ភ្នំពេញ៖នាយករដ្ឋមន្ត្រីកម្ពុជា-ថៃ នៅថ្ងៃព្រហស្ថនេះ
បានពិភាក្សាគ្នា ដោយយកចិត្តទុកដាក់ និង ដោយស្និទ្ធស្នាល អំពីវិស័យនៃកិច្ចសហការទ្វេភាគីកម្ពុជា-ថៃ ដែលមានភាពសម្បូរបែប និងទូលំទូលាយ ។ កិច្ចពិភាក្សាបានផ្តោតជាសំខាន់ទៅលើវិស័យគន្លឹះ ដោយរាប់ចាប់ពី វិស័យពាណិជ្ជកម្ម, វិនិយោគ, ទេសចរណ៍, ការអប់រំ, ការបណ្ដុះបណ្ដាលវិជ្ជាជីវៈ, កិច្ចការទូត, ទំនាក់ទំនងធុរកិច្ច, ទំនាក់ទំនង ប្រជាជន និង ប្រជាជន, ការតភ្ជាប់រវាងប្រទេសទាំងពីរ តាមផ្លូវអាកាស, ផ្លូវរថភ្លើង និង ផ្លូវថ្នល់, សេដ្ឋកិច្ចឌីជីថល និងសេដ្ឋកិច្ចបៃតង, កិច្ចការពាក់ព័ន្ធនឹងអន្តោប្រវេសន៍ រហូតដល់វិស័យសន្តិសុខឆ្លងដែននិង សន្តិសុខអនឡាញ។ ជាមួយគ្នានេះ, ថ្នាក់ដឹកនាំទាំងពីរក៏បានណែនាំឱ្យក្រសួង-ស្ថាប័នពាក់ព័ន្ធនៃប្រទេសទាំងពីរ បន្តពិភាក្សា និង សហការគ្នា ដើម្បីឱ្យកិច្ចសហប្រតិបត្តិការកម្ពុជា-ថៃ ទទួលបានផ្លែផ្កា សម្រាប់ជាឧត្តមប្រយោជន៍ទាំងសងខាង។

នៅវិមានសន្តិភាព សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រ​កម្ពុជា បានទទួលបដិសណ្ឋាកិច្ចយ៉ាងកក់ក្តៅ និងបានពិភាក្សាការងារជាមួយ ឯកឧត្តម សេដ្ឋា ថាវីស៊ីន  (Srettha Thavisin) នាយករដ្ឋមន្រ្តី នៃព្រះរាជាណាចក្រថៃ និង គណៈប្រតិភូជាន់ខ្ពស់ ដែលកំពុងបំពេញទស្សនកិច្ចផ្លូវការនៅព្រះរាជាណាចក្រកម្ពុជា។

សម្តេចធិបតី បានសម្តែងនូវការស្វាគមន៍យ៉ាងកក់ក្តៅជូនចំពោះ ឯកឧត្តម សេដ្ឋា ថាវីស៊ីន និងគណៈប្រតិភូជាន់ខ្ពស់ មកកាន់ព្រះរាជាណាចក្រកម្ពុជា និងចំពោះការជ្រើសរើសកម្ពុជា ជាប្រទេសដំបូង សម្រាប់ការបំពេញទស្សនកិច្ចផ្លូវការរបស់ ឯកឧត្តម ក្នុងនាមជានាយករដ្ឋមន្រ្តី នៃព្រះរាជាណាចក្រថៃ ។ សម្តេចធិបតី ក៏បានសម្តែងនូវការអបអរសាទរជាថ្មីម្តងទៀត ជូនចំពោះ ឯកឧត្តម សេដ្ឋា ថាវីស៊ីន ដែលត្រូវបានជ្រើសតាំងជានាយករដ្ឋមន្រ្តីនៃព្រះរាជាណាចក្រថៃ នៅថ្ងៃតែមួយ ស្របគ្នាទៅនឹងការជ្រើសតាំងជានាយករដ្ឋមន្រ្តីរបស់ សម្តេចធិបតី ផងដែរ។

ឯកឧត្តម សេដ្ឋា ថាវីស៊ីន បានថ្លែងអំណរគុណយ៉ាងជ្រាលជ្រៅ ចំពោះការស្វាគមន៍ និងបដិសណ្ឋារកិច្ចដ៏កក់ក្តៅ ប្រកបដោយភាតរភាព និងក៏បានអបអរសាទរដោយផ្ទាល់ចំពោះ សម្តេចធិបតី ដែលត្រូវបានជ្រើសតាំងជានាយករដ្ឋមន្រ្តីកម្ពុជា នីតិកាលទី៧ នៃរដ្ឋសភា ផងដែរ។

ថ្នាក់ដឹកនាំទាំងពីរបានវាយតម្លៃខ្ពស់ទៅវិញទៅមក និងមានជំនឿដ៏មុតមាំថា កិច្ចសហប្រតិបត្តិការកម្ពុជា-ថៃ ដែលនឹងកាន់តែរីកចម្រើន និងរឹងមាំថែមទៀត ។

សម្តេចធិបតី បានអញ្ជើញ ឯកឧត្តម សេដ្ឋា ថាវីស៊ីន និង គណៈប្រតិភូជាន់ខ្ពស់ ចូលរួមពិធីជប់លៀងផ្លូវការ និង បានជូនពរដល់ឯកឧត្តម និង គណៈប្រតិភូ ទាំងអស់ ទទួលបាននូវជោគជ័យដ៏ថ្លៃថ្លា នៅក្នុងការបំពេញទស្សនកិច្ចផ្លូវការនៅព្រះរាជាណាចក្រកម្ពុជា និង សូមឱ្យការធ្វើមាតុភូមិនិវត្តន៍ប្រកបដោយសុវត្ថិភាព៕

ភ្នំពេញ៖នៅទីបំផុតអគ្គនាយកដ្ឋានពន្ធដារ សម្រេចលើកលែងទណ្ឌកម្មរដ្ឋបាល (ពន្ធបន្ថែម និងការប្រាក់) ចំពោះពន្ធលើអចលនទ្រព្យ និង/ឬពន្ធលើដីធ្លីមិនបានប្រើប្រាស់។

នេះបើតាមសេចក្តីជូនដំណឹង អគ្គនាយកដ្ឋានពន្ធដារ ដែលអង្គភាព សៀមរាប ប៉ុស្ដិ៍ ទទួលបាន៕

ខេត្តបាត់ដំបង៖លោកជំទាវ Teo Lay Cheng ឯកអគ្គរដ្ឋទូតនៃសាធារណរដ្ឋសិង្ហបុរី បានមានប្រសាសន៍លើកឡើងថា ខេត្តបាត់ដំបងពិតជាគួរឱ្យទាក់ទាញខ្លាំងមែនទែន ពិសេសចំពោះសម្រស់អគារបុរាណ ដែលមាននៅក្នុងខេត្តបាត់ដំបង ដែលជាអគារបន្សល់តាំងពីអាណានិគមនិយមបារាំង ដែលលើកសម្រស់ក្រុងបាត់ដំបង ឱ្យកាន់តែមានភាពចាប់អារម្មណ៍បានមួយកម្រិត។

លោកជំទាវបានបន្តទៀតថា ជំហ៊ានបន្ទាប់លោកជំទាវ និងក្រុមការងារនឹងបន្តទស្សនកិច្ចរោងម៉ាស៊ីនកិនស្រូវ នៅក្នុងទីរួមខេត្តបាត់ដំបង ដើម្បីយល់បន្ថែមអំពីបញ្ហាស្រូវអង្ករ នៅក្នុងខេត្តបាត់ដំបង ហើយសង្ឃឹមថាបន្ទាប់ពីទស្សនកិច្ចនេះហើយ អាចមានបន្ថែមនូវការយល់ដឹងអំពីស្រូវអង្ករ នៅក្នុងខេត្តបាត់ដំបងកាន់តែច្រើន នឹងសង្ឃឹមថាអាចនាំចូលស្រូវអង្ករពីប្រទេសកម្ពុជា ទៅប្រទេសសិង្ហបុរីផងដែរ។

លោកជំទាវ ឯកអគ្គរដ្ឋទូតនៃសាធារណរដ្ឋសិង្ហបុរី មានប្រសាសន៍បែបនេះ
នៅរសៀលថ្ងៃពុធ ម្សិលមិញ ក្នុងឱកាស ពិភាក្សាការងារនិងជំនួបសម្ដែងការគួរសម
ជាមួយឯកឧត្តម សុខ លូ អភិបាលខេត្តបាត់ដំបង។

ឯកឧត្តម សុខ លូ បានមានប្រសាសន៍ស្វាគមន៍ចំពោះការអញ្ជើញមកដល់របស់លោកជំទាវ Teo Lay Cheng ដែលបានអញ្ជើញមកទស្សនកិច្ចសិក្សា នៅឯទឹកដីខេត្តបាត់ដំបង ។

ឯកឧត្តមបានបន្តទៀតថា ខេត្តដែលមានសក្ដានុពលខ្លាំង លើវិស័យកសិកម្ម ហើយខេត្តមួយនេះ កំពុងមានតម្រូវការជាច្រើន ខាងផ្នែកនេះ ដោយទាមទារឱ្យវិនិយោគិន ក្នុងស្រុក និងក្រៅស្រុក ចាប់អារម្មណ៍វិនិយោគផ្នែកកសិឧស្សាហកម្ម ដូចជាការកែច្នៃផ្លែឈើ ការយកផលិតផលកសិកម្មយកទៅកែច្នៃ ដើម្បីធ្វើការលក់ និងនាំចេញទៅក្រៅប្រទេស ព្រោះសព្វថ្ងៃនេះផលិតផល កសិកម្មជាច្រើន នៅមិនទាន់បានយកមកកែច្នៃ អស់លទ្ធភាពនៅឡើយទេ ធ្វើឱ្យផលិតផលទាំងនោះ លើសតម្រូវការទីផ្សារបណ្ដាលឱ្យមានការធ្លាក់ថ្លៃចុះ។

ឯកឧត្តមបានបញ្ជាក់បន្ថែមថា ដោយសារតែខេត្តបាត់ដំបង ត្រូវបានរាជរដ្ឋាភិបាលកម្ពុជា ចាត់ទុកជាខេត្តប៉ូលសេដ្ឋកិច្ចទី៤ នៃប្រទេសកម្ពុជា និងជាខេត្ត គោលដៅទេសចរណ៍ដ៏សំខាន់ ក្នុងនោះហេដ្ឋារចនាសម្ព័ន្ធ នៅក្នុងខេត្តក៏ចាប់ផ្ដើមល្អប្រសើរច្រើន មានផ្លូវអាស៊ានហាយវេ ដែលភ្ជាប់ពីរាជធានីភ្នំពេញ មកកាន់ខេត្តបន្ទាយមានជ័យ តែម្ដង មានផ្លូវរថភ្លើង។ ដោយឡែកនៅពេលអនាគត រាជរដ្ឋាភិបាល ក៏នឹងមានគម្រោងសាងសង់ផ្លូវតភ្ជាប់ពីខេត្តសៀមរាប ឆ្ពោះមកខេត្តបាត់ដំបង ផ្ទាល់តែម្ដង ហើយបើសិនជាផ្លូវល្បឿនលឿន ពីភ្នំពេញ មក សៀមរាប និងផ្លូវពីសៀមរាបមកបាត់ដំបង ចេញរូបរាងនោះ ភ្ញៀវទេសចរជាតិ និងអន្តរជាតិនឹងងាក មកកម្សាន្ត ខេត្តបាត់ដំបង កាន់តែច្រើនឡើងៗ ហើយខេត្តបាត់ដំបង ក៏នឹងក្លាយជាខេត្តទេសចរណ៍ដ៏សំខាន់ផងដែរ។

ឯកឧត្តម សុខ លូ ក៏បានង្ហាញអំពីគុណភាពដ៏ឈ្ងុយឆ្ងាញ់ ដល់អង្ករកម្ពុជា ដែលកំពុងធ្វើការនាំចេញទៅក្រៅប្រទេស ក្នុងនោះក៏មានដែរនូវដំណាំម្រេចសំឡូត ដែលជាដំណាំមួយមិនសូវមានអ្នកស្គាល់ច្រើន ដូចដំណាំម្រេច នៅកំពតឡើយ តែចំពោះដំណាំម្រេចសំឡូត នេះគឺត្រូវបានទទួលការលើកសរសើរ អំពីគុណភាព និងរស់ជាតិឆ្ងាញ់មិនចាញ់ដំណាំម្រេច នៅឯខេត្តកំពតឡើយ៕

ខេត្តសៀមរាប៖ឯកឧត្តម ប្រាក់ សោភ័ណ អភិបាលខេត្តសៀមរាប បានបកស្រាយចំណុចលើកឡើងក្នុងបណ្តាញសង្គម Facebook page រឿងប្រាក់ពន្ធ។

ខាងក្រោមនេះជាសំណេរឯកឧត្តម ប្រាក់ សោភ័ណ អភិបាលខេត្តសៀមរាប៖

ខ្ញុំបាទ សូមបកស្រាយចំណុចលើកឡើងក្នុងបណ្តាញសង្គម Facebook page មួយដែលថា “ដើម្បីគណនាប្រាក់ពន្ធ គឺត្រូវយក ការ៉េដី គុណនឹង ៨០ ០០០ រៀល” គឺមិនពិតនោះទេ។ សម្រាប់តម្លៃដីទំនេរ ៨០ ០០០ រៀល គឺជាតម្លៃជាមូលដ្ឋានគិតពន្ធ សម្រាប់ដីក្នុងមួយមែតការ៉ ក្នុងការកំណត់តម្លៃដី មិនមែនជាអត្រាពន្ធ ឬប្រាក់ពន្ធត្រូវបង់នោះទេ។  ដើម្បីរកប្រាក់ពន្ធត្រូវបង់ក្នុងមួយឆ្នាំ គឺត្រូវយក តម្លៃដី (ទំហំដី គុណនឹង តម្លៃដីក្នុងមួយការ៉េ) គុណនឹង អត្រាពន្ធ ២%។

ឧទាហរណ៍៖ ដីទំនេរមួយកន្លែងស្ថិតនៅក្រុងសៀមរាប ក្នុងក្រវ៉ាត់ក្រុងទីមួយ មានទំហំ ១០០ ម២។ តម្លៃមូលដ្ឋានគិតពន្ធលើដីធ្លីមិនបានប្រើប្រាស់កំណត់ដោយគណៈកម្មការវាយតម្លៃដីគឺ ៨០ ០០០៛/ម២។ តើដីនេះត្រូវបង់ពន្ធលើដីធ្លីមិនបានប្រើប្រាស់ប៉ុន្មានក្នុងមួយឆ្នាំ?
មូលដ្ឋានគិតពន្ធ = 100 m2 x 80 000 រៀល = 8 000 000 រៀលនោះប្រាក់ពន្ធត្រូវបង់ក្នុងមួយឆ្នាំ គឺ 8 000 000 រៀល x អត្រាពន្ធ (2%) = 160 000 រៀល។

ខ្ញុំបាទសូមគោរពបញ្ជាក់ជូនបន្ថែមទៀតថា៖ ពន្ធលើដីធ្លីមិនបានប្រើប្រាស់នេះ គឺជាប្រភេទពន្ធប្រចាំឆ្នាំ ដែលពន្ធនេះកំណត់លើដីដែលគ្មានសំណង់ និងដីដែលមានសំណង់ដែលមិនបានប្រើប្រាស់ស្ថិតក្នុងទីក្រុងនានា និងក្នុងតំបន់តាមបណ្តាស្រុកដែលកំណត់ដោយគណៈកម្មការវាយតម្លៃដីធ្លីមិនបានប្រើប្រាស់ ដោយពន្ធនេះ ដាក់ឲ្យអនុវត្តចាប់ពីឆ្នាំ១៩៩៦ មក។

កាតព្វកិច្ច និងបែបបទនៃការប្រកាសបង់ពន្ធ ៖ ពន្ធនេះជាប្រភេទពន្ធស្វ័យប្រកាស ដែលតម្រូវឱ្យកម្មសិទ្ធិករនៃដីជាប់ពន្ធ ត្រូវមកចុះបញ្ជី និងដាក់លិខិតប្រកាសបង់ពន្ធលើដីធ្លីមិនបានប្រើប្រាស់នៅរដ្ឋបាលសារពើពន្ធ។ អ្នកជាប់ពន្ធត្រូវបង់ពន្ធយ៉ាងយឺតបំផុតត្រឹមថ្ងៃទី៣០ ខែកញ្ញា នៃឆ្នាំជាប់ពន្ធនីមួយៗ និងត្រូវបង់ប្រាក់ពន្ធនៅសាខាពន្ធដារខេត្ត ឬនៅធនាគារជាដៃគូជាមួយក្រសួងសេដ្ឋកិច្ចនិងហិរញ្ញវត្ថុ។
អត្រាពន្ធ មូលដ្ឋានគិតពន្ធ និងការគណនាពន្ធ៖ អត្រាពន្ធនេះត្រូវកំណត់តាមអត្រា ២% នៃមូលដ្ឋានគិតពន្ធ។

មូលដ្ឋានគិតពន្ធ គឺជាថ្លៃដីគិតតាមតំបន់នីមួយៗ ដែលវាយតម្លៃទៅតាមតម្លៃគិតក្នុងមួយម៉ែត្រក្រឡា ដែលកំណត់ដោយគណៈកម្មការវាយតម្លៃដីធ្លីមិនបានប្រើប្រាស់។

សម្រាប់តម្លៃជាមូលដ្ឋាននៃការគិតពន្ធនៅក្នុងខេត្តសៀមរាប គឺអនុវត្តតាមសេចក្តីសម្រេចលេខ ០០៧ សសរ.សហវ.ពដ ចុះថ្ងៃទី២៩ ខែធ្នូ ឆ្នាំ២០០៥ របស់គណៈកម្មការវាយតម្លៃដីមិនបានប្រើប្រាស់ ដែលមានឧបសម្ព័ន្ធទី៣ ស្តីពីការកំណត់បែងចែកតំបន់ និងតម្លៃដីមួយម៉ែតក្រឡា សម្រាប់គិតពន្ធលើដីធ្លីមិនបានប្រើប្រាស់ ខេត្តសៀមរាប។
តំបន់ I ដីក្នុងក្រុងសៀមរាប
I. ១.តម្លៃគិតពន្ធក្នុងមួយម៉ែតក្រឡា ៨០ ០០០ រៀល គឺដីគ្រប់ប្រភេទក្នុងអតីតប្រព័ន្ធការពារក្រុងសៀមរាប និងដីសងខាងផ្លូវជាតិលេខ ៦ ចម្ងាយ២៥០ម៉ែត។
I. ២. តម្លៃគិតពន្ធក្នុងមួយម៉ែតក្រឡា ៤ ០០០ រៀល គឺដីសង់លំនៅដ្ឋាន ក្រៅពីតំបន់ I ខាងលើ។

តំបន់ II ដីស្រុកផ្សេងៗក្រៅពីក្រុងសៀមរាប
II.១.តម្លៃគិតពន្ធក្នុងមួយម៉ែតក្រឡា ២ ០០០ រៀល គឺដីអមសងខាងផ្លូវជាតិលេខ ៦ ចម្ងាយ១០០ម៉ែត សងខាងផ្លូវក្នុងស្រុកពួក និងស្រុកប្រាសាទបាគង។
II.២.តម្លៃគិតពន្ធក្នុងមួយម៉ែតក្រឡា ១ ០០០ រៀល គឺដីអមសងខាងផ្លូវជាតិលេខ ៦ ចម្ងាយ១០០ម៉ែត ក្រៅពីតំបន់ II.១ ខាងលើ។
III.៣.តម្លៃគិតពន្ធក្នុងមួយម៉ែតក្រឡា  ៥០០ រៀល គឺដី ក្រៅពីតំបន់ II.១ និង តំបន់ II.២ ខាងលើ។

ការចុះបញ្ជី និងប្រកាសបង់ពន្ធ ទាំងពន្ធលើដីទំនេរមិនប្រើប្រាស់ និងពន្ធលើអចលនទ្រព្យ គឺ ចាប់ផ្តើមបង់ពន្ធ ចាប់ពីថ្ងៃទី០១ ខែមករា ដល់ ថ្ងៃទី៣០ ខែកញ្ញា នៃឆ្នាំជាប់ពន្ធនីមួយៗ ជារៀងរាល់ឆ្នាំ។ ករណីខកខានមិនបានបង់ នឹងត្រូវទទួលរងទោសទណ្ឌតាមច្បាប់ជាធរមាន។ ជាការសំគាល់ បងប្អូនអ្នកជាប់ពន្ធមួយចំនួន គាត់តែងតែអញ្ជើញសម្រុកមកប្រកាសបង់ពន្ធ នៅក្នុងខែចុងក្រោយ នេះ ទោះបីយ៉ាងណា សាខាតែងតែខិតខំផ្តល់សេវា ជូនគាត់រហូតដល់អស់អ្នកជាប់ពន្ធ ក្នុងថ្ងៃនីមួយ ដែលក្នុងខែនេះជាទូទៅពេលល្ងាចរហូតដល់ម៉ោង ៧.៣០នាទី ទៅ ម៉ោង ៨.០០ យប់។ បន្ថែមពីនេះ ថ្ងៃសៅរ៍ សប្តាហ៍មុន សាខាក៏មានបើកផ្តល់សេវា ដែលមានអ្នកមកប្រកាសបង់ពន្ធ ប្រមាណ ២០០ នាក់ផងដែរ។

សម្រាប់ការប្រកាសបង់ពន្ធប្រចាំឆ្នាំ២០២៣ នេះដែរ ថ្ងៃនេះ អគ្គនាយកដ្ឋានពន្ធដារបានសម្រេចពន្យារពេល ០១ ខែទៀត គឺរហូតដល់ ថ្ងៃទី ៣០ ខែ តុលា ឆ្នាំ២០២៣ នេះ។

សេចក្តីដូចបានគោរពបញ្ជាក់ជូនខាងលើ មេត្តាជ្រាបជារបាយការណ៍ ។ សូមមេត្តាទទួលនូវសេចក្តីគោរពដ៏ខ្ពង់ខ្ពស់អំពីខ្ញុំបាទ។

ការបកស្រាយរបស់អភិបាលខេត្តសៀមរាប ធ្វើឡើងនៅក្នុងគ្រុបតេឡេក្រាមសៀមរាប ប៉ុស្ដិ៍៕

ខេត្តសៀមរាប៖ឯកឧត្តម ប្រាក់ សោភ័ណ អភិបាលខេត្តសៀមរាប បានសូមសំណូមពរដល់ មន្ត្រីរាជការ គ្រូបង្រៀន អាជីវករ បងប្អូនប្រជាពលរដ្ឋទាំងអស់ដែលរស់នៅក្នុងខេត្តសៀមរាប ចូលរួមរៀបចំទុកដាក់សម្រាមឲ្យបានត្រឹមត្រូវ និងល្អប្រសើរ ដើម្បីឲ្យខេត្តរបស់យើងស្អាត ទីសាធារណៈមានសោភណ្ឌភាពល្អ។

អភិបាលខេត្តអំពាវនាវយ៉ាងដូច្នេះ នៅថ្ងៃពុធនេះ ក្នុងពិធីសម្អាតបរិស្ថាន ក្នុងក្រុងសៀមរាប ដើម្បីអបអរសាទរទិវាទេសចរណ៍ពិភពលោក ក្រោមប្រធានបទ “ទេសចរណ៍ និងការវិនិយោគបៃតង” ដោយមានការចូលរួមពីមន្ទីរអង្គភាពជុំវិញខេត្ត រដ្ឋបាលក្រុង កងកម្លាំងប្រដាប់អាវុធ សង្កាត់ទាំង១២ ក្រុមហ៊ុនឯកជន លោកគ្រូ អ្នកគ្រូ ប្អូនៗសិស្សានុសិស្ស សហភាពសហព័ន្ធយុវជនកម្ពុជាខេត្ត និងបងប្អូនប្រជាពលរដ្ឋ ប្រមាណជាង ១៧,១២៦នាក់ ទូទាំងក្រុងសៀមរាប។

ឯកឧត្តម ប្រាក់ សោភ័ណ បានបន្តថា ការរៀបចំយុទ្ធនាការសម្អាតបរិស្ថានក្រុងនាថ្ងៃនេះ គឺធ្វើឡើងក្នុងគោលបំណងបំផុសចលនាប្រជាពលរដ្ឋ កងកម្លាំងប្រដាប់អាវុធ មន្ត្រីរាជការគ្រប់ជាន់ថ្នាក់ សិស្ស និស្សិតគ្រប់រូបឱ្យចូលរួមធ្វើអនាម័យ កែលម្អសោភណ្ឌភាពទីក្រុង ទីប្រជុំជន ជនបទ ភូមិដ្ឋាន វត្តអារាម សាលារៀន មន្ទីរពេទ្យ រោងចក្រ សហគ្រាស និងទីផ្សារ ដូចនេះ ដើម្បីធានាបាននូវគុណភាពបរិស្ថាន សោភណ្ឌភាពទីប្រជុំជន សុខុមាលភាពសាធារណៈ ចាំបាច់ត្រូវយកចិត្តទុកដាក់លើកកម្ពស់ការគ្រប់គ្រងសំណល់ ដោយត្រូវចេះវេចខ្ចប់ និងញែកសំណល់សំរាមគ្រប់ប្រភេទដូចជា សំណល់អាចកែច្នៃបាន សំណល់សរីរាង្គ សំណល់ផ្ទុកសារធាតុគ្រោះថ្នាក់ និងសំណល់ផ្សេងៗ ដើម្បីប្រែក្លាយសំណល់មួយចំនួនឱ្យមានតម្លៃសេដ្ឋកិច្ច និងកាត់បន្ថយបរិមាណសំណល់នៅតាមទីសាធារណៈ។

ក្នុងឱកាសនេះខ្ញុំសូមឆ្លុះបញ្ចាំងពីកិច្ចសហការគ្នា និងការយល់ដឹងដូចគ្នា សំដៅលើកកម្ពស់ការគ្រប់គ្រងសំរាម សំណល់រឹងនៅកម្ពុជាឱ្យកាន់តែមានប្រសិទ្ធភាព និងប្រកបដោយនិរន្តរភាព ដែលយើងត្រូវអនុវត្តជាប្រចាំ ដើម្បីខេត្តយើងទាំងអស់គ្នា ក្រោមទិសស្លោក “សៀមរាបផ្ទះខ្ញុំ” ។ ការបេ្តជ្ញាចិត្តខ្ពស់ក្នុងការគ្រប់គ្រងសំរាម សំណល់រឹង ដែលជាកត្តាលីករដ៏សំខាន់មួយ ដែលចូលរួមក្នុងការលើកកម្ពស់សុខភាពមនុស្សនាពេលបច្ចុប្បន្ន និងសម្រាប់កូនចៅជំនាន់ក្រោយ។ ដូច្នេះ ខ្ញុំសូមឱ្យស្មារតី នៃប្រារព្ធទិវាអូហ្សូនបរិស្ថានអន្តរជាតិ និងទិវាទេសចរណ៍ពិភពលោក ឆ្នាំ២០២៣ នេះ ក្លាយជាកម្លាំងចលករដ៏មុតស្រួច និងជាត្រីវិស័យមួយ ដើម្បីនាំផ្លូវយើងទាំងអស់គ្នាឈានទៅរកការអភិវឌ្ឍន៍ប្រកបដោយចីរភាព៕

ខេត្តសៀមរាប៖សមត្ថកិច្ចខេត្តសៀមរាបបានប្រាប់អង្គភាពសៀមរាប ប៉ុស្ដិ៍ នៅថ្ងៃពុធនីថា យ៉ាងហោចណាស់មានមនុស្សចំនួនពីរនាក់បានស្លាប់បាត់បង់ជីវិតដោយភ្លើងឆក់។

ហេតុការណ៍បានកើតឡើងនៅវេលាម៉ោង១០និង៣០ នាទី ថ្ងៃទី២៧ ខែកញ្ញា ឆ្នាំ២០២៣ នៅចំណុចបង្គោលខ្សែភ្លើង មុខដីទំនេររបស់ឈ្មោះចាំង គង់ ភេទប្រុស ស្ថិតនៅក្នុងភូមិដូនហុង ឃុំដំដែក ស្រុកសូទ្រនិគម។

សមត្ថកិច្ចបានប្រាប់បន្តថា ជនរងគ្រោះ
១/ឈ្មោះឆា បុណ្យ ហៅប៊ូកភេទប្រុស អាយុ១៨ឆ្នាំ មានទីលំនៅភូមិទ្រា ឃុំស្វាយជ្រុំ ស្រុកមេសាង ខេត្តព្រៃវែង មុខរបរជាងតខ្សែរWifi (ស្លាប់)។
២/ឈ្មោះអាន យូ ភេទប្រុស អាយុ៣៦ឆ្នាំ មានទីលំនៅភូមិព្រៃព្រះអណ្ដូង ឃុំស្វាយជ្រុំ ស្រុកមេសាង ខេត្តព្រៃវែង មុខរបរជាងតខ្សែរWifi (ស្លាប់)។

បើតាមសមត្ថកិច្ច ករណីនេះ មូលហេតុ: ដាក់ជណ្ដើរឡើងតខ្សែរ wifi ជិតបង្គោលខ្សែរភ្លើង ប៉ះនិងខ្សែភ្លើង ធ្លាក់មកដីដាច់ស្រាត ដោយលើដីមានទឹកលិច បណ្ដាលឱ្យឆក់ស្លាប់តែម្ដង។

ក្រោយកើតហេតុ សមត្ថកិច្ច បានយកសាកសពតម្កល់ទុកនៅ មន្ទីរពេទ្យបង្អែកស្រុកសូទ្រនិគម ដើម្បីអោយគ្រួសា រ យកទៅធ្វើបុណ្យតាមប្រពៃណី៕

ខេត្តសៀមរាប៖ឯកឧត្តម ប្រាក់ សោភ័ណ អភិបាលខេត្តសៀមរាប នៅរសៀល ថ្ងៃទី២៦ ខែកញ្ញា ឆ្នាំ២០២៣ បានជួបសម្តែងការគួរសមជាមួយលោកជំទាវ Teo Lay Cheng ឯកអគ្គរដ្ឋទូតសិង្ហបុរីប្រចាំព្រះរាជាណាចក្រកម្ពុជានិងប្រតិភូ ដោយមានការអញ្ជើញចូលរួមពី លោកនាយកទីចាត់ការទំនាក់ទំនងសាធារណៈ និងសហប្រតិបត្តិការអន្តរជាតិ លោកនាយកទីចាត់ការអន្តរវិស័យ តំណាង ទីចាត់ការផែនការ និងវិនិយោគខេត្ត ព្រមទាំងអ្នកពាក់ព័ន្ធនានា។

ឯកឧត្តម អភិបាលខេត្ត បានសម្តែងនូវកិច្ចស្វាគមន៍យ៉ាងកក់ក្តៅ ចំពោះវត្តមានរបស់លោកជំទាវ ឯកអគ្គរដ្ឋទូត ដែលបានអញ្ជើញមកបំពេញបេសកកម្មក្នុងខេត្តសៀមរាប ព្រមទាំងបានថ្លែងអំណរគុណចំពោះរដ្ឋាភិបាល ក៏ដូចប្រជាជនសិង្ហបុរី ដែលជានិច្ចកាលតែងតែរក្សានូវទំនាក់ទំនងជាមិត្តល្អជាមួយប្រទេសកម្ពុជា។

ក្នុងនោះដែរ ឯកឧត្តម ក៏បានលើកពីផែនការស្តា រ និងអភិវឌ្ឍន៍វិស័យទេចរណ៍របស់ខេត្ត តាមរយៈ នៃការរៀបចំព្រឹត្តិការណ៍កីឡានានា ការតាំងពិព័រណ៍ទេសចរណ៍ និងការបង្កើតផលិតផលទេសចរណ៍ថ្មីរបស់ខេត្ត ជាពិសេសការបើកដំណើរការ នៃអាកាសយានដ្ឋានអន្តរជាតិថ្មីក្នុងពេលខាងមុខដ៏ខ្លីនេះ និងបង្តើតជាឱកាសថ្មីមួយទៀត សម្រាប់ខេត្តសៀមរាបទទួលបាននូវកំណើនភ្ញៀវទេសចរអន្តរជាតិមកទស្សនាខេត្តសៀមរាបច្រើនជាងមុន។

លោកជំទាវ ឯកអគ្គរដ្ឋទូត បានថ្លែងអំណរគុណចំពោះ ឯកឧត្តម អភិបាលខេត្ត និងប្តេជ្ញាជួយគាំទ្រដល់ការអភិវឌ្ឍខេត្តសៀមរាប តាមរយៈវិស័យទេសចរណ៍ អប់រំ សង្គមកិច្ច ជាពិសេសគឺបន្តពង្រឹងកិច្ចសហប្រតិបត្តិការនានាឱ្យកាន់តែប្រសើរឡើងថែមទៀត៕

ខេត្តសៀមរាប៖ឯកឧត្តម ប្រាក់ សោភ័ណ អភិបាល​ ខេត្តសៀមរាប នៅរសៀល​ ថ្ងៃទី២៦ ខែកញ្ញា ឆ្នាំ២០២៣ បានជួបសម្តែងការគួរសមជាមួយ លោក Kawaguchi Masaki ប្រធានការិយាល័យកុងស៊ុល ជប៉ុន ប្រចាំខត្តសៀមរាបនិងប្រតិភូ នៅរដ្ឋបាលខេត្តសៀមរាប
ដោយមានការអញ្ជើញចូលរួមពី លោក នាយកទីចាត់ការទំនាក់ទំនងសាធារណៈ និងសហប្រតិបត្តិការអន្តរជាតិ លោក នាយកទីចាត់ការអន្តរវិស័យ  និងតំណាងទីចាត់ការផែនការ និងវិនិយោគខេត្ត ព្រមទាំងអ្នកពាក់ព័ន្ធនានា។

ឯកឧត្តម អភិបាលខេត្ត បានសម្តែងនូវកិច្ចស្វាគមន៍យ៉ាងកក់ក្តៅចំពោះលោក Kawaguchi Masaki ដែលបានរួមចំណែកយ៉ាងសំខាន់ក្នុងការពង្រឹង និងពង្រីកកិច្ចសហប្រតិបត្តិការល្អជាមួយរដ្ឋបាលខេត្តសៀរាប។

ជាមួយគ្នានេះដែរ ឯកឧត្តម​ អភិបាលខេត្ត​ ក៏បានថ្លែងអំណរគុណចំពោះរដ្ឋាភិបាល ក៏ដូចប្រជាជនជប៉ុន ដែលបាន​និងបន្តផ្តល់ជំនួយអភិវឌ្ឍន៍ដល់ប្រទេសកម្ពុជា ក៏ដូចជាខេត្តសៀមរាបផ្ទាល់លើវិស័យសេដ្ឋកិច្ច អប់រំ វប្បធម៌ ទឹកស្អាត និងការជួសជុលប្រាង្គប្រាសាទនានា​ ក្នុងតំបន់រមណីយដ្ឋានអង្គរជាដើម។ល។

លោក ប្រធានការិយាល័យកុងស៊ុល បានថ្លែងអំណរគុណចំពោះ ឯកឧត្តម អភិបាលខេត្ត និងបន្តគាំទ្រជួយជម្រុញការអភិវឌ្ឍខេត្តសៀមរាប ជាពិសេគឺបន្តពង្រឹងកិច្ចសហប្រតិបត្តិការនានា ឱ្យកាន់តែប្រសើរឡើងថែមទៀត៕

ខេត្តសៀមរាប៖នៅទីបំផុតផ្សារទំនើបដ៏ល្បីមួយនៅកណ្ដាលក្រុងសៀមរាប គឺផ្សារទំនើបឡាក់គីម៉លសៀមរាប បានប្រកាស ផ្អាកដំណេីរការ របស់ខ្លួន ចាប់ពីថ្ងៃទី១ ខែតុលា ឆ្នាំ២០២៣។

គេនៅពុំទាន់ដឹងច្បាស់ថាការផ្អាកដំណើរការផ្សារទំនើបដ៏ល្បីមួយនៅកណ្ដាលក្រុងសៀមរាបនេះ មានមូលហេតុអ្វីពិតប្រាកដនៅឡើយទេ ដោយតំណាងផ្សារមិនទាន់ចេញសេចក្ដីជូនដំណឹងជាក់លាក់៕នាគខៀវ

ភ្នំពេញ៖នៅទីបំផុតអគ្គនាយកដ្ឋានពន្ធដារ បានពន្យារពេលបង់ពន្ធលើអចលនទ្រព្យ និងពន្ធលើដីធ្លីមិនបានប្រើប្រាស់ សម្រាប់ឆ្នាំ២០២៣ រហូតដល់ថ្ងៃទី៣១ ខែតុលា ឆ្នាំ២០២៣។ នេះបើយោងតាមសេចក្ដីជូនដំណឹង ស្តីពីរបស់អគ្គនាយកដ្ឋានពន្ធដារ។

សូមជម្រាបថា រយៈពេលប៉ុន្មានថ្ងៃមកនេះ ប្រជាពលរដ្ឋបានបញ្ចេញនៅមតិប្រតិកម្មជានៅទូទាំងប្រទេស ជុំវិញការបង់ពន្ធ លើអចលនទ្រព្យ និងពន្ធលើដីធ្លីមិនបានប្រើប្រាស់៕ដោយនាគខៀវ

រឿងអាស្រូវព្រព្រឹត្តអំពើពុករលួយ នៅខេត្តស្ទឹងត្រែង​ មន្ត្រីពាក់ព័ន្ធ ដែលបានគប់គិតគ្នា បានរួចខ្លួនតាមវិធីឈ្នះៗ របស់អភិបាលខេត្ត។

យោងតាងការផ្សាយរបស់គេហទំព័រមេគង្គញ៉ូរនៅថ្ងៃអង្គានេះបានលាតត្រដាងថា ចៅហ្វាយខេត្តស្ទឹងត្រែង សម្រេចបញ្ចប់រឿង គប់គិតគ្នាកឹបកេងថវិការដ្ឋ ជាង៦០០លានរៀលត្រឹមឈ្នះ ឈ្នះ ចំណែក  មន្រ្តីពុករលួយរួចខ្លួន ។ ការសម្រេចបែបនេះ បានធ្វើឡើងក្នុងកិច្ចប្រជុំរដ្ឋបាលខេត្តស្ទឹងត្រែង  ក្រោមការដឹកនាំរបស់លោកស្វាយ សំអ៊ាង អភិបាលខេត្តដើម្បីប្រជុំដោះស្រាយ ករណីមន្ត្រីសាលាខេត្ត ដែលបម្រើការ​ នៅការិយាល័យទីចាត់ការផែនការនិងវិនិយោគ ឃុបឃិត ជាមួយក្រុមហ៊ុនម៉ៅការ ធ្វើផ្លូវសុធិរាជ្យខន់ស្ត្រាក់សិន បានស៊ីលុយរដ្ឋអស់ជាង៦០០រយលានរៀល ក្នុងការសាងសង់ផ្លូវលំនៅឃុំស្រែសំបូរ និងឃុំសេកុង កន្លងទៅថ្មីៗ ក្នុងឆ្នាំ២០២៣នេះ ។

អ្នកនាំពាក្យសាលាខេត្តស្ទឹងត្រែង លោក ម៉ែន គុង បានប្រាប់ភ្នាក់ងារសារព័ត៌មានប្រចាំខេត្តស្ទឹងត្រែង កាលពីថ្ងៃទី២៣ ខែកញ្ញា ឆ្នាំ២០២៣ថា ៖ «អភិបាលខេត្តស្ទឹងត្រែង បានដឹកនាំកិច្ចប្រជុំជាមួយក្រុមប្រឹក្សា ដោយសម្រេចក្នុងអង្គប្រជុំ ត្រូវឈប់ដេញដោល រកឫសគល់ក្នុងរឿងកន្លងទៅ បើដេញដោលរកឫសគល់ គឺជាប់ពាក់ពន្ធទាំងអស់គ្នា ដូច្នេះអង្គប្រជុំសម្រេចថា ទាំងមន្ត្រី ទាំងក្រុមហ៊ុន ត្រូវបានឱ្យរួចខ្លួនឈប់ដេញដោល ប៉ុន្តែសម្រាប់ការអនុវត្តគំរោងថវិកាមូលនិធិឃុំ ឆ្នាំ២០២៤ខាងនេះ ត្រូវអនុវត្តឱ្យបានត្រឹមត្រូវតាមសៀវភៅTeam»។ សូមរំឭកថា កាលពីថ្ងៃទី៦ ខែមិថុនា ឆ្នាំ២០២៣ ក្រុមហ៊ុនម៉ៅការ ធ្វើផ្លូវចំនួន៤ នៅខេត្តស្ទឹងត្រែង បានឯកភាពគ្នាដាក់លិខិតប្តឹង ទៅអភិបាលខេត្តស្ទឹងត្រែង លោក ស្វាយ សំអ៊ាង ស្នើសុំចុះធ្វើអធិការកិច្ច ចំពោះករណីមិនប្រក្រតី បានឃុបឃិតគ្នា ធ្វើឱ្យបាត់លុយរដ្ឋជាង៦រយលានរៀល ក្នុងគ្រាដែលជួសជុលផ្លូវលំឃុំស្រែសំបូរ និងធ្វើផ្លូវលំឃុំសេកុង នៃស្រុកសៀមប៉ាង។ ក្នុងលិខិតខាងលើបានបង្ហាញថា ការដែលបាត់លុយរដ្ឋជាង៦រយលានរៀលនេះ គឺដោយសារតែមេឃុំសេកុង ឈ្មោះ ចាន់ សយ និងមេឃុំស្រែសំបូរឈ្មោះ សុឹង ម៉ាន់ និងឈ្មោះ កាន់ សាវុធ នាយករងទីចាត់ការផែនការនិងវិនិយោគ និងជាអ្នកសម្របសម្រួលបច្ចេកទេស បានរួមគំនិតជាមួយក្រុមហ៊ុនម៉ៅការធ្វើផ្លូវឈ្មោះ សុធិរាជ្យខន់ស្ត្រាក់សិន របស់លោកម៉ៅ អេងជឺ បានលួចបន្តចុះកិច្ចសន្យាធ្វើផ្លូវបន្ថែមទៀត ក្នុងតម្លៃខ្ពស់កប់ពពក គឺ១គ.ម ជួសជុលអស់៤០លានរៀល។

សូមបញ្ជាក់បន្ថែមថា កាលពីខែមីនា ឆ្នាំ២០២៣ ឃុំសេកុង បានប្រកាសដាក់ដេញថ្លៃជាសាធារណៈ ដើម្បីធ្វើផ្លូវដីសប្រវែង៤គ.ម អស់ទឹកប្រាក់៣៤លានរៀល (គ្មានលូ ស្ពាន ស្លាកសញ្ញា) ដោយក្រុមហ៊ុនសុធិរាជ្យខន់ស្ត្រាក់សិន ជាអ្នកទទួលសាងសង់ (គិតជាមធ្យម១គម=៨,៥០០,០០០៛ ) ក្រោយមកលោកមេឃុំ ចាន់ សយ និងលោក កាន់ សាវុធ បានរួមគំនិតជាមួយ ក្រុមហ៊ុនសុធិរាជ្យខន់ស្ត្រាក់សិនដដែល លួចធ្វើផ្លូវប្រវែង១១គម ផ្សេងទៀត ដែលមិនបានប្រកាសដាក់ដេញថ្លៃ ជាសាធារណៈនោះទេ មានតម្លៃរហូត៤០៧លានរៀល ជាងតម្លៃខ្ពស់ជាងតម្លៃចាស់កប់ពពក ំ(គិតជាមធ្យម១គម=៣៧,០០០,០០០៛)។

ចំណែកឃុំស្រែសំបូរវិញ ដែលមានលោក ស៊ឹង ម៉ាន់ ជាមេឃុំ ក្នុងកំឡុងខែ ឆ្នាំ ដដែល បានដាក់ប្រកាសដេញថ្លៃ ជាសាធារណៈ ជួសជុលផ្លូវលំប្រវែង២,៥គម និងលូកាត់ផ្លូវ១កន្លែង អស់លុយ៣៧,៥១០,០០០៛ (គិតធាមធ្យម១គម=១៥,០០០,០០០៛) ។ ក្រោយមកលោក ស៊ឹង ម៉ាន់ និងលោក កាន់ សាវុធ បានរួមគំនិតជាមួយ ក្រុមហ៊ុន សុធិរាជ្យខន់ស្ត្រាក់សិន របស់លោកម៉ៅអេងជឺ លួចធ្វើផ្លូវប្រែង៧,៥គម ផ្សេងទៀត ដោយមិនប្រកាសដាក់ឱ្យដេញថ្លៃ ជាសាធារណៈដដែល ក្នុងតម្លៃទឹកប្រាក់៤០៧,០០០,០០០៛ ជាតម្លៃខ្ពស់ជាងតម្លៃដាក់ឱ្យដេញថ្លៃជាសាធារណៈកប់ពពក (គិតជាមធ្យម១គម=៤១,០០០,០០០៛)។

ដោយសារការឃុបឃិត ជាប្រពន្ធកិបកេងស៊ីលុយរដ្ឋអស់សន្ធឹកសន្ធាប់បែបនេះហើយ ទើបក្រុមហ៊ុនក្នុងខេត្តស្ទឹងត្រែង ចំនួន៤ មានក្រុមហ៊ុនផនប៊ុនថុង ក្រុមហ៊ុនទ្រីវន្ថា ក្រុមហ៊ុនទូចសុខា និងក្រុមហ៊ុនម៉ាត់ ហាសាន់ បានឯកភាពល្អដាក់ពាក្យប្តឹង ទៅអភិបាលខេត្តលោក ស្វាយ សំអ៊ាង ជួយស្វែងរកភាពត្រឹមត្រូវនិងយុត្តធម៌ ជូនប្រជាជននិងសង្គមជាតិ ។

បន្ទាប់ពីទទួលដំណឹងថា លោក ស្វាយ សំអ៊ាង អភិបាលខេត្ត ធ្វើការដោះស្រាយនូវរឿងរ៉ាវខាងលើ ដោយវិធីត្រជាក់ដូចទឹកអម្រឹត ដោយមិនឱ្យមានអ្នកចាញ់និងអ្នកឈ្នះ បែបនេះនោះ មហាជនងឿងឆ្ងល់ថា ម្តេចក៏ឱ្យមន្ត្រីពុលរលួយស៊ីលុយរដ្ឋរាប់រយលានរៀលបែបនេះរួចខ្លួនទៅវិញ?  ដែលមានភស្តុតាងបញ្ជាក់ច្បាស់ៗដូចព្រះសូរិយាទៅទៀត។ មន្ត្រីលួចស៊ីលុយរដ្ឋ ថែមទាំងមានភស្តុតាងបញ្ជាក់ច្បាស់បែរជាឱ្យរួចខ្លួន។ 

បើដូច្នេះ ស្នើសុំក្រសួង ស្ថាប័ន ពាក់ព័ន្ធ ជាពិសេសអង្គភាពប្រឆាំងអំពើពុករលួយសូមមេត្តាជួយចុះពិនិត្យចំពោះករណីខាងលើនេះផង៕ដោយនាគខៀវ