លោកសៀ ទីន ជំរុញឱ្យក្រុមការងារទាំងអស់ ក្ដាប់ឱ្យបាននូវបញ្ហាប្រឈមរបស់ប្រជាពលរដ្ឋក្នុងមូលដ្ឋាន ហើយត្រូវព្យាយាមដោះស្រាយជូនពួកគាត់ឱ្យបានឆាប់រហ័ស និងទាន់ពេលវេលា

ក្នុងពិធីប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានឃុំកំពង់ភ្លុក ស្រុកប្រាសាទបាគង ខេត្តសៀមរាប នៅថ្ងៃទី១៧ ខែកក្កដា ឆ្នាំ២០២៥នេះ លោកសៀ ទីន ប្រធានក្រុមការងាររាជរដ្ឋាភិបាលចុះមូលដ្ឋានឃុំកំពង់ភ្លុក បានជំរុញដល់ក្រុមការងារទាំងអស់ បន្ដកិច្ចសហការគ្នាយ៉ាងស្អិតរមួតធ្វើយ៉ាងណាឱ្យមូលដ្ឋានឃុំកំពង់ភ្លុកទាំងមូល មានការអភិវឌ្ឍន៍កាន់តែល្អប្រសើរ និងជាពិសេស គឺសុខុមាលភាពរបស់បងប្អូនប្រជាពលរដ្ឋ។

លោកក៏បានជំរុញឱ្យក្រុមការងារទាំងអស់ ត្រូវក្ដាប់ឱ្យបាននូវបញ្ហាប្រឈមរបស់ប្រជាពលរដ្ឋក្នុងមូលដ្ឋាន ហើយត្រូវព្យាយាមដោះស្រាយជូនពួកគាត់ឱ្យបានឆាប់រហ័ស និងទាន់ពេលវេលា ទៅតាមវិស័យ និងជំនាញនីមួយៗ របស់ខ្លួន ដើម្បីឱ្យពលរដ្ឋមានជំនឿទុកចិត្ដលើការអនុវត្តការងាររបស់យើងសំដៅដល់ការលើកកម្ពស់ជីវភាពរស់នៅ និងអភិវឌ្ឍមូលដ្ឋានជាចាំបាច់ និងត្រូវអនុវត្ដតាមសំណូមពររបស់ពលរដ្ឋដែលបានលើកឡើងជាបន្តបន្ទាប់។

ជាមួយគ្នានេះ លោកក៏សូមកោតសរសើរនិងវាយតម្លៃខ្ពស់ចំពោះក្រុមការងារដែលបានអនុវត្តផែនការសកម្មភាពបានយ៉ាងល្អប្រសើរគួរឱ្យកត់សម្គាល់នាពេលកន្លងមក និងសំណូមពរឱ្យក្រុមការងារយកចិត្តទុកដាក់អនុវត្តការងារតាមវិស័យនីមួយៗជាបន្ដទៀត ដើម្បីបំពេញតម្រូវការរបស់បងប្អូនប្រជាពលរដ្ឋនៅក្នុងមូលដ្ឋានទាំងមូល៕SRP

អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
#មន្ទីរព័ត៌មានខេត្តសៀមរាប

ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី​ អនុប្រធានសមាគមអតីតយុទ្ធជនកម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាម បានរម្លឹកពីវីរភាពអង់អាចក្លាហានរបស់អតីតយុទ្ធជនគ្រប់ជំនាន់ ក្នុងការរួមចំណែកធានាជួយឱ្យប្រទេសកម្ពុជាមានសុខសន្តិភាព និងស្ថិរភាពមកដល់សព្វថ្ងៃ គឺប្រជាពលរដ្ឋខ្មែរទាំងអស់ចងចាំថា មានការរួមចំណែកពីអតីតយុទ្ធជន ទើបមានប្រទេសកម្ពុជាដ៏រុងរឿង។

ក្នុងនោះពាក់ព័ន្ធនឹងសមិទ្ធផលទីស្នាក់សមាគមអតីតយុទ្ធជនខេត្ត ដែលបានដាក់ឱ្យប្រើប្រាស់នាពេលនេះ ឯកឧត្តមសន្តិបណ្ឌិត នេត សាវឿន បានកោតសរសើរចំពោះការខិតខំប្រឹងប្រែងរបស់ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា ដែលបានចង្អុលបង្ហាញ ដឹកនាំដោយផ្ទាល់ និងចុះជាប់ជាប្រចាំ ដើម្បីដោះស្រាយបញ្ហាប្រឈមទាំងឡាយជូនអតីតយុទ្ធជននៅទូទាំងប្រទេស។

ជាមួយគ្នានេះ ឯកឧត្តមសន្តិបណ្ឌិត នេត សាវឿន បានណែនាំដល់រដ្ឋបាលខេត្តកំពង់ចាម ត្រូវរៀបចំប្រព័ន្ធHotlineសម្រាប់អតីតយុទ្ធជន និងនិវត្តជន ទំនាក់ទំនងដើម្បីដោះស្រាយរាល់សេចក្តីត្រូវការឱ្យបានទាន់ពេលវេលា និងមានប្រសិទ្ធភាព។

ឯកឧត្តមឧបនាយករដ្ឋមន្ត្រី​ មានប្រសាសន៍បែបនេះនៅព្រឹកមិញនេះក្នុងឱកាសអញ្ជើញចូលរួមពិធីសម្ពោធដាក់ឲ្យប្រើប្រាស់ជាផ្លូវការ អគារសមាគមអតីតយុទ្ធជនកម្ពុជាខេត្តកំពង់ចាម​ និងទិវាអតីតយុទ្ធជន​ ២១​ មិថុនា​ លេីកទី១៨​។

ពិធីនេះអញ្ជើញចូលរួមពីឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានកិត្តិយសសាខាសមាគមអតីតយុទ្ធជនកម្ពុជា ខេត្តកំពង់ចាម និង ឯកឧត្តម ខ្លូត ផន ប្រធានក្រុមប្រឹក្សាខេត្ត
សមាជិក សមាជិការាជរដ្ឋាភិបាល, ក្រុមការងាររាជរដ្ឋាភិបាលចុះមូលដ្ឋានខេត្ត, លោកឧត្តមសេនីយ៍ទោ ហ៊ួ ពៅ មេបញ្ជាការតំបន់ប្រតិបត្តិការសឹករងខេត្ត, លោកឧត្តមសេនីយ៍ទោ ហេង វុទ្ធី ស្នងការនគរបាលខេត្ត ជាប្រធាន ស.អ.ក ខេត្ត, លោកឧត្តមសេនីយ៍ត្រី ថេង ឆេងលីម មេបញ្ជាការកងរាជអាវុធហត្ថខេត្ត, លោក លោកស្រី ប្រធានមន្ទីរ-អង្គភាពជុំវិញខេត្ត មន្ត្រីរាជការ និងបងប្អូនអតីតយុទ្ធជនយ៉ាងច្រើនកុះករ ស្ថិតនៅក្នុងភូមិទី៧ សង្កាត់កំពង់ចាម ក្រុងកំពង់ចាម។

បន្ទាប់ពីស្តាប់របាយការណ៍ និងមតិចូលរួមរបស់ ឯកឧត្តម អ៊ុន ចាន់ដា អភិបាលខេត្ត និងជាប្រធានកិត្តិយសសាខា និង ឯកឧត្តមនាយឧត្តមសេនីយ៍ គន់ គីម ទេរដ្ឋមន្ត្រី បន្ទុកបេសកកម្មពិសេស, អនុប្រធានទី១ និងជា អគ្គលេខាធិការសមាគម, ឯកឧត្តម ឧបនាយករដ្ឋមន្រ្តី នេត សាវឿន បានសម្តែងការដឹងគុណចំពោះគុណបំណាច់របស់អតីតយុទ្ធជន ដែលបានតស៊ូគ្រប់ដំណាក់កាលដែលប្រទេសកម្ពុជាធ្លាប់ឆ្លងកាត់នូវសង្គ្រាម បូករួមទាំងសង្គ្រាមផ្ទៃក្នុង រហូតមកបញ្ចប់សង្គ្រាមដោយជោគជ័យ ក្រោមនយោបាយ ឈ្នះ ឈ្នះ របស់សម្តេចតេជោ ហ៊ុន សែន បិតាស្ថាបនិកសន្តិភាព ទើបអាចដឹកនាំយុទ្ធជន យុទ្ធនារី ជួយឱ្យប្រទេសកម្ពុជាមានសុខសន្តិភាពមកទល់ពេលបច្ចុប្បន្ន៕SRP

អភិបាលខេត្តសៀមរាប ណែនាំឲ្យមន្ត្រីជំនាញពាក់ព័ន្ធទប់ស្កាត់បង្ក្រាបឱ្យបានរាល់ការចូលមកស្នាក់នៅរបស់ពួកក្រុម Scam Online

ខេត្តសៀមរាប៖ឯកឧត្តម ប្រាក់ សោភ័ណ អភិបាលខេត្តសៀមរាប បានណែនាំបន្ថែមដល់ លោក អភិបាលក្រុង ស្រុកទាំងអស់ត្រូវធ្វេីការទប់ស្កាត់ និងបង្ក្រាបល្បែងអនឡាញ នៅភូមិសាស្ត្ររបស់ខ្លួន ហេីយពេលចាប់បានត្រូវហ៊ុំទីតាំងនោះឱ្យជាប់។ ម្យ៉ាងទៀតត្រូវសហការគ្នារវាងគណៈបញ្ជាការឯកភាពក្រុង ស្រុក និងគណៈបញ្ជាការឯកភាពខេត្តត្រូវទប់ស្កាត់នឹងបង្ក្រាបឱ្យបានរាល់ការចូលមកស្នាក់នៅរបស់ពួកក្រុម Scam Online។

ឯកឧត្តមអភិបាលខេត្តសៀមរាបបានបន្ថែមថា ក្រុង ស្រុក និងឃុំ សង្កាត់ត្រូវត្រួតពិនិត្យ និងផ្ទៀងផ្ទាត់បងប្អូនប្រជាពលរដ្ឋ ដែលវិលត្រឡប់មកប្រទេសថៃវិញ ដេីម្បីជំរុញឱ្យបងប្អូន និងណែនាំបងប្អូនឱ្យរកការងារធ្វេីនៅក្នុងខេត្ត ឬខេត្តដទៃទៀតដែលត្រូវការកម្លាំងពលកម្ម។ ជាមួយគ្នានេះ បេីបងប្អូនខ្វះជំនាញបច្ចេកទេស និងវិជ្ជាជីវៈ ដោយយេីងមានវិទ្យាស្ថានចំនួនពីរ គឺវិទ្យាស្ថានពហុបច្ចេកទេសភូមិភាគតេជោ សែនសៀមរាប និងវិទ្យាស្ថានជាតិពហុបច្ចេកទេសអង្គរ ដែលវិទ្យាស្ថានទាំងពីរនេះមានជំនាញជាច្រេីន។ ម្យ៉ាងទៀតយេីងក៏មានគោនយោបាយបណ្តុះបណ្តាលវិជ្ជាជីវៈដែលប្រេីប្រាស់ថវិកាជាតិសម្រាប់បងប្អូនចំនួន ១,៥លាននាក់ដោយផ្តោតជំនាញចំនួន ៤៥ផងដែរ។

ឯកឧត្តមប្រាក់ សោភ័ណ ណែនាំយ៉ាងដូច្នេះនៅសាលប្រជុំសាលាខេត្តសៀមរាប នៅថ្ងៃទី១៧ ខែកក្កដា ឆ្នាំ២០២៥ ក្នុងឱកាសដឹកនាំលោក អភិបាលរងខេត្ត លោក នាយករដ្ឋបាល និងលោកអភិបាល នៃគណៈអភិបាលក្រុង ស្រុក ដេីម្បីចូលរួមកិច្ចប្រជុំអភិបាល នៃគណៈអភិបាលរាជធានី ខេត្ត ប្រចាំឆមាសទី១ ឆ្នាំ២០២៥ ក្រោមអធិបតីភាពដ៏ខ្ពង់ខ្ពស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ តាមរយៈកម្មវិធី zoom៕SRP

សិក្ខាសាលាស្តីពីការបង្កើតមាតិកាទេសចរណ៍ឌីជីថល និងបច្ចេកទេសថតរូបដោយប្រើទូរស័ព្ទ

លោក សំកុល សុចិត្រា អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ប្រាក់ សោភ័ណ អភិបាល​នៃគណៈអភិបាលខេត្តសៀមរាប នៅថ្ងៃពុធ ទី១៦​ ខែកក្កដា ឆ្នាំ២០២៥ បានចូលរួមជាគណៈអធិបតីក្នុងសិក្ខាសាលាស្តីពីការបង្កើតមាតិកាទេសចរណ៍ឌីជីថល និងបច្ចេកទេសថតរូបដោយប្រើទូរស័ព្ទ ដែលប្រព្រឹត្តិទៅរយៈពេលពីរថ្ងៃ ក្រោមអធិបតីភាព ឯកឧត្តម ហុល សីលា អនុរដ្ឋលេខាធិការក្រសួងទេសចរណ៍ តំណាងដ៏ខ្ពង់ខ្ពស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍។ នៅក្នុងសិក្ខាសាលាខាងលើនេះមានការអញ្ជើញចូលរួមពីមគ្គុទេសន៍ទេសចរណ៍ អ្នកផលិតមាតិការក្នុងខេត្តសរុបប្រមាណជាង ១៥០នាក់ ចូលរួមផងដែរ ។

ថ្លែងនៅក្នុងសិក្ខាសាលាខាងលើ លោកអភិបាលរងខេត្តបានលើកឡើងថា ការរៀបចំឡើងនូវសិក្ខាសាលានាពេលនេះ នឹងទទួលបាននូវលទ្ធផលល្អ និង​នាំយកនូវ​​ចំណេះដឹង​បច្ចេកទេស​ នៃកាអភិវឌ្ឍខ្លួន​បន្ថែមសម្រាប់អ្នកចូលរួម ដើម្បីយកទៅប្រើប្រាស់ឱ្យចំគោលដៅ ពិសេសផលិតវីដេអូផ្សព្វផ្សាយឱ្យទាក់ទាញ​ដល់ភ្ញៀវទេសចរមកទស្សនា​​ប្រទេសកម្ពុជាយើងបន្ថែមទៀត​ និងដើម្បីធ្វើឱ្យមាន​កំណើន​សេដ្ឋកិច្ចនៅ​ក្នុងខេត្តរបស់យើងកាន់តែល្អប្រសើរឡើងជាងនេះ។

លោកអភិបាលរងខេត្តបានសំណូមពរដល់អង្គពិធី​ទាំងមូល​ ក៏ដូចជា​ប្រជាពលរដ្ឋ​ក្នុងខេត្តសៀមរាប សូមបន្ត​ចូលរួម​ផ្សព្វផ្សាយ​វិស័យ​ទេសចរណ៍បន្ថែមទៀត ស្រប​តាម​ការលើកឡើងរបស់ ឯកឧត្តមរដ្ឋមន្ត្រី ក្រសួងទេសចរណ៍ គឺ​​“ប្រជាពលរដ្ឋម្នាក់ ជាអ្នក​ផ្សព្វផ្សាយទេសចរណ៍កម្ពុជាម្នាក់”​៕SRP

រដ្ឋមន្ត្រីណែនាំឱ្យមន្ត្រីមន្ទីរសាធារណការខេត្តសៀមរាប បន្តពង្រឹងការងារជួសជុល និងថែទាំផ្លូវថ្នល់ឱ្យបានល្អ ស្របតាមស្ដង់ដារបច្ចេកទេស

ថ្លែងក្នុងពិធីប្រកាសចូលកាន់តំណែង ប្រធានមន្ទីរសាធារណការ និងដឹកជញ្ជូនខេត្តសៀមរាប នារសៀលថ្ងៃទី១៦ ខែកក្កដា ឆ្នាំ២០២៥ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានណែនាំឱ្យថ្នាក់ដឹកនាំ និងមន្ត្រីនៃមន្ទីរសាធារណការខេត្តសៀមរាប ត្រូវបន្តពង្រឹងការងារជួសជុល និងថែទាំហេដ្ឋារចនាសម្ព័ន្ធផ្លូវថ្នល់ ស្ពានក្នុងខេត្ត ប្រកបដោយគុណភាពស្របតាមស្ដង់ដារបច្ចេកទេស និងជំរុញការផ្សព្វផ្សាយច្បាប់ស្តីពីចរាចរណ៍ផ្លូវគោក និងការលើកកម្ពស់សុវត្ថិភាពចរាចរណ៍។

ឯកឧត្តម ប៉េង ពោធិ៍នា ក៏បានជំរុញឱ្យមន្ត្រីទាំងអស់ ត្រូវវខិតខំផ្តល់សេវាសាធារណៈឱ្យបានត្រឹមត្រូវ មានតម្លាភាព ប្រសិទ្ធភាព និងរហ័ស ចៀសវាងកុំមានប៉ះពាល់ដល់ផលប្រយោជន៍ប្រជាពលរដ្ឋ ជាពិសេសប្រកាន់ភ្ជាប់នូវវប្បធម៌សេវាសាធារណៈ និងទិសស្លោក “មន្ត្រីរាជការជាអ្នកបម្រើរាស្ត្រ មិនមែនជាចៅហ្វាយរាស្ត្រនោះទេ” ជាពិសេសត្រូវចាត់វិធានការឱ្យបានម៉ឺងម៉ាត់ក្នុងការទប់ស្កាត់ការដឹកជញ្ជូនលើសទម្ងន់កម្រិតកំណត់។

ឯកឧត្តម ប៉េង ពោធិ៍នា បានគូសបញ្ជាក់ថា វិស័យសាធារណការ និងដឹកជញ្ជូន ជាវិស័យមួយដែលដើរតួយ៉ាងសំខាន់ក្នុងការទ្រទ្រង់ និងអភិវឌ្ឍសេដ្ឋកិច្ចឱ្យមានភាពរឹងមាំ និងមាននិរន្តរភាព បើគ្មានហេដ្ឋារចនាសម្ព័ន្ធរឹងមាំគ្រប់ច្រកល្ហក ប្រទាក់ក្រឡាគ្នាដូចសរសៃឈាមតភ្ជាប់ពីតំបន់មួយទៅតំបន់មួយទៀតនោះទេ ក៏គ្មានការអភិវឌ្ឍដែរ។ ជាមួយនេះ ក៏សូមឱ្យប្រធានមន្ទីរដែលត្រូវបានតែងតាំងថ្មី ត្រូវខិតខំបំពេញការងារអស់ពីកម្លាំងកាយចិត្ត ដើម្បីបន្តដឹកនាំមន្ទីរឱ្យមានការរីកចម្រើនថែមទៀត ត្រូវបម្រើសេវាសាធារណៈជូនប្រជាពលរដ្ឋប្រកបដោយភាពកក់ក្ដៅ គឺធ្វើឱ្យបានលឿន ធ្វើឱ្យមានប្រសិទ្ធភាព និងតម្លាភាព។

លោក លី សារី អភិបាលរងខេត្ត តំណាងឯកឧត្តមប្រាក់ សោភ័ណអភិបាលខេត្តសៀមរាប ក៏បានជំរុញដល់ថ្នាក់ដឹក និងមន្រ្តីនៃមន្ទីរសាធារណការខេត្តទាំងអស់ ត្រូវបន្តរក្សាប្រពៃណីសាមគ្គីភាព និងកិច្ចសហប្រតិបត្តិការផ្ទៃក្នុងល្អ ចេះរួមសុខរួមទុក្ខ កសាងឱ្យបាននូវភាពសុខុដុមរមនា និងចេះជួយគ្នាទៅវិញទៅមកទាំងស្មារតី និងសម្ភារត្រូវរៀនសូត្រពីការងារ និងសិក្សាស្វែងយល់បន្ថែមពិសេស គឺបច្ចេកវិទ្យាឌីជីថល ដើម្បីយើងអាចធ្វើ ការងារបានលឿនឆាប់រហ័ស។

សូមជម្រាបថា លោក លឿម រស្មី ឋានន្តរស័ក្តិមន្ត្រីបច្ចេកទេសជាន់ខ្ពស់ដើមខ្សែ ថ្នាក់លេខ២ នៃក្របខណ្ឌមន្ត្រីបច្ចេកទេសជាន់ខ្ពស់ ត្រូវបានប្រកាសតែងតាំងជាប្រធានមន្ទីរសាធារណការ និងដឹកជញ្ជូនខេត្តសៀមរាប ជំនួស លោក គី វីរិន្ទ ដែលបានចូលនិវត្តន៍៕

អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
#មន្ទីរព័ត៌មានខេត្តសៀមរាប

មន្ត្រីជាង៤០០នាក់ទៀត បានទទួលការបណ្ដុះបណ្ដាលនៅសាលាជាតិរដ្ឋបាលមូលដ្ឋាន ក្នុងខែមិថុនា

ពេញមួយខែមិថុនា ឆ្នាំ២០២៥នេះ សាលាជាតិរដ្ឋបាលមូលដ្ឋាន នៃក្រសួងមហាផ្ទៃ បានបន្តរៀបចំបើកវគ្គបណ្តុះបណ្តាលមន្ត្រីចំនួន៧វគ្គ ដោយមានសិក្ខាកាមចូលរួមសិក្សាសរុបចំនួន៤៤៦រូប ក្នុងនោះមានសិក្ខាកាមជាស្ត្រីចំនួន១៨៣រូប។

លោក ទូច សុឃៈ អ្នកនាំពាក្យរងក្រសួងមហាផ្ទៃ បានឱ្យដឹងថា ក្នុងចំណោមមន្ត្រីទទួលការបណ្ដុះបណ្ដាលក្នុងខែមិថុនានោះ ភាគច្រើនគឺជាមន្ត្រីនៅតាមមូលដ្ឋាន ចាប់ពីថ្នាក់ក្រុមប្រឹក្សាឃុំ សង្កាត់ រហូតដល់រាជធានី ខេត្ត រួមទាំងមន្ត្រីជាប់ឆ្នោតក្រុមប្រឹក្សា។

បើតាមអ្នកនាំពាក្យក្រសួង នៅខែមុខនេះដែរ សាលាជាតិរដ្ឋបាលមូលដ្ឋានក៏បាននិងកំពុងដាក់ឱ្យអនុវត្តសាកល្បងនូវការរៀនសូត្រតាមប្រព័ន្ធអនឡាញ(E-Learning) សម្រាប់ក្រុមគោលដៅជាក្រុមប្រឹក្សាក្រុង ស្រុក និងរៀបចំប្រព័ន្ធព័ត៌មានវិទ្យាសម្រាប់ប្រតិបត្តិការការងារ(NASLA-MIS)។

ការរៀបចំកម្មវិធីសិក្សាកម្រិតបរិញ្ញាបត្ររង បរិញ្ញាបត្រ បរិញ្ញាបត្រជាន់ខ្ពស់ កម្មវិធីសិក្សារយៈពេលខ្លីសម្រាប់សាធារណជន និងកម្មវិធីសិក្សារយៈពេលវែង ក៏មានវឌ្ឍនភាពដែរ ដោយគិតមកដល់ខែមិថុនសម្រេចបានពី៧០%ទៅ៨០% ខណៈកម្មវិធីសិក្សាពិសេសសមមូលទៅនឹងមធ្យមសិក្សាទុតិយភូមិសម្រាប់ក្រុមប្រឹក្សាឃុំ សង្កាត់សម្រេចបាន១៥%។

សាលាជាតិរដ្ឋបាលមូលដ្ឋាន មានតួនាទីអភិវឌ្ឍសមត្ថភាពមន្រ្តីរាជការ ក្រុមប្រឹក្សានៃរដ្ឋបាលថ្នាក់ក្រោមជាតិ សិស្ស និស្សិត និងអ្នកពាក់ព័ន្ធដទៃទៀត សិក្សាស្រាវជ្រាវអំពីអភិបាលកិច្ច ការអភិវឌ្ឍមូលដ្ឋាន ការលើកកម្ពស់ស័្វយភាពមូលដ្ឋាន និងការគ្រប់គ្រងរដ្ឋបាលថ្នាក់ក្រោមជាតិ។

រចនាសម្ព័ន្ធរបស់សាលាជាតិរដ្ឋបាលមូលដ្ឋានមានចំនួន៤ រួមមាន១.នាយកដ្ឋានកិច្ចការទូទៅ ២.នាយកដ្ឋានបណ្ដុះបណ្ដាល ៣.នាយកដ្ឋានផែនការ និងកិច្ចសហប្រតិបត្តិការ ៤.នាយកដ្ឋានស្រាវជ្រាវ និងផ្សព្វផ្សាយ។នេះបើតាម អនុក្រឹត្យស្ដីពីការបង្កើតសាលាជាតិរដ្ឋបាលមូលដ្ឋាន៕SRP
ដោយ កញ្ញា សេង សុខហ៊ុន

ក្នុងខែមិថុនា ឆ្នាំ២០២៥ សមត្ថកិច្ចបង្ក្រាបក្មេងទំនើង និងអ្នកងប់ល្បែងស៊ីសង ជាង៤០០នាក់

ក្នុងរយៈពេលមួយខែមិថុនា ឆ្នាំ២០២៥នេះ សមត្ថកិច្ចក្រសួងមហាផ្ទៃ បន្តបង្ក្រាបក្រុមក្មេងទំនើងនៅទូទាំងប្រទេសបានចំនួន៩០ករណី និងឃាត់ខ្លួនមនុស្សសរុបចំនួន២៨៩នាក់ ស្រី២៧នាក់។ បើតាមអ្នកនាំពាក្យរងក្រសួងមហាផ្ទៃ ក្នុងចំណោមក្មេងទំនើងដែលសមត្ថកិច្ចបង្ក្រាប អ្នកពាក់ព័ន្ធបទល្មើសព្រហ្មទណ្ឌមាន៥១ករណី ស្មើនឹង១៧៦នាក់ ស្រី១៧នាក់ ដោយអ្នកទាំងនោះត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានី-ខេត្ត។ អ្នកពាក់ព័ន្ធមួយចំនួនទៀតសមត្ថកិច្ចអនុវត្តវិធានការរដ្ឋបាល ដោយណែនាំ អប់រំ និងធ្វើកិច្ចសន្យាបញ្ឈប់សកម្មភាពចំនួន ៣៩ករណី ស្មើ១១៣នាក់ និងស្រីចំនួន១០នាក់។

អ្នកនាំពាក្យរង លោក ទូច សុឃៈ បានបន្ថែមឱ្យដឹងថាក្នុងរយៈពេលដូចគ្នានេះ សមត្ថកិច្ចក៏បានបង្ក្រាបករណីអ្នកងប់ងល់នឹងល្បែងស៊ីសងខុសច្បាប់គ្រប់ប្រភេទនៅទូទាំងប្រទេសចំនួន៦២ករណី ដោយឃាត់ខ្លួនមនុស្សចំនួន១៤៩នាក់ មានស្រី៥៧នាក់ រួមទាំងវត្ថុតាងមានជាអាទិ៍ម៉ូតូ១៧គ្រឿង កុំព្យូទ័រ៥គ្រឿង និងសម្ភារផ្សេងមួយចំនួនទៀត។ លោកបានឱ្យដឹងទៀតថា ក្នុងចំណោមការបង្ក្រាបករណីល្បែងស៊ីសងខុសច្បាប់នេះ សមត្ថកិច្ចបានអនុវត្តវិធានការច្បាប់ចំនួន ១៨ករណី មានមនុស្ស៤៥នាក់ ស្រី២០នាក់ និងអនុវត្តលើវិធានការរដ្ឋបាលចំនួន៤៤ករណី មានមនុស្ស ១០៤នាក់ ស្រី៣៧នាក់។

លទ្ធផលនៃការបង្រ្កាបក្រុមក្មេងទំនើង និងល្បែងស៊ីសងខុសច្បាប់ ក្នុងខែមិថុនាកន្លងទៅនេះ បានឆ្លុះបញ្ចាំងអំពីការយកចិត្តទុកដាក់ខ្ពស់ចំពោះសុខសុវត្ថិភាពរបស់ប្រជាពលរដ្ឋគ្រប់មូលដ្ឋាន។ ជាការកត់សម្គាល់ក្នុងរយៈពេលចុងក្រោយនេះ សកម្មភាពល្បែងស៊ីសងបានលេចឡើងមិនត្រឹមតែជាលក្ខណៈប្រពៃណី ដូចជាលេងបៀ អាប៉ោង ជល់មាន់ ឬចាក់កន្ទុយលេខនោះទេ ពោលគឺក្រុមមេល្បែង ពួកកាងល្បែងបានប្រើវិធីសាស្រ្តអូសទាញមនុស្សឱ្យលេងល្បែងតាមប្រព័ន្ធបច្ចេកវិទ្យា ខណៈការទូទាត់ប្រាក់ឈ្នះចាញ់ល្បែងបានធ្វើឡើងយ៉ាងងាយស្រួលតាមមធ្យោបាយធនាគារ។

ដើម្បីជម្នះនិន្នាការបែបនេះ ឯកឧត្តមអភិសន្តិបណ្ឌិត ស សុខា  ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានផ្ដល់ការណែនាំ និងតម្រង់ទិសជាប្រចាំ ឱ្យសមត្ថកិច្ចក្រសួងមហាផ្ទៃ រួមទាំងអាជ្ញាធរមូលដ្ឋានគ្រប់លំដាប់ថ្នាក់ យកចិត្តទុកដាក់ស្រាវជ្រាវបង្ក្រាប និងចាប់ខ្លួន អ្នកពាក់ព័ន្ធយកមកផ្តន្ទាទោស និងអនុវត្តវិធានការស្របតាមច្បាប់។ ដោយឡែកសម្រាប់ករណីក្រុមក្មេងទំនើង បន្ថែមលើកបទបញ្ជាឱ្យបង្ក្រាបយ៉ាងមុឺងម៉ាត់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក៏បានបង្ហើបពីការត្រៀមអនុវត្តច្បាប់ស្ដីពីកាតព្វកិច្ចយោធានៅឆ្នាំ២០២៦ ដោយព្រលយថា ច្បាប់នេះក៏នឹងក្លាយជាយន្តការកាត់បន្ថយក្មេងទំនើងពីក្នុងសង្គមផងដែរ៕SRP
ដោយលោក សេង បូលីន

ខេត្តព្រះវិហារ៖ស្ត្រីជាមន្ត្រីសាលាស្រុកត្បែងមានជ័យម្នាក់និងប្តីជាមន្ត្រីយោធាកំពុងឈរជើងនៅព្រំដែនភ្នំខ្មោច បានប្តឹងទៅក្រសួងមហាផ្ទៃនិងស្ថាប័នតុលាការខេត្តព្រះវិហារ ក្រោយពីរូបនាងត្រូវលោកនុត សោភ័ណ្ឌ អភិបាលស្រុកត្បែងមានជ័យ បៀតកេរខ្មាស់ និងប៉ុនប៉ងចាប់រំលោភ និងគំរាមបណ្តេញចេញពីក្របខណ្ឌមន្ត្រីរាជការបើនាងទម្លាយរឿងនេះ។ ករណីនេះដែរលោកនុត សោភ័ណ្ឌអភិបាលស្រុកត្បែងមានជ័យ បានបំភ្លឺថា រឿងនេះមិនពិតទេវាជាការលាបពណ៌ខ្ញុំ ហើយរឿងនេះក្រុមការងារខាងអធិការកិច្ចនៃក្រសួងមហាផ្ទៃ បានចុះមកស្រាវជ្រាវ៣ថ្ងៃហើយ។

លោកស្រី សួសចាន់ពិសី អាយុ ៣៦ឆ្នាំ មន្ត្រីសាលាស្រុកត្បែងមានជ័យ បានផ្តល់បទសម្ភាសន៍ដល់អ្នកសារព័ត៌មាន នៅរសៀលថ្ងៃទី១៦ខែកក្កដាឆ្នាំ២០២៥នេះថា កាលពីអំឡុងឆ្នាំ២០២២ និងឆ្នាំ២០២៣ ឈ្មោះ នុត សោភ័ណ្ឌ តែងតែឡែបខាយពាក្យសម្តីលួង លោមសុំនាងខ្ញុំធ្វើជាសង្សារជាញឹកញាប់ និងបានលូកលាន់ប៉ះរាងកាយនាងខ្ញុំ ដោយចាប់ចង្កេះ ចាប់ស្មាជាដើម តែនាងខ្ញុំមិនព្រមនោះទេ ព្រោះមានគ្រួសាររៀងខ្លួន នាងខ្ញុំមិនប្រព្រឹត្តអំពើអសីលធម៌បែបនឹងឡើយ ហើយដោយសារតែគិតថាជារឿងបន្តិចបន្តួច ទើបនាងខ្ញុំមិនប្រកាន់ក្រែងបន្តិចទៅគាត់លែងមករំខាននាងខ្ញុំទៀតហើយ។ ប៉ុន្តែ លុះមកដល់ឆ្នាំ២០២៤ គាត់កាន់តែហ៊ានបំពាននាងខ្ញុំលើសដើម ដោយតែងតែឆ្លៀតឱកាសពេលគាត់ហៅជួបពិភាក្សាការងារក្នុងបន្ទប់គាត់ និង នៅបន្ទប់ធ្វើការរបស់នាងខ្ញុំខណៈដែលមិនមានមនុស្សនៅគាត់តែងតែស្ទុះចូល មកអោបថើបនាងខ្ញុំពីក្រោយ ហើយច្របាច់សុដន់នាងខ្ញុំថែមទៀត ដោយអត់ទ្រាំនឹងទង្វើដ៏ថោកទាបបែបនេះមិន បាននាងខ្ញុំបានពិភាក្សាជាមួយមិត្តរួមការងារ(អ្នករងគ្រោះដូចគ្នា និងសាក្សី)ដើម្បីធ្វើការដាក់ពាក្យបណ្តឹងតែដោយ អ្នកខ្លះនិយាយថាអត់មានភស្តុតាង ខ្លាចប៉ះពាល់កិត្តិយស,ខ្សែខ្នងគេចំណាស់ គេអ្នកមាន,គាត់ជិតដល់អាណត្តិកន្លែងផ្សេងហើយអត់ធ្មត់កិចទៅ យើងតូចភាចធ្វើអីមិនឈ្នះគេទេ។ល។ នាងខ្ញុំពិតជាមានការភ័យខ្លាចខ្លាំងណាស់ ខ្លាចអំណាចគេ ខ្លាចខូចកិត្តិយស ខ្លាចគេធ្វើបាប ណាមួយខ្លាចគេបំពាន នាងខ្ញុំត្រូវបង្ខំចិត្តខាំមាត់ សង្កត់ចិត្តទាំងឈឺចាប់ ពិបាកចិត្តស្ត្រេសចង់សតិអារម្មណ៍ ហើយនាងខ្ញុំតែងតែព្យាយាមគេចចេញអោយឆ្ងាយពីគាត់ តែគាត់រឹតតែតាមរបៀតបៀននាងខ្ញុំកាន់តែខ្លាំងឡើងដោយបានធ្វើសកម្មភាពលូកលាន់រាងកាយយនាងខ្ញុំ ដោយហ៊ាន ចាប់ចង្កេះ ចាប់ស្នានៅមុខមិត្តរួមការងារជាច្រើនក្នុងបន្ទប់ធ្វើការរបស់នាងខ្ញុំលែងមានការខ្មាស់អៀន សីលធម៌ក្នុងខ្លួនទាល់តែសោះ(មានសាក្សីរឃើញផ្ទាល់ភ្នែក)។ គាត់មិនបានឈប់ត្រឹមនឹងទេ ដោយកាលពីថ្ងៃទី១៩ ខែវិច្ឆិកា ឆ្នាំ២០២៤ វេលាម៉ោង១២:២២នាទីថ្ងៃត្រង់ ឈ្មោះ នុត សោភ័ណ្ឌ បានគេទូរស័ព្ទផ្ទាល់ខ្លួនមកនាងខ្ញុំ បាននិយាយពាក្យអសុរោះអសីលធម៌ជាច្រើនពាក់ព័ន្ធផ្លូវភេទ ខាងខ្ញុំក៏បានចុចថតសម្លេង តែគាត់ដឹងខ្លួនទាន់ក៏ចុច បិទទូរស័ព្ទភ្លាមៗ។ បន្ទាប់មកនៅវេលាម៉ោងប្រហែលជាង១០ព្រឹក ថ្ងៃទី១២ ខែកុម្ភៈ ឆ្នាំ២០២៥ ឈ្មោះ នុត សោភ័ណ្ឌ បានហៅនាងខ្ញុំទៅយកឯកសារនៅបន្ទប់ធ្វើការរបស់គាត់ ខណៈពេលដែលនាងខ្ញុំដើរចេញមកវិញឈ្មោះ នុត សោភ័ណ្ឌ បានស្ទុះមកអោបនាងខ្ញុំពីក្រោយទាំងមិនដឹងខ្លួន ដៃម្ខាងខ្ទប់មាត់នាងខ្ញុំទាញមុខមកថើបញ៉ក់ញី ដៃម្ខាងទៀតធ្វើសកម្មភាពចាប់សុដន់នាងខ្ញុំច្របាច់យ៉ាងខ្លាំង នាងខ្ញុំបានស្រែកថាមេកុំធ្វើចឹង រួចនាងខ្ញុំខំរើបំរ៉ាស់ខ្លួនរត់ចេញមកក្រៅយ៉ាងលឿនៗ។ ចុងក្រោយនៅល្ងាចថ្ងៃទី២ ខែមេសាឆ្នាំ២០២៥ ការិយាល័យអប់រំស្រុកបានរៀបចំពិធីជប់លៀងជួបជុំមន្ត្រីរាជការ និងគ្រូបង្រៀន ឈ្មោះ ឌុត សោភ័ណ្ឌ ក៏បានចូលរួមដែរ វេលាម៉ោងខ្ទង់៧ទៅ៨យប់ គាត់បានដើរដល់កែវជាមួយភ្ញៀវជាច្រើនក្នុងកម្មវិធី រហូតមកដល់តុខាងខ្ញុំ គាត់បានឈរក្បែរកៅអីនាងខ្ញុំអង្គុយ ម្ខាងកាន់កែវស្រាជល់ ឯដៃម្ខាងទៀតលូកមកចាប់ចង្កេះនាងខ្ញុំ(នាងខ្ញុំមិនច្បាស់ថាមានអ្នកឃើញឬអត់ទេ) ឃើញថ្មី ស្រួលនាងខ្ញុំក៏ងើបដើរចេញ។ ដោយព្រួយបារម្ភណ៍ពីសុវត្ថិភាពផ្ទាល់ខ្លួនខ្លាចថ្ងៃណាមួយបុគ្គលនេះអាចឈាន នេះតទៅ ចាប់នាងខ្ញុំរំលោភសេពសន្ថវៈ នាងខ្ញុំអស់ការអត់ធ្មត់នឹងទង្វើថោកទាប និងអសីលធម៌ របស់បុគ្គលនេះតទៅទៀត ទើបនាងខ្ញុំសម្រេចចិត្តប្តឹងបុគ្គលនេះទៅតាមផ្លូវច្បាប់ នាងខ្ញុំសង្ឃឹមយ៉ាងមុតមាំថាផ្លូវច្បាប់នឹងផ្តល់យុត្តិធម៌ដល់រូបនាងខ្ញុំ។ នាងខ្ញុំមានការឈឈចាប់ សុំប្តឹងឈ្មោះនុត សោភ័ណ្ឌ នាងខ្ញុំមានការឈឺចាប់ក្នុងចិត្តជាខ្លាំង សូមប្តឹងទាមទារអោយច្បាប់ធ្វើការផ្តន្ទាទោស បុគ្គលខាងលើ ទៅតាមផ្លូវច្បាប់ និងសូមទាមទារអោយឈ្មោះ នុត សោភណ្ឌ សងជំងឺចិត្តមកនាងខ្ញុំជាទឹកប្រាក់ចំនួន ១០០,០០០,០០០រៀល (មួយរយលានរៀល)។

ជុំវិញការចោទប្រកាន់នេះ ចំណែកលោកនុត សោភ័ណ្ឌ អភិបាលស្រុកត្បែងមានជ័យ បានឲ្យដឹងតាមប្រព័ន្ធតេលេក្រាម ប្រាប់អ្នកសារព័ត៌មាន នៅថ្ងៃទី ១៦ខែកក្កដាឆ្នាំ ២០២៥ នេះថា ពាក់ព័ន្ធនិងករណីនេះ មិនពិតទេវាជាការលាបពណ៌ខ្ញុំ ក្រសួងមហាផ្ទៃបានចុះមកស្រាវជ្រាវ៣ថ្ងៃហើយ។ ពីថ្ងៃទី៧ដល់ថ្ងៃទី៩ កក្កដានៅស្រុក២ថ្ងៃនៅខេត្ត១ថ្ងៃ បណ្តឹងនេះក៏ស្ថិតនៅក្នុងសាលាដំដូងខេត្តដែរ។ លោកបញ្ចាក់ថា ការប្តឹងនេះគឺមកពីគេចង់បានលុយដូរឡាន។

ពាក់ព័ន្ធនឹងករណីនេះដែរអាជ្ញាធរខេត្តព្រះវិហារ បានឲ្យដឹងថា ក្នុងករណីនេះថ្នាក់ដឹកនាំនៃក្រសួងមហាផ្ទៃ កំពុងស្រាវជ្រាវយ៉ាងយកចិត្តទុកដាក់ដើម្បីរកយុត្តិធម៌ឲ្យជនរងគ្រោះ៕SRP

ករណីបើករថយន្តបុកមនុស្សស្លាប់ សាលាដំបូងខេត្តព្រៃវែង បានចេញដីកាអញ្ជើញ លោក ណាំ សុវណ្ណារ៉ា នាយប៉ុស្ដិ៍ច្រកទ្វារអន្តរជាតិបន្ទាយចក្រី ចូលបំភ្លឺ

ករណីបើករថយន្តបុកមនុស្សស្លាប់ នៅចំណុចលើផ្លូវកៅស៊ូ ៣១២ ចន្លោះKm 27-28 ស្ថិតនៅភូមិ កកា ឃុំបន្ទាយចក្រី ស្រុកព្រះស្ដេច ខេត្តព្រៃវែង កាលពីថ្ងៃទី២៣ ខែកុម្ភៈ ឆ្នាំ២០២៥ ត្រូវបានសាលាដំបូងខេត្តព្រៃវែង បានចេញដីកាអញ្ជើញ លោក ណាំ សុវណ្ណារ៉ា ជានាយប៉ុស្ដិ៍ច្រកទ្វារអន្តរជាតិបន្ទាយចក្រី មានទីតាំងស្ថិតនៅភូមិ កកា ឃុំបន្ទាយចក្រី ស្រុកព្រះស្ដេច ខេត្តព្រៃវែង ដើម្បីចូលបំភ្លឺ៕SRP

ឯកឧត្តម នួន ផារ័ត្ន បានដាក់បទបញ្ជាដល់អាជ្ញាធរមូលដ្ឋានក្រុងស្រុក និងមន្ទីរដែលពាក់ព័ន្ធ រួមគ្នាបើកយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា (ONLINE SCAMS) ប្រឹងប្រែងអស់ពីសមត្ថភាព លទ្ធភាព និងមានភាពស្មោះត្រង់

ខេត្តកំពង់ធំ៖ឯកឧត្តម នួន ផារ័ត្ន អភិបាលខេត្តកំពង់ធំ និងជាប្រធានគណៈបញ្ជាការឯកភាពឯកភាពរដ្ឋបាលខេត្ត បានដាក់បទបញ្ជាដល់អាជ្ញាធរមូលដ្ឋានក្រុងស្រុក និងមន្ទីរដែលពាក់ព័ន្ធ រួមគ្នាបើកយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា (ONLINE SCAMS) ប្រឹងប្រែងអស់ពីសមត្ថភាព លទ្ធភាព និងមានភាពស្មោះត្រង់ ដោយមិនឱ្យកើតមានល្បែងអនឡាញនេះក្នុងភូមិសាស្ត្រខេត្តកំពង់ធំ ជាដាច់ខាត។

ការដាក់បទបញ្ជានេះ ថ្លែងនៅក្នុងកិច្ចប្រជុំគណៈបញ្ជាការឯកភាពបើកទូលាយ ដោយមានការចូលរួមដោយផ្ទាល់ និងអនឡាញ ពីឯកឧត្តមស្នងការនគរបាលខេត្ត ឯកឧត្តមមេបញ្ជាការងករាជអាវុធហត្ថខេត្ត លោកអភិបាលក្រុង-ស្រុក លោកអធិការនគរបាលក្រុង-ស្រុក មេបញ្ជាការមូលដ្ឋានកងរាជអាវុធហត្ថ ក្រុង-ស្រុក មេឃុំ-ចៅសង្កាត់ នាយប៉ុស្តិ៍នគរបាលឃុំ-សង្កាត់ ដើម្បីរួមគ្នាអនុវត្តបទបញ្ជារបស់ប្រមុខរាជរដ្ឋាភិបាល ស្តីពីយុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យា ឱ្យទទួលបានប្រសិទ្ធភាព នាព្រឹកថ្ងៃទី១៦ ខែកក្កដា ឆ្នាំ២០២៥ នៅសាលប្រជុំសាលាខេត្តកំពង់ធំ៕SRP

នាយករដ្ឋមន្ត្រី ចេញបទបញ្ជាឲ្យបោសសម្អាតការឆបោកតាមប្រព័ន្ធបច្ចេកវិទ្យា (ONLINE SCAMS)

ក្រុមហ៊ុន CAMBODIAN NOBLE TASTE FOOD CO., LTD.មិនទាន់អាចបើកដំណើរផលិតកម្មឡើងវិញបានទេ ត្រូវបំពេញវិធានការច្បាប់បន្ថែម

ឯកឧត្តម ខ្វៃ អាទិត្យា អនុរដ្ឋលេខាធិការក្រសួងបរិស្ថាន នៅថ្ងៃទី២៣ ខែមិថុនា ឆ្នាំ២០២៥ បានដឹកនាំក្រុមការងារសុក្រឹត្យកម្មបរិស្ថានកិច្ចលើភាពស្អាត នៃអគ្គនាយកដ្ឋានគាំពារបរិស្ថាន ដោយមានការចូលរួមពីលោក ជូ មុនីដារិន អគ្គនាយករង នៃអគ្គនាយកដ្ឋានគាំពារបរិស្ថាន តំណាងមន្ទីរបរិស្ថានខេត្តព្រះសីហនុ មេឃុំទឹកថ្លា មន្រ្តីប៉ុស្ដ៍នគរបាលរដ្ឋបាលឃុំទឹកថ្លា ស្រុកព្រៃនប់ ខេត្តព្រះសីហនុ និងមេធាវីរបស់ក្រុមហ៊ុន បានចុះត្រួតពិនិត្យការអនុវត្តវិធានការច្បាប់ដែលក្រសួងបរិស្ថានបានដាក់ចេញ ចំពោះក្រុមហ៊ុន CAMBODIAN NOBLE TASTE FOOD CO., LTD. ប្រភេទកែច្នៃស្បែកគោ ដែលមានអាសយដ្ឋាននៅឃុំទឹកថ្លា ស្រុកព្រៃនប់ ខេត្តព្រះសីហនុ។ ក្រុមការងារបានរកឃើញ ស្ថានភាពទឹកព្រែកសង្កែនៅទីតាំងសំខាន់ៗក្បែក្រុមហ៊ុន ចំនួន៤ មានលក្ខណៈធម្មតា ពុំមានក្លិនស្អុយនោះទេ។ លទ្ធផលតេស្ដបឋម នៅទីតាំងទាំង៤ខាងលើ ឃើញថាប៉ារ៉ាម៉ែត្រ pH, DO និង COD ស្ថិតនៅក្នុងកំរិតស្ដង់ដារ
-ក្រុមការងារបានយកសំណាកទឹក មកវិភាគបន្តនៅមន្ទីរពិសោធន៍ក្រសួងបរិស្ថាន ដើម្បីធ្វើការផ្ទៀងផ្ទាត់។
ដោយឡែក ការត្រួតពិនិត្យនៅក្នុងទីតាំងក្រុមហ៊ុន ក្រុមការងារបានពិនិត្យឃើញថា ក្រុមហ៊ុនបានផ្អាកសកម្មភាពផលិតកម្មជាបណ្តោះអាសន្ន និងគ្មានការបង្ហូរសំណល់រាវចេញពីទីតាំងក្រុមហ៊ុនទេ។ អាងប្រព្រឹត្តិកម្មទឹកកក្ខក់ ពុំមានដំណើរការនោះទេ។  ក្រុមហ៊ុនបានធ្វើការបិទភ្ជិតប្រព័ន្ធលូ ដែលពីមុនក្រុមហ៊ុនប្រើប្រាស់សម្រាប់បង្ហូរសំណល់រាវចូលព្រែកសង្កែបានរួចរាល់។ ក្រុមការងារបានពិនិត្យតាមព្រៃកោងកាងជាប់របងក្រុមហ៊ុនឃើញថា ពុំមានកំណកខ្លាញ់ ឬ ប្រេងកកជាប់នឹងឬសកោងកាង និងពុំមានក្លិនស្អុយដូចមុនទៀតនោះទេហើយដើមកោងកាងបានលូតលាស់ឡើងវិញ។

សូមបញ្ជាក់ថា ក្រុមហ៊ុនបានកំពុងអនុវត្តវិធានការច្បាប់ ដែលបានកំណត់ក្នុងលិខិតលេខ៩៧/០១២៥ ប.ស្ថ/អគព ចុះថ្ងៃទី៩ ខែមករា ឆ្នាំ២០២៥ របស់ក្រសួងបរិស្ថាន។

ឆ្លើយតបនឹងចំណុចមិនទាន់បានបំពេញទាំងនេះ ក្រុមការងារបានបន្តតម្រូវឲ្យក្រុមហ៊ុន អនុវត្តវិធានការ មួយចំនួនដូចខាងក្រោម៖
១.ក្រុមហ៊ុនត្រូវពន្លឿនការដំឡើងបរិក្ខារ នៅក្នុងអាងប្រព្រឹត្តិកម្មសម្អាតសំណល់រាវ ឱ្យបានឆាប់រួចរាល់ និងរាយការណ៍ជូនក្រសួងបរិស្ថាន ដើម្បីក្រសួងបរិស្ថានចុះត្រួតពិនិត្យ និងវាយតម្លៃ មុននឹងក្រុមហ៊ុនដាក់ឱ្យ អាងប្រព្រឹត្តិកម្មដំណើរការឡើងវិញ។
២.ត្រូវទុកដាក់ និងគ្រប់គ្រងសំរាម សំណល់រឹងឱ្យបានត្រឹមត្រូវតាមលក្ខណៈបច្ចេកទេស និងសហការជាមួយក្រុមហ៊ុនផ្ដល់សេវាប្រមូល និងដឹកជញ្ជូន ដោយមានការទទួលស្គាល់ពីអាជ្ញាធរមានសមត្ថកិច្ច៕SRP