ខេត្តសៀមរាប៖ក្មេងប្រុសម្នាក់ត្រូវបានសមត្ថកិច្ចអះអាងថា បានលង់ទឹកស្រះស្លាប់។
ហេតុការណ៍បានកើតឡើង នៅថ្ងៃចន្ទ ទី១៩ ខែ កុម្ភ: ឆ្នាំ២០២៤ ស្ថិតនៅភូមិព្រៃគុយ ឃុំអំពិល ស្រុកប្រាសាទបាគង ខេត្តសៀមរាប។
សមត្ថកិច្ចបានប្រាប់ថា ជនរងគ្រោះ ឈ្មោះ វាសនា វិសាល ភេទប្រុសអាយុ ៧ឆ្នាំ បាន
លង់ទឹកស្រះស្លាប់ នៅខាងក្រោយផ្ទះ ដោយបានបាត់ខ្លួនប្រហែលជាម៉ោង ០៩:០០ នាទីព្រឹក ហើយត្រូវបានរកសពឃើញនៅវេលាម៉ោង ១០:៣០នាទីព្រឹកនេះ៕
ខេត្តសៀមរាប៖ជនបរទេសមួយរូបបានស្លាប់ សមត្ថកិច្ចបានអះអាងថាស្លាប់ដោយសារ ស្ទះសសៃឈាមបេះដូង។
ហេតុការណ៍បានកើតឡើង នៅវេលាម៉ោង១៣ និង៣០នាទី ថ្ងៃទី១៧ ខែកុម្ភៈ ឆ្នាំ២០២៤
នៅចំណុខាងមុខប្រាសាទអង្គរវត្ត ស្ថិតនៅភូមិត្រពាំងសេះ សង្កាត់គោកចក ក្រុងសៀមរាប។
សមត្ថកិច្ចបានប្រាប់ថា ជនរងគ្រោះបាន
ដើរដួលបណ្តាលឲ្យស្លាប់តែម្ដង។ ជនរងគ្រោះ ឈ្មោះ DROZDZ JACEK WOJCIECH ភេទប្រុស អាយុ ៥៤ឆ្នាំ ជនជាតិប៉ូឡូញ កាន់លិខិតឆ្លងដែនលេខEK5085530 ជាភ្ញៀវទេសចរណ៍ ស្នាក់នៅសណ្ឋាគារ Amber Angkor Villa Hotel &Spa នៅភូមិវត្តបូព៌ សង្កាត់សាលាកំរើក ក្រុងសៀមរាប។
តាមការស្រាវជ្រាវ របស់សមត្ថកិច្ចជំនាញនិងគ្រូពេទ្យអមតុលាការ បានសន្និដ្ឋានថា ស្លាប់ដោយសារ ស្ទះសសៃឈាមបេះដូង។
សាកសព ត្រូវបានបញ្ជូនទៅតម្កល់ទុក នៅវត្តស្ទឹងមានជ័យ រាជធានីភ្នំពេញ រង់ចាំការសម្រេចពីស្ថានទូត និងក្រុមគ្រួសារ៕
ខេត្តត្បូងឃ្មុំ៖លោកជាម ច័ន្ទសោភ័ណ អភិបាលត្បូងឃ្មុំ និងលោកជំទាវ ម៉េង វ៉ាន់ដានីន រួមជាមួយថ្នាក់ដឹកនាំខេត្ត មន្ទីរអង្គភាព និងមន្ត្រីរាជការជុំវិញខេត្ត ព្រមទាំងបងប្អូនប្រជាពលរដ្ឋ ប្រមាណ១០ម៉ឺននាក់ បានចូលរួមចាប់ត្រី តាមបែបប្រពៃណីបុរាណ នៅបឹងក្រម ឬបឹងត្រពាំងក្រម។
ការចាប់ត្រីនេះនៅថ្ងៃទី១៧ ខែកុម្ភៈ ឆ្នាំ២០២៤នេះស្ថិតនៅភូមិសាទុំ ឃុំជាំក្រវៀន ស្រុកមេមត់ ដែលតែងតែធ្វើឡើងជារៀងរាល់ឆ្នាំ នៅក្នុងខែកុម្ភៈនេះ។នេះបើយោងតាមការឲ្យដឹងពីលោក អឿន រិទ្ធ ប្រធានមន្ទីរទេសចរណ៍ខេត្តត្បូងឃ្មុំ។
ពិធីចាប់ត្រីនេះ បានធ្វើឡើងឲ្យកាន់តែធំពីមួយឆ្នាំ ទៅមួយឆ្នាំ ក្រោមការផ្តួចផ្តើមពីសំណាក់ លោកជាម ច័ន្ទសោភ័ណ និងលោកជំទាវ ក្នុងគោលបំណង ដើម្បីរំលឹកប្រពៃណី នៅតាមភូមិស្រុក ថែរក្សាអភិរក្សកេរ្តិ៍តំណែល ដូនតាពីបុរាណត រៀងមក ក៏ដូចជាបង្កើនបរិយាកាស សប្បាយរីករាយ ជួបជុំជូនបងប្អូនប្រជាពលរដ្ឋ ក្រោមម្លប់សុខសន្តិភាព។
គូសបញ្ជាក់ថា ៖ ក្នុងកម្មវិធីនេះ មានការចុះចាប់ត្រី យកមកចំអិនហូបជុំគ្នា អាហារសាមគ្គី ការប្រគុំតន្ត្រី រាំលេងកំសាន្ត ពិសេសអ្នកដែលចាប់បានច្រើន ទទួលបានប្រាក់រង្វាន់ដូចជា ៖
-លេខ១ ទទួលបានថវិកាចំនួន ៥០០ ០០០រៀល
-លេខ២ ទទួលបានថវិកាចំនួន ៤០០ ០០០រៀល
-លេខ៣ ទទួលបានថវិកាចំនួន ៣០០ ០០០រៀល
-លេខ៤ ទទួលបានថវិកាចំនួន ២០០ ០០០រៀល
-លេខ៥ ទទួលបានថវិកាចំនួន ១០០ ០០០រៀល
-លេខ៦ ដល់លេខ១០ ក្នុងម្នាក់ៗទទួលបានថវិកាចំនួន ៥០ ០០០រៀល ពីលោក ជាម ច័ន្ទសោភ័ណ និងលោកជំទាវ ព្រមទាំងចែកជូននូវនំបញ្ចុក សម្លខ្មែរ និងត្រីស្រស់ ចំនួន៣០០គីឡូក្រាម ដល់បងប្អូនប្រជាពលរដ្ឋ ដែលចូលរួមនាកម្មវិធីនេះផងដែរ។
សូមជម្រាបថា៖ តំបន់បឹងក្រម មានផ្ទៃដីប្រមាណ ៣០ហិកតា និងផ្ទៃបឹងទំហំ១ហិកតា ដោយរៀងរាល់ឆ្នាំ មុនពិធីចាប់ត្រីមកដល់អាជ្ញាធរ មិនអនុញ្ញាតឲ្យពលរដ្ឋនេសាទត្រី ក្នុងបឹងក្រមនេះឡើយ ដើម្បីរក្សាវត្តមានត្រី ទុកសម្រាប់ពិធីចាប់ត្រី។ ចំពោះការចាប់ត្រី ពលរដ្ឋអាចប្រើប្រាស់ បានតែឧបករណ៍បុរាណប៉ុណ្ណោះ ដូចជា អង្រុត ឈ្នាង និងត្រកជាដើម៕
ខេត្តព្រះសីហនុ៖ លោកគួច ចំរើន អភិបាលខេត្តព្រះសីហនុ និងស្នងការនគរបាលខេត្តនៅរសៀលថ្ងៃព្រហស្បតិ៍ ទី១៥ ខែកុម្ភៈ ឆ្នាំ២០២៤នេះ បានធ្វើសន្និសីទសារព័ត៌មានលម្អិត ដើម្បីបង្ហាញអំពីជនសង្ស័យចំនួន ២នាក់ ជនជាតិចិនតៃវ៉ាន់ ដែលផលិតមាតិកាវីដេអូប្រឌិត ធ្វើឲ្យប៉ះពាល់ដល់កិត្តិយស សណ្ដាប់ធ្នាប់ និងសន្តិសុខ នៅខេត្តព្រះសីហនុ។
សូមជម្រាបថាកាលពីថ្ងៃទី១៣ ខែកុម្ភៈ ឆ្នាំ២០២៤ កម្លាំងជំនាញស្នងការដ្ឋាននគរបាលខេត្តព្រះសីហនុ បានធ្វេីការឃាត់ខ្លួនជនជាតិចិនតៃវ៉ាន់ចំនួន ២នាក់ នៅបន្ទប់ខុនដូមួយកន្លែង ដែលមានទីតាំងស្ថិតក្នុងក្រុងព្រះសីហនុ ខេត្តព្រះសីហនុ ក្រោយពួកគេរួមគ្នាផលិតវីដេអូក្លែងក្លាយ ដើម្បីទាក់ទាញការចាប់អារម្មណ៍ នៅលើបណ្ដាញសង្គមនានា ពិសេសបណ្ដាញសង្គម TikTok ដែលមានអ្នកគាំទ្រ និងចុចឡាយ រហូតដល់ជាង៥លាននាក់ ។ វីដេអូដែលពួកគេផលិតនោះ មានដូចជា ការប្រឌិតជាខ្មោចលងនៅតាមសណ្ឋាគារទុកចោល និងទីតាំងផ្សេងៗទៀត នៅក្នុងមូលដ្ឋានខេត្តព្រះសីហនុ។
តាមរយៈវីដេអូប្រឌិតទាំងអស់នេះ បានធ្វើឲ្យមហាជនមានការភ័យខ្លាច និងយល់ច្រឡំ ពិសេសអ្នកដែលរស់នៅក្រៅប្រទេស ដែលមានបំណងមកលេងកម្សាន្ដ ក៏ដូចជាមកទេសចរណ៍ក្នុងខេត្តព្រះសីហនុ។ ដែលធាតុពិតមិនមានហេតុការណ៍នេះកើតឡើងទេ ដោយជនសង្ស័យធ្វើដើម្បីទាក់ទាញការចូលមើល ឬដើម្បីបាន View ច្រើនតែប៉ុណ្ណោះ។
ក្រោយការឃាត់ខ្លួនជនសង្ស័យទាំង ២នាក់ ខាងលេី កម្លាំងសមត្ថកិច្ចជំនាញ បានដកហូតស្រោមមុខខ្មោច, កាំភ្លើងជ័រ, សំលៀកបំពាក់ទាហានប៉ារ៉ា,ទូរស័ព្ទដៃ, សម្ភារឧបករណ៍ផលិតVideo Live និងសម្ភារបម្រើឲ្យការថតវីដេអូមួយចំនួន។ បច្ចុប្បន្នជនសង្ស័យទាំង ២នាក់ ខាងលេី កំពុងឃាត់ខ្លួនជាបណ្ដោះអាសន្ន ដេីម្បីកសាងសំណុំរឿងបញ្ជូនទៅសាលាដំបូងខេត្តព្រះសីហនុ ចាត់ការតាមនីតិវិធីច្បាប់៕
ខេត្តសៀមរាប៖បុរសម្នាក់បានស្លាប់ខណ:បានហូបត្រីកំពត។
ហេតុការណ៍បានកើតឡើង នៅវេលាម៉ោង១០ ព្រឹក ថ្ងៃទី ១៥ ខែកុម្ភៈ ឆ្នាំ២០២៤ នៅភូមិឧទ័យ ឃុំល្វាក្រាំង ស្រុកវ៉ារិន ខេត្តសៀមរាប។
សមត្ថកិច្ចបានថ្លែងប្រាប់អង្គភាពសៀមរាប ប៉ុស្ដិ៍ ថា ជនរងគ្រោះ មានឈ្មោះ ទៀន ញ៉ាម ភេទ ប្រុស អាយុ ៥៤.ឆ្នាំ មានទីលំនៅភូមិឧទ័យ ឃុំល្វាក្រាំង ស្រុកវ៉ារិន ខេត្តសៀមរាប។
ករណីនេះ មូលហេតុ ជនរងគ្រោះបានពុលអាហា (ពុលត្រីកំពត)។ សមត្ថកិច្ចបានពិនិត្យប្រគល់សាកសពឲ្យក្រុមគ្រួសារធ្វើតាមប្រពៃណី៕
ខេត្តកំពង់ចាម៖ លោក ឈាង រ៉ា រដ្ឋមន្ត្រីក្រសួងសុខាភិបាល បានសូមឱ្យអាជ្ញាធរមូលដ្ឋាន ត្រូវខិតខំក្នុងការពង្រឹងសេវាសុខាភិបាលឱ្យបានប្រសេីរថែមទៀត ដោយមន្ទីរពេទ្យខេត្តកំពង់ចាម នឹងប្រែក្លាយជាមន្ទីរពេទ្យថ្នាក់តំបន់នាពេលខាងមុខនេះ។
រដ្ឋមន្រ្តី ក៏បានផ្តាំផ្ញើ ត្រូវខិតខំបន្ថែមទៀតក្នុងការផ្តល់សេវាជូនប្រជាពលរដ្ឋ ប្រកបដោយស្មារតីទទួលខុសត្រូវ និងស្នើឱ្យថ្នាក់ដឹកនាំ ត្រូវជំរុញការបណ្តុះបណ្តាលដល់មន្រ្តីជំនាញ បន្ថែមទៀតដោយត្រូវបញ្ជូនទៅចូលរួមនៅមន្ទីរពេទ្យខេត្ត និងមន្ទីរពេទ្យថ្នាក់ជាតិ។
លោក ឈាង រ៉ា ក៏បានស្នេីឱ្យមន្រ្តីរាជការ និងបុគ្គលិកសុខាភិបាលទាំងអស់ ត្រូវចេះជួយគ្នា សហការគ្នា សាមគ្គីភាពគ្នា និងត្រូវខិតខំប្រឹងព្យាយាមបន្ថែមទៀត ក្នុងការអភិវឌ្ឍ វិស័យសុខាភិបាល ឱ្យកាន់តែល្អប្រសើរថែមទៀត ដើម្បីឈានទៅរកការសម្រេចបាននូវការគ្របដណ្តប់សុខភាព ជាសកលផងដែរ។
លោក ឈាង រ៉ា ក៏មានការចាប់អារម្មណ៍ពីការពិនិត្យមូលដ្ឋានសុខាភិបាល និងបានវាយតម្លៃខ្ពស់ពីភាពរីកចម្រើន ទាំងរៀបចំហេដ្ឋារចនាសម្ព័ន្ធ ការរៀបចំសណ្តាប់ធ្នាប់ សម្ភារបរិក្ខារវេជ្ជសាស្រ្ត និងធនធានមនុស្សដែលមានជំនាញច្បាស់លាស់ ប្រកបដោយក្រមសីលធម៌វិជ្ជាជីវៈ ដើម្បីធានាការបម្រើសេវាជូនប្រជាពលរដ្ឋប្រកបដោយគុណភាព សុវត្ថិភាព ប្រសិទ្ធភាព និងសមធម៌។
រដ្ឋមន្ត្រីសុខាភិបាលថ្លែងបែបនេះ នៅល្ងាចថ្ងៃទី១៤ ខែកុម្ភៈ ឆ្នាំ២០២៤ ក្នុងឱកាសអញ្ជើញចុះពិនិត្យការផ្តល់សុខាភិបាល និងសំណេះសំណាល សួរសុខទុក្ខថ្នាក់ដឹកនាំ មន្រ្តីរាជការនៅមន្ទីរពេទ្យបង្អែកខេត្តកំពង់ចាម។
ថ្លែងក្នុងពិធីសំណេះសំណាលនេះ លោក អ៊ុន ចាន់ដា អភិបាលខេត្តកំពង់ចាម បានលើកទឹកចិត្តដល់មន្រ្តីសុខាភិបាល ជាពិសេសមន្រ្តីជំនាញសូមខិតខំ ទោះបីការងារនៅទីណាក៏ដោយ ស្របតាមគោលនយោបាយរាជរដ្ឋាភិបាល ក្នុងការពង្រាយមន្រ្តីសុខាភិបាល នៅតាមមូលដ្ឋាន ឱ្យគៀកប្រជាពលរដ្ឋ ដើម្បីលើកកម្ពស់សេវាសុខាភិបាល និងសុខភាពសហគមន៍ នៅខេត្តកំពង់ចាម និងទូទាំងប្រទេសកម្ពុជា៕
