ខេត្តសៀមរាប៖មេភូមិតាចក សង្កាត់ស្រង៉ែ ខេត្ត សៀមរាប លោក រី ឃន បានរងការចោទប្រកាន់ពីពលរដ្ឋថា បានជិះម៉ូតូក្នុងស្ថានភាពស្រវឹងស្រា បើកបុកម៉ូតូរបស់គាត់ខណ:កំពុងតែជិះឌុបគ្នា។

ហេតុការណ៍បានកើតឡើងនៅម៉ោងប្រមាណជាង៩ ព្រឹក ថ្ងៃទី៣០ ខែឧសភា ឆ្នាំ២០២៣ ស្ថិតនៅភូមិតាចក សង្កាត់ស្រង៉ែ ខេត្តសៀមរាប។ នេះបើតាមសម្ដីជនរងគ្រោះដែលបានផ្ដល់បទសម្ភាសន៍ ប្រាប់អង្គភាពសារព័ត៌មាន សៀមរាប ប៉ុស្ដិ៍ នៅថ្ងៃពុធនេះ។

ជនរងគ្រោះមាន ស្រ៊ាង តុលា ជាអ្នកបើកម៉ូតូឌុបមនុស្សម្នាក់ពីក្រោយ ជាប្អូនស្រី។

សៀមរាប ប៉ុស្ដិ៍ មិនអាចទាក់ទង លោក រី ឃន មេភូមិតាចក បាននៅឡើយទេរហូតមកដល់ម៉ោងផ្សាយនេះ។

បើតាមសម្ដីជនរងគ្រោះ បានលើកឡើងថា ខណៈពេលដែលរូបលោក បានកំពុងជិះម៉ូតូដឹកប្អូន នៅតាមផ្លូវ នៅពេលនោះ លោកមេភូមិតាចក ក៏បានជិះម៉ូតូចេញពីផ្ទះរបស់គាត់ ដោយមើលទៅក្នុងស្ថានភាពស្រវឹងសំដៅមករកម៉ូតូរបស់លោកតែម្ដង។ ហើយលោកបានព្យាយាមបើកម៉ូតូគេចដែរ ប៉ុន្តែគេចមិនផុត ដោយសារម្ខាងទៀតជាប្រឡាយ ទើបធ្វើឱ្យម៉ូតូមេភូមិតាចក បានមកបុកម៉ូតូរបស់លោកចំពីក្រោយត្រង់បំពង់ស៊ីមាំង ប្រសិនបើលោកគេចមិនទាន់នោះទេ អាចនឹងចំរូបលោក និងប្អូនស្រី ទាំងកម្រោលតែម្ដង មិនដឹងថាស្លាប់ឬរស់ឬរបួសប៉ុន្មាននោះទេ។ តែសំណាងល្អរបួសបន្តិចបន្តួចតែប៉ុណ្ណោះ។

ជនរងគ្រោះបានបន្តថា ក្រោយពីកើតហេតុភ្លាមៗមេភូមិរូបនេះ បានលើកម៉ូតូ របស់ខ្លួនដោយនិយាយថា ប្រញាប់ទៅយកចៅនៅសាលា និងប្រាប់ជនរងគ្រោះថា ឲ្យទៅពេទ្យសិនទៅ ហើយចេញ វិក្កយបត្រ អស់ប៉ុន្មាន? រូបលោកនឹងជួយចេញថ្លៃព្យាបាល។ ប៉ុន្តែនៅពេលចេញវិក្កយប័ត្រ រួចមក លោកមេភូមិរូបនេះ មិនបានទទួលខុសត្រូវ ក្នុងការជួយចេញថ្លៃព្យាបាលនោះទេ ព្រមទាំងបោះសម្ដីថាធ្វើអីធ្វើទៅ។ បញ្ជាក់មេភូមិរូបនេះ បានឲ្យលុយតែ៤ម៉ឺនរៀល តែប៉ុណ្ណោះ មករូបលោកប្រាប់ជួសជុលម៉ូតូ ដោយការជួសជុលអស់ ៣៥០០០រៀល៕ដោយនាគខៀវ

ក្នុងពិធីសម្ពោធដាក់ឲ្យប្រើប្រាស់ជាផ្លូវការស្ពានបេតុងខ្សែកាបឆ្លងកាត់ទន្លេសាប និងស្ពានអាកាសឫស្សីកែវ នៅថ្ងៃពុធ នេះ ទាក់ទងទៅនឹងការការពារសន្តិសុខជាតិ សម្ដេចតេជោនាយករដ្ឋមន្ត្រី ហ៊ុន សែន បានមានប្រសាសន៍ព្រមានសារជាតិថ្មីទៅដល់អ្នកដែលមានបំណងចង់បំផ្លាញសន្តិភាពថា នរណាក៏ដោយ ឲ្យតែហ៊ានធ្វើចលនា ដែលនាំឲ្យអសន្តិសុខសាធារណៈ និងមានចេតនាចង់បំផ្លាញសុខសន្តិភាព នឹងមិនលើកលែងឲ្យនោះទេ។

ទាក់ទងទៅនឹងព្រឹត្តិការណ៍ស៊ីហ្គេម នៅកម្ពុជា សម្តេចតេជោ ហ៊ុន សែន បានមានប្រសាសន៍ថា ស៊ីហ្គេម គឺជាកាតព្វកិច្ចរបស់រដ្ឋជាសមាជិកអាស៊ាន ដែលត្រូវផ្លាស់ប្តូរវេនគ្នាសម្រាប់រៀបចំព្រឹត្តិការណ៍កីឡានេះ។ ហើយគិតត្រឹមថ្ងៃនេះទី៣១ ឧសភា នេះ កម្ពុជាសល់តែ៣ ថ្ងៃទៀតតែប៉ុណ្ណោះនឹងត្រូវរៀបចំព្រឹត្តិការណ៍កីឡាអាស៊ានប៉ារ៉ាហ្គេម ឬកីឡាសម្រាប់បងប្អូនជនពិការនៅកម្ពុជា ដែលត្រូវធ្វើជាម្ចាស់ផ្ទះជាបន្តទៀត។ សម្តេចតេជោ ហ៊ុន សែន បានអំពាវនាវដល់បងប្អូនប្រជាពលរដ្ឋខ្មែរទាំងអស់ សូមគាំទ្រ និងលើកទឹកចិត្តបន្ថែមទៀតដល់កីឡាករ-កីឡាការិនី ដែលជាកីឡាជនពិការ។សម្ដេចតេជោ បានណែនាំដល់រដ្ឋមន្រ្ដីក្រសួងទេសចរណ៍ និងក្រុមការងាររៀបចំព្រឹត្តិការកីឡាអាស៊ានប៉ារ៉ាហ្គេម ត្រូវរៀបចំទស្សនីយភាពពិធីបើកព្រឹត្តិការណ៍នេះឱ្យបានល្អ និងបាញ់កាំជ្រួចឱ្យបានច្រើន ខណៈរដ្ឋមន្រ្ដីក្រសួងទេសចរណ៍បញ្ជាក់ថា ការបាញ់កាំជ្រួចក្នុងពេលបើកព្រឹត្តិការណ៍អាស៊ានប៉ារ៉ាហ្គេម គឺមានចំនួនច្រើនជាងព្រឹត្តិការណ៍បើកស៊ីហ្គេមទៅទៀត៕ដោយនាគខៀវ

សម្តេចតេជោហ៊ុន សែន នាយករដ្ឋមន្ត្រីបានមានប្រសាសន៍ កោតសរសើរ ចំពោះកិច្ចខិតសំប្រឹងប្រែង និងវិធីសាស្ត្រយកស្លឹកត្នោតខ្ចប់ស្ករត្នោត ឬយករាជធានីភ្នំពេញចិញ្ចឹមរាជធានីភ្នំពេញ ដែលធ្វើឱ្យរាជធានីភ្នំពេញមានការរីកចម្រើនពីមួយថ្ងៃទៅមួយថ្ងៃ។ សម្ដេចតេជោ ថា រាជធានីភ្នំពេញកំពុងដើរលើផ្លូវដ៏ត្រឹមត្រូវមួយលើការ អភិវឌ្ឍក្រោមគោលនយោបាយ និងយុទ្ធសាស្រ្ដ «ស្លឹកត្នោតខ្ចប់ស្ករត្នោត» ដោយយកធនធានផ្ទាល់នៅទីនេះ ដើម្បីអភិវឌ្ឍន៍ឡើងវិញ និងកសាងហេដ្ឋារចនាសម្ព័ន្ធលើគ្រប់វិស័យ បម្រើដល់ការរស់នៅរបស់ប្រជាពលរដ្ឋ។

សម្ដេចតេជោ ហ៊ុន សែន មានប្រសាសន៍យ៉ាងដូច្នេះ ក្នុងឱកាសសម្ពោធដាក់ឲ្យប្រើប្រាស់ជាផ្លូវការស្ពានបេតុងខ្សែកាបឆ្លងកាត់ទន្លេសាប និងស្ពានអាកាសឫស្សីកែវ នៅថ្ងៃពុធនេះ។

សម្ដេចហ៊ុន សែន ពិតជារីករាយដែលបានអញ្ជើញមកសម្ពោធដាក់ឲ្យប្រើប្រាស់ជាផ្លូវការ នូវស្ពានបេតុងខ្សែកាបឆ្លងកាត់ទន្លេសាបមកតំបន់អភិវឌ្ឍន៍ជ្រោយចង្វារ និងស្ពានអាកាសនៅផ្លូវជាតិលេខ៥ឫស្សីកែវ បន្ទាប់ពីសម្ដេចបានអញ្ជើញបើកការដ្ឋានស្ពានទាំងពីរនេះ នាពេលកន្លងទៅ។

សម្តេចតេជោ បានមានប្រសាសន៍រំលឹកគ្រាអតីតកាល នៃតំបន់ជ្រោយចង្វារ និងឫស្សីកែវ ដែលជាកន្លែងជ្រកពួន និងលាក់ខ្លួន របស់ខ្មែរក្រហម ដែលតែងលបលួចចូលវាយប្រហារកន្លែងស្តុកសាំង និងចូលមកកាន់រាជធានីភ្នំពេញ។

សម្ដេចតេជោនាយករដ្ឋមន្ត្រីក៏សូមការអធ្យាស្រ័យដល់អ្នករត់ទូកដ និងសាឡង់ទាំងឡាយដែលរាជរដ្ឋាភិបាលបានសាងសង់ស្ពានជាច្រើនឆ្លងកាត់ទន្លេ ដែលធ្វើឱ្យផ្ដាច់មុខរបរអ្នករត់ទូកដ និងសាឡាងនៅរាជធានីភ្នំពេញ ខណៈគម្រោងសាងសង់ស្ពានមួយចំនួនទៀតដូចជា ស្ពានតភ្ជាប់ពីរាជធានីភ្នំពេញទៅអរិយ្យក្សត្រ និងស្ពានតភ្ជាប់នៅតំបន់ច្បារអំពៅជាដើម ដែលនឹងត្រូវសាងសង់នៅពេលខាងមុខ។ សម្ដេចតេជោបានផ្ដាំផ្ញើអ្នកបន្តវេននាំក្រោយ កុំភ្លេចប្រើប្រាស់ ឬវិភាជថវិកាទៅលើហេដ្ឋារចនាសម្ព័ន្ធពន្លឿនសេដ្ឋកិច្ច ក្នុងពេលដឹកនាំប្រទេស ឬស្ថាប័ន ឬហៅថា «បែងចែកថវិកានៅកំណើនសេដ្ឋកិច្ចប្រកបដោយសមធម៌» ដោយគួរតែរៀបចំមិនត្រូវប្រើប្រាស់ថវិកាខ្ចះខ្ជាយឡើយ។

សម្តេចតេជោ ហ៊ុន សែន បានមានប្រសាសន៍ប្រកាស ពីគម្រោង និងដំណើរការស្ថាបនាផ្លូវល្បឿនលឿនភ្នំពេញ-បាវិត ដែលជាផ្នែកមួយ នៃការតភ្ជាប់ និងលំហូរ នៃការធ្វើដំណើរបានឆាប់រហ័ស ដែលផ្លូវនេះនឹងត្រូវបើកការដ្ឋាននៅថ្ងៃ៧ មិថុនាខាងមុខនេះផងដែរ៕ដោយនាគខៀវ

ក្នុងសម្ពោធអគារសិក្សាថ្មី នៃពុទ្ធិកសាកលវិទ្យាល័យ​ព្រះសីហមុនីរាជា នៅថ្ងៃអង្គារ នេះសម្ដេចហ៊ុន សែន បានមានប្រសាសន៍សារជាថ្មីទៀតថា កំហុសនយោបាយពីអតីតកាល ធ្វើឱ្យកម្ពុជាជួបវិនាសកម្ម ហើយធនធានមនុស្សត្រូវបានបាត់បង់។ ដូច្នេះគ្មានអ្វីល្អប្រសើរជាងការចូលរួមថែរក្សាសុខសន្តិភាពឱ្យបានគង់វង្សនោះទេ។

សម្តេចតេជោបន្តទៀតថា បើគ្មានរដ្ឋប្រហារ ១៨ មីនា ១៩៧០ ហើយទុកឱ្យព្រះបរមរតនកោដ្ឋដឹកនាំប្រទេស កម្ពុជានឹងទទួលលបានការអភិវឌ្ឍន៍ ចម្រើនលូតលាស់ មិនជួបវិនាសកម្មនោះឡើយ។ សម្តេចតេជោ ហ៊ុន សែន បានមានប្រសាសន៍ថា កម្ពុជានៅតែប្រកាន់យកគោលនយោបាយ ថវិកា ផ្សារភ្ជាប់នឹងគោលនយោបាយ ដើម្បីអភិវឌ្ឍន៍ប្រទេសជាតិឲ្យកាន់តែរីកចម្រើនទៅមុខទៀត។

សម្តេចតេជោ ហ៊ុន សែន ក៏បានសម្រេចជួយសាងសង់អគារស្នាក់នៅសម្រាប់និស្សិតសិក្សានៅពុទ្ធិកសាកលវិទ្យាល័យព្រះសីហមុនីរាជាមួយខ្នង និងឲ្យអភិបាលរាជធានីភ្នំពេញរៀបចំចាត់ចែងការសាងសង់ចាក់ផ្លូវបេតុង សម្រាប់ទីធ្លាបរិវេណសាកលវិទ្យាល័យនេះផងដែរ។ ជសម្តេចតេជោនាយករដ្ឋមន្ត្រីក៏បានសម្រេចផ្តល់ក្របខណ្ឌមន្ត្រីរាជការ ជូនគ្រូ និងបុគ្គលិកបណ្តែត ២៨នាក់ កំពុងបង្រៀន និងបម្រើការងារនៅពុទ្ធិកសាកលវិទ្យាល័យសីហមុនីរាជាផងដែរ៕ដោយនាគខៀវ

សម្តេចតេជោហ៊ុន សែន បានណែនាំឱ្យមានកែតម្រូវ ។លើបទចម្រៀងមួយបទដែលមានចំណងជើង ទាក់ទងការអបអរសាទរសម្ពោធអគារសិក្សាថ្មីនៅពុទ្ធិកសាកលវិទ្យាល័យសីហមុនីរាជា តែបែជាអ្នកនិពន្ធ និពន្ធច្រឡំដាក់ថាសាកលវិទ្យាល័យពុទ្ធិកសាកលវិទ្យាល័យសីហនុរាជាទៅវិញ។

សម្ដេចតេជោក៏បានបន្ថែមទៀតថា ពេលខ្លះការនិពន្ធបទចម្រៀងហាក់បីដូចជាលឿនពេក ដែលមិនបានសិក្សាឱ្យស៊ីជម្រៅ ធ្វើឱ្យមានការខុសឆ្គង ហើយពេលខ្លះនិពន្ធទៅតាមសកម្មភាពប្រចាំថ្ងៃ ដែលធ្វើឲ្យអ្នកស្ដាប់ ស្ដាប់សឹងមិនទាន់ សូម្បីសម្ដេចក៏មិនមានពេលស្តាប់ដែរ។ ដូច្នេះសម្ដេចតេជោសំណូមពរឲ្យមានការដកបទចម្រៀងមួយនេះចេញ និងធ្វើការកែតម្រូវ។

សម្តេចតេជោ ហ៊ុន សែន មានប្រសាសន៍ណែនាំយ៉ាងដូច្នេះ ក្នុងឱកាស អញ្ជើញសម្ពោធអគារសិក្សាថ្មី នៃពុទ្ធិកសាកលវិទ្យាល័យ​ព្រះសីហមុនីរាជានៅថ្ងៃអង្គារ នេះ ស្ថិតក្នុងបរិវេណ​វត្ត​ស្វាយពពែ សង្កាត់ទន្លេបាសាក់ ខណ្ឌចំការមន រាជធានីភ្នំពេញ៕ដោយនាគខៀវ

សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃអង្គារ នេះ អញ្ជើញ​សម្ពោធអគារសិក្សាថ្មី នៃពុទ្ធិកសាកលវិទ្យាល័យព្រះសីហមុនីរាជា ស្ថិតក្នុងបរិវេណ​វត្ត​ស្វាយពពែ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

អគារសិក្សាថ្មីនេះ ត្រូវបានប្រសិទ្ធនាមថា «អគារសម្តេចព្រះមហាសង្ឃរាជ បួរ គ្រី» ត្រូវ​បាន​​សាងសង់ឡើង ដោយចំណាយថវិកាសរុបជិត ២លានដុល្លារសហរដ្ឋអាមេរិក។ ថវិកា​សាងសង់អគារសិក្សាថ្មីនេះ ទទួលបានការ​ឧបត្ថម្ភ​ពី​សម្តេចតេជោ ហ៊ុន សែន និងសម្តេច​កិត្តិ​ព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាក​បាទក្រហកម្ពុជា និងក្រុមគ្រួសារ ព្រម​ទាំង​​សប្បុរសជននានា។

តាមការអោយដឹងពីឯកឧត្តម ឈិត សុខុន រដ្ឋមន្ត្រីក្រសួងធម្មការ និងសាសនា បានឱ្យដឹងថា អគារសម្តេច​ព្រះ​មហាសង្ឃរាជ បួរ គ្រី មានបន្ទប់សិក្សា ការិយាល័យ បណ្ណាល័យតេជោ​សន្តិភាព សាល​សវការកាត់ក្តីសម្រាប់និស្សិតផ្នែកច្បាប់ និងសាលប្រជុំ។ អគារនេះ មានកម្ពស់ ៩ជាន់ ស្មើនឹង ៤៥បន្ទប់។

អគារនេះ បានបញ្ចុះបឋមសិលាសាងសង់នៅថ្ងៃទី៤ ខែកក្កដា ឆ្នាំ២០២២ ក្រោមអធិ​ប​តី​ភាពរបស់នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធ​ពល​ខេម​រ​ភូមិន្ទ និងជាមេបញ្ជាការកងទ័ពជើងគោក ជាតំណាងដ៏ខ្ពង់ខ្ពស់របស់សម្តេចតេជោ ហ៊ុន សែន។

អគារថ្មីនេះ បានរចនាប្លង់ស្ថាបត្យកម្ម​រចនា​ប័ទ្ម​ខ្មែរ បែបសហសម័យ នាសម័យតេជោសន្តិភាព និងអភិវឌ្ឍន៍ ដោយសំយោគ​ចូល​នូវ​រច​នាប័ទ្មស្ថាបត្យកម្មខ្មែរសំខាន់ៗ រួមមានស្ថាបត្យកម្មប្រពៃណីផ្ទះបុរាណខ្មែរ ព្រះពុទ្ធ​សាស​នា ប្រាសាទបុរាណខ្មែរ (អង្គរវត្ត បន្ទាយស្រី និងប្រាសាទបាគង) សំណង់បេតិកភណ្ឌ​អា​ណានិគម និងស្ថាបត្យកម្មទំនើបកម្ម៕ដោយនាគខៀវ

ភ្នំពេញ៖នៅក្នុងជំនួបតាមទូរស័ព្ទ រវាង សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ឯកឧត្តម វ៉ូឡូឌីមៀ ហ៊្សែលលិនស្គី ប្រធានាធិបតីនៃប្រទេសអ៊ុយក្រែនបានថ្លែងអំណរគុណ ចំពោះជំនួយមនុស្សធម៌របស់កម្ពុជាក្នុងការ បណ្តុះបណ្តាល អ្នកដោះមីនរបស់អ៊ុយក្រែន កាលពីខែមករា ឆ្នាំ២០២៣ កន្លងទៅនេះ។

នេះបើតាមសេចក្ដីប្រកាសព័ត៌មានលទ្ធផលជំនួបតាមទូរស័ព្ទរវាងសម្តេចតីតេជោ ហ៊ុន សែន និង ឯកឧត្តម វ៉ូឡូឌីមៀ ហៀលលិនស្គី នៅល្ងាចថ្ងៃចន្ទ ម្សិលមិញ៕ដោយនាគខៀវ

ក្រុមមន្ត្រីផ្នែកនាយកដ្ឋានអភិរក្សជលផល នៃក្រសួងកសិកម្មរុក្ខាប្រមាញ់និងនេសាទ នាំយកសត្វក្រពើត្រីចំនួន ២៥ក្បាល មានទម្ងន់ចាប់ពី២៥ទៅ៤០គីឡូក្រាុំ មកពីខេត្តសៀមរាប មកលែងក្នុងបឹងធម្មជាតិ មួយហៅថា (បឹងខាំផា) ដើម្បីឱ្យវារស់នៅបន្តពូជបែបធម្មជាតិ និងមានបរិមាណ កើនឡើងបន្ថែម ព្រោះវាជាពពួកសត្វក្រពើ ជិតផុតពូជ។

ក្នុងពិធីលែងសត្វក្រពើត្រី ទៅក្នុងបឹងធម្មជាតិនៅឃុំព្រែកមាស ស្រុកសៀមប៉ាងខេត្តស្ទឹងត្រែង កន្លងមកថ្មីៗនេះ លោកអ៊ន ហ៊ុល អនុប្រធាននាយកដ្ឋានអភិរក្ស ជលផលនៃក្រសួងកសិកម្មរុក្ខាប្រមាញ់និងនេសាទបានបញ្ចាក់ថា៖ សត្វក្រពើត្រីដែលបាននាំយកមកលែងនេះ មានចំនួន២៥ក្បាលតែការនាំមកមានផ្លូវឆ្ងាយ និងប្រើរយៈពេលយួរ វាបានស្លាប់ចំនួន៣ក្បាល នៅសល់តែ២២ក្បាលប៉ុណ្ណោះបានលែងទៅក្នុងបឹងធម្មជាតិ នៅតំបន់អភិរក្សសត្វត្មាត ក្នុងភូមិសាស្ត្រទឹកដីស្រុកសៀមប៉ាង។

លោកបន្តថា៖ នេះជាលើកទី២ហើយ បន្ទាប់ពីលើកទី១ នៅឆ្នាំ២០២២ លែងបានចំនួន១៩ក្បាល ទៅក្នុងបឹងធម្មជាតិ (បឹងណាវ៉ា) នៅក្នុងតំបន់អភិរក្សសត្វស្លាប់សៀមប៉ាងនេះដែរ ព្រោះនៅពេលវាបន្សាំខ្លួន បន្តពូជ ពងកូន នៅខែវស្សាវាអាចចេញពីបឹងធម្មជាតិនេះ ចូលទៅទន្លេសេកុងប៉ែកខាងលើ និងបានបន្តពូជ ពងកូនសម្បូរបែបឡើងវិញ។

លោក សុខ ឃឿន នាយកដែនអភិរក្សសត្វព្រៃសៀមប៉ាង បានគាំទ្រដល់ការអភិរក្សពពួកសត្វជិតផុតពូជនេះ ហើយមន្ត្រីអភិរក្សបានធ្វើរបងព័ទ្ធជុំវិញស្រះក្នុង បឹងខាំផានេះ ដើម្បីរក្សាភាពស្អាប់ស្អាត ឱ្យសត្វក្រពើត្រីវារស់នៅស៊ីចំណីដែលយើងផ្តល់ឱ្យ។

លោកបន្តថា មន្ត្រីប្រចាំការនៅទីនេះនិងមើលថែរសត្វក្រពើត្រីនេះ ហើយការពារមិនឱ្យសត្វគោ ក្របីចុះ ព្រមទាំងដាក់សញ្ញាហាមឃាត់កូនចៅប្រជាពលរដ្ឋ ចុះទឹករកត្រី ឬបោះបោចបន្លែបង្ការនៅក្នុងស្រះទឹកនេះទេ ព្រោះវាមានជម្រៅជ្រៅខ្លាចមានគ្រោះថ្នាក់ទោះបីថា ក្រពើត្រីនេះវាមិនខាំមនុស្សក៏ដោយ។

លោកព្រំ អូដន អភិបាលរងស្រុកសៀមប៉ាងបានបញ្ចាក់ថា ៖ទោះជាយ៉ាងនេះក៏ដោយ ក្នុងពិធីលែងសត្វក្រពើត្រីនេះ អាជ្ញាធរមូលដ្ឋានបាននិមន្តព្រះសង្ឃ អាជ្ញាធរ អ្នកពាន់ព័ទ្ធនិងប្រជាពលរដ្ឋ ចូលរួមទទួលយកព័ត៌មានទាំងនេះទៅផ្សព្វផ្សាយបន្ត ដើម្បីបានរួមគ្នាអភិរក្សពពួកសត្វទាំងនេះឱ្យនៅគង់វង់ ហើយបានលើកកម្ពស់ការប្រុងប្រយ័ត្ន និងការពារសុវត្ថិភាពផង។

សូមបញ្ជាក់ថា៖ ក្រពើត្រីនេះជាពពួកសត្វជិតផុតពូជ ត្រូវបានមន្ត្រីនាយកដ្ឋានជលផល សហការជាមួយក្រុមហ៊ុន រ៉ាយហ្សីងហ្វីនិក រួមនិងអាជ្ញាធរមូលដ្ឋាន ធ្វើពិធីលែងសរុបបានចំនួន ៤១ក្បាលហើយ ក្នុងនោះ លើកទីមួយចំនួន១៩ក្បាល និងលើកទី២នេះ មានចំនួន២២ក្បាល ទៅក្នុងបឹងណាវ៉ា និងបឹងខាំផា ស្ថិននៅក្នុងភូមិសាស្ត្រ ដែនជម្រកសត្វព្រៃសៀមប៉ាង ក្នុងឃុំព្រែកមាស ស្រុកសៀមប៉ាង ខេត្តស្ទឹងត្រែង៕ដោយនាគខៀវ

ខេត្តសៀមរាប៖ស្ត្រីម្នាក់ត្រូវបានភ្លើងឆក់បណ្ដាលឲ្យស្លាប់។ ហេតុការណ៍បានកើតឡើង នៅរសៀល ថ្ងៃអាទិត្យ ម្សិលមិញ នៅចំណុចក្រោយផ្ទះជនរងគ្រោះ ភូមិពាម ឃុំដូនកែវ ស្រួក។

ប្រភពបានឲ្យដឹងថា ជនរងគ្រោះឈ្មោះ ផយ សាឡី ភេទស្រី អាយុ៥១ឆ្នាំ មុខរបរកសិករ មានទីលំនៅភូមិពាម ឃុំដូនកែវ ស្រួក។

បើតាមសមត្ថកិច្ច ករណីនេះ មូលហេតុ ជនរងគ្រោះបូមទឹក នឹងម៉ូទ័រ មុជ កំពុងបូមមុជរបូតទុយោរ ពីម៉ូទ័រ ជនរងគ្រោះគ្រោះ ទៅដកហ្វ្រីភ្លើងបណ្តាលឲ្យឆក់ស្លាប់តែម្ដង៕ដោយនាគខៀវ

ក្នុងសម្រង់ប្រសាសន៍សំខាន់ៗរបស់ ឯកឧត្តម បណ្ឌិត ហ៊ុន ម៉ាណែត តំណាងដ៏ខ្ពង់ខ្ពស់របស់សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ថ្លែងក្នុងពិធីបញ្ចុះខណ្ឌសីមា និងសម្ពោធសមិទ្ធផលនានាក្នុងវត្តជ្រោយអំពិល ស្ថិតនៅក្នុងសង្កាត់ក្បាលកោះ ខណ្ឌច្បារអំពៅ រាជធានីភ្នំពេញ (ភ្នំពេញ, ថ្ងៃទី២៧ ខែឧសភា ឆ្នាំ២០២៣ បានលើកឡើងថាសន្តិភាព បានកើតឡើងដោយលំបាក ប៉ុន្តែអាចនឹងរលាយបាត់ទៅវិញយ៉ាងផុយស្រួយក្នុងពេលដ៏ខ្លី ប្រសិនបើយើងធ្វេសប្រហែស។

១. សូមចូលរួមអនុមោទនាបុណ្យ និងអបអរសាទរចំពោះសមិទ្ធផលថ្មីបន្ថែមសម្រាប់វត្តជ្រោយអំពិល ដែលមានអាយុកាលជាង ២២០ ឆ្នាំ ដែលបានឆ្លងកាត់ជាច្រើនជំនាន់ទាំងក្នុងសម័យកាលសង្គ្រាមរាំងជលវឹកវរខ្លាំង, សម័យកាលរីកចម្រើនក្រោមព្រះរាជបូជនីយកិច្ចដឹកនាំរបស់អតីតព្រះមហាក្សត្រ ព្រះបរមរតនកោដ្ឋ, សម័យកាលជម្លោះបែកបាក់ផ្លាស់ប្តូរបបគ្រប់គ្រង ដែលបាននាំឈានទៅការកាប់សម្លាប់ប្រជាជនខ្មែរខ្លួនឯងយ៉ាងរង្គាលក្នុងរបបខ្មៅងងឹត ៣ ឆ្នាំ ៨ ខែ និង២០ ថ្ងៃ ដោយនៅពេលនោះទីអារាម បានរងនូវការបំផ្លិចបំផ្លាញ ហើយព្រះសង្ឃត្រូវបានចាប់ផ្សឹក និងសាសនាត្រូវបានលុបបំបាត់ទាំងស្រុង។ ឈានមកដល់សម័យតេជោសន្តិភាព, សមិទ្ធផលជាច្រើនត្រូវបានកសាងរីកចម្រើនឡើងវិញទាំងផ្នែកពុទ្ធចក្រអាណាចក្រ និងអាណាចក្រ។ គ្រប់សាសនាទាំងអស់ បានដើរតួនាទីដ៏មានសារៈសំខាន់ក្នុងសង្គម ពីព្រោះថាបើគ្មានសាសនាទេ គឺប្រទេសជាតិនឹងជួបទុក្ខលំបាក ដោយសារប្រជាពលរដ្ឋនឹងប្រព្រឹត្តអំពើខុសឆ្គង ដោយលែងខ្វល់អំពីបុណ្យបាប ហើយសង្គមទាំងមូលនឹងបាត់បង់សីលធម៌ និងគុណធម៌ ដែលជាគុណតម្លៃ និងសេចក្តីថ្លៃថ្នូរក្នុងការរស់នៅក្នុងភាពជាមនុស្ស។ គោលការណ៍គ្រឹះរបស់គ្រប់សាសនា គឺបង្រៀនមនុស្សឱ្យប្រព្រឹត្តអំពើល្អ គោរពគ្នា ស្រលាញ់គ្នា និងជួយគ្នាទៅវិញទៅមក។ ដូច្នេះហើយទើបរាជរដ្ឋាភិបាល បានទិសដៅលើកកម្ពស់ការគោរពបដិបត្តិសាសនា ដើម្បីពង្រឹងសីលធម៌សង្គម និងជំរុញការចូលរួមចំណែករបស់ប្រជាពលរដ្ឋក្នុងសកម្មភាពសង្គមផ្សេងៗ តាមរយៈវប្បធម៌ចែករំលក ដែលជាប្រពៃណីដ៏ពិសិដ្ឋរបស់ដូនតាខ្មែរតាំងពីបូរាណកាលមក។

២. គោលការណ៍នៃវប្បធម៌ចែករំលែក គឺសំដៅដល់ការណ៍ដែលអ្នកមានទ្រព្យចែករំលែកទ្រព្យ ហើយអ្នកមានចិត្តអាចផ្តល់ការគាំទ្រផ្នែកស្មារតី, កម្លាំងកាយ និងប្រាជ្ញា ជាមួយនឹងបេះដូងស្មោះត្រង់ និងចែករំលែកជួយគ្នាក្នុងគ្រប់កាលៈទេសៈ។ ឈរលើមូលដ្ឋាននេះ សមិទ្ធផលរបស់សង្គមជាតិបានចាប់ផ្តើមរីកដុះដាលឆាប់រហ័ស នៅក្រោយពេលដែលប្រទេសយើងបានទទួលសុខសន្តិភាពពេញលេញ នៅក្រោម គោលនយោបាយដឹកនាំប្រកបដោយធម៌របស់ សម្តេចតេជោ ដែលតែងផ្តោតជានិច្ចលើការកសាងអំពើជាកុសល ព្រមទាំងការអភិវឌ្ឍ ដើម្បីបង្កើតជាផលឱ្យសង្គមជាតិរុងរឿង និងប្រជាជនមានបាន។

៣. សមិទ្ធផលសន្តិភាព និងស្ថិរភាព ដូចដែលយើងកំពុងមានបច្ចុប្បន្ននេះ គឺជាពរជ័យ និងជាទ្រព្បសម្បត្តិដ៏មានតម្លៃមហាសាលសម្រាប់ជាតិ និងប្រជាជន ដែលយើងទាំងអស់គ្នាអាចមើលឃើញយ៉ាងជាក់ស្តែង ធៀបនឹងអតីតកាលដ៏សែនជូរចត់ខ្លោចផ្សាដែលជាតិខ្មែរយើងធ្លាប់បានហែលឆ្លងកាត់អស់រយៈកាលជាង ៥០០ ឆ្នាំកន្លងមក នៅមុនសម័យតេជោសន្តិភាពនេះ។ សន្តិភាព បានកើតឡើងដោយលំបាក ប៉ុន្តែអាចនឹងរលាយបាត់ទៅវិញយ៉ាងផុយស្រួយក្នុងពេលដ៏ខ្លី ប្រសិនបើយើងធ្វេសប្រហែស។ ដូច្នេះ សូមប្រជាពលរដ្ឋទាំងអស់បន្តរួបរួមក្នុងធ្លុងសាមគ្គី ដើម្បីបន្តថែរក្សាសន្តិភាព និងភាពសុខសាន្តសុខដុមរមនារបស់សង្គមជាតិយើងឱ្យបានគង់វង្សតរៀងទៅសម្រាប់កូនចៅជំនាន់ក្រោយ តាមរយៈការបន្តផ្តល់ទំនុកចិត្តចំពោះការដឹកនាំប្រកបដោយគតិបណ្ឌិតរបស់ សម្តេចតេជោ ដូចដែលយើងធ្លាប់ទទួលបានភាពកក់ក្តៅអស់រយៈកាលជាង ៤០ ឆ្នាំនេះ កន្លងមកហើយ៕ដោយនាគខៀវ

ក្រុមមន្ត្រីជំនាញជលផល និងអាជ្ញាធរស្រុកស្រីសន្ធរ បាននាំគ្នាចុះធ្វើការហ៊ុំព័ទ្ធកំណត់ដីបឹងរបស់រដ្ឋ ស្ថិតនៅចំណុចបឹងចារ ក្នុងឃុំព្រែករំដេង ស្រុកស្រីសន្ធរ។

ការចុះហ៊មព័ទ្ធនេះ បន្ទាប់ពី អភិបាលខេត្តកំពង់ចាម លោក អ៊ុន ចាន់ដា បានចាត់បញ្ជាឲ្យ លោក អ៊ុក ណារិន នាយខណ្ឌរដ្ឋបាលជលផលខេត្តកំពង់ចាម សហការជាមួយអាជ្ញាធរស្រុកស្រីសន្ធរ ចុះពិនិត្យស្រាវជ្រាវ និងចាត់វិធានការជាបន្ទាន់ លើជនល្មើស ដែលប្រព្រឹត្តឈូសឆាយប៉ះពាល់លើដីបឹង និងដីរបស់រដ្ឋ។

បើតាមអភិបាលរងស្រុកស្រីសន្ធរ លោក ប៊េត វ៉េងឃីម បានឱ្យដឹង នៅថ្ងៃ សៅរ៍នេះ ថា ករណី ការឈូសឆាយដីបឹងចារ បន្ទាប់ពីទទួលបានព័ត៌មាននេះ អាជ្ញាធរស្រុកស្រីសន្ធរបានបង្កើតគណៈកម្មការ ដឹកនាំដោយ លោក វៃ គឹមសែ អភិបាលរងស្រុកស្រីសន្ធរ សហការជាមួយមន្ត្រីខណ្ឌរដ្ឋបាលជលផលខេត្ត និងអាជ្ញាធរមូលដ្ឋាន ចុះចាត់វិធានការ ហ៊ុំព័ទ្ធដីចំណុចកើតហេតុ ទុកជាសម្បត្តិរបស់រដ្ឋ បន្ទាប់ពី ពិនិត្យឃើញថា មានការឈូសឆាយប៉ះពាល់លើដីបឹងរបស់រដ្ឋពិតមែន។ លោកបានបញ្ជាក់ផងដែរថា ករណីនេះ អាជ្ញាធរស្រុក មិនបានចាប់ឃាត់ខ្លួនជនណាម្នាក់នោះទេ។

លោក អ៊ុក ណារិន នាយខណ្ឌរដ្ឋបាលជលផលខេត្តកំពង់ចាម បានឲ្យដឹងដែរថា ក្នុងការចុះស្រាវជ្រាវ លោកបានពិនិត្យឃើញថា មានការឈូសឆាយប៉ះពាល់លើដីបឹងរបស់រដ្ឋប្រមាណជាជិត ១ហិកតា ដែលជាដែននេសាទរបស់រដ្ឋ។

លោក អ៊ុក ណារិន បានបន្តថា ដីនៅចំណុចក្បែរកន្លែងកើតហេតុ កន្លងមកក៏មានប្រជាពលរដ្ឋអាស្រ័យផលផងដែរ។ ប៉ុន្តែចំណុចឈូសឆាយ គឺគេបានយកគ្រឿងចក្រទៅឈូសបកដី ប្រមូលព្រៃលិចទឹកទាំងនោះ យកដាក់លើដីស្រែទុកសម្រាប់ធ្វើជី។

បើតាមលោក អ៊ុក ណារិន ប្រការដែលបុគ្គលបានយកគ្រឿងចក្រ ទៅឈូសឆាយដីព្រៃលិចទឹក ដោយគ្មានការអនុញ្ញាត ចំពោះផ្លូវច្បាប់ ចំណុចទី១ អាចពិន័យអន្តរការ នូវមាត្រា៩៦ ចំណុច៤ ជាប្រាក់ពី ៥ លានរៀល ទៅ ១០ លានរៀល និងចំណុចទី២ នូវ មាត្រា១០១ ចំណុច១ អាចមានទោសទណ្ឌពី ១ ខែ ទៅ ១ ឆ្នាំ និងពិន័យជាប្រាក់ពី ១លានរៀល ទៅ ៥ លានរៀល និងរឹបអូសវត្ថុតាងទុកជាសម្បត្តិរដ្ឋ។ លោកថា ក្នុងការចុះស្រាវជ្រាវ ជាច្រើនលើកនៅចំណុចកើតហេតុ សមត្ថកិច្ចមិនបានជួបគ្រឿងចក្រកំពុងធ្វើសកម្មភាពនោះទេ គឺឃើញត្រឹមតែស្លាកស្នាម នៃការឈូសឆាយប៉ុណ្ណោះ។

អភិបាលរងខេត្ត និងជាអ្នកនាំពាក្យ សាលាខេត្តកំពង់ចាម លោក ស្រី សុភ័ក្រ្ត បានឲ្យដឹងថា ជុំវិញករណីឈូសឆាយប៉ះពាល់ដីបឹង នៅស្រុកស្រីសន្ធរ បន្ទាប់ពីអាជ្ញាធរខេត្ត បានទទួលព័ត៌មាន តាមរយៈប្រជាពលរដ្ឋ នៅលើបណ្ដាញសង្គម គឺរដ្ឋបាលខេត្តបានចាត់ការភ្លាមៗផងដែរ។ ដោយចាត់តាំងមន្ត្រីជំនាញខាងជលផល សហការជាមួយអាជ្ញាធរដែនដី ចុះពិនិត្យជាក់ស្ដែង លើករណីនេះឃើញថា មានការឈូសឆាយប៉ះពាល់លើដីបឹងរបស់រដ្ឋពិតមែន។ ប៉ុន្តែភ្លាមៗនោះ ក្រុមការងារមិនអាចកំណត់មុខសញ្ញាបាន ដោយសារវាពុំមែនបទល្មើសជាក់ស្ដែង ពោលគឺឃើញត្រឹមតែស្នាមឈូសឆាយ មិនបានឃើញគ្រឿងចក្រនៅទីនោះទេ៕ដោយនាគខៀវ

ថ្លែងនៅមុខកងកម្លាំង អតីតយុទ្ធជន និវត្តជន ក្នុងស្រុកសំឡូត ខេត្តបាត់ដំបង នៅថ្ងៃសៅរ៍នេះ សម្ដេច ស ខេង បានគូសបញ្ជាក់អំពីការប្រជែងភូមិសាស្រ្តនយោបាយ និងវិបត្តិសង្គ្រាម ព្រមទាំងបញ្ជាក់អំពីស្ថានភាពផ្ទៃក្នុងប្រទេស ដែលក្រុមប្រឆាំងជ្រុលនិយមនៅតែបន្តប៉ុនប៉ងបំផ្លាញសន្តិភាព។

ប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង និងបាត់ដំបង សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងបន្តថា ក្រោមការដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន រាជរដ្ឋាភិបាល បានដាក់ចេញនូវគោលនយោបាយ និងវិធានការនានាដោយមានការគាំទ្រ និងការចូលរួមពី មន្ត្រីរាជការ កងកម្លាំង មានសមត្ថកិច្ច អាជ្ញាធរគ្រប់លំដាប់ថ្នាក់ និងប្រជាពល ក្នុងនោះរួមទាំងក្នុងស្រុកសំឡូតផងដែរ ដែលធ្វើឱ្យប្រទេសជាតិ អាចជម្នះបាននូវបញ្ហាប្រឈមនានាជាសាកល រួមទាំងជំងឺកូវីដ-១៩ ព្រមទាំងទប់ស្កាត់ បាននូវរាល់ឧបាយកល ទុច្ចរិតរបស់ក្រុមប្រឆាំងជ្រុលនិយម រក្សាបានសុខសន្តិភាព និងការអភិវឌ្ឍសេដ្ឋកិច្ចផងដែរ។

សម្ដេចបានមានប្រសាសន៍ថា សមិទ្ធផលនានា ដែលកើតចេញពីមូលដ្ឋាន នៃការខិតខំប្រឹងប្រែង ថែរក្សាសុខសន្តិភាព ក្នុងនោះមានដូចជាការបន្តអនុវត្តលទ្ធិប្រជាធិបតេយ្យ សេរីពហុបក្ស ពិសេសការរៀបចំការបោះឆ្នោត ជាទៀងទាត់ ការដាក់ចេញគោលនយោបាយ ពង្រឹងសេដ្ឋកិច្ចជាតិ ធានាការផ្ដល់សេវាសាធារណៈ និងការបន្តអនុវត្តគម្រោងអភិវឌ្ឍន៍ផ្សេងៗទៀត ក្នុងនោះក៏មានការអភិវឌ្ឍធនធានមនុស្ស ផ្លូវគមនាគមន៍ ទឹកស្អាត និងប្រព័ន្ធធារាស្ត្រ និងការតបណ្ដាញអគ្គិសនី។ សម្ដេចក៏បានគូសបញ្ជាក់អំពីស្នាដៃនៃការដឹកនាំកិច្ចប្រជុំអាស៊ាន និងការរៀបចំធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេមនៅឆ្នាំ២០២៣ ផងដែរ។

សម្ដេច ក៏បានស្នើសុំអង្គពិធីបន្តរួមគ្នាថែរក្សាការពារសុខសន្តិភាព ជាអាទិភាព ដើរទន្ទឹមគ្នានឹងការខិតខំថែរក្សាសន្តិសុខ សណ្ដាប់សាធារណៈ និងការបន្តការងារជាប្រក្រតីតាមតួនាទី និងភារកិច្ច។

សម្ដេចក៏បានស្នើឱ្យបន្តរួមគ្នាជំរុញគាំទ្រការអនុវត្តគោលនយោបាយភូមិ ឃុំ សង្កាត់ មានសុវត្ថិភាព ព្រមទាំងប្ដេជ្ញា ចិត្តរួមគ្នា ធ្វើឲ្យការបោះឆ្នោតជ្រើសតាំងតំណាងរាស្រ្តនីតិកាលទី៧ នាខែកក្កដា ឆ្នាំ២០២៣មខាងមុខនេះ ឱ្យប្រព្រឹត្តទៅដោយរលូន ដើម្បីរួមគ្នារក្សា ស្ថេរភាពជាតិ និងការអភិវឌ្ឍតាមគន្លងប្រជាធិបតេយ្យ។

សម្តេចស ខេង ក៏បានថ្លែងអំណរគុណ កោតសសើរ និងវាយតម្លៃខ្ពស់ ចំពោះមន្ត្រីរាជការ កងកម្លាំងមានសមត្ថកិច្ច និងអាជ្ញាធរគ្រប់លំដាប់ថ្នាក់ក្នុងស្រុកសំឡូត ដែលជាអតីតទឹកដី សមរភូមិសង្គ្រាមចុងក្រោយមួយ សម្រាប់ការខិតខំបំពេញការងារតាមតួនាទីភារកិច្ចរៀងៗខ្លួន ប្រកបដោយស្មារតីទទួលខុសត្រូវខ្ពស់សម្រេច បានសមិទ្ធផលនានាជាច្រើន និងបានថ្លែងបង្ហាញការដឹងគុណ និងអរគុណយ៉ាងជ្រាលជ្រៅ ចំពោះ អតីតយុទ្ធជន និងនិវត្តជនទាំងអស់ ក្នុងស្រុកដែលតស៊ូលះបង់ ធ្វើពលិកម្មយ៉ាងលំបាកចូលរួមនាំមកនូវ សន្តិភាព ស្ថិរភាព សន្តិសុខសណ្តាប់ធ្នាប់ សាធារណៈ និងវឌ្ឍនភាពសង្គម៕ដោយនាគខៀវ