ខេត្តកំពង់ចាម​៖ក្នុងដំណើរ​អញ្ជើញ​ចុះ​ពិនិត្យ​សមិទ្ធផល​នានា​ នៅវត្តព្រះមហោសថសុវណ្ណគីរី បឹងដែង (ហៅវត្តផ្កាឈូកមាស) ស្ថិតនៅ​ក្នុងភូមិបឹងដែង ឃុំព្រែកកក់ ស្រុកស្ទឹងត្រង់​ ខេត្ត​កំពង់ចាម​ នាព្រឹក​ថ្ងៃ​ទី​១០​ ខែវិច្ឆិកា​ ឆ្នាំ​២០២០​នេះ​ លោកស្រីម៉ែន សំអន រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា​ និងអធិការកិច្ច បាន​នាំយក​នូវ​ថវិកា​របស់​សប្បុរសជន​នានា​ ចំនួន​៨០លានរៀល​ និង​២០០០ដុល្លារ​អាមេរិក​ ប្រគេន​ដល់​ព្រះសង្ឃ​ ដេីម្បី​ចូលរួម​ចំណែក​ក្នុងការ​អភិវឌ្ឍន៍​វិស័យ​ព្រះពុទ្ធសាសនា​ឲ្យ​កាន់តែ​មាន​ការ​រីកចម្រើន​បន្ត​ទៅ​ទៀត​។ ​

ក្នុង​ពិធី​នេះក៏មាន​ការអញ្ជើញចូលរួមពី​ លោកស្រី​​ បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ លោក​ អ៊ុនចាន់ដា​ អភិបាលខេត្តកំពង់ចាម រួមទាំង​ប្រតិភូអមដំណើរ លោកឧកញ៉ា លោក​ លោកស្រីថ្នាក់ដឹកនាំ មន្ទីរអង្គភាពពាក់ព័ន្ធ​ជុំវិញខេត្ត​ និង​អាជ្ញាធរមូលដ្ឋាន​ ព្រមទាំង​ពុទ្ធបរិស័ទ​ជាច្រើន​
ផងដែរ។

ឆ្លៀត​ក្នុង​ឱកាស​នោះ​ដែរ​ លោកស្រីម៉ែន​ សំអន​​ មាន​ប្រសាសន៍​ថា​ ដោយសារ​ប្រទេស​ជាតិ​យើង​មាន​សុខសន្តិភាព​ ក្រោម​ការ​ដឹកនាំ​ដ៏​ត្រឹមត្រូវ​ របស់សម្តេចតេជោ ហ៊ុន​ សែន​ ជា​នាយករដ្ឋមន្ត្រី​​ ទេីប​យេីង​មាន​ឱកាស​ធ្វើ​បុណ្យ​ កសាងកុសលរួមគ្នា។ ដូច្នេះ​សូម​ឲ្យ​បងប្អូន​ប្រជាពលរដ្ឋ​ រួមគ្នាថែរក្សាសុខសន្តិភាពនេះ ឲ្យ​បាន​គង់វង្ស​ ដេីម្បី​បន្ត​ការ​អភិវឌ្ឍន៍​ ប្រទេសជាតិយើង ឲ្យកាន់តែមានការរីកចម្រើនបន្តទៅទៀត។

លោកស្រក៏បានអំពាវនាវដល់បងប្អូនប្រជាពលរដ្ឋ​ ឲ្យ​មានការ​ថែទាំ​សុខភាព​ ជៀស​ផុត​ពី​ការ​ឆ្លង​ជំងឺ​ផ្សេងៗ​ ជាពិសេស​ការ​អនុវត្ត​វិធានការ​ការពារ​ ទប់ស្កាត់ចំពោះការឆ្លងរីករាលដាល នៃជំងឺកូវីដ១៩ តាម​សេចក្តី​ណែនាំ​ របស់ក្រសួងសុខាភិបាល ឲ្យ​បាន​ជាប់​ ជាប្រចាំផងដែរ៕SRP

ខេត្តសៀមរាប៖ថៅកែសណ្ឋាគារម្នាក់ ត្រូវបានកម្លាំងនគរបាលខេត្តសៀមរាបឃាត់ខ្លួន ពាក់ព័ន្ធ ពីបទគំរាមកំហែងហែកកេរ្តិ៍។
ការឃាត់ខ្លួនធ្វើឡើងនៅថ្ងៃទី ០៩ ខែតុលាឆ្នាំ២០២០ នៅក្នុង ខេត្តសៀមរាប។

បុរសដែលត្រូវសមត្ថកិច្ចខេត្តសៀមរាបឃាត់ខ្លួនមានឈ្មោះ GANSHAW JOHN EDWARD កើតថ្ងៃទី ២១ ខែសីហាឆ្នាំ ១៩៦៣ មុខរបរម្ចាស់សណ្ឋាគារ Butterfly Pea កាន់លិខិតឆ្លងដែនលេខ565454607 ជនជាតិអាមេរិកាំង។
យោងតាមប្រភពពីសមត្ថកិច្ចបានឲ្យដឹងថានៅថ្ងៃទី ២៩ ខែកញ្ញាឆ្នាំ ២០២០ បានទទួលពាក្យបណ្ដឹងពីឈ្មោះ ច. ស.ប ភេទប្រុសអាយុ ៣៣ឆ្នាំ សង្កាត់សាលាកំរើក ក្រុងខេត្តសៀមរាបមុខរបរចុងភៅ ស្ដីពីឈ្មោះ GANSHAW JOHN EDARD បានបង្ហោះរូបភាពអាសអាភាស របស់ខ្លួន ឲ្យទៅ ទៅខ្លួន ហើយនិយាយគំរាមកំហែងទារលុយចំនួន ៨ម៉ឺនដុល្លារ ជាថ្នូរនឹងការមិនបង្ហោះរូបភាពអាក្រាត របស់ខ្លួនជាសាធារណៈ។

តាមចម្លើយសារភាព របស់បុរសខាងលើ ថាពិតជាបានផ្ញើរូបភាពអាក្រាតឲ្យឈ្មោះ ច.សប ពិតមែន ពីព្រោះជនរងគ្រោះ
ឈប់ស្រលាញ់ខ្លួន។
បើតាមសមត្ថកិច្ចបានបញ្ជាក់ថា ជនសង្ស័យ ជាមនុស្សភេទទីបី ស្រឡាញ់ភេទដូចគ្នា។

តាមរយ:ការស្រាវជ្រាវ របស់សមត្ថកិច្ច បានពិនិត្យ ឆែកឆេរផ្ទះជនសង្ស័យ ដោយរកឃើញវត្ថុតាងមួយចំនួនដូចខាងក្រោម:
កុំព្យូទ័រយួដៃចំនួន ០២គ្រឿង
Ipatចំនួន ០២គ្រឿង Cammera canongចំនួន ០១គ្រឿង
លិង្គសិប្បនិម្មិតចំនួន០១ និងស្រោមអនាម័យ ប្រេីប្រាស់រួចមួយចំនួនទៀត។
បច្ចុប្បន្ន ជនសង្ស័យ រួមជាមួយវត្ថុតាងត្រូវបានសមត្ថកិច្ច កសាងសំណុំរឿង បញ្ជូនទៅសាលាដំបូងខេត្តដេីម្បីអនុវត្តតាមផ្លូវច្បាប់៕SRP

ខេត្តសៀមរាប៖អភិបាលរងខេត្តសៀមរាប លោក ពៅ ពិសិដ្ឋ បានថ្លែងថា ខណៈពេលនេះ លោកដឹកនាំក្រុមការងារ ចម្រុះទៅពិនិត្យ មើលតាមបណ្តា ក្លឹបកំសាន្តនានានៅក្នុងក្រុងសៀមរាប ដើម្បីបានដឹងថា តើមានក្លឹបកំសាន្តណាខ្លះមិនទាន់បានបិទតាមការណែនាំរបស់រាជរដ្ឋាភិបាល។ ដូច្នេះប្រសិនបើរកឃើញថា ក្លឹបកំសាន្តណា ដែលមិនព្រមបិទតាមការណែនាំរបស់រាជរដ្ឋាភិបាល អាជ្ញាធរខេត្តសៀមរាប នឹងចាត់វិធានការទៅតាមផ្លូវច្បាប់ ដូចជាការដកអាជ្ញាប័ណ្ណធ្វើអាជីវកម្មជាដើម។

លោក ពៅ ពិសិដ្ឋ ថ្លែងបែបនេះ ក្នុងឱកាសចុះពិនិត្យមើលជាក់ស្តែងនូវទីតាំងអាជីវកម្ម ក្លឹបកំសាន្ត ខារ៉ាអូខេ រង្គសាល ឌីស្តូតែក និងបៀរហ្គាឌិន ក្នុងក្រុងសៀមរាប កាលពីយប់ថ្ងៃទី០៩ ខែវិច្ឆិកា ឆ្នាំ២០២០។

គួររំលឹកថា បន្ទាប់ពីមានព្រឹត្តិការណ៍០៣វិច្ឆិកា មក កាលពីថ្ងៃទី០៨ ខែវិច្ឆិកា ឆ្នាំ២០២០កន្លងទៅនេះ ក្រសួងសុខាភិបាល កម្ពុជា បានប្រកាសឱ្យបិទក្លឹបកំសាន្ត ខារ៉ាអូខេ រោងភាពយន្ត និងសារមន្ទីរនៅទូទាំងប្រទេស ហើយគិតត្រឹមថ្ងៃទី០៩ ខែវិច្ឆិកា ឆ្នាំ២០២០នេះ ការធ្វើតេស្តអ្នកប៉ះពាល់ក្នុងព្រឹត្តិការណ៍០៣ វិច្ឆិកា មានចំនួនសរុប១.១៦៦នាក់ ទាំងតេស្តលើកទី១ និងលើកទី២ ហើយទទួលបានលទ្ធផលពីវិទ្យាស្ថានប៉ាស្ទ័រកម្ពុជា មានចំនួន១.១៤៣នាក់ ក្នុងនោះ អ្នកវិជ្ជមានវីរុសកូវីដ១៩ មានចំនួន០៣នាក់ និង អ្នកអវិជ្ជមានវីរុសកូវីដ១៩ មានចំនួន១.១៤០នាក់ រីឯវត្ថុសំណាកនៅសល់ចំនួន២៣នាក់ នឹងត្រូវវិភាគបន្តដោយវិទ្យាស្ថានប៉ាស្ទ័រកម្ពុជា នៅថ្ងៃទី១០ ខែវិច្ឆិកានេះ៕SRP

ខេត្តសៀមរាប៖អាជ្ញាធរស្រុកជីក្រែងបានឲ្យដឹងថាបុរសម្នាក់ដើរឆ្លងថ្នល់ ត្រូវបានរថយន្តមួយគ្រឿង បានបុកចំពេញទំហឹងបណ្ដាលឲ្យស្លាប់ភ្លាមៗ។

ហេតុការណ៍បានកើតឡើងនៅវេលាម៉ោង១៨និង៣៥នាទីថ្ងៃទី០៩ខែវិច្ឆិកាឆ្នាំ២០២០ លើផ្លូវជាតិលេខ០៦ចំណុចភូមិពោធិ៍សិរី ឃុំកំពង់ក្តី ស្រុកជីក្រែង ខេត្តសៀមរាប។

អាជ្ញាធរបានរាយការណ៍ថាករណី នេះ រវាងរថយន្តម៉ាកសាំយ៉ុង ពណ៌សំបកឪឡឹក ពាក់ស្លាកលេខភ្នំពេញ២AU៣៧៩៨ មានទិសដៅពីលិចទៅកើត បុកចំ ជនរងគ្រោះខណ: កំពុងដើរឆ្លងថ្នល់ ពីត្បូង ទៅជើងបណ្តាលអោយស្លាប់តែម្ដង។

ជនរងគ្រោះមានឈ្មោះ សួង បញ្ញា ភេទប្រុសអាយុ៣១ឆ្នាំមានទីលំនៅភូមិពោធិ៍សិរី ឃុំកំពង់ក្តី ស្រុកជីក្រែង ខេត្តសៀមរាប។ ចំណែកអ្នកបើកបររថយន្តក្រោយកើតហេតុបានចុះរត់គេចខ្លួនបាត់បន្សល់ទុកតែរថយន្ត។

អាជ្ញាធរបានបញ្ជាក់ថាកំពុងកំពុងស្រាវជ្រាវរកអ្នកបើកបរយកមកអនុវត្តតាមផ្លូវច្បាប់។ សូមបញ្ជាក់ថារថយន្តបង្កខាងលើសមត្ថកិច្ចបានយកទៅរក្សាទុកនៅអធិការ នគរបាលស្រុកជីក្រែង ដើម្បីអនុវត្តតាមនិតិវិធី។

ទោះយ៉ាងណា សមត្ថកិច្ចស្រុកជីក្រែង នៅពុំទាន់បង្ហាញជាក់លាក់ អំពីមូលហេតុជុំវិញគ្រោះថ្នាក់ចរាចណ៍ នេះនៅឡើយទេ ដោយទំនាក់ទំនងតាមទូរស័ព្ទ មិនមានអ្នកទទួល៕SRP

ខេត្តបាត់ដំបង៖មន្ត្រីខេត្តបាត់ដំបង បានឲ្យដឹងថាក្រោយពីបានទទួលសេចក្តីណែនាំពីក្រសួងសុខាភិបាល និងក្រសួងទេសចរណ៍ ព្រមទាំងបទបញ្ជាផ្ទាល់ពី អភិបាលខេត្ត នៅយប់ថ្ងៃទី០៩ ខែវិច្ឆិកា ឆ្នាំ២០២០នេះ ក្រុមការងារអធិការកិច្ចមន្ទីរបន្តចុះត្រួតពិនិត្យ និងផ្សព្វផ្សាយលិខិតលេខ២២៣ សខល ចុះថ្ងៃទី០៨ ខែវិច្ឆិកា ឆ្នាំ២០២០ របស់ក្រសួងសុខាភិបាល ស្តីពីការបិទ KTV ក្លិបកំសាន្ត រោងភាពយន្ត និងសារមន្ទីរនៅទូទាំងប្រទេស ក្នុងស្ថានភាពជំងឺកូវីដ១៩កំពុងរីករាលដាលជាសាកល។

គួរបញ្ជាក់ដែរថា តាមបណ្ដាមូលដ្ឋានអាជីវកម្ម សេវាកម្មទេសចរណ៍ ដែលពាក់ព័ន្ធក្រុមការងារ ក៏បានរំលឹក បន្ថែមដល់ម្ចាស់អាជីវកម្ម ទាំងនោះ ដាច់ខាត មិនត្រូវប្រើប្រាស់ បន្ទប់ខារ៉ាអូខេ ឬបន្ទប់ វីអាយភី ឬទីតាំងអគារបិទជិត និងប្រើប្រាស់ ម៉ាស៊ីនត្រជាក់ តែអាចដំណើរការជាភោជនីយដ្ឋាន នៅក្រៅបន្ទប់ ឬអគារបិទជិតបាន ហើយត្រូវអនុវត្តអោយបានម៉ឺងម៉ាត់ តាមវិធានសុវត្ថិភាពទេសចរណ៍ ដូចជាពាក់ម៉ាស់ វាស់កម្តៅ បាញ់អាល់កុល និងរក្សាគម្លាត សុវត្ថិភាព ជាដើមផងដែរ៕SRPដោយប៊ុន ថេត

ភ្នំពេញ៖សម្ដេចតេជោហ៊ុន សែននាយករដ្ឋមន្ត្រី នៅរសៀលថ្ងៃនេះបានសរសេរ សំណេរ នៅលើទំព័រផេកហ្វេសប៊ុក របស់សម្ដេច ថា៖
ថ្ងៃនេះ៩ វិច្ឆិកា ២០២០ ក្រុមគ្រូពេទ្យបានយកសំណាកខ្ញុំនិងភរិយាព្រមទាំងអ្នកនៅជាមួយនិងអ្នកនៅជាប់ខ្ញុំទាំងអស់ទៅធ្វើតេស្តជាលើកទី២។

លទ្ធផលគឺអវិជ្ជមានទាំងអស់ គឺជាលទ្ធផលល្អសម្រាប់ដំណាក់កាលទី២ក្នុងចំណោម៤ដំណាក់កាល។ ខ្ញុំត្រូវធ្វើចត្តាឡីស័កបន្តទៀតនឹងរង់ចាំការធ្វើតេស្តជាលើកទី៣នៅថ្ងៃទី១៤ វិច្ឆិកា និងលើកទី៤នៅថ្ងៃទី១៨វិច្ឆិកា។

ខ្ញុំកំពុងរង់ចាំលទ្ធផលនៃការធ្វើតេស្តបងប្អូនជិត ៩០០ នាក់ផ្សេងទៀតដែលបានប៉ះពាល់ដោយផ្ទាល់ឬដោយប្រយោលពីព្រឹត្តិការដែលខ្ញុំសូមដាក់ឈ្មោះថា(ព្រឹត្តិការ៣វិច្ឆិកា)។

ព្រឹត្តិការ(៣វិច្ឆិកា)នឹងត្រូវបិទបញ្ចប់នៅក្រោយពេលដែលមនុស្សប្រមាណ៩០០នាក់ដឹងថាវិជ្ជមានឬ អវិជ្ជមានដែលត្រូវការពេលប្រមាណ៣សប្តាហ៍ទៀត។ ដើម្បីកំរិតកុំអោយមនុស្សកើនឡើង តម្រូវអោយអ្នកដែលបាននិងកំពុងធ្វើចត្តាឡីស័កកុំចេញទៅជួបជាមួយមនុស្សផ្សេងទៀត។ ប្រសិនជួបជាមួយអ្នកណាត្រូវយកអ្នកនោះមកធ្វើតេស្តនិងធ្វើចត្តាឡីស័កថែមទៀតដែលនឹងធ្វើអោយកាន់តែលំបាកប្រើពេលកាន់តែយូរមនុស្សកាន់តែច្រើន។

ដើម្បីបញ្ជៀសករណីដូចដែលខ្ញុំលើកឡើងខាងលើ ខ្ញុំសុំចេញបទបញ្ជាអោយក្រសួងសុខាភិបាល អាជ្ញាធររាជធានីភ្នំពេញ និងខេត្តកណ្តាលពិនិត្យតាមដានគ្រប់មនុស្សដែលបាននិងកំពុងធ្វើចត្តាឡីស័ក ប្រសិនពួកគាត់អនុវត្តន៍មិនបានត្រឹមត្រូវក្នុងការធ្វើចត្តាឡីស័កតាមផ្ទះទេ សូមអញ្ជើញពួកគាត់ទៅធ្វើចត្តាឡីស័កតាមទីកន្លែងដែលរៀបចំដោយក្រសួងសុខាភិបាល ដោយមានការយាមកាមពីកម្លាំងនគរបាលឬកងរាជអាវុធហត្ថអោយបានហ្មត់ចត់។

នេះគឺជាគន្លឹះក្នុងការឈានទៅបញ្ចប់ព្រឹត្តិការ៣វិច្ឆិកាអោយបានឆាប់តាមរយៈកុំអោយកើនចំនួនមនុស្សពាក់ព័ន្ធដែលនាំដល់អូសពេលវេលាកាន់តែវែង។ សូមកុំអោយកំទេចភ្លើងក្លាយជាអគ្គីភ័យតាមរយៈការធ្វេសប្រហែសរបស់យើង សូមជួយពន្លត់ភ្លើង និង សុំកុំអង្គុយបក់ផ្សែង។

ព្រឹត្តិការ៣វិច្ឆិកានឹងបញ្ចប់ក្នុងខែវិច្ឆកានេះ ដែលមិនត្រូវពន្យាពេល។ សូមជូនពរបងប្អូនជនរួមជាតិឃ្លាតឆ្ងាយពីកូវីត១៩៕SRP

ខេត្តសៀមរាប៖ប្រជាកសិករដែលទទួលរងគ្រោះ ដោយទឹកជំនន់ទឹកភ្លៀង ចំនួន១០០គ្រួសារ មកពី ឃុំ ចំនួន ០៣ គឺឃុំកំពង់ថ្កូវ ឃុំតាអាន និងឃុំចន្លាសដៃ ដោ០១គ្រួសារ ទទួល បាន ស្រូវពូជចំនួន ១០០គីឡូក្រាម ។

ការទទួលបាននេះនាថ្ងៃទី០៩ ខែវិច្ឆិកា ឆ្នាំ២០២០ នៅបរិវេណសាលាឃុំកំពង់ថ្កូវ ស្រុកក្រឡាញ់ ខេត្តសៀមរាប ក្រោមវត្តមាន លោក នាក់ ណេរ៉ុន អភិបាលរងខេត្ត។

លោកស្រី ម៉មនី រង្សុី អភិបាលស្រុកក្រឡាញ់ បានបញ្ជាក់ថាទំហំនៃការខូចខាត ដោយគ្រោះធម្មជាតិដោយសារទឹកជំនន់ទឹកភ្លៀងនៅស្រុកក្រឡាញ់ លេីផ្ទៃដីបង្កបង្កើនផលស្រូវរដូវវស្សាឆ្នាំ២០២០ និងបង្កការខូចខាតដំណាំស្រូវរបស់ ពលរដ្ឋជាច្រេីនហិកតា។

សូមបញ្ជាក់ថា គណៈកម្មាធិការ គ្រប់គ្រង គ្រោះមហន្តរាយ ខេត្ត បានទទួលស្រូវពូជចំនួន ៨០.៥តោន ពីគណៈ កម្មាធិការ ជាតិ គ្រប់គ្រង គ្រោះមហន្តរាយ ហេីយនេះជាលេីកទី៦ សម្រាប់ ការចែកពូជស្រូវជូនបងប្អូនប្រជាកសិករក្នងខេត្ត បន្ទាប់ពីបានចែកជូនបងប្អូនប្រជាកសិករ នៅស្រុកជីក្រែង ចំនួន ១២តោន សូទ្រនិគម ១២តោន ប្រាសាទបាគងង ១១ តោន ពួក ២០តោន ក្រុងសៀមរាប ១៥.៥តោន ៕SRP

ខេត្តកំពង់ចាម៖រដ្ឋបាលខត្តកំពង់ចាម​ នាព្រឹក​ថ្ងៃ​ទី​៩​ ខែវិច្ឆិកា​ ឆ្នាំ​២០២០​នេះ​ បានប្រារព្ធ​ពិធី​រំលឹកខួបលើកទី៦៧​ ថ្ងៃ​បុណ្យឯករាជជាតិ៩ វិច្ឆិកា ឆ្នាំ​១៩៥៣-៩ វិច្ឆិកា ឆ្នាំ២០២០​ និង​អបអរ​សាទរ​​ខួប​អនុស្សាវរីយ៍​លើក​ទី​៦៧​ នៃទិវា​កំណើត​កងយោធពល​ខេ​ម​ភូមិន្ទ​ បន្ទាប់​ពី​កម្ពុជា​ទទួលបានឯករាជ្យពេញបរិបូរពី​អាណានិគម​បារាំង នៅឆ្នាំ១៩៥៣​ ។

ពិធី​នេះ​ត្រូវ​បាន​រៀបចំ​ឡើង​នៅ​សួនច្បារ​មុខ​សាលា​ខេត្ត​ ក្រោម​វត្តមាន លោកអ៊ុន ចាន់ដា​ អភិបាល ខេត្តកំពង់ចាម ដោយមានការអញ្ជើញចូលរួមពី​លោក​ លោកស្រី​ មាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំមន្ទីរ អង្គភាពជុំវិញខេត្ត កងកម្លាំងប្រដាប់អាវុធ មន្ត្រីរាជការ​ សិស្ស​និស្សិត​ និង​បងប្អូន​ប្រជាពលរដ្ឋ​ជាច្រើន​រូប​។

លោក​​ អ៊ុន​ ចាន់ដា​ បានអានសន្ទរកថាស្តីពីព្រះរាជប្រវត្តិសង្ខេប ព្រះរាជបូជនីកិច្ច ទាមទារឯករាជ្យនៅកម្ពុជា ដែល​ជា​ការ​រំលឹកដល់ស្នាព្រះហស្ថនៃអង្គព្រះមហាវីរក្សត្រដ៏ឆ្នើមរបស់កម្ពុជា គឺព្រះកុរណា ព្រះបាទសម្តេច ព្រះនរោត្តម សីហនុ ព្រះបរមរតនកោដ្ឋ និងជាព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ដែលព្រះអង្គបានលះបង់ព្រះកាយពល និងព្រះបញ្ញាញាណ ធ្វើការតស៊ូទាមទារឯករាជ្យខ្មែរពីអាណានិគមនិយមបារាំង រហូតទទួលបានជោគជ័យយ៉ាងត្រចះត្រចង់ នៅថ្ងៃទី០៩ ខែវិច្ឆិកា ឆ្នាំ១៩៥៣​ វីរៈភាពដ៏អង់អាចក្លាហាននេះគឺជាគំរូដ៏ល្អដល់កូនខ្មែរ ជំនាន់ក្រោយ ក្នុងការកសាងការពារបូរណភាព និងអភិវឌ្ឍន៍ប្រទេសជាតិ​ឲ្យ​កាន់តែមានភាពរីកចម្រើនទៅថ្ងៃអនាគត​។ ដោយ​ទិវាខួបកំណើតកងយោធពលខេមរភូមិន្ទនាពេលនេះ បានឆ្លុះបញ្ចាំង ពីជោគជ័យក្នុងកម្លាំងមហាសាមគ្គី របស់ប្រជាជាតិខ្មែរយើងទាំងមូល ដែលបានឆ្លងកាត់ដំណាក់កាលមួយ ទៅដំណាក់កាលមួយ​ ប្រកបដោយភាពបត់បែន នៃដំណើរប្រវត្តិសាស្ត្រដ៏ស្មុគស្មាញជាច្រើន ជាពិសេស ឆ្លងកាត់រយៈពេល៦៧ឆ្នាំកន្លងមក រហូតដល់បច្ចុប្បន្ននេះ គឹនៅតែរក្សាបាននូវអត្តសញ្ញាណជាកម្លាំងប្រដាប់អាវុធ របស់ជាតិកម្ពុជា​ ជាកងយោធពលខេមរភូមិន្ទដ៏អង់អាចក្លាហាន ដែលប្រសូត្រចេញពីប្រជាជន ដើម្បីប្រជាជន ដែលជា​ការតស៊ូដ៏ត្រឹមត្រូវរបស់ប្រជាជន ដើម្បីបម្រើឧត្តមប្រយោជន៍ប្រទេសជាតិ ផងដែរ​៕SRP

ខេត្តព្រៃវែង៖អាជ្ញាធរខេត្តព្រៃវែង រួមជាមួយនឹងមន្ទីរអង្គភាពអាជ្ញាធរពាក់ព័ន្ធ កងកំលាំងទាំងបី អាជ្ញាធរក្រុងស្រុកទាំង ១៣ សិស្សានុសិស្ស បងប្អូនប្រជាពលរដ្ឋ ទូទាំងខេត្ត បានរៀបចំប្រារព្ធខួបអនុស្សាវរីយ៍លើកទី៦៧ នៃទិវា បុណ្យឯករាជជាតិ ៩ វិច្ឆិកា និងទិវាកំណើតនៃកងយោធពលខេមរភូមិន្ទ ឆ្នាំ២០២០ ក្រោមអធិបតីភាព លោក ស្បោង សារ៉ាត់ ប្រធានក្រុមប្រឹក្សាខេត្ត និងលោក សួន សុម៉ាលីន អភិបាលរងខេត្ត។ ពិធីនេះធ្វើនៅសាលាខេត្តព្រៃវែងនៅថ្ងៃទី ០៩ ខែវិច្ឆិកា ឆ្នាំ២០២០។

លោកស្បោង សារ៉ាត់ ប្រធានក្រុមប្រឹក្សាខេត្ត មានប្រសាសន៍លើកឡើងថា ថ្ងៃនេះគឺជាទិវាបុណ្យឯករាជ្យជាតិ (០៩ វិច្ឆិកា ១៩៥៣-០៩ វិច្ឆិកា ២០២០) ដែលប្រជាជាតិកម្ពុជាទាំងមូល បានរំដោះខ្លួនទាំងស្រុងចេញពីអាណានិគមន៍បារាំង ក្រោមព្រះរាជបូជនីយកិច្ចដឹកនាំ ដ៏ក្លៀវខ្លារបស់ព្រះមហាវីរក្សត្រខ្មែរ ព្រះបរមរតនកោដ្ឋ ព្រះករុណា ព្រះបាទសម្តេច នរោត្តមសីហនុ។ ប្រទេសបារាំង បានដាក់អាណានិគមន៍លើដែនដីសុវណ្ណភូមិកម្ពុជាយើង អស់រយៈពេលជិតមួយសតវត្សរ៍ (១១ សីហា ១៨៦៣ -៩ វិច្ឆិកា ១៩៥៣)។ ការដាក់អាណានិគមន៍របស់បារាំងលើដែនដីកម្ពុជា ក៏ដូចជា បណ្តាប្រទេសមួយចំនួនទៀតក្នុងតំបន់អាស៊ី។

ប្រធានក្រុមប្រឹក្សា បានបន្តទៀតថា៖ នេះគឺជាទិវាប្រវត្តិសាស្ត្រដ៏ថ្លៃថ្លា របស់ប្រជាជាតិខ្មែរ ដើម្បីរំលឹកគុណូបការៈ ដ៏ខ្ពង់ខ្ពស់បំផុត ជូនចំពោះព្រះវិញ្ញាណខ័ន្តព្រះបរមរតនកោដ្ឋ ដែលបានដឹកនាំទាមទារឯករាជ្យ ពីអាណានិគមនិយមបារាំង និងរំលឹកគុណដល់វីរៈកុលបុត្រកុលធីតា កងកម្លាំងប្រដាប់អាវុធ នៃកងយោធពលខេមរភូមិន្ទ នៅគ្រប់ជំនាន់ ដោយបានឆ្លងកាត់នូវគ្រប់ដំណាក់កាលធំៗជាប្រវត្តិសាស្ត្ររបស់ប្រទេសជាតិ រួមមានការ តស៊ូដណ្តើមឯករាជ្យ ការពុះពារ ឆ្លងកាត់ដំណាក់កាលនៃសង្គ្រាម និងរបបប្រល័យពូជសាស្រ្ត ប៉ុល ពត ជាពិសេសលើមូលដ្ឋាន នៃជ័យជម្នះថ្ងៃ០៧ មករា ឆ្នាំ១៩៧៩ ដែលបានកសាងនូវអ្វីៗគ្រប់យ៉ាង ដូចបច្ចុប្បន្ននេះ។

ប្រធានក្រុមប្រឹក្សា បានបន្ថែមទៀតថា ដូច្នេះដើម្បីបន្តនូវគំរូវីរភាព ដ៏ឧត្តុងឧត្តមថ្លៃថ្លានេះ សូមកម្លាំងប្រដាប់អាវុធទាំងអស់ ជាពិសេសកងយោធពលខេមរភូមិន្ទ សូមបន្តការពារមាតុភូមិ ការពារសន្តិសុខសណ្តាប់ធ្នាប់ ថែរក្សារាល់សមិទ្ធផល របស់ជាតិឲ្យគង់វង្សស្ថិតស្ថេរ រួមចំណែក កសាង អភិវឌ្ឍន៍ប្រទេសជាតិឲ្យបានរីកចម្រើនរុងរឿង ក្នុងឯករាជ្យ សន្តិភាព ស្ថិរភាព និងរួបរួមក្នុងមហាសាមគ្គីជាតិដ៏ទូលំទូលាយ ដោយគ្មានការកើតឡើងជាថ្មីទៀត នូវសង្គ្រាមសោកនាដកម្ម និងគ្រោះមហន្តរាយដូចអតីតកាល។

ប្រធានក្រុមប្រឹក្សា រួមជាមួយរដ្ឋបាលខេត្ត មន្ទីរអង្គភាពអាជ្ញាធរពាក់ព័ន្ធ កងកំលាំងទាំងបី អាជ្ញាធរក្រុងស្រុកទាំង ១៣ សិស្សានុសិស្ស បងប្អូនប្រជាពលរដ្ឋទូទាំងខេត្តព្រៃវែង សូមសម្ដែងនូវកត្តញ្ញូតាធម៌នឹងដឹងគុណយ៉ាងជ្រាលជ្រៅបំផុតថ្វាយ ព្រះករុណាព្រះបាទសម្ដេចព្រះ នរោត្ដម សីហនុ អតីតព្រះមហាវីរៈក្សត្រ ព្រះវរៈរាជបិតាឯករាជ្យជាតិ បូរណភាពទឹកដី នឹងឯកភាពជាតិខ្មែរ ព្រះបរមរតនកោដ្ឋ ដែលព្រះអង្គបានបូជាព្រះកាយពល និងព្រះបញ្ញញា្ញណជំនះគ្រប់ឧបសគ្គ ដើម្បីនាំមកនូវសន្តិភាព ផ្សះផ្សាជាតិ ភាពចម្រុងចម្រើន និងកិត្តិយសដល់មាតុភូមិកម្ពុជា និងប្រជារាស្រ្ត៕SRP

ខេត្តសៀមរាប៖សមត្ថកិច្ចបានឲ្យដឹងថាមានករណី អំពេីមនុស្សឃាត (យកកាំបិតអារក) កូន អាយុ៣ឆ្នាំ បណ្តាលអោយស្លាប់។

ហេតុការណ៍បានកើតឡើង
នៅថ្ងៃទី 09ខែវិច្ឆិកា ឆ្នាំ2020 វេលាម៉ោង 1.00នាទីយប់ នៅក្នុង បន្ទប់ផ្ទះជួល ម្តុំខាងក្រោយសាលារៀន បន្ទាយចាស់ ស្ថិតភូមិចុងកៅស៊ូ សង្កាត់ស្លក្រាម ក្រុងសៀមរាប។

ជនដៃដល់ឈ្មោះ ខឿន វីឡា ភេទប្រុស អាយុ 28ឆ្នាំ មុខរបរកម្មករសំណង់ មានស្រុកកំណេីត ភូមិជ្រៃធំ ឃំុជ្រៃធំ ស្រុកខ្សាច់កណ្តាល ខេត្តកណ្តាល បានយកកាំបិត បុ័ងតោ អារក កូនពីខាងក្រោយ បណ្តាលអោយស្លាប់ ក្រោយពេលបញ្ជូន ទៅដល់មន្ទីរពេទ្យគន្ឋបុប្ផា (ជនសង្ស័យត្រូវជាឪពុកចុង)។
ជនរងគ្រោះឈ្មោះ ឌឿ សុបញ្ញា ភេទប្រុស អាយុ៣ឆ្នាំ , ម្តាយឈ្មោះ ឌឿ សុផា ភេទស្រីអាយុ 21ឆ្នាំ មុខរបរលក់ដូរ ស្នាក់ផ្ទះជួល កន្លែងកេីតហេតុ។
ជនសង្ស័យ ត្រូវកំលាំងប៉ុស្ដិ៍ ឃាត់ខ្លួនបាន យកមកសាកសួរនតែពុំទាន់ យកចំលេីយបានទេ ព្រោះឆ្លេីយវង្វេងវង្វាន់មិនដឹងខុសត្រូវ គឺបែកថ្នាំញៀន បានធ្វេីតេស គឺវិជ្ជមាន។
មូលហេតុ ពេលប្រពន្ឋកំពុងបោកខោអាវ ស្រាប់តែឮសំឡេងកូនស្រែក ពេលស្ទុះមកមេីល ក៏ឃេីញ ប្តីកំពុងកាន់កាំបិតអារក កូនដែលដេកផ្កាប់មុខនៅលេីគ្រែ ហេីយស្រែកអោយគេជួយ និង យកកូនទៅពេទ្យ។ ចំណែកជនសង្ស័យជិះកង់គេចខ្លួន ក្រោយមកសមត្ថកិច្ចប៉ុស្ដិ៍ចាប់បានមកវិញ។
ការឃាត់ខ្លួនេះជនដៃដល់ករណីនេះ មានការចូលរួម សហការ ពីលោកមេភូមិ ប្រជាការពារ ភូមិចុងកៅស៊ូ នឹង ភូមិធ្លកអណ្ដូង ផងដែរ៕SRP