ភ្នំពេញ៖សាលាដំបូងរាជធានីភ្នំពេញបានសម្រេចឃុំខ្លួនបណ្ដោះអាសន្ន ជនបង្កគ្រោះថ្នាក់ចរាចរណ៍ ហ៊ុន ហេង នៅពន្ធនាគារ ក្រោមបទចោទ បើកបរបង្កគ្រោះថ្នាក់ចរាចរណ៍បណ្ដាលឱ្យស្លាប់ របួស​អ្នកដទៃ និងបើកបរស្ថិតក្នុងស្ថានភាពស្រវឹង៕SRP

គ្រួសាររងគ្រោះដោយរន្ទះបាញ់ ថ្ងៃម្សិលមិញទទួលបានអំណោយពីកាកបាទក្រហមកម្ពុជា ខេត្តសៀមរាប

ខេត្តសៀមរាប៖លោក ស៊ុំ សំអន នាយកសាខា កាកបាទក្រហមកម្ពុជា ខេត្តសៀមរាប និងសហការី នារសៀលថ្ងៃទី១៧ ខែឧសភា ឆ្នាំ២០២៥ ចុះសួសុខទុក្ខ រំលែកទុក្ខ និងនំាយកអំណោយមនុស្សធម៌ជូនគ្រួសាររងគ្រោះដោយឧបទ្ទវហេតុ (រន្ទះបាញ់) កាលពីល្ងាចថ្ងៃទី១៦ ខែឧសភា ឆ្នាំ២០២៥ វេលាម៉ោង១៧និង១០នាទី។

ជនរងគ្រោះឈ្មោះ ដុប ស្រប ភេទប្រុស អាយុ ៣៤ឆ្នាំ សមាជិកគ្រួសារ ៤នាក់ (ស្រី ២នាក់) រស់នៅភូមិនគរក្រៅ សង្កាត់គោកចក ក្រុងសៀមរាប ខេត្តសៀមរាប។

នាឱកាសនោះ លោកនាយកសាខា បានសម្ដែងនូវការសោកស្ដាយ និងពាំនាំនូវប្រសាសន៍ផ្ដាំផ្ញើ និងសួរសុខទុក្ខដ៏ខ្ពង់ខ្ពស់ ពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តម ប្រាក់ សោភ័ណ ប្រធានគណៈកម្មាធិការសាខា កក្រក ខេត្តសៀមរាប ដែលជានិច្ចកាលតែងគិតគូរ យកចិត្តទុកដាក់ចំពោះសុខទុក្ខរបស់ បង-ប្អូនប្រជាពលរដ្ឋគ្រប់រូបដោយមិនប្រកាន់ វណ្ណៈ ជំនឿសាសនា ឬនិន្នាការនយោបាយណាមួយ ស្របតាមទិសស្លោក «ទីណាមានទុក្ខលំបាកទីនោះមានកាកបាទក្រហមកម្ពុជា» និង «កាកបាទក្រហមកម្ពុជាមានគ្រប់ទីកន្លែងសម្រាប់គ្រប់ៗគ្នា-មិនទុក្ខនរណាម្នាក់ចោល»។

គ្រឿងឧបភោគបរិភោគបានផ្ដល់ជូនគ្រួសារសពរងគ្រោះ ទទួលបានអង្ករ៣០គីឡូក្រាម ឃីត១កញ្ចប់ (សារុង១ ក្រមា១ មុង១ ភួយ១) ត្រីខ១យួរ មី១កេស ទឹកស៊ីអ៊ីវ១យួរ អំបិល១គីឡូក្រាម និងថវិកា ៤០ម៉ឺនរៀល៕SRP

ខេត្តសៀមរាប៖សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជានៅថ្ងៃសៅរ៍ ទី១៧ ខែឧសភា ឆ្នាំ២០២៥នេះ បានចាត់ឱ្យលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា ចុះសួរសុខទុក្ខ និងចូលរួមរំលែកមរណទុក្ខដ៏ក្រៀមក្រំជាមួយក្រុមគ្រួសារសពចំនួន ៥រូប ដែលបានទទួលមរណភាពក្នុងគ្រោះថ្នាក់ចរាចរណ៍កាលពីយប់ថ្ងៃទី១៤ ខែឧសភា ឆ្នាំ២០២៥ វេលាម៉ោង២៣និង២៥នាទី នៅស្រុកពួក ខេត្តសៀមរាប ពេលត្រឡប់មកពីធ្វើសំណង់នៅក្រុងប៉ោយប៉ែត ដែលពេលនេះសពបានយកមកធ្វើបុណ្យនៅស្រុកជីក្រែង និងស្រុកសូទ្រនិគម ខេត្តសៀមរាម។

ស្ថិតក្នុងសមានទុក្ខដ៏ក្រៀមក្រំនេះ លោកជំទាវអគ្គលេខាធិការរងទី១ បានសម្តែងនូវក្តីសោកសង្រេងចំពោះឧបទ្ទវហេតុគ្រោះថ្នាក់ចរាចរណ៍ដែលបានកើតឡើងបណ្តាលឱ្យសាច់ញាតិក្រុមគ្រួសារជាទីស្រឡាញ់បានបាត់បង់ជីវិត និងសូមឧទ្ទិសបួងសួងដល់វិញ្ញាណក្ខន្ធសពបានទៅកាន់សុគតិភពកុំបីឃ្លៀងឃ្លាតឡើយ។

ជនរងគ្រោះទាំង៥នាក់ រួមមាន៖
១. ឈ្មោះ រឿន រ៉ាន ភេទប្រុស អាយុ៤៥ឆ្នាំ នៅភូមិរកា ឃុំកំពង់ក្តី ស្រុកជីក្រែង ខេត្តសៀមរាប (សពធ្វើបុណ្យ នៅភូមិគោកមន ឃុំដំដែក ស្រុកសូទ្រនិគម)។
២. ឈ្មោះ ហឿន ហ៊ាម ភេទប្រុស អាយុ៣៨ឆ្នាំ នៅភូមិបឹង ឃុំគោកធ្លកក្រោម ស្រុកជីក្រែង ខេត្តសៀមរាប។
៣. ឈ្មោះ ផម ផា ភេទប្រុស អាយុ៤០ឆ្នាំ ភូមិថ្លុកស្មាច់ ឃុំគោកធ្លកលើ ស្រុកជីក្រែង ខេត្តសៀមរាប ។
៤. ឈ្មោះ ប៉ាត តឿម ភេទស្រី អាយុ៣៧ឆ្នាំ ភូមិស្លែងកោង ឃុំគោកធ្លកលើ ស្រុកជីក្រែង ខេត្តសៀមរាប។
៥. ឈ្មោះ ឆាន់ ម៉ាង ភេទប្រុស អាយុ៥៣ឆ្នាំ ភូមិម្កាក់ ឃុំគោកធ្លកលើ ស្រុកជីក្រែង ខេត្តសៀមរាប។

ជាមួយនឹងការចូលរួមរំលែកទុក្ខជាមួយក្រុមគ្រួសារសពខាងលើនេះ កាកបាទក្រហមកម្ពុជា បានឧបត្ថម្ភគ្រឿងឧបភោគបរិភោគ និងថវិកាចំនួន ៥លានរៀលជូនដល់ក្រុមគ្រួសារសពនីមួយៗសម្រាប់ជួយសម្រាលការលំបាក និងធ្វើបុណ្យតាមប្រពៃណីផងដែរ។ ដោយឡែក អនុសាខាកាកបាទក្រហមកម្ពុជា ស្រុកជីក្រែង ក៏បានចូលរួមរំលែក និងផ្តល់អំណោយជូនដល់គ្រួសាររងគ្រោះនីមួយៗផងដែរ។

ទន្ទឹមនឹងនេះ នៅព្រឹកថ្ងៃខែឆ្នាំដដែលនេះដែរ ឯកឧត្តម គុជ លីណា អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជា ខេត្តសៀមរាប និងសហការី ក៏បានអញ្ជើញចុះសួរសុខទុក្ខជនរងគ្រោះក្នុងគ្រោះថ្នាក់ចរាចរណ៍នោះ ដែលមានអ្នករងរបួសចំនួន ១១នាក់ទៀត ដែលកំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាបផងដែរ។ អំណោយមនុស្សធម៌បានផ្ដល់ជូនក្នុង១គ្រួសារទទួលបាន៖ មុង១ ភួយ១ សារុង១ ក្រមា១ កន្ទេល១ អង្ករ៣០គីឡូក្រាម មី១កេស ត្រីខ១យួរ ទឹកស៊ីអ៊ីវ១យួរ អំបិល១គីឡូក្រាម និងថវិកា១០ម៉ឺនរៀល៕SRP

សម្ដេចបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានគូសបញ្ជាក់ថា ថ្មីៗនេះ មានការចោទប្រកាន់ថា រាជរដ្ឋាភិបាល បានលក់ព្រលានយន្តហោះពោធិ៍ចិនតុងតាំងពី១៥ ឆ្នាំមុនមក ដែលការលើកឡើងបែបនេះ ជាការចោទប្រកាន់ហើយមិនពិតទាល់តែសោះ។

ក្នុងពិធីអបអរសាទរខួបអនុស្សាវរីយ៍លើកទី៨០ ថ្ងៃកំណើតនគរបាលជាតិកម្ពុជា នៅព្រឹកថ្ងៃសុក្រទី១៦ ខែឧសភា ឆ្នាំ២០២៥ សម្ដេចបវរធិបតី ហ៊ុន ម៉ាណែត បានថ្លែងថា បើសិនដូចការចោទប្រកាន់មែន សូមបង្ហាញឯកសារនោះមក។ សម្តេចបានបន្តថា សម្តេច បានសម្រេចផ្ទេរប្រតិបត្តិការ ព្រលានយន្តហោះកន្លែងចាស់ ទៅព្រលានយន្តហោះថ្មីតែប៉ុណ្ណោះ៕SRP

នាយករដ្ឋមន្រ្តី សម្ដេចធិបតីហ៊ុន ម៉ាណែត បនគូសបញ្ជាក់ថា កម្ពុជា បានប្រែក្លាយពីសង្គមមួយដែលមានបញ្ហាច្រើន ជាពិសេសឆ្លងកាត់សង្រ្គាម និងអសន្តិសុខសង្គមពីមុន និងជាប្រទេសឯកោបំផុត ប៉ុន្តែពេលនេះ កម្ពុជាបានក្លាយជាសង្គមមួយដែលកំពុងរីកចម្រើនគ្រប់វិស័យ និងបន្តឆ្ពោះទៅកាន់ភាពរុងរឿងកាន់តែល្អប្រសើរបន្ថែមទៀតនាពេលខាងមុខ។

ក្នុងពិធីអបអរសាទរខួបអនុស្សាវរីយ៍លើកទី៨០ ថ្ងៃកំណើតនគរបាលជាតិកម្ពុជា នៅព្រឹកថ្ងៃសុក្រទី១៦ ខែឧសភា ឆ្នាំ២០២៥ សម្ដេចបវរធិបតី ហ៊ុន ម៉ាណែត បានថ្លែងថា ផ្អែកលើវឌ្ឍនភាពសង្គម កម្ពុជាយើង ទាមទារឱ្យនគរបាលជាតិ ត្រូវពង្រឹងសមត្ថភាពជាប់ជាប្រចាំដើម្បីអភិវឌ្ឍខ្លួនឱ្យស្របទៅតាមបរិបទនៃការរីកចម្រើនរបស់សង្គមជាតិយើង។

សម្ដេចបវរធិបតី ហ៊ុន ម៉ាណែត បានគូសបញ្ជាក់ថា ការប្រែប្រួលនៃការអភិវឌ្ឍប្រទេសជាតិ និងពិភពលោក គឺទាមទារឱ្យកងកម្លាំងនគរបាលជាតិ ត្រូវត្រៀមខ្លួនជានិច្ច និងខិតខំរៀបចំលិខិតបទដ្ឋាន និងគោលនយោបាយនានា ដើម្បីទបស្កាត់បទល្មើសនានាទាំងបទល្មើសបច្ចេកវិទ្យា និងបទល្មើសនៅមូលដ្ឋាន ដូចជាករណីក្មេងទំនើងជាដើម៕SRP

ភ្នំពេញ៖អ្នកបើករថយន្តដែលជាមន្ត្រីនៃស្នងការដ្ឋាននគរបាលរាជធានីភ្នំពេញ ត្រូវបានសមត្ថកិច្ចជំនាញចរាចរណ៍កំពុងកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់។

ការសម្រេចបញ្ជូនខ្លួននេះតាមបទបញ្ជាផ្ទាល់របស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនិងជាស្នងការនគរបាលរាជធានីភ្នំពេញ។

សូមបញ្ជាក់ថា កាលពីថ្ងៃទី១៥ ខែឧសភា ឆ្នាំ២០២៥ វេលាម៉ោង១៣និង៥៧នាទី មានករណីគ្រោះថ្នាក់ចរាចរណ៍មួយកេីតឡេីង ត្រង់ចំណុច មុខក្រសួងវប្បធម៌ និងវិចិត្រសិល្បៈ សង្កាត់ ទន្លេបាសាក់ ខណ្ឌចំការមន រាជធានីភ្នំពេញ បង្កឡើងដោយរថយន្តម៉ាក LEXUS RX400H បុករះ ម៉ូតូកង់បីចំនួន ០៣គ្រឿង ម៉ូតូ០១គ្រឿង និងរថយន្ត០១គ្រឿង។

ជនបង្កមានឈ្មោះ ហ៊ុន ហេង ជានាយការិយាល័យគណនេយ្យ ចំណុះផែនការងារភស្តុភារ និងហិរញ្ញវត្ថុ នៃស្នងការដ្ឋាននគរបាលរាជធានីភ្នំពេញ បើករថយន្ត
ម៉ាក LEXUS RX400H ពណ៌ទឹកមាស ពាក់ផ្លាកលេខ ភ្នំពេញ 2AO.2188 ធ្វើដំណើរតាមបណ្ដោយមហាវិថីព្រះនរោត្តម បើកបរក្នុងទិសដៅ ពីត្បូងទៅជើង លុះបើកមកដល់ចំណុចកើតហេតុខាងលើ បានបុករះពីក្រោយយានយន្តជាច្រើនគ្រឿងដែលធ្វើដំណើរស្របទិសគ្នា។

ហេតុការណ៍នេះបង្កឲ្យមានមនុស្សស្លាប់ម្នាក់ រងរបួសធ្ងន់០២នាក់ និងរងរបួសស្រាល០៣ស្រាល។

តាមការបញ្ជាក់របស់សមត្ថកិច្ចនគរបាលរាជធានីភ្នំពេញហេតុការណ៍នេះ មូលហេតុគ្រោះថ្នាក់បណ្ដាលមកពី អ្នកបើកបររថយន្ត LEXUS RX400H បើកបរលឿនខ្វះការប្រុងប្រយ័ត្ន និងបើកបរមានជាតិស្រវឹងមានអត្រាជាតិអាល់កុល៕SRP

សមត្ថកិច្ចកម្លាំងអាវុធហត្ថខេត្តបាត់ដំបងបានចាប់ខ្លួនស្ត្រីម្នាក់ ករណី: ឆបោក (ប្រាក់)។ ការចាប់ខ្លួនធ្វើឡើងនៅម៉ោង ១០ និង ១០ នាទី ថ្ងៃទី ១៤ ខែឧសភា ឆ្នាំ ២០២៥ ចំណុចបុរីរំចេក ភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង។

សមត្ថកិច្ចអាវុធហត្ថខេត្តបាត់ដំបងបានឲ្យដឹងថា ជនសង្ស័យឈ្មោះ សុង សោភ័ណ្ឌ ភេទស្រី អាយុ ៤៧ ឆ្នាំ មុខរបរលក់ដូរ ស្នាក់នៅចំណុចខាងលើ ពីបទ:ឆបោក (ប្រាក់)។

ការចាប់ខ្លួននេះតាមបណ្តឹងរបស់ជនរងគ្រោះ ឈ្មោះ ឈឿន ឈុំ ភេទប្រុស អាយុ៥៧ ឆ្នាំមុខរបរ ធ្វើស្រែ ស្នាក់នៅភូមិអំពិល ឃុំអំពិលប្រាំដើម ស្រុកបរវេល ខេត្តបាត់ដំបង ប្រព្រឹត្តកាលពីថ្ងៃទី០៦ ខែឧសភា ឆ្នាំ២០២៥ និង ថ្ងៃទី១៤ ខែឧសភា ឆ្នាំ២០២៥ នៅចំណុចខាងលើ។ ដោយជនសង្ស័យបានយកប្រាក់ពីជនរងគ្រោះចំនួន ២៦២០ដុល្លារ ដើម្បីរត់ការយកឈ្មោះកូនរបស់ជនរងគ្រោះ ចូលក្របខ័ណ្ឌមន្រ្តីនគរបាលជាតិក្នុងឆ្នាំ ២០២៥ បាន ដោយមិនចាំបាច់ប្រលងចូល ទាំងដែលក្រសួងមហាផ្ទៃមិនមានជ្រើសរើសមន្ត្រីនគរបាលជាតិថ្មីក្នុងឆ្នាំ ២០២៥ ឡើយ។

សមត្ថកិច្ចអាវុធហត្ថបានបន្តថា ហេតុការណ៍នេះ ដកហូតវត្ថុតាង
១.បញ្ជីរាយនាមបេក្ខជនប្រឡងជាប់ក្របខណ្ឌមន្រ្តីនគបាល ឆ្នាំ២០២៥ ចំនួន ០២ សន្លឹក
២.លិខិតស្នើសុំចូលក្របខណ្ឌមន្រ្តីនគបាលជាតិចំនួន ០១ សន្លឹក
៣.លិខិតធានាឪពុក ម្តាយ ឬ អាណាព្យាបាល ចំនួន ០៣ សន្លឹក
៤.ពាក្យស្នើសុំចំនួន ០៨ សន្លឹក
៥.ពាក្យសុំចូលបម្រើការងារក្នុងក្រសួងមហាផ្ទៃចំនួន ០១ សន្លឹក
៦.លិខិតធានា ចំនួន ០១ សន្លឹក
៧.លិខិតបញ្ជាក់ចំនួន ០១ សន្លឹក
៨.លិខិតបញ្ជាក់កិរិយាមាយាទចំនួន ០១ សន្លឹក
៩.វិញ្ញាប័ណ្ណបត្របណ្តោះអាសន្នមធ្យមសិក្សាទុតិយភូមិ ចំនួន ០១ សន្លឹក
១០. អត្តសញ្ញាណប័ណ្ណ កូពី ចំនួន ០១ សន្លឹក
១១.សៀវភៅគ្រួសារ កូពី ចំនួន ០១ សន្លឹក
១២.ទូរស័ព្ទដៃចំនួន ០១ គ្រឿង ម៉ាក SAMSUNG
១៣.ចិញ្ជៀន លោហៈធាតុពណ៌លឿង ដាំត្បូង ពណ៌ ស ចំនួន ០២ វង់
១៤.ផ្លាកដៃ លោហៈធាតុពណ៌លឿង ចំនួន ០១ ខ្សែ
១៥.ខ្សែដៃ លោហៈធាតុពណ៌លឿង ដាំត្បូងពណ៌ ស ចំនួន ០១ ខ្សែ
១៦.ខ្សែក លោហៈធាតុពណ៌លឿង ដាំត្បូងពណ៌ ស ចំនួន ០១ ខ្សែ
១៧.ក្រវិល ដាំត្បូងពណ៌ ស ចំនួន ០១ គូរ
១៨.ប្រាក់ដុល្លារ ២៥០០ ដុល្លារ
១៩.រថយន្ត ០១ គ្រឿង ម៉ាក LEXUS NX200T ពណ៌ ប្រផេះ ស៊េរីឆ្នាំ ២០១៦ ពាក់ស្លាកលេខ ភ្នំពេញ 2BS-9510 ។
បច្ចុប្បន្ន ជនសង្ស័យ និងវត្ថុតាងការិយាល័យជំនាញ ដើម្បីចាត់ការតាមនីតិវិធី៕SRP

ខេត្តសៀមរាប៖យុវសិស្សចំនួន៣រូប ឈ្មោះ ពៅ ជុំរតនៈ ជាសិស្សថ្នាក់ទី១២ មកពីសាលាអន្តរជាតិ ស្មាធ ឃីដ ទទួលបានជ័យលាភី ចំណាត់ថ្នាក់លេខ១ លេីមុខវិជ្ជារូបវិទ្យា ទូទាំងខេត្ត និងទូទាំងប្រទេស មួយរូបទៀតទទួលបានជ័យលាភី ចំណាត់ថ្នាក់លេខ១ លេីមុខវិជ្ជាគណិតវិទ្យា ទូទាំងខេត្ត ឯមួយរូបទៀតទទួលបានជ័យលាភី ចំណាត់ថ្នាក់លេខ៣ លេីមុខវិជ្ជារូបវិទ្យា ទូទាំងខេត្ត ទទួលបានរង្វាន់លើកទឹកចិត្តពីសាលាអន្តរជាតិ ស្មាធ ឃីដ។

ការផ្ដល់រង្វាន់អបអរសាទរសិស្សពូកែនេះធ្វើឡើងនៅព្រឹក ថ្ងៃទី១៣ ខែឧសភា ឆ្នាំ២០២៥ នៅសាលាអន្តរជាតិ ស្មាធ ឃីដ ខេត្តសៀមរាប សាខាទី៣ ដោយមានការអញ្ជើញចូលរួមពីអគ្គនាយកសាលា គណៈគ្រប់គ្រង លោកគ្រូអ្នកគ្រូ សិស្សានុសិស្ស និងមាតាបិតារបស់សិស្សពូកែទាំងបីរូបនោះផងដែរ។

យុវសិស្សឈ្មោះ ពៅ ជុំរតនៈ ជាសិស្សថ្នាក់ទី១២ មកពីសាលាអន្តរជាតិ ស្មាធ ឃីដ ទទួលបានជ័យលាភី ចំណាត់ថ្នាក់លេខ១ លេីមុខវិជ្ជារូបវិទ្យា ទូទាំងខេត្ត និងទូទាំងប្រទេស ទទួលបានរង្វាន់លើកទឹកចិត្តពីសាលាអន្តរជាតិ ស្មាធ ឃីដ ចំនួន ៣លាន៥សែនរៀល។

-យុវសិស្សឈ្មោះ មាស សុវណ្ណរ័ត្ន ជាសិស្សថ្នាក់ទី៩ មកពីសាលាអន្តរជាតិ ស្មាធ ឃីដ ទទួលបានជ័យលាភី ចំណាត់ថ្នាក់លេខ១ លេីមុខវិជ្ជាគណិតវិទ្យា ទូទាំងខេត្ត ទទួលបានរង្វាន់លើកទឹកចិត្តពីសាលាអន្តរជាតិ ស្មាធ ឃីដ និងក្រុមហ៊ុនហ្វតតេ អ៊ិនសួរីនស៍ (ខេមបូឌា) ចំនួន ១លានរៀល។

-យុវសិស្សឈ្មោះ វ៉ាន់ ដារ៉ាវិជ្ជា ជាសិស្សថ្នាក់ទី៩ មកពីសាលាអន្តរជាតិ ស្មាធ ឃីដ ទទួលបានជ័យលាភី ចំណាត់ថ្នាក់លេខ៣ លេីមុខវិជ្ជារូបវិទ្យា ទូទាំងខេត្ត ទទួលបានរង្វាន់លើកទឹកចិត្តពីសាលាអន្តរជាតិ ស្មាធ ឃីដ និងក្រុមហ៊ុនហ្វតតេ អ៊ិនសួរីនស៍ (ខេមបូឌា) ចំនួន ១លានរៀល។

យុវសិស្សទាំង៣រូប មកពីសាលាអន្តរជាតិ ស្មាធ ឃីដ បានសម្ដែងនូវការរីករាយនិងមានមោទនភាពយ៉ាងខ្លាំងចំពោះការខិតខំប្រឹងរៀនសូត្ររហូតទទួលបានចំណាត់ថ្នាក់នឹងបានថ្លែងអំណរគុណដល់សាលាអន្តរជាតិ ស្មាធ ឃីដ ដែលបានផ្ដល់ចំណេះដឹងដល់រូបគេជាសាលាអន្តរជាតិមានគុណភាពផងដែរ។

សូមជម្រាបថា តាមការបញ្ជាក់ពីសាលាអន្តរជាតិ ស្មាធ ឃីដ បានបើកសម្ភោធជាផ្លូវការតាំងពីថ្ងៃទី៧ ខែមករា ឆ្នាំ ២០០៩ មានរយៈពេល ១៦ ឆ្នាំមកហើយដោយមានការអនុញ្ញាតពីក្រសួងអប់រំយុវជននិងកីឡា និងមានការគាំទ្រពីឧត្តមភាពសិក្សាមានគុណភាព ហើយបានពង្រីកសាខាជាច្រើនកន្លែងផងដែរ។

សាលាស្មាធ ឃីដមានកម្មវិធីសិក្សា៖
-ចំណេះទូទៅភាសាខ្មែរ (ពីកម្រិតមត្តេយ្យ ដល់ថ្នាក់ទី១២)
-ចំណេះទូទៅភាសាអង់គ្លេស-ចិន (ពីកម្រិតមុនមត្តេយ្យ ដល់ថ្នាក់ទី១២)
-ភាសាអង់គ្លេសត្រៀមអាហារូបករណ៍ (IELTS 7-12) តាមកម្មវិធី British Council
-សហគ្រិនភាព តាមកម្មវិធី Venture Lab  របស់សហរដ្ឋអាមេរិក
-សំណេរកូដ (Coding) តាមកម្មវិធី Tynker  របស់សហរដ្ឋអាមេរិក
-Robotic & Stick’Em  តាមកម្មវិធី  របស់សឹង្ហបុរី

បាវចនា៖ មូលដ្ឋានអប់រំរឹងមាំ អនាគតរុងរឿង

ចក្ខុវិស័យ៖ អប់រំសិស្សឱ្យទទួលបាន មូលដ្ឋានអប់រំរឹងមាំ ដើម្បីអនាគតរុងរឿង។

បេសកកម្ម៖ អប់រំសិស្សឱ្យមានឧត្តមភាពលើសូចនាករបួន ចំណេះដឹង ចំណេះធ្វើ សីលធម៌ និងទំនុកចិត្តលើខ្លួនឯង។

ឧត្តមភាពអប់រំ៖ ប្តេជ្ញាចំពោះឧត្តមភាពអប់រំ ដោយបន្តជំរុញបរិយាកាសសិក្សាដោយភាពច្នៃប្រឌិត បរិយាបន្ន ដែលសិស្សគ្រប់រូបមានសិទ្ធិសម្រេចសក្តានុពលរបស់ខ្លួន។

សិស្ស ឪពុកម្តាយ បុគ្គលិក សហគមន៍៖ សសរស្តម្ភទាំងបួននេះ ជួយដល់ឧត្តមភាពអប់រំ ពោលគឺ ការចង់ដឹងចង់ឃើញរបស់សិស្ស គប្បីមានការគាំទ្រពី មាតាបិតា បុគ្គលិកជំនាញរបស់សាលា និងសហគមន៍។

សុវត្ថិភាពសិក្សា ប្រសិទ្ធភាពអប់រំ៖ យកចិត្តទុកដាក់លើឧត្តមភាពអប់រំ និងបរិស្ថាន ផ្តល់បរិក្ខារសិក្សាមានសុវត្ថិភាព ប្រើវិធីសាស្រ្តមានប្រសិទ្ធភាពដែលធានាដល់ការសិក្សាដែលមិនផ្តល់ផលអវិជ្ជមានដល់ភពផែនដី។

ថ្នាលអប់រំគាំទ្របរិស្ថាន៖ ផ្តល់សេវាអប់រំ និងសេវាគាំទ្រ ស្របច្បាប់ក្នុងថ្នាលអប់រំដែលគាំទ្របរិស្ថាន សាលាប្រកួតប្រជែងបង្កើតបរិយាកាសសិក្សាដែលមិនប៉ះពាល់ដល់បរិស្ថាន ប៉ុន្តែជំរុញការសិក្សា និងការស្រឡាញ់ថែរក្សាបរិស្ថាន៕

ខេត្តសៀមរាប៖ផ្នែកគ្រប់គ្រងអចលនទ្រព្យបុរីទេសចរណ៍ បានចេញលិខិតព្រមាននឹងចាត់វិធានការទៅតាមផ្លូវច្បាប់ជាធរមាន ប្រសិនបើមានករណីកាប់ បំផ្លាញដើមឈើណាមួយកើតមានឡើង នៅក្នុងបុរីទេសចរណ៍។

ការព្រមានធ្វើឡើងតាមសេចក្តីជូនដំណឹងស្តីពី ដើមឈើដែលជាទ្រព្យសម្បត្តិសាធារណៈរបស់បុរី ចុះថ្ងៃទី ១៣ ខែ ឧសភា ឆ្នាំ២០២៥។

ផ្នែកគ្រប់គ្រងអចលនទ្រព្យបុរីទេសចរណ៍ មានកិត្តិយសសូមជម្រាបជូនដំណឹងដល់ ឯកឧត្តម លោកជំទាវ លោក/លោកស្រី ដែលជាម្ចាស់គេហដ្ឋានទាំងអស់ឱ្យបានជ្រាបថា៖ ដោយសង្កេតឃើញថាកន្លងមកមានករណីកាប់ និងគ្រៀវដើមឈើដែលជាទ្រព្យសាធារណៈ របស់បុរីធ្វើឱ្យមានការប៉ះ ពាល់ដល់សោភ័ណភាព និងបរិស្ថាននៅក្នុងបុរី។ ដើមឈើត្រូវបានដាំឡើងដើម្បីបង្កើតភាពបៃតង ស្រស់ ជាម្លប់តាមដងផ្លូវសាធារណៈ ជួយកាត់បន្ថយកម្ដៅថ្ងៃ បង្កើតបរិយាកាសល្អ និងជាពិសេសវាបាន បញ្ចេញនូវអុកស៊ីសែន និងស្រូបយកឧស្ម័នដែលជាសារធាតុពុល។

ដើម្បីចូលរួមថែរក្សាបរិស្ថានធម្មជាតិនៅក្នុងសហគមន៍បុរីទេសចរណ៍ ផ្នែកគ្រប់គ្រងអចលនទ្រព្យបុរីទេសចរណ៍យើងខ្ញុំមិនឱ្យមានការកាប់បំផ្លាញដើមឈើដែលជាទ្រព្យសម្បត្តិសាធារណៈរបស់បុរីជាដាច់ខាត។ ប្រសិនបើមានករណីកាប់ បំផ្លាញដើមឈើណាមួយកើតមានឡើង ផ្នែកគ្រប់គ្រងអចលនទ្រព្យបុរី ទេសចរណ៍យើងខ្ញុំ នឹងចាត់ វិធានការទៅតាមផ្លូវច្បាប់ជាធរមាន។

ផ្នែកគ្រប់គ្រងអចលនទ្រព្យបុរីទេសចរណ៍យើងខ្ញុំសង្ឃឹមយ៉ាងមុតមាំចំពោះ ឯកឧត្តម លោក ជំទាវ លោក/លោកស្រី ដែលជាម្ចាស់គេហដ្ឋានទាំងអស់ ដែលរស់នៅក្នុងសហគមន៍បុរីទេសចរណ៍ ជា ប្រជាពលរដ្ឋប្រកប ដោយសេចក្តីថ្លៃថ្នូរ និងមានកិត្តយស សូមចូលរួមសហការថែរក្សារការពារដើមឈើ សាធារណៈនៅក្នុងបុរីទាំងអស់គ្នា។

អាស្រ័យដូចបានជម្រាបជូនខាងលើសូម ឯកឧត្តម លោកជំទាវ លោក/លោកស្រី មេត្តា ជ្រាបជាព័ត៌មាន និង ចូលរួមសហការជាមួយយើងខ្ញុំដោយក្ដីអនុគ្រោះ៕SRP

ឯកឧត្តម​ ប្រាក់​ សោភ័ណ​ ថ្លែងអំណរយ៉ាងជ្រាលជ្រៅចំពោះស្ថាបនិកទេសចរណ៍អំណាន ដែលបានបំពេញបេសកកម្ម នៅខេត្តសៀមរាប​ ដេីម្បីយកសៀវភៅជាច្រេីនដាក់ ឱ្យបងប្អូនបានអាន​ ព្រមទាំងដកស្រង់នូវបទពិសោធន៍ល្អៗពីសៀវភៅ

ទេសចរណ៍អំណាន បានបញ្ចប់បេសកកម្ម របស់ខ្លួន នៅលេីទឹកដីអង្គរ​ ក្រុងសៀមរាប។

លោក​ អ៊ុក​ វណ្ណដេត​ ជាស្ថាបនិកទេសចរណ៍អំណាន ប្រកបដោយមនោសញ្ចេតនា​ រួសរាយ​រាក់ទាក់​ ដែលបានមកបំពេញបេសកកម្ម នៅលេីទឹកដីអង្គរក្រុងសៀមរាប​ ខេត្តសៀមរាប ចាប់ពីថ្ងៃ១៨​ ខែមេសា​ ដល់ថ្ងៃទី១២​ ខែឧសភា​ ឆ្នាំ២០២៥​។ ក្នុងអំឡុងពេលបេសកកម្មនៅខេត្តសៀមរាបនេះ​ បានទាក់ទាញបងប្អូន​ មិត្តអ្នកអាន​សៀវភៅ​ និងអ្នកគាំទ្រជាច្រេីន​ ដែលនេះជាការបង្ហាញនូវការចូលរួមអភិវឌ្ឍន៍ចំណេះដឹងតាមរយៈការអានសៀវភៅ​។

ក្រោមតំណក់ទឹកភ្លៀង នារាត្រីថ្ងៃទី១២ ខែឧសភា​ ឯកឧត្តម ប្រាក់ សោភ័ណ អភិបាលខេត្តសៀមរាប បានជូនដំណើរលោក អ៊ុក វណ្ណដេ ស្ថាបនិកទេសចរណ៍អំណាន ប្រកបដោយមនោសញ្ចេតនា ដែលបានបញ្ចប់បេសកកម្ម របស់ខ្លួន នៅលេីទឹកដីអង្គរ​ ក្រុងសៀមរាប ជាមួយនឹងមិត្តអ្នកអាន និងអ្នកគាំទ្រជាច្រើនផងដែរ។

ក្នុងការស្នាក់នៅខេត្តសៀមរាប​ លោក​ អ៊ុក​ វណ្ណដេ​ ក៏បានថ្លែងអំណរគុណដល់អាជ្ញាធរខេត្តសៀមរាប​ ពិសេស ឯកឧត្តម​ ប្រាក់​ សោភ័ណ​ ដែលបានផ្តល់ទីតាំង​ ការសម្របសម្រួលទូទៅដល់អ្នកអានសៀវភៅផងដែរ។

ឯកឧត្តម​ ប្រាក់​ សោភ័ណ​ ក៏បានថ្លែងអំណរយ៉ាងជ្រាលជ្រៅចំពោះលោក អ៊ុក វណ្ណដេ ស្ថាបនិកទេសចរណ៍អំណាន ដែលបានបំពេញបេសកកម្មនៅខេត្តសៀមរាប​ ដេីម្បីយកសៀវភៅជាច្រេីនដាក់ឱ្យលោកយាយលោកតា​ អ៊ុំ​ ពូ​មីង​ និងបងប្អូនបានអាន​ ព្រមទាំងដកស្រង់នូវបទពិសោធន៍ល្អៗពីសៀវភៅ៕SRP

ខេត្តបាត់ដំបង៖កម្លាំងក្រុមអន្តរាគមន៍ បង្ការ បង្ក្រាបនៅថ្ងៃទី ១១ ខែឧសភា ឆ្នាំ ២០២៥ បានចុះប្រតិបត្តិការបង្ក្រាប ករណីលួច ( យកម៉ូតូ ) ០១ករណី និងបានធ្វើការនាំខ្លួនជនសង្ស័យ ០៣ នាក់ មកកាន់ស្នងការដ្ឋានដើម្បីធ្វើការសាកសួរ។

1️⃣ ឈ្មោះ រុំ ភីរក្ស ហៅ ង៉ា ភេទ ប្រុស អាយុ ៣៣ ឆ្នាំ មានទីលំនៅមិនពិតប្រាកដ ។
2️⃣ ឈ្មោះ ភឹម ឌីណា ភេទ ប្រុស អាយុ ៣៩ ឆ្នាំ មានទីលំនៅភូមិរំចេក២ សង្កាត់រតនៈ ក្រុងបាត់ដំបង ខេត្តបាត់ដំបង។
3️⃣ ឈ្មោះ យិន សារ៉ាវុធ ភេទប្រុស អាយុ ៤៦ ឆ្នាំ មានទីលំនៅភូមិរំចេក២ សង្កាត់រតនៈ ក្រុងបាត់ដំបង ខេត្តបាត់ដំបង។

នៅចំពោះមុខសមត្ថកិច្ចជនសង្ស័យឈ្មោះ ភឹម ឌីណា បានឆ្លើយសារភាពថា ៖ កន្លងមកខ្លួនបានធ្វើសកម្មភាពលួចយកម៉ូតូ ចំនួន ០៧ គ្រឿង
+ ស្រុកសង្កែ
– លើកទី ១ ខ្លួនបានធ្វើសកម្មភាពលួចជាមួយជនសង្ស័យឈ្មោះ យិន សារ៉ាវុធ ដោយលួចបានម៉ូតូស៊េរីចាស់ចំនួន ០២ គ្រឿង។
– លើកទី ២ លួចបានម៉ូតូ ម៉ាកហុងដា វេវ អាល់ហ្វា ពណ៍ខ្មៅ ០១ គ្រឿង
– លើកទី ៣ លួចបានម៉ូតូ ម៉ាក ហុងដា ឃ្លីក ពណ៍ ក្រហម ០១ គ្រឿង
+ ស្រុកឯកភ្នំ
– លើកទី ១ ខ្លួនបានធ្វើសកម្មភាពជាមួយជនសង្ស័យ ឈ្មោះ រុំ ភីរក្ស ហៅ ង៉ា ដោយលួចបានម៉ូតូ ម៉ាក ហុងដា ឃ្លីក ពណ៌ ស ០១ គ្រឿង ។
+ ស្រុកថ្មគោល
– លើកទី ១ ខ្លួនបានធ្វើសកម្មភាពជាមួយជនសង្ស័យឈ្មោះ រុំ ភីរក្ស ហៅ ង៉ា ដោយលួចបានម៉ូតូម៉ាកហុងដា ឌ្រីម ស៊េរីឆ្នាំ ២០២០ ពណ៌ខ្មៅ ០១ គ្រឿង
+ ស្រុករតនមណ្ឌល
– កាលពីថ្ងៃទី ២៩ ខែមេសា ឆ្នាំ២០២៥ នៅចំណុចភូមិតាគ្រក់ ឃុំត្រែង ស្រុករតនមណ្ឌល
ខ្លួនបានធ្វើសកម្មភាពជាមួយជនសង្ស័យ ឈ្មោះ រុំ ភីរក្ស ហៅ ង៉ា បានធ្វើសកម្មភាពលួចយកម៉ូតូ ០១ គ្រឿង ដែលជារបស់ជនរងគ្រោះឈ្មោះ ហួន សុខហៃ ភេទប្រុស អាយុ ១៨ ឆ្នាំ មានទីលំនៅភូមិជីសាង ឃុំត្រែង ស្រុករតនមណ្ឌល ខេត្តបាត់ដំបង ក្នុងពេលដែលខ្លួនទុកនៅរោងគោនៅក្បែរផ្ទះ ហើយជិះគេចខ្លួនបាត់ ។
វត្ថុតាងដកហូតរួមមាន ៖
– ម៉ូតូ ០១ គ្រឿង ម៉ាក ហុងដាឌ្រីម សេ១២៥ ពណ៍ក្រហម ស៊េរីឆ្នាំ ២០២០ ពាក់ស្លាកលេខ បាត់ដំបង1AJ-2031 (ជារបស់ជនរងគ្រោះ)
– ម៉ូតូ ០១ គ្រឿង ម៉ាកYAMAHA EXCITER ស៊េរីចាស់ (ជាមធ្យោបាយជិះធ្វើសកម្មភាព)

បច្ចុប្បន្នការិយាល័យជំនាញកំពុងធ្វើការកសាងសំណុំរឿងដើម្បីបញ្ជូនទៅសាលាដំបូងខេត្តបាត់ដំបងចាត់ការបន្តតាមនីតិវិធី៕SRP