ខេត្តសៀមរាប – Page 226

ខេត្តសៀមរាប៖មនុស្ស០២នាក់បានស្លាប់ភ្លាមៗ ដោយគ្រោះថ្នាក់ចរាចណ៍។
ហេតុការណ៍បានកើតឡើងវេលាម៉ោង១៧និង០០នាទី ថ្ងៃទី៣០ ខែមេសា ឆ្នាំ២០២០ នៅចំណុចភូមិសាលាកកោះ ឃុំកៀនសង្កែ ស្រុកសូទ្រនិគម ខខេត្តសៀមរាប លើកំណាត់ផ្លូវជាតិលេខ៦។
សមត្ថកិច្ចថាករណីគ្រោះថ្នាក់ចរាចរណ៍នេះ បង្កដោយ រថយន្តម៉ាកហ៊ីយិនដាយ ពណ៌ស ពាកស្លាកលេខភ្នំពេញ3D1494 សណ្ដោងរ៉ឹម៉ក ពាក់ស្លាកលេខព្រះសីហនុ 4A2096 បើកបរដោយឈ្មោះប៊ន់ ថាន ភេទប្រុស អាយុ២៤ឆ្នាំ ទីលំនៅភូមិលេខ២ ឃុំគងជ័យ ស្រុកអូរាំងឪ ខេត្តត្បូងឃ្មុំ។ ដោយបានបុកម៉ូតូម៉ាក C125 ហុងដាឌ្រីម ពណ៌ខ្មៅ ពាក់ស្លាកលេខស្ទឹងត្រែង 1B0780 បណ្ដាលអោយ ស្លាប់មនុស្ស០២នាក់ ៖១/ ឈ្មោះហ៊ីង អាត ភេទប្រុស អាយុ៥៩ឆ្នាំ នៅភូមិជាំធំ ឃុំកោះស្លែង ស្រុកថាឡាបរិវ៉ាត់ ខេត្តស្ទឹងត្រែង ស្លាប់ (ជាអ្នកបើកបរម៉ូតូ)។
២/ឈ្មោះហ៊ីង សុខ ភេទប្រុស អាយុ៧០ឆ្នាំ នៅភូមិជាំធំ ឃុំកោះស្លែង ស្រុកថាឡាបរិវ៉ាត់ ខេត្តស្ទឹងត្រែង (ស្លាប់) ។
បច្ចុប្បន្នសាកសពប្រគល់អោយក្រុមគ្រួសារធ្វើបុណ្យតាមប្រពៃណី។ ចំណែករថយន្ត និងម៉ូតូរក្សាទុកកន្លែងនគរបាលស្រុកដើម្បីរងចាំការដោះស្រាយតាមផ្លូវច្បាប់៕SRP

ខេត្តសៀមរាប៖គណ:កម្មការប្រយុទ្ធនឹងជំងឺកូវីដ-១៩ រដ្ឋបាលខេត្តសៀមរាបនៅព្រឹកមិញនេះបានបើកកិច្ចប្រជុំក្រោមវត្តមានលោក ពិន ប្រាកដ អភិបាលរងខេត្ត និងជាអនុប្រធានគណ:កម្មការ។

លោក ពិន ប្រាកដ អភិបាលរងខេត្ត មានប្រសាសន៍ថា ដើម្បីចូលរួមអនុវត្តវិធានការបង្ការ និង ទប់ស្កាត់ការរីករាលដាលនៃជំងឺកូវីដ-១៩ នៅក្នុងខេត្តសៀមរាប ឱ្យកាន់តែមានប្រសិទ្ឋភាព រដ្ឋបាលខេត្ត មានវិធានការឆ្លើយតប ការបង្ការទប់ស្កាត់ និងការផ្សព្វផ្សាយ ដោយបន្តសម្របសម្រួលប្រចាំការ ទទួលដឹកជញ្ជូនប្រជាពលរដ្ឋខ្មែរដែលវិលត្រឡប់ពីក្រៅប្រទេស នៅតាមច្រកព្រំដែនកម្ពុជា-ថៃ ដូចជាច្រកអន្តរជាតិដូង ខេត្តបាត់ដំបង , ច្រកប៉ោយប៉ែត ខេត្តបន្ទាយមានជ័យ និងច្រកអូរស្មាច់ ខេត្តឧត្ដរមានជ័យ។
ដោយបានបញ្ជូនពួកគាត់មកកាន់ទីតាំងមណ្ឌលត្រួតពិនិត្យសុខភាពខេត្ត ស្ថិតនៅសាលាគរុកោសល្យ និងវិក្រឹតការខេត្ត ដើម្បីឱ្យក្រុមគ្រូពេទ្យពិនិត្យ និងតាមដានសុខភាពមុននឹងបញ្ជូនទៅទីតាំងចត្តាឡីស័ករយៈពេល ១៤ថ្ងៃ នៅតាមមូលដ្ឋានរបស់ខ្លួន ដោយគិតចាប់ពីថ្ងៃទី០៩ ខែមេសា ឆ្នាំ២០២០ រហូតដល់ថ្ងៃទី២៦ ខែមេសា ឆ្នាំ២០២០ មានចំនួន៥២២នាក់។

លោក ពិន ប្រាកដ មានប្រសាសន៍បន្ថែម រដ្ឋបាលខេត្ត បានរៀបចំទីតាំងចត្តាឡីស័ករយៈពេល ១៤ថ្ងៃ តាមការណែនាំរបស់ក្រសួងសុខាភិបាល នៅតាមបណ្ដាសាលារៀនក្នុងភូមិសាស្ត្រក្រុង-ស្រុក នៃខេត្តសៀមរាប សរុបចំនួន ១៣០ទីតាំងសម្រាប់ការស្នាក់នៅរបស់ប្រជាពលរដ្ឋខ្មែរដែលត្រឡប់ពីប្រទេសថៃ។ ជាមួយគ្នានេះដែរ រដ្ឋបាលខេត្ត រដ្ឋបាលក្រុង-ស្រុក មន្ទីរ អង្គភាព សាខាកាកបាទក្រហមកម្ពុជាខេត្ត សហភាពសហព័ន្ធយុវជនកម្ពុជាខេត្ត និងអ្នកពាក់ព័ន្ធ បានចុះសួរសុខទុក្ខ និងចែកអំណោយជាគ្រឿងឧបភោគបរិភោគ និងសម្ភារប្រើប្រាស់មួយចំនួន ដែលបានទទួលពីសប្បុរស ជន នានា ដូចជា ៖ អាកុល , ម៉ាស់ , សាប៊ូលាងដៃ , មី និងអង្ករ ជូនដល់បងប្អូនប្រជាពលរដ្ឋដែលកំពុងធ្វើចត្តាឡីស័ក ផងដែរ។

ក្នុងឱកាសនោះដែរ លោកអភិបាលរងខេត្តសៀមរាប បានជំរុញដល់ក្រុមការងារនៃគណ:កម្មការប្រយុទ្ធនឹងជំងឺកូវីដ-១៩ខេត្ត និង មន្ទីរ អង្គភាព ស្ថាប័នពាក់ព័ន្ឋ សូមឱ្យពង្រឹងកិច្ចសហការជាមួយមន្ទីរសុខាភិបាលខេត្ត ក្រុមការងារចត្តាឡីស័ក បន្តការតាមដាន ត្រួតពិនិត្យស្ថានភាពសុខភាព និងធ្វើតេស្តប្រជាពលរដ្ឋខ្មែរ ដែលទើបត្រឡប់មកពីធ្វើការនៅក្រៅប្រទេស បានរៀបចំចត្តាឡីស័ករយៈពេល ១៤ថ្ងៃ។ លោកថាត្រូវបន្តសម្របសម្រួល ទំនាក់ទំនងជាមួយរដ្ឋបាលខេត្តជាប់ព្រំដែនប្រទេសថៃ ដើម្បីដឹកជញ្ជូនប្រជាពលរដ្ឋខ្មែរទៅកាន់លំនៅដ្ឋានរបស់ពួកគាត់និងត្រូវបន្តជំរុញផ្សព្វផ្សាយអំពីវិធានការបង្ការទប់ស្កាត់នៃជំងឺកូវីដ-១៩ នៅក្នុងភូមិសាស្រ្តខេត្តសៀមរាប តាមគ្រប់រូបភាព និងចាក់ឧគ្ឃោសនសព្ទផ្សេងៗ ជាពិសេសភូមិ ឃុំ សង្កាត់ ដែលមានបងប្អូនប្រជាពលរដ្ឋច្រើនទើបវិលត្រឡប់មកពីប្រទេសថៃ និង ស្រាវជ្រាវបុគ្គលមួយចំនួន ដែលបានធ្វើការផ្សព្វផ្សាយព័ត៌មានមិនពិត ឬបំភ្លើស ដើម្បីយកមកអប់រំ ណែនាំ និងចាត់វិធានការតាមនីតិវិធីច្បាប់។
បើតាមលោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានឲ្យដឹងថា ស្ថានភាពជំងឺកូវីដ-១៩ នៅខេត្តសៀមរាប លទ្ធផលធ្វើតេស្តជនសង្ស័យរកជំងឺកូវីដ-១៩ បានចំនួន ២៩១ករណី មានស្រីចំនួន៩៦នាក់ ក្នុងនោះអវិជ្ជមានចំនួន ២៨៤នាក់ ស្រីមានចំនួន ៩៥នាក់ និង វិជ្ជមានចំនួន០៧ករណី ស្រីមានចំនួន០១នាក់ រួមមានជនជាតិខែ្មរចំនួន០៥នាក់ ស្រីមានចំនួន០១នាក់ និង ជនជាតិឥណ្ឌូនេស៊ីចំនួន ០២នាក់ ប៉ុន្តែមកទល់ពេលនេះ អុ្នកជំងឺកូវីដ-១៩ បានព្យាបាលជាសះស្បើយទំាងអស់ហើយ ហើយក៏បានអនុញ្ញាតឲ្យចេញពីមន្ទីរពេទ្យទាំងអស់គ្នាដែរ៕SRP

ខេត្តសៀមរាប៖ លោក ទៀ សីហា អភិបាលខេត្ត និងលោក អ៊ាន ឃុន តំណាងប្រធានក្រុមប្រឹក្សាខេត្ត នៅព្រឹកមិញបានដឹកនាំប្រតិភូខេត្ត ដោយមានអស់លោក លោកស្រីជាថ្នាក់ដឹកនាំមន្ទីរ មន្ត្រីរាជការ សហភាពសហព័ន្ធយុវជនកម្ពុជាខេត្ត និង កងកម្លាំងប្រដាប់អាវុធ អាជ្ញាធរក្រុង ស្រុក ឃុំសង្កាត់បានចូលរួមគោរពវិញ្ញាណក្ខន្ធ និងចូលរួមរំលែកទុក្ខក្រុមគ្រួសារនៃសព លោក ហង់ ហឿម ចៅសង្កាត់រងទី១ សង្កាត់ស្វាយដង្គំ និងជាអតីតប្រធានសមាគមក្រុមប្រឹក្សាក្រុង ស្រុក ឃុំ សង្កាត់ ខេត្តសៀមរាប ដែលបានទទួលមរណភាព ក្នុង ជម្មាយុ ៦៧ឆ្នាំ វេលាម៉ោង ១៦៖២០នាទីរសៀល នៅថ្ងៃទី២៧ ខែមេសា ឆ្នាំ២០២០ ដោយរោគាពាធ។

ក្នុងនោះដែរដែរ លោក ទៀ សីហា អភិបាលខេត្ត លោកអ៊ាន ឃុន ព្រមទាំងគណៈអភិបាលខេត្ត អស់លោក លោកស្រីថ្នាក់ដឹកនាំ និង មន្ត្រីរាជការ ក៏បានធ្វើការបូជាទៀនធូក ដើមី្បឧទ្ទិសជូនដល់ដួងវិញ្ញាណក្ខន្ធ លោក ហង់ ហឿម សូមឲ្យលោកបានទៅកាន់សុខគតិភពថ្មី ព្រមទាំងបែរងាកក្រោយឲ្យពរជ័យដល់ក្រុមគ្រួសារ បងប្អូន កូនចៅ និង ថ្នាក់ដឹកនាំគ្រប់ជាន់ថ្នាក់ ក្នុងជួរមន្ត្រីរាជការ ឲ្យទទួលនូវសេចក្តីសុខ និងឲ្យស្គាល់នូវតែសុខសន្តិភាព សុភមង្គល និង ការអភិវឌ្ឍប្រទេសជាតិលើគ្រប់វិស័យ៕SRP

ខេត្តសៀមរាបលោក ទៀ សីហា អភិបាលខេត្តសៀមរាប នៅព្រឹកមិញនេះបានដឹកនាំក្រុមការងាររដ្ឋបាលខេត្ត ក្រុង សង្កាត់ មេភូមិស្ទឹងថ្មីចុះទៅពិនិត្យផ្លូវកដប ត្រង់ចំណុចផ្លូវភូមិស្ទឹងថ្មី ប្រសព្វនឹងផ្លូវសម្តេចទេពវង្ស( ផ្លូវផ្សារញ៉ែ ទៅស្តុបឡាប៉េ ទល់មុខផ្សារទំនេីបចៅសាំងហុក) ដេីម្បីពិនិត្យមេីលផ្ទះ និងសំយ៉ាបផ្ទះដែលប៉ះពាល់លេីដីចំណីផ្លូវរបស់ប្រជាពលរដ្ឋចំនួនពីរគ្រួសារដែលបានឯកភាពឲ្យក្រុមការងារចម្រុះរដ្ឋបាលខេត្តរុះរើ ដេីម្បីពង្រីកផ្លូវឲ្យបានធំទូលាយ និងងាយស្រួលក្នុងការធ្វេីចរាចរណ៍របស់បងប្អូនប្រជាពលរដ្ឋដែលរស់នៅក្នុងក្រុងសៀមរាប ក៏ដូចជាការចូលរួមបញ្ជៀសការកកស្ទះចរាចរផងដែរ។
ក្នុងឱកាសនោះដែរ អភិបាលខេត្តសៀមរាប បានកោតសរសើរ និងថ្លែងអំណរគុណយ៉ាងជ្រាលជ្រៅដល់បងប្អូនប្រជាពលរដ្ឋទាំង ២គ្រួសារដែលមានឈ្មោះ ទៀវ សុខវី និងឈ្មោះ ម៉ៅ សុខលី ស្ថិតនៅភូមិស្ទឹងថ្មីតាមបណ្តោយផ្លូវពីកេសរកូល ទៅប្រសព្វនឹងផ្លូវសម្តេចទេពវង្ស( ផ្លូវផ្សារញ៉ែ ទៅស្តុបឡាប៉េ ទល់មុខផ្សារទំនេីបចៅសាំងហុក) សង្កាត់ស្វាយដង្គំ ក្រុងសៀមរាប ដែលបានយល់ព្រមឲ្យក្រុមការងារចម្រុះរដ្ឋបាលខេត្តរុះរើផ្ទះ និងសំយ៉ាបផ្ទះដែលប៉ះពាល់ដីចំណីផ្លូវដោយស្ម័គ្រចិត្ត។ ដោយរដ្ឋបាលខេត្តបាននិងកំពុងដំណើរការអនុវត្តគម្រោងសាងសង់ផ្លូវភូមិស្ទឹងថ្មី សង្កាត់ស្វាយដង្គំ ដោយមានការពង្រីកផ្លូវតាមទំហំដែលបានកំណត់ដោយ គណៈកម្មការរដ្ឋបាលខេត្ត។

នេះគឺជាសកម្មភាពជាគំរូមួយដែលបានចូលរួមនៅក្នុងសកម្មភាពអភិវឌ្ឍក្រុង។ ក្នុងនាមអាជ្ញាធរខេត្តសៀមរាបសូមស្នើដល់បងប្អូនប្រជាពលរដ្ឋ ទាំងអស់ចូលរួមសហការលេីការងារអភិវឌ្ឍន៍នានានៅក្នុងខេត្តសៀមរាបទាំងមូលផងដែរ។

សូមបញ្ជាក់ថាទិសដៅការងារឆ្នាំ២០២០ ក៏បានកំណត់យកការងារបើកផ្លូវ និងការសាងសង់ផ្លូវ ជាការងារអាទិភាពតាមរយៈសេចក្តីសម្រេចសន្និបាតបូកសរុបលទ្ធផលការងារប្រចាំឆ្នាំ២០១៩ និងលើកទិសដៅការងារឆ្នាំ២០២០ របស់រដ្ឋបាលខេត្ត៕SRP

Sponsored

ខេត្តសៀមរាប៖លោកជំទាវទាងអេងទៀ សីហា អនុប្រធានសាខាកាកបាទក្រហមកម្ពុជាខេត្តសៀមរាប នៅថ្ងៃទី២៨ខែមេសាម្សិលមិញ បានចុះចែកអំណោយដល់គ្រួសាររងគ្រោះធម្មជាតិ ដោយខ្យល់កន្ត្រាក់ និង រន្ទះបាញ់ស្លាប់ ចំនួន១៦គ្រួសារ នៅបរិវេណសាលាឃុំវ៉ារិន ស្រុកវ៉ារិន។

នាឱកាសនោះដែរ លោកជំទាវទាងអេង ទៀ សីហា បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាលោក ទៀ សីហា ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នា ការនយោបាយណាមួយឡើយ។

នៅក្នុងបេសកកម្មមនុស្សធម៌ថ្នាក់ដឹកនាំសាខាកាកបាទក្រហមកម្ពុជាខេត្តសៀមរាប អំពាវនាវឲ្យប្រជាពលរដ្ឋសហគមន៍ មានការអត់ធ្មត់ចូលរួមទាំងអស់គ្នា ប្រយុទ្ធប្រឆាំងការឆ្លងរាលដាលនៃជម្ងឺកូវីដ១៩ ដែលជាសោកនាដកម្មដំបូងនៃការផ្ទុះជម្ងឺផ្លូវដង្ហើមថ្មីកូវីត១៩ គឺជាមេរៀនសម្រាប់ពិភពលោក ព្រោះតែមិនបានប្រយ័ត្នក្នុងការធ្វើដំណើរ ដែលជាមូលហេតុនៃការចម្លង។ ការអប់រំស្តីពីការបង្កាទប់ស្កាត់ ការឆ្លងរីករាលដាលនៃជម្ងឺកូវីដ-១៩ ពីមនុស្សម្នាក់ទៅមនុស្សម្នាក់ ពីមនុស្សម្នាក់ចូលទៅកាន់គ្រួសាររបស់ខ្លួន និងពីគ្រួសារមួយរីកសាយភាយទៅក្នុងសហគមន៍ បានក្លាយជាប្រធានបទយ៉ាងសំខាន់បំផុត ត្រូវបានដាក់បញ្ជូលទៅក្នុងបេសកកម្មមនុស្សធម៌ នៃចលនាកាកបាទក្រហមកម្ពុជា។

លោកជំទាវក៏បានសម្តែងនូវការសោកស្ដាយចំពោះការខូចខាតផ្ទះសំបែង ទ្រព្យសម្បត្តិ រហូតដល់មានការបាត់បង់អាយុជីវិតសមាជិកគ្រួសារទៀត ដែលនេះជាគ្រោះមហន្តរាយដោយធម្មជាតិ គ្មាននរណាម្នាក់ចង់ជួបប្រទះឡើយ។

លោកជំទាវបន្តថា ថ្វីត្បិតតែអំណោយមនុស្សធម៌ដែលបាននាំយកមកចែកជូនបងប្អូននាពេលនេះ មានចំនួនតិចតួចក្ដី មិនសមល្មមនឹងការខាតបង់របស់បងប្អូន តែក៏អាចជួយសម្រាលទុក្ខបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា -មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា” ។

ក្នុងឱកាសនោះលោកជំទាវក៏បានអំពាវនាវសូមឲ្យបងប្អូនប្រជាពលរដ្ឋទាំងអស់ ត្រូវតែចេះការពារខ្លួនពីជម្ងឺរលាកផ្លូវដង្ហើម កូវិដ១៩ ដោយមេត្តាកុំឲ្យមានការប្រមូលផ្ដុំជួបជុំជាក្រុម និង ត្រូវអនុវត្តន៍តាមបទបញ្ជារបស់រាជរដ្ឋាភិបាល និងវិធាននានារបស់ក្រសួងសុខភិបាល ។ ជាមួយគ្នានេះ ក្រុមប្រតិបត្តិសាខា ក៏ធ្វើការផ្សព្វផ្សាយ និងចែកខិត្តប័ណ្ណដែលទទួលបានពីទីស្នាក់ការកណ្ដាលកាកបាទក្រហមកម្ពុជា ស្ដីពី “របៀបលាងសម្អាតដៃជាមួយទឹក និងសាប៊ូ ដើម្បីបង្ការ ជម្ងឺកូវីដ១៩” និង “វិធីកាត់បន្ថយហានិភ័យពីការឆ្លង ជម្ងឺកូវីដ១៩” ផងដែរ ។

អំណោយមនុស្សធម៌ផ្តល់ជូនបងប្អូនរងគ្រោះ ក្នុងមួយគ្រួសារទទួលបានឃីត១កញ្ចប់ កន្ទេល១ អាវយឺត២ មី១កេស ត្រីខ១យួរ អង្ករ៣០គីឡូក្រាម គ្រួសាររលំផ្ទះ ទទួលបានស័ង្កសី ១៦សន្លឹក និងថវិកា២សែនរៀល គ្រួសាររបើកដំបូល ទទួលបានស័ង្កសី ១០សន្លឹក ស័ង្កសី ១០សន្លឹក និង គ្រួសាររន្ទះបាញ់ស្លាប់ បន្ថែមថវិកា ១លានរៀល៕SRP

ខេត្តសៀមរាប៖អាជ្ញាធរខេត្តនៅថ្ងៃម្សិលមិញបានកិច្ចប្រជុំពិភាក្សាពាក់ព័ន្ធនឹងការងារបញ្ហាការជីករណ្តៅយកអាចម៍ដីទីលានចាក់សំរាមបណ្តោះអាសន្នសម្រាប់ឆ្នាំ២០២០។
កិច្ចប្រជុំនេះ បានសម្រេចលទ្ធផលដូចខាងក្រោម៖
០១.ក្រុមហ៊ុនត្រូវបំពេញកាតព្វកិច្ចក្នុងការចាក់អាចម៍ដីរៀបចំហេដ្ឋារចនាសម្ព័ន្ធក្នុងបរិវេណទីលានចាក់សំរាមចាស់ឲ្យបានរួចរាល់ មុនយកអាចម៍ដីចេញពីទីលានចាក់សំរាម និងត្រូវបំពេញតាមនីតិវិធីច្បាប់ លិខិតបទដ្ឋានគតិយុត្តដែលមានការពាក់ព័ន្ធនឹងការជីករណ្តៅដែលបានស្នើសុំ
០២.ក្រុមហ៊ុនត្រូវរៀបចំផែនការ និងរាយការណ៍អំពីបញ្ហាប្រឈមដែលក្រុមហ៊ុនជួបប្រទះ ដើម្បីរាយការណ៍មករដ្ឋបាលខេត្ត បានជ្រាប និងពិនិត្យលើកិច្ចការទាំងនោះ ព្រមទំាងពិនិត្យ ណែនាំបុគ្គលិករបស់ខ្លួនឲ្យមានការប្រុងប្រយ័ត្ន និងយកទុកដាក់ក្នុងការប្រមូលសំរាម និងដឹកជញ្ជូនសំរាមឲ្យបានស្អាត និងជាប្រចាំ
០៣.រដ្ឋបាលខេត្ត នឹងរៀបចំក្រុមការងារ ដើម្បីពិនិត្យ តាមដាន ការប្រមូលសំរាម និងការងារផ្សេងៗ ពាក់ព័ន្ធនឹងបញ្ហាសំរាមក្នុងក្រុងសៀមរាប។
ការប្រជុំនេះក្រោមវត្តមានលោក ង៉ាន់ ភិរុណ អភិបាលរងខេត្ត តំណាងលោក ទៀ សីហា អភិបាលខេត្តសៀមរាប ស្ដីពីបញ្ហាការជីករណ្តៅយកអាចម៍ដីទីលានចាក់សំរាមបណ្តោះអាសន្នសម្រាប់ឆ្នាំ២០២០ របស់ក្រុមហ៊ុន ហ្កាអុីយ៉ា ដោយមានការអញ្ជេីញចូលរួមពីសំណាក់លោក នាយករងរដ្ឋបាលសាលាខេត្ត លោក ប្រធានមន្ទីរបរិស្ថានខេត្ត លោក ប្រធានមន្ទីររ៉ែ និងថាមពលខេត្ត លោក នាយកទីចាត់ការអន្តរវិស័យសាលាខេត្ត លោក នាយកទីចាត់ការផែនការ និងវិនិយោគសាលាខេត្ត តំណាងសាលាក្រុងសៀមរាប សាលាស្រុកប្រាសាទបាគង មន្រ្តីជំនាញពាក់ព័ន្ធនានា និងតំណាងក្រុមហ៊ុន ហ្កាអុីយ៉ា ផងដែរ៕SRP

ខេត្តសៀមរាប៖ជុំវិញបុរសម្នាក់ មានមុខរបរបុគ្គលិកក្រុងហ៊ុនអនឡាញ ត្រូវខ្សែភ្លើងឆក់ ស្លាប់នៅក្រុងសៀមរាប នៅថ្ងៃម្សិលមិញ ករណីនេះ នគរបាលប៉ុស្ដិ៍ស្វាយដង្គំ បានបញ្ជាក់ថាសពជនរងគ្រោះឈ្មោះ ឡេង ប៊ុនឡុងភេទប្រុសអាយុ៣១ឆ្នាំជនជាតិខ្មែរមានមុខរបបុគ្គលិកក្រុងហ៊ុនអនឡាញ ស្នាក់នៅភូមិ០៤សង្កាត់ចុងឃ្នៀកក្រុងខេត្តសៀមរាប។

នគរបាលបានបញ្ជាក់ថាការពិនិត្យសាកសព យើងបានបង្វិលមើលជុំវិញខ្លួនសាកសពឃើញមានស្នាមនៅលើបាតដៃខាងស្តាំមានស្នាមឆេះខ្លោចដែលមានទំហំ២×៣សង់ទីម៉ែត្រ។នៅលើខ្លួនសាកសពមានស្នាមរបួសក្រោយពីឆក់ចរន្តអគ្គិសនីយធ្លាក់ពីលើបង្គោលខ្សែភ្លើងដែលមានកំពស់៤ម៉ែត្រ៥០មកចំវត្ថុរឹងបណ្តាលអោយមានស្នាមរបួលនៅលើចញ្ចើមមានប្រែង៦សង់ទីម៉ែត្រមមានជម្រៅ២សង់ទីម៉ែត្រដល់ឆ្អឹង។នៅលើប្របកភ្នែកខាងឆ្វេងមានស្នាមទ្រុតមានទំហំ២×២សង់ទីម៉ែត្រ។នៅលើបបូរមាត់មានស្នាមរយះសាច់ប្រវែង៥សង់ទីម៉ែត្រ។នៅលើប្រអប់ជើងខាងឆ្វេងមានស្នាមរយះស្បែកប្រវែង១០សង់ទីម៉ែត្រ។

មន្ត្រីប៉ុស្ដិ៍ស្វាយដង្គំបានបញ្ជាក់ទៀតថាតាមការសាកសួរបំភ្លឺពីរអ្នកលាងម៉ូតូនៅជិតនឹងបង្គោលភ្លើងកន្លែងកើតហេតុបានអោយដឹងថា ជនរងគ្រោះបានយកជណ្ដើរដាក់នឹងបង្គោលភ្លើងដែលមានកម្ពស់ប្រហែលជា៥ទៅ៦ម៉ែត្រហើយទាញខ្សែទម្លាក់មកខាងក្រោម។ មួយសន្ទុះក្រោយមកក៏ឮសំឡេងស្រែកអុះមើលទៅឃើញដៃអោបសសរបង្គោលខ្សែភ្លើងហើយក៍ធ្លាក់មកដី។ ពួកក្រុមគាត់មានគ្នា៣នាក់បានដឹកយកទៅមន្ទីរពេទ្យ។

បើតាមនគរបាលសន្និដ្ឋានថាជនរងគ្រោះស្លាប់ដោយសារ(ឆក់ចរន្តអគ្គិសនី)។សាកសពបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។ សូមបញ្ជាក់ថាហេតុការណ៍នេះបានកើតឡើងនៅវេលាម៉ោង១៥និង០០

ថ្ងៃទី២៧ខែមេសាឆ្នាំ២០២០ ស្ថិតនៅបង្គោលខ្សែភ្លើងនៅខាងជើងខារាអូខេហ្វីលីញតាមបណ្តោយផ្លូវថ្នល់ក្នុងភូមិសាលាកន្សែងសង្កាត់ស្វាយដង្គំក្រុងខេត្តសៀមរាប។

ពាក់ព័ន្ធករណីនេះគេនៅមិនទាន់ដឹងថាក្រុមគ្រួសារជនរងគ្រោះបានប្ដឹងក្រុមហ៊ុនអនឡាញដើម្បីទាមទារសំណងដែរឬយ៉ាងណានោះទេ ខណ:ក្រុមគ្រួសារកំពុងធ្វើបុណ្យជូនជនរងគ្រោះនៅឡើយ។ ទោះយ៉ាងណាបណ្ដាញសារព័ត៌មាន សៀមរាបប៉ុស្ដិ៍ នៅមិនទាន់ទទួលបានការបកស្រាយបំភ្លឺពីក្រុមហ៊ុនអនឡាញ នៅឡើយទេ រហូតមកដល់នៅរសៀលថ្ងៃនេះ៕SRP

ខេត្តសៀមរាប៖អង្គការ IOM (International Organization for Migration) ប្រចាំខេត្តសៀមរាប បាននាំយកនូវខោអាវការពារមេរោគ ចំនួន៥០០, វែនតាពេទ្យការពារមេរោគចំនួន១៥, ម៉ាសN95 ចំនួន ២៦០ប្រអប់ នឹងសម្ភារៈបរិក្ខាពេទ្យ មួយចំនួនទៀត ផ្តល់ជូនដល់រដ្ឋបាលខេត្តសៀមរាប។
ការប្រគល់នេះក្រោមវត្តមានលោក ពិន ប្រាកដ អភិបាលរងខេត្ត តំណាងលោក ទៀ សីហា អភិបាលខេត្តសៀមរាប ធ្វើនៅថ្ងៃទី២៧ខែមេសា ឆ្នាំ២០២០។
លោក ផល ឧត្តមសម្បត្តិ ដែរជាអ្នកសម្របសម្រួលរបស់អង្គការ IOM បានបញ្ជាក់ថា ក្នុងការឧបត្ថម្ភនេះគឺមានគោលបំណងដើម្បី ចូលរួមជាមួយរាជរដ្ឋាភិបាលកម្ពុជា ក៏ដូចរដ្ឋបាលខេត្តសៀមរាប ក្នុងយុទ្ធនាការបង្ការ និងទប់ស្កាត់ការរីករាតត្បាតនៃជម្ងឺកូវីដ១៩។
ឆ្លៀតក្នុងឱកាសនោះដែរលោក ពិន ប្រាកដ ក្នុងនាមអាជ្ញាធរខេត្ត បានធ្វើការថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏សប្បុរស របស់អង្គការ IOM (International Organization for Migration) ក៏ដូចជាបណ្តាសប្បុរសជននានា ក្នុងពេលកន្លងមក ដែលបានបរិច្ចាគនូវសម្ភារៈបរិក្ខាមួយចំនួន ចូលរួមជាមួយរាជរដ្ឋាភិបាល ក៏ដូចអាជ្ញាធរខេត្ត ក្នុងការប្រយុទ្ធប្រឆាំងនឹងជម្ងឺឆ្លង កូវីដ១៩នៅកម្ពុជា ។
លោកអភិបាលរងបានបន្តទៀតថា កាយវិការដ៏សប្បុរសធម៌នេះ គឺជាចំណែកមួយក្នុងការពង្រឹងស្មារតីប្រយុទ្ធប្រឆាំងនិងជម្ងឺកូវីដ១៩ នៅកម្ពុជា ហើយកន្លងមកនេះក៏មានបណ្តាក្រុមហ៊ុន បងប្អូនសប្បុរសជនទាំងក្នុង និង ក្រៅប្រទេស បានផ្តល់ជាសម្ភារៈបរិក្ខាពេទ្យ គ្រឿងឧបភោគបរិភោគ ដល់រដ្ឋបាលខេត្តសៀមរាប ដើមី្បយកទៅបម្រើការងារយុទ្ធនាការប្រយុទ្ធ ប្រឆាំងនឹងជម្ងឺកូវិដ១៩ នៅគ្រប់បណ្តាក្រុង ស្រុកទាំង១២របស់ខេត្តសៀមរាប។
ដោយអំណោយទាំងនេះរដ្ឋបាលខេត្ត និងធ្វើការបែងចែកជូនដល់គណៈកម្មការ អនុគណៈកម្មការប្រយុទ្ធប្រឆាំងជម្ងឺកូវីដ១៩ខេត្ត ក្រុង ស្រុក ដើម្បីបំពេញប្រតិបត្តិការរបស់ខ្លួន ក្នុងការប្រយុទ្ធប្រឆាំងនិងជម្ងឺឆ្លងកូវិដ១៩នេះ៕SRP