ម៉ែរ៉ួយ អគ្គនាយកក្រុមហ៊ុន រួយ អ៊ីនហ្វីនីធី បានរៀបចំកម្មវិធីរៃអង្គាសដោយសហការជាមួយមន្ទីរពេទ្យកុមារអង្គរខេត្តសៀមរាប។ កិច្ចសហការណ៍រៀបចំកម្មវិធីរៃអង្គាសថវិកានេះ បានចាត់ចែងឡើងដោយមានការស្នើសុំពីមន្ទីរពេទ្យកុមារអង្គរ ដោយហេតុថាមន្ទីរពេទ្យកុមារអង្គរកំពុងតែមានការប្រឈមមុខខ្វះខាតថវិកាដើម្បីដំណើរការ ពិនិត្យព្យាបាលកុមារ ប្រកបដោយគុណភាព ក្តីមេត្តាករុណា និងឥតគិតថ្លៃ ក្នុងឆ្នាំ២០២០ ដោយសារតែវិបត្តិនៃការរីករាលដាលជំងឺកូវីដ-១៩។ ជាមួយនឹងទឹកចិត្តដ៏សប្បុរស និងចំណូលចិត្តកិច្ចការមនុស្សធម៌ពីសំណាក់ម៉ែរួយ កម្មវិធីរៃអង្គាសក៏បានចាប់ផ្តើម ដោយការបរិច្ចាគធ្វើឡើងដំបូងតាមរយៈ ការឡាយផ្ទាល់អំពាវនាវនៅលើគេហទំព័រហ្វេសប៊ុក MaeRouy Queen of Univers ដែលបានធ្វើឡើងនៅថ្ងៃទី១៣ ខែមិថុនា ឆ្នាំ២០២០ កន្លងទៅនេះ។

តាមរយៈទេព្យកោសល្យដ៏ប៉ិនប្រសប់របស់ ម៉ែរួយ ធ្វើឲ្យសន្ទុះនៃការការបរិច្ចាគរបស់សប្បុរសជនដែលជាតំណាងចែកចាយរបស់ ក្រុមហ៊ុន រួយ អ៊ីនហ្វីនីធី និង អ្នកគាំទ្ររបស់គាត់មកពីគ្រប់ខេត្តក្រុង កើនឡើងលើសពីការរំពឹងទុក ដោយទទួលបានថវិកាបរិច្ចាគតាមរយៈកម្មវិធីរៃអង្គាសផ្ទាល់មានចំនួន ៣០,០០០ដុល្លារ ថវិកាផ្ទាល់ខ្លួនរបស់ម៉ែរួយ ចំនួន១២,០០០ដុល្លារ ដែលថវិកាសរុបចំនួន ៤២ ០០០ ដុល្លារ ត្រូវបានប្រគល់ជូនដល់មន្ទីរពេទ្យកុមារអង្គរ នៅច័ន្ទថ្ងៃទី២៩ មិថុនា ២០២០ព្រឹកមិញនេះ ក្រោមការដឹកនាំរបស់ម៉ែរួយផ្ទាល់ និងសហការី ព្រមទាំងតំណាងចែកចាយក្រុមហ៊ុនរួយអ៊ីនហ្វីនីធីជាច្រើនរូបផងដែរ។

នៅក្នុងពិធីប្រគល់-ទទួលថវិកានាព្រឹកមិញដែរក៏មានការចួលរួមស្វាគមន៍យ៉ាងកក់ក្តៅជាទីបំផុតពីសំណាក់ថ្នាក់ដឹកនាំរបស់មន្ទីរពេទ្យកុមារអង្គរ ដែលដឹកនាំដោយលោកវេជ្ជបណ្ឌិត ងួន ច័ន្ទភក្រ្តា នាយកមន្ទីរពេទ្យ និង នាយករង និងបុគ្គលិកមន្ទីរពេទ្យធ្វើឲ្យពិធីកើតឡើងយ៉ាងអធិកអធម។ នាក្នុងឱកាសនោះដែរ ម៉ែរួយ ក៏បានសន្យាថានឹងបន្តជួយគាំទ្រដល់​ការងារមនុស្សធម៌ជាមួយនឹងមន្ទីរពេទ្យកុមារអង្គរទៅឆ្នាំក្រោយៗទៀត និងអំពាវនាវឲ្យតំណាងចែកចាយ ព្រមទាំងសាធារណៈជនទូទាំងប្រទេសកម្ពុជាចូលរួមជ្រោមជ្រែងជួយដល់មន្ទីរពេទ្យកុមារអង្គរឲ្យបានច្រើនថែមទៀត។ ការប្តេជ្ញាចិត្តរបស់ ម៉ែរួយ សបញ្ជាក់ឲ្យឃើញពីទឹកចិត្ត និងវប្បធម៌ចែករំលែកខ្មែរជួយខ្មែរ ក្នុងគ្រាលំបាកពិតៗ ព្រមទាំងជាការចូលរួមចំណែកក្នុងការលើកស្ទួយវិស័យសុខាភិបាលកម្ពុជាជាពិសេស ការថែទាំសុខភាពកុមារកម្ពុជាប្រកបដោយគុណភាពខ្ពស់ និងក្តីមេត្តាករុណា។

អំពីមន្ទីរពេទ្យកុមារអង្គរ

មន្ទីរពេទ្យកុមារអង្គរគឺជាអង្គភាពមិនស្វែងរកប្រាក់ចំណេញ ដែលមានបេសកកម្មលើកកម្ពស់សុខុមាលភាពកុមារកម្ពុជាគ្រប់រូប។ មន្ទីរពេទ្យកុមារអង្គរបានផ្តល់នូវការយកចិត្តទុកដាក់ក្នុងការពិនិត្យព្យាបាល និងថែទាំសុខភាពដល់កុមារកម្ពុជា ប្រកបដោយក្តីមេត្តាករុណា អស់រយៈពេលជាង២០ឆ្នាំ ចាប់តាំងពីឆ្នាំ ១៩៩៩។ បច្ចុប្បន្ន នេះ មន្ទីរពេទ្យកុមារអង្គរបានក្លាយខ្លួនទៅជាមជ្ឈមណ្ឌលមួយ ផ្តល់ជូននូវសេវាកម្មផ្នែកសុខភាពប្រកបដោយគុណភាពខ្ពស់ និងជំនាញឯកទេសវិជ្ជាជីវៈដល់កុមារនៅក្នុងប្រទេសកម្ពុជា អមដោយការប្តេជ្ញាចិត្តក្នុងការបណ្តុះបណ្តាលវេជ្ជសាស្ត្របន្តពង្រីកការអភិវឌ្ឍសមត្ថភាពចំណេះដឹងទៅខាងក្រៅមន្ទីរពេទ្យ ព្រមទាំងដើរតួនាទីជាអង្គភាពគំរូដែលមានភិបាលកិច្ចគណនេយ្យភាពល្អប្រសើរ។​ តាមរយៈទិន្នន័យនៃការស្រាវជ្រាវ និងគោលនយោបាយបានបង្ហាញឲ្យឃើញថា មន្ទីរពេទ្យកុមារអង្គរកំពុងតែជួយសង្គ្រោះជីវិតកុមារកាន់តែទូលំទូលាយ តាមរយៈការពង្រឹងប្រព័ន្ធថែទាំសុខភាព និងធ្វើឲ្យប្រសើរឡើងនូវសុខុមាលភាពកុមារក្នុងតំបន់ និងអន្តរជាតិ៕SRP

ខេត្តកំពង់ចាម៖ ក្នុង ឱកាស នាំយកទៀនចំណាំព្រះវស្សា និងគ្រឿងបរិក្ខា វេរប្រគេនព្រះសង្ឃ ចំនួន ០៤វត្ត ក្នុងក្រុងកំពង់ចាម ដែលបានរៀបចំឡេីងនៅវត្តខេមវន្តបឹងស្នាយ ស្ថិតក្នុង សង្កាត់សំបួរមាស ក្រុងកំពង់ចាម នៅព្រឹកថ្ងៃទី២៨ខែមិថុនាម្សិលមិញ លោក អ៊ុន ចាន់ដា អភិបាលខេត្តកំពង់ចាម បានថ្លែងប្រាប់ដល់ប្រជាពលរដ្ឋ ឲ្យបន្តការប្រុងប្រយ័ត្ន និង ត្រូវ យកចិត្តទុកដាក់ថែទាំសុខភាព ឲ្យបានខ្ជាប់ខ្ជួន ទៅតាមសារអប់រំនានា របស់ក្រសួងសុខាភិបាល ដើម្បី បង្ការ ទប់ស្កាត់ ការ ឆ្លង រីករាល ដាល នៃជំងឺឆ្លងកូវីដ១៩ ខណៈដែលពិភពលោកមិនទាន់រកឃើញវ៉ាក់សាំងការពារនៅឡើយ។

ដូច្នេះ ដើម្បី ចៀសផុតពីជំងឺកូវីដ១៩ យើងទាំងអស់គ្នា ត្រូវតែចូលរួម ក្នុងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងជំងឺឆ្លងសាកលនេះ។

លោក អភិបាលខេត្ត លើកឡើងថា រាជរដ្ឋាភិបាលកម្ពុជា បានមានវិធានការ ត្រួតពិនិត្យនៅតាមព្រំដែន ចំពោះ អ្នកដំណើរដែលបានឆ្លងកាត់ តាមរយៈ ការត្រួតពិនិត្យសុខភាព និងការដាក់នៅ ដាច់ ដោយឡែក ជាពិសេស ប្រសិនបើរកឃើញអ្នកផ្ទុកជំងឺកូវីដ១៩ ត្រូវបញ្ជូនទៅព្យាបាលភ្លាម។

សូមបញ្ជាក់ថា ដើម្បីរួមចំណែកទ្រទ្រង់ដល់ព្រះសង្ឃ ក្នុងឱកាសចូលកាន់ព្រះវស្សា អស់កាលត្រីមាស អភិបាលខេត្ត ក៏បាននាំយកទេយ្យទាន និងគ្រឿងបរិក្ខា វេរប្រគេនព្រះសង្ឃទាំង ៤វត្ត ដោយក្នុង ១វត្តៗ មាន ៖ ទៀនព្រះវស្សា ១គូ ទេយ្យវត្ថុ ០១កញ្ចប់ ភ្ជាប់ថវិកា ១០ម៉ឺនរៀល ទឹកក្រូច០៥កេស តែ០៥កញ្ចប់ ស្ករស០៥គ.ក្រ ទឹកដោះគោខាប់០១កេស ទឹកសុទ្ធ០៥កេស អង្ករ១០០គ.ក្រ ត្រីខកំប៉ុង០៥យួរ ទឹកស៊ីអ៊ីវ០៥យួរ មី០១កេសធំ និងបច្ច័យ ១.២០០.០០០រៀល និងថវិកាលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ចំនួន៥០ដុល្លារ ផងដែរ ៕SRP

ភ្នំពេញ៖ មុខដឹកនាំកម្ពុជាសម្តេចនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា នៅរសៀលថ្ងៃទី២៨ ខែមិថុនាម្សិលមិញ បានអញ្ជើញសូត្រមន្តឡើងអគារវិមាន៧មករា ដែលជាទីស្នាក់ការកណ្តាលដ៏ថ្មីស្រឡាងរបស់ គណបក្សប្រជាជនកម្ពុជានៅតាមបណ្តោយមហាវិថីព្រះនរោត្តម។

ពិធីសូត្រមន្តចម្រើនព្រះបរិត្តឡើងអគារវិមាន៧មករា គឺប្រារព្ធធ្វើឡើងត្រូវចំនឹងថ្ងៃខួបលើកទី៦៩ នៃថ្ងៃកំណើតគណបក្សប្រជាជនកម្ពុជា(២៨ មិថុនា ១៩៥១- ២៨ មិថុនាឆ្នាំ២០២០)។ នៅក្នុងពិធីនេះក៏មានការអញ្ជើញចូលរួមពីមន្រ្តីកំពូល និងសមាជិកសមាជិការគណបក្សប្រជាជានកម្ពុជាសំខាន់ៗជាច្រើនរូបរួមទាំង សម្តេចអគ្គមហាពញ្ញាចក្រី ហេង សំរិន ប្រធានកិត្តិយសគណបក្ស និងសម្តេចវិបុលសេនាភក្តី សាយ ឈុំ អនុប្រធានគណបក្សប្រជាជនកម្ពុជា នៅជាន់ទី ១ និងជាន់ទី ៥ ដែលបានប្រព្រឹត្តិទៅតាមគន្លងទំនៀមទម្លាប់សាសាសនារបស់ខ្មែរយើង។

វិមាន៧ មករា ដែលជាទីស្នាក់ការកណ្តាលគណបក្សប្រជាជនកម្ពុជា ដ៏ធំស្កឹមស្កៃពោរពេញដោយប្រណិតភាពស្ថិតកណ្តាលរាជធានីភ្នំពេញក្នុងយុគ្គ សម័យនៃការអភិវឌ្ឍដ៏រុងរឿងនោះ ត្រូវបានសាងសង់រួចរាល់ជាស្ថាពរហើយ។

វិមាន៧ មករា ត្រូវបានបញ្ចុះបឋមសិលាសាងសង់នៅថ្ងៃទី១១ ខែវិច្ឆិកា ឆ្នាំ២០១៨ ហើយទើបនឹងសាងសង់រួចរាល់ក្នុងខែមិថុនា ឆ្នាំ២០២០នេះ។ អគារនេះមានបណ្ដោយ១៥០ម៉ែត្រ, ទទឹង៧៤ម៉ែត្រ។ កម្ពស់អគារគិតអំពីទីលានមហាជនខាងមុខរហូតទៅដល់កំពូលពេជ្រមានកម្ពស់ ៤៨ម៉ែត្រ។ ជាន់ផ្ទាល់ដីមានចំណតរថយន្តជាង ៥០០ចំណត និងទីធ្លារមុខអគារសម្រាប់មហាជនអាចចតរថយន្តបាន ៣០០គ្រឿង។ នៅជាន់ទី៥ខាងលើ គឺមានសាលសម្រាប់ប្រជុំជាលក្ខណៈមហាជន ឬក៏មិទ្ទិញបានដែលអាចដាក់ចំនួនមនុស្សបានជាង ៣,៤០០។ អគារនេះមានកម្ពស់ ៥ជាន់ ដោយមានសាលបដិសណ្ឋារកិច្ច ដែលមានក្រឡាផ្ទៃប្រមាណ ៣ពាន់ម៉ែត្រក្រឡា មានអាហារដ្ឋាននៅផ្នែកខាងត្បូងអគារ ដែលអាចដាក់មនុស្សបានចំនួន ១២០នាក់ក្នុងមួយពេល។

អគារនេះមានបន្ទប់សោតទស្សន៍ បន្ទប់កាត់សក់ បន្ទប់រដ្ឋបាល បន្ទប់សម្រាប់ជនពិការ បន្ទប់ឃ្លាំង បន្ទប់សម្រាប់កងការពារ បន្ទប់ប្រជុំគណៈប្រចាំការ និងបន្ទប់ប្រជុំអន្តរជាតិ ព្រមទាំងមានការិយាល័យសម្រាប់សម្រាក និងការិយាល័យសម្រាប់សម្ដេចប្រធានកិត្តិយស ការិយាល័យសម្រាប់ប្រឹក្សាគណៈអចិន្ត្រៃយ៍ ការិយាល័យដែលជាសាលសមាជិកអចិន្ត្រៃយ៍ និងបន្ទប់ទទួលទានអាហារ។ អគារនេះក៏មានសាលលៀងសាយភោជន៍ដាក់មនុស្សបាន១៥០នាក់ និងបន្ទប់រៀបចំអាហារជាដើម។

វត្តមានថ្មីនៃអគារទីស្នាក់ការកណ្តាលរបស់គណបក្សប្រជាជនកម្ពុជា នឹងក្លាយទៅជាកន្លែងប្រតិបត្តិការងារដ៏សំខាន់របស់ គណបក្សប្រជាជនកម្ពុជា ដែលជាគណបក្សដ៏ធំបំផុត ដែលកំពុងដឹកនាំរាជរដ្ឋាភិបាល និងទទួលខុសត្រូវខ្ពស់បំផុតចំពោះជោគវាសនាអនាគត់ប្រទេសជាតិ និងប្រជាពលរដ្ឋកម្ពុជា៕SRP

ខេត្តកំពង់ចាម៖ដេីម្បីលើកស្ទួយដល់ផលិតផលរបស់​ប្រជាកសិករខ្មែរយើង អាជ្ញាធរ​ខេត្តកំពង់ចាម​ បាន​រៀបចំ​ផ្សារ​ចុង​សប្ដាហ៍​ឡើង​ ក្នុង​គោលបំណង​ជួយ​ផ្សព្វផ្សាយ​ផលិតផល​កសិកម្ម​ ដេីម្បី​​លើក​កម្ពស់​ជីវភាព​គ្រួសារ​ប្រជាកសិករ​​ ក្នុង​ដំណាក់កាល​ទប់ស្កាត់​ការ​ឆ្លង​រីករាល​ដាល​នៃ​ជំងឺ​កូវីដ​១៩​ ផងដែរ​។

ក្នុង​ឱកាស​ដែល​លោក​ អ៊ុន​ចាន់ដា​ អភិបាលខេត្ត​កំពង់ចាម​ បាន​អញ្ជើញ​​ចុះ​ពិនិត្យ​ ​តាម​ស្តង់​ដែល​បាន​រៀបចំ​ឡើង​នៅ​មុខ​មន្ទីរ​ពាណិជ្ជកម្ម​ខេត្ត​កំពង់ចាម​ នាល្ងាច​ថ្ងៃទី២៧ ខែមិថុនា ឆ្នាំ២០២០នេះ​ លោក ឈាង បូរិន ប្រធានមន្ទីរពាណិជ្ជកម្មខេត្តកំពង់ចាម បានឲ្យដឹងថា ផ្សារចុងសប្តាហ៍ ដែល​មន្ទីរពាណិជ្ជកម្មខេត្ត​ បាន​រៀបចំ​ឡើង​ចាប់​ពី​ថ្ងៃ​សៅរិ៍​ ដល់​ថ្ងៃ​អាទិត្យ​ ទី​២៧-២៨​ ខែមិថុនា​ ឆ្នាំ​២០២០​ នៅ​មុខ​មន្ទីរ​ពាណិជ្ជកម្ម​ ស្រប​តាម​ដង​ផ្លូវ​មាត់​ទន្លេ​ ស្ថិត​នៅ​ក្នុង​ក្រុង​កំពង់ចាម​​ ជាគម្រោងជំរុញទីផ្សារសម្រាប់កសិកម្មខ្នាតតូច (AIMS) ។

លោក​ប្រធាន​មន្ទីរ​ពាណិជ្ជកម្ម​ បាន​បន្តថា ផ្សារចុងសប្ដាហ៍ គម្រោង អេម ខេត្តកំពង់ចាម​ បានចាប់ផ្តើមដំណើរការ នារសៀលថ្ងៃទី២៧ ខែមិថុនា ឆ្នាំ២០២០ ពីម៉ោង ៣​ រសៀល រហូតដល់ម៉ោង ៨យប់​ ដែល​ត្រូវ​ធ្វើ​ឡើង​ជា​រៀងរាល់​សប្តាហ៍​ ដោយ​ដំបូង​មានចំនួន​១១តូប និងមានមុខទំនិញប្រមាណជា៤០មុខ/ប្រភេទ រួមមានបន្លែ​ ផ្លែឈើ​ ពងមាន់ សាច់មាន់ មាន់អាំង អង្ករ ផលិតផលដំឡូងមី រួមទាំងផលិតផលកែច្នៃ ជាច្រើនមុខទៀត​ ដែល​ជា​ផលិតផល​ខ្មែរ​ក្នុង​ខេត្ត​កំពង់ចាម​។ លោក​បន្តថា​ តាមការប៉ាន់ប្រមាណចំពោះការលក់ដាច់ ប្រមាណ ១,៦៩២ គ.ក នៃផលិតផលដែលបានយកមកលក់ សរុបប្រមាណ ២,២៥២ គ.ក​ ដែល​មានអតិថិជន ទិញមុខទំនិញទាំងនោះ ប្រមាណ ៧០០ នាក់។

លោក ឈាង បូរិន បាន​អំពាវនាវ​ដល់​បងប្អូន​ប្រជាពលរដ្ឋ​សាធារណៈជន​ ឲ្យ​ចូលរួម​គាំទ្រ​ដល់គម្រោង​ផ្សារចុងសប្ដាហ៍ ដេីម្បី​លើកស្ទួយ​កម្រិត​ជីវភាព​​ ក៏​ដូចជា​ផលិតផលរបស់​ប្រជាកសិករខ្មែរយើង​ផងដែរ​៕SRP

ខេត្តសៀមរាប៖លោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានអះអាងថាហេដ្ឋារចនាសម្ព័ន្ធផ្លូវក្នុងក្រុងសៀមរាប ដល់ពេលដែលត្រូវសិក្សារៀបចំផែនការមេ ដើម្បីធ្វើការជួសជុស កែលម្អឡើងវិញ ដូចក្រុងព្រះសីហនុ ឱ្យសាកសមជាទីក្រុងទេសចរណ៍ ដើម្បីលើកស្ទួយមុខមាត់ប្រទេសជាតិ នៅលើឆាកអន្តរជាតិ តាមរយៈភ្ញៀវទេសចរណ៍អន្តរជាតិ។

លោករដ្ឋមន្ដ្រីបញ្ជាក់ផងដែរថា រាជរដ្ឋាភិបាល កំពុងសិក្សាស្វែងរកប្រភពថវិកាដើម្បីអនុវត្តគម្រោងហេដ្ឋារចនាសម្ព័ន្ធ ផ្លូវ៣៨ខ្សែនៅក្រុងសៀមរាប។ លោកថាខេត្តសៀមរាប ជាប៉ូលសេដ្ឋកិច្ច ក៏សំខាន់មួយរបស់កម្ពុជា និងជាតំបន់តភ្ជាប់ផ្លូវសេដ្ឋកិច្ចបាត់ដំបង-សៀមរាប។

បើតាមរដ្ឋមន្ដ្រីថាគម្រោងដែលក្រសួងកំពុងជួសជុលកែលម្អឡើងវិញគម្រោងផ្លូវវាងក្រុងរួមមាន៖ ផ្លូវខេត្តលេខ 2SR3 ប្រវែង ១៤,៩៥គ.ម បំបែកពីផ្លូវជាតិលេខ៦ ត្រង់គ.ម ៣០៨+៨៣០ (ចុងកៅស៊ូ) ដល់គ.ម ៣១៩+៦០០ (ទឹកវិល) ក្រាលកៅស៊ូ DBST និងផ្លូវខ្នារចាស់ (វិថីសម្តេច ជា ស៊ីម) ប្រវែង ៤,៦០គ.ម បន្តពីផ្លូវ ៧មករា ចាប់ពីផ្លូវលេខ 2SR3 ឆ្ពោះទៅកាន់ផ្លូវខេត្តលេខ 265F ប្រើប្រាស់ថវិកាឥណទាន ADB និងគម្រោងផ្លូវវាងខាងត្បូងក្រុងសៀមរាប ប្រើប្រាស់ឥណទានហិរញ្ញប្បទានសាធារណរដ្ឋកូរ៉េ EDCF មានប្រវែង៤៥គ.ម ចាប់ពីផ្លូវជាតិលេខ ៦ ត្រង់ចំណុច គ.ម២៩១ ដល់គ.ម ៣៣០ កំពុងសិក្សាជ្រើសរើសគន្លងខ្សែផ្លូវ និងសិក្សាសមិទ្ធិលទ្ធភាពគម្រោង។ ព្រមជាមួយគម្រោងប្រព័ន្ធចម្រោះទឹកកខ្វក់ក្នុងក្រុងសៀមរាបផងដែរ។

រដ្ឋមន្ត្រីអះអាងយ៉ាងដូច្នោះនៅថ្ងៃសៅរ៍ទី២៧ខែមិថុនាម្សិលមិញក្នុងពេលដឹកនាំកិច្ចប្រជុំពិភាក្សាជាមួយលោកទៀ សីហា អភិបាលខេត្តសៀមរាប លើការងារពាក់ព័ន្ធនឹងការសិក្សាគម្រោងអភិវឌ្ឍហេដ្ឋារចនាសម្ព័ន្ធក្នុងក្រុងសៀមរាប ខេត្តសៀមរាប។

លោកទៀ សីហា បានថ្លែងថាការងារជួសជុល និងកែលម្អផ្លូវចំនួន១០ខ្សែ ដោយរដ្ឋបាលខេត្តសៀមរាប រួមមាន៖ ផ្លូវតាអុច ផ្លូវនាគទេព ផ្លូវខ្នែងជន្លង់ ផ្លូវតុងសេង ផ្លូវអាទីហ្សង់ ផ្លូវគោកស្រិត ផ្លូវជាប់សូហ្វីតែល ផ្លូវពន្ធដារខេត្ត ផ្លូវកេសរកូល និងផ្លូវស្វាយមាស។

សូមជម្រាបថាកិច្ចប្រជុំនេះធ្វើឡើងដើម្បីពិនិត្យ និងសិក្សាទៅលើគម្រោងខ្សែផ្លូវមេចំនួន ៣៨ខ្សែ សរុបប្រវែងប្រមាណ ៩៨,៣៤គ.ម ក្នុងនោះ ផ្លូវពីរគន្លង មានប្រវែងប្រមាណ ៤៤គ.ម និងផ្លូវបួនគន្លង មានប្រវែងប្រមាណ ៥៤គ.ម លាតសន្ធឹងក្នុងសង្កាត់ទាំង១២ របស់ក្រុងសៀមរាប និងមួយផ្នែកនៃស្រុកបាគង ដែលស្ថិតក្នុងគម្រោងអភិវឌ្ឍហេដ្ឋរចនាសម្ព័ន្ធក្នុងក្រុងសៀមរាប។

គម្រោងសិក្សាផ្លូវទាំង ៣៨ខ្សែនេះ ជាបណ្តុំបណ្ដាញផ្លូវមេយ៉ាងប្រទាក់ក្រឡាក្នុងក្រុងសៀមរាប នឹងជួយសម្រួលដល់ការធ្វើដំណើររបស់ប្រជាពលរដ្ឋ ក៏ដូចជាភ្ញៀវទេសចរណ៍ក្នុងខេត្តសៀមរាប កាត់បន្ថយពេលវេលាក្នុងការដឹកជញ្ជូននិងចរាចរណ៍ទំនិញគ្រប់ប្រភេទ កាត់បន្ថយការកកស្ទះ និងគ្រោះថ្នាក់ចរាចរណ៍ ព្រមទាំងលើកកម្ពស់សោភណ្ឌភាពទីក្រុងសៀមរាបផងដែរ៕SRP

ខេត្តកំពង់ចាម៖លោកអ៊ុន ចាន់ដាអភិបាលខេត្តកំពង់ចាមនៅរសៀលថ្ងៃទី ២៧ខែមិថុនាម្សិលមិញ បានអញ្ជើញចុះ ពិនិត្យលទ្ធផលនៃការសាងសង់ សួនច្បារចាប់ពីចំណុចកំពង់ស្រឡាង ចាស់រហូតដល់មុខសណ្ឋាគារមេគង្គ។
បេី​យោង​តាម​កិច្ចសន្យា​ស្តីពី​ការ​ងារ​កសាង​កែលម្អ​សួន​ច្បារ​មាត់​ទន្លេ​ក្នុង​កំពង់ចាម​ ចុះ​ថ្ងៃ​ទី​២៨​ ខែមករា​ ឆ្នាំ​២០២០​កន្លងទៅ​ថ្មីៗ​នេះ​ ដែល​មក​ដល់​ពេល​នេះ​ ក្រុម​ជាង​បាន​បញ្ចប់​ដំណើរ​ការ​សាងសង់​សួនច្បារ​ តាម​ជំហាន​នីមួយៗជាស្ថាពរហើយ ដោយ​គោរព​បាន​ត្រឹម​ត្រូវ​តាម​គំរូ​ប្លង់​ និង​កិច្ចសន្យា​ ដែល​មាន​ការ​ងារ​មួយ​ចំនួន​ដូច​ជា​ ការ​ងារ​រៀបចំ​ខឿនច្រាំងទន្លេ​ ចាក់​ដី​ និង​រៀបចំ​ប្រព័ន្ធ​លូ​ ការងារ​រៀបចំ​ខឿន​ផ្លូវ​ និង​ចាក់​សាប​ (ផ្នែក​ក្រាល​ការ៉ូឡា​ជំនួស​ដោយ​ចាក់​សាប​ទាំង​អស់​)​ ការងារ​ដាំ​កូន​ឈើ​ ផ្កា​ ស្មៅ​ ការងារ​រៀបចំ​ប្រព័ន្ធ​ស្រោចស្រព​ ការងារ​រៀបចំ​បណ្តាញ​អគ្គិសនី​ បង្កោល​ភ្លេីង​ និង​អំពូល​ភ្លើង​ និង​ការ​ងារ​រៀបចំ​ និង​បំពាក់​សម្ភារសួនកុមារ។
ក្នុង​ការ​ចុះ​ពិនិត្យ​គម្រោង​​នេះ​ដែរ​ លោក​​ អ៊ុន​ ចាន់ដា​ ក៏បាន​ធ្វើ​ការ​ផ្តាំផ្ញេី​ដល់​ក្រុម​ហ៊ុន​អ្នក​ទទួល​ការ​ ធ្វេី​យ៉ាង​ណា​ត្រូវ​អនុវត្ត​ការងារ​នេះឲ្យ​បាន​ចប់​សព្វគ្រប់​តាម​កិច្ចសន្យា​ ដូច​ជា​ការ​ដាំ​ស្មៅ​លម្អ​ និង​ការ​ជួសជុល​កែលម្អ​នៅ​កន្លែង​ដែល​រងការ​ខូចខាត​មួយ​ចំនួន​ផងដែរ​៕SRP

ភ្នំពេញ៖ សម្តេចតេជោ ហ៊ុន សែន ប្រធានគណបក្ស ប្រជាជនកម្ពុជា និងជានាយករដ្ឋមន្រ្តីនៃព្រះរាជាណាចក្រកម្ពុជានៅរសៀលថ្ងៃស្អែកទី ២៨ ខែមិថុនា ឆ្នាំ២០២០ នឹងអញ្ជើញសូត្រមន្តចម្រើនព្រះបរិត្តឡើងវិមាន ៧មករា ទីស្នាក់ការកណ្តាលគណបក្សប្រជាជនកម្ពុជា នៅក្នុងរាជធានីភ្នំពេញ។

វិមានដ៏ធំស្កឹមស្កៃនេះគឺបង្ហាញពីសាមគ្គីភាព ជោគជ័យត្រចះត្រចង់ និងបារមីរឹងមាំនៃគណបក្សប្រជាជនកម្ពុជា ដែលជាគណបក្សដ៏ធំជាងគេបំផុតនៅក្នុងប្រទេសដែលតែងតែទទួលបានការបោះឆ្នោតគាំទ្រពីប្រជាពលរដ្ឋអោយបន្តដឹកនាំនិងអភិវឌ្ឍប្រទេសជាតិអោយកាន់តែរីកចម្រើនទៅមុខ។

អរគុណសន្តិភាព និង អរគុណសមាជិក សមាជិការ នៃគណបក្សប្រជាជនកម្ពុជា ព្រមទាំងបងប្អូនប្រជាពលរដ្ឋទាំងក្នុងនិងក្រៅប្រទេស ដែលបានចូលរួមក្នុងការកសាងប្រទេសជាតិមានសុខសន្តិភាព និងរីកចម្រើនមកទល់សព្វថ្ងៃ ៕SRP

ខេត្តសៀមរាប៖អាជ្ញាធរស្រុកសូទ្រនិគមបានឲ្យដឹងថាបុរសម្នាក់បានធ្វើអត្តឃាត លេបថ្នាំសម្លាប់ខ្លួន នៅម៉ោង០៧និង៤០នាទីព្រឹកមិញនេះ។ហេតុការណ៍បានកើតឡើងនៅចំណុចភូមិថ្នល់ចែក ឃុំសំរោង ស្រុកសូទ្រនិគម ខេត្តសៀមរាប។

អាជ្ញាធរបានបញ្ជាក់ថាជនរងគ្រោះឈ្មោះហែម ស៊ីណាង អាយុ២២ឆ្នាំ ទីលំនៅភូមិ ឃុំកើតហេតុខាងលើ។មូលហេតុជនរងគ្រោះអាចជាមនុស្សប្រសៃប្រសាទ សតិមិនប្រក្រតី ហើយបានលេបថ្នាំប្រសៃប្រសាទជាប្រចាំ លុះម៉ោង និងថ្ងៃកើតហេតុ ជនរងគ្រោះបានលេបថ្នាំប្រៃប្រសាទអស់មួយកំប៉ុង ហើយដេកស្លាប់នៅលើអង្រឹងក្រោមផ្ទះតែម្ដង។តាមការពិនិត្យធ្វើកោសល្យពិច័យរបស់មន្ត្រីជំនាញឃើញថាពុំមានស្លាកស្នាមអ្វី ពាក់ព័ន្ធនិងបទល្មើសឡើយ៕SRP

ខេត្តកំពង់ធំ៖សមត្ថកិច្ចអាវុធហត្ថស្រុកបារាយណ៍បានចាប់ខ្លួនជនសង្ស័យម្នាក់ករណីលួចម៉ូតូ។ហេតុការណ៍បានធ្វើឡើងនៅថ្ងៃទី២៧ខែមិថុនាឆ្នាំ២០២០វេលាម៉ោង៧ព្រឹកតាមបណ្តោយផ្លូវអាស៊ានវាងផ្សារកំពង់ថ្ម  ចំណុចមុខផ្ទះជនរងគ្រោះ ស្ថិតនៅភូមិដូង ឃុំបល្ល័ង្គស្រុកបារាយណ៍ខេត្តកំពង់ធំ។

លោកសេង សំ មេបញ្ជាការរងអាវុធហត្ថស្រុកបារាយណ៍បានឲ្យដឹងថា ម៉ូតូដែលជនសង្ស័យលួចម៉ាកឌ្រីមសង់C125ពណ៌ខ្មៅសេរី២០០៨ស្លាកលេខកំពង់ធំ 1A.7943។ម្ចាស់ម៉ូតូឈ្មោះប៉ិច  សុធា  ភេទប្រុសអាយុ៣៩ឆ្នាំមុខរបរជាគ្រូបង្រៀន  ទីលំនៅភូមិដូង  ឃុំបល្ល័ង្គ  ស្រុកបារាយណ៍  ខេត្តកំពង់ធំ។

ចំណែកជនសង្ស័យឈ្មោះសុខ  លើម  ភេទប្រុសអាយុ៣៣ឆ្នាំ  មុខរបរមិនពិត្យប្រាកដ  ទីលំនៅភូមិថ្នល់  ឃុំដា  ស្រុកកំពង់លែងខេត្តកំពង់ឆ្នាំង។

លោកប៉ិច សុធា ដែលជាម្ចាស់ម៉ូតូបានឲ្យដឹងថាមុនពេលកើតហេតុគាត់បានបញ្ចេញម៉ូតូពីក្នុងផ្ទះមកក្រៅហើយក៏រៀបចំផ្ទះបន្តិចបន្តួច។មួយសន្ទុះក្រោយមកក្រឡេកមើលម៉ូតូក៏ឃើញបុរសម្នាក់បណ្ដើរម៉ូតូរបស់គាត់ដល់ថ្នល់ជាតិ ហើយលោកក៏រត់តាមដេញទាន់ហើយរាយការណ៍ទៅកម្លាំងអាវុធហត្ថដែលនៅក្បែរផ្ទះគាត់តែម្ដង។សមត្ថកិច្ចបានឲ្យដឹងថាម៉ូតូប្រគល់ឲ្យម្ចាស់វិញ។ចំណែកជនសង្ស័យកសាងសំណុំរឿងទៅតាមផ្លូវច្បាប់៕SRP

ភ្នំពេញ៖នាយករដ្ឋមន្ត្រីហ៊ុន សែន នៅថ្ងៃសៅរ៍ទី២៧ខែមិថុនានេះបានបន្តបង្ហាញប្រាប់ប្រជាពលរដ្ឋតាមរយ:ទំព័រផេកហ្វេសប៊ុកឲ្យមានការប្រុងប្រយ័ត្នចំពោះជំងឺកូវីដ១៩។

សម្ដេចតេជោនាយករដ្ឋមន្ត្រីបានសរសេរថាសូមបងប្អូនប្រជាពលរដ្ឋមានការប្រុងប្រយ័ត្នខ្ពស់ហើយបន្តយកចិត្តទុកដាក់ថែរក្សាសុខភាពអោយបានល្អ ចៀសវាងការឆ្លងមេរោគកូវីដ-១៩។កម្ពុជាទោះបីមិនសូវទំនើបដូចគេ ក៏ប៉ុន្តែយើងបានខិតខំពង្រឹងការត្រួតពិនិត្យសុខភាពប្រជាពលរដ្ឋនិងអ្នកធ្វើដំណើរចេញចូលក្នុងប្រទេសគ្រប់ច្រកទាំងអស់ ទាំងតាមដែនគោកនិងតាមព្រលានយន្តហោះដែលគ្រប់ៗគ្នាត្រូវតែទទួលបានការពិនិត្យសុខភាព(Health Screening) ដោយអនុវត្តខ្ជាប់ខ្ជួនតាមការណែនាំរបស់ក្រសួងសុខាភិបាល។

នាយករដ្ឋមន្ត្រីបានបន្តថាចាប់តាំងពីថ្ងៃទី២០ខែឧសភាកន្លងទៅនេះ កម្ពុជាយើងបានរកឃើញអ្នកឆ្លងមេរោគកូវីដ១៩ ថ្មីចំនួន០៧នាក់ ហើយនៅថ្ងៃទី២៦ខែមិថុនាកន្លងមកនេះ គឺយើងរកឃើញអ្នកឆ្លងកូវីដថ្មី០៩នាក់ថែមទៀត ដែលពួកគាត់ទើបបានធ្វើដំណើរមកពីប្រទេសឥណ្ឌូនេស៊ី។ដូច្នេះសរុបមកកម្ពុជាយើងគឺមានចំនួនអ្នកឆ្លងមេរោគកូវីដ-១៩ ទាំងអស់សរុបចំនួន១៣៩នាក់ ហើយព្យាបាលជាសះស្បើយបាន១២៩នាក់ នឹងកំពុងសម្រាកព្យាបាលនៅមន្ទីរពេទ្យសូវៀតចំនួន១០នាក់។ ជំងឺកូវីដ-១៩ នៅតែជំងឺឆ្លងរាតត្បាតដ៏កាចសាហាវបំផុតដែលមិនទាន់មានថ្នាំព្យាបាលនៅឡើយ។ ថ្ងៃនេះតួលេខពីអង្គការសុខភាពពិភពលោក (WHO) បានបញ្ជាក់ថានៅក្នុងប្រទេសចំនួន ២១៦ គឺមានអ្នកឆ្លងមេរោគកូវីដ១៩ បានកើនឡើងរហូតដល់ 9,473,214 នាក់ និងមានអ្នកស្លាប់ 484,249 នាក់។

សម្ដេចបានបញ្ជាក់ថាដើម្បីសុខភាពល្អ ចៀសផុតពីជំងឺឆ្លងកូវីដ-១៩ និងជំងឺឆ្លងផ្សេងៗ សូមបងប្អូនរស់នៅមានអនាម័យល្អ ឧស្សាហ៍ដុសលាងសម្អាតដៃជាមួយសាប៊ូ អាល់កុល ឬចឹលសម្លាប់មេរោគ ហើយត្រូវតែពាក់ម៉ាសជាប្រចាំ។ កុំធ្វេសប្រហែស ឬមើលស្រាលជំងឺឆ្លងកូវីដ-១៩អោយសោះ។ ចំពោះទីកន្លែងដែលមានចំនួនមនុស្សប្រមូលផ្តុំច្រើនដូចជាទីផ្សារ ផ្សារទំនើប ហាងទំនិញលក់ដូរតាមផ្លូវតូចធំ ភោជនីយដ្ឋាន ហាងកាហ្វេ ផ្ទះសំណាក់ សណ្ឋាគារ ជាពិសេសក្លីនិក និងមន្ទីរពេទ្យរដ្ឋនិងឯកជន គឺត្រូវតែមានចឹល ទឹកអាល់កុល និងម៉ាសដើម្បីអោយពលរដ្ឋនិងអតិថិជនប្រើប្រាស់កុំអោយឆ្លងរោគពីម្នាក់ទៅម្នាក់។ ព្រោះជំងឺនេះ យើងមើលមិនឃើញទេ គឺការពារប្រសើរជាងព្យាបាល។សូមជូនពរបងប្អូនជនរួមជាតិបានរីករាយជួបជុំក្រុមគ្រួសារ និងចៀសផុតពីជំងឺឆ្លងកូវីដ-១៩ទាំងអស់គ្នា៕SRP

ខេត្តសៀមរាប៖សមត្ថកិច្ចស្រុកស្វាយលើ បានរាយការណ៍ថាយ៉ាងហោចណាស់មនុស្សម្នាក់បានស្លាប់ភ្លាមៗនៅកន្លែងកើតហេតុនិង០៣នាក់ទៀតរងរបួសករណីគ្រោះថ្នាក់ចរាចរណ៍។
ហេតុការណ៍ បានកើតឡើងនៅវេលាម៉ោង០៣និង៣០នាទីថ្ងៃសុក្រទី២៦ ខែមិថុនា ឆ្នាំ២០២០ នៅតាមបណ្ដោយផ្លូវលំគ្រួសក្រហម ត្រង់ចំណុច ភូមិបិតផ្ការ ឃុំស្វាយលើ ស្រុកស្វាយលើ ខេត្តសៀមរាប។
សមត្ថកិច្ចបានបញ្ជាក់ថាករណីគ្រោះថ្នាក់ចរាចរណ៍នេះរវាងម៉ូតូនិងម៉ូតូ រួមប៉ះនិងរថយន្តច្រាសទិសគ្នា៖
1- ម៉ូតូម៉ាកស្មាស់ពណ៌ខ្មៅស្លាកលេខ ភ្នំពេញ1U7172 អ្នកបើកបរឈ្មោះ សែម យ៉ូន ភេទ ប្រុសអាយុ33 ឆ្នាំ រស់នៅភូមិអន្លង់ធំ ឃុំខ្នងភ្នំ ស្រុកស្វាយលើ រងរបួសធ្ងន់ និងអ្នករួមដំណើរឈ្មោះ ជិន ខ្មៅ ភេទប្រុសអាយុ27 រស់នៅឃុំខ្នងភ្នំ ស្រុកស្វាយលើ បានស្លាប់នៅនឹងកន្លែងកើតហេតុ ដោយបុកប៉ះជាមួយម៉ូតូម៉ាកហុងដាពណ៌ខ្មៅ ស្លាកលេខគ្មាន បើកបរដោយឈ្មោះ ស្រី កុសល ភេទ ប្រុសអាយុ34ឆ្នាំនិងប្រពន្ធឈ្មោះ វ៉ា រាំ ភេទ ស្រីអាយុ33ឆ្នាំ រស់នៅភូមិត្រពាំងពពេល ឃុំតាសៀម ស្រុកស្វាយលើ របួសស្រាលទាំង2នាក់ បានប៉ះជាមួយនឹងរថយន្តម៉ាកHYUNDAI 25T ពណ៌ស សេរីឆ្នាំ2001 ពាក់ស្លាកលេខ កំពង់ធំ 3A2142 អ្នកបើកបររត់គេចខ្លួនបាត់។
ករណីនេះបណ្តាលឱ្យ ខូចខាតម៉ូតូ 02គ្រឿងស្រាល និងស្លាប់មនុស្សម្នាក់របួស3នាក់។
មូលហេតុអ្នកបើកបរម៉ូតូស្មាក់បើកបរវ៉ាជេងក្នុងផ្លូវកែង។
ក្រោយពេលកើតហេតុ កម្លាំងជំនាញបានចុះត្រួតពិនិត្យនិងបានបញ្ជូនអ្នករបួសទៅសង្រ្គោះនៅពេទ្យបង្អែកស្រុកសូត្រនិគម។ចំណែកវត្ថុតាងយករក្សាទុកនៅអធិការដ្ឋានស្រុកស្វាយលើ។ដោយឡែកសាកសពអោយក្រុមគ្រួសារយកទៅធ្វើបុណ្យតាមប្រពៃណី៕SRP