ភ្នំពេញ៖ប្រមុខដឹកនាំកម្ពុជា សម្ដេចតេជោ ហ៊ុន សែន នៅព្រឹកនេះបានអញ្ជើញចុះទៅពិនិត្យ មជ្ឈមណ្ឌល ស្រាវជ្រាវ និងអភិវឌ្ឍន៍
ពូជត្រី នៅខេត្តព្រៃវែង។
ប្រមុខដឹកនាំកម្ពុជា បានបញ្ជាក់ថា
នៅព្រឹកថ្ងៃអង្គារ៍ទី ១៤ កក្កដា នេះ ខ្ញុំនឹងចុះទៅពិនិត្យមើលមជ្ឈមណ្ឌលស្រាវជ្រាវ និងអភិវឌ្ឍន៍ពូជត្រី ហើយនឹងឆ្លៀតឱកាសជួបសំណេះសំណាលជាមួយបងប្អូនប្រជាកសិករនៅស្រុកពាមរក៍ខេត្តព្រៃវែងផងដែរ​ ប្រសិនបើពេលវេលាអនុញ្ញាត។

«ស្ថានីយ៍ផលិតកូនត្រីពូជ» នេះបានបង្កើតឡើងនៅឆ្នាំ១៩៨៨ ដោយរដ្ឋបាលជលផល សហការជាមួយអង្គការប៉ាដិក លើផ្ទៃដី១៦ហិកតា។ មកដល់ឆ្នាំ២០០៨ ក្រសួងកសិកម្មបានប្តូរឈ្មោះនិងបង្កើតទៅជាមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មទឹកសាបរហូតមកដល់សព្វថ្ងៃ។

មជ្ឈមណ្ឌលនេះ បានផលិតពូជត្រីរាប់លានកូនជារៀងរាល់ឆ្នាំ ដូចជាត្រីឆ្ពិន ត្រីប្រា ត្រីអណ្តែង ត្រីទីឡាព្យ៉ា កង្កែប បង្កង និងប្រភេទត្រីកាបមួយចំនួនទៀត សម្រាប់ចែកដល់កសិករចិញ្ចឹមទូទាំងប្រទេស និងលែងចូលទៅក្នុងដែនទឹកសាធារណៈ និងស្រះជម្រកត្រីសហគមន៍ជាដើម។

យើងនាំគ្នាបំផុសចលនាប្រជាកសិករឱ្យចូលរួមដាំដុះដំណាំស្បៀងតាមគោលការណ៍អភិវឌ្ឍន៍បៃតង ចិញ្ចឹមសត្វ និងវារីវប្បកម្មឱ្យបានសកម្មនៅក្នុងយុគសម័យបដិវត្តន៍ឧស្សាហកម្មទី៤ ដែលកម្ពុជាកំពុងមានការអភិវឌ្ឍពីប្រទេសពឹងផ្អែកលើវិស័យកសិកម្មទៅជាកសិ-ឧស្សាហកម្មវិញនេះ៕SRP

ខេត្តសៀមរាប៖សមត្ថកិច្ចស្រុកស្វាយលើបានរាយការណ៍ថាមនុស្សម្នាក់ត្រូវបានរន្ទះបាញ់សម្លាប់កាលពីល្ងាចម្សិលមិញ។
ហេតុការណ៍បានកើតឡើងនៅវេលាម៉ោង០៤និង៤០នាទីថ្ងៃទី១៣ខែកក្កដាឆ្នាំ២០២០ នៅចំណុចខាងជើងស្រែដំណាក់ ភូមិរំចេក ឃុំស្វាយលើ ស្រុកស្វាយលើ ខេត្តសៀមរាប។
ជនរងគ្រោះឈ្មោះវី ភេទ ប្រុសអាយុ៤៣ឆ្នាំ ទីលំនៅឃុំគោកធ្លកលើ ស្រុកជីក្រែង ខេត្តសៀមរាប មុខរបរធ្វើស្រែ។ មូលហេតុជនរងគ្រោះមកធ្វើស្រែ ហើយនៅថ្ងៃកើតហេតុរន្ទះបាញ់សម្លាប់តែម្ដង។ ជនរងគ្រោះបានបញ្ជូនទៅស្រុកកំណើត ដើម្បីធ្វើបុណ្យតាមប្រពៃណី៕SRP

ខេត្តសៀមរាប៖ចៅក្រមសើបសួរនៃសាលាដំបូងខេត្តសៀមរាប លោកមុយ សុភ័ក្រ្ត បានសម្រេចចេញដីកាបង្គាប់ឲ្យឃុំខ្លួន មនុស្សពីរនាក់ដាក់ពន្ធនាគារ
ពីបទកាប់រានព្រៃ ឈូសឆាយដីព្រៃ ហ៊ុំព័ទ្ធកាប់ដីព្រៃឈើ និងប្រើប្រាស់រណាយន្តដោយគ្មានការអនុញ្ញាតពីរដ្ឋបាលព្រៃឈើ ដែលបានប្រព្រឹត្តនៅភូមិរុងរឿង ឃុំកន្ទួត ស្រុកស្វាយលើ ខេត្តសៀមរាប កាលពីថ្ងៃទី ០៩ខែកក្កដាឆ្នាំ២០២០ បទល្មើសមានចែង និងផ្ដន្ទាទោសតាមបញ្ញត្ដិមាត្រា៩៧ កថាខណ្ឌ១ចំណុច៦ និងមាត្រា ៩៩ កថាខណ្ឌ ចំណុច១ នៅច្បាប់ស្ដីពីព្រៃឈើ។
ជនជាប់ចោទទី១ឈ្មោះ ហឿម ហុង ភេទប្រុសអាយុ២៩ឆ្នាំ កើតនៅភូមិរំដួលថ្មី ឃុំដូនពែង ស្រុកអង្គរជុំខេត្តសៀមរាប ទីលំនៅមុនចាប់ខ្លួន នៅភូមិរំដួលថ្មី ឃុំដូនពែង ស្រុកអង្គរជុំខេត្តសៀមរាប មុខរបរធ្វើស្រែ។
ជនជាប់ចោទទី២ឈ្មោះម៉ៅ ម៉ាងភេទប្រុសអាយុ២៨ ឆ្នាំ កើតនៅភូមិកំព្រំ ឃុំឃុនរាម ស្រុកបន្ទាយស្រីខេត្តសៀមរាប មុនចាប់ខ្លួន នៅភូមិកំព្រំ ឃុំឃុនរាម ស្រុកបន្ទាយស្រីខេត្តសៀមរាប៕SRP

ខេត្តសៀមរាប៖អាជ្ញាធរស្រុកក្រឡាញ់បានឲ្យដឹងថាមន្ត្រីយោធាម្នាក់បានស្លាប់និងម្នាក់ទៀតរងរបួសធ្ងន់ក្នុងហេតុការណ៍គ្រោះថ្នាក់ចរាចណ៍។
ហេតុការណ៍បានកើតឡើង
ថ្ងៃទី១៣ខែកក្កដាឆ្នាំ២០២០ វេលាម៉ោង ១៤និង១០នាទី វាងម៉ូតូនិងគោយន្ដកន្ត្រៃ លើផ្លូវជាតិលេខ៦៨ ត្រង់ចំណុចចន្លោះគីឡូម៉ែត្រលេខ២០និង២១មុខការ៉ាស់សាំងឈ្មោះ ឡង ម៉ៅ ស្ថិតនៅភូមិតាប៉ាង ឃុំសែនសុខ ស្រុកក្រឡាញ់ ខេត្តសៀមរាប។
អាជ្ញាធរបានបន្តថាករណីនេះគឺម៉ូតូម៉ាក វ៉េវអាល់ហ្វាពណ៌ខ្មៅ ពាក់ផ្លាកលេខ បន្ទាយមានជ័យ ១J៩៨៤៣ បើកបរឈ្មោះ អៀម ម៉ុន ភេទប្រុស អាយុ២៨ឆ្នាំ រស់នៅភូមិស្វាយ ឃុំថ្មពួក ស្រុកថ្មពួក ខេត្តបន្ទាយមានជ័យ (ស្លាប់)និងអ្នករួមដំណើរម្នាក់ឈ្មោះក្រឹម រ៉ា ភេទប្រុសអាយុ ៣៦ឆ្នាំរស់នៅភូមិចង្ក្រានយក្ស ឃុំបេង ស្រុកបន្ទាយអំពិល ខេត្តឧត្តរមានជ័យ (របួសធ្ងន់) ក្នុងទិសដៅពីត្បូងទៅជើង(អ្នកទាំងពីរជាទាហានធ្វើការនៅកងពលធំអន្តរាគមន៍លេខ២ វរសេនាតូចកាំភ្លើងត្បាល់ ១០០DKZ ៧៥) ពាក់មួកសុវត្ថិភាពទាំងពីរនាក់ បានបើកបុកគោយន្តកន្រ្តៃពីក្រោយម៉ាក់គូប៊ូតា ពណ៌ក្រហម គ្មានផ្លាកលេខកំពុងឈប់នៅចិញ្ចើមផ្លូវខាងជើងបែរក្បាលទៅទិសខាងជើង បើកបរដោយ(មិនទាន់ស្គាល់អត្តសញ្ញាណ) ដោយកើតហេតុរួចអ្នកបើកបរគោយន្តកន្ត្រៃបានរត់គេចខ្លួនបន្សល់ទុកគោយន្តកន្ត្រៃនៅកន្លែងកើតហេតុ។ ក្នុងនោះខូចខាតម៉ូតូមួយគ្រឿងធ្ងន់ និងគោយន្តកន្ត្រៃខូចខាតស្រាលមួយគ្រឿង។
បើតាមអាជ្ញាធរបញ្ជាក់ថាមូលហេតុះអាចបណ្តាលមកពីអ្នកបើកបរម៉ូតូមានល្បឿនលឿនដោយខ្វះការប្រុងប្រុងយ័ត្ន។ក្រោយកើតហេតុកម្លាំងជំនាញបានយកវត្ថុតាង រក្សាទុកនៅប៉ុស្តិ៍នគរបាលរដ្ឋបាលសែនសុខស្រកក្រឡាញ់៕SRP

ខេត្តកំពង់ឆ្នាំង៖សេចក្ដីរាយការណ៍បានឲ្យដឹងថាសត្វគោចំនួន០៨ក្បាល ដែលម្ចាស់បានលែងឲ្យរកស៊ីស្មៅនៅតាមផ្លូវសាធារណៈ ត្រូវគោយន្តកែឆ្នៃមួយគ្រឿងបុកងាប់។

ហេតុការណ៍ការខាងលើនេះបានកើតឡើងនៅវេលាម៉ោង៨និង១០នាទីព្រឹកថ្ងៃទី១៣ខែកក្កដាឆ្នាំ២០២០លើផ្លូវក្រាលគ្រួសក្រហម លេខ៥១C ចំណុចអូរធំ ស្ថិតភូមិកង្កែប ឃុំច្រណូក ស្រុកកំពង់លែង  ជាផ្លូវតភ្ជាប់ពីខេត្តកំពង់ធំ មកស្រុកកំពង់លែង។

លោកវរសេនីយ៍ឯក ប៉ាល់ ជឿន អធិការនគរបាលស្រុកកំពង់លែង បានឲ្យដឹងតាមទូរស័ព្ទនៅរសៀលថ្ងៃនេះថា៖ ករណីគ្រោះថ្នាក់ចរាចរណ៍នេះ កើតទ្បើងដោយមានគោយន្ដកែឆ្នៃមួយគ្រឿង គ្មានស្លាកលេខ បើកបរក្នុងទិសដៅពី ខេត្តកំពង់ធំមកស្រុកកំពង់លែង ខណៈដែលអ្នកបើកបរ បានបើកគេចជង្ហុក ក៏ជ្រុលទៅបុកសត្វគោទាំង០៨ក្បាលនេះងាប់រណូកប្រណែល ក្នុងនោះមានគោញីចំនួន០៥ក្បាល ដែលម្ចាស់បានលែងឲ្យស៊ីស្មៅតាមផ្លូវសាធារណៈ។

អធិការនគរបាលស្រុកកំពង់លែងបានបញ្ជាក់ថា៖ ក្រោយពេលកើតហេតុអ្នកបើកបរបានចុះរត់គេចខ្លួនបាត់ ដែលគេមិនទាន់ស្គាល់អត្តសញ្ញាណគេនៅឡើយដោយទុកគោយន្តកែច្នៃនៅនិងកន្លែងកើតហេតុ។ ករណីនេះសមត្ថកិច្ច បានយកគោយន្តមករក្សាទុកនៅអធិការដ្ឋាននគរបាលស្រុកកំពង់លែង ដើម្បីកសាងសំណុំរឿងតាមនីតិវិធី៕SRP

ខេត្តសៀមរាប៖ លោកវរសេនីយ៍ទោ លឹម សម្បត្តិ អធិការនគរបាលស្រុកប្រាសាទបាគង បានឲ្យដឹងថាថ្ងៃច័ន្ទ ទី១៣ខែកក្កដាឆ្នាំ២០២០វេលាម៉ោង៨និង២៩នាទីមានករណីគ្រោះថ្នាក់ចរាចរណ៍ចំណុចបង្គោលគីឡូលេខ ២៩៨៧ ២៩៨ ភូមិស្ទឹង ឃុំបាគង ស្រុកប្រាសាទបាគង លើផ្លូវជាតិលេខ៦ រវាងម៉ូតូសណ្ដោងរ៉ឺម៉ក និងរថយន្ដ២គ្រឿង ម៉ាកហុងដា សេ១២៥សេរី ២០១០ ពណ៌ខ្មៅ ពាក់ផ្លាកលេខ បន្ទាយមានជ័យ 1H 9030 បើកបរដោយឈ្មោះ កាយ ម៉ាប ភេទប្រុសអាយុ៣១ឆ្នាំសញ្ជាតិខ្មែរដែលមានទីលំនៅភូមិតាត្រាវ ឃុំ កន្រ្ទាំង ស្រុកប្រាសាទបាគង ខេត្ដសៀមរាប(ស្លាប់) បើកម៉ូតូសណ្ដោងរ៉ឺម៉កដឹកប្រពន្ធពីក្រោយ ឈ្មោះ ក្រឹម ស្រីខួន អាយុ ២៥ឆ្នាំសញ្ជាតិខ្មែរ (របួសធ្ងន់) ដែលបើកបរពីទិសខាងលិចទៅកើត បុកនិង រថយន្ដម៉ាកកាមរីបាឡែនពណ៌ទឹកមាស ពាក់ផ្លាកលេខ ភ្នំពេញ2Y 9479 បើកបរដោយឈ្មោះ ឆែម លាងសុង ភេទប្រុសអាយ៤២ឆ្នាំសញ្ជាតិខ្មែរដែលមានទីលំនៅឃុំរកាពប្រាំ ស្រុកត្បូងឃ្មុំ ខេត្ដត្បូងឃ្មុំ បើបរមានទិសដៅពីលិចទៅកើត ក្រោយពេលកើតហេតុរួច ម៉ូតូសណ្ដោងរ៉ឺម៉កវេចង្កូតទៅបុកជាមួយរថយន្ដដឹកដី ម៉ាក នីសាន់ពណ៌ទឹកស ពាក់ផ្លាកលេខ តាកែវ3A 26 21 បើកបរដោយមិនស្គាល់អត្ដ សញ្ញាណ បើកបរមាទិសដៅពីកើតទៅលិច ក្រោយពេលកើតហេតុរួចអ្នកបើកបររថយន្ដដឹកដីបានរត់គេចខ្លួនបាត់ទៅ។

លោកវរសេនីយ៍ទោ លឹម សម្បត្តិ បន្តថា មូលហេតុម៉ូតូសណ្ដោងរ៉ឺម៉កបើកបរមានល្បឿនលឿនខ្វះការប្រុងប្រយ័ត្ន។

វត្ថុតាងទាំងបីគ្រឿងបានយកមករក្សាទុកនៅអធិ ការ រដ្ឋា ននគរ បាល ស្រុកប្រាសាទបាគង ៕SRP

ខេត្តកំពង់ចាម៖លោក​ អ៊ុន ចាន់ដា អភិបាលខេត្តកំពង់ចាម និងជាប្រធានគណកម្មការគ្រប់គ្រងដីរដ្ឋថ្នាក់ខេត្តនៅព្រឹកមិញបាន​អញ្ជើញដឹកនាំកិច្ចប្រជុំ ពិភាក្សា លើការស្នើសុំចុះបញ្ជីប្លង់ធ្វើប័ណ្ណកម្មសិទ្ធិ និង​ដាំដុះ​អាស្រ័យ​ផល​លេី​ដី​ ទំហំ៧១,៨១២ ម៉ែត្រការ៉េ​ នៅក្នុងតំបន់អភិរក្ស រមណីយដ្ឋានភ្នំជើងព្រៃ ស្ថិតនៅក្នុងភូមិគោករវៀង ឃុំគោករវៀង ស្រុកជើងព្រៃ តាមការស្នើសុំរបស់ម្ចាស់សំណើ។

ក្រោយកិច្ចប្រជុំពិភាក្សា លោកប្រធានគណកម្មការ បានសម្រេចបង្វែសំណើខាងលើជូនទៅក្រសួងវប្បធម៌​ និងវិចិត្រសិល្បៈ​ ដើម្បីធ្វើការពិនិត្យ សម្រេច ព្រោះថាដីនៅក្នុងតំបន់អភិរក្ស រម្មណីយដ្ឋានភ្នំជើងព្រៃ កន្លងមកស្ថិត​ក្រោម​ការគ្រប់គ្រង របស់ក្រសួងវប្បធម៌និងវិចិត្រសិល្បៈ។​

គួរ​បញ្ជាក់​ផង​ដែរ​ថា​ ភ្នំជើងព្រៃ ដែល​មាន​ប្រវត្តិ​ជា​យូរ​លង់​ណាស់​មក​ហើយ​នោះ ឥឡូវនេះ​បាន​ក្លាយ​ទៅ​ជា​​រមណីយដ្ឋាន​មួយ​ដ៏សែន​មនោរម្យ​សម្រាប់​បបោស​អង្អែល​អារម្មណ៍​ភ្ញៀវទេសចរ។ អាស្រ័យ​ដោយ លក្ខណៈ​ភូមិ​សាស្រ្ត​អំណោយ​ផល ភ្នំជើង​ព្រៃ ស្ថិតនៅ​ចម្ងាយ​ប្រមាណ​តែ​២គ.ម ប៉ុណ្ណោះ​ពីផ្លូវ​ជាតិ លេខ៧ និង​៥៦គ.ម ពីក្រុងកំពង់ចាម ស្ថិត​នៅ​ក្នុង​ភូមិគោក​រវៀង ឃុំ​គោករវៀង ស្រុក​ជើងព្រៃ។ នៅទីនោះមានសក្តានុពលទេសចរណ៍សំខាន់ដែលទាក់ទងនឹងរឿងព្រេងបុរាណខ្មែរ។ ដោយភ្ញៀវទេសចរអាចទស្សនាប្រាសាទបុរាណ និងទេសភាពបែបធម្មជាតិពិលើកំពូលភ្នំ​៕SRP

ខេត្តកំពង់ចាម៖តំណាង​លោក​ អ៊ុន​ ចាន់ដា​ អភិបាលខេត្ត​កំពង់ចាម​ លោក​ ឡី​ មិច​ នាយក​រង​រដ្ឋបាល​សាលា​ខេត្ត​​ នាព្រឹក​ថ្ងៃ​ទី​១៣​ ខែកក្កដា​ ឆ្នាំ​២០២០នេះ​ បាន​អញ្ជើញ​ចូលរួម​ក្នុង​ពិធី​​ដាក់​សំណើ​ដេញ​ថ្លៃ​គម្រោង​មូលនិធិ​ឃុំ​ ចំនួន​៤​គម្រោង​ នៅ​សាលា​ស្រុក​កោះសូទិន​ ដោយ​មាន​ការ​ចូលរួម​ពី​ លោក​ យី​ វណ្ណៈ​ អភិបាល​ស្រុក​ ​លោក​ ពោយ​ សុខជា​​ នាយករង​ទីចាត់ការ​ផែនការ​និង​វិនិយោគ​ខេត្ត​ ​និង​គណៈកម្មការ​ម្ចាស់​លទ្ធកម្ម​ ​ព្រមទាំង​មន្ត្រី​ពាក់ព័ន្ធ​ និង​​តំណាង​ក្រុម​ហ៊ុន​ អ្នក​ទទួល​ការ​ ជា​ច្រើន​រូប​ផង​ដែរ​។ ​​

លោក​ យី​ វណ្ណៈ​ បាន​ធ្វើ​ការ​សំណូមពរ​ដល់​គណៈកម្មការ​លទ្ធកម្ម​ និង​ក្រុម​ហ៊ុន​ អ្នក​ទទួល​ការ​ទាំងអស់​ សូម​ឲ្យ​ការអនុវត្ត​គម្រោង​ធ្វើ​យ៉ាងណា​ ​ត្រូវ​ឲ្យ​​មាន​តម្លាភាព​ ហេីយ​ធ្វើ​ការ​សាងសង់​ឲ្យ​ត្រូវ​តាម​បទដ្ឋាន​លក្ខណៈ​បច្ចេកទេស​ ប្រយោជន៍​ដល់​ការ​ប្រើប្រាស់​បាន​យូរ​អង្វែង។

លោក​ ​ឡី​ មិច​ បាន​ថ្លែង​អំណរគុណ​ដល់​អាជ្ញាធរ​ស្រុក​កោះសូទិន​​ ដែល​បាន​រៀបចំ​នីតិវិធី​នៃ​ការ​ដេញ​ថ្លៃ​នេះ​ ឲ្យ​មាន​សណ្ដាប់​ធ្នាប់​ និង​របៀបរៀបរយ​ល្អ​ ព្រមទាំង​បាន​សំណូមពរ​ដល់​អ្នក​ទទួល​ការ​ ឲ្យ​សហការ​ជាមួយ​អាជ្ញាធរ​ ដេីម្បី​លុបបំបាត់នូវ​ភាព​អនាធិបតេយ្យ​ ដែល​បង្ក​ឡើង​ដោយ​ក្រុម​ឆ្លៀត​ឱកាស​មួយ​ចំនួន​។

គួរ​បញ្ជាក់​ផង​ដែរ​ថា​ គម្រោង​មូលនិធិ​ឃុំ​ ដែល​បាន​ដាក់​ឲ្យ​ដេញ​ថ្លៃ​ខាង​លើ​នេះ​ គឺមាន​ផ្លូវ​ចំនួន​៤ខ្សែ​​ ដែល​ត្រូវ​ស្ថាបនា​​ ជូន​ប្រជាពលរដ្ឋ​​ប្រើប្រាស់​ ក្នុង​នោះ​មាន​ ១-ឃុំ​ពង្រសាងសង់ផ្លូវបេតុងអាមេ ប្រវែង ០.៥៤៥ គ.ម ទទឹង៣ម កម្រាស់ ០.១៥ម នៅភូមិព្រែករំដេងលិច ។
២-ឃុំ​ល្វេ​ សាងសង់ផ្លូវបេតុងអាមេ ប្រវែង ០.៥៧៩ គ.ម ទទឹង៣ម នៅភូមិអំបែងចេះ​។
៣-ឃុំ​ពាមប្រធ្នោះ​ សាងសង់ផ្លូវបេតុងអាមេ ប្រវែង ០.៦២៥ គ.ម ទទឹង៤ម នៅភូមិវាល​។
៤-ឃុំ​មហាលាភ​ សាងសង់ផ្លូវបេតុងអាមេ ប្រវែង ០.៥៤០ គ.មទទឹង៤មនៅភូមិរកាកោងត្បូង​៕SRP

ខេត្តសៀមរាប៖ សេចក្ដីរាយការណ៍ព័ត៌មានបឋមបានឲ្យដឹងថាបុរសម្នាក់ត្រូវបានរថយន្តដឹកដីបើកកិនបណ្តាលឲ្យស្លាប់ភ្លាមនៅមុននេះបន្តិច។

ហេតុការណ៍បានកើតឡើងនៅចំណុចភូមិស្ទឹង ស្រុកប្រាសាទបាគង ខេត្តសៀមរាបនាថ្ងៃទី១៣ខែកក្កដាឆ្នាំ២០២០នេះ។
ជនរងគ្រោះឈ្មោះ កាយ ម៉ាប អាយុ៣១ ឆ្នាំរស់នៅ ឃុំកន្រ្តាំង ស្រុកប្រាសាទបាគង ខេត្តសៀមរាប ស្លាប់នៅនឹងកន្លែងកើតហេតុ បើកពីលិចទៅកើត។ ប្រពន្ធឈ្មោះក្រឹម ស្រីខួន អាយុ២៥ឆ្នាំ រស់នៅ ឃុំកន្ទ្រាំងស្រុកប្រាសាទបាគង របួសធ្ងន់បញ្ជូនទៅមន្ទីរពេទ្យ។

បើតាមសេចក្ដីរាយការណ៍ន្តថា ជនរងគ្រោះដែលស្លាប់បើករ៉ឺម៉កដឹកដូង ទៅបុកគូទរថយន្តបាឡែនដែលធ្វើដំណើរស្របទិសគ្នា ហើយខ្ទាតចេញពីរ៉ឺម៉កទៅលើថ្នល់ ហើយក៏មានរថយន្តហីយ៉ានដាយ ដែលបើកបញ្ច្រាសទិសគ្នា បានបុកកិនស្លាប់តែម្ដង។

ក្រោយកើតហេតុរថយន្តបាឡែនរថយន្តដឹកដីបានបើករត់ប៉ុន្តែត្រូវបានសមត្ថកិច្ចឃាត់បានទាំងពីរគ្រឿងផងដែរ។ ទោះយ៉ាងណាពាក់ព័ន្ធករណីគ្រោះថ្នាក់ចរាចរណ៍នេះមិនទាន់មានការបញ្ជាក់បន្ថែមពីសមត្ថកិច្ចស្រុកប្រាសាទបាគងនៅឡើទេ៕SRP

ខេត្តព្រៃវែង៖ ប្រជាពលរដ្ឋពីរគ្រួសារបាននាំគ្នាជិត២០នាក់មកបោះបង្គោលលើព្រំដីក្រោយសាលាឃុំរាប ដោយអះអាងថាជាដី កេរ្តិ៍ដំណែល របស់ឪពុកម្តាយគាត់តាំងពីពួកគាត់នៅក្មេងៗមកម្ល៉េះតែអាជ្ញាធរឃុំរាប មិនអនុញ្ញាត ដោយអះអាងថាជាដីរបស់សាលាឃុំ។

នៅព្រឹកថ្ងៃទី១២ ខែកក្កដា ឆ្នាំ២០២០នេះលោកស្រី ប្រាក់ វណ្ណនឿន នឹង ប្អូនស្រីរបស់គាត់ឈ្មោះ ប្រាក់ វណ្ណី រស់នៅភូមិវៃវេទ ឃុំរាប ស្រុកពារាំង ខេត្តព្រៃវែងបានប្រាប់អ្នកសារព័ត៌មានថាដីដែលមានទីតាំងនៅក្រោយសាលាឃុំរាប នេះគឺជាដីកេរ្តិ៍ដំណែលពីឪពុកម្តាយគាត់ចែកអោយពួកគាត់អាស្រ័យផលដើម្បីចិញ្ចឹមជីវិតហើយកន្លងមកក៏មានអាជ្ញាធរភូមិឃុំចាស់ៗទទួលស្គាល់ដីនេះថាជាដីរបស់ពួកគាត់៦ជំនាន់មកហើយដែរ តែលោក ផន ផល មេឃុំរាប បច្ចុប្បន្នមិនទទួលនិងហាមឃាត់មិនអោយគាត់ធ្វើរបងឬបោះបង្គោល។

ដូច្នេះពួកគាត់សូមសំណូមពរដល់មន្ត្រីថ្នាក់ដឹកនាំខាងលើជួយពិនិត្យមើលនឹងជួយសម្រួលដល់ពួកគាត់ផង។

ជុំវិញករណីនេះលោក ផន ផល មេឃុំរាប បានឲ្យដឹងថាដីក្រោយសាលាឃុំរាប នេះគឺមិនមែនតែគាត់ទេ ដែលមិនអនុញ្ញាតគឺកន្លងមកក៏មានមេឃុំមុនៗ ក៏មិនអនុញ្ញាតដែរ។ លោកក៏បានបញ្ជូនទៅដល់សាលាស្រុករួចហើយដែរ តែខាងស្រុកដោះស្រាយឬមិនដោះស្រាយគាត់ក៏មិនដឹងដែរ។

គួររំលឹកផងដែរថាកន្លងមកនៅឃុំរាប នេះគឺធ្លាប់មានបញ្ហារឿងដីធ្លីច្រើនករណីហើយក៏ធ្លាប់មានការរិះគន់ពីប្រជាពលរដ្ឋខ្លះផងដែរ តែក៏បានអាជ្ញាធរស្រុកដែលមានលោក ហ៊ី ធួក អភិបាលស្រុកបានជួយដោះស្រាយជូនប្រជាពលរដ្ឋបានដោយជោគជ័យ ប្រកបដោយយុត្តិធម៌ដែលប្រជាពលរដ្ឋទទួលយកបានដោយរីករាយ ប៉ុន្តែឥឡូវនេះក៏ស្រាប់តែមានករណីដូចខាងលើនេះមួយទៀត ដូច្នេះសង្ឃឹមថាអាជ្ញាធរស្រុកនឹងដោះស្រាយជូនពួកគាត់បានដោយជោគជ័យដូចកាលពីកន្លងមកផងដែរ៕ SRP ដោយ: សូ សុខា

ភ្នំពេញ៖យោងតាមប្រភពពីសមត្ថកិច្ចពាក់ព័ន្ធនៅច្រកទ្វេភាគីបុសមន បានឲ្យដឹងថា កាលជំនាន់លោក ខៀវ សារឿន នៅធ្វើជាប្រធានសាខាគយខេត្តស្វាយរៀង បានបណ្តោយឲ្យលោក ឃុត សាលីន ប្រធានការិយាល័យគយច្រកទ្វេភាគីបុសមន ប្រើអំណាចរបស់ខ្លួនឲ្យកូនចៅប្រមូលលុយពីអាជីវករតាមអំពើចិត្ត។ ឥឡូវនេះនៅពេលដែលលោក ហេង សំបូរ ចូលកាន់តំណែងជាប្រធានសាខាគយខេត្តស្វាយរៀង ក៏នៅតែបណ្តោយឲ្យ​លោក ឃុត សាលីន ប្រធានការិយាល័យគយច្រកទ្វេភាគីបុសមន បន្តប្រមូលលុយតាមរបៀបពុករលួយដដែល។ លើសនេះទៅទៀតលោក ឃុត សាលីន ឃុបឃិតឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញក្លែងក្លាយយ៉ាងពេញបន្ទុកដើម្បីជាថ្នូរនឹងផលប្រយោជន៍យ៉ាងសុខស្រួល ព្រោះអាងមានខ្នងបង្អែករឹងមាំចាំជួយការពារ។

ប្រភពពីប្រជាពលរដ្ឋនិងក្រុមអាជីវករដែលនាំទំនិញពីវៀតណាមចូលតាមច្រកទ្វេភាគីបុសមន ស្រុករំដួល ខេត្តស្វាយរៀង បានឲ្យដឹងថា បច្ចុប្បន្នមានមនុស្សរបស់លោក ឃុត សាលីន ឈរនៅខាងមុខរបងស្នាក់ការការិយាល័យគយនិងរដ្ឋាករបុសមន ប្រមូលលុយពីពួកគាត់តាមរបៀបពុករលួយយ៉ាងងងើល។ ប្រភពបានឲ្យដឹងទៀតថា អ្នកដឹក​ទំនិញតាមម៉ូតូត្រូវបង់១ម៉ឺនរៀល អ្នកដឹកទំនិញតាមរ៉ឺម៉កម៉ូតូ គេយក៤ម៉ឺនរៀលទៅ១០ម៉ឺនរៀល ហើយអ្នកដឹកទំនិញតាមគោយន្ត និងរ៉ឺម៉កធំៗត្រូវបង់ពី១០ម៉ឺនរៀលទៅ៨០ម៉ឺនរៀល តាមទំហំរ៉ឺម៉ក ទំហំត្រាក់ទ័រនិងបរិមាណទំនិញ។

ក្រុមឈ្មួញនិងអាជីវករបានឲ្យដឹងទៀតថារាល់ការបង់លុយរបស់ពួកគាត់មិនទទួលបានបង្កាន់ដៃឬវិក្កយបត្រត្រឹមត្រូវឡើយ ដោយអ្នកប្រមូលលុយប្រាប់ពួកគាត់ថា ធ្វើតាមបញ្ជារបស់លោក ឃុត សាលីន ប្រធានការិយាល័យគយច្រកទ្វេភាគីបុសមន។

បើតាមការបង្ហើបពីមន្ត្រីគយនិងខេត្តស្វាយរៀង មួយចំនួនបានឲ្យដឹងថា កន្លងមកការដែលលោក ឃុត សាលីន ប្រធានការិយាល័យគយច្រកទ្វេភាគីបុសមន ហ៊ានប្រើអំណាចឲ្យមន្ត្រីខ្លួនប្រមូលលុយមិនញញើតគឺដោយសារអាងមានលោក ខៀវ សារឿន អតីតប្រធានសាខាគយខេត្តស្វាយរៀង ជាបង្អែកដ៏រឹងមាំ។ ដូច្នេះលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាលោក គុណ ញឹម អគ្គនាយកគយ មិនគួរបណ្តែតបណ្តោយតទៅទៀតទេ ព្រោះរឿងអាស្រូវយ៉ាងពេញបន្ទុករបស់លោក ឃុត សាលីន ប្រធានការិយាល័យគយច្រកទ្វេភាគីបុសមន ជារឿងមិនអាចបិទបាំងបានឡើយ។ ពាក់ព័ន្ធករណីនេះបណ្ដាញសារព័ត៌មានសៀមរាបប៉ុស្ដិ៍នៅមិនទាន់ទទួលបានការបំភ្លឺពីលោកឃុត សាលីន បាននៅឡើយទេ ដោយមិនមានលេខទំនាក់ទំនង៕SRP

ខេត្តកំពង់ស្ពឺ៖លោកឧត្តមសេនីយ៍ឯក ហ៊ុន ម៉ាណែត បានលើកឡើងថា ប្រទេសជាតិរឹងមាំគឺផ្អែកទៅលើវិស័យការពារជាតិខ្លាំង ហើយវិស័យការពារជាតិខ្លាំង គឺដោយសារកងទ័ពយើងខ្លាំង។ នាយទាហានជំនាន់មុនបានបន្សល់ទុកនូវស្នាដៃការពារជាតិ ដើម្បីបុព្វហេតុជាតិ មកដល់យើងសព្វថ្ងៃនេះ ដូច្នេះយើងត្រូវបន្តថែរក្សានូវកេរមរតកនេះទៅមុខទៀត ដោយឈរលើមូលដ្ឋានៃស្មារតីឆន្ទៈ បទពិសោធន៍ ហើយបូកផ្សំជាមួយនឹងសមត្ថភាពជាក់ស្តែង។

ការលើកឡើងបែបនេះក្នុងពិធីជួបសំណេះសំណាលជាមួយសិក្ខាកាមវគ្គបណ្តុះបណ្តាលយោធាចារ្យជំនាន់ទី២ បំពេញក្របខ័ណ្ឌឲ្យសាលាពលទាហានចំណុះយោធភូមិភាគ ឆ្នាំ២០២០ មូលដ្ឋានកងយោធពលខេមរភូមិន្ទតេជោសែន ភ្នំធំម្រះព្រៅ នាព្រឹក ថ្ងៃទី១១ ខែកក្កដា ឆ្នាំ២០២០។

លោកហ៊ុន ម៉ាណែត បានបន្ថែមថា ការហ្វឹកហ្វឺនពលទាហានឱ្យមានមូលដ្ឋានគ្រឹះច្បាស់លាស់ គឺជាកត្តាសំខាន់បំផុតដែលធ្វើឱ្យកងទ័ពរបស់យើងខ្លាំងហើយអាចការពារជាតិមាតុភូមិរបស់យើងបានយូរអង្វែងទៅមុខទៀត។ ការហ្វឹកហ្វឺនត្រូវផ្អែកលើកត្តាពីរ ទីមួយគឺស្មារតីស្នេហាជាតិ សាសនា ព្រះមហាក្សត្រ និងទីពីរគឺកត្តាសមត្ថភាពដោយមានភាពម្ចាស់ការលើខ្លួនឯង។ នេះហើយជាស្មារតីជាតិនិយម ដើម្បីបង្កើននូវភាពជឿទុកចិត្តលើខ្លួនឯងនៅក្នុងការធានាម្ចាស់ការលើអនាគតរបស់យើង។

លោកបានបញ្ជាក់ថា យោធាចារ្យមានតួនាទីសំខាន់ណាស់។ អាជីពជាយោធាចារ្យ មានលក្ខណៈពិសេសពីរ ទីមួយគឺយើងបានចូលរួមដោយផ្ទាល់ក្នុងការបម្រើជាតិតាមរយៈការបង្រៀនពលទាហានរបស់យើងឱ្យមានមូលដ្ឋានក្នុងការការពារខ្លួន ក៏ដូចជាការពារអង្គភាព ធានាបាននូវជោគជ័យក្នុងការបំពេញភារកិច្ច ដែលជាមោទភាពក្នុងការចូលរួមចំណែកការពារជាតិតាមរយៈការបណ្តុះបណ្តាលនូវវីរជនឆ្នើមៗ ទីពីរគឺយោធាចារ្យទទួលបាននូវកិត្តិយសមហាសាលដែលដក់ជាប់ក្នុងក្រអៅបេះដូងរបស់សិស្សគ្រប់រូប ក្នុងនាមជាអ្នកមានគុណដែលបានផ្តល់នូវចំណេះដឹងដល់ពួកគេ។

លោក លើកបង្ហាញ ដល់សិក្ខាកាម និងយោធាចារ្យ ឱ្យយល់អំពីតម្លៃនៃអាជីពមួយនេះ ហើយយកចិត្តទុកដាក់ខ្ពស់ក្នុងការហ្វឹកហ្វឺន និងចេញទៅបំពេញភារកិច្ចបង្រៀននៅតាមបណ្តាសាលា ប្រកបដោយឆន្ទៈ និងមនសិកាខ្ពស់ចេញពីបេះដូង។ លោកបានបន្តថាសូមយល់ផងដែរអំពីអត្ថប្រយោជន៍នៃអាជីពមួយនេះ តាមរយៈការចោទសួរថា តើយើងបានបន្សល់ទុកអ្វីខ្លះជូនកងទ័ពយើងបន្ទាប់ពីការចូលនិវត្តន៍ទៅ គឺយោធាចារ្យម្នាក់អាចបន្សល់ទុកនូវយោធិនរាប់ពាន់នាក់ដែលយើងបានចូលរួមបណ្តុះបណ្តាល រួមទាំងការបន្សល់ទុកនូវប្រព័ន្ធហ្វឹកហ្វឺនបណ្តុះបណ្តាលអប់រំកងទ័ព បន្តទុកឱ្យកូនចៅយើងជំនាន់ក្រោយៗទៀត។ ដូច្នេះហើយឱកាសជាយោធាចារ្យនេះ គឺជាឱកាសពិសេសមួយដែលសិក្ខាកាមយើងអាចចូលរួមក្នុងការកសាងសមិទ្ធិផលសម្រាប់កងទ័ពតាមរយៈការកសាងបណ្តុះបណ្តាលធនធានមនុស្ស។

លោកក៏បានកោតសរសើរ និងថ្លែងអរគុណថ្នាក់ដឹកនាំកងទ័ពជើងគោក នៃកងយោធពលខេមរភូមិន្ទ, អង្គភាព-ស្ថាប័នពាក់ព័ន្ធ, គណៈគ្រប់គ្រងវគ្គ, យោធាចារ្យ ក៏ដូចជានាយទាហាន, នាយទាហានរង និងពលទាហានទាំងអស់នៃកងពលតូចលេខ៧០ ដែលបានដែលបានសហការជួយរៀបចំ និងបង្កលក្ខណៈឱ្យការហ្វឹកហ្វឺននេះដំណើរការបានល្អប្រសើរ និងសូមអរគុណដល់បេក្ខជនយោធាចារ្យទាំងអស់ដែលបានស្ម័គ្រចិត្ត និងសកម្មយកចិត្តទុកដាក់ចូលរួមនៅក្នុងការហ្វឹកហ្វឺននេះ៕SRP