លោកប៉ែន កុសល អភិបាលខេត្តឧត្តរមានជ័យ បានបញ្ជាឲ្យ​អភិ​បាលស្រុកអន្លង់វែង និងអភិបាលរងខេត្ត នៅថ្ងៃទី២១ ខែមេសា ឆ្នាំ២០២៣ នេះ ចុះទៅពិនិត្យមើល និងជួបជាមួយប្រជាពលរដ្ឋ ចំនួន ១៣គ្រួសារ រស់នៅផ្លូវចូលផ្ទះតាម៉ុក ក្នុងភូមិអភិវឌ្ឍន៍ ឃុំអន្លង់វែង ស្រុកអន្លង់វែង ដែលបានតវ៉ារឿងដីធ្លី និងបានចោទប្រកាន់លើលោក គឹម គាវិន ប្រធានមន្ទីររៀបចំដែនដី នគររូបនីយកម្ម និងសំណង់​ខេត្តឧត្តរមានជ័យ។

ការបញ្ជារបស់អភិបាលខេត្តរូបនេះ ឲ្យអភិបាលស្រុកស្រុកអន្លង់វែង និងអភិបាលរងខេត្តឧត្តរមាន​ជ័យ ចុះទៅពិនិត្យមើលករណីនេះ គឺបន្ទាប់ពីប្រជាពលរដ្ឋចំនួន ១៣គ្រួសារ រស់នៅផ្លូវចូលផ្ទះតាម៉ុក ក្នុងភូមិអភិវឌ្ឍន៍ ឃុំអន្លង់វែង ស្រុកអន្លង់វែង ខេត្តឧត្តរមានជ័យ ផ្ទុះការតវ៉ា កាលពីថ្ងៃទី១៩ ខែមេសា ឆ្នាំ២០២៣។

ការតវ៉ាប្រជាពលរដ្ឋ បានចោទប្រកាន់លោក គឹម គាវិន ប្រធានមន្ទីររៀបចំដែនដី នគររូបនីយកម្ម និងសំណង់ខេត្ត​ឧត្តរមានជ័យថា ចេញប័ណ្ណឲ្យទៅបក្សពួករំលោភលើដីលំនៅដ្ឋានពួកគាត់៕SRP

ភ្នំពេញ៖នាយឧត្តមសេនីយ៍ ហ៊ុន ម៉ាណែត រយៈទំព័រហ្វេសប៊ុក បានលើកឡើងថា៖ ចំពោះអស់លោកដែលពូកែខាងឆ្ងល់អំពីច្បាប់ និងទម្លាប់របស់កងទ័ព ក្នុងការតែងតាំងផ្លាស់ប្តូរមុខងារ ឬតម្លើងឋានន្តរស័ក្តិ យោធិន និងចំពោះអ្នកដែលទើសចំពោះការតម្លើងឋានន្តរស័ក្តិ សម្រាប់រូបខ្ញុំ គឺសូមបន្តឆ្ងល់ និងបន្តទើសតាមការគួររបស់អស់លោកចុះ បើអស់លោកមានពេលវេលាច្រើន និងអត់មានកិច្ចការអ្វីផ្សេងសម្រាប់ធ្វើ។

នាយឧត្តមសេនីយ៍ ហ៊ុន ម៉ាណែត បានបន្តថា៖
ខ្ញុំអត់មានពេលវេលាដើម្បីធ្វើការពន្យល់ឬឆ្លើយតបជាមួយអស់លោកទេ😅 ព្រោះពេលវេលារបស់ខ្ញុំត្រូវចំណាយទៅលើកិច្ចការអ្វីដែលមានប្រយោជន៍។ ជាក់ស្តែង ពេលនេះខ្ញុំកំពុងធ្វើដំណើររាប់រយគីឡូម៉ែត្រ ដើម្បីបន្តចុះជួបនិងធ្វើការងារ ជាមួយបណ្តាអង្គភាពកងទ័ពដែលឈរជើងនៅតាមបណ្តោយព្រំដែន ដើម្បីពង្រឹងសមត្ថភាពកងទ័ព ក្នុងការត្រៀមលក្ខណៈការពារបូរណភាពទឹកដីរបស់យើង។ កិច្ចការងារនេះវាមានអត្ថប្រយោជន៍ ចំពោះជាតិមាតុភូមិ ជាងចំណាយពេលឆ្លើយតប នឹងការឆ្ងល់ ឬទើសរបស់អស់លោក😃😃
ខ្ញុំនិយាយតាមត្រង់ទេណា សូមកុំខឹង😅

នៅក្នុងទំព័រហ្វេសប៊ុក ដដែល នាយឧត្តមសេនីយ៍ ហ៊ុន ម៉ាណែត ក៏បានលើកឡើងផងដែរថា ៖ ថ្ងៃនេះមានកូនទាហានពិសេសម្នាក់រង់ចាំអបអរសាទរខ្ញុំនៅផ្ទះ (ជាតំណាងអោយម៉ាក់ និងបងស្រីទាំងពីររបស់គាត់ផងដែរ)🥰🥰

ខ្ញុំសូមឆ្លៀតឱកាសនេះ ដើម្បីធ្វើការថ្លែងអំណរគុណដោយស្មោះ ចំពោះលោកតាលោកយាយ លោកអ៊ុំពូមីងបងប្អូន និងក្មួយៗទាំងអស់ដែលបានផ្ញើរសារអបអរសាទរ ចំពោះរូបខ្ញុំ ក្នុងឱកាសនៃការបំពាក់ឋានន្តរស័ក្តិជានាយឧត្តមសេនីយ៍ នាថ្ងៃនេះ🙏🙏

នៅទីស្តីការក្រសួងការពារជាតិ ជាថ្ងៃព្រហស្បតិ៍នេះ សម្តេចពិជ័យសនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បំពាក់ឋានន្តរស័ក្តិនាយឧត្តមសេនីយ៍ ជូនឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទនិងជាមេបញ្ជាការកងទ័ពជើងគោក។

សូមជម្រាបថា កាលពីថ្ងៃទី១៧ ខែមីនា ឆ្នាំ២០២៣ ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានចេញព្រះរាជក្រឹត្យត្រាស់បង្គាប់ដំឡើងឋានន្តរស័ក្តិ នាយឧត្តមសេនីយ៍ ដល់ឧត្តមសេនីយ៍ឯក ហ៊ុន ម៉ាណែត នាយទាហានថ្នាក់ឧត្តមសេនីយ៍ នៃកងយោធពលខេមរភូមិន្ទ៕SRP

លោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប នៅថ្ងៃនេះ បានចុះជួបសំណេះសំណាល និងនាំយកអំណោយ មនុស្សធម៌ ចែកជូនដល់គ្រួសាររងគ្រោះ ដោយខ្យល់កន្ត្រាក់ ចំនួន១៤១ គ្រួសារ ស្ថិតក្នុងបរិវេណវត្តក្របីរៀល ឃុំកំពង់ក្តី ស្រុកជីក្រែង ខេត្តសៀមរាប។

តាមរបាយការណ៍របស់ អនុសាខាកាកបាទក្រហមកម្ពុជាស្រុកជីក្រែង បង្ហាញថា កាលពីថ្ងៃទី ១៥ មេសា ឆ្នាំ២០២៣ ក្នុងភូមិសាស្ត្រស្រុកជីក្រែង កើតមានគ្រោះធម្មជាតិ ខ្យល់កន្ត្រាក់ លាយឡំនឹងភ្លៀង ផ្គររន្ទះ ធ្វើឱ្យប៉ះពាល់លើ ឃុំចំនួន១០ នៃឃុំចំនួន១២ បណ្តាលឱ្យរលំផ្ទះ១ខ្នង និង របើកដំបូលជញ្ជាំង១៤០ ខ្នង តែមិនបង្កឱ្យមនុស្សរងគ្រោះថ្នាក់ឡើយ។

បើតាមរបាយការណ៍របស់ សាខាកាកបាទក្រហមកម្ពុជាខេត្តសៀមរាប នៅដើមឆ្នាំ២០២៣ នេះ គ្រួសាររងគ្រោះ ដោយគ្រោះធម្មជាតិនៅទូទាំងខេត្ត មានចំនួនសរុប ៥១៣គ្រួសារ ជាមួយនោះសាខាកាកបាទក្រហមកម្ពុជាខេត្ត បាននាំយកអំណោយ ចែកជូនគ្រួសាររងគ្រោះជាបន្តបន្ទាប់ផងដែរ។

ថ្លែងក្នុងឱកាសនោះ លោកជំទាវ ទាង អេង ទៀ សីហា បាននាំយកនូវការសួរសុខទុក្ខ ពី សំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងឯកឧត្តម ទៀ សីហា ប្រធានគណៈកម្មាធិការ សាខាកាកបាទក្រហមកម្ពុជាខេត្តសៀមរាប ព្រមទាំងបានចូលរួមសោកស្ដាយ ចំពោះការខូចខាតទ្រព្យ និងលំនៅដ្ឋានរបស់បងប្អូន ដោយគ្រោះធម្មជាតិកន្លងទៅនេះ។

លោកជំទាវ ក៏បានផ្ដាំផ្ញើដល់ប្រជាពលរដ្ឋ ទាំងអស់ សូមបន្តប្រុងប្រយ័ត្ន ចំពោះបាតុភូតនាៗ ដែលអាចកើតមាននៅក្នុងរដូវប្រាំងនេះ និងថែរក្សាសុខភាពឱ្យបានល្អ ពិសេសកូនចៅតូចៗ បើឃើញថាមានអាការៈមិនស្រួល ត្រូវប្រញាប់បញ្ជូនទៅមណ្ឌលសុខភាពដែលនៅជិតបំផុត។

សូមជម្រាបថា សម្រាប់គ្រួសាររងគ្រោះរលំផ្ទះទទួលបាន អង្ករ ៣០គ.ក្រ មី១កេស ត្រីខ១យួរ កន្ទេល១ មុង១ សារុង១ ក្រមា១ ស័ង្កសី១៦សន្លឹក និងថវិកាចំនួន១៥ម៉ឺនរៀល។ ដោយឡែក គ្រួសាររងគ្រោះ ដោយផ្ទះរបើកដំបូល ជញ្ជាំងចំនួន ១៤០គ្រួសារ ក្នុងមួយគ្រួសារទទួលបាន អង្ករ ៣០គ.ក្រ មី១កេស ត្រីខ១យួរ កន្ទេល១ មុង១ សារុង១ ក្រមា១ ស័ង្កសី១០សន្លឹក និងថវិកាចំនួន១០ម៉ឺនរៀល៕SRP

ខេត្តសៀមរាប៖ក្រុមការងារចុះមូលដ្ឋានឃុំស្រណាល និងធ្វើកាជួលជុលផ្លូវមួយខ្សែប្រវែង ជិត៤ពាន់ម៉ែត្រ ទទឹង ៥ម៉ែត្រ តាមសំណូមពររបស់ប្រជាពលរដ្ឋ ផ្ទាល់ស្ថិតនៅក្នុងភូមិទួលរវៀង ភូមិមានជ័យ និងភូមិផ្លាំង ឃុំស្រណាល ស្រុកក្រឡាញ់ ខេត្តសៀមរាប។

លោក សឹង្ហ សំរឹទ្ធិ ប្រធានក្រុមការងារចុះមូលដ្ឋានឃុំស្រណាល តំណាង ឯកឧត្តម អ្នកឧកញ៉ាបណ្ឌិត សៀង ណាំ ប្រធានក្រុមការងារចុះជួយមូលដ្ឋានស្រុកក្រឡាញ់ នៅ
ថ្ងៃពុធ ទី១៩ ខែមេសា ឆ្នាំ២០២៣
បានដឹកនាំក្រុមការងារ ក្រុមប្រឹក្សាឃុំ និងកងវិស្វកម្មចុះពិនិត្យ រៀបចំជួលជុលផ្លូវមួយខ្សែប្រវែង 3800ម៉ែត្រ ទទឹង 5ម៉ែត្រ តាមសំណូមពររបស់ប្រជាពលរដ្ឋ ខាងលើ។

លោក សឹង្ហ សំរឹទ្ធិ បានឲ្យដឹងថាការជួសជុល គ្រោងបើកការដ្ឋាន ថ្ងៃទី ២១ ខែមេសា ស្អែកនេះ  ស្ថិតនៅក្នុងគំរោងចំណាយថវិកាប្រមាណជិត២មុឺនដុល្លា ដោយប្រើពេលជួសជុលប្រមាណ២០ថ្ងៃ ដោយក្នុង១ថ្ងៃចំណាយថវិកា ៨០០ដុល្លារ ដោយ(ថ្លៃគ្រឿងចក្រ៤ គ្រឿង ១ថ្ងៃ៥០០ដុល្លា ថ្លៃប្រេង និងអាហារ៣០៩ដុល្លារ) ក្នុងនោះដែលយើងប្រើគ្រឿងចក្រ ចំនួន៤គ្រឿង រួមមាន រេវឺល័រមួយគ្រឿង រ៉ូឡូមួយគ្រឿង ឡានទឹកធំពីរគ្រឿង។

លោក សឹង្ហ សំរឹទ្ធិ បន្តថា ឆ្លៀតក្នុងឱកាសនេះដែរ តាំងនាមអោយប្រជាពលរដ្ឋ នៅទីនេះផ្ទាល់ ខ្ញុំបាទសូមអំពាវនាវដល់សប្បុរសជន នានា ដែលមានសទ្ធាជ្រះថ្លា ចូលរួមចាប់មគ្គផល ក្នុងការជួសជុលផ្លូវ ដោយចូលរួមជាថវិការ តាមសទ្ធារៀងខ្លួន🙏🏻🙏🏻🙏🏻 សប្បុរសជនអាចទំនាក់ទំនងឧបត្ថម្ភ តាមរយៈលេខទូរស័ព្ទ 077777743 / 087777714

នៅទីបំផុត«ធនាគារ ABA» បានរៀបចំឯកសារផ្លូវច្បាប់ ជាបណ្ដឹងព្រហ្មទណ្ឌ ប្ដឹងអតិថិជនម្នាក់ទៅតុលាការក្រោយអតិថិជនរូបនោះ បរិហារកេរ្តិ៍ «ធនាគារ ABA»។

បើតាមសេចក្ដីប្រកាសរបស់«ធនាគារ ABA» សៀមរាប ប៉ុស្ដិ៍ ទទួលបាននៅព្រឹកនេះបានបង្ហាញថា៖ យើងខ្ញុំសូមធ្វើបច្ចុប្បន្នភាពជុំវិញ ករណីចោទប្រកាន់មួយ ដែលបានកើតឡើងកាលពីថ្ងៃទី 08 ខែមេសា ដោយមានអតិថិជនម្នាក់ បានអញ្ជើញទៅសាខាធនាគារ ABA មួយកន្លែង ដើម្បីដាក់ប្រាក់នៅបញ្ជរ ហើយបានអះអាងថា បានបាត់ប្រាក់ចំនួន 1,000,000រៀល (មួយលានរៀល)។ ភ្លាមៗ បន្ទាប់ពីអតិថិជនបានតវ៉ានៅសាខា ក្រុមការងារពាក់ព័ន្ធរបស់យើងខ្ញុំ បានបង្ហាញវីដេអូ ជូនអតិថិជន អំពីដំណើរការនៃការរាប់សាច់ប្រាក់ពីជ្រុង (ប្លង់) ផ្សេងៗគ្នា ដោយវីដេអូនោះ បានចាប់យកសកម្មភាពទាំងស្រុង នៃការរាប់សាច់ប្រាក់របស់ក្រុមការងារ។ ប៉ុន្ដែ ពេលនោះ អតិថិជនមិនព្រមទទួលយកការបកស្រាយពីក្រុមការងារយើងឡើយ ហើយក៏បានចាកចេញពីសាខា។ នៅថ្ងៃទី 8 ខែមេសា អតិថិជនបានបង្ហោះសារនៅលើគណនីហ្វេសប៊ុក ដោយបានចោទប្រកាន់ធនាគារ ABA ហើយបំភ្លៃខុសពីហេតុការណ៍ពិត ដែលបានកើតឡើងជាក់ស្ដែង។

នៅថ្ងៃបន្ទាប់ អតិថិជនក៏បានធ្វើការផ្សាយវីដេអូផ្ទាល់ (live) នៅហ្វេសប៊ុក ដោយបន្តរៀបរាប់អំពីការចោទប្រកាន់បំភ្លៃ និងបំផ្លើសការពិតនោះ។ ទោះជាធនាគារយើងខ្ញុំ បានកំណត់ថ្ងៃជួបប្រជុំជាមួយអតិថិជនរូបនេះ នៅថ្ងៃទី 10 ខែមេសា ដែលបង្ហាញពីឆន្ទៈក្នុងការដោះស្រាយបញ្ហាភាន់ច្រឡំនេះក៏ដោយ ក៏អតិថិជនរូបនេះ នៅតែបន្តបរិហារកេរ្តិ៍ រួមមានខ្លឹមសារ ដែលញុះញង់តាមបណ្ដាញសង្គម ឲ្យគេឈប់ប្រើប្រាស់ធនាគារ ABA។

ធនាគារយើងខ្ញុំនៅតែប្ដេជ្ញាព្យាយាមដោះស្រាយបញ្ហាដោយសន្ដិវិធី និងបានជួបប្រជុំជាមួយអតិថិជន នៅការិយាល័យកណ្តាល នៅថ្ងៃទី 10 ខែមេសា ដើម្បីពិនិត្យករណីនេះឡើងវិញ។ បន្ទាប់ពីបង្ហាញវីដេអូ និងភ័ស្ដុតាងដែលបានរកឃើញផ្សេងៗម្ដងទៀតរួច អតិថិជនបានទទួលស្គាល់ថា ចំនួនទឹកប្រាក់ដែលបានដាក់ គឺពិតជាត្រឹមត្រូវ ហើយមិនមានបាត់បង់ប្រាក់នោះទេ។ នៅថ្ងៃដដែល អតិថិជនរូបនេះ បានផុស លិខិតសុំទោស។ ទោះយ៉ាងណា នៅថ្ងៃនេះ លិខិតនោះលែងមាននៅលើទំព័រ/គណនី ហ្វេសប៊ុក របស់គាត់ទៀតហើយ។

ជាមួយមូលដ្ឋានរឹងមាំដែលបញ្ជាក់ថា ការចោទប្រកាន់របស់អតិថិជន គឺការបំភ្លៃការពិត ហើយដោយផ្អែកលើភ័ស្ដុតាង រួមទាំងការរកឃើញផ្សេងៗ ដែលប្រមូលបាន បច្ចុប្បន្ននេះ ធនាគារ ABA រក្សាសិទ្ធិក្នុងការការពារកេរ្តិ៍ឈ្មោះធុរកិច្ច និងម៉ាកសញ្ញារបស់ខ្លួន ដោយក្នុងនោះរួមមាន ការរៀបចំឯកសារផ្លូវច្បាប់ ក៏ដូចជាបណ្ដឹងព្រហ្មទណ្ឌទៅតុលាការ។

ស្របគ្នានេះដែរ យើងខ្ញុំ សូមរំលឹកអតិថិជនជាថ្មីម្ដងទៀត សូមធ្វើការទាក់ទងមកធនាគារ ABA តាមបណ្ដាញទំនាក់ទំនងផ្សេងៗរបស់យើងខ្ញុំ មុននឹងផុសអំពីបញ្ហាអ្វីមួយនៅលើអ៊ីនធឺណិត ឬបណ្ដាញសង្គម។ នីតិវិធីដោះស្រាយវិវាទនានារបស់ធនាគារយើង មាននៅលើវិបសាយ ។ ការអះអាង និងចោទប្រកាន់ដោយបំភ្លៃការពិត និងគ្មានមូលដ្ឋាន អាចបណ្ដាលឲ្យរងវិធានការផ្នែកច្បាប់ជាធរមាន។

អង្គភាព សៀមរាប ប៉ុស្ដិ៍ មិនអាចទាក់ទង អតិថិជន រូបនោះ ដើម្បីបកស្រាយបំភ្លឺនៅឡើយទេ៕srp

តាមរយៈតេឡេក្រាម នាយករដ្ឋមន្ត្រីហ៊ុន សែន នៅយប់ថ្ងៃទី១៩ ខែមេសា បានបង្ហោះ អត្ថបទវិភាគមួយ ក្រោមចំណងជើងថា៖ «កម្ពុជា និងការកើនអំណាចរបស់រដ្ឋតូច»។

អត្ថបទវិភាគនេះ ក្រុមស្រាវជ្រាវ វិភាគ និងព្យាករណ៍ នៃក្រសួងការបរទេស និងសហប្រតិបត្តិការអន្តរជាតិ រៀបចំក្រោមចំណងជើងថា «កម្ពុជា និងការកើនអំណាចរបស់រដ្ឋតូច» ដើម្បីគោរពជូនសម្តេចតេជោ ហ៊ុន សែន នាយករដ្ឋមន្រ្តីកម្ពុជា។

ខាងក្រោមនេះជាអត្ថបទវិភាគ៖

ខេត្តបន្ទាយមានជ័យ៖លោក គាត ហ៊ុល អភិបាលក្រុងប៉ោយប៉ែត​ ត្រូវបានប្រកាសជាអភិបាលក្រុងប៉ោយប៉ែត សម្រាប់អាណត្តិទី២​ ក្នុងដែនសមត្ថកិច្ចដដែល នៅរសៀលថ្ងៃនេះ
ទៅតាមអនុក្រឹត្យ របស់រដ្ឋាភិបាល ចុះថ្ងៃទី១១ ខែមេសា ឆ្នាំ២០២៣។

ក្នុងពិធីប្រកាស អភិបាលខេត្តបន្ទាយមានជ័យ លោក អ៊ុំ រាត្រី បានអំពាវនាវអោយគ្រប់អង្គភាពពាក់ព័ន្ធ នៃរដ្ឋបាលក្រុងប៉ោយប៉ែត បន្តគាំទ្រលោក គាត ហ៊ុល បន្តដឹកនាំរដ្ឋបាលក្រុងប៉ោយប៉ែត បន្តទៀត ដើម្បីអោយកាន់តែរីកចំរើន និងរក្សាបាននូវសន្តិសុខសណ្តាប់ធ្នាប់ល្អ ស្របតាមគោលនយោបាយរដ្ឋាភិបាល។

លោក អ៊ុំ រាត្រី បានបន្តថា សមិទ្ធផល និងស្នាដៃដែលរដ្ឋបាល ក្រុងប៉ោយប៉ែត សម្រេចបាននាពេលកន្លងមក ពិតជា បានរួមចំណែកយ៉ាងសំខាន់ ក្នុងការពង្រឹងសន្តិសុខ ស្ថេរភាពនយោបាយ សេរភាពសង្គម និងការអភិវឌ្ឍ សេដ្ឋកិច្ចសង្គម ដែលជាការរួមចំណែកធ្វើឲ្យសេដ្ឋកិច្ច ប្រទេសកម្ពុជា ទទួលបានកំណើនគួរឲ្យគាត់សម្គាល់ បន្ទាប់ពីរងនូវវិបត្តិដែលបណ្ដាលមកពីជំងឺកូវីដ-១៩ និងបានបង្កលក្ខណៈសម្បត្តិ ដល់ការកាត់បន្ថយភាពក្រីក្រ របស់ប្រជាពលរដ្ឋ សំដៅកសាងសង្គមកម្ពុជាយើង ឲ្យមានការរីកចម្រើនប្រកបដោយចីរភាពជាបន្តទៀត។

លោកថា សមិទ្ធផល និងស្នាដៃដែលសម្រេចបានទាំងនេះហើយ ទើបលោក គាត ហ៊ុល ត្រូវបានរាជរដ្ឋាភិបាលផ្ដល់សេចក្តីទុកចិត្ត តែងតាំងជា អភិបាលនៃគណៈអភិបាលក្រុងប៉ោយប៉ែត សម្រាប់អាណត្តិទី២ ក្នុងដែនសមត្ថកិច្ចដដែល។

សូមបញ្ជក់ថា លោក គាត ហ៊ុល អភិបាលក្រុងប៉ោយប៉ែត ចាប់តាំងពីឡើងកាន់តំណែងជាអភិបាលក្រុងប៉ោយប៉ែត បានរយៈពេលបួនឆ្នាំ ទោះបីក្នុងដំណាក់កាល នៃការរាលដាលខ្លាំង នៃជំងឺកូវីដ-១៩ ក៏ដោយក៏ក្រុងប៉ោយប៉ែត ក្រោមការដឹកនាំរបស់លោក គាត ហ៊ុល មានសមិទ្ធិផលជាច្រើនបានកើតឡើង ដូចជា ៖ រង្វងមូលមាត់ច្រកអន្តរជាតិប៉ោយប៉ែត សួន សម្តេចតេជោ ហ៊ុន សែន ហេដ្ឋារចនាសម្ព័ន្ធផ្លូវថ្នល់ ជាបេតុង និងថ្មមិចជាច្រើនផងដែរ៕SRP

ថ្លែងនៅឯព្រំដែន ច្រកទ្វារអន្តរជាតិដូង លោក សុខ លូ អភិបាលខេត្តបាត់ដំបង បានបញ្ជាក់ប្រាប់មន្ត្រីនៅច្រកទ្វារ អន្តរជាតិដូង ដោយត្រូវចៀសវាងការយកកំរៃសេវាក្រៅផ្លូវការពីបងប្អូនប្រជាពលរដ្ឋ និងពលករដែលធ្វើដំណើរចេញ-ចូលច្រកទ្វារអន្តរជាតិដូងនេះ។

លោក សុខ លូ មានប្រសាសន៍ នៅថ្ងៃពុធនេះ ក្នុងឱកាស ចុះពិនិត្យមើលស្ថានភាព ប្រជាពលរដ្ឋ ពលករ ពលការិនី ត្រឡប់ទៅប្រទេសថៃវិញ បន្ទាប់ពីបានមកលេងស្រុកកំណើត ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដើម្បីត្រឡប់ទៅបំពេញភារកិច្ច ការងាររបស់ខ្លួនវិញ នៅឯច្រកទ្វារអន្តរជាតិដូង ស្ថិតក្នុងស្រុកកំរៀង ខេត្តបាត់ដំបង។

អញ្ជើញនៅព្រំដែន ច្រកទ្វារអន្តរជាតិដូង លោក សុខ លូ បានមានប្រសាសន៍ណែនាំបន្ថែម ដល់មន្ត្រី និងសមត្ថកិច្ច ដែលនៅប្រចាំការ នៅច្រកទ្វារអន្តរជាតិដូងនេះ ដោយត្រូវខិតខំប្រឹងប្រែង ធ្វើយ៉ាងណា ដើម្បីបង្កលក្ខណ:ងាយស្រួល ដល់ដំណើរចេញចូលរបស់ ប្រជាពលរដ្ឋ ពលករ ត្រឡប់ទៅបំពេញភារកិច្ច ឬទៅធ្វើការវិញ ដោយស្របច្បាប់ និងពន្លឿន ក្នុងការបំពេញបែបបទ ឆ្លងដែនជូនបងប្អូនប្រជាពលរដ្ឋ និងពលករអោយបានឆាប់រហ័សផងដែរ៕SRP

«លោកណម ពិសិដ្ឋ ប្រធានមន្ទីរសេដ្ឋកិច្ចនិងហិរញ្ញវត្ថុខេត្តសៀមរាប»

ខេត្តសៀមរាប៖មានការបង្ហោះរិះគន់ ទៅលើមន្ទីរសេដ្ឋកិច្ចហិរញ្ញវត្ថុខេត្តសៀមរាប ដែលគ្រប់គ្រងដោយ លោកណម ពិសិដ្ឋ ប្រធានមន្ទីរចំពោះការយកភាស៊ីរបស់អ្នកធ្វើដំណើរ។

ការរិះគន់នេះ តាមប្រព័ន្ធ facebook នៅថ្ងៃពុធនេះ។ ជុំវិញការរិះគន់នេះ លោកណម ពិសិដ្ឋ ប្រធានមន្ទីរសេដ្ឋកិច្ចនិងហិរញ្ញវត្ថុខេត្តសៀមរាប នៅមិនទាន់ធ្វើការឆ្លើយតបនៅឡើយទេ។

បើតាមបណ្ដាញ់សង្គម ដែលបានបង្ហោះប៉ុន្មានម៉ោងមុននេះ ថា៖ តើផ្លូវថ្នល់នៅខេត្តសៀមរាប ត្រូវបានកសាងនិងថែទាំដោយថវិការបស់មន្ទីរសេដ្ឋកិច្ច និងហិរញ្ញវត្ថុរបស់ខេត្តសៀមរាប ដែលបានមកពីការយកភាស៊ីមែនទេ? ខេត្តផ្សេងទៀតក៏ដូចគ្នាដែរ។
បើដូច្នេះចុះ ពន្ធផ្លូវ មួយឆ្នាំ ២ លានរៀល យកទៅណា?

សូមជម្រាបថា នៅខេត្តសៀមរាប មានទីតាំងយកលុយពីឡានត្រង់ចំណុចខាងលិចសាខាគយ ស្ថិតក្នុងសង្កាត់ទឹកវិល នឹងមួយកន្លែងទៀត ស្ថិតនៅត្រង់ចំណុចការ៉ាស់សាំងផ្លូវក្រវ៉ាត់ក្រុងសៀមរាប ក្នុងសង្កាត់ស្រងែ ជារៀងរាល់ថ្ងៃ ទាំងយប់ទាំងថ្ងៃ៕SRP

ខេត្តសៀមរាប៖បុរសម្នាក់បានចងកសម្លាប់ខ្លួន នៅព្រឹកមិញនេះ នៅលេីដេីមត្រយឹង ខាងកេីតភូមិចំងាយប្រហែល ៣០០ម៉ែត្រ ស្ថិតក្នុងភូមិរូងថ្មី ឃុំល្វែងឫស្សី ស្រុកជីក្រែង ខេត្តសៀមរាប។

សមត្ថកិច្ចស្រុកជីក្រែងបានឲ្យដឹងថាជនរងគ្រោះឈ្មោះ ញឹម ហេង អាយុ ៦៣ឆ្នាំ។ សមត្ថកិច្ចបន្តថាតាមការបំភ្លឺរបស់សាច់ញ្ញាតិ និងការធ្វេីកោសល្យវិច័យរបស់សមត្ថកិច្ច ជនរងគ្រោះ មានជំងឺប្រចាំកាយ បានដេីរទៅចងក នៅចំណុចខាងលេីបណ្តាលអោយស្លាប់តែម្ដង៕SRP

ខេត្តសៀមរាប៖អធិការនគរបាលក្រុងសៀមរាប នៅថ្ងៃអង្គារនេះ បានចេញសេចក្ដីបំភ្លឺមួយ ជុំវិញការផ្សាយរបស់សារព័ត៌មាន សៀមរាប ប៉ុស្ដិ៍ កាលពីយប់ ថ្ងៃ ទី១៧ ខែមេសា ឆ្នាំ ២០២៣។

ការចេញបំភ្លឺ របស់អធិការនគរបាលនៅក្រុងសៀមរាបបន្ទាប់ ពីគេហទំព័រសារព័ត៌មាន សៀមរាប ប៉ុស្ដិ៍ បានចេញផ្សាយនៅអត្ថបទរបស់ខ្លួនមួយក្រោមចំណងជើងថា៖ យុវជនម្នាក់មកពីខេត្តពោធិ៍សាត់ មកលេងខេត្តសៀមរាបត្រូវប៉ូលីសវាយដំ និងជំរិតទាប្រាក់៣ពាន់ដុល្លារ។

ខាងក្រោមនេះជាសេចក្ដីបំភ្លឺព័ត៍មានរបស់អធិការនគរបាលក្រុងសៀមរាប៖ កាលពីថ្ងៃទី១៧ ខែមេសា ឆ្នាំ២០២៣ មានគណនីឈ្មោះ Post News- សៀមរាបប៉ុស្តិ៍ បានសរសេរបង្ហោះព័ត៌មាន នៅតាមបណ្ដាញទំនាក់ទំនងសង្គម Facebook និងមានការចែករំឡែកតៗគ្នា ដែលមានខ្លឹមសារថាៈ យុវជនម្នាក់មកពីខេត្តពោធិ៍សាត់ មកលេងខេត្តសៀមរាបត្រូវប៉ូលីសវាយដំ និងជំរិតទាប្រាក់៣ពាន់ដុល្លារ ជា ថ្នូរនឹងការដោះលែង។

អធិការនគរបាលក្រុងសៀមរាប សូមធ្វើការបដិសេធទាំងស្រុង ចំពោះការលើកឡើងខាងលើ ដោយ មូលហេតុ នៅថ្ងៃទី១៧ ខែមេសា ឆ្នាំ២០២៣ វេលាម៉ោង១៦.០០នាទី អធិការនគរបាលក្រុងសៀមរាប បានទទួលសេចក្ដីរាយការណ៍ ពីនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប ថាពួកគាត់ឃាត់ខ្លួនជនសង្ស័យម្នាក់ុះពាក់ព័ន្ធ នឹង ករណីហិង្សាដោយចេតនា យោងតាមការបំភ្លឺរបស់មន្ត្រីនគរបាលចរាចរណ៍បានអោយដឹងថា នៅថ្ងៃទី១៧ ខែមេសា ឆ្នាំ២០២៣ វេលាម៉ោង១៣.០០នាទី មានជនសង្ស័យឈ្មោះ ឈុន ចំរើន ភេទប្រុស អាយុ១៨ឆ្នាំ មុខរបរមិនពិតប្រាកដ មានស្រុកកំណើត និងទីលំនៅបច្ចុប្បន្ននៅភូមិបត់រំដួល ឃុំផ្ទះរុង ស្រុកតាលោសែនជ័យ ខេត្តពោធិ៍សាត់ បានរត់ចូលក្នុងកន្លែងថៃកុងរថយន្តដែល កំពុងបញ្ហា៖ ខណៈ ពេលដែរម្ចាស់រថយន្តចេញទៅទិញភេជ្ជៈ ក្នុងពេលនោះក្រុមគ្រួសារម្ចាស់រថយន្ត ដែលនៅក្នុងរថយន្ត បានស្រែក ហើយម្ចាស់រថយន្តបានឃាត់ជនសង្ស័យខាងលើ ប្រគល់អោយនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្ត សៀមរាប យកមកស្នាក់ការចរាចរណ៍មាត់ស្ទឹង ក្នុងភូមិមណ្ឌល២ សង្កាត់ស្វាយដង្គំ ក្រុងសៀមរាប ខេត្តសៀមរាប បន្ទាប់មកជន សង្ស័យបានព្យាយាមរត់គេចខ្លួន ត្រូវនគរបាលចរាចរណ៍ដេញចាប់ត្រលប់មកវិញ ក៏ត្រូវជនសង្ស័យវាយមកលើកម្លាំងនគរបាល ចរាចរណ៍មួយកែងដៃបែកភ្នែកខាងស្តាំ(ដេរចំនួន៤ថ្នូរ) ក្រោយមកកម្លាំងប៉ុស្តិ៍នគរបាលរដ្ឋបាលស្វាយដង្គំ ទៅប្រគល់ និងទទួល ជនសង្ស័យខាងលើមកធ្វើការសួរនាំ ក្រោយពីមកដល់ប៉ុស្តិ៍នគរបាលរដ្ឋបាល ជនសង្ស័យខាងលើ ពុំអាចផ្ដល់ចម្លើយបានទេ ព្រោះ៖ ជនសង្ស័យជាមនុស្សរវើរវាយ និយាយខុសពីមនុស្សធម្មតា ក្នុងពេលនោះដែរក្រុមគ្រួសារជនសង្ស័យ បានសុំទោស | នគរបាល ចរាចរណ៍ខាងលើដែលជាជនរងគ្រោះ និងសុំធានាយកជនសង្ស័យឈ្មោះ ឈុន ចំរើន ដែលជាប្អូនទៅព្យាបាលជំងឺបន្ត ហើយ នគរបាលចរាចរណ៍នោះក៏យល់ព្រមបញ្ចប់រឿង ក្នុងពេលនោះដែរស្រាប់តែមានឈ្មោះ ឈុន មៅ ភេទស្រី អាយុ៤២ឆ្នាំ ដែលជា បងជនសង្ស័យ ហើយលឺជនសង្ស័យដែលជាមនុស្សរវើរវាយ បាននិយាយថាប៉ូលីសគាបស៊ីលុយចំនួន៣ពាន់ដុល្លារ ក៏បានទូរស័ព្ទ ទៅប្អូនឈ្មោះ ឈុន ចែម ភេទស្រី អាយុ៣៥ឆ្នាំរស់នៅរាជធានីភ្នំពេញ ថាប៉ូលីសគាបស៊ីលុយចំនួន៣ពាន់ដុល្លារ បន្ទាប់មកឈ្មោះ ឈុន ថែម ក៏បានផ្ញើររូបភាព នឹងពាក្យដែលបងឈ្មោះឈុន មៅ ប្រាប់ទៅកាន់អ្នកកាសែត សៀមរាបប៉ុស្តិ៍ ។ លុះដឹងការពិតថា នគរបាលពុំបានទាមទាប្រាក់ដូចការនិយាយរបស់ប្អូនឈ្មោះ៖ ឈុន ចំរើន ហើយឈ្មោះ ឈុន មៅ និងក្រុមគ្រួសារបានធ្វើការសុំ ទោស ដល់សមត្ថកិច្ចនគរបាលយើងផងដែរ។

សូមជម្រាបថា អត្ថបទនិងរូបភាពដែលសារព័ត៌មានសៀមរាប ប៉ុស្ដិ៍ បានផ្សាយ ជាព័ត៌មានពិត ដែលក្រុមគ្រួសារប្រជាពលរដ្ឋ ខាងលើ បានប្រាប់មានទាំងសំឡេង ដូចលិខិតប្រកាសអធិការនគរបាលក្រុងសៀមរាប បំភ្លឺ ថា គ្រួសារពលរដ្ឋខាងលើ ជាអ្នកផ្ដល់ព័ត៌មានឲ្យអ្នកកាសែតសៀមរាប ប៉ុស្ដិ៍៕SRP