ខេត្តបាត់ដំបង៖ លោកវរសេនីយ៏ទោ កងសុផាណ្ណា ជានាយរងការិយាល័យនគរបាលព្រហ្មទណ្ឌកំរិតធ្ងន់បានឲ្យដឹងនៅរសៀលថ្ងៃនេះថា ក្រោមណែពី ឧត្តមសេនីយ៏ទោ អ៊ុច សុខុន ស្នងការនគរបាលខេត្តនិងលោកវរសេនីយ៍ឯក លឹម ពុទ្ធីឡា ស្នងការរងទទួលផែនការងារនគរបាលព្រហ្មទណ្ឌ លោកបាន
ដឹកនាំការិយាល័យព្រហ្មទណ្ឌកម្រិតធ្ងន់សហការជាមួយនគរបាលក្រុងបាត់ដំបងដេីម្បីអនុវត្តន៍ដីកាបង្គាប់ឲ្យចាប់ខ្លួនលេខ៤៨១ដចបខ ចុះថ្ងៃទី ៧ខែកក្កដា ឆ្នាំ ២០២០ដោយលោកជុំសង្វា ជាចៅក្រមជំនុំជម្រះនៃសាលាដំបូងខេត្តបាត់ដំបង ដោយបានចាប់ខ្លួនជនជាតិវៀតណាមម្នាក់នភពីល្ងាចថ្ងៃទី ១៥ខែសីហា ឆ្នាំ ២០២០វេលាម៉ោង ១៦និង ៣០នាទី ស្ថិតនៅត្រង់ចំណុចភូមិជ្រៃកោង សង្កាត់ស្លាកែត ក្រុងបាត់ដំបង។

លោកនាយរងការិយាល័យបានឲ្យដឹងទៀតថា បុរសម្នាក់ឈ្មោះ សុខឡាញ់ ភេទប្រុសអាយុ ៣៧ឆ្នាំ ជាជនជាតិវៀតណាមមានទីលំនៅបច្ចុប្បន្នភូមិជ្រៃកោង សង្កាត់ស្លាកែត ក្រុងខេត្តបាត់ដំបង។ ត្រូវបានចោទប្រកាន់ពីបទ(អំពើលួច)ប្រព្រឹត្តនៅចំណុចភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង កាលពីថ្ងៃទី៨ខែសីហា ឆ្នាំ ២០១៨កន្លងមក។

បច្ចប្បន្ននគរបាលសាកសួរនឹងបញ្ជូនទៅកាន់សាលាដំបូងខេត្តបាត់ដំបង អនុវត្តតាមនីតិវិធីច្បាប់៕SRPដោយប៊ុនថេត

ភ្នំពេញ៖សួនទឹក «ហ្គាឌិនស៊ីធី» នេះ គឺជាកន្លែងលេងទឹកកម្សាន្តដ៏ធំ និងដំបូងគេនៅក្នុងប្រទេសកម្ពុជា ត្រូវបានបើកសម្ពោធនៅព្រឹកមិញនេះក្រោមវត្តមាននាយករដ្ឋមន្ត្រី ហ៊ុន សែន។

សួនទឹក «ហ្គាឌិនស៊ីធី» របស់ឧកញ៉ា លី យ៉ុងផាត់ ស្ថិតនៅសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ត្រូវបានសាងសង់ឡើងនៅតំបន់អភិវឌ្ឍន៍របស់លោកឧកញ៉ា លី យ៉ុងផាត់ ដែលជាតំបន់អភិវឌ្ឍន៍រណបមួយភាគខាងជើងឈាងខាងកើតរាជធានីភ្នំពេញ។ សួនទឹក «ហ្គាឌិនស៊ីធី» ត្រូវបានបោះទុនវិនិយោគសរុបជាង ៤៤លានដុល្លារអាមេរិក។ សួនទឹកនេះ ត្រូវបានសាងសង់ឡើងលើផ្ទៃដីជាង ៨ហិកតា ដោយចាប់ផ្តើមដំណើរការសាងសង់នៅថ្ងៃទី២៨ ខែឧសភា ឆ្នាំ២០១៨ ហើយបញ្ចប់ការសាងសង់ទាំងស្រុងនៅខែកក្កដា ឆ្នាំ២០២០។ សួនទឹកនេះ មានឧបករណ៍សម្រាប់លេងកម្សាន្តទាំងអស់ចំនួន៣៨ ដែលទាន់សម័យ និងមានគុណភាពល្អ ដោយបាននាំចូលពីសហរដ្ឋអាមេរិក និងសហគមន៍អឺរ៉ុប។ ឧបករណ៍លេងកម្សាន្តទាំងនេះ ត្រូវបានរចនាឡើងសម្រាប់មនុស្សគ្រប់វ័យទាំងវ័យកុមារ ជំទង់ យុវវ័យ និងវ័យចំណាស់ផងដែរ។ ឧបករណ៍កម្សាន្តទាំងនេះមានដូចជា៖ ឋានសួគ៌រលក (ធំជាងគេនៅអាស៊ាន), អាណាចក្រទឹក (ធំជាងគេនៅអាស៊ាន), ឋានសួគ៌កុមារ, ទន្លេមេគង្គ, ស្គីរលក និងជ្រលងទឹកគួច។

ក្រៅពីមានកន្លែងលេងទឹកហើយនោះនៅក្នុងសួននេះ ក៏មានភោជនីយដ្ឋានបម្រើអាហារដ្ឋានមានទាំងអាហារខ្មែរ បារាំង និងកញ្ចុសសម្រាប់អង្គុយលេងកម្សាន្ត។ សួនទឹកនេះមានបុគ្គលិកបម្រើការរហូតដល់ទៅ ២៣០នាក់ ហើយសម្រាប់តម្លៃសំបុត្រចូលលេងកម្សាន្តវិញ មនុស្សធំតម្លៃ ១៥ដុល្លារអាមេរិក កូនក្មេង និងមនុស្សចាស់តម្លៃ ៩ដុល្លារ។ បើកដំណើរការពីម៉ោង ១០ព្រឹក ដល់ម៉ោង ៦ល្ងាច៕SRP

ខេត្តសៀមរាប៖មន្ត្រីបម្រើការងារនៅក្រសួងសាធារណការ និងដឹកជញ្ជូន ម្មាក់បានសាងសង់សំណង់អគារដ៏ស្កឹមស្កៃ នៅតំបន់ឧទ្យានអង្គរ ត្រូវបានវាយកម្ទេចចោលវិញ។
ទីតាំងសំណង់ដ៏ធំនេះត្រូវបានគេអះអាងថាបានសាងសង់ជាយូណាស់មកហើយស្ថិតក្នុងភូមិគោកដូង សង្កាត់ទឹកវិលក្រុងសៀមរាប ត្រូវបានគេប៉ាន់ប្រមាណថា មានទំហំ៣០ម៉ែត្រ គុណ១០០ម៉ែត្រ និងមានតម្លៃប្រមាណជាង២លានដុល្លាអាមេរិកឯណោះ។

យោងតាមប្រភពបានឲ្យដឹងថាសំណង់ដ៏ធំរបស់មន្ត្រីជាន់ខ្ពស់មួយរូបនៅក្រសួងសាធារណការ និងដឹកជញ្ជូន ត្រូវបានរុះរើទាំងបង្ខំ តាមការកំណត់របស់អាជ្ញាធរជាតិអប្សរា។
តាមប្រភពបានឲ្យដឹងថា ដើមចមដែលនាំឲ្យមានសំណង់ធំនេះ គឺដំបូងឡើយគេបានយកឈ្មោះ ក្រសួងសាធារណការ និងដឹកជញ្ជូន មកសុំការសាងសង់ជារោងសម្រាប់ដាក់សម្ភារបម្រើការជួសជុលផ្លូវជាតិលេខ៦។ប៉ុន្តែបន្ទាប់ពីបានការអនុញ្ញាតស្រាប់តែម្ចាស់ទីតាំងបានលួចសាងសង់សំណង់ដ៏ធំខុសពីការស្នើសុំ ហើយបានរុះរើដោយខ្លួនឯងវិញបន្ទាប់ពីអាជ្ញាធរជាតិអប្សរាបានបញ្ជាក់ថាពុំសាងសង់តាមការអនុញ្ញាត។
មន្ត្រីបាននិយាយថា បន្ទាប់ពីមានការចាត់វិធានការនេះ ម្ចាស់សំណង់បានសម្រេចចិត្តទាំងបង្ខំសុំធ្វើការរុះរើសំណង់នេះដោយខ្លួនឯង ដោយបានចំណាយពេលជាច្រើនថ្ងៃ ទើបការរុះរើសំណង់នេះបានចប់ជាស្ថាពរនាថ្ងៃទី១៤ ខែសីហា ឆ្នាំ២០២០មុននេះពីរថ្ងៃ។
ពាក់ព័ន្ធការសាងសង់សំណង់ពលរដ្ឋជាច្រើនបានលើកឡើងថានៅក្នុងតំបន់ឧទ្យានអង្គរគ្រប់គ្រងដោយអាជ្ញាធរជាតិអប្សរា មានកម្លាំងការពារយ៉ាងរឹងតឹងពីសំណាក់មន្ត្រីអាជ្ញាធរជាតិអប្សរា សូម្បីប្រជាពលរដ្ឋ ជួសជុលលំនៅដ្ឋានបន្តិចបន្តួចត្រូវបានកម្លាំងរបស់អាជ្ញាធរជាតិអប្សរាចុះទៅដល់ភ្លាមៗនឹងវាកម្ទេចចោលដោយគ្មានការយោគយល់ឡើយ។ មតិពលរដ្ឋបានលើកឡើងថាបើទោះបីជានៅក្នុងតំបន់គ្រប់គ្រងដោយអាជ្ញាធរជាតិអប្សរាបានហាមឃាត់មិនឲ្យមានការសាងសង់សំណង់យ៉ាងណាក៏ដោយ ក៏ប៉ុន្តែគេសង្កេតឃើញនៅក្នុងតំបន់រមណីយដ្ឋានឧទ្យានអង្គរ មានផ្ទះសាងសង់ជាច្រើនផងដែរ មិនដឹងថាមានលិខិតអនុញាតឬយ៉ាងណានោះទេ៕SRP

ខេត្តកំពង់ឆ្នាំង៖ អំណោយមនុស្សធម៌កាកបាទក្រហមកម្ពុជា ត្រូវបានចែកជូនពលរដ្ឋចំនួន ៣០៤គ្រួសារ រស់នៅភូមិ១១ ឃុំ២ ស្រុកជលគិរី ក្រោមអធិបតីភាព សម្តេចចៅហ្វាវាំងវររៀងជ័យអធិបតីស្រឹង្គារ គង់ សំអុល អនុប្រធានអចិន្ត្រៃយ៍កាកបាទក្រហមកម្ពុជា និងថ្នាក់ដឹកនាំ មន្ត្រីទីស្នាក់ការកណ្តាល គណៈកម្មាធិការសាខា អនុសាខាស្រុកជលគិរី នៅថ្ងៃទី ១៤ ខែសីហា ឆ្នាំ២០២០។
ឆ្លៀតក្នុងឱកាសនោះដែរ សម្តេចចៅហ្វាវាំង បានអញ្ជើញសម្ភោធដាក់ឲ្យប្រើប្រាស់អាគារអនុសាខាកាកបាទក្រហមកម្ពុជា ស្រុកជលគិរី ដែលមានទំហំ ៩ម៉ែត្រ x ១០ម៉ែត្រ ផងដែរ។
អំណោយផ្តល់ជូនគ្រួសារនីមួយៗទទួលបានអង្ករ ៣០គីឡូក្រាម មី ១កេស ត្រីខ ១០កំប៉ុង ឃីត១ (មុង ភួយ សារុង ក្រមា អាវយឺត) សាប៊ូដុំ ២ដុំ ថវិកាមួយចំនួន និងប័ណ្ណប្រកាសស្តីពីវិធានការទប់ស្កាត់ការរីករាលដាលនៃជំងឺកូវីដ-១៩៕SRP

ភ្នំពេញ៖ គណ:រដ្ឋមន្ត្រីបានចេញសេចក្ដីប្រកាសបានលទ្ធផលនៃសម័យប្រជុំពេញអង្គគណ:រដ្ឋមន្ត្រី ក្រោមអធិបតីដ៏ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ថ្ងៃទី១៤ ខែសីហា ឆ្នាំ២០២០៕SRP

ខេត្តបាត់ដំបង៖សមត្ថកិច្ចមូលដ្ឋានបានឲ្យដឹងថាបុរសម្នាក់ជិះម៉ូតូចុះចំរាកភ្នំ បានបុកជាមួយត្រាក់ទ័រ បណ្ដាលឲ្យស្លាប់ភ្លាមៗ។ ករណីនេះ រវាងម៉ូតូនិងត្រាក់ទ័រ។
ហេតុការណ៍បានកើតឡើងយប់ថ្ងៃទី១៤ខែសីហាឆ្នាំ២០២០វេលាម៉ោង១៩ នៅត្រង់ចំណុចផ្លូវលេខ៥៧Bស្ថិតក្នុងភូមិអូរតាសុខ ឃុំពេជ្រចិន្ដា ស្រុកភ្នំព្រឹក ខេត្តបាត់ដំបង។

សមត្ថកិច្ចបញ្ជាក់ថាជនរងគ្រោះមានឈ្មោះជា ភីរុន អាយុ៣៣ឆ្នាំរស់នៅភូមិឈ្នួល ឃុំពេជ្រចិន្តា ស្រុកភ្នំព្រឹកខេត្តបាត់ដំបង។ ជិះម៉ូតូម៉ាកហុងដា ពាក់ស្លាកលេខភ្នំពេញ ១R៣១៤៤។
បើតាមសមត្ថកិច្ចមូលហេតុ ជនរងគ្រោះជិះម៉ូតូក្នុងស្ថានភាពលឿនចុះចំរាកភ្នំ ហេីយងងឹតផងក៏ជ្រុលទៅបុកត្រាក់ទ័រកំពុងធ្វេីដំណេីរស្របគ្នាស្លាប់តែម្តង។

បច្ចុប្បន្នម៉ូតូនិងត្រាក់ទ័រ ត្រូវនគរបាល យកមករក្សាទុកនៅអធិការដ្ឋានស្រុកភ្នំព្រឹកដើម្បីរងចាំការដោះស្រាយ។ចំណែកសាកសពប្រគល់ឲ្យទៅក្រុមគ្រួសារយកទៅធ្វេីបុណ្យតាមប្រពៃណី៕SRPដោយប៊ុនថេត

ខេត្តកំពង់ចាម៖រដ្ឋបាលខេត្តកំពង់ចាម សូមប្រកាសជូនដំណឹងជាសាធារណៈ ដល់បងប្អូនប្រជាពលរដ្ឋ និង សាធារណជនទូទៅឲ្យបានជ្រាបថា៖ ក្រុមហ៊ុន​គ្លូប​ប៊លហ្គ្រីន​ ជាក្រុមហ៊ុនដែលទទួលបានអាជ្ញាប័ណ្ណបូមខ្សាច់នៅទន្លេ ភូមិសាស្រ្តស្រុកស្រីសន្ធរ បានបូមប្រទះឃើញយុទ្ធភ័ណ្ឌមិនទាន់ផ្ទុះជាច្រើនគ្រាប់ នៅក្នុងទន្លេ មេគង្គស្ថិតនៅភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម ។ ក្រោយទទួលបានព័ត៌មាននេះភ្លាម រដ្ឋបាលខេត្ត បានចាត់វិធានការបន្ទាន់ដោយបានស្នើសុំឲ្យអ្នកបច្ចេកទេសនៃមជ្ឈមណ្ឌលកំចាត់មីនកម្ពុជា (CMAC)ដើម្បីធ្វើការស្រាវជ្រាវ ។

តាមលទ្ធផលនៃការស្រាវជ្រាវបឋមរបស់មជ្ឈមណ្ឌលកំចាត់មីនកម្ពុជា(CMAC)បានឲ្យដឹងថា៖ នៅទស្សវត្ស៧០ចន្លោះឆ្នាំ១៩៧៣-១៩៧៥ក្នុងសម័យសង្គ្រាមរបបសាធារណរដ្ឋខ្មែរ មាននាវាចម្បាំងដែលផ្ទុក នូវយុទ្ធភ័ណ្ឌ បានលិចក្នុងទន្លេមេគង្គក្នុងជម្រៅទឹកប្រមាណ១៩ម៉ែត្រ នៅចំណុចនិយាមការ (X=506883,Y= 1308896 ស្ថិតក្នុងភូមិសាស្ត្រភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម។ បច្ចុប្បន្នរដ្ឋបាលខេត្ត និងក្រុមការងារបច្ចេកទេសរបស់រាជរដ្ឋាភិបាល បានចាត់តាំងកម្លាំង សមត្ថកិច្ចការពារ និងកំពុងបោះពោងសុវត្ថិភាព ដើម្បីកំណត់តំបន់គ្រោះថ្នាក់ខាងលើជូនបងប្អូនបានជ្រាប។ ដើម្បីបញ្ចៀសនូវគ្រោះមហន្តរាយនានាដែលអាចនឹងកើតមានឡើងដល់ប្រជាពលរដ្ឋ រដ្ឋបាលខេត្តសូមប្រកាសជូនដំណឹង ជូនដល់សាធារណជន ពិសេសបងប្អូនប្រជាពលរដ្ឋ ដែលប្រកបរបរ ទទួលទានតាម ដងទន្លេ ឬធ្វើដំណើរឆ្លងកាត់ចំណុចខាងលើ សូមផ្អាកសកម្មភាពជាបណ្តោះអាសន្ន រង់ចាំដល់ក្រុម បច្ចេកទេស ធ្វើការបោសសំអាត​គ្រឿង​យុទ្ធភ័ណរួច ទើបអនុញ្ញាតឲ្យប្រកបរបរទទួលទាន និងធ្វើដំណើរឆ្លងកាត់តំបន់នោះឡើងវិញ៕SRP

ខេត្តសៀមរាប៖ក្នុងពិធីបិទវគ្គបណ្ដុះបណ្ដាល ស្តីពី “ ការសរសេរព័ត៌មានបែបសន្តិភាព ” នៅរសៀលថ្ងៃសុក្រ ទី១៤ ខែសីហា ម្សិលមិញ
លោកលីវ សុខុន ប្រធានមន្ទីរព័ត៌មានខេត្ត បានមានមតិផ្ដាំផ្ញើដល់អ្នកសារព័ត៌មានទាំងអស់ ដោយសុំកុំឈ្លោះគ្នា ត្រូវចេះសាមគ្គីគ្នា ចេះជួយគ្នាឲ្យល្អប្រសើរ។
លោកលីវ សុខុន បានថ្លែងថា ការសរសេរព័ត៌មានប្រកបដោយវិជ្ជាជីវ:និងមានក្រមសីលធម៌ របស់អ្នកសារព័ត៌មាន គឺជាអាវក្រោះការពារ ដល់អ្នកសារព័ត៌មាន។
លោកលីវ សុខុន ក៏បានលើកឡើងនូវ”ពាក្យស្លោក” ផងដែរថា សារព័ត៌មាន (លឿន ប្លែក ទុកចិត្តបាន នៅពេលណា ទីណាក៏បាន) ។
សូមបញ្ជាក់ថាវគ្គបណ្ដុះបណ្ដាលនេះ រៀបចំឡើង មានរយ:ពេលមួយថ្ងៃ នៅមន្ទីរព័ត៌មានខេត្តសៀមរាបដោយអង្គការក្រុមការងារ ដើម្បីដោះស្រាយទំនាស់( ACT ) ដែលមានកញ្ញាស្រី សុធាវី ជានាយកា សហការរៀបចំដោយមន្ទីរព័ត៌មានខេត្ត និងសម្របសម្រួលដោយរដ្ឋបាលខេត្តសៀមរាប ដោយមានអ្នកសារព័ត៌មានក្នុងខេត្តចំនួន ៣៣នាក់ស្រី៣នាក់ផងដែរ។
វគ្គបណ្តុះបណ្តាលនេះដែរ រៀបចំឡើង ក្នុងគោលបំណងពង្រឹងសមត្ថភាពដល់អ្នកសារព័ត៌មានទាំងអស់បានយល់ដឹងអំពីការសរសេរព័ត៌មានបែបសន្តិភាព និងអនុវត្តឱ្យសមស្របតាមក្រមសីលធម៌វិជ្ជាជីវ: ដើម្បីចៀសវាងបញ្ហាទំនាស់ និងបញ្ហាប្រឈមនានា ដែលធ្វើឱ្យប៉ះពាល់សិទ្ធិអ្នកដទៃ។
កញ្ញាស្រី សុធាវី នាយកាអង្គការACT បានលើកឡើងឱកាសនោះ ថា ថ្វីដ្បិតតែវគ្គបណ្ដុះបណ្ដាលនេះមានសិក្ខាកាមជាអ្នកសារព័ត៌មានតែជាង៣០នាក់ ក៏ពិតមែនក៏ប៉ុន្តែវគ្គនេះបានធ្វើឱ្យសិក្ខាកាមយើងបានសិក្សាស្វែងយល់អំពីរបៀបសរសេរព័ត៌មានបែបសន្តិភាព និងចៀសវាងបានទំនាស់ទាំងឡាយ ហើយប្រាសចាកពីផលប៉ះពាល់ នៃការធ្វើប្រតិបត្តិការ របស់អ្នកសារព័ត៌មានល្អប្រសើរជាងមុន៕SRP

ភ្នំពេញ៖សម្ដេចស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញសេចក្ដីសម្រេចមួយ ដោយបានលុបឈ្មោះអង្គការ ការពារ និងអភិរក្សសត្វ ព្រៃឈើ ជលផលកម្ពុជា ចេញពី
បញ្ជីអង្គការមិនមែនរដ្ឋាភិបាល។
នេះបើយោងតាមលិខិតមួយរបស់ក្រសួងមហាផ្ទៃ ចុះថ្ងៃទី១១ខែសីហាឆ្នាំ២០២០ចុះហត្ថលេខា ដោយសម្ដេចស ខេង ៕SRP

ភ្នំពេញ៖ យុវជនមួយក្រុមបានផ្តើមគំនិតផលិតចានធ្វើពីស្លឹកឈើសម្រាប់ដាក់ម្ហូបអាហារ ជំនួសចានធ្វើពីប្លាស្ទិក ដើម្បីចូលរួមថែរក្សាបរិស្ថាន ខណៈកាកសំណល់ប្លាស្ទិកកំពុងបង្កជាវិបត្តិដល់បរិស្ថានទាំងផ្នែក សោភ័ណ ភាពទីសាធារណៈ និងស្ទះលូបង្ហូរទឹក ជាដើម។

ក្រសួងបរិស្ថាន នៅថ្ងៃទី១៤ ខែសីហានេះបានឱ្យដឹងថា ក្រុមយុវជនទាំងនេះ យុវជនមួយក្រុម នៃវិទ្យាល័យ តេជោសែនសំរោង ក្នុងក្រុងសំរោង ខេត្តឧត្តរមានជ័យ បានបង្កើតគំនិតកែច្នៃប្រភេទស្លឹកឈើ ធ្វើជាចានសម្រាប់ ដាក់ម្ហូបអាហារប្រចាំថ្ងៃជំនួសចានធ្វើពីប្លាស្ទិកវិញ ដោយដាក់ឈ្មោះថា«ដើម្បីសហគមន៍ខ្ញុំ»សំដៅចូលរួមថែរក្សា កាពារ និងអភិរក្សធនធានធម្មជាតិ តាមរយៈលើកទឹកចិត្តឱ្យប្រជាពលរដ្ឋចូលរួមកាត់បន្ថយការប្រើប្រាស់ប្លាស្ទិក ដោយនាំគ្នា ងាកមកប្រើប្រាស់ស្លឹកឈើធម្មជាតិនៃព្រៃសហគមន៍ក្នុងដែនជម្រកសត្វព្រៃសង្ឃរុក្ខាវ័នជំនួសវិញ។

បើតាមការឱ្យដឹងរបស់លោក អោក គិមសួរ ប្រធានក្រុមយុវជនស្ម័គចិត្តដើម្បីសហគមន៍ខ្ញុំ បានបញ្ជាក់ថា ស្លឹកឈើប្រភទ ឈើខ្លុង នឹងត្រូវបានធ្វើចានសម្រាប់ជំនួសចានប្លាស្ទិក។ លោកថា ក្រុមយុវជនកំពុងរៀប ចំសាកល្បង និងបន្តសិក្សារួមគ្នាបន្ថែមទៀត ទាំងការរចនា រូបរាង ទំហំ ចំណុះ ពណ៌ តម្លៃ និងពីគុណភាពរ ក្សាទុកផងដែរ។

ព្រះតេជគុណ ប៊ុន សាលួត ព្រះប្រធានសង្ឃសហគមន៍ព្រៃសង្ឃរុក្ខាវ័ន បានសាទរចំពោះគម្រោងស្រាវជ្រាវ មួយនេះ។ ព្រះអង្គ មានពុទ្ធដីកាថា ចានផលិតឡើងពីស្លឹកឈើធម្មជាតិដែលទាញយកពីព្រៃសហគមន៍សង្ឃរុក្ខាវ័ន នឹងអាចប្រើជំនួសចានស្នោរ ឬចានប្លាស្ទិកបាននាថ្ងៃខាងមុខ។

ក្រសួងបរិស្ថាន បានគាំទ្រចំពោះគម្រោងនេះ និងបានលើកទឹកចិត្តឱ្យប្រជាសហគមន៍ត្រូវរួមគ្នាផលិតចានស្លឹកឈើ ដែលអាចរកចំណូលពីភ្ញៀវទេសចរចូលមកកម្សាន្តថែមទៀត៕SRP

ខេត្តកំពង់ចាម៖លោក​ ឈួន​ វិបុល​ អភិបាលរង​ស្រុក​កំពង់សៀម​​​ បានធ្វើការណែនាំ ដល់ក្រុមហ៊ុន អ្នក​ទទួល​ការ​ទាំងអស់​ សូម​ឲ្យ​មាន​ការ​ប្រកួតប្រជែង​ដោយ​ភាព​ថ្លៃថ្នូរ​ និងកុំឲ្យមានការគប់គិតគ្នាប្រព្រឹត្តអំពើពុករលួយ និងការសាងសង់ ​ឲ្យ​ត្រូវ​តាម​បទដ្ឋាន​លក្ខណៈ​បច្ចេកទេស​ ប្រយោជន៍​ដល់​ការ​ប្រើប្រាស់​បាន​យូរ​អង្វែង​ផងដែរ​។
លោកបញ្ជាក់នេះក្នុងឱកាសប្រកាសដាក់ដេញថ្លៃ គម្រោង​មូលនិធិ​ឃុំ​-សង្កាត់​ ​ឆ្នាំ​២០២០​ របស់​គណៈកម្មការ​ជាតិ​សម្រាប់​ការអភិវឌ្ឍន៍​តាម​បែប​ប្រជាធិបតេយ្យ​នៅ​ថ្នាក់​ក្រោម​ជាតិ​​​
ចំនួន​៤គម្រោង​ នៅ​សាលា​ស្រុក​កំពង់សៀម​​​​​​​​ ក្រោម​វត្តមាន​​លោក​ ឡី​ មិច​ នាយករងរដ្ឋបាលសាលាខេត្តកំពង់ចាម។
ក្នុង​នាម​អាជ្ញាធរ​ខេត្ត​ លោក​ ​ឡី​ មិច​​ បាន​ថ្លែង​អំណរគុណ​ដល់​អ្នក​ទទួល​ការ​ទាំង​អស់​ ដែល​បាន​ចូល​រួម​ដេញ​ថ្លៃ​គម្រោង​នេះ​យ៉ាង​មាន​របៀបរៀបរយ​ល្អ​ តាម​ការ​រៀបចំ​របស់​អាជ្ញាធរ​ ក៏​ដូចជា​​គណៈកម្មការ​ម្ចាស់​លទ្ធកម្ម​ ហេីយសូម​ឲ្យ​រាយការណ៍​ជា​បន្ទាន់​ បើ​សិន​ជា​មាន​ករណី​ទារ​ថ្លៃ​លុយ​ទឹកតែ​ ពី​បុគ្គល​ណា​មួយ​ ដេីម្បី​ចាត់វិធានការ​តាម​ផ្លូវ​ច្បាប់​ ។

គួរ​បញ្ជាក់​ថា គម្រោង​ដែល​បាន​ដាក់​ឲ្យ​ដេញ​ថ្លៃ​ខាង​លើ​នេះ​ គឺមាន​ផ្លូវ​ចំនួន​៤ខ្សែ​​ ដែល​ត្រូវ​ស្ថាបនា​​ ជូន​ប្រជាពលរដ្ឋ​​ប្រើប្រាស់​ ក្នុង​នោះ​មាន​ ១-ឃុំ​គៀនជ្រៃ​ សាងសង់ផ្លូវបេតុងអាមេ ប្រវែង ២៧២​ ​ម៉ែត្រ​ ទទឹង ៤ មែត្រ កម្រាស់០.១៥ម៉ែត្រ​ នៅភូមិកៀនជ្រៃក្នុង។ ២-ឃុំ​វិហារ​ធំ​ សាងសង់ផ្លូវបេតុងអាមេ ប្រវែង ៤៨៥​ ម៉ែត្រ​ ទទឹង ៤ មែត្រ នៅភូមិប្រសាទ។ ៣-ឃុំ​ហាន់ជ័យ​សាងសង់ផ្លូវបេតុងអាមេ ប្រវែង ២៤៥​ ម៉ែត្រ​ទទឹង៤​ម៉ែត្រ​នៅភូមិល្វាទេ។៤-ឃុំ​ហាន់ជ័យ​ជួសជុលផ្លូវដីក្រាលក្រួសក្រហមប្រវែង២០៧ ម៉ែត្រ​ទទឹង៤មនៅភូមិក្រូចសើច​៕SRP

ខេត្តព្រៃវែង៖បើយោងតាមការឲ្យដឹងពីពលរដ្ឋ រស់នៅស្រុកពោធិ៍រៀង បានរាយការណ៍មកថា មានរថយន្តក្រុមដឹកជញ្ជូន ជាច្រើន ដឹកលើសទម្ងន់ កំពុងបើកវាង ស្ថានីយជញ្ជីងព្រៃព្នៅ​ ស្រុកពារាំ ងខេត្តព្រៃវែងរាល់ថ្ងៃ ជាពិសេសក្រុមរថយន្ត ដាក់ឡូហ្គោ L.M.H ដឹកជញ្ជូនផ្ទាល់ នេះតែម្តង ។

ជាកស្តែង នៅរសៀលថ្ងៃទី១៣ ខែ សីហា ឆ្នាំ២០២០នេះទី១.
មានរថយន្តបើកចេញពីកន្លែងផ្សេងៗ ឆ្លងកាត់រង្វង់មូលតាកោ ក្រុងព្រៃវែង​ ផ្លូវជាតិលេខ11 ហើយបំបែកចូលផ្លូវខេត្តលេខ384 ឆ្ពោះទៅភូមិថ្នល់ជ័យ​ ឃុំពពឺស​ ស្រុកស្វាយអន្ទរ រួចបត់ឆ្វេងចូលផ្លូវDBST ផ្លូវមន្ទីរអភិវឌ្ឍន៍ជនបទខេត្ត កាត់តាម​ ឃុំព្រៃកន្លោង ស្រុកពោធិ៍រៀង ឆ្ពោះទៅចូលផ្លូវខេត្តលេខ382A ហើយទៅចេញ​ តាមផ្លូវជាតិលេខ8 ផ្សារស្នាយពល​ ស្រុកពារាំង​ ចន្លោះគីឡូម៉ែត្រលេខ56និង57 រីឯស្ថានីយព្រៃព្នៅ​ ស្ថិតនៅចំនុចគីឡូម៉ែត្រ69+200​ នៃផ្លូវជាតិលេខ៨ ។

ទី2. រថយន្តចេញពីរង្វង់មូលស្វាយអន្ទរផ្លូវជាតិលេខ8 មកដល់ភូមិគ្រួស ឃុំព្រៃព្នៅ ស្រុកពារាំង​ បត់ឆ្វេងចូលផ្លូវខេត្ត លេខ384 ឆ្ពោះទៅភូមិថ្នល់ជ័យ ឃុំពពឺស​ ស្រុកស្វាយអន្ទរ​រួចបត់ស្តាំ ទៅចេញផ្លូវជាតិលេខ8 ផ្សារស្នាយពលស្រុកពារាំង។

ទី3. រថយន្តចេញតាមសង្កាត់ជើងទឹក ក្រុងព្រៃវែង លើផ្លូវក្រុង ឆ្ពោះទៅឃុំព្រៃកន្លោង ទៅលើផ្លូវខេត្តលេខ382A ទៅចេញផ្លូវជាតិលេខ8 ផ្សារស្នាយពល ស្រុកពារាំងខេត្តព្រៃវែង។

ពលរដ្ឋបន្តថា ក្រុមរថយន្តទាំងនោះបើកបរលឿនមិនថាបើកចូលភូមិហើយក៏នៅតែបើកលឿនដែរ ធ្វេីអោយស្ពានមានសភាពទ្រុតទ្រោម​ ផ្លូវកៅស៊ូប្រេះ បាក់ស្រុត បង្ករជារណ្តៅធំៗ​ពិបាកដល់ប្រជាពលរដ្ឋ​ មន្ត្រីរាជការ​ សិស្សានុសិស្ស​ ក្នុងការធ្វេីដំណេីរ..។

ពួកគាត់សំណូមពរដល់អាជ្ញាធរ​ អភិបាលខេ​ត្ត​ ព្រៃវែង មេ​ត្តា​ជួយអន្តរាគមន៍​ទប់ស្កាត់រថយន្តខ្នាតយក្សដឹកធ្ងន់បំផ្លាញស្ពាន,ផ្លូវ​ ពិសេសមន្ទីរសាធារណការ និងក្រសួងសាធារណការ សុំមានវិធានការបង្ក្រាប​ ចាប់ថ្លឹងរថយន្តទាំងនោះតាមច្បាប់កំណត់​ ដេីម្បីអោយម្ចាស់រថយន្តរៀងចាល​ ព្រមទាំងចូលរួមគោរពច្បាប់​ ដែលធានាអោយសម្បត្តិសាធារណៈ​ ផ្លូវ​ ស្ពាន​ ប្រេីប្រាស់បានយូអង្វែង​…៕SRP