ភ្នំពេញ៖ កាសែតឥណ្ឌា​ The Sunday Guardian បានចុះផ្សាយអត្តបទមួយដោយទម្លាយថា រដ្ឋបាលបៃឌិនរបស់សហរដ្ឋអាមេរិក នៅពីក្រោយគម្រោងការណ៍បង្កើតបដិវត្តន៍ពណ៌នៅកម្ពុជា។

កាសែតមួយនេះទម្លាយទៀតថា គម្រោងផែនការធ្វើរដ្ឋប្រហារនៅកម្ពុជា បានកើតឡើងតាមរយៈមូលនិធិរបស់លោក​ George Soros និងអង្គការ Open Society Foundations(OSF) ផ្អែកលើភស្តុតាងឯកសារបែកធ្លាយដែលពួកគេទទួលបាន។

និពន្ធនាយកនៃកាសែតមួយនេះ បានទាញសេចក្តីសន្និដ្ឋាន ដោយយោងតាមខ្លឹមសារផ្ញើសារតាម email របស់សកម្មជននៃអតីតគណបក្សប្រឆាំង, សកម្មភាពនៃបណ្តាអង្គការសង្គមស៊ីវិលដែលមានទំនាក់ទំនងនឹងមន្ត្រីរបស់បៃឌិននៅតំបន់អាស៊ីប៉ាស៊ីហ្វិក និងសកម្មភាពដោយប្រយោលនានាទៀតនៃមូលនិធិរបស់លោក George Soros និងអង្គការ Open Society Foundation(OSF) នៅក្នុងការផ្តល់ថវិការក្រោមរូបភាពគម្រោងនានា ជាពិសេសគម្រោងស្តារលទ្ធិប្រជាធិបតេយ្យនៅអាស៊ី ជាពិសេសបានទាញឧទារហរណ៍នៃគម្រោងចលនាបះបោរដ៏ជោគជ័យនៅប្រទេសបង់ក្លាដេសនាពេលថ្មីៗនេះ។

ខាងក្រោមនេះជាខ្លឹមសារទាំងស្រុងនៃការចុះផ្សាយរបស់កាសែតThe Sunday Guardian:

https://sundayguardianlive.com/top-five/biden-administration-backed-organisations-plotting-colour-revolution-in-cambodia

សូមនិមន្ត​ និងគោពអញ្ជេីញភ្ញៀវទេសចរជាតិ​ និងអន្តរជាតិចូលរួមទស្សនាកម្សាន្ត ព្រះរាជពិធីបុណ្យអុំទូក​ បណ្តែតប្រទីប​ និងសំពះព្រះខែ​ អកអំបុក​ ខេត្តសៀមរាប​ ដែលនឹងប្រព្រឹត្តទៅថ្ងៃទី១៤-១៦​ ខែវិច្ឆិកា​ ឆ្នាំ២០២៤​ នៅតាមបណ្តោយស្ទឹងសៀមរាបចាប់ពីស្ពានថ្មអតីត មន្ទីរទេសចរណ៍រហូតដល់ ស្ពានថ្មវត្តដំណាក់។

សូមចូលរួមឱ្យបានច្រេីនកុះករ! ! !

ភ្នំពេញ៖លោកហ៊ុន ម៉ានី កូនប្រុសទី 2 របស់សម្ដេចតេជោហ៊ុន សែន ប្រធានព្រឹទ្ធសភាកម្ពុជា នៅរសៀលថ្ងៃអាទិត្យនេះ បានបង្ហោះសំណេរមួយថា ក្រោយពីបានស្តាប់ការសន្ទនាហើយ ក្នុងនាមជាកូន ដែលមានតែក្តីស្រឡាញ់ និងការគោរពសម្រាប់ព្រះរស់នៃខ្ញុំ គឺពិតជាមានអារម្មណ៍ក្តៅក្រហាយ ពោរពេញដោយកំហឹង តែខ្ញុំមិនលើកនៅក្នុងសារនេះនោះទេ ប៉ុន្តែនិយាយឱ្យសាមញ្ញ កូនណាមិនខឹងពេលដែលអ្នកមានគុណបានត្រូវគេប្រមាថ។

ការអះអាងរបស់លោកហ៊ុន ម៉ានី ធ្វើឡើងបន្ទាប់ពីសម្ដេចហ៊ុន សែន បានផុសសំឡេងជាងពីរនាទីដែលក្រុមប្រឆាំងនៅក្រៅប្រទេសបានទូរសព្ទរំខានសម្ដេចតេជោហ៊ុន សែន ថ្ងៃអាទិត្យទី 10 ខែវិច្ឆិកាឆ្នាំ 2024 នេះ។

តាមរយៈសំណេររបស់លោកហ៊ុនមម៉ានី បានបញ្ជាក់បន្ថែមថា៖ អ្វីដែលខ្ញុំចង់ឱ្យយើងទាំងអស់គ្នាយកពីepisodeនេះមកពិចារណាគឺ៖ 

១ វិជ្ជាជីវៈសារព័ត៌មាន

២ អាកប្បកិរិយាក្នុងការគោរពចាស់ទុំ ដែលជាទំនៀមទម្លាប់ប្រពៃណីជាតិរបស់យើង។

ទោះជាមានចំណុចឬទស្សនៈនយោបាយខុសគ្នា តែព្រំដែនគួរតែមាន។ ជាពិសេស អាកប្បកិរិយាក្នុងការអនុវត្តវិជ្ជាជីវៈរបស់ខ្លួនឱ្យស្របទៅតាមប្រពៃណីរបស់ខ្មែរយើង ដែលមានការគោរពគ្នាទៅវិញទៅមក ជាពិសេស ការគោរពចាស់ទុំ។

គេអាចលើកឡើងថា ក្មេងនេះ ឬបុគ្គលនេះធំនៅក្រៅប្រទេស អញ្ជឹងមិនស្គាល់អ្វីជាប្រពៃណីខ្មែរយើង តើលើកដូចនេះស្មើនឹងការទទួលស្គាល់ថា ឱ្យតែអ្នកណា ទោះជាខ្មែរក្តី បរទេសក្តី មិនបាច់ស្វែងយល់ ឬ/និងគោរពទំនៀមទម្លាប់ប្រពៃណីខ្មែរទេឬយ៉ាងណា?

យើងទៅប្រទេសគេ យើងគោរពច្បាប់គេផង ប្រពៃណីគេផង។ ចុះហេតុគ្រាន់តែស្នើឱ្យគេគោរពច្បាប់ និងប្រពៃណីខ្មែរទៅជាបញ្ហាទៅវិញ?

ជារួម ក្នុងនាមជាខ្មែរយើងត្រូវចេះឱ្យតម្លៃបន្ថែមមកលើខ្លួនយើង ក្នុងនាមជាប្រជាជាតិមួយដែលមានអធិបតេយ្យ មានទំនៀមទម្លាប់ប្រពៃណីដ៏ពិសិដ្ឋរបស់យើង៕SRP

សេចក្តីជូនដំណឹង ក្រុមការងារផ្នែកអត្តសញ្ញាណប័ណ្ណសញ្ជាតិខ្មែរក្រុងតាខ្មៅ មានកិត្តិយសសូមជម្រាបថា ថ្ងៃសៅរ៍ និង ថ្ងៃអាទិត្យ គឺ ថ្ងៃទី០៩-១០ ខែវិច្ឆិកា ឆ្នាំ២០២៤ ក្រុមការងាររៀបចំបំពេញសំណុំបែបបទថតអត្តសញ្ញាណប័ណ្ណសញ្ជាតិខ្មែរ ជូននៅ អធិការដ្ឋាននគរបាលក្រុងតាខ្មៅ បន្ទប់ផ្នែកអត្តសញ្ញាណប័ណ្ណ ជាន់ទី១ ។

ដូច្នេះសូមពុកម៉ែបងប្អូនប្រជាពលរដ្ឋ ហួសសុពលភាព បាត់ បាក់ ខូច និង ប្អូនៗដែរគ្រប់អាយុ១៥ឆ្នាំថ្មី អាចអញ្ជើញមក អធិការដ្ឋាននគរបាលក្រុងតាខ្មៅ ដើម្បីស្នើរថ្មី ឬ ទុយតា ។ សម្រាប់អត្តសញ្ញាណប័ណ្ណសុពលភាព តិចជាង១៨០ថ្ងៃ ស្មើរនឹង៦ខែ អាចស្នើរថតថ្មីបានហើយ ។

សម្រាប់ព័ត៌មានបន្ថែម
•ផ្នែកអត្តសញ្ញាណកម្ម: 010 511 886 / 066 644 966

ថ្ងៃទី០៩ ខែវិច្ឆិកា ឆ្នាំ២០២៤៕ SRP

ខេត្តបន្ទាយមានជ័យ៖អំពើឃាតកម្មដ៏សាហាវយង់យ្នង១ បានកើតឡើងនៅក្រុងប៉ោយប៉ែត រវាងឃាតករជាជនជាតិចិន បានសម្លាប់ ជនជាតិចិនដូចគ្នា ផ្តើមពីរឿង ជំរិតទារប្រាក់ជនរងគ្រោះ ត្រូវកំលាំងអាវុធហត្ថឃាត់ខ្លួនបានហើយ នៅវេលាម៉ោង៤រសៀល ថ្ងៃទី ៥ ខែវិច្ឆិកា ឆ្នាំ២០២៤។

ឃាតកម្មដ៏សាហាវយង់យ្នងនេះបើតាមការរៀបរាប់របស់ឈ្មោះ ទូច កញ្ញា  ភេទស្រី អាយុ៣១ឆ្នាំ ជនជាតិខ្មែរ ត្រូវជាប្រពន្ធជនរងគ្រោះ ឈ្មោះ ជឹង ហ័រកាង ជនជាតិចិន ភេទប្រុស អាយុ៣១ឆ្នាំ ត្រូវជាប្តី  រស់នៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ប្រាប់

មុនពេលកើតហេតុនោះ នៅវេលាម៉ោង១០យប់ ថ្ងៃទី២៩ ខែតុលា ឆ្នាំ២០២៤ ប្ដីរបស់ខ្លួនបានជិះរថយន្តម៉ាក Rang Rover ពាក់ស្លាកលេខ ភ្នំពេញ 2BA- 8553  ទៅលេងផ្ទះបងប្អូនជីដូនមួយនៅ  បុរីឌឹផាកស៊ីធី ក្រោយមកនៅវេលាម៉ោង១យប់ ថ្ងៃទី៣០ ខែតុលា ឆ្នាំ២០២៤ ប្ដីរបស់ខ្លួនបានចេញពីផ្ទះបងប្អូនជីដូនមួយមកផ្ទះវិញ ក៏បាត់ដំណឹងសូន្យឈឹងតែម្ដង។ 

លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវក្រោយពីទទួលបានពាក្យបណ្តឹងហើយលោក បានដឹកនាំកំលាំងជំនាញមូលដ្ឋានកងរាជអាវុធហត្ថក្រុងប៉ោយប៉ែត ១ក្រុមបេីកការស្រាវហូតដល់វេលាម៉ោង៣រសៀល ថ្ងៃទី៣១ ខែតុលា ឆ្នាំ២០២៤ នៅចំណុចបុរីKN ស្ថិតក្នុងភូមិគីឡូម៉ែត្រ៤ សង្កាត់ផ្សារកណ្ដាល ក្រុងប៉ោយប៉ែត បានរកឃើញរថយន្តរបស់ជនរងគ្រោះ ត្រូវបានជនសង្ស័យយកមកផ្លុងចោល និងបានដោះផ្លាកលេខចេញ។ កម្លាំងអាវុធហត្ថបានធ្វើការឆែកមើលកាមេរ៉ាសុវត្ថិភាពតាមផ្លូវក្នុងបុរីខឃេីញមានរថយន្តចំនួន១គ្រឿងម៉ាកHyundai  Staria ពណ៌ទឹកប្រាក់ បានជិះនាំមុខរថយន្តជនរងគ្រោះ យកមកផ្លុងចោល ហើយបើកចេញបាត់តែម្តង។ 

លោកវរសេនីយ៍ទោ ព្រហ្ម ថេងបានបញ្ជាក់ឲ្យដឹងបន្តទៀតថា នៅវេលាម៉ោង៣ រសៀល ថ្ងៃទី៣០ ខែតុលា ឆ្នាំ២០២៤ ធ្វើការស្រាវជ្រាវបន្តរហូតដល់វេលាម៉ោង៦ ថ្ងៃទី ១ ខែវិច្ឆិកា ឆ្នាំ២០២៤ កម្លាំងជំនាញមូលដ្ឋានក្រុងប៉ោយប៉ែត បានទទួលព័ត៌មានពីប្រជាពលរដ្ឋប្រទះឃើញសពអណ្ដែតទឹក នៅចំណុចអាងទឹកអូរខៃដន ស្ថិតក្នុងភូមិសុខសាន្ត សង្កាត់និមិត្ត ក្រុងប៉ោយប៉ែត ហើយកម្លាំងបានចុះទៅដល់កន្លែងកើតហេតុឃើញថា សពនោះជាសពជនរងគ្រោះពិត មានសភាពហើមជាំ និងមានចងភ្ជាប់ជាមួយដុំដែកចំនួន២ដុំ ទម្ងន់២០គីឡូក្រាម ហើយកម្លាំងជំនាញបាន បន្តបើកការស្រាវជ្រាវ ឈានដល់ឃាត់ខ្លួនជនសង្ស័យជនជាតិចិនបានចំនួនម្នាក់ឈ្មោះ ស៊ុន ជៀភេទប្រុស អាយុ៤៨ឆ្នាំ រស់នៅចំណុចបុរីសានកូ ស្ថិតក្នុងភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត បក្ខពួក២នាក់ទៀតគេចខ្លួនទៅប្រទេសថៃ ព្រមទាំងដកវត្ថុតាង រថយន្ត ម៉ាក Hyundai  Staria ពណ៌ទឹកប្រាក់  ពាក់ស្លាកលេខ សៀមរាប 2D-2253 ចំនួន ១គ្រឿង កំលាំងអាវុធហត្ថកំពុងសហការជាមួយអាជ្ញាធរខេត្តស្រះកែវ ប្រទេសថៃ ដេីម្បីស្វែងរកបក្ខពួកទាំង២នាក់ទៀតបន្តទៀត។ ក្នុងនោះជនសង្ស័យបានឆ្លើយសារភាពថាខ្លួនពិតជាបានសម្លាប់ ជនរងគ្រោះ ឈ្មោះ ជឹង ហ័រកាងពិត ហើយមានគំរោងគិតទុកជាមុន ដើម្បីជំរិតទារប្រាក់ ពីជនរងគ្រោះ។

លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្តទទួលការងារស្រាវជ្រាវ និងបង្ក្រាបបទល្មេីសបានឲ្យដឹងថា ដោយទទួលបានការ អនុញ្ញាតពីលោកឧត្ដមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលពី លោក កើត វណ្ណារ៉េត ព្រះរាជអាជ្ញា អមសាលាដំបូងខេត្ត  ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្ត បញ្ជូនទៅសាលាដំបូងខេត្ត នៅរសៀលថ្ងៃសុក្រ ទី៨ ខែវិច្ឆិកា ឆ្នាំ២០២៤នេះ ដើម្បីអនុវត្តតាមនីតិវិធីច្បាប់៕SRP

ខេត្តសៀមរាប៖លោកឧត្តមសេនីយ៍ត្រី សៀ ទីន មេបញ្ជាការកងរាជអាវុធហត្ថខេត្តសៀមរាប និង លោកមេបញ្ជាការរងបានប្រគល់គ្រឿងបំពាក់សម្ភារៈបរិក្ខារ ដល់កម្លាំងកងអនុសេនាធំ កងរាជអាវុធហត្ថចល័តរួមមានអាវក្រោះ, (ជាមួយស្មាច់ការពារគ្រាប់)មួកឃ្លុបប្រយុទ្ធ (ជាមួយពិលលើមួក), ខ្សែប្រវ៉ាត់ប្រយុទ្ធ, វែនតាប្រយុទ្ធ, ស្រោមដៃប្រយុទ្ធ, កាសការពារត្រចៀក កាបូបពេទ្យបុគ្គល, អាវុធ CQ-A (ជាមួយពិល និងសាម៉ែល Red Dot)។

ការប្រគល់ នៅថ្ងៃសុក្រនេះនៅនៅទីបញ្ជាការកងរាជអាវុធហត្ថខេត្តសៀមរាប៕SRP

តាមរយៈក្រុមការងារបច្ចេកទេស រៀបចំពិធីបុណ្យអុំទូក បណ្តែតប្រទីប និងសំពះព្រះខែ អកអំបុក របស់រដ្ឋបាលខេត្តសៀមរាបបង្ហាញថា ទូក”ង” ប្រមាណជាង ៣០ទូក នឹងចូលរួមប្រកួត នៅថ្ងៃទី១៤ និង ១៥ ខែវិច្ឆិកាខាងមុខនេះ។

តាមការបញ្ជាក់ របស់ លោក អ៊ឹង គឹមលាង ប្រធានអនុគណៈកម្មការបច្ចេកទេស លើកឡើងថា នៅឆ្នាំ២០២៤នេះ រដ្ឋបាលក្រុងស្រុក គ្រឹះស្ថានសាធារណៈ អង្គការ សមាគម គ្រឹះស្ថានឯកជន ជាច្រើន នឹងនាំយកទូក”ង” មកចូលរួមប្រកួត បន្ថែមពីនេះថ្នាក់ដឹកនាំខេត្ត ក្រុង ស្រុក និងមន្ទីរ អង្គការជុំវិញខេត្ត ក៏នឹងចូលរួមអុំប្រកួត ដើម្បីញ៉ាំងឱ្យពិធីនេះ កាន់មានភាពសប្បាយរីករាយផងដែរ។

តាមការបញ្ជាក់របស់លោក អ៊ឹង គឹមលាង ពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងក្រុងសៀមរាប នឹងចាប់ផ្តើមរៀបចំកម្មវិធីកម្សាន្តសប្បាយចាប់ពីថ្ងៃទី១៣ ដល់ទី១៦ ខែវិច្ឆិកា ក្នុងនោះ រួមមាន ការប្រគុំមន្ត្រីសម័យ បុរាណ កម្មវិធីជិះទូកកម្សាន្តកម្មវិធីដាល់អំបុក កម្មវិធីលេងល្បែងកម្សាន្ត ពិព័រណ៍ម្ហូបអាហារ និងមានកម្មវិធីជាច្រើនទៀត ។

ទន្ទឹមនោះ លោក អ៊ឹង គឹមលាង ក៏បានណែនាំដល់អ្នកពាក់ព័ន្ធ ធ្វើការផ្សព្វផ្សាយនូវព្រឹត្តិការណ៍ដ៏សប្បាយរីករាយនេះ ឱ្យបានទូលំទូលាយទៅដល់ភ្ញៀវជាតិ និងអន្តរជាតិ ជាមួយនោះ ប្រតិបត្តិករទេសចរណ៍ ក្នុងខេត្តត្រូវពង្រឹងសេវាកម្ម និងរក្សាតម្លៃសមរម្យចៀសវាងការតម្លើងថ្លៃ ដែលធ្វើឱ្យប៉ះពាល់ដល់អារម្មណ៍របស់ភ្ញៀវទេសចរ ដែលមកកម្សាន្តក្នុងខេត្តសៀមរាប។SRP

សត្វក្រៀល គឺជាប្រភេទសត្វដែលកំពុងរងការគំរាមគំហែងក្នុងពិភពលោក ទិន្នន័យជំរឿននៅឆ្នាំ២០២៣-២០២៤ កម្ពុជាកត់ត្រាបានតែ ១៧៨ ក្បាលប៉ុណ្ណោះ។ បច្ចុប្បន្ននេះក្រុមអភិរក្សសត្វក្រៀលកម្ពុជាបាន និងកំពុងធ្វើការអភិរក្សសត្វក្រៀលដែលមានវត្តមានទូទាំងប្រទេស។ នេះបើតាមការឱ្យដឹងអង្គការ NatureLife នៅថ្ងៃទី០៧ ខែវិច្ឆិកា ឆ្នាំ២០២៤។

ដោយឡែកក្នុងរដូវកាលបន្តពូជឆ្នាំ២០២៤នេះ ក្រុមការងារអង្គការជីវិតធម្មជាតិនៅកម្ពុជាដែនជម្រកសត្វព្រៃលំផាត់បានធ្វើការយ៉ាងសកម្មក្នុងការអង្កេតតាមដានស្វែងរកសំបុករបស់សត្វក្រៀល និងការការពារពិនិត្យតាមដានសំបុកពងកូនរបស់ពួកវាក្នុងដែនជម្រកសត្វព្រៃនេះ។ ជាលទ្ធផលគិតមកត្រឹមខែតុលា ឆ្នាំ២០២៤ ក្រុមការងាររបស់អង្គការ NatureLife បានកត់ត្រាសំបុករបស់សត្វក្រៀលចំនួន៥សំបុកហើយមានកូនសរុបចំនួន០៩ក្បាល បានហើរចេញពីសំបុកដោយជោគជ័យក្នុងអត្រា១០០ភាគរយ។

យោងតាមទិន្នន័យនេះបានបញ្ជាក់ឱ្យឃើញថាចំនួនសំបុកសត្វក្រៀលនៅដែនជម្រកសត្វព្រែដែលកំពុងអនុវត្តគម្រោងរេដបូកនេះមានចំនួនថេរបើប្រៀបធៀបទៅនឹងការរកឃើញឆ្នាំ២០២៣កន្លងមក។ នេះបានបង្ហាញថាដែនជម្រកសត្វព្រៃលំផាត់គឺជាទីជម្រកដ៏សំខាន់របស់សត្វក្រៀលក្នុងការគាំទ្រដល់ការរស់រានមានជីវិតក្នុងរដូវមិនបន្តពូជ និងក្នុងរដូវបន្តពូជ៕SRP

ភ្នំពេញ៖រដ្ឋសភា នៃព្រះរាជាណាចក្រកម្ពុជា នៅថ្ងៃទី៨ ខែវិច្ឆិកា ឆ្នាំ​២០២៤នេះ បានអនុម័ត ជា ឯកច្ឆន្ទ ដោយសំឡេង១០៩ លើសេចក្តីព្រាងច្បាប់ស្តីពី ការអនុម័តលុបចោល​កិច្ចព្រម​ព្រៀង​ស្តីពី​ការ​ជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម។

ការអនុម័តនេះ​ធ្វើ​​ឡើង​​ក្នុងសម័យប្រជុំរដ្ឋសភា លើកទី៣ នីតិកាលទី៧ ក្រោម​អធិបតីភាព​ដ៏ខ្ពង់​ខ្ពស់ សម្ដេច​មហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា។

សូមបញ្ជាក់ដែរថា សម័យប្រជុំរដ្ឋសភា លើកទី៣ នីតិកាលទី៧ នាព្រឹកនេះ​មាន​របៀប​វារៈ​ចំនួន​ពីរ​រួមមាន៖

១-ការសម្រេចអំពីសុពលភាពនៃអាណត្តិរបស់លោកជំទាវ យស ថានារី ជាតំណាងរាស្រ្តមណ្ឌលខេត្តកំពង់ធំ ជំនួស ឯកឧត្តម ជា ចាន់តូ ដែលបានទទួលមរណភាព។

២-ពិភាក្សា និងអនុម័តសេចក្តីព្រាងច្បាប់ស្តីពី ការអនុម័តលុបចោលកិច្ចព្រមព្រៀងស្តីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម៕SRP

ខេត្តតាកែវ៖អង្គភាពប្រឆាំងអំពើពុករលួយបានចាប់ខ្លួន នាយកទីចាត់ការផែនការ និងវិនិយោគសាលាខេត្តតាកែវ និងមន្រ្តី២រូបទៀត។

ប្រភពបានឱ្យដឹងថា មន្ត្រីសាលាខេត្តតាកែវ ៣នាក់ រួមមាន លោក ហេង វុទ្ធី នាយកទីចាត់ការ និងផែនការវិនិយោគរបស់សាលាខេត្តតាកែវ និងមន្ត្រីរបស់លោក ២រូបទៀត គឺលោក ម៉ម វិចិត្រ និងម្នាក់ទៀតឈ្មោះ ប៊ុនធឿន មន្រ្តីទីចាត់ការផែនការវិនិយោគ។

ព្រះរាជអាជ្ញាអម​សាលាដំបូង​ខេត្តតាកែវ លោក ឯក ឆេងហួត បានឱ្យសារព័ត៌មាន ដឹងនៅល្ងាចថ្ងៃទី០៧ ខែវិច្ឆិកា ឆ្នាំ២០២៤នេះថា មន្ត្រីសាលាខេត្តតាកែវ ទាំង ៣នាក់ បានបញ្ជូនទៅដល់ពន្ធនាគារខេត្តតាកែវរួចហើយ។

លោក ឯក ឆេងហួត បន្តទៀតថា, ពួកគេត្រូវបានឃាត់ខ្លួន កាលពីថ្ងៃទី០៥ ខែវិច្ឆិកា ឆ្នាំ២០២៤ និងបានរកឃើញថា បានជាប់ពាកព័ន្ធពាក់ព័ន្ធនឹងបទរំលោភអំណាច និងភាពមិនប្រក្រតីមួយចំនួនពេលបំពេញភារកិច្ច៕SRP

សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ផ្តល់អាហារូបករណ៍ដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត (អ.ម.ត) នៅសាកលវិទ្យាល័យភូមិន្ទវិចិត្រសិល្បៈ (RUFA) ចំនួន ៦០ កន្លែង ថ្នាក់បរិញ្ញាបត្រ សម្រាប់ឆ្នាំសិក្សា ២០២៤-២០២៥ ដោយឆ្លងកាត់ការប្រឡង និងមិនឆ្លងកាត់ការប្រឡង

កាលបរិច្ឆេទទទួលពាក្យ៖ ចាប់ពីថ្ងៃជូនដំណឹងនេះតទៅ រហូតដល់ថ្ងៃទី១២ ខែវិច្ឆិកា ឆ្នាំ២០២៤

ព័ត៌មានបន្ថែម សូមចូលទៅកាន់ https://t.me/+owb3dYcQt38zZWFl

#អមត #AMT ៕ SRP

ភ្នំពេញ៖ ក្រសួងធនធានទឹក និងឧតុនិយម បានឱ្យដឹងថាចាប់ពីសប្តាហ៍ទី២ នៃខែវិច្ឆិកា ឆ្នាំ២០២៤ ដល់ខែមករា ឆ្នាំ២០២៥ធាតុអាកាសនៅកម្ពុជា នឹងចាប់ចុះត្រជាក់ ដោយសារទទួលរងឥទ្ធិពលរបបខ្យល់មូសុងឦសានខ្លាំង ដែលនាំមកនូវខ្យល់ត្រជាក់។ក្នុងកំលុងពេលដូចគ្នានេះ កម្ពុជា នឹងទទួលរបបទឹកភ្លៀងមានបរិមាណតិចតួចផងដែរ។

បើតាមក្រសួងធនធានទឹក យោងតាមការអង្កេត ពិនិត្យនិងវិភាគ ទៅលើស្ថានភាពវិវឌ្ឍប្រែប្រួលនៃសីតុណ្ហភាពនៅលើផ្ទៃមហាសមុទ្រប៉ាស៊ីហ្វិក ភាគខាងលិច និងមហាសមុទ្រឥណ្ឌា ព្រមទាំងតំបន់អេក្វាទ័របានបង្ហាញឱ្យឃើញថា ចាប់ពីខែវិច្ឆិកាឆ្នាំ២០២៤ ដល់ខែមករា ឆ្នាំ២០២៥ បាតុភូតឡានីញ៉ា មានប្រមាណ៦០% និងអេនសូ ៤០%។

ក្រសួង បញ្ជាក់ថា ខេត្តនៅតំបន់វាលទំនាប មានបន្ទាយមានជ័យ បាត់ដំបង ពោធិ៍សាត់ សៀមរាប កំពង់ឆ្នាំង កំពង់ធំ កំពង់ចាមត្បូងឃ្មុំ ព្រៃវែង ស្វាយរៀង កណ្តាល ខេត្តតាកែវ និងរាជធានីភ្នំពេញ មានសីតុណ្ហភាពមធ្យមអប្បបរមា២០អង្សា និងសីតុណ្ហភាពមធ្យមអតិបរមា ៣១អង្សា។
ខ្យល់បក់មកពីទិសឦសាន និងអាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់ គ្របដណ្តប់លើផ្ទៃដី៥%។

ចំណែកបណ្តាខេត្តនៅតំបន់ខ្ពង់រាប មានកំពង់ស្ពឺ ប៉ៃលិន ឧត្តរមានជ័យ ព្រះវិហារ ស្ទឹងត្រែង ក្រចេះ រតនគិរី និងខេត្តមណ្ឌលគិរីមានសីតុណ្ហភាព មធ្យមអប្បបរមា២០អង្សា និងសីតុណ្ហភាព មធ្យមអតិបរមា៣០អង្សា និងមានខ្យល់បក់មកពីទិសឦសាន និងទិសឧត្តរ។

រីឯតំបន់មាត់សមុទ្រវិញ ដែលមានខេត្តកោះកុង ព្រះសីហនុ កំពត និងខេត្តកែប មានសីតុណ្ហភាពមធ្យមអប្បបរមា២១អង្សា និងសីតុណ្ហភាពមធ្យមអតិបរមា៣២អង្សា និងមានខ្យល់បក់មកពីទិសឦសាន និងអាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដី៥%។ ខណៈរលកសមុទ្រមានកម្ពស់មធ្យមអប្បបរមា ០,៥០ម៉ែត្រ និងកម្ពស់មធ្យមអតិបរមា ១,៥០ម៉ែត្រ។

ដោយឡែក តំបន់ជួរភ្នំក្រវាញ ជួរភ្នំដងរែក និងជួរភ្នំបូកគោ មានសីតុណ្ហភាពមធ្យមអប្បបរមា១៩អង្សា និងសីតុណ្ហភាពមធ្យមអតិបរមា៣០អង្សា និងមានខ្យល់បក់មកពីទិសឦសាន។

ស្របពេលដែលទូទាំងប្រទេស នឹងទទួលរបបទឹកភ្លៀងតិចតួច ក្រសួងធនធានទឹក បានអំពាវនាវឱ្យពលរដ្ឋ ប្រើប្រាស់ទឹកដោយសន្សំសំចៃ និងចូលរួមថែរក្សាប្រភពទឹកទុក ដោយស្មារតីទទួលខុសត្រូវ និងប្រុងប្រយ័ត្ន ដើម្បីធានាដល់ការប្រើប្រាស់ និងស្រោចស្រពផលដំណាំ៕SRP