ខេត្តសៀមរាប៖អធិការដ្ឋាននគរបាលស្រុកក្រឡាញ់លោកវរសេនីយ៍ឯក ជី បេងជន បានឲ្យដឹងនៅរសៀលថ្ងៃនេះថាករណីប្រជាពលរដ្ឋដែលបានពុលនំបញ្ចុកកាលពីម្សិលមិញ ពួកគាត់បានជាសះស្បើយទាំងអស់វិញហើយ។
លោកវរសេនីយ៍ឯក ជី បេងជន បានបន្តថាជនរងគ្រោះសរុប១៣នាក់ស្រី០៦នាក់៖១-ឈ្មោះ ថូវ ប្រុក ភេទ ប្រុស អាយុ៣០ឆ្នាំ
២-ឈ្មោះ សៀន ប៉ប់ ភេទ ស្រី អាយុ៤៥ឆ្នាំ
៣-ឈ្មោះ ក្រូច ស្រី ភេទ ប្រុស អាយុ៤៥ឆ្នាំ
៤-ឈ្មោះ លាត ហ៊ីង ភេទ ប្រុស អាយុ៣៥ឆ្នាំ
៥-ឈ្មោះ រុំ រ៉ង ភេទ ប្រុស អាយុ៤៥ឆ្នាំ
៦-ឈ្មោះ អ៊ាម អ៊ី ភេទប្រុស អាយុ៤៨ឆ្នាំ
៧-ឈ្មោះ ឡាត ណូត ភេទប្រុស អាយុ៥៦ឆ្នាំ
៨-ឈ្មោះ សៀវ សៅ ភេទស្រី អាយុ១២ឆ្នាំ
៩-ឈ្មោះ សាន់ សៀវ ភេទ ប្រុសអាយុ៥៩
១០-ឈ្មោះ តក់ រុំា ភេទ ស្រី អាយុ៥៧ឆ្នាំ
១១-ឈ្មោះនាត សារៀន ភេទស្រីអាយុ១១ឆ្នាំ
១២-ឈ្មោះនាត សារ៉ាន់ ភេទស្រីអាយុ០៩ឆ្នាំ
១៣-ឈ្មោះបាន សាមឿយ ភេទស្រីអាយុ០៨ឆ្នាំ។

លោកបន្តថាក្រោយកើតហេតុជនរងគ្រោះទាំងអស់ត្រូវបានកម្លាំងប៉ុស្តិ៍ក្រូចគរបញ្ចូនមកសង្រ្គោះនៅមណ្ឌលសុខភាពក្រូចគរ ក្នុងនោះម្នាក់ឈ្មោះ ថូវ ប្រុក ភេទប្រុសអាយុ៣០ ឆ្នាំបញ្ជូនមកមន្ទីរពេទ្យបង្អែកស្រុកក្រឡាញ់។

លោកបានបញ្ជាក់ទៀតថាករោយពីទទួលព័ត៌មានអធិការបានបញ្ជាកម្លាំងជំនាញបានចុះទៅដល់កន្លែងកើតហេតុភ្លាមៗនិងពិនិត្យធ្វើកោសល្យវិច្ច័យផងដែរ។ដោយស្ថានភាពសុខភាពរបស់ជនរងគ្រោះទាំង១៣នាក់ មានសភាពល្អ។កនុងហេតុការណ៍នេះមិនបណ្តាលអោយមានគ្រោះថ្នាក់ដល់អាយុជីវិតនោះឡើយ។

អធិការបន្តទៀតថាករណីនេះអាចបណ្ដាលមកពីល្បោយបន្លែ។ទោះយ៉ាងណាពលរដ្ឋទាំង១៣នាក់បានវិលត្រឡប់ទៅផ្ទះរៀងៗខ្លួនវិញហើយ។សូមជម្រាបថាករណីពុលនំបញ្ចុកនេះនៅថ្ងៃទី២៣ខែមិថុនាឆ្នាំ២០២០វេលាម៉ោង៩ព្រឹកនៅចំណុចផ្ទះកម្មវិធីបុណ្យចំរើនអាយុរបស់ ឈ្មោះ សាន់ ក្រួច ភេទប្រុស អាយុ៦៤ឆ្នាំ ភូមិគោកចំបក់ ឃុំក្រូចគរ ស្រុកក្រឡាញ់ ខេត្តសៀមរាប៕SRP

ខេត្តសៀមរាប៖ អភិបាលខេត្តសៀមរាបនៅថ្ងៃទី២៣ខែមិថុនាម្សិលមិញបានដឹកនាំក្រុមការងារបច្ចេកទេសឈ្មោះផ្លូវនិងលេខផ្លូវក្នុងក្រុងសៀមរាប។  ដោយអាជ្ញាធរថាផ្លូវក្នុងក្រុងសៀមរាប ដែលក្រុមការងារបានសិក្សានិងរៀបចំមានចំនួន១៨១៦ខ្សែ ក្នុងនោះផ្លូវប្រមាណជាង ៥០ខ្សែ ត្រូវបានដាក់ឈ្មោះ នៅពេលឆាប់ៗខាងមុខនេះ។

សូមបញ្ជាក់ថាអាជ្ញាធរបានឯកភាពលើការកំណត់លេខផ្លូវបានកំណត់ជាប្លុកចំនួន៤ប្លុក ក្នុងនោះប្លុក(ក) មានចំនួន ៥៧៥ខ្សែ ប្រវែងសរុប ១១៤ពាន់៦០០ម៉ែត្រ,ប្លុក (ខ)មានចំនួន៣០៥ខ្សែមានប្រវែងសរុប១៤៨ពាន់៩៩០ម៉ែត្រ ,ប្លុក(គ)មានចំនួន៤៤០ខ្សែមានប្រវែងសរុប ១៣៤ពាន់៣៨០ម៉ែត្រនិងប្លុក(ឃ)មានចំនួន៤៩៦ខ្សែមានប្រវែងសរុប១១៥ពាន់៦៣០ម៉ែត្រ។ដោយឡែកឈ្មោះផ្លូវត្រូវធ្វើការកែសម្រួលមួយចំនួនដោយត្រូវដាក់ជាឈ្មោះវីរជន ឥស្សរជន,សប្បុរសជននិងឈ្មោះពីប្រវត្តិសាស្ត្រ ឬជាឈ្មោះតាមភូមិសាស្ត្រធម្មជាតិ តាមវប្បធម៌ និងឈ្មោះពីបុរាណ និងទៅតាមទម្លាប់មួយចំនួន ហើយត្រូវស្នើសុំគោលការណ៍ពីថ្នាក់ដឹកនាំជាមុនផងដែរ។

បើតាមអភិបាលខេត្តថាសមត្ថកិច្ចគ្រប់គ្រងផ្លូវថ្នល់ក៏ត្រូវរៀបចំផែនការមេអភិវឌ្ឍផ្លូវថ្នល់គម្រោងប្លង់និងកំណត់គម្រោងសាងសង់ស្តារឡើងវិញក្នុងការកែលម្អពង្រីកនិងថែទាំផ្លូវថ្នល់ព្រមទាំងសកម្មភាពអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ក្នុងក្រុងក្នុងការស្នើសុំគោលការណ៍ឯកភាពពីរដ្ឋាភិបាល។ ដូចនេះរដ្ឋបាលខេត្តនឹងសម្រេចដាក់ឲ្យប្រើប្រាស់ជាផ្លូវការនូវលេខផ្លូវ និងឈ្មោះផ្លូវនាពេលឆាប់ៗខាងមុខនេះ៕SRP

ខេត្តសៀមរាប៖ សមត្ថកិច្ចបានចាប់អិចស្ការចំនួនពីរគ្រឿង ដែលបានឈូសឆាយដីព្រៃដោយខុសច្បាប់។ការឃាត់នេះធ្វើឡើងនៅវេលាម៉ោង ០៩ព្រឹក ថ្ងៃទី២៤, ខែមិថុនា ២០២០ នេះស្ថិតនៅភូមិស្វាយចេក ឃុំស្វាយចេក ស្រុកអង្គរធំ ខេត្តសៀមរាប ដោយកម្លាំងអាវុធហត្ថស្រុកអង្គរធំដឹកនាំដោយលោកវរសេនីយ៍ត្រី រ៉ា បួន មេការស្រុកអង្គរធំ សហការជាមួយរដ្ឋបាលព្រៃឈើសង្កាត់អង្គរធំ។

បើតាមសមត្ថកិច្ចថាបច្ចុប្បន្ន អិចស្ការទាំងពីរត្រូវយកទៅរក្សាទុក្នៅសង្កាត់រដ្ឋបាលព្រៃឈើស្រុកអង្គរធំដើម្បីអនុវត្តបន្ត៕SRP

ខេត្តត្បូងឃ្មុំ៖ បុរសវ័យចំណាស់ម្នាក់ត្រូវបានស្លាប់បាត់បង់ជីវិតបន្ទាប់ពីបានយកខ្សែភ្លើងតចរន្តអគ្គិសនី រាយនៅក្រោមផ្ទះ ដើម្បីការពារទ្រព្យសម្បត្តិតែអកុសលបែជាឆក់ស្លាប់ខ្លួនឯងវិញ។ហេតុការណ៍នេះកើតមានឡើងកាលពីវេលាម៉ោងប្រមាណ ជា០៤ និង៣០នាទី ទៀបភ្លឺ ថ្ងៃទី២៣ ខែមិថុនាឆ្នាំ២០២០ ស្ថិតនៅក្នុងភូមិជ្រោយចង្ហា ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ។សមត្ថកិច្ចបានឲ្យដឹងថាជនរងគ្រោះមានឈ្មោះ តន់ ជាអាយុ៧៣ឆ្នាំរស់នៅភូមិកើតហេតុខាងលើ។

សមត្ថកិច្ចបានបន្តថាបន្ទាប់ពីទទួលព័ត៌មាននេះ កម្លាំងជំនាញនគរបាលស្រុកត្បូងឃ្មុំ សហការជាមួយកម្លាំងប៉ុស្តិ៍នគរបាលរដ្ឋបាលមង់រៀវ ដោយ មានការចូលរួមពីគ្រូពេទ្យមណ្ឌលសុខភាពមង់រៀវ បានចុះទៅដល់កន្លែងកើតហេតុដើម្បី ធ្វើការពិនិត្យសាក់សព និងស្រាវជ្រាវកន្លែងកើតហេតុ។សមត្ថកិច្ចបានសន្និដ្ឋានថាជនរងគ្រោះបានស្លាប់ ដោយមូលហេតុយកខ្សែភ្លើងតចរន្តអគ្គិសនី រាយនៅក្រោមផ្ទះដោយខ្លួនឯង ដើម្បីការពារទ្រព្យសម្បត្តិក្នុងផ្ទះ ហើយគាត់ភ្លេចខ្លួនងើបពីដេក ចុះដើរមកក្រោមផ្ទះក៏បណ្តាលឲ្យឆក់ស្លាប់តែម្តង ពុំមានពាក់ព័ន្ធនឹងបទល្មើសព្រហ្មទណ្ឌឡើយ។ក្រោយធ្វើការពិនិត្យ រួចសពត្រូវបានប្រគល់ជូនសាច់ញាតិដើម្បីយកទៅធ្វើបុណ្យតាមប្រពៃណី៕SRP

ភ្នំពេញ៖  សម្ដេចតេជោហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជានៅព្រឹកថ្ងៃពុធទី២៤ ខែមិថុនា ឆ្នាំ២០២០នេះ បានអញ្ជើញប្រកាសអនុវត្តកម្មវិធីផ្តល់សាច់ប្រាក់ជូនប្រជាពលរដ្ឋមានជីវភាពក្រីក្រ និងងាយរងគ្រោះដោយសារជំងឺកូវីដ១៩ នៅវិមានសន្តិភាព។

សម្តេចតេជោ ហ៊ុន សែន បានមានប្រសាសន៍ថា កម្មវិធីឧបត្ថម្ភសាច់ប្រាក់នេះ ជាវិធានការជំនួយសង្គមរបស់រាជរដ្ឋាភិបាល សំដៅជួយសម្រួលជីវភាពប្រចាំថ្ងៃ នៅក្នុងអំឡុងពេលនៃវិបត្តិជំងឺកូវីដ-១៩ ជូនដល់គ្រួសារក្រីក្រ និងងាយរងគ្រោះ ដែលមានបណ្ណសមធម៌ទូទាំងប្រទេស ដែលក្នុងនោះគឺផ្តោតការយកចិត្តទុកដាក់បន្ថែមចំពោះកុមារអាយុក្រោម ៥ឆ្នាំ, ជនមានពិការភាព, ជនចាស់ជរាអាយុចាប់ពី៦០ឆ្នាំឡើង និងអ្នកមានផ្ទុកមេរោគអេដស៍ នៅក្នុងគ្រួសារក្រីក្រទាំងនោះ។ កន្លងមកនេះ រាជរដ្ឋាភិបាលកម្ពុជាបានដាក់ចេញនូវវិធានការជាច្រើនក្នុងការប្រយុទ្ធប្រឆាំងទប់ស្កាត់បញ្ហាប្រឈមនៅពេលដែលប្រទេសយើងកើតមានជំងឺកូវីដ១៩ ។ រាជរដ្ឋាភិបាលកម្ពុជា បានគិតគូរជាប់ជានិច្ចពីសុខទុក្ខរបស់ពលរដ្ឋ បើទោះបីប្រទេសយើងជាប្រទេសក្រីក្រមួយក៏ដោយ គឺយើងនៅមានលទ្ធភាពគ្រប់គ្រាន់អាចធ្វើបានដើម្បីជួយបងប្អូនប្រជាពលរដ្ឋយើងមិនអោយអត់អាហារទទួលទានឡើយ។

សម្តេចតេជោ ហ៊ុន សែន បានជំរុញអោយក្រសួងផែនការ សហការធ្វើការជាមួយអាជ្ញាធខេត្តនីមួយៗ ដើម្បីប្រញ៉ាប់បញ្ជូនរបាយការណ៍បច្ចុប្បន្នភាពអំពីជនក្រីក្រពិតប្រាកដមកកាន់ក្រសួងសេដ្ឋកិច្ច និងហិរញ្ញវត្ថុ ដើម្បីរៀបចំសាច់ប្រាក់ឧបត្ថម្ភជូនដល់ពួកគាត់ជាបន្តបន្ទាប់ថែមទៀត។ តាមរយៈកម្មវិធីនេះ រាជរដ្ឋាភិបាលនឹងផ្តល់ប្រាក់ឧបត្ថម្ភប្រចាំខែជូនគ្រួសារក្រីក្រ។ ការរៀបចំបែបនេះ គឺត្រូវបានធ្វើឡើងឱ្យស្របតាមគោលការណ៍សមធម៌ និងដើម្បីឆ្លើយតបទៅនឹងភាពខុសគ្នានៃថ្លៃទំនិញរវាងតំបន់នីមួយៗផងដែរ ។ ប្រាក់ឧបត្ថម្ភនេះនឹងត្រូវបានបើកផ្តល់នៅក្នុងសប្តាហ៍ទី ៤ នៃខែនីមួយៗ តាមរយៈធនាគារឯកទេសវីង (Wind) ដែលមានបណ្តាញភ្នាក់ងារនៅទូទាំងប្រទេស ។

បច្ចុប្បន្ន គ្រួសារដែលមានប័ណ្ណសមធម៌ (ទាំងក្រ-១ និងក្រ-២) មានប្រមាណជាង ៥៦ ម៉ឺនគ្រួសារ ដែលរាជរដ្ឋាភិបាលត្រូវចំណាយថវិកាប្រមាណជាង ១០០ ប៊ីលានរៀល (ឬប្រមាណ ២៥ លានដុល្លារ) ក្នុងមួយខែៗសម្រាប់បើកផ្តល់ជូន ។ សម្តេចតេជោ ហ៊ុន សែន បានស្នើឱ្យស្ថាប័នពាក់ព័ន្ធទាំងអស់ ជាពិសេសក្រុមការងារថ្នាក់ជាតិ និងអាជ្ញាធរមូលដ្ឋាន បន្តអនុវត្តឱ្យមានប្រសិទ្ធភាពនូវវិធីសាស្រ្ត និងគោលការណ៍ ដែលត្រូវបានដាក់ចេញមកដើម្បីកំណត់អត្តសញ្ញាណកម្មគ្រួសារក្រីក្រ ក្នុងគោលដៅធានាឱ្យពួកគាត់ទទួលបានស្របតាមលក្ខខណ្ឌវិនិច្ឆ័យជាធរមាននូវជំនួយសង្គមនាពេលនេះ។

សម្តេចតេជោ ហ៊ុន សែន បានអោយអាជ្ញាធរអនុវត្តរាល់កម្មវិធីគាំពារសង្គមទាំងអស់ដែលមានស្រាប់ ឱ្យបានរលូន និងមិនយឺតយ៉ាវ ដែលក្នុងនោះរួមមាន របបសន្តិសុខសង្គមសម្រាប់មន្ត្រីរាជការស៊ីវិល និងអតីតយុទ្ធជន និងការឧបត្ថម្ភជនពិការក្រីក្រតាមសហគមន៍ មូលនិធិសមធម៌សុខាភិបាល និងរបបថែទាំសុខភាព សម្រាប់មន្ត្រីសាធារណៈ របបថែទាំសុខភាព និងរបបហានិភ័យការងារសម្រាប់កម្មករនិយោជិត កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះនិងកុមារអាយុក្រោម ២ ឆ្នាំ និងកម្មវិធីផ្តល់អាហារតាមសាលារៀន ដែលត្រូវបានបង្វែរពីការចម្អិនម្ហូបអាហារជូនសិស្សានុសិស្ស មកជាការចែកជាអង្ករជូនគ្រួសារក្រីក្រនៅក្នុងសហគមន៍របស់សាលារៀនទាំងនោះវិញ។

ជាមួយគ្នានេះដែរ សម្តេចតេជោនាយករដ្ឋមន្រ្តី បានអំពាវនាវដល់ប្រជាពលរដ្ឋកម្ពុជាគ្រប់រូបនៅទូទាំងប្រទេស ត្រូវបន្តរក្សាការប្រុងប្រយ័ត្នខ្ពស់ក្នុងការបង្ការ និងការពារនូវការឆ្លងរីករាលដាលនៃជំងឺកូវីដ-១៩ ដ៏កាចសាហាវនេះ ដោយគោរពនិងអនុវត្តអោយបានខ្ជាប់ខ្ជួននូវគោលការណ៍រក្សាគម្លាតសង្គម និងវិធានការនានាតាមការកំណត់របស់ក្រសួងសុខាភិបាល៕SRP

ភ្នំពេញ៖ នៅក្នុងឱកាសអញ្ជើញប្រកាសអនុវត្តកម្មវិធីផ្តល់សាច់ប្រាក់ជូនពលរដ្ឋក្រីក្រ និងងាយរងគ្រោះដោយសារជំងឺកូវីដ១៩ ថ្ងៃទី២៤ ខែមិថុនា ឆ្នាំ២០២០ នៅវិមានសន្តិភាព សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបង្ហាញពីការគិតគូរនឹងព្រួយបារម្ភចំពោះសាលារៀនឯកជនដែលបានជួលអគារបើកសាលារៀន ហើយពេលនេះកំពុងប្រឈមនឹងការបិទទ្វាដោយសារជំងឺឆ្លងកូវីដ១៩។

សម្តេចតេជោយនាយករដ្ឋមន្ត្រី នៅថ្ងៃនេះបានអំពាវនាវស្នើសុំដល់ម្ចាស់អគារដោយផ្ទាល់គឺត្រូវមានភាពទន់ភ្លន់ និងមេត្តាយោគយល់បន្ធូរបន្ថយថ្លៃជួលអាគារក្នុងអំឡុងពេលដែលប្រទេសជាតិទាំងមូលកំពុងប្រឈមនឹងជំងឺឆ្លងកូវីដ១៩។ ជាមួយគ្នានេះផងដែរ សម្តេចជោនាយករដ្ឋន្ត្រី បានស្នើឲ្យក្រសួងហិរញ្ញវត្ថុបន្តធ្វើការជាមួយធនាគារ រៀបចំឥណទានឡើងវិញដើម្បីផ្តល់លទ្ធភាពដល់គ្រឹះស្ថានឯកជនអាចមានឱកាសខ្ចីថវិកាក្នុងការអភិវឌ្ឍកម្មវិធីបង្រៀតតាម “ Online” ព្រោះមានសាលារៀនឯកជនជាច្រើនដែលមិនបានរៀបចំកម្មវិធីបង្រៀន Online បង្រៀនសិស្សានុសិស្សអោយទាន់សភាពការណ៍កូវីដបច្ចុប្បន្ន។ ទន្ទឹមនឹងនេះ សម្តេចតេជោបានលើកទឹកចិត្តដល់គ្រឹះស្ថានអប់រំឯកជន ត្រូវបន្តខិតខំអភិវឌ្ឍខ្លួន ហើយសម្តេចតេជោពិតជាមិនចង់ឃើញគ្រឹះស្ថានឯកជនណាមួយដួលរលំនោះឡើយ៕SRP

ខេត្តសៀមរាប៖ស្នងការនគរបាលខេត្តសៀមរាបបានសុំទោស សម្តេច ស ខេង និងលោកនេត សាវឿន ករណីដែលលោកបានប្រើប្រាស់កំលាំងប្រជាការពារ(ដោយអោយពាក់ឯកសណ្ឋាននគរបាលជាតិ) ចុះប្រតិបត្តិការការងាររៀបចំសណ្ដាប់ធ្នាប់។
តាមរយៈផេកស្នងការនគរបាលខេត្តសៀមរាបលោកឧត្តមសេនីយ៍ទោទិត្យណារ៉ុងបានសរសេរថា៖លិខិតសុំទោសខ្ញុំបាទ ឧត្តមសេនីយ៍ទោ ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាបជាបឋម ខ្ញុំបាទសូមគោរពសុំទោសចំពោះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ
ឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ
និងប្រជាពលរដ្ឋទូទាំងប្រទេស ករណីដែលខ្ញុំបាទបានប្រើប្រាស់កំលាំងប្រជាការពារ(ដោយអោយពាក់ឯកសណ្ឋាននគរបាលជាតិ) ចុះប្រតិបត្តិការការងាររៀបចំសណ្ដាប់ធ្នាប់ក្នុងក្រុងសៀមរាប កាលពីថ្ងៃទី23 ខែ06 ឆ្នាំ2020 ធ្វើអោយមានការប៉ះពាល់ និងភន្ត័ច្រឡំ មកលើកងកំលាំងនគរបាលជាតិ ខ្ញុំបាទគោរពជម្រាបជូនថាបច្ចុប្បន្ននេះ ខ្ញុំបាទបានអោយមន្ត្រីជំនាញហៅបុគ្គលនេះមកអប់រំណែនាំរួចរាល់ហើយ៕SRP

ភ្នំពេញ៖សម្ដេចតេជោហ៊ុន សែន នាយករដ្ឋមន្ត្រី នៅព្រឹកនេះបានលើកឡើងថា
សុខសប្បាយជាទេបងប្អូនជនរួមជាតិទូទាំងប្រទេស?

សូមបងប្អូនជនរួមជាតិបន្តយកចិត្តទុកដាក់ថែរក្សាការពារសុខភាពកុំអោយឆ្លងរោគកូវីដ-១៩ ដោយឧស្សាហ៍ដុសលាងសម្អាតដៃជាមួយសាប៊ូ អាល់កុល ឬចឹលសម្លាប់មេរោគ ហើយត្រូវតែពាក់ម៉ាសជាប្រចាំ។ ជំងឺឆ្លងកូវីដ១៩ មិនទាន់មានថ្នាំព្យាបាលនៅឡើយទេ។ សូមកុំធ្វេសប្រហែស ឬមើលស្រាលជំងឺឆ្លងកូវីដ-១៩អោយសោះ។ ចំពោះទីកន្លែងដែលមានចំនួនមនុស្សប្រមូលផ្តុំច្រើនដូចជាទីផ្សា ផ្សារទំនើប ហាងទំនិញលក់ដូរតាមផ្លូវតូចធំ ភោជនីយដ្ឋាន ហាងកាហ្វេ ជាពិសេសក្លីនិក និងមន្ទីរពេទ្យរដ្ឋនិងឯកជន គឺត្រូវមានចឹល ទឹកអាល់កុល និងម៉ាសដើម្បីអោយពលរដ្ឋនិងអតិថិជនប្រើប្រាស់កុំអោយឆ្លងរោគ។

យើងដឹងហើយថាជំងឺឆ្លងកូវីដ-១៩ កំពុងធ្វើអោយប៉ះពាល់ដល់សេដ្ឋកិច្ចពិភពលោកយ៉ាងធ្ងន់ធ្ងរ ក្នុងនោះក៏ប៉ះពាល់ដល់កម្ពុជាផងដែរ ហេីយក្នុងពេលនេះគឺបានធ្វើអោយពលរដ្ឋក្រីក្រជាង៦សែនគ្រួសារកំពុងប្រឈមនឹងកង្វះខាតស្បៀងអាហារ។នៅថ្ងៃពុធទី ២៤ មិថុនា ថ្ងៃនេះខ្ញុំនឹងប្រកាសដាក់អោយប្រើប្រាស់ “កម្មវិធីឧបត្ថម្ភសាច់ប្រាក់ជូនគ្រួសារក្រីក្រនិងងាយរងគ្រោះក្នុងអំឡុងពេលប្រយុទ្ធប្រឆាំងនឹងជំងឺឆ្លងកូវីដ-១៩”។សូមជូនពរបងប្អូនជនរួមជាតិជួបតែសេចក្តីសុខ និងចៀសផុតពីជំងឺឆ្លងកូវីដ-១៩ទាំងអស់គ្នា៕SRP

ខេត្តសៀមរាប៖បុរសម្នាក់បានស្លាប់និងម្នាក់ទៀតរងរបួសក្នុងករណីគ្រោះថ្នាក់ចរាចរណ៍។
ហេតុការណ៍បានកើតឡើងនៅវេលាម៉ោង២១និង០៥នាទី ថ្ងៃទី២៣ខែមិថុនាឆ្នាំ២០២០លេីផ្លូវជាតិលេខ០៦ចំណុចភូមិពោធិ៍សិរី ឃុំកំពង់ក្តី ស្រុកជីក្រែង។រវាងរថយន្តមិនស្គាល់អត្តសញ្ញាណនិងអ្នកបេីកបរម៉ូតូម៉ាកហុងដាពណ៌ខ្មៅ ពាក់ស្លាកលេខភ្នំពេញ ១J២៥៤៥( ទិសដៅពីត្បូងទៅជេេីង)។
សមត្ថកិច្ចបានបញ្ជាក់ថាជនរងគ្រោះទីមួយឈ្មោះ ម៊ុយ ទេវ ភេទប្រុសអាយុ២៥ឆ្នាំ រស់នៅភូមិទទារ ឃុំស្ពានត្នោត ស្រុកជីក្រែង អ្នកបេីកបរម៉ូតូស្លាប់។ទីពីរឈ្មោះ តឿរ ភេទប្រុសអាយុ២៦ឆ្នាំ មានទីលំនៅស្រុកបារាយ ណ៍ខេត្តកំពង់ធំ អ្នករួមដំណេីរ របួសធ្ងន់ ( បញ្ជូនទៅមន្ទីរពេទ្យខេត្តសៀមរាប )។ចំណែករថយន្តបង្ក បានបេីកគេចបាត់ សមត្ថកិច្វកំពុងស្រាវជ្រាវបន្តផងដែរ៕SRP

ខេត្តសៀមរាប៖លោកអ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍន៍ជនបទនៅថ្ងៃទី២៣ ខែមិថុនានេះ រួមដំណើរជាមួយ លោក Liu Zhijie អគ្គកុងស៊ុលរបស់ស្ថានទូតចិន ប្រចាំនៅខេត្តសៀមរាប អញ្ជើញចុះពិនិត្យ អណ្តូងទឹកស្អាត និងសកម្មភាពខួងអណ្តូងទឹកស្អាតជូនប្រជាពលរដ្ឋប្រើប្រាស់នៅភូមិក្អែកទុំ ឃុំរើល ស្រុកពួក និងនៅភូមិស្នាតេជោ ៣១៧ ឃុំបល្ល័ង្គ ស្រុកប្រាសាទបាគង ខេត្តសៀមរាប របស់គម្រោងផ្គត់ផ្គង់ទឹកជនបទ ជំហានទី២ ក្រោមហិរញ្ញប្បទានឥតសំណងរបស់សាធារ ណរដ្ឋប្រជាមានិតចិន។
សូមបញ្ជាក់ថាគម្រោងផ្គត់ផ្គង់ទឹកជនបទ ជំហានទី២ របស់ក្រសួងអភិវឌ្ឍន៍ជនបទនេះ នឹងត្រូវធ្វើការខួងអណ្តូងស្នប់ចំនួន ៩៦៤អណ្តូង ជីកស្រះទឹកសហគមន៍ចំនួន ១២ស្រះ និងជីកស្រះទឹកសហគមន៍ដែលមានរៀបថ្មចំនួន ៤២ស្រះ នៅក្នុងខេត្តគោលដៅចំនួន១០ រួមមាន ខេត្តសៀមរាប ខេត្តបន្ទាយមានជ័យ ខេត្តបាត់ដំបង ខេត្តពោធិ៍សាត់ ខេត្តកំពង់ឆ្នាំង ខេត្តកំពង់ស្ពឺ ខេត្តកំពត ខេត្តព្រៃវែង ខេត្តស្វាយរៀង និងខេត្តកំពង់ចាម។
ដោយឡែក នៅក្នុងខេត្តសៀមរាប មានអណ្តូងសរុបទាំងអស់ចំនួន ១០០អណ្តូង និងស្រះសរុបចំនួន០៧ស្រះ ក្នុងនោះ ស្រះសហគមន៍មានរៀបថ្មចំនួន០៤ស្រះ និងស្រះសហគមន៍ធម្មតាចំនួន០៣ស្រះ។ជាលទ្ធផល ចំពោះការជីកអណ្តូងបានចំនួន៦៧អណ្តូង និងការជីកស្រះសហគមន៍ទាំង អស់សម្រេចបានលទ្ធផលប្រមាណ ៩៥% ហើយ៕SRP

ខេត្តសៀមរាប៖សេចក្ដីរាយការណ៍បឋមពីអាជ្ញាធរស្រុកក្រឡាញ់បានឲ្យដឹងនៅមុននេះបន្តិចថាមានប្រជាពលរដ្ឋ១២នាក់ បានពុលនំបញ្ចុកក្នុងកម្មវិធីមួយ។
អាជ្ញាធរបានថ្លែងប្រាប់បណ្ដាញសារព័ត៌មានសៀមរាបប៉ុស្តិ៍ថា ហេតុការណ៍បានកើតឡើង
វេលាម៉ោង១៥និង៣០នាទីរសៀលថ្ងៃអង្គារទី២៣ ខែមិថុនាឆ្នាំ២០២០នេះក្នុងកម្មវិធីបុណ្យចំរើនអាយុនៅចំណុចភូមិគោកចំបក់ឃំុក្រូចគរស្រុកក្រឡាញ់ខេត្តសៀមរាប។

អាជ្ញាធរបានបញ្ជាក់ថាករណីពុលនំបញ្ចុកនេះក្នុងកម្មវិធីបុណ្យចំរើនអាយុនៅចំណុចភូមិខាងលើ បណ្ដាលឲ្យប្រជាពលរដ្ឋរងគ្រោះសរុប១២នាក់ ស្រី០៤នាក់ ធ្ងន់មួយនាក់។
មន្ត្រីថាជនរងគ្រោះត្រូវបានបញ្ចូនទៅព្យាបាលនៅមណ្ឌលសុខភាពឃំុក្រូចគរ។
អាជ្ញាធរបានបញ្ជាក់ថានៅម៉ោង១៥និង៣០នាទីថ្ងៃដដែលនេះ ស្ថានភាពសុខភាពប្រជាពលរដ្ឋទាំងអស់ មានសភាពល្អ អាចជួយសង្រ្គោះបាន។
ទោះយ៉ាងណាអាជ្ញាធរសមត្ថកិច្ចនៅមិនទាន់បញ្ជាក់លំអិតនៅឡើយចំពោះហេតុការណ៍នេះ៕SRP

ខេត្តកំពង់ចាម៖នៅចំពោះមុខប្រជាពលរដ្ឋលោក​​ អ៊ុន​ ចាន់ដា​ អភិបាលខេត្ត​កំពង់ចាម​ បានថ្លែងថា បន្ទាប់​ពី​ទទួល​បាន​ប័ណ្ណ​កម្មសិទ្ធិគ្រប់គ្រងដីធ្លីនេះហើយ សូម​​បងប្អូន​ប្រជាពលរដ្ឋ​ កុំ​យក​ទៅបញ្ចាំ ឬក៏​លក់​ដូរ​អី​ គឺ​ត្រូវ​ខិតខំ​ធ្វើការ​អាស្រ័យ​ផល​លេី​ដី​នេះ​ ឲ្យ​មាន​ជីវភាព​ធូរធារ​ទាំងអស់​គ្នា​ និង​គួរតែ​ទុកជា​​​​កេរ្តិ៍ដំណែល​សម្រាប់​កូនចៅ​យើងនៅ​ជំនាន់​ក្រោយ​ៗ​ ឲ្យ​បាន​ទទួលផលប្រយោជន៍ពីដីនេះ។ ព្រោះ​នេះ​ជា​ដី​ដែល​សម្តេច​តេជោ ហ៊ុន​ សែន​ នាយក​រដ្ឋមន្ត្រី​ បាន​ផ្តល់​ឲ្យ​បងប្អូន​ទាំង​អស់​គ្នា​ ​តាម​រយៈ​​គោលនយោបាយ​ឈ្នះ​ៗ​របស់​សម្តេច។
លោក​​អភិបាលខេត្ត​ ក៏​បាន​​បញ្ជាក់​ផង​ដែរ​ថា​ អាជ្ញាធរ​ដែល​ឈរ​នៅ​ចំពោះ​មុខ​បងប្អូន​ទាំង​អស់​គ្នា​នេះ​ គឺ​ជា​អ្នក​បម្រើ​រាស្ត្រ​យ៉ាង​ពិតប្រាកដ​ បេី​បងប្អូនមាន​បញ្ហា​អ្វី​ ឬ​ត្រូវ​ការ​អ្វី​នោះ​ សូម​ប្រាប់​មក​អាជ្ញាធរ​​តាម​រយៈ​​ភូមិ​ឃុំ​ និង​ស្រុក​ ដេីម្បីឲ្យ​ពួក​គាត់​ជួយ​​ដោះស្រាយ​រាល់​តម្រូវការ​ជូន​ពុក​ម៉ែ​បងប្អូន​។
លោក​​ អ៊ុន​ ចាន់ដា​ ថ្លែងយ៉ាងដូច្នោះ នៅព្រឹកថ្ងៃអង្គារទី២៣​ខែមិថុនា​នេះ ក្នុងពេលចុះដោះស្រាយបញ្ហាវិវាទដីធ្លីមួយកន្លែង ស្ថិត​នៅ​ក្នុង​ថ្មី​ និង​ភូមិ​តាមាង​ ឃុំ​កោះ​រកា​ ស្រុក​កំពង់សៀម​ ដោយ​ភាគី​ទាំង​ពីរបានទទួលផលប្រយោជន៍ពីដីទីទួលចំប៉ីនោះ​ទាំងអស់​គ្នា​ ពោលគឺ​ភាគី​ចង់​បាន​​ប្លង់​កម្មសិទ្ធិមកគ្រប់គ្រងបានស្ម័គ្រចិត្តកាត់ដី២០%​ ​សម្រាប់​បម្រុង​ទុក​ជា​ទីទួល​សុវត្ថិភាព​ក្នុង​រដូវ​ទឹក​ជំនន់​ ដែល​ប្រជាពលរដ្ឋជា​ទូទៅ​​អាច​យក​សត្វ​ពាហនៈ​មក​ស្នាក់​នៅ​បណ្តោះអាសន្ន​នៅ​ទីតាំង​នោះ​បាន​ទាំងអស់​គ្នា​ ដោយអនុវត្តតាមយុទ្ធសាស្ត្រឈ្នះៗ របស់​សម្តេច​តេជោ​ ហ៊ុន​ សែន​ ។
បើតាមមេឃុំ​កោះ​រកា​ លោក​ផន​ ផូ​ បាន​ឲ្យដឹងថា​ ​ពាក់ព័ន្ធ​ដីទី​ទួល​ចំប៉ី​នេះ​ គឺ​មាន​ទំហំ​ប្រមាណ​ជា​ង៦ហិកតា​ ដែល​មាន​ប្រជាពលរដ្ឋ​២៤គ្រួសារ​ នៅ​​ភូមិ​ថ្មី​ភូមិ​តាមាង​ ឃុំ​កោះ​រកា​ ស្រុក​កំពង់សៀម​ និង​ភូមិ​​កំពង់​រលីង​ សង្កាត់​សំបួរមាស​ ក្រុងកំពង់ចាម​ បាន​ស្នើសុំ​ប័ណ្ណ​កម្មសិទ្ធិគ្រប់គ្រង ហើយ​ក៏​មាន​ប្រជាពលរដ្ឋ​ សុំ​ទុក​ជា​ទីទួល​សុវត្ថិភាព​សម្រាប់​បម្រុង​ទុក​ពេល​​រដូវ​ទឹក​ជំនន់​ផង​ដែរ​៕SRP