ខេត្តតាកែវ

លោក ផែង វណ្ណៈ បានបង្ហោះសារតាមបណ្ដាញសង្គមហ្វេសប៊ុករបស់ខ្លួនលាតត្រដាងអំពើពុករលួយ ប្រធានមន្ទីរសុរិយោដីខេត្ត​តាកែវ​ និងបក្សពួក។

ការលាតត្រដាងឲ្យនូវអំពើពុករលួយនៅថ្ងៃទី 15 ខែតុលា ឆ្នាំ 2025 នេះ តាម account facebook ផ្ទាល់ខ្លួន ហើយត្រូវបានចែកចាយជាសាធារណៈ។

នៅក្នុងសារលោកផែង វណ្ណៈ បានសរសេរថា៖ អ្នកសារព័ត៌មាន​ចាប់​បានចោរគប់គិតគ្នា​លួចធ្វេីប្លង់​គ្របលេីដីរដ្ឋ​ (ស្ទឹងស្លាគូរ)​ ស្ថិតនៅ​ភូមិ​ ត្រពាំងពោធិ​ ឃុំ​ ជាងទង​ ស្រុក​ ត្រាំកក់​ ខេត្ត​ តាកែវ​ ! ។

លោក ផែង វណ្ណៈបានបន្តថា រឿង​លោក​នួន​ សុធា​ ប្រធានមន្ទីរ​សូរិយោដី​ ខេត្ត​តាកែវ​ និង​ លោក​ លន់​ ហួត​ ប្រធាន​សូរិយោដី​ស្រុក​ ត្រាំកក់​ គប់គិតគ្នា​លួច​ធ្វេីប្លង់​គ្រប់លេីដីរដ្ឋអោយ​ឈ្មួញ​ឈ្មោះ​ លី​ សម្បត្តិ​ កំពុងបែក​ពាង​ប្រហុកហេីយ​។ បន្ទាប់​ពី​សារ​ព័ត៌មានផ្សាយ​គេសង្កេតឃេីញ​ អភិបាលខេត្ត​ និង​ ថ្នាក់ដឹកនាំ​ក្រសួង​ធនធានទឹក​ ចុះទៅ​ពិនិត្យ​ទីតាំង​ជាក់ស្ដែង​ ឃេីញថា​ ពិត​ជា​រំលោភយកដីរដ្ឋមែន​។ ហេតុនេះហេីយ​ ទេីប​អភិបាលខេត្ត​បញ្ជាអោយវាយ​កំទេចរបងដែលសង់​រំលោភយកដី​ស្ទឹងស្លាគូរ​ប្រវែង​ ១៤៨​ ម៉ែត្រ​ ចោលវិញ​។

លោកបានសរសេរបន្តថា នៅ​ខេត្ត​តាកែវ​ អ្នកណាក៏ដឹងថា​ នួន​ សុធា​ ប្រធាន​មន្ទីរ​សូរិយោដីខេត្ត​តាកែវ​ ជា​មេក្លោងពុករលួយដែរ​ អោយតែមានលុយអោយគាត់​ ដីរដ្ឋក៏នួន​សុធា​ធ្វេី​ប្លង់បានដែរ​។ ចំណែក​ លន់​ ហួត​ ជំនាញ​កសាង​ប្លង់ពីក្រោមទៅលេី​ភូតកុហកថ្នាក់លេីយកដីរដ្ឋមកធ្វេី​ជា​កម្មសិទ្ធិឯកជន​។

តេី​កំហុស​មហាលបែបនេះ​ តេី​មន្ត្រី​ទាំង២នាក់នេះ​គួរតម្លេីងតួនាទី​បន្ថែម​ ឬ​ យ៉ាងណា​ ? ពេល​វេលា​ងូតទឹកដុះក្អែលគ្រប់គ្រាន់ហេីយ​ ពេលនេះ​ល្មមដល់ពេល​វះកាត់ហេីយ​ មន្ត្រីលួចជាតិបែបនេះ​មិនគួរទុកទេ​។

ជុំវិញការបង្ហោះសារលាតត្រដាងនូវអំពើពុករលួយរបស់ប្រធានមន្ទីរសុរិយោដីខេត្តតាកែវនិងបក្សពួកបែបនេះ ទីភ្នាក់ងារសារព័ត៌មានសៀមរាប ប៉ុស្តិ៍មិនទាន់ទទួលបានការបំភ្លឺពីប្រធានមន្ទីរសុរិយោដីខេត្តតាកែវនៅឡើយទេរហូតដល់ម៉ោងផ្សាយនេះ៕SRP

ឯកឧត្តម វ៉ី សំណាង អភិបាលខេត្ត និង ជាប្រធានគណៈបញ្ជាការឯកភាពរដ្ឋបាល បានទុករយៈពេល ១៤ថ្ងៃ អោយរុះរើរបងចេញប្រវែង ១១៩ម៉ែត្រ ដែលសាងសង់ប៉ះពាល់ចំណី ស្ទឹងស្លាគូរ ស្រុកត្រាំកក់។

ការព្រមានទុកពេលនេះ បានធ្វើឡើងនៅរសៀលថ្ងៃអាទិត្យនេះ ក្នុងឱកាស ដឹកនាំ សហការី និងអាជ្ញាធរពាក់ព័ន្ធ បានចុះពិនិត្យមើល ជាក់ស្ដែងរបងថ្មមួយកន្លែង ដែលបានសាងសង់ប៉ះពាល់ចំណីស្ទឹងស្លាគូរ ប្រវែង ១១៩ម៉ែត្រ ស្ថិតនៅភូមិសាស្ត្រ ភូមិត្រពាំងពោធិ៍ ឃុំជាងទង ស្រុកត្រាំកក់ ខេត្តតាកែវ ដោយទុករយៈពេល ១៤ថ្ងៃ។

អភិបាលខេត្ត បានឱ្យដឹងថា របងថ្មដែលមានប្រវែង ១១៩ម៉ែត្រ គឺសាងសង់ដោយទុកចំណីស្ទឹង បួនម៉ែត្រ កន្លែងខ្លះ ១៨ម៉ែត្រ ដែលក្នុងច្បាប់បានកំណត់ឱ្យរក្សាទុកចំណីស្ទឹង ៣០ម៉ែត្រ (ម្ចាស់សំណង់បានបញ្ជាក់ថា គាត់សាងសង់តាមប័ណ្ណដី ដែលគាត់បានទិញ )។

ឯកឧត្តមអភិបាលខេត្ត បានបន្ថែមថា ចំណុចនេះគឺជា កំហុសរបស់ក្រុមមន្ត្រីបច្ចេកទេស ដែលមានសមត្ថកិច្ច នៅក្នុងការកសាងប័ណ្ណ (ក្រុមវាល ដែលរួមមាន៖ មេភូមិ មេឃុំ តំណាងចាស់ព្រឹទ្ធាចារ្យក្នុងភូមិ ភូមិបាលស្រុក គណៈកម្មាធិការរដ្ឋបាលថ្នាក់ស្រុក និងគណៈកម្មាធិការរដ្ឋបាលថ្នាក់ខេត្ត )។ វិធានការចំពោះមុខ ឯកឧត្តម អភិបាល បានឲ្យក្រុមហ៊ុន វាយរបងមួយចំណែក ដែលប៉ះពាល់ដល់ចំណីស្ទឹងប្រវែង ១១៩ម៉ែត្រ នោះចេញ៕SRP

នាយករដ្ឋមន្ត្រី៖ ហេតុអ្វីបានជារាជរដ្ឋាភិបាលចាត់ទុក “ផ្លូវ” ជាអាទិភាពគន្លឹះទី២?

នាយករដ្ឋមន្រ្តីនៃកម្ពុជា សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាលចាត់ទុក “ផ្លូវ” ជាអាទិភាពទី២ ក្នុងយុទ្ធសាស្រ្ដរបស់រាជរដ្ឋាភិបាលតាំងពីអាណត្តិមុនៗរហូតមកដល់អាណត្តិទី៧នេះ។ សម្ដេចធិបតីបានបន្ថែមថា ផ្លូវគឺជាសរសៃឈាមសេដ្ឋកិច្ច និងទេសចរណ៍ដ៏មានសក្តានុពល ដូច្នេះការរៀបចំតភ្ជាប់ផ្លូវ គឺជាយុទ្ធសាស្រ្ដសំខាន់ណាស់សម្រាប់ការពង្រាយសេដ្ឋកិច្ចនៅក្នុងសង្គមកម្ពុជា។ សម្ដេចធិបតីបានបន្តថា ជាក់ស្តែង ប្រសិនបើផ្លូវលេខ៤១ មិនបានពង្រីកទេ នោះក៏មិនមានអ្នកធ្វើដំណើរច្រើនដែរ។

សម្តេចធិបតី ហ៊ុន ម៉ាណែត បានបន្តទៀតថា ការតភ្ជាប់ផ្លូវ គឺជាការបើកផ្លូវ និងលើកកម្ពស់ជីវភាព សេដ្ឋកិច្ចរបស់ប្រជាពលរដ្ឋនៅមូលដ្ឋាន។ សម្ដេចថា មានផ្លូវមានសង្ឃឹម មានផ្លូវផ្ដល់ឱកាសដល់ពលរដ្ឋអាចទាញយកផលនៅមូលដ្ឋាន ដូច្នេះទើបរាជរដ្ឋាភិបាលបានចាត់ទុក “ផ្លូវ” ជាអាទិភាពទី២ នៅក្នុងយុទ្ធសាស្រ្ដជាតិ។

សម្តេចធិបតី ហ៊ុន ម៉ាណែត បានគូសបញ្ជាក់ថា ផ្លូវទាំង៣ខ្សែនេះ គឺជាសរសៃឈាមសេដ្ឋកិច្ច និងទេសចរណ៍ដ៏មានសក្តានុពល ដែលស្ថិតនៅក្នុងតំបន់ភាគកណ្តាល និងតំបន់ភាគនិរតីរបស់កម្ពុជា។ ក្នុងនោះ ផ្លូវជាតិលេខ៣១ ឆ្លងកាត់តាមភូមិសាស្ត្រខេត្តតាកែវ និងខេត្តកំពត ឯផ្លូវជាតិលេខ៣៣ បាននិងកំពុងបន្តជំរុញវឌ្ឍនភាពការងារលើគ្រប់វិស័យជាអាទិភាព និងបន្តសម្រេចបាននូវសមិទ្ធផលធំៗជាច្រើនបន្ថែមទៀត ជាពិសេសការបន្តទាក់ទាញការវិនិយោគ និងទេសចរណ៍ រួមទាំងការបន្តបង្កើនប្រសិទ្ធភាពនៃការអភិវឌ្ឍហេដ្ឋារចនាសម្ព័ន្ធដឹកជញ្ជូន និងការតភ្ជាប់ប្រព័ន្ធដឹកជញ្ជូនអន្តរមធ្យោបាយ និងឡូជីស្ទីក សំដៅរួមចំណែកដល់ការអភិវឌ្ឍសេដ្ឋកិច្ច-សង្គម និងទេសចរណ៍នៅកម្ពុជា។

សម្តេចធិបតី ហ៊ុន ម៉ាណែត បានថ្លែងបែបនេះនៅក្នុងឱកាសអញ្ជើញជាអធិបតី «សម្ពោធផ្លូវជាតិលេខ ៤១, ៣១, ៣៣ នៅស្រុកត្រាំកក់ ស្រុកជំគីរី ខេត្តតាកែវ» នៅថ្ងៃអង្គារនេះ៕SRP

សម្ដេច៖ តើមតិលើកឡើងថា “ខ្មែរកាន់តែក្រ” ជារឿងត្រឹមត្រូវដែរឬទេ?

សម្តេចបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានគូសបញ្ជាក់ថា មានមតិខ្លះលើកឡើងថា ប្រទេសកម្ពុជាកាន់តែក្រទៅៗ និងរីកចម្រើនតែរាជធានីភ្នំពេញ ដែលការលើកឡើងបែបនេះ មិនមែនជារឿងត្រឹមត្រូវនោះទេ។

ក្នុងពិធីសម្ពោធដាក់ឱ្យប្រើប្រាស់ជាផ្លូវការ ផ្លូវជាតិលេខ៣១ ផ្លូវជាតិលេខ៣៣ និងផ្លូវជាតិលេខ៤១ ប្រវែងសរុប ២០១,៣៨៥ គីឡូម៉ែត្រ ក្នុងខេត្តតាកែវ នាថ្ងៃទី២៩ ខែមេសា ឆ្នាំ២០២៥ សម្តេចបវរធិបតី ហ៊ុន ម៉ាណែត បានចោទជាសំណួរថា បើធៀបនឹងកាលពីទសវត្ស៨០ បើសិននិយាយថា ប្រទេសកម្ពុជាមិនមានការរីកចម្រើនទេ សូមចង្អុលបង្ហាញមកតើនៅកន្លែងណា?

សម្តេចបវរធិបតី ហ៊ុន ម៉ាណែត បានគូសបញ្ជាក់ថា ការលើកឡើងថា កម្ពុជារីកចម្រើនតែនៅរាជធានីភ្នំពេញ ឯភូមិ-ឃុំ គ្មានការអភិវឌ្ឍទេ នោះគឺមិនជឿនោះទេ ព្រោះថា ប្រជាពលរដ្ឋនៅមូលដ្ឋានជាក់ស្តែងដឹងច្បាស់ហើយពីការរីកចម្រើនបើប្រៀបធៀបពីអតីតកាល។

សម្តេចបវរធិបតី ហ៊ុន ម៉ាណែត ក៏បានគូសបញ្ជាក់ដែរថា ការរីកចម្រើននៅកម្ពុជា កើតឡើងនៅគ្រប់ទីកន្លែងទូទាំងប្រទេស សូម្បីតែនៅតាមទីជនបទ គឺស្ទើរតែគ្រប់ផ្ទះមានគោយន្ត ផ្ទះថ្ម ម៉ូតូ ឡាន ជាដើម ដែលកត្តាទាំងអស់នេះហើយឆ្លុះបញ្ចាំងពីការរីកចម្រើនជារួម៕SRP

លោកហ៊ុន ម៉ានី៖ អ្នកដឹកនាំជំនាន់មុនរកបានដោយលំបាកនូវសុខសន្តិភាពការបង្រួបបង្រួមជាតិ អ្នកជំនាន់ក្រោយមានកាតព្វកិច្ចបន្តថែរក្សាសន្តិភាព

ក្នុងឱកាសនៃពិធីសម្ពោធសមិទ្ធផលនានា ក្នុងវត្តអូរព័ទ្ធ ស្ថិតក្នុងភូមិស្រមោចហែ ឃុំចំបក់ ស្រុកបាទី ខេត្តតាកែវ លោកឧបនាយករដ្ឋមន្រ្តី ហ៊ុន ម៉ានី បានរម្លឹកដល់សមិទ្ធផលនៃសុខសន្តិភាព ដែលរកបានដោយលំបាក ក្រោមការលះបង់របស់អ្នកជំនាន់មុន ដោយឯកឧត្តម បានលើកឡើងថា ភាពសម្បូរសប្បាយរបស់ប្រជាជនកម្ពុជា បច្ចុប្បន្ន គឺជាសមិទ្ធផលនៃការលះបង់មិនអាចកាត់ថ្លៃបាន របស់វីរជនជំនាន់មុន ដែលបានលះបង់សាច់ស្រស់ឈាមស្រស់ និងការប្រថុយប្រថានយកជីវិតធ្វើជាដើមទុនក្នុងបុព្វហេតុសន្តិភាពដែលយើងមានសព្វថ្ងៃ។

លោកបានបន្តទៀតថា ក្នុងដំណើរបន្តស្វែងរកសន្តិភាព បង្រួបបង្រួមជាតិ ឯកភាពជាតិ និងផ្សះផ្សាជាតិ បញ្ចប់សង្គ្រាមនៅកម្ពុជា គឺមិនអាចបំភ្លេចបាននូវការលះបង់ដ៏ធំធេងក្នុងបុព្វហេតុជាតិមាតុភូមិរបស់អ្នកជំនាន់មុន ជាពិសេសសម្ដេចតេជោ ហ៊ុន សែន បានឡើយ ដោយលោកបានដាក់ជីវិតធ្វើជាដើមទុនក្នុងដំណើរសង្រ្គោះជីវិតប្រជាជនពីរបបប្រល័យពូជសាសន៍ ពោលគឺ សម្ដេចតេជោ គឺជាស្ថាបនិក និងប្រតិបត្តិករនយោបាយឈ្នះ!ឈ្នះ! រហូតនាំមកជូនជាតិនិងប្រជាជននូវសន្តិភាពនៅថ្ងៃទី២៩ ខែធ្នូ ឆ្នាំ១៩៩៨ និងការអភិវឌ្ឍជាបន្តបន្ទាប់រហូតមកដល់សព្វថ្ងៃ។

លោកឧបនាយករដ្ឋមន្រ្តី ក៏បានគូសរំលេចថា ពិតណាស់សមិទ្ធផលថ្ងៃនេះ គឺកើតចេញពីការដឹកនាំក្រោមបេសកកម្មធំៗចំនួន២ នៅក្នុងជីវិតរបស់សម្ដេចតេជោ គឺទី១៖ មិនឱ្យប្រជាពលរដ្ឋរងទុក្ខវេទនាដូចអតីតកាល ជាពិសេសដូចជារបបប្រល័យពូជសាសន៍ ប៉ុល ពត និងទី២៖ ត្រូវខិតខំប្រឹងប្រែងអភិវឌ្ឍប្រទេសជាតិឥតឈប់ឈរ៕SRP