ខេត្តសៀមរាប៖សេចក្ដីរាយការណ៍ព័ត៌មានបឋមបានឲ្យដឹងថារថយន្តមួយគ្រឿងម៉ាកCRV បានបុករះរថយន្ត៣គ្រឿងផ្សេងទៀត នៅក្បែរស្ពាននាគ បណ្ដាលឲ្យរបួសមនុស្សម្នាក់។
ហេតុការណ៍បានកើតឡើងនៅវេលាម៉ោង៤និង៣០នាទី ថ្ងៃទី ១៣ខែកញ្ញាឆ្នាំ ២០២០នៅលេីផ្លូវ វិវិបុលបញ្ញាសុខអាន ក្បែរស្ពាននាគ(៦០ម៉ែត្រ)ស្ថិតក្នុងសង្កាត់ស្លក្រាមក្រុងសៀមរាប។

សមត្ថកិច្ចបានឲ្យដឹងថាករណីគ្រោះថ្នាក់ចរាចរណ៍នេះរវាង​រថយន្ត​និងរថយន្ត​ ចំនួន០៤គ្រឿង បង្កឡេីង ដោយ​រថយន្ត​ម៉ាកCRV បណ្តាល​អោយខូចខាតរថយន្ត​ស្រាល​ទាំងគ្រឿង និងមានអ្នករបួសស្រាលម្នាក់ភេទស្រីផងដែរ។
សមត្ថកិច្ចបានបញ្ជាក់ថារថយន្តស៊ីអរវីបានបើកបរពីទិសខាងកើតទៅលិចក្នុងស្ថានភាពស្រវឹងក៏បានទៅបុករថយន្ដ ០៣គ្រឿងទៀតដែលបើកបរមកពីទិសខាងលិចទៅកើត។ ក្នុងចំណោមរថយន្តរងគ្រោះទាំង០៣គ្រឿងមាន
រថយន្តពីរគ្រឿងពាក់ស្លាកលេខ ខេមរៈភូមិន្ទ។ ទោះយ៉ាងណាសមត្ថកិច្ចនគរបាលមិនបានបញ្ជាក់លម្អិតចំពោះហេតុការណ៍នេះទេ ដោយបញ្ជាក់ថាករណីនេះមានការប៉ះបន្តិចបន្តួចប៉ុណ្ណោះហើយភាគីទាំងអស់ក៏បានសម្របសម្រួលគ្នាបញ្ចប់រឿងតែម្ដង៕SRP

ភ្នំពេញ៖លោកឌី វិជ្ជានៅព្រឹកថ្ងៃទី១៣ ខែកញ្ញា ឆ្នាំ២០២០នេះ បានអញ្ជើញចុះសួរសុខទុក្ខ សំណេះសំណាលព្រម ទាំងបាននាំយកអំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ផ្តល់ជូនដល់បងប្អូនដែលប្រកបមុខរបររើសអេតចាយចំនួន៣៩៤ គ្រួសារ ក្នុងទីលានចាក់សំរាមក្នុងខណ្ឌដង្កោ រាជធានី ភ្នំពេញ។

ក្នុងឱកាសនោះលោក ឌី វិជ្ជា បានក្រើនរំលឹកឱ្យបងប្អូនបង្កើនការយកចិត្តទុកដាក់ថែរក្សាសុខភាព ប្រចាំថ្ងៃដើម្បីការពារជំងឺឆ្លងកូវីដ-១៩ ពិសេសក្នុងរដូវបុណ្យភ្ជុំនេះ។ សូមរក្សាគម្លាតសង្គម និងពាក់ម៉ាស់នៅកន្លែងមានមនុស្សច្រើន។ លោក បានបន្តផ្តាំផ្ញើឱ្យប្រជាពលរដ្ឋជំរុញកូនតូចៗឱ្យបានចូលរៀនគ្រប់ៗគ្នា ដើម្បីទទួលបានចំណេះដឹង និងបានរួមចំណែកអភិវឌ្ឍន៍ប្រទេសជាតិយើង ហើយលើសពី នេះអំណោយដែលទទួលបានក្នុងមួយគ្រួសារៗរួមមាន៖

១-អង្ករ៥០គីឡូក្រាម

២-មី២កេសតូច

៣-ទឹកត្រី១យួរ

៤-ទឹកសុីអុីវ១យួរ

៥-ត្រីខកំប៉ុង១យួរ

៦-ទឹកដោះគោខាប់២កំប៉ុង

៧-នំផ្អែម១ធុង

៨-ថ្នាំពេទ្យ២ប្រអប់

៩-សាប៊ូ៦ដុំ

១០-ថវិកាចំនួន ១០០,០០០រៀល៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម និងលោក ស្រី ញូង ចរិយា អ៊ុន ចាន់ដា នាព្រឹកថ្ងៃ ទី១២ ខែកញ្ញាឆ្នាំ ២០២០នេះ បានអញ្ជើញចូលរួមក្នុងពិធីបុណ្យកាន់បិណ្ឌវេនទី១១ នៅវត្ត ខែលជ័យ ស្ថិត ក្នុង ឃុំ អូរស្វាយ ស្រុកកំពង់សៀម ដោយមានការអញ្ជើញចូលរួមពី លោក ខ្លូត ផន ប្រធាន ក្រុមប្រឹក្សា ខេត្ត លោក លោកស្រី អភិបាល រង ខេត្ត សមាជិកក្រុមប្រឹក្សាខេត្ត ថ្នាក់ដឹកនាំ មន្ត្រីរាជការ នៃមន្ទីរអង្គភាព ពាក់ព័ន្ធ ជុំវិញខេត្ត និង អជ្ញាធរ មូលដ្ឋាន ព្រមទាំងពុទ្ធបរិស័ទ ជាច្រើនរូបផងដែរ ។

ក្នុង ពិធី នោះដែរ លោក អ៊ុន ចាន់ដា អភិបាលខេត្តកំពង់ចាម រួមនឹង ថ្នាក់ដឹកនាំ មន្ត្រី រាជការ បាន ឧទ្ទិស សូម ឲ្យ ដួង វិញ្ញាណក្ខន្ធ បុព្វការី ជន បាន យោង យកកំណើត កើត នៅ ក្នុង ទីឋាន ដ៏ ខ្ពង់ខ្ពស់ និង ងាក ក្រោយ ឲ្យ ពរជ័យ ដល់ កូន ចៅ បាន សេចក្តីសុខ សេចក្តីចម្រើន ជាពិសេស សូម ឲ្យ ព្រះ បារមី ដ៏ សក្ដិសិទ្ធិ នៅក្នុង លោក ក៏ដូចជា ព្រះ បារមីនៅវត្ត ខែលជ័យ តាម ជួយ បីបាច់ ថែរក្សា សម្តេច តេជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រ កម្ពុជា និង សម្តេច កិត្តិព្រឹទ្ធបណ្ឌិត មាន សុខ ភាព ល្អ បរិបូរណ៍ ជន្មាយុ យឺនយូរ ដើម្បី សម្តេច បានដឹកនាំ នាវា កម្ពុជា ឲ្យ រក្សា បាន ជានិរន្តរ៍ នូវ សន្តិភាព ស្ថេរភាព នយោបាយ សន្តិសុខ សណ្តាប់ធ្នាប់ សាធារណៈ និង ការអភិវឌ្ឍ រីកចំរើន ថ្មីៗ បន្ថែមទៀត ដើម្បី ជា សេចក្តីសុខ សេចក្តីចម្រើន របស់ ប្រជាពលរដ្ឋ ខ្មែរ ទូទាំងប្រទេស។ ព្រមទាំង ឧទ្ទិស នូវ មហា កុសលផល បុណ្យ សូម ឲ្យ បាន ដល់ វិញ្ញាណក្ខន្ធ វីរៈ កម្មាភិបាល យុទ្ធជន យុទ្ធ នារី អ្នកស្នេហាជាតិ ដែល បាន បាត់បង់ ជីវិត ដើម្បី បុព្វ ហេតុ ជាតិ មាតុភូមិ ជាតិ ស្នេហា នៃ យើង ផងដែរ ៕SRP

ខេត្តសៀមរាប៖អាជ្ញាធរបានរាយការណ៍ថាកូនឈើចំនួន១៥០០ដើម ត្រូវបានដាំនៅប្រាសាទបន្ទាយក្តី នាព្រឹកថ្ងៃអាទិត្យ ទី១៣ ខែកញ្ញា ឆ្នាំ២០២០នេះ ក្រោមវត្តមាន លោក ពិន ប្រាកដ អភិបាលរងខេត្ត។

សូមជម្រាបថាការដាំកូនឈើនេះ សហការរៀបចំដោយ អាជ្ញាធរ រដ្ឋបាលខេត្តសៀមរាប និងធនាគារ សុីអាយអឹមប៊ី ភីអិលស៊ី ” CIMB ” និងជាខួបអនុស្សាវរីយ៍ ១០ឆ្នាំ នៃការធ្វើប្រតិបត្តិការរបស់CIMB Bank នៅប្រទេសកម្ពុជា។ បើតាមអាជ្ញាធរដាំការកូនឈើនេះ ក្រោមប្រធានបទ ” យើងដាំ យើងចំណាំ យើងថែរក្សា ប្រាង្គប្រាសាទដែលជាបេតិកភណ្ឌ មនុស្សជាតិ “។កូនឈើទាំងនោះរួមមាន៖គ្រញូង, ធ្នង់, បេង, នាងនួន, ឈើទាល, ស្រឡៅ, ពពេល និងសុក្រម៕SRP

ខេត្តស្វាយរៀង៖ជនសង្ស័យម្នាក់ក្នុងចំណោមពីរនាក់ត្រូវបានសមត្ថកិច្ចចាប់ខ្លួនក្រោយធ្វើសកម្មភាពប្លន់យកម៉ូតូនិងបានបាញ់តដៃជាមួយសមត្ថកិច្ចពេលចុះបង្ក្រាប។

សមត្ថកិច្ចខេត្តស្វាយរៀងបានឲ្យដឹងថានៅព្រឹកថ្ងៃទី១២ខែកញ្ញា ឆ្នាំ២០២០ វេលាម៉ោង ០៦និង០០នាទីព្រឹក ជនសង្ស័យ ០២នាក់ ជិះម៉ូតូមួយគ្រឿង ម៉ាកហុងដាពណ៌ខ្មៅ ប្រដាប់ដោយអាវុធខ្លីម៉ាករ៉ូឡូ ពណ៌សរ ធ្វើសកម្មភាពចូលភ្ជង់យកម៉ូតូ០១ គ្រឿង ម៉ាកហុងដា C125 ពណ៌ខ្មៅ ស៊េរីឆ្នាំ2020 ពាក់ស្លាកលេខ ស្វាយរៀង 1P-5053 ពីជនរងគ្រោះឈ្មោះ វរ័ អឿន ភេទ ប្រុស អាយុ ៤៩ ឆ្នាំ រស់នៅភូមិកំពង់ត្រាច ឃុំកំពង់ត្រាច ស្រុករមាសហែក ដែលបំរ៉ុងចេញពីផ្ទះ ។

សមត្ថកិច្ចបន្តថា ក្រោយធ្វើសកម្មភាពភ្ជង់ប្លន់យកម៉ូតូ ពីជនរងគ្រោះបានសម្រេច ក្រុមចោរបានជិះតាមបណ្តោយផ្លូវជាតិលេខ១៣ ឆ្នោះទៅទិសខាងជើងត្រូវបានពលរដ្ឋរាយការណ៍ភ្លាមៗមកសមត្ថកិច្ច។

សមត្ថកិច្ចបានបញ្ជាក់ថាក្រោមបញ្ជារបស់លោកឧត្តមសេនីយ៍ទោ កឹង ឃន ស្នងការនគរបាលខេត្ត  និងកម្លាំងនគរបាលស្រុករមាសហែក ដឹកនាំដោយលោកវរសេនីយ៍ឯក សំ សំអុល អធិការនគរបាលស្រុករមាសហែក បានចេញអន្តរាគមន៍ ដេញតាមក្រុមចោរ និងដាក់កម្លាំងពួនស្ទាក់តាមគោលដៅសំខាន់ៗ រហូតដល់ត្រង់ចំណុចភូមិមុន្នីប្រឹក្សា ឃុំត្រស់ ស្រុករមាសហែក កម្លាំងនគរបាលបានបើករថយន្តកៀរបក្ខពួកចោរម្នាក់ ដែលកំពុងបើកម៉ូតូដែលទើបភ្ជង់យកបានពីជនរងគ្រោះ ហើយចោរបានបាញ់តដៃសំដៅលើរថយន្តនគរបាលចំនួន០៣គ្រាប់ផងដែរ។ ប៉ុន្តែត្រូវបាននគរបាលបើករថយន្តបំបុកម៉ូតូពីក្រោយបណ្តាលអោយដួល និងជ្រុះអាវុធ នៅលើថ្នល់ ជនសង្ស័យក៏រត់ចូលផ្ទះពលរដ្ឋ ទៅទិសខាងកើត ទើបកម្លាំងនគរបាលហ៊ុំព័ទ្ធចាប់។ ជនសង្ស័យឈ្មោះឈ្មោះ រ៉ាត់ សារ៉ាន់ ហៅ ចុន រ៉ាន់ ហៅ តឿ ភេទប្រុស អាយុ២៨ឆ្នាំ រស់នៅភូមិថ្មី ឃុំត្រពាំងផ្លុង ស្រុកពញាក្រែក ខេត្តត្បួងឃ្មុំ  និងដកហូតម៉ូតូវត្ថុតាងបានមកវិញ។ បច្ចុប្បន្នសមត្ថកិច្ចកសាងសំណុំរឿងបញ្ជូនទៅតុលាការ។ចំណែកជនសង្ស័យម្នាក់ទៀត ដែលបានរត់គេច សមត្ថកិច្ចកំពុងស្រាវជ្រាវ តាមចាប់ខ្លួន៕SRP

ខេត្តកំពង់ចាម​៖លោក​ អ៊ុន ចាន់ដា អភិបាលខេត្តកំពង់ចាម និង​លោក ខ្លូត​ ផន​ ប្រធាន​ក្រុមប្រឹក្សា​ខេត្ត​ នាព្រឹក​ថ្ងៃ​ទី​១២ ខែកញ្ញា​ ឆ្នាំ​២០២០នេះ​ បានអញ្ជើញចូលរួមក្នុងពិធីបុណ្យកាន់បិណ្ឌវេនទី១០​ នៅវត្ត​ភ្នំ​ជ័យ​គិរី​(ភ្នំ​ហាន់​ជ័យ​)​ ស្ថិត​នៅ​ក្នុង​ឃុំ​ហាន់​ជ័យ​ ស្រុក​កំពង់សៀម​ ខេត្តកំពង់ចាម​ ដោយ​មានការអញ្ជើញចូលរួមពី លោក​ លោកស្រី​ អភិបាល​រង​ខេត្ត​ សមាជិកក្រុមប្រឹក្សាខេត្ត ថ្នាក់ដឹកនាំ​មន្ត្រី​រាជការ​នៃមន្ទីរអង្គភាព​ពាក់ព័ន្ធ​ជុំវិញខេត្ត និង​អជ្ញាធរ​មូលដ្ឋាន​ ព្រមទាំងពុទ្ធបរិស័ទ​ជាច្រើន​រូប​ផងដែរ​។

ក្នុង​ពិធី​នោះ​ដែរ​ លោក​​ អ៊ុន​ ចាន់ដា​ អភិបាលខេត្តកំពង់ចាម​​ រួមនឹង​ថ្នាក់ដឹកនាំ​ មន្ត្រី​រាជការ​ បាន​ឧទ្ទិស សូម​ឲ្យ​​ដួង​វិញ្ញាណក្ខន្ធ បុព្វការី​ជន ​បាន​យោង​យកកំណើត​កើត​នៅ​ក្នុង​ទីឋាន​ដ៏​ខ្ពង់ខ្ពស់​ និង​ងាក​ក្រោយ​ឲ្យ​​ពរជ័យ ដល់​កូន ​ចៅ​បាន​សេចក្តីសុខ សេចក្តីចម្រើន ​ជាពិសេស​សូម​ឲ្យ​​ព្រះ​បារមី​ដ៏​សក្ដិសិទ្ធិ​នៅក្នុង​លោក ក៏ដូចជា​ព្រះ​បារមីនៅវត្ត​ភ្នំ​ជ័យ​គិរី​(ភ្នំ​ហាន់​ជ័យ​)​ តាម​ជួយ​បីបាច់​ថែរក្សា​សម្តេច​តេជោ ហ៊ុន​ សែន​ នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​ និង​សម្តេច​កិត្តិព្រឹទ្ធបណ្ឌិត​ ​មាន​សុខ​ភាព​ល្អ​បរិបូរណ៍ ​ជន្មាយុ​យឺនយូរ ដើម្បី​សម្តេច​បានដឹកនាំ​នាវា​កម្ពុជា​​​ ឲ្យ​​រក្សា​បាន​ជានិរន្តរ៍ ​ នូវ​សន្តិភាព ស្ថេរភាព​នយោបាយ សន្តិសុខ​សណ្តាប់ធ្នាប់​សាធារណៈ​ និង​ការអភិវឌ្ឍ រីកចំរើន​ថ្មីៗ​បន្ថែមទៀត​ ដើម្បី​ជា​សេចក្តីសុខ​ សេចក្តីចម្រើន​ របស់​ប្រជាពលរដ្ឋ​ខ្មែរ​ទូទាំងប្រទេស។ ព្រមទាំង​ឧទ្ទិស​នូវ​មហា​កុសលផល​បុណ្យ​ សូម​ឲ្យ​បាន​ដល់​វិញ្ញាណក្ខន្ធ​វីរៈ​កម្មាភិបាល​ យុទ្ធជន​ យុទ្ធ​នារី អ្នកស្នេហាជាតិ ដែល​បាន​បាត់បង់​ជីវិត​ដើម្បី​បុព្វ​ហេតុ​ជាតិ​មាតុភូមិ​ជាតិ​ស្នេហា​នៃ​យើង​ផងដែរ​៕SRP

ខេត្តសៀមរាប៖ជនសង្ស័យម្នាក់ត្រូវបាននគរបាលចាប់ខ្លួនពាក់ព័ន្ធករណីឆក់ដ៏សកម្មនៅក្រុងសៀមរាប។
អធិការនគរបាលក្រុងសៀមរាប លោកវរសេនីយ៍ឯក ណុប សារ៉ាក់ បានឲ្យដឹងកាលពីថ្ងៃទី 15 ខែកក្កដា ឆ្នាំ 2020 វេលាម៉ោង 13និង53 នាទី ស្ថិតនៅ ចំណុចតាមផ្លូវមុខ បន្ទប់ជួលភូមិវត្តបូព៌ សង្កាត់សាលាកំរើក​ ក្រុងសៀមរាប ជនរងគ្រោះឈ្មោះ នឹម សារ៉ែន ភេទស្រី អាយុ 33 ឆ្នាំ កំពុងឈរចាក់សោរទ្វារចូលផ្ទះ ពេលនោះស្រាប់តែមានជន សង្ស័យម្នាក់ភេទប្រុស​ អាយុចន្លោះពី 20 ឆ្នាំទៅ 30 ឆ្នាំជិះម៉ូតូមួយគ្រឿង ម៉ាកហុងដាឌ្រីមស៊េរីឆ្នាំ 2017 ពណ៌ខ្មៅ​ ពាក់ស្លាកលេខ សៀមរាប 1Y-6834 បានធ្វើសកម្មភាពឆក់កាបូបជនរងគ្រោះដែលស្ពាយជាប់និងស្មា​ ពេលនោះជនរងគ្រោះបានប្រតាយប្រតប់ទាញបានកាបូបប្រាក់ និងទូរស័ព្ទដៃបានមកវិញ។  ចំណែកជនសង្ស័យ យកបានកាបូបស្ពាយ ដោយនៅក្នុងកាបូបមានអាយផត ពណ៌ ផ្កាឈូក ជាឧបករណ៍ស្ដាប់ចម្រៀង01 គ្រឿង និងគ្រឿង សំអាងមានតំលៃមួយចំនួនទៀត។
អធិការក្រុងសៀមរាបបានបន្តថាក្រោយពីកើតហេតុសមត្ថកិច្ចបានធ្វើការចុះស្រាវជ្រាវនិងកំណត់មុខសញ្ញាបាន ភិនភាគម៉ូតូតាមរយ:កាមេរ៉ាសុវត្តិភាព។ ក្រោយធ្វើសកម្មភាព ជនសង្ស័យបានគេចខ្លួនបាត់រហូតមក។
បើតាមលោកវរសេនីយ៍ឯក ណុប សារ៉ាក់បានបញ្ជាក់ថានៅថ្ងៃទី11ខែកញ្ញា ឆ្នាំ 2020​ វេលាម៉ោង 15និង30នាទី ស្ថិតនៅ ភូមិបន្ទាយចាស់​ សង្កាត់ស្លក្រាម​ ក្រុងសៀមរាប ជនរងគ្រោះឈ្មោះ នី​ បូរីន ភេទស្រី​ អាយុ 24 ឆ្នាំមុខរបរ បុគ្គលិកក្រុម ហ៊ុនធានារ៉ាប់រងអេអាយអេ  មានទីលំនៅបច្ចុប្បន្ន ភូមិធ្លកអណ្ដូង​ សង្កាត់ស្លក្រាម កំពុងជិះម៉ូតូនិយាយទូរស័ព្ទ តាមផ្លូវ ត្រូវបានជនសង្ស័យម្នាក់ភេទ ប្រុស ជិះម៉ូតូមួយគ្រឿង ធ្វើសកម្មភាពឆក់យកទូរស័ព្ទដៃរបស់ជនរងគ្រោះដែលកំពុងនិយាយ ៊ពេលនោះ ជនរងគ្រោះបានឃើញស្លាកលេខ ម៉ូតូរបស់ជន សង្ស័យ ដែលមានលេខ1Y-6834។  ក្រោយពីកើតហេតុជនរងគ្រោះបានមកប្តឹង ដោយដល់សមត្ថកិច្ចបានកំណត់មុខសញ្ញាចាស់ ក៏បាននាំគ្នាចុះធ្វើការស្វែងរកព្រមទាំងធ្វើការហ៊ុំព័ទ្ធផ្ទះរបស់ជនសង្ស័យ ក៏ឃើញជនសង្ស័យ កំពុងសម្ងំលាក់ខ្លួននៅក្នុងផ្ទះ​ ក៏ឃាត់ខ្លួនតែម្ដង និងដកហូតបានវត្ថុតាងទូរស័ព្ទដៃរបស់ជនរងគ្រោះ មួយគ្រឿងម៉ាក iphone x ពណ៌ស ម៉ូតូមួយគ្រឿងដែលរបស់ជនសង្ស័យជិះធ្វើសកម្មភាព។ គឺម៉ូតូម៉ាកហុងដាឌ្រីម ស៊េរីឆ្នាំ2017 ពណ៌ខ្មៅ​ មានស្លាកលេខសៀមរាប 1Y-6834 លេខតួ និងលេខម៉ាស៊ីន 9847536។
ក្រោយពេលធ្វើការសាកសួរជនសង្ស័យឈ្មោះ មឿ សាម៉ាច អាយុ26 ឆ្នាំនិងប្រើប្រាស់ដោយខុសច្បាប់នូវសារធាតុញៀនបានឆ្លើយសារភាពថា ខ្លួនពិតជាបានធ្វើសកម្មភាព ឆក់កាបូបនិងទូរស័ព្ទដៃរបស់ជនរងគ្រោះទាំងពីរ ករណីខាងលើពិតប្រាកដមែន។
សុំបញ្ជាក់ថាប្រតិបត្តិការទទួលបានជោគជ័យនេះ ក្រោមការណែនាំរបស់លោកឧត្តមសេនីយ៍ទោ ទិត្យ ណារ៉ុងស្នងការខេត្តសៀមរាប និងមានការ
បញ្ជាផ្ទាល់ពីលោកឧត្តមសេនីយ៍ត្រីភឹង ចិន្តារ៉េត ស្នងការរងទទួលផែនព្រហ្មទណ្ឌ។ ករណីនេះពលរដ្ឋបានសាទរយ៉ាងខ្លាំងចំពោះកងកម្លាំងនគរបាលខេត្តសៀមរាប ដែលបង្ក្រាបបានមុខសញ្ញាចោលឆក់ដ៏សកម្មនេះ៕SRP

ខេត្តសៀមរាប៖ការស្តារឡើងវិញនូវហេដ្ឋារចនាសម្ព័ន្ធនៅក្រុងសៀមរាប ជាការបើកទំព័រប្រវត្តិសាស្ត្រថ្មីមួយ មិនធ្លាប់មានពីមុនមក ក្នុងការស្ថាបនាផ្លូវទូទាំងក្រុងសៀមរាប បែបនេះ ហើយនេះគឺជាការបង្ហាញ នូវការយកចិត្តទុកដាក់ ពីប្រមុខរាជរដ្ឋាភិបាល ក្នុងការប្រែក្លាយទីក្រុងវប្បធម៌ប្រវត្តិសាស្ត្រ ដ៏សម្បូរបែបមួយនេះ ឲ្យកាន់តែមានភាពទាក់ទាញដល់ភ្ញៀវទេសចរណ៍ និងការវិនិយោគបន្ថែមទៀត ស្របទៅនឹងគោលនយោបាយអភិវឌ្ឍន៍របស់រាជរដ្ឋាភិបាល។
សូមជម្រាបជូនថាសម្ដេចតេជោ ហ៊ុនសែន នាយករដ្ឋមន្ត្រី បានប្រកាសបញ្ចេញកញ្ចប់ថវិកា ប្រមាណពី ១០០ ទៅ ១៥០ លានដុល្លារអាមេរិក សម្រាប់គម្រោងសាងសង់ផ្លូវចំនួន ៣៨ខ្សែ ក្នុងក្រុងសៀមរាប ក្នុងគោលបំណងប្រែក្លាយក្រុងមួយនេះឱ្យក្លាយជាទីក្រុង ដែលពោរពេញដោយសោភ័ណភាព បរិស្ថានល្អ ជំរុញការបង្កើតការងារ និងលើកស្ទួយជីវភាពប្រជាពលរដ្ឋ ព្រមទាំងជំរុញកំណើនភ្ញៀវទេសចរណ៍ និងកំណើនសេដ្ឋកិច្ចជាតិក្រោយវិបត្តិជម្ងឺកូវីដ-១៩។

គម្រោងកែលម្អហេដ្ឋារចនាសម្ព័ន្ធផ្លូវក្នុងទីក្រុងក្នុងទីរួមខេត្តសៀមរាបនេះ មានចំនួន៣៨ខ្សែ មានប្រវែង សរុប៩៨,៣៤គីឡូម៉ែត្រ ហើយគម្រោងនេះគ្រោងនឹងបញ្ចប់នៅចុងឆ្នាំ២០២១។ គម្រោងនេះគ្រោងនឹងសិក្សាសាងសង់ផងដែរ នូវប្រព័ន្ធលូ ចិញ្ចើមផ្លូវ ផ្លូវថ្មើរជើង ផ្លូវជិះកង់ ចំណតរថយន្ត ប្រព័ន្ធបំភ្លឺផ្លូវសាធារណៈ ផ្លាកសញ្ញានិងគំនូសចរាចរណ៍ ប្រព័ន្ធកាមេរ៉ាសុវត្ថិភាព អាងចម្រោះទឹកកខ្វក់ និងការធ្វើសួននិងដាំដើមឈើ៕SRP

ខេត្តសៀមរាប៖យ៉ាងហោចណាស់ក្មេងម្នាក់បានស្លាប់និង០៣នាក់ទៀតបានរងរបួសធ្ងន់ស្រាលដោយគ្រោះថ្នាក់ចរាចរណ៍។
ហេតុការណ៍បានកើតឡើងថ្ងៃសុក្រ​ថ្ងៃ​ទី​១១​ ខែកញ្ញាឆ្នាំ ២០២០ វេលាម៉ោង១៧និង១០នាទីនៅចន្លោះបង្គោលគីឡូលេខ៣៩៧ .៣៩៨ ភូមិស្ទឹងឃុំបាគងស្រុកប្រាសាទបាគង​ ខេត្ត​សៀមរាប​ លើផ្លូវជាតិលេខ ៦ រវាងរថយន្ត និង ម៉ូតូ។
យោងតាមរបាយការណ៍របស់អធិការនគរបាលស្រុកប្រាសាទបាគងបានដឹងថាបានបង្ហាញថាករណីនេះរថយន្តម៉ាកលុចស៊ីស Ls៤៦០ពណ៌សពាក់ស្លកលេខភ្នំពេញ២X ៣៩៩៥បើកបរដោយឈ្មោះ ហេង សេងហាំង ភេទប្រុសអាយុ២០ឆ្នាំនៅភូមិជ្រាវ សង្កាត់ជ្រាវ ក្រុងសៀមរាប ខេត្តសៀមរាប បើកបរមានទិសដៅពីកើតទៅលិចប៉ះជាមួយម៉ូតូមួយគ្រឿងម៉ាកវេវសេ១១០ ពណ៌ក្រហមពាក់ស្លាកលេខសៀមរាប១D៤២៩១ បើកបរដោយឈ្មោះ ស៊ឹម ពេជ្រ ភេទប្រុសអាយុ៣១ឆ្នាំនៅភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប (របួសស្រាល) បើកបរដឹកប្រពន្ធនិងកូន២នាក់
១ ប្រពន្ធឈ្មោះ តាយ តាន់ អាយុ៣៦ឆ្នាំ(របួសស្រាល)
២ កូន ឈ្មោះ ពេជ្រ មូនិកា ភេទស្រីអាយុ៦ខែ (ស្លាប់)
៣ ឈ្មោះ ពេជ្រ មូលីកុដ្ឋ ភេទស្រី អាយុ៦ឆ្នាំ (របួសធ្ងន់)បើកបរមានទិសដៅពីកើតទៅលិចឆ្លងផ្លវទៅជើង។ បើតាមរបាយការណ៍បញ្ជាក់ថាមូលហេតុម៉ូតូឆ្លងផ្លូវខ្វះការប្រុងប្រយ័ត្ន៕SRP

ខេត្តព្រះវិហារ៖ស្ត្រីជាប្រពន្ធម្នាក់ត្រូវបានកម្លាំងអាវុធហត្ថចាប់ខ្លួនពាក់ព័ន្ធករណីឃាតកម្មវាយសម្លាប់ប្ដីខ្លួនឯង។
យោងតាមរបាយការណ៍សមត្ថកិច្ច កិច្ចបានបង្ហាញថានៅថ្ងៃទី០៩ខែកញ្ញាឆ្នាំ២០២០មានករណីឃាតកម្មមួយកើតឡើងនៅភូមិអន្ទិល ឃុំយាង ស្រុកជាំក្សាន្ត ខេត្តព្រះវិហារ។ ជនរងគ្រោះ ឈ្មោះឆេន ធីម ភេទប្រុស អាយុ៣២ឆ្នាំ មុខរបរកសិករ។ បង្កឡើងដោយជនមិនស្គាល់អត្តសញ្ញាណបានប្រើដំបងឈើគ្រញូងប្រវែង៣,៧សង់ទីម៉ែត្រវាយទៅលើជនរងគ្រោះ ត្រូវចំចិញ្ចើម បាក់ថ្គាម និងបាក់ដងកាំបិតខាងស្តាំ បណ្តាលឲ្យស្លាប់នៅនឹងកន្លែងកើតហេតុ។ ក្រោយធ្វើសកម្មភាពរួចជនសង្ស័យបានយកដំបងទៅចោលនៅចម្ងាយពីកន្លែងកើតហេតុប្រវែង១១,៥០ម៉ែត្រ។
របាយការណ៍បន្តថាលុះដល់ថ្ងៃទី១១ខែកញ្ញាឆ្នាំ២០២០វេលាម៉ោង៨,៤០នាទីព្រឹកកម្លាំង
ការិយាល័យជំនាញអាវុធហត្ថខេត្ត
និងកម្លាំងមូលដ្ឋានកងរាជអាវុធហត្ថ
ស្រុកបន្តចុះស្រាវជ្រាវរហូតឈានដល់កំណត់មុខសញ្ញាជនសង្ស័យដែលមានឈ្មោះ(វិន សែន) ភេទស្រីអាយុ៣១ឆ្នាំ គឺជាប្រពន្ធរបស់ជនរងគ្រោះ។
បើតាមរបាយការណ៍ក្រោយពីសាកសួរ ជនសង្ស័យសារភាពថាខ្លួនពិតជាបានសម្លាប់ប្តីដោយប្រើដំបងឈើនោះពិតប្រាកដមែន ។
មូលហេតុដោយសារប្តីតែងតែផឹកស្រា ហើយបាន ប្រើអំពើហិង្សាមក លើខ្លួនជាច្រើនលើកច្រើនសារ កន្លងមក។ ដូច្នេះហើយបានជាខ្លួនគិតថាថ្ងៃណាមួយនិងសម្លាប់ប្តីឲ្យទាល់តែបាន។
បច្ចុប្បន្នកម្លាំងជំនាញកំពុងកសាងសំណុំរឿងដើម្បីចាត់ការតាមនីតិវិធី៕SRPគីម គឹម ឡាយ

ខេត្តកំពង់ចាម ៖លោក អ៊ុន ចាន់ដា អភិបាលខេត្តកំពង់ចាម និងលោកស្រី នាព្រឹក ថ្ងៃ ទី ១១ ខែកញ្ញា ឆ្នាំ ២០២០នេះ បានអញ្ជើញចូលរួមក្នុងពិធីបុណ្យកាន់បិណ្ឌវេនទី៩ នៅវត្តនិរោធរង្សី (វត្តនិរោធ) ស្ថិតនៅ ក្នុង ភូមិរោធ ឃុំត្រប់ ស្រុកបាធាយ ដោយ មានការអញ្ជើញចូលរួមពី អ្នកតំណាងរាស្ត្រមណ្ឌលខេត្តកំពង់ចាម លោក លោកស្រី សមាជិកក្រុមប្រឹក្សាខេត្ត ថ្នាក់ដឹកនាំមន្ទីរអង្គភាពជុំវិញខេត្ត រួមជាមួយមន្ត្រីរាជការ ព្រមទាំងពុទ្ធបរិស័ទ ផងដែរ ។

លោក អ៊ុន ចាន់ដា អភិបាលខេត្តកំពង់ចាម និង លោក លោកស្រី រួមនឹង ថ្នាក់ដឹកនាំ មន្ត្រី រាជការ បាន ឧទ្ទិស សូម ឱ្យ ដួង វិញ្ញាណក្ខន្ធ បុព្វការី ជន បាន យោង យកកំណើត កើត នៅ ក្នុង ទីឋាន ដ៏ ខ្ពង់ខ្ពស់ និង ងាក ក្រោយ ឱ្យ ពរជ័យ ដល់ កូន ចៅ បាន សេចក្តីសុខ សេចក្តីចម្រើន ជាពិសេស សូម ឲ្យ ព្រះ បារមី ដ៏ សក្ដិសិទ្ធិ នៅក្នុង លោក ព្រះ បារមីនៅវត្តនិរោធរង្សី តាម ជួយ បីបាច់ ថែរក្សា សម្តេច តេជោ ហ៊ុន សែន នាយករដ្ឋមន្ត្រី នៃ ព្រះរាជាណាចក្រ កម្ពុជា និង សម្តេច កិត្តិព្រឹទ្ធបណ្ឌិត មាន សុខ ភាព ល្អ បរិបូរណ៍ ជន្មាយុ យឺនយូរ ដើម្បី សម្តេច បាន ស្ថិតនៅ គ្រប់គ្រង ការពារ ព្រះរាជាណាចក្រ កម្ពុជា ឲ្យ រក្សា បាន ជានិរន្តរ៍ នូវ សន្តិភាព ស្ថេរភាព នយោបាយ សន្តិសុខ សណ្តាប់ធ្នាប់ សាធារណៈ និង ការអភិវឌ្ឍ រីកចំរើន ថ្មីៗ បន្ថែមទៀត ដើម្បី ជា សេចក្តីសុខ សេចក្តីចម្រើន របស់ ប្រជាពលរដ្ឋ ខ្មែរ ទូទាំងប្រទេស។ ព្រមទាំង ឧទ្ទិស នូវ មហា កុសលផល បុណ្យ សូម ឲ្យ បាន ដល់ វិញ្ញាណក្ខន្ធ វីរៈ កម្មាភិបាល យុទ្ធជន យុទ្ធ នារី អ្នកស្នេហាជាតិ ដែល បាន បាត់បង់ ជីវិត ដើម្បី បុព្វ ហេតុ ជាតិ មាតុភូមិ ជាតិ ស្នេហា នៃ យើង ផងដែរ ៕SRP

ភ្នំពេញ៖ឯកអគ្គរដ្ឋទូតឥណ្ឌា ប្រចាំនៅកម្ពុជា ដែលចប់អាណត្តិបេសកកម្មការទូត លោកជំទាវ Manika Jain បានគោរពសម្ដែងនូវការវាយតម្លៃខ្ពស់ចំពោះការគ្រប់គ្រងជំងឺកូវីដ១៩ នៅក្នុងប្រទេសកម្ពុជា។ លោកជំទាវបានមានប្រសាសន៍ថា កម្ពុជាបានគ្រប់គ្រងការរាតត្បាតជំងឺកូវីដ១៩បានយ៉ាងល្អប្រសើរ ដែលរហូតមកដល់ថ្ងៃនេះ អ្នកជំងឺកូវីដ១៩នៅកម្ពុជាបានជាសះស្បើយទាំងស្រុង ជាមួយគ្នានេះផងដែរលោកជំទាវក៏បានថ្លែងអំណរគុណយ៉ាងជ្រាលជ្រៅចំពោះសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មន្ត្រីរាជរដ្ឋាភិបាលកម្ពុជាទាំងអស់ និងប្រជាជនកម្ពុជាដែលកន្លងមកបានផ្ដល់នូវការគាំទ្រដល់កិច្ចសហប្រតិបត្តិការយ៉ាងល្អប្រសើរធ្វើឱ្យបេសកកម្មកាទូតរបស់លោកជំទាវនៅកម្ពុជានាពេលនេះជាង២ឆ្នាំកន្លងមកនេះ ទទួលនូវភាពជោគជ័យត្រចះត្រចង់ ក្នុងនោះរួមទាំងមានការអញ្ជើញទស្សនកិច្ចផ្លូវការរបស់សម្ដេចតេជោទៅកាន់ប្រទេសឥណ្ឌាផង ហើយជាមួយគ្នានោះ ក៏មាន ឯកឧត្តមរដ្ឋមន្ត្រីក្រសួងពាណិជ្ជកម្ម ឯកឧត្តមរដ្ឋមន្ត្រីក្រសួងសាធារណការ និងថ្នាក់ដឹកនាំកម្ពុជាមួយចំនួនទៀត បានទៅធ្វើទស្សនកិច្ចនៅប្រទេសឥណ្ឌាផងដែរ។

លើសពីនេះទៅទៀត ក៏មានការធ្វើដំណើរមកប្រទេសកម្ពុជារបស់ ឯកឧត្តមរដ្ឋមន្ត្រីក្រសួងពាណិជ្ជកម្មឥណ្ឌា រដ្ឋមន្ត្រីការពារជាតិឥណ្ឌាផងដែរ ដែលសកម្មភាពទាំងអស់នេះធ្វើឱ្យទំនាក់ទំនងរវាងប្រទេសទាំងពីរកាន់តែរឹងមាំ និងកិច្ចសហប្រតិបត្តិការរវាងប្រទេសទាំងពីរ កាន់តែរីកដុះដាលប្រសើរឡើងជាលំដាប់។ លោកជំទាវបានបន្តទៀតថា ក្នុងដំណើរទស្សនកិច្ចនីមួយៗមានការចុះហត្ថលេខាលើអនុស្សារណៈ កិច្ចព្រមព្រៀងលើការអភិវឌ្ឍគម្រោងផ្សេងៗផងដែរ ដែលជំរុញទំនាក់ទំនងនៃប្រទេសទាំងពីរអោយកាន់តែល្អបន្ថែមទៀត។

ជាសាក្ខីភាពទំហំពាណិជ្ជកម្មនៃប្រទេសទាំងពីរបានកើនឡើងជាលំដាប់ ក្នុងន័យនេះដែរលោកជំទាវក៏បានគោរពជម្រាបជូនសម្ដេចតេជោថា តាមអ្វីដែលលោកជំទាវបានកត់សម្គាល់ គឺក្នុងរយៈពេលជាង២ឆ្នាំកន្លះនេះ កម្ពុជា និងឥណ្ឌាបានធ្វើសហប្រតិបត្តិការរវាងគ្នា និងគ្នាស្ទើរតែគ្រប់វិស័យទាំងអស់។
លោកជំទាវលើកឡើងយ៉ាងដូច្នេះនៅវិមានសន្តិភាព នាព្រឹកថ្ងៃសុក្រថ្ងៃទី ១១ ខែកញ្ញា ឆ្នាំ២០២០ នាឱកាសជួបជពិភាក្សាការងារជាមួយសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ជាការឆ្លើយតប សម្ដេចតេជោ ហ៊ុន សែន ក៏បានថ្លែងអំណរគុណចំពោះលោកជំទាវ Manika Jain និងសហការីទាំងអស់ដែលបានដើរតួយ៉ាងសំខាន់ក្នុងការពង្រីក ពង្រឹងនូវកិច្ចសហប្រតិបត្តិការរវាងប្រទេសទាំងពីរ។ សម្ដេចតេជោបានមានប្រសាសន៍ថា សម្ដេចសម្គាល់ឃើញដូចលោកជំទាវឯកអគ្គរដ្ឋទូតឥណ្ឌាដែរថា កម្ពុជា និងឥណ្ឌាមានកិច្ចសហប្រតិបត្តិការស្ទើតែគ្រប់វិស័យទៅហើយ ហើយវិស័យនីមួយៗសុទ្ធតែវិស័យសំខាន់ៗក្នុងការជំរុញលើកកម្ពស់ទំនាក់ទំនងរវាងប្រទេសទាំងពីរ។ សម្តេចតេជោបន្តថា អ្វីដែលជាការងារបន្តសម្ដេចតេជោបានជម្រាបជូនលោកជំទាវថា យើងគប្បីណាលើកកម្ពស់អនុស្សារណៈដែលយើងបានចុះហត្ថលេខារួចមក ឱ្យទៅជាកិច្ចព្រមព្រៀង ហើយកិច្ចព្រមព្រៀងដែលយើងបានចុះជាមួយគ្នាគប្បីណាជំរុញការអនុវត្ត ដើម្បីឈានឆ្ពោះទៅការជោគជ័យលើរាល់កិច្ចព្រមព្រៀងដែលបានចុះហត្ថលេខាហើយនោះ ។

សម្តេតេជោ ហ៊ុន សែន ក៏បានមានប្រសាសន៍ផងដែរថា អ្វីដែលយើងបានចុះហត្ថលេខាយើងគប្បីណាពិនិត្យមើលបន្ថែមទៀតក្នុងការពង្រឹងតួនាទី សហប្រតិបត្តិការរវាងប្រទេសទាំងពីរបន្ថែមទៀត ដើម្បីទៅពង្រីកវិសាលភាពទំនាក់ទំនងកិច្ចសហប្រតិបត្តិការរវាងប្រទេស និងប្រទេសឲ្យកាន់តែរឹងមាំថែមមួយកម្រិតទៀត។ ជាទីបញ្ចប់សម្ដេចតេជោនាយករដ្ឋមន្ត្រី ក៏បានអរគុណដល់លោកជំទាវ សូមជូនពរឱ្យបេសកកម្មកាទូតរបស់លោកជំទាវ ទទួលបាននូវភាពជោគជ័យជាបន្តបន្ទាប់ទៀត៕SRP