Siem Reap Post – Page 624 – Siem Reap News, Cambodia News

ខេត្តកំពង់ចាម៖លោកវេជ្ជបណ្ឌិត គឹម សួរភីរុណ ប្រធានមន្ទីរសុខាភិបាលខេត្តកំពង់ចាម នៅព្រឹកមិញនេះបាននាំយកនូវថវិការួមរបស់មន្ត្រីសុខាភិបាល ចំនួន៥.១៦០.០០០៛ សម្រាប់ផ្តល់ជូនគណៈកម្មការប្រយុទ្ធនឹងជំងឺកូវីដ១៩ ខេត្តកំពង់ចាម ដែលជាការចូលរួមចំណែកជាមួយរាជរដ្ឋាភិបាល ក្នុងការបង្ការទប់ស្កាត់ការរីករាលដាលនៃជំងឺកូវីដ១៩។
លោកអ៊ុន ចាន់ដា អភិបាលខេត្តកំពង់ចាម បានថ្លែងអំណរគុណដល់មន្ត្រីនៃមន្ទីរសុខាភិបាលខេត្តកំពង់ចាម ទាំងអស់ ដែលបានចូលរួមចំណែកឧបត្ថម្ភជាថវិកា សម្រាប់គណៈកម្មការប្រយុទ្ធនឹងជំងឺកូវីដ១៩ ខេត្តកំពង់ចាម យកទៅប្រេីប្រាស់ តាមតម្រូវការចាំបាច់ ក្នុងយុទ្ធនាការនានា ដេីម្បីរួមគ្នាបង្ការទប់ស្កាត់ការរីករាលដាលនៃជំងឺកូវីដ១៩ ដែលមន្ត្រីសុខាភិបាលជាកងទ័ពជួរមុខយ៉ាងសំខាន់ ក្នុងការប្រយុទ្ធប្រឆាំងទប់ស្កាត់ការរាតត្បាតនៃជំងឺដ៏កាចសាហាវនេះ។
លោកវេជ្ជបណ្ឌិត គឹមសួរ ភីរុណ ប្រធានមន្ទីរសុខាភិបាលខេត្តកំពង់ចាម បានឲ្យដឹងថា កន្លងមកនេះមន្ត្រីសុខាភិបាល បានធ្វើការផ្សព្វផ្សាយ សភាពការណ៍ និងធ្វើបច្ចុប្បន្នភាពពីករណី COVID ១៩ នៅក្នុងខេត្តកំពង់ចាម បានគ្រប់គ្រងសភាពការណ៍ ដោយចុះស្រង់ស្ថិតិ ពលករចំណូលស្រុកជាប្រចាំរៀងរាល់ថ្ងៃ ដើម្បីធ្វើការតាមដាន អប់រំ ពីអនាម័យ ការបង្ការចម្លងមេរោគ (ក្នុងករណីសង្ស័យ) ត្រូវទុកដាក់ដោយឡែកចំនួន១៤ថ្ងៃ ដើម្បីចៀសវាងការចម្លង ជាសហគមន៍ដែលជាបញ្ហាព្រួយបារម្ភ។ បានត្រៀមលក្ខណៈទុកជាមុន ចំពោះករណី ពលករចំណូលមកពីប្រទេសជិតខាង ដោយមានអគារសម្រាប់ទុកដាក់ករណីសង្ស័យ ដែលមាននៅមន្ទីរពេទ្យខេត្ត សណ្ឋាគារមេគង្គ និងសាលាគរុកោសល្យ ភូមិភាគកំពង់ចាុម សរុបជាង ៥០០គ្រែ។ ព្រមទាំងបានបរិច្ចាគថវិកាដោយស្ម័គ្រចិត្តរបស់ថ្នាក់ដឹកនាំ មន្ត្រីរាជការរបស់យើង ក្នុងការជួយឩបត្ថម្ភដល់ គណៈកម្មការជាតិកូវីត១៩ ក៏ដូច គណៈកម្មការខេត្តគ្រប់គ្រងកូវីត១៩ផងដែរ៕SRP

ខេត្តសៀមរាប៖អាជ្ញាធរ ក្រុងសៀមរាប ប្រកាសទុកពេល១៥ថ្ងៃ ឲ្យអ្នកពាក់ព័ន្ធ ទាំងអស់ ត្រូវធ្វើការរុះរើ ការរំលោភចញ្ចើមដី សាធារណ: និងការលក់ដូរលើសួន។ នេះបើតាមសេចក្ដីជូនដំណឹង។
រដ្ឋបាលក្រុងសៀមរាប សូមជូនដំណឹងដល់សាធារណជនជ្រាបថា រដ្ឋបាលខេត្តបាននិងកំពុងបន្តការរៀបចំហេដ្ឋារចនាសម្ព័ន្ធផ្លូវថ្នល់ក្នុងឆ្នាំ២០២០ក្នុងក្រុងសៀមរាបឱ្យកាន់តែប្រសើរឡើង។

ដើម្បីឱ្យដំណើរការអនុវត្តគម្រោងខាងលើមានប្រសិទ្ធភាពនិងមានភាពរលូន សូមអ្នកពាក់ព័ន្ធទាំងអស់ត្រូវធ្វើការរុះរើសំណង់តូប សំយាប ខឿន ខ្សាច់ ថ្ម ការ៉ូឡា ឥដ្ឋ បណ្តាញខ្សែភ្លើងដែលធ្លាក់រាយប៉ាយ សួនច្បារ សម្ភារ និងសំណង់ផ្សេងៗទាំងអស់ ព្រមទាំងបញ្ឈប់ការលក់ដូរនៅលើសួនច្បារ និងផ្លូវសាធារណៈខាងលើឱ្យអស់ក្នុងរយៈពេល ១៥ថ្ងៃ គិតចាប់ពីថ្ងៃចុះហត្ថលេខានេះជាកំហិត។

ព័ត៌មានលម្អិតសូមអានសេចក្តីជូនដំណឹងខាងក្រោម៖SRP

Sponsored

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម និងលោកខ្លូត ផន ប្រធានក្រុមប្រឹក្សាខេត្ត នៅព្រឹកមិញនេះបានអញ្ជើញចុះសាកសួរសុខទុក្ខ កម្មករ កម្មការនីនិយោជិត ក្រុមហ៊ុនមេតថេត ស្រុកកំពង់សៀម ប្រមាណជិត៤០០០នាក់ ដែលកំពុងបំពេញការងារជាធម្មតា ដូចរោងចក្រនានា និងមន្ត្រីរាជការ នៅទូទាំងខេត្តកំពង់ចាម តាមការណែនាំរបស់រាជរដ្ឋាភិបាល ដេីម្បីចូលរួមបង្ការទប់ស្កាត់ការរីករាលដាលនៃជំងឺកូវីដ១៩ នៅកម្ពុជា។

ឆ្លៀតក្នុងឱកាសនោះដែរ លោកអ៊ុន ចាន់ដា អភិបាលខេត្តកំពង់ចាម បានថ្លែងអំណរគុណ ចំពោះ ក្រុមហ៊ុនមេតថេត ដែលបានសហការ ចូលរួមចំណែកជាមួយរាជរដ្ឋាភិបាលកម្ពុជា ក្នុងការអនុវត្តនូវវិធានការ បង្ការទប់ស្កាត់ការរាត្បាត នៃជម្ងឺកូវីដ១៩ ជាពិសេស បានណែនាំអប់រំដល់កម្មករ និយោជិត ឲ្យមកបំពេញការងារ ទៅតាមតួនាទី ភារកិច្ចរៀងៗខ្លួន ប្រកបដោយការទទួលខុសត្រូវ និងទឹកចិត្តសប្បាយរីករាយ ព្រមទាំងបានធ្វើការអប់រំណែនាំ ឲ្យមានការចូលរួមថែរក្សាអនាម័យ តាមរយៈ ការលាងដៃជាមួយសាប៊ូ ឬអាល់កុល និងការវាស់កំដៅមុនពេលចូលធ្វើការ ដើម្បី បង្ការការឆ្លង នៃជម្ងឺកូវីដ ១៩ ទៅអ្នកដទៃ ដែលកំពុងបំរើការងារនៅក្នុងរោងចក្រ។
លោកអភិបាលខេត្ត បានសង្កត់ធ្ងន់ថា បើទោះបីជាពេលនេះ ខេត្តកំពង់ចាម បានបិទការព្យាបាលជម្ងឺកូវីដ១៩ យ៉ាងណាក្ដី តែយើងទាំងអស់គ្នា នៅតែបន្តការប្រុងប្រយ័ត្នជានិច្ច ជាពិសេស ការអនុវត្តទៅតាមការណែនាំ របស់ក្រសួងសុខាភិបាល ដើម្បី បញ្ជៀសការឆ្លង នៃមេរោគ ដ៏កាចសាហាវ មួយនេះ ឲ្យខាងតែបាន។
ជាមួយគ្នានោះ លោកអភិបាលខេត្ត ក៏បានថ្លែងអំណរគុណ ចំពោះ រោងចក្រ Medtecs ដែលកន្លងមក បានជួយឧបត្ថម្ភ នូវម៉ាស់ និងសម្លៀកបំពាក់មួយចំនួន ដល់គណៈកម្មការប្រយុទ្ធនឹងជំងឺកូវីដ ១៩ ខេត្តកំពង់ចាម សម្រាប់ផ្ដល់ជូនក្រុមគ្រូពេទ្យ នៅក្នុងខេត្តកំពង់ចាម ដើម្បី ផ្ដល់សេវាព្យាបាលថែទាំអ្នកជម្ងឺកូវីដ១៩ ដែលមកសម្រាកព្យាបាល នៅមន្ទីរពេទ្យខេត្តកំពង់ចាម ផងដែរ។

សូមបញ្ជាក់ថា បច្ចុប្បន្ន នៅទូទាំងខេត្តកំពង់ចាម មានរោងចក្រធំៗ សរុបចំនួន ១៧កន្លែង និងមានកម្មករសរុបចំនួន ៣២.៨៦៨នាក់ ។ ដោយឡែក រោងចក្រ (MEDTECS Cambodia Corp Limited) មានកម្មករសរុបចំនួន ៣.៥៤៦នាក់ ស្រី ៣.២៧៥នាក់ ។ បច្ចុប្បន្ន រោងចក្រមួយនេះ បានផលិតសម្ភារៈផ្នែកវេជ្ជសាស្ត្រ មានដូចជា សម្លៀកបំពាក់ការពារ សម្រាប់គ្រូពេទ្យ ជាដើម ដោយនាំចេញទៅលក់ នៅក្រៅប្រទេស នៅក្នុងពិភពលោក ។ ដោយឡែក បច្ចុប្បន្ននេះ ដោយសារតែកម្ពុជាទទួលរងផលប៉ះពាល់ជម្ងឺកូវីដ ១៩ ក្រុមហ៊ុន ក៏បានផ្គត់ផ្គង់ នូវសម្ភារៈពេទ្យមួយចំនួន ទៅឲ្យក្រសួងសុខាភិបាលកម្ពុជាប្រើប្រាស់ ផងដែរ៕SRP

ខេត្តសៀមរាប៖មនុស្សបីនាក់ត្រូវបានចាប់ខ្លួន ក្រោយធ្វើសកម្មភាពលួចកាណូតចំនួនពីរគ្រឿង។
យោងតាមរបាយការណ៍របស់សមត្ថកិច្ចបានឲ្យដឹងថានៅវេលាម៉ោង១០និង៣០ថ្ងៃទី១៥ខែមេសាឆ្នាំ២០២០ ដោយបានទទួលបណ្តឹងតាមទូរស័ព្ទពីជនរងគ្រោះ យឹម យិច ភេទប្រុស រស់នៅភូមិគោកក្តុល ឃុំកំពង់ភ្លុក ស្រុកប្រាសាទបាគង ខេត្តសៀមរាប ដោយបានរាយការណ៍ប្រាប់សមត្ថកិច្ចថា មានករណី៖ អំពើលួច កាណូតចំនួន០២គ្រឿង៖
១/.បណ្តោយប្រវែង ៦,៩ម៉ែត្រ ទទឹង ១,២ម៉ែត្រ ពណ៌សលាយក្រហម បំពាក់ដោយម៉ាស៊ីន ហ៊ីណូតា ១៨សេះ។
២/.បណ្តោយប្រវែង ៦,៩ម៉ែត្រ ទទឹង ១,២ម៉ែត្រពណ៌បៃតង បំពាក់ដោយម៉ាស៊ីន យានដាយ១៨សេះ។
នៅភូមិគោកក្តុល ឃុំកំពង់ភ្លុក ស្រុកប្រាសាទបាគង ខេត្តសៀមរាប។
របាយការណ៍បានបញ្ជាក់ថានៅពេលទទួលបណ្តឹងខាងលើ ភ្លាមៗនោះកម្លាំង
ស្នាក់ការបេ៨.២ ចំនួនពីរនាក់ ដឹកនាំដោយលោក អនុសេនីយ៍ឯក ផល គឹមណាន ប្រធានស្នាក់ការបេ៨.២ សហការជាមួយកម្លាំងប៉ុស្តិ៍នគរបាលរដ្ឋបាលកំពង់ភ្លុក ចំនួនពីរនាក់, ប្រជាការពារចំនួន១០នាក់ និងក្រុមប្រឹក្សាឃុំកំពង់ភ្លុកចំនួនពីរនាក់ បានដេញចាប់ប្រផាប់ប្រភីង ទើបនៅម៉ោង២៣និង៣០ នាទី ថ្ងៃទីខែឆ្នាំដដែល ទើបកម្លាំងចម្រុះ
ឃាត់ខ្លួនជនសង្ស័យបានចំនួនបីនាក់៖
ទី០១.ឈ្មោះ យ៉ត អ៊ាងម៉ូលី ភេទប្រុស អាយុ២៥ឆ្នាំ រស់នៅភូមិគោកក្តុល ឃុំកំពង់ភ្លុក ស្រុកប្រាសាទបាគង ខេត្តសៀមរាប ។
ទី០២. ឈ្មោះ ជា ទុង ភេទប្រុស អាយុ ២៧ឆ្នាំ រស់នៅភូមិអូតាពុត ឃុំកំពង់ឃ្លាំង ស្រុកសូទ្រនិគម ខេត្តសៀមរាប។
ទី០៣. ឈ្មោះ ហួរ ចម្រើន ភេទប្រុស ២៧ឆ្នាំ រស់នៅភូមិអូតាពុត ឃុំកំពង់ឃ្លាំង ស្រុកសូទ្រនិគម ខេត្តសៀមរាប។
ក្រោយឃាត់ខ្លួន ដកហូតវត្ថុតាង៖ កាណូតស្មាច់ចំនួនបីគ្រឿង៖
១/. បណ្តោយ ប្រវែង៦,៩ម៉ែត្រទទឹង ១,ម៉ែត្រ ពណ៌សលាយក្រហម បំពាក់ដោយម៉ាស៊ីនហ៊ីណូតា១៨សេះ។
២/.បណ្តោយប្រវែង៦,៩ម៉ែត្រទទឹង ១,២ម៉ែត្រពណ៌បៃតង បំពាក់ដោយម៉ាស៊ីន យានដាយ១៨សេះ។
៣/បណ្តោយប្រវែង៦,៩ម៉ែត្រទទឹង ១,២ម៉ែត្រពណ៌បៃតង បំពាក់ដោយម៉ាស៊ីន កាវ៉ា១៨សេះ។
បច្ចុប្បន្នជនសង្ស័យ និងវត្ថុតាង បានឃាត់ នៅអធិការដ្ឋាននគរបាលស្រុកប្រាសាទបាគង ចាត់ការតាមនីតិវិធី៕SRP

ភ្នំពេញ៖ សម្ដេចតេជោហ៊ុនសែន នាយករដ្ឋមន្ត្រី បានបញ្ជាក់ថាសូមបងប្អូនប្រជាពលរដ្ឋបើកបរមានការប្រុងប្រយ័ត្នខ្ពស់បំផុតទាំងសុវត្ថិភាពចរាចរណ៍ និងសុវត្ថិភាពសុខភាពផ្ទាល់ខ្លួនដោយសារថ្ងៃនេះអាចមានអ្នកធ្វើដំណើរច្រើនតាមដងផ្លូវ ដូច្នេះសូមបងប្អូនប្រជាពលរដ្ឋ ជាពិសេសអ្នកបើករថយន្តតាក់ស៊ី និងរថយន្តដឹកទំនិញធំៗ សូមបើកបរដោយមានការប្រុងប្រយ័ត្នខ្ពស់ និងគោរពច្បាប់ចរាចរណ៍ ដើម្បីសុវត្ថិភាពទាំងអស់គ្នា។

ទន្ទឹមនឹងនេះដែរ សូមបងប្អូនប្រជាពលដ្ឋនិងកូនក្មួយកម្មករកម្មការនីយកចិត្តទុកដាក់ចេះការពារសុខភាពផ្ទាល់ខ្លួនកុំអោយឆ្លងរោគកូវីដ-១៩ ដោយពាក់ម៉ាស និងឧស្សាហ៍ដុសលាងសម្អាតដៃជាមួយទឹកអាល់កុលឬជិលកម្ចាត់មេរោគ ជាពិសេសក្នុងពេលជិះរថយន្តជាមួយអ្នកធ្វើដំណើរច្រើននាក់ជុំគ្នាក្នុងរថយន្តឈ្នួលតែមួយ។

សូមអរគុណសារជាថ្មីដល់បងប្អូនជនរួមជាតិដែលបានយោគយល់ដល់កាដាក់បម្រាមមិនអោយធ្វើដំណើរឆ្លងកាត់ខេត្តបណ្តោះអាសន្នរយៈពេលខ្លីកន្លងទៅនេះ ដើម្បីបង្ការទប់ស្កាត់ការឆ្លងរាលដាលជំងឺកូវីឌ -១៩ នៅក្នុងប្រទេសជាតិយើង។

ក្នុងឱកាសចូលឆ្នាំថ្មីប្រពៃណីជាតិ ២០២០ នេះ សូមជូនពរបងប្អូនជនរួមជាតិទាំងក្នុង និងក្រៅប្រទេស ព្រមទាំងមន្រ្តីរាជការ និងកងកម្លាំងប្រដាប់អាវុធដែលកំពុងឈរជើងនៅតាមព្រំដែនមានសុខភាពល្អ ព្រមទាំងពរ៥ប្រការគឺអាយុ វណ្ណៈ សុខៈ ពលៈ និងបដិភាណៈកុំបីឃ្លៀងឃ្លាតឡើយ៕SRP

ខេត្តសៀមរាប៖ សូមចូលរួមគោរពច្បាប់ចរាចរណ៍ បុរសម្នាក់ បើកម៉ូតូ បុកបង្គោលខ្សែភ្លើង នៅស្រុកបន្ទាយស្រី បណ្ដាលឲ្យស្លាប់ភ្លាមៗ។ ហេតុការណ៍បានកើតឡើងថ្ងៃទី១៥ ខែ មេសា ឆ្នាំ២០២០ វេលាម៉ោង១៩ និង ២០ នាទី ត្រង់ចំណុច ខាងជើង ភ្នំតូចចម្ងាយ ១៥០ ម៉ែត្រ ស្ថិតនៅភូមិ ស្គន់ ឃុំត្បែង ស្រុកបន្ទាយស្រី ខេត្តសៀមរាប។

អធិការដ្ឋាននគរបាលស្រុកបន្ទាយស្រី លោកវរសេនីយ៍ឯក ឡុង សំណាងបានឲ្យដឹងនៅព្រឹកនេះថា គ្រោះថ្នាក់ចរាចរណ៍នេះ បង្កឡើង ដោយ ខ្លួន ឯង ដោយជនរងគ្រោះ បើកម៉ូតូមួយគ្រឿង ម៉ាក ហុងដា ឌ្រីម ពណ៌ ខ្មៅ ពាក់ស្លាកលេខ ភ្នំពេញ១HI៣១១០ ឈ្មោះ ពុំ សាលូ ភេទប្រុស អាយុ ២០ ឆ្នាំ រស់នៅ ភូមិ តានី ឃុំ រុន តាឯក ស្រុកបន្ទាយស្រី ខខេត្តសៀមរាប។ បេីកបរ មាន ទិសដៅ ពី ត្បូង ទៅ ជើង ក្នុង ល្បឿន លឿន ក៏ ទៅ បុក ចំ បង្គោល ខ្សែ ភ្លើង បណ្តាលអោយស្លាប់នៅនិងកន្លែង។ខូចខាតម៉ូតូ មួយគ្រឿងធ្ងន់។ លោកវរសេនីយ៍ឯក ឡុង សំណាង បានបញ្ជាក់ថាមូលហេតុមកពីអ្នកបេីកបរម៉ូតូ ល្បឿនលឿន។បេីកបរ ក្នុង ស្ថានភាព ស្រវឹង ៕SRP

Sponsored

ភ្នំពេញ៖ យោងតាមផេកផ្លូវការ របស់សម្ដេចតេជោហ៊ុនសែន បានបញ្ជាក់យ៉ាងដូច្នេះថា៖ *Profile និង Page ផ្លូវការ សម្តេចតេជោនាយករដ្ឋមន្រ្តី គឺមានតែមួយគត់។

ក្នុងពេលដែលរាជរដ្ឋាភិបាលកម្ពុជាបានដាក់ចេញនូវយុទ្ធសាស្រ្តប្រយុទ្ធប្រឆាំងនឹងជំងឺកូវីដ-១៩ ក៏មានជនអគតិមួយចំនួនបានប្រឌិតនូវព័ត៌មានមិនពិតជាច្រើនដើម្បីបំពុលសង្គមជាតិ។ ទន្ទឹមនឹងនោះ ក៏មានជនអគតិមួយចំនួនបានលួចបង្កើត Profile និង Page មិនពិតជាច្រើនក្នុង facebook ដាក់ឈ្មោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្នុងចេតនាមិនល្អដោយបានបង្ហោះសារ និងព័ត៌មានបោកប្រាស់បំភ័ន្តភ្នែកសាធារណៈជនជាច្រេីន។

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា មាន Profile និង Page ផ្លូវការតែមួយគត់ ក្នុង Facebook ដែលមានសញ្ញាគូសធិក (tick) ពណ៍ខៀវ ដែលបញ្ជាក់ថាពិត (Verified) ពីក្រុមហ៊ុន facebook [ https://www.facebook.com/hunsencambodia/ ] ។ ក្រៅពីនោះគឺសុទ្ធតែជា Profile និង Page ក្លែងក្លាយទាំងអស់។

សូមបងប្អូនជនរួមជាតិប្រើប្រាស់បណ្តាញសង្គម facebook មានការទទួលខុសត្រូវនឹងប្រុងប្រយ័ត្នខ្ពស់ ហើយកត់សម្គាល់ Profile/Page ពិត និង Profile/Page ក្លែងក្លាយដែលដាក់ឈ្មោះ សម្តេចតេជោ ហ៊ុន សែន កំពុងបង្ហោះសារ និងព័ត៌មានមិនពិតដែលធ្វើអោយប៉ះពាល់យ៉ាងធ្ងន់ធ្ងរដល់កិត្តិយសនិងសេចក្តីថ្លៃថ្នូររបស់ប្រមុខដឹកនាំ។
សូមក្រសួងជំនាញស្រាវជ្រាវពិនិត្យនិងបិទ Profile/Page ក្លែងក្លាយទាំងនោះជាបន្ទាន់ ដើម្បីកុំអោយបន្តផ្សព្វផ្សាយសារនិងព័ត៍មានបោកបញ្ឆោតបំពុលបរិកាសសង្គមជាបន្តទៀត៕SR

ខេត្តសៀមរាប៖លោក ពិន ប្រាកដ អភិបាលរងខេត្ត និងជាអនុប្រធានគណៈកម្មការប្រយុទ្ធប្រឆាំងជំងឺកូវីដ១៩ ខេត្តសៀមរាប នៅថ្ងៃទី១៥ខែមេសានេះ បានចុះជួបសំណេះសំណាលសួរសុខទុក្ខជាមួយមេភូមិ អនុភូមិ និងសមាជិកភូមិ ក្នុងឃុំចារឈូក ស្រុកអង្គរជុំ។
លោក ពិន ប្រាកដ អភិបាលរងខេត្ត បានថ្លែងការសរសើរចំពោះការខិតខំរបស់អាជ្ញាធរភូមិ ក្នុងការផ្សព្វផ្សាយនិងណែនាំប្រជាពលរដ្ឋក្នុងមូលដ្ឋានរបស់ខ្លួន ដែលទើបត្រឡប់ពីបរទេស ជាពិសេសប្រទេសថៃ ស្ម័គ្រចិត្តនៅដាច់ដោយឡែករយៈពេល១៤ថ្ងៃ។
លោកក៏បានស្នើដល់ អាជ្ញាធរភូមិ ត្រូវបន្តស្រង់ចំនួនប្រជាពលរដ្ឋចំណូលថ្មី ក៏ដូចជាប្រជាពលរដ្ឋទើបត្រឡប់មកពីបរទេស ចូលមកស្នាក់នៅក្នុងមូលដ្ឋានរបស់ខ្លួន ទោះបីពិធីបុណ្យចូលឆ្នាំប្រពៃណីជាតិខ្មែរត្រូវបានបញ្ចប់ក៏ដោយ។
ក្នុងនាម លោកទៀ សីហា អភិបាលខេត្តសៀមរាប លោក ពិន ប្រាកដបាននាំយកអំណោយរួមមាន អង្ករ សាប៊ូ ម៉ាស មី និងថវិកាមួយចំនូន ប្រគល់ជូនអាជ្ញាធរភូមិ មកពី២០ភូមិក្នុងឃុំចារឈូក ក្នុងឱកាសពិធីបុណ្យចូលឆ្នាំប្រពៃណីជាតិខ្មែរផងដែរ។
ជាមួយគ្នានេះដែរលោក ពិន ប្រាកដ បានចុះទៅសួរសុខទុក្ខ ដល់ ប្រជាពលរដ្ឋ ដែលកំពុងស្នាក់នៅដាច់ដោយនៅទីតាំងចំនួន២ ក្នុងចំណោម ១៨ទីតាំងក្នុងស្រុកអង្គរជុំ ក្នុងនោះ ឃុំតាសោម សាលាបឋមសិក្សាតាសោម មានចំនួន១៦នាក់ និង នៅឃុំនគរភាស អនុវិទ្យាល័យនគរភាស មានចំនួន៦នាក់។
ក្នុងនោះលោកអភិបាលស្រុកអង្គរជុំ ក៏បាន កោតសរសើរ ដល់ប្រជាពលរដ្ឋ ដែលបានគិតគូរដល់មនុស្សនៅជុំវិញខ្លួននៅក្នុងសហគមន៍ និងស្ម័គ្រចិត្តមកស្នាក់នៅដាក់ដោយឡែក។

គួរបញ្ជាក់ថា គិតមកត្រឹមព្រឹកថ្ងៃទី១៥ ខែមេសានេះ នៅស្រុកអង្គរជុំ មានប្រជាពលរដ្ឋ ស្ម័គ្រចិត្តស្នាក់នៅដាច់ដោយឡែករយៈពេល១៤ថ្ងៃ សរុប ១៥៣នាក់។

សូមជម្រាបផងដែរថា រយៈពេល៣ថ្ងៃ អំឡុងពិធីបុណ្យចូលឆ្នាំប្រពៃណីជាតិខ្មែរ ចាប់ពីថ្ងៃទី១៣ ដល់ ១៥ ខែមេសា ឆ្នាំ២០២០ អាជ្ញាធរខេត្តសៀមរាប រួមនិងសហភាពសហព័ន្ធយុវជនខេត្តសៀមាប យុវជនស្ម័គ្រចិត្តគាំទ្ររាជរដ្ឋាភិបាល និងសប្បុរសជននានា បានចូលរួមផ្ដល់ជាអំណោយដល់ មេភូមិ អនុភូមិ និងសមាជិកភូមិ សរុប ៩៥២ភូមិ ក្នុងក្រុងស្រុកទាំង១២ នៃខេត្តសៀមរាប ដើម្បីជាការលើកទឹកចិត្ត ដល់អាជ្ញាធរ ដែលបាននិងកំពុងផ្សព្វផ្សាយ ណែនាំដល់ ប្រជាពលរដ្ឋក្នុងមូលដ្ឋានរបស់ខ្លួន បង្ការ ទប់ស្កាត់ជំងឺកូវិដ១៩ និងការស្ម័គ្រចិត្តដាក់ខ្លួនឲ្យនៅដាច់ដោយឡែក៕SRP