ខេត្តកំពង់ចាម – Page 40

ខេត្តកំពង់ចាមអាជ្ញាធរសាលាស្រុកស្រីសន្ធរ នៅព្រឹកមិញនេះបានប្រកាសដាក់ឲ្យដេញថ្លៃ ចំនួន៤គម្រោង ដើម្បីស្ថាបនាផ្លូវបេតុងអាមេ ជាង១០០០ម៉ែត្រ។

គម្រោងការដេញថ្លៃក្រោមវត្តមានលោក ឡី មិច នាយករងរដ្ឋបាលសាលាខេត្តកំពង់ចាម និងលោក បែត វ៉េងឃីម អភិបាលរងស្រុកស្រីសន្ធរ ដោយមានការចូលរួមពីក្រុមការងារសម្របសម្រួលខេត្ត និងស្រុក ព្រមទាំងគណៈកម្មការលទ្ធកម្ម និងតំណាងក្រុមហ៊ុន អ្នកទទួលការ ជាច្រើនរូបផងដែរ។ ដោយគម្រោងនេះគឺមូលនិធិឃុំ-សង្កាត់ ឆ្នាំ២០២១ របស់គណៈកម្មការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ។

ឆ្លៀតក្នុងឱកាសនោះដែរ លោក ឡី មិច បានធ្វើការសំណូមពរដល់ក្រុមហ៊ុន អ្នកទទួលការទាំងអស់ ឲ្យចូលរួមជាមួយអាជ្ញាធរក្នុងការអនុវត្តវិធានការសុខាភិបាល ដេីម្បីទប់ស្កាត់ការឆ្លងរីករាលដាលនៃជំងឺកូវីដ-១៩ ជាពិសេសត្រូវអនុវត្តវិធានការ៣ការពារ ៣កុំ ក្នុងនោះត្រូវរក្សាគម្លាតសុវត្ថិភាពផ្ទាល់ខ្លួន និងពាក់ម៉ាសការពារឲ្យបានគ្រប់ៗគ្នា។ ដោយឡែកចំពោះការដេញដេញថ្លៃគម្រោងមូនិធិឃុំនេះដែរ ត្រូវឲ្យមានការប្រកួតប្រជែង ដោយភាពថ្លៃថ្នូរ និងកុំឲ្យមានការឃុបឃិតគ្នាប្រព្រឹត្តអំពើពុករលួយ ហេីយការសាងសង់សំណង់ ឲ្យត្រូវតាមបទដ្ឋានលក្ខណៈបច្ចេកទេស ប្រយោជន៍ដល់ការប្រើប្រាស់បានយូរអង្វែងផងដែរ។

លោកបែត វ៉េងឃីម អភិបាលរងស្រុកស្រីសន្ធរ បានឲ្យដឹងថា គម្រោងមូលនិធិឃុំដែលបានដាក់ឲ្យដេញថ្លៃខាងលើនេះ គឺមានផ្លូវចំនួន៤ខ្សែ ដែលត្រូវស្ថាបនា ជូនប្រជាពលរដ្ឋប្រើប្រាស់ ក្នុងនោះមាន ១-ឃុំផ្ទះកណ្តាល សាងសង់ផ្លូវបេតុងអាមេ ប្រវែង ៣៦៥ ម៉ែត្រ ទទឹង ៣ម៉ែត្រ នៅភូមិផ្ទះកណ្តាលក្រោម ភូមិចុងបឹង និងភូមិអូរលាវ។
២-ឃុំព្រែកពោធិ សាងសង់ផ្លូវបេតុងអាមេ ប្រវែង ៤០០ម៉ែត្រ ទទឹង ៤ម៉ែត្រ នៅភូមិប្រថ្នល់។
៣-ឃុំព្រែករំដេង សាងសង់ផ្លូវបេតុងអាមេ ប្រវែង ២៣១ម៉ែត្រ ទទឹង៣.៥ម៉ែត្រ នៅភូមិអូរឡេង។
៤-ឃុំឫស្សីស្រុក សាងសង់ផ្លូវបេតុងអាមេ ប្រវែង ២០០ម៉ែត្រ ទទឹង៤.៥ម៉ែត្រ នៅភូមិត្នោតលើ៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម នៅថ្ងៃពុធ ខែ ទី២២កញ្ញានេះ បានដឹកនាំមន្ត្រីរាជការ មន្ទីរអង្គភាពពាក់ព័ន្ធជុំវិញខេត្ត និងអាជ្ញាធរមូលដ្ឋាន រួមជាមួយពុទ្ធបរិស័ទជិតឆ្ងាយ ចូលរួមកាន់បិណ្ឌវេនទី១ ព្រមទាំងបាននាំយកគ្រឿង ឧបភោគ បរិភោគ ចង្ហាន់ រួមនឹងបច្ច័យមួយចំនួន វេរប្រគេនដល់ព្រះសង្ឃ ដែលគង់ចាំព្រះវស្សាអស់កាលត្រីមាស នៅវត្តជ័យគីរី (ភ្នំហាន់ជ័យ) ក្នុងស្រុកកំពង់សៀម ដេីម្បីឧទ្ទិសកុសលផលបុណ្យជូនទៅដល់បុព្វការីជនទាំងអស់ ដែលបានចាកឋានទៅកាន់លោកខាងមុខ រួមទាំងប្រជាពលរដ្ឋដែលបានស្លាប់បាត់បង់ជីវិតដោយជំងឺកូវីដ-១៩ ផងដែរ។

គួរបញ្ជាក់ថា ទេយ្យទាន និងបច្ច័យដែលវេរប្រគេនដល់ព្រះសង្ឃក្នុងឱកាសកាន់បិណ្ឌវេនទី១នេះរួមមាន បច្ច័យសរុប ចំនួន ៥លាន ៤សែនរៀល និង១០០ដុល្លារ អង្ករ ២០០គីឡូក្រាម មី ៥កេស ទឹកបរិសុទ្ធ ៥កេស ទឹកក្រូច ៥កេស ទឹកដោះគោខាប់ ១កេសធំ តែ ៥កញ្ចប់ ស្ករស ៥គីឡូ ចង្ហាន់ ៧ស្រាក់ និងផ្លែឈើ ៥កន្ត្រក ផងដែរ។ឆ្នាំនេះពិធីបុណ្យកាន់បិណ្ឌនិងភ្ជុំបិណ្ឌបានចាប់ផ្តើម ពីថ្ងៃទី២២ ដល់ថ្ងៃទី២៨ខែកញ្ញាដល់ថ្ងៃទី៦ ខែតុលា ដែលមានរយៈពេល១៤ថ្ងៃ សម្រាប់ការកាន់បិណ្ឌ និង១ថ្ងៃចុងក្រោយជាថ្ងៃភ្ជុំធំ៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម បានបញ្ជាឲ្យអាជ្ញាធរមូលដ្ឋាន សហការជាមួយមន្ទីរជំនាញ យកគ្រឿងចក្រកាយជាប្រឡាយ ហេីយដាក់លូរំដោះទឹកចេញ ដើម្បីបញ្ចៀសការខូចខាតដល់ហេដ្ឋារចនាសម្ព័ន្ធ និងលិចលង់ដល់លំនៅដ្ឋាន ក៏ដូចជាផលដំណាំរបស់ប្រជាពលរដ្ឋ។ ជាមួយនោះ រាល់មធ្យោបាយធ្វើដំណើរ គឺអាចនៅចរាចរណ៍បានដដែល ប៉ុន្តែមិនតម្រូវឲ្យបើកបរក្នុងល្បឿនលឿនឡេីយ ហើយក៏មានការសម្រួលចរាចរណ៍ ពីកងកម្លាំងសមត្ថកិច្ច ផងដែរ។

ការបញ្ជានេះនៅព្រឹកមិញនេះ ក្នុងឱកាសលោកដឹកនាំមន្ត្រី ចុះពិនិត្យ ការលិចលង់ដោយជំនន់ទឹកភ្លៀងនៅកំណាត់ផ្លូវជាតិលេខ៦ និងលេខ៧។

សូមជម្រាបថា កាលពីល្ងាចថ្ងៃទី២០ កញ្ញា កន្លងទៅនេះ ជំនន់ទឹកភ្លៀងបានជន់លិច ទីតាំងចំនួន៣កន្លែង គឺ៖ ១.នៅលើកំណាត់ផ្លូវជាតិលេខ៦ ស្ថិតនៅក្នុងស្រុកបាធាយ១កន្លែង។ ២.នៅលើកំណាត់ផ្លូវជាតិលេខ៧ ស្ថិតនៅក្នុងឃុំមៀន ស្រុកព្រៃឈរ ១កន្លែង ហើយទីតាំងទាំង ២កន្លែងនេះ ត្រូវបានស្ថាប័នជំនាញ សហការជាមួយអាជ្ញាធរមូលដ្ឋាន កាយជាប្រឡាយរំដោះទឹកចេញពីថ្នល់រួចរាល់ហើយ។ ដោយឡែកកន្លែងទី ៣ គឺនៅចំណុចលើកំណាត់ផ្លូវជាតិ លេខ៧ ស្ថិតក្នុងឃុំខ្វិតធំ ស្រុកព្រៃឈរ ក៏ព្រោះតែទឹកបានហូរកាត់ថ្នល់ រហូតមានជម្រៅត្រឹមជង្គង់។

ការលិចលង់បែបនេះ បន្ទាប់ពីភ្លៀងជាប់ៗគ្នា នាប៉ុន្មានថ្ងៃកន្លងមកនេះ បានធ្វើឲ្យភូមិសាស្ត្រខាងលើរងការលិចលង់៕SRP

ខេត្តកំពង់ចាម៖ខេត្តកំពង់ចាម បានប្រកាសបិទយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋ ដែលមានអាយុចាប់ពី១២ឆ្នាំឡើងទៅ។

ការប្រកាសបិទធ្វើឡើងនៅថ្ងៃទី២១ ខែកញ្ញា ព្រឹកមិញ នៅសាលាខេត្តកំពង់ចាម ក្រោមវត្តមានលោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងលោកអ៊ុន ចាន់ដា អភិបាលខេត្ត។

លោកអ៊ុន ចាន់ដា បានថ្លែងថា ជាលទ្ធផលនៃការអនុវត្តអនុវត្តតាមផែនការយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនដល់ប្រជាពលរដ្ឋដែលមានអាយុចាប់ពី១២ឆ្នាំឡើង សរុបចំនួន៦៨៥,៦២៤ នាក់ ស្មើនឹង ៨៤.៤២% នៃផែនការ ចំនួន ៨១២,១៣២នាក់។ ដោយយុទ្ធនាការកន្លងមកនេះ ចំពោះព្រះសង្ឃ មន្ត្រីរាជការ កងកម្លាំងប្រដាប់អាវុធ និងអតីតយុទ្ធជនក្នុងខេត្តកំពង់ចាម ទទួលបានការចាក់វ៉ាក់សាំងកូវីដ-១៩ ដោយឥតគិតថ្លៃជាបន្តបន្ទាប់ ចាប់ពីដេីមខែមិនា ឆ្នាំ២០២១។ ក្នុងនោះប្រជាពលរដ្ឋ ដែលមានអាយុចាប់ពី ១៨ឆ្នាំឡើង ទទួលបានការចាក់ចាប់ពីថ្ងៃទី ២៩ ខែមិថុនា ឆ្នាំ២០២១។ សម្រាប់កុមារ និងយុវវ័យ ដែលមានអាយុចាប់ពី១២ឆ្នាំ ឡើងដល់ក្រោម ១៨ឆ្នាំ ចាប់ពីថ្ងៃទី ៩ ខែសីហា ឆ្នាំ២០២១។

លោកអ៊ុន ចាន់ដា បានបញ្ជាក់ថា ការបិទបញ្ចប់យុទ្ធនាការចាក់វ៉ាក់សាំងនេះ គឺសំដៅតែទៅលើមនុស្ស ដែលមានអាយុចាប់ពី១២ឆ្នាំឡើងទៅប៉ុណ្ណោះ ចំពោះការចាក់វ៉ាក់សាំង សម្រាប់មនុស្សអាយុចាប់ពី ៦ឆ្នាំ ដល់ក្រោម១២ឆ្នាំ មិនទាន់ដល់ពេលដែលត្រូវបិទបញ្ចប់នោះឡើយ។ ក្នុងនោះរដ្ឋបាលខេត្តកំពង់ចាម បានសម្រេចគោរពស្នើសុំបើកដំណើរការកន្លែងចាក់វ៉ាក់សាំង ជាអចិន្ត្រៃយ៍ នៅតាមមន្ទីរពេទ្យបង្អែកចំនួន ៩កន្លែង ដើម្បីឲ្យប្រជាពលរដ្ឋ ដែលពុំទាន់ទទួលបានការចាក់វ៉ាក់សាំងកូវីដ-១៩ ជាពិសេសពលរដ្ឋ ចំណូលស្រុក និងអ្នកមានសុខភាពប្រសើរឡើងវិញ មកទទួលវ៉ាក់សាំង ក្រោយពីបិទបញ្ចប់យុទ្ធនាការ។

លោកជំទាវ ឱ វណ្ណឌីន បានឲ្យដឹងថា កំណេីនអត្រាចាក់វ៉ាក់សាំងកូវីដ-១៩ នៅកម្ពុជា គិតត្រឹមថ្ងៃទី២០ ខែកញ្ញា ឆ្នាំ២០២១ មាន ៩៨,៣៣% ធៀបជាមួយចំនួនប្រជាជនគោលដៅ ១០លាននាក់ និងលើកុមារ-យុវវ័យអាយុចាប់ពី ១២ឆ្នាំ ដល់ក្រោម ១៨ឆ្នាំ មាន ៨៨,១៦% ធៀបជាមួយចំនួនប្រជាជនគោលដៅ ១,៩៦៦,៩៣១ នាក់ និងលើកុមារអាយុចាប់ពី ៦ឆ្នាំ ដល់ក្រោម ១២ឆ្នាំ មាន ៣៧,៣៤% ធៀបជាមួយនឹងប្រជាជនគោលដៅ ១,៨៩៧, ៣៨២នាក់៕SRP

ខេត្តកំពង់ចាម៖លោកអ៊ុន ចាន់ដាអភិបាលខេត្តកំពង់ចាម បានប្រាប់ដល់ក្រុមយុវជនស្ម័គ្រចិត្តដើម្បីសហគមន៍ ឲ្យខិតខំអភិវឌ្ឍន៍ចំណេះដឹងបន្ថែមទៀត ដើម្បីបម្រើផលប្រយោជន៍ប្រជាពលរដ្ឋ និងសង្គមជាតិ។

ការលើកឡើងយ៉ាងដូច្នេះក្នុងឱកាសដែលក្រុមយុវជនស្ម័គ្រចិត្តដើម្បីសហគមន៍ ចូលជួបសំដែងការគួរសម នាព្រឹកមិញនៅសាលាខេត្តកំពង់ចាម។

លោកអភិបាលខេត្ត បានថ្លែងថា ក្រុមយុវជនស្ម័គ្រចិត្តដើម្បីសហគមន៍ ដែលបានបង្កើតឡើងនេះ គឺធ្វើកិច្ចការផ្តោតទៅលើវិស័យអប់រំ, សុខាភិបាល និងសហគ្រិន។ ក្នុងវិស័យទាំង ៣នេះដែរ អភិបាលខេត្ត មានចំណាប់អារម្មណ៍ខ្លាំងទៅលើវិស័យសហគ្រិន ដោយហេតុថា ការបង្កើតឲ្យមានសហគ្រិនភាព គឺជាការផ្ដល់ឱកាស ដល់យុវជនរបស់យើង ក្នុងការពង្រឹងសេដ្ឋកិច្ចគ្រួសារ និងសេដ្ឋកិច្ចក្នុងសហគមន៍ ដោយមិនប្រកាន់និន្នាការនយោបាយ។ ដូច្នេះហើយយុវជនរបស់យើង ចាំបាច់ត្រូវសិក្សាស្វែងយល់បន្ថែមទៀត ពីបណ្ដាសហគមន៍ផ្សេងៗ ក៏ដូចជាសមាគមចលនាយុវជនដូចគ្នា ដើម្បីដុសខាត់ខ្លួនឲ្យមានការរីកចម្រើន នូវចំណេះដឹង បង្កើនភាពខ្លាំងនៅក្នុងសហគមន៍ និងឈានទៅប្រកួតប្រជែងថ្នាក់ជាតិ ជាមួយក្រុមយុវជន នៃបណ្ដាខេត្តផ្សេងៗទៀតនាពេលឆាប់ៗខាងមុខផងដែ៕SRP

Sponsored

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម នៅព្រឹកមិញនេះ បានចុះពិនិត្យការរៀបចំដំឡើង ម៉ាស៊ីនផលិតអុកស៊ីសែន ដែលជាអំណោយរបស់លោកហ៊ុន ម៉ាណែត និងលោកជំទាវ នៅមន្ទីរពេទ្យខេត្តកំពង់ចាម។

លោកអ៊ុន ចាន់ដា បានជំរុញដល់ក្រុមការងារបច្ចេកទេស ដែលកំពុងដំឡើងម៉ាស៊ីនផលិតអុកស៊ីសែននេះ ធ្វើយ៉ាងណាឲ្យបានឆាប់រួចរាល់ ដើម្បីចាប់ផ្តើមដំណើរការផលិត អុកស៊ីសែនបម្រើឲ្យការព្យាបាលជំងឹកូវីដ នៅក្នុងខេត្តកំពង់ចាម។

អភិបាលខេត្ត បានបញ្ជាក់ថា បន្ទាប់ពពីដំឡើងម៉ាស៊ីននេះរួច ខេត្តកំពង់ចាម នឹងចាប់ផ្តើមដំណើរការផលិតខ្យល់អុកស៊ីសែន ដោយខ្លួនឯងហើយ គឺលែងទៅទិញ និងដឹកជញ្ជូននពីភ្នំពេញដែលជាមធ្យមក្នុងមួយថ្ងៃប្រមាណ ៣០០ បំពង់។ ព្រោះម៉ាស៊ីនសម្រាប់ផលិតអុកស៊ីសែន មួយគ្រឿងនេះ មានសមត្ថភាពផលិតអុកស៊ីសែនបានក្នុងមួយម៉ោងចំនួន ១០បំពង់ឯណោះ។

លោក យិន ស៊ីណាត ប្រធានបន្ទីរពេទ្យខេត្តកំពង់ចាម បានឲ្យដឹងថា ថ្មីៗនេះមន្ទីរពេទ្យខេត្ត បានរៀបចំផ្នែកមន្ទីរពិសោធន៍មួយដើម្បីពិនិត្យសំណាកវិភាគមេរោគកូវីដ-១៩ ដោយប្រើប្រាស់ម៉ាស៊ីនកម្រិតមធ្យម អាចពិនិត្យបានមួយថ្ងៃ ចំនួន ១០០ ករណី។ បច្ចុប្បន្នកំពុងធ្វើការសាកល្បង ដែលការលទ្ធផលទាំងអស់ ត្រូវបានយកទៅផ្ទៀងផ្ទាត់ នៅវិទ្យាស្ថានប៉ាស្ទ័រ និងវិទ្យាស្ថានសុខភាពសាធារណៈ មួយរយៈសិន រហូតមានលទ្ធផលដូចគ្នា ទើបមន្ទីរពិសោធន៍ខេត្តកំពង់ចាម នឹងមានលទ្ធភាព ចេញលទ្ធផលដោយផ្ទាល់តែម្ដង អំពីវីរូសជំងឺកូវីដ៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម បានណែនាំដល់លោកគ្រូ អ្នកគ្រូ និងសិស្សទាំងអស់ ឲ្យមានការយកចិត្តទុកដាក់ខ្ពស់អំពីបញ្ហាសុខភាព គឺត្រូវអនុវត្តឲ្យបានខ្ជាប់ខ្ជួននូវវិធានការ ៣ការពារ ៣កុំ ជាពិសេសត្រូវចេះការពារខ្លួនឯងរៀងៗខ្លួន។ ក្នុងករណីបេីមានអាការះមិនស្រួល ត្រូវប្រញាប់រាយការណ៍ទៅឲ្យលោកគ្រូ អ្នកគ្រូ ដើម្បីយកសំណាកធ្វើតេស្តរកមេរោគកូវីដ-១៩ ហើយធ្វេីការព្យាបាលឲ្យបានទាន់ពេលវេលា ដេីម្បីទប់ស្កាត់កុំឲ្យឆ្លងរាលរីកដាលទៅអ្នកដទៃទៀត។

លោកថ្លែងណែនាំយ៉ាងដូច្នេះ នៅថ្ងៃទី២០ ខែកញ្ញា ឆ្នាំ២០២១ ព្រឹកមិញនេះក្នុងឱកាសអញ្ជើញចុះពិនិត្យដំណើរការចូលរៀនវិញ របស់សិស្សានុសិស្ស នៅវិទ្យាល័យបឹងកុក និងវិទ្យាល័យដីដុះ ក្រុងកំពង់ចាម។

សូមជម្រាបថារដ្ឋបាលខេត្តកំពង់ចាម បានបើកឲ្យសិស្សានុសិស្សចូលរៀនវិញ ចែកចេញជាពីរតំណាក់កាល ដោយតំណាក់កាល *ទី១ ៖ ឲ្យសិស្សចាប់ពីថ្នាក់អនុវិទ្យាល័យឡើងទៅ និងសាលាពុទ្ធិក: ចូលរៀននៅថ្ងៃទី២០ ខែកញ្ញា និងតំណាក់កាល *ទី២ ៖ ឲ្យសិស្សថ្នាក់បឋមសិក្សា ចូលរៀននៅថ្ងៃទី១១ ខែតុលា ដែលការសម្រេចឲ្យសិស្សចាប់ពីអនុវិទ្យាល័យចូលរៀនមុននេះ ដោយសារពួកគាត់ បានចាក់វ៉ាក់សាំងការពារជំងឺកូវីដ១៩ រួចហើយ ម្យ៉ាងទៀត ពួកគាត់ ស្ថិតនៅក្នុងវ័យមួយ ដែលទទួលបានការអប់រំច្រើន អំពីវិធានការ ការពារ ការឆ្លងរាលដាជំងឺកូវីដ។ ជាមួយគ្នានោះ លោកគ្រូ អ្នកគ្រូ ត្រូវបានចាក់វ៉ាក់សាំងគ្រប់ចំនួន និងធ្វើការពិនិត្យសំណាករកមេរោគកូវីដផងដែរ៕SRP

ខេត្តសៀមរាប៖លោកអ៊ុន ចាន់ដា អភិបាលខេត្តកំពង់ចាម បានថ្លែងអំណរគុណយ៉ាងជ្រាលជ្រៅបំផុតចំពោះទឹកចិត្តប្រកបដោយសប្បុរស ពោរពេញទៅដោយសទ្ធាជ្រះថ្លារបស់អ្នកឧកញ៉ា ឡេង ណាវ៉ាត្រា និងក្រុមការងារ ដែលបានចំណាយថវិកា និងទ្រព្យសម្បត្តិផ្ទាល់ខ្លួន ក្នុងការជួយដល់សង្គមជាតិ តាមរយៈរដ្ឋបាលខេត្តកំពង់ចាម ដែលនេះគឺជាកាយវិការឆ្លុះបញ្ចាំងពីគុណធម៌ សប្បុរសធម៌ និងការចេះជួយគ្នាក្នុងគ្រាលំបាកទៀតផង។

អភិបាលខេត្តបានថ្លែងថា អំណោយមនុស្សធម៌របស់អ្នកឧកញ៉ា ឡេង ណាវ៉ាត្រា នាពេលនេះ គឺជាការចូលរួមចំណែកយ៉ាងសំខាន់ជាមួយ រាជរដ្ឋាភិបាល ក៏ដូចជាអាជ្ញាធខណៈសាលារៀនមួយចំនួនក្នុងខេត្តកំពង់ចាម ត្រូវបានបេីកឲ្យដំណេីរការឡេីងវិញ។

អភិបាលខេត្តកំពង់ចាម ថ្លែងអរគុណនៅព្រឹកមិញនេះ ក្នុងឱកាសទទួលអំណោយពីអ្នកឧកញ៉ា ឡេង ណាវ៉ាត្រា ដែលបានចូលរួមឧបត្ថម្ភ ថវិកា ចំនួន១០០,០០០,០០០រៀល ម៉ាស ២៥០,០០០ម៉ាស និងទឹកអាកុលចំនួន ៣០០០លីត្រ សម្រាប់ប្រេីប្រាស់ក្នុងយុទ្ធនាការ បង្ការ និងទប់ស្កាត់ជំងឺកូវីដ-១៩ ក្នុងភូមិសាស្ត្រខេត្តកំពង់ចាម៕SRP

ខេត្តកំពង់ចាម៖ក្រុមមន្ត្រីអន្តរាគមន៍បង្ក្រាបបទល្មើសចរាចរសត្វ និងផលិតផលមានដើមកំណើតពីសត្វ សហការជាមួយការិយាល័យផលិតកម្ម និងបសុព្យាបាលមន្ទីរកសិកម្មខេត្តកំពង់ចាម បានចាប់រថយន្ត១គ្រឿង ដឹកប្រហិតជិត ២០តោន នាំចូលពីប្រទេសថៃ។

ការបង្ក្រាបធ្វើឡើងនៅថ្ងៃទី១៨ ខែកញ្ញា ឆ្នាំ២០២១ ស្ថិតក្នុងភូមិបាធាយ ឃុំបាធាយ ស្រុកបាធាយ ខេត្តកំពង់ចាម។

មន្ត្រីជំនាញបានឲ្យដឹងថារថយន្តដឹកប្រហិតម៉ាក HYUNDAI ពណ៌ស ជាប្រភេទរថយន្តដឹកទំនិញចំណុះ២០តោន(V1) ពាក់ស្លាកលេខកំពង់ចាម ៣A ៩៩៨៣ បានដឹកផលិតផលកែច្នៃពីសត្វ (ប្រហិត)ចំនួនសរុប១៨,៤៥៤គីឡូក្រាម ( ហតដកសាច់ក្ដាម៧,៥០៤គីឡូក្រាម និងហតដកសាច់មាន់១០,៩៥០គីឡូក្រាម)។

មន្ត្រីបានបន្តថារថយន្តខាងលើនេះបាននាំចូលផលិតផលមានដើមកំណើតពីសត្វ(ប្រហិត) មកពីប្រទេសថៃ តាមច្រកអូរស្មាច់ សង្កាត់អូរស្មាច់ ខេត្តឧត្តរមានជ័យ ឆ្ពោះទៅចែកចាយនៅរាជធានីភ្នំពេញ ដោយពុំមានលិខិតអនុញ្ញាតអ្វីទាំងអស់។

បើតាមមន្ត្រីបានបញ្ជាក់ថាវត្ថុតាងបទល្មើសត្រូវបានយកទៅរក្សាទុកនៅទីតាំងចត្តាឡីស័កសត្វរបស់ឣគ្គនាយកដ្ឋានសុខភាពសត្វ និងផលិតកម្មសត្វ ដើម្បីចាត់ការទៅតាមនិតិវិធីច្បាប់៕SRP

ខេត្តកំពង់ចា៖លោកអ៊ុន ចាន់ដា អភិបាលខេត្ត និងជាប្រធានគណកម្មការចំពោះកិច្ច ចាក់វ៉ាក់សាំងក្នុងក្របខណ្ឌ ខេត្តកំពង់ចាម បានថ្លែងថា អ្វីដែលកូនៗ ក្មួយៗ រង់ចាំបានមកដល់ហេីយគឺ វ៉ាក់សាំងការពារជំងឺកូវីដ-១៩ ក្តីសង្ឃឹមរបស់កុមារ និងយុវ័យ គឺការទទួលបានវ៉ាក់សាំងបង្ការជំងឺកូវីដ-១៩ ដើម្បីមានឱកាសបានចូលសាលារៀនវិញ។

ថ្លែងយ៉ាងដូច្នេះក្នុងឱកាសបើកយុទ្ធនាការចាក់វ៉ាក់សាំងបង្ការជំងឺកូវីដ ១៩ ដល់កុមារ អាយុចាប់ពី ៦ឆ្នាំ ដល់ក្រោម ១២ឆ្នាំ នៅទូទាំងខេត្តកំពង់ចាម នៅព្រឹកមិញនេះ។

លោកអ៊ុន ចាន់ដា បានថ្លែងថា យុទ្ធនាការចាក់វ៉ាក់សាំង សម្រាប់កុមារអាយុ ៦ឆ្នាំ ដល់ក្រោម ១២ឆ្នាំ នាពេលនេះ សបញ្ជាក់អំពី ការយកចិត្តទុកដាក់ខ្ពស់ របស់សម្តេចហ៊ុន សែន នាយករដ្ឋមន្ត្រីកម្ពុជា មកលើចៅៗ កុមារ ដើម្បីជំរុញឲ្យមានការបើកសាលាបឋមសិក្សាឡើងវិញ នាពេលខាងមុខ ខណៈពេលដែល កុមារ អាយុចាប់ពី ១២ឆ្នាំ រហូតដល់ ១៨ឆ្នាំ បាននឹងកំពុងតែបន្តចាក់វ៉ាក់សាំងដូសបន្ត ហើយឈានទៅដល់ការបើកសាលាអនុវិទ្យាល័យ និងវិទ្យាល័យ ឡើងវិញផងដែរ។ ម្យ៉ាងវិញទៀត រដ្ឋបាលខេត្ត ក៏គ្រោងនឹងបើកឲ្យសិស្សថ្នាក់បឋម ចូលរៀនវិញនៅថ្ងៃទី១១ ខែតុលា ឆ្នាំ២០២១ ខាងមុខ ផងដែរ។ ដូច្នេះយុទ្ធនាការចាក់វ៉ាក់សាំង ដល់កុមារ ចាប់ពីអាយុ ៦ ដល់ក្រោម ១២ឆ្នាំ នាពេលនេះ វានឹងអាចបន្ស៊ីទៅនឹងផែនការ បើកឲ្យដំណើរការចូលរៀនឡើងវិញ នៅថ្នាក់កម្រិតបឋម ហើយក្មួយៗ ក៏អាចនឹងឈានចាក់វ៉ាក់សាំងម្ជុលទី ២ និងទទួលបានភាពសាំនៅក្នុងខ្លួន ដើម្បីការពារការឆ្លងរាលដាល នៃជំងឺកូវីដ-១៩ ផងដែរ។

អភិបាលខេត្តកំពង់ចាម បានធ្វើការអំពាវនាវ ដល់បងប្អូនប្រជាពលរដ្ឋ មាតាបិតា អាណាព្យាបាល និងកុមារ ដែលបានទទួលការចាក់វ៉ាក់សាំង រួចហើយ ត្រូវតែមានការប្រុងប្រយ័ត្នខ្ពស់បន្តអនុវត្ត តាមការណែនាំ របស់ក្រសួងសុខាភិបាល ការអនុវត្តវិធាន ៣ការពារ ៣កុំ ដើម្បីជៀសផុតពីជំងឺដ៏កាចសាហាវនេះ។

គួរបញ្ជាក់ថា យុទ្ធនាការចាក់វ៉ាក់សាំងបង្ការ ដល់កុមារអាយុចាប់ពី ៦ឆ្នាំ ដល់អាយុក្រោម ១២ឆ្នាំ នៅក្នុងខេត្តកំពង់ចាម សរុបមានចំនួន ១០៦.៥០១នាក់ ក្នុងនោះ រដ្ឋបាលខេត្តកំពង់ចាម បានរៀចំទីតាំងចាក់ នៅតាមបណ្តាក្រុង-ស្រុក ចំនួន ២៨កន្លែង។ ដោយបច្ចុប្បន្ននេះ នៅទូទាំងខេត្តកំពង់ចាម សម្រេចចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋមានអាយុចាប់ពី ១៨ឆ្នាំឡើង បានចំនួន ៥៧៩.៩៥២នាក់ ស្មើនឹង ៨២,៦៥% និងកុមារមានអាយុចាប់ពី ១២ឆ្នាំ ដល់ក្រោម ១៨ឆ្នាំ បានចំនួន ១០៧.៦៩៦នាក់ ស្មើនឹង ៩៧,៥៦%។

ក្នុងឱកាសនោះដែរ លោក អ៊ុន ចាន់ដា អមដំណើរដោយមន្ត្រីពាក់ព័ន្ធ ក៏បានអញ្ជើញពិនិត្យអាគារ សម្រាប់រៀបចំម៉ាស៊ីនផលិតអុកស៊ីសែន ដែលមានទីតាំង ស្ថិតនៅក្នុងមន្ទីរពេទ្យ ខេត្តកំពង់ចាម សម្រាប់បម្រើឲ្យការព្យាបាលជំងឺកូវីដ-១៩ ផងដែរ៕SRP