ចាប់ខ្លួនមេខ្យល់ បម្រុងនាំពលរដ្ឋខ្មែរចូលទៅថៃ

ខេត្តបាត់ដំបង៖មេខ្យល់ម្នាក់ត្រូវបានសមត្ថកិច្ចអាវុធហត្ថចាប់ខ្លួនខណៈបម្រុងនាំពុលរដ្ឋខ្មែរចំនួន ១១នាក់ចូលទៅទឹកដីប្រទេសថៃ។

សមត្ថកិច្ចអាវុធហត្បានឲ្យដឹងថា នៅវេលាម៉ោង19.00នាទី ថ្ងៃទី24 ខែតុលា ឆ្នាំ2026 នៅចំណុចភូមិស្វាយឃុំបឹងរាំង ស្រុកកំរៀងខេត្តបាត់ដំបង កម្លាំងជំនាញកងរាជអាវុធហត្ថស្រុកបានឃាត់ខ្លួនជនសង្ស័យម្នាក់ (មេខ្យល់) ដែលបំរ៉ុងនាំពលករខ្មែរលួចឆ្លងដែនទៅប្រទេសថៃចំនួន11នាក់ ក្នុងនោះស្រី7នាក់ ប្រុស5នាក់។

ជនដែលឃាត់ខ្លួនមានឈ្មោះដូចខាងក្រោម
1-ឈ្មោះ ផល ម៉ាន់ភេទប្រុសអាយុ42ឆ្នាំ(អ្នកនាំពលករ)មានទីលំនៅភូមិស្វាយឃុំបឹងរាំងស្រុកកំរៀងខេត្តបាត់ដំបង
2-ឈ្មោះ វឿន ម៉ីម៉ី ភេទស្រីអាយុ23ឆ្នាំ(ពលករ)មានទីលំនៅភូមិព្រៃឃ្លូតឃុំព្រៃត្រឡាចស្រុកម៉ោងខេត្តបាត់ដំបង។
3-ឈ្មោះសារ៉ាវុធ ដាវណ្ណភេទស្រីអាយុ22ឆ្នាំ(ពលករ)មានទីលំនៅភូមិព្រៃឃ្លូកឃុំព្រៃត្រឡាចស្រុកម៉ោងឮស្សីខេត្តបាត់ដំបង
4-ឈ្មោះឈឿន ឈឿបភេទស្រីអាយុ39ឆ្នាំ(ពលករ)រស់នៅភូមិប្រាំដំឡឹងឃុំតាសោមស្រុកអង្គរជុំខេត្តសៀមរាប។
5-ឈ្មោះទូច លីដា ភេទស្រីអាយុ19ឆ្នាំមានទីលំនៅភូមិអណ្តូងត្រាចឃុំកំពង់ព្រះស្រុកសង្កែខេត្តបាត់ដំបង។
6-ឈ្មោះភីន លីនភេទស្រីអាយុ48ឆ្នាំ(ពលករ)មានទីលំនៅភូមិបឹងព្រីងឃុំបឹងព្រីងស្រុកថ្មភោលខេត្តបាត់ដំបង។
7-ឈ្មោះទួកស្រី ជីភេទស្រីអាយុ15ឆ្នាំ(ពលករ)មានទីលំនៅភូមិកោកក្រួចឃុំសំបួរស្រុកក្រឡាញ់ខេត្តសៀមរាប។
8-ឈ្មោះធួក ចាន់ធួនភេទស្រីអាយុ32ឆ្នាំ(ពលករ)មានទីលំនៅភូមិជោគជ័យឃុំអូរបីជាន់ស្រុកអូរជ្រៅខេត្តបន្ទាយមានជ័យ។
9-ឈ្មោះឈៀង វ៉ាន់ឆៃភេទប្រុសអាយុ41ឆ្នាំ(ពលករ)មានទីលំនៅភូមិបត់ត្រង់ឃុំបត់ត្រង់ស្រុកមង្គោលបូរីខេត្តបន្ទាយមានជ័យ។
10-ឈ្មោះ ម៉ៃ សំបុកភេទប្រុសអាយុ39ឆ្នាំ(ពលករ)មានទីលំនៅភូមិចារការឃុំចាឈូកស្រុកអង្គរជុំខេត្តសៀមរាប
11-ឈ្មោះកាន់សំបួនភេទប្រុសអាយុ46ឆ្នាំមានទីលំភូមិខ្លែងពណ៏ភូមិស្លក្រាមស្រុកស្វាយចេកខេត្តបន្ទាយមានជ័យ។
12-ឈ្មោះរស់ ឆេនភេទប្រុសអាយុ26ឆ្នាំ(ពលករ)មានទីលំនៅភូមិអំបែងខ្ញែឃុំរកាស្រុកសង្កែខេត្តបាត់ដំបង។
+វត្ថុតាងដកហូតរួមមាន
-ទូរសព្ទ័ ចំនួន 1គ្រឿង រថយន្តកាមម៉ារីពណ៏ខ្មៅ ស្លាកលេខ សៀមរាប2A-6728 ចំនួន1គ្រឿង។
បច្ចប្បន្នកម្លាំងជំនាញកងរាជអាវុធហត្ថស្រុកបញ្ជូនការិយាល័យជំនាញកងរាជអាវុធហត្ថខេត្តដើម្បីអនុវត្តនិតិវិធី៕SRP

គណៈកម្មាធិការគណបក្សឃុំស្លែងស្ពាន រៀបចំកិច្ចប្រជុំប្រចាំខែតុលា ឆ្នាំ២០២៦ ដើម្បីពង្រឹងការងារបក្ស និងត្រៀមលក្ខណៈឆ្ពោះទៅកាន់ការបោះឆ្នោតនាពេលខាងមុខ

គណៈកម្មាធិការគណបក្សឃុំស្លែងស្ពាន ស្រុកស្រីស្នំ នៅថ្ងៃទី២៤ ខែតុលា ឆ្នាំ២០២៦ បានបើកកិច្ចប្រជុំប្រចាំខែតុលា ឆ្នាំ២០២៦ ដើម្បីពង្រឹងការងារបក្ស និងត្រៀមលក្ខណៈឆ្ពោះទៅកាន់ការបោះឆ្នោតនាពេលខាងមុខ ក្រោមវត្តមានចូលរួមពី ឯកឧត្តម ម៉ន សាម៉ុន អនុប្រធានក្រុមការងារគណបក្សចុះមូលដ្ឋានស្រុក និងជាប្រធានក្រុមការងារគណបក្សចុះមូលដ្ឋានឃុំស្លែងស្ពាន ដោយមានការអញ្ជើញចូលរួមពីសំណាក់សមាជិក សមាជិកាគណបក្សជាច្រើនរូប។

យោងតាមរបៀបវារៈនៃកិច្ចប្រជុំ អង្គប្រជុំបានស្ដាប់ និងពិភាក្សាលើការងារមួយចំនួនរួមមាន: ការផ្សព្វផ្សាយឯកសារជំនួយស្មារតីរបស់គណៈឃោសនាអប់រំគណៈកម្មាធិការកណ្ដាល និងទិសដៅបន្តការងារ។ ការបង្ហាញពីការធ្វើបច្ចុប្បន្នភាពរចនាសម្ព័ន្ធមេគ្រួសារបក្ស សមាជិកបក្សផ្សព្វ និងការរៀបចំបញ្ជីអ្នកបោះឆ្នោតតាមភូមិ។ ការអានផែនការការងារឆ្ពោះទៅកាន់ការបោះឆ្នោតសម្រាប់ខែវិច្ឆិកា ឆ្នាំ២០២៦ និងការពិភាក្សាលើការចំណាយបោះពុម្ពបណ្ណសមាជិកបក្សតាមសាខាបក្សភូមិ។

មានប្រសាសន៍ក្នុងឱកាសនោះ ឯកឧត្តម ម៉ន សាម៉ុន បានផ្ដាំផ្ញើដល់សមាជិក សមាជិកាទាំងអស់ ត្រូវបន្តខិតខំពង្រឹងស្មារតីសាមគ្គីភាព កសាង និងធ្វើបច្ចុប្បន្នភាពរចនាសម្ព័ន្ធបក្សឱ្យបានច្បាស់លាស់ ដើម្បីឆ្លើយតបទៅនឹងទិសដៅការងារឆ្ពោះទៅកាន់ការបោះឆ្នោតនាពេលខាងមុខឱ្យទទួលបានជោគជ័យ។

ឯកឧត្តមបានលើកឡើងថា ត្រូវរៀបចំបណ្តុះបណ្តាលមន្ត្រីរបស់យើងពីលើដល់ក្រោម ទាក់ទងទៅនឹងអាកប្បកិរិយារបស់បេក្ខជន ដែលត្រូវឈរឈ្មោះដឹកនាំគ្រប់គ្រងប្រជាជន និងការចេះគ្រប់គ្រងសតិអារម្មណ៍របស់ប្រជាជនក្នុងមូលដ្ឋានខ្លួន។ ត្រូវអប់រំ និងពន្យល់ប្រជាជនក្នុងមូលដ្ឋាន ឱ្យបានយល់ពីគុណសម្បត្តិ របស់រាជរដ្ឋាភិបាល ព្រមទាំងគុណបំណាច់ និងការលះបង់ដ៏ធំធេងរបស់សម្ដេច ព្រមទាំងប្រវត្តិសាស្ត្រពាក់ព័ន្ធនឹងតំបន់ប្រវត្តិសាស្ត្រ X16។ ត្រូវពង្រីកកម្លាំងបក្សឱ្យបានគ្រប់ពេលវេលា និងខិតខំបញ្ចូលយុវជនថ្មីៗឱ្យចូលរួមរស់ជីវភាពជាមួយបក្សជាប្រចាំ។ ត្រូវពង្រឹង និងអនុវត្តជាប្រចាំនូវគោលនយោបាយភូមិ-ឃុំមានសុវត្ថិភាព ដោយត្រូវអប់រំ និងណែនាំប្រជាពលរដ្ឋឱ្យចេះជៀសឆ្ងាយពីគ្រឿងញៀន។ ជាពិសេសត្រូវធ្វើអំពើល្អជាមួយប្រជាពលរដ្ឋ បម្រើសេវាជូនពួកគាត់ឱ្យបានល្អបំផុត និងជៀសវាងមានអាកប្បកិរិយាមិនល្អទៅកាន់ពលរដ្ឋ ។

ក្នុងស្មារតីយកចិត្តទុកដាក់ខ្ពស់ចំពោះការងារបក្សនៅមូលដ្ឋាន ឯកឧត្តមក៏បានផ្ដល់អំណោយជា ម៉ាស៊ីនព្រីនចំនួន ១គ្រឿង ជូនដល់ទីស្នាក់ការគណបក្សឃុំ សម្រាប់ប្រើប្រាស់ក្នុងកិច្ចការដ្ឋបាល និងបម្រើឱ្យសកម្មភាពការងារបក្សផងដែរ៕SRP

អត្ថបទ៖ លោក ឡៃ បញ្ញា
‎កែសម្រួល៖ លោក អ៊ុន ណារាជ្យ

មន្ទីរអប់រំខេត្តសៀមរាប៖ ការអភិវឌ្ឍមូលធនមនុស្ស គឺជាអាទិភាពគន្លឹះដ៏សំខាន់បំផុត របស់រាជរដ្ឋាភិបាលកម្ពុជា ដើម្បីឈានទៅសម្រេចចក្ខុវិស័យឆ្នាំ២០៥០

ការអភិវឌ្ឍមូលធនមនុស្ស គឺជាបញ្ចកោណទី១ និងជាអាទិភាពគន្លឹះដ៏សំខាន់បំផុត ក្នុងចំណោមបញ្ចកោណទាំង៥ នៃ«យុទ្ធសាស្ត្របញ្ចកោណ ដំណាក់កាលទី១» របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ក្រោមការដឹកនាំរបស់រាជរដ្ឋាភិបាល ដើម្បីតម្រង់ទិសប្រទេសជាតិឱ្យឆ្ពោះទៅសម្រេចបាននូវចក្ខុវិស័យ ក្លាយជាប្រទេសដែលមានចំណូលខ្ពស់នៅឆ្នាំ២០៥០។

ក្នុងពិធីប្រគល់ពានរង្វាន់ និងមេដាយដល់សិស្សឆ្នើម ប្រចាំឆ្នាំ២០២៦ របស់សាសាអន្តរជាតិ យូ.អេស.អេ (USA) ខេត្តសៀមរាប នៅថ្ងៃទី២៤ ខែតុលា ឆ្នាំ២០២៦ លោកស្រី ថុន ស៊ីណា អនុប្រធានមន្ទីរអប់រំ យុវជន និងកីឡាខេត្ត បានមានប្រសាសន៍ថា ប្អូនៗដែលទទួលបានពាន់ មេដាយមាស ក្នុងឱកាសនេះគឺសុទ្ធតែជាមូលធនមនុស្សដែលជួយអាចអភិវឌ្ឍប្រទេសជាតិនាពេលអនាគត។ សិស្សានុសិស្សដែលអាចជាមូលធនមនុស្សបាន គឺត្រូវមានវិជ្ជាសម្បទា សំដៅដល់ចំណេះដឹង ចំណេះវិជ្ជាផ្សេងៗ តាមរយ:ការសិក្សារៀនសូត្រនៅក្នុងសាលា និងនៅក្នុងសង្គមក្ដី។

លោកបន្ថែមថា អ្វីដែលមិនអាចខ្វះនោះ គឺបំណិនសម្បទា ដែលសំដៅដល់ការអនុវត្តកិច្ចការងារផ្សេងៗ ប្រកបដោយប្រសិទ្ធភាព និងប្រសិទ្ធផលខ្ពស់ និងចរិយាសម្បទា សំដៅដល់សីលធម៌ និងសុជីវធម៌នៃការរស់នៅរបស់សិស្សានុសិស្ស និងជាពិសេសមូលធនមនុស្សក៏មិនអាចខ្វះបានឡើយនូវសុខភាពជាសំខាន់។ លោកស្រីបានធ្វើការកោតសរសើរ និងវាយតម្លៃខ្ពស់ចំពោះសាសាអន្តរជាតិ យូ.អេស.អេ សាខាខេត្តសៀមរាប ដែលបានបង្កើតនូវពិធីនេះឡើង ដើម្បីជាផ្នែកមួយក្នុងការលើកទឹកចិត្តដល់សិស្សានុសិស្សឱ្យខិតខំ ប្រឹងប្រែងរៀនសូត្របន្ថែមទៀត។

លោកស្រី ហុង ចាន់នី នាយិកាប្រតិបត្តិសាលាអន្តរជាតិ យូ.អេស.អេ សាខាខេត្តសៀមរាប បានឱ្យដឹងថាកម្មវិធីសិស្សឆ្នើមប្រចាំឆ្នាំ២នេះ ត្រូវបានរៀបចំឡើងក្នុងគោលបំណងលើកកម្ពស់គុណភាពអប់រំ ជំរុញការសិក្សាស្រាវជ្រាវ និងការខិតខំប្រឹងប្រែងសិក្សារៀនសូត្ររបស់សិស្ស ព្រមទាំងបង្កើតឱកាសឱ្យសិស្សបានបង្ហាញសមត្ថភាព ចំណេះដឹង និងទេពកោសល្យរបស់ខ្លួនលើមុខវិជ្ជាសំខាន់ៗ និងជាពិសេសដើម្បីជាបទពិសោធន៍ដ៏ល្អដើម្បីជាផ្លូវនាំសិស្សានុសិស្សឱ្យក្លាយខ្លួនជាមនុស្សសកល។ កម្មវិធីនេះ គឺជាសកម្មភាពអប់រំដ៏មានសារៈសំខាន់ក្នុងការជំរុញនៃការសិក្សា ការប្រកួតប្រជែងប្រកបដោយសុចរិតភាព និងការទទួលស្គាល់សកម្មភាពរបស់សិស្សានុសិស្ស។

លោក ឈាន រតនៈ អគ្គនាយករងនៃសាលាអន្តរជាតិ យូ.អេស.អេ មានប្រសាសន៍ថា ការប្រគល់ពានរង្វាន់ និងមេដាយជូនដល់សិស្សឆ្នើមប្រចាំឆ្នាំ២០២៦នាពេលនេះ ពិតជាមានតម្លៃ និងមានសារៈសំខាន់ណាស់ព្រោះបានបង្ហាញពីការខិតខំប្រឹងប្រែងសិក្សារៀនសូត្រ គួបផ្សំជាមួយកត្តាមួយចំនួនទៀតរួមមាន កត្តាគ្រូបង្រៀន ដែលបានខិតខំ បង្ហាត់បង្រៀនសិស្សានុសិស្សប្រកបដោយការយកចិត្តទុកដាក់ និងការទទួលខុសត្រូវខ្ពស់ មួយវិញទៀតកត្តាសាលារៀនដែលបានរៀបចំកម្មវិធីសិក្សាបានល្អប្រសើរ ច្បាស់លាស់ និងត្រឹមត្រូវ និងកត្តាអាណាព្យាបាលដែលបានជំរុញ និងលើកទឹកចិត្តដល់កូនៗឱ្យបន្តយកចិត្តទុកដាក់សិក្សារៀនសូត្រដើម្បីឱ្យក្លាយជាកូនល្អ សិស្សល្អ និងមិត្តល្អ៕SRP

អត្ថបទ៖ លោក អោត រត់
‎កែសម្រួល៖ លោក អ៊ុន ណារាជ្យ

អាជ្ញាធរខេត្តសៀមរាប លើកទឹកចិត្តដល់កីឡាករ កីឡាការិនី ខិតខំពង្រឹងសមត្ថភាព និងប្រកួតប្រជែងប្រកបដោយស្មារតីសាមគ្គីភាព មិត្តភាព និងគោរពក្រមសីលធម៌កីឡា

ថ្លែងបើកការប្រកួតកីឡាវាយសីដណ្ដើមពានរង្វាន់ “ក្រុងអង្គរ” ខេត្តសៀមរាប នាព្រឹកថ្ងៃទី២៤ ខែតុលា ឆ្នាំ២០២៦ លោក សុខ ថុល អភិបាលរងខេត្ត បានលើកឡើងថា ការរៀបចំការប្រកួតកីឡាវាយសីនាពេលនេះ គឺជាព្រឹត្តិការណ៍កីឡាដ៏មានសារៈសំខាន់មួយ ក្នុងការលើកកម្ពស់វិស័យកីឡា បំផុសស្មារតីស្រឡាញ់កីឡា និងជំរុញឱ្យប្រជាពលរដ្ឋ ជាពិសេសយុវជន ចូលរួមលេងកីឡាដើម្បីសុខភាព មិត្តភាព សាមគ្គីភាព និងចៀសឆ្ងាយពីគ្រឿងញៀនព្រមទាំងអំពើអបាយមុខផ្សេងៗនៅក្នុងសង្គម។

លោក សុខ ថុល មានប្រសាសន៍ថា រាជរដ្ឋាភិបាលកម្ពុជាបានយកចិត្តទុកដាក់លើការអភិវឌ្ឍវិស័យកីឡា ដោយចាត់ទុកថា កីឡា ជាកត្តាសំខាន់ក្នុងការលើកកម្ពស់សុខភាព សុខុមាលភាព និងការអភិវឌ្ឍធនធានមនុស្ស ព្រមទាំងជាមធ្យោបាយមួយក្នុងការពង្រឹងសាមគ្គីភាព និងលើកកម្ពស់កិត្យានុភាពជាតិ។ ក្នុង ន័យនេះ ការរៀបចំការប្រកួតកីឡាវាយសី ដណ្ដើមពានរង្វាន់ក្រុងអង្គរ មិនត្រឹមតែជាការ ប្រកួតដើម្បីដណ្ដើមជ័យលាភី ឬពានរង្វាន់ប៉ុណ្ណោះទេ ប៉ុន្តែថែមទាំងជាឱកាសសម្រាប់កីឡា ករ កីឡាការិនីបង្ហាញសមត្ថភាព បង្កើនបទពិសោធន៍ ផ្លាស់ប្ដូរបច្ចេកទេស និងបង្កើតទំនាក់ ទំនងល្អរវាងក្រុមកីឡាផ្សេងៗផងដែរ។ ជាក់ស្ដែង កីឡាវាយសីជាប្រភេទកីឡាដែលជួយពង្រឹងកាយសម្បទា ភាពរហ័សរហួន ការផ្ដោតអារម្មណ៍ និងសមត្ថភាពសម្រេចចិត្ត។

លោកអភិបាលរងខេត្តបានបន្ថែមទៀតថា កីឡាមិនត្រឹមតែជាសកម្មភាពហាត់ប្រាណដើម្បីសុខភាពប៉ុណ្ណោះទេប៉ុន្តែថែមទាំងជាមធ្យោបាយដ៏មានប្រសិទ្ធភាពក្នុងការកសាងទំនាក់ទំនងល្អបង្កើនភាពស្និទ្ធស្នាល ពង្រឹងស្មារតីសាមគ្គីភាព និងបណ្ដុះនូវឆន្ទៈអត់ធ្មត់ ការតស៊ូ ព្រមទាំងការគោរពវិន័យ និងចេះទទួលយកលទ្ធផលនៃការប្រកួតប្រជែងដោយស្មារតីជាអ្នកកីឡា។ សម្រាប់ការប្រកួតកីឡាវាយសីដណ្ដើមពានរង្វាន់នេះ ក៏ជាឱកាសដ៏ល្អសម្រាប់កីឡាករ កីឡាការិនី បានបញ្ចេញនូវសមត្ថភាព ទេពកោសល្យ និងបច្ចេកទេសដែលបានខិតខំហ្វឹកហាត់កន្លងមក ព្រមទាំងផ្លាស់ប្ដូរបទពិសោធន៍ពីគ្នាទៅវិញទៅមក ដើម្បីអភិវឌ្ឍសមត្ថភាពឱ្យកាន់តែរីកចម្រើន និងឈានទៅចូលរួមប្រកួតក្នុងព្រឹត្តិការណ៍កីឡាធំៗទាំងថ្នាក់ខេត្ត ថ្នាក់ជាតិ និងអន្តរជាតិនាពេលអនាគត។

លោកអភិបាលរងខេត្ត ក៏បានណែនាំ និងផ្ដាំផ្ញើដល់គណៈកម្មការរៀបចំការប្រកួត និងមន្ត្រីបច្ចេកទេស ត្រូវបន្តយកចិត្តទុកដាក់លើការគ្រប់គ្រង និងដឹកនាំ ការប្រកួតឱ្យមានសណ្ដាប់ធ្នាប់ សុវត្ថិភាព តម្លាភាព និងយុត្តិធម៌ ដោយអនុវត្តតាមបទបញ្ជា និងលក្ខន្តិកៈបច្ចេកទេសកីឡាឱ្យបានត្រឹមត្រូវ។ សូមកីឡាករ កីឡាការិនីទាំងអស់ ចូល រួមប្រកួតដោយស្មារតីកីឡា គោរពបទបញ្ជា គោរពអាជ្ញាកណ្ដាល គោរពគូប្រកួត និងរក្សា ភាពថ្លៃថ្នូរ។ សូមចងចាំថា ជ័យជម្នះគឺជាគោលដៅ ប៉ុន្តែការប្រកួតដោយសុចរិតភាព មិត្តភាព និងការគោរពគ្នា គឺជាតម្លៃដ៏សំខាន់បំផុតនៃវិស័យកីឡា។ សូមរដ្ឋបាលក្រុង ស្រុក មន្ទីរ អង្គភាពពាក់ព័ន្ធ សមាគមកីឡា និងវិស័យឯកជន បន្តសហការគាំទ្រ និងជំរុញការរៀបចំ សកម្មភាពកីឡាជាប្រចាំ ដើម្បីបង្កើតឱកាសឱ្យប្រជាពលរដ្ឋ ជាពិសេសយុវជន បានចូលរួម លេងកីឡា និងអភិវឌ្ឍសមត្ថភាពរបស់ខ្លួន។ សូមបន្តពង្រឹងការផ្សព្វផ្សាយ និងចលនា ប្រជាពលរដ្ឋឱ្យស្រឡាញ់កីឡា និងហាត់ប្រាណជាប្រចាំ ព្រមទាំងចូលរួមថែរក្សាអនាម័យ បរិស្ថាន សណ្ដាប់ធ្នាប់សាធារណៈ និងសុវត្ថិភាពនៅទីតាំងប្រកួត។

សូមបញ្ជាក់ថា ការប្រកួតកីឡាវាយសីដណ្ដើមពានរង្វាន់”ក្រុងអង្គរ” ត្រូវបានរៀបចំឡើងក្នុងគោលបំណងលើកកម្ពស់វិស័យកីឡា ស្វែងរកកីឡាករ កីឡាការិនីដែលមានសមត្ថភាព និងជំរុញចលនាកីឡាមហាជនឱ្យកាន់តែរីកចម្រើននៅក្នុងខេត្ត ដោយមានកីឡាករ-កីឡាការនីចូលរួមប្រកួតសរុបមានចំនួន ២១៥នាក់ (នារី ១១នាក់) ដែលមកពី ១០ខេត្តរួមមាន៖ខេត្តសៀមរាប បន្ទាយមានជ័យ បាត់ដំបង មណ្ឌលគិរី រតនៈគិរី ព្រះវិហារ កំពង់ឆ្នាំង ប៉ៃលិន ពោធិ៍សាត់ និងខេត្តកំពង់ធំ ដែលមានចែកចេញជា១១២គូ គឺកម្រិត AB ចំនួន ៣២ គូ និងកម្រតិC មានចំនួន៤៨ គូ៕SRP

អត្ថបទ៖ លោក ទ្រា ពន្លឺ
‎កែសម្រួល៖ លោក អ៊ុន ណារាជ្យ

មន្ត្រីជាន់ខ្ពស់លើកទឹកចិត្តដល់ថ្នាក់ដឹកនាំ និងមន្ត្រីវិស័យសុខាភិបាលទាំងអស់ ត្រូវបំពេញការងារស្របតាមក្រមសីលធម៌វិជ្ជាជីវៈ និងមានទំនួលខុសត្រូវ

ថ្លែងក្នុងសន្និសីទប្រចាំឆ្នាំលើកទី១០ របស់មន្ទីរពេទ្យកុមារអង្គរ ស្ដីពីសុខភាពកុមារ ក្រោមប្រធានបទ “បច្ចុប្បន្នភាពជំងឺកុមារ ៧” នៅខេត្តសៀមរាប នាថ្ងៃទី២៤ ខែតុលាឆ្នាំ២០២៦ ឯកឧត្តមសាស្ត្រាចារ្យ យីត ស៊ុនណារ៉ា រដ្ឋលេខាធិការក្រសួងសុខាភិបាល បានលើកទឹកចិត្តដល់ថ្នាក់ដឹកនាំ និងមន្ត្រីក្នុងវិស័យសុខាភិបាលទាំងរដ្ឋ និងឯកជន ឱ្យយកចិត្តទុកដាក់ស្វ័យសិក្សាដោយខ្លួនឯងជាប្រចាំ និងចូលរួមក្នុងការស្រាវជ្រាវនានា ដើម្បីពង្រឹងសមត្ថភាពក្នុងការផ្ដល់សេវា។

ឯកឧត្តម បានណែនាំឱ្យរៀបចំផែនការសកម្មភាពការងារបណ្តុះបណ្តាលបន្តឱ្យបានទៀងទាត់ ទៅតាមផែនការដែលអាចធ្វើបាន និងត្រូវចូលរួមត្រៀមបង្ការនូវហេតុការណ៍នៃការប្រែប្រួលអាកាសធាតុដែលបង្កឱ្យកើតមាននូវជំងឺថ្មីៗ។ ជាមួយគ្នានេះ ក៏សូមឱ្យបន្តយកចិត្តទុកដាក់លើការព្យាបាលទាំងឡាយប្រកបដោយប្រសិទ្ធភាព និងមានសុវត្ថិភាពពោល គឺព្យាបាលជាយឺតប្រសើរជាងព្យាបាលជាឆាប់ តែអាចបង្កជាគ្រោះថ្នាក់ទៅថ្ងៃអនាគត និងសូមចាត់ទុកកុមារដែលមកស្វែងរកសេវាព្យាបាលជាកូនចៅបង្កើតរបស់យើង។

ឯកឧត្តមសាស្ត្រាចារ្យ បានបន្តថា សម្រាប់សន្និសីទថ្ងៃនេះ គឺពិតជាព្រឹត្តិការណ៍ដ៏វិសេសវិសាលមួយក្នុងការលើកកម្ពស់នូវគុណភាព ចំណេះជំនាញអ្នកផ្តល់សេវាសុខាភិបាលកម្ពុជាយើង សំដៅធ្វើឱ្យមានសុក្រិតភាពលើការអភិវឌ្ឍន៍ទាំងធនធានមនុស្ស និងនវានុវត្តន៍បច្ចេកវិទ្យា ដែលជាធនធានចាំបាច់ក្នុងការគាំទ្រដល់ការរីកចម្រើននៃវិស័យសុខាភិបាល។ សកម្មភាពទាំងឡាយដែលមន្ទីរពេទ្យកំពុងតែធ្វើនេះ គឺស្រប និងអនុលោមទៅតាមគោលនយោបាយ និងយុទ្ធសាស្ត្របញ្ចកោណរបស់រាជរដ្ឋាភិបាលអាណត្តិទី៧ ដែលសំដៅលើកកម្ពស់សុខភាព និងសុខុមាលភាពកុមារដែលជាមុំមួយដ៏សំខាន់របស់យុទ្ធសាស្ត្របញ្ចកោណ ក្នុងនោះសម្តេចធិបតីប្រមុខរាជរដ្ឋាភិបាលបានផ្ដល់អាទិភាពជាយុទ្ធសាស្ត្រ៥ គឺ មនុស្ស ទឹក ផ្លូវ ភ្លើង និងនវានុវត្តន៍បច្ចេកវិទ្យា ហើយដូចដែលមន្ទីរពេទ្យបាន និងកំពុងធ្វើពេលនេះ។      

លោក មួង ណារិន អនុប្រធានមន្ទីរសុខាភិបាលខេត្តសៀមរាប មានប្រសាសន៍ថា សន្និសីទនេះ គឺជាប្រធានបទមួយផ្តល់នូវការចែករំលែកបទពិសោធន៍ និងចំណេះដឹងពាក់ព័ន្ធនឹងការពិនិត្យ ព្យាបាល និងថែទាំសុខភាពកុមារក្នុងការចូលរួមចំណែកធ្វើឱ្យប្រសើរនូវគុណភាពនៃការថែទាំព្យាបាល និងកាត់បន្ថយអត្រាមរណភាពរបស់ទារក និងកុមារកម្ពុជា ស្របតាមផែនការយុទ្ធសាស្ត្រជាអាទិភាពរបស់ក្រសួងសុខាភិបាល នៃព្រះរាជាណាចក្រកម្ពុជា។

លោកសាស្រ្តាចារ្យ ងួន ច័ន្ទភក្រ្តា នាយកមន្ទីរពេទ្យកុមារអង្គរ ខេត្តសៀមរាប បង្ហាញថា មន្ទីរពេទ្យកុមារអង្គរ ក្រោមកិច្ចសហការជាមួយក្រសួងសុខាភិបាល និងមន្ទីរសុខាភិបាលខេត្តសៀមរាប ត្រូវបានបង្កើតឡើងក្នុងឆ្នាំ១៩៩៩ ក្នុងគោលបំណងផ្តល់ការពិនិត្យ ព្យាបាល និងថែទាំសុខភាពប្រកបដោយគុណភាពខ្ពស់ និងឥតគិតកម្រៃចំពោះកុមារមកពីគ្រួសារក្រីក្រ ចូលរួមពង្រឹងប្រព័ន្ធសុខាភិបាលតាមរយៈការបណ្តុះបណ្តាលវេជ្ជបណ្ឌិត គិលានុបដ្ឋាក និងបុគ្គលិកសុខាភិបាល ព្រមទាំងផ្ដល់ការអប់រំសុខភាព និងវិធានការការពារជំងឺដង្កាត់ផ្សេងៗដល់ប្រជាពលរដ្ឋ និងសាលារៀននៅក្នុងសហគមន៍។ ជារៀងរាល់ថ្ងៃមានកុមារប្រមាណ ៣០០ ទៅ ៤០០នាក់ មកទទួលការព្យាបាលនៅមន្ទីរពេទ្យកុមារអង្គរ និងចាប់តាំងពីមន្ទីរពេទ្យបើកដំណើរការរហូតដល់ពេលបច្ចុប្បន្ននេះ យើងបានផ្ដល់ការព្យាបាលកាលដល់កុមារកម្ពុជាប្រមាណ ៣លានករណី។
   
សូមជម្រាបថា សន្និសីទប្រចាំឆ្នាំលើកទី១០ នាពេលនេះរៀបចំឡើងក្រោមគោលបំណង លើកកម្ពស់ការថែទាំសុខភាពប្រកបដោយក្តីមេត្តាករុណា និងផ្តោតលើអ្នកជំងឺជាអាទិភាព។ចែករំលែកលទ្ធផលស្រាវជ្រាវក្នុងស្រុកអំពីជំងឺបាតភ្នែកលើទារកកើតមិនគ្រប់ខែ នៅមន្ទីរពេទ្យកុមារអង្គរ ដើម្បីកែលម្អការពិនិត្យស្រាវជ្រាវស្វែងរកជំងឺលើទារកទើបនឹងកើត ការធ្វើអន្តរាគមន៍ទាន់ពេល និងយុទ្ធសាស្ត្របង្ការភាពពិការភ្នែកលើកុមារ។ពង្រឹងសមត្ថភាពរបស់អ្នកជំនាញសុខាភិបាលក្នុងការកំណត់ស្វែងរក វាយតម្លៃ និងគ្រប់គ្រងកង្វះអាហារូបត្ថម្ភស្រួចស្រាវធ្ងន់ធ្ងរបង្កើនចំណេះដឹងផ្នែកគិលានុបដ្ឋាក និងជំនាញគ្លីនិកក្នុងការវាយតម្លៃ និងគ្រប់គ្រងទារកដែលមានបញ្ហាលំបាកក្នុងការបំបៅ ឬផ្ដល់អាហារដោយលើកកម្ពស់ការផ្តល់អាហារូបត្ថម្ភប្រកបដោយសុវត្ថិភាព ការតាមដានប្រកបដោយប្រសិទ្ធភាព និងការថែទាំដែលផ្តោតលើគ្រួសារជាសំខាន់។ កែលម្អការវាយតម្លៃ និងការគ្រប់គ្រងដំបូងចំពោះការបាក់ឆ្អឹងលើកុមារ ។ពង្រឹងសមត្ថភាពវិភាគ និងវិនិច្ឆ័យគ្លីនិក តាមរយៈការពិភាក្សាអំពីជំងឺរលាកស្បែក និងសាច់ដុំលើកុមារដោយសង្កត់ធ្ងន់លើសារៈសំខាន់នៃការធ្វើរោគវិនិច្ឆ័យបែងចែក និងការវាយតម្លៃជាប្រព័ន្ធ ក្នុងការគ្រប់គ្រងជំងឺកម្រជួបប្រទះលើកុមារ។ល៕SRP

អត្ថបទ៖ លោក យូ វង្ស
‎កែសម្រួល៖ លោក អ៊ុន ណារាជ្យ

ប្រច័ណ្ឌ​ចាក់សាំងដុតប្រពន្ធ ត្រូវបាន
សមត្ថកិច្ចឃាត់ខ្លួនបុរសជាប្តី

ខេត្តបាត់ដំបង៖សមត្ថកិច្ចបានឃាត់ខ្លួនឈ្មោះ នួន ស៊ីយាន ភេទប្រុស អាយុ៣១ឆ្នាំ រស់នៅភូមិតាគម ឃុំពាមឯក ស្រុកឯកភ្នំ ខេត្តបាត់ដំបង (ត្រូជាប្តី) បានធ្វើសកម្មភាពយកសាំងចាក់ដុតទៅលើប្រពន្ធ ឈ្មោះ រិន ពៅ ភេទស្រី អាយុ២៩ឆ្នាំ រស់នៅភូមិតាគម ឃុំពាមឯក ស្រុកឯកភ្នំ ខេត្តបាត់ដំបង ដែលកំពុងស្នាក់នៅបណ្តោះអាសន្ននៅចំណុចកើតហេតុ បណ្តាលឲ្យជនរងគ្រោះរងរបួសធ្ងន់ ត្រង់ដៃខាងស្តាំ ទ្រូងខាងស្តាំ ត្រគៀកខាងស្តាំ ភ្លៅខាងស្តាំ និងជើងខាងឆ្វេង។

ហេតុការណ៍បានកើតឡើង នៅថ្ងៃទី២៣ ខែតុលា ឆ្នាំ២០២៦ វេលាម៉ោង០៩និង១០នាទី នៅចំណុចក្រុមទី០៩ ភូមិព្រៃដាច់ ឃុំអូរតាគី ស្រុកថ្មគោល។

ករណីប៉ុនប៉ងឃាតកម្ម (អំពើហិង្សាក្នុងគ្រួសារ) បន្ទាប់កើតហេតុ កម្លាំងជំនាញ នៃអធិការដ្ឋាននគរបាលស្រុកថ្មគោល សហការជាមួយកម្លាំងប៉ុស្តិ៍នគរបាលរដ្ឋបាលអូរតាគី ដឹកនាំដោយលោកវរសេនីយ៍ឯក សេង លុច អធិការនគរបាលស្រុកថ្មគោល បានចុះទៅដល់ចំណុចកើតហេតុ ឈានដល់ការឃាត់ខ្លួនជនសង្ស័យ ឈ្មោះ នួន ស៊ីយាន នៅវេលាម៉ោងប្រហែល១១និង០០នាទី ថ្ងៃខែឆ្នាំដដែល នាំមកកាន់ អធិការដ្ឋាននគរបាលស្រុកថ្មគោល ដើម្បីធ្វើការសាកសួរតាមនីតិវិធី។

ក្រោយពីធ្វើការសាកសួរ ជនសង្ស័យបានឆ្លើយសារភាពថា ខ្លួនពិតជាបានចាក់សាំងដុតប្រពន្ធ ពិតប្រាកដមែន ក្នុងគោលបំណងដុតសម្លាប់ ទាំងប្រពន្ធ និងសាហាយប្រពន្ធ។ មូលហេតុដោយសារជនសង្ស័យ ប្រចណ្ឌប្រពន្ធ ដែលលួចមានសាហាយ។

បច្ចុប្បន្ន ជនសង្ស័យ ត្រូវបានសមត្ថកិច្ចកសាងសំណុំរឿងបញ្ជូនទៅកាន់ការិយាល័យជំនាញ នៃស្នងការដ្ឋាននគរបាលខេត្តបាត់ដំបង ដើម្បីចាត់ការបន្តតាមនីតិវិធីច្បាប់៕SRP

នគរបាលខេត្តសៀមរាបឃាត់ខ្លួនអ្នកសារព័ត៌មានម្នាក់ ករណី ប៉ុនប៉ងរំលោភកូនបង្កើត

ខេត្តសៀមរាប៖លោកឧត្តមសេនីយ៍ទោហួតមសុធី ស្នងការនគរបាលខេត្តសៀមរាបបានប្រាប់សារព័ត៌មានសៀមរាប ប៉ុស្ដិ៍ នៅព្រលប់ថ្ងៃនេះថា នគរបាលខេត្តសៀមរាប ឃាត់ខ្លួនបុរសម្នាក់ នៅស្រុកប្រាសាទបាគង ពាក់ព័ន្ធករណីប៉ុនប៉ងរំលោភ និងបំពារបំពានផ្លូវភេទ លើកូនស្រីខ្លួនឯង។

លោកឧត្តមស្ដីទោបានបញ្ជាក់ថា នៅថ្ងៃទី១៩ ខែតុលា ឆ្នាំ២០២៦ បន្ទាប់ពីកំលាំងព្រហ្មទណ្ឌ នៃអធិការដ្ឋានស្រុកប្រាសាទបាគង បានទទួលពាក្យបណ្តឹងពីម្តាយជនរងគ្រោះ ដែលបានប្តឹងចោទប្រកាន់ទៅលើប្តី របស់ខ្លួនឈ្មោះប្រាក់ គីមឡេង អាយុ៥៩ ឆ្នាំ រស់នៅភូមិគោកធ្លក ឃុំកណ្តែក ស្រុកប្រសាទបាគង ខេត្តសៀមរាប (មុខរប សារពត៌មាន អំណាចខ្មែរ) ថា បានបំពាន ផ្លូវភេទ ទៅលើកូនស្រី របស់ខ្លួន ឈ្មោះ ឡ គ ឡ អាយុ១៥ ឆ្នាំ។

ស្នងការនគរបាលខេត្តសៀមរាបបានបន្តថាក្រោយពីទទួលពាក្យបណ្តឹងរួច នគរបាលជំនាញបានសាកសួរ និងសម្ភាសន៏ ជនរងគ្រោះបាន រៀបរាប់ថា ឪពុកខ្លួនបានប្រព្រឹត្ត មកលើខ្លួនចំនួន៧លើក លើកចុងក្រោយ នៅថ្ងៃទីមិនចាំ ខែសីហា ឆ្នាំ២០២៦ វេលាម៉ោង ១៥ និង ០០នាទី នៅក្នងផ្ទះរបស់ជនសង្ស័យ ស្ថិតនៅភូមិគោកធ្លក ឃុំកណ្តែក ស្រុកប្រាសាទបាគង ខេត្តសៀមរាប តែនាងមិនព្រម ចេះតែរើបំរះ ទើបមិនបានសម្រេច។ ម៉្យាងវិញទៀតឪពុកនាងប្រព្រឹត្តបែបនេះ ដោយសារម្តាយនាងមិននៅផ្ទះ គាត់ទៅធ្វើការរោងចក្រ នៅភ្នំពេញ ១ ឆ្នាំមកហើយ និងឆ្លៀតឪកាសយកស្រីកំណាន់ មកនៅផ្ទះជាមួយរយៈពេល១ឆ្នាំមកដែរ។ ហើយទង្វើដែលគាត់ប្រព្រឹត្ត គឺគាត់បិតទ្វារផ្ទះមុខជិតមិនឲ្យជាប់ Camera សុវត្ថិភាព ហើយស្រីកំណាន់គាត់ ក៏មិនដឹងដែរ ពីព្រោះគាត់ទៅក្រៅផ្ទះបាត់។ ហើយរឿងនេះ នាងមិនហ៊ានប្រាប់ម្តាយទេខ្លាចខ្មាស់ម្តាយ តែក្រោយមកម្តាយនាងបានទាស់គ្នា ជាមួយស្រីកំណាន់ឪពុក គាត់ជេរដៀលគ្នា តាមឆាត Messenger ហើយប្រាប់ថា នាងបើកដៃឲ្យឪពុកចាប់ដោះលេង ម្តាយនាងដូច្នេះ ក៏ឡើងមកសៀមរាប នាំមកដាក់ពាក្យបណ្តឹង។

នៅចំពោះមុខ សមត្ថកិច្ចយើង ជនសង្យ័យ មិនព្រមសារភាពឡើយ ។តែក្នុងករណីនេះ មានសាក្សីម្នាក់ ឈ្មោះឡ គ ល ភេទស្រី អាយុ ១១ឆ្នាំ ត្រូវជាកូន ជនសង្ស័យបង្កើត បានឃើញឪពុកបានចាប់ដោះបងស្រី របស់ខ្លួន ដោយផ្ទាល់ភ្នែក ហើយទៅនិយាយប្រាប់ ស្រីកំណាន់ របស់ឪពុកខ្លួន។

យោងតាមពាក្យបណ្ដឹង ដឹងការរៀបរាប់របស់ជនរងគ្រោះ ព្រមទាំងសាក្សី ជនសង្ស័យ ត្រូវបាននគរបាលនគរបាលខេត្តសៀមរាប កសាងសំណុំរឿង បញ្ជូនទៅសាលាដំបូង និងត្រូវបានចៅក្រមស៊ើបសួរនៃសាលាដំបូងខេត្តសៀមរាបសម្រេចឃុំខ្លួនហើយ នាថ្ងៃទី២២ខែតុលា ឆ្នាំ២០២៦នេះ។

សូមជម្រាបថាជនសង្ស័យត្រូវបានចៅក្រមនៃសាលាដំបូងខេត្តសៀមរាបបានចេញដីកាសម្រេចឃុំខ្លួនហើយនៅថ្ងៃនេះ។

សូមបញ្ជាក់ផងដែរថាប្រតិបត្តិការនេះអនុវត្តតាមបទបញ្ជាដ៏ម៉ឺងម៉ាត់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងក្រោមការយកចិត្តទុកដាក់ខ្ពស់ពីសំណាក់ ឯកឧត្តម ប្រាក់ សោភ័ណ ប្រធានគណៈបញ្ជាការឯកភាពរដ្ឋបាលខេត្តសៀមរាប ព្រមទាំងមានការដឹកនាំ និងបញ្ជាផ្ទាល់ពី លោកឧត្តមសេនីយ៍ទោ ហួត សុធី ស្នងការនៃស្នងការដ្ឋាននគរបាលខេត្តសៀមរាប និងកិច្ចសម្របសម្រួលនីតិវិធីពី ឯកឧត្តម សៀង សុខ ព្រះរាជអាជ្ញានៃអយ្យការអមសាលាដំបូងខេត្តសៀមរាប៕SRP

បញ្ចប់វិវាទរវាងមគ្គុទ្ទេសក៍ទេសចរណ៍ និងបុគ្គលិកអាជ្ញាធរជាតិអប្សរា នៅប្រាសាទបាយ័ន

ដើម្បីដោះស្រាយបញ្ហាវិវាទរវាងមគ្គុទ្ទេសក៍ទេសចរណ៍ និងបុគ្គលិកអាជ្ញាធរជាតិអប្សរា នៅប្រាសាទបាយ័ន ប្រកបដោយសន្តិវិធី និងរក្សាបាននូវទំនាក់ទំនងល្អរវាងអ្នកបម្រើសេវាកម្មទេសចរណ៍ និងស្ថាប័នគ្រប់គ្រងតំបន់បេតិកភណ្ឌ នៅថ្ងៃទី២០ ខែតុលា ឆ្នាំ២០២៦ មន្ទីរទេសចរណ៍ខេត្តសៀមរាប បានអញ្ជើញភាគីទាំងពីរមកជួបពិភាក្សា និងសម្របសម្រួលដោះស្រាយនៅអង្គភាពនគរបាលទេសចរណ៍។

យោងតាមគេហទំព័រផ្លូវការ របស់មន្ទីរទេសចរណ៍ខេត្តសៀមរាប បានឱ្យដឹងទៀតថា តាមរយៈកិច្ចពិភាក្សា និងការសម្របសម្រួលប្រកបដោយស្មារតីស្ថាបនាភាគីទាំងពីរ បានបង្ហាញពីការយោគយល់គ្នា និងទទួលស្គាល់ថា បញ្ហាដែលបានកើតឡើង គឺបណ្ដាលមកពីការយល់ច្រឡំរៀងៗខ្លួន។ ជាលទ្ធផល ភាគីទាំងពីរបានឯកភាពផ្សះផ្សា សុំទោសគ្នាទៅវិញទៅមក និងបញ្ចប់វិវាទដោយសន្តិវិធី ក្នុងស្មារតីសាមគ្គីភាព និងការគោរពគ្នាទៅវិញទៅមក។

ក្នុងឱកាសនេះ មន្ទីរទេសចរណ៍ខេត្ត សូមអំពាវនាវដល់មគ្គុទ្ទេសក៍ទេសចរណ៍ បុគ្គលិកបម្រើការងារនៅតាមគោលដៅទេសចរណ៍ និងភាគីពាក់ព័ន្ធទាំងអស់ បន្តពង្រឹងកិច្ចសហការ គោរពតួនាទី និងភារកិច្ចគ្នាទៅវិញទៅមក ព្រមទាំងប្រកាន់ខ្ជាប់នូវក្រមសីលធម៌វិជ្ជាជីវៈ និងការដោះស្រាយបញ្ហាតាមរយៈការសន្ទនា និងការសម្របសម្រួលដោយសន្តិវិធី ជាពិសេស សូមប្រើប្រាស់បណ្ដាញសង្គមប្រកបដោយការទទួលខុសត្រូវ ពិចារណាឱ្យបានហ្មត់ចត់មុននឹងផ្សព្វផ្សាយព័ត៌មាន រូបភាព ឬវីដេអូ ដែលអាចបង្កឱ្យមានការយល់ច្រឡំ ប៉ះពាល់ដល់កិត្តិយសបុគ្គល ស្ថាប័ន និងរូបភាពវិស័យទេសចរណ៍។

ក្នុងនាមមន្ទីរទេសចរណ៍ខេត្តសៀមរាប សូមថ្លែងអំណរគុណចំពោះភាគីទាំងពីរ ដែលបានបង្ហាញនូវស្មារតីយោគយល់ អធ្យាស្រ័យ និងឯកភាពគ្នាក្នុងការបញ្ចប់វិវាទដោយសន្តិវិធី ដើម្បីរួមគ្នាថែរក្សាកិត្តិយស សណ្ដាប់ធ្នាប់ និងរូបភាពល្អនៃគោលដៅទេសចរណ៍សៀមរាប-អង្គរ។

សូមបញ្ជាក់ថា វិវាទនេះ កើតឡើងរវាងមគ្គុទ្ទេសក៍ទេសចរណ៍ លោក ហៀក សេងហួត និងបុគ្គលិកអាជ្ញាធរជាតិអប្សរា កាលពីថ្ងៃទី១៦ ខែតុលា ឆ្នាំ២០២៦កន្លងទៅនេះ នៅបរិវេណប្រាសាទបាយ័ន និងមានការផ្សព្វផ្សាយវីដេអូតាមបណ្ដាញសង្គម TikTok ដែលបង្កឱ្យមានការយល់ច្រឡំ និងការបញ្ចេញមតិផ្សេងៗពីសាធារណជន៕SRP

អត្ថបទ៖ លោកស្រី ហែម បូរ៉ាន្នី
‎កែសម្រួល៖ លោក អ៊ុន ណារាជ្យ

កម្ពុជាធ្វើជាម្ចាស់ផ្ទះរៀបចំកិច្ចប្រជុំឧត្តមមន្ត្រីកីឡាអាស៊ានលើកទី១៧ និងកិច្ចប្រជុំពាក់ព័ន្ធ នៅខេត្តសៀមរាប

ក្រសួងអប់រំ យុវជន និងកីឡានៃព្រះរាជាណាចក្រកម្ពុជា និងលេខាធិការដ្ឋានអាស៊ាន នៅថ្ងៃទី 20 ខែតុលា បានរៀបចំបើកជាផ្លូវការកិច្ចប្រជុំឧត្តមមន្រ្តីកីឡាអាស៊ានលើកទី១៧ (THE SEVENTEENTH ASEAN SENIOR OFFICIALS MEETING ON SPORTS – SOMS-17) និងកិច្ចប្រជុំពាក់ព័ន្ធ នៅខេត្តសៀមរាប ក្រោមអធិបតីភាព លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡាកម្ពុជា ដោយមានការចូលរួមពីប្រតិភូឧត្តមមន្រ្តីកីឡានៃបណ្តាប្រទេសសមាជិកអាស៊ាន និងភាគីពាក់ព័ន្ធ។

ក្នុងឱកាសនោះ លោកជំទាវបណ្ឌិត គឹម សេដ្ឋានី បានសម្តែងនូវការស្វាគមន៍យ៉ាងកក់ក្តៅចំពោះប្រតិភូទាំងអស់ និងបានគូសបញ្ជាក់ពីសារៈសំខាន់នៃកិច្ចប្រជុំនេះ ក្នុងការបន្តពង្រឹងកិច្ចសហប្រតិបត្តិការកីឡាក្នុងតំបន់អាស៊ាន។ កិច្ចប្រជុំឧត្តមមន្រ្តីកីឡា អាស៊ានលើកទី១៧ គឺជាវេទិកាដ៏សំខាន់សម្រាប់ពិនិត្យវឌ្ឍនភាពការងារកន្លងមក កំណត់អាទិភាព និងទិសដៅយុទ្ធសាស្ត្ររួម ដើម្បីជំរុញការអភិវឌ្ឍវិស័យកីឡាអាស៊ានឱ្យដែលឆ្លើយតបទៅនឹងបរិបទ និងតម្រូវការនាពេលអនាគត។

ក្នុងនាមក្រសួងអប់រំ យុវជន និងកីឡា លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំកម្ពុជា បានលើកឡើងថា កម្ពុជាក៏បានបង្ហាញពីការប្តេជ្ញាចិត្តក្នុងការជំរុញកិច្ចសហប្រតិបត្តិការអន្តរវិស័យលើវិទ្យាសាស្ត្រកីឡា ការគ្រប់គ្រងកីឡា និងការប្រើប្រាស់បច្ចេកវិទ្យាទំនើប ដើម្បីលើកកម្ពស់សមត្ថភាពអត្តពលិក។ ជាមួយគ្នានេះដែរផង កម្ពុជាក៏បានគូសបញ្ជាក់ពីសារៈសំខាន់នៃការពង្រឹងក្របខ័ណ្ឌច្បាប់ និងបទប្បញ្ញត្តិ ដើម្បីគាំទ្រដល់កីឡាកម្រិតខ្ពស់ ឧស្សាហកម្មកីឡា និងបូរណភាពកីឡា កីឡាស្អាតស្អំ និងកីឡាបរិយាបន្ន ព្រមទាំងការជំរុញគោលការណ៍ «កីឡាសម្រាប់ទាំងអស់គ្នា» ដោយធានាការចូលរួមរបស់ស្ត្រី ជនមានពិការភាព និងក្រុមជនងាយរងគ្រោះ ដើម្បីលើកកម្ពស់សុខភាព និងភាពសកម្មនៅក្នុងសហគមន៍អាស៊ាន។

កិច្ចប្រជុំនេះរយ:ពេលបីថ្ងៃ ពីថ្ងៃទី២០ ដល់ថ្ងៃទី២២ ខែតុលា ឆ្នាំ២០២៦ នឹងបន្តពិភាក្សាពីសមិទ្ធផលនៃការសម្រេចរបស់កិច្ចប្រជុំ SOMS-16 និង AMMS-8 ដែលបានរៀបចំឡើងនៅទីក្រុងហាណូយ ប្រទេសវៀតណាម កាលពីខែតុលា ឆ្នាំ២០២៥ ជាពិសេសការវាយតម្លៃផែនការការងារកីឡាអាស៊ានឆ្នាំ២០២១-២០២៥ និងការអនុម័តផែនការការងារកីឡាអាស៊ាន ឆ្នាំ២០២៦-២០៣០។ នៅក្នុងផែនការការងារកីឡាអាស៊ាននេះ បានកំណត់វិស័យកីឡាជាកត្តាជំរុញអន្តរវិស័យសម្រាប់សន្តិភាព សុខភាព បរិយាបន្ន ការអប់រំ អត្តសញ្ញាណវប្បធម៌ និងកំណើន សេដ្ឋកិច្ចសង្គមប្រកបដោយចីរភាព ស្របតាមចក្ខុវិស័យសហគមន៍អាស៊ានឆ្នាំ២០៤៥។

ជាមួយនឹងការជំរុញកិច្ចសហប្រតិបត្តិការក្នុងតំបន់ កម្ពុជាក៏បានបង្ហាញពីការប្តេជ្ញាចិត្តយ៉ាងមុតមាំ ក្នុងការរួមចំណែកអភិវឌ្ឍវិស័យកីឡាក្នុងតំបន់អាស៊ាន តាមរយៈការត្រៀមខ្លួនធ្វើជាម្ចាស់ផ្ទះរៀបចំព្រឹត្តិការណ៍កីឡាថ្នាក់តំបន់នាពេលអនាគត រួមមាន ការប្រកួតកីឡាសាកលវិទ្យាល័យអាស៊ាន ឆ្នាំ២០២៨ ការប្រកួតកីឡាយុវជនអាស៊ីប៉ារ៉ាហ្គេម ឆ្នាំ២០២៩ និងការប្រកួតកីឡាយុវជនអាស៊ាន ឆ្នាំ២០៣១ ព្រមទាំងអំពាវនាវឱ្យបណ្តាប្រទេសសមាជិកអាស៊ានបន្តផ្តល់កិច្ចសហការ និងការគាំទ្រដើម្បីធានាភាពជោគជ័យនៃព្រឹត្តិការណ៍ទាំងនេះ៕SRP

អត្ថបទ៖ លោក យូ វង្ស
‎កែសម្រួល៖ លោក អ៊ុន ណារាជ្យ

អភិបាលខេត្តបាត់ដំបង ជំរុញអាជ្ញាធរក្រុង ស្រុក បង្កើនការព្រលែងកូនត្រីនៅតាមប្រភពទឹកធំៗ និងតំបន់អភិរក្សឱ្យបានច្រើន

អភិបាលខេត្តបាត់ដំបង ឯកឧត្តមសុខ លូ បានជំរុញអាជ្ញាធរក្រុង ស្រុក បង្កើនការព្រលែងកូនត្រីនៅតាមប្រភពទឹកធំៗ និងតំបន់អភិរក្សឱ្យបានច្រើនសំដៅបង្កើនធនធានជលផលនិងជំរុញការបង្រ្កាបបទល្មើសនេសាទឱ្យកាន់តែមានប្រសិទ្ធភាពបំផុត។

ឯកឧត្តម ជំរុញដល់មន្រ្តីជំនាញជលផល និងប្រជាពលរដ្ឋបង្កើនការបង្កាត់ពូជមច្ឆជាតិ និងការចិញ្ចឹមឱ្យបានច្រើនផុសផុលដើម្បីបំពេញតម្រូវការហូបចុកប្រចាំថ្ងៃ។

ឯកឧត្តម ណែនាំដល់មន្រ្តី និងប្រជាពលរដ្ឋត្រូវមានស្មារតីភ្ញាក់រលឹកចូលរួមយុទ្ធនាការថែរក្សាអនាម័យបរិស្ថាន និងសម្អាតបរិវេណមន្ទីរ អង្គភាព តាមដងផ្លូវ និងផ្ទះសម្បែងរៀងៗខ្លួននៅថ្ងៃទី២៣ ខែតុលា ឆ្នាំ២០២៦ខាងមុខនេះ។

ឯកឧត្តម សុខ លូ គូសបញ្ជាក់ថា ពិធីព្រលែងកូនត្រីពូជ និងកូនបង្កងពូជធ្វើឡើងដើម្បីដាស់ស្មារតីឱ្យប្រជាពលរដ្ឋចូលរួមថែរក្សា និងអភិរក្សធនធានមច្ឆជាតិសម្រាប់ជាប្រយោជន៍ដល់កូនចៅជំនាន់ក្រោយ។

ឯកឧត្តម ថ្លែងអំណរគុណដល់កងកម្លាំងយោធាដែលបានខិតខំការពារធនធានជលផល និងបង្រ្កាបបទល្មើសនៅតំបន់បឹងទន្លេសាបធ្វើឱ្យធនធានមច្ឆជាតិមានការកើនឡើងជាលំដាប់។

ឯកឧត្តម សុខ លូ មានប្រសាសន៍ជំរុញបែបនេះក្នុងឱកាសអញ្ជើញ អធិបតីក្នុងពិធីព្រលែងកូនត្រីពូជ និងកូនបង្កងពូជ នៅចំណុចដងស្ទឹងសង្កែ នៅព្រឹកមិញនេះ។

សូមជម្រាបថា ទិវាមច្ឆជាតិ “ព្រលែងកូនត្រីពូជ និងកូនបង្កងពូជ នៅថ្ងៃទី២១ ខែតុលា ឆ្នាំ២០២៦បានព្រលែងកូនត្រីពូជមាន ត្រីប្រា ត្រីឆ្ពិន ពោ ក្រាញ់ អណ្តែងទន់ ចំនួន ៧០ ០០០ក្បាល និងកូនបង្កងពូជ ៤០ ០០០ក្បាល សរុបចំនួន ១១០ ០០០ក្បាល ព្រមទាំងកូនអន្ទង់ និងកូនអណ្តើក៕SRP

គ្រួសាររងគ្រោះដោយសារអគ្គីភ័យ ទទួលបានអំណោយពីអនុសាខាកាកបាទក្រហមស្រុកជីក្រែង

លោក បូ ម៉េងទ្រី ប្រធានគណៈកម្មាធិការ អនុសាខាកាកបាទក្រហមស្រុកជីក្រែង ខេត្តសៀមរាប នៅថ្ងៃម្សិលមិញ បានដឹកនាំសហការី អញ្ជើញសួរសុខទុក្ខ និងនាំយកអំណោយជូនដល់គ្រួសាររងគ្រោះ ដោយសារភ្លើងឆេះផ្ទះ នៅក្នុងភូមិពោធិ៍ ឃុំពង្រក្រោម ស្រុកជីក្រែង ខេត្តសៀមរាប ដែលរងគ្រោះកាលពីថ្ងៃទី១៩ ខែតុលា ឆ្នាំ២០២៦។

ក្នុងឱកាសនោះ លោក បូ ម៉េងទ្រី បាននាំនូវប្រសាសន៍ផ្ដាំផ្ញើ សួរសុខទុក្ខពីសំណាក់ ថ្នាក់ដឹកនាំកាកបាទក្រហមកម្ពុជា ជាពិសេស ឯកឧត្តម ប្រាក់ សោភ័ណ ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប ដែលលោកតែងតែគិតគូរចំពោះសុខទុក្ខបងប្អូនប្រជាពលរដ្ឋគ្រប់រូបដោយមិនប្រកាន់វណ្ណៈ ពូជសាសន៍ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ស្របតាមទិសស្លោក «កាកបាទក្រហមកម្ពុជា មានគ្រប់ទីកន្លែងសម្រាប់គ្រប់ៗគ្នា មិនទុកអ្នកណាម្នាក់ចោល» និង «ទីណាមានទុក្ខលំបាក ទីនោះមានកាកបាទក្រហមកម្ពុជា»។

លោកប្រធានគណៈកម្មាធិការ ក៏បានសម្ដែងនូវក្ដីសោកស្ដាយ ចំពោះការបាត់បង់ដោយសារឧបទ្ទវហេតុដែលបានកើតឡើងនេះ ដែលគ្មាននរណាម្នាក់ចង់ជួបឡើយ។ លោកបន្តថា ត្បិតតែអំណោយមនុស្សធម៌ដែលបាននាំយកមកចែកជូននាពេលនេះ មានចំនួនមិនសមល្មមនឹងការខូចខាតក៏ពិតមែន តែក៏អាចជួយសម្រាលទុក្ខលំបាកបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។

សូមជម្រាបថា អំណោយដែលបានផ្ដល់ជូនរួមមាន៖ អង្ករ មី ត្រីខ ទឹកត្រី កន្ទេល មុង ភួយ ក្រម៉ា សារ៉ុង តង់ ទឹកសុទ្ធ និងថវិកាមួយចំនួនផងដែរ៕SRP

អត្ថបទ៖ លោក អ៊ុន ណារាជ្យ

ក្រសួងពាណិជ្ជកម្ម៖ ការចុះបញ្ជីពាណិជ្ជកម្មផ្ដល់សិទ្ធិពេញលេញស្របច្បាប់ និងជួយសម្រួលដល់បរិយាកាសធុរកិច្ចកាន់តែប្រសើរ

មន្រ្តីជាន់ខ្ពស់ក្រសួងពាណិជ្ជកម្មបានគូសបញ្ជាក់ថា ការចុះបញ្ជីពាណិជ្ជកម្មមិនត្រឹមតែផ្ដល់សិទ្ធិពេញលេញ និងការការពារស្របច្បាប់ដល់ម្ចាស់អាជីវកម្មប៉ុណ្ណោះទេ ប៉ុន្តែថែមទាំងជួយកាត់បន្ថយហានិភ័យ និងបង្កើនទំនុកចិត្តពីអតិថិជនផងដែរ ខណៈបច្ចុប្បន្នរាជរដ្ឋាភិបាល និងក្រសួងពាណិជ្ជកម្មបានដាក់ឱ្យដំណើរការនូវគម្រោងទំនើបកម្មសេវាសាធារណៈ ដើម្បីធ្វើឱ្យការចុះបញ្ជីកាន់តែងាយស្រួល លឿនរហ័ស និងចំណេញពេលវេលា។

ក្នុងសិក្ខាសាលាសិក្ខាសាលាផ្សព្វផ្សាយ ស្ដីពីការធ្វើសាមញ្ញកម្ម នៃការចុះបញ្ជីពាណិជ្ជកម្ម និងលិខិតបទដ្ឋានគតិយុត្តពាក់ព័ន្ធនឹងការចុះបញ្ជីពាណិជ្ជកម្ម នៅខេត្តសៀមរាប នាថ្ងៃទី២០ ខែតុលា ឆ្នាំ២០២៦ ឯកឧត្តម ឱម តារារិទ្ធ ប្រធាននាយកដ្ឋានចុះបញ្ជីពាណិជ្ជកម្ម នៃក្រសួងពាណិជ្ជកម្ម បានបញ្ជាក់ថា ការចុះបញ្ជីពាណិជ្ជកម្ម និងការធ្វើសាមញ្ញកម្មនីតិវិធី ជាផ្នែកមួយយ៉ាងសំខាន់នៃការកែលម្អបរិយាកាសធុរកិច្ច និងជួយសម្រួលដល់ប្រជាពលរដ្ឋ ពាណិជ្ជករ និងសហគ្រិន ក្នុងការបំពេញកាតព្វកិច្ចចុះបញ្ជីឱ្យបានត្រឹមត្រូវ និងស្របតាមច្បាប់។

ឯកឧត្តម បានឱ្យដឹងថា ក្រសួងពាណិជ្ជកម្មបានដាក់ឱ្យដំណើរការ នូវគម្រោងទំនើបកម្មសេវាសាធារណៈលើការងារចុះបញ្ជីពាណិជ្ជកម្មចំនួន៣ រួមមាន៖ ការធ្វើសាមញ្ញកម្មនៃការងារចុះបញ្ជីពាណិជ្ជកម្ម, ការធ្វើទំនើបកម្មការទូទាត់កម្រៃសេវាសាធារណៈ និងការលើកលែងការផាកពិន័យខកខានតម្កល់ប្រតិវេទន៍ប្រចាំឆ្នាំ។ ទំនើបកម្មនេះ នឹងសម្របសម្រួលដល់ការងារចុះបញ្ជីពាណិជ្ជកម្មឱ្យកាន់តែងាយស្រួល មានប្រសិទ្ធភាពខ្ពស់ ក្នុងការសាងបរិយាកាសធុរកិច្ចក្នុងព្រះរាជាណាចក្រកម្ពុជា ឱ្យកាន់តែមានភាពប្រសើរឡើង ស្របតាមគោលនយោបាយរបស់រាជរដ្ឋាភិបាលកម្ពុជា។

ឯកឧត្តមបន្តថា ការធ្វើសាមញ្ញកម្មនៃការចុះបញ្ជីពាណិជ្ជកម្ម នឹងជួយកាត់បន្ថយភាពស្មុគស្មាញក្នុងការបំពេញនីតិវិធី បង្កើតប្រសិទ្ធភាពវាសាធារណៈ និងរួមចំណែកបង្កើតបរិយាកាសអំណោយផលសម្រាប់ការធ្វើធុរកិច្ច និងការវិនិយោគ សំដៅជំរុញការអភិវឌ្ឍវិស័យឯកជន និងសេដ្ឋកិច្ចកម្ពុជាឱ្យកាន់តែមានប្រសិទ្ធភាព និងចីរភាព។ ឯកឧត្តម រំពឹងថាតាមរយៈសិក្ខាសាលានេះ អ្នកចូលរួមនឹងទទួលបានចំណេះដឹង និងបទពិសោធន៍ថ្មីៗ ពាក់ព័ន្ធនឹងការធ្វើសាមញ្ញកម្មនៃការចុះបញ្ជីពាណិជ្ជកម្ម ព្រមទាំងលិខិតបទដ្ឋានគតិយុត្តពាក់ព័ន្ធ។

លោក ភឿន គឹមលី ប្រធានមន្ទីរពាណិជ្ជកម្មខេត្តសៀមរាប បានឱ្យដឹងថា សម្រាប់មន្ទីរពាណិជ្ជកម្មខេត្ត តែងតែរៀបចំកិច្ចប្រជុំជាហូរហែពាក់ព័ន្ធ នឹងកិច្ចការនៃការចុះបញ្ជីពាណិជ្ជកម្មជាហេតុផលដែលសំខាន់ គឺចង់ឱ្យព័ត៌មាននៃការចុះបញ្ជី ឬក៏ព័ត៌មានផ្សេងទៀតទាក់ទងជាមួយនឹងក្រសួងពាណិជ្ជកម្ម ទៅដល់បងប្អូនអ្នកដែលធ្វើអាជីវកម្ម។ ធ្វើឱ្យសកម្មភាពការងារ កាន់តែប្រសើរ តាមរយៈការខិតខំរបស់ក្រសួងពាណិជ្ជកម្ម បានធ្វើការកែប្រែច្រើន ជាពិសេសការពង្រឹង និងជំរុញទៅកាន់វិវត្តន៍ទៅកាន់ការងារ Digital បានកាន់តែប្រសើរច្រើនជាងមុន ស្របទៅនឹងគោលនយោបាយ រាជរដ្ឋាភិបាលទាក់ទងជាមួយនឹងបច្ចេកវិទ្យា។ ក្នុងនោះការចុះបញ្ជីពាណិជ្ជកម្មនៅខេត្តសៀមរាប រយៈពេល៩ខែ ឆ្នាំ២០២៦នេះ ការចុះបញ្ជីពាណិជ្ជកម្ម មានជាង៥០០ និងការចុះបញ្ជីម៉ាកមាន ៣២ម៉ាក៕SRP

អត្ថបទ៖ លោក ធន់ ពូថេ
‎កែសម្រួល៖ លោក អ៊ុន ណារាជ្យ