ឲ្យបានជ្រាបថា៖
០១-រាល់ភ្នាក់ងារណាម្នាក់បានផុសឬស៊ែ នៅលើគណនី ហ្វេសប៊ុក ផេក ផ្ទាល់ខ្លួន ដែលអាចពាក់ព័ន្ធទៅនិងនយោបាយ ឬក៏ផ្សព្វផ្សាយមានចរិកញុះញុង អុជអាល បំភ័យ បង្អើល បញ្ឆេះកំហឹង បង្កើតចលាចល កលយុគសង្គម និងអាចធ្វើឲ្យប៉ះពាល់ដល់សេចក្ដីថ្លៃថ្នូរបស់ថ្នាក់ដឹកនាំ ភ្នាក់ងារនោះ ត្រូវទទួលខុសត្រូវចំពោះមុខច្បាប់ដោយខ្លួនឯង មិនពាក់ព័ន្ធជាមួយគេហទំព័រសៀមរាបប៉ុស្ដិ៍នោះឡើយ។
០២-អង្គភាពគេហទំព័រសៀមរាបប៉ុស្ដិ៍ សូមមិនទទួលខុសត្រូវដាច់ខាត ចំពោះការបង្ហោះឬស៊ែព័ត៌មាននានា របស់ភ្នាក់ងារណានៅលើហ្វេសប៊ុកឬផេកផ្ទាល់ខ្លួនដែលមិនមែនជាព័ត៌មានចេញដោយសារព័ត៌មាន សៀមរាបប៉ុស្ដិ៍។
០៣-សូមភ្នាក់ងាររបស់អង្គភាពសៀមរាបប៉ុស្ដិ៍ ទាំងអស់នៅពេលចុះយកព័ត៌មាន ត្រូវពាក់កាតព័ត៌មានសំគាល់ខ្លួនឲ្យបានជាប្រចាំ ចៀងវៀងមានការភាន់ច្រឡំណាមួយដែលអាចកើតឡើង។
០៤-ភ្នាក់ងារទាំងអស់ដែលបានសរសេរព័ត៌មានមកអង្គភាពហើយមានការចេញផ្សាយលើគេហទំព័រសៀមរាបប៉ុស្ដិ៍ គឺអង្គភាពទទួលខុសត្រូវរាល់ព័ត៌មានដែលបានចេញផ្សាយ។
០៥-អង្គភាពសៀមរាបប៉ុស្ដិ៍ សូមអំពាវនាវដល់ភ្នាក់ងារយកព័ត៌មានទាំងអស់ ត្រូវបំពេញការងាររបស់ខ្លួនបានតាមវិជ្ជាជីវ: និងក្រមសីលធម៌ តាមច្បាប់ស្ដីពីរបបអ្នកសារព័ត៌មាន៕SRP

ខេត្តសៀមរាប៖កម្លាំងអាវុធហត្ថខេត្តសៀមរាប បានឃាត់ខ្លួនបុរស០៥នាក់ពាក់ព័ន្ធករណីរក្សាទុកដឹកជញ្ជូនឬជួញដូរដោយខុសច្បាប់នូវសារធាតុញៀន។

ហេតុការណ៍ធ្វើឡើនៅថ្ងៃទី២២ខែមេសាឆ្នាំ២០២០ នៅចំណុចភូមិបឹងដូនប៉ា សង្កាត់ស្លក្រាម ខេត្តសៀមរាប។ ត្រូវឃាត់ខ្លួនកម្លាំងសមត្ថកិច្ចរបស់ខេត្តសៀមរាប បានរកឃើញវត្ថុតាងម្សៅក្រាមពណ៌ស(មេតាំហ្វេតាមីន)ចំនួន០៧កញ្ចប់ ស្មេីនិង១៤,៧៥ក្រាម,ជញ្ជីងថ្លឹងគ្រឿងញៀន០១គ្រឿង,ទូរសព្ទ័០៩គ្រឿង។ សមត្ថកិច្ចបានដឹងថាបច្ចុប្បន្នជនសង្ស័យនិងវត្ថុតាងត្រូវបានកសាងសំណុំរឿងបញ្ជូនទៅសាលាដំបូងដើម្បីអនុវត្តតាមច្បាប់៕SRP

ខេត្តសៀមរាប៖លោកសូរ ប្លាតុង អភិបាលស្រុកប្រាសាទបាគងក្រុមការងារ នៅព្រឹកមិញនេះបានចុះពិនិត្យ មើលការ ដ្ឋាន ជីកស្រះ សហគមន៍ភូមិដីក្រហម ស្ថិតនៅក្នុងឃុំកំពង់ភ្លុក ស្រុកប្រាសាទបាគង ខេត្តសៀមរាប ដើម្បីធ្វើជាកន្លែងស្តុករក្សារទឹកទុក ពីរដូវវស្សា ជូនបងប្អូនប្រជាពលរដ្ឋប្រើប្រាស់នារដូវប្រាំងវិញ ។ លោកគិតត្រឹម ថ្ងៃទី២ ៤ខែមេសា នេះ សម្រេចលទ្ធផលបាន ប្រមាណ៨០ ភាគរយ ហើយ ។

លោកសូរ ប្លាតុង អភិបាលស្រុកប្រាសាទបាគង បន្តថាស្រះ សហគមន៍ភូមិដីក្រហមនេះ មានបណ្តោយ ១០០ម៉ែត្រ ទទឹង៧៥មម៉ែត្រ ជម្រៅ ៦ម៉ែត្រ មានធ្វើផ្លូវ និងរបងពទ្ធ័ជុំវិញ រួមជាមួយការដាំស្មៅតាមជេីងទេ ផងដែរ។ ជាគម្រោងលេីកកំពស់ជីវភាពប្រជាជនក្រីក្រ (LEAP) ដោយគ្រោងចំណាយថវិកាក្នុងការសាងសង់សរុប ៤៥,៥០០ដុល្លា សហរដ្ឋអាមេរិក។
បើតាមលោកសូរ ប្លាតុង ក្រោយសាងសង់រួចរាល់ ទីនេះមិនត្រឹមក្លាយជាកន្លែងស្តុករក្សាទឹកទុក សម្រាប់ប្រើប្រាស់ តែប៉ុណ្ណោះនោះទេ..! តែទីនេះ ក៏អាចនឹងក្លាយជាកន្លែង សម្រាប់បងប្អូនប្រជាពលរដ្ឋ អង្គុយជួបជុំ លំហែរកាយ ឬ ដើរហាត់ប្រាណ រួមជាមួយខ្យល់អាកាសបរិសុទ្ធផងដែរ៕SRP

ខេត្តកំពង់ចាម៖ប្រជាពលរដ្ឋ​ដែល​ជួប​ការ​លំបាក​ក្នុង​ជីវភាព​រស់នៅ​ប្រចាំ​ថ្ងៃ​ ចំនួន​៥៣គ្រួសារ​ នៅ​ក្នុង​ឃុំ​ព្រែក​ក្របៅ​ ស្រុក​កង​មាស​ ខេត្ត​កំពង់ចាម​ បាន​ទទួល​អំណោយ​ពី​ប្រិយ​សម្ព័ន្ធ​គ្រិស្ត​បរិស័ទ​កម្ពុជា​ និង​ប្រជាជាតិ​អាស៊ី​ តាម​រយៈ​ក្រុម​ជុំនំ​គ្រួសារ​ថ្មី​ក្នុង​ព្រះ​គ្រីស្ត​។
ពិធីនេះត្រូវបានធ្វើឡើងនាព្រឹកថ្ងៃទី​២៤​ ខែមេសា​ ឆ្នាំ​២០២០​ ក្រោម​វត្តមាន​លោក​​ ខាន់​ ខុន​ ទីប្រឹក្សា​ក្រសួង​ធម្មកា​ និង​សាសនា​ ព្រឹទ្ធ​បូជា​ចារ្យ​ សរ​ ពលៈ​ សមាជិក​ក្រុម​ប្រឹក្សា​ភិបាល​ ទទួល​បន្ទុក​បេសកកម្ម​ និង​ជាប្រធាន​សម្របសម្រួល​បេសកកម្ម​កម្ពុជា​ ក្នុង​ប្រិយ​សម្ព័ន្ធ​គ្រិស្ត​បរិស័ទ​កម្ពុជា​ ព្រមទាំង​មាន​ការ​ចូលរួម​ពី​មន្ត្រី​អាជ្ញាធរ​មូលដ្ឋាន​ផងដែរ​។

ឆ្លៀត​ក្នុង​ឱកាសនោះដែរ​ គណៈអធិបតី​ បាន​ក្រេីន​រំលឹក​ដល់​បងប្អូន​ប្រជាពលរដ្ឋ​ ឲ្យ​ចូល​រួម​អំពី​ការ​ការពារ​​​ទប់ស្កាត់​ការ​រីករាលដាល​នៃ​ជំងឺ​កូវីដ​១៩​ ដោយផ្តើមចេញពីការថែរក្សាអនាម័យផ្ទាល់ខ្លួន ក្នុង​គ្រួសារ​ ក៏ដូចជា​នៅ​ក្នុង​សហគមន៍​ទាំង​មូល​ ពោលគឺ​ត្រូវ​ជៀសវាងការជួបជុំគ្នា​ក្នុង​ពិធី​ធំ​ៗ​ និង​ត្រូវ​ពាក់ម៉ាស់​​នៅ​ទី​ប្រជុំជន​ ព្រមទាំង​លាងសម្អាតដៃដោយសាប៊ូ អាល់កុល ឬជែលសម្លាប់មេរោគ​ជាញឹកញាប់​ ស្របតាមការណែនាំ របស់ក្រសួងសុខាភិបាល​ ព្រោះ​ជំងឺ​កូវីដ​១៩នេះ​ មិន​មាន​ការ​រេីសអេីង​ ឬ​យោគយល់​ចំពោះអ្នក​ណា​ម្នាក់​នោះ​ទេ​ គឺមិន​ថា​អ្នក​មាន​ អ្នក​ក្រ​ មន្ត្រី​តូច​ធំ​ អ្នក​កាន់​ព្រះពុទ្ធ​សាសនា​ ឥស្លាម​សាសនា​ ឬ​អ្នក​ជឿ​ព្រះ​យេស៊ូគ្រិស្ត​នោះ​ទេ​ ឲ្យ​តែ​មាន​ការ​ធ្វេសប្រហែស​ គឺ​ជា​ការ​ផ្តល់​ឱកាស​ឲ្យ​មាន​ការ​ឆ្លង​ជំងឺ​នោះ​ជា​មិន​ខាន​ ដូច្នេះ​យើង​ត្រូវ​ទាមទារ​ឲ្យ​មាន​ការ​ប្រុងប្រយ័ត្ន​ខ្ពស់​ទាំង​អស់​គ្នា​។គួរ​បញ្ជាក់​ផង​ដែរថា​ អំណោយ​ដែល​បាន​ប្រគល់​ជូន​ក្នុង១គ្រួសារ​ៗ​ត្រូវ​ទទួល​បាន​អង្ករ០​១បេ​ស្មើ​នឹង​១៥គីឡូក្រាម​មី០១កេស​ទឹក​ស៊ីអ៊ីវ​០១យួរ​ទឹក​ត្រី​០១ដប​ក្រម៉ា០២​និង​អាហារ​បំប៉ន​១០​កញ្ចប់​៕SRP

ភ្នំពេញ៖សម្ដេចតេជោហ៊ុន សែន នាយករដ្ឋមន្ត្រី បានក្រើនរំឮក ដល់បងប្អូន ប្រជាពលរដ្ឋ ត្រូវចងចាំនឹងបង្កើនការប្រុងប្រយ័ត្ន ជាប់ខ្លូនជានិច្ច គឺត្រូវពាក់ម៉ាសការពារ មានទឹកអាល់កុល និងជឹលសម្អាតមេរោគ។

សម្ដេចតេជោ ហ៊ុន សែន បានបញ្ជាក់លើទំព័រហ្វេសប៊ុកថា៖ក្នុងប៉ុន្មានថ្ងៃកន្លងមកនេះ នៅក្នុងប្រទេសយើង ទោះបីអត្រាឆ្លងរោគកូវីដ-១៩ មិនបានកើនឡើងខ្លាំងដូចប្រទេសដទៃ ហើយចំនួនអ្នកព្យាបាលដែលបានជាសះស្បើយក៏កាន់តែមានច្រើនពិតមែន ប៉ុន្តែយើងត្រូវមានការប្រុងប្រយ័ត្នជាប់ខ្លួនជានិច្ច ជាពិសេស ត្រូវបង្កើនការប្រុងប្រយ័ត្នទេ្វដង។ ព្រោះមេរោគកូរ៉ូណា២០១៩ (Coronavirus 2019) ដែលយើងហៅថាកូវីដ-១៩ (covid-19)ដែលជាជំងឺឆ្លងដ៏កាចសាហាវនេះគឺពុំទាន់មានថ្នាំព្យាបាលនៅឡើយទេ។
សម្តេចតេជោនាយករដ្ឋមន្ត្រី ក៏បានបញ្ជាក់ផងដែរថា៖ក្នុងប៉ុន្មានថ្ងៃនេះ នៅតាមដងផ្លូវក៏មានការធ្វើដំណើររណែនរកកល់ស្ទះចរាចរណ៍ទៀតផង។ សូមក្រើនរំឮកដល់បងប្អូនប្រជាពលរដ្ឋត្រូវចងចាំនឹងបង្កើនការប្រុងប្រយ័ត្នជាប់ខ្លូនជានិច្ច គឺត្រូវពាក់ម៉ាសការពារ មានទឹកអាល់កុល និងជឹលសម្អាតមេរោគនិងបាក់តេរីផ្សេងៗ ចៀសវាងការចម្លងរោគពីម្នាក់ទៅម្នាក់ដោយសារខ្វះការប្រុងប្រយ័ត្នឬគិតស្រាលៗថាស្រុកយើងមិនអីទេនោះ។
សម្ដេចបានបញ្ជាក់ទៀតថា៖បើគ្មានការចាំបាច់ទៅខាងក្រៅផ្ទះទេ សូមកុំទៅ ឬទៅក្នុងចំណោមក្រុមមនុស្សច្រេីន​ គឺអោយតែមេគ្រួសារឬអ្នកដែលចាំបាច់ត្រូវទៅបានហើយ។
សូមបងប្អូនយកការព្រួយបារម្ភនិងភ័យខ្លាចនេះទៅការការប្រុងប្រយ័ត្នខ្ពស់ជាប្រចាំរាល់ថ្ងៃ ដោយមានអនាម័យរស់នៅល្អ ដើម្បីសុខភាពនិងអាយុវជីវិតរស់នៅបានយូរអង្វែង៕SRP

ខេត្តប៉ៃលិន៖លោក ផាន់​ ចាន់ធុល​ អភិបាលខេត្ដប៉ៃលិន នៅព្រឹកនេះបាន​អញ្ជើញ​ចុះ​សួរ​សុខទុក្ខ​ និង​ចែកអំណោយ​ជូន​ប្រជាពលរដ្ឋ​ដែល​រងគ្រោះ​ដោយសារ​គ្រោះ​ធម្មជាតិ​ (​ ខ្យល់​កន្ត្រាក់​ )​ កាលពី​យប់​ថ្ងៃ​ទី​២៣​ ខែមេសា​ ឆ្នាំ​២០២០​។ រួម​ជាមួយ​គ្នា​នេះ​ដែរ​លោក​ឧត្ដមសេនីយ៍​ទោ​ សេង​ សុគន្ធ​ ស្នងការ​នគរបាល​ខេត្ត​ប៉ៃលិន​ បាន​ដឹង​នាំ​កម្លាំង​ក្រោម​ឱវាទ​ចុះ​អមដំណើរ​ ក្នុង​ការ​ចុះសួរសុខទុក្ខ​ប្រជាពលរដ្ឋ​នេះដែរ។
អំណោយ​ក្នុង​មួយ​ខ្នង​ផ្ទះ​ទទួល​បាន​
-អង្ករ​ ០១​ ការ៉ុង
-មី​ ០១​ កេះ
-ត្រីខ​ ០១​ យួរ​
-ទឹក​ត្រី​ ០៤​ ដប
ក្នុង​ហេតុការណ៍​គ្រោះ​ធម្មជាតិ​ខាង​លើ​បណ្តាល​ឲ្យ​ខូចខាត​ផ្ទះ​ប្រជាពលរដ្ឋ​ ៖
ក/ ស្រុកសាលាក្រៅ ខូចខាតផ្ទះប្រជាពលរដ្ឋចំនួន ៦៥ខ្នងផ្ទះ ៖
+ ឃុំស្ទឹងកាច់ ០៣ខ្នងផ្ទះ ។
+ ឃុំអូរអណ្ដូង ០៥ខ្នងផ្ទះ ។
+ ឃុំស្ទឹងត្រង់ ៥២ខ្នងផ្ទះ ។
+ ឃុំសាលាក្រៅ ០៥ខ្នងផ្ទះ ។
ខ/ ក្រុងប៉ៃលិន ក្នុងសង្កាត់បរយ៉ាខា ខូចខាត ៖
+ ផ្ទះ ០៥ខ្នងផ្ទះ ។
+ សាលាសង្កាត់ ០១ខ្នង ។
+ តូបលក់ដូរ ០២តូប ។
+ ស្លាកគណបក្សប្រជាជន០១ស្លាក។ឆ្លៀតឆ្លៀតក្នុងឱកាសនឡដែរ អភិបាល​ខេត្ដប៉ៃលិន បាន​មាន​ប្រសាសន៍​ផ្ដាំផ្ញើ​ដល់​ប្រជាពលរដ្ឋ​ទាំងអស់​អោយ​យក​ចិត្ត​ទុកដាក់​ និង​ប្រុងប្រយ័ត្ន​គ្រប់​ពេលវេលា​ ក៏​ការការពារ​ និង​បង្ការ​កុំ​អោយ​ឆ្លង​ជំងឺ​ COVID-19 ​ផងដែរ​៕SRP

ខេត្តសៀមរាប៖ខណ:ពេលនារដូវវស្សាចាប់ផ្តើមចូលមកដល់អាជ្ញាធរស្រុកបន្ទាយស្រី បានដឹកនាំប្រជាពលរដ្ឋចាប់ផ្តើមចុះភ្ជួររាស់ដីស្រែ លើផ្ទៃដីជិត៤០ហិកតា ដើម្បីជួយដល់ប្រជាពលរដ្ឋក្រីក្រ ជនចាស់ជរា និងជនពិការ។

បច្ចុប្បន្នរដ្ឋបាលស្រុក បាននិងកំពុងអនុវត្ត “ គម្រោងស្រែសង្គម ” ដែលមានផ្ទៃដីជិត៤០ហិកតា សម្រាប់ធ្វើការដាំដុះស្រូវស្រាល ដែលសកម្មភាពសប្បុរសធម៌នេះ គឺទទួលបានការគាំទ្រ និងចូលរួមពីប្រជាពលរដ្ឋ យុវជន និងអាជ្ញាធរ ក្នុងស្រុកបន្ទាយស្រី ខេត្តសៀមរាប។

លោក ឃឹម ហ្វីណង់ អភិបាលស្រុកបន្ទាយស្រី នៅថ្ងៃទី២៣ ខែមេសាម្សិលមិញ បានថ្លែងប្រាប់អ្នកយកព័ត៌មាន ថា នៅដើមខែឧសភាខាងមុខ រដ្ឋបាលស្រុកនឹងចាប់ផ្តើមស្ទូងសំណាបក្នុងវាលស្រែដែលជាការចាប់ផ្តើមដើមរដូវវស្សាតែម្តង ហើយបើមិនមានអ្វីប្រែប្រួលទេ ៣ខែខាងមុខទៀតនេះ គម្រោងនេះ នឹងអាចទទួលផល ស្រូវស្រាលដើមរដូវជុំទី១។

លោក ឃឹម ហ្វីណង់ បន្ថែមថា នៅថ្ងៃនេះ យុវជន ប្រជាការពារភូមិ មន្រ្តីនគរបាលប៉ុស្តិ៍ និងអាជ្ញាធរឃុំជាច្រើននាក់ បានចូលរួមជាមួយប្រជាពលរដ្ឋ កំពុងអនុវត្តនៅក្នុងគម្រោងនេះ ដោយបាចជីអាចម៍មាន់នៅក្នុងវាលស្រែ ដែលការងារនេះ ត្រូវប្រើពេល៣ថ្ងៃ លើផ្ទៃដីជិត៤០ហិកតា ។

លោកឃឹម ហ្វីណង់ បញ្ជាក់ថា ផ្ទៃដីជិត៤០ហិកតានេះ គឺជាការផ្ដល់ជូនឲ្យប្រើប្រាស់បណ្ដោះអាសន្នរហូតដល់ដំណាច់ឆ្នាំ២០២០ ពីប្រជាពលរដ្ឋចំនួន៣៩គ្រួសារ មកពីភូមិអូរទទឹង និងភូមិថ្នល់ទទឹង និងមានការសម្របសម្រួលពីរដ្ឋបាលស្រុក ។ បន្ទាប់ពីទទួលបានផលហើយម្ចាស់ដីស្រែនីមួយៗ នឹងទទួលបានស្រូវចំនួន ៤០០គីឡូក្រាម ក្នុងមួយហិកតា។ ចំពោះស្រូវ ដែលនៅសល់ពីចែកឲ្យម្ចាស់ស្រែ នឹងត្រូវចែកជូន ប្រជាពលរដ្ឋក្រីក្រ ជនពិការ និងចាស់ជរា ជាពិសេសប្រជាពលរដ្ឋ ដែលរងផលប៉ះពាល់ ដោយសារវិបត្តិនៃមេរោគកូវីដ-១៩។

ជាមួយនោះដែរ លោកអភិបាលស្រុក រំពឹងថា រដ្ឋបាលស្រុកបន្ទាយស្រី នឹងមានគម្រោងធ្វើស្រែរួមគ្នា រឺសហគមន៍កសិកម្ម (Agricultural Cooperative រឺ Farmers’ Co-op) នាពេលអនាគត ប្រសិនបើគម្រោងស្រែសង្គមនេះ ជោគជ័យ។ លោកបន្ថែមថា គម្រោងប្រភេទនេះ ប្រទេសជឿនលឿន គេបានអនុវត្តរួចមកហើយ ដោយសារតែវាផ្តល់គុណប្រយោជន៍ទៅដល់ប្រជាកសិករ ច្រើនជាងការធ្វើលើដីស្រែទំហំតូចៗដាច់ដោយឡែក៕SRP

ភ្នំពេញ៖ប្រមុខដឹកនាំកម្ពុជា សម្ដេចតេជោ ហ៊ុន សែន នាយករដ្ឋមន្ត្រី បានលើកឡើងថាក្នុងនាមរាជរដ្ឋាភិបាលនៃព្រះរាជាណាចក្រកម្ពុជា ខ្ញុំនិងភរិយាសូមអបអរសាទរ និងសូមជូននូវពរជ័យ សិរីសួស្ដី សុភមង្គល បវរមហាប្រសើរ ជូនដល់បងប្អូនសាសនិកខ្មែរឥស្លាមកម្ពុជា ក្នុង និងក្រៅប្រទេស រួមទាំងបងប្អូនសាសនិកឥស្លាមនៅទូទាំងពិភពលោកផងដែរ ដែលបានចូល បួសខែរ៉ម៉ាឌន ដែលនៅកម្ពុជានឹងចាប់ផ្ដើមនៅថ្ងៃសុក្រ​ ទី១ ខែរ៉ម៉ាឌន ឆ្នាំ១៤៤១ មូហាំម៉ាត់សករាជ ត្រូវនឹងថ្ងៃទី៣កើតខែពិសាខឆ្នាំជូតទោស័កព.ស.២៥៦៣ដែលត្រូវនឹងថ្ងៃទី២៤ខែមេសាឆ្នាំ២០២០។

សម្ដេចតេជោ ហ៊ុន សែន បានបញ្ជាក់ថាខ្ញុំសូមផ្ញើនូវក្តីនឹករលឹក និង អរគុណយ៉ាងជ្រាលជ្រៅបំផុតចំពោះបងប្អូនខ្មែរឥស្លាមកម្ពុជា ដែលបានចូលរួមថែរក្សា សុខសន្តិភាព ហើយមានជំនឿជឿជាក់លើការដឹកនាំរបស់ខ្ញុំ និង របស់គណបក្សប្រជាជនកម្ពុជា តាំងពីដើមរៀងមក រួមនឹង ប្រជាជនកម្ពុជា។

ប្រមុខរាជរដ្ឋាភិបាលក៏បានបញ្ជាក់បន្ថែមថាជាមួយគ្នានេះ ខ្ញុំក៏សូមអធ្យាស្រ័យសុំការយោគយល់ពីបងប្អូនសាសនិកខ្មែរឥស្លាម ដែលត្រូវលុបកម្មវិធីជួបជុំស្រាយបួសរ៉ាម៉ាឌនថ្នាក់ជាតិលើក ទី៧ ដែលបានគ្រោងថ្ងៃទី២៩ ខែ មេសា ២០២០ ការផ្អាកការថ្វាយបង្គំនៅតាមវិហារ​ ស៊ូរ៉ាវ​ ការជួបជុំលក្ខណៈសាសនា និង សុំបន្កការអនុវត្តតាមសារាចរណែនាំពីវិធីបង្ការទប់ស្កាត់ជំងឺកូវីដ-១៩ ក៏ដូចជាសេចក្តីណែនាំរបស់ចាងហ្វាងនៃគណៈដឹកនាំជាន់ខ្ពស់នៃសាសនា ឥស្លាមកម្ពុជា ទៅតាមគោលការណ៍របស់រាជរដ្ឋាភិបាល បើទោះបីនៅក្នុងប្រទេសកម្ពុជាយើង ហាក់ មានសភាពធូរស្រាល ប៉ុន្តែយើងមិនត្រូវភ្លេចខ្លួន និង ធ្វេសប្រហេស មើលស្រាលដល់ជំងឺដ៏កាចសាហាវនេះឡើយ គឺត្រូវរួមគ្នាការពារជាប់ជានិច្ច ។

សម្ដេចនាយករដ្ឋមន្ត្រីបន្តទៀតថាខ្ញុំសូមបួងសួង​ សុំឲ្យបងប្អូនទាំងអស់ទទួលបាននូវសេចក្តីសុខស្លាម៉ាត់ ករុណារ៉ោះម៉ាត់ និង ចំរើនញ្ហរ៉កាត់គ្រប់ៗគ្នាពីព្រះអល់ឡោះ​ និង សុំឱ្យព្រះអល់ឡោះ ទទួលយកនូវកុសលផលបុណ្យ ខែបួសរ៉ម៉ាឌន ទាំងអស់ដែលបងប្អូនបានប្រតិបត្តិសាងឡើងកុំបីអាក់ខានឡើយ៕SRP

ខេត្តសៀមរាប៖យ៉ាងហោចណាស់មនុស្សចំនួន០២នាក់បានរងរបួស
ដោយសាេគោយន្តច្នៃ បុកជាមួយរថយន្ត។
ហេតុការណ៍បានកើតឡើងវេលាម៉ោង១៥និង៤០នាទី ថ្ងៃទី២៣ ខែមេសា ឆ្នាំ២០២០ នៅចំណុច ចន្លោះគីឡូម៉ែត្រលេខ២៨៤និង២៨៦ ភូមិគោករលួស ឃុំដំដែក ស្រុកសូទ្រនិគម ខេត្តសៀមរាប លើកផ្លូវជាតិលេខ៦។
អ្នកបើករថយន្ដម៉ាក ម៉ាសសាដាពណ៌ស ពាក់ស្លាកលេខ២E១៦១៧ ឈ្មោះយាន រី ភេទប្រុសអាយុ៤០ ទីលំនៅភូមិប៉ាលីឡៃ សង្កាត់ក្បាលស្ពាន ក្រុងប៉ោយប៉ែត ខេត្តបន្ទាយមានជ័យ។ (របួស)។
បើកបរពីកើតទៅលិច ត្រូវគោយន្តឆ្នៃដឹកអិដ្ឋ ឡើងពីត្បូងទៅជើង ហើយបត់ទៅកើត បុករថយន្តពីក្រោយ ហើយរថយន្ត ជ្រុលទៅបុកដើមឈើ។
អ្នកបើកបរគោយន្តឆ្នៃឈ្មោះហឿន ព្រីង ភេទប្រុស អាយុ៤៤ឆ្នាំ នៅភូមិរលួស ឃុំរលួស ស្រុកប្រាសាទបាគង ខេត្តសៀមរាប។ អ្នករួមដំណើរជាមួយរថយន្តដឹកអិដ្ឋឈ្មោះឡាន សុខី ភេទស្រី អាយុ១៥ឆ្នាំ របួស។
សមត្ថកិច្ចថាអ្នករបួសបញ្ជូនទៅមន្ទីរពេទ្យស្រុក។ចំណែក រថយន្ត និងគោយន្តរក្សាទុក នៅកន្លែងប៉ូលិសស្រុក៕SRP