សម្តេចតេជោ ហ៊ុន សែននាយករដ្ឋមន្ត្រីកម្ពុជាបានបញ្ជាក់ថា សម្តេចគ្មានសិទ្ធិដើម្បីប្រគល់ដីឱ្យវៀតណាមសូម្បីមួយមីលីម៉ែត្រ ហើយក៏មិនចង់បានដីវៀតណាមសូម្បី១មីលីម៉ែត្រ ដែរ សូមឱ្យតែការដោះស្រាយត្រឹមត្រូវតាមផែនទីតាំងពីអាណានិគមបារាំងទៅបានហើយ។

ថ្លែងក្នុងខួបលើកទី ៤៥ទិវានៃការចងចាំដំណើរឆ្ពោះទៅកាន់ការផ្តួលរំលំនៃរបបប្រល័យពូជសាសន៍ប៉ុលពត និងសម្ពោធសមិទ្ធផលនានា នៅឃុំទន្លូង ស្រុកមេមត់ ខេត្តត្បូងឃ្មុំ នៅថ្ងៃទី២០ ខែមិថុនា ឆ្នាំ២០២២ សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា បានមានប្រសាសន៍ថា៖ អ្នកដែលបានចោទប្រកាន់មកលើសម្ដេចថា ប្រសិនបើសម្ដេចចង់ប្រគល់ដីខ្មែរឱ្យ វៀតណាម មិនចាំបាច់ចរចាជជែក ជាមួយវៀតណាម ដល់ទៅជាង៤០ឆ្នាំនេះឡើយ។

សម្តេចតេជោបានបន្តថា៖ ការចោទប្រកាន់ទាំងនោះថា ជារឿងអយុត្តិធម៌បំផុត មកលើ
សម្ដេច និងថ្នាក់ដឹកនាំផ្សេងទៀតដែលបាននិងកំពុងខិតខំចរចាយ៉ាងលំបាក ទម្រាំរកបានភាពត្រឹមត្រូវចំពោះបញ្ហាព្រំដែននេះ។

សម្តេចតេជោ បានបញ្ជាក់ថា ប្រទេសកម្ពុជា មានសុខសន្តិភាពរយៈពេល៤៣ ឆ្នាំហើយ ក្រោមការដឹកនាំរបស់គណបក្សប្រជាជនកម្ពុជា ក្នុងនោះភាគីកម្ពុជាបានធ្វើកិច្ចការដោះស្រាយបញ្ហាព្រំដែនជាមួយវៀត ណាម ដែលភាគីទាំងពីរបានចុះហត្ថលេខាទទួលយក ៨៤ភាគរយនៃខ្សែបន្ទាត់ព្រំដែនកម្ពុជា-វៀតណាម ហើយត្រូវបានបោះបង្គោលរួចរាល់។

សម្ដេហ៊ុន សែន បន្តថា៖ «ខ្ញុំសូមបញ្ជាក់នៅទីនេះ ចំពោះមុខ ប្រជាពលរដ្ឋ កម្ពុជា កំពុងធ្វើការផ្សាយផ្ទាល់ ក្នុងប្រទេសនិងក្រៅប្រទេស គ្រប់ស្ថានីយ៍ទូរទស្សន៍ទាំងអស់ កំពុងផ្សាយ បញ្ជាក់ជូនចំពោះមុខនាយករដ្ឋមន្ត្រីវៀតណាម នៅទីនេះ ខ្ញុំគ្មានសិទ្ធិ ដើម្បីប្រគល់ដី ឱ្យវៀតណាម សូម្បី១មីលីម៉ែត្រ ហើយខ្ញុំក៏មិនចង់បានដីវៀតណាម សូម្បី១មីលីម៉ែត្រ សុំឱ្យតែត្រូវតាមក្បួនខ្នាត ដែលអាណានិគមបារាំងបានបន្សល់ទុក ខ្ញុំអត់ត្រូវការអីទេ។ ហើយវៀតណាម ក៏មិនត្រូវការយកដីយើង ឯយើងក៏មិនត្រូវការយកដីវៀតណាមដែរ មិនថាតែជាមួយវៀតណាម នោះទេ ជាព្រះរាជាណាចក្រថៃ ជាមួយឡាវ ខ្ញុំសូមបញ្ជាក់នៅទីនេះ ឱ្យបានច្បាស់បន្តិច ក្រោយពេលអនុវត្តន៍ដោយជោគជ័យ នូវនយោបាយឈ្នះៗ។ ខ្ញុំបានដាក់ចេញនៅទិសដៅចំនួន២ គោលដៅទី១ ប្រែក្លាយតំបន់អតីតសមរភូមិ ទាំងអស់ឱ្យក្លាយទៅជាតំបន់ អភិវឌ្ឍន៍និងទីផ្សារ ឥឡូវតំបន់នេះគ្មានមីនទៀតទេ គ្មានការវាយគ្នាទៀតទេ គោលដៅទី២ប្រែក្លាយខ្សែព្រំដែនជាមួយប្រទេសជិតខាងទាំងអស់ ឱ្យទៅជាព្រំដែន សន្តិភាពមិត្តភាព សហប្រតិបត្តិការនិងការអភិវឌ្ឍន៍»៕SRP

ភ្នំពេញ៖កញ្ញា ឈឹម ស៊ីថរ មេដឹកនាំសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ បានចេញមុខបានដឹកនាំអតីត បុគ្គលិក ក្រុមហ៊ុនណាហ្គាវើលដ៍ ដាក់ញ្ញត្តិសុំអន្តរាគមន៍ ទៅសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា នៅព្រឹកថ្ងៃទី២០ ខែមិថុនា ឆ្នាំ២០២២។ បន្ទាប់ពីដាក់ញ្ញត្តិជូនខុទ្ទកាល័យសម្តេចនាយករដ្ឋមន្ត្រីរួច បានបន្តដាក់ញ្ញត្តិជូនសម្តេចអគ្គមហាពញាចក្រី ហេង សំរិន ប្រធានរដ្ឋសភាផងដែរ។

កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ បានបញ្ជាក់ថា ការដាក់ញ្ញត្តិជូនសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា គឺដើម្បីស្នើសុំជួយអន្តរាគមន៍ ដោះស្រាយវិវាទ ការងារនៅក្រុមហ៊ុនណាហ្គាវើលដ៍ ដោយការទទួលយកបុគ្គលិក ដែលនៅសេសសល់ ត្រឡប់ចូលធ្វើការវិញ ជាមួយប្រាក់រំលឹក ការទូទាត់សំណងឲ្យបានត្រឹមត្រូវតាមច្បាប់ស្តតីពីការងារ និងទម្លាក់ចោលការចោទប្រកាន់លើថ្នាក់ដឹកនាំសហជីព និងសកម្មជនសហជីព ទាំង ១៥រូប៕SRP

ខេត្តត្បូងឃ្មុំ៖ក្នុងឱកាសអញ្ជើញជាអធិបតី ខួបលើកទី៤៥នៃទិវាការចងចាំដំណើរឆ្ពោះទៅកាន់ការផ្ដួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧ – ២០ មិថុនា ២០២២) និង សម្ពោធសមិទ្ធផលនានានៅតំបន់ប្រវត្តិសាស្ត្រយោធាតេជោកោះថ្ម X16  ស្ថិតនៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ ចន្ទថ្ងៃទី២០ ខែមិថុនា ឆ្នាំ២០២២នេះ សម្តេចតេជោ ហ៊ុន សែន បានបញ្ជាក់ថា សន្តិភាព បានកើតឡើងរយៈពេលជាង ៤៣ឆ្នាំមកហើយ ក្រោមការដឹកនាំរបស់គណបក្សប្រជាជនកម្ពុជា។

សម្ដេចហ៊ុន សែន បន្តថា រយៈពេល ៤៣ឆ្នាំមកនេះ កម្ពុជាបានធ្វើកិច្ចការជាច្រើនជាមួយវៀតណាម ក្នុងនោះសម្រេចការបោះបង្គោលព្រំដែន ៨៤ភាគរយ ខណៈដែលចំណុចសេសសល់ ១៦ភាគរយទៀត កំពុងដំណើរការជាបន្តបន្ទាប់ ដោយឈរលើទស្សនវិស័យព្រំដែនសន្តិភាព មិត្តភាព និងកិច្ចសហប្រតិបត្តិការជាមួយប្រទេសជិតខាង។

សម្តេចតេជោ ហ៊ុន សែន បានប្រកាសថា៖ មិនមែនតែបូរណភាពទឹកដីកម្ពុជា ជាមួយ​ប្រទេសវៀតណាម​នោះទេ ជាមួយប្រទេសក្បែរខាងផ្សេងទៀត ក៏មិនឱ្យមាន​ការបាត់បង់​ទឹកដីដូចគ្នា សូមប្រជាពលរដ្ឋស្ងប់ចិត្ត និងទុកចិត្តលើការដឹកនាំរបស់សម្តេច និងគណបក្សប្រជាជនកម្ពុជា៕SRP

ខេត្តត្បូងឃ្មុំ៖សម្តេចហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី២០ ខែមិថុនា ឆ្នាំ២០២២ បានសម្រក់ទឹកភ្នែក និងអួលដើម.ក ខណៈ ដែលសម្តេចបានរំលឹកអំពីប្រវត្តិសាស្រ្ត ទៅកាន់ប្រទេសវៀណាម កាលពី៤៥ ឆ្នាំមុន ដើម្បីស្នើសុំកងកម្លាំងវៀតណាមមកជួយ រំដោះប្រទេសកម្ពុជាចេញពីរបបប្រល័យពូជសាសន៍ប៉ុល ពត។

សម្តេចតេជោ ហ៊ុនសែន មានប្រសាសន៍ថា, ថ្ងៃនេះ កាលពី៤៥ ឆ្នាំមុន សម្តេចបានចាកចេញពីទឹកដីកំណើត ឃ្លាតឆ្ងាយ ពី ក្រុមគ្រួសារ ជាពិសេសពីកូនប្រុស ដែលមិនទាន់បានកើតនៅឡើយ ដើម្បីគោលដៅដ៏សំខាន់មួយ គឺការស្វែងរកការរំដោះជាតិមាតុភូមិ។

សម្តេចតេជោ ហ៊ុនសែន ថ្លែងបន្តថា, ទោះជាស្ថិតនៅក្នុងស្បៃអន្ធការ នៃសោកនាដកម្ម និងអំពើឃោឃៅ ជាច្រើនដែល សម្តេចតេជោ បានឆ្លងកាត់ក្នុងពេលនោះ តែសម្តេច បានជម្នះឧបសគ្គទាំងអស់បាន ហើយងើបឡើងតស៊ូដើម្បីបុព្វហេតុតែមួយគត់គឺជាតិ មាតុភូមិ និងប្រជាជន។

កិច្ចខិតខំប្រឹងប្រែងរបស់សម្តេចត្រូវបានតបស្នងមកវិញ តាមរយៈការប្រកៀកស្មារប្រយុទ្ធជាមួយបណ្តាយុទ្ធមិត្តជាច្រើនរូបទៀត ហើយប្រែក្លាយសមរភូមិទៅជាជ័យជម្នះដ៏ត្រចះត្រចង់លើរបបយង់ឃ្នង់ នាថ្ងៃ ០៧ មករា ១៩៧៩។

សូមបញ្ជាក់ថា, សម្តេចមានប្រសាសន៍បែបនេះ ខណៈ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង លោក នាយករដ្ឋមន្ត្រីវៀតណាម អញ្ជើញជាអធិបតី ខួបលើកទី៤៥នៃទិវាការចងចាំដំណើរឆ្ពោះទៅកាន់ការផ្ដួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧ – ២០ មិថុនា ២០២២) និង សម្ពោធសមិទ្ធផលនានានៅតំបន់ប្រវត្តិសាស្ត្រយោធាតេជោកោះថ្ម X16  ស្ថិតនៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ នៅព្រឹកថ្ងៃចន្ទ ៦រោច ខែជេស្ឋ ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី២០ ខែមិថុនា ឆ្នាំ២០២២៕SRP

ខេត្តសៀមរាប៖គ្រោះថ្នាក់ចរាចណ៍មួយបានបង្កឱ្យមានសោកនាដ្ឋកម្ម ស្លាប់មនុស្សម្នាក់ភ្លាមៗនិងនារីអ្នករួមដំណើររងរបួសធ្ងន់។

របាយការរបស់ការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប ដែលអង្គភាពសៀមរាបប៉ុស្ដិ៍ទើបទទួលបាននៅរសៀលថ្ងៃនេះ បានឱ្យដឹងថា គ្រោះថ្នាក់ចរាចរណ៍ នេះបានកើតឡើងនៅថ្ងៃទី១៩ ខែមិថុនា ២០២២ វេលាម៉ោង៣ និង៣៥នាទី ចំណុចរង្វង់មូលព្រះបាទជ័យវរ័ន្មទី៧ ស្ថិតនៅភូមិថ្នល់ សង្កាត់ ស្រង៉ែ ក្រុងសៀមរាប ខេត្តសៀមរាប ផ្លូវជាតិលេខ៦ ត្រង់ចន្លោះបង្គោលគីឡូម៉ែត្រលេខ ៣១៧-៣១៨។

របាយការណ៍បន្តថាហេតុការណ៍នេះ កើតឡើងរវាងរថយន្ត និងរង្វង់មូល។ រថយន្តម៉ាក TOYOTA PRUIS ពណ៌ស ពាក់ផ្លាកលេខ ភ្នំពេញ​ 2AZ.8122 អ្នកបើកបរឈ្មោះ ទី សុធា ភេទ ប្រុស អាយុ ៣៧ឆ្នាំ រស់នៅភូមិបឹង សង្កាត់ជ្រាវ ក្រុងសៀមរាប ខេត្តសៀមរាប (ស្លាប់) និងមានអ្នករួមដំណើរ ម្នាក់ឈ្មោះ យី សុឃីម ភេទស្រី អាយុ២៨ឆ្នាំ ទីកន្លែងកំណើតភូមិចេក ឃុំកំពង់ចិនជើង ស្រុកស្ទោង ខេត្តកំពង់ធំ បច្ចុប្បន្នស្នាក់នៅបន្ទប់ជួល ភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប របួសធ្ងន់បញ្ជូនទៅសង្គ្រោះនៅមន្ទីរពេទ្យកាល់ម៉ែត្រ ទិសដៅពីកើត ទៅលិច បានបុកខឿនចែកទ្រូងផ្លូវ បន្ទាប់មកបុករង្វង់មូល ហើយបានរ៉េ ចង្កូតទៅបុកបង្គោលភ្លើងសញ្ញាចរាចរណ៍​(បង្គោលភ្លេីងស្តុប)ខាងលិច ឈៀងខាងជើង។ ក្នុងនោះខូតខាតរថយន្តធ្ងន់ ១គ្រឿង។ មូលហេតុ អ្នកបើកបររថយន្ត បើកបរក្នុងល្បឿនលឿន។

កម្លាំងជំនាញកំពុងស្រាវជ្រាវ និងកសាងសំណុំរឿងតាម នីតិវិធី ដើម្បីបញ្ជូនទៅតុលាការ។ ចំណែកវត្ថុតាងរក្សាទុកនៅការិយាល័យ នគរបាលចរាចរណ៍ផ្លូវគោក៕SRP

ខេត្តកំពង់ចាម​៖លោក អ៊ុន ចាន់​ដា អភិបាលខេត្តកំពង់ចាម​ នៅថ្ងៃទី​១៧​ ខែមិថុនា​ ឆ្នាំ​២០២២​នេះ​ បាន​ជម្រុញ​ដល់​ក្រុម​ការងារ​បច្ចេកទេស​ ឲ្យ​ពន្លឿន​ ការ​សាងសង់​​ វិមានឯករាជ្យ ធ្វើ​យ៉ាងណា​ ឲ្យបាន​រួចរាល់ មុន​ថ្ងៃទី​៩ វិច្ឆិកា​ ​២០២២​ ខណៈ​ដែល​ការស្ថាបនាសម្រេច​ បាន​ប្រមាណ​ជាង​៥០%ហេីយ។

លោក អ៊ុន ចាន់​ដា បាន​ថ្លែង​ថា ការរៀបចំ​សាងសង់​ វិមានឯករាជ្យ​ ស្ថិត​នៅក្នុង ភូមិ​ទី​៦ សង្កាត់​វាលវង់ ក្រុង​កំពង់ចាម​ នេះ គឺអាជ្ញាធរខេត្ត​ មានបំណង​ទុកជា​សម្បត្តិ​វប្បធម៌​ទេសចរណ៍​​ ​ប្រវត្តិសាស្ត្រ និងលេីក​កម្ពស់​សោភ័ណ្ឌភាពទីក្រុង​ សំដៅ​ទៅលើ ខួបកំណើត​នៃ​កង​យុទ្ធ​ពល​ខេ​មរ​ភូ​មិន ដែលជា​ស្នាម​ព្រហស្ថ របស់ព្រះ​រម​រតន​កោដ្ឋ ព្រះបាទ ន​រោ​ត្ដម សីហនុ ដែល​ព្រះអង្គ​បាន​ដណ្ដើម​ឯករាជ្យ ពី​អាណានិគម​បារាំង នៅ​ថ្ងៃទី​៩ ខែវិច្ឆិកា ឆ្នាំ១៩៥៣។​

គួរ​​រំលឹកថា ទីតាំង​ដែលលោក​​អភិបាលខេត្ត សម្រេច​សាងសង់​វិមានឯករាជ្យនេះ គឺ​នៅ​ចំណុច​ផ្លូវ​កៅស៊ូ​ មាត់ច្រក​ចូល ទៅ​សាលា​គរុកោសល្យ​ ខេត្តកំពង់ចាម ដោយ​ចំណុច​នេះ លោក​​អភិបាលខេត្ត បាន​ណែនាំ​ឲ្យ​មន្ត្រី​ជំនាញ​ពាក់ព័ន្ធ សាងសង់​ពង្រីក​ផ្លូវជាតិ​ ឲ្យបាន​ធំ​ទូលាយ ចាប់ពី​ចំណុច​នាគព័ន្ធ រហូតមកដល់​ចំណុច​ទន្លេ​អុំ ដើម្បី​បង្កើន​សោភ័ណភាព នៃ​ចំណុច​វិមានឯករាជ្យ ឲ្យ​ក្លាយទៅជា​កន្លែង​ទេសចរណ៍ សម្រាប់​ប្រជាពលរដ្ឋ មក​កម្សាន្ត​ផងដែរ។

គួរ​បញ្ជាក់​ថា​ បន្ទាប់​ពី​បាន​ពិនិត្យ​ការ​សាងសង់​ វិមានឯករាជ្យ​ខាងលើ​រួច​ ​លោកអភិបាលខេត្ត​ ក៏បាន​ដឹកនាំ​ក្រុម​ការងារ​ អញ្ជើញ​ចុះ​ពិនិត្យ​ការដ្ឋានសាងសង់អាគារពហុបំណង សហភាពសហព័ន្ធយុវជនកម្ពុជា ខេត្តកំពង់ចាម ដែលមានទីតាំងស្ថិតនៅក្នុង ភូមិតាណេង សង្កាត់សំបូរមាស ក្រុងកំពង់ចាម ដេីម្បី​ពន្លឿន​ការ​សាងសង់​ឲ្យ​បាន​ឆាប់​រួចរាល់​ផង​ដែរ​៕SRP

ខេត្តកំពង់ចាម​៖លោក​ទេសរដ្ឋមន្ត្រី​ គន់​ គីម​ អនុប្រធាន​ និងជាអគ្គលេខាធិការ​សមាគមអតីតយុទ្ធជនកម្ពុជា​ បានថ្លែងថា គុណចំណាច់​​របស់ អតីតយុទ្ធជន មិនត្រូវបោះបង់ចោលនោះទេ ពោលគឺមានការយកចិត្តទុកដាក់ខ្ពស់បំផុតពី​សំណាក់​ រាជរដ្ឋាភិបាល​ ឲ្យសក្តិសម ទៅនឹងអ្វីដែលបងប្អូនជា អតីតយុទ្ធជន បានលះបង់ពលី ទាំងកំលាំងកាយចឹត្តក្នុងការការពារ បូរណភាពទឹកដី និងប្រជាជនកម្ពុជា។​

ការ​ថ្លែង​បែប​នេះ​ ក្នុង​ឱកាស​ប្រារព្ធ​ទិវាអតីតយុទ្ធជនកម្ពុជា ខួបលើកទី១៥ ថ្ងៃទី២១ ខែមិថុនា ឆ្នាំ​២០២២​ នៅសាលាខេត្តកំពង់ចាម​ នាព្រឹក​មិញនេះ​។

លោក​គន់​ គីម​ តំណាងដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា បានរំលឹកអំពីវីរភាព និងគុណបំណាច់ដ៏ធំធេងរបស់អតីតយុទ្ធជន​ ចំពោះជាតិ​មាតុភូមិ និងប្រជាជនកម្ពុជា ដោយឡែក​ការប្រារព្ធ ទិវាអតីតយុទ្ធជនកម្ពុជា ២១មិថុនា ដែល​បាន​ធ្វើឡើង​ជារៀងរាល់ឆ្នាំ ក្នុងគោលបំណង ផ្សព្វផ្សាយ​ ឲ្យប្រជាជន ទូទាំងប្រទេស បានយល់ដឹងកាន់តែទូលំទូលាយបន្ថែមទៀតអំពីអតីតយុទ្ធជនយេីង​។

លោក​​ អ៊ុន​ ចាន់ដា​ អភិបាលខេត្ត និង​ជា​ប្រធាន​កិត្តិយស​សមាគម​អតីត​យុទ្ធជន​ខេត្តកំពង់ចាម​ បាន​អាន​នូវ​សារលិខិត​របស់​សម្តេចតេជោ ហ៊ុន សែន ដែលបានបានលើកឡើងពីពលិកម្ម ប្រកបដោយស្មារតី ស្នេហាជាតិរបស់ អតីតយុទ្ធជន យុទ្ធនារី និងប្រជាពលរដ្ឋ កម្ពុជា នៅគ្រប់​ដំណាក់កាល​ នៃប្រវត្តិសាស្ត្រ ដែលបានចូលរួមចំណែក យ៉ាងសំខាន់ ក្នុងកិច្ចការពារ បូរណភាពទឹកដី ក្នុងការកសាងសុខសន្តិភាព និងស្ថិរភាពសង្គមសម្រាប់​ ព្រះរាជាណាចក្រកម្ពុជា សំដៅធានា​ឲ្យមានការអភិវឌ្ឍសេដ្ឋកិច្ច និងសង្គម ដើម្បីជាឧត្តមប្រយោជន៍ សម្រាប់ជាតិមាតុភូមិ និងប្រជាជនកម្ពុជា​ ផងដែរ​។

ក្នុង​ឱកាស​ប្រារព្ធ​​ទិវាអតីតយុទ្ធជនកម្ពុជា ខួបលើកទី១៥​នេះដែរ​ បងប្អូនអតីតយុទ្ធជន ដែលចូលរួមក្នុងពិធី ត្រូវបានទទួលការឧបត្ថម្ភ ពីសម្តេចហ៊ុន សែន នាយករដ្ឋមន្ត្រី និង​សម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុន​ សែន​ ផងដែរ​៕SRP

ខេត្តសៀមរាប៖ជាងឡានម្នាក់បានស្លាប់ ដោយសាររថយន្តថយកិន ក្នុងការធ្វេសប្រហែស។

ហេតុការណ៍បានកើតឡើងនៅម៉ោង១៧ និង១៥នាទី ថ្ងៃទី ១៦ ខែមិថុនា ឆ្នាំ២០២២ ស្ថិតភូមិបុស្សក្រឡាញ់ សង្កាត់ជ្រាវ ក្រុងសៀមរាប ខេត្តសៀមរាប។

ជនរងគ្រោះ ឈ្មោះ ផន សុភ័ណ្ឌ ភេទប្រុសអាយុ ៣៨ឆ្នាំ មុខរបរ ជាងជួសជុលរថយន្ត មានទីលំនៅភូមិគោកធ្លក ឃុំកណ្តែក ស្រុកប្រាសាទបាគង ខេត្តសៀមរាប។

របាយការណ៍បានឲ្យដឹងថាតាមការបំភ្លឺរបស់ឈ្មោះ តាំ ម៉ាអាត សើសីម ភេទប្រុស អាយ ១៥ឆ្នាំ មុខរបរលក់នំ បានបំភ្លឺថា៖ នៅថ្ងៃទី ១៦ ខែមិថុនា ឆ្នំា២០២២ វេលាម៉ោង១៦ :៣០នាទី ម្ដាយមីងរបស់ខ្ញុំឈ្មោះ ចែ ទី បានទូរស័ព្ទហៅជាងឡាន (សព ឈ្មោះ ផន សុភ័ណ្ឌ) អោយមកធ្វើឡាននៅផ្ទះរបស់គាត់ ប្រហែលជាម៉ោង១៧ ថ្ងៃទីខែឆ្នាំដដែល។

ជាងឡានក៏មកដល់ ពេលនោះខ្ញុំបាទកំពុងគេងក្នុងឃ្លាំងដាក់ស៊ីម៉ង់នៅក្បែរនោះដែរ ក៏ឮសំលេងម្ដាយមីង របស់ខ្ញុំឈ្មោះ ចែ ទី ស្រែកហៅខ្ញុំថា (សាលីម) បន្ទាប់ពី់សំលេងម្ដាយមីងហៅ ខ្ញុំក៏បានដើរចេញមកក្រៅ ក៏ស្រាប់តែជាងឡាន (សពឈ្មោះ ផន សុភ័ណ្ឌ) បានហៅខ្ញុំអោយមកជួយគាត់។ បន្ទាប់មកខ្ញុំបានដើរទៅកន្លែងជាងធ្វើឡាន ពេលទៅដល់ឡានកំពុងឆេះស្រាប់ (សពឈ្មោះ ផន សុភ័ណ្ឌ ជាអ្នកបញ្ឆេះស្រាប់) រួចគាត់បានអោយខ្ញុំឡើងលើឡាន ហើយគាត់បានប្រាប់អោយខ្ញុំជាអ្នក ប៉ះសេឆ្វេងស្ដាំ ទៅវិញ ទៅមក បន្ទាប់មកគាត់បានចូលទៅក្រោមឡាន រួចគាត់ក៏ស្រែកអោយខ្ញុំ ប៉ះសេឆ្វេង ស្ដាំទៅវិញ ទៅមកទៀត ក៏ស្រាប់តែឡាន កញ្ឆក់ទៅក្រោយហើយគាត់ក៏ស្រែកថា ហេ.ហេ ខ្ញុំក៏បិទសោរឡានទៅ រួចក៏ចុះពីលើឡានក៏ឃើញគាត់ វាចេញពីក្រោមឡាន បន្ទាប់មកអ្នកជិតខាងបានរត់មកមើល ឈូរឆរ ភ្លាមៗនោះ ខ្ញុំបានរត់ទៅរកហែកក្រដាសកេសស្រាប៊ៀរ ហ្គែនស្បឺក ដើម្បីយកមកបក់ខ្យល់អោយគាត់។

បុរសរូបនេះបំភ្លឺបន្តថា ក្រោយពីកើតហេតុ ខ្ញុំមិនច្បាស់ថា​ នណាជាអ្នកហៅ ប្រពន្ធរបស់ជាងឡានទេ តែខ្ញុំបានឃើញប្រពន្ធជាងឡានជិះម៉ូតូឃ្លីកមកដល់ផ្ទះកើតហេតុ ពេលនោះខ្ញុំ ជិះម៉ូតូឃ្លីកជាមួយអ៊ុំប្រុសម្នាក់ទៀត រីឯ ជាងឡាន ត្រូវបានប្រពន្ធអង្គុយអោបពីក្រោយដោយមានមនុស្សប្រុសម្នាក់ទៀត (មិនស្គាល់ឈ្មោះ) ជាអ្នកដឹកទៅពេទ្យ(មន្ទីរពេទ្យនាគទេព)។ នៅមន្ទីរពេទ្យនាគទេព លោកគ្រូពេទ្យ បានប្រាប់ថា ជនរងគ្រោះ បានដាច់ខ្យល់ស្លាប់តំាងពីពាក់កណ្ដាលផ្លូវមុនពេលមកដល់មន្ទីរពេទ្យនាគទេពទៅទៀត។

ក្រោយពីបានទទួលដំណឹងនេះ ក្រុមគ្រួសារនៃសពបានទាក់ទងឡានពេទ្យ របស់មន្ទីរពេទ្យនាគទេព អោយជួយដឹកសពមកផ្ទះគាត់ដែលមានទីតំាងស្ថិតនៅភូមិគោកធ្លក ឃុំកណ្ដែក ស្រុក ប្រាសាទបាគង ខេត្តសៀមរាប។ ចំណែករូបខ្ញុំបានជិះម៉ូតូត្រលប់មកផ្ទះកើតហេតុវិញ ដែលមានទីតំាងស្ថិតនៅភូមិ បុស្សក្រឡាញ់ សង្កាត់ជ្រាវ ក្រុង​សៀមរាប ខេត្ត សៀមរាប។

របាយការណ៍បន្តថាការពិនិត្យស្លាកស្នាម៖ ផ្នែកក្បាល មានស្ថានភាពធម្មតា។ ផ្នែកដងខ្លួន : ត្រង់ឆ្អឹងជំនីចំហៀងពោះខាងស្តាំ មានស្នាមឌ្រុត និងជាំ។ផ្នែកអវះយវះ:ពុំមានស្លាកស្នាមអ្វីពាក់ព័ន្ធបទល្មើសព្រហ្មទ័ណ្ឌនោះទេ។

ការសន្និដ្ឋាន យោងតាមការបំភ្លឺពីសាក្សី និងការពិនិត្យកន្លែងកើតហេតុ ការពិនិត្យសាកសព ជាក់ស្តែង ជនរងគ្រោះស្លាប់ដោយសារ គ្រាំក្នុងខ្លួនធ្ងន់ធ្ងរ។សាកសពបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕SRP

ខេត្តសៀមរាប៖បុរសជនជាតិកូរ៉េម្នាក់បានដេកស្លាប់ដោយសារជំងឺ។ មន្ត្រីដែលបានចុះទៅពិនិត្យកន្លែងកើតហេតុបានឲ្យដឹងថានៅវេលាម៉ោង ១០ ថ្ងៃទី១៥ ខែមិថុនា  ឆ្នាំ ២០២២ នៅចំណុចតូបលក់ដូរខោអាវ  តាមបណ្តោយ  ផ្លូវជាតិលេខ៦  ភូមិសណ្ដាន់ សង្កាត់ទឹកវិល ក្រុងសៀមរាបខេត្តសៀមរាប ជនបរទេសម្នាក់បានស្លាប់។

មន្ត្រីបានបន្តថាជនរងគ្រោះឈ្មោះ  PARK YEONGCHUN ភេទប្រុស  កើតថ្ងៃទី ២០-១២-១៩៥៧  ជនជាតិកូរ៉េ កាន់លិខិតឆ្លងដែនលេខ M០៩៧៨៦៨៩៧ ផុតកំណត់ថ្ងៃទី៣០.jun.២០២៧ មុខរបរគ្មាន។

បើតាមមន្ត្រីបានដកស្រង់សម្ដីពីឈ្មោះហ៊ីង ចន្ថានា  ភេទស្រី អាយុ៤៣ឆ្នាំ ត្រូវជាមិត្តស្រី របស់ជនរងគ្រោះនឹងបានរស់នៅជាមួយគ្នា  ដូចជាប្តីប្រពន្ធ អស់រយៈពេល១០ឆ្នាំមកហើយ ដោយខ្លួននឹងជនរងគ្រោះ បានស្នាក់នៅ នឹងបើកតូបលក់ខោអាវនៅទីតាំងខាងលើ។

មន្ត្រីដដែលបន្តថាលុះដល់អំឡុងខែមីនាឆ្នាំ២០២២ ជនរងគ្រោះបានធ្លាក់ខ្លួនឈឺ ហើយខ្លួនបានយកទៅព្យាបាល នៅមន្ទីរពេទ្យបង្អែកខេត្តសៀមរាប។ ដោយក្រុមគ្រូពេទ្យបានប្រាប់ថា ជនរងគ្រោះមានជំងឺជំងឺមហារីក និងបានសំរាកព្យាបាល ដោយអស់រយៈពេល ០៣ខែ គ្រូពេទ្យអស់លទ្ធភាពព្យាបាលក៏អោយមកផ្ទះវិញ។

មន្ត្រីបានបញ្ជាក់ថាក្រោយពីការពិនិត្យរបស់គ្រូពេទ្យអមតុលាការ   រួមទាំងព្រះរាជអាជ្ញារង លោក ប៉ុក ដារា និងសមត្ថកិច្ចជំនាញ  កោសល់វិច្ឆ័យខេត្តបានសន្និដ្ឋានថាជនរងគ្រោះ ស្លាប់ដោយសារ  ជំងឺមហារីកជើងខាងស្តាំ។ ពាក់ព័ន្ធករណីនេះ សាកសព រង់ចាំការសម្រេចពីក្រុមគ្រួសារនិងស្ថានទូត៕SRP

ខេត្តកំពង់ឆ្នាំង៖សម្ដេច ស ខេង បានមានប្រសាសថា «នគរបាលយើងត្រូវតែមានសមត្ថភាព វិជ្ជាជីវៈ មានសីលធម៌ល្អ ដូចដែលក្មួយៗ ប្អូនៗបានសិក្សានេះ គឺនោះហើយជាចំណេះវិជ្ជា ចំណេះដឹង ដែលយើងត្រូវប្រកាន់ខ្ជាប់ពេលយើង បំពេញបេសកកម្ម ដើម្បីប្រែក្លាយខ្លួនយើង ជាមន្រ្តីនគរបាលរបស់ប្រជាពលរដ្ឋ ពលរដ្ឋមិនខ្លាចញញើតយើង ពលរដ្ឋ គាត់ស្រលាញ់ ជឿទុកចិត្ត និងផ្ដល់កិច្ចសហការជាមួយយើង។ ទោះបីយើងមានកម្លាំងប៉ុន្មានក៏ដោយ ក៏មិនអាចរក្សាសន្តិសុខសណ្ដាប់ធ្នាប់បានល្អដែរ បើគ្មានការគាំទ្រ និងការចូលរួមពីប្រជាពលរដ្ឋ។ នេះជាគោលការណ៍ និងជាទ្រឹស្ដីត្រូវចងចាំ»។

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ថ្លែងបែបនេះ
នៅថ្ងៃពុធ ក្នុងឱកាសអញ្ជើញជាអធិបតី ពិធីបិទវគ្គបណ្ដុះបណ្ដាលបឋមវិជ្ជាជីវៈនគរបាលជំនាន់ទី១៥ លើកទី១ នៅសាលានគរបាលជាតិភូមិភាគ៦ ខេត្តកំពង់ឆ្នាំង។

សម្ដេចស ខេង ក៏បានមានប្រសាសន៍ ពន្យល់ជូនអង្គពិធី អំពីទស្សនៈពាក់ព័ន្ធនឹងនគរបាលជាតិ រួមមាន ទី១ បញ្ចូល៖ សំដៅលើការបញ្ចូលក្របខណ្ឌនគរបាលដោយឆ្លងកាត់ការប្រឡងប្រជែង។
ទី២ បញ្ចេះ៖ សំដៅដល់ការបង្រៀនឱ្យចេះទាំងទ្រឹស្ដី និងការអនុវត្តជាក់ស្ដែង។
ទី៣ បញ្ជា៖ សំដៅលើការតែងតាំងឱ្យបំពេញការងារតាមជំនាញ និងផ្នែក បន្ទាប់ពីបានបង្រៀនឱ្យចេះ។
ទី៤ បញ្ជោរ៖ សំដៅដល់ការលើកទឹកចិត្ត ដូចជាការតម្លើងស័ក្ដិ ឋានៈ តួនាទី រង្វាន់ និងបណ្ណសរសើរជាដើម។
ទី៥ បញ្ចោរ៖ គឺសំដៅលើវិធានការលើមន្រ្តីមានកំហុស ដូចជា ការស្ដីបន្ទោស និងដាក់ទណ្ឌវិន័យជាដើម។
ទី៦ បញ្ចេញ៖ សំដៅដល់ការដកក្របខណ្ឌចេញពីនគបាល បើកាលណាមានកំហុសធ្ងន់ធ្ងរ ដូចជា ប្រព្រឹត្តបទល្មើស និងទី៦ បញ្ចប់៖ សំដៅដល់ការររៀបចំចូលនិវត្តន៍ ឬការបាត់បង់កាយសម្បទានវិជ្ជាជីវៈជាដើម៕SRP

ខេត្តកំពង់ចាម​៖លោក អ៊ុន ចាន់ដា អភិបាលខេត្តកំពង់ចាម បាន​ថ្លែងអំពាវនាវ​ដល់​យុវជន​ ឲ្យ​ខិតខំ​សិក្សា​ រៀនជំនាញ​ឯកទេស​ពិតប្រាកដ និង​សុចរិត​ ដើម្បីកសាងអនាគត​ របស់​ខ្លួន​ ខណៈរាជរដ្ឋាភិបាលកម្ពុជា បានបង្កើតសាលាបណ្ដុះបណ្ដាលជំនាញបច្ចេកទេស នៅគ្រប់ទីកន្លែង។​

លោកថ្លែងបែបនេះក្នុង​ឱកាស​ប្រារព្ធ​ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈលើកទី៥ ឆ្នាំ២០២២ ក្រោមប្រធានបទ «TVET បង្កើនផលិតភាពការងារ និងភាពប្រកួតប្រជែងខ្ពស់» នៅវិទ្យាស្ថានពហុបច្ចេកទេសខេត្តកំពង់ចាម នៅថ្ងៃទី១៥ ខែមិថុនា ឆ្នាំ២០២២ នេះ​។

អភិបាលខេត្តកំពង់ចាម​ក៏ បាន​ថ្លែងថា រាជរដ្ឋាភិបាលកម្ពុជា ដែលដឹកនាំ ដោយសម្ដេចតេជោ ហ៊ុន សែន ជានបានយកចិតត្តទុកដាក់ជាខ្លាំង ក្នុងកសាងធនធានមនុស្ស ដោយចាប់ផ្ដើមពីកម្រិតជំនាញ ដើម្បីបង្កើននូវមុខរបរ និងការងារ រួមទាំងការចូលរួមប្រកួតប្រជែង ទីផ្សារ ក្នុងគោលបំណង ដើម្បីលើកកម្ពស់ កម្រិតជីវភាព របស់ប្រជាពលរដ្ឋ ដោយរាប់ចាប់តាំងពីពេលដែល យុវជនយើង បញ្ចប់ការសិក្សា ត្រឹមកម្រិតសញ្ញាបត្រមធ្យម សិក្សាទុតិយភូមិទៅ។

លោកបានបញ្ជាក់ថាយ៉ាងណាមិញ ទិវាជាតិឆ្នាំនេះ បានរៀបចំឡើង ក្នុងគោលបំណង លើកកម្ពស់ការ បណ្តុះបណ្តាលបច្ចេកទេស និងវិជ្ជាជីវៈ នឹងធ្វើការផ្សព្វផ្សាយទៅដល់សិស្សានុសិស្ស និស្សិត យុវជន មាតាបិតា អាណាព្យាបាល កម្មករ និយោជិត និយោជក និងផ្នែកឯកជន ព្រមទាំង សាធារណៈជន ឲ្យបានយល់ដឹងកាន់តែច្បាស់អំពីសារៈសំខាន់ នៃការអប់រំបណ្តុះបណ្តាលបច្ចេកទេស និងវិជ្ជាជីវៈ ក្នុងការអភិវឌ្ឍន៍កម្លាំងពលកម្មជំនាញ ប្រកបដោយប្រសិទ្ធភាព ដើម្បីឆ្លើយតបទៅ នឹងតម្រូវការទីផ្សារការងារ នៅក្នុងស្រុក​ និងក្រៅប្រទេស។

បេីតាមលោក ហាវ ធិន នាយកវិទ្យាស្ថានពហុបច្ចេកទេសខេត្តកំពង់ចាម បាន​ឲ្យដឹងថា បច្ចុប្បន្ន វិទ្យាស្ថានពហុបច្ចេកទេសខេត្ត មានបណ្ដុះបណ្ដាល លើជំនាញ ដូចជា៖ វិស្វករអគ្គិសនី វិស្វករអេឡិចត្រូនិក វិស្វករយន្តសាស្ត្រយន្ត វិស្វកម្មសំណង់ស៊ីវិល បរិក្ខាត្រជាក់ឧស្សហកម្ម វិទ្យសាស្ត្រកុំព្យូទ័រ និងមានជំនាញជាច្រើនទៀត តាមតម្រូវការទីផ្សារការងារ ដោយបណ្ដុះបណ្ដាល ចាប់ពីកម្រិតវិញ្ញាបនបត្រ រហូតដល់កម្រិតបរិញ្ញាបត្រ ដោយសិក្សាចាប់ពី ១សប្ដាហ៍ រហូតដល់ ៥ឆ្នាំ។ ទន្ទឹមនឹងនោះ វិទ្យាស្ថាន ក៏បានខិតខំលើកកម្ពស់ការបណ្ដុះបណ្ដាល និងការងារ ដើម្បី បង្កើនផលិតភាព និងភាពប្រកួរប្រជែង ដោយខិតខំស្វែងរកដៃគូ ដូចជា៖ រោងចក្រ សហគ្រាស ដើម្បី ឲ្យសិស្ស និស្សិតចុះហាត់ការការងារ និងកម្មសិក្សា ជាពិសេស ស្វែងរកការងារជូននិស្សិត ក្រោយបញ្ចប់ការសិក្សា ស្របតាមជំនាញ និងសមត្ថភាពរបស់សិស្ស និស្សិត ផងដែរ៕SRP