ខេត្តសៀមរាប៖នៅទីបំផុត ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ លោកស សុខា សម្រេចដកតំណែង ប្រធានអង្គភាពនគរបាលទេសចរណ៍ខេត្តសៀមរាប ឲ្យទៅជាមន្ត្រី ព្រមទាំងអ្នកប្តឹង និងអ្នករងបណ្តឹងសរុប៦រូបផងដែរ។

សេចក្ដីសម្រេចចុះហត្ថលេខា លោកស សុខា រដ្ឋមន្ដ្រីក្រសួងមហាផ្ទៃ ត្រូវបានបង្គាប់ការលោកវរសេនីយ៍ត្រី ចៅ ពិសិដ្ឋ អត្តលេខ៥៤០៧៧ ឋានៈអនុប្រធានអង្គភាព នគរបាលទេសចរណ៍ប្រចាំខេត្តសៀមរាប ឱ្យទទួលដឹកនាំជាប្រធានអង្គភាពនគរបាលទេសចរណ៍ ប្រចាំខេត្តសៀមរាប ស្ដីទី ជំនួសលោកវរសេនីយ៍ទោ ទី សុខឡែន អត្តលេខ៦៨៤៣៦ ដែលត្រូវផ្ទេរ ភារកិច្ចទៅបម្រើការងារនៅនាយកដ្ឋានកណ្ដាលសណ្ដាប់ធ្នាប់សាធារណៈ។

បើតាមសេចក្ដីសម្រេច ការដកបែបនេះបណ្តាលមកពីមូលហេតុ ល្មើសវិន័យរបស់កងកម្លាំងនគរបាលជាតិ៕

ខេត្តសៀមរាប៖លោកង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប ត្រូវបានសម្ដេចហ៊ុន ម៉ាណែត សម្រេចតែងតាំងជាអភិបាលរងខេត្តសៀមរាប។ ក្នុងនោះក៏មានការតែងតាំង លោក សំកុល សុចិត្រា អនុប្រធានសហភាពសហព័ន្ធយុវជនកម្ពុជាខេត្តសៀមរាប ជាអភិបាលរងខេត្តសៀមរាបផងដែរ។

នៅក្នុងចំណាររបស់សម្ដេចហ៊ុន ម៉ាណែត ក៏បានសម្រេចផ្ទេរភារកិច្ចលោកស្រី យូ សុភា ពីអភិបាលរងខេត្តសៀមរាប ឲ្យទៅបំពេញការងារនៅទីស្រីការក្រសួងមហាផ្ទៃផងដែរ៕

គណបក្សប្រជាជនកម្ពុជា ប្រកាសគាំទ្រយ៉ាងពេញទំហឹងចំពោះពាក្យបណ្តឹងរបស់មេធាវីតំណាងគណបក្សប្រជាជនកម្ពុជា ដែលបានដាក់ពាក្យប្តឹងឈ្មោះ ស៊ឹង សែនករុណា

ពីបទប្រព្រឹត្តអំពើទុច្ចរិតនិយាយបំផ្លើស និងមូលបង្កាច់ក្នុងចេតនា ទំលាក់កំហុសមកលើគណបក្សប្រជាជនកម្ពុជា នាំឲ្យប៉ះពាល់យ៉ាងធ្ងន់ធ្ងរដល់កិត្តិយស និងសេចក្តីថ្លៃថ្នូររបស់គណបក្សប្រជាជនកម្ពុជា និងមានចេតនាទុច្ចរិតធ្វើឲ្យប៉ះពាល់ដល់ដំណើរការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ ដែលនឹងប្រព្រឹត្តទៅចុងខែកុម្ភៈ ឆ្នាំ២០២៤ ខាងមុខនេះ។

សេចក្តីថ្លែងការណ៍ របស់គណបក្សប្រជាជនកម្ពុជា នៅថ្ងៃទី 6 ខែកុម្ភៈឆ្នាំ 2004 នេះ៕

ភ្នំពេញ៖របាយការណ៍ក្រុមប្រឹក្សាអភិវឌ្ឍន៍កម្ពុជា បានបង្ហាញថា ខែមករា ឆ្នាំ២០២៤នេះ កម្ពុជា ទទួលបានគម្រោងវិនិយោគបន្ថែមរហូតដល់ទៅ៣២គម្រោង។

លោកឧបនាយករដ្ឋមន្ត្រី ស៊ុន ចាន់ថុល អនុប្រធាន ទី១ ក្រុមប្រឹក្សាអភិវឌ្ឍន៍កម្ពុជា បានចាត់ទុកគម្រោងវិនិយោគទាំងនេះ បង្ហាញឱ្យឃើញពីទំនុកចិត្តរបស់ អ្នកវិនិយោគ លើការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

របាយការណ៍របស់ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី១ ខែកុម្ភៈ ឆ្នាំ២០២៤កន្លងទៅនេះ បានឱ្យដឹងថា ក្នុងខែមករា ឆ្នាំ២០២៤នេះ មានគម្រោងវិនិយោគរហូតដល់ទៅ៣២គម្រោង ត្រូវបានអនុញ្ញាតឱ្យធ្វើសកម្មភាព។

របាយការណ៍បានឱ្យដឹងថា គម្រោងទាំង៣២នេះ មានទុនវិនិយោគសរុបជាង ១៨៧លាន ដុល្លារអាម៉េរិក និងអាចបង្កើតការងារបានជិត ២៩ពាន់កន្លែង។ គម្រោងវិនិយោគដែលមានភាពលេចធ្លោជាងគេប្រចាំខែរួមមាន៖ ១) គម្រោងបង្កើតរោងចក្រផលិត គ្រឿងអេឡិចត្រូនិកនៅស្រុកសំរោង ខេត្តតាកែវ, ២) គម្រោងបង្កើតរោងចក្រផ្ដុំដំឡើងម៉ូតូ, កង់, រ៉ឺម៉ក (អគ្គិសនី) និងឧបករណ៍បញ្ចូល ឬសាកថ្ម នៅស្រុកកៀនស្វាយ ខេត្តកណ្តាល, ៣) គម្រោងបង្កើតរោងចក្រកែច្នៃអាលុយមីញ៉ូម, ដែក, និងទង់ដែង នៅស្រុកគងពិសី ខេត្តកំពង់ស្ពឺ និង ៤) គម្រោងបង្កើតរោងចក្រតម្បាញក្រណាត់ និងកាត់ដេរសម្លៀកបំពាក់នៅស្រុកកំពង់សីលា ខេត្តព្រះសីហនុ។ របាយការណ៍បានឱ្យដឹងផងដែរថា ទុនវិនិយោគជាង ៧៨ភាគរយ មានប្រភពមកពីប្រទេសចិន, ៩.៦៥ ភាគ រយ មកពីប្រទេសសិង្ហបុរី, ៥.៣៤ភាគរយមកពីសហរដ្ឋអាម៉េរិក, ៣.៥៥ភាគរយ មកពីសាធារណរដ្ឋកូរ៉, និង ២.៧៣ភាគរយ ប្រភពក្នុងស្រុក។

លោកស៊ុន ចាន់ថុល បានមានប្រសាសន៍ថា ការទទួលបាន ប្រាក់ចំណេញ និង ការធានាបាននិរន្តរភាពនៃច្រវ៉ាក់ផលិតកម្ម គឺជាលក្ខខណ្ឌដ៏ចម្បងបំផុតសម្រាប់អ្នកជំនួញគ្រប់រូប។ ដូច្នេះ មុនឈានដល់ការដាក់ទុនវិនិយោគនៅប្រទេសណាមួយ អ្នកវិនិយោគត្រូវសិក្សាយ៉ាងល្អិតល្អន់បំផុតលើ លទ្ធភាព ទទួលបានផលចំណេញ ជាពិសេសកត្តាសុខសន្តិភាព និងស្ថេរភាពសង្គមនៅក្នុងប្រទេស គោលដៅវិនិយោគ ដើម្បីធានានិរន្តរភាពនៃការវិនិយោគ។

ក្រោមហេតុផលខ្លីខាងលើ លោក ស៊ុន ចាន់ថុល បានអះអាងថា ការសម្រេចចិត្ត ដាក់ទុនវិនិយោគនៅកម្ពុជានាពេលនេះ គឺបានបង្ហាញច្បាស់ឱ្យឃើញនូវទំនុកចិត្តរបស់អ្នកវិនិយោគលើការដឹក នាំរបស់សម្តេចធិបតី ហ៊ុន ម៉ាណែត ក្នុងការធានាបាននូវសុខសន្តិភាព និងស្ថេរភាពសង្គមកម្ពុជា ដើម្បីធ្វើឱ្យច្រវ៉ាក់ផលិតកម្មរោងចក្ររបស់ពួកគេអាចដំណើរការដោយរលូត និងគ្មានឧបសគ្គ។ បន្ថែមពីលើនេះ អ្នកវិនិយោគមានជំនឿចិត្តលើការដឹកនាំរបស់សម្តេចធិបតី ហ៊ុន ម៉ាណែត ក្នុងការធ្វើឱ្យការវិនិយោគរបស់ពួកគេទទួលបានផ្លែផ្កាតាមរយៈគោលនយោបាយវិនិយោគប្រកបដោយភាពបត់បែន លើកទឹកចិត្តខ្ពស់ និងអនុគ្រោះខ្ពស់។ លោកស៊ុន ចាន់ ថុល ក៏បានចាត់ទុកគម្រោងវិនិយោគទាំងនេះ ជាផ្លែផ្កាកើតចេញនយោបាយការទូត សេដ្ឋកិច្ច និងការប្រឹងប្រែងរបស់សម្តេចធិបតី ហ៊ុន ម៉ាណែត ក្នុងរយៈពេលជាង៥ខែកន្លងទៅ។

លោកបានរំលឹកថា ក្នុងឋានៈជាប្រមុខរាជរដ្ឋាភិបាល និងជាប្រធានក្រុមប្រឹក្សាអភិវឌ្ឍន៍កម្ពុជា សម្តេចធិបតី ហ៊ុន ម៉ាណែត បានខិតខំ និងប្រឹងប្រែងយ៉ាងខ្លាំងក្នុងការកៀរគរ និងបញ្ចុះ បញ្ចូល អ្នក វិនិយោគបរទេសឱ្យចូលមកវិនិយោគនៅកម្ពុជា។ ក្នុងនោះរាល់ដំណើរទស្សនកិច្ចក្រៅប្រទេស សម្តេចធិបតី មិនដែលរំលងឡើយកម្មវិធីធុរកិច្ច និងជំនួបជាមួយអ្នកវិនិយោគ។ លោកមានសុទិដ្ឋិនិយមថា នៅក្នុងខែបន្តបន្ទាប់ទៀត កម្ពុជា នឹងទទួល បាន គម្រោងវិនិយោគពីបរទេសបន្តបន្ទាប់ទៀត ដែលនឹងរួមចំណែកជំរុញកំណើនសេដ្ឋកិច្ចជាតិ និងផ្តល់ ការងារជូនប្រជាពលរដ្ឋកាន់តែច្រើន៕

ភ្នំពេញ៖នៅទីបំផុត មេធាវីតំណាងគណបក្សប្រជាជនកម្ពុជា បានដាក់ពាក្យបណ្តឹងប្តឹងលោក ស៊ឹង សែនករុណា មន្ត្រីអ្នកនាំពាក្យសមាគមអាដហុក ទៅសាលាដំបូងរាជធានីភ្នំពេញ នឹងស្នើសុំឲ្យសម្រេចចោទប្រកាន់នឹងផ្តន្ទាទោសលើ លោក ស៊ឹង សែនករុណា និងទាមទារឲ្យសងសំណងជំងឺចិត្តជូនគណបក្សប្រជាជនកម្ពុជា ២ពាន់លានរៀល។

ការសម្រេចប្តឹងនេះ នៅថ្ងៃទី៥ ខែកុម្ភៈ ឆ្នាំ២០២៤៕

ខេត្តកំពង់ចាម៖ខេត្តកំពង់ចាមនឹមានទីលានចាក់សំរាមស្តង់ដារទំនើប នឹងលេចរូបរាងឡើងនៅលើទឹកដីស្រុកកំពង់សៀម។

លោកអ៊ុន ចាន់ដា អភិបាលខេត្តកំពង់ចាម នៅរសៀលថ្ងៃទី៥ ខែកុម្ភៈ ឆ្នាំ២០២៤ បានដឹកនាំ ក្រុមការងារ និងមន្ត្រីបច្ចេកទេស អញ្ជើញចុះពិនិត្យដោយផ្ទាល់នូវដំណើរការ ការដ្ឋានការសាងសង់ទីលានចាក់សំរាមថ្មីមួយ ប្រកបដោយស្តង់ដារទំនើប ដែលមានទីតាំងស្ថិតនៅចំណុចភូមិកោះរកាក្នុង ឃុំកោះរកា ស្រុកកំពង់សៀម ខេត្តកំពង់ចាម។

គួរបញ្ជាក់ថា គម្រោងសាងសង់ទីលានចាក់សំរាមថ្មីនេះ បាននឹងកំពុងដំណើរការ លើផ្ទៃដី ទំហំ ៨.១៣ ហិកតា ក្នុងនោះ ទីលានទុកដាក់សំរាមទំហំ ១.៣ ហិកតា អាងប្រព្រឹត្តិកម្មទឹកកខ្វក់ ចំនួន ៤អាង សាងសង់ផ្លូវចូលទីលានចាក់សំរាម ១ខ្សែប្រវែង ជាង ២,០០០ម៉ែត្រ និងសាងសង់ផ្លូវបេតុងនៅក្នុងទីលាន ជាង ១,០០០ម៉ែត្រ សាងសង់ច្រកចូល និងរបងមានអាគារការិយាល័យ និងអគារស្នាក់នៅកម្ពស់ ២ជាន់ កន្លែងថ្លឹងរថយន្ត អាគារសម្រាប់ញែកសំរាម អាគាររោងជាង អាគារស្តុកទុកកាកសំណល់ដែលគ្រោះថ្នាក់បណ្ដោះអាសន្ន អាគារផ្គត់ផ្គង់ថាមពលអគ្គិសនី និងទឹក កន្លែងលាងសម្អាតរថយន្ត អាគារសម្រាប់ធ្វើជាកំប៉ុស រណ្ដៅទុកដាក់សំរាមសំណល់គ្រោះថ្នាក់ និងដាក់ប្រព័ន្ធសូឡាថាមពលអគ្គិសនីព្រះអាទិត្យផងដែរ។

គម្រោងនេះ ទទួលការសាងសង់ដោយក្រុមហ៊ុន ប៊ីអេម. ខនស្ត្រាក់ហ្សិន និងធេឡិចទ្រិច ខូអិលធីឌី គម្រោងនេះត្រូវប្រើរយៈពេលសាងសង់ ១៧ខែ ដោយចាប់ដំណើរការសាងសង់នៅថ្ងៃទី៥ ខែមករា ឆ្នាំ២០២៤ និងបញ្ចប់ការសាងសង់ នៅថ្ងៃទី២៨ ខែឧសភា ឆ្នាំ២០២៥៕

ខេត្តកំពង់ចាម៖លោកហ៊ុន ម៉ានិត អគ្គនាយក នៃអគ្គនាយកដ្ឋានចារកិច្ច និងជាប្រធានក្រុមការងារគណបក្សចុះមូលដ្ឋានស្រុកចំការលើ ខេត្តកំពង់ចាម បានថ្លែងប្រាប់អាជ្ញាធរសមត្ថកិច្ចខេត្តកំពង់ចាម គ្រប់ជាន់ថ្នាក់ បងប្អូនពូមីង អ៊ំ ប្រជាពលរដ្ឋទាំងអស់ ចូលរួមទាំងអស់គ្នា ពង្រឹងគោលនយោបាយ ភូមិ.ឃុំ មានសុវត្ថិភាព លុបបំបាត់ល្បែងស៊ីសង រួមគ្នាទប់ស្កាត់បទល្មើសផ្សេងៗ ដែលអាចបង្កអស្ថិរភាពក្នុងមូលដ្ឋាន។ ជាពិសេស សូមរួមគ្នាថែក្សាការពារ សមិទ្ធផល ដែលកើតមាន ថែរក្សាសុខសន្តិភាពឱ្យស្ថិតស្ថេរតរៀងទៅ។

លោកហ៊ុន ម៉ានិត ថ្លែងណែនាំបែបនេះ ក្នុងឱកាស បានអញ្ជើញចូលរួមក្នុងពិធីបុណ្យកាន់អង្គ ឆ្លងឧបដ្ឋានសាលា និងពុទ្ធាភិសេក នៅវត្តអម្ពវនារាម (តាអុង) ស្ថិតនៅភូមិតាអុង ឃុំតាអង ស្រុកចំការលើ ខេត្តកំពង់ចាម នៅថ្ងៃទី៤ ខែកុម្ភ: ឆ្នាំ២០២៤។

លោកហ៊ុន ម៉ានិត បានថ្លែងបន្តថា កត្តាសុខសន្តិភាព បានរុញនាវាកម្ពុជា ឆ្ពោះទៅរកការអភិវឌ្ឍលើគ្រប់វិស័យ ទាំងពុទ្ធចក្រ និងអាណាចក្រ មានសុខដុមរមនាខាងសាសនា។ ក្រោមការដឹកនាំរបស់រាជរដ្ឋាភិបាល ដោយមានការគាំទ្រពីប្រជាជន កម្ពុជា សម្រេចបាននូវសមិទ្ធផល ជាបន្តបន្ទាប់ ដើម្បីលើកស្ទួយជីវភាពប្រជាជន ឱ្យកាន់តែប្រសើរឡើង។

លោកបន្តថា សមិទ្ធផល ដែលកើតចេញជារូបរាងនៅពេលនេះ គឺកើតឡើងពីការចូលរួមចំណែក ឧបត្ថម្ភគាំទ្រ ពីថ្នាក់ដឹកនាំគ្រប់ជាន់ថ្នាក់ គណៈកម្មការវត្តគ្រប់ជំនាន់ ពុទ្ធបរិស័ទ និងសប្បុរសជនជិតឆ្ងាយទាំងអស់។ នេះជាវប្បធម៌នៃការចែករំលែក បម្រើប្រយោជន៍សាធារណៈ។

លោកបានបញ្ជាក់ថា វត្តតាអុង បានចាប់ផ្តើមកសាងដំបូងចាប់តាំងពីឆ្នាំ១៩៥៣ ហើយមកដល់ពេលនេះមានអាយុកាល ៧១ ឆ្នាំ។ កាលពីជំនាន់ប៉ុលពត វត្តនេះត្រូវបានបោះបង់ចោល គ្មានការគោរពបូជាសាសនាឡើយ៕

ខេត្តកំពង់ចាម៖រយ:ពេលប៉ុន្មានថ្ងៃកន្លងនេះមានការបែកធ្លាយអំពើពុករលួយ លោក នង ម៉េងហ៊ាង ប្រធានពេទ្យ សត្វខេត្តកំពង់ចាម។

ការបែកធ្លាយការប្រព្រឹត្ត អំពើពុករលួយ ពីសំណាក់ លោក នង ម៉េងហ៊ាងត្រូវបានបណ្ដាញសង្គមនិងសារព័ត៌មាន ក្នុងស្រុកមួយចំនួន បានធ្វើការផ្សព្វផ្សាយលាតត្រដាងជាសាធារណៈ។

ប្រភពបានបង្ហើបថា លោក នង ម៉េងហ៊ាង ប្រធានពេទ្យ សត្វខេត្តកំពង់ចាម បានទទួលយកលុយកញ្ចប់ពីម្ចាស់សត្តឃាត ក្នុងមួយស្រុកចំនួន ជាច្រើន។ ករណីនេះថ្នាក់ដឹកនាំក្រសួងកសិកម្ម រុក្ខាប្រមាញ់និងនេសាទ និងអង្គភាពប្រឆាំងអំពើពុករលួយ គួរតែបើកការស៊ើបអង្កេត និងមានវិធានការ។

ប្រភពបានបង្ហើបបន្តថា រឿងអាស្រូវពុករលួយ របស់លោក នង ម៉េងហ៊ាង ប្រធានពេទ្យ សត្វខេត្តកំពង់ចាម ត្រូវបានបែកធ្លាយជាបន្តបន្ទាប់ ដូចជា៖ ការប្រមូលពន្ឋអារក ពិឃាតសត្វ នៅទីសត្តឃាត តាមបណ្តាស្រុករាប់រយលានរៀល ប៉ុន្តែការបង់ចូលថវិការចូលរដ្ឋបានចំនួនតិចតួចតែប៉ុណ្ណោះ។

ឧទាហរណ៍ គ្រាន់តែស្រុកស្រីសន្ឋរ ឯកសារទទួលបានគឺប្រាក់ចំណូលជាង 64 លានរៀល ចុះ10ក្រុងស្រុក នៃខេត្តកំពង់ចាម តើប្រាក់ចំណូលបានប៉ុន្មាន លានរៀល តែត្រូវបង់ចូលថវិការខេត្ត មិនដល់ ១០០លានរៀលផង។

ជុំវិញការបែកធ្លាយនូវការប្រព្រឹត្ត អំពើពុករលួយ ពីសំណាក់ លោក នង ម៉េងហ៊ាង ប្រធានពេទ្យសត្វខេត្តកំពង់ចាម អង្គភាពសារព័ត៌មានសៀមរាប ប៉ុស្តិ៍ នៅមិនទាន់ទទួលបានការបំភ្លឺ ពីលោក នង ម៉េងហ៊ាង ប្រធានពេទ្យសត្វខេត្តកំពង់ចាម នៅឡើយទេរហូតដល់ម៉ោងផ្សាយនេះ។

ទោះជាយ៉ាងណា មជ្ឈដ្ឋាននៅក្នុងស្រុកនានា ក្នុងខេត្តកំពង់ចាម កំពុងមើលចំណាត់ការរបស់អភិបាលខេត្តកំពង់ចាម ក៏ដូចជារដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ក៏ដូចជាអង្គភាពប្រឆាំងអំពើពុករលួយ មានវិធានការ លើ លោក នង ម៉េងហ៊ាង ប្រធានពេទ្យសត្វខេត្តកំពង់ចាម៕

ប្រធានគណបក្សប្រជាជនកម្ពុជា សម្ដេចតេជោហ៊ុន សែន បានប្រកាសមិនយោគយល់ឲ្យក្រុមប្រឆាំងតទៅទៀតនោះទេ ដែលបានប្រមាថគណបក្សប្រជាជនកម្ពុជា។

តាមរយៈទំព័រហ្វេសប៊ុកផ្លូវការរបស់សម្ដេចហ៊ុន សែន
បានសរសេរថា៖ គ្មានការយោគយល់ណា សម្រាប់ផ្តល់ឱ្យពួកអ្នកទៀតទេ ព្រោះនៅពេលអ្នក វាយប្រហារ មកលើ គណបក្សប្រជាជន ឬមកលើខ្ញុំតើពួកអ្នក មានបានយោគយល់ ដល់យើងដែរឬទេ?។ ក្នុងការចុះផ្សាយក៏មានការនិយាយដោយសឹង សែនករុណា។ ខ្ញុំសូមឱ្យមេធាវី គណបក្សសិក្សាផ្លូវច្បាប់ដើម្បីប្តឹងមនុស្សម្នាក់នេះទៀតប្រសិនមានមូលដ្ឋានគ្រប់គ្រាន់ខាងផ្លូវច្បាប់។

តាមសំណេរ សម្ដេច បានបញ្ជាក់ថា យើងសូមបញ្ជាក់ថា គណបក្សប្រជាជនកម្ពុជា មិនផ្តល់ឱកាសសម្រាប់មនុស្សណា ក៏ដោយប្រមាថមើលងាយងាយ គណបក្ស
តទៅទៀតទេ យើងត្រូវរកយុត្តិធម៌ សម្រាប់ខ្លួនយើងតាមផ្លូវតុលាការ។ (សិទ្ធរបស់អ្នកមានព្រំដែនជាមួយសិទ្ធរបស់ខ្ញុំ)៕

ភ្នំពេញ៖នាយករដ្ឋមន្ត្រីខ្មែរសម្តេចធិបតី ហ៊ុន ម៉ាណែត នឹងអញ្ជើញបំពេញទស្សនកិច្ចផ្លូវការ នៅព្រះរាជាណាចក្រថៃ នៅថ្ងៃទី០៧ ខែកុម្ភៈ ឆ្នាំ២០២៤។

នេះបើតាមសេចក្ដីប្រកាសរបស់ក្រសួងការបរទេសនិងសហប្រតិបត្តិការអន្តរជាតិកម្ពុជា៕