រាជធានីភ្នំពេញ៖អគ្គស្នងការនគរបាលជាតិ ឯកឧត្តម នាយឧត្តមសេនីយ៍ ស ថេត បានដាក់បទបញ្ជាដល់កម្លាំងជំនាញ នៃអគ្គស្នងការដ្ឋាននគរបាលជាតិ ពិសេសមន្ទីរប្រឆាំងគ្រឿងញៀន ត្រូវបន្ដប្រតិបត្តិការកុំបន្ធូរដៃលើការងារបង្ការ ទប់ស្កាត់ និងបង្ក្រាបបទល្មើសគ្រឿងញៀន។

ក្នុងឱកាសដឹកនាំកិច្ចប្រជុំត្រួតពិនិត្យ និងវាយតម្លៃលទ្ធផលការប្រយុទ្ធប្រឆាំងគ្រឿងញៀន ប្រចាំឆមាសទី១ នៅព្រឹកថ្ងៃទី៦ ខែមិថុនា ឆ្នាំ២០២៥ នៅទីស្តីការក្រសួងមហាផ្ទៃ ឯកឧត្តម នាយឧត្តមសេនីយ៍ ស ថេត ក៏បានជំរុញឲ្យផ្ដោតការយកចិត្តទុកដាក់លើការងារផ្សព្វផ្សាយអប់រំអំពីផលប៉ះពាល់នៃគ្រឿងញៀនដល់ប្រជាពលរដ្ឋ ពិសេសអាណាព្យាបាលត្រូវបន្ដយកចិត្តទុកដាក់ចំពោះកូនចៅរបស់ខ្លួន ដើម្បីជៀសឲ្យឆ្ងាយពីគ្រឿងញៀន។

ដើម្បីឲ្យការងារបង្ការ ទប់ស្កាត់ និងបង្ក្រាបបទល្មើសគ្រឿងញៀនកាន់តែមានប្រសិទ្ធភាព ឯកឧត្តម នាយឧត្តមសេនីយ៍ ស ថេត បានណែនាំដល់មន្ទីរប្រឆាំងបទល្មើសគ្រឿងញៀន ត្រូវសហការជាមួយគ្រប់ស្ថាប័ន អង្គភាព និងសមត្ថកិច្ចពាក់ព័ន្ធឲ្យបានស្អិតរមួត និងចាត់ទុកការងារប្រយុទ្ធប្រឆាំងគ្រឿងញៀន គឺជាទិសដៅរួមគ្នា។

ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានសង្កត់ធ្ងន់ថា បញ្ហាគ្រឿងញៀននៅតែជាក្តីកង្វល់របស់សកលលោក ប្រទេសនៅក្នុងតំបន់ ក៏ដូចនៅក្នុងប្រទេសកម្ពុជា។ ឯកឧត្តម នាយឧត្តមសេនីយ៍ អះអាងថា គ្រឿងញៀន គឺបានបំផ្លាញអនាគតរបស់យុវវ័យ ដែលជាទំពាំងស្នងឬស្សី ដូច្នេះត្រូវតែរួមគ្នាបង្ការ ទប់ស្កាត់ និងបង្ក្រាបឲ្យមានប្រសិទ្ធភាព៕SRP

គ្រាន់តែខ្ចីម៉ារវេនមិនបាន កូនប្រុសលើកដៃកាន់កាំបិតកាប់ឪពុកបង្កើតបណ្តាលឱ្យស្លាប់នៅខ្ទមស្រែ

ខេត្តព្រះវិហារ៖ទីបំផុតកម្លាំងគរបាលខេត្តព្រះវិហារ សហការជាមួយនគរបាលឧត្តរមានជ័យ ធ្វើការបំបែកសំណុំរឿងឃាតកម្ម ដោយឃាត់ខ្លួនបានជនសង្ស័យ ធ្វើសកម្មភាពយកកាំបិតផ្គាក់កាប់ទៅលើឪពុកបង្កើតរបស់ខ្លួនបណ្តាលឱ្យដេកស្លាប់ក្នុងខ្ទមស្រែ នៅភូមិកោះកេរ ឃុំស្រយង់ ស្រុកគូលែន ខេត្តព្រះវិហារ។

ការឃាត់ខ្លួននេះធ្វើឡើងនៅភូមិអូរស្មាច់ សង្កាត់អូរស្មាច់ ក្រុងសំរោង ខេត្តឧត្តរមានជ័យ នាថ្ងៃទី០២ ខែមិថុនា ឆ្នាំ២០២៥។

លោកវរសេនីយ៍ឯក ឱ សេង អធិការនគរបាលស្រុកគូលែន ជនសង្ស័យឈ្មោះ ស្រី ស៊ីណា ហៅ ណាវ វាសនា ភេទប្រុស អាយុ៣៤ឆ្នាំ ជនជាតិខ្មែរ របរកសិករ ទីលំនៅបច្ចុប្បន្នភូមិពពេលលិច ឃុំពពេល ស្រុកសូទ្រនិគម ខេត្តសៀមរាប ត្រូវជាកូនបង្កើតរបស់សពជនរងគ្រោះឈ្មោះ ដួង ស្រី ភេទប្រុស អាយុ៦០ឆ្នាំ។

លោក ឱ សេង បានបន្ថែមថា កាលពីថ្ងៃទី៣១ ខែឧសភា ឆ្នាំ២០២៥ វេលាម៉ោង៨ និង៣៥នាទីព្រឹក ប៉ុស្តិ៍នគរបាលរដ្ឋបាលស្រយង់ បានទទួលព័ត៌មានពីឈ្មោះ ហេង ហឿន ភេទប្រុស ជាប្រជាការពារភូមិថា មានករណីឃាតកម្មកាប់បង្ករឱ្យស្លាប់ដល់ជនរងគ្រោះម្នាក់ នៅថ្ងៃទី៣០ ខែឧសភា ឆ្នាំ២០២៥ វេលាម៉ោងប្រហែល១៩.៣០នាទី នៅចំណុចខ្ទមស្រែត្រពាំងប៉ាលហាល ស្ថិតនៅភូមិកោះកេរ ឃុំស្រយង់ ស្រុកគូលែន ខេត្តព្រះវិហារ។

ក្រោយពីទទួលបានព័ត៌មាននេះភ្លាម កម្លាំងប៉ុស្តិ៍នគរបាលរដ្ឋបាលស្រយង់ សហការជាមួយកម្លាំងជំនាញអធិការដ្ឋាននគបាលស្រុកគូលែន និងអាជ្ញាធរ ភូមិ ឃុំ កម្លាំងអាជ្ញាធរជាតិប្រចាំប្រាសាទកោះកេរ និងគ្រួសារសព បានចុះទៅដល់កន្លែងកើតហេតុនៅក្រោមសំយ៉ាបខ្ទមស្រែ៖ឃើញថា សពមានកម្ពស់១៥៥ស.ម ស្លៀកខោជើងខ្លីពណ៌ខ្មៅ គ្មានអាវ ស្ថានភាពសាកសពដេកផ្ងារ បើកភ្នែក ក្បាលទៅទិសខាងជើង សណ្តូកជើងទៅទិសខាងត្បូង។

លោក ឱ សេង បន្ថែមទៀតថា បើតាមការបំភ្លឺរបស់ឈ្មោះ វេត វង់ ភេទប្រសអាយុ៥៣ឆ្នាំ ដែលមានខ្ទមស្រែនៅមិនឆ្ងាយពីខ្ទមស្រែជនរងគ្រោះ បាននិយាយប្រាប់សម្ថកិច្ចថា មុនពេលកើតហេតុកាលពីថ្ងៃទី៣០ ខែឧសភា ឆ្នាំ២០២៥ វេលាម៉ោងប្រហែល១១ថ្ងៃត្រង់ ជនសង្ស័យឈ្មោះ ណាវ វាសនា ហៅ ស៊ីណា បានដើរមកសុំខ្ចីម៉ារវេន ដើម្បីបញ្ឆេះម៉ាស៊ីនគោយន្តកន្ត្រៃពីគាត់ តែគាត់មិនឱ្យទេ ហើយម៉ារវេនរបស់ជនសង្ស័យ ត្រូវឪពុកជាជនរងគ្រោះបានយកលាក់ទុកមិនឱ្យប្រើ ទើបធ្វើឱ្យជនសង្ស័យ ជាកូនខឹងនិងឪពុក ណាមួយកូនប្រុសជាជនសង្ស័យរូបនេះតែងផឹកស្រាស្រវឹងជាប្រចាំ ទើបឈានដល់ការយកកាំបិតកាប់ឪពុករបស់ខ្លួនឯងបែបនេះតែម្តង៕SRP

សម្តេចតេជោ៖ «អ្នកដែលជេរខ្លាំង មិនប្រាកដថាប្រឆាំងពិតប្រាកដនោះទេ»

សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានសមាជរដ្ឋសភានិងព្រឹទ្ធសភា នៃព្រះរាជាណាចក្រកម្ពុជា បានគូសបញ្ជាក់ថា អ្នកដែលជេររាជរដ្ឋាភិបាល និងជេរគណបក្សប្រជាជនកម្ពុជាខ្លាំងបំផុត មិនប្រាកដថាបុគ្គលនោះ ជាអ្នកប្រឆាំងពិតប្រាកដនោះទេ ព្រោះថាជួនកាល បន្ទាប់ពីជេររួច គេនឹងចូលរួមជាមួយគណបក្សប្រជាជនកម្ពុជា ដែលនេះគឺជាអ្វីដែលសម្តេចហៅថា «យុទ្ធសាស្រ្តតេជោ»។

ក្នុងសមាជរដ្ឋសភា និងព្រឹទ្ធសភា លើកទី១ ដែលប្រារព្ធនៅវិមានរដ្ឋសភា នៅរសៀលថ្ងៃទី៣ ខែមិថុនា ឆ្នាំ២០២៥ សម្តេចតេជោ ហ៊ុន សែន បានថ្លែងថា សម្តេចបានប្រើយុទ្ធសាស្រ្តនយោបាយជាច្រើន រួមមានទាំងយុទ្ធសាស្រ្ត «រុញទូកបណ្តោយទឹក» ជាដើម តាមរយៈការបណ្តោយឱ្យសមាជិកទៅចូលរួមឈរឈ្មោះនៅក្នុងអតីតគណបក្សសង្រ្គោះជាតិ ដូចករណី ឯកឧត្តម ឡុង ប៊ុន្នី ជាដើម។ ដូចនេះ គេមិនអាចចោទថា ឯកឧត្តម ឡុង ប៊ុន្នី លក់ឧត្តមគតិបានទេ។

សម្តេចតេជោ ហ៊ុន សែន បានគូសបញ្ជាក់ថា សម្តេចបានដឹងថា ក្នុងបរិបទបច្ចុប្បន្ននេះ គណបក្សឆន្ទៈខ្មែរ និងគណបក្សកម្លាំងជាតិ ក៏កំពុងតែរៀបចំរចនាសម្ព័ន្ធផ្ទៃក្នុងរបស់ខ្លួនដើម្បីឈរឈ្មោះបោះឆ្នោត ហើយក៏កំពុងតែខ្វះមនុស្សផងដែរ ដូចនេះហើយ សម្តេចអាចនឹងប្រើប្រាស់យុទ្ធសាស្រ្តរុញទូកបណ្តោយទឹកបន្តទៀត៕SRP

បានចំណូលបានជាង $២៤លាន ពីការលក់សំបុត្រឱ្យភ្ញៀវទេសចរចូលទស្សនាអង្គរ

ខេត្តសៀមរាប៖គ្រឹះស្ថានអង្គរ បានលក់សំបុត្រឱ្យភ្ញៀវទេសចរអន្តរជាតិចូលទស្សនាអង្គរចំនួន ៥២ ៧៦៧នាក់ នៅក្នុងខែឧសភា ឆ្នាំ២០២៥ កើនឡើង ១១,៧១ ភាគរយ ធៀបនឹងឆ្នាំ២០២៤ នឹងរកចំណូល បានចំនួន ២៤ ៥៦៩ ០២៤  ដុល្លារអាមេរិក កើនឡើង ១០,៦៤ភាគរយ ធៀបនឹងរយៈពេលដូចគ្នា កាលពីឆ្នាំ២០២៤។

នេះបើយោងតាមសេចក្ដីប្រកាសព័ត៌មានរបស់គ្រឹះស្ថានអង្គរ ដែលចេញផ្សាយនៅថ្ងៃទី១ ខែមិថុនានេះ ក៏បានបង្ហាញថា សម្រាប់ក្នុងខែឧសភា ឆ្នាំ២០២៥ មានភ្ញៀវទេសចរអន្តរជាតិទិញបណ្ណចូលទស្សនាអង្គរ មានចំនួន ៥២ ៧៦៧នាក់ បើធៀបនឹងខែឧសភា ឆ្នាំ២០២៤ កើនឡើងជាង ៣ភាគរយ និងរកចំណូលបានចំនួន ២ ៣៦០ ២១៤ដុល្លារអាមេរិក កើនឡើងជាង ៣ភាគរយ បើធៀបក្នុងរយៈពេលដូចគ្នាកាលពីឆ្នាំ២០២៤។

របាយការណ៍ដដែល បានបញ្ជាក់ទៀតថា ក្នុងខែឧសភា ឆ្នាំ២០២៥នេះដែរ ភ្ញៀវទេសចរបរទេសដែលទិញសំបុត្រចូលទស្សនារមណីយដ្ឋានអង្គរ គឺភ្ញៀវទេសចរចិន ជាប់លំដាប់លេខ១, សហរដ្ឋអាមេរិកលេខ២, អង់គ្លេសលេខ៣, អូស្ត្រាលីលេខ៤, បារាំងលេខ៥ និងជប៉ុនលេខ៦។ ប៉ុន្តែរយៈពេល៥ខែ ពីខែមករាដល់ខែឧសភានេះ ភ្ញៀវទេសចរអន្តរជាតិដែលទិញសំបុត្រច្រើនជាងគេ គឺសហរដ្ឋអាមេរិកលេខ១, អង់គ្លេសលេខ២, ប្រទេសបារាំងលេខ៣, ចិនលេខ៤ និងលេខ៥ ប្រទេសកូរ៉េខាងត្បូង៕SRP

អត្ថបទ៖ លោក ឈិត សាវី
កែសម្រួល៖ លោក អ៊ុន ណារាជ្យ

លោកពុយ គា៖ ពេលប្រទេសមួយត្រូវបានឈ្លានពាន តើអ្នកព័ត៌មានធ្វើដូចម្តេច?

បើសិនជាប្រទេសមួយត្រូវបានប្រទេសជិតខាងរំលោភ ឬឈ្លានពាន អ្នកសារព័ត៌មានមានតួនាទីសំខាន់ណាស់ក្នុងការផ្តល់ព័ត៌មានដល់សាធារណជន ប៉ុន្តែត្រូវគោរពគោលការណ៍ដូចខាងក្រោម៖
១. ការពិត៖
• ផ្ទៀងផ្ទាត់អំពីការរំលោភ ឬឈ្លានពានទឹកដីជាមួយប្រភពដែលអាចជឿជាក់បាន (ឧ. សេចក្តីថ្លែងការណ៍ចេញពីក្រសួងការពារជាតិ ចេញពីរដ្ឋាភិបាលឬអ្នកនាំពាក្យ…)។
• ផ្តល់ទីតាំងកើតហេតុ ពេលវេលា ទំហំ (ឧ. ប៉ះទង្គិចតែចំណុចព្រំដែនមួយ ឬការរំលោភពេញលេញ) ការខូចខាត ស្លាប់ របួស ឬជនភៀសខ្លួន។
• ចៀសវាងចំណងជើងបង្កការភ័យខ្លាច (ឧ. “ការប៉ះទង្គិចត្រង់ព្រំដែនកើតឡើងកាន់តែធ្ងន់ធ្ងរ” មិនមែន “សង្គ្រាមផ្ទុះឡើងហើយ”)។

២. ការឆ្លើយតបរបស់រដ្ឋាភិបាល៖
• ផ្តល់ព័ត៌មានដល់សាធារណជនអំពីជំហរផ្លូវការដែលកំពុងអនុវត្ត៖ ការបង្រួបបង្រួមកងទ័ព ការតវ៉ាជាផ្លូវការទៅកាន់ប្រទេសដែលរំលោភឬឈ្លានពាន ទៅកាន់តុលាការអន្តរជាតិ ការអំពាវនាវឲ្យមានការចូលរួមជួយពីអន្តរជាតិ។

៣. ចៀសវាងព័ត៌មានមិនបានផ្ទៀងផ្ទាត់ ឬព័ត៌មានស៊ីអារម្មណ៍ ៖
• កុំផ្សាយព័ត៌មានចចាមអារ៉ាមចេញពីបណ្តាញសង្គម ឬប្រភពមិនផ្លូវការដែលមិនទាន់មានការផ្ទៀងផ្ទាត់។
• ចៀសវាងបង្ហោះរូបភាពសាហាវ ឬរាយការណ៍ពីចំនួនអ្នករងគ្រោះដែលមិនទាន់មានការបញ្ជាក់ត្រឹមត្រូវដែលអាចប៉ះពាល់ដល់អារម្មណ៍សាធារណជន។

៤. ប្រើភាសាដោយមានការទទួលខុសត្រូវ៖
• កុំប្រើពាក្យបញ្ឆេះកំហឹង និងបែបប្រកាន់ពូជសាសន៍ទៅកាន់ប្រជាជននៃប្រទេសជិតខាង ព្រោះប្រជាជនអាចមិនពាក់ព័ន្ធទេ។
• ប្រើភាសាអព្យាក្រិត៖ ប្រើ “កងកម្លាំងប្រទេសជាប់ព្រំដែន” ជំនួសឲ្យ “សត្រូវ ឬពួកឈ្លានពាន” លើកលែងតែរដ្ឋាភិបាលបានហៅនិងប្រើប្រាស់រួចហើយ។

៥. គាំទ្រឯកភាពជាតិ និងសុវត្ថិភាពសាធារណៈ៖
• ចែករំលែកសេចក្តីណែនាំសុវត្ថិភាពសាធារណៈ តំបន់សុវត្ថិភាព យុទ្ធសាស្ត្រជម្លៀស លេខទំនាក់ទំនងសម្រាប់ជួយបន្ទាន់។
• អំពាវនាវឲ្យប្រជាពលរដ្ឋរក្សាភាពស្ងប់ស្ងាត់ តាមដានការណែនាំផ្លូវការ។

៦. កិច្ចខិតខំផ្នែកការទូត ៖
• ផ្តល់ព័ត៌មានពីកិច្ចខិតខំរបស់រដ្ឋាភិបាល អង្គការអន្តរជាតិ (ឧ. អាស៊ាន អង្គការសហប្រជាជាតិ) ដើម្បីដោះស្រាយវិបត្តិតាមផ្លូវការទូត។

៧. កុំបង្ហាញព័ត៌មានដែលអាចប៉ះពាល់ដល់ប្រតិបត្តិការយោធា៖
• កុំបង្ហាញអំពីចលនាកងទ័ព ទីតាំងយុទ្ធសាស្ត្រ ឬប្រតិបត្តិការណាមួយដែលកំពុងអនុវត្តនៅតាមទីកន្លែងក្បែរព្រំដែន ឬក្បែរតំបន់ប៉ះទង្គិចគ្នា។
• សហការជាមួយអាជ្ញាធរ ឬយោធាដើម្បីធានាថាការផ្សាយព័ត៌មានមិនជួយទៅដល់ភាគីអ្នករំលោភ/ឈ្លានពាន ឬប៉ះពាល់ដល់ការពារជាតិ។

៨. ផ្សាយពីប្រវត្តិទីតាំង៖
• បញ្ហាព្រំដែនក្នុងបរិបទប្រវត្តិសាស្ត្រ ព្រឹត្តិការណ៍កើតឡើងកន្លងមក យោងតាមកិច្ចព្រមព្រៀង ឬច្បាប់អន្តរជាតិ។
• ចងក្រងព្រឹត្តិការណ៍តាមលំដាប់លំដោយពេលវេលា និងពន្យល់អំពីផលប៉ះពាល់ជាលក្ខណៈភូមិសាស្ត្រ។
• សម្ភាសអ្នកជំនាញ (អ្នកវិភាគយោធា អ្នកច្បាប់អន្តរជាតិ មន្ត្រីការទូត ជំនួសឲ្យអត្ថបទដែលបញ្ចេញមតិបែបផ្ទាល់ខ្លួន។

ដោយ៖ ពុយ គា (ថ្ងៃទី២ ខែមិថុនា ឆ្នាំ២០២៥)

សម្ដេចតេជោ៖ ថវិកាសន្សំរបស់ជាតិបច្ចុប្បន្ន គឺមានចំនួនច្រើនជាងពេលដែលសម្ដេច ចាកចេញពីតំណែងជានាយករដ្ឋមន្ត្រីទៅទៀត

សម្ដេចអគ្គមហាសេនាបតីតេជោ ហ៊ុន សែន ប្រធានសមាជរដ្ឋសភា និងព្រឹទ្ធសភាលើកទី១ បានមានប្រសាសន៍ថា នៅមុនការផ្ទុះនៃជំងឺកូវីដ១៩ សម្ដេចបានឱ្យពង្រឹងបន្ថែមលើការសន្សំថវិកាជាតិ ដែលការសន្សំនៅពេលនោះបានកើនដល់ជាង២១% នៃផលិតផលក្នុងស្រុកសរុប (GDP) ដោយមានថវិកាជាតិនៅសល់រហូតដល់ជិតបួនពាន់លានដុល្លារ។

សម្ដេចតេជោបន្ថែមថា តាមការគ្រោងទុកពេលថវិកាសន្សំរបស់ជាតិកើនជិត៥ពាន់លានដុល្លារ រាជរដ្ឋាភិបាលនឹងដាក់ឱ្យដំណើរការការកសាងប្រព័ន្ធហេដ្ឋារចនាសម្ពន្ធផ្លូវ ស្ពាន ឱ្យបានច្រើននៅគ្រប់ទីកន្លែងដោយមិនចាំបាច់ពឹងលើថវិកាបរទេសនោះឡើយ។ ប៉ុន្តែជាអកុសលវិបត្តិកូវីដក៏ផ្ទុះឡើង ដែលបណ្ដាលឱ្យថវិកាសន្សំរបស់ជាតិបានថយចុះមួយកម្រិត។

សម្ដេចតេជោក៏បានកោតសរសើរចំពោះការដឹកនាំរបស់រាជរដ្ឋាភិបាលបច្ចុប្បន្ន ដែលបានធ្វើឱ្យចំនួនថវិកាជាតិដែលបានសន្សំទុកមានការកើនឡើងច្រើនគួរឱ្យកត់សម្គាល់ ទោះបីមានការដំឡើងប្រាក់ខែមន្ត្រីរាជការ និងកងកម្លាំងប្រដាប់អាវុធគ្រប់ប្រភេទក៏ដោយ។ សម្ដេចតេជោបញ្ជាក់បន្ថែមទៀតថាថវិកាសន្សំរបស់ជាតិបច្ចុប្បន្ន គឺមានចំនួនច្រើនជាងពេលដែលសម្ដេច ចាកចេញពីតំណែងជានាយករដ្ឋមន្ត្រីទៅទៀត៕SRP

ឯកឧត្តម ហ៊ុន ម៉ានី៖ «យុវជនជាក្តីសង្ឃឹមដ៏រឹងមាំរបស់ប្រទេសជាតិ យុវជនជាខែល នៃខឿនការពារជាតិផង និងជាកម្លាំងថាមពលក្នុងការជំរុញភាពរីកចម្រើនរបស់ប្រទេសជាតិផង»

ស.ស.យ.ក. តែងតែចូលរួមចំណែកយ៉ាងសំខាន់ជាមួយ រាជរដ្ឋាភិបាលកម្ពុជា លើការងារសេដ្ឋកិច្ច សង្គមតាមរយៈការរៀបចំយុទ្ធនាការ និងកម្មវិធីផ្សេងៗ រួមមាន ការអប់រំសិក្សាធិការ កីឡា សាសនា វប្បធម៌ មនុស្សធម៌ និងផ្សេងៗ ដើម្បីនាំមកនូវការជួបជុំ ពង្រឹងមិត្តភាព បង្កើនសាមគ្គីភាព ភាតរភាព ស្នាមញញឹម និងបំផុសមោទនភាពក្នុងនាមជាខ្មែរ ក្រោមម្លប់នៃសន្តិភាព ស្ថិរភាព និងពោរពេញដោយឱកាស។

ដោយឡែក ក្រុមគ្រួសារស.ស.យ.ក.  ក៏បានចូលរួមចំណែក ក្នុងពេលដែលសង្គមកម្ពុជាឆ្លងកាត់នូវវិបត្តិនានា ដោយចូលរួមជាមួយរាជរដ្ឋាភិបាលតាមលទ្ធភាពដែលក្រុមគ្រួសារ សមាជិក សមាជិកា ស.ស.យ.ក.  អាចធ្វើបាន។
ជាកត្តាប្រវត្តិសាស្ត្រ ការចូលរួមរបស់ សសយក គឺស្ថិតក្នុង DNA របស់ស.ស.យ.ក. ផ្ទាល់។ នៅពេលកកើត   ស.ស.យ.ក. ជាផ្នែកមួយនៃរណសិរ្សសាមគ្គីសង្គ្រោះជាតិកម្ពុជា ដែលមានបេសកកម្មតែមួយគត់ គឺដាក់ជីវិតជាដើមទុនក្នុងការរំដោះ និងផ្តួលរំលំរបបកម្ពុជាប្រជាធិបតេយ្យខ្មែរក្រហម ដែលយើងហៅថា របប ៣ឆ្នាំ ៨ខែ ២០ថ្ងៃ ដែលបានកាប់សម្លាប់ប្រជាជនខ្មែរស្លូតត្រង់ជាង ៣លាននាក់ នាំឱ្យ ស្ទើរគ្រប់គ្រួសារខ្មែរ បាត់បង់សមាជិក និងបែកបាក់គ្នា ជាមួយសោកនាដកម្ម ដែលសង្គមយើងនៅតែទទួលរងផលប៉ះពាល់មកដល់ថ្ងៃនេះ ហើយក៏ជាសោកនាដកម្មដែលយើងគួរផ្សារភ្ជាប់ទៅនឹង ពាក្យថា “បំភ្លេចម្តេចបាន”។

ស.ស.យ.ក. ក៏ចូលរួមជាបន្តបន្ទាប់ ក្នុងស្ថានភាពវិបត្តិ ដូចជាការប្រឆាំងការរីករាលដាល នៃជំងឺ CoVID19 និងគ្រោះមហន្តរាយធម្មជាតិផ្សេងៗ។ ក្នុងពេលដែលសង្គមកម្ពុជាបានជួបប្រទះ បញ្ហាប្រឈមពាក់ព័ន្ធទៅនឹងប្រធានបទ សន្តិសុខ និងអធិបតេយ្យភាពរបស់កម្ពុជា ដូចជា ករណី ប្រាសាទព្រះវិហារនៅឆ្នាំ ២០០៨-២០១១ ករណី CLV ជាដើម ដែលសុទ្ធសឹងតែជាប្រធានបទរសើប និងសំខាន់ ដែលទាមទារអោយយើងត្រូវផ្តល់នូវការជឿជាក់ ត្រៀមស្មារតី និងការចូលរួមក្រោមការដឹកនាំរបស់រាជរដ្ឋាភិបាល ជាពិសេស ការផ្តល់ជាកម្លាំង ក្នុងក្របខណ្ឌជាផ្នែកមួយនៃខឿនការពារជាតិប្រជាជន ក្នុងគោលដៅបង្ហាញនូវភាពសុចរិត ការដោះស្រាយបញ្ហាជាមួយប្រទេសជិតខាងដោយសន្តិវិធី ដើម្បីប្រែក្លាយបន្ទាត់ព្រំដែនអោយទៅជាបន្ទាត់ព្រំដែន ដែលមានចំណងមិត្តភាព សហប្រតិបត្តិការដើម្បីការអភិវឌ្ឍ។

និយាយជារួម ស.ស.យ.ក. ត្រៀមខ្លួនរួចជាស្រេចដើម្បី ចូលរួមក្រោមការដឹកនាំរបស់រាជរដ្ឋាភិបាល មិនថាក្នុងស្ថានភាពដែលសង្គមជាតិមានភាពសម្បូរសប្បាយ ឬពេលសង្គមកម្ពុជាឆ្លងកាត់វិបត្តិនោះទេ ក្រុមគ្រួសារសសយក នឹងត្រៀមខ្លួនចូលរួមក្រោមការដឹកនាំរបស់រាជរដ្ឋាភិបាលដើម្បីជាប្រយោជន៍ ដើម្បីស្នាមញញឹម ភាពសម្បូរសប្បាយ និងភាពរីកចម្រើនសម្រាប់សង្គមកម្ពុជា។

ខ្ញុំសូមអំពាវនាវដល់សមាជិក សមាជិកា ស.ស.យ.ក. ក៏ដូចជាយុវជនខ្មែរ ដែលជា ទំពាំងស្នងឬស្សី ជាអ្នកបន្តវេនដែលពោរពេញដោយសក្តានុពល ឧត្តមគតិស្នេហាជាតិ សូមចូលរួមជាមួយរាជរដ្ឋាភិបាលកម្ពុជា ដើម្បីជាផ្នែកមួយខ្វះមិនបាន និងជាថាមពលបន្ថែម ក្នុងការធ្វើជា ខែលនៃខឿនការពារជាតិ (shield of national defense) និងជាកម្លាំងក្នុងការជំរុញដើម្បីភាពរីកចម្រើនរបស់កម្ពុជាថ្ងៃនេះ និងទៅអនាគត។

យុវជនជាក្តីសង្ឃឹមដ៏រឹងមាំរបស់កម្ពុជា

យុវជនអាចចូលរួមទាំងអស់គ្នាបានតាមរយៈការខំប្រឹងប្រែងរៀនសូត្រ ខំប្រឹងប្រែងធ្វើការ ខំប្រឹងប្រែងសម្រេចក្តីស្រមៃរៀងៗខ្លួន ដើម្បីខ្លួនឯង ដើម្បីគ្រួសាររបស់ខ្លួន ព្រោះភាពជោគជ័យរបស់ប្អូនៗម្នាក់ៗ គឺជាភាពជោគជ័យរបស់ប្រជាជាតិទាំងមូល។ លើសពីនេះ  សូមចូលរួមដោយ បន្ទរឲ្យឮខ្លាំងឡើង នៃភាពជឿជាក់ទៅលើការដឹកនាំរបស់រាជរដ្ឋាភិបាល និងការត្រៀមខ្លួនក្នុងគ្រប់ស្ថានភាព ដែលប្រជាជាតិយើងត្រូវការយើង ទោះក្នុងកាលៈទេសៈណាក៏ដោយ៕SRP

ឯកឧត្តមសេង ទៀង នាំយកថវិកាជាង២០លានរៀល របស់សម្តេចហ៊ុន ម៉ាណែត ចូលបុណ្យសពស្រ្តីមានផ្ទៃពោះ៧ខែម្នាក់ ដែលមានស្វាមីជាយោធាប្រចាំការនៅតំបន់មុំបី ខេត្តព្រះវិហារ

ឯកឧត្តមសេង ទៀង រដ្ឋលេខាធិការទីស្ដីការគណៈរដ្ឋមន្ដ្រី និងជានាយករងខុទ្ទកាល័យសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅថ្ងៃទី១ ខែមិថុនា ឆ្នាំ២០២៥នេះ បាននាំយកថវិកា២០លានរៀល ដែលជាអំណោយរបស់សម្តេចបវរធិបតី ហ៊ុន ម៉ាណែតចូលរួមបុណ្យសព លោកស្រី អាំ រត្តនាង អាយុ ៣៧ឆ្នាំ ដែលបានទទួលមរណភាពទាំងមានផ្ទៃពោះ ៧ខែ នៅភូមិកន្សោមអក ឃុំកន្សោមអក ស្រុកកំពង់ត្របែក ខេត្តព្រៃវែង ខណៈដែលប្តីកំពុងប្រចាំការនៅតំបន់មុំបី ខេត្តព្រះវិហារ។

លោកស្រី អាំ រត្តនាង គឺជាភរិយារបស់អនុសេនីយ៍ត្រី គឹម សារិ អាយុ៤២ឆ្នាំ ជាមន្ត្រីយោធាប្រចាំការនៅតំបន់មុំបី។ បច្ចុប្បន្ននេះ មានកូនចំនួន៣នាក់ ក្នុងនោះប្រុស២នាក់គឺ អាយុ១៥ឆ្នាំ, ១១ឆ្នាំ និងកូនស្រីអាយុ៤ឆ្នាំ។

ក្នុងឱកាសនោះដែរ ឯកឧត្តមសេង ទៀង ថែមទាំងបាននាំយកនូវការផ្តាំផ្ញើ និងចូលរួមរំលែកទុក្ខយ៉ាងក្រៀមក្រំដល់គ្រួសារសព ពីសំណាក់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ច័ន្ទមុនី ហ៊ុន ម៉ាណែត ផងដែរ និងសូមឱ្យវិញ្ញាណក្ខន្ធរបស់លោកស្រី អាំ រត្តនាង ទៅកាន់សុខគតិភពកុំបីឃ្លៀងឃ្លៀតឡើយ។

ស្របដែលប្រពន្ធទទួលមរណភាព នៅថ្ងៃ១ ខែមិថុនា ប្តីរបស់សពទើបតែមកដល់ជួបមុខប្រពន្ធជាលើកចុងក្រោយ៕SRP

ខេត្តសៀមរាប៖សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) នៅព្រឹកថ្ងៃទី៣១ ខែ ឧសភា ឆ្នាំ ២០២៥ ចុះពិនិត្យ និងព្យាបាលជំងឺ ទូទៅ និងសុខភាពមាត់ធ្មេញ ជូនសិស្សានុសិស្សជិត២០០០នាក់ មកពីសាលាបឋមសិក្សាចំនួន៣ នៃស្រុកបន្ទាយស្រី មានសាលាបឋមសិក្សាព្រះដាក់ សាលាបឋមសិក្សា ស្រះស្រង់ និងសាលាបឋមសិក្សាតាប៉ាង ដែលពិធីនេះធ្វើឡើងនៅបរិវេណសាលាបឋមសិក្សាព្រះដាក់ ភូមិព្រះដាក់ ឃុំព្រដាក់ ស្រុកបន្ទាយស្រី ខេត្តសៀមរាប ក្រោមអធិបតីភាព ឯកឧត្តមបណ្ឌិត ពេជ សោភ័ន ទេសរដ្ឋមន្ត្រីទទួលបន្ទុក បេសកកម្មពិសេស និងជាប្រធានលេខាធិការដ្ឋាន គណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំ «គ វ អ» តំណាងដ៏ខ្ពង់ខ្ពស់លោកជំទាវបណ្ឌិត ពេជ ចន្ទមុន្នី ហ៊ុនម៉ាត។

លោក ស៊ឹម ស៊ូយេង អនុប្រធានប្រតិបត្តិសមាគមគ្រូពេទ្យស្ម័គ្រចិត្តយុវជន សម្តេចតេជោ បានផ្តាំផ្ញើការសួរសុខទុក្ខ ពីសំណាក់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ចំពោះ លោកគ្រូ អ្នកគ្រូ ក្មួយៗដែលមកទទួលសេវានាឱកាសនេះទាំងអស់។

លោក ស៊ូយេង បានអោយដឹងទៀតថា ក្រុមគ្រូពេទ្យ TYDA ដឹកនាំដោយលោកបណ្ឌិត ពេជ ចន្ទមុន្នី ហ៊ុនម៉ាណែត ជាង១០ឆ្នាំមកហើយ ប្រកបដោយក្តីស្រឡាញ់យកចិត្តទុកដាក់ដ៏ជ្រាលជ្រៅចំពោះការព្យាបាលដល់ប្រជាពលរដ្ឋទូទៅនៅទូទាំងប្រទេស ជាក់ស្តែងថ្ងៃនេះ ក្រោមការចង្អុលបង្ហាញរបស់លោកជំទាវបណ្ឌិត លោកបានដឹកនាំគ្រូពេទ្យជាង៣០០នាក់ ចុះមកព្យាបាលជំងឺទូទៅ ជាពិសេសសុខភាពមាត់ធ្មេញ ជូនលោក អ្នកគ្រូនិងសិស្សានុសិស្សនៅទីនេះ ដោយមិនមានការគិតថ្លៃអ្វីទាំងអស់ ប្រកបដោយក្តីស្រឡាញ់ និងស្នាមញញឹម ក្នុងន័យជម្រុញលើកកម្ពស់សុខភាពសហគមអោយកាន់តែប្រសើរ។

ឯកឧត្តមបណ្ឌិត ពេជ សោភ័ន ទេសរដ្ឋមន្ត្រីទទួលបន្ទុក បេសកកម្មពិសេស និងជាប្រធានលេខាធិការដ្ឋាន គណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំ «គ វ អ» សូមកោតសសើរចំពោះក្រុមគ្រូពេទ្យ TYDA ទាំងអស់ ដែលបានលះបង់កម្លាំងចិត្តខិតខំចុះព្យាបាលជំងឺជូនប្រជាពលរដ្ឋអស់រយះពេលជាងច្រើនឆ្នាំកន្លងមកនេះ ក្រោមការដឹកនាំរបស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត មិនថាព្យុះភ្លៀង រងាក្តៅណាទេ គឺដើម្បីសុខមាលភាពប្រជាពលរដ្ឋ។

ទន្ទឹមនឹងនេះដែរឯកឧត្តម បានលើកឡើងថា រាជរដ្ឋាភិបាលកម្ពុជា នីតិកាលទី៧ នៃរដ្ឋសភា បានបង្កើតគណៈកម្មាធិការជាតិ ដើម្បីជម្រុញការអនុវត្តវិធានការគន្លឹះក្នុងវិស័យអប់រំ (គ.វ.អ.) ហើយគណៈកម្មាធិការជាតិនេះ មានសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជាប្រធាន។

ឯកឧត្តមបណ្ឌិតទេសរដ្ឋមន្ត្រី បានបញ្ជាក់ផងដែរថា នៅក្នុង ការអនុវត្តការងារ លេខាធិការដ្ឋាននេះ ដើរតួនាទីជាសេនាធិការ របស់ គ.វ.អ ក្នុងគោលបំណងជួយគាំទ្រដល់ការ លើកកម្ពស់ ការអប់រំតាមរយៈ ការពង្រឹងអភិបាលកិច្ចសាលារៀន, ការពិនិ ត្យកែលម្អកម្មវិធីសិក្សា និងរៀបចំកម្មវិធីសិក្សា និងសកម្មភាព ក្រៅម៉ោងសិក្សាឲ្យស្របតាមតម្រូវការក្នុងពង្រឹងចំណេះដឹង វិន័យ សីលធម៍ និងឥរិយាបថសិស្ស, ការយកចិត្តទុកដាក់ លើសុខភាពសិស្សតាមរយៈកម្មវិធីអាហារូបត្ថម្ភ ដល់កុមារ និង ការត្រួតពិនិត្យគុណភាពចំណីអាហារនៅតាមសាលារៀន និង ការជំរុញនិងលើកទឹកចិត្ត ការចូលរួមរបស់មាតាបិតា អា ណាព្យាបាល និងសហគមន៍ក្នុងការអប់រំ ។ រចនាសម្ព័ន្ឋលេខា ធិការដ្ឋាន គ.វ.អ រួមមានផ្នែកចំណុះចំនួន ០៤ ៖ ផ្នែកគោល នយោបាយ, ផ្នែកគាំទ្រសាលារៀន, ផ្នែកតាមដាន ត្រួតពិនិត្យ និង វាយតម្លៃ, និង ផ្នែករដ្ឋបាល ហិរញ្ញវត្ថុ និងទំនាក់ទំនង សាធារណៈ។

លោកគ្រូអ្នកគ្រូដែលជាគណៈគ្រប់គ្រងសាលារៀនទាំងបីខាងលើសូមគោរពថ្លែងអំណរគុណដល់ក្រុមគ្រូពេទ្យ TYDA ដែលមានលោកជំទាវបណ្ឌិត ពេជ ចន្នមុន្នី ជាប្រធាន បានចាត់អោយក្រុមគ្រូពេទ្យជំនាញ ចុះមកព្យាបាលជំងឺជូនសិស្សានុសិស្សរបស់ពួកគាត់ ដល់សាលារៀន ក្នុងការរួមចំណែកលើកកម្ពស់សុខភាពសហគមជាពិសេសកុមា ដែលជាទំពាំងស្នងឫស្សី នេះជាការលើកឡើងរបស់ពួកគាត់។

សូមជម្រាបថាសកម្មភាពពិនិត្យ និងព្យាបាលជំងឺទូទៅ និងសុខភាពមាត់ធ្មេញជូន លោកគ្រូ អ្នកគ្រូ និងសិស្សានុសិស្សនៅសាលាទាំង៣ខាងលើនេះ សរុបចំនួន ១៧៤៩នាក់ ស្មើរនឹង ៣២៨៤ករណី និងបញ្ជូលទៅព្យាបាលបន្តនៅភ្នំពេញមានចំនួន១៣ករណី ក្រោមជំនួយឧបត្ថមទាំងស្រុងពីសម្តេចធិបតី ហ៊ុន ណែត និងលោកជំទាវបណ្ឌិតផ្ទាល់៕SRP

នាយករដ្ឋមន្ត្រី៖ ហេតុអ្វីបានជាយើងត្រូវចរចាបញ្ហាព្រំដែនដោយសន្តិវិធី?

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងថា កម្ពុជាចង់ដោះស្រាយបញ្ហាព្រំដែនដោយសន្តិភាព ដោយសន្តិវិធី និងសហប្រតិបត្តិការល្អជាមួយប្រទេសជិតខាងទាំងអស់ តែកម្ពុជារក្សាសិទ្ធិនៅក្នុងការការពារបូរណភាពទឹកដីរបស់ខ្លួនមិនឱ្យបាត់បង់ក្នុងករណីមានការរំលោភបំពានណាមួយ។

ក្នុងពិធីជួបសំណេះសំណាលជាមួយសហគមន៍ខ្មែរ ប្រមាណ១៦០០នាក់ នៅទីក្រុងតូក្យូ ប្រទេសជប៉ុន នៅព្រឹកថ្ងៃសៅរ៍ទី៣១ ខែឧសភា ឆ្នាំ២០២៥ សម្តេចធិបតី ហ៊ុន ម៉ាណែត បានថ្លែងបន្តថា ប្រទេសកម្ពុជាយើងមិនមែនរស់នៅតែម្នាក់ឯងនោះទេ គឺយើងមានប្រទេសជាមិត្តជុំវិញខ្លួនដូចជា ថៃ វៀតណាម ឡាវ ដែលសុទ្ធតែធ្លាប់ឆ្លងកាត់ប្រវត្តិជូរចត់ជាមួយគ្នា ប៉ុន្តែយើងមិនអាចជ្រើសរើស យកការស្អប់គ្នានោះទេ ផ្ទុយទៅវិញគឺត្រូវបង្កើនកិច្ចសហប្រតិបត្តិការគ្នាដើម្បីអភិវឌ្ឍន៍ប្រទេសជាតិរបស់យើង។

ឆ្លៀតក្នុងឱកាសនោះដែរ សម្តេចធិបតី ហ៊ុន ម៉ាណែត ក៏បានគូសបញ្ជាក់ថា រាជរដ្ឋាភិបាលបានគិតគូរចំពោះសុខទុក្ខកងទ័ពជួរមុខដែលឈរជើងការពារទឹកដីនៅតាមព្រំដែនតាំងពីដើមតរៀងមករហូតដល់បច្ចុប្បន្ន ខណៈបក្សប្រឆាំងមិនដែលបានចូលរួមជួយដល់កងទ័ពនៅសមរភូមិបានមួយរៀលនោះទេទាំងដែលអួតក្តែងៗថា ស្រលាញ់ជាតិស្រលាញ់ទឹកដី។

សម្តេចធិបតី ហ៊ុន ម៉ាណែត ក៏បានអំពាវនាវដល់ប្រជាពលរដ្ឋឱ្យរួមគ្នាលើកទឹកចិត្តដល់កងទ័ពដោយមិនត្រូវបំបែកបំបាក់ការសាមគ្គីទឹកចិត្តរវាងកងទ័ពនឹងជួយលើកទឹកចិត្តស្នេហាជាតិរបស់កងទ័ពយើង។ សូមអ្នកនយោបាយ បើស្រឡាញ់ជាតិត្រូវរួមគ្នាការពារទឹកដី និងរួមគ្នាលើកទឹកចិត្តកងទ័ព នេះជាម៉ោងនាំគ្នាមូលចិត្តមូលគំនិតដើម្បីការពារបូរណភាពទឹកដីទាំងអស់គ្នា៕SRP

សម្ដេចតេជោហ៊ុន សែន ប្រធានព្រឹទ្ធសភាជាតិនៃកម្ពុជា បានបង្ហោះសារសរសេរក្នុងន័យថា៖ នៅក្នុង Facebook របស់ខ្ញុំ ត្រូវបានពួកជ្រុលនិយមថៃចូលមកជេរប្រមាថ ដែលជាចេតនាចង់បំផ្លាញទំទាក់ទំនងល្អរវាងរដ្ឋាភិបាល និងប្រជាជននៃប្រទេសទាំងពីរ កម្ពុជា-ថៃ និងចង់ដុតកំដៅឲ្យមានការប្រយុទ្ធគ្នារវាងកងទ័ពប្រទេសទាំងពីរ។ ក៏មានជនជាតិថៃមួយចំនួន ចង់ឲ្យកម្ពុជាដកកងទ័ពចេញពីតំបន់ដែលកងទ័ពកម្ពុជាកំពុងឈរជើង។

ដើម្បី​ជៀសវាងការវង្វេងប្រវត្តិសាស្ត្រ ខ្ញុំសូមបញ្ជាក់លើ៣ចំណុចដូចខាងក្រោម៖

១. តំបន់មុំបីនេះ ជាទឹកដីកម្ពុជា និងត្រូវបានកងទ័ពកម្ពុជាឈរជើងតាំងពីមុនកិច្ចព្រមព្រៀងប៉ារីសទៅទៀត មានន័យថាមុន MoUឆ្នាំ២០០០ ប្រហែល ១៣ឬ១៤ឆ្នាំ។ អ៊ុនតាក់ប្រហែលជាអាចធ្វើសាក្សីបាន ហើយបើមិនច្បាស់ កម្ពុជា និងថៃ អាចព្រមព្រៀងគ្នាយកបញ្ហានេះ អមដោយផែនទីផ្លូវការដែលអន្តរជាតិទទួលស្គាល់ (មិនមែនជាផែនទីចោរដែលគូសខ្លួនឯងដើម្បីលួចដី) ទៅកាន់តុលាការយុត្តិធម៌អន្តរជាតិឡាអេ ដើម្បីបញ្ចប់សេចក្តីក្រោមយុទ្ធសាស្ត្រពន្លត់ភ្លើង ជាជាងអង្គុយបក់ផ្សែង និងដើម្បីសេចក្តីសុខ និងសាមគ្គីភាពនៃអ្នកជំនាន់ក្រោយកុំឲ្យមានរឿងច្រំដែលកើតឡើងបន្តទៀត។

២. រូបថតប៉ុន្មានសន្លឹកដែលខ្ញុំនិងភរិយាព្រមទាំងសហការីបានទៅកាន់តំបន់នោះ កាលពីជាង១៥ឆ្នាំមុន គឺជាភស្តុតាងកាន់តែច្បាស់បញ្ជាក់ថាជាទឹកកម្ពុជា។ ខ្ញុំមិនអាចស្លៀកពាក់យោធាទៅថតក្នុងទឹកដីថៃ ឬទឹកដីឡាវនៅតំបន់នោះបានទេ ពិតមែនតែពេលនោះ ខ្ញុំទទួលកងទ័ពឡាវនៅក្នុងរោងបុណ្យនេះ (រោងនេះត្រូវបានភ្លើងឆេះកាលពីប៉ុន្មានឆ្នាំមុន)។

៣. កម្ពុជាមិនអាចដកកងទ័ពចេញពីទឹកដីរបស់ខ្លួនតាមការទាមទាររបស់ភាគីថៃបានឡើយ។ ក្បួនបែបនេះ គឺជាក្បួនដែលអតីតនាយករដ្ឋមន្ត្រីថៃ អាភិសិដ្ឋ វេចាជីវ៉ា និយាយមកកាន់ខ្ញុំ ចំពោះមុខប្រធានាធិបតីឥណ្ឌូណេសុី កាលពីខ្ញុំពី២០១១ ថា សូមភាគី២ដកកងទ័ពចេញពីតំបន់ប្រាសាទព្រះវិហារទាំងអស់គ្នា។ ខ្ញុំនិយាយទៅកាន់ អាភិសិដ្ឋ វិញថា ខ្ញុំមិនអាចដកកងទ័ពចេញទឹកដី​ខ្លួនឯងបានទេផ្ទុយទៅវិញឯកឧត្តមត្រូវដកកងទ័ពឈ្លានពានរបស់ឯកឧត្តមចេញដោយគ្មានលក្ខខណ្ឌ។

ការកើតឡើងនៅមុំបីចំនួន៣ថ្ងៃមកនេះ គឺរឿងច្រំដែលនៃល្បិចកលដែលចង់យកដីពីកម្ពុជា ដោយមេបញ្ជាការថ្នាក់ក្រោម ដោយមានការគាំទ្រពីក្រុមនិយមជ្រុលរបស់ថៃផងដែរ៕SRP

សម្តេចតេជោ ហ៊ុន សែន ស្នើឱ្យជនរួមជាតិស្ងប់ចិត្ត ហើយជឿជាក់លើការដឹកនាំរបស់រាជរដ្ឋាភិបាល

សម្ដេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា នៅព្រឹកថ្ងៃព្រហស្បតិ៍ ទី២៩ ខែឧសភា ឆ្នាំ២០២៥ អញ្ជើញថ្លែងសារពិសេសក្នុងសម័យប្រជុំលើកទី៣ ព្រឹទ្ធសភា នីតិកាលទី៥។

ខាងក្រោមនេះគឺជាប្រសាសន៍សំខាន់ៗរបស់សម្ដេចតេជោ ហ៊ុន សែន ក្នុងឱកាសថ្លែងសារពិសេស ពាក់ព័ន្ធការប៉ះទង្គិចដោយប្រដាប់អាវុធរវាងកងទ័ពកម្ពុជា និងថៃ នៅព្រំដែន តំបន់មុំបី ខេត្តព្រះវិហារ៖

សម្តេចតេជោ ហ៊ុន សែន ស្នើឱ្យជនរួមជាតិស្ងប់ចិត្ត ហើយជឿជាក់លើការដឹកនាំរបស់រាជរដ្ឋាភិបាល និងកងកម្លាំងប្រដាប់អាវុធកម្ពុជា ក្នុងការដោះស្រាយតាមរយៈការចរចា ជាងការដោះស្រាយដោយកម្លាំងប្រដាប់អាវុធ។

សម្តេចបានអំពាវនាវដល់ប្រជាពលរដ្ឋស្ងប់ចិត្តលើបញ្ហាព្រំដែនរវាងកម្ពុជា និងថៃ ហើយជឿជាក់លើការដោះស្រាយរវាងរាជរដ្ឋាភិបាលទាំងពីរ។ ត្រូវប្រុងប្រយ័ត្នចំពោះព័ត៌មានក្លែងក្លាយ ដែលរុញឱ្យផ្ទុះសង្គ្រាមរវាងប្រទេសទាំងពីរ។

សម្តេចតេជោ ហ៊ុន សែន បានមានប្រសាសន៍បន្តទៀតថា សព្វាវុធ និងកងទ័ព ដែលបានបញ្ជូនទៅកាន់ព្រំដែន មិនមែនដើម្បីវាយថៃ ឬធ្វើសង្គ្រាមនោះទេ តែជាការត្រៀមបម្រុងចំពោះយថាហេតុអាក្រក់ណាមួយកើតឡើង។
ហេតុការណ៍ផ្ទុះអាវុធនៅព្រំដែនកម្ពុជា-ថៃ មិនមែនជាបន្ទាត់នយោបាយរបស់រាជរដ្ឋាភិបាល និងក្រសួងការពារជាតិរបស់ថៃនោះឡើយ។ សម្តេចតេជោ សន្និដ្ឋានថា ហេតុការណ៍នេះ អាចបង្កឡើងដោយបុគ្គល ឬអង្គភាព។ ហេតុការណ៍នៅព្រំដែនកម្ពុជា-ថៃ កាលពីម្សិលមិញ គឺខុសគ្នានឹងព្រឹត្តិការណ៍ឈ្លានពានវត្តកែវគិរីស្វារៈកាលពីឆ្នាំ២០០៨។

សម្តេចតេជោ ហ៊ុន សែន បានរំលឹកថា ក្នុងសង្គ្រាមនៅព្រះវិហារ និងប្រាសាទតាមាន់ធំ និងតាក្របីពីឆ្នាំ២០០៨ ដល់ឆ្នាំ២០១១ គឺកម្ពុជាប្រើប្រាស់ភាពអត់ធ្មត់ខ្ពស់បំផុតរហូតដល់កងទ័ពងឿងឆ្ងល់។ ក្នុងសង្គ្រាមនោះទីបញ្ជាការដ្ឋានគឺចេញពីផ្ទះរបស់សម្តេចតែម្តង ហើយបញ្ជាតាមប្រព័ន្ធវីដេអូ។ សម្តេចបានរំលឹកថា កាលពីពេលនោះ នាយឧត្តមសេនីយ៍ ជា តារា និង ឈិន ច័ន្ទពណ៌ បានស្នើសុំសម្តេចប្រើកាំភ្លើងធំបាញ់ចូល៤០គីឡូម៉ែត្រទៅក្នុងប្រទេសថៃ តែសម្តេចមិនប្រើនោះទេ។

សម្តេចតេជោ ហ៊ុន សែន បានថ្លែងថា កម្លាំងទ័ព និងសព្វាវុធ ដែលបញ្ជូនទៅព្រំដែនមិនមែនដើម្បីវាយថៃនោះទេ តែករណីមានការឈ្លានពាន គឺកម្ពុជាប្រើសិទ្ធិការពារបូរណភាពទឹកដី និងអធិបតេយ្យជាតិ។ ថា បើទោះបីសម្តេចមហាបវរធិបតី ហ៊ុន ម៉ាណែត កំពុងទស្សនកិច្ចនៅក្រៅប្រទេស តែសម្តេចបានធ្វើការជាប់ប្រចាំលើបញ្ហាព្រំដែន ហើយដឹងពីភូមិសាស្ត្រនោះច្បាស់។ កន្លែងដែលផ្ទុះអាវុធ គឺជាកន្លែងដែលសម្តេចបានទៅដល់កាលពីឆ្នាំ២០០៩ ហេតុអ្វីថៃថាជាដីរបស់ពួកគេ?

សម្តេចតេជោ ហ៊ុន សែន បានថ្លែងថា សម្តេចមិនមែនជាមេដឹកនាំដែលអង្គុយតែក្នុងការិយាល័យនោះទេ គឺតែងតែចុះតាមមូលដ្ឋាន ហើយនៅសមរភូមិសង្គ្រាម ក៏សម្តេចចុះដែរ។ អ្វីដែលកម្ពុជាចង់បាន គឺចង់បានស្ថានការណ៍នៅព្រំដែន វិលត្រឡប់ទៅសភាពដើមវិញ ហើយសុំឱ្យវាកើតត្រឹមនៅមុំបី កុំឱ្យរីករាយរាលដាលទូទាំងព្រំដែន និងប៉ះពាល់ដល់កិច្ចសហប្រតិបត្តិការលើវិស័យផ្សេងៗទៀត។

សម្តេចតេជោបានមានប្រសាសន៍ប្រកាសស្វាគមន៍ក្រុមហ៊ុនជីបម៉ុង ដែលបានប្រកាសនាំយកអំណោយជាទឹក ភេសជ្ជៈ និងគ្រឿងឧបភោគបរិភោគជូនដល់កងទ័ព។

សម្តេចតេជោ ហ៊ុន សែន ផ្តាំទៅជនជាតិថៃ សិទ្ធិ លីមថងគុល លោកឯងមិនមែនជាកងទ័ពទេ។ សម្តេចតេជោ បានថ្លែងថា យុទ្ធសាស្ត្រសម្តេច បើទ័ពថៃចង់វាយចូលមកដល់អង្គរវត្តដូច សិទ្ធិ លីមថងគុល លើកឡើងនោះ សម្តេចក៏បើកឱ្យវាចូល ដើម្បីបង្ហាញពីការឈ្លានពានដល់អង្គការសហប្រជាជាតិ ហើយសម្តេចនឹងប្រើទ័ពវាយកាត់ផ្តាច់ទ័ពថៃ។

សម្តេចតេជោ ហ៊ុន សែន បានថ្លែងថា តេជោសែន ច្បាស់ណាស់ពីយុទ្ធសាស្ត្រសង្គ្រាម។ សម្តេចតេជោ បានថ្លែងថា យន្តហោះអាមេរិក ធ្លាប់ដេញបាញ់សម្តេច តែធ្វើអ្វីមិនបែកនោះឡើយ។

សម្តេចតេជោបានថ្លែងថា ក្នុងសង្គ្រាមបែបនេះ សម្តេចមិនប្រើយន្តហោះនោះទេ តែសម្តេចមានសំណាញ់មេឃ គឺកាំភ្លើងបាញ់ទម្លាក់យន្តហោះ។ នៅពេលនេះកម្ពុជា មានកាំភ្លើងការពារអាកាសដែលល្អប្រសើរ។

សម្តេចតេជោ ហ៊ុន សែន អំពាវនាវប្រជាពលរដ្ឋឧបត្ថម្ភដល់កងទ័ព ដើម្បីបង្ហាញពីភាពរួបរួមគ្នាជាធ្លង់នៃខឿនការពារជាតិរបស់កម្ពុជា។ កម្ពុជា ចង់បានព្រំដែនជាមួយប្រទេសជិតខាងទាំងអស់ ជាព្រំដែនសន្តិភាព មិត្តភាព សហប្រតិបត្តិការ និងអភិវឌ្ឍន៍។

សម្តេចតេជោ ហ៊ុន សែន ក៏បានផ្តាំសួរសុខទុក្ខទៅដល់កងទ័ពទាំងអស់នៅជួរមុខ ហើយសម្ដេចក៏បានអំពាវនាវដល់កាកបាទក្រហមនៅខេត្តព្រះវិហារ ជួយដល់ជនភៀសសឹកនៅព្រំដែន៕SRP