ក្នុងកិច្ចប្រជុំគណៈបញ្ជាការឯកភាពរបស់រដ្ឋបាលខេត្តបាត់ដំបង ប្រចាំខែវិច្ឆិកា ឆ្នាំ២០២៣ នៅថ្ងៃអង្គារ បានថ្លែងថារដ្ឋបាលបាត់ដំបង នឹងធ្វើការរៀបចំការដាក់តាំងបង្ហាញម្ហូបអាហារអ្នកបាត់ដំបង រយៈពេល៣ថ្ងៃ គឺនៅថ្ងៃទី២៩-៣០-៣១ ខែធ្នូ ឆ្នាំ២០២៣ ដើម្បីអបអរសាទរ ខេត្តបាត់ដំបង បានជាប់ជាខេត្តមានការច្នៃប្រតិដ្ឋលើផ្នែកម្ហូបអាហាររបស់អង្គការUNESCO នាពេលកន្លងទៅថ្មីៗ និងដើម្បីអបអរសាទរពិធីបុណ្យឆ្លងឆ្នាំសកលឆ្នាំ២០២៤នាពេលខាងមុខដ៏ខ្លីនេះ ផងដែរ។

ឯកឧត្តមក៏បានអំពាវនាវ ដល់ប្រជាពលរដ្ឋ នាំយកផលិលតផលម្ហូបអាហាររបស់ខ្លួន ចូលរួមក្នុងការដាក់តាំងពិព័រណនេះ ឱ្យបានច្រើនកុះករ និងកាន់តែផុសផុលថែមទៀត ដើម្បីលើកកម្ពស់ ម្ហូបអាហារអ្នកបាត់ដំបង ឱ្យកាន់តែមានភាពល្បីល្បាញ សាកសមជាមួយនឹងខេត្ត ដែលទើបតែជាប់ក្នុងបញ្ជី ការច្នៃប្រតិដ្ឋលើផ្នែកម្ហូបអាហាររបស់អង្គការUNESCO។

ឯកឧត្តម បានមានប្រសាសន៍បន្តទៀតថា រដ្ឋបាលខេត្តបាត់ដំបង នឹងរៀបចំធ្វើពិធីដាល់អំបុក និងអកអំបុក នៅឯបរិវេណសួនសម្ដេចក្រឡាហោម វិមានឯករាជ្យ ដើម្បីអបអរសាទរក្នុងឱកាសពិធីព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ ដោយរដ្ឋបាលខេត្ត នឹងជ្រើសរើសថ្ងៃទី២៧ ខែវិច្ឆិកា ឆ្នាំ២០២៣នេះ ដូចនេះសូមមន្រ្ដីរាជការ ប្រជាពលរដ្ឋ ចូលរួមឱ្យបានច្រើនកុះករ ដើម្បីចូលរួមរក្សាអត្តសញ្ញាណ ពិធីដាល់អំបុក និងអកអំបុកនេះ ដល់កូនចៅជំនាន់ក្រោយបានស្គាល់អំពីទំនៀមទម្លាប់ដ៏ល្អផូរផង់របស់យើង។

នៅសាលប្រជុំអគារE សាលាខេត្តបាត់ដំបង ឯកឧត្តម សុខ លូ អភិបាលខេត្តបាត់ដំបង និងជាប្រធានគណៈបញ្ជាការឯកភាពរដ្ឋបាលខេត្ត បានមានប្រសាសន៍ថ្លែងដល់រដ្ឋបាលក្រុងស្រុក អាជ្ញាធរ មន្ទីរអង្គភាព កងកម្លាំងប្រដាប់អាវុធទាំងអស់ ត្រូវខិតខំបន្តនិរន្ដរភាពការងារនេះឱ្យកាន់តែល្អប្រសើរបន្ថែមទៀត ដោយមិនត្រូវដកដៃថយក្រោយឡើយ ពោលគឺត្រូវខិតខំយ៉ាងណា ឱ្យបាននូវលទ្ធផលការងារកាន់តែមានការរីកចម្រើនជាលំដាប់។

ឯកឧត្តមបានបន្តទៀតថា បញ្ហាគ្រឿងញៀននូវតែបញ្ហាចម្បងដែលយើងត្រូវបន្តយកចិត្តទុកដាក់ ដូចនេះត្រូវខិតខំស្រាវជ្រាវបង្រ្កាបឱ្យកាន់តែមានប្រសិទ្ធភាពខ្ពស់ជាងមុននូវអ្នកប្រើប្រាស់ និងជួញដូរគ្រឿងញៀនដែលមាននៅក្នុងមូលដ្ឋានរបស់ខ្លួន ហើយជាពិសេសត្រូវពិនិត្យមើលកងកម្លាំងរបស់ខ្លួន ព្រោះកងកម្លាំងគឺជាគំរូមុនគេ ប្រសិនបើរកឃើញថាមានពាក់ព័ន្ធនឹងគ្រឿងញៀន ត្រូវចាត់វិធានការទៅតាមច្បាប់វិន័យរបស់កងកម្លាំង៕SRP

ខេត្តសៀមរាប៖យ៉ាងហោចណាស់មនុស្សម្នាក់បានស្លាប់និងម្នាក់ទៀតបានរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍។

សមត្ថកិច្ចស្រុកអង្គរជុំបានប្រាប់ថា ហេតុការណ៍បានកើតឡើង នៅវេលាម៉ោង២០និង១០នាទី ថ្ងៃទី​២០ ខែវិច្ឆិកា ឆ្នាំ​២០២៣ នៅចំណុចផ្លូវកោង​ ស្ថិតក្នុងភូមិប្រាសាទត្រាវ ឃុំ​គោកដូង ស្រុក​អង្គរជុំ។

សមត្ថកិច្ចបានបន្តថា គ្រោះថ្នាក់ចរាចរ​ណ៍នេះរវាងម៉ូតូនឹង​គោយន្ត​កន្ត្រៃ (​ម៉ាស៊ិនបោកស្រូវ) បើកបរ​បញ្ច្រាស់ទិសគ្នា។ ម៉ូតូម៉ាកហុងដាឌ្រីម ពណ៌ខ្មៅ​ ឆ្នាំ​២០២២ ពាក់ស្លាកលេខសៀមរាប 1AO-3599 បើកបរ​ដោយឈ្មោះ ស៊ាវ ឈាង ភេទប្រុស​ អាយុ២០ឆ្នាំ មុខរបរ​ កសិករ​ រស់នៅ​ភូមិ​គោកល្ពោត ឃុំ​វ៉ារិន ស្រុកវ៉ារិន គ្មានមួក​សុវត្ថិភាព​ (ស្លាប់) អ្នករួមដំណើរជាមួយឈ្មោះ សៅ សាប ភេទប្រុស​ អាយុ២១ឆ្នាំ មុខរបរ​ កសិករ​ រស់នៅ​ភូមិឃុំជាមួយគ្នា គ្មានមួក​សុវត្ថិភាព​(របួសធ្ងន់​ បាក់ភ្លៅឆ្វេង) បើកបរ​ពី​កើតទៅលិច បានបុក​ជាមួយគោយន្តកន្ត្រៃ ម៉ាកគូបូតាRT140 ពណ៌​ក្រហម សណ្ដោង​រម៉ក​បោកស្រូវ​ ពណ៌​ខៀវ។

សមត្ថកិច្ចបានបញ្ជាក់ថា អ្នកបើកបរក៏យើងតន្ត្រៃ
ឈ្មោះ រ៉ាន ភេទប្រុស អាយុ៣៤ឆ្នាំ មុខរបរ​ កសិករ រស់នៅភូមិប្រាសាទត្រាវ ឃុំ​គោកដូង ស្រុក​អង្គរជុំ (រត់គេចខ្លួន) បើកបរ​ពី​លិចទៅកើត​(ឆ្លងផ្លូវ)។ វត្ថុតាង​ត្រូវបានសមត្ថកិច្ច យកទៅក្សាទុកនៅ​អធិការដ្ឋាន​នគរបាល​ស្រុក​អង្គរជុំ៕

សម្តេចធិបតីនាយករដ្ឋមន្ត្រី ហ៊ុន ម៉ាណែត បានមានប្រសាសន៍ថា ឆ្នាំនេះ ស្រូវមានតម្លៃល្អ បើប្រៀបធៀបជាមួយឆ្នាំមុន ដែលមានតម្លៃចាប់ពី ១០០០រៀល ទៅ ១៣០០រៀល ខណៈតម្លៃជី និងសម្ភារៈកសិកម្មមួយចំនួនមានការធ្លាក់ចុះ។ សម្តេចក៏បានមានប្រសាសន៍ថ្លែងអំណរគុណដល់មន្រ្ដីពាក់ព័ន្ធទាំងអស់ ជាពិសេសគណៈកម្មាធិការជាតិគ្រប់គ្រងគ្រោះមហន្តរាយ ក្រសួងកសិកម្ម ដែលបានជួយផ្ដល់ពូជស្រូវដល់ប្រជាពលរដ្ឋ បានទាន់ពេលវេលា ក្រោយពីទឹកជំនន់បានស្រកចុះនាពេលកន្លងមក ធ្វើឱ្យប្រជាពលរដ្ឋរងគ្រោះទាំងអស់នោះអាចបង្កង្កើតផលស្រូវបានទាន់ពេលវេលាឡើងវិញ។ សម្តេចធិបតី ក៏បានជំរុញឱ្យផ្នែកពាក់ព័ន្ធសហការគ្នាចូលរួមអភិវឌ្ឍ និងលើកកម្ពស់លើវិស័យកសិកម្មផ្ទៃក្នុងកម្ពុជា ដើម្បីឈានទៅប្រកួតប្រជែងនៅកម្រិតតំបន់ និងពិភពលោកនាពេលខាងមុខ។

សម្តេចធិបតី ហ៊ុន ម៉ាណែត មានប្រសាសន៍យ៉ាងដូច្នេះ ក្នុងឱកាស អញ្ជើញប្រកាសដាក់ឱ្យអនុវត្តកម្មវិធី​នយោបាយអាទិភាពទី៥ និងទី៦ ពាក់ព័ន្ធវិស័យកសិកម្ម នៅថ្ងៃចន្ទនេះ។

សម្ដេចហ៊ុន ម៉ាណែត បានមានប្រសាសន៍ថា អំឡុងពេលដែលពិភពលោកកំពុងប្រឈមនឹងវិបត្តិស្បៀងអាហារនោះ គឺកម្ពុជាមិនត្រឹមតែធានាបាននូវសន្តិសុខស្បៀង សម្រាប់ប្រទេសខ្លួនប៉ុណ្ណោះនោះទេ ប៉ុន្តែក៏បានសល់ ផលកសិកម្ម និងបាននាំចេញជាង៦លានតោនក្នុងរយៈពេល ១០ខែ នៃឆ្នាំ២០២៣ នេះថែមទៀត។ សម្ដេចធិបតីនាយករដ្ឋមន្ត្រីបានមានប្រសាសន៍ទៀតថា កម្មវិធីគោលនយោបាយអាទិភាពទី៥ និងទី៦ របស់រាជរដ្ឋាភិបាល អាណត្តិទី៧បាន បញ្ជាក់ឱ្យឃើញថា កម្ពុជាយើងមិនដើរចេញពីវិស័យកសិកម្មនោះទេ តែយើងនឹងពង្រឹងបន្ថែម និងជួយបន្ថែមទៀតទៅដល់កសិករយើង។

សម្តេចធិបតី ហ៊ុន ម៉ាណែត មានប្រសាសន៍ថា បច្ចុប្បន្នប្រជាពលរដ្ឋកម្ពុជា នៅរាជធានីភ្នំពេញ និងតាមទីក្រុងភាគច្រើន នាំគ្នាទិញផលិតផល ចំណីអាហារ តាមប្រព័ន្ធឌីជីថល អនឡាញ ដែលនេះជាមូលហេតុពលរដ្ឋមិនសូវទៅផ្សារដោយផ្ទាល់ដូចមុននោះទេ។ សម្ដេចធិបតីនាយករដ្ឋមន្ត្រី ក៏បានរម្លឹកឱ្យដឹងថា នៅក្នុងការធ្វើពាណិជ្ជកម្ម ក្នុងពិភពលោកបច្ចុប្បន្ន ត្រូវគោរពតាមច្បាប់ស្ដីពីការប្រកួតប្រជែងក្នុងទីផ្សារសេរី ហេតុនេះ យើងត្រូវធ្វើយ៉ាងណាកុំឱ្យប៉ះពាល់ដល់ស្មារតីប្រកួតប្រជែងក្នុងទីផ្សារសេរី ដែលនាំឱ្យបាត់ទីផ្សារ។ រដ្ឋាភិបាលកម្ពុជាតិ មិនមែនចេះតែអន្តរាគមន៍គ្រប់រឿងបាននោះទេ ព្រោះវាប៉ះពាល់ដល់ច្បាប់ នៃការប្រកួតប្រជែងក្នុងទីផ្សារសេរី។

សម្ដេចធិបតី បានបន្តទៀតថា គោលដៅរបស់រដ្ឋាភិបាល បានកំណត់ថា កសិកម្មមិនមែនផ្ដោតតែទៅលើការដាំដុះដំណាំ និងចិញ្ចឹមសត្វប៉ុណ្ណោះនោះទេ ប៉ុន្តែវាផ្ដោតសំខាន់លើការដាំដុះដំណាំ និងចិញ្ចឹមសត្វអោយបានផលកាន់តែច្រើនស្របតាមទីតាំងភូមិសាស្ត្រ និងតម្រូវការទីផ្សារជាតិ និងអន្តរជាតិ។ សម្តេចបន្តទៀតថា រាជរដ្ឋាភិបាល​ នឹងបន្តខិតខំពង្រីកកសិកម្ម​ជាលក្ខណៈគ្រួសារឲ្យទៅជា​កសិឧស្សាហកម្មអោយបានកាន់ច្រើន។

សម្តេចធិបតីនាយករដ្ឋមន្រ្តី បានថ្លែងថា គោលការណ៍រដ្ឋ​ប្រកាស​ប្រឡងជ្រើសរើសឲ្យបម្រើការនៅតាមឃុំ-សង្កាត់ លើជំនាញកសិកម្មត្រឹមចំនួន ២៥០នាក់ តែបេក្ខជនបានដាក់ឈ្មោះប្រឡងរហូតដល់ជិត១ម៉ឺននាក់ ​ប៉ុន្តែទោះជាយ៉ាងណា​ការប្រឡងនេះ​ត្រូវប្រកាន់ជំហរនូវ តម្លាភាព យុត្តិធម៌ និង​សុក្រឹត្យភាព ​ពោលគឺអ្នកជាប់ប្រកបដោយមោទនៈ ដោយ​អ្នកធ្លាក់ឲ្យគេអស់ចិត្ត។

សម្តេចធិបតី ហ៊ុន ម៉ាណែត បានបន្ថែមថា ​ការប្រឡងជ្រើសរើសន្ត្រីជំនាញកសិកម្មនៅតាមឃុំ-សង្កាត់នាពេលខាងមុខនេះ ត្រូវតែប្រព្រឹត្តទៅប្រកបដោយគុណភាព​ខ្ពស់ត្រូវផ្ដល់លទ្ធភាព​ដល់​អ្នកដែលមានឆន្ទៈខ្ពស់ពិតប្រាកដលើកិច្ចការនេះ ដោយការធ្វើការមិនត្រឹមតែចង់បាន​ប្រាក់​ខែនោះទេ គឺត្រូវបម្រើ ​ដល់ប្រជាកសិករប្រកបដោយឆន្ទៈ​មុះមុត និងមានការជឿជាក់​ពីប្រជាកសិករ។

បញ្ជាក់កម្មវិធីនយោបាយទាំងពីរនោះមាន៣កម្មវិធី រួមមាន៖ ទី១) កម្មវិធីគោលនយោបាយ​លើកស្ទួយ​ផលិត​​កម្មកសិកម្ម រកទីផ្សារ និងរក្សាលំនឹងថ្លៃកសិផលតាមរយៈកម្មវិធី​ហិរញ្ញ​ប្ប​ទាន​, ទី២) កម្មវិធីគោលនយោបាយការដាក់ពង្រាយមន្ត្រី​កសិកម្មនៅតាម​ឃុំ-សង្កាត់ និងទី៣) កម្មវិធីគោលនយោបាយការអភិវឌ្ឍសហគមន៍​កសិកម្ម​ទំនើប៕

ខេត្តសៀមរាប៖មនុស្សចំនួន៣នាក់បានរងរបួសធ្ងន់ស្រាលក្នុងហេតុការណ៍គ្រោះថ្នាក់ចរាចណ៍រវាងម៉ូតូនិងម៉ូតូ។ ហេតុការណ៍បានកើតឡើងនៅថ្ងៃទីថ្ងៃទី ២០ ខែវិច្ឆិកា  ឆ្នាំ២០២៣ វេលាម៉ោង ៦ និង ៣០នាទី ព្រឹកនៅលើផ្លូវជាតិលេខ៦ ត្រង់ចំណុចចន្លោះបង្គោលគីឡូម៉ែត្រ លេខ ៣៦៦ និង ៣៦៧ ខាងកើតក្បាលស្ពានតាប៉ុន ស្ថិតនៅភូមិកំពង់ថ្កូវ២ឃុំកំពង់ថ្កូវ ស្រុកក្រឡាញ់ ខេត្តសៀមរាប។

សមត្ថកិច្ចស្រុកក្រឡាញ់បានឲ្យដឹងថាគ្រោះថ្នាក់ចរាចណ៍នេះម៉ូតូមួយគ្រឿងម៉ាក HONDA DREAM ពណ៌ខ្មៅ ពាក់ផ្លាកលេខ បន្ទាយមានជ័យ 1W .9895  បើកបរដោយឈ្មោះ ដាំ ស្រីល័ក្ខ ភេទស្រីអាយុ៣៣ឆ្នាំ រស់ នៅភូមិតាប៉ុន ឃុំទឹកជ្ជោ ស្រុកព្រះនេត្រព្រះ ខេត្បន្ទាយមានជ័យ បានដឹកអ្នករួមដំណើរ០១នាក់ពីក្រោយ ឈ្មោះ ជាវ សន្និកា ភេទស្រី អាយុ២៦ ឆ្នាំ រស់នៅភូមិជាមួយគ្នា បើកបរក្នុងទិសដៅពីកើត ទៅលិច(ពាក់មួកសុវត្ថិភាពទាំងពីរនាក់) បានបុកម៉ូតូមួយគ្រឿង HONDA ZOOM ERX ពណ៌ស ពាក់ផ្លាកលេខ 1X.7428 បើកបរ ដោយឈ្មោះ មិត្ត រើន ភេទប្រុសអាយុ៥៤ឆ្នាំ រស់នៅភូមិក្រឡាញ់ ឃុំក្រឡាញ់  ស្រុកក្រឡាញ់ ខេត្តសៀមរាប។ (អត់ពាក់មួកសុវត្ថិភាព) បើកបរឆ្លងថ្នល់ពីជើងទៅត្បូង។

សមត្ថកិច្ចបន្តថាក្នុងហេតុការណ៍នេះបណ្តាលអោយ១/អ្នកបើកបរ ម៉ូតូ ឈ្មោះ ដាំ ស្រីល័ក្ខ ភេទស្រីរងរបួសធ្ងន់បែកក្បាលឆ្វេងនិង ចុកទ្រូង

២/ឈ្មោះ ជាវ សន្និកា ភេទស្រី របួសស្រាល

៣/ ឈ្មោះ មិត្ត រើន ភេទប្រុស រងរបួសធ្ងន់ បាក់ស្នងជើងស្តាំ

៤/រងការខួចខាតម៉ូតូធ្ងន់ ០១គ្រឿងនិងស្រាល០១គ្រឿង

មូលហេតុ គ្រោះថ្នាក់បណ្តាលមកពីអ្នកបើកបរម៉ូតូម៉ាកHONDA DREAM ពាក់ផ្លាកលេខបន្ទាយមានជ័យ 1W9895 បើកបរពីទិសខាងកើតទៅទិសខាងលិច មានល្បឿនលឿននិងអ្នកបើកបរម៉ូតូម៉ាក HONDA ZOOMERX ពណ៍ស ពាក់ផ្លាកលេខ សៀមរាប 1X 7428 បើកបរឆ្លងថ្នល់ខ្វះការប្រុងប្រយ័ត្ន។កម្លាំងជំនាញបានចុះដល់និងបានបញ្ជូនជនរងគ្រោះទៅពេទ្យ និងពិនិត្យវាស់វែងកន្លែងកើតហេតុនិងចាប់យកវត្ថុតាងយកទៅរក្សាទុកនៅអធិការដ្ឋាននគរបាលស្រុកដើម្បីចាត់ការតាមនិតិវិធីច្បាប់៕

ខេត្តសៀមរាប៖យុវជនម្នាក់បានស្លាប់ភ្លាមៗខណ:បើកម៉ូតូទៅបុកម៉ូតូរ៉ឺម៉ក លក់នំរ៉ូទី។

ហេតុការណ៍បានកើតឡើង នៅវេលាម៉ោង ២១និង៤០នាទី ថ្ងៃទី១៨ ខែវិច្ឆិកា ឆ្នាំ២០២៣ នៅចំណុច​ ​ខាងកើតផ្សារមេម៉ាយ ១០០ម៉ែត្រ ស្ថិតនៅភូមិវាល សង្កាត់ជ្រាវ ក្រុងសៀមរាប​ លើផ្លូវ​ ពីរប៉ុស្តិ៍ជ្រាវ ទៅផ្សារមេម៉ាយ។

សមត្ថកិច្ចបានប្រាប់ថា គ្រោះថ្នាក់​ចរាចរណ៍នេះ រវាងម៉ូតូ និងម៉ូតូរុឺម៉ក លក់នំរ៉ូទី។ ម៉ូតូម៉ាកហុងដាពណ៌ ខ្មៅ ពាក់ផ្លាកលេខ 1G-1345 សៀមរាប បើកបរដោយឈ្មោះហុិន ហុង ភេទប្រុស អាយុ ២៤ ឆ្នាំ រស់នៅភូមិខ្នារ សង្កាត់ជ្រាវ ក្រុងសៀមរាប (ទិសដៅពីលិចទៅកើត)។

ចំណែកម៉ូតូរ៉ឺម៉ក លក់នំរ៉ូទី បើកបរចេញពីកន្លែងកើតហេតុ  មិនស្គាល់អត្តសញ្ញាណ (ទិសដៅពីកើតទៅលិច)។

សមត្ថកិច្ចបន្តថាហេតុការណ៍នេះបណ្តាលឲ អ្នកបើកបរម៉ូតូ1G1345 សៀមរាប (ស្លាប់)ម៉ូតូខូចខាត( ស្រាល)។

តាមសន្និដ្ឋាន​របស់សមត្ថកិច្ចអ្នកបើកបរម៉ូតូឌ្រីម អាចបើកបរក្នុងល្បឿនលឿន ខ្វះការប្រុងប្រយ័ត្ន។ សមត្ថកិច្ចបានចុះវាស់វែងនិង​បញ្ជូនយកវត្ថុតាងទៅការិយាល័យនគរបាលចរាចរណ៍ផ្លូវគោក៕

រថយន្តចំនួនពីរគ្រឿងបានបុកគ្នាទាំងកំរោល បណ្ដាលឲ្យមនុស្សម្នាក់រងបួស។

ហេតុការណ៍បានកើតឡើងវេលាម៉ោងប្រមាណ១២ ថ្ងៃទី១៨ ខែវិច្ឆិកា ឆ្នាំ២០២៣ នៅលេីកំណាត់ផ្លូវជាតិលេខ៥ ស្ថិតក្នុងភូមិថ្មី ឃុំផ្សារ ស្រុកបរិបូណ៍ ខេត្តកំពង់ឆ្នាំង។

សមត្ថកិច្ចបានប្រាប់ថា គ្រោះថ្នាក់ចរាចរណ៍ នេះ រវាងរថយន្តម៉ាកសុីណា ពណ៌ស ពាក់ស្លាកលេខ ភ្នំពេញ-2AW.8767 អ្នកបើកបរឈ្មោះ សាន្ត គឹមសុង ភេទប្រុស អាយុ៣៥ឆ្នាំ រស់នៅភូមិត្រពាំងប្រលិត ឃុំសន្តិភាព ស្រុកសំពៅលូន ខេត្តបាត់ដំបង បេីកបរពីលិចទៅកើត បានបុកនឹងរថយន្ត១គ្រឿងទៀត ម៉ាកឡង់គ្រីស័រ ពណ៌សំបកឪឡឹក ពាក់ស្លាកលេខ ភ្នំពេញ-2P.3389 អ្នកបើកបរឈ្មោះ សូ លីអាន ភេទប្រុស អាយុ៦៣ឆ្នាំ រស់នៅភូមិកណ្តាល សង្កាត់កំពង់ឆ្នាំង ក្រុង ខេត្តកំពង់ឆ្នាំង (ក្នុងដំណើរខ្វែងទិសគ្នា) បណ្តាលអោយរងរបួមនុស្សម្នាក់(ស្រាល)។

សមត្ថកិច្ចបន្តថាករណីនេះមូលហេតុ បើកបរក្នុងល្បឿនលឿនខ្វះការប្រុងប្រយ័ត្ន៕

អ្នកភូមិចំនួនពីរភូមិ គឺនៅភូមិចាន់គីរី និង ភូមិទទួលប្រាសាទ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយុំមានជ័យ បានដាក់ពាក្យបណ្តឹងចូលទៅឯកឧត្តម ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សុំកិច្ចអនត្តរាគមន៍ទៅលោក អ៊ុ រាត្រី អភិបាលខេត្តបន្ទាយមានជ័យ និងលោក ង៉ោ ម៉េងជ្រួន អភិបាលរងខេត្តបន្ទាយមានជ័យ ចំពោះការមិនយកចិត្តទុកដាក់ក្នុងការដោះស្រាយបញ្ហាជូនប្រជាពលរដ្ឋ។

យោងតាមពាក្យបណ្តឹងរបស់ប្រជាពលរដ្ឋ ជាច្រើនគ្រួសារ ដាក់គោរពចូលទៅ ឯកឧត្តម ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី១៧ ខែវិច្ឆិកា ឆ្នាំ២០២៣ បានរៀបរាប់ថា៖ «សូមអានពាក្យបណ្តឹងរបស់ប្រជាពលរដ្ឋ»

ភ្នំពេញ៖សម្តេចធិបតី ហ៊ុន ម៉ាណែត បានលើកឡើងថា ក្នុងបរិបទដែលសង្គមកម្ពុជាកាន់តែអភិវឌ្ឍ និងកាន់តែទំនើប, ការលើកកម្ពស់វិធាននៃការរស់នៅស្របតាមដំបូន្មាន នៃសាសនា គឺពិតជាសំខាន់ និងចាំបាច់ ហើយគុណតម្លៃនៃការទូន្មានរបស់ព្រះសង្ឃ នឹងរួមចំណែកដ៏សំខាន់ចំពោះការសម្រេចវត្ថុបំណងនេះ។

អញ្ជើញក្នុងពិធីស្រោចស្រពព្រះសុគន្ធវារីប្រគេនព្រះមន្រ្តីសង្ឃជាន់ខ្ពស់ គណៈមហានិកាយ នៃព្រះរាជាណាចក្រកម្ពុជា នៅវត្តមុនីសុវណ្ណ (ហៅវត្តចំពុះក្អែក) ក្នុងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ នៅថ្ងៃទី១៧ ខែវិច្ឆិកា ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានលើកទ្បើងនូវទឡ្ហីករណ៍ ៣ ចំណុច ដែលឆ្លុះបញ្ចាំងឱ្យឃើញអំពីការរីកចម្រើន ក៏ដូចជាការយកចិត្តទុកដាក់របស់រាជរដ្ឋាភិបាលចំពោះព្រះពុទ្ធសាសនា និងភាពសុដុមរមនាជាមួយនឹងសាសនាដទៃទៀត ដែលមានដូចជា៖

(ទី១) យុទ្ធសាស្រ្តបញ្ចកោណ-ដំណាក់កាលទី ១ របស់រាជរដ្ឋាភិបាល នីតិកាលទី៧ នៃរដ្ឋសភា បានផ្តោតសំខាន់ទៅលើមនុស្ស ជាមុំមួយក្នុងចំណោមមុំនៃបញ្ចកោណទាំង៥ គឺការពង្រឹងភាពជាពលរដ្ឋក្នុងសង្គម ដែលមានអារ្យធម៌ខ្ពស់ប្រកបដោយសីលធម៌, សមធម៌ និងបរិយាបន្ន ព្រមទាំងការទទួលខុសត្រូវខ្ពស់ប្រកបដោយមនសិការស្នេហាជាតិ និងភក្តីភាពចំពោះអត្តសញ្ញាណនៃភាពជាខ្មែរ ។ កិច្ចការដ៏សំខាន់នេះអាចសម្រេចទៅបាន លុះត្រាតែមានការអប់រំទូន្មានតាមបែបសាសនា ជាពិសេស ការជំរុញការរស់នៅតាមពុទ្ធោវាទនៃព្រះពុទ្ធសាសនា។ នៅក្នុងបរិបទដែលសង្គមកម្ពុជាកាន់តែអភិវឌ្ឍ និងកាន់តែទំនើប, ការលើកកម្ពស់វិធាននៃការរស់នៅស្របតាមដំបូន្មាន នៃសាសនា គឺពិតជាសំខាន់ និងចាំបាច់ ហើយគុណតម្លៃនៃការទូន្មានរបស់ព្រះសង្ឃ នឹងរួមចំណែកដ៏សំខាន់ចំពោះការសម្រេចវត្ថុបំណងនេះ។

(ទី២) ការចូលរួមយ៉ាងកុះកររបស់ប្រជាជនកម្ពុជា ក្នុងការលើកស្ទួយព្រះពុទ្ធសាសនា និងសាសនាដទៃទៀត ជាតឹកតាងមិនអាចខ្វះបាននៃការបន្តគោរពជំនឿសាសនាយ៉ាងមោះមុតរបស់ប្រជាជនកម្ពុជា បើទោះជាសាសនាធ្លាប់ត្រូវបានលុបបំបាត់ ក្នុងរបបប្រល័យពូជសាសន៍ប៉ុលពតក៏ដោយ ។ ជាក់ស្តែង, បើប្រៀបធៀបជាមួយនឹងពេលរបបប៉ុលពត ដែលពេលនោះវត្តអារាមត្រូវបានបិទទាំងស្រុងនៅទូទាំងប្រទេស, បច្ចុប្បន្ន យើងមានវត្តអារាមសរុបចំនួន ៥១៣៣ វត្ត, មានព្រះសង្ឃចំនួន ៦៨ ៩៦៧ អង្គ, និងថែមទាំងមានវិហារនៃសាសនាឥស្លាម និងសាសនាគ្រិស្ត ជាច្រើនទៀត នៅទូទាំងព្រះរាជាណាចក្រកម្ពុជា។ សមិទ្ធផលទាំងនេះ ដែលភាគច្រើនបានមកពីការរួមជាវិភាគទាន របស់ប្រជាជនកម្ពុជាផ្ទាល់ ហើយទាំងនេះ គឺបានបង្ហាញយ៉ាងច្បាស់អំពីទំនាក់ទំនងមិនអាចកាត់ផ្តាច់បានរវាងផ្នែកអាណាចក្រ និងសាសនាចក្រ។

(ទី៣) ទោះបីជាព្រះពុទ្ធសាសនា ជាសាសនារបស់រដ្ឋ, សិទ្ធិសេរីភាពនៃការគោរពជំនឿសាសនាត្រូវបានធានាដោយរដ្ឋធម្មនុញ្ញ ហើយប្រជាពលរដ្ឋគ្រប់រូបមានសិទ្ធិពេញលេញ ក្នុងការគោរពប្រតិបត្តិសាសនាផ្សេងៗ ដោយគ្មានការរើសអើងឡើយ។ រហូតមកដល់ពេលនេះ, នៅក្នុងប្រទេសកម្ពុជាយើង គ្មានប្រជាពលរដ្ឋណាម្នាក់ ត្រូវបានធ្វើទុក្ខបុកម្នេញដោយសារតែការគោរពជំនឿសាសនារបស់ពួកគេនោះទេ។ ផ្ទុយទៅវិញ, ការគោរព និងការប្រតិបត្តិជំនឿសាសនាផ្សេងៗគ្នារបស់ប្រជាពលរដ្ឋកម្ពុជាគ្រប់ៗរូប ត្រូវបានធានាការពារនៅក្នុងលក្ខខណ្ឌដែលមិនធ្វើឱ្យប៉ះពាល់ដល់ជំនឿ ឬសាសនាដទៃ ក៏ដូចជាដល់សណ្តាប់ធ្នាប់សង្គម និងសន្តិសុខសាធារណៈ ។ យើងអាចនិយាយបានថា មិនមានជម្លោះសាសនានៅកម្ពុជាទេ ។ នេះជាតថភាពមួយដែលយើងគួរមានមោទនភាព ព្រោះមានប្រទេសជាច្រើន ដែលមិនអាចធានាបាននូវសុខដុមនីយកម្មសាសនាបាន ដែលពេលខ្លះបានបង្កជាជម្លោះបែកបាក់រវាងប្រជាជន នៅក្នុងសហគមន៍សាសនាខុសៗគ្នាទៀតផង៕