Siem Reap Post – Page 576 – Siem Reap News, Cambodia News

ខេត្តកំពង់ចាម៖លោក អ៊ុន ចាន់ដា អភិបាលខេត្ត និងជាប្រធានកិត្តិយសសមាគមអតីតយុទ្ធជនខេត្តកំពង់ចាម អមដំណើរដោយមន្ត្រីពាក់ព័ន្ធ នាព្រឹកថ្ងៃទី៨ ខែកក្កដា ឆ្នាំ២០២០នេះ បានអញ្ជើញជួបសំណេះសំណាល និងនាំយកអំណោយសម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានសមាគមអតីតយុទ្ធជនកម្ពុជា ទៅចែកជូនដល់សមាជិកអតីតយុទ្ធជនដែលបានស្ម័គ្រចិត្ត មករស់នៅលើដីសម្បានសង្គមកិច្ច ស្ថិតនៅក្នុងភូមិសំបួរសែនជ័យ ឃុំស្វាយជ្រះ ស្រុកស្នួល ខេត្តក្រចះ ចំនួន៣៤ មកពីបណ្ដាក្រុង-ស្រុកនានាក្នុងខេត្តកំពង់ចាម ដែលមានជីវភាពក្រលំបាកអត់ដីអត់ផ្ទះ ហេីយត្រូវការជាចាំបាច់នូវលំនៅឋានសមរម្យ និងដីកសិកម្មសម្រាប់បង្កបង្កើនផល ដេីម្បីដោះស្រាយជីវភាពរស់នៅប្រចាំថ្ងៃ។
វត្តមានរបស់លោក អ៊ុន ចាន់ដា ក្នុងពិធីនោះ សបញ្ជាក់ឲ្យឃើញអំពីការយកចិត្តទុកដាក់ខ្ពស់ របស់សមាគមអតីតយុទ្ធជនកម្ពុជា និងរដ្ឋបាលខេត្តកំពង់ចាម ដែលតែងតែបានគិតគូរពីសុខទុក្ខផលប្រយោជន៍ និងលេីកកម្ពស់ជីវភាពរស់នៅរបស់បងប្អូនជាសមាជិកសមាគមអតីតយុទ្ធជន ដែលជាការរួមចំណែកយ៉ាងសំខាន់បំផុតដល់ការអនុវត្តន៍គោលនយោបាយជាតិចំពោះអតីតយុទ្ធជន របស់រាជរដ្ឋាភិបាលកម្ពុជា ដោយក្នុងមួយគ្រួសារទទួលបាន ដីលំនៅដ្ឋានទំហំ ៣០×៤០ ម៉ែត្រ សង់អំពីឈើប្រកស័ង្កសី-ដីចំការចំនួន០២ ហិកតា-ផ្លូវលំចំនួន០៤ខ្សែ-ចេញថ្លៃ តបណ្ដាញទឹក-ភ្លើង រដ្ឋ ។ល។
ជាមួយគ្នានោះលោក អ៊ុន ចាន់ដា ក៏បាននាំយកអំណោយរបស់សមាគមអតីតយុទ្ធជន មកផ្តល់ជូនបងប្អូនទាំង៣៤ គ្រួសារ ដោយក្នុងមួយគ្រួសារៗ ទទួលបានអង្ករចំនួន២បាវ ទឹកត្រី ទឹកសុីអុីវ មីកេះ-ភួយ-មុង និងថវិការចំនួន២០ ម៉ឺនរៀល ផងដែរ៕SRP

ខេត្តស្វាយរៀង៖ ក្រុមអាជីវករបានលាតត្រដាងរឿងអាស្រូវរបស់ការិយាល័យគយ និងរដ្ឋាករបុសមន ថាយកលុយពីពួកគាត់ដោយមិនមានចេញវិក្កយបត្រអ្វីទាំងអស់។

យោងតាមប្រភពពីអាជីវកររកស៊ីដឹកទំនិញតាមម៉ូតូ តាមរ៉ឺម៉កម៉ូតូ និងតាមត្រាក់ទ័រ នាំគ្នារអ៊ូរទាំប្រាប់អ្នកព័ត៌មានថា មានមនុស្សឈរ នៅមុខរបងការិយាល័យគយ និងរដ្ឋាករបុសមនស្ទាក់បង់ប្រាក់ក្នុងមួយម៉ូតូមួយម៉ឺនរៀល, មួយរ៉ឺម៉កម៉ូតូ០៤ម៉ឺនរៀល ទៅ៨០ម៉ឺនរៀល តាមរ៉ឺម៉កវែងខ្លី និងតាមមុខទំនិញ តាមត្រាក់ទ័រគេយក១០ម៉ឺនរៀល ក៏ប៉ុន្តែពុំមានសរសេរវិក័យបត្រ័ ឬវីញ៉ែតបង់ពន្ធទេ គ្រាន់តែដើរមើលមុខទំនិញហើយទាលុយតែម្តង។

ការបែកធ្លាយករណីមនុស្សឈរទាលុយអ្នកដឹកទំនិញនេះកើតឡើង នាព្រឹក ថ្ងៃទី០៧ ខែកក្កដា ឆ្នាំ២០២០ នៅជិតច្រកទ្វាព្រំដែនទ្វេភាគីបុសមន ឃុំបុសមនស្រុករំដួល ខេត្តស្វាយរៀង។

ពាក់ព័ន្ធករណីខាងលើនេះបណ្ដាញសារព័ត៌មាន សៀមរាបប៉ុស្តិ៍ នៅមិនទាន់ទទួលបានការបំភ្លឺពី លោក ឃុត សាលីន ប្រធានការិយាល័យគយ និងរដ្ឋាករបុសមន បាននៅឡើយទេនារសៀលថ្ងៃទី០៨កក្កដានេះ។ ប៉ុន្តែក្រោយបែកធ្លាយព័ត៌មាននេះក៏មានស្រ្តីម្នាក់ស្លៀកសំលៀកបំពាក់ស៊ីវិលបានមកប្រាប់ថា មេមិនអាចឲ្យចូលជួបសម្ភាសន៍បានទេ បើអ្នកសារព័ត៌មានគ្មានលិខិតបញ្ជាបេសកកម្មសុំជួបសម្ភាសន៍។

អ្នកសារព័ត៌មានក៏បានសួរទៅស្ត្រីនោះដែរថាពួកខ្ញុំចង់សម្ភាសន៍អំពីករណីក្រុមអាជីវករដឹកទំនិញតាមម៉ូតូ តាមម៉ូតូរ៉ឺម៉ក និងតាមត្រាក់ទ័រ ពួកគាត់រអ៊ូរទាំថា មានមនុស្សស្លៀកពាក់គ្មានឯកសណ្ឋានឈនៅខាងមុខការិយាល័យគយ និងរដ្ឋាករបុសមន ទារលុយពួកគេដែលដឹកអីវ៉ាន់បន្តិចបន្តួចតាមម៉ូតូ ក្នុង០១ម៉ូតូ០១ម៉ឺនរៀល ក្នុង០១រ៉ឺម៉កម៉ូតូ ០៤ម៉ឺនរៀល បើរ៉ឺម៉កម៉ូតូណាវែងដឹកមុខទំនិញចាប់ហួយ ឬតុ ទូ កៅអីជ័រ ពួក ដែកក្រឡាក្រួច ក្តាបកេ។ល។ ក្នុងមួយរ៉ឺម៉កចាប់ពី០៨ម៉ឺនរៀលទៅ១០ម៉ឺនរៀល បើដឹកតាមត្រាក់ទ័រមួយគ្រឿង១០ម៉ឺនរៀល និយាយទៅគឺគេមើលតាមមុខទំនិញ ដោយគ្មានសរសេវិក័យបត្រ័បង់ប្រាក់ទេ។ ដោយស្រ្តីម្នាក់ដែលមកជួបអ្នកសារព័ត៌មាននោះអះអាងថារូបគាត់ជាមន្ត្រីគយ ហើយចំពោះមានអ្នកឈយកលុយនៅមុខការិយាល័យគយនិងរដ្ឋាករបុសមន នោះក៏ជាមន្ត្រីគយដែរ គ្រាន់តែមិនបានពាក់សំលៀកបំពាក់ជាឯកសណ្ឋាន ហើយលុយកាក់បន្តិចបន្តួចពីអ្នកដឹកទំនិញតាមម៉ូតូ ឬតាមរ៉ឺម៉កនោះ គឺគេបង់ឲ្យគ្រាន់ថ្លៃបាយថ្លៃកាហ្វេ ធម្មតាប៉ុណ្ណោះ បើទំនិញដឹកតាមរថយន្តទើបមានវិក័យបត្រ័រាយមុខទំនិញបង់តាមបារ៉ែមគយ ហើយក៏មិនមិនអាចជម្រាបជូនអ្នកយកព័ត៌មានបានទេនេះជាជំនាញរបស់ស្ថាបន័។

ក្រុមអាជីវករបន្តថាបើទោះបីពួកគាត់រកស៊ីដឹកទំនិញបានបង់ពន្ធនៅតាមច្រកព្រំដែនរួចហើយ យ៉ាងណាក៏ដោយក៏មកដល់មុខការិយាល័យគយ និងរដ្ឋាករបុសមន ចៀសមិនផុតពីការបង់លុយបន្ថែមទេឲ្យមន្ត្រីគយ និងរដ្ឋាករបុសមន នោះទេ នេះអាចចាត់ទុកជារបៀបពុករលួយ៕SRP

ខេត្តកំពង់ចាម៖ផ្ទះពលរដ្ឋមួយខ្នង ត្រូវបានអគ្គិភ័យលេបត្របាក់ទាំងស្រុង និង១ខ្នងទៀតត្រូវរងការខូចខាតមួយចំហៀង ដោយករណីផ្ទុះធុងហ្គាស។
ហេតុការណ៍បានកើតមានឡើងកាលពីវេលាម៉ោង៨និង៣០នាទីព្រឹក ថ្ងៃទី០៨ ខែកក្កដា ឆ្នាំ២០២០ ស្ថិតនៅក្នុងភូមិអូរបេង ឃុំមេសរជ្រៃ ស្រុកស្ទឹងត្រង់ ខេត្តកំពង់ចាម។
សមត្ថកិច្ចបានឲ្យដឹងថាករណីនេះបណ្ដាលឲ្យឆេះផ្ទះរបស់ឈ្មោះ រូន សូកូត ភេទប្រុស អាយុ៤៥ឆ្នាំ ជាតិខ្មែរឥស្លាម ប្រពន្ធឈ្មោះ សាអុីត រូហានី អាយុ២៦ឆ្នាំ មានចំនួន២ខ្នងធ្វើអំពីឈើប្រក់ក្បឿង ទំហំ ៥,៥០x៨ម៉ែត្រ ដែលបណ្តាលមកពីផ្ទុះធុងហ្គាស(ធុងធំ) ក្នុងនោះមានការបាត់បង់ទ្រព្យសម្បត្តិរួមមាន៖ ប្រាក់ដុល្លាចំនួន២០,១៥០ដុល្លារសហរដ្ឋអាមេរិក ប្រាក់ម៉ាឡេចំនួន២០០
ប្រាក់រៀលចំនួន៣០០,០០០រៀល និងទ្រព្យសម្បត្តិនៅក្នុងផ្ទះមួយចំនួនទៀត។
ក្នុងនោះបានរាលទៅឆេះជញ្ជាំងផ្ទះអ្នកជិតខាងមានឈ្មោះ ញិប ម៉េងឃាង ភេទប្រុស អាយុ៣៩ឆ្នាំ ជាតិខ្មែរអស់មួយចំហៀង តែមិនបណ្តាលអោយប៉ះពាល់ដល់ទ្រព្យសម្បត្តិអ្វីឡើយ។
សមត្ថកិច្ចបានបញ្ជាក់ថា ក្នុងកិច្ចប្រតិបត្តិការពន្លត់គឺបានប្រើប្រាស់រថយន្តពន្លត់អគ្គិភ័យ០២គ្រឿង រថយន្តអធិការដ្ឋាននគរបាលស្រុកស្ទឹងត្រង់ និងរថយន្តអធិការដ្ឋាននគរបាលស្រុកចំការលើ ដោយប្រើប្រាស់ទឹកអស់ ៣សាទែន។ ក្នុងករណីគ្រោះអគ្គិភ័យនេះពុំមានរងរបួសដល់ម្ចាស់ផ្ទះឡើយ៕SRP

ខេត្តព្រះវិហារ៖ក្រុមឈ្មួញនៅតែបន្តសកម្មភាពដឹកជញ្ជូនឈើនៅក្នុងទឹកដីខេត្តព្រះវិហារបានដោយសេរី ប៉ុន្តែបែជាថ្នាក់ដឹកនាំខេត្តនៅតែធ្វើមិនដឹងមិនឮអ្វីទាំងអស់ ដោយទុកឳកាសឲ្យឈ្មួញដឹកជញ្ជូនឈើតាមតែអំពើចិត្ត។

យោងតាមសេចក្ដីរាយការណ៍បានឲ្យដឹងថាមានក្រុមឈ្មួញជានាក់បានធ្វើសកម្មភាពដឹកជញ្ជូនឈើនៅខេត្តព្រះវិហារដោយមិនកោតខ្លាចញញើតអ្វីឡើយ។ ប្រការដែលឈ្មួញហ៊ានដឹកឈើបានដោយរលូនគ្មានការទប់ស្កាត់បង្ក្រាបបែបនេះអាចព្រោះតែការដឹកនាំរបស់ចៅហ្វាយខេត្តព្រះវិហារ លោក ប្រាក់ សុវណ្ណ មានភាពកំសោយឬអាចនិយាយបានថា អសមត្ថភាពក៏អាចថាបាន។

បើតាមសេចក្ដីរាយការណ៍បានបញ្ជាក់ថាមេឈ្មួញឈើឈ្មោះព្រហ្មធី ហៅ(ធីម្រេច) បានប្រើប្រាស់ រថយន្តសាំងយ៉ុង០២គ្រឿង ក្នុងការរកស៊ីដឹកជញ្ជូនឈើ តាមដងផ្លូវជាតិលេខ៦២ ក្នុងស្រុករវៀងខេត្តព្រះវិហារទៅកាន់ព្រំប្រទល់ស្រុកប្រាសាទបល្ល័ង្ក ខេត្តកំពង់ធំ យ៉ាងគគ្រឹកគគ្រេងបំផុត ខណ:នៅតាមដងផ្លូវមានសមត្ថកិច្ចជាច្រើនស្ថាប័នយ៉ាងណាក៏ដោយក៏ឈ្មួញឈ្មោះព្រហ្មធី ហៅ(ធីម្រេច) នៅតែអាចដឹកឈើបានដោយមិនមានការទប់ស្កាត់ពីអាជ្ញាធរជំនាញពាក់ព័ន្ធនោះឡើយ។

ក្រៅពីមេឈ្មួញព្រហ្មធី ហៅ(ធីម្រេច) ក៏មានឈ្មួញឈើជាច្រើននាក់ទៀត បានធ្វើសកម្មភាពដឹកជញ្ជូនឈើនៅក្នុងខេត្តព្រះវិហារ យកទៅខេត្តសៀមរាប និងខេត្តកំពង់ធំ ដូចជាឈ្មោះសានជាដើម ដោយពួកគេដឹកជញ្ជូនបានដោយរលូនតែម្ដង។ លោកប្រាក់ សុវណ្ណ ចៅហ្វាយខេត្តព្រះវិហារ ចាប់តាំងពីបានឡើងមុខតំណែងជាងមួយឆ្នាំមក គេនៅមិនទាន់ឃើញ អភិបាលខេត្តរូបនេះបញ្ចេញស្នាដៃទប់ស្កាត់បង្ក្រាបជំនួញឈើនៅខេត្តព្រះវិហារនៅឡើយទេខណ:នៅខេត្តព្រះវិហារល្បីបទល្មើសព្រៃឈើ។ ជាហេតុធ្វើឲ្យមជ្ឍដ្ឋាននានាមានការរិះគន់យ៉ាងខ្លាំងចំពោះការដឹកនាំខេត្តរបស់លោកប្រាក់ សុវណ្ណ៕SRP

Sponsored

ខេត្តកំពង់ចាម៖គម្រោងមូលនិធិឃុំ-សង្កាត់ ឆ្នាំ២០២០ របស់គណៈកម្មការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ ចំនួន៥គម្រោង ស្មើនឹង៥ឃុំ របស់ស្រុកកងមាស ត្រូវបានប្រកាសដាក់ដេញថ្លៃ ដេីម្បីអនុវត្តការងារសាងសង់ នាព្រឹកថ្ងៃទី០៨ ខែកក្កដា ឆ្នាំ២០២០ នៅសាលាស្រុកកងមាស ក្រោមវត្តមានលោក លោក ម៉ុក រ៉ាសឿន អភិបាលរងស្រុកកងមាស លោកឡី មិច នាយករងរដ្ឋបាលសាលាខេត្តកំពង់ចាម និងលោកពោយ សុខជា នាយករងទីចាត់ការផែនការនិងវិនិយោគខេត្ត ព្រមទាំងគណៈកម្មការម្ចាស់លទ្ធកម្ម និងតំណាងក្រុមហ៊ុន អ្នកទទួលការ ជាច្រើនរូប។
ឆ្លៀតក្នុងឱកាសនោះដែរ លោក ម៉ុក រ៉ាសឿន បានធ្វើការសំណូមពរដល់គណៈកម្មការលទ្ធកម្ម និងក្រុមហ៊ុន អ្នកទទួលការទាំងអស់ ត្រូវអនុវត្តការងារគម្រោងឲ្យមានតម្លាភាព ហេីយធ្វើការសាងសង់ឲ្យត្រូវតាមបទដ្ឋានលក្ខណៈបច្ចេកទេស ប្រយោជន៍ដល់ការប្រើប្រាស់ជាសាធារណៈ។
ក្នុងនាមតំណាងឲ្យអាជ្ញាធរខេត្តកំពង់ចាម លោក ឡី មិច មានមតិលេីកឡើងថាការដេញថ្លៃគម្រោងមូលនិធិឃុំ-សង្កាត់ ត្រូវតែធ្វើឡើង ជាសាធារណៈ នៅចំពោះមុខអ្នកចូលរួមដេញថ្លៃទាំងអស់ ដើម្បីតម្លាភាព និងចៀសវាងជាដាច់ខាតនូវភាពអនាធិបតេយ្យ ក្នុងអំឡុងពេលដំណើរការនីតិវិធីដេញថ្លៃ ជាពិសេសត្រូវលុបបំបាត់ឲ្យខានតែបាន ចំពោះជនឆ្លៀតឱកាស ដោយឡែកអ្នកទទួលការ ដែលឈ្នះក្នុងការដេញថ្លៃត្រូវគោរពឲ្យបានត្រឹមត្រូវ ទៅតាមបទដ្ឋានលក្ខខណ្ឌបច្ចេកទេស និងរយៈពេលកំណត់ នៃកិច្ចសន្យា។

គួរបញ្ជាក់ផងដែរថា គម្រោងដែលបានដាក់ឲ្យដេញថ្លៃខាងលើនេះ គឺមានផ្លូវចំនួន៥ខ្សែ ដែលត្រូវស្ថាបនា ជូនប្រជាពលរដ្ឋប្រើប្រាស់ ក្នុងនោះមាន ១-ឃុំពាមជីកង សាងសង់ផ្លូវបេតុងអាមេ ប្រវែង ០.៤៥០ គ.ម ទទឹង៥ម កម្រាស់០.១៥ ម នៅភូមិសំបួរមាស(ក) ។
២-ឃុំព្រែកកុយ សាងសង់ផ្លូវបេតុងអាមេ ប្រវែង ០.៦២៥ គ.ម ទទឹង ៥ម នៅភូមិគោហេរ ។
៣-ឃុំរកាគយ សាងសង់ផ្លូវបេតុងអាមេ ប្រវែង ០.១២៥ គ.ម ទទឹង ៤ម នៅភូមិស្វាយតាហែន ។
៤-ឃុំរកាអារ សាងសង់ផ្លូវបេតុងអាមេ ប្រវែង ០.៦៧៥ គ.ម ទទឹង ៤ម នៅភូមិព្រែកលីវទី៤ ។
៥-ឃុំស្តៅ សាងសង់ផ្លូបបេតុងអាមេ ប្រវែង ០.៥៣៦ គ.ម ទទឹង ៤ម នៅភូមិស្តៅ ។
ដោយនីតិវិធីនៃការដេញថ្លៃនេះប្រព្រឹត្តទៅដោយរលូននោះ ប្រធានគណៈកម្មាការម្ចាស់លទ្ធកម្មទាំង៥ឃុំ បានធ្វើការប្រកាសទទួលយកទាំង៥គម្រោង ព្រមទាំងបានធ្វើការផ្តាំផ្ញើដល់ក្រុមហ៊ុនអ្នកទទួលការទាំងនោះ សូមឲ្យអនុវត្តន៍ការងារសាងសង់ផ្លូវ ឲ្យមានគុណភាពល្អ និងធ្វើឲ្យត្រូវតាមស្តង់ដារ លក្ខណៈបច្ចេកទេស ជាប្រយោជន៍ដល់ការប្រើប្រាស់ផងដែរ៕SRP

ខេត្តសៀមរាប៖រយ:ពេលប៉ុន្មានថ្ងៃកន្លងមកនេះតាមបណ្ដាញសង្គមហ្វេសប៊ុកនិងសារព័ត៌មានមួយចំនួនបានបង្ហោះផ្សព្វផ្សាយលាតត្រដាងរឿងអាស្រូវរបស់មេប៉ូលិសស្រុកប្រាសាទបាគងគឺលោកវរសេនីយ៍ទោ លឹម សម្បត្តិ ។

យោងតាមព័ត៌មានដែលបានបង្ហោះចែកចាយតាមបណ្ដាញសង្គមបានឲ្យដឹងថាប្រជាពលរដ្ឋមួយចំនួនបានប្រតិកម្ម ចំពោះ អធិការនគររដ្ឋានបាល ស្រុកប្រាសាទបាគង ខេត្ដសៀមរាប ដោយចោទថា ជំរិតទារលុយពីអ្នកលេងល្បែងស៊ីសងក្នុងម្នាក់មួយលានរៀល ដោយជាថ្នូរទៅនឹងការដោះលែង ពួកគាត់អោយ ឲ្យមានសេរីភាព វិលត្រឡប់ ទៅផ្ទះទាំងកណ្ដាលយប់វិញ។ ការចោទប្រកាន់មកលើអធិការនគរបាលស្រុកប្រាសាទបាគងនេះក្រោយពេល សមត្ថកិច្ចនគរបាលស្រុកប្រាសាទបាគងចុះចាប់ពលរដ្ឋ ក្នុងករណីបង្ក្រាបល្បែងស៊ីសង កាលពីជាងពីរសប្ដាហ៍មុន។

ប្រភពពីអ្នកស្រុកដែលសុំមិនប្រាប់ឈ្មោះ បានអោយដឹងថា ក្រុមសមត្ថកិច្ចស្រុកប្រាសាទបាគង បានចាប់អ្នកលេងល្បែងស៊ីសង នៅតាមភូមិជាច្រើននាក់ ក្នុងនោះចាប់ទាំងអ្នកដែលមិនបានលេងផងដែរ។ យកទៅដាក់ខ្នោះដៃ ហើយសំឡុតអោយពួកគាត់បង់លុយចំនួន៣០០ដុល្លារជាថ្នូរនឹងការដោះលែង។ប៉ុន្ដែអ្នកលេងល្បែងអត់មានលុយ ក៏អង្វរសុំត្រឹមមួយលានរៀលដែលស្មើរនឹង២៥០ដុល្លាក្នុងម្នាក់។ អ្នកស្រុកបន្ដថា ប្រជាពលរដ្ឋ ដែលសមត្ថកិច្ចចាប់នោះ ខ្លះមិនបានលេងល្បែង គ្រាន់តែលក់ទឹក ខ្លះទៀតទៅទិញរបស់ហូប និងខ្លះទៀតដើរកាត់កន្លែងគេល្បែងនោះ ក៏ត្រូវបានសមត្ថកិច្ចចាប់ពួកគាត់ដាក់រថយន្ដបញ្ជូនទៅអធិការដ្ឋានគរបាល ដែរ ដោយប្រាប់ថា អោយឡើងឡានសិនទៅ។

បើតាមប្រភពបន្តឲ្យដឹងទៀតថាពលរដ្ឋ ដែលសមត្ថកិច្ចចាប់នោះ មានប្រមាណជិត៣០នាក់។ ពួកគាត់ត្រូវបានសមត្ថកិច្ចសួរចំលើយ ហើយគម្រាមទារលុយ បើមិនបង់ប្រាក់ទេ មិនអាចរួចខ្លួននោះទេ។យោងតាមប្រភពបានបញ្ជាក់ទៀតថាក្រោយពេលចប់ការដោះស្រាយហើយ អធិការស្រុកប្រាសាទបាគង អោយដោះលែងទាំងយប់តែម្ដង។

ពាក់ព័ន្ធករណីនេះ អធិការស្រុក្រប្រាសាទបាគង លោកវរសេនីយ៍ទោ លឹម សម្បត្ដិ បានប្រាប់អ្នកសារព័ត៌មានថាលោកមិនបានជំរិតទារលុយពីអ្នកលេងល្បែងដូចការចោទប្រកាន់នោះទេ។ អ្នកលែងល្បែងដែលសមត្ថកិច្ចចាប់ខ្លួនគឺសមត្ថកិច្ចអនុវត្ដទៅតាមផ្លូវច្បាប់។ក្នុងផងដែរគ្មានភស្ដុតាងណាមួយដែលសមត្ថកិច្ចជំរិតទារលុយពីអ្នកលែងល្បែងនោះទេ។

ជាមួយគ្នានេះដែរលោកវរសេនីយ៍ទោ លឹម សម្បត្ដិ អធិការស្រុក្រប្រាសាទបាគង បានបញ្ជាក់តាមប្រព័ន្ទតេលេកក្រាមរបស់គ្រុប.សៀមរាបប៉ុស្ដិ៍ ថាធម្មតា អ្នកធ្វើតែងតែខុស អ្នកមិនធ្វើ បានត្រូវ ។

នៅព្រឹកនេះដែរតាមរយ:ទំព័រផេកហ្វេសប៊ុករបស់លោកវរសេនីយ៍ទោ លឹម សម្បត្ដិអធិការស្រុក្រប្រាសាទបាគង បានសរសេរថា៖លិខិត របស់ លោក អឿម ហួរ ធ្វើការបំភ្លឺ និងសូមទោស ដែលបានផ្តល់ បទសម្ភាសន៍ ដល់អ្នកសាព័ត៌មាន ដោយបាន បំភ្លើស និងចោទប្រកាន់ មកលើរូបខ្ញុំបាទ រួមទាំងកងម្លាំង នៃអធិការដ្ឋានស្រុកប្រាសាទបាគង ដែលខិតខំលុបបំបាត់ ការលេងល្បែងស៊ីសង ក្នុងមូលដ្ឋាន ដើម្បីរក្សាសន្តិសុខទូទៅជូនបងប្អូនប្រជាពលរដ្ឋ ។

សូមជ្រាបជាព័ត៌មាន កុំបំពានសិទ្ធអ្នកដ៏ទៃនិងកុំបំភ្លៃការពិត។ ទោះយ៉ាងណាយោងតាមលិខិតមួយទំព័រសរសេរដោយពលរដ្ឋបានធ្វើការសុំទោសនគរបាលស្រុកប្រាសាទបាគងផងដែរ ក្រោយពីមានការបែកធ្លាយរឿងដល់អ្នកសារព័ត៌មាន។

បើយោងតាមច្បាប់បង្ក្រាបល្បែងស៊ីសងជំពូកទី៣មាត្រា៤ ជនណាលេងល្បែងស៊ីសង ជននោះនឹងត្រូវផ្ដន្ទាទោសពិន័យជាប្រាក់១ម៉ឺនរៀលដល់៥ម៉ឺនរៀលឫដាក់គុកពីមួយសប្តាហ៍ដល់មួយខែ។ក្នុងករណីពុំរាងចាល ត្រូវផ្តន្ទាទោសពិន័យជាប្រាក់ ៥០០០០៛ដល់ប្រាំសែនរៀលនិងដាក់គុកពី១ខែដល់មួយឆ្នាំ។មាត្រា៥ត្រូវផ្តន្ទាទោសពិន័យជាប្រាក់ពីប្រាំលានរៀល (៥.០០០.០០០រ ដល់២០.០០០.០០០រ និងដាក់គុកពីមួយឆ្នាំដល់ប្រាំឆ្នាំ ចំពោះអ្នកបើកកន្លែងលេងល្បែងស៊ីសង អ្នកកាន់កាប់ល្បែងស៊ីសង អ្នកចាត់ចែងនិងភ្នាក់ងារស៊ីសង។ក្នុងករណីពុំរាងចាល ត្រូវផ្តន្ទាទោសពិន័យជាប្រាក់និងដាក់គុកខាងលើនេះជាអតិបរមា៕SRP

ភ្នំពេញ៖នាយករដ្ឋមន្ត្រី ហ៊ុន សែន នៅព្រឹកនេះបានបន្តសូមបងប្អូន បន្តយកចិត្តទុកដាក់ ថែរក្សាសុវត្ថិភាព អោយបានល្អ កុំអោយឆ្លងជំងឺកូវីដ-១៩។
សម្ដេចតេជោ ហ៊ុន សែន បានបញ្ជាក់
សុខសប្បាយជាទេបងប្អូនជនរួមជាតិ? សម្ដេចបានបញ្ជាក់ថាមកទល់ថ្ងៃនេះស្ថានភាពការឆ្លងរាលរាតត្បាតជំងឺកូវីដ-១៩ ក្នុងពិភពលោកបានកើនឡើងដល់ 11,500,302 នាក់ ហើយចំនួនអ្នកស្លាប់បានកើនឡើងដល់ 535,759 នាក់តាមការបញ្ជាក់របស់ WHO។

សូមបងប្អូនបន្តយកចិត្តទុកដាក់ថែរក្សាសុវត្ថិភាពអោយបានល្អ ជាពិសេសកុំអោយឆ្លងជំងឺកូវីដ-១៩។ ត្រូវក្រើនរំលឹកដល់កូនចៅតូចៗនៅក្នុងបន្ទុកអោយចេះការពារខ្លួន ហើយឧស្សាហ៍ដុសលាងសម្អាតដៃជាមួយសាប៊ូ ចឹល ឬទឹកអាល់កុល និងពាក់ម៉ាសការពារខ្លួន។ នៅផ្សាររដ្ឋនិងឯកជន តូបឬហាងលក់ឥវ៉ាន់ ភោជនីយដ្ឋាន ហាងកាហ្វេ ផ្ទះសំណាក់ សណ្ឋាគារ ជាពិសេសក្លីនិក និងមន្ទីរពេទ្យរដ្ឋ និងឯកជនត្រូវមានចឹលឬអាល់កុល និងម៉ាសសម្រាប់អតិថិជនប្រើប្រាស់ចៀសវាងការឆ្លងជំងឺកូវីដ-១៩ ពីម្នាក់ទៅម្នាក់។
សម្ដេចតេជោនាយករដ្ឋមន្ត្រីបានបញ្ជាក់បន្ថែមថាចំពោះបងប្អូនប្រជាពលរដ្ឋអ្នកធ្វើដំណើរមកពីក្រៅប្រទេស ក្រោយពីបានពិនិត្យសុខភាពមានលទ្ធផលអវិជ្ជមានហើយបានអនុញ្ញាត្តិអោយទៅរស់នៅដាច់ដោយឡែកនៅតាមផ្ទះ សូមធ្វើតាមការណែនាំរបស់ក្រសួងសុខាភិបាលអោយបានត្រឹមត្រូវ ហាមដើរចេញមានទំនាក់ទំនងក្រៅផ្ទះ ទោះបីគ្មានមន្រ្តីសុខាភិបាលនៅជាមួយជាប់ក៏ដោយ។ ជូនពរបងប្អូនជួបតែសំណាងល្អ នឹងបានចៀសផុតពីជំងឺឆ្លងកូវីដ១៩ គ្រប់ៗគ្នា៕SRP

ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រី កម្ពុជា បានបញ្ជាក់ថាថ្ងៃនេះអបអរសាទរខួប៣ឆ្នាំ នៃការដាក់បញ្ចូលតំបន់ប្រាសាទសំបូរព្រៃគុក ក្នុងបញ្ជីបេតិកភណ្ឌពិភពលោក។
សម្ដេចតេជោ នាយករដ្ឋមន្ត្រីបានបញ្ជាក់យ៉ាងដូច្នោះថាថ្ងៃទី០៨ខែកក្កដា ឆ្នាំ២០២០នេះ ខួប៣ឆ្នាំ (០៨ កក្កដា ២០១៧-០៨ កក្កដា ២០២០) នៃការដាក់បញ្ចូលប្រាសាទសំបូរព្រៃគុក ជាសម្បត្តិបេតិកភណ្ឌពិភពលោក នៅក្នុងកិច្ចប្រជុំគណៈកម្មាធិការបេតិកភណ្ឌពិភពលោក នៅទីក្រុង Krakow ប្រទេសប៉ូឡូញ។
សម្តេចតេជោ បានបន្តទៀតថា
ក្រោយចុះបញ្ជីជាសម្បត្តិបេតិកភណ្ឌពិភពលោក ប្រាសាទសំបូរព្រៃគុក ដែលស្ថិតនៅភូមិសំបូរ ឃុំសំបូរ ស្រុកប្រាសាទសំបូរ ខេត្តកំពង់ធំ បានក្លាយជាតំបន់ទេសចរណ៍វប្បធម៌ ប្រវត្តិសាស្ត្រ ដ៏ទាក់ទាញមួយ។ ប្រាសាទសំបូរព្រៃគុក មានទីតាំងស្ថិតនៅក្នុងភូមិសំបូរ ឃុំសំបូរ ស្រុកប្រាសាទសំបូរ ខេត្តកំពង់ធំ ដែលមាន ចំងាយ ២៥គីឡូម៉ែត្រ ពីទីរួមខេត្តកំពង់ធំ តាមផ្លូវជាតិលេខ៦៤ បត់ស្តាំតាមផ្លូវកូនត្នោត។ ប្រាសាទនេះ ជារាជធានីចាស់ បុរាណឈ្មោះ ថាឥសានបុរៈ ដែលកាលពីសម័យនោះ ជាមជ្ឈមណ្ឌលនៃសាសនា ឧទ្ទិសថ្វាយដល់សិវៈនិយម។ ក្រុមប្រាសាទនេះសាងសង់អំពីឥដ្ឋតាន់ ថ្មបាយក្រៀម និងថ្មភក់ជាដើម៕SRP