ភ្នំពេញ៖ក្រុមហ៊ុន សៀ ម៉ុន ( SIEMON CAMBODIA AGRICULTURE COMPREHENSIV DEVELOPMENT CO., LTD) កំពុងរងនូវការរិះគន់ថាបង្វេរឈើដែលខ្លួនបានប្រមូលទិញពីអ្នកស្រុកដោយខុសច្បាប់ឲ្យក្លាយជាឈើមានច្បាប់។ដោយករណីនេះអាចជាសកម្មភាពមួយផ្ទុយពីគោលការណ៍កិច្ចសន្យាជាមួយរាជរដ្ឋាភិបាល ដោយបាននឹងកំពុងដាក់កម្លាំងអារឈើនៅតំបន់ព្រៃនៅក្បែរៗក្រុមហ៊ុននោះ រួចដឹកចូលទីតាំងក្រុមហ៊ុនបង្វែរទៅជាឈើស្របច្បាប់។

យោងតាមរបាយការណ៍របស់ក្រសួងកសិកម្មលេខ១២០ សជណ.កស ចុះថ្ងៃទី១៨ ខែកុម្ភៈ ឆ្នាំ២០១៧ ក្រុមហ៊ុន សៀ ម៉ុន បានទទួលសិទ្ធិវិនយោគជាមួយរាជរដ្ឋាភិបាល លើទំហំដីចំនួន៣០១៩៣ហិកតា ស្ថិតនៅក្នុងឃុំស្រែសំបូរ ស្រុកសៀមប៉ាង បច្ចុប្បន្នត្រូវបានកាត់មកឲ្យ ស្រុកបុរីអូរស្វាយសែនជ័យ។ កន្លងមកនេះក្រុមហ៊ុនបានដាំដំណាំឪឡឹក និងក្រូចវល្លិ៍ ផ្ទុយពីកិច្ចសន្យា គោលការរបស់ក្រុមហ៊ុនជាមួយរាជរដ្ឋាភិបាល ក្នុងការដាំឈើលើដីព្រៃឈើរិចរិល ដោយសហការដៃគូជាមួយវិស័យឯកជន។

ថ្មីៗនេះបានលេចឮថាមានឈ្មួញម្នាក់ ដែលគេស្គាល់ថា ឈ្មោះ យីម ស្នា ជាមេការក្រុមហ៊ុន សៀ ម៉ុន បានកាប់ឈើពីខាងក្រៅ ហើយនាំចូលទៅស្តុកទុកក្នុងដីក្រុមហ៊ុន ជ្រកក្រោមស្លាកអាជ្ញាប័ណ្ណស្របច្បាប់ ដើម្បីដឹកចេញបន្តទៅកាន់ទីផ្សារ។

ជាក់ស្តែងថ្មីៗនេះ គេឃើញមានរថយន្តយីឌុបធំៗ បានដឹកឈើចេញពីក្រុមហ៊ុន សៀ ម៉ុន នេះជាច្រើនគ្រឿង ហើយឈើនៅលើរថយន្តទាំងនេះ សុទ្ធតែជាឈើដែលមានមុខកាត់ធំៗ ផ្ទុយពីខ្នាតឈើដែលបានកាប់មកពីព្រៃឈើរិចរិលក្នុងដីក្រុមហ៊ុន។ បើយោងតាមការអនុញ្ញាតពីក្រសួងកសិកម្មឲ្យកាប់ស្តារ និងនាំឈើចេញ គឺមានខ្នាតត្រឹមតែ២៥សង់ទីម៉ែត្រ(២,៥តឹក) ចុះក្រោមប៉ុណ្ណោះ។

ជុំវិញការករណីនេះបណ្ដាញសារព័ត៌មានសៀមរាបប៉ុស្ដិ៍ នៅមិនទាន់ទទួលបានការបកស្រាយពីតំណាងក្រុមហ៊ុន សៀ ម៉ុន និងលោក យីម ស្នា បាននៅឡើយទេដោយមិនមានលេខទូរស័ព្ទទំនាក់ទំនង។ ប៉ុន្តែករណីនេះក្រុមហ៊ុន បានចេញលិខិតបំភ្លឺមួយកាលពីថ្ងៃទី១០ខែកក្កដាឆ្នាំ២០២០ដូចក្រោម៖

ភ្នំពេញ៖កម្ពុជាបានរកឃើញ អ្នកជំងឺកូវីដ១៩ ចំនួន១៥នាក់ទៀត មកពីប្រទេសអារ៉ាប៊ីសាអូឌី។ លើបញ្ហានេះប្រមុខដឹកនាំកម្ពុជាបានអំពាវនាវ ឲ្យពលរដ្ឋខ្មែរមា​នការប្រុងប្រយ័ត្នចំពោះជំងឺដ៏កាចសាហាវមួយនេះ។

សម្ដេចតេជោ នាយករដ្ឋមន្ត្រី ហ៊ុន សែន បានបញ្ជាក់ថាសំខាន់នៅពេលនេះ សូមបងប្អូនបន្តយកចិត្តទុកដាក់ថែរក្សាសុខភាពអោយបានល្អ កុំអោយឆ្លងជំងឺកូវីដ-១៩ អោយសោះ។

សម្ដេចតេជោ ហ៊ុន សែន បន្តថាថ្មីៗនេះកម្ពុជាយើងមានអ្នកដំណើរមកពីប្រទេសអារ៉ាប៊ីសាអូឌី ១៥នាក់ទៀត ដែលមានឆ្លងមេរោគកូវីដ-១៩ ដែលកំពុងដាក់អោយព្យាបាលជាបន្ទាន់។ មកទល់ពេលនេះ​ នៅក្នុងប្រទេសយើងគឺមានអ្នកឆ្លងកូវីដ-១៩ សរុបចំនួន ១៥៦ នាក់ ដែលបានព្យាបាលជាសះស្បើយ ១៣៣នាក់។ ជំងឺកូវីដ-១៩ គឺនៅតែជាជំងឺឆ្លងរាតត្បាតដ៏កាចសាហាវ ហើយពុំទាន់មានថ្នាំព្យាបាលនៅឡើយទេ។

សូមបងប្អូនប្រជាពលរដ្ឋកុំធ្វេសប្រហែសអោយសោះ ហើយសូមឧស្សាហ៍ដុសលាងសម្អាតដៃជាមួយសាប៊ូ ចឹល ឬទឹកអាល់កុល ហើយពាក់ម៉ាសការពារអោយបានត្រឹមត្រូវ។

សម្ដេចបានបញ្ជាក់ទៀតថាទីកន្លែងដែលមានមនុស្សច្រើនដូចជាទីផ្សារ និង ផ្សារទំនើប តូបលក់ដូរទូទៅ ភោជនីយដ្ឋាន ផ្ទះសំណាក់ សណ្ឋាគារ កាស៊ីណូដែលទទួលបានការអនុញ្ញាត្តិអោយបើកដំណើរការ ជាពិសេសមន្ទីពេទ្យឯកជន និងមន្ទីរពេទ្យរដ្ឋត្រូវតែមានទឹកអាល់កុល ចឹលសម្លាប់មេរោគ និងម៉ាស សម្រាប់អតិថិជន រួមទាំងអ្នកជំងឺ នឹងបងប្អូនមកសួរសុខទុក្ខពាក់ការពារចៀសវាងការឆ្លងរោគពីម្នាក់ទៅម្នាក់។ សូមបងប្អូនប្រជាពលរដ្ឋបន្តធ្វើតាមការណែនាំរបស់ក្រសួងសខាភិបាលអោយបានខ្ជាប់ខ្ជួន។សូមជូនពរបងប្អូនធ្វើដំណើរមានសុខសុវត្ថិភាព នឹងចៀសផុតពីជំងឺឆ្លងកូវីដ-១៩ទាំងអស់គ្នា៕SRP

ខេត្តកំពង់ចាម៖ ក្រុមអ្នកញៀនល្បែងស៊ីសង លួច​បេីក​សង្វៀន​ប្រ​ជល់មាន់​១កន្លែង​ នៅភូមិគងជ័យ ឃុំព្រែកកុយ ស្រុកកងមាស ​​ ត្រូវ​បាន​កម្លាំង​សមត្ថកិច្ច​ក្រសោប​បាន​ទាំង​សំបុក​ កាលពី​វេលាម៉ោង១២ថ្ងៃត្រង់​ ថ្ងៃ​ទី​១១​ ខែកក្កដា​ ឆ្នាំ​២០២០​នេះ។

សមត្ថកិច្ចបានបញ្ជាក់ថា​ថា​ ក្នុងប្រតិបត្តិការ​បង្រ្កាបនេះ កម្លាំង​ជំនាញ​បាន​ឃាត់​ខ្លួន​ក្រុមអ្នក​ញៀន​ល្បែង​ ចំនួន០៩នាក់​ និងដកហូតបាននូវវត្ថុតាងមួយចំនួន​ ហើយ​បានបញ្ជូនមកកាន់ស្នងការដ្ឋាននគរបាលខេត្តកំពង់ចាម ដើម្បី​ធ្វើការ​សាកសួរ និងកសាងសំណុំរឿងតាមនីតិវិធី​ច្បាប់​៕SRP

ខេត្តសៀមរាប៖ លោក ទៀ សីហា អភិបាល ខេត្តសៀមរាបនៅរសៀលថ្ងៃសុក្រទី១០ខែកក្កដា ម្សិលមិញ បានដឹកនាំកិច្ចប្រជុំដោយដាក់វិធានការចំនួន ០៣សំខាន់ៗ ទី០១៖ វិធានការទប់ស្កាត់ការរុករានទន្រ្ទានដីរដ្ឋគ្រប់ប្រភេទ ដែលវាតយកដីធ្វើជាកម្មសិទ្ធិនៅក្នុងភូមិសាស្រ្តខេត្តសៀមរាប ទី០២៖ការបង្ការ និងទប់ស្កាត់បញ្ហាកូដកម្ម និងបាតុកម្មនៅតាមបណ្ដាក្រុង ស្រុក ទី០៣៖ដំណើរការនិងនិតិវិធីនៃការបើកប្រាក់ឧបត្ថម្ភគ្រួសារក្រីក្រ។
កិច្ចប្រជុំនេះអភិបាលខេត្ត បានដាក់ចេញនូវ វិធានការ សម្រាម់ មន្ទីរអង្គភាព ក្រុង ស្រុក ឃុំ សង្កាត់យកទៅអនុវត្តដូចខាងក្រោម៖

-ត្រូវចុះពិនិត្យទីតាំងភូមិសាស្រ្តតាមផែនទីប្រើប្រាស់ដីឆ្នាំ2002 ដើម្បីធ្វើបច្ចុប្បន្នភាពដីរដ្ឋ ស្ថិតិប្រជាពលរដ្ឋ និងដីប្រជាពលរដ្ឋកាន់កាប់ប្រើប្រាស់ជាក់ស្តែង។

-បង្ការ និងទប់ស្កាត់បញ្ហាកូដកម្ម និងបាតុកម្មនៅតាមបណ្ដាក្រុង ស្រុក ដោយការដោះស្រាយបញ្ហាជូនប្រជាពលរដ្ឋឱ្យបានល្អប្រសើរ ដើម្បីធានាបាននូវសន្តិសុខជូនប្រជាពលរដ្ឋ។

-ពិនិត្យលើដំណើរការ និងនិតិវិធីនៃការបើកប្រាក់ឧបត្ថម្ភគ្រួសារក្រីក្រជូនប្រជាពលរដ្ឋឲ្យបានត្រឹមត្រូវ ពិសេសឲ្យចំគោលដៅគឺប្រជាពលរដ្ឋដែលក្រីក្រពិតប្រាកដ។ រដ្ឋបាលក្រុង ស្រុក ត្រូវណែនាំដល់រដ្ឋបាលឃុំ សង្កាត់ ត្រូវធ្វើការងារប្រកបដោយតម្លាភាព គណនេយ្យភាព និងប្រសិទ្ធភាព ព្រមទាំងចាត់វិធានការដាច់ខាតចំពោះបុគ្គលណាដែលអនុវត្តខុសគោលការណ៍ និងនីតិវិធី។ បន្ថែមលើសនេះ រដ្ឋបាលក្រុង ស្រុកត្រូវរៀបចំក្រុមការងារដើម្បីដកសិទ្ធិ(ដកប័ណ្ណសមធម៌)ចំពោះគ្រួសារដែលមានលក្ខខណ្ឌមិនស្របតាមគ្រួសារក្រីក្រតែមានប័ណ្ណសមធម៌។

-កងកម្លាំងប្រដាប់អាវុធត្រូវរៀបចំឲ្យមានកម្លាំងល្បាត តាមពេលវេលា ទីតាំង ជាពិសេសមុខសញ្ញាមានសកម្មភាពលួច ឆក់ ប្លន់។ល។

អភិបាលខេត្តបានថ្លែងផងដែរថាមេឃុំ ចៅសង្កាត់ត្រូវហាមដាច់ខាតចំពោះការចុះហត្ថលេខាទិញ លក់ដីរបស់រដ្ឋ និងត្រូវពិនិត្យផ្តល់ការបើកប្រាក់ឧបត្ថម្ភគ្រួសារក្រីក្រជូនប្រជាពលរដ្ឋដែលក្រពិតប្រាកដ៕SRP

ខេត្តសៀមរាប៖លោកជំទាវ អ៊ីវ៉ា ង្វៀន ប៊ិញ (Eva Nguyen Binh) ឯកអគ្គរដ្ឋទូតបារាំងប្រចាំនៅកម្ពុជា បានថ្លែង
ក្នុងឱកាសជួបពិភាក្សាការងារជាមួយលោក ទៀ សីហា អភិបាលខេត្តសៀមរាប នៅថ្ងៃទី១០ ខែកក្កដា ម្សិលមិញដោយ
បានលើគម្រោងចំនួន០២ គឺទី០១. គម្រោងពុយទីហ្វូ គឺជាការស្ដារវិស័យទេសចរណ៍ក្នុងខេត្តសៀមរាប ឲ្យកាន់តែមានទាក់ទាញលើឆាកអន្តរជាតិ ខណៈគម្រោងនេះ ជួបពិភាក្សាម្ដងរួចមក កាលពីថ្ងៃទី២០ ខែឧសភា កន្លងទៅថ្មីៗនេះ រវាងលោក ង៉ាន់ ភិរុណ អភិបាលរងខេត្ត និងម្ចាស់គម្រោង ដើម្បីសិក្សាពីលទ្ធភាព និងធ្វើការសន្និដ្ឋាននាពេលឆាប់នេះ ។
ទី០២. ជាគម្រោងលើប្រព័ន្ធធារាសាស្រ្ត មានឈ្មោះថា “សៀមរាបទឹកសម្រាប់ទាំងអស់គ្នា” ដែលមានទីតាំងក្នុងស្រុកពួក និងគាំទ្រដោយ ទីភា្នក់ងារបារាំង សម្រាប់ការអភិវឌ្ឍ (AFD) ហើយគម្រោងនេះ នឹងគ្រប់គ្រងលើធនធានទឹកចម្រុះ សម្រាប់ប្រជាពលរដ្ឋក្នុងខេត្តសៀមរាប មានទឹកប្រើប្រាស់ទាំងអស់គ្នា ដែលមានគុណប្រយោជន៍ដល់ អាជ្ញាធរជាតិអប្សរា ក្រសួងធនធានទឹក ក្រសួងវប្បធម៌ និងវិចិត្រសិល្បៈ និងអង្គភាពពាក់ព័ន្ធដទៃទៀត ហើយទោះបីប្រទេសកម្ពុជា ក៏ដូចពិភពលោក កំពុងរងផលប៉ះពាល់ដោយសារវិបត្តិជំងឺកូវីដ១៩ ប្រទេសបារាំងនៅតែបន្តគាំទ្រ និងសហការ ជាមួយប្រទេសកម្ពុជា ក៏ដូចរដ្ឋបាលខេត្តសៀមរាប លើគម្រោងនានានាពេលអនាគត។
អភិបាលខេត្ត លោកទៀ សីហា បានថ្លែងអំណរគុណចំពោះការគាំទ្រ និងកិច្ចសហប្រតិបត្តិការល្អរបស់ប្រទេសបារាំង ជាមួយរាជរដ្ឋាភិបាលកម្ពុជា ហើយក្នុងកាលៈទេសៈនៃវិបត្តិជំងឺកូវីដ១៩ រាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជា នាយករដ្ឋមន្ត្រី បានណែនាំដល់បណ្ដារដ្ឋបាលរាជធានីខេត្តទាំងអស់ ត្រូវយកចិត្តទុកដាក់ ធ្វើអត្តសញ្ញាណកម្មជនក្រីក្រពិតប្រាកដ ដែលកំពុងរងផលប៉ះពាល់ដោយសារវិបត្តិជំងឺកូវីដ១៩។
ជាមួយនោះ រដ្ឋបាលខេត្ត ក៏បានខិតខំប្រឹងប្រែង ប្រែក្លាយពេលវេលាដ៏លំបាកនេះ ទៅជាការអភិវឌ្ឍ ជាពិសេសហេដ្ឋារចនាសម្ព័ន្ធក្នុងក្រុង សម្រាប់ទទួលភ្ញៀវទេសចរ បន្ទាប់ជំងឺកូវីដ១៩នេះ ផងដែរ៕SRP

ខេត្តកំពង់ធំ៖លោកវរសេនីយ៍ឯក យី សំអូន មេបញ្ជាការរងកងរាជអាវុធហត្ថខេត្តកំពង់ធំ បានធ្វើការបដិសេធច្រានចោលទាំងស្រុងនូវការចោទប្រកាន់ថា រូបលោកថាប្រើអំពើហិង្សា លើអ្នកគ្រប់គ្រង លក់សំបុត្រ ចូលភ្នំសន្ទុក។
ពាក់ព័ន្ធការចោទប្រកាន់នេះលោកលោកវរសេនីយ៍ឯក យី សំអូន បានប្រាប់បណ្ដាញ សារព័ត៌មានសៀមរាបប៉ុស្ដិ៍ តាមប្រព័ន្ធតេលេក្រាមថា៖ខ្ញុំឯណាដល់ថ្នាក់ថោកទាបលុយ១០០០រៀលនោះ ស្តាប់តែម្ខាងឬដឹងតាមគេមិនពិតឡើយ។ ប្រជាជននៅខេត្តនិងហើយនិងមកលេងខាងក្រៅគេត្អូញត្អែណាស់រកពេលទៅបុណ្យនៅវត្តនិងទៅហូបបាយនៅជើងភ្នំត្រូវបានអ្នកដេញថ្លៃដាក់កុងត្រូលរាប់មនុស្សយកលុយ។
សូមបញ្ជាក់ថានៅថ្ងៃទី០៨ខែកក្ដដា ឆ្នាំ២០២០ មានករណីហិង្សាបានកើតឡើង នាំឲ្យមានការភ្ញាក់ផ្អើលដល់ពលរដ្ឋ ក៏ដូចអាជីវកលក់ដូរនៅតាមរមណីដ្ឋានជើងភ្នំសន្ទុក ។
បើតាមប្រភពថាមូលហេតុ គឺលោកវរសេនីយ៍ឯកយី សំអូន បើកឡានហួសបារាសលក់សំបុត្រ ហើយជនរងគ្រោះ ឈ្មោះប្រាក់ សុប៊ុន ហៅទី ជាអ្នកគ្រប់គ្រងនៅរមណីដ្ឋានភ្នំសន្ទុក ជិះម៉ូតូតាមយកលុយចំនួន១ពាន់រៀល ក្នុងមួយនាក់ ដោយនៅក្នុងឡានលោកយី សំអូន មានមនុស្សបីនាក់ គឺលោកយី សំអូន ប្រពន្ធ នឹងម្ដាយរបស់លោកយី សំអូន។ នៅពេល ជនរងគ្រោះ បានលើកដៃសំពះគោរពត្រឹមត្រូវ ហើយសុំលុយថ្លៃអនាម័យគ្នាបីនាក់សុំ៣ពាន់រៀល ស្រាប់តែលោកយី សំអូន ប្រាប់ជនរងគ្រោះថា ហែងមិនមើលស្លាកលេខ ខ.ម ទេអី ជនរងគ្រោះក៏បានប្រាប់លោកយី សំអូន វិញថា នៅកន្លែងនេះ លើកលែងតែ ជនពិការនឹងកូនក្មេង ហើយនិងអ្នកមានបេសកកម្ម ក្រសួងឬមន្ទីទេសចរណ៍ មិនអោយយកលុយទេ ក្រៅពីនោះគឺយកទាំងអស់ ដើម្បីយកលុយចំណូលនោះ មកអោយថ្លៃអនាម័យ កម្មករ ដែលសម្អាត នៅរមណីដ្ឋានភ្នំសន្ទុកហ្នឹងឯង។ ក៏មានការប្រកែកមួយពីរៗ ឮដល់ម្ដាយរបស់លោកយី សំអូន ដែលជិះឡានជាមួយគ្នា ក៏បានសួរនាំទៅជនរងគ្រោះថា រឿងអី នៅពេលនោះ លោកយី សំអូន បានស្រែកប្រាប់ម្ដាយរបស់លោកថា មិនបាច់អោយលុយវាទេ បើហ៊ានតែអោយរឿង ។ ជនរងគ្រោះក៏បានសួរទៅម្ដាយលោកយី សំអូន ថាគាត់ធ្វើការអីសម្ដីរបស់គាត់កាចម្លេះ? គ្រាន់តែឮជនរងគ្រោះ សួរទៅម្ដាយ បែបនេះ ស្រាប់តែលោកយី សំអូន បានចុះមកវាយ ជនរងគ្រោះតែម្ដង រហូតមានដកកាំភ្លើងខ្លី តែត្រូវបានប្រពន្ធ របស់លោកយកកាំភ្លើង ទៅទុកក្នុងឡានវិញ។
ជនរងគ្រោះ ក៏បានយកទូរស័ព្ទមកថត តែត្រូវបានលោកយី សំអូន ចុះមកឆក់យកទូរស័ព្ទពីដៃ ហើយបើកឡានរត់ទៅបាត់តែម្ដង។
ជុំវិញករណីខាងលើនេះ លោកលោកវរសេនីយ៍ឯក យី សំអូន បានប្រាប់អ្នកសារព័ត៌មានតាមទូរស័ព្ទ សូមស្ដាប់សម្លេងខាងក្រោមនេះ៖

ខេត្តសៀមរាប៖លោកក្អោប រ៉ន ចៅសង្កាត់ជ្រាវ ក្រុងសៀមរាប បានចុះធ្វើការផ្សព្វផ្សាយលក្ខណ:០៩យ៉ាងនៃគោលនយោបាយភូមិ ឃុំ មានសុវត្ថិភាព ដើម្បីឲ្យពលរដ្ឋស្វែងយល់បន្ថែមទៀត។
ពិធីនេះធ្វើនៅសាលាឆទានបុស្សក្រឡាញ់ ស្ថិតនៅក្នុងភូមិបុស្សក្រឡាញ់ នាព្រឹកថ្ងៃសៅរ៍ទី១១ខែកក្កដាឆ្នាំ២០២០នេះ ដោយមានការចូលរួមពីរមន្ត្រីសង្កាត់រួមនឹងនគរបាលប៉ុស្ដិ៍ ព្រមទាំងប្រជាពលរដ្ឋជាច្រើននាក់ផងដែរ។
សូមបញ្ជាក់ថាពិធីនេះក៏មានការចែកលិខិតថ្លែងអំណរគុណដល់សប្បុរសជននានា ដែលបានឧបត្ថម្ភថវិការ សម្រាប់ការសាងសង់សាលាឆទាន នៅភូមិបុស្សក្រឡាញ់ នេះ និងការឧបត្ថម្ភថវិការ ចូលរួមទ្រទ្រង់ទប់ស្កាត់ជំងឺកូវីដ១៩។ ក្នុងនោះលោកគង់ ប៊ឹប ចៅសង្កាត់រងទី១បានឧបត្ថម្ភ១០០ដុល្លារផងដែរ៕SRP

ភ្នំពេញ៖ សារលិខិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសទិវាប្រជាជនពិភពលោកលើកទី៣១ ថ្ងៃ១១ ខែកក្កដា ឆ្នាំ២០២០៕SRP

ខេត្តសៀមរាប៖ស្នងការនគរបាលខេត្តសៀមរាបសុំធ្វើការបដិសេធច្រានចោលទៅនឹងបណ្ដាញសង្គមហ្វេសប៊ុកមួយចំនួនដែលបានបង្ហោះថាមានករណីប្លន់នៅផ្លូវព្រលានយន្តហោះក្បែរស្នងការនគរបាលខេត្តសៀមរាប។
យោងរបាយការណ៍របស់ការិយាល័យនគរបាលព្រហ្មទណ្ឌកំរិតធ្ងន់ នៃស្នងការនគរបាលខេត្តសៀមរាបបានអះអាងថានៅព្រឹកថ្ងៃទី09ខែ កក្កដា ឆ្នាំ 2020 មានអាខោនហ្វេសប៊ុកឈ្មោះ Son chaya បានសរសេរបង្ហោះថាមានករណី ប្លន់ ទៅលើកូនប្រុសរបស់គាត់ឈ្មោះ ចិត្ត ហៅម៉ៅ ត្រង់ចំណុចផ្លូវព្រលាន យន្តហោះ ក្បែរស្នងការនគរបាលខេត្តសៀមរាបកាលពីវេលាម៉ោង 20 និង 00 នាទីថ្ងៃទី08 ខែ07ឆ្នាំ2020។
របាយការណ៍ដដែលបញ្ជាក់ទៀតថាក្រោយពេលឃើញការបង្ហោះហើយ នៅព្រឹកថ្ងៃទី 10 ខែកក្កដាឆ្នាំ 2020 កម្លាំងសមត្ថកិច្ចបានទៅជួបជាមួយជនរងគ្រោះ រួមទាំងឈ្មោះ ស៊ន់ ចៃ ( Son chaya ) ដែលជាឪពុកនិងអ្នកសរសេរបង្ហោះនៅលើ facebook។ តាមការសាកសួរករណីខាងលើនេះ មិនមែនជាករណីប្លន់នោះទេគឺជា ករណីហិង្សា ពេលនេះ ម្ចាស់ហ្វេសប៊ុកឈ្មោះ Son chaya បានសរសេរបង្ហោះសុំទោសជាសាធារណៈ នៅលើហ្វេសប៊ុក ដើម្បី កុំឲ្យមានការយល់ច្រឡំ ថាជាករណីប្លន់។ សមត្ថកិច្ចក៏បានអោយគាត់ ដាក់ពាក្យបណ្តឹង ប៉ុស្ដិ៍ទឹកវិល ដើម្បីចំណាត់ការបន្តរួចរាល់ហើយដែរ។
បើតាមរបាយការណ៍បញ្ជាក់ថាចំណែអាខោនហ្វេសប៊ុកឈ្មោះ Nit Duch ដែលបានសរសេរបង្ហោះនៅលើ facebook ពាក់ព័ន្ធនឹងករណីខាងលើនេះដែរ សមត្ថកិច្ចកំពុងធ្វើការស្វែងរកបន្តដោយហ្វេសប៊ុករបស់គាត់ទាក់ទងមិនបាន៕SRP

ខេត្តសៀមរាប៖(ដំណឹងមរណភាព)
លោក ឌិត សេរីរ័ត្ននា ប្រធានការិយាល័យបច្ចេកទេស នៃមន្ទីរសាធារណការ និងដឹកជញ្ជូន ខេត្តសៀមរាប បានទទួលអនិច្ចកម្ម នៅថ្ងៃសុក្រ ៥រោច ខែអាសា ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី ១០ ខែកក្កដា ឆ្នាំ២០២០ វេលាម៉ោង ១០៖៣០នាទីព្រឹក ក្នុងជន្មាយុ៤៧ឆ្នាំ ដោយរោគាពាធ។

សពតម្កល់ទុកធ្វើបុណ្យទក្ខិណានុប្បទាន តាមប្រពៃណីព្រះពុទ្ធសាសនានៅ គេហដ្ឋាននៃសព ស្ថិតនៅភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប។

សពដង្ហែរចេញពីគេហដ្ឋានទៅបូជានៅឈាបនដ្ឋាន វត្តដំណាក់ នៅថ្ងៃ អាទិត្យ ទី១២ ខែកក្កដា ឆ្នាំ២០២០ (ពត៌មានលំអិតនិងជម្រាបនៅពេលក្រោយ)។

សេចក្តីនេះចាត់ទុកជាការជូនដំណឹងដល់បងប្អូន ញាតិមិត្តជិតឆ្ងាយនៃសព ដើម្បីចូលរួមរំលែកទុកជាមួយក្រុមគ្រួសារសព៕SRP

ខេត្តតាកែវ៖ការចិញ្ចឹមសត្វទាយកស៊ុត និងសាច់នៅខេត្តតាកែវមានការកើនឡើង ខណៈមានតម្រូវការច្រើន ដែលធ្វើឱ្យអ្នកចិញ្ចឹមងាយស្រួលលក់ ហើយបានជួយសម្រួលដល់ជីវភាពរបស់ប្រជាកសិករ ។

លោក ញិប ស្រ៊ន ប្រធានមន្ទីរកសិកម្ម រុក្ខាប្រមាញ់និងនេសាទខេត្តតាកែវ មានប្រសាសន៍ថា ស្របពេលដែលមានការរីករាលនៃជំងឺកូវីដ-១៩ រាជរដ្ឋាភិបាលក៏ដូចជាក្រសួងកសិកម្ម បានជំរុញដល់ប្រជាកសិករឲ្យបង្កើនការចិញ្ចឹមសត្វនិងដុះដំណាំចម្រុះផ្សេងៗ ដើម្បីជួយដល់ជីវភាពគ្រួសារ ហេតុនេះទើបកសិករបានបង្កើនការចិញ្ចឹមសត្វទាបន្ថែម ខណៈដែលបច្ចុប្បន្នកំពុងមានទីផ្សារល្អទាំងស៊ុត ទាំងសាច់។

លោកបានបន្តថា ការចិញ្ចឹមទាមានការបែងចែកជា២ប្រភេទ គឺការចិញ្ចឹមនៅក្នុងកសិដ្ឋាន និងការចិញ្ចឹមលក្ខណៈគ្រួសារ (ហ្វូង) ដោយការចិញ្ចឹមក្នុងកសិដ្ឋានមានលក្ខណៈងាយគ្រប់គ្រងជាងការចិញ្ចឹមជាហ្វូង ប៉ុន្តែការចិញ្ចឹមជាហ្វូងមានលក្ខណៈងាយស្រួល ដោយកសិករគ្រាន់តែប្រលែងវាទៅក្នុងស្រែ ដែលបានច្រូតកាត់រួចដើម្បីឲ្យវាដើរស៊ីចំណី ។

ខេត្តតាកែវយើងនេះ ការចិញ្ចឹមទាគឺមានការចិញ្ចឹមនៅក្នុងកសិដ្ឋាន ហើយនិងការចិញ្ចឹមទាជាហ្វូងនៅក្នុងស្រែតែម្ដង គឺឲ្យតែដល់រដូវច្រូតកាត់គឺកសិករតែងតែដឹកយកទៅដាក់តាមស្រែ ហើយនៅពេលដែលយើងបានបូមទឹកដាក់ស្រែទៅគឺវាចុះស៊ី ដែលគេហៅថា ស្រូវវាជ្រុះទៅក្នុងស្រែហ្នឹង ហើយនិងវាអាចស៊ីក្ដាម ខ្យង ខ្ចៅអីហ្នឹង ដែលមាននៅក្នុងស្រែនេះ។

សូមបញ្ជាក់ថា កសិដ្ឋានចិញ្ចឹមទាក្នុងខេត្តតាកែវ មាន១៧កសិដ្ឋាន និងចិញ្ចឹមជាលក្ខណៈគ្រួសារ មាន៧២ហ្វូង ដែលទាលក់បានក្នុង១ថ្ងៃរាប់ពាន់ក្បាលដែលមានតំលៃជិត១ម៉ឺនរៀលក្នុង១គីឡូក្រាម និងស៊ុតក្នុង១ថ្ងៃអាចប្រមូលបានរាប់សែនគ្រាប់ ដែលមានតំលៃពី៣០០រៀលទៅ៥០០រៀលក្នុង១ស៊ុតទៅតាមប្រភេទស៊ុត ដែលចែកចេញជា៣ប្រភេទ មានស៊ុតធម្មតា ស៊ុតកូន និងសំរាប់ភ្ញាស់ធ្វើពូជ៕SRP

ខេត្តសៀមរាប៖លោកវរសេនីយ៍ទោ លឹម សម្បត្តិ អធិការនគរបាលស្រុកប្រាសាទបាគង បានបដិសេធចោលទាំងស្រុង ការចោទប្រកាន់របស់ពលរដ្ឋ ថារូបលោក រួមទាំងមន្ត្រីក្នុងអធិការ ចុះទៅបង្ក្រាបល្បែងស៊ីសងក្នុងមូលដ្ឋាន បានចាប់មនុ ស្សជំរិតទារប្រាក់នោះ ពុំមែនជាការពិតនោះឡើយ។

លោកវរសេនីយ៍ទោ លឹម សម្បត្តិ បានបញ្ជាក់ប្រាប់បណ្ដាញសារព័ត៌មាន ថា ការចុះបង្ក្រាបល្បែង ស៊ីសងកាលពីកន្លងទៅ គឺដើម្បីរក្សាគោលការណ៍ភូមិឃុំមានសុវត្ថិភាព។ ប៉ុន្តែវាធ្វើអោយរំខាន និងប៉ះពាល់ដល់ផលប្រយោជន៍របស់ក្រុមអ្នកញៀនល្បែង។ ចឹងហើយទើបពួកគេផ្តល់ព័ត៌មាន ដល់អ្នកសារព័ត៌មានមិនពិត បំណងមួលបង្កាច់បង្ខូចសមត្ថកិច្វទូទាំងអធិការ។ ការបង្ក្រាបល្បែងស៊ីសង ក្នុងមូលដ្ឋានរបស់លោកកាលពីកន្លងទៅ យើងត្រឹមតែនាំខ្លួនពួកគេមកអប់រំនិងធ្វើកិច្ចសន្យាតែប៉ុណ្ណោះ មិនពាក់ពន្ធ័និងការទាមទារប្រាក់ ពីបុគ្គលណាម្នាក់នោះឡើយ។
អធិការនគរបាលបញ្ជាក់ថា ក្រោយព័ត៌មានបានផ្សព្វផ្សាយអំពីករណីនេះ បុគ្គលដែលជាអ្នកញៀនល្បែងឈ្មោះអឿម ហួរ ក៏បានសរសេរជាលិខិតបំភ្លឺ និងសុំទោសជាសាធារណ: អំពីកំហុសឆ្គង ដែលបានផ្តល់បទសម្ភាសន៍ដល់អ្នកសារព័ត៌មាននេះវិញផងដែរ។
ជាមួយនិងលិខិតបំភ្លឺ ទទួលស្គាល់កំហុសនេះ លោកអធិការក៏បានបង្ហាញអំពីជំហររបស់ខ្លួន ដោយអះអាងថា រាល់សកម្មភាពល្បែងស៊ីសង ការសេពគ្រឿងញៀន សកម្មភាពលួច ឬសកម្មភាពផ្សេងៗផ្ទុយនិងច្បាប់ ដែលកើតមានឡើងក្នុងមូលដ្ឋាន គឺចាំបាច់ត្រូវតែបង្ក្រាប បើទោះបីប៉ះចំខ្សែឬខ្នង ឬធ្វើអោយរូបលោកធ្លាក់បុណ្យសក្តិក៏ដោយ។
លោកបានបញ្ជាក់ថា កាលពីថ្ងៃទី១៩មិថុនាឆ្នាំ២០២០ កន្លងទៅ កម្លាំងរបស់អធិការស្រុកប្រាសាទបាគង បានចុះទៅបង្ក្រាបល្បែងស៊ីសង មានដូចជាអាប៉ោង បៀរ ។ល។ ក្នុងនោះក៏បាននាំខ្លួនមេល្បែង និងអ្នក លេងសរុប០៩នាក់ មកធ្វើការអប់រំ ហើយអោយត្រឡប់ទៅផ្ទះវិញ រៀងៗខ្លួន។ចឹងទេការចោទប្រកាន់ដែលផ្តើមចេញពីការប៉ះពាល់ផលប្រយោជន៍នេះ រូបលោក រួមទាំងមន្ត្រីក្នុងអធិការ សូមធ្វើការបដិសេធ និងច្រានចោលទាំងស្រុង ហើយក៏សុំទទួលយកមកវិញ ចំពោះរិះគន់បែបស្ថាបនាផងដែរ៕SRP